فاكرين فيلم "سور الصين العظيم".. وهنيدى واللى عمله هناك، حاجات بـ تظهر وحاجات بـ تختفى، إحنا افتكرنا الفيلم أول ما شوفنا برنامج "ونهو حول العالم".. الفكرة بتاعته مش جديدة.. هو واحد عاوز يلف العالم علشان يحكى لنا حكايات كثيرة من بلاد كثير.. حاجة كده زى "رامز حول العالم".. بس الجديد بقى هو "ونهو".

هو برنامج ترفيهي سياحي من تقديم الكوميديان الكوري الأردني الشهير "ونهو تشونغ"، هـ نسافر مع ونهو علشان نتعرف على أجمل المناظر السياحية والطبيعية المشهورة حول العالم شرقًا وغربًا.. حاجة كده ممتعة الصراحة.

شخصية ونهو جذابة وبجد بـ يضحك والبرنامج دمه خفيف جدًا بـ يروح حتت كثير حول العالم، وبـ يرسم لك خريطة كده يخليك عاوز تزور كل المدن دى.. وبـ يقف عند أهم المعالم اللى فيها مرة يزور معبد ومرة يزور حديقة أو شلال أو نهر.. من سيريلانكا لحد مصر.

ومش عاوزين نقول لكم بقى على حلقة مصر دى كانت تحفة.. بـ ياكل فى أماكن شعبية وبـ ينزل الحارات والأماكن اللى مختفية دى.. وبـ يتكلم عامية زينا وده طبعًا لوحده بـ يجيب ضحك كثير جدًا.. بـ يخليك عاوز تقعد معاه أصلًا علشان تضحك.

الجديد فى البرنامج أنه مش مجرد واحد بـ يعدى على الأماكن علشان يقول لك اتبنى سنة كام ولا حصل إيه فيه من تواريخ.. الموضوع أنه بالكوميديا بـ يقابل الناس ويقعد معاهم على الأرض وفى القهوة وعلى الشط وفى الجناين والمعابد والمساجد.. بـ يروح بك كل حتة علشان تفهم إيه الموضوع وتحس قد إيه العالم جميل.

وهى دى قيمة البرنامج أنك تشوف العالم وأنت قاعد أمام الشاشة بتاعتك وتتعرف على ناس جديدة وحكايات غريبة ومدينة بـ تصحى من الصبح علشان ترقص عادى يعنى.. وناس عندها تقاليد فى شرب الشاى وناس ثانية وبيوت غريبة وناطحات سحاب وأكواخ كمان يعنى من كل حاجة هـ تلاقيه.. هـ يعرفك على أنواع المترو فى هونج كونج مثلًا.. وكمان هـ تعرف أنواع الزهور المختلفة، وفيه كلام عن الرقص المحتشم واللى بـ يسموه الرقص بالأيدى.. وهـ تزور عاصمة الدول اللى بـ يروحها علشان تتعرف على الاقتصاد والسياحة والسياسة اللى هناك.. هـ تعيش لحظات رعب كأنه بـ يمشى على السما لما بـ يركب المترو فى هونج كونج وبـ يطلع أعلى ناطحة سحاب هناك.. وهـ تحس بالضحك وهو بـ يصور فى الشارع مع الناس البسيطة.

أجمل حاجة فى البرنامج أنه خرج من فكرة الستوديو والصور والتقارير، ونهو بـ ينزل يعمل تقاريره ويذيعها فى الشارع والبرنامج كله خارجى وكله مع الناس والطبيعة.. وصراحة متكلف كثير، كفاية فريق العمل بتاعه اللى لف العالم علشان يصور كل ده.