مراكز ثقافية فن وثقافة in Cairo, Egypt

فن وثقافة

إبداع: مركز ثقافي ومكتبة في وسط البلد
اصدرت في: 07/09/2016

هو مكتبة ومركز ثقافي، اسمه إبداع، فيه كل الأنشطة الثقافية واللي هنتكلم عنها بالتفصيل، وكمان لازم نقول إن إبداع دار نشر وبقى لها فترة طويلة في السوق، فلما دار نشر تقرر تعمل مكتبة ده معناه إنهم عاوزين ينتشروا ويبقوا موجودين في الحياة بشكل كبير، ودي خطوة تحسب لهم، لكن الأول لازم نتكلم عن حاجتين مهمين. الحاجتين الحاجة الأولي سؤال وجودي مرتبط بالثقافة بيقول "هو ليه كل المكتبات والمراكز متجمعة في وسط البلد؟" ويمكن الإجابة على السؤال ده كانت في قعدات المثقفين وحاولوا يجاوبوا عن السؤال ده ويوصلوا لإجابة مختصرها، وسط البلد بقت تجمع للمثقفين والثقافة والناس اتعودت على كده، كمان وسط البلد مركز مهم وكل الناس سهل يوصلوا له. السؤال الثاني بقى إيه هي مواصفات المركز الثقافي؟ قبل ما تعمل مركز ثقافي لازم يكون عندك مجموعة مواصفات مهمة تاخد بالك منها، ومن المواصفات دي إن المكان يكون كبير وواسع وتهويته حلوة، موقعه متميز، قريب من المترو والمواصلات قدر الإمكان، فيه مكان قريب لركنة العربية، ويكون دور أرضي أو أول بالكتير غير كده لأ، علشان الناس مبتحبش السلالم، بتحب تنزل من العربية توصل على طول لمكانها، كمان لما بيبقى دور أرضي على شارع رئيسي ده بيخلي المكان متشاف كويس. إبداع مركز إبداع الثقافي بقى قرر يخبط المواصفات دي، واختار منها إنه يكون قريب من المترو، وهو بالفعل قريب من محطة المترو بشكل كبير، لكنه في الدور الثاني فوق مطهم "بجة" ويمكن ده خلى عدد من الكتاب يتكلموا عن اختيار المكان وإن اللي رايح هناك في الغالب الناس اللي عايزة تاكل مش اللي عايزة تقرأ، لكن لما دخلنا المكان لاقيناه مكان جيد وفيه عرض لعدد كبير من الكتب، وبيحاول كمان يعمل مهرجانات وأشكال جديدة للدعاية عن طريق الخصومات اللي وصلت لحد 50% لمجموعة كتب..كمان بيعملوا ورش عمل وجلسات قراءة، ويمكن حفلات التوقيع أكثر حاجة بقت تميز المكان هناك، علشان بتتعمل مجانًا وده خلى فيه ناس تقرر تروح تعمل حفلات التوقيع هناك، وكمان عاملين نادى إبداع للقراءة، وكل ده بيتم جوه المكان وهو مش واسع قوي، لكنه محاولة جيدة لنشر الثقافة في زمن بقى صعب يعترف بها.

...

قلمي: مكتبة جديدة في وسط البلد
اصدرت في: 25/08/2016

مش كل مكان ينفع نقول عليه مركز ثقافي، ومش كل مكان ينفع نقول عليه مكتبة، ومع كثرة المكتبات دلوقتي بنلاقي كتير منهم بيقدم خدمات مختلفة، وبيعمل مهرجانات كمان، علشان ينطلقوا ويجيبوا جمهور، لكن أكثر حاجة بقت تميز المكتبات والمراكز الثقافية دلوقتي هي ورش العمل والفقرات الفنية اللي بتقدمها. زمان: زمان كنا لما نسمع عن فقرة فنية أو حفلة أو ندوة في مكان ما نجري على طول لهناك، وده كان راجع لقلة الأماكن اللي بتقدم ده، ولما ظهرت ساقية الصاوي ومن بعدها الجريك كامبس، والمكتبات المنتشرة في أماكن كثيرة، عرفنا أن موضوع الثقافة بقى سهمه عالي في الحياة الثقافية المصرية، وده عمل حاجتين مهمين. الأولى هي انتشار فكرة الندوات والحفلات والمنافسة، والثانية كانت بالسلب، وهي ظهور ناس كتير وكتب لا ترقي للمستوى الثقافي العالي اللى كلنا نفسنا فيه. المكتبة: مكتبة قلمي بقى مش جديدة على السوق، لإنها تابعة لمكتبة ودار نشر قلمي اللي في دبي، وصراحة لما سمعنا كده قولنا خلاص إحنا هنروح ونلاقي مكان محصلش ، لإنه شايل اسم مؤسسة موجودة في الإمارات، وروحنا بس أول ما رحنا اتصدمنا، وده راجع لسببين برضه، الأول إن المكان آه في وسط البلد لكنه مكان مش معروف لكل الناس، هو شارع متفرع من محمد محمود والمكتبة هناك مالهاش دعاية قوي، والسبب الثاني إن المكان مش كبير، مع أنها بتقدم خدمات ثقافية، لكن القاعة هناك بتكفي لـ 15 شخص بالكثير، وده صعب جدًا لما تيجي تعمل حفل توقيع مثلًا، والحاجة اللي مش عاجبانا كمان إن المكتبة لها رسم دخول 10 جنيه شامل مشروب، طيب السؤال هنا لو أنا جاي حفل توقيع وعايز أشترى كتاب ب 20 جنيه، ولاقيت فيه رسم دخول للمكتبة، هدخل وماشتريش الكتاب ولا همشي وأبقى اشتري الكتاب من مكان ثاني ولا أعمل إيه؟ أعتقد ده سؤال مهم لازم أصحاب المكتبة يقفوا عليه ويعرفوه، من المهم بقى إننا نقول أن المكتبة معمولة حلو من جوه والكراسي بتاعتها فخمة ومتقسمة تقسيم جيد وكمان المكان بيعمل مجموعة كبيرة من الورش في الرسم والغناء والموسيقى مع تقديم عدد كبير من الندوات وحفلات التوقيع وده مهم للترويج لهم ولفكرة الثقافة بشكل عام.

...

تويا: محاولة للخروج من ثقافة وسط البلد
اصدرت في: 23/07/2016

الرواية: في 2015 كتب الروائي المعروف أشرف العشماوي رواية عملت ضجة كبيرة اسمها (تويا) وهي رواية بتتقابل فيها شخصيات، وجنسيات، وثقافات مختلفة، وبتختلط فيها أفكار ومعاني ومباديء كتير، وبتمتزج فيها أحاسيس ومشاعر مختلفة، الكاتب أشرف العشماوي قدر أنه يبعتنا لمكان تاني، ومن وحي اسم تويا اللي جمع بين ثقافات كتير وجنسيات مختلفة وحالة كمان من الحب والعشق جديدة من نوعها، خرج مركز تويا الثقافي. المركز: تويا هو مركز ثقافى جديد تم افتتاحه من قريب في المعادي، وهو محاولة جديدة للخروج من ثقافة وسط البلد، بمعنى إنه محاولة جديدة للخروج من فكرة وجود التجمع الثقافي في منطقة وسط البلد.. بهدف البعد عن مركزية وسط البلد، والزحمة اللي بقت موجودة هناك. تويا: المكان في الدور الأرضي في شارع النصر في المعادي، هو مش مجرد مكان عادي (مكتبة) تدخل تشتري كتاب وتخرج، إحنا بنتكلم عن موضوع أكبر من كده، بنتكلم عن مكان معمول بشكل يخليك تحب القعدة على الأرض وتحب الجو بتاعه وتحب كمان تفاصيل المكان والقعدة والقراية هناك، وده كان السبب إننا لما رحنا فضلنا قاعدين شوية، المكان ببساطة معمول بطابع مصري جدًا وقعدات على الأرض غير قعدات الترابيزات، والمكان أغلبه مفتوح ومعمول (بخوص) في السقف حاجة كده عاملة ازدواج ما بين الشعبية والمودرن، ما بين الماضي والحاضر، حاجة بتجمع بين ثقافات كتير، وكمان جنب الكتب اللي بيبعوها فيه مهرجانات بيعملواها زي مهرجان تويا الأول واللي هينتهي في 6 أغسطس، وبيضم فرق وشعراء وحكايين ومنشدين، ومفاجآت كتيرة عاملينها للناس، وكمان المكان بيعمل مجموعة كبيرة من الورش في الرسم والغنا والموسيقى مع تقديم عدد كبير من الندوات والحفلات بتضم أسماء كبيرة فى عالم الثقافة والغناء والأدب.

...

ساقية المعز: بـ يفكروا زي النحاس الأصفر فى شارع المعز
اصدرت في: 15/01/2016

الساقية: أنك تستعمل اسم الساقية نسبة إلى ساقية عبد المنعم الصاوى.. فده حاجة من اثنين: إما أنك بـ تحب الساقية أو بـ تستخدمها للدعاية. هنا وقفنا وقررنا ندخل ونشوف المكان علشان نعرف إيه موضوع ساقية المعز... ولما قعدنا هناك عرفنا أن الرجل صاحب المكان بـ يحب الساقية وعجباه الفكرة علشان كده قرر يعمل ساقية جديدة فى المعز لكن بفكر جديد مختلف عن ساقية الصاوى. المكان فى قلب شارع المعز لدين الله بالضبط بعد جامع الأقمر.. عبارة عن دورين: الدور الأول مش واسع.. لكن الثانى واسع ينفع يتعمل فيه حفلة أو حاجة قريبة من كده.. وممكن كمان يتعمل فيه ندوة بـ تتكلم عن الآثار والتاريخ أو الثقافة أو الشعر وحاجات كده يعنى. الحاج باشا: دخلنا المكان وقعدنا مع الحاج باشا، ده مش لقب ولا حاجة ده اسم صاحب المكان.. شاب وسيم فى الثلاثينات، مثقف جدًا وبـ يتكلم كذا لغة لأنه سافر خارج مصر كثير.. اشتغل فى أماكن وحاجات كثير وقرر يعمل كافيه ومركز ثقافى مصرى أصيل.. دى الفكرة الأساسية اللى عاوز يعملها، لكن جوه الفكرة دى فيه حاجات ثانية كثير، الأفكار بجد هى المنبع الأساسى لكل حاجة حلوة. الأفكار: كان ممكن المكان ده يبقى كافيه زى أى كافيه فى شارع المعز وبـ يقعد فيه بنات وولاد بـ يهزورا ويضحكوا ويشربوا وخلاص.. لكن الجمال فى الموضوع هنا أن الحاج باشا عاوز يعمل حاجة مختلفة. هو مبدئيًا كده من أول فكرة المشروبات، اتفق مع شركتين أوربيتين كبار علشان المشروبات، واحدة فرنسية والثانية ألمانية وكل مشروباته هـ تبقى من خلال الماركات العالمية.. أما الساندويشات فهى مختلفة وبـ تناسب كل الأذواق من أول متوسطى الدخل، يعنى الساندويتش يبدأ بـ (7 جنيه) لحد أصحاب الدخل العالى، والجديد بقى أنه بـ يستخدم خامات كلها ماركات، وكمان هـ يعمل ساندويتش جديد هـ يبقى مميز به وهو ساندويتش "لحم الغزال"، وشوفوا أنتم بقى مين اللى مش هـ يحب يروح ياكل لحم الغزال. الثقافة: كده خلصنا الكلام عن المكان من ناحية الكافيه.. المكان بقى كمركز ثقافى واخد الجو التراثى الجميل.. لكن بفكر معاصر، يعنى لما تخش هـ تلاقى تفاصيل كثيرة فى المكان معمولة من النحاس الأصفر المطعم بالذهب وتفكيرهم بالضبط زى كده عامل زى النحاس الأصفر أصيل وعصرى. هما عندهم ورش مزيكا زى العود والكمان.. وعندهم ورش عن صناعات التراث المشهورة بالنحاس والمعروف بها شارع المعز.. وكمان هـ يعملوا مسابقات كثير فى الغناء وهـ يبقى فيه لجنة تحكيم كبيرة من أماكن مختلفة زى الأوبرا وكلية التربية الموسيقية وغيرها.. وهـ يعملوا مسابقة فى الطبخ وكل مسابقة هـ يبقى فيها مجموعة من المفاجآت. زوروا المكان واستمتعوا!

...

مركز الهناجر للفنون: الفن الجديد داخل ساحة دار الأوبرا المصرية
اصدرت في: 26/10/2015

يعني إيه هناجر؟ سؤال أولي جاء فى دماغنا وإحنا بـ نفكر نكتب عن مركز الهناجر للضيوف... الهناجر زي ما نعرفها أنها المستودعات الكبيرة اللي بـ تستخدم كمخازن أو ورش صيانة للمعدات الثقيلة.. وهنا نقف إيه علاقة المستودعات بالفن.. وقفنا كثير وفى الآخر وقفنا عند علاقة مخزن الإبداع اللى وقت الحاجة بـ يطلع الثقافة للناس وقت ما يحتاجوها.. وهو ورشة صيانة للفن علشان يطلعوا المنتج الثقافي اللى يليق. الفن: كانت فكرة تكوين مركز ثقافي بـ يقدم خدمة لشباب المثقفين علشان يبقى نواة العمل فى وجود المركز علشان يصبح منارة للإشعاع الثقافى.. تم افتتاح مركز الهناجر للفنون يوم 20 سبتمبر 1991 واللى افتتحه وزير الثقافة السابق فاروق حسني وكان معاه وقتها السيدة الأستاذة الدكتــــورة هدى وصفي رئيسة المركز، وقدم عرض المحبظطية إخراج محسن حلمي فى الافتتاح. المركز: بـ يتكون مركز الهناجر من قاعة عرض مسرحي واللى كانت بـ تتكون من قاعتين متصلتين وفى النصف خشبة المسرح وكان بـ يعتبر أول مســـرح من نوعه في الشرق الأوسط بالشكل ده.. وكمان فيه قاعة معرض فنون تشكيلية وهي بـ تمثل واحدة من أكبر قاعة فنون تشكيلية من ناحية الحجم في مصر.. وهو بـ يقدم العديد مــن الأنشطة الثقافية. اللي بـ تخدم كل شرائح المجتمع خاصه الشباب.. وكمان فيه أنشطة مختلفة فى مجال المسرح.. منها العروض المسرحية لكبار المخرجين اللى قدموا عروضهم عليه والمركز لا ينسى الشباب وبـ يعتبر فى الوسط الثقافى أنه بـ يمثل "كارت عبور" للعرض اللى بـ يُقدم فى الهناجر، وده راجع لاختيارهم العروض بشكل جيد.. وتنوعت العروض فيه من مسرح بسيط إلى عروض متداخلة ومسرح الشنطة وعروض الحكي وغيرها. رسالتهم: ترويج كل أنواع الفن ومحاولة التقدم بالمسرح وشباب المسرح وإظهار أنواع جديدة من الفن والشباب المبدع... وصراحة دي رسالة تحترم ولازم ندعمها ونحاول نخلي الفن يظهر بشكل جيد.. خاصة وأنها بـ تقدم حاجات مختلفة ومتنوعة وبـ تخدم ألوان مختلفة من الفنون زي ملتقى الخزف الدولي وبعض عروض مهرجان القاهرة السينمائي، ومسرحيات زي "ميتانونا، الحفرة، أريوس، بارانويا" وفيه ورش زي ورش الرقص الحديث، وبعض الندوات زي حفلات التأبين ومناقشة بعض القضايا اللى على الساحة الثقافية.. زوروا المركز واستمتعوا بالكافيتريا اللى هناك واللى أسعارها عادية.

...

مركز نور للثقافة والفنون: إنتاج ثقافى وندوات وورش فنية مختلفة فى وسط البلد
اصدرت في: 16/09/2015

ليه نور؟.. ده كان أول سؤال دار في ذهننا وإحنا بـ نزور مركز نور الثقافى، ولما تفرجنا على المكان وفهمنا هو بـ يعمل إيه، عرفنا أن الفكرة جاية من التنوير، هم نفسهم يكونوا مركز بـ يرسل التنوير الثقافي لكل حتة في مصر. بـ يعملوا إيه؟ لهم أنشطة مختلفة زي الإنتاج الثقافي.. وعندهم مشروع معرض فن تشكيلي لمجموعة من الفنانيين من ضمنهم الفنانة المعروفة ماجدة الشرقاوي، وإنتاج فني موسيقي وعندهم مشروع لعمل ألبوم للمطربة عصمت الشقنقيري، وكمان بـ يكونوا باند اسمه "رومانزا" واللي معناها بالإيطالية قصة حب. ولحد هنا ما وقفوش، بالعكس قرروا يغزوا السوق الثقافي ويعملوا أكبر مخاطرة في العمل الثقافي وهو (دار نشر) وبـ يستعدوا لعمل أربع كتب منهم ديوان بالعامية على اسم واحد من دواوين درويش "أثر الفراشة" وديوان "سفر النبوة" للشاعر ناظم نور الدين، كمان عندهم بوك ستور بـ يبيعوا فيه أغلب كتب دور النشر الثانية. أما الكورسات فهي متنوعة منها جيتار مع الفنان أسعد نسيم وهو عضو فرقة وسط البلد، وكورس الكمان مع الفنان عبد المنعم هلال، والعود والغناء مع الفنان بلال الشيخ، والأورج والغناء للأطفال مع الفنانة عصمت الشقنقيرى. جنب ده بـ يعملوا حفلات توقيع وندوات وفيه مسابقة في شعر العامية والفصحى والرواية والمجموعة القصصية والكتابة الساخرة والمسرح، يعني مسابقة ثقيلة وفيها جوائز لما تظهر النتيجة. ولما بـ يبقى فيه أمسيات كبيرة بـ يكون فيه تعاون مع حديقة السيدة زينب الثقافية، ولهم صالون شهى لناجح إبراهيم في تجديد الخطاب الديني بعنوان "خطاب متجدد" وبـ يجهزوا لإنتاج عرض مسرحي للأطفال اسمه "كوكب هيدو" تأليف وأشعار وإخراج ناظم نور الدين. المكان قائم عليه 4 مبدعين هم: الشاعر ناظم نور الدين، والروائية هند مختار، والقاصة ياسمين أبو المجد، والإعلامية فاطمة العبيدي.

...

مكتبة حروف: مكان ثقافي ومكتبة مختلفة في وسط البلد
اصدرت في: 09/09/2015

المكان: شاب 1: انزل معايا وسط البلد شوية شاب 2: لا يا عم أنا زهقت من وسط البلد شاب 1: تعالي وهـ تنبسط شاب 2: ما إحنا كل مرة بـ ننزل بـ نقعد في نفس الأماكن شاب 1: هـ أقعدك في مكان جديد شاب 2: والنبى فين؟ مافيش خرم أبره في وسط البلد إلا ولفيناه شاب 1: حروف شاب 2: مش فاهم شاب 1: مكتبة وقعدة حلوة شاب 2: ثقافة وكده.. لا يا عم ماليش فيه.. شاب 1: لا يبقي أوصف لك الوصف: هنا بدأ الشاب يعدد في وصف المكان وحلاوته، وقد إيه هو مكان في موقع متميز في وسط البلد، لكن إحنا هـ نسيب الوصف ونحكي لكم على اللى شوفناه. المكان عبارة عن شقة واسعة من شقق وسط البلد القديمة اللي هي كانت تنفع مسرح عادي لكن الناس عايشين فيها، ومُقسمة بقي مجموعة قاعات. قاعة للفن التشكيلي وفيها هـ يتعمل معرض للوحات، وبالفعل عملوا معرض واحد وفي انتظار تجهيز جدول باقي المعارض، وقاعة ثانية فيها جو شبه "الكافيه" تقدر تقعد فيها وتطلب المشروبات اللي أنت عاوزها، وأسعارهم على فكرة لطيفة جدًا، وقاعة ثالثة بـ يتعمل فيها اجتماعات وتنفع جدًا يتعمل فيها نقاشات مصغرة أو جلسات عمل على الهادئ، وقاعة رابعة هي ستوديو للشباب لو عاوز يعمل بروفات. وفي الاستقبال هـ تلاقي المكان مليان كتب من اللي قلبك يحبها كتب في مجالات مختلفة، لكنها مش كثير قوي لدرجة أنها تعمل مكتبة ضخمة، ولما سألنا أصحاب المكان على الكتب عرفنا أن فيه "كذا شوال" كتب في المخزن بس مستنيين يكملوا تجهيز المكان. الفكرة: الفكرة بقى أنهم مجموعة شباب بـ يحبوا الثقافة وعاوزين يعملوا حاجة مختلفة، عاوزين يعملوا مكان فيه كل حاجة بـ تعطي كورسات في الموسيقى والرسم والكتابة، وكمان يبقى فيه قاعات فن تشكيلي ومعارض، وكمان يعملوا مسرح صغير (لسه بـ يتجهز) علشان العروض المسرحية والحفلات متوسطة الجمهور، وكمان قاعة للبروفات علشان يساعدوا الشباب أنهم يلاقوا مكان نظيف في وسط البلد يقرأوا ويشتروا كتب بأسعار معقولة ويعملوا بروفات ويتمرنوا ويقعدوا يتناقشوا ويشربوا مشروبات بأسعار متوسطة ومقبولة جدًا. اللى عاجبنا كمان هي الروح اللى هناك وقد إيه هما بـ يحبوا بعض وبـ يحبوا شغلهم وعاوزين يعملوا مكان جديد ومختلف، لأ وكمان عاوزين يعملوا فرع ثاني، صراحة لازم نرفع لهم القبعة.

...

مشكاة: مركز ثقافي جديد في المنيل
اصدرت في: 11/08/2015

يعنى إيه: المشكاة.. مصدر إضاءة جميل، وهي عبارة عن شكل مصمم علشان يطلع النور بشكل مختلف، طب ليه اختاروا اسم المشكاة مع أنه قديم؟ سألنا أصحاب المكان قالوا لنا رد غريب لكنه جميل، أن المكان عامل زي المشكاة، النور يدخل فيها أبيض ويخرج بألوان كثير، وأي واحد يدخل باختلافه ومعتقداته وأفكاره ويتجمعوا كلهم في المشكاة اللى بـ تقبل الآخر بكل اختلافه. المطبخ: قررنا نبدأ في الحكي عن المكان بالمطبخ عارفين ليه، علشان هما عاملين حاجة مختلفة جدًا، سبورة كبيرة عليها أسعار المشروبات، واخدم نفسك بنفسك، أنت اللى تعمل المشروب وأنت اللى تضبط سُكرك وأسعارهم تقريبًا (سعر التكلفة) يعني سعر على قد الأيد جدًا، وعلشان تحاسب روح للشكمجية (صندوق مفتوح) بـ تحط الفلوس بنفسك أو بـ تفك منه وتحاسب، والجميل أن الموضوع ده أثبت أمانة المصريين ما حدش شرب حاجة إلا وحاسب مع نفسه. مشكاة: المكان اسمه تراثي والديكور بتاعه تراثي برضه، معمار إسلامي جميل، ممنوع فيه التدخين وهو مجتمع هدفه الأساسي التعارف بين الناس، وكمان مكان للعمل لو عاوز تشتغل في هدوء، وبـ يهتم بتعليم الناس بأسعار مناسبة وهدفه مراعاة الضمير الإنساني ونشر الأخلاق والصفات الجميلة بين الناس، وعندهم مجموعة من الكورسات اللطيفة زي: "أنك تأخذ الفرصة في أنك تعبر عن حريتك"، "اتعلم آلة تعبر عنك"، "الكمانجة آلة الأمراء"، بـ يحبها الحد الرايق اللي بـ يتمزج بصوتها.. وهناك تقدر تتعلم مع المدرب عبد المنعم هلال مفتاحها وسرها. وعندهم كورسات ثانية زي تعليم العروسة وتصنيعها باللعب مع الأطفال، وفي رمضان كان عندهم ورشة لتعليم صناعة الفانوس، وحالو يا حالو، وكمان عندهم يوم مسميينه (الثلاث الحلو) وده كل ثلاث بـ يعملوا أكلات مميزة وضحك وفرفشة، والجميل بقى أنهم بـ يعلموا الطلبة ببلاش التسويق والإدارة وممكن تقعد تتعلم معاهم شهر وتطبق اللى تعلمته في شهر شغل معاهم. الساحة: قاعة الساحة عبارة عن كراسي زي كراسي الشارع والقهوة البلدي وفيه قلة وزير علشان تقعد كأنك في الساحة بتاعة زمان، وهما واخدين إيحاء المكان من شارع المعز لدين الله الفاطمى، وده مكان ينفع للقعدة والأصحاب. العطفة: مكان خاص ومرتاح للراحة والهدوء القعدة فيه عربي وممنوع فيه الرد على التليفون، وده علشان لو حابب تذاكر أو تكتب في هدوء، تقدر تقول عليها غرفة "المزاج" والرسومات على الحائط عبارة عن تعشيقات شجر ممتعة، لازم نقول أن ديكور المكان بجد حلو. المشربية: دى قاعة واخدة شكل بيت السحيمي وبـ تتحجز كغرفة اجتماع ومكان هادئ وسبورة، وفي وقت المذاكرة بـ يعملوا "كامب مذاكرة" تقعد طوال اليوم بـ 10 جنيه. الإيوان: والاستقبال اسمه "الإيوان".. وهو شبه إيوان الجامع اللى في مسجد الحاكم وممكن يشيل لحد 50 فرد، وفيه كتب على الأرض للى عاوز يقرأ، وباختصار في مشكاة فيه هدف ورؤية وهدوء ومكان بجد مميز.

...

صحبة كافيه & جاليري: لمة الأندرجراوند فى شارع التحرير
اصدرت في: 15/03/2015

صحبة: اسم بدأ يتردد كثير فى الفترة اللى فاتت.. مش ملاحظين كده ولا إيه؟ تفتكروا إيه السبب يعنى يتعمل حدث كبير فى مجموعة من أشهر شعراء العامية الشباب يبقى اسمه "الصحبجية" وينتشر الموضوع جدًا.. ويتعمل مكان كامل ويبقى اسمه "صحبة"، يا ترى الناس مش حاسه بالأمان فبـ تدور عليه فى الصحاب.. ولا هى فكرة اللمة اللى الناس بقيت محتاجاها دلوقت علشان الأحداث اللى البلد بـ تمر بها.. أسئلة كثير بـ تمر بذهنك وأنت ماشى بالذات فى وسط البلد ولما فجأة تلاقى أمامك مكان اسمه صحبة، لازم تقف وتفكر هو فيه إيه؟ فيه إيه: السؤال ده لما بـ يتردد فى ذهننا لازم ساعتها نعمل حاجة واحدة بس نسأل وندور على الموضوع ونشوف.. ما نطولش عليكم إحنا دخلنا المكان وقعدنا وطلبنا قهوة يعنى بعدها بشوية جات وصراحة طعمها كان تمام.. ضيفوا المكان ده للأماكن القليلة اللى بـ تعمل قهوة حلو فى وسط البلد. القهوة: ولأن القهوة مزاج ولها طابع خاص فى الشرب حتى، برضه المكان مزاج وله طابع خاص، هو عبارة عن ممر طويل واسع شوية لكن سقفه قريب.. ودى من الحاجات اللى بـ تضايق فى المكان.. وفى آخر الممر ده هـ تلاقى المطبخ وقبله هـ تلاقى أوضه على اليمين فيها قعدة.. وفى آخر الممر فيه أوضه ثانية معمول فيها "جاليرى". المكان: الفكرة الأولى اللى هـ تقابلك هناك هى استخدام المساحة.. فيه استخدام جيد لها وطريقة وضع الكراسى والترابيزات مش هـ تخليك تحس أن المكان صغير.. بصوا هو مش صغير لكنه طويل يعنى بدل ما يبقى المكان مربع وواسع.. فهو مستطيل علشان كده هـ تحس أنه ضيق. الديكور: ديكور المكان كله مختلف أنه قائم على فكرة "الـ Handmade"، هما مش حابين يجيبوا حد من خارج السرب يعمل حاجة فهما اللى عملوا كل حاجة فى المكان وهما اللى جابوا الجرايد القديمة ورسموا على الحوائط رسومات كلها مرتبطة بالأندرجراوند.. هم آه.. هم اللى عملوا روح للمكان. هم: مين بقى هم؟ نقول لكم.. هم مجموعة من الأصدقاء على رأسهم صاحب المكان اللى اسمه إسلام إسماعيل.. ولما نحكى لكم حكاية إسلام هـ تفهموا إيه الموضوع. الحكاية: كان يا ما كان كان فيه أيام دلوقت شاب زى شباب مصر كثير سافر بلاد بره واشتغل لحد ما حوش شوية فلوس مش كثير.. على طول رجع مصر وقرر أنه يعمل حاجة بـ يحبها.. ولأنه بـ يحب موسيقى الأندرجراوند قرر يعمل مكان يسمع فيه هو وأصحابه موسيقاهم وكمان يعملوا "Jamming" مع بعض، اللى يلعب جيتار واللى يغنى واللى يعمل ستاند أب كوميدى وكلهم فى النهاية أصحاب واللى جاى على المكان جديد برضه صاحب، هى دى الروح اللى مالية المكان.. وهو ده سبب التسمية.. وهى دى الفكرة، الصحبة فى كل حاجة وابقى روح واستمتع هناك.

...

مكتبة البلد: مكان ثقافي يحتويك ويزود معرفتك في وسط البلد
اصدرت في: 03/03/2015

فتحت في الفترة الأخيرة مراكز ثقافية كثيرة، حتى المكتبات العادية تلاقيها عاملة جنب بيعها الكتب أنشطة ثانية تحفز بها القراء، أنهم ييجوا المكتبة، وده مش بس متوفر في مكتبة البلد، لأ دي تعتبر البيت الثاني لكثير من القراء والمثقفين. أول ما بـ تدخل المكتبة بـ تلاقي على أيدك اليمين موظف الكاشير وجنبه مجموعة صور فوتوغرافية جميلة جدًا الواحدة فيهم بـ 5 جنيه، بعد كده بـ تلاقي أربع غرف، على اليمين غرفة المدير المسئول عن المكتبة، وعلى الشمال غرفتين اجتماعات وتعتبر كافيتريا، لأي حد عاوز يعمل اجتماع أو للمثقفين اللي عاوزين يشتغلوا في مكان هادي، وساعات بـ تستخدم في عمل الورش، في الوش بقى أكبر غرفة في المكتبة واللي فيها كتب في كل المجالات، الأدب والسياسة والإسلام السياسي والفن الساخر، والكتب القديمة للكتاب المشهورين زي نجيب محفوظ وغيره من الكتاب اللي بنوا أسس كتاب الأدب العربي في مصر والعالم العربي وبأسعار معقولة جدًا. والغرفة دي برضه بـ يتم عمل الورش فيها والتجمعات الثقافية أو الفنية، كمان فيها بلكونة مطلة على شارع محمد محمود، تقدر تقعد فيها وتشرب حاجة في نفس الوقت، بس لو أعصابكم خفيفة ما ننصحكمش بده لأن الشارع ده شاف ذكريات وده تخليك تفضل تعيط لحد ما تروح. أكثر حاجة بـ تميز المكتبة هي أنشطتها الثقافية اللي بـ تعملها بالتعاون مع الكتاب والشباب، يعنى مثلًا، ورشة زي ورشة الكتابة الإبداعية في فن الرواية بالتعاون مع الكاتب الكبير والدكتور بهاء عبد المجيد، واللي هـ توفر لك مدة تدريب 18 ساعة مرتين فى الأسبوع، وهـ تتدرب على الكتابة في فن كتابة الرواية من بناء الشخصية الروائية والحبكة وخلق الصراع الروائى، وإزاي يختار العنوان المناسب للرواية ومساعدة الكاتبة أو الكاتب للوصول إلى دار النشر المناسبة. أو ورشة إعداد المترجم الأدبي من الإنجليزية للعربية، واللي هـ يدرسها الدكتور بهاء عبد المجيد برضه أستاذ الأدب الإنجليزى والدراما بجامعة عين شمس، واللي هـ تساعدك على التدريب على استخدام القواميس، وعلى نماذج من الرواية والقصة والشعر، والترجمة الفعلية من الإنجليزية إلى العربية وتحليل وتحرير النص الأدبى وتقسيمه إلى أجزاء بغرض الترجمة. أما عن التعاون الجميل بين مكتبة البلد ومركز الربع اللي بـ يعملوا فيه كثير من جلساتهم التأملية، اللي ممكن يصحبها بعض الغناء المريح للأعصاب، فده ما يتحكيش عنه أنتم لازم تجربوا بنفسكم، كمان ورشة فن الزجاج المعشق وفن كتابة القصة القصيرة ما يتفوتوش إطلاقًا لمحب الفن. أخيرًا، نقدر نقول بقلب جامد أن ورش مكتبة البلد مفيدة وممتعة في أكثر من مجال، ممكن تقرأ فيها أو تقعد تشتغل والمشروبات أسعارها رمزية.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح