حفلات فن وثقافة in Cairo, Egypt

فن وثقافة

علبة ألوان: صومعتك في انتظارك في الزمالك
اصدرت في: 03/09/2014

إحنا مش من هواة الكلام عن صعوبة الحياة في القاهرة بزحمتها ورتمها السريع والمكرر في نفس الوقت -غالبًا إحنا قلنا كل حاجة في جملة واحدة خلاص- لأننا مش هـ نضيف أي جديد. وبالتالي محاولة طرح أي حلول –زي كلمة "افصل"- هـ تكون حشو مالوش لازمة؛ لأن الحلول كثيرة وبـ تفرق من شخص لآخر. كل واحد فينا له طريقته في أنه يفصل عن دوشة الحياة، فيه مثلًا واحد يحب يجرب حاجة مجنونة زي التزحلق على الرمال، وفيه واحد بالنسبة له التقوقع والسياحة الداخلية في "أغوار الذات" هو باب الهروب... لو أنت من النوع الثاني، قوقعتك في انتظارك في علبة ألوان في الزمالك. علبة ألوان موقعه ممتاز، مش بس لأنه في الزمالك، ده كمان في أكثر الشوارع هدوءً، وهو شارع أحمد حشمت. يافطة خشب بدائية الصنع عليها الاسم، مُعلقة على جذع شجرة، أجمل شيء فيها بالنسبة لنا هو العيب الوحيد اللي فيها، وهو أن ما عليهاش أي سهم يوجهك للمكان بالفعل... وده حفّز القبطان اللي جوانا، فدخلنا ممر العمارة الهادئ وطلعنا السلالم الرخام اللي لاقيناها على اليمين. حتى الآن مافيش علامة توجهنا؛ كل أبواب الدور الأرضي لا توحي بالحياة تمامًا –لو رحت جاليري تاون هاوس قبل كده في وسط البلد هـ تفهم إحنا بـ نتكلم في جو عام شكله عامل إزاي- ماعدا باب واحد على أيدك الشمال بجانبه لوحة متوسطة لعرائس أوبريت الليلة الكبيرة. الباب كان مفتوح فدخلنا. المكان هدوءه للوهلة الأولى غريب، مش بس كده... ديكوراته أعجب وأغرب، لدرجة أننا توقعنا رجل مسن لابس روب قديم عايش لوحده هـ يخرج من أي ركن يطردنا، ولكن لحسن الحظ لحقنا أحد الشركاء الأساسيين للمكان، واللي استقبلنا بترحاب شديد هو وقطة صغيرة اسمها "زبيدة" (طبعًا اللي مالهمش في القطط، المقال النقدي انتهى بالنسبة لهم) بـ تلعب مع أي شخص وفي كل مكان. الديكور... صعب وصفه، إحنا حسينا أننا دخلنا بيت رجل من الزمن الجميل... أصحاب المكان احتفظوا بديكورات المنزل الأساسية وغالبًا ممتلكاته، لأن المكان فيه أنتيكات على كل لون وشكل: من أول زمزميات قديمة، وحتى الآلات الكاتبة وكاميرات بمختلف أنواعها... ده غير مجموعة مميزة من الإكسسوارات المصنوعة يدويًا... كل ده قابل للبيع "أي حاجة تعجبك وتحس أنك ارتبطت بها اشتريها مننا." ده كلام أصحاب المكان. أخذنا جولتنا، المكان فيه غرفة للقراءة وغرفة فيها قعدتين منفصلين لو مش لوحدك، فيه كمان غرفة تحت التجهيز للفنانين علشان يأخذوا راحتهم مع ألوانهم وكراكيبهم. الصالة الرئيسية واسعة وفيها مسرح صغير بـ يستوعب حفلات "على القد" كل يوم خميس، وده المكان اللي قررنا أننا نقعد فيه. المكان قائم على فكرة "اخدم نفسك"... فروحنا المطبخ وطلبنا منهم يرشحوا لنا نشرب إيه، قدموا لنا مشروبين رسميين عندهم: عنب بالتوت (15 جنيه)، وليمون بالكيوي والنعناع (15 جنيه). تخوفنا من الأول علشان عندنا اعتقاد مترسخ أن التوت أو العنب يعني دواء كحة متخفي... بس الحقيقة أنه كان منعش جدًا وكميته الكبيرة تساعد على شربه بمزاج لأطول فترة ممكنة، أما الثاني فمشكلته بالنسبة لنا كان سكره الزيادة بالرغم من أن كان فيه ليمونة كاملة في الكوب... بقشرها، وده لأن المشروب مستخدم فيه شربات النعناع، فوضع طبيعي أنه يبقى مسكر. أخذنا راحتنا واستمتعنا بالهدوء، فأخذنا دور ثاني من المشاريب، جربنا كابتشينو (15 جنيه) وشاي بالتوت البري (10 جنيه)... مشروبات عادية ولكن قلنا يمكن فيه إضافة. ولكن الكابتشينو مش أفضل ما أنجبت الكافيهات، الرغوة كانت اختفيت عقبال ما وصلنا للمكان اللي كنا قاعدين فيه. الشاي كان تجاري ممكن تجيبه من السوبر ماركت فعادي جدًا. تجربة هـ نكررها، بغض النظر عن الكابتشينو والشاي أنت مش رايح هناك علشان تدلع جسمك بأكلة أو مشروب ما جربتش زيّهم قبل كده... أنت رايح تدلع نفسيّتك في جو عتيق يشجعك أنك تتأمل... لازم تجربه!

...

مسرح الجنينة: ما تروح وأنت تعرف
اصدرت في: 07/04/2013

عن السور (لازم تعرف): 28 أبريل 2005 ده الوقت اللى افتتحوا فيه "مسرح الجنينة" جنب سور القاهرة الأيوبى داخل حديقة الأزهر، قبل ما نتكلم عن المسرح لازم نقول لكم عن سور القاهرة الأيوبى اللى عمله صلاح الدين الأيوبى وبـ يرجع تصميمه للقرن 12 فى عهد صلاح الدين، والعجيب أن فيه كمان عدد من الأحجار المزخرفة بكتابات هيروغليفية واللى بـ تصل أطوال بعضها إلى متر تقريبًا تم استخدامها فى بناء سور صلاح الدين.. وعلشان يتم كشف السور اللى تم دفنه عبر الزمن كان لازم الحفر لعمق 15 متر ولما اكتشفوه لاقوا كثير من السور لسه بحالته بأبراجه وتصميماته الجميلة اللى ظهرت بكل روعتها، والجميل أن اللى قام بتصميمها المهندس ماهر ستينو (مصرى) وقام بالتنفيذ شركات مصرية بكفاءات مصرية. عن الحديقة (اعرف بقى): أما عن حديقة الأزهر فلازم تعرفوا أنه تم إنشائها على مساحة 30 هكتار، بواسطة إمام الطائفة الإسلامية الإسماعيلية الشيعية كريم شاه الحسيني (آغا خان الرابع)، بعد أن قرر إهداء حديقة إلى مدينة القاهرة في 1984، بناءً على الاعتقاد الإسلامي بأن كلنا مسؤولين عن إبداع الخالق ولازم نخلى الأرض مكان أفضل، والمشروع تكلف تقريبًا 30 مليون دولار أمريكى علشان يكون مثال يدرس للحلول المبدعة لكثير من التحديات اللى بـ تواجهها المدن التاريخية وطريقة عملية جدًا فى دمج البيئة مع التاريخ. حديقة الأزهر تعتبر الرئة الخضراء للقاهرة نتيجة لمساحتها الضخمة، والحديقة أكبر مساحة خضراء تم إنشائها فى القاهرة منذ قرن. عن المسرح (ما تروح وأنت تعرف): أما مسرح "الجنينة" فهو مسرح نصف مكشوف بـ يساع حوالى خمسمائة مشاهد، وزى ما قولنا أنه جنب سور القاهرة الأيوبى ناحية الحد الغربى لحديقة الأزهر. واللى قام بتصميم المسرح والإشراف على تنفيذه مؤسسة صندوق شباب المسرح العربى. والمسرح هو نتيجة للتعاون بين إدارة حديقة الأزهر، وبين مؤسسة المورد الثقافى وده نموذج لفكرة التعاون المشترك للتنمية الثقافية. واستمر العمل فى إنشاء المسرح حوالى 8 شهور، وتطمح مؤسسة المورد الثقافي إلى تطوير الإمكانيات التقنية للمسرح كل عام من خلال الأجهزة الحديثة وكمان الفرق الجديدة.بـ يسعى مسرح "الجنينة" إلى اجتذاب جمهور واسع من الشباب، وده لأنه بـ يقدم برامج موسيقية ومسرحية متنوعة على مدار العام، تقدم معظمها فرق ومجموعات فنية مستقلة، من مصر والمنطقة العربية. وكمان بـ يدور على التجارب الفنية الرائدة والمتميزة، واللى بـ تسعى إلى اكتشاف كل جديد فى الإبداع، يعنى من الآخر هـ تلاقى فرق جديدة ومغنيين ومسرح مفتوح وحالة مختلفة من الفنون البصرية والمسرحية والاستعراضية والغنائية... نقول لك.. ما تروح وأنت تعرف.

...

التكية المولوية: عالم ساحر قررنا استكشافه فى منطقة الخليفة
اصدرت في: 03/10/2012

سمعنا كثير عن التكية المولوية، ما كناش عارفين هي مواعيدها إيه، لأنها من كل آثار القاهرة القديمة صعب تلاقي لها بيانات واضحة مؤكدة تمشي على أساسها، سألنا وروحنا، عدينا من جنبها أكثر من مرة، ما عرفناش أن هي دي التكية، مافيش أي حاجة تدل أنها في المكان، لا لوحات ولا يافطة ولا أي شيء، ما عرفناش أننا جنب التكية غير من عجلاتي واقف قصادها.المفروض أن المكان بـ يفضل فاتح لحد الساعة 4 عصرًا، لكن يبدو أنهم بـ يقفلوا قبل كده بشوية، المهم دخلنا، ولاقينا المدخل كله إعلانات على الحوائط في الجانبين فيه فاترينات مخصصة للإعلانات لكن كلها عن أحداث قديمة مرت، بالداخل في التكية كان فيه ثلاثة عمال قاعدين سألناهم عاوزين نزور التكية، دلونا على ثلاثة موظفات قاعدين في مكتب، دخلنا المكتب وسألنا نعمل إيه، بصوا لنا باستغراب كأنها أول مرة حد يزور التكية، سألناهم هل الزيارة بفلوس قالوا لأ، وعرضوا أنهم يفرجونا المكان عادي لو حابين.اكتشفنا من خلال الزيارة أن الموضوع بـ يكون ودي وأن مافيش تذاكر ولا حاجة، زيارة التكية بالنسبة للأجانب بـ تكون جزء من البرنامج السياحي، لكن بالنسبة للمصريين فيبدو أن الموضوع ودي، المهم حبينا نتفرج على المكان اللي هو عبارة عن ساحة واسعة فيها شوية زرع، ومبنى من دورين تقريبًا، فتحوا لنا المسرح، دخلنا.. وبدأ السحر.المسرح عبارة عن خشب في خشب، مساحة مستديرة بالخشب الكامل من الأرض للسقف، فيه يافطة كبيرة شكلها قيم مكتوب عليها "يا حضرة مولانا"، السقف عبارة عن قبة مدورة، فيها رسم للشمس، وطيور شكلها حقيقي جدًا، المكان ده المولوية لحد سنة 1952 كانوا بـ ييجوا يدوروا فيه، حاولنا نتفرج على حاجات أكثر لكن قالوا لنا أن مدير المكان هو اللي ممكن يفتح لنا باقي الحاجات، وهي عبارة عن مدرسة كان الناس فيها زمان بـ يتعلموا فقه، وعلوم دين، ومتحف للمولوية.صحيح إحنا ما قدرناش نشوف باقي التكية، لكن اللي شوفناه خلانا نتشحن شحنة روحانية جميلة، من مكاننا على المسرح بصينا تحت لاقينا ضريح عرفنا بعد كده أنه لشيخ اسمه سيدي حسن صدقة، وده كان رفيق السيد البدوي، جنب الضريح بتاعه فيه فاترينة كبيرة بـ توضح الزي المولوي القديم كان عامل إزاي، ويبدو أنه زي أثري.الناس اللي كانوا موجودين معانا من التكية ما كانوش مفيدين جدًا، حاولوا يساعدونا لكن ما قدروش، كانوا ثلاث بنات حاولنا نفهم منهم تاريخ المكان، لكنهم قالوا بوضوح أنهم شغالين من شهور قليلة وما عرفوش لسه تاريخ المكان كويس.رغم أن ترميم المكان استغرق 33 سنة –حسب كلام البنات- إلا أنه ما حدش بـ يستفيد منه، وتم إغلاقه تمامًا من فترة مش بعيدة بعد ما اتسرق منه النص التأسيسي للضريح، وبعض الشرائط المزخرفة.بعد ما روحنا حاولنا نبحث على الإنترنت ونقرأ بنفسنا عن المكان أكثر، عرفنا أن آخر نشاط رسمي اتعمل فيه كان سنة 1928 وهو المؤتمر الأول للموسيقي العربية في القاهرة، ولكن للأسف سنة ‏1952‏ تم تصفية التكايا في مصر، ومش عارفين ليه ده حصل، المهم أن المكان كان هـ يضيع تمامًا، لكن عالم الآثار المصري دكتور حجاج إبراهيم تدخل ومن هنا بدأت عمليات الترميم اللي تعاون فيها المجلس الأعلي للآثار والمركز الإيطالي المصري، وللآسف آخر حفلة اتعلمت في التكية كانت سنة 1992‏ بعد افتتاحه بأربع سنين، وأحيا الحفلة وقتها مجموعة من الدراويش الأتراك.

...

جاز مايت: بيت لموسيقى الجاز وأكلات لطيفة أخيرًا فى الزمالك
اصدرت في: 12/09/2012

فى وقت كتابتنا للمقال ده حطينا السماعات على ودننا وقعدنا نسمع موسيقى جاز والمغني والعازف لوي أرمسترونج علشان ندخل فى موود المكان اللى رحنا زرناه بعد افتتاحه بيومين.. لكن بصراحة الموود ده ما يجييش حاجة لما تروح هناك وتعيش بنفسك داخل عالم الجاز.. عالم «جاز مايت – Jazz Mate».المكان ده تقدر تغذي فيه روحك بموسيقى الجاز اللى شغالة طوال اليوم هناك إلى جانب الاستمتاع بتشكيلة من المأكولات والمشروبات اللى بـ يقدمها المكان، موجود فى الشارع اللى جنب فندق "فلامنكو" فى الزمالك، المكان حجمه صغير ويغلب عليه اللونين الأسود والبني هـ تلاقيه على الشمال وأنت داخل الشارع.بشعار "Put a little Jazz in your life" هـ يستقبلك، المكان مكون من دورين، الدور اللى تحت فيه 4 ترابيزات وكراسي خشب وأمامها كاونتر والمطبخ وشاشة بـ تعرض فيديو لأغانى قديمة أبيض وأسود لفنانين جاز كبار، سلم حلزونى صغير هـ يوصلك للدور العلوي اللى بـ يقام فيه حفلات جاز لايف كل ويك إند، فى الدور ده حوالى 4 ترابيزات منخفضة وواحدة عالية طويلة وبيانو وميكروفون بستاند وسماعات مع شباكين دائريين مدخلين نور النهار ووحدات الإضاءة فى السقف عليها لوجو جميل لـ "جاز مايت"، مش دي بس المنطقة اللى فوق لأنها ممتدة لجزء ثاني مكمل للداخل بـ يفصلهم 3 درجات سلم وفيها ترابيزات وكراسي ثانية مع جزء فيه كنب وأخيرًا حمام مشترك للرجال والسيدات. فيه تابلوهات صغيرة على الحوائط لنجوم فن الجاز أبيض وأسود أضافت روح حلوة قوي للمكان مع موسيقى الجاز اللى شغالة باستمرار.شريف مصطفى صاحب المكان واحد من 4 شركاء هم تامر أسامة ومحمد المهدي وكريم حمدان، شريف بـ يحب يعمل مشروعات للحاجات اللى هو بـ يحبها والدليل على كده أنه فكر فى "جاز مايت" لأنه مجنون موسيقى جاز وعنده مكتبته الخاصة للناس القديمة اللى بـ يسمعها أكثر من موسيقى الجاز الحالية، ولأنه لقى أن كمان مافيش مكان فى مصر متخصص لتقديم نوع الموسيقى دي، وكمان كان سبب أنه أسس مكتبة مع أصدقائه سماها «صوفى» والموجودة برضه فى الزمالك وحققت نجاح الفترة اللى فاتت لأنه بـ يحب الصوفية وكل ما يتعلق بها."هـ نبدأ الأول بعروض حية كل ويك إند، وبعدين ممكن العروض دي تكون شبه يومية، هـ نحط يافطة بره المكان كل مرة يكون فيه عرض لايف ونكتب اسم الفنان والميعاد علشان نستمتع كلنا فى اليوم ده بموسيقى الجاز"، شريف بـ يدعو أى حد عازف موسيقى جاز هاوي أو محترف وحابب يقدم عرض هناك ممكن يراسله على إيميله smostafa@jazz-mate.com أو يروح له هناك، وأضاف كمان: "فى الافتتاح كان فيه عرض حي لثلاثى جاز عمرو صلاح وقدم هو ونهى فكرى عرض جميل جدًا".الويك إند القادم "جاز مايت" عندهم حفل لايف لثلاثى رشاد فهيم Rashad Fahim Trio الساعة 9 مساءً، ودى تفاصيل الحفلة على الفيسبوك. يفضل الحجز المسبق فى المكان لأن مساحته صغيرة بالاتصال بهم على تليفون .0227370521"جاز مايت" عندهم مطبخ بـ يقدم إفطار وأطباق رئيسية وساندويتشات وسلاطات وشوربة ومقبلات ومشروبات باردة وساخنة وحلويات زي الوافل والتشيز كيك والبراونيز والآيس كريم بدون خدمة وضريبة. جربنا هناك كونتري فرايد تشيكن بـ 49 جنيه وديب فرايد فيش (سمك مقلى) بـ 49 جنيه، الأطباق الرئيسية بـ يكون لها 2 طلب جانبي من اختيارك، زجاجة المياه هناك بـ 5 جنيه وطلبنا كمان فى المشروبات ميلك شيك بالفانيليا بـ 20 جنيه. الميلك شيك جاء لنا الأول، سكره مضبوط وقوامه خفيف شويه لكن كان حلو قوي، الأكل تأخر حوالى نصف ساعة وكان فيه غلطة بسيطة أننا طلبنا طلب جانبي واحد (بيوريه مع الفراخ وأرز مع السمك) بس مش مشكلة لأن كل حاجة فى البداية بـ تحتاج شوية تضبيط ولأن أدب الجرسونات ومعاملتهم خلتنا نتغاضى عن الخطأ ده. بالنسبة للأطباق الكميات كبيرة ومشبعة ومتجهزة كويس، البيوريه بالفلفل الألوان كان أكثر بطاطس طرية وغنية زي الكريمة ذقناها فى حياتنا، كانت وهمية، الفراخ قطعتين كبار ومستويين كويس وكمان السمك والأرز كانوا حلوين قوي. التحلية اختارنا فيها تشيز كيك، كان حلو برضه وقوامه جميل، بس نصيحتنا كموقع 360 أنهم ممكن يعملوا اختيار لنوع صوص يوضع عليها، هـ تكون أجمد. "جاز مايت" مكان بـ نتنبأ له بالنجاح الفترة الجاية زي "صوفى". المكان يعتبر بيت بـ يجمع بين موسيقى جميلة وأكلة شهية مع صحبة أصدقائك وفرقة حية.. عاوزين إيه أكثر من كده؟

...

مجموعة الغورى: أشهر مكان لعروض التنورة في الأزهر
اصدرت في: 24/01/2012

التاريخ: 922 هجرية. المكان: منطقة اسمها مرج دابق. الحدث: معركة شهيرة بين سلطان مصر الغورى والعثمانيين. النتيجة: قتل السلطان الغورى. (فلاش باك) السلطان الغورى قاعد فى مصر، لا به ولا عليه، لقى المماليك اتفقوا على أنه يبقى سلطان مصر، وكانوا فاكرين أنه ضعيف الشخصية وهـ يقدروا يتحكموا فيه، هو وافقهم طبعًا، أو بمعنى ثانى أخذهم على قد عقلهم، وأول ما مسك الحكم عرفهم قد إيه هو ملك قوى، فاضطروا يسكتوا ويكونوا تحت طوعه، وإلا فالسجن أو القتل هو المصير، أما الشعب فكان عايش فى ظلم وتعب من كثر الضرائب المفروضة عليه وكثر الحروب اللى بـ يعملها السلطان الغورى. (المجموعة) السلطان الغورى على قد ما كان قوى وبـ يحكم بقسوة، إلا أنه كان مُحب للعمارة، خاصة المبانى اللى فيها زخارف، وكان بـ يأمر المهندسين بتصميم الحدائق، وكان بـ يجيب فيها طيور مختلفة، فعمل مجموعة مبانى جنب بعض يشهد التاريخ بجمالها، وبمهارة الصناع اللى تفننوا فى تجميلها، والمجموعة هى مسجد ووكالة وسبيل. المسجد: مفتوح للصلاة عادى جدًا، لو عاوز تصلى أدخل، ولو عاوز تتفرج برضه، المسجد واسع من الداخل تطلع له بسلم خشب، هـ تلاقى الباب المزين والمزخرف بالنحاس من الخارج، وأول ما تدخل يقابلك مدخل صغير، على شمالك باب المسجد، وكعادة المساجد فى الوقت ده لازم يكون له مأذنة عالية وقبة مزخرفة، والزخارف بـ تبقى واخدة من روح التعشيقات الإسلامية الهندسية، يعنى ممكن تلاقى مربعات فى مثلثات فى متوازى أضلاع وفى النهاية بـ يطلع لك شكل هندسى جميل، غير الكتابات بالخط العربى واللى هـ نتكلم عن واحدة منها فى السبيل. السبيل: فكرته توفير المياه لكل اللى موجودين أو المسافرين ببلاش، علشان كده دائمًا بـ يكون تصميمه بسيط يعنى مجموعة غرف جنب بعضها بـ تطل على مكان واسع فيه أماكن لحفظ المياه، علشان لما ييجى أى مسافر يشيل حاجته فى الغرف، ويريح شوية ويكون فيه مياه يقدر يملأ منها علشان الطريق، فى سبيل الغورى هـ تلاقى جنبه بالظبط تكملة للمبنى عليها نقش طويل وبديع بالخط العربى مكتوب عليه: "أمر بإنشاء هذه القبة المباركة مولانا السلطان العالم العامل العادل المجاهد المرابط المؤيد المظفر المنصور سيف الدنيا والدين سلطان الإسلام والمسلمين محيى العدل فى العالمين قاتل الكفرة والمشركين مولانا السلطان الملك الأشرف أبو النصر قنصوه الغورى"! الوكالة: هو أنت مش هـ تعرف هو بيت ولا قصر ولا وكالة ولا إيه، وإحنا بـ نقول لك كده علشان هو مش واسع لكنه فيه من الزخارف وطريقة البناء تخليك تقول أنا عايز أعيش هنا شوية، هـ تلاقى فناء واسع مستطيل فى المنتصف، بـ يطل عليها من كل جانب حائط وفيه مجموعة شبابيك كلها مزخرفة بالأرابيسك بشكل بديع، وكانت وظيفتها التهوية والإضاءة، والعجيب أن المكان ده كانوا بـ يستخدموه علشان يخزنوا فيه بضاعة التجار، وأحيانًا كان التجار بـ يقعدوا فيه. ومن عام 2005 تحولت وكالة الغورى من مبنى أثرى لمكان ثقافى تابع لصندوق التنمية الثقافية اللى بـ يقدم فيه عروض شهرية فيها الموسيقى والغناء والندوات، ومن أكثر العروض المميزة في وكالة الغورى عرض رقصة التنورة اللى بـ يُقدم هناك، واللى لو شوفته نعتقد أنك هـ تحبه جدًا.

...

متحف إنجي أفلاطون: الحلو ما يكملش في قصر الأمير طاز
اصدرت في: 01/01/2012

"الحلو ما يكملش" هو ده اللي ممكن نقوله عن متحف الفنانة إنجي أفلاطون الدائم، اللي افتتحه وزير الثقافة السابق عماد أبو غازي في بداية عام 2011 في قصر الأمير طاز بعد قيام الثورة، واللي استقبله العالم بحفاوة شديدة لأن مكانة إنجي أفلاطون عند كل اللي له علاقة بالفن التشكيلي كبيرة، ولأن الست دي رغم مكانتها ودورها في مجال الفن التشكيلي كان مالهاش حاجة دائمة باسمها من ساعة وفاتها سنة 1989 لحد ما أخيرًا المتحف ده تم افتتاحه. ولدت إنجي أفلاطون سنة 1924 وتوفيت في 17 أبريل سنة 1989 بعد ما سابت رصيد كبير جدًا من اللوحات، إنجي كانت سيدة أرستقراطية لكنها كانت مهتمة جدًا بالفقراء والبسطاء في المجتمع المصري كله، وخاصة اللي موجودين في الريف المصري وكمان اللي في السجن، والمفارقة أنه تم اعتقالها، وأنتجت خلال فترة الاعتقال دي أعمال رائعة تصور مأساة الفقراء من الفلاحات والعاملات بالحقول، واللوحات دي كانت هي السبب في شهرتها، وساهم في تعريف المتخصصين وعامة الناس بها، كان لها طابع مميز في استخدام الألوان الساخنة جدًا، وده أعطاها طابع مميز وفريد جدًا، وشخصية فنية مستقلة. المتحف بـ يضم 60 لوحة من أعمالها، بـ يتم تغييرهم كل فترة، بالإضافة لمجموعة من المقتنيات الشخصية القيمة زي حامل الرسم الخاص بها، وأدوات الرسم وبواقي ألوان، كمان بعض الإكسسوار الخاص بها، والمتحف فيه كمان شاشة عرض بـ تعرض فيلم وثائقي عن حياتها لزوار المتحف. كانت الفنانة متبعة المنهج السريالي في أعمالها الفنية، والمنهج ده فرنسي حديث بـ يعبر من خلاله الفنان عن العقل الباطن بصورة منطقية، ومن خلال السريالية بـ تظهر أهمية الرمز في اللوحة، ومن أهم الفنانين اللي اتبعوا المنهج الفني ده سيلفادور دالي، ومن خلاله بـ تقدم أفلاطون في متحفها أعمال بـ تصور من خلالها الأحلام والكوابيس بطريقة روائية واضحة زي لوحات "الوحش الطائر" (عام 1941)، و"الحديقة السوداء" (عام 1942)، و"انتقام شجرة" (عام 1943). من خلال المعرض تقدر تعرف التدرج اللي مرت به إنجي في حياتها واللي بدأته من خلال السيريالية، لكن مع مرور الوقت وارتحالها في مصر وزيارتها للأماكن الأثرية واختلاطها بالغلابة، وانخراطها في العمل السياسي خلاها تبدأ تغيير توجهها الفني، وبعد دخولها سجن القناطر كمعتقلة سياسية سنة 1959، وخروجها منه بعد أربع سنين علشان تبدأ مرحلة جديدة في حياتها الفنية أطلقوا عليها المرحلة الواقعية. طبعًا بـ تسألونا: "وليه الحلو ما يكملش؟" نقول لكم... رغم أن قطاع الفنون التشكيلية هو اللي طالب بإنشاء المتحف لأن أعمال الفنانة إنجي أفلاطون كانت موجودة قبل كده في مجمع 15 مايو للفنون المعاصرة، وهو اللي مسئول عن أمانته وهو اللي طالب من سنتين بتخصيص أحد المواقع غير الأثرية الموجودة في حرم قصر الأمير طاز علشان تكون معرض دائم لها إلا أن المندوب اللي القطاع معينه كأمين للمتحف مش بـ يروح، ومش بـ يفتح المتحف اللي محدش يقدر يفتحه غيره لأنه هو بس اللي معاه الكارت اللي أجهزة أمن المتحف مش بـ تفتح غير به، وده في الوقت اللي فيه ناس كثير جدًا بـ تروح من داخل وخارج مصر علشان تشوف أول المتحف، سألنا حارس القصر عن مواعيد حضور أمين المتحف فـ قال أنها متقطعة ممكن ييجي يومين أو ثلاثة في الأسبوع يفتح فيهم ساعتين ويمشي، رغم أن مواعيد عمل المتحف الرسمية من 10 صباحًا لـ 4 عصرًا!

...

ساحة روابط: مسرح متعدد الثقافة
اصدرت في: 15/12/2011

لما تقل التجهيزات وتتعدد العروض ما بين مسرحيات، وأمسيات شعرية كبيرة، وحفلات لفرق كثير، يبقى أنت بـ تتكلم عن مسرح روابط. لكن إيه حكايته؟ نقولك إحنا، "مسرح روابط" أو "ساحة روابط" زى ما بـ يحب المسؤولين عن المكان يسموه، هو واحد من المشروعات الكثير اللى بـ يعملها التاون هاوس. التاون هاوس مؤسسة غير ربحية هدفها نشر الثقافة بكل أشكالها، وبـ تعتمد على التمويل الخارجى من المنظمات الثقافية الأوربية، مدير المكان الأستاذ ياسر جراب شخص مثقف بـ يعمل خطط طويلة للمكان ممكن تمتد إلى ستة شهور لأنه شايف أن ده أفضل من العمل العشوائى. أما عن ساحة روابط فهى مشروع من مشاريع التاون هاوس، ويمكن أكثرها شهرة، عبارة عن مسرح أرضى متوسط الحجم، الإضاءة فيه معقولة مش قوية ومش بسيطة، وسماعات مواجهة للجمهور علشان ما تعملش إزعاج كبير، علشان كده قوتها الصوتية مش عالية قوى، وأمام المسرح فيه أماكن الجمهور معمولة بنظام المدرجات علشان الناس تعرف تتفرج على العروض، خاصة أن المسرح أرضى مش خشبة عالية، وأحلى ما فى المسرح الأرضى أنه بـ يكسر الحاجز بين الجمهور والعرض، فـ تحس أنك داخل العرض ومشترك معاه. روابط فيه كثير من الهدوء لما تعدى من جنبه، تحس أنك داخل معبد قديم مثلاً، ولما يبقى فيه حدث شغال تلاقى زحمة وناس كثير بـ يشاهدوا اللى حاصل، وده راجع لشهرته فى منطقة وسط البلد، ولأنه بـ يقدم فن أغلبه من نوع جديد، ويمكن ده واحد من العيوب اللى الناس انتقدت الساحة فيها وهو اعتمادهم على عروض جديدة فيها تغيير للشكل المعتاد للعروض، يعنى تلاقى عروض فيها أداء بالجسد والصوت والمزيكا، وتلاقى عروض ثانية داخل فيها الكمبيوتر، وشاشات العرض وحاجات كده. لكن برضه عندهم عروض ثانية تجاوبت مع الناس وقدمت لهم احتفال كبير جدًا بعد الثورة اسمه "ألف شاعر" دعوا فيه عدد كبير من الشعراء فى مصر وكانت أمسية كبيرة ومهمة، وكان فيه عروض ثانية مرتبطة بالثورة فيها حكى وارتجال من الحاضرين يحكوا عن اللى حصل لهم فى الثورة والمواقف اللى تعرضوا لها. باختصار لو عايز تروح مكان فيه جديد وفيه مشاركة وفيه قيمة فنية، انصحك تروح روابط.

...

بيت الهراوي: بيت العود العربي اللي من القرن الـ18
اصدرت في: 20/04/2011

بيت «الهراوي» وبيت «السحيمي» وبيت «زينب خاتون» كلها بيوت أشخاص عاشوا ايام فترة حكم المماليك ومعظمها موجود في القاهرة الإسلامية وشارع المعز. وعادةً زوار بيت «الهراوي» بـ يكونوا من المغرمين بمعمار القاهرة في القرن الـ18. البيت مشهور بالحفلات الموسيقية اللي بتـ تعمل هناك أكتر من المعمار المميز للمبنى، وربما لتأكيد المعلومة اللوحة اللي مكتوب عليها "بيت العود العربي" على المدخل أوضح من اللي جنبها اللي مكتوب عليها "بيت الهراوي". طول ما انت هناك هـ تبقى سامع بروفات بيت العود و عادة بـ يكون في حفلات موسيقى عربية او شعبية والموسم بـ يبقى في ذروته في رمضان و بـ تبقى الحفلات شبه يومية. وعشان المكان بـ يتم استخدامه للحفلات أكتر من أي حاجة تانية عمليات التجديد اللي حصلت اهتمت بتعديل المكان عشان يناسب الغرض ده أكتر من أهتمامها بتجديد المبنى لنفسه أو ترميمه، يعني فيه غُرف كاملة زي ما هي من غير تجديد. أول ما تدخل من البوابة هـ تلاقي المسرح المنصوب في وسط ساحة كبيرة على شكل حوش المدرسة والبيت نفسه داير ما يدور الحوش وهـ تميّز الشبابيك الأرابيسك والمشربيات في الأدوار العالية، لكن للأسف فيه قضبان حديد محوطّة المسرح وبـ تداري المشربيات والشغل الجميل اللي وراها. على الشِمال فيه صالة الإستقبال الرئيسية بسقفها الخشب العالي المدهون والمزخرف بإتقان وفيه دواليب أرابيسك مسنودة على الحيطان زخرفتها تجنن والأرضيات كلها رخام، وفي وسط القاعة فيه بير مية. يُفضل إنك تِخلَّي القاعة دي للآخر عشان ما تُحبطش من باقي المكان بعد ما تشوف الإبداع ده. ورا المسرح أوضة تانية موجود فيها شوية مقتنيات ليها علاقة ببعضها ما عدا الكراسي الحديد اللي مالهاش علاقة بالموضوع. ورغم أن معمار وتصميم الجزء الباقي من البيت نفسه مش مبهر زي أول قاعة بس له نفس الشكل المميز لمعمار القاهرة القديمة، فبالتالي اللي تكون أول تجربة له في بيوت القاهرة القديمة مع «الهراوي» ممكن ما يبقاش متحمس أنه يزور باقي الأماكن الشبيهة. فيه حمام واسع جداً في آخر المدخل اللي في الدور الأرضي ومعمول على الطراز القديم سقفه زجاجي ملون وعلى شكل قبة. معظم الحيطان والمداخل مدهونة باللون الأصفر ومجهزة بكراسي وترابيزات، ومع إن الطبيعي إن الأماكن اللي مش مرممة تكون مقفولة، إلا أن في آخر ممر من الممرات فيه جزء مش متشطب وخطر ، فيه تقريباً حفرة عرضها كذا متر بين آخر الممر وبير السلم اللي بعده! فكرة هايلة أنه يتم تجديد بيت أثري بغرض أنه يكون مجهز للحفلات وتقديم مواهب جديدة بس كان لازم يكون التجديد أشمل من كده وما كانش يتم الإفتتاح قبل ما يكون تم ترميمه وتجهيزه بالكامل. الزيارة بالنهار أو بالليل ومافيش أي عرض شغال مش هـ تبقى مسلية وما تستاهلش. الزيارة هـ تكون امتع لو كان في حفلة أو لو رايح تاخد حصة تعليم عود في بيت العود، بس ما تروحش لمجرد زيارة المكان. عامةً الدخول للمصريين بجنيه، وللأجانب بـ15 جنيه.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح