ستوديو صوت فن وثقافة in Cairo, Egypt

فن وثقافة

أميديوس: ستوديو تسجيل وبروفات في الزمالك
اصدرت في: 08/02/2012

ستوديو صوت جديد، يمكن الوحيد في الحي الراقي، في شارع 26 يوليو بعد محل «ديادورا» وقهوة «رباعيات الخيام» على نفس الصف، الستوديو في أول عمارة على الصف الشمال في أول شارع جانبي بعد القهوة، في الدور الأول. ستوديو «أميديوس - Amadeus» له ريسبشن ظريف مليان رسومات وبوسترات وفيه عدد من المجلات والموسوعات الخاصة بالمزيكا اللي ممكن تقعد تقرأها وتتفرج على الصور اللي فيها وتنسى نفسك، وفيه كاونتر ممكن تعمل عليه أي حاجة تشربها أثناء فترة انتظارك. غرفة البروفات مستطيلة الشكل ومساحتها صغيرة نسبيًا وأحد جدرانها زجاجي علشان يسمح بالتواصل مع غرفة التحكم المجاورة أثناء البروفة وبالأخص أثناء التسجيل. المعدات في غرفة البروفة كلها حديثة وفي حالة ممتازة، سماعات ياماها وأمبليفاير Fender للجيتار مش موجود في أي حتة، والدرامز ماركة Premier وصوته جيد جدًا، وصوت الباص جيتار جيد فقط، وتوزيع السماعات والأمبليفيرات معمول بشكل احترافي علشان كده الصوت مجسم ونقي ومش هـ تسمع أي صفارة أو ذبذبة غير مرغوب فيها. ولولا أن المساحة صغيرة شوية كنا ممكن نقول أنه أحسن مكان لبروفات الفرق اللي عدد أعضائها كثير وبـ يستخدموا ميكروفونات كثير وبـ تعمل الصفارة أياها لما تكون قريبة من بعضها أو من السماعات. لكن المكان هنا مثالي لأي فرقة لا يزيد عدد أعضاءها عن 4 أفراد، أكثر من كده هـ تبقوا قريبين قوي من بعض. جودة التسجيل موضوع نسبي لو كنا متفقين على أن تسجيل الصوت في مصر لسه ما ارتقاش للمستوى المطلوب، خاصة في موسيقى الـ Underground وبعيد عن شركات الإنتاج المشهورة، لكن المنافسة اللي بين الستوديوهات الكثير اللي فتحت مؤخرًا أكيد بـ تعلي جودة التسجيل يوم بعد يوم. مهندس صوت محترف هو اللي بـ يقوم بعملية التسجيل والصوت هـ يبقى أفضل من المتوقع، واللي لازم نقوله أن أصحاب المكان والمشرفين على التسجيل أشخاص متعاونين وظرفاء جدًا، وهـ تشعر أنك واخد راحتك تمامًا في التعامل وكأنك صاحب مكان أو تعرفهم من زمان. الستوديو بـ يعمل زي ورش عمل وحصص تعليم آلات مختلفة زي الجيتار والدرامز والباص جيتار، وممكن تبيع وتشتري آلات موسيقية وإكسسوارتها. إيجار الستوديو لمدة ساعة للبروفة بـ يكون 40 جنيه، وساعة التسجيل بـ 150 جنيه، والستوديو بـ يشتغل طول أيام الأسبوع من الساعة 2 ظهرًا لحد 2 بعد منتصف الليل. وفي التسجيل بـ يتم عمل جميع الخطوات بداية من التراكات الخاصة بكل آلة لحد المكساج والماسترينج. سعداء بوجود ستوديو زي «أميديوس» في الزمالك، ونتمنى أنه يستمر ويتوسع علشان يبقى مركز ثقافي موسيقى متكامل زي ما أصحابه بـ يحلموا.

...

فوق السطوح: ستوديو بروﭬات موسيقية في مصر الجديدة
اصدرت في: 19/01/2012

بعد ما قفلت معظم ستوديوهات الصوت الموجودة في مصر الجديدة أبوابها في الكام سنة اللي فاتوا، وكان أشهرها ستوديو Room 5 اللي كان موجود في روكسي وستوديو Highway القريب من ميدان سانت فاتيما، كانت الخيارات الموجودة أمام المزيكاتية في هليوبوليس والمناطق المحيطة قليلة ومحصورة في أماكن أبعد في مدينة نصر أو وسط البلد. لكن بعد افتتاح ستوديو «فوق السطوح» نتوقع عودة "الموسيقى" مرة ثانية لمصر الجديدة وضواحيها خصوصًا أن المكان فعلًا جيد وأحسن من منافسين كثير في أماكن ثانية. الستوديو موجود في شارع الشيخ حسن منصور الموازي لشارع الحجاز بالقرب من ميدان المحكمة، أو في ظهر نادي النصر الرياضي. يعني لو المحكمة في ظهرك وأنت رايح ناحية كوبري التجنيد هـ يبقى في أول شارع يمين اللي على ناصيته وحدة الإطفاء المدنية. هـ تمشي حوالي 200 متر قبل ما تلاقي الستوديو على إيدك اليمين. باب حديدي مفتوح على الشارع مباشرة، وهـ تلاقي أمامه مساحة كبيرة لركنات العربيات. الستوديو كان في الأصل محل بلاي ستيشن، هـ تلاقي غرفة في الدور الأرضي فيها شاشات وأجهزة ألعاب وكان اسمه "أجمد واحد". لكن دلوقتي بقى الأساسي أنه ستوديو بروﭬات صوت (مش تسجيل) وبقى البلاي ستيشن حاجة على الماشي كده. في الدور الأرضي زي ريسبشن فيه كمبيوتر وطول الوقت هـ تسمع مزيكا ظريفة بـ يشغلوها هناك. وفي الدور العلوي فيه غرفة البروﭬات اللي مساحتها صغيرة نوعًا ما، وهي مربعة الشكل وتوزيع المعدات فيها معمول بشكل مناسب. فيها درامز ماركة Pearl فيه الـ 5 قطع الأساسية ونحاسات مقاس 20 و16 ماركة Paiste وأمبلفايرات ماركة Behringer واحد للباص جيتار بقوة 300 واط، والثاني للجيتار موديلV-Tone GMX 212 بقوة 120 واط. والميكسر من نفس الماركة موديل SL3242 FX-PROوفيه 4 سماعاتMontarbo وعدد كبير من الميكروفونات والستاندات الخاصة بها، وممكن تطلب ستاند خاص للكيبورد أو حامل النوتة الموسيقية. وفيه ميكروفون مخصوص للـ Bass Drum. الصوت يعتبر جيد جدًا، وعزل الصوت معمول بطريقة مثالية. صحيح ناقصه لمسات فنية بسيطة، وأحيانًا أسلاك التوصيل (Cables) بـ تبقى بـ تلمس، لكن ممكن تتفادى المشكلة دي بأنك يكون معاك الأسلاك بتاعتك. وصاحب الستوديو الأستاذ كمال غانم هـ يساعدك لآخر لحظة في توصيل معداتك ومش هـ يسيبك إلا لما تكون مستريح 100% للصوت اللي طالع. وبشكل عام الجيتارات صوتها بـ يبقى كويس هناك لأن السماعات والأمبلفايرات موزعة بطريقة محترفة، لكن أحيانًا لو وضع الميكروفونات مواجهة للسماعات هـ تسمع الصفارة الشهيرة اللي بـ تخرم الودان، فـ تأكد أنك مثبت الميكروفون في الوضع الصحيح. الحجز بـ يكون بالتليفون والساعة بـ 30 جنيه، وممكن تأخذ أي عدد من الساعات على مدار الـ 24 ساعة، طبعًا بالتنسيق مع صاحب الستوديو، لأن ممكن أوقات يبقى ما ينفعش يبقى فيه حجوزات أصلًا، لكن مبدأ الـ 24 ساعة 7 أيام في الأسبوع موجود. السعر ممتاز بالنسبة لمستوى الصوت ومكان الستوديو الحيوي. لازم أي آلات غير الدرامز تكون معاك وأنت رايح لأن مافيش إيجار لأي آلات من هناك. ستوديو «فوق السطوح» رغم اسمه اللي يوحي بأنه "فقايري" على الآخر إلا أنه مكسب حقيقي لكل العازفين والفرق الموسيقية القريبين من مصر الجديدة، وبـ نرشحه كمان لأهل الجيزة والمعادي رغم أنه بعيد عليهم، لكن المكان يستاهل التجربة.

...

أرابيسك: مش بس راديو
اصدرت في: 17/12/2011

شفت قبل كده مكان بث الراديو؟ يعنى شفت الأجهزة اللى بـ تعمل إرسال والستوديو بتاع الصوت وحاجات كده؟ النهاردة هـ ندعيك أنك تروح راديو «أرابيسك» وتشوف كل ده وحاجات ثانية كمان، لكن خلينا الأول نعرف موضوع أرابيسك. شركة أرابيسك ليمتد هى شركة إنجليزية متخصصة فى إنشاء الإذاعات بشكل عام، لها مقرين الأول فى ألمانيا والثانى فى مصر، والفرع اللى فى مصر قائم على تعاون مشترك مع موقع مصراوى، ومدير الراديو هو الإعلامى أحمد سمير. أرابيسك لها 3 إذاعات: إذاعة أرابيسك (وهى إذاعة المغترب العربى فى أوربا)، وإذاعة أرابيسك مصر، وراديو مدينة مصر (مشروع خدمى هـ ينطلق قريبًا). لما تروح مكان الراديو فى وسط البلد هـ تعرف أننا بـ نتكلم عن حاجة مختلفة، بمعنى أنك أول ما تدخل المكان هـ يقابلك غرفة على الشمال دى ستوديو الراديو، هـ تلاقى فيه أجهزة البث اللى بـ يستخدموها وممكن تشوف المذيع أو تقابله هناك، وعندهم شعار لطيف عاجبنا جدًا بـ يقول "راديو أرابيسك.. مصر اللى بجد". فيه مكان لاستقبال الضيوف وتوضيح أى استفسار عن أرابيسك، وبعدين هـ تلاقى غرفتين واحدة مكتبة فيها مجموعة كتب مخصصة للقراءة فقط علشان لو عاوز تقعد تقرأ فى المكان وتشرب حاجة، وفيه مجموعة كتب ثانية مخصصة للبيع، والجميل أنهم مش محددين دار نشر معينة بـ يتعاملوا معاها لكن فيه كتب لمجموعة كبيرة من دور نشر وفى كل المجالات. خد عندك بقى الاختلاف اللى بجد هناك، فيه حاجة اسمها "ستوديو أرابيسك للثقافة والإعلام" ودى خدمة بـ يقدمها المكان للثقافة والمثقفين أهم خدمة فيهم هى عمل حفلات التوقيع لأى كاتب مجانًا، من غير أى مقابل مادى، وباعتبار المكان فى وسط البلد فالخدمة تعتبر بجد جميلة، لأنك لو عاوز تعمل حفلة توقيع لكتابك، أهم حاجة عندك تختار مكان سهل الناس توصل له وشيك، والاثنين متوفرين فى أرابيسك. المكان كمان بـ يقدم ورش سيناريو وفيه ورشة لسه منتهية كانت مع السيناريست "باسم شرف" وفيه ورش تنمية مهارات، وفيه كمان ورش تصوير، وكل اللى بـ يقدموا الورش دى خبراء فى مجالهم. يعنى لو عاوز تروح مكان تسمع فيه راديو شبابى، وتقرأ كتاب وتسمع ندوة وتشرب حاجة وكل ده فى وسط البلد تعالى أرابيسك.

...

ستوديو وسط البلد: الستوديو رقم واحد للفرقة رقم واحد
اصدرت في: 20/04/2011

فرقة «وسط البلد» قررت تعمل لنفسها ستوديو ويكون مكان للبروﭭـات والتسجيل الخاص بيهم، وفي نفس الوقت سمحت أنه أي فريق أو مازيكاتي يعمل بروﭭـاته هناك مقابل 25 جنيه في الساعة. المكان سهل الوصول ليه من كل حتة لأنه قريب من محطة مترو أنفاق «سعد زغلول» في شارع جانبي متفرع من شارع «القصر العيني» اسمه شارع «صفية زغلول»، والشارع هادي وممكن تلاقي ركنات بـ سهولة لو معاك عربية. الإستوديو عبارة عن شقة في دور أرضي ليها مَنزَل كام سلمة وباب إزاز على الشارع مباشرة. هـ تدخل من الباب تلاقي مكتب الحجوزات في الوش، هـ تمشي في طرقة طويلة على اليمين بـ تودي على صالة إنتظار فيها كمبيوتر مشغَّل مزيكا طول الوقت، وعلى الشمال في أوضتين، واحدة للبروﭭـات والتانية للتسجيل. في صالة الإنتظارالديكور ظريف جداً بالكراسي البامبو والطبول اللي في كل الأركان، والسقف عبارة عن بوسترات وصفحات من مجلات موسيقى عالمية زي «Total Guitar» و«kerrang» و«Rolling Stones» ملزوقة بشكل عشوائي، والحمام كمان فيه نفس البوسترات. أوضة البروفات مساحتها مش كبيرة، متبطنة باللون الأزرق الغامق وتوزيع السماعات والأمبلفايرز فيها إحترافي جداً بحيث تسمع أحسن صوت ممكن في كل أجزاء الأوضة، فيه درامز «تاما – Tama» عليه نحاسات «زيلدﭼن – Zildjian»، صوتها كويس وحالتها كويسة، وفي سماعتين «ياماها – Yamaha» في أول الاوضة وآخرها صوتهم نقي بس مش قوي كفاية وفي أمبلفاير للباص جيتار نوعه «لاين 6 – Line 6» محتاج شوية تظبيط عشان يطلع صوت كويس، ومفيش أمبلفاير للإليكتريك جيتار "Lead Guitar" لأنه بـ يتوصل على الميكسر زي الميكروفونات، الميكسر كمان « Yamaha» فيه 12 مكان للتوصيل "12 Channels Mixer" وحالته ممتازة مش زي ستوديوهات بروﭭـات تانية، وبـ شكل عام المعدات كلها جديدة وأصلية وحالتها ممتازة. أوضة التسجيل ليها معداتها الخاصة بيها زي الميكسر والميكروفونات وفلاتر الصوت والحجز بـ 150 جنيه الساعة وبـ يكون معاك مهندس الصوت المتخصص وممكن يساعدك في التوزيع لو معاك مزيكا محتاجة آلات تانية وتوزيع موسيقي. مفيش تأجير آلات موسيقية ولازم كل حد يجيب أدواته معاه، دي سياسة المكان رغم أن الإستوديو مليان آلات إيقاع وجيتارات خاصة بفرقة «وسط البلد» بس طبعاً ليهم مطلق الحرية أنها تبقى للإستخدام الشخصي بس. أرقام تليفون الحجز بـ تتغير كتير وممكن يحصل لخبطة في الحجز، بس المعاملة ممتازة فحتى لو ده حصل هـ يتم حل المشكلة فوراً أو التعويض المناسب. في بوفيه ممكن تشرب فيه شاي أو نسكافيه ومشروبات دافية تانية بأسعار بسيطة بس ممنوع تدخل بيها أوضة البروﭭـات. عشان أصحاب الإستوديو أصلاً موسيقيين محترفين وعاملين المكان قبل أي حاجة للإستخدام الشخصي؛ هـ تلاقي الجو العام هادي ومنظم ويساعد على أنك تعمل بروﭭـة كويسة ومنتجة.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح