معارض فن وثقافة in Cairo, Egypt

فن وثقافة

مركز الهناجر للفنون: الفن الجديد داخل ساحة دار الأوبرا المصرية
اصدرت في: 26/10/2015

يعني إيه هناجر؟ سؤال أولي جاء فى دماغنا وإحنا بـ نفكر نكتب عن مركز الهناجر للضيوف... الهناجر زي ما نعرفها أنها المستودعات الكبيرة اللي بـ تستخدم كمخازن أو ورش صيانة للمعدات الثقيلة.. وهنا نقف إيه علاقة المستودعات بالفن.. وقفنا كثير وفى الآخر وقفنا عند علاقة مخزن الإبداع اللى وقت الحاجة بـ يطلع الثقافة للناس وقت ما يحتاجوها.. وهو ورشة صيانة للفن علشان يطلعوا المنتج الثقافي اللى يليق. الفن: كانت فكرة تكوين مركز ثقافي بـ يقدم خدمة لشباب المثقفين علشان يبقى نواة العمل فى وجود المركز علشان يصبح منارة للإشعاع الثقافى.. تم افتتاح مركز الهناجر للفنون يوم 20 سبتمبر 1991 واللى افتتحه وزير الثقافة السابق فاروق حسني وكان معاه وقتها السيدة الأستاذة الدكتــــورة هدى وصفي رئيسة المركز، وقدم عرض المحبظطية إخراج محسن حلمي فى الافتتاح. المركز: بـ يتكون مركز الهناجر من قاعة عرض مسرحي واللى كانت بـ تتكون من قاعتين متصلتين وفى النصف خشبة المسرح وكان بـ يعتبر أول مســـرح من نوعه في الشرق الأوسط بالشكل ده.. وكمان فيه قاعة معرض فنون تشكيلية وهي بـ تمثل واحدة من أكبر قاعة فنون تشكيلية من ناحية الحجم في مصر.. وهو بـ يقدم العديد مــن الأنشطة الثقافية. اللي بـ تخدم كل شرائح المجتمع خاصه الشباب.. وكمان فيه أنشطة مختلفة فى مجال المسرح.. منها العروض المسرحية لكبار المخرجين اللى قدموا عروضهم عليه والمركز لا ينسى الشباب وبـ يعتبر فى الوسط الثقافى أنه بـ يمثل "كارت عبور" للعرض اللى بـ يُقدم فى الهناجر، وده راجع لاختيارهم العروض بشكل جيد.. وتنوعت العروض فيه من مسرح بسيط إلى عروض متداخلة ومسرح الشنطة وعروض الحكي وغيرها. رسالتهم: ترويج كل أنواع الفن ومحاولة التقدم بالمسرح وشباب المسرح وإظهار أنواع جديدة من الفن والشباب المبدع... وصراحة دي رسالة تحترم ولازم ندعمها ونحاول نخلي الفن يظهر بشكل جيد.. خاصة وأنها بـ تقدم حاجات مختلفة ومتنوعة وبـ تخدم ألوان مختلفة من الفنون زي ملتقى الخزف الدولي وبعض عروض مهرجان القاهرة السينمائي، ومسرحيات زي "ميتانونا، الحفرة، أريوس، بارانويا" وفيه ورش زي ورش الرقص الحديث، وبعض الندوات زي حفلات التأبين ومناقشة بعض القضايا اللى على الساحة الثقافية.. زوروا المركز واستمتعوا بالكافيتريا اللى هناك واللى أسعارها عادية.

...

مدرار: معرض الطيب والشرس والحذاء القرمزي
اصدرت في: 20/08/2015

يعتبر جاليري مدرار من المنصّات الفنية المهمة، واللي بـ تخلق حوار شيق وتعاون مثمر بين الفنانين المعاصرين في القاهرة، وده كان واضح جدًا في أحدث معارضهم الطليعية "الطيب والشرس والحذاء القرمزي". "الطيب والشرس والحذاء القرمزي" هو معرض اتعمل أساسًا لعرض أعمال اثنين من المواهب الواعدة، محمد المغربي وأحمد توفيج، أول قطعة لفتت انتباهنا كانت مجموعة من الرسومات الجرافيك واضح أنها بـ تمثل مراحل تنفيذ فن الرسوم المتحركة، الأعمال دي ما يعملهاش غير أحمد توفيج وهو فنان شاب في العشرينات وبـ يدرس في المعهد العالي للفنون التطبيقية، وهو متخصص في صناعة الكوميكس والرسومات الديجيتال. معظم لوحات توفيج فيها تنوع بين الشخصيات، من أبطال خارقين بأجنحة عملاقة، لمخلوقات قبيحة بأسنان مخيفة وجلد أخضر غامق، واحدة من الأعمال فيها مخلوق مرعب على خلفية بيضاء وشكله كأنه بـ يرمي نار أو بـ ينفخها. وإحنا بـ نتفرج على باقي اللوحات في الجاليري، لاحظنا وجود معالجات واقعية في اللوحات للشخصيات والموضوعات، اللوحات دي خاصة بمحمد المغربي، اللي بـ يعتمد على الفن المعماري في صناعة أعماله، محمد بـ يرسم خطوط متقطعة لتحديد رسوماته مع خطوط ثانية وأرقام إلكترونية صغيرة ببار كود علشان يؤكد على فكرة الاستهلاكية اللي إحنا عايشينها. يمكن أهم عنصر في أعمال محمد المغربي هي فكرة استخدام ميكروسكوب علشان يشوف الحقيقة الكاملة للأشكال قبل رسمها، وقدر يشرح الموضوع ده بامتياز في جملة كتبها لأحد أعماله: قالت سلمى "دائمًا بشوف الأشياء تحت المايكروسكوب لمعرفة ماهيتها، طب لو وضعت الحذاء القرمزي تحت المايكروسكوب؟ استخدام سلمى للمايكروسكوب هدفه كان الحصول على معلومات، لأن المايكروسكوب يعتبر عين تقدر سلمى تشوف عن طريقها حقيقة الأشياء حولها" محمد المغربي من مواليد 1985، وتخرّج من قسم العمارة من المعهد العالي للتكنولوجيا سنة 2007. محمد بـ يستخدم وسائط متعددة في أعماله تشمل الرسم والتلوين والطباعة والرسومات التوضيحية، واحدة من أعماله عبارة عن رسمة أنيقة لحيوان الرنة على لوح خشبي صغير، وسط خلفية فاضية تمامًا وده بـ يزود التركيز على الرنة أكثر من المشهد نفسه. "الطيب والشرس والحذاء القرمزي" معرض مودرن يتميز بالتشويق، صحيح أعمال الاثنين مختلفة تمامًا، بس كملوا بعض بشكل لطيف، وأضافوا لمسة مودرن جميلة لجو المعرض العام، بشكل عام، المعرض أكيد يستحق زيارة من عشاق الفن المعاصر.

...

قاعة الزمالك للفن: معرض لعب عيال للفنان خالد سرور
اصدرت في: 20/12/2014

عادة بـ ترتبط المعارض الفنية في ذهن الواحد بالجدية والعمق، وقليل جدًا لما بـ نزور معرض ونلاقي موضوعه خفيف ومبهج؛ معرض الفنان خالد السرور "لعب عيال" في قاعة الزمالك للفن – Zamalek Art Gallery من أكثر المعارض المبهجة اللي زرناها في الفترة الأخيرة. ومش بس المعرض مميز في عنوانه وموضوعه، ده كمان تناول الموضوع في حد ذاته مختلف وجرئ. الفنان خالد سرور من مواليد دمنهور 1965، وتخرج من كلية التربية الفنية سنة 1988، درس في كلية التربية الفنية وله معارض محلية كثيرة، بالإضافة إلى أن عدد كبير من الأماكن العامة بـ تعرض أعماله بشكل دائم زي جامعة حلوان، كليّته في الزمالك ومتحف الفن الحديث. ومعرضه الحالي هو امتداد لمشوار فني طويل اهتم فيه بموضوعات مختلفة زي الموروثات الشعبية ورسوم الأطفال، واللي واضح المزج بينهم بالذات في المعرض الأخير. متعودين ندخل قاعة الزمالك للفن ونلاقي لوحات ألوانها هادئة ورزينة، فكان بالنسبة لنا غريب أننا نلاقي لوحات ألوانها طفولية صارخة وواضحة، والحقيقة أن اللوحات نجحت في أنها تنقل لنا الشعور بالبهجة؛ الفنان خالد سرور تناول فكرة رسوم الأطفال لأن ببساطة وجهة نظر الأطفال عن العالم اللي إحنا عايشين فيه أوسع وأقل واقعية من وجهة نظر أي إنسان مهمة كانت قدرته على التخيل. من أول اللوحات اللي أبهرتنا كانت لوحة فيها مجموعة من لاعبي السيرك. وبالرغم من أن الفنان متبني فكرة الرسم بخيال طفل وبالتالي اللوحات خالية من واقعية المنظور، إلا أن الفنان قدر أنه يستبدل المنظور بتقسيم اللوحة لمساحات لونية مختلفة ومحددة باللون الأسود. وللتأكيد على "اللا واقعية" رسم قطة باللون الأصفر الفاتح في أسفل اللوحة. من اللوحات اللي لفتت نظرنا كانت لوحة لصياد سمك، بنفس النمط الطفولي للوحات الأخرى ولكن الألوان في اللوحة دي كانت متناسقة أكثر –رمادي فاتح، ولونين صريحين زي الأزرق والأصفر- وكذلك ترتيب العناصر وتكوينهم في اللوحة ككل. لاحظنا اهتمام الفنان بتأكيد على مصرية لوحاته، ففيه لوحة لبنت كأنها جالسة على سطح بيت ريفي وفي الخلفية أرض عليها الحيوانات وأشجار ونخيل. اللوحة تقسيمها شبه هندسي وغالب عليها الألوان الساخنة. وفيه لوحة ثانية لأسرة، لاحظنا أن الفنان أضاف أبراج الحمام للخلفية. ده غير لوحات ثانية فيها موتيفات شعبية مختلفة زي الطيور والأشكال الهندسية زي المثلثات الموجودة في بيوت الريف والنوبة. آخر لوحة كانت لثلاثة أطفال بـ يعزفوا على آلات موسيقية زي الدف، والمزمار والأكورديون. اللوحة تكوينها أبسط من تكوينات اللوحات السابقة. الاهتمام بالتفاصيل واضح في ألوان ملابس الأطفال وأشكالهم، أما الخلفية فهو بيت شبه بيوت النوبة ومن وراءه سماء بلون أزرق فاتح. بالرغم من لوحات المعرض كلها بـ تجمع بينها تفاصيل موحدة زي أن جميع عناصر اللوحة محددة بالون الأسود، والتأكيد على البيئة المصرية سواء ريف، ساحل أو حتى مدينة. إلا أنك هـ تقف أمام كل لوحة وكأنها أول لوحة تشوفها في المعرض.

...

زمان: الحياة على طريقة زمان فى المعادى
اصدرت في: 23/03/2014

"زمان".. أول ما هـ تسمع الاسم طبيعى ييجى فى بالك كل حاجة من الزمن الجميل يعنى من الأربعينيات والخمسينيات... وهكذا، زمان الناس كانت بـ تتلم على القهوة تتكلم على كتاب جديد فى السوق أو تتحاكى بانبهار عن فيلم جديد فى السينمات، أو بـ يتنهدوا وهما بـ يفتكروا أغنية لسومة ولا حليم ولا فايزة ولا فريد وكمان يقعدوا يسمعوا باهتمام للي عنده معلومة جديدة يقدمها للناس. كلمات تعريفية كتبها فريق "كافية زمان" على صفحتهم على الفيسبوك. "زمان" عبارة عن مبادرة شبابية بدأت من فترة قليلة 4 شهور تقريبًا، ولكن بدأت تسمع على المستوى الثقافى بسرعة.. "زمان" ده كافيه مفتوح لأى هاوى أو حتى محترف أو حتى عاوز يتعلم حاجة جديدة أو يعلِم، فى الفترة الأخيرة سمعنا كثير وكتبنا عن كافيهات بـ تخدم الثقافة والفن بشكل عام، بس لما روحنا "كافيه زمان" كان فيه شوية اختلافات ومميزات ممكن تميزه عن الأماكن الكثير اللى ظهرت فى الفترة الأخيرة، يعنى مثلاً مكانه هادي جدًا.. أي نعم تعبنا لحد ما وصلنا لكن اكتشفنا أن ده الطبيعي لو رايح أول مرة، كمان الخدمة كويسة بالإضافة إلى الأسعار اللى على قد إيدك سواء للكورسات أو حفلات أعياد الميلاد أو حتى لو كنت ناوى تأجر المكان لبروفة أو حتى للعرض أو للتصوير، بالإضافة لأسعار الأكلات السريعة والحلويات والمشروبات، ده غير أن فيه يوم خاص للأكلات البيتى. أول ما هـ تدخل المكان هـ تحسه عادي، الموضوع هـ يحتاج منك شوية تأمل علشان تكتشف المكان، هو عبارة عن دورين: الأول والأرضى، أول ما هـ تدخل هـ تلاقى مجموعة ترابيزات وبار لتقديم المشروبات، وعلى شمالك المكتبة فيها مجموعة كتب كبيرة للاقتناء أو الاستعارة أو الشراء، بعد كده بـ تنزل الدور الثانى أو البدروم هـ تلاقى فيه قاعة تساعى 100 فرد فيها قعدة بلدى يتم فيها أغلب الأحداث سواء للعروض أو البروفات أو الندوات الثقافية أو الورش، وكمان فيه غرفة بلاي ستيشن. أى نعم هو مُتبع الطراز القديم سواء فى ديكورات المكان المكونة من راديو من الأربعينيات والتليفون من الخمسينيات والطربوش والبيشة وحاجات ثانية كثير ممكن تتصور بها، والصور القديمة للفنانين وفنانات الزمن الجميل اللى مالية المكان والقعدة العربى والمشروبات اللي بـ تتعمل علي سبرتاية والشاى اللى فى البراد... وهكذا، إلا أنه بـ يفتقد الطراز ده فى ديكورات الكراسى المودرن اللي بـ تنتمى تقريبًا للوقت الحالى والدهانات كمان ألوانها حديثة وده خطأ يوخذ عليهم، لكن المجمل نقدر نقول عليه مكان مريح نفسيًا. بالنسبة للأسعار هـ نبدأ بالورش، طبعًا بما أنهم لسه مبتدئين مش هـ تلاقى كورسات كثير لكنها على المستوى التعليمى كويسة ومفيدة، ورشة العود والكمان والناى والرسم كل منهم سعرها 350 جنيه لمدة شهرين لكل واحدة، ورشة التصوير سعرها 150 جنيه شهر واحد، وفى آخر كل ورشة بـ يتم عمل معرض لبيع المنتجات اللى تم الشغل عليها أثناء الورشة بأسعار رمزية. كمان ممكن لو عندك بروفة ومحتاج مكان هادى للتدريب مش هـ تلاقى أفضل من المكان ده، أما بالنسبة لو كان عندك عرض مسرحى أو أى عرض ثانى أو حتى عندك تصوير ومش لاقى مكان، "كافية زمان" بـ يوفر لك المكان، عبارة عن قعدة عربى تتسع لـ 100 فرد تقريبًا، وبـ تأخذ منك مبالغ رمزية بعد أول ساعة مجانية 100 جنيه للساعة الواحدة، وده طبعًا مقارنة بأماكن ثانية مبلغ بسيط جدًا، وتدعيمًا منهم للشباب المبتدئ المكان بـ يكون مجانًا للبروفات. "كافيه زمان" كمان ممكن يحتفل معاك بعيد ميلادك وينظم لك حفلة بأسعار بسيطة، يعنى لو كان معاك مجموعة فيها 15 فرد تدفع 250 جنيه وتأخذ مشروبك المفضل وتحتفل أنت وأصحابك فى جو مختلف ولطيف، لو كان العدد معاك أقل من 15 فى حد أدنى 25 جنيه للفرد. ده غير الحفلات الموسيقية وآخرها التخت الشرقى وحفلات كاريوكى الأسبوعية بتذاكر مخفضة.

...

مقهى ريش: التاريخ البديل للمثقفين
اصدرت في: 26/01/2013

بناه ثرى ألمانى وباعه لواحد من الرعايا الفرنسيين اسمه هنرى بير واللى سماه "ريش" على اسم ريش كافيه الشهير فى فرنسا، وبعدين آل المقهى لمجدى ميخائيل صاحب مقهى ريش الحالى وهو أول مصرى يمتلك المقهى، كان بـ يقعد فيه كثير من الشعراء والفنانين، ويعتبر مقهى ريش ملتقى الأدباء والمثقفين زى مثلًا نجيب محفوظ، ويوسف إدريس، وأمل دنقل، ويحيى الطاهر عبد الله، وصلاح جاهين، وثروت أباظة، ونجيب سرور، وكمال الملاخ، وغيرهم كثير من اللى كانوا بـ يحضروا نداوت نجيب محفوظ الأسبوعية واللى كان بـ يعملها عصر كل يوم جمعة منذ عام 1963.ولما نرجع بالتاربخ للخلف شوية كمان هـ نلاقى أن عبد الرحمن الرافعى قال في كتابه "تاريخ مصر القومى" أن مقهى ريش ملتقى الأفندية من الطبقة الوسطى، وأنها عُرفت كمكان بـ يجتمع فيه الداعون إلى الثورة والمتحدثون عن أهميتها وعن حال البلاد.لأ وكمان كان لمقهى ريش دور كبير فى ثورة عام 1919، وبـ يقول أصحاب الحكايات الثقافية الخاصة أن صاحب المقهى في الوقت ده كان عضو في واحد من أهم التنظيمات السرية، وبـ تقول الحكايات برضه أنهم بعد 80 عام من ثورة 1919 لاقوا آلة لطبع المنشورات. وكمان فى سنة 1972 انطلقت منه ثورة الأدباء احتجاجًا على اغتيال الروائى الفلسطيني غسان كنعانى.. وفى ديسمبر عام 1919 شهد المقهى محاولة اغتيال رئيس الوزراء وقتها يوسف وهبة.وفي ساحة المقهى قدمت فرقة الفنان عزيز عيد المسرحية عدد من مسرحياته اللى قامت ببطولاتها الفنانة روزاليوسف، وكمان بعض المونولوجات اللى كان بـ يغنيها الفنان محمد عبد القدوس، والد الأديب إحسان عبد القدوس.شوفتم التاريخ قد إيه مرتبط بالمكان ده؟ المكان عبارة عن مساحة مستطيلة واخده مساحة مهمة فى منطقة وسط البلد بالضبط هـ تلاقوه جنب ميدان طلعت حرب، مع أن البياعين من كل صنف ولون حاوطوا المكان إلا أنه قادر يفضل مقهى المثقفين والأدباء لحد دلوقت.. وفيه بـ نلاقى حفلات توقيع لكبار الكتاب وندوات خاصة بـ تتعمل فيه، لكن اللى يؤخذ عليه أنه غالى ومش أى حد يقدر يقعد فيه، خاصة الشباب اللى لهم طقوس ثانية خالص فى القهاوى ممكن نتعرض لها فى مقهى ثانى فى وسط البلد برضه، واللى يتاخد على المقهى برضه هو أن واحد من كبار الشعراء قال عليه أنه مكان للنخبة يعنى المثقفين اللى ماسكين كل حاجة فى أيديهم وهو الشاعر نجيب سرور، لأ وكمان عمل ديوان اسمه "بروتوكولات حكماء ريش" وده كان نتيجة الظلم اللى تعرض له فى حياته واللى وصل للنفى خارج مصر.. والسجن والتعذيب.. واللى كان بعض المثقفين اللى موجودين فى ريش وقتها سبب فيه.. اسمعوه وهو بـ يوصفهم بـ يقول:نحن الحكماء المجتمعين بمقهى ريش ..من شعراء وقصاصين ورسامين ..ومن النقاد سحالى «الجبانات» ..حملة مفتاح الجنة ..وهواة البحث عن الشهرة ..وبأى ثمن ..والخبراء بكل صنوف «الإزمات» ..مع تسكين الزاى ..كالميكانيزم!نحن الحكماء المجتمعين بمقهى ريش ..قررنا ماهو آت:* البرتوكول الأول:لا تقرأ شيئًا .. كن حمال حطب ..وأحمل طن كتب ..ضعه بجانب قنينة بيره ..أو فوق المقعد ..واشرب .. وانتظر الفرسان ..سوف يجيئ الواحد منهم تلو الآخر ..يحمل طن كتب! ..شوية ممكن بـ يوصف حال بعض المثقفين فى عصرنا لأن كل العصور بـ تتشابه، خاصة فى الأدعياء، وعمومًا إحنا كده عرضنا كل وجهات النظر حول المقهى.. ونقول لكم روحوا أنتم وشوفوه واقرأوا عنه وكونوا رأيكم الخاص عن ريش ذكريات الثقافة والمثقفين وأنصاف المثقفين وأدعياء الثقافة.* البروتوكول: هو صيغة تعاون بين يتفق عليها مجموعة من الأطراف بمواد وقوانين محددة

...

التكية المولوية: عالم ساحر قررنا استكشافه فى منطقة الخليفة
اصدرت في: 03/10/2012

سمعنا كثير عن التكية المولوية، ما كناش عارفين هي مواعيدها إيه، لأنها من كل آثار القاهرة القديمة صعب تلاقي لها بيانات واضحة مؤكدة تمشي على أساسها، سألنا وروحنا، عدينا من جنبها أكثر من مرة، ما عرفناش أن هي دي التكية، مافيش أي حاجة تدل أنها في المكان، لا لوحات ولا يافطة ولا أي شيء، ما عرفناش أننا جنب التكية غير من عجلاتي واقف قصادها.المفروض أن المكان بـ يفضل فاتح لحد الساعة 4 عصرًا، لكن يبدو أنهم بـ يقفلوا قبل كده بشوية، المهم دخلنا، ولاقينا المدخل كله إعلانات على الحوائط في الجانبين فيه فاترينات مخصصة للإعلانات لكن كلها عن أحداث قديمة مرت، بالداخل في التكية كان فيه ثلاثة عمال قاعدين سألناهم عاوزين نزور التكية، دلونا على ثلاثة موظفات قاعدين في مكتب، دخلنا المكتب وسألنا نعمل إيه، بصوا لنا باستغراب كأنها أول مرة حد يزور التكية، سألناهم هل الزيارة بفلوس قالوا لأ، وعرضوا أنهم يفرجونا المكان عادي لو حابين.اكتشفنا من خلال الزيارة أن الموضوع بـ يكون ودي وأن مافيش تذاكر ولا حاجة، زيارة التكية بالنسبة للأجانب بـ تكون جزء من البرنامج السياحي، لكن بالنسبة للمصريين فيبدو أن الموضوع ودي، المهم حبينا نتفرج على المكان اللي هو عبارة عن ساحة واسعة فيها شوية زرع، ومبنى من دورين تقريبًا، فتحوا لنا المسرح، دخلنا.. وبدأ السحر.المسرح عبارة عن خشب في خشب، مساحة مستديرة بالخشب الكامل من الأرض للسقف، فيه يافطة كبيرة شكلها قيم مكتوب عليها "يا حضرة مولانا"، السقف عبارة عن قبة مدورة، فيها رسم للشمس، وطيور شكلها حقيقي جدًا، المكان ده المولوية لحد سنة 1952 كانوا بـ ييجوا يدوروا فيه، حاولنا نتفرج على حاجات أكثر لكن قالوا لنا أن مدير المكان هو اللي ممكن يفتح لنا باقي الحاجات، وهي عبارة عن مدرسة كان الناس فيها زمان بـ يتعلموا فقه، وعلوم دين، ومتحف للمولوية.صحيح إحنا ما قدرناش نشوف باقي التكية، لكن اللي شوفناه خلانا نتشحن شحنة روحانية جميلة، من مكاننا على المسرح بصينا تحت لاقينا ضريح عرفنا بعد كده أنه لشيخ اسمه سيدي حسن صدقة، وده كان رفيق السيد البدوي، جنب الضريح بتاعه فيه فاترينة كبيرة بـ توضح الزي المولوي القديم كان عامل إزاي، ويبدو أنه زي أثري.الناس اللي كانوا موجودين معانا من التكية ما كانوش مفيدين جدًا، حاولوا يساعدونا لكن ما قدروش، كانوا ثلاث بنات حاولنا نفهم منهم تاريخ المكان، لكنهم قالوا بوضوح أنهم شغالين من شهور قليلة وما عرفوش لسه تاريخ المكان كويس.رغم أن ترميم المكان استغرق 33 سنة –حسب كلام البنات- إلا أنه ما حدش بـ يستفيد منه، وتم إغلاقه تمامًا من فترة مش بعيدة بعد ما اتسرق منه النص التأسيسي للضريح، وبعض الشرائط المزخرفة.بعد ما روحنا حاولنا نبحث على الإنترنت ونقرأ بنفسنا عن المكان أكثر، عرفنا أن آخر نشاط رسمي اتعمل فيه كان سنة 1928 وهو المؤتمر الأول للموسيقي العربية في القاهرة، ولكن للأسف سنة ‏1952‏ تم تصفية التكايا في مصر، ومش عارفين ليه ده حصل، المهم أن المكان كان هـ يضيع تمامًا، لكن عالم الآثار المصري دكتور حجاج إبراهيم تدخل ومن هنا بدأت عمليات الترميم اللي تعاون فيها المجلس الأعلي للآثار والمركز الإيطالي المصري، وللآسف آخر حفلة اتعلمت في التكية كانت سنة 1992‏ بعد افتتاحه بأربع سنين، وأحيا الحفلة وقتها مجموعة من الدراويش الأتراك.

...

ساحة روابط: مسرح متعدد الثقافة
اصدرت في: 15/12/2011

لما تقل التجهيزات وتتعدد العروض ما بين مسرحيات، وأمسيات شعرية كبيرة، وحفلات لفرق كثير، يبقى أنت بـ تتكلم عن مسرح روابط. لكن إيه حكايته؟ نقولك إحنا، "مسرح روابط" أو "ساحة روابط" زى ما بـ يحب المسؤولين عن المكان يسموه، هو واحد من المشروعات الكثير اللى بـ يعملها التاون هاوس. التاون هاوس مؤسسة غير ربحية هدفها نشر الثقافة بكل أشكالها، وبـ تعتمد على التمويل الخارجى من المنظمات الثقافية الأوربية، مدير المكان الأستاذ ياسر جراب شخص مثقف بـ يعمل خطط طويلة للمكان ممكن تمتد إلى ستة شهور لأنه شايف أن ده أفضل من العمل العشوائى. أما عن ساحة روابط فهى مشروع من مشاريع التاون هاوس، ويمكن أكثرها شهرة، عبارة عن مسرح أرضى متوسط الحجم، الإضاءة فيه معقولة مش قوية ومش بسيطة، وسماعات مواجهة للجمهور علشان ما تعملش إزعاج كبير، علشان كده قوتها الصوتية مش عالية قوى، وأمام المسرح فيه أماكن الجمهور معمولة بنظام المدرجات علشان الناس تعرف تتفرج على العروض، خاصة أن المسرح أرضى مش خشبة عالية، وأحلى ما فى المسرح الأرضى أنه بـ يكسر الحاجز بين الجمهور والعرض، فـ تحس أنك داخل العرض ومشترك معاه. روابط فيه كثير من الهدوء لما تعدى من جنبه، تحس أنك داخل معبد قديم مثلاً، ولما يبقى فيه حدث شغال تلاقى زحمة وناس كثير بـ يشاهدوا اللى حاصل، وده راجع لشهرته فى منطقة وسط البلد، ولأنه بـ يقدم فن أغلبه من نوع جديد، ويمكن ده واحد من العيوب اللى الناس انتقدت الساحة فيها وهو اعتمادهم على عروض جديدة فيها تغيير للشكل المعتاد للعروض، يعنى تلاقى عروض فيها أداء بالجسد والصوت والمزيكا، وتلاقى عروض ثانية داخل فيها الكمبيوتر، وشاشات العرض وحاجات كده. لكن برضه عندهم عروض ثانية تجاوبت مع الناس وقدمت لهم احتفال كبير جدًا بعد الثورة اسمه "ألف شاعر" دعوا فيه عدد كبير من الشعراء فى مصر وكانت أمسية كبيرة ومهمة، وكان فيه عروض ثانية مرتبطة بالثورة فيها حكى وارتجال من الحاضرين يحكوا عن اللى حصل لهم فى الثورة والمواقف اللى تعرضوا لها. باختصار لو عايز تروح مكان فيه جديد وفيه مشاركة وفيه قيمة فنية، انصحك تروح روابط.

...

دار الأوبرا المصرية: علامة القاهرة الثقافية
اصدرت في: 21/04/2011

«دار الأوبرا المصرية» موجودة في الزمالك قبل كوبري قصر النيل، ليها اسم تاني هو «المركز الثقافي القومي»، تعتبر هي المكان الرئيسي والأهم في إستضافة الأحداث الثقافية في مصر من أول العروض والأوبرات العالمية المعروفة لحد عروض الفنانين والنجوم الصاعدين. أول أوبرا إتبنت في مصر كانت في القاهرة سنة 1869 وأسسها «الخديوي إسماعيل»، وتم إفتتاح دار الأوبرا الخديوية مع إحتفالات إفتتاح قناة السويس، وبناها معماريين ومهندسين من ايطاليا في 6 شهور. سنة 1971 إتدمرت تماماً نتيجة حريق كبير وماتمش بناء دار أوبرا تاني إلا بعد 15 سنة من تاريخ الحريق. في 10 أكتوبر 1988 إفتتح الرئيس المصري السابق «حسني مبارك» والأمير «توموهيتو ميكاسا» شقيق إمبراطور اليابان الأصغر «دار الأوبرا المصرية» بعد تجديدها بواسطة معماريين ومهندسين مصريين ويابانيين، التجديدات كلها كانت هدية كريمة من دولة اليابان للشعب المصري. ومن الوقت ده إبتدت دار الأوبرا تقدم عروض فنية وأوبرات وعروض رقص وحفلات سيمفونية وغنائية على أعلى مستوى وبقت المركز الثقافي الأهم في مصر، ده بجانب دورها في إستضافة شركات دولية بشكل دائم كمقر ودورها في تعليم وتدريس الفنون للشباب ودعم الإبداع والإبتكار. تصميمها المعماري جميل، ،هي عبارة عن مساحة كبيرة من الأرض والمباني اللي بـ تطل على النيل والحدائق وفيه مساحات خضراء بين المبانى. في 7 مسارح جوة الدار، القاعة الرئيسية سعتها 1200 كرسي على 4 مستويات. في المستوى التالت في الجناح الرئاسي وده مكان مخصص لضيوف الشرف وكبار الزوار، والقاعة متصممة على أحدث طراز للمشاهدة وتعتبر هي الأفضل في أفريقيا والشرق الأوسط. المسرح المكشوف على شكل مستطيل محاط بالأشجار ومبني على مستوى الأرض مش زي باقي المسارح، الصوت كويس جداً بس أجهزة الصوت عايزة شوية تجديدات عشان تكون مثالية، بس المكان مناسب جداً للحفلات الأكوستك والريسيتالات البسيطة. فيه مساحة كبيرة من الدار مخصصة للورش الفنية، وفيه المسرح الروماني ومعهد الموسيقى العربية و«متحف الفن المصري الحديث» اللي بـ يفتح كل يوم ماعدا الإثنين من 9 الصبح لـ3 العصر، ومن 5 العصر لـ9 بالليل، المتحف في مقتنيات كتيرة من الفن المصري والعالمي الحديث. الأوبرا مش بس مكان تروحوه لو نفسك في سهرة راقية أو عشان تشوف عرض كلاسيكي، المكان كله والمساحات الخضراء اللي فيه والأماكن المخصصة للجلوس شئ رائع يستحق الزيارة ولو عشان تغير جو بدل الزحمة والفوضى اللي في الشوارع، ده غير طبعاً أن الدخول مجاناً.

...

مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال