وسط البلد فن وثقافة in Cairo, Egypt

فن وثقافة

مكان: المسرح حضن الجمهور فى وسط البلد
اصدرت في: 21/09/2015

المكان: سمعنا عن حفلة الزار.. استغربنا وقولنا هو فيه كده، هو لسه فيه ناس بـ تعمل زار، وكمان حفلة، ساعتها قررنا نروح.. ولما رحنا أول حاجة قابلتنا النظام الشديد في المكان، كل حاجة ولها تفصيلة وكل حاجة لها نظام.. لما سألنا مين مدير المكان قالوا لنا أحمد المغربي. المغربي: قابلنا المدير ووجدنا الآتي: الملحق الثقافي المصري السابق بباريس.. مهذب.. لبق.. هادئ.. فنان. التفاصيل: قعدنا نسأله كثير ونتكلم معاه، وفي الآخر قررنا نقول أن "مكان" بجد مكان مختلف.. هو مساحة واسعة فيها مسرح في قلبها، المسرح جوه الجمهور والجمهور جوه المسرح.. والتفاصيل في المكان قليلة جدًا كلها قائمة على الشكل القديم التراثي جدًا حتى شكل الديكورات البسيطة جدًا، واللي فيها تليفزيون قديم، وراديو قديم، ومافيش حاجة على الحوائط مجرد رتوش كأنها من بيت قديم في القرن التاسع عشر.. وبذكر القرن التاسع عشر لازم نقول أن المكان أصله كان مطابع جريدة البلاغ القديمة وقدر د. أحمد أنه يقنع الورثة بعمل مركز ثقافي مصري فيه.. والمكان بـ يقدم أحداث كثيرة جدًا كلها مرتبط بالتراث والشعبيات والذكر الصوفي وكمان حفلات الزار اللي اشتهرت جدًا فى المكان، وتقريبًا "مكان" هو الوحيد اللى بـ يقدم حفلات الزار. الرسالة: قررنا في الجزء ده نقول رسالتهم زي ما هم كاتبينها.. موسيقى وأغاني مصرية.. بصوت جديد.. لناس من مكان.. تجربة إبداعية موسيقية نسعى فيها لطرح "صوت" موسيقي جديد.. يشارك فيها عمالقة الموسيقيين في مصر من حفظة التراث.. ومن ورثة المقامات والتقنيات الموسيقية الشعبية والحديثة. تعتمد التجربة في أساسها على مفردات وقواعد وتقنيات الموسيقى الشعبية بجمالياتها وتفاصيلها الدقيقة وثراءها الشديد وقدرتها على النفاذ إلى قلب المستمع. منذ أن بدأنا في العمل في مجال الموسيقى الشعبية قبل سنوات مضت، وهناك سؤال يطرح نفسه: ماذا بعد؟ ماذا بعد الوصول إلى ما تبقى من المصادر الحية لتلك الموسيقى؟ ماذا بعد تسجيلها وحفظها على وسائط تقنية حديثة؟ وبعد تقديمها مرات ومرات بنفس شكلها التقليدي؟ جاءت الإجابة من مقولة الشيخ أمين الخولي" :أول التجديد، قتل القديم فهمًا.." لذلك تعد هذه التجربة محاولة في طريق هذا التجديد نقف فيها على القواعد والأساسات المتينة والثرية لموسيقانا الشعبية لنبني عليها أشكالًا وأصواتًا وألحانًا وتراكيب مختلفة لنخرج في النهاية بتجربة إبداعية جديدة.

...

مركز نور للثقافة والفنون: إنتاج ثقافى وندوات وورش فنية مختلفة فى وسط البلد
اصدرت في: 16/09/2015

ليه نور؟.. ده كان أول سؤال دار في ذهننا وإحنا بـ نزور مركز نور الثقافى، ولما تفرجنا على المكان وفهمنا هو بـ يعمل إيه، عرفنا أن الفكرة جاية من التنوير، هم نفسهم يكونوا مركز بـ يرسل التنوير الثقافي لكل حتة في مصر. بـ يعملوا إيه؟ لهم أنشطة مختلفة زي الإنتاج الثقافي.. وعندهم مشروع معرض فن تشكيلي لمجموعة من الفنانيين من ضمنهم الفنانة المعروفة ماجدة الشرقاوي، وإنتاج فني موسيقي وعندهم مشروع لعمل ألبوم للمطربة عصمت الشقنقيري، وكمان بـ يكونوا باند اسمه "رومانزا" واللي معناها بالإيطالية قصة حب. ولحد هنا ما وقفوش، بالعكس قرروا يغزوا السوق الثقافي ويعملوا أكبر مخاطرة في العمل الثقافي وهو (دار نشر) وبـ يستعدوا لعمل أربع كتب منهم ديوان بالعامية على اسم واحد من دواوين درويش "أثر الفراشة" وديوان "سفر النبوة" للشاعر ناظم نور الدين، كمان عندهم بوك ستور بـ يبيعوا فيه أغلب كتب دور النشر الثانية. أما الكورسات فهي متنوعة منها جيتار مع الفنان أسعد نسيم وهو عضو فرقة وسط البلد، وكورس الكمان مع الفنان عبد المنعم هلال، والعود والغناء مع الفنان بلال الشيخ، والأورج والغناء للأطفال مع الفنانة عصمت الشقنقيرى. جنب ده بـ يعملوا حفلات توقيع وندوات وفيه مسابقة في شعر العامية والفصحى والرواية والمجموعة القصصية والكتابة الساخرة والمسرح، يعني مسابقة ثقيلة وفيها جوائز لما تظهر النتيجة. ولما بـ يبقى فيه أمسيات كبيرة بـ يكون فيه تعاون مع حديقة السيدة زينب الثقافية، ولهم صالون شهى لناجح إبراهيم في تجديد الخطاب الديني بعنوان "خطاب متجدد" وبـ يجهزوا لإنتاج عرض مسرحي للأطفال اسمه "كوكب هيدو" تأليف وأشعار وإخراج ناظم نور الدين. المكان قائم عليه 4 مبدعين هم: الشاعر ناظم نور الدين، والروائية هند مختار، والقاصة ياسمين أبو المجد، والإعلامية فاطمة العبيدي.

...

مكتبة حروف: مكان ثقافي ومكتبة مختلفة في وسط البلد
اصدرت في: 09/09/2015

المكان: شاب 1: انزل معايا وسط البلد شوية شاب 2: لا يا عم أنا زهقت من وسط البلد شاب 1: تعالي وهـ تنبسط شاب 2: ما إحنا كل مرة بـ ننزل بـ نقعد في نفس الأماكن شاب 1: هـ أقعدك في مكان جديد شاب 2: والنبى فين؟ مافيش خرم أبره في وسط البلد إلا ولفيناه شاب 1: حروف شاب 2: مش فاهم شاب 1: مكتبة وقعدة حلوة شاب 2: ثقافة وكده.. لا يا عم ماليش فيه.. شاب 1: لا يبقي أوصف لك الوصف: هنا بدأ الشاب يعدد في وصف المكان وحلاوته، وقد إيه هو مكان في موقع متميز في وسط البلد، لكن إحنا هـ نسيب الوصف ونحكي لكم على اللى شوفناه. المكان عبارة عن شقة واسعة من شقق وسط البلد القديمة اللي هي كانت تنفع مسرح عادي لكن الناس عايشين فيها، ومُقسمة بقي مجموعة قاعات. قاعة للفن التشكيلي وفيها هـ يتعمل معرض للوحات، وبالفعل عملوا معرض واحد وفي انتظار تجهيز جدول باقي المعارض، وقاعة ثانية فيها جو شبه "الكافيه" تقدر تقعد فيها وتطلب المشروبات اللي أنت عاوزها، وأسعارهم على فكرة لطيفة جدًا، وقاعة ثالثة بـ يتعمل فيها اجتماعات وتنفع جدًا يتعمل فيها نقاشات مصغرة أو جلسات عمل على الهادئ، وقاعة رابعة هي ستوديو للشباب لو عاوز يعمل بروفات. وفي الاستقبال هـ تلاقي المكان مليان كتب من اللي قلبك يحبها كتب في مجالات مختلفة، لكنها مش كثير قوي لدرجة أنها تعمل مكتبة ضخمة، ولما سألنا أصحاب المكان على الكتب عرفنا أن فيه "كذا شوال" كتب في المخزن بس مستنيين يكملوا تجهيز المكان. الفكرة: الفكرة بقى أنهم مجموعة شباب بـ يحبوا الثقافة وعاوزين يعملوا حاجة مختلفة، عاوزين يعملوا مكان فيه كل حاجة بـ تعطي كورسات في الموسيقى والرسم والكتابة، وكمان يبقى فيه قاعات فن تشكيلي ومعارض، وكمان يعملوا مسرح صغير (لسه بـ يتجهز) علشان العروض المسرحية والحفلات متوسطة الجمهور، وكمان قاعة للبروفات علشان يساعدوا الشباب أنهم يلاقوا مكان نظيف في وسط البلد يقرأوا ويشتروا كتب بأسعار معقولة ويعملوا بروفات ويتمرنوا ويقعدوا يتناقشوا ويشربوا مشروبات بأسعار متوسطة ومقبولة جدًا. اللى عاجبنا كمان هي الروح اللى هناك وقد إيه هما بـ يحبوا بعض وبـ يحبوا شغلهم وعاوزين يعملوا مكان جديد ومختلف، لأ وكمان عاوزين يعملوا فرع ثاني، صراحة لازم نرفع لهم القبعة.

...

مسرح ستوديو ناصيبيان: عروض بجد فى رمسيس
اصدرت في: 22/04/2015

جوجل: ادخل على Google Earth منظر عام للأرض... قرب الزاوية شوية.. انزل على أفريقيا... ومنها ادخل على مصر.. أيوه العاصمة أرجوك.. مرحبًا بك فى القاهرة تحديدًا فى واحدة من أكثر المناطق زحمة فى مصر.. رمسيس... امشى على طول.. عند المستشفى القبطى.. ادخل من جنبها بالضبط فى ظهر المستشفى القبطى، هـ تلاقى يافطة مكتوب عليها "الجزويت". الجزويت: هو المركز الثقافى اللى أسسته جمعية النهضة العلمية والثقافية فى القاهرة سنة 1998... وأصل الموضوع كان مبادرة من الأباء والأخوة اليسوعيين "الجيزويت" وكمان الشخصيات العامة من المسلمين والمسيحيين المهمومين بقضايا الوطن الثقافية والمدنية والفنية، وغيرها من القضايا اللي بـ تهم كل المصريين. والجمعية بـ تبدأ فكرتها من دور الثقافة في تنمية الإنسان، وده الهدف الأساسى لها أنها تنمى الإنسان فى كل المجالات... وبـ تربط الجمعية بين الإبداع والطاقات الكامنة أو محاولة لبيان طاقة الثقافة والإبداع في الإنسان المصري.. وعلشان كده اختاروا مسرح فى منطقة حيوية جدًا وهو مسرح ناصيبيان وبدأوا المهمة وكان لهم رسالة. الرسالة: رسالة الجزويت اللى هى رسالة مسرح ناصيبيان بـ تظهر فى اهتمام جمعية النهضة العلمية والثقافية جزويت بثقافة الصورة واعتبارها أداة قوية ومؤثرة فى التنمية، لكن خلونا هنا ما نتكلمش عن التنمية المجتمعية وتوفير الشغل للشباب.. إحنا بـ نتكلم عن تنمية المواهب والقدرات والشغل على الإبداع.. اللي له قدرة سحرية على الثبات فى قلب ومخيلات الناس، مهما ثقافتهم ومستوياتهم الاجتماعية ثقافتهم وحتى درجات وعيهم. ناصيبيان: مسرح ستوديو ناصيبيان بقى عبارة عن خشبة محترمة ومجهزة بتجهيزات عالية جدًا من إضاءة وصوت وهو بـ يكفى تقريبًا 150 فرد.... والكراسى هناك مريحة على فكرة، وبـ يهدف لخلق مساحة بديلة للثقافة علشان تظهر جنب المساحات المستقلة بالقاهرة وبـ يشتغل على تنشيط العملية الفنية المستقلة فى مجالات المسرح والموسيقى والسينما على مستوى التدريب والعرض وهى مساحة تسع 150 إلى 180 متفرج وأغلب العروض بـ تُقدم بشكل مجانى أو شبه مجانى.. يعنى بـ تذاكر "سعرها قليل" وكمان المسرح بـ يوفر للعارضين فى مختلف المجالات مساحة علشان يعرضوا إبداعاتهم أمام الجمهور... ومكان المسرح مهم جدًا لأنه فى منطقة حيوية وسهل الوصول لها.. هو فى رمسيس بالضبط جنب مدرسة العائلة المقدسة بالفجالة. العروض: لو دورت على تاريخ المسرح على الرغم من أنه حديث نسبيًا لكنك هـ تفهم قد إيه فيه شغل عالى بـ يحصل وكمية ورش الإبداع والمسرح والسينما والأنيميشن وكمية العروض المسرحية والأفلام المستقلة وحفلات الموسيقى المستقلة اللى اتعملت عليه بـ تؤكد حاجة واحدة بس.. أننا أمام مشروع مهم ولازم يتنور عليه شوية.. وابقوا احضروا هناك وقولوا لنا رأيكم.

...

صحبة كافيه & جاليري: لمة الأندرجراوند فى شارع التحرير
اصدرت في: 15/03/2015

صحبة: اسم بدأ يتردد كثير فى الفترة اللى فاتت.. مش ملاحظين كده ولا إيه؟ تفتكروا إيه السبب يعنى يتعمل حدث كبير فى مجموعة من أشهر شعراء العامية الشباب يبقى اسمه "الصحبجية" وينتشر الموضوع جدًا.. ويتعمل مكان كامل ويبقى اسمه "صحبة"، يا ترى الناس مش حاسه بالأمان فبـ تدور عليه فى الصحاب.. ولا هى فكرة اللمة اللى الناس بقيت محتاجاها دلوقت علشان الأحداث اللى البلد بـ تمر بها.. أسئلة كثير بـ تمر بذهنك وأنت ماشى بالذات فى وسط البلد ولما فجأة تلاقى أمامك مكان اسمه صحبة، لازم تقف وتفكر هو فيه إيه؟ فيه إيه: السؤال ده لما بـ يتردد فى ذهننا لازم ساعتها نعمل حاجة واحدة بس نسأل وندور على الموضوع ونشوف.. ما نطولش عليكم إحنا دخلنا المكان وقعدنا وطلبنا قهوة يعنى بعدها بشوية جات وصراحة طعمها كان تمام.. ضيفوا المكان ده للأماكن القليلة اللى بـ تعمل قهوة حلو فى وسط البلد. القهوة: ولأن القهوة مزاج ولها طابع خاص فى الشرب حتى، برضه المكان مزاج وله طابع خاص، هو عبارة عن ممر طويل واسع شوية لكن سقفه قريب.. ودى من الحاجات اللى بـ تضايق فى المكان.. وفى آخر الممر ده هـ تلاقى المطبخ وقبله هـ تلاقى أوضه على اليمين فيها قعدة.. وفى آخر الممر فيه أوضه ثانية معمول فيها "جاليرى". المكان: الفكرة الأولى اللى هـ تقابلك هناك هى استخدام المساحة.. فيه استخدام جيد لها وطريقة وضع الكراسى والترابيزات مش هـ تخليك تحس أن المكان صغير.. بصوا هو مش صغير لكنه طويل يعنى بدل ما يبقى المكان مربع وواسع.. فهو مستطيل علشان كده هـ تحس أنه ضيق. الديكور: ديكور المكان كله مختلف أنه قائم على فكرة "الـ Handmade"، هما مش حابين يجيبوا حد من خارج السرب يعمل حاجة فهما اللى عملوا كل حاجة فى المكان وهما اللى جابوا الجرايد القديمة ورسموا على الحوائط رسومات كلها مرتبطة بالأندرجراوند.. هم آه.. هم اللى عملوا روح للمكان. هم: مين بقى هم؟ نقول لكم.. هم مجموعة من الأصدقاء على رأسهم صاحب المكان اللى اسمه إسلام إسماعيل.. ولما نحكى لكم حكاية إسلام هـ تفهموا إيه الموضوع. الحكاية: كان يا ما كان كان فيه أيام دلوقت شاب زى شباب مصر كثير سافر بلاد بره واشتغل لحد ما حوش شوية فلوس مش كثير.. على طول رجع مصر وقرر أنه يعمل حاجة بـ يحبها.. ولأنه بـ يحب موسيقى الأندرجراوند قرر يعمل مكان يسمع فيه هو وأصحابه موسيقاهم وكمان يعملوا "Jamming" مع بعض، اللى يلعب جيتار واللى يغنى واللى يعمل ستاند أب كوميدى وكلهم فى النهاية أصحاب واللى جاى على المكان جديد برضه صاحب، هى دى الروح اللى مالية المكان.. وهو ده سبب التسمية.. وهى دى الفكرة، الصحبة فى كل حاجة وابقى روح واستمتع هناك.

...

مكتبة البلد: مكان ثقافي يحتويك ويزود معرفتك في وسط البلد
اصدرت في: 03/03/2015

فتحت في الفترة الأخيرة مراكز ثقافية كثيرة، حتى المكتبات العادية تلاقيها عاملة جنب بيعها الكتب أنشطة ثانية تحفز بها القراء، أنهم ييجوا المكتبة، وده مش بس متوفر في مكتبة البلد، لأ دي تعتبر البيت الثاني لكثير من القراء والمثقفين. أول ما بـ تدخل المكتبة بـ تلاقي على أيدك اليمين موظف الكاشير وجنبه مجموعة صور فوتوغرافية جميلة جدًا الواحدة فيهم بـ 5 جنيه، بعد كده بـ تلاقي أربع غرف، على اليمين غرفة المدير المسئول عن المكتبة، وعلى الشمال غرفتين اجتماعات وتعتبر كافيتريا، لأي حد عاوز يعمل اجتماع أو للمثقفين اللي عاوزين يشتغلوا في مكان هادي، وساعات بـ تستخدم في عمل الورش، في الوش بقى أكبر غرفة في المكتبة واللي فيها كتب في كل المجالات، الأدب والسياسة والإسلام السياسي والفن الساخر، والكتب القديمة للكتاب المشهورين زي نجيب محفوظ وغيره من الكتاب اللي بنوا أسس كتاب الأدب العربي في مصر والعالم العربي وبأسعار معقولة جدًا. والغرفة دي برضه بـ يتم عمل الورش فيها والتجمعات الثقافية أو الفنية، كمان فيها بلكونة مطلة على شارع محمد محمود، تقدر تقعد فيها وتشرب حاجة في نفس الوقت، بس لو أعصابكم خفيفة ما ننصحكمش بده لأن الشارع ده شاف ذكريات وده تخليك تفضل تعيط لحد ما تروح. أكثر حاجة بـ تميز المكتبة هي أنشطتها الثقافية اللي بـ تعملها بالتعاون مع الكتاب والشباب، يعنى مثلًا، ورشة زي ورشة الكتابة الإبداعية في فن الرواية بالتعاون مع الكاتب الكبير والدكتور بهاء عبد المجيد، واللي هـ توفر لك مدة تدريب 18 ساعة مرتين فى الأسبوع، وهـ تتدرب على الكتابة في فن كتابة الرواية من بناء الشخصية الروائية والحبكة وخلق الصراع الروائى، وإزاي يختار العنوان المناسب للرواية ومساعدة الكاتبة أو الكاتب للوصول إلى دار النشر المناسبة. أو ورشة إعداد المترجم الأدبي من الإنجليزية للعربية، واللي هـ يدرسها الدكتور بهاء عبد المجيد برضه أستاذ الأدب الإنجليزى والدراما بجامعة عين شمس، واللي هـ تساعدك على التدريب على استخدام القواميس، وعلى نماذج من الرواية والقصة والشعر، والترجمة الفعلية من الإنجليزية إلى العربية وتحليل وتحرير النص الأدبى وتقسيمه إلى أجزاء بغرض الترجمة. أما عن التعاون الجميل بين مكتبة البلد ومركز الربع اللي بـ يعملوا فيه كثير من جلساتهم التأملية، اللي ممكن يصحبها بعض الغناء المريح للأعصاب، فده ما يتحكيش عنه أنتم لازم تجربوا بنفسكم، كمان ورشة فن الزجاج المعشق وفن كتابة القصة القصيرة ما يتفوتوش إطلاقًا لمحب الفن. أخيرًا، نقدر نقول بقلب جامد أن ورش مكتبة البلد مفيدة وممتعة في أكثر من مجال، ممكن تقرأ فيها أو تقعد تشتغل والمشروبات أسعارها رمزية.

...

أكاديمية الاتجاه: مؤسسة عاوزة تعلم الناس فى وسط البلد
اصدرت في: 01/02/2015

المكان: قررنا نزور المكان.. أخذنا معداتنا وطفايتنا وولاعتنا وحرقنا الطريق وبسرعة جدًا نزلنا موقف عبد المنعم رياض وهناك فى أول شارع رمسيس وصلنا بسهولة للمكان. السؤال: سألنا لو سمحتم عاوزين نعرف أنتم بـ تعملوا إيه؟وبـ تقدموا إيه؟ صراحة الناس ما كذبوش خبر.. بسرعة لاقينا مرشد قعد معانا علشان يحكى لنا فكرة المؤسسة وهدفها وإيه هى الكورسات اللى بـ يقدموها. الوصف: على غرار "وصف مصر" الكتاب التاريخى المشهور هـ نوصف لكم المكان: "أنه فى عام 2015 قرر مجموعة من رجال الأعمال عمل مؤسسة تدريبية لرفع الوعى الشبابى وسابوا إدارة المكان للواء رؤوف حسن فرج.. والمكان كما ذكر المؤرخون عبارة عن شقة واسعة فيها مكان استقبال مميز ومليان بشاشات العرض.. وفيه ثلاث قاعات للدراسة واحدة شايلة اسم الروائى المصرى العالمى نجيب محفوظ... والثانية شايلة اسم الصحفية والكاتبة المعروفة روزاليوسف.. والقاعة الثالثة شايلة اسم شهيد مذبحة بورسعيد الطفل غنر على محسن.. والقاعات مجهزة بكل حاجة من كراسى لسبورة لشاشات عرض علشان المتدرب يعرف يأخذ راحته.. هنا انتهى المؤرخ من كلامه". هما مين: هما مؤسسة أكاديمية تأسست علشان تطور أداء الشباب وتكون منبر تنويرى لرفع ثقافة وكفاءة الشباب فى مصر والوطن العربى من خلال مجموعة برامج تدريبية على أعلى مستوى من الجودة. هدفهم: يوفروا فرص عمل للشباب الواعى.. ويصنعوا حالة خاصة لتشجيع العلاقة بين المدرب والمتدرب لخلق ثقافة المشاركة فى التدريب.. وكمان تشجيع إقامة الندوات والأحداث الثقافية بمقر الأكاديمية علشان تكون منبر للعلم والثقافة لكل الناس. بـ يقدموا إيه: الفكرة العامة هى صناعة الجودة فى كل المجالات اللى هـ يشتغلوا فيها وخد عندك: الجودة في مجال الصحافة التحريرية والإلكترونية، وفي مجال العمل الإعلامي والفني، ومجال التصوير الفوتوغرافي والصحفي والسينمائي، ومجال المونتاج الصحفي والسينمائي، وكمان شبكات التواصل الاجتماعي الإلكترونية Social Media ومهارات إنشاء المواقع والمدونات وتوظيفها إعلاميًا، وكمان مجالات غير مطروقة زي جودة الأداء بالمواني ومحطات الحاويات وتطبيقاتها، ومجال المشروعات الصغيرة والحرفية للشباب، ومجال جودة إدارة العمران وتطبيق أكواد البناء، وفي مجال الدورات الصيفية للبراعم، ودبلوم صناعة اللوجستيات في الموانئ ومحطات الحاويات، وشهادة المدرب الدولي المعتمد من المعهد الكندي للتدريبICT، والمعهد القومي للجودةNQI، ودبلوم إدارة الجودة في مجال الصحافة التحريرية والإلكترونية. لو ناوى تأخذ شهادة معتمدة وتأخذ الجودة فى أى مجال من اللى فات زور الأكاديمية واشترك معاهم.

...

ستوديو 5: خمس بنات وستوديو فى وسط البلد
اصدرت في: 28/12/2014

ليه ستوديو 5؟ لأنه تأسس على أيد خمسة من المصريات اللى جمعوا الجمال بين الشعر والأدب والفن التشكيلي والإعلام في المشهد الثقافي المعاصر، وهما: عبير عبد العزيز (شاعرة)، أسماء عواد (قاصة وروائية)، مها شهاب الدين (شاعرة)، سمر نور (قاصة وروائية)، هبة عصام (شاعرة). الجميل أن إطلاق مساحة على المكان لها مدلول كبير على أهميته فى تقديم شكل ثقافى جديد، يعنى هما مش شايفينه مركز ثقافى أو مجرد مكان بـ يقدم خدمات.. هما شايفينه مساحة للفنون والثقافة. "ستوديو 5"بـ يهتم بتنظيم ودعم الأنشطة الفنية والثقافية والتعليمية الكتير منها: الورش، المحاضرات، والمعارض الثابتة والمؤقتة اللى ممكن تأخذ يومين أو يوم واحد. كمان بـ يضم مشروعedu.vitaللاستشارات العائلية والتربوية.. وده مشروع جرئ بـ يقدم للأسرة دورات تدريبية واستشارات فى كل المجالات الأسرية بداية من فكرة الزواج حتى تربية الأطفال.. وهى حاجة مجتمعنا محتاجها جدًا. وكل ده بـ يتم من خلال مقره الحالي داخل The Greek Campus فى باب اللوق، وسط البلد، المبنى اليوناني، مساحة رقم 250.. والمكان عبارة عن مساحة كبيرة فى المبنى اليونانى التابع للجامعة الأمريكية فى باب اللوق، وهو ستوديو كبير فى الدور الثانى يقدروا يعملوا فيه فعاليات كثيرة وبعدد. ومن أهم الورش عندهم ورشة عرايس الماريونت.. وهى تابعة للمسرح اللى عملوه جوه المساحة وسموه مسرح البرجولا للعرائس.. الورشة لتصنيع وتحريك عرائس ماريونيت.. وبـ تنقسم الورشة إلى 4 أقسام: القسم الأول: تصنيع جسم العروسة، الثاني: التشكيل الفني للعروسة ورسم ملامحها، الثالث: تفصيل ملابس العروسة، والقسم الرابع: تعليق وتحريك العروسة علشان تعمل العرض. مدة الورشة 8 أيام، من ساعتين ونصف إلى 3 ساعات فى اليوم.. وبـ تتكلف 1400جنيه تشمل الخامات.

...

بركة: مشروب زيادة على حساب صاحب المحل في وسط البلد
اصدرت في: 24/09/2014

الفكرة: كان قاعد مع واحد صاحبه اسمه "بركة"، وبـ يتكلموا فى الشغل والطموح والحياة.. وأوحى له بعمل "قهوة ثقافية" تكون "كافيه" وبـ تدعم الثقافة.. فـ قرر يعمل ده ويسميها "بركة". وائل: وائل هو صاحب المشروع اشتغل مترجم إيطالى.. وعاش فترة فى إيطاليا واشتغل فى الميديا بعد ما أخد كورسات إخراج، وعمل فيلم مستقل أخد مركز أول فى التقييم الخاص بالورشة فى قصر ثقافة السينما والفيلم اسمه "Call me"، ولما فكر فى مشروعه الخاص مع أصحابه قرر يعمل حاجة تجارية لكن لها علاقة بالثقافة وكانت بوك كافيه فى وسط البلد اسمه "بركة". محسن: هو مدير المكان شخص هادى طوال الوقت، وكان شغال فى "السياحة"، وهو خريج سياحة وفنادق.. وكل همه فى الحياة أن بركة تبقى أحسن "بوك كافيه" فى وسط البلد. بوك كافيه: بوك كافيه يعنى فنجان قهوة محترم.. وكتاب وتقعد تقرأ فى هدوء.. وأصحاب المكان محافظين قوى على الموضوع لدرجة أن لو فيه واحد عاوز يقرأ ومجموعة "عاملين دوشة" بـ يعتذروا لهم أن ما ينفعش دوشة علشان الرجل اللى بـ يقرأ.. وممكن كمان يبقى لك هدية لما تيجى وتقرأ فى المكان "مشروب زيادة على حساب صاحب المحل". القهوة: أصحاب المكان بـ يقولوا أنك ممكن تشرب أحسن قهوة عندهم.. وفيه أنواع كثير من سادة ومحوج وبن ثقيل وخفيف ووسط وبالبندق، المهم أنك فعلاً هـ تجرب "قهوة" عظيمة.. كمان أسعارهم مش عالية، وممكن أى حد يقعد هناك.. وعندهم شيشة لكنك تقدر تشربها أمام الكافيه على ترابيزات خاصة علشان الدخان ما يؤثرش على اللى قاعدين داخل الكافيه. حفلات: كمان هما عاوزين يعملوا حفلات توقيع مجانية للكتب، واللى حابب يروح ويتفق معاهم ومن غير مقابل "وده برضه حبًا فى الثقافة"، وبـ يتبنوا فكرة أن القراءة نفسها مكسب.. وبـ يحكوا على "بنت" زارتهم فى مرة ومعاها كتاب ولما خلصته، اتفقت معاهم على تبديل كتابها بكتاب معروض عندهم ولما تخلصه ترجعه.. وبالفعل وافقوا على كده.. ومش محتاجين نقول أن عندهم مجموعة كتب للقراءة فى مجالات مختلفة وهما بـ يستقبلوا أى كتاب للعرض ماعدا "كتب الدين والسياسة" علشان ما يحصلش خلاف بين الناس. وبـ يوجهوا دعوتهم للمكتبات الكبيرة ودور النشر أنهم يبعثوا لهم كتب من إصداراتهم علشان الناس تتعرف على الكتب وتبقى مساحة القراءة أكبر. أصغر صانع: كمان لاقينا هناك "أصغر صانع مشغولات يدوية" وهو "رفعت مصطفى" 8 سنوات وبـ يعمل حظاظات من الخيوط وعاوز يبقى ده مشروعه لما يكبر، وبـ يبيع الواحدة بـ "3جنيه".. ها؟ حد عاوز يشترى؟.. طيب يقرأ.. طيب يشرب قهوة؟

...

مسرح الضمة: ما تضم علينا فى وسط البلد
اصدرت في: 02/09/2014

الحلم: فضل من الثمانينيات وهو بـ يدور على الفرق الشعبية علشان يجمعها فى مكان واحد.. ويكتب فى نشرات غير دورية ويقعد مع مثقفين ويكلمهم عن الفكرة.. وفى وسط كل ده كان بـ يرقص ويغنى وبـ يشتبك مع الموسيقى خاصة موسيقى الطنبورة.. هو "زكريا إبراهيم" مدير مركز المصطبة ومسرح الضمة.. اللى قرر يبعد بالفن الشعبى المصرى بعيدًا عن التجارية ويجره لمنطقة الاحتراف فدور على الكبار اللى بـ يغنوا وحافظين الأغانى الشعبية وقعد معاهم وأقنعهم بالفكرة فى كل حتة من مصر.. وبعدين بدأ يجمع الشباب ويحفظوا منهم علشان يحقق حلمه ويعمل مسرح وكيان للموسيقى الشعبية. حكاية الضمة: لما سألناه ليه سميته مسرح الضمة، فقال: "الضمة فى قناة السويس هى القعدة واللمة الموسيقية "المزيكا الشعبية" يعنى والناس كانت تقعد تقول تعالى ضم علينا "نخلق الحظ ونعيشه" وهى جملة فارقة فعلًا وبـ تبين هدف وفكرة المكان، خلق الحظ والتعايش معاه من خلال المزيكا، وحكاية المسرح باختصار هى أنه كان قهوة شعبية فى حارة فى عابدين اسمها "حارة البلاقسة".. آه والله تخيلوا الموقف قهوة شعبية فى حارة وكان بـ يحصل فيها ما يحدث بقى من "التصرفات" فـ قرر الريس زكريا أنه يحول القهوة دى لمسرح.. ومن هنا بقى عندنا فكرة مجنونة جدًا مسرح فى حارة شعبية وبـ ييجى له مثقفين وأجانب من كل حتة فى مصر.. والعجيب بقى أن الفكرة نجحت والمسرح موجود ولسه حاضرين فيه عرض لفرقة نوبية اسمها "نوبانور". العروض: المسرح عبارة عن مساحة متوسطة حوالى 100 متر وهو مغلف كله بالفوم تقريبًا وفيه تكييف ومساحة العرض تقريبًا 10 أمتار مع وجود حوالى 60 كرسى فى المكان ممكن يزيدوا شوية، وبـ تتم العروض على نفس فكرة المسرح الفقير اللى بـ يتعامل مع المسرح باعتباره أداة لتوصيل الفكرة والثقافة.. والفكرة الكبيرة هى تحويل الموسيقى الشعبية اللى كانت بـ تعتمد على "النقوط" وفقدت معناها الاجتماعى.. تحويل كل ده لفكرة الثقافة المرتبطة بالمتعة واستعادة الموسيقى الشعبية والمعنى الروحى لها. الروح: الموسيقى غذاء الروح زى القراءة بالضبط، وزى الثقافة، وزى كل شىء جميل بـ يمتعنا فى الحياة، ومسرح الضمة بـ يقوم بدور ثقافى كبير فى حارة وده مصدر العجب بين المثقفين،إزاى نجح فى ده.. والإجابة باختصار أنه اختار مكان قريب من وسط البلد مش بعيد برضه.. وكمان اختار جمهور "نوعى" يقدر يجيله ويحافظ عليه من خلال حفلات مستمرة طوال الوقت وقعدات.. وكمان المسرح بـ يوفر بروفات للفرق المختلفة.. وبـ يعمل مهرجانات وعروض مسرح ومونودراما.. وفيه كل يوم خميس عرض لفرقة من فرق مركز المصطبة.

...

شاهد المزيد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال