مراكز ثقافية فن وثقافة in وسط البلد Cairo, Egypt

فن وثقافة

مركز نور للثقافة والفنون: إنتاج ثقافى وندوات وورش فنية مختلفة فى وسط البلد
اصدرت في: 16/09/2015

ليه نور؟.. ده كان أول سؤال دار في ذهننا وإحنا بـ نزور مركز نور الثقافى، ولما تفرجنا على المكان وفهمنا هو بـ يعمل إيه، عرفنا أن الفكرة جاية من التنوير، هم نفسهم يكونوا مركز بـ يرسل التنوير الثقافي لكل حتة في مصر. بـ يعملوا إيه؟ لهم أنشطة مختلفة زي الإنتاج الثقافي.. وعندهم مشروع معرض فن تشكيلي لمجموعة من الفنانيين من ضمنهم الفنانة المعروفة ماجدة الشرقاوي، وإنتاج فني موسيقي وعندهم مشروع لعمل ألبوم للمطربة عصمت الشقنقيري، وكمان بـ يكونوا باند اسمه "رومانزا" واللي معناها بالإيطالية قصة حب. ولحد هنا ما وقفوش، بالعكس قرروا يغزوا السوق الثقافي ويعملوا أكبر مخاطرة في العمل الثقافي وهو (دار نشر) وبـ يستعدوا لعمل أربع كتب منهم ديوان بالعامية على اسم واحد من دواوين درويش "أثر الفراشة" وديوان "سفر النبوة" للشاعر ناظم نور الدين، كمان عندهم بوك ستور بـ يبيعوا فيه أغلب كتب دور النشر الثانية. أما الكورسات فهي متنوعة منها جيتار مع الفنان أسعد نسيم وهو عضو فرقة وسط البلد، وكورس الكمان مع الفنان عبد المنعم هلال، والعود والغناء مع الفنان بلال الشيخ، والأورج والغناء للأطفال مع الفنانة عصمت الشقنقيرى. جنب ده بـ يعملوا حفلات توقيع وندوات وفيه مسابقة في شعر العامية والفصحى والرواية والمجموعة القصصية والكتابة الساخرة والمسرح، يعني مسابقة ثقيلة وفيها جوائز لما تظهر النتيجة. ولما بـ يبقى فيه أمسيات كبيرة بـ يكون فيه تعاون مع حديقة السيدة زينب الثقافية، ولهم صالون شهى لناجح إبراهيم في تجديد الخطاب الديني بعنوان "خطاب متجدد" وبـ يجهزوا لإنتاج عرض مسرحي للأطفال اسمه "كوكب هيدو" تأليف وأشعار وإخراج ناظم نور الدين. المكان قائم عليه 4 مبدعين هم: الشاعر ناظم نور الدين، والروائية هند مختار، والقاصة ياسمين أبو المجد، والإعلامية فاطمة العبيدي.

...

مكتبة حروف: مكان ثقافي ومكتبة مختلفة في وسط البلد
اصدرت في: 09/09/2015

المكان: شاب 1: انزل معايا وسط البلد شوية شاب 2: لا يا عم أنا زهقت من وسط البلد شاب 1: تعالي وهـ تنبسط شاب 2: ما إحنا كل مرة بـ ننزل بـ نقعد في نفس الأماكن شاب 1: هـ أقعدك في مكان جديد شاب 2: والنبى فين؟ مافيش خرم أبره في وسط البلد إلا ولفيناه شاب 1: حروف شاب 2: مش فاهم شاب 1: مكتبة وقعدة حلوة شاب 2: ثقافة وكده.. لا يا عم ماليش فيه.. شاب 1: لا يبقي أوصف لك الوصف: هنا بدأ الشاب يعدد في وصف المكان وحلاوته، وقد إيه هو مكان في موقع متميز في وسط البلد، لكن إحنا هـ نسيب الوصف ونحكي لكم على اللى شوفناه. المكان عبارة عن شقة واسعة من شقق وسط البلد القديمة اللي هي كانت تنفع مسرح عادي لكن الناس عايشين فيها، ومُقسمة بقي مجموعة قاعات. قاعة للفن التشكيلي وفيها هـ يتعمل معرض للوحات، وبالفعل عملوا معرض واحد وفي انتظار تجهيز جدول باقي المعارض، وقاعة ثانية فيها جو شبه "الكافيه" تقدر تقعد فيها وتطلب المشروبات اللي أنت عاوزها، وأسعارهم على فكرة لطيفة جدًا، وقاعة ثالثة بـ يتعمل فيها اجتماعات وتنفع جدًا يتعمل فيها نقاشات مصغرة أو جلسات عمل على الهادئ، وقاعة رابعة هي ستوديو للشباب لو عاوز يعمل بروفات. وفي الاستقبال هـ تلاقي المكان مليان كتب من اللي قلبك يحبها كتب في مجالات مختلفة، لكنها مش كثير قوي لدرجة أنها تعمل مكتبة ضخمة، ولما سألنا أصحاب المكان على الكتب عرفنا أن فيه "كذا شوال" كتب في المخزن بس مستنيين يكملوا تجهيز المكان. الفكرة: الفكرة بقى أنهم مجموعة شباب بـ يحبوا الثقافة وعاوزين يعملوا حاجة مختلفة، عاوزين يعملوا مكان فيه كل حاجة بـ تعطي كورسات في الموسيقى والرسم والكتابة، وكمان يبقى فيه قاعات فن تشكيلي ومعارض، وكمان يعملوا مسرح صغير (لسه بـ يتجهز) علشان العروض المسرحية والحفلات متوسطة الجمهور، وكمان قاعة للبروفات علشان يساعدوا الشباب أنهم يلاقوا مكان نظيف في وسط البلد يقرأوا ويشتروا كتب بأسعار معقولة ويعملوا بروفات ويتمرنوا ويقعدوا يتناقشوا ويشربوا مشروبات بأسعار متوسطة ومقبولة جدًا. اللى عاجبنا كمان هي الروح اللى هناك وقد إيه هما بـ يحبوا بعض وبـ يحبوا شغلهم وعاوزين يعملوا مكان جديد ومختلف، لأ وكمان عاوزين يعملوا فرع ثاني، صراحة لازم نرفع لهم القبعة.

...

صحبة كافيه & جاليري: لمة الأندرجراوند فى شارع التحرير
اصدرت في: 15/03/2015

صحبة: اسم بدأ يتردد كثير فى الفترة اللى فاتت.. مش ملاحظين كده ولا إيه؟ تفتكروا إيه السبب يعنى يتعمل حدث كبير فى مجموعة من أشهر شعراء العامية الشباب يبقى اسمه "الصحبجية" وينتشر الموضوع جدًا.. ويتعمل مكان كامل ويبقى اسمه "صحبة"، يا ترى الناس مش حاسه بالأمان فبـ تدور عليه فى الصحاب.. ولا هى فكرة اللمة اللى الناس بقيت محتاجاها دلوقت علشان الأحداث اللى البلد بـ تمر بها.. أسئلة كثير بـ تمر بذهنك وأنت ماشى بالذات فى وسط البلد ولما فجأة تلاقى أمامك مكان اسمه صحبة، لازم تقف وتفكر هو فيه إيه؟ فيه إيه: السؤال ده لما بـ يتردد فى ذهننا لازم ساعتها نعمل حاجة واحدة بس نسأل وندور على الموضوع ونشوف.. ما نطولش عليكم إحنا دخلنا المكان وقعدنا وطلبنا قهوة يعنى بعدها بشوية جات وصراحة طعمها كان تمام.. ضيفوا المكان ده للأماكن القليلة اللى بـ تعمل قهوة حلو فى وسط البلد. القهوة: ولأن القهوة مزاج ولها طابع خاص فى الشرب حتى، برضه المكان مزاج وله طابع خاص، هو عبارة عن ممر طويل واسع شوية لكن سقفه قريب.. ودى من الحاجات اللى بـ تضايق فى المكان.. وفى آخر الممر ده هـ تلاقى المطبخ وقبله هـ تلاقى أوضه على اليمين فيها قعدة.. وفى آخر الممر فيه أوضه ثانية معمول فيها "جاليرى". المكان: الفكرة الأولى اللى هـ تقابلك هناك هى استخدام المساحة.. فيه استخدام جيد لها وطريقة وضع الكراسى والترابيزات مش هـ تخليك تحس أن المكان صغير.. بصوا هو مش صغير لكنه طويل يعنى بدل ما يبقى المكان مربع وواسع.. فهو مستطيل علشان كده هـ تحس أنه ضيق. الديكور: ديكور المكان كله مختلف أنه قائم على فكرة "الـ Handmade"، هما مش حابين يجيبوا حد من خارج السرب يعمل حاجة فهما اللى عملوا كل حاجة فى المكان وهما اللى جابوا الجرايد القديمة ورسموا على الحوائط رسومات كلها مرتبطة بالأندرجراوند.. هم آه.. هم اللى عملوا روح للمكان. هم: مين بقى هم؟ نقول لكم.. هم مجموعة من الأصدقاء على رأسهم صاحب المكان اللى اسمه إسلام إسماعيل.. ولما نحكى لكم حكاية إسلام هـ تفهموا إيه الموضوع. الحكاية: كان يا ما كان كان فيه أيام دلوقت شاب زى شباب مصر كثير سافر بلاد بره واشتغل لحد ما حوش شوية فلوس مش كثير.. على طول رجع مصر وقرر أنه يعمل حاجة بـ يحبها.. ولأنه بـ يحب موسيقى الأندرجراوند قرر يعمل مكان يسمع فيه هو وأصحابه موسيقاهم وكمان يعملوا "Jamming" مع بعض، اللى يلعب جيتار واللى يغنى واللى يعمل ستاند أب كوميدى وكلهم فى النهاية أصحاب واللى جاى على المكان جديد برضه صاحب، هى دى الروح اللى مالية المكان.. وهو ده سبب التسمية.. وهى دى الفكرة، الصحبة فى كل حاجة وابقى روح واستمتع هناك.

...

مكتبة البلد: مكان ثقافي يحتويك ويزود معرفتك في وسط البلد
اصدرت في: 03/03/2015

فتحت في الفترة الأخيرة مراكز ثقافية كثيرة، حتى المكتبات العادية تلاقيها عاملة جنب بيعها الكتب أنشطة ثانية تحفز بها القراء، أنهم ييجوا المكتبة، وده مش بس متوفر في مكتبة البلد، لأ دي تعتبر البيت الثاني لكثير من القراء والمثقفين. أول ما بـ تدخل المكتبة بـ تلاقي على أيدك اليمين موظف الكاشير وجنبه مجموعة صور فوتوغرافية جميلة جدًا الواحدة فيهم بـ 5 جنيه، بعد كده بـ تلاقي أربع غرف، على اليمين غرفة المدير المسئول عن المكتبة، وعلى الشمال غرفتين اجتماعات وتعتبر كافيتريا، لأي حد عاوز يعمل اجتماع أو للمثقفين اللي عاوزين يشتغلوا في مكان هادي، وساعات بـ تستخدم في عمل الورش، في الوش بقى أكبر غرفة في المكتبة واللي فيها كتب في كل المجالات، الأدب والسياسة والإسلام السياسي والفن الساخر، والكتب القديمة للكتاب المشهورين زي نجيب محفوظ وغيره من الكتاب اللي بنوا أسس كتاب الأدب العربي في مصر والعالم العربي وبأسعار معقولة جدًا. والغرفة دي برضه بـ يتم عمل الورش فيها والتجمعات الثقافية أو الفنية، كمان فيها بلكونة مطلة على شارع محمد محمود، تقدر تقعد فيها وتشرب حاجة في نفس الوقت، بس لو أعصابكم خفيفة ما ننصحكمش بده لأن الشارع ده شاف ذكريات وده تخليك تفضل تعيط لحد ما تروح. أكثر حاجة بـ تميز المكتبة هي أنشطتها الثقافية اللي بـ تعملها بالتعاون مع الكتاب والشباب، يعنى مثلًا، ورشة زي ورشة الكتابة الإبداعية في فن الرواية بالتعاون مع الكاتب الكبير والدكتور بهاء عبد المجيد، واللي هـ توفر لك مدة تدريب 18 ساعة مرتين فى الأسبوع، وهـ تتدرب على الكتابة في فن كتابة الرواية من بناء الشخصية الروائية والحبكة وخلق الصراع الروائى، وإزاي يختار العنوان المناسب للرواية ومساعدة الكاتبة أو الكاتب للوصول إلى دار النشر المناسبة. أو ورشة إعداد المترجم الأدبي من الإنجليزية للعربية، واللي هـ يدرسها الدكتور بهاء عبد المجيد برضه أستاذ الأدب الإنجليزى والدراما بجامعة عين شمس، واللي هـ تساعدك على التدريب على استخدام القواميس، وعلى نماذج من الرواية والقصة والشعر، والترجمة الفعلية من الإنجليزية إلى العربية وتحليل وتحرير النص الأدبى وتقسيمه إلى أجزاء بغرض الترجمة. أما عن التعاون الجميل بين مكتبة البلد ومركز الربع اللي بـ يعملوا فيه كثير من جلساتهم التأملية، اللي ممكن يصحبها بعض الغناء المريح للأعصاب، فده ما يتحكيش عنه أنتم لازم تجربوا بنفسكم، كمان ورشة فن الزجاج المعشق وفن كتابة القصة القصيرة ما يتفوتوش إطلاقًا لمحب الفن. أخيرًا، نقدر نقول بقلب جامد أن ورش مكتبة البلد مفيدة وممتعة في أكثر من مجال، ممكن تقرأ فيها أو تقعد تشتغل والمشروبات أسعارها رمزية.

...

أكاديمية الاتجاه: مؤسسة عاوزة تعلم الناس فى وسط البلد
اصدرت في: 01/02/2015

المكان: قررنا نزور المكان.. أخذنا معداتنا وطفايتنا وولاعتنا وحرقنا الطريق وبسرعة جدًا نزلنا موقف عبد المنعم رياض وهناك فى أول شارع رمسيس وصلنا بسهولة للمكان. السؤال: سألنا لو سمحتم عاوزين نعرف أنتم بـ تعملوا إيه؟وبـ تقدموا إيه؟ صراحة الناس ما كذبوش خبر.. بسرعة لاقينا مرشد قعد معانا علشان يحكى لنا فكرة المؤسسة وهدفها وإيه هى الكورسات اللى بـ يقدموها. الوصف: على غرار "وصف مصر" الكتاب التاريخى المشهور هـ نوصف لكم المكان: "أنه فى عام 2015 قرر مجموعة من رجال الأعمال عمل مؤسسة تدريبية لرفع الوعى الشبابى وسابوا إدارة المكان للواء رؤوف حسن فرج.. والمكان كما ذكر المؤرخون عبارة عن شقة واسعة فيها مكان استقبال مميز ومليان بشاشات العرض.. وفيه ثلاث قاعات للدراسة واحدة شايلة اسم الروائى المصرى العالمى نجيب محفوظ... والثانية شايلة اسم الصحفية والكاتبة المعروفة روزاليوسف.. والقاعة الثالثة شايلة اسم شهيد مذبحة بورسعيد الطفل غنر على محسن.. والقاعات مجهزة بكل حاجة من كراسى لسبورة لشاشات عرض علشان المتدرب يعرف يأخذ راحته.. هنا انتهى المؤرخ من كلامه". هما مين: هما مؤسسة أكاديمية تأسست علشان تطور أداء الشباب وتكون منبر تنويرى لرفع ثقافة وكفاءة الشباب فى مصر والوطن العربى من خلال مجموعة برامج تدريبية على أعلى مستوى من الجودة. هدفهم: يوفروا فرص عمل للشباب الواعى.. ويصنعوا حالة خاصة لتشجيع العلاقة بين المدرب والمتدرب لخلق ثقافة المشاركة فى التدريب.. وكمان تشجيع إقامة الندوات والأحداث الثقافية بمقر الأكاديمية علشان تكون منبر للعلم والثقافة لكل الناس. بـ يقدموا إيه: الفكرة العامة هى صناعة الجودة فى كل المجالات اللى هـ يشتغلوا فيها وخد عندك: الجودة في مجال الصحافة التحريرية والإلكترونية، وفي مجال العمل الإعلامي والفني، ومجال التصوير الفوتوغرافي والصحفي والسينمائي، ومجال المونتاج الصحفي والسينمائي، وكمان شبكات التواصل الاجتماعي الإلكترونية Social Media ومهارات إنشاء المواقع والمدونات وتوظيفها إعلاميًا، وكمان مجالات غير مطروقة زي جودة الأداء بالمواني ومحطات الحاويات وتطبيقاتها، ومجال المشروعات الصغيرة والحرفية للشباب، ومجال جودة إدارة العمران وتطبيق أكواد البناء، وفي مجال الدورات الصيفية للبراعم، ودبلوم صناعة اللوجستيات في الموانئ ومحطات الحاويات، وشهادة المدرب الدولي المعتمد من المعهد الكندي للتدريبICT، والمعهد القومي للجودةNQI، ودبلوم إدارة الجودة في مجال الصحافة التحريرية والإلكترونية. لو ناوى تأخذ شهادة معتمدة وتأخذ الجودة فى أى مجال من اللى فات زور الأكاديمية واشترك معاهم.

...

ستوديو 5: خمس بنات وستوديو فى وسط البلد
اصدرت في: 28/12/2014

ليه ستوديو 5؟ لأنه تأسس على أيد خمسة من المصريات اللى جمعوا الجمال بين الشعر والأدب والفن التشكيلي والإعلام في المشهد الثقافي المعاصر، وهما: عبير عبد العزيز (شاعرة)، أسماء عواد (قاصة وروائية)، مها شهاب الدين (شاعرة)، سمر نور (قاصة وروائية)، هبة عصام (شاعرة). الجميل أن إطلاق مساحة على المكان لها مدلول كبير على أهميته فى تقديم شكل ثقافى جديد، يعنى هما مش شايفينه مركز ثقافى أو مجرد مكان بـ يقدم خدمات.. هما شايفينه مساحة للفنون والثقافة. "ستوديو 5"بـ يهتم بتنظيم ودعم الأنشطة الفنية والثقافية والتعليمية الكتير منها: الورش، المحاضرات، والمعارض الثابتة والمؤقتة اللى ممكن تأخذ يومين أو يوم واحد. كمان بـ يضم مشروعedu.vitaللاستشارات العائلية والتربوية.. وده مشروع جرئ بـ يقدم للأسرة دورات تدريبية واستشارات فى كل المجالات الأسرية بداية من فكرة الزواج حتى تربية الأطفال.. وهى حاجة مجتمعنا محتاجها جدًا. وكل ده بـ يتم من خلال مقره الحالي داخل The Greek Campus فى باب اللوق، وسط البلد، المبنى اليوناني، مساحة رقم 250.. والمكان عبارة عن مساحة كبيرة فى المبنى اليونانى التابع للجامعة الأمريكية فى باب اللوق، وهو ستوديو كبير فى الدور الثانى يقدروا يعملوا فيه فعاليات كثيرة وبعدد. ومن أهم الورش عندهم ورشة عرايس الماريونت.. وهى تابعة للمسرح اللى عملوه جوه المساحة وسموه مسرح البرجولا للعرائس.. الورشة لتصنيع وتحريك عرائس ماريونيت.. وبـ تنقسم الورشة إلى 4 أقسام: القسم الأول: تصنيع جسم العروسة، الثاني: التشكيل الفني للعروسة ورسم ملامحها، الثالث: تفصيل ملابس العروسة، والقسم الرابع: تعليق وتحريك العروسة علشان تعمل العرض. مدة الورشة 8 أيام، من ساعتين ونصف إلى 3 ساعات فى اليوم.. وبـ تتكلف 1400جنيه تشمل الخامات.

...

بركة: مشروب زيادة على حساب صاحب المحل في وسط البلد
اصدرت في: 24/09/2014

الفكرة: كان قاعد مع واحد صاحبه اسمه "بركة"، وبـ يتكلموا فى الشغل والطموح والحياة.. وأوحى له بعمل "قهوة ثقافية" تكون "كافيه" وبـ تدعم الثقافة.. فـ قرر يعمل ده ويسميها "بركة". وائل: وائل هو صاحب المشروع اشتغل مترجم إيطالى.. وعاش فترة فى إيطاليا واشتغل فى الميديا بعد ما أخد كورسات إخراج، وعمل فيلم مستقل أخد مركز أول فى التقييم الخاص بالورشة فى قصر ثقافة السينما والفيلم اسمه "Call me"، ولما فكر فى مشروعه الخاص مع أصحابه قرر يعمل حاجة تجارية لكن لها علاقة بالثقافة وكانت بوك كافيه فى وسط البلد اسمه "بركة". محسن: هو مدير المكان شخص هادى طوال الوقت، وكان شغال فى "السياحة"، وهو خريج سياحة وفنادق.. وكل همه فى الحياة أن بركة تبقى أحسن "بوك كافيه" فى وسط البلد. بوك كافيه: بوك كافيه يعنى فنجان قهوة محترم.. وكتاب وتقعد تقرأ فى هدوء.. وأصحاب المكان محافظين قوى على الموضوع لدرجة أن لو فيه واحد عاوز يقرأ ومجموعة "عاملين دوشة" بـ يعتذروا لهم أن ما ينفعش دوشة علشان الرجل اللى بـ يقرأ.. وممكن كمان يبقى لك هدية لما تيجى وتقرأ فى المكان "مشروب زيادة على حساب صاحب المحل". القهوة: أصحاب المكان بـ يقولوا أنك ممكن تشرب أحسن قهوة عندهم.. وفيه أنواع كثير من سادة ومحوج وبن ثقيل وخفيف ووسط وبالبندق، المهم أنك فعلاً هـ تجرب "قهوة" عظيمة.. كمان أسعارهم مش عالية، وممكن أى حد يقعد هناك.. وعندهم شيشة لكنك تقدر تشربها أمام الكافيه على ترابيزات خاصة علشان الدخان ما يؤثرش على اللى قاعدين داخل الكافيه. حفلات: كمان هما عاوزين يعملوا حفلات توقيع مجانية للكتب، واللى حابب يروح ويتفق معاهم ومن غير مقابل "وده برضه حبًا فى الثقافة"، وبـ يتبنوا فكرة أن القراءة نفسها مكسب.. وبـ يحكوا على "بنت" زارتهم فى مرة ومعاها كتاب ولما خلصته، اتفقت معاهم على تبديل كتابها بكتاب معروض عندهم ولما تخلصه ترجعه.. وبالفعل وافقوا على كده.. ومش محتاجين نقول أن عندهم مجموعة كتب للقراءة فى مجالات مختلفة وهما بـ يستقبلوا أى كتاب للعرض ماعدا "كتب الدين والسياسة" علشان ما يحصلش خلاف بين الناس. وبـ يوجهوا دعوتهم للمكتبات الكبيرة ودور النشر أنهم يبعثوا لهم كتب من إصداراتهم علشان الناس تتعرف على الكتب وتبقى مساحة القراءة أكبر. أصغر صانع: كمان لاقينا هناك "أصغر صانع مشغولات يدوية" وهو "رفعت مصطفى" 8 سنوات وبـ يعمل حظاظات من الخيوط وعاوز يبقى ده مشروعه لما يكبر، وبـ يبيع الواحدة بـ "3جنيه".. ها؟ حد عاوز يشترى؟.. طيب يقرأ.. طيب يشرب قهوة؟

...

بيت دوِّن: حلقة وصل في وسط البلد
اصدرت في: 12/02/2014

زووم أوت: الكاميرا ماشية براحة.. أنت دلوقت فى وسط البلد، أيوه بالضبط فى ميدان طلعت حرب، هاه شايف التمثال؟ تمام جدًا، هـ تلاقى "كافيه ريش" أيوه اللى تكلمنا عنه فى كايرو 360 قبل كده، هو بالضبط، شايف الممر اللى جنبه؟ ادخل فيه، تمام.. بص لفوق هـ تلاقى يافطة "بيت دوِّن". زووم إن: الكاميرا لسه ماشية معانا وإحنا دلوقت طالعين بيت قديم من بيوت وسط البلد.. وصلنا الدور الأول.. دخلنا من الباب اللى مفتوح من 10 صباحًا إلى 11 ونصف مساءً.. مرحبًا بكم فى "بيت دوِّن". دخول أول: قبل أى حاجة لازم نحكى لكم حكاية شابين: واحد اسمه مصطفى الحسينى والثانى اسمه أحمد مهنا، ودول عملوا دار نشر وسموها "دوِّن" وبدأت صغيرة لكن بمجهودهم قدروا يكبروها وفضلت تنتشر لحد ما بقيت دلوقت من أهم دور النشر الشابة ولها إنتاج كبير، ولما بـ يعملوا حدث بـ يبقى واحد من أكبر الفعاليات الثقافية فى مصر. دخول تاني: الوقت جري بسرعة مع مديرين المكان أحمد رامى، أمنية عبد الرحمن، وإحنا قاعدين نسمع لهم هما بـ يعملوا إيه وإيه فكرة المكان، مع أن المكان مش كبير لكنهم قادرين يستفيدوا بالصالة علشان تبقى قاعة ندوات وبالغرفة اللى باقية علشان تبقى مكان للورش.. الورش بقى عندهم لها طابع مختلف جدًا، أولًا هما بـ يعملوا استبيان ويشوفوا الناس عاوزة ورشة إيه، أو بـ يقدم مجموعة شباب لهم فكرة الورشة اللى عاوزينها، أو بـ يقدم مدرب فكرة ورشة عاوز يعملها عندهم، ثانيًا يبدأ المكان فى عمل تصفية لكل الأفكار ويعملوا أفضل شيء ممكن والجميل بقى أن المدربين متطوعين والورش ببلاش. ببلاش: لو عاوزين نلخص هدف المكان يبقى فى ثلاث كلمات" "حلقة وصل مجانية" بين الراغبين فى الثقافة والمنتج الثقافى نفسه، هما بـ يعملوا حفلات توقيع وندوات وورش تصوير وشعر وسرد مع فريق اسمه "باند بورتريه" وهو باند متكون من شاعر "عبد الرحمن إبراهيم" وقاص "أحمد شاهين" ورسام "حسام جمال" بـ يقولوا القصيدة أو القصة ويرسموها، وبـ يعلموا الناس إزاى يعملوا كده.. في قعدة حلوة. القعدة: على ذكر القعدة لازم نقول لكم أن كمان فيه فريق "القعدة" وهو مجموعة من الروائيين والشعراء والكتاب بـ يعملوا قعدة مع الشباب ويسمعوهم ويوجهوهم، كمان هناك فيه قعدة حلوة لو عاوز تشرب حاجة وأسعارهم لطيفة جدًا، وفيه إنترنت مجانى، ومكتبة بـ تبيع الكتب الخاصة بدار دوِّن ودور النشر الثانية، لو عاوز تروح تشترى ماشى، لو عاوز تروح تذاكر ماشى، لو عاوز تحضر ورشة أو ندوة أو تقرأ برضه ماشى، وشعارهم اللى بـ يلخص كل حاجة "دوِّن حكايتك معانا".

...

بيت زينب: قوم يا مصري.. كأنك فى بيتك
اصدرت في: 29/01/2014

كأنك فى بيتك: أول إحساس وأنت داخل المكان هو كأنك فى بيتك بالضبط، فيه أريحية فى المكان غريبة من أول ما تدخله لحد ما تخرج منه هـ تلاقى نفسك مش عاوز تخرج، ده إحساسنا، المهم هو عبارة عن شقة عادية من بابها.. فيها غرفة مونتاج وغرفة إدارة وأتيليه، ولما تدخل لازم يشد عينك الديكور الجميل والشرقى بامتياز، خاصة القناديل المزركشة بالخط العربى، واللوحة الجميلة اللى مكتوب عليها "النبى تبسم". تبسم: يمكن لوحة النبى تبسم اللى مش واخده واحد فى الألف من حيز المكان لكنها دالة جدًا على الجو الصوفى اللى مغلف المكان واللى راجع لمديرة المكان المخرجة/ جيهان الأعصر واللى نسبها ممتد لسيد من أسياد الطرق، ولى من الأولياء، يمكن يكون النبى تبسم فابتسمت الثقافة فى بيت زينب. زينب: اختيار الاسم لغز أصلًا وحكاية كبيرة، يعنى المشروع قائم على شخصين: المخرجة جيهان الأعصر، ومصممة الأزياء هند عبد العزيز، تخيلوا مافيش زينب فى أساميهم.. هنا السؤال: أمال إيه بقى حكاية زينب؟ حكاية: يحكى والعهدة ع الراوى أن فيه بنوتة صغيرة اسمها جيهان بنت الأعصر، ربطت بين وطنها وبين اسم زينب.. ليه؟ هى نفسها ما تعرفش، لكنها عارفة أن كلمة زينب بـ تفكرها بمصر، حتى لما زارت سوريا وهى كبيرة وراحت حى السيدة زينب الصغرى افتكرت مصر على طول، علشان كده قررت تعمل مكان ثقافى وتسميه زينب.. فيه كل حاجة حتى الأزياء. الأزياء: هنا لازم نقف بكم مع مصممة الأزياء هند عبد العزيز اللى بـ تعمل أزياء واخدة الروح المصرية.. ولأن اللبس بـ يؤثر على الشخصية كان لازم الأزياء تبقى واخدة من تراب البلد الشكل واللون والتصميم ونوع القماش، كله مصرى من غير أى تداخل مع الخط الغربى فى الأزياء، بالضبط هى أزياء جدتي وجدتك لكن بشكل عصرى جدًا ومميز كمان. العصرية والتميز: الهدف الكبير لبيت زينب هو إحياء الفنون المصرية بكل أشكالها لكن بشكل عصرى ومتميز.. يعنى عروض أزياء تلاقى.. إنتاج أفلام ممكن، عروض مسرحية وماله، وكمان مجموعة مشاريع مختلفة بالتعاون مع أماكن ثقافية ثانية زى بيت السنارى، ومؤسسة دوم، فمع بيت السنارى فيه مشروع "مدرسة السينما" اللى هـ يعلم الشباب يعنى إيه سينما وإزاى يصنعوا أفلامهم.. ومع دوم فيه مشروع "باختصار" اللى هـ ينتج مجموعة أفلام عن كل ما هو مصرى من عادات وتقاليد وأزياء وغيره. الفكرة الكبيرة لبيت زينب هى الشغل على الروح المصرية وبعثها من ثانى لكن مش من باب إعادة التاريخ، من باب العصرية والبحث جوه الواقع والشغل عليه علشان يبقى أفضل، هو محاولة للبعد عن "تغريب الفنون" وعمل مشروع فنى مصرى، وأول عمل صدر هو فيلم عن الفلاحة المصرية واللى بـ يرصد حالة الفلاحة اليوم مع ملمح مقارنة مع الفلاحة فى التاريخ المصرى، وأقرب حدث لهم هـ يكون عرض "أتيليه زينب" فى فبراير فى فندق موفنبيك دريم.. وفرست مول. لو عندك مشروع مهتم بالطابع المحلى والشأن المصرى وبـ يعالجه تقدر تقدمه لبيت زينب وعلى فكرة هـ تلاقى نفسك "كأنك فى بيتك".

...

فندق دينا: الإقامة للأجانب والمصريين في هوستيل وسط البلد
اصدرت في: 21/06/2012

"هوستيل دينا" أو "نزل دينا" مكان مناسب لواحد أجنبي نازل القاهرة كام يوم وماشي، الأسعار معقولة، والجو مناسب، والموقع كمان في قلب وسط البلد، سهل التحرك من خلاله والرجوع له، صاحبة المكان اسمها دينا وواخدة الدور الأخير من عمارة أثرية في منطقة وسط البلد، تحديدًا في شارع عبد الخالق ثروت، ومسمياه على اسمها، الموضوع نسائي بالكامل وده الموضوع الفريد من نوعه، المالكة واحدة ست والمديرة ست، والخدمة من سيدات. تُهنا عقبال ما روحنا، ولفينا كثير جدًا رايحين جايين في شارع عبد الخالق ثروت، لحد ما اكتشفنا أن العمارة رقم 42 مدخلها مش على الشارع مباشرة، لكن لازم تدخل وتمشي حوالي أربع أو خمس خطوات في ممر علشان توصل للباب، غالبًا هـ تلاقي البواب قاعد على ناصية الممر، رجل أسمر لو سألته هـ يقول لك رقم 42 جوه. لما تدخل العمارة هـ تلاقيها مظلمة، أو منورة نور ضعيف شوية، السلالم قديمة جدًا، ونظافتها مش كويسة قوي، لونها ترابي، والحوائط على طول السلم لونها بني مُقبِض، السلم مخيف فعلاً، إحنا ما طلعناش عليه، وقفنا انتظرنا الأسانسير، والغريب أنه ينفع تطلبه من الأرضي ينزل لك ويطلعك الخامس، لكن لو أنت في الخامس عاوز تنزل وحاولت تستدعيه فيه عطل هـ يخليه ما يطلعش، إلا بقى لو كان حظك حلو، وحد من تحت طلع في اللحظة اللي أنت نازل فيها. الأسانسير قديم جدًا برضه، أثري فعلاً، ومع كل الحاجات دي تصورنا أن الفندق أي كلام وحاجة مش ولا بد، لكن اكتشفنا أنه مريح، ونسبة الخصوصية فيه عالية، لما بـ تطلع بـ تستقبلك بنت اسمها نرمين، بـ تحجز لك، وبـ تخلص الإجراءات، جادة جدًا، وبشوشة في الوقت نفسه. الفندق مكون من 11 غرفة، وبـ يقدم نفسه من خلال شبكة الإنترنت بكلام زي: "أنه دافئ وهادئ ونظيف وأسعاره معقولة، لكن الكلام مش خيالي، السقوف فعلاً مميزة في المكان، لأنه قديم، والأرضية خشب، والشبابيك فرنسية عالية، ورغم أنه في قلب القاهرة لكن طريقة البناء والتأسيس للمبني مخلياه هادئ جدًا، رغم الزحام اللي هو فيه، المبنى تم بناؤه سنة 1910، الأفطار مجانًا كل يوم من الساعة 8 صباحًا لحد الساعة 11 صباحًا، الغرفة المشتركة عبارة عن مساحة مريحة للناس اللي هـ تبات ليلة وما عندهاش مشكلة تشارك في الغرفة مع ناس ثانية. الغرفة الخاصة مع بلكونة وحمام مش خاص سعرها 110 جنيه في الليلة، بـ توفر غرف للأعداد الكبيرة من الأصدقاء بحوالي 240 جنيه، وعلى كل الفندق موقعه مثالي قريب لمنطقة رمسيس، والعتبة، والتحرير. الفندق بـ يحاول يقدم أنشطة ثقافية على ما قسم، زي الفيلم الأجنبي اللي بـ يتم عرضه كل يوم خميس، والطرقة الكبيرة بـ يتم استخدامها كمعرض فني من وقت لآخر، آخر معرض كان في المكان كان خاص بإبراهيم البريدي، والأعمال الفنية كانت معروضة للبيع.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا