الزمالك فن وثقافة in Cairo, Egypt

فن وثقافة

قاعة الزمالك للفن: معرض لعب عيال للفنان خالد سرور
اصدرت في: 20/12/2014

عادة بـ ترتبط المعارض الفنية في ذهن الواحد بالجدية والعمق، وقليل جدًا لما بـ نزور معرض ونلاقي موضوعه خفيف ومبهج؛ معرض الفنان خالد السرور "لعب عيال" في قاعة الزمالك للفن – Zamalek Art Gallery من أكثر المعارض المبهجة اللي زرناها في الفترة الأخيرة. ومش بس المعرض مميز في عنوانه وموضوعه، ده كمان تناول الموضوع في حد ذاته مختلف وجرئ. الفنان خالد سرور من مواليد دمنهور 1965، وتخرج من كلية التربية الفنية سنة 1988، درس في كلية التربية الفنية وله معارض محلية كثيرة، بالإضافة إلى أن عدد كبير من الأماكن العامة بـ تعرض أعماله بشكل دائم زي جامعة حلوان، كليّته في الزمالك ومتحف الفن الحديث. ومعرضه الحالي هو امتداد لمشوار فني طويل اهتم فيه بموضوعات مختلفة زي الموروثات الشعبية ورسوم الأطفال، واللي واضح المزج بينهم بالذات في المعرض الأخير. متعودين ندخل قاعة الزمالك للفن ونلاقي لوحات ألوانها هادئة ورزينة، فكان بالنسبة لنا غريب أننا نلاقي لوحات ألوانها طفولية صارخة وواضحة، والحقيقة أن اللوحات نجحت في أنها تنقل لنا الشعور بالبهجة؛ الفنان خالد سرور تناول فكرة رسوم الأطفال لأن ببساطة وجهة نظر الأطفال عن العالم اللي إحنا عايشين فيه أوسع وأقل واقعية من وجهة نظر أي إنسان مهمة كانت قدرته على التخيل. من أول اللوحات اللي أبهرتنا كانت لوحة فيها مجموعة من لاعبي السيرك. وبالرغم من أن الفنان متبني فكرة الرسم بخيال طفل وبالتالي اللوحات خالية من واقعية المنظور، إلا أن الفنان قدر أنه يستبدل المنظور بتقسيم اللوحة لمساحات لونية مختلفة ومحددة باللون الأسود. وللتأكيد على "اللا واقعية" رسم قطة باللون الأصفر الفاتح في أسفل اللوحة. من اللوحات اللي لفتت نظرنا كانت لوحة لصياد سمك، بنفس النمط الطفولي للوحات الأخرى ولكن الألوان في اللوحة دي كانت متناسقة أكثر –رمادي فاتح، ولونين صريحين زي الأزرق والأصفر- وكذلك ترتيب العناصر وتكوينهم في اللوحة ككل. لاحظنا اهتمام الفنان بتأكيد على مصرية لوحاته، ففيه لوحة لبنت كأنها جالسة على سطح بيت ريفي وفي الخلفية أرض عليها الحيوانات وأشجار ونخيل. اللوحة تقسيمها شبه هندسي وغالب عليها الألوان الساخنة. وفيه لوحة ثانية لأسرة، لاحظنا أن الفنان أضاف أبراج الحمام للخلفية. ده غير لوحات ثانية فيها موتيفات شعبية مختلفة زي الطيور والأشكال الهندسية زي المثلثات الموجودة في بيوت الريف والنوبة. آخر لوحة كانت لثلاثة أطفال بـ يعزفوا على آلات موسيقية زي الدف، والمزمار والأكورديون. اللوحة تكوينها أبسط من تكوينات اللوحات السابقة. الاهتمام بالتفاصيل واضح في ألوان ملابس الأطفال وأشكالهم، أما الخلفية فهو بيت شبه بيوت النوبة ومن وراءه سماء بلون أزرق فاتح. بالرغم من لوحات المعرض كلها بـ تجمع بينها تفاصيل موحدة زي أن جميع عناصر اللوحة محددة بالون الأسود، والتأكيد على البيئة المصرية سواء ريف، ساحل أو حتى مدينة. إلا أنك هـ تقف أمام كل لوحة وكأنها أول لوحة تشوفها في المعرض.

...

علبة ألوان: صومعتك في انتظارك في الزمالك
اصدرت في: 03/09/2014

إحنا مش من هواة الكلام عن صعوبة الحياة في القاهرة بزحمتها ورتمها السريع والمكرر في نفس الوقت -غالبًا إحنا قلنا كل حاجة في جملة واحدة خلاص- لأننا مش هـ نضيف أي جديد. وبالتالي محاولة طرح أي حلول –زي كلمة "افصل"- هـ تكون حشو مالوش لازمة؛ لأن الحلول كثيرة وبـ تفرق من شخص لآخر. كل واحد فينا له طريقته في أنه يفصل عن دوشة الحياة، فيه مثلًا واحد يحب يجرب حاجة مجنونة زي التزحلق على الرمال، وفيه واحد بالنسبة له التقوقع والسياحة الداخلية في "أغوار الذات" هو باب الهروب... لو أنت من النوع الثاني، قوقعتك في انتظارك في علبة ألوان في الزمالك. علبة ألوان موقعه ممتاز، مش بس لأنه في الزمالك، ده كمان في أكثر الشوارع هدوءً، وهو شارع أحمد حشمت. يافطة خشب بدائية الصنع عليها الاسم، مُعلقة على جذع شجرة، أجمل شيء فيها بالنسبة لنا هو العيب الوحيد اللي فيها، وهو أن ما عليهاش أي سهم يوجهك للمكان بالفعل... وده حفّز القبطان اللي جوانا، فدخلنا ممر العمارة الهادئ وطلعنا السلالم الرخام اللي لاقيناها على اليمين. حتى الآن مافيش علامة توجهنا؛ كل أبواب الدور الأرضي لا توحي بالحياة تمامًا –لو رحت جاليري تاون هاوس قبل كده في وسط البلد هـ تفهم إحنا بـ نتكلم في جو عام شكله عامل إزاي- ماعدا باب واحد على أيدك الشمال بجانبه لوحة متوسطة لعرائس أوبريت الليلة الكبيرة. الباب كان مفتوح فدخلنا. المكان هدوءه للوهلة الأولى غريب، مش بس كده... ديكوراته أعجب وأغرب، لدرجة أننا توقعنا رجل مسن لابس روب قديم عايش لوحده هـ يخرج من أي ركن يطردنا، ولكن لحسن الحظ لحقنا أحد الشركاء الأساسيين للمكان، واللي استقبلنا بترحاب شديد هو وقطة صغيرة اسمها "زبيدة" (طبعًا اللي مالهمش في القطط، المقال النقدي انتهى بالنسبة لهم) بـ تلعب مع أي شخص وفي كل مكان. الديكور... صعب وصفه، إحنا حسينا أننا دخلنا بيت رجل من الزمن الجميل... أصحاب المكان احتفظوا بديكورات المنزل الأساسية وغالبًا ممتلكاته، لأن المكان فيه أنتيكات على كل لون وشكل: من أول زمزميات قديمة، وحتى الآلات الكاتبة وكاميرات بمختلف أنواعها... ده غير مجموعة مميزة من الإكسسوارات المصنوعة يدويًا... كل ده قابل للبيع "أي حاجة تعجبك وتحس أنك ارتبطت بها اشتريها مننا." ده كلام أصحاب المكان. أخذنا جولتنا، المكان فيه غرفة للقراءة وغرفة فيها قعدتين منفصلين لو مش لوحدك، فيه كمان غرفة تحت التجهيز للفنانين علشان يأخذوا راحتهم مع ألوانهم وكراكيبهم. الصالة الرئيسية واسعة وفيها مسرح صغير بـ يستوعب حفلات "على القد" كل يوم خميس، وده المكان اللي قررنا أننا نقعد فيه. المكان قائم على فكرة "اخدم نفسك"... فروحنا المطبخ وطلبنا منهم يرشحوا لنا نشرب إيه، قدموا لنا مشروبين رسميين عندهم: عنب بالتوت (15 جنيه)، وليمون بالكيوي والنعناع (15 جنيه). تخوفنا من الأول علشان عندنا اعتقاد مترسخ أن التوت أو العنب يعني دواء كحة متخفي... بس الحقيقة أنه كان منعش جدًا وكميته الكبيرة تساعد على شربه بمزاج لأطول فترة ممكنة، أما الثاني فمشكلته بالنسبة لنا كان سكره الزيادة بالرغم من أن كان فيه ليمونة كاملة في الكوب... بقشرها، وده لأن المشروب مستخدم فيه شربات النعناع، فوضع طبيعي أنه يبقى مسكر. أخذنا راحتنا واستمتعنا بالهدوء، فأخذنا دور ثاني من المشاريب، جربنا كابتشينو (15 جنيه) وشاي بالتوت البري (10 جنيه)... مشروبات عادية ولكن قلنا يمكن فيه إضافة. ولكن الكابتشينو مش أفضل ما أنجبت الكافيهات، الرغوة كانت اختفيت عقبال ما وصلنا للمكان اللي كنا قاعدين فيه. الشاي كان تجاري ممكن تجيبه من السوبر ماركت فعادي جدًا. تجربة هـ نكررها، بغض النظر عن الكابتشينو والشاي أنت مش رايح هناك علشان تدلع جسمك بأكلة أو مشروب ما جربتش زيّهم قبل كده... أنت رايح تدلع نفسيّتك في جو عتيق يشجعك أنك تتأمل... لازم تجربه!

...

مكتبة القاهرة الكبرى: مصر التى فى الزمالك
اصدرت في: 29/06/2014

مصر: لما نيجى نتكلم عن واحدة من أكبر المكتبات فى مصر يبقى إحنا لازم نتكلم عن مكان عريق وكبير بـ يحمل تاريخ.. وناس داخلة وناس خارجة.. مش كده ولا إيه؟ عمومًا إحنا رحنا وزورنا مكتبة القاهرة الكبرى فى الزمالك، تحديدًا فى شارع مظهر وعرفنا أنها افتتحت سنة 1995 وصراحة هى من ناحية التصميم حاجة كده تحفة معمارية بـ تفكرنا بمصر من بره.. اللى يشوفها من الطيارة غير اللى يعيش فيها فى حارة.. المكان تحفة ليه بقى؟ لأنه فى الأصل كان قصر تاريخى للملكة سميحة كامل (بنت السلطان حسين كامل) اللى حكم مصر فى نهاية القرن التاسع عشر.. والقصر بـ يتكون من 3 طوابق وطابق تحت الأرض.. ومساحته الكلية حوالى (3465) متر مربع المبانى منها حوالى (535) متر مربع. التى: التى أداة وصل ما بين مصر وخاطرى أو الزمالك.. مصر التى تقدر تحط بعدها أى عدد من الكلمات الحلوة أو غيرها.. والمكتبة من الكلمات الحلوة اللى ممكن تتحط بعد "التى".. المهم هما كتبوا فى التعريف بالمكان أن عدد الناس اللى بـ يزوروهم حوالى (600) مستفيد يوميًا مع أننا لما رحنا ما كانش فيه العدد ده لكن خلونا نقول أن (المكتبة التى) دى عندها مجموعة أنشطة كبيرة بالفعل يعنى فيه برنامج شهرى لمحو الأمية سواء الكتابية أو الأمية الثقافية... وبـ يحاولوا ينشروا ثقافة العلوم الإنسانية والاجتماعية والثقافة العلمية والتكنولوجية.. وبـ يعملوا ندوات فى تخصصات كثير. وورش عمل ومعارض ومؤتمرات ومحاضرات وحلقات بحثية. فى الزمالك: مصر ساعات بـ تبقى فى خاطرى وساعات برضه بـ تبقى فى الزمالك، عادى يعنى ومصر التى فى الزمالك وتحديدًا فى مكتبة مصر ماسكة حاجة مهمة جدًا وهى فكرة توثيق الإنتاج الفكرى المرتبط بالحضارة العربية وفى مجالات كثير، يعنى العلوم والآداب والفنون والعمارة والآثار والتاريخ وكمان فيه إمكانية البحث عن كتابات بلغات مختلفة عن العرب وعن تراثهم وحضاراتهم وفيها مجموعة من الوثائق والخرائط مش موجودة فى مكان ثانى.. وكمان بـ تهتم بحاجة فريدة من نوعها.. بـ تهتم بمصر وبتوثيق اللى حصل فيها وبالوثائق المصرية فى مختلف العصور والخرائط واللوحات والصور والكتابات والمقالات. يعنى تقريبًا كده عاوزين يعملوا أول مركز حضارى ثقافى متخصص فى كل حاجة لها علاقة بالقاهرة وده عمل كبير ومهم، روحوا المكتبة هـ تلاقوا معلومات وكتب كثير وخدمات للمراجع والاستعارة الداخلية والتصوير والإنترنت والخرائط والميكروفيلم وكمان ورش للأطفال.

...

المطرح فنون وثقافة: بيتك ومطرحك
اصدرت في: 07/04/2014

المطرح: زمان كانت الناس الجميلة لما تقابل حد فى بيتها وعاوزة تحسسه بأنه فى بيته تقول له: "اتفضل بيتك ومطرحك" فـ يحس الضيف أنه قاعد فى بيته، فـ يأخذ راحته، ودى كانت من أدبيات الضيافة زمان. أدبيات: لما زورنا المطرح لاقيناهم زى الناس زمان برضه.. بـ ينفذوا عملى فكرة "بيتك ومطرحك"، بـ يخلوك تحس أنك صاحب مكان يعنى مش فى بيت غريب ولا حاجة.. هما شايفين أن المكان مش مجرد مركز ثقافى متخصص فى الفنون وتعليمها، لكنه مكان للراحة فى المقام الأول، راحة المستفيد وعمل حالة من التوافق الاجتماعى والفكرى والنفسى للمتدرب والزائر، هو ده اللى بـ يحاولوا يعملوه، علشان كده بـ يتم اختيار الموسيقى ونسبة الإضاءة على حسب نوع الورشة أو المحاضرة اللى بـ تتم فى المركز. المركز: لما زورنا المكان قابلنا د. سميحة تهامي وهى معيدة فى كلية تربية فنية وعرفنا منها أن المكان ملك د. أحمد عبد الغني اللى بـ يدرس فى كلية التربية الفنية، وكمان معاه شريكه أ. أيمن أبو دومة الفنان التشكيلي.. والمركز قائم على فكرة مهمة جدًا وهى طرح الثقافة البصرية للجمهور وتنميتها، وتعريف الجمهور فكرة العمل الفنى وأسسه الجمالية والفكرية والفلسفية.. وعلى أى أساس بـ يتم تقييم الأعمال الفنية. الفنية: الفنية هنا هى القيمة اللى بـ يقدمها المكان.. وهى قائمة على فلسفة المكان وده باين من الأعمال اللى على الحائط من إبداع د. أحمد عبد الغنى والفنان أيمن أبو دومة، وجذب نظرنا معرض د. أحمد اللى قائم على فكرة فلسفية عبارة عن نظرة على الطبقة الفقيرة ومحاولة لإخراج الجماليات فيها. الجماليات: المكان بجد جميل، عبارة عن شقة كبيرة فيها مكان مفتوح للورش والرسم وفيه غرف ثانية للمتدربين.. ومكتبة كبيرة فيها كتب متنوعة عن النقد والفن والسينما وتاريخ الفن والموسيقى، والجماليات النفسية من أهم الحاجات فى المكان لأنهم بـ يحاولوا دائمًا يخلوك فى حالة نفسية ومزاجية عالية، وده طبعًا مرتبط بالفن زى ما فهمنا من القائمين على المكان، لأنهم بـ يحاولوا يعملوا توعية بنشر المفهوم الجمالى وتوصيل معلومة أن الفن التشكيلى مش مجرد رسومات، لكنه حالة ولها أبعاد فلسفية وفكرية زى فكرة البيت القديم اللى جمالياته مش فى رسمه لكن فى التاريخ اللى عدى عليه والذكريات اللي مخزنها، وزى لعبة الضوء واللون وانعكاس الرسوم على النفس البشرية. الرسوم: فى النهاية كل حاجة بـ تدور حول ثقافة الرسوم والبصر وعلشان كده هما بـ يعملوا فعاليات كثير زى الدورات والورش التدريبية فى "التصوير، الرسم، النحت، الخزف، الفوتوغرافيا، السلك سكرين"، وبـ يعملوا حلقات نقاشية لتبادل الخبرات فى الفنون التشكيلية والمسرح والأدب، وحلقات لقراءة ونقد الأعمال الفنية، وعروض الأفلام السينمائية وفتح الحوارات فى التذوق الفنى، وكمان الزيارات المتحفية اللى بـ يعملوها بالتزامن مع الورش المختلفة. المطرح روح وجمال وفن وراحة وثقافة وزيارات ومتعة بصرية وحلقات نقاش.

...

زور خانة: ما تزور المكان بقى فى الزمالك
اصدرت في: 03/03/2014

خانة: لفظة فارسية معناها "المكان".. ودخلت مصر أيام المماليك والعثمانيين وبدأت تنتشر وتتعرف فى البلد ومنها حافظ المصريين على مصطلحات مشهورة جدًا وساعات بـ نستعملها لحد وقتنا ده زى "كتب خانة"، يعنى المكان اللى بـ نتحفظ فيه بالكتب.. "أجزا خانة" وهى الصيدلية.. إلخ. والخان تطور بعد كده فى مصر وبقى المكان اللى بـ يبات فيه الناس المسافرة وبـ يقدموا لهم فيه الطعام والشراب والراحة لمدة بسيطة يعنى مش زى الفندق فيه إقامة كاملة، فقط إقامة مؤقتة. إقامة مؤقتة: الثقافة ممكن تكون زى الإقامة المؤقتة فى مكان ما فى العقل.. وبعدين لازم تنتقل لمكانثانى وهو الفعل.. يعنى ما ينفعش نأخذ المعلومات ونخزنها فى العقل وخلاص على كده، وإنما لازم كمان نحرك الإقامة دى.. ونطبق المعلومات اللى عندنا فى حواراتنا وحياتنا وتصرفاتنا وسلوكنا، وبكده نبقى مثقفين.. عندنا وعى ومعرفة وبـ نطبقهم فى حياتنا.. آفة الأمم أن مثقفينهم ما بـ يتحركوش بعيد عن الكتب والمقالات والأفلام الوثائقية.. وفاكرين أن الثقافة لازم تكون مع الجماعة الخاصة (جماعة المثقفين واللى بـ يقرأوا) فى حين أن الثقافة فى الأصل منتج لكل الناس. الثقافة منتج: آه والله الثقافة منتج، حاجة لازم تتحس وتتشاف وتتسمع وتنزل لأرض الواقع.. تطلع مزيكا أو كتاب أو ندوة أو تحفة فنية أو لوحة أو رسم على الحائط.. تطلع زى ما تكون.. وده اللى لازم تعرفوه وأنتم بـ تزوروا المكان اللى عامل كأنه مكان مقدس ومسمى نفسه "زور خانة". زور خانة: "إذا رفضنى الآخر فأنا موجود.. وإذا لم يرنى فأنا موجود.. ولهذا عزمنا نحن قاعة "زورخانة" بعرض أعمال الفنانين المرفوضين، فنحن نقبل الأعمال التى تستحق أن تكون مقبولة، ونحن نرى الأعمال التى لم يرها الآخر..فنحن نرى الأعمال بعين ثلاثية الأبعاد..بعين فنية.. حيادية... متخصصة.. إذا كنت من المرفوضين.. وأعجبتك الفكرة.. فارسل أعمالك على "زورخانة"، نحن نحترم العمل الفنى ونقدره". باختصار هى دى فكرتهم وهو ده قانونهم.. المهم أنك تكون فنان ومبدع فى المقام الأول، وهما هـ يساعدوك.. طيب بـ يعملوا إيه فى المكان .. نقول لك: المكان فى الزمالك عبارة عن قاعة عرض كبيرة كلها تحف ولوحات ورسومات لفنانين مختلفين وتوجهات مختلفة.. مع إضاءة خفيفة وهادئة ومكتب واحد قاعد فيه مدير المكان.. وهما جاليرى بـ يهتم بالفن بكل أشكاله وبـ يعملوا ندوات لكن على استحياء لأن نشاطهم الأساسى والمهم هو الجاليرى والورش. عن الورش نتحدث هنا.. لأن هما صراحة متميزين فى ده جدًا، يعنى عندهم ورش رسم ونحت وخط عربى وفوتوغرافيا وعود وكمان أنيميشن D2و 3D، وبـ نقول لك إيه؟ ما تزورهم بقى.

...

روعة بوك ستور: الاسم لازم يكون على مسمى
اصدرت في: 30/12/2013

الاسم: زمان كنا بـ ندرس مع دكتور "سيد البحراوى" -ربنا يعطيه الصحة- "علم اجتماع الأدب" وهو علم بـ يحلل المسميات عن طريق دراسة المجتمع وتأثيره على أسماء الأماكن والكتب والمحلات وغيرها.. وكان التحليل المميز واللى لسه متعلق بذهننا لعنوان "السلام شوبنج سنتر للمحجبات" وفيه تعلمنا أن كل جزء بـ يعبر عن حاجة فى المجتمع "السلام" علشان اتفاقية السلام بين مصر وإسرائيل، "شِوبنج سنتر" علشان الانفتاح ودخول اللغة الإنجليزية لنسيج المجتمع وكده. روعة: ولو حاولنا نسترجع ذاكرتنا ثانى يبقى لازم نقول أن اختيار اسم "روعة" بـ يدل على محاولة اللعب فى عقل المتلقى علشان يعترف أن أى حاجة هـ تبقى موجودة هناك لازم تبقى "روعة" يعنى باهرة الجمال، وأى كتب من هناك لازم تبقى على نفس النمط من الجمال.. يعنى من الآخر لما هـ تروح هناك هـ تبقى حاطط فى دماغك أنك رايح تتعامل مع الجمال على إطلاقه. بوك ستور: هنا لازم نقف شوية أمام المصطلح الإنجليزى اللى عربناه (خليناه عربى) وبدأنا نتعامل معاه على اعتباره من مفردات الحياة الثقافية فى مصر، يعنى أصبح من الوجاهة الاجتماعية والثقافية أنك تروح تشترى كتب من الـ "بوك ستور" مش من "المكتبة"، وأنك تروح تقعد فى "كافيه" مش فى "قهوة" وأنك تقرأ "بوك" مش "كتاب" وتسمع "ألبوم" جديد مش "شريط" وكل المفردات دى راجعة لفكرة واحدة وهى باختصار أنك لو فكرت وتكلمت بلغة ثانية غير العربى فده معناه أنك متعلم وفاهم وعارف، مع أن اللغة العربية واحدة من أهم اللغات فى الإبداع، لكن ده مش عيب فى المكان، ده بقى حالة شبه عامة فى الوسط الثقافى.. فيه اللى بـ يحاربه وفيه اللى بـ يؤكده، وما نقدرش نقول أنه حالة عامة لكنه حالة موجودة. المكان: "روعة بوك ستور" مكان موجود فى الزمالك جديد تم افتتاحه فى 16 ديسمبر، وهو تابع لدار روعة للنشر والتوزيع والدار تقريبًا بقى لها سنة أو أكثر شوية، وهى دار شبابية بـ تهتم بكتب الشباب وقائمة على فكرة دعم الشباب، علشان صاحبة الدار هى شاعرة شابة "هبة الشرقاوى" والمكتبة فيها ترتيبات جيدة علشان تبقى مركز ثقافى "بسيط" لكنه مؤثر، وجودها فى الزمالك هـ يفتح لها مجالات كثير للزيارة، خاصة أن الموقع فى قلب القاهرة وسهل الوصول إليه.. كمان المكتبة بدأت تعمل حفلات توقيع، وفى خطتها أنها تعمل صالون "شعرى" ثابت كل أسبوع يهتم بإبداع الشباب، وده هـ يعمل حركة فى المكتبة وهـ يخلى الزيارة لها ثابتة للشعراء ولمحبى الشعر والأدب.. كمان لازم نقول أن من الحاجات الجيدة فى المكتبة أنها بـ تعرض كتب ثانية غير كتب الدار يعنى كتب لدور نشر ثانية أشهرهم "نهضة مصر".

...

مركز الإبداع الفنى: اسم على مسمى
اصدرت في: 01/10/2013

إزاي تقدم إبداع حقيقى بتجربة جديدة جدًا؟ الإجابة بـ يقدمها مركز الإبداع الفنى بالقاهرة بثلاث سلامات تستحق الاهتمام فى مجال المسرح والسينما والرقص المسرحى الحديث وده عن طريق أسابيع ثقافية مختلفة. المركز تم افتتاحه فى 27 أغسطس 2002 علشان يكون نواة لمؤسسة ثقافية تخرج أجيال من المبدعيين وفكرة المكان قائمة على الأفكار الجديدة، يعنى هو اسم على مسمى "إزاى تعمل إبداع؟" دى فكرته اللى بـ يحاول ينشرها بين الناس ودى كمان الفكرة اللى بـ تخليه يعيش وينتشر. ثلاث سلامات: السلام الأول.. المسرح عبارة عن قاعة مستعدة لاستقبال عروض فنية عالمية من مدارس مسرحية متنوعة، وعبارة عن خشبة مسرح فى وسط القاعة الكبيرة وحولها المدرجات.. وكمان فيه ستوديو مسرح مركز الإبداع ومهمته هو الدراسة العملية للمواهب .. وده بـ يكون من خلال الورشة المسرحية اللى بـ يعملها مركز الإبداع الفنى تحت إشراف الفنان خالد جلال فيها تمثيل وغناء وإلقاء ورقص وصراحة خرج من الورشة دى ممثلين كثير اشتهروا دلوقت وأصبحوا نجوم.. ومن عروضهم "غنى الوطن".. مسرحية "قهوة سادة".. "أيامنا الحلوة".. "حنغنى". السلام الثانى.. مدرسة الرقص المسرحى الحديث صندوق التنمية الثقافية هو اللى بـ يصرف على مركز الإبداع والأنشطة اللى بـ تتم فيه.. وخلونا نقول عن الصندوق ده عامل أنشطة مهمة جدًا ولازم نرفع له القبعة ومن ضمن الأنشطة دى فكرة إنشاء مدرسة للرقص المسرحى الحديث يعنى بـ يدربوا الشباب على التعبير الحركى بشكل علمي وفني.. وهي أول تجربة يعملها مجموعة من الفنانين المتحمسين تحت إدارة الفنان وليد عوني، وهدفهم مش بس تعليم الرقص لكن كمان صنع حالة فنية وثقافية.. ومن عروضهم "سترة النجاة تحت المقعد" وده كان 3 أجزاء، وعرض "نصف ساعة قبل العرض" وكمان فيه قاعة الفيديو تيك.. وده عبارة عن مشروع كل فكرته أنه يحافظ على تراث السينما المصرية واللى منها الأفلام الروائية أو حتى التسجيلية.. وفيه فرصة كمان عشان تتفرج على الأفلام وتعرف بيانتها من على كومبيوتر المركز. السلام الأخير.. قاعة العرض السينمائى قاعة متوسطة للسينما بـ تأخذ حوالى 200 شخص.. هدفها معرفة مدارس السينما العالمية.. وعمل ثقافة سينمائية حقيقية.. بـ تقدم تجارب كثير من مصر والعالم.. وبـ تعمل كمان ندوات بعد الفيلم مع المخرجين والممثلين علشان يبقى الموضوع فيه ثقافة حقيقية.. وعاوزين نقول لكم أن مركز الإبداع بـ يقدم ورش عمل فى السينما للشباب.

...

المجلس الأعلى للثقافة: اتفرج يا سلام
اصدرت في: 01/09/2013

قرار جمهورى: قرار جمهورى رقم 150 لسنة 1980 م بإنشاء المجلس الأعلى للثقافة بديلًا للمجلس الأعلى لرعاية الفنون والآداب والعلوم الاجتماعية، باعتباره هيئة عامة بحيث يتبع الوزير المختص بشؤون الثقافة المصرى. المهمة: مهمة كبيرة على فكرة أنك تكون مسؤول عن مجلس زى ده وقبل ما نحكى عن المجلس وتفاصيله عاوزين نقول لكم عن مهمته... لما صدر قرار إنشاء المجلس الأعلى لرعاية الفنون والآداب سنة 1956كان كل مهمته أنه ينسق جهود الهيئات الحكومية اللى بـ تشتغل فى الفنون والآداب ويربط الجهود ىببعضها.. والناس صراحة ما كذبوش خبر.. عملوا اللائحة الداخلية وفيها أهم أهداف المكان.. خذ عندك: تيسير الثقافة للناس وكمان ربطها بالقيم الروحية، تعميق ديمقراطية الثقافة يعنى يوصلوا بها لكل الناس فى كل مكان فى مصر، وتنمية المواهب فى كل مجالات الثقافة والفنون والآداب، والاهتمام بالتراث القديم، وتأكيد قيم المجتمع الدينية والروحية والخلقية. يعنى إيه: يعنى إيه مجلس أعلى للثقافة؟ سؤال حيرنا جدًا وإحنا عاوزين نكتب عن الموضوع ده، يعنى إيه مجلس يكون هو أكبر وأهم مكان فى مصر بـ يخطط ويرتب لكل حاجة لها علاقة بالثقافة.. عارفين ده معناه إيه؟ معناه أن الثقافة وأهلها من المفروض يكون مكانهم فى المجلس ده.. وأن الحياة الثقافية من كبيرها لصغيرها فيه تمثيل لهم فى المجلس.. عمومًا تعالوا نتفرج عليه. اتفرج يا سلام: "اتفرج يا سلام" جملة شعبية قديمة كانت بـ تُقال فى عروض الأراجوز والساحر، واتفرج يا سلام على مجلسك الأعلى هو عبارة عن مبنى ضخم جدًا وتصميمه المعمارى تحفة..تقريبًا 7 أدوار كل دور له علاقة بتخصص معين من فنون وآداب وعلوم اجتماعية وفلسفة وتاريخ وإصدارات فى مجالات كثير.. أما عن أنشطة المجلس فصراحة هى كثير جدًا ندوات ولقاءات ومؤتمرات ومناقشة قضايا..وحفلات شعرية.. والاهتمام بالتواصل بين أدباء مصر والأدباء الأجانب.. والاهتمام بعمل احتفاليات لرموز الأدب والفكر والإبداع والفكر زى: ابن رشد، رفاعة الطهطاوى، جمال الدين الأفغاني، توفيق الحكيم، نجيب محفوظ، ألكسندر بوشكين، أم كلثوم، برتولد برخت، سوفوكليس، لوركا، محمد عبده وآخرين. وجنب كل اللى فات عندنا كمان مجموعة إصدارات زى سلسلة الكتاب الأول واللى باين من اسمه.. هى سلسلة بـ تهتم بأول عمل للكاتب.. وفيه سلسلة المؤلفات ودى للكتب اللى بـ توافق عليها لجان المجلس وبـ تنشر الكتاب بعدها.. وسلسلة روائع الأدب العربى ودى واحدة من أهم السلاسل لأنها بـ تهتم بنشر مجموعة كبيرة من الكتب التراثية اللى أثرت فى الوعى العربى بشكل عام.. والملحوظة المهمة أن أسعار الكتب دى بـ يبقى مدعم وبجد فى متناول الجميع. وآخر حاجة بـ يعملها المجلس هى جوائز الدولة اللى بـ تجتمع كل اللجان علشان ترشح ناس تكسبها وهى جوائز الدولة التقديرية والتشجيعية وجائزة النيل والجوائز دى على فكرة بـ تعتبر من أهم الجوائز وأغلاها قيمة فى مصر.

...

جاز مايت: بيت لموسيقى الجاز وأكلات لطيفة أخيرًا فى الزمالك
اصدرت في: 12/09/2012

فى وقت كتابتنا للمقال ده حطينا السماعات على ودننا وقعدنا نسمع موسيقى جاز والمغني والعازف لوي أرمسترونج علشان ندخل فى موود المكان اللى رحنا زرناه بعد افتتاحه بيومين.. لكن بصراحة الموود ده ما يجييش حاجة لما تروح هناك وتعيش بنفسك داخل عالم الجاز.. عالم «جاز مايت – Jazz Mate».المكان ده تقدر تغذي فيه روحك بموسيقى الجاز اللى شغالة طوال اليوم هناك إلى جانب الاستمتاع بتشكيلة من المأكولات والمشروبات اللى بـ يقدمها المكان، موجود فى الشارع اللى جنب فندق "فلامنكو" فى الزمالك، المكان حجمه صغير ويغلب عليه اللونين الأسود والبني هـ تلاقيه على الشمال وأنت داخل الشارع.بشعار "Put a little Jazz in your life" هـ يستقبلك، المكان مكون من دورين، الدور اللى تحت فيه 4 ترابيزات وكراسي خشب وأمامها كاونتر والمطبخ وشاشة بـ تعرض فيديو لأغانى قديمة أبيض وأسود لفنانين جاز كبار، سلم حلزونى صغير هـ يوصلك للدور العلوي اللى بـ يقام فيه حفلات جاز لايف كل ويك إند، فى الدور ده حوالى 4 ترابيزات منخفضة وواحدة عالية طويلة وبيانو وميكروفون بستاند وسماعات مع شباكين دائريين مدخلين نور النهار ووحدات الإضاءة فى السقف عليها لوجو جميل لـ "جاز مايت"، مش دي بس المنطقة اللى فوق لأنها ممتدة لجزء ثاني مكمل للداخل بـ يفصلهم 3 درجات سلم وفيها ترابيزات وكراسي ثانية مع جزء فيه كنب وأخيرًا حمام مشترك للرجال والسيدات. فيه تابلوهات صغيرة على الحوائط لنجوم فن الجاز أبيض وأسود أضافت روح حلوة قوي للمكان مع موسيقى الجاز اللى شغالة باستمرار.شريف مصطفى صاحب المكان واحد من 4 شركاء هم تامر أسامة ومحمد المهدي وكريم حمدان، شريف بـ يحب يعمل مشروعات للحاجات اللى هو بـ يحبها والدليل على كده أنه فكر فى "جاز مايت" لأنه مجنون موسيقى جاز وعنده مكتبته الخاصة للناس القديمة اللى بـ يسمعها أكثر من موسيقى الجاز الحالية، ولأنه لقى أن كمان مافيش مكان فى مصر متخصص لتقديم نوع الموسيقى دي، وكمان كان سبب أنه أسس مكتبة مع أصدقائه سماها «صوفى» والموجودة برضه فى الزمالك وحققت نجاح الفترة اللى فاتت لأنه بـ يحب الصوفية وكل ما يتعلق بها."هـ نبدأ الأول بعروض حية كل ويك إند، وبعدين ممكن العروض دي تكون شبه يومية، هـ نحط يافطة بره المكان كل مرة يكون فيه عرض لايف ونكتب اسم الفنان والميعاد علشان نستمتع كلنا فى اليوم ده بموسيقى الجاز"، شريف بـ يدعو أى حد عازف موسيقى جاز هاوي أو محترف وحابب يقدم عرض هناك ممكن يراسله على إيميله smostafa@jazz-mate.com أو يروح له هناك، وأضاف كمان: "فى الافتتاح كان فيه عرض حي لثلاثى جاز عمرو صلاح وقدم هو ونهى فكرى عرض جميل جدًا".الويك إند القادم "جاز مايت" عندهم حفل لايف لثلاثى رشاد فهيم Rashad Fahim Trio الساعة 9 مساءً، ودى تفاصيل الحفلة على الفيسبوك. يفضل الحجز المسبق فى المكان لأن مساحته صغيرة بالاتصال بهم على تليفون .0227370521"جاز مايت" عندهم مطبخ بـ يقدم إفطار وأطباق رئيسية وساندويتشات وسلاطات وشوربة ومقبلات ومشروبات باردة وساخنة وحلويات زي الوافل والتشيز كيك والبراونيز والآيس كريم بدون خدمة وضريبة. جربنا هناك كونتري فرايد تشيكن بـ 49 جنيه وديب فرايد فيش (سمك مقلى) بـ 49 جنيه، الأطباق الرئيسية بـ يكون لها 2 طلب جانبي من اختيارك، زجاجة المياه هناك بـ 5 جنيه وطلبنا كمان فى المشروبات ميلك شيك بالفانيليا بـ 20 جنيه. الميلك شيك جاء لنا الأول، سكره مضبوط وقوامه خفيف شويه لكن كان حلو قوي، الأكل تأخر حوالى نصف ساعة وكان فيه غلطة بسيطة أننا طلبنا طلب جانبي واحد (بيوريه مع الفراخ وأرز مع السمك) بس مش مشكلة لأن كل حاجة فى البداية بـ تحتاج شوية تضبيط ولأن أدب الجرسونات ومعاملتهم خلتنا نتغاضى عن الخطأ ده. بالنسبة للأطباق الكميات كبيرة ومشبعة ومتجهزة كويس، البيوريه بالفلفل الألوان كان أكثر بطاطس طرية وغنية زي الكريمة ذقناها فى حياتنا، كانت وهمية، الفراخ قطعتين كبار ومستويين كويس وكمان السمك والأرز كانوا حلوين قوي. التحلية اختارنا فيها تشيز كيك، كان حلو برضه وقوامه جميل، بس نصيحتنا كموقع 360 أنهم ممكن يعملوا اختيار لنوع صوص يوضع عليها، هـ تكون أجمد. "جاز مايت" مكان بـ نتنبأ له بالنجاح الفترة الجاية زي "صوفى". المكان يعتبر بيت بـ يجمع بين موسيقى جميلة وأكلة شهية مع صحبة أصدقائك وفرقة حية.. عاوزين إيه أكثر من كده؟

...

أميديوس: ستوديو تسجيل وبروفات في الزمالك
اصدرت في: 08/02/2012

ستوديو صوت جديد، يمكن الوحيد في الحي الراقي، في شارع 26 يوليو بعد محل «ديادورا» وقهوة «رباعيات الخيام» على نفس الصف، الستوديو في أول عمارة على الصف الشمال في أول شارع جانبي بعد القهوة، في الدور الأول. ستوديو «أميديوس - Amadeus» له ريسبشن ظريف مليان رسومات وبوسترات وفيه عدد من المجلات والموسوعات الخاصة بالمزيكا اللي ممكن تقعد تقرأها وتتفرج على الصور اللي فيها وتنسى نفسك، وفيه كاونتر ممكن تعمل عليه أي حاجة تشربها أثناء فترة انتظارك. غرفة البروفات مستطيلة الشكل ومساحتها صغيرة نسبيًا وأحد جدرانها زجاجي علشان يسمح بالتواصل مع غرفة التحكم المجاورة أثناء البروفة وبالأخص أثناء التسجيل. المعدات في غرفة البروفة كلها حديثة وفي حالة ممتازة، سماعات ياماها وأمبليفاير Fender للجيتار مش موجود في أي حتة، والدرامز ماركة Premier وصوته جيد جدًا، وصوت الباص جيتار جيد فقط، وتوزيع السماعات والأمبليفيرات معمول بشكل احترافي علشان كده الصوت مجسم ونقي ومش هـ تسمع أي صفارة أو ذبذبة غير مرغوب فيها. ولولا أن المساحة صغيرة شوية كنا ممكن نقول أنه أحسن مكان لبروفات الفرق اللي عدد أعضائها كثير وبـ يستخدموا ميكروفونات كثير وبـ تعمل الصفارة أياها لما تكون قريبة من بعضها أو من السماعات. لكن المكان هنا مثالي لأي فرقة لا يزيد عدد أعضاءها عن 4 أفراد، أكثر من كده هـ تبقوا قريبين قوي من بعض. جودة التسجيل موضوع نسبي لو كنا متفقين على أن تسجيل الصوت في مصر لسه ما ارتقاش للمستوى المطلوب، خاصة في موسيقى الـ Underground وبعيد عن شركات الإنتاج المشهورة، لكن المنافسة اللي بين الستوديوهات الكثير اللي فتحت مؤخرًا أكيد بـ تعلي جودة التسجيل يوم بعد يوم. مهندس صوت محترف هو اللي بـ يقوم بعملية التسجيل والصوت هـ يبقى أفضل من المتوقع، واللي لازم نقوله أن أصحاب المكان والمشرفين على التسجيل أشخاص متعاونين وظرفاء جدًا، وهـ تشعر أنك واخد راحتك تمامًا في التعامل وكأنك صاحب مكان أو تعرفهم من زمان. الستوديو بـ يعمل زي ورش عمل وحصص تعليم آلات مختلفة زي الجيتار والدرامز والباص جيتار، وممكن تبيع وتشتري آلات موسيقية وإكسسوارتها. إيجار الستوديو لمدة ساعة للبروفة بـ يكون 40 جنيه، وساعة التسجيل بـ 150 جنيه، والستوديو بـ يشتغل طول أيام الأسبوع من الساعة 2 ظهرًا لحد 2 بعد منتصف الليل. وفي التسجيل بـ يتم عمل جميع الخطوات بداية من التراكات الخاصة بكل آلة لحد المكساج والماسترينج. سعداء بوجود ستوديو زي «أميديوس» في الزمالك، ونتمنى أنه يستمر ويتوسع علشان يبقى مركز ثقافي موسيقى متكامل زي ما أصحابه بـ يحلموا.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن