المعادي فن وثقافة in Cairo, Egypt

فن وثقافة

زمان: الحياة على طريقة زمان فى المعادى
اصدرت في: 23/03/2014

"زمان".. أول ما هـ تسمع الاسم طبيعى ييجى فى بالك كل حاجة من الزمن الجميل يعنى من الأربعينيات والخمسينيات... وهكذا، زمان الناس كانت بـ تتلم على القهوة تتكلم على كتاب جديد فى السوق أو تتحاكى بانبهار عن فيلم جديد فى السينمات، أو بـ يتنهدوا وهما بـ يفتكروا أغنية لسومة ولا حليم ولا فايزة ولا فريد وكمان يقعدوا يسمعوا باهتمام للي عنده معلومة جديدة يقدمها للناس. كلمات تعريفية كتبها فريق "كافية زمان" على صفحتهم على الفيسبوك. "زمان" عبارة عن مبادرة شبابية بدأت من فترة قليلة 4 شهور تقريبًا، ولكن بدأت تسمع على المستوى الثقافى بسرعة.. "زمان" ده كافيه مفتوح لأى هاوى أو حتى محترف أو حتى عاوز يتعلم حاجة جديدة أو يعلِم، فى الفترة الأخيرة سمعنا كثير وكتبنا عن كافيهات بـ تخدم الثقافة والفن بشكل عام، بس لما روحنا "كافيه زمان" كان فيه شوية اختلافات ومميزات ممكن تميزه عن الأماكن الكثير اللى ظهرت فى الفترة الأخيرة، يعنى مثلاً مكانه هادي جدًا.. أي نعم تعبنا لحد ما وصلنا لكن اكتشفنا أن ده الطبيعي لو رايح أول مرة، كمان الخدمة كويسة بالإضافة إلى الأسعار اللى على قد إيدك سواء للكورسات أو حفلات أعياد الميلاد أو حتى لو كنت ناوى تأجر المكان لبروفة أو حتى للعرض أو للتصوير، بالإضافة لأسعار الأكلات السريعة والحلويات والمشروبات، ده غير أن فيه يوم خاص للأكلات البيتى. أول ما هـ تدخل المكان هـ تحسه عادي، الموضوع هـ يحتاج منك شوية تأمل علشان تكتشف المكان، هو عبارة عن دورين: الأول والأرضى، أول ما هـ تدخل هـ تلاقى مجموعة ترابيزات وبار لتقديم المشروبات، وعلى شمالك المكتبة فيها مجموعة كتب كبيرة للاقتناء أو الاستعارة أو الشراء، بعد كده بـ تنزل الدور الثانى أو البدروم هـ تلاقى فيه قاعة تساعى 100 فرد فيها قعدة بلدى يتم فيها أغلب الأحداث سواء للعروض أو البروفات أو الندوات الثقافية أو الورش، وكمان فيه غرفة بلاي ستيشن. أى نعم هو مُتبع الطراز القديم سواء فى ديكورات المكان المكونة من راديو من الأربعينيات والتليفون من الخمسينيات والطربوش والبيشة وحاجات ثانية كثير ممكن تتصور بها، والصور القديمة للفنانين وفنانات الزمن الجميل اللى مالية المكان والقعدة العربى والمشروبات اللي بـ تتعمل علي سبرتاية والشاى اللى فى البراد... وهكذا، إلا أنه بـ يفتقد الطراز ده فى ديكورات الكراسى المودرن اللي بـ تنتمى تقريبًا للوقت الحالى والدهانات كمان ألوانها حديثة وده خطأ يوخذ عليهم، لكن المجمل نقدر نقول عليه مكان مريح نفسيًا. بالنسبة للأسعار هـ نبدأ بالورش، طبعًا بما أنهم لسه مبتدئين مش هـ تلاقى كورسات كثير لكنها على المستوى التعليمى كويسة ومفيدة، ورشة العود والكمان والناى والرسم كل منهم سعرها 350 جنيه لمدة شهرين لكل واحدة، ورشة التصوير سعرها 150 جنيه شهر واحد، وفى آخر كل ورشة بـ يتم عمل معرض لبيع المنتجات اللى تم الشغل عليها أثناء الورشة بأسعار رمزية. كمان ممكن لو عندك بروفة ومحتاج مكان هادى للتدريب مش هـ تلاقى أفضل من المكان ده، أما بالنسبة لو كان عندك عرض مسرحى أو أى عرض ثانى أو حتى عندك تصوير ومش لاقى مكان، "كافية زمان" بـ يوفر لك المكان، عبارة عن قعدة عربى تتسع لـ 100 فرد تقريبًا، وبـ تأخذ منك مبالغ رمزية بعد أول ساعة مجانية 100 جنيه للساعة الواحدة، وده طبعًا مقارنة بأماكن ثانية مبلغ بسيط جدًا، وتدعيمًا منهم للشباب المبتدئ المكان بـ يكون مجانًا للبروفات. "كافيه زمان" كمان ممكن يحتفل معاك بعيد ميلادك وينظم لك حفلة بأسعار بسيطة، يعنى لو كان معاك مجموعة فيها 15 فرد تدفع 250 جنيه وتأخذ مشروبك المفضل وتحتفل أنت وأصحابك فى جو مختلف ولطيف، لو كان العدد معاك أقل من 15 فى حد أدنى 25 جنيه للفرد. ده غير الحفلات الموسيقية وآخرها التخت الشرقى وحفلات كاريوكى الأسبوعية بتذاكر مخفضة.

...

آرت كافيه: طوّر كل مهاراتك فى مكان واحد في المعادي
اصدرت في: 05/02/2014

مؤخرًا زاد الإقبال على أماكن الورش والكورسات المتنوعة من فنون ولغات وغيرها، وبقى معظم البنات والشباب بـ يحرصوا على أنهم يأخذوا الورش دى بشكل مستمر، ولأن كايرو 360 دائمًا بـ تحاول تساهم فى مساعدتكم أو اهتماماتكم بطريقة أو بأخرى اكتشفت "آرت كافيه" وهو يعتبر من الأماكن النادرة اللى بـ تجمع أكبر قدر من الكورسات فى مكان واحد وفى مجال واحد، فى الرسم والتصوير والفوتوشوب والخياطة وعمل أشكال فنية بالورق والطبخ وفن الإكسسوار.. إلخ، يعنى لو فكرت فى مرة تزور المكان حتى ولو للاطلاع صدقنى مش هـ تخرج منه إلا وأنت مُكتشف نفسك أنت بـ تعرف تعمل إيه وعاوز إيه وبـ تحب إيه، لأن فى "آرت كافيه " أكثر من 72 ورشة فى كل المجالات. المكان عبارة عن حديقة شكلها مختلف، فيها كافيه بس صغير شوية لقضاء الغرض مش أكثر واستراحة لأولياء الأمور، بعد كده بـ تدخل بـ تلاقي صالة فيها الريسبشن لكن هـ تعانى لحد ما تأخذ معلومة، وده أكبر مكان في آرت كافية عبارة عن صالة كبيرة بـ يتم فيها أغلب الورش ومجهزة بحاجات كثير من ترابيزات وأدوات ولوحات ومطبخ وكمان مزيكا حلوة يعنى جو مناسب لأى فنان. كمان فيه مكتبة صغيرة فيها مجموعة من الكتب المهتمة بالفن، بالإضافة لجاليرى صغير خاص بالإكسسوار الهاند ميد، ومطبخ وده خاص بورشة الطبخ. بالإضافة لأماكن الكورسات الثانية المغلقة واللى بـ تحتاج هدوء. أنواع الورش 3 أقسام: قسم للكبار وقسم للأطفال وقسم المشغولات اليدوية وده لأى سن حسب القدرات. حرصًا على وقتكم هـ نقول نبذة سريعة عن بعض الورش، ولو حبيت تعرف تفاصيل أى ورشة ممكن تدخل الموقع أو تتصل على الرقم الخاص بهم. هـ نبدأ بالقسم الخاص بالكبار من أول 16 إلى 90 سنة، وده فيه تقريبًا 16 ورشة كل ورشة بـ يندرج تحتها مستويات، كل مستوى له أسعار ومواعيد مختلفة أهمهم: تعلم فن إكسسوار وطريقة تشكيلها يدويًا، فن الشموع وعمل أشكال فنية مختلفة زي: paper art وInterior design و Collageو Variety crafty وNeedle work والتصوير وتعلم الفوتوشوب، فن الباتيك وفن الموزايك، فن النحت، وكمان فيه ورشة لصناعة الزهور وطرق تنسيقها، الـ Makeup وطريقة تعلمه بأبسط إمكانيات وأبسط الطرق، ورشة لعمل تصميمات عالمية والتعرف عليها ومعرفة آخر صيحات الموضة، وكمان فيه ورشة لاحتراف عمل الحلويات والتورتات المختلفة، وورشة لتعليم الطبخ، وكمان فيه ورشة بـ تعلمك إزاى تغير ديكورات غرفتك بنفسك. بالنسة للأسعار فهى تختلف من مدرس لمدرس ثانى، وكمان التعامل بـ يكون بالشهر وبـ يكون تقريبًا 4 حصص. لكن لو كنت محتار بين كل الورش دي ومش عارف تأخذ قرار، آرت كافية عاملة ورشة بـ تجمع بين كل الورش السابقة وهي عبارة عن نبذة مختصرة عن كل ورشه وسعرها 1600 جنيه للـ 8 حصص. ثانيًا: القسم الخاص بالأطفال، وده تقريبًا 17 ورشة بـ تهتم بالأطفال بداية من عمر 3 شهور إلى 16 سنة، أهمها الرسم والتلوين، والأعمال اليدوية، فن التشكيل بالطين الأسوانى، عمل إكسسوار هاند ميد، تعلم حكى القصص وتأليف الحكايات، دى بـ 3 لغات بالألمانى، بالإنجليزى والفرنساوى، الرسم على الكرتون، التصوير، الفوتوشوب، الأوريجامى، الرسم على الخشب،Paper art ،Puppetry . نفس النظام تقريبًا أغلب الورش موجودة بصفة شهرية والأسعار تختلف من مدرس للثانى، وآخر ورشة خاصة بالطفل والأم ودى بـ يتعلموا فيها إزاى يسمعوا مزيكا ويتعلموا الكتابة عن طريق اللعب ودى من 3 شهور إلى 4 سنين بـ 300 جنيه للـ 5 حصص. ثالثًا: المشغولات اليدوية، ودى فيها تقريبًا 7 ورش ومتاحة لكل الأعمار حسب القدرات العقلية والبدنية، أهمها الرسم سواء بالرصاص أو بالزيت، أو بالألوان المائية، وكمان ورشة فن الزهور، الرسم بالحرير، العلاج بالفن، تعلم أصول الخط العربى. الأسعار متفاوتة حسب المواعيد والمدرس مع أنها ممكن تكون لنفس نوع الورشة، بالإضافة للحفلات اللى بـ يعملها آرت كافيه فى المناسبات زي رأس السنة.. وهكذا، وحفلات أعياد الميلاد تكون بالحجز مع الإدارة وحسب الاتفاق.

...

بيت الرصيف: بيت الفن والثقافة
اصدرت في: 17/07/2013

"بيت الرصيف" بدأت حكايته بمجموعة شباب قرروا أنهم يساهموا فى تنمية ثقافة المجتمع فبدأوا مشوارهم بأنهم يعرفوا الناس على الأماكن الثقافية والأنشطة اللى بـ تقدمها المراكز وده من خلال مجلة صغيرة الحجم تقريبًا بحجم كف اليد وسموها "الرصيف" وكانوا بـ يطبعوها بمجهودهم الذاتى. بعد كده تطورت الفكرة لأنهم لقوا أن ده مش كفاية فبدأوا يعملوا نشاط فنى وثقافى فى الشارع وكانت الفكرة أنهم يروحوا بالثقافة والفن للناس فى الشوارع والميادين العامة ومن أنشطتهم المشهورة "مهرجان الرصيف" اللى لاقى نجاح كبير وعلشان كده كرروا المهرجان فى أماكن ومحافظات مختلفة واستعانوا فى المهرجان بفرق فنية مختلفة وعازفين موسيقى وشعراء شباب. كل ما نجاحهم يكبر كان بـ يكبر طموحهم، وبمساعدة بعض المُنصفين للثقافة والفن استطاعوا أنهم يأجروا مكان علشان يقدموا فيه أنشطتهم المختلفة مع حفاظهم على رسالتهم الأساسية و هى توصيل الثقافة والفن للمتلقى من خلال مهرجان الرصيف اللى بـ يقام فى الميادين العامة، وزى ما قدروا يوصلوا رسالتهم ببساطة قرروا أن بيت الرصيف كمان يكون بسيط وفى نفس الوقت مختلف. عبارة عن الطابق الأول من فيلا فى المعادى والحديقة المرفقة بالفيلا، أول ما بـ ندخل من الباب بـ نلاقى ممر على الشمال يؤدى لحديقة الفيلا وفى الحديقة مسرح متوسط فى الوجه مباشرة وعلى اليمين كافيتريا مساحتها مش كبيرة وعلى الشمال مجموعة طاولات عليها كتب مختلفة للقراءة، وفيه كمان مساحة للجلوس على الأرض مفروشة بالكليم وبعض المخدات للجلوس والديكور بشكل عام بسيط ويوحى بروح ريفية بسيطة. وطبعًا فيه إنترنت Wi-Fi. من الحاجات اللى لفتت نظرنا أول ما دخلنا "بيت الرصيف" يافطة على الباب مكتوب عليها "بيت الرصيف مش قهوة" ده علشان يوصلوا للناس أنه مش مكان للمقابلات الشخصية أو المواعيد وإنما مكان ثقافى لكل اللى يحب يعطى لنفسه وعقله فترة من الراحة والغذاء الفكرى وكمان فى وقت الامتحانات المكان مناسب للمذاكرة فى هدوء نهارًا وممكن الاستعانة بالمكتبة الموجودة هناك. ولفت نظرنا كمان شعار بيت الرصيف وهو "القيمة والكرامة لكل خلق الله"، ولما تكلمنا مع أحد الأشخاص المؤسسين للبيت عن مغزى الشعار قال لنا أنهم بـ يطمحوا لتقديم الثقافة والفن للمواطن البسيط دون المساس بقيمته وبشكل يحفظ له كرامته وبمعنى بسيط هو النزول لمستوى رجل الشارع ومحاولة الارتقاء بمستواه الفكرى. وعن أنشطة بيت الرصيف فهى عديدة جدًا، زى الحفلات الموسيقية للفرق الشابة زى فرقة نغم مصرى وكايروكى ومسار إجبارى وغيرها، وكمان حفلات للمطربين الشباب ودائمًا شباب بيت الرصيف حريصين أن يكون سعر التذكرة بسيط علشان يناسب المستويات البسيطة، وده بالإضافة للأمسيات الشعرية والندوات العامة اللى بـ يقدموا من خلالها رسالة أدبية وقيمة مجتمعية متميزة. مش ده بس نشاط بيت الرصيف، فيه كمان ورش تعليمية وفنية مختلفة زى الموسيقى والتمثيل الصامت والطبخ والتصوير الفوتوغرافى وصناعة الحلى وتعليم النجارة والكهرباء، والتقديم فى الورش بـ يكون أنك تملأ استمارة اشتراك وبـ تدفع رسوم إن وجدت وبـ يتم تحديد موعد مناسب بين المدرب وكل المشتركين ودى طبعًا ميزة مهمة جدًا، كمان ممكن لأى شخص أنه يقترح إضافات للمكان أو تقديم أى انتقاد أو ملاحظات للشباب القائمين على المكان وهم بـ يسمعوا كل المقترحات وبـ يناقشوها وبـ ينفذوها على قدر استطاعتهم وده بـ يحسس الرواد أن بيت الرصيف مش مجرد مكان بـ يزوروه وأنه بيتهم فعلًا حتى أن المكان بقى له رواد أصدقاء بـ يترددوا عليه باستمرار وبـ يساهموا فى تطويره. وده كان واضح جدًا لما كانوا شباب بيت الرصيف بـ يجهزوا الطابق الأول علشان يكون مكتبة كبيرة وصالة عرض للمعارض الفنية شاركهم أصدقاء المكان متطوعين بمجهودهم، وممكن تكتشفوا حاجات كثيرة فى بيت الرصيف لو روحتم بنفسكم. وعلى فكرة بيت الرصيف منظمين حفل إفطار بكره، وهـ يكون فيه أول حلقة من حلقات برنامج "العلم والإيمان" للراحل د. مصطفى محمود، كل المطلوب منكم تجيبوا معاكم أكل وشرب وحاجات حلوة تشاركوا بها "الرصيفيين" زي ما بـ يقولوا.

...

جرافيتى إلهامى نجيب: صانع الألعاب
اصدرت في: 03/12/2011

عاوز تجيب لعبة لأولادك، انزل العتبة هـ تلاقى هناك ألعاب صينى جامدة جدًا، أو انزل أى محل ألعاب فخم فى المهندسين أو مصر الجديدة أو وسط البلد، هـ تلاقى ألعاب محترمة جدًا وشيك وغالية، ممكن اسألك سؤال: جربت تعمل لعبة لأولادك؟ طيب بلاش، جربت تشوف حد بـ يصنع لعبة لأولادك؟ جديدة دى صح. ده بقى الجديد اللى معانا.. صانع الألعاب ده فنان مصرى عالمى اسمه إلهامى نجيب، فنان تشكيلى عمل معارض فى كثير من دول العالم وشاف وطاف الدنيا، لكنه وقف أمام حاجة جديدة شدت انتباهه فى أمريكا اللاتينية، وهى أن الفنان هناك بـ يقوم بصناعة الألعاب للأطفال، ويشكلها بطريقة تتناسب مع تراث بلده، فـ يعمل ضربتين بلعبة واحدة، ألعاب مفيدة للأطفال وتحفز تفكيرهم، وكمان تربطهم بتراثهم. هنا وقف الفنان إلهامى نجيب وقال ليه ما يحصلش ده فى مصر؟، وكان القرار، رجع واشتغل فى الموضوع لكن الإبداع دائمًا فيه جديد، والعقل المبدع دائمًا بـ يدور على التطوير، قرر إلهامى تطوير الفكرة من ناحيتين، الناحية الأولى: أحضر معاه اثنين فنانين من أوربا: الفنان التشكيلى "إدواردو أورتز"، والفنانة التشكيلية "كاتالينا كونستاين" وعمل جروب لتصميم الألعاب منهم، والناحية الثانية: الاستفادة من الفنون العالمية والتراث المصرى بكل أشكاله علشان يعمل ألعاب عالمية، ألعاب مؤمنة بقيمة الفن العالمى. اللى ساعد إلهامى فى الموضوع هو ثقافته العالية وقراءته المستمرة فى التراث العربى والفنون العالمية، واهتمامه بالفن المصرى بكل عصوره من أول الفرعونى لحد العصر الحديث، وكمان اللوحات اللى عملها قبل كده عن أبو زيد الهلالى وعبلة وشيبوب وأبو الفوارس ومار جرجس وسليمان الحكيم ملك الجان. تخيلوا كل التراث ده لما يتحل للوح مرسومة أو ألعاب فيها من التأثيرات العالمية والمحلية، نعتقد أنه شيء مهم من كذا ناحية.. من الناحية الفنية لأنه إبداع من جديد مش فى مصر فقط لكن فى الشرق الوسط، وإبداع لازم يتدرس لأنه بـ يجمع تأثيرات من عدة ثقافات وينتج شيء جديد. لما تروح "الجرافيتى" اللى فى المعادى هـ تلاقى نفسك داخل غرفتين مليانين بالألعاب الخشبية فى معظمها فيها الطيارة وفيها أشكال الحيوانات وفيها "لعبة الدبور" لكنها بشكل جديد أن الحبل منه فيه وبـ يتلف على عصاية خشب، العصاية وتقسيمها من أمريكا اللاتينية، والدبور من التأثير الفرعونى، تخيلوا اللعبة دى واخدة من أقصى الأرض لأقصاها، وهـ تلاقى لعبة شبه صندوق الدنيا اللى بـ يحكى حكاوى زمان، وألعاب على شكل الخنفسة الفرعونية المقدسة، لما تروح هناك هـ تلاقى الفن واللعبة ممزوجين ببعض، فما تقدرش تفرق ما بين الإبداع واللعبة. عاوز أقولكم أن الفنان إلهامى كمان بـ يعمل ورشة عمل مع الفنانين اللى معاه علشان يطلعوا الألعاب دى، وبـ يعمل ورشة تصنيع ألعاب للأطفال فى مكتبة «كليلة ودمنة» بـ يعلم الأطفال فيها إزاى يصنعوا لعبهم الخاصة، وازاى يصنعوا ماكيت لكنيسة ومسجد ومعبد فرعونى، لو عاوز ابنك يبقى له لعبته المميزة نعتقد أنك لازم تزور "جرافيتى إلهامى".

...

كليلة ودمنة: مكتبة أطفال غير أى مكتبة ثانية
اصدرت في: 27/10/2011

شعارهم "نبنى طفل مصرى مثقف" بعيد عن الألعاب الإلكترونية، والفرجة على التليفزيون، وواجبات المدرسة، فيه حاجات ثانية ممكن الطفل يعملها، كل اللى عليك أنك تدور على مكتبة ومركز ثقافى للطفل. طب يا أستاذ هو فيه كده فى مصر؟ طبعًا فيه. يا سلام. آه والله. طب فين؟ وبـ يعملوا إيه؟ نرجع لكم ثانى ونقول لكم أصل الحكاية، "كليلة ودمنة" كتاب مشهور جدًا ترجمه من الفارسية للعربية العالم الكبير ابن المقفع، وهو كتاب بـ يحكي على لسان الحيوانات مجموعة من القيم والأخلاق والأساطير، الكتاب جميل وممتع، والمكان اللى بـ نتكلم عنه النهاردة ممتع أكثر. كنا بـ نقول إيه؟ كنا بـ نقول أن اللى عليك أنك تدور على مركز ثقافى للطفل، وعلشان تعمل ده حضرتك لازم تنزل المعادى عند شارع 231 دجلة وتقابل مديرة المكتبة أ. نرمين مجدى، وأ. أحمد حجازى، وهناك هـ تلاقى مكتبة «كليلة ودمنة – Kalila & Dimna»، لما تدخل هـ يقابلوك بابتسامة لطيفة وترحيب كأنك صاحب المكان وهو هادئ جدًا علشان يتناسب مع فكرة القراءة ويناسب الأطفال. أول حاجة بـ تشوفها كتب كثير ومتصنفة حسب المواضيع، يعنى مثلاً: كتب تعليمية، وتراث، وتاريخ، ومنوعات، وموسوعات، وقصص، وأشعار، وأدب، وكتب دينية، وكتب تراث، وكتب للصغار جدًا. موضوع كتب للصغار جدًا ده لفت انتباهنا، ولما سألنا قالوا: أنها كتب محتواها بسيط جدًا ومليانة بمسليات للأطفال علشان يتعودوا على فكرة الكتاب من صغرهم، وكمان هى كتب غير قابلة للقطع، يعنى لو حاول الأطفال يقطعوها –زى ما كل الأطفال بـ تعمل- هـ يبقى صعب جدًا عليهم. والمكتبة مش واقفة على الكتب باللغة العربية فقط لكن كمان فيه باللغة الإنجليزية، واللغة الفرنسية، وفيه نوع من الكتب تعليمى تفاعلي يقدر الطفل يكتب فيه ويمسح كتابته زى السبورة بالظبط. المكتبة كمان بـ توفر عرض للكتب للأطفال علشان يعرفوا فيها إيه وعلى أساس العرض يقرروا هـ يشتروا الكتاب ولا لأ، وفيه مجموعة إسطوانات كارتون وموسيقى للأطفال وأغانى، ومسلسلات صلصال دينية. الجميل فى الموضوع هو التفاعل مع الطفل وده بـ يتم بكذا طريقة منها عمل مسابقة بين الأطفال باختيار 7 كتب، وعرضهم على الأطفال عن طريق صفحة المكتبة على الفيس بوك، والطفل يختار كتاب منهم ويقرأه، ويتابع الأسئلة اللى بـ تنزل على الصفحة والطفل اللى يجاوب صح عليها يختار هديته من صندوق جميل فى المكتبة فيه مجموعة هدايا بسيطة لكنها جميلة اسمه صندوق الهدايا، وكمان بـ يعلقوا صورته فى لوحة الشرف اللى فى المكتبة علشان الأطفال يغيروا من بعضهم ويعملوا زى بعض. وفيه مجموعة ورش بـ تنظمها المكتبة منها ورشة "أنتمى" وهـ يكون المسئول عنها الرسام العالمى "إلهاى نجيب" المتخصص فى صنع لعب للأطفال وهدف الورشة هو ربط الأطفال بـ تراثهم الفرعونى والقبطى والإسلامى وربط كل ده بمصر. وطبعًا فيه حكى للأطفال كل يوم اثنين وثلاثاء، يوم حكى بالعربى ويوم بالإنجليزي وده بـ يتم على سجادة الحواديت، وجدولهم الأسبوع بـ يكون كالتالى: السبت: نشاط ثقافى، الاثنين والثلاثاء: حواديت، يوم لسينما الأطفال، ورحلة واحدة كل شهر. هاه.. صدقت بقى أن فيه مركز ثقافى ومكتبة كل همها هو بناء طفل مصرى مثقف بجد؟ لو حابب تتواصل معاهم زور موقعهم على الإنترنت أو روح على المركز.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح