دليل كتب القاهرة - أحدث المقالات عن الكتاب العرب ومؤلفاتهم

كتب

بهجاتوس: الديكتاتورية للمبتدئين
اصدرت في: 30/10/2012

عاشت بهجاتيا حرة مستقلة.. عاشت بهجاتيا حرة مستقلة.. الرئيس الموقر والزعيم الأوحد والقائد الفظيع رئيس بهجاتيا الزعيم بهجاتوس يلقى إليكم كلمة النصر:"يا شعب بهجاتيا العظيم، زى ما أنتوا عارفين أن عملة بهجاتيا العظمى تنخفض بانخفاض الدولار، ولا ترتفع بارتفاعه، وشعارنا هو ما أقدرش أحب اثنين، ونصيحتي لكم في عام الجفاف اغسل أيدك قبل الأكل وبعده".ده كان تخيلنا لخطاب زعيم الدولة اللي مش موجودة إلا في خيال معلم الكاريكاتير الأول في مصر "بهجت عثمان" واللي مقالنا النهارده بـ يحكي عنه.الكتاب اسمه "الدكتاتورية للمبتدئين.. بهجاتوس"، وهو كتاب معمول عن رسومات بهجت الخاصة بالديكتاتور، ويبدأ بذكريات دكتور علي الراعي مع بهجت لما كانوا مع بعض في الكويت مطرودين من مصر وإزاي جاءت فكرة الديكتاتور لبهجت من مقاله عن مسرحية "الإمبراطور جونز" للكاتب الأمريكى يوجين أونيل وكانت بـ تحكى أحوال حكام العالم الثالث وبـ يوصف فيها الإمبراطور العجيب ده اللي لابس سترة زرقاء بأزرار صفراء وعلي الكتفين والكمين خيوط من ذهب وبنطلون أحمر وحزام بـ يظهر منه مسدس طويل يديه من اللؤلؤ.ده الوصف اللي قرأه بهجت وقرر يعمل الديكتاتورية للمبتدئين وهو كتاب بـ يقدم شخصية "بهجاتوس" حاكم بهجاتيا العظمي صورة من صور الديكتاتورية فى العالم الثالث زي ما عملها صانعها الرسام ووضع فيها شيء من ملامحه الشخصية وهو بـ يبعد عن نفسه الحرج فبـ يرسم ديكتاتور تفاصيله صعب تكون موجودة في الحقيقة لكنها في الوقت نفسه تقدر تعملها إسقاط على أى ديكتاتور في العالم وكل ده بـ يدور في جو من السخرية والضحك، فمقولات الزعيم الحكيمة اغسل أيدك قبل الأكل وبعده وإمضاء الزعيم المعلم هي البصمة وعلم بهجاتيا أيدين بـ يسلموا علي بعض، أيد كمها بـ يدل علي الفقر وأيد علي كمها علامة الدولار، ده غير الصور الكثير قوى والمضحكة زى صورة طفل رضيع ومكتوب عليها بهجاتوس الابن نائب الرئيس ورئيس المجلس الأعلي للشباب وطبعًا كلنا عارفين مين الأب ومين الابن.لو عاوز تستمتع برسومات عبرت عن الظلم وسخرت منه، لو عاوز تضحك وتدمع فى نفس الوقت من رسوم، لو عاوز تتعرف أكثر على "بهجت" اقرأ الكتاب ده.

...

أنا وأنا: مجموعة قصصية مصورة
اصدرت في: 26/05/2012

كل مرة بـ يصدر كتاب كوميكس جديد للكبار بـ نقول الحمد لله أنه أصبح عندنا النوع ده من الكتب في المكتبة المصرية والحمد لله أن الشعب المصري فهم أخيرًا أن قصص الكوميكس مش قصص أطفال فقط. كتاب الكوميكس المرة دي اسمه "أنا وأنا" من تأليف ميشيل حنا ورسوم رانية أمين وبـ يتضمن 14 قصة قصيرة مصورة تتميز أغلبها بالأسلوب الكلاسيكي اللي بـ يعكس حاجات كثير في النفس البشرية، كمان رتم القصص بـ يتميز بهدوء الأحداث اللي يحسسك أنك بـ تتفرج على فيلم فرنساوي. القصة الأولى "مروة" بـ تناقش فكرة الحديث مع الذات والتناقض اللي داخل كل واحد مننا ورغبتنا في الحصول على كل اللي بـ نتمناه بدون أي تنازلات، يعيب القصة أن الرسم ما أضافش لها أي شيء إطلاقًا لأن القصة كلها عبارة عن شخص واحد بـ يفكر مع نفسه في البنت اللي بـ يحبها. القصة الثانية "ليالي الأنس في براج" دمها خفيف بـ تستعرض خلافات المخطوبين واللي منها هـ يقضوا فين شهر العسل، القصة بـ تورينا قد إيه فيه ناس دماغهم روتينية وبـ يخافوا من التغيير وما بـ يحبوش يغيروا أي حاجة في حياتهم. القصة الثالثة "نعناع" جميلة وبسيطة جدًا بـ تناقش فكرة أن كل واحد فينا عنده اهتماماته الصغيرة اللي نفسه يلاقي الشريك المناسب اللي يشاركه فيها. أما بالنسبة لقصة "الوردة" فالجديد فيها هو رسومها وإخراجها الفني اللي تم استخدام لقطات من الأفلام فيه. أما "القصة رقم 11" فهي قصة مميزة بدءًا من عنوانها "أمفيوكساس"، ورغم أن القصة رومانسية إلا أن ميشيل حنا قدر يوظف كونه دارس للصيدلة في تفاصيلها. وواحدة من أمتع القصص في المجموعة قصة "شيء رهيب" وهي قصة ذاتية جدًا بـ تتكلم عن الكتابة بوجه عام في البداية ومن خلال إخراجها بـ تستعرض العديد من الخطابات اللي كانت بـ توصل للكاتب لما كان بـ يراسل أجانب قبل بداية عهد الشات الإلكتروني. على الغلاف الخلفي للكتاب جملة هـ تساعدك أنك تتوقع مضمون الكتاب الذاتي بـ تقول: "عندما يتحدث أنا مع أنا ويظل يثرثر طول الوقت فإنه حتمًا سيصيب أنا بالصداع، لكن كيف يتصرف أنا للتخلص من أنا وهو يقبع منزويًا داخل رأسه رافضًا كل محاولات الخروج؟". الكتاب هو الإصدار الثاني لدار كوميكس بعد رواية "18 يومًا" وهو كتاب مختلف عن إصدارات الكوميكس اللي صدرت في مصر قبل كده.

...

فرسان زمان: كتاب أطفال عن السيرة الذاتية لأشهر الأبطال الشعبيين
اصدرت في: 29/03/2012

لو بـ تتجول في مكتبة لبيع الكتب هـ يلفت نظرك لونه وإخراجه وقطعه وعنوانه واسم مؤلفه، لونه أحمر مبهج فيه نقطة سوداء، واسمه «فرسان زمان» والمؤلف هو حمدي أبو جليل الكاتب البدوي المعروف، ويمكن المفارقة هنا أن البدو معروف عنهم خشونتهم، وأبو جليل تحديدًا كل أعماله بـ تحكي عن حياته الصعبة وشغله في مجال الفواعلية، وبناء العمائر ومعاناته في حياته لحد ما أصبح كاتب حاصل على جائزة نجيب محفوظ في الأدب من الجامعة الأمريكية. الكتاب صغير جدًا ومصمم للأطفال علشان يقرأوه ويتعرفوا على سيرة عدد من الفرسان، مش كلهم لأنها مش موسوعة، لكن مجموعة فقط اختارهم الكاتب مبدئيًا دونًا عن غيرهم لهدف معين في نفسه، تكلمنا معه علشان نعرف، فقال لنا أنه اختار الشخصيات دي كبداية لمزيد من الشخصيات هـ تظهر في سلسلة كتب من نفس النوعية تقدم الأبطال العرب الحقيقيين اللي عاشوا وماتوا وبعضنا ما يعرفش عنهم حاجة. الكتاب مكتوب بالعربي والإنجليزي وفيه رسوم مبدعة للفنان صلاح المر بـ تدمج السير مع الرسوم وتعيشك جو ثاني، فعلاً مناسب لخيال الأطفال، القصة الأولى عن أبو زيد الهلالي سلامة فارس السيرة الهلالية، والثانية عن الجازية من أبطال السيرة الهلالية برضه وهي سيدة جمعت بين الذكاء والجمال وكانت في خدمة قومها باستمرار، وده يعطينا فكرة عن طريقة تفكير الكاتب اللي عاوز يقول أن الأبطال مش رجالة فقط بدليل شخصيات قوية وكبيرة زي الجازية، وزي الأميرة ذات الهمة. الكتاب مش للأطفال بس رغم أن عدد صفحاته قليلة إلا أن فيه معلومات كثير، هـ تتفاجئ من بعضها، إحنا نفسنا تفاجئنا لما عرفنا أن جحا شخصية حقيقية مش خيالية زي ما بعضنا ممكن يظن. في هولندا كان المشروع القومي لهم قصة قبل النوم، لأن العلماء أكدوا أن الأطفال بـ يكونوا مبدعين وخيالهم أوسع وأذكي لما يسمعوا قصص قبل النوم ويناموا يحلموا بها، وعقلهم بـ يشتغل بصورة أفضل فيما بعد، وكتاب أبو جليل مقارنة بالمعلومات دي من أفضل الكتب اللي ممكن تقرأها لطفل قبل ما ينام، مش بس علشان خاطر المعلومات اللي فيه كويسة، ولا علشان الشخصيات الأسطورية اللي بـ يتناولها هـ تعرف الطفل أن مش كل الشخصيات الأسطورية خيالية، وأن هو نفسه ممكن يكون أسطورة في يوم من الأيام، لكن كمان علشان الرسوم المميزة للفنان صلاح المر، واللي هـ تقف أمامها كثير بألوانها وخطوطها اللي هـ تخليك تغرق فيها وتسرح وتعيش جو الأساطير داخل الكتاب. كمان الكتاب مش بس يصلح أنه يكون حكاية ما قبل النوم لأطفال العرب لكن كمان لأطفال الغرب اللي بـ يتكلموا الإنجليزي، لأن الكتاب مترجم بصورة شيقة جدًا من أول لآخر صفحة على يد المترجم روبرت موجر، وعرفنا من مصادرنا الخاصة أنه قام بالترجمة بدون مقابل مادي. الكتاب حلو ورسومه رائعة، لكن فيه عيب واحد أن الحكايات الموجودة عن الشخصيات مش بسيطة، ووارد فيها أسماء ثانية مش معروفة بـ تزود صعوبة القراءة مش بـ تسهلها زي لما الكاتب بـ يعرف الزير سالم ويقول: "يعود نسبه إلى تغلب أحد بطون العرب ويرجع نسبها إلى بني يشكر بن وائل"، طبعًا إحنا لو مش عارفين الزير سالم فهـ يبقى مستحيل نعرفه أكثر من خلال الوصف المعقد له ده.

...

36 لايك و12 كومنت: نظرة متأملة وساخرة لاستخدام الفيسبوك في مصر
اصدرت في: 28/02/2012

كلام كثير كُتب عن الفيسبوك بين مقالات وكتب ودراسات وإحصائيات، إلا أن الكتاب ده يعتبر حالة خاصة شكلاً وموضوعًا، «36 لايك و12 كومنت» كتاب (من واقع حسابات الفيسبوك المصرية) زي ما مكتوب على الغلاف.. يعني نقدر نقول هو دراسة مسلية وحقيقية فى نفس الوقت عن طبيعة استخدام الفيسبوك فى المجتمع المصري. يبدأ الكتاب برسالة المؤلف أحمد عاطف مجاهد لمارك زوكربيرج مؤسس الفيس بوك بـ يعبر فيها عن مدى جنونه بالفيسبوك اللي بـ يبدأ به يومه وبـ يستمد منه قناعاته ويضيع فيه وقته.. بعدها يبدأ يتكلم عن أنواع البروفايلات الشائعة على الفيسبوك، يعني مثلاً بالنسبة للبنات بـ يتكلم عن نموذج البنت اللي دائمًا بـ تحط صور دباديب وتكتبstatus من نوعية "إذا أردت شيئًا بشدة ..." واسمها بـ يكون مزيف من طراز "لولا العسولة" أو "توتة الدلوعة"، وكذلك أنواع ثانية من بروفايلات الأولاد زي "الولد الكوول" و"الفيسبوكي المناضل" و"الفيسبوكي صاحب الكاريزما"، وبجانب كل نموذج صورة للبروفايل مرسومة بشكل ساخر ومعبرة جدًا حتى فى أدق التفاصيل الصغيرة. بعد كذا فصل بـ يوصف بشكل بسيط -ولاذع- جوانب استخدام الفيسبوك فى شريحة الشباب فى مصر بـ يأتي فى جزء ويتخيل حالة تأميم الفيسبوك وإكسابه الصفة الحكومية البيروقراطية وتحويل إجراءات الاشتراك فى الفيسبوك لاستمارات ودمغات. رجوعًا لطبيعة وأنواع المستخدمين للفيسبوك فى فصل "سايكوبوك" بـ يوصف ويحلل بنفس الأسلوب الساخر -الموضوعي- أنماط مختلفة من ناس لهم أعراض مبالغ فيها زي عمل Like على أي حاجة أو طلب إضافة عمال على بطال واللي بـ يعمل Share لأي حاجة وخلاص. من أكثر الأجزاء المضحكة فى الكتاب هو تصور وجود الفيسبوك فى عصور ما قبل الفيسبوك وفيها بـ يتخيل أحداث تاريخية مشهورة فى سياق فيسبوكي، زي تخيل أن محمد على باشا عملEvent مذبحة القلعة والمماليك يعملوا Attending أو أن فى العصر الفرعوني تطلع صفحات "شهداء معركة قادش" و"لا لتغيير اسم مدينة منف إلى ممفيس" مع تخيل تغيير شعار الفيسبوك عبر كل مرحلة وأمثلة كثير مضحكة ومفتكسة. آخر جزء فى الكتاب جايب أمثلة سريعة لنوع الحوارات الشائعة اللي بـ تدور فى الشات على الفيسبوك بين الأولاد والبنات... وهنا القارئ هـ يقف للحظات من كثر ما الكلام واقعي وحقيقي! كتاب خفيف ومُسلي لدرجة كبيرة جدًا وساعد على كده الإخراج الفني الرائع للكتاب اللي ماشي بنفسTheme الفيسبوك ومدعم بصور ورسومات فى سياق محتويات الكتاب، ومش لازم نغفل أن رغم حالة الكتاب الساخرة أو اللي تبدو هزلية نسبيًا إلا أن محتوى الكتاب يدل على نظرة متأملة وعين لماحة للكاتب رصدت وحللت سلوكيات وظواهر فيسبوكية بشكل موضوعي.

...

18 يومًا: أول جرافيك نوفيل عن الثورة
اصدرت في: 12/12/2011

فن الكوميكس أصبح واحد من الفنون المطبوعة اللي بـ تفرض نفسها دلوقتي على ساحة الكتابة، ومؤخرًا بقينا نلاقي في المكتبات المصرية كتب ومجلات كومكيس بـ تصدر بصفة دورية وكمانstrips في الجرائد واللي أشهرها "ستربسات" جورنال التحرير.. كل الأسباب دي كانت السبب في صدور أعمال كوميكس بـ تتكلم عن الثورة كان أولها كتاب "الشعب لما" اللي صدر من كام شهر ومؤخرًا ظهر عمل جديد عن الثورة بعنوان "18 يومًا" حقق نجاح رهيب في المكتبات لدرجة أنه فِضل متصدر المركز الأول في "فيرجن ميجا ستورز" لفترة طويلة. الكتاب ده يعتبر مختلف عن اللي فات في أنه مش كتاب توثيقي وبس.. الكتاب عبارة عن "جرافيك نوفل Graphic Novel" بـ تمزج الواقع مع خيال المؤلف محمد هشام عبية وبـ ينقل لنا أهم أحداث الثورة من خلال عرض لحياة مجموعة من الشباب اللي شاركوا فيها. على غلاف الكتاب اللي صممه مصمم الأغلفة أحمد مراد رسمت حنان الكرارجي –رسامة الرواية- علاء وجمال مبارك والرئيس مبارك نفسه قاعدين على كنبة متوترين وبـ يتفرجوا على مشهد الثوار في التليفزيون وعلى ملامحهم حالة من الترقب والوجوم وهـ نلاقي في الكتاب أن حنان استخدمت ستايل شبيه بفن المانجا الياباني اللي بـ تميزه ملامح الوجه الواضحة الكبيرة والعيون الواسعة مع لمحة كاريكاتورية خفيفة. في بداية الكتاب هـ نلاقي مقدمة عن فن الكوميكس تقع في صفحة واحدة بتعرف القارئ بشكل سريع على الفن ده وإزاي دخل مصر وحتى تدشين "دار كوميكس"، وفن الكوميكس هو فن القصص المصورة اللي بـ تُرسم فيه الرواية على هيئة كادرات وبـ نسمى رواية الكوميكس المطولة اللي بـ تتكلم عن موضوع واحد "جرافيك نوفيل". بـ تدور أحداث الرواية حول 4 شخصيات لهم أيديولوجيات مختلفة قرروا يشاركوا في الثورة وينزلوا الميدان يوم 25 يناير، وفي الميدان بـ يتقابلوا وبـ تسير أحداث الرواية في خطين متوازيين: الأول هو أحداث الثورة المصرية خلال الـ 18 يوم من 25 يناير إلى يوم التنحي والخط الثاني هو مصير الشخصيات الأربعة. شخصيات الرواية الرئيسية هي: شخصية الشاب الليبرالي المتحمس للميدان، وشخصية البنت المسيحية مريم، وشخصية الشاب المنتمي لجماعة الإخوان المسلمين واللي قرر ما يمشيش على مبدأ الأمر والطاعة وقرر أنه يلبي نداء الملايين، وأخيرًا شخصية أدهم الشاب المصري المهاجر لهولندا واللي قرر يسيب عائلته هناك وينزل مصر يشارك في الثورة وهـ ينال الشهادة في الميدان. أخرج الرواية فنيًا أحمد عاطف مجاهد بعد ما عمل بحث سريع عن طرق إخراج قصص الكوميكس العالمية وده علشان تكون الرواية مواكبة للأسلوب العالمي في الإخراج، وحرص أحمد أن البالوناتbubbles المكتوب فيها الحوار تكون مختلفة الشكل وتوزيعها في الكادرات يكون مختلف علشان يعمل حالة من التشويق البصري، وتم استخدام نوعين من الخطوط نوع لسرد الأزمنة والأمكنة ونوع لكتابة السيناريو ما بين أبطال الرواية. أحمد حرص كمان أن المسافة بين الكادرات في الصفحات تكون متساوية تمامًا علشان تكون مريحة لعين القارئ.

...

الشعب لما.. أول كوميكس يوثق أحداث الثورة المصرية
اصدرت في: 28/07/2011

مع انتشار فن الكوميكس مؤخرًا في مصر كان من المتوقع يخرج لنا عمل كوميكس (كتاب مصور) بـ يوثق لثورة 25 يناير لأنها بالتأكيد مادة خصبة ممكن تُلهم أي فنان أنه يكتب ويرسم ويطلع كل قدراته الفنية. علشان كده صدر مؤخرًا كتاب "الشعب لما" وهو أول كتاب كوميكس بـ يتكلم عن الثورة المصرية من إعداد وكتابة دينا سعيد ورسومات عبد الرحمن حازم ومن إصدار دار نشر كتابي. الكتاب مقسوم لجزئين متساويين: جزء بالعربي وجزء بالإنجليزي وعدد صفحات الكتاب ككل حوالي 60 صفحة من القطع المتوسط. الجميل في الكتاب أنه بالألوان وطباعته فاخرة وده بـ يخليك مستريح وأنت بـ تقرأه وحاسس بالمجهود اللي بُذل علشان يخرج بالشكل الجيد ده. الجزء العربي ترجمته للإنجليزية مريم خالد علشان يكون سهل ومتاح بالنسبة للأجانب اللي من المهم لفريق عمل الكتاب أنهم يشوفوا الثورة المصرية على حقيقتها في كتاب خفيف ممكن يشتروه بسهولة ويأخذوه بلدهم. ممكن نعتبر الكتاب ده وثائقي لأن مفيش أي تدخل من الكاتبة في أحداثه، يعني كل حاجة في الكتاب هي الحقيقة 100%. أول صفحة في الكتاب بـ تعرض بعض الأسباب اللي أدت لقيام الثورة زي الفساد، وأزمة رغيف العيش، والفقر، والعنف والتعذيب، وبـ نشوف فيها صورة لمجموعة من الشباب قاعدين على أجهزة الـ "لاب توب" وبـ يفكروا في حل المشاكل دي، بعد كده الصفحات بتأخذنا لأحداث الـ 18 يوم ثورة زي جمعة الغضب، والهروب الكبير للشرطة وتخريب البلد، ونزول الجيش، وخطابات حسني مبارك، وفكرة الأجندات الأجنبية، وموقعة الجمل، ومحاصرة القصر والتنحي.. وآخر صفحة طبعًا بـ تعرض لنا مظاهر الاحتفال بعد التنحي. على الرغم من أن الكتاب وثائقي، يعني بـ يوثق الحقيقة تمامًا بدون تدخل، إلا أن فيه بعض الأجزاء الساخرة في الكتاب، زي الجزء بتاع خطاب الرئيس السابق مبارك واللي في الكتاب بـ يبدأه بجملة: "شعبي العزيز الصبور المهاود، قرار ديكتاتوري رقم 7680000" وده ممكن يبقى ظريف ومضحك بالنسبة للمصريين اللي عارفين الجزء المشهور من مسرحية تخاريف لمحمد صبحي، لكن الفكرة هل الأجنبي هـ يفهم الدعابة دي وهو بعيد عن ثقافتنا؟ الأجزاء الساخرة في الكتاب ممكن تسبب بعض اللَبس عند بعض الأجانب اللي هـ يقرأوا الكتاب. الجميل في رسومات الكتاب أن ألوانها مريحة ومافيهاش زحمة كثير، ودي الغلطة اللي بـ يغلطها بعض رسامين الكوميكس في مصر، بالإضافة لأن الألوان معظمها بالأبيض والأحمر والأسود ودي ألوان موجودة في ثقافتنا البصرية ومريحة لعيوننا، مساحة اللون الأبيض الكثيرة في الصفحات مريحة جدًا للعين وده بـ يخلي قراءة الكتاب سهلة وممتعة باستثناء بعض الكادرات اللي كان النص فيها مكتوب بخط صغير جدًا. الجميل كمان أن الأشخاص المرسومين في الكتاب بـ يمثلوا المجتمع المصري بجد: الأحياء الراقية والشعبية، البنات المحجبات واللي من غير حجاب، الشباب اللي مربي ذقنه واللي من غير ذقن، تحس أنك شايف المصريين كلهم وأن مافيش أي عنصرية في استبعاد فئة معينة من الكتاب وده معناه أن الرسامين كانوا لاغيين كل الحوارات الخلفية وهما بـ يرسموا. الكتاب بوجه عام روحه جديدة ومبذول فيه مجهود كبير لتوثيق الثورة بالرسم. * الكتاب سعره 25 جنيه، ولكنه موجود بطبعه غلافها مقوى (طبعة خاصة متكلفة) بسعر 35 جنيه.

...

مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول