دليل كتب القاهرة - أحدث المقالات عن الكتاب العرب ومؤلفاتهم

كتب

مزاج القاهرة: حكايات وتأملات واحد مصري عن نفسه!
اصدرت في: 04/07/2012

أحمد مهنى في إهداء الكتاب قال الخلاصة اللي على أساسها كتب كتابه: "إلى الإنسان الذي بداخل كل منا ذلك الذي يعبر عنا ونخشى أن نفصح عنه. وإلى أدب الاعترافات الذي لا يكتبه العرب". فعلاً إحنا ما عندناش كتب كثير في أدب الاعترافات وسرد الحكايات الذاتية وبـ نعتبر في مصر أن النوع ده من الكتابة حكر على الفنانين والمشاهير على عكس الغرب اللي ممكن نلاقي فيه موظف عادي أو حتى عاملة عملت كتاب بـ تتكلم فيه عن نفسها وعن وجهة نظرها في الحياة. الكتاب ممكن تسميه أي حاجة: خواطر، حكايات، مواقف، تأملات، تدوين، فضفضة. مش مهم هـ تسميه إيه المهم تستمتع بقراءته وتكون بـ تحب النوع ده من الكتابات. أحمد مهنى بـ يقول في مقدمة كتابه أنه كتب الكتاب ده علشان يشارك العالم المحيط به بتفاصيل إنسانية ذاتية خاصة جدًا ممكن تكون بـ تحصل لناس كثير بس هما عمرهم ما فكروا يقولوها أو يحكوها وأنه حب ينشر المواضيع دي بشكل مبعثر علشان تبين مزاج أحد سكان القاهرة وعاشقيها. الكتاب مُقسم لأربعة أقسام رئيسية، كل قسم منها بـ يتفرع تحته مجموعة من الموضوعات، والأقسام دي هي: عن الناس الطبيعيين، الحقيقة، الحب لا يكلف شيء، وأخيرًا مقاومة المقاومة. في الجزء الأول أحمد بـ يتكلم عن حاجات موجودة في حياة كل بني آدم فينا زي الأكل المفضل والعادات اللي بـ يحبها زي شرب القهوة وعن طفولته كمان. كلها مواقف صغيرة حميمة لو كل واحد فينا دور في طفولته هـ يلاقي ذكريات مشابهة لذكريات أحمد يكتبها في كتابه الخاص. الجزء الثاني بعنوان "الحقيقية" بـ يتكلم عن الدين وعن أفكار كثير ممكن نفكر فيها عن الإسلام وفيه نص جميل بعنوان "اعتراف" بـ يشكر فيه أحمد ربنا على الحاجات الحلوة اللي أنعم عليه بها وذكرهم بالتفصيل والجميل في النص ده أنه بـ يخلي كل واحد فينا لا إراديًا وهو بـ يقرأ يسترجع نعم ربنا أنعم عليه بها هو شخصيًا. القسم الثالث مخصص للحب والكاتب بـ يتكلم فيه عن أفكاره وقناعاته الشخصية اللي منها موضوع "الجواز مش للجنس فقط" وده نص بـ يشرح فيه وجهة نظره في الحب والجواز والبنت اللي عاوز يرتبط بها. والجميل في القسم ده موضوعين بعنوان "أثر في نفسي" و"أثر في نفسي 2" ودول عبارة عنQuotes أو عبارات قصيرة مأثورة كتبها أحمد في مواقف مختلفة. أما القسم الأخير بعنوان مقاومة المقاومة فده مخصص للثورة والقسم ده أحمد شاف أنه مهم يضيفه لكتابه لأنه -زي ما قال في مقدمة الكتاب- مزاجه بالتأكيد تغير بعد الثورة وأن الأفكار دي أصبحت جزء من مزاجه، النص المميز في هذا القسم هو نص "ماذا خسرت الثورة؟" واللي بـ يرصد أحمد فيه بعض عيوب الثورة مثل تشتت المصريين وظاهرة فرض الرأي، وهـ نلاقي في القسم ده كمان نص بعنوان "أثر في نفسي 3" وده عبارة عن عبارات مأثورة كتبها أحمد عن الثورة. الكتاب في مجمله مسلي وحميم إلى أقصى درجة ونفذ منه طبعتين في وقت قياسي وكله متمازج جدًا باستثناء بعض القصائد النثرية اللي ممكن تكون فصلتنا شوية عن الجو العام للكتاب لكن لازم نحترم وجودها لأنها جزء من "مزاج" أحمد مهنى.

...

1001 نصيحة رومانسية: دليلك لتكون شخص رومانسي بجدارة
اصدرت في: 02/07/2012

هل أنت من الأشخاص اللي بـ يهتموا بالحب والعاطفة والمرح والرومانسية؟ لو إجابتك كانت "نعم" يبقى الكتاب ده مخصوص لك. كتاب 1001 فكرة رومانسية لجريجوري جيه. بي. جوديك Gregory.j.p.Godek من الكتب اللي مضمونها بـ يبان من عنوانها، وهو بـ يندرج تحت بند كتب الـ self-help أو المساعدة على تطوير الذات وده طبعًا لأنه بـ يتضمن مئات الأفكار اللي بـ تخلي حبك ومشاعرك مش مجرد إحساس في قلبك ناحية شريكك وإنما بـ يخليك تعبر عن مشاعرك بأفضل شكل ممكن علشان تبقى علاقتك العاطفية مع شريكك نابضة بالحياة والإثارة من خلال الهدايا والإشارات وتهيئة الجو ومفاجأة شريك حياتك وكمان من خلال التجارب والنصائح الشخصية لمؤلف الكتاب. أحسن حاجة في الكتاب ده هو إخراجه الداخلي اللي بـ يخلي قراءته تجربة مفيدة وممتعة، الكتاب مُقسم لنقط وفصول وفقرات بـ تخلي الأفكار منظمة ومرتبة. والجميل فيه أنه بلونين الأسود والفوشيا بمشتقانه، وده بـ يدخلك في المود الرومانسي فعلًا ده غير أنه مليان quotes أو عبارات مأثورة في الحب هـ تساعدك أنك تكتب رسائل حب لحبيبك. الظريف كمان مئات الاقتراحات لأغاني وأفلام رومانسية تصلح لكل مشاعر الحب المختلفة زي الإعجاب والحب والعشق والشوق واللهفة والغيرة وغيرها كثير. الحاجة الوحيدة السلبية في الكتاب ده بالنسبة لنا كقراء مصريين أن الكتاب مليان اقتراحات بماركات محلات ومنتجات معينة كلها موجودة في أمريكا زي مثلا محل ورد معين أو محل بـ يقدم شوكولاتة بطريقة معينة أو مطاعم وده طبعًا مش مفيد قوي. يمكن فيه شوية أفكار أون لاين ومنتجات ممكن تجربها لو كنت بـ تستخدم فيزا كارد وتقدر تتعامل أون لاين. أكثر حاجة هـ تخلي قراءة الكتاب ده مسلي هي أنك تقرأه وأنت متصل بالإنترنت وكل ما الكتاب يقترح أغنية تروح عامل عليها search وتبدأ تسمعها فورًا وأنت بـ تقرأ الكتاب هـ تلاقي نفسك لا إراديًا دخلت في مود من الرومانسية والحب وهـ تحس أنك نِفسك تكلم شريك حياتك وتعبر له عن مشاعرك. الكتاب دسم جدًا ومش خفيف كما يبدو عليه، عدد صفحاته 500 صفحة وينفع يبقى هدية رائعة للحبيبة أو الخطيبة أو الزوجة وينفع كمان هدية في عيد الحب أو عيد الجواز لأنه بجد مهم لأي couple بـ يحبوا بعض.

...

انسجام: كتاب عن مهارات الحفاظ على الحب
اصدرت في: 30/05/2012

لو كنت شخصية رومانسية، لو كنت قارئ خفيف ما بـ يحبش الإطناب والإسهاب، لو كنت من هواة قراءة وتجميع الأقوال المأثورة فالكتاب ده مناسب لك تمامًا. "انسجام" هو الكتاب الأول لشيماء فؤاد اللي بـ تعرف نفسها كباحثة في علوم التغيير ومجال العلاقات الإنسانية، وهو عبارة عن تجميع لخلاصة قراءتها المختلفة والمتنوعة عن الرومانسية والحب زي ما بـ توضح للقارئ في مقدمة الكتاب. الكتاب بـ يناقش فكرة الحب كحاجة إنسانية أساسية وبـ يعرض موضوعات مختلفة متصلة/ منفصلة عن الحب وفترة الخطوبة والحياة الزوجية واحتياجات الستات ومطالب الرجالة والشيء الممتع فيه هو قطعه الصغير اللي بـ يخليه مناسب أنك تأخذه معاك في كل حتة وتتسلى به، ده غير أنك ممكن تسيبه وترجع له ثاني كل شوية لأن مواضيعه مش مترتبة على بعض في القراءة. هـ تلاقي كمان أن كل العناوين الجانبية ملونة بلون زهري واضح علشان يرتب أفكارك وقت القراءة. المختلف في الكتاب ده هو أن فيه بعض القراءات الإسلامية المتعلقة بالحب وده بـ يخليه مناسب لثقافتنا نوعًا ما. ومن أمثلة الموضوعات دي "رومانسيات من بيت النبوة" وده بـ يستعرض إزاي الرسول صلى الله عليه وسلم كان بـ يعامل زوجاته بكل حب. موضوع "إسلاميات صغيرة" وده بـ يستعرض نماذج للرومانسية والحب واحترام المرأة في الإسلام. ومن مواضيع الكتاب: "لا تتزوجي هذا الرجل"، و"الزوج الذي تكرهه المرأة"، و"الزوج الذي تحبه المرأة"، و"هل تحترم شريكك؟"، و"شجاعة الاعتذار"، و"أقوال مأثورة في الحب والزواج"، و"هرم ماسلو وهرم خوفو"، و"كيف تختارين زوجًا"، وغيرها كثير.

...

القاهرة مدريد: فى السفر سبع فوائد
اصدرت في: 16/05/2012

أدب الرحلات نوع متميز جدًا من الكتابة، مثير وجذاب، بـ يخطف خيال القارئ ويأخذه معاه لكل الأماكن والأشخاص اللى هـ يمر بهم الكاتب خلال الرحلة، وعلشان النوع ده فعلاً بـ ينقل للناس تجارب ومواقف السفر والتجوال لازم طريقة الكتابة والسرد تكون على نفس مستوى التشويق والجذب. "القاهرة مدريد" هو الكتاب الأول للكاتب الشاب فادى صلاح لكنه مش أول تجربة سفر. ويمكن ده اللى جعل فادى متمكن جدًا فى رحلته وجرىء لدرجة أن يغير خطته والهدف اللى سافر له ويتحرك لأماكن جديدة بعيدة عن المجموعة اللى كان مقرر حضور المؤتمر معاهم، كل ده جعل فادى يختزن التجربة بشكل جيد جدًا يستحق العرض والكتابة، لكن طريقة العرض هى اللى فيها كلام. المؤلف تعرض أثناء حكيه لأدق التفاصيل اللى كان بـ يمر بها لدرجة خليتنا نظن أنه كان ماسك ورقة وقلم طول الوقت وبـ يكتب هو فين ومع مين وبـ يعملوا إيه، ويمكن ده نتيجة الانبهار اللى كان مسيطر على المؤلف وقت الرحلة لكنه ببساطة تعرض لتفاصيل موجودة هنا فى مصر وبـ نشوفها كثير، يعنى مثلاً مش هـ يضيف لمتعة الرحلة اللى إحنا بـ ننتظرها كقراء أن الكاتب كان فى مكان ممنوع فيه التدخين وخرج يشرب سيجارة بره مع صديقه ولا أنه صحى الساعة 8 بالضبط ولا أن المسافة بين مدريد وسلامانكا 3 ساعات إلا ربع ولا أنه فى يوم ما كانش عارف ينام وفضل يقلب بين القنوات فى التليفزيون، خاصة أن السرد فى المواقف دى كان بشكل تقريرى شديد بعيد عن الحكى القصصى أو الروائى. فادى يمتلك ذاكرة قوية بالإضافة لقدرة ملاحظة عالية لكل حاجة بـ تدور حوله، ولأنه استمتع بكل لحظة في رحلته كان عاوز يشارك قراؤه فى كل متعته، لكن نعتقد أنه لو اختصر شوية تفاصيل زيادة كان الموضوع هـ يخرج بشكل أفضل وأكثر جذبًا، وعلى مستوى الرحلة فادى أمتعنا بوصف جيد جدًا للأماكن اللى زارها وتفاصيلها وشكلها وشكل زوارها والصعوبات اللى واجهته فى دخول بعض الأماكن، وعادات بعض الناس اللى قابلهم فى مدريد وبرشلونة وروما سواء من الأسبان والإيطاليين أو من غيرهم. ومن أغرب الأشياء اللى رصدها فادى فى الكتاب هو وجود مقاطعة فى أسبانيا تحمل اسم "كتالونيا" لا يعترف سكانها بأنهم من الأسبان وبـ يعتبروا أنهم "كتالونيين" وأن لغتهم الرسمية هى اللغة الكتالونية وبالفعل كل اللوحات الإرشادية والعبارات المكتوبة فى محطة المترو والشوارع مكتوبة بالكتالونية، بالإضافة إلى أن سكان كتالونيا بـ يكرهوا "الأسبان" كره شديد على حد وصف أحدى سيدات كتالونيا للمؤلف. الكتاب يعتبر بداية جيدة لمؤلف واضح أنه قرر يتخصص فى أدب الرحلات.

...

دائمًا امرأة أخرى: قصص قصيرة لها نهايات غير متوقعة لقصص الحب المعتادة
اصدرت في: 16/12/2011

الزواج أو الفراق، واحد فيهم كان دائمًا بـ يبقى النهاية المتوقعة لأى قصة حب أو رواية رومانسية كنا بـ نقرأها، لكن في "دائمًا آمرأة أخرى" المجموعة القصصية -الصادرة عن دار دون للنشر والتوزيع للكاتب أحمد القاضي- نهايات العلاقات العاطفية كانت بـ تبقى مختلفة وغير متوقعة. 34 قصة قصيرة قسمها الكاتب لفصلين، الفصل الأول "دائمًا آمرأة أخرى" وبـ يتناول دور المرأة فى اختراق أى علاقة بين اثنين تحت عناوين مختلفة بـ تعبر عن شكل العلاقة، وتحويلها من علاقة حب إلى علاقة فتور، حتى وإن كان دورها بـ يتم عن طريق خيالها. أحيانًا كان بـ ينتصر الحب والرغبة الشديدة فى الاحتفاظ بشريك العمر على محاولات الطرف الثالث لخطفه، ده كان موجود فى قصة "اعتراف" وفيها قدرت الزوجة صراحة زوجها بخيانتها وقررت أنها تكمل حياتها معاه. وفى قصة "طفل آخر جديد" الزوجة أصرت على الاحتفاظ بزوجها ومنعه من خيانتها عن طريق استخدام سلاح الأنوثة والإنجاب. ومرات ثانية كان بـ ينتصر اليأس ويقتل الحب ورغبة البقاء مع الطرف الثانى زى ما حصل فى قصة "دائمًا آمرأة أخرى"، الزوجة تعبت من شعورها بأن فيه واحدة ثانية موجودة بينها وبين زوجها، تعبت من مجرد التفكير بأن فيه واحدة ثانية واخدة زوجها منها، أو موجودة معاهم فى كل الأماكن اللى بـ يتواجدوا فيها مع بعض لدرجة أنها يأست واستسلمت لطلب الرحيل وطلبت الطلاق. من أكثر الحاجات الشيقة فى الرواية أنها بـ تعكس أنماط مختلفة من الشخصيات وبـ تعكس كمان آثار الشخصية على العلاقة العاطفية، يعنى مثلاً بـ توضح الشخصية العنادية والشخصية الخجولة واللى عندها لا مبالاة، وعلاقة شخصياتهم بحياتهم العاطفية. وزى ما كانت المرأة عامل مهم من عوامل انهيار العلاقات الزوجية أو عامل بـ يهدد استقرارها، كانت عامل فى نجاحها وتدعيمها، زى قصة "صوتها" وفيها نبهت الحبيبة حبيبها إلى جمال صوت زوجته، اللى كان غايب عنه بقاله فترة، لدرجة أنه بدأ يكلمها فى التليفون علشان يتعرف على مواطن الجمال اللى كانت مختفية، ومن بعدها بدأ يكلمها زى العشاق. وأكيد تناولت القصص القصيرة موضوع الحب الأول إلا أنها عرضته بطريقة مختلفة، يعنى مثلاً قصة "عيناها وشفتاها" كانت قائمة على حوار العيون وبس، الحبيب اللى قابل حبيبته فجأة وحب يطمن عليها فـ اكتفى بنظرات عينه لها، ونظراتها له، وفى قصة "أمل" تجربة جديدة الواحد ممكن يطبقها علشان يسترجع ذكريات حبه الجميلة، بطل القصة رجع ثانى لبيته القديم علشان يفتكر تفاصيل قصة الحب الأول، ويطلب من سواق أتوبيس المدرسة أنه يركب الباص اللى كان فيه بـ يلتقى بحبيبته التلميذة. أما الفصل الثانى واللى اسمه "دائمًا رجل آخر"، كان مركز على دور الرجل فى تدمير العلاقات العاطفية اللى قائمة بين اثنين، يعنى مثلاً فى قصة "مترددة" كان الزوج الأول هو السبب فى شعور طليقته بعدم الأمان أنها تكمل حياتها مع راجل ثانى، وفى "أسرار مكبوتة" كان إهمال الزوج هو الدافع الأساسى لخيانة زوجته له، لكن فى "العذراء أمى" بعدت الزوجة عن خيار الخيانة وفضلت أنها تعيش مع الرجل اللى بـ تحبه فى خيالها واستمرت فى الاهتمام بنفسها على أمل أن زوجها يرجع لها ثانى. فقرات القصص كلها كانت فى محلها، يعنى ما كانش فيه رغى كثير، كل كلمة كانت فى محلها وبـ تخدم القصة نفسها.

...

سبع سماوات: كتاب ممتع يستحق تدور عليه
اصدرت في: 17/11/2011

على فكرة ممكن تكون قاعد في مكانك وتلف الدنيا، الكلام ده حقيقي وبـ يحصل لما يقع في إيدك كتاب حلو من نوع أدب الرحلات، مكتوب كويس، وفيه خبرة وعمق، وده حصل لنا مع كتاب "سبع سماوات" للكاتب سعد القرش واللي بـ يحكي فيه عن رحلاته في الجزائر والعراق والهند والمغرب وهولندا. الكتاب ده لأصحاب المزاج، ومش أي حد ممكن يوصل له، لأنه صادر عن مؤسسة غير هادفة للربح، مش بـ تنزل كتبها في المكتبات وأماكن البيع، و مش بـ تعرضه غير بتكلفته لما بـ تشارك في معارض، لذلك الوصول له ممكن يكون صعب شوية لكن مش مستحيل، وببساطة ممكن تطلبه من دار النشر نفسها عبر مراسلتها لو أنت مهتم. سعد القرش صحفي في جريدة الأهرام المسائي، وكمان روائي له أعمال مميزة، كان بـ يسافر بحكم شغله لأماكن ومناطق مختلفة لحضور مؤتمرات أو ملتقيات تخص مجاله، وخلال رحلاته كان بـ يكتب بصدق وعمق عن شعوره الحقيقي عن المكان، وبـ يقول أنه ما كانش ناوي ينشر الكلام ده أساسًا، وأن اللي كتبه كان مجرد انطباع حب يسجله مش أكثر، لكن فكر بعد كده أنه يجمعهم في كتاب، وقد كان، وكان كتاب حلو فعلاً لدرجة أنه فاز بجائزة ابن بطوطة للرحلة المعاصرة سنة 2009، وتمت طباعته وصدر السنة دي أخيرًا من عدة أسابيع. الجميل في الموضوع أنه بـ يقارن طول الوقت بين اللي بـ يشوفه بره وبين اللي شايفه في مصر، وعجبنا جدا مقطع بـ يقول فيه: "بدلاً من شعار "ساعة لقلبك" يمنحون أنفسهم في هولندا ساعتين وثلاثًا، حيث تغلق المحال التجارية في الخامسة عصرًا، ليعيش الناس حياتهم، فمن لا يلهو بصدق لا يتقن عمله، ولا يزال كثير من زائري مصر يسألون، ولهم الحق، متى ينام الناس؟، ومتى يصحون؟ ومتى يعملون وكيف؟ أنها ساعات طويلة يختلط فيها العمل بالإرهاق بالنوم بتناول الطعام، فإذا عادوا إلى بيوتهم المجازية استسلموا لمشاهدة مسلسل درامي ساذج، قبل أن يتفرغوا إلى إنجاب مزيدًا من الذرية في واقع ضاغط يهان فيه الإنسان ابتداء من أقسام البوليس وليس انتهاء بالانحناء في سيارات الميكروباص". من أبرز الرحلات إن لم تكن كلها، نقدر نقول الرحلة للعراق، رغم أن الكاتب بـ يوصف الحياة على لسان أهل العراق اللي تكلموا معاه ومن خلال نفسه كشاهد عليها، فمثلا بـ يحكي لك إزاي الحصار وإحساس الناس أنهم داخلين على مجاعة خلاهم يأكلوا أكثر، وخلى الأكل اللي كان ممكن يكفيهم لوقت أطول ما يكفيهمش، حكى كمان أنه رغم الحصار الدولي للبلد إلا أن التقاليد العراقية اللي ممكن نقول عنها أنها قبلية كان لها الفضل في تماسك بنية المجتمع خلال التسعينيات وخلى المجتمع العراقي يتحدى العالم كله برغبته في الحياة وسط نوبات الظلام اللي كانت بـ تستمر لعشرين ساعة يوميًا كانت الشموع بـ تشتغل والأفراح بـ تتعمل، والأحبة بـ يجتمعوا مع بعض، ويتمموا قصص الحب رغم أنف العالم اللي بـ يحاصرهم. الكتاب لغته سلسة، ومافيش شك أنك هـ تستفيد منه كثير، هـ تعرف صفات الناس في الهند، وشكل الحياة، هـ تحس يعني إيه جزائر وإزاي كانت الحياة عاملة في العراق أيام الحصار، والأهم من المعلومات والمشاهد اللي بـ ينقلها لك الكاتب، هي المشاعر والأفكار، لأنه مش بـ يقولك فقط هو شاف إيه، هو كمان بـ يقول لك هو حاسس بإيه، وطول ما أنت بـ تقرأ مش بـ يتكلم بصيغة العارف بالأشياء وأنه هو اللي بـ يقول الحقيقة وكلامه من الآخر.. لأ، هو مستمر على طول الكتاب في أنه يقول لك أن دي وجهة نظره وأن دي رؤيته الشخصية، اللي ممكن حد ثاني يشوف حاجة غيرها. أكثر حاجة ممكن نأخذها على الكتاب أنه في بعض المواضيع كان بـ يتكلم عن حاجات هو بس اللي يعرفها أو ناس ثانيين قليلين غيره، لكنه بـ يقولها فـ يحس القارئ أنه مش فاهم هو عاوز يقول إيه من النقطة دي، ويمكن ده لأنه كتبها في البداية لنفسه، وما كانش مجهزها للنشر. دار السويدي: العنوان: أبو ظبي ص.ب: 44480 - الإمارات العربية المتحدة هاتف: 6322079، فاكس: 6312866 أو ممكن تلاقي الدار نفسها جاءت لحد عندك من خلال معارض الكتب التي بـ تشارك فيها زي معرض القاهرة الدولي للكتاب، وسعر الكتاب 8 دولار.

...

مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال