دليل كتب القاهرة - أحدث المقالات عن الكتاب العرب ومؤلفاتهم

كتب

فرسان العشق الإلهى: أحبوا الله فأحبهم
اصدرت في: 12/03/2014

فرسان: علشان هما حاربوا واتحاربوا، علشان هما رجال أفعال وأقوال، هنا سكنات وحركات، وهمسات وصرخات وتدبير وتفكير وتعبير، هنا فرسان بالفعل فى التاريخ الإسلامى.. قرر الكاتب أنه يصَّدَر أول كتابه بفرسان لأنهم جاهدوا نفسهم قبل أى حاجة فكان لازم يتسموا بفرسان المحبة والتسامح والزهد والمعرفة الربانية.. فرسان بحق دورت عن الحب وكانوا مش زى أى فرسان، كانت قلوبهم رقيقة ونفوسهم عالية، وروحهم بـ ترفرف فى كل مكان على الأرض وفى الملكوت مع الله، رضوا عن الله فرضى الله عنهم. العشق: إيه بقى الموضوع؟ يعنى هما بـ يحبوا بعض يعنى ولا بـ يحبوا الناس ولا بـ يحبوا بمعنى العشق اللى عارفينه.. وإيه علاقة ده بالله؟ أسئلة لازم تيجى فى ذهنك وأنت بـ تقرأ عن الصوفية.. أسئلة كثير قرر د. عمار على حسن أنه يحلها فى كتابه "فرسان العشق الإلهى" اللى كان مجموعة مقالات كثير جدًا وعلى فترات متفاوتة.. بـ يجمعها خيط واحد وهو الكلام عن الصوفية ورجال الصوفية. الإلهى: الكتاب إعادة لكتابة التاريخ الدينى الإسلامى والعربى.. بالكلام عن الصوفيين أفضل من تكلموا عن الحب الإلهى وعن حلاوة العلاقة مع الله.. وكانت لهم أحوال ومقامات، ومعرفة بالله هما ناس حبوا ربنا بالفعل فحبهم الله وكانت حياتهم كلها لله. عنهم: هـ تلاقى كلام عن النفرى الفيلسوف الكبير اللى ساب "المواقف والخطابات" مع الله، وعن ابن عربى الإمام الأكبر والخواص شاعر الصوفية المتوكل دومًا، الشيرازى الجسر بين الشرق والغرب، الشاذلى اللى خرجت من عبايته أغلب المناهج والطرق الصوفية، أبو الدرداء حكيم أهل الصُفة، الشبلى تاج الصوفية، النخشبى العارف المتوكل اللى شاف موته، الغزالى فقيه الصوفية، الحلاج اللى أهلكته شطحاته، الخراز لسان الصوفية اللى حاور إبليس، الدارانى ريحان القلوب وبندار الجائعين، أبو طالب المكى قوت القلوب، أبو عبد الله الجلاء الرجل اللى وهبه أبواه لله، أبو مدين الغوث أستاذ الألف شيخ، البسطامى المختَلَف على أحواله وأقواله، بشر الحافى اللص اللى بقى عبد ربانى، التسترى مفسر القرآن اللى انجذب، الرومى المتصوف الشاعر اللى أدهش الغرب، الجنيد طاووس العلماء وسيد الطائفة العاشقة، حاتم الأصم لقمان المتصوفة اللى عاش زى الطيور، الحارث المحاسبى اللى عبد الله كأنه يراه، الحسن البصرى رائد المتصوفين وسيد التابعين، داود الطائى الرجل البصير الراعى، ذو النون المصرى رائد التصوف اللى اختلف عليه الناس، رابعة العدوية شهيدة العشق الإلهى، السرى السقطى واسطة العقد بين قطبين من أقطاب الصوفية، السهروردى رجل الإشراق اللى قتلته أفكاره، البلخى الزاهد المجاهد اللى أبكى هارون الرشيد، الفضيل بن عياض أروع الناس وحجة أهل زمانه، القشيرى زين الإسلام والجامع بين أشتات العلم، الجيلانى صاحب الوصايا اللى ظلمه مريدوه، الجيلى اللى دور عن الإنسان الكامل، عبد الله بن المبارك سيد الزاهدين، عمر بن الفارض سلطان العاشقين، فريد الدين العطار صاحب منطق الطير، مالك بن دينار "كاتب المصاحف"، الكرخى، العارف المتسامح، ويحى بن معاذ الواعظ الذكار.

...

وتشرق شمس الأناضول: العثمانيين زمان وتركيا دلوقت
اصدرت في: 29/11/2013

كتاب جديد للصحفية والكاتبة "نسرين مهران" ممكن نعتبره من أدب قرب يختفى، نوع اسمه "أدب الرحلات"، ودى مش أى رحلة دى رحلة لبلاد العثمانيين زمان وتركيا دلوقت.. لكن يا ترى إيه اللى شد نسرين علشان تكتب عن رحلتها لتركيا؟.. يمكن رائحة البوسفور.. قمم الجبال.. سحر المولوية.. منتزهات أنقرة.. ميدان تقسيم.. صراحة حاجات كثير ممكن تشد الواحد علشان يكتب عن البلاد دى. طرابزون: أول ما يقابلك فى الكتاب هو اللغة الرقيقة والمليانة بالحب والتفاؤل جواه وطبعًا علشان ندلل على ده لازم نتكلم عن طرابزون وهى مدينة الحب والجمال واللى بـ توصف مهران ناسها بميلهم للعشق وكأن عبادتهم هى الحب.. والناس هناك طيبين وكلهم ود.. ونصف السكان بـ يعملوا فى الزراعة وبـ يجروا على الرزق الحلال.. وقد إيه المناظر الطبيعية هناك خلابة خاصة بحيرة "النجمة" وهى بحيرة تكونت من السيول والأمطار وصنعت شكل "نجمة" وهناك بـ يتقابل العشاق كل ليلة. ريزا: لو سيبت طرابزون يبقى لازم تروح "ريزا"، وهى عبارة عن بساط أخضر ممتد وهى المدينة الأشهر فى مدن البحر الأسود، واحة من السحر والجمال، مكان تقدر تتأمل فيه الحياة بعيد عن كل التكنولوجيا والسياسة والبورصة والحروب.. مكان تقدر تهرب إليه وأنت مستريح.. عارفين ليه؟ لأن المدينة ببساطة مبنية على منحدرات الجبال وبـ يلفها أشجار الشاى وبكده تقدروا تشربوا أحلى شاى فى ريزا لأن المصانع هناك ببساطة بـ تعمل 9 أنواع مختلفة.. وعلى فكرة المصانع لازم تعرفوا أنها داخل مزارع الشاى والعمال هناك بـ يحبوا شغلهم جدًا وفى وقت الراحة أكيد بـ يشربوا شاى. أسطنبول: ما ينفعش نعدى بكم على تركيا وما نتكلمش عن "أسطنبول" لكن يا ترى هـ نتكلم عنها إزاى؟ الموضوع صعب جدًا على فكرة.. علشان تقول عليها شرقية ممكن.. طب غربية؟ تصدقوا ممكن برضه.. المشكلة بقى مش فى كده، لكن المشكلة فى التحديد.. لكن لو عاوزين الحق نقدر نقول عليها "جسر حقيقى ما بين الشرق والغرب"، هى واحدة من أجمل مدن العالم.. فيها حس الصوفية التركية خاصة المولوية.. فيها الجوامع والبنايات اللى بـ تفكرك بالجو العثمانى.. كمان فيها الجو المسيحى واللى لسه موجود فى الكنائس والبنايات من أيام البيزنطيين.. وفيها الجو الإسلامى لأنها كانت عاصمة العثمانيين.. ومن كثر المواقع الأثرية اللى فيها قررت اليونسكو ضمها لمواقع التراث العالمى.. والعجيب أن برغم المدينة وزحمتها لكنها فى الليل بـ تكون هادية جدًا ويمكن ميدان "تقسيم" هو اللى بـ يسهر بمحلاته ومطاعمه وفرقه الموسيقية اللى بـ تلعب مزيكا عربية وغربية. الناس هناك بـ تحب شغلها وبـ تحب بلدها.. والكاتبة عاملة ملف فيه أهم صور الأماكن اللى هناك، مسجد السلطان أحمد وآية صوفيا والأبراج القديمة والبحيرات وغيرها كثير.. ومن الواضح أن "نسرين مهران" مبهورة جدًا بتركيا وبالناس هناك وبالحضارة والتقدم لما يتعانقوا مع بعض.. وعلشان كده ابقوا روحوا وقولوا لنا رأيكم إيه؟

...

واحد من الميدان: لك الله يا مصر
اصدرت في: 13/09/2013

كتاب قدمه د. علاء الأسوانى وقال فيه: "أشكر مؤلفه على جهده وأتمنى أن يعكف على المزيد من العمل حتى يسجل للأجيال القادمة التاريخ المشرف الذى يصنعه المصريون الآن". ومن الأول كده علشان تبقوا عارفين وأنتم رايحين تشتروا كتاب "واحد من الميدان" هو عبارة عن توثيق لمرحلة مهمة جدًا فى حياة المصريين وده للى مهتمين يعرفوا التواريخ بحذافيرها وبالتحديد فترة السنة ونصف بتاعة "حكم العسكر" يعنى ما لها وما عليها.. وبحيادية تامة من غير تدخل من فتحى المزين زى ما قال. الكتاب تكملة لسلسلة توثيق بدأها بكتاب الأول "18 يوم" وطبعًا كلنا عارفين إيه هما الـ "18 يوم" وإيه اللى حصل فيهم من عبقرية المصريين اللى هزوا العالم ساعتها –إيييه كانت أيام– المهم الكتاب الثانى بقى هو "واحد من الميدان" وفيه وعد من الكاتب أنه هـ يعمل كتاب عن فترة "حكم الإخوان". الكتاب بـ يتكون من 5 فصول هم: "الثمرة الأولى.. دماء على الأسفلت.. واحد من الميدان.. حصاد الثورة.. الطريق إلى قصر العروبة". الثمرة الأولى بـ يتكلم فيه عن سجن مبارك وكبار الرجال فى الدولة وده اللى ما كانش حد متوقعه، يعنى ناس كنا فاكرينها فوق القانون بقيت فى قفص الاتهام وده يعتبر من أهم إنجازات الثورة، وطبعًا إحنا كمصريين مش ممكن نعدى حدث زى ده من غير ما نطلع عليه نكت زى "طرة لاند" و"ليه تسرق مرة لما ممكن تسرق مليون". وبعد كده ييجى دور توثيق محاكمة القرن بذكر اليوم والساعة والتاريخ والتهمة ده غير جلسات الشهود زى المشير طنطاوى والعنان وسليمان والعادلى وغيرهم. أما فى الفصل الثانى فبـ يتكلم فيه عن الدم اللى سال فى ماسبيرو والمحاكمات العسكرية، ده غير الانتخابات واللى حصل فيها.. وبـ يرصد المؤلف بعد كده أخطاء العسكر زى التباطؤ، التصعيد، التوقيت، وكل ده مشروح بالتفصيل. أما فصل واحد من الميدان بـ يعوم بنا فى بحر أخطاء المجلس العسكرى وإزاى كان بـ يفكر ويقدم نفسه على أنه حامى الحمى.. وكمان بـ يجيب سيرة محمد محمود واللى حصل فيه. وإحنا داخلين على آخر الكتاب نقدر نقول أن الكاتب فعلًا اشتغل شغل توثيقى وهو صدق فى ده.. وكون أنك تتفق أو تختلف مع اللى موجود فيه مش معناه أنه غير حيادى.

...

المدن المسحورة: زرزورة
اصدرت في: 12/07/2013

"زرزورة" اسم المدينة السحرية الأكثر شهرة فى الصحراء الغربية.. فيه ناس بـ تقول عليها مخفية ما حدش يعرف يوصل لها.. وناس بـ تقول عنها مطلسمة.. ومستورة.. وناس بـ تقول عنها مخفية.. أنها المدينة العجيبة الشعبية السحرية اليوتوبيا اللى بجد واللى تقريبًا كل الناس الساكنين فى الواحات بـ يعتقدوا فيها. كتاب المدن السحرية هو كتاب فريد من نوعه لأنه بـ يتعامل مع موروث حقيقى عند الناس على الرغم من أنه غريب لكنه موجود وهو موروث المدينة المسحورة والحكايات اللى حولها.. خلونا نقول أن فكرة الكتاب جديدة بجد ومتعوب فيها جدًا. الرجل تعبان طبعًا فى الجمع وفى البحث وفى المواد الكثير اللى تعامل معاها وحللها، هو بدأ من أول تاريخ الواحات وأنها كانت فى العصر الفرعونى أرض العزلة ومهجر الفارين عن القانون تقريبًا لحد أيام العرب فى مصر والواحات مهجرة وبعيدة عن الأحداث اللى بـ تحصل فى القاهرة الواحات بعيدة بعيدة ومهجورة وسحرية. اصطلاح جديد بـ يتكلم عنه الباحث/ فارس خضر.. وهو "جغرافيا الوهم" واللى بـ يتكلم عن الأماكن اللى موجودة فى ذاكرة الناس وبـ يتكلموا عنها ويصفوا فيها لكنها أصلًا مش موجودة على الخريطة.. مش موجودة إلا فى الخيال وبس.. على الرغم من كده إلا أن قراءة المنطقة جغرافيًا بـ يخلينا نركز على طبيعة المكان وعلاقته بالحكايات السحرية اللى ممكن توصل لدرجة المعتقد الأساسى فى وجدان الناس هناك.. وفارس بـ يعمل تأصيل جيد للموضوع لأنه بـ يحكى عن الكتابات العربية الجغرافية وحكايات الرحالة اللى بـ يحكوا هما كمان على المدن السحرية وإزاى ده أثر فى عقل الناس وخلاهم يصدقوا الموضوع.. وكمان بـ يحكي على القرى اللى فى الواحات اللى اختفت بفعل تأثير زحف الرمال عليها والآبار بتاعتها جفت وده كله بـ يؤثر على الناس واعتقادهم. لأ وكمان فيه إعادة إحياء لبعض المدن الخالدة فى التاريخ يعنى الناس تنقل مرحلة تاريخية ما من مكانها الواقعى لمكانها الأسطوري ويحكوا حكايات عجيبة عن مملكة "سبأ" مثلًا علشان يعيدوها للعقل العربى لكن بشكل جديد وقوي وأسطوري وده استرداد عاطفي للمكان يعني كأنهم بـ يعيدوا بناء المكان فى وجدانهم وقلوبهم من كثر حبهم للمكان.. وفى الآخر ده برضه بـ يساعد على بناء المدينة المسحورة وبـ يكون مبرر قوى لوجودها. فيه أشكال كثير للمدن المسحورة ولأسباب اختفاءها والجميل أن المدينة المسحورة مشترك إنسانى كبير فى ثقافات كثيرة عند العرب والبربر والقبط والمسلمين وفى النهاية كل مدينة مسحورة الناس بـ تخليها تشبه الجنة فيها كل حاجة أنت محتاجها والأفعى واقفة على بابها تحرسها.. وفيه أنواع كثيرة من المدن زى مدينة العقاب اللى من وراء النهر العظيم.. ومدينة العجائب اللى خلف الجبل.. ومدينة الأموال.. وواحة التائهين.. ودينة خزنة الحكمة اللى فيها السبعة ألوان.. ومدينة الأصنام الحاسة اللى التمثال فيها بـ يتوجه للجهات الأربع لوحده.. وحكايات ثانية كثير قوى هـ نسيبكم بقى تقرأوها لما تجيبوا الكتاب.

...

جنة الإخوان (رحلة الخروج من الجماعة): رحلة وجع ومعرفة
اصدرت في: 21/06/2013

شفتم مسلسل الجماعة؟.. إيه رأيكم فيه؟ جاب كل الحاجات اللى نعرفها عن الجماعة ولا لأ؟ طيب بصوا بقى مسلسل الجماعة كان مسلى صراحة مع أنه جاء فى رمضان والناس صايمة وكده.. بس المعلومات اللى فيه كانت فاتحة خير على الناس اللى بـ تكتب عن الجماعة لأنهم بدأوا ينشقوا عنهم ويخرجوا منها وطبعًا كان الخروج الكبير والكتاب اللى كسر الدنيا وعمل طبعات كثير "سر المعبد" لثروت الخرباوى وعلى نفس الفكرة بـ يقدم لنا ثروت الخرباوى واحد جديد من جماعة الإخوان بـ يخرج منها وبـ يتكلم عن مشاهد كثير قوى تعالوا نشوف مع بعض.. سامح فايز شاب إخوانى صميم قرر يخرج من الجماعة ويقول لنا ليه خرج فى رحلة طويلة مليانة مشاكل وحفر وحاجات غريبة، بصوا بقى السلبية اللى هـ تتاخد على سامح هو استخدامه تقريبًا لنفس طريقة ثروت الخرباوى.. لكنه بـ يحكى بشكل مختلف وإيييه ذكريات بقى. الذكريات بـ تبدأ معاه من أيام ثورة يناير من بداية القعدات اللى كانت بـ تجمعه بالشباب على قهوة البستان أيام التحرير والثورة والسؤال الأزلى: أنت ليه خرجت من الجماعة؟.. فى الأول كان بـ يهرب من الإجابة، عارفين ليه؟.. على اعتبار أنهم كانوا إخوة فى وقت من الأوقات وأنه كان لازم يحافظ على سر الجماعة اللى كان جواها لكن الموضوع اختلف لما قرر يعرف الناس طريقة العمل. آه يا جماعة من طريقة عمل الجماعة، هو بـ يحكى لنا ما يشبه المذكرات بلغة سهلة رقيقة فى وقت وشديدة وقت ثانى على حسب الموقف وعلى حسب انفعاله.. على فكرة سامح بـ يظهر انفعاله قوى فى كتابته.. بـ يظهر فى اختياره لطريقة الحكي ووصفه للمشهد.. بـ يبان لما يحكي عن الهدف الحقيقي –زى ما بـ يقول – وراء الأذكار والأوراد اللى كان شيخه بـ يعطيها له.. فايز بـ يقول أن السبب وراء اهتمام الجماعة بكل الكتيبات والأذكار دى هو حاجة واحدة... هاه فكروا معانا إيه هى الحاجة دى؟ لأ غلط مش أنه يبقى شيخ خالص.. الحاجة دى هى أنه باختصار يبقى مطيع جدًا.. وبـ يربط بين حاجات كثير ببعض زى مثلًا وجهة نظر الجماعة فى العسكرية.. هما شايفين أن العساكر والجنود لازم يكونوا آلات ما عندهمش قدرة على الإبداع والتفكير لأنهم لو أبدعوا ممكن يكونوا خطر على مدنية الدولة. حاجات كثير هـ تعرفها فى الكتاب وفى الرحلة الطويلة اللى قضاها سامح فايز فى الجماعة عن دين الإخوان وعن كفر غطاطى وعن مدرسة الدعوة، هـ تعرفوا كتير بس ابقوا اقرأوا الكتاب.

...

سر المعبد: طقس وكاهن وسر ومعبد وتميمة
اصدرت في: 26/04/2013

الطقس:الأول: جربت تعمل طقس قبل كده؟الثاني: يعنى إيه طقس؟الأول: يعنى حاجات ثابتة بـ تتعمل بشكل ثابت.الثاني: والله على اعتبار أنى فهمت كده.الأول: تعالى أعلمك.زمااااان قوى كان فيه الأخويات، ودى كانت عبارة عن مجموعة أشخاص بـ تتجمع على هدف واحد وفكرة واحدة وفى الغالب بـ يكون لهم كتاب محدد ومجموعة طقوس خاصة بـ يعملوها حاجة شبه الصلوات كده ما حدش بـ يعرفها غير اللى داخل الجماعة ومن أشهرهم فى العصر القديم جماعة "السيف والوردة" واللى تطورت لفرسان الهيكل، وجماعة "الحشاشين" اللى كانت بـ تقوم بعملية اغتيالات سياسية وصلت لصلاح الدين الأيوبى لكنهم فشلوا فى قتله... وجماعة "الماسونية العالمية المعروفة"، وأخيرًا جماعة "الأخوان المسلمين" واللى برضه كانت لهم طقوس معينة زى ما هـ تعرف من كتاب "سر المعبد".الكاهن الأكبر:الأول: هو فيه قيمة للإنسان؟الثاني: يعنى إيه إنسان؟الأول: يعنى هو أنت علشان يبقى عندك قيمة لازم تكون إنسان الأولالثاني: وإزاى أعمل لنفسى قيمة؟الأول: أنك تكون إنسان.الكاهن الأكبر فى المعبد هو الآمر الناهى هو اللى بـ يقول كل حاجة وبـ يعمل كل حاجة وهو اللى حافظ الكتاب وهو اللى بـ يقول لأفراد الجماعة كل حاجة وبـ يوجههم لدرجة أنهم بـ يعتقدوا فيه اعتقاد قوى جدًا بأنه بـ يفهم فى كل حاجة أو أن ربنا أعطاه موهبة خاصة واصطفاه من بينهم.. ده اللى خلى ثروت الخرباوى يتكلم عن التكبيل وعدم القدرة على التفكير خارج إطار الجماعة، لأ وكمان مش كل كبار الجماعة زى ما بـ تشوفها على التليفزيون أو فى الجرائد، ساعات بـ يبقى لهم شكل ثانى، وأقرأوا لقاؤه مع السيد الهضيبى وأمنياته فى اللقاء ده واللى تحطمت كلها لما انتهى اللقاء وساب الجماعة بعدها. السر:الأول: أقول لك سر؟الثاني: لأ.الأول: ليه؟الثاني: لأنك لو قولته مش هـ يبقى سر. لكل معبد سر خاص مختفى ما حدش بـ يعرفه واللعنة لازم هـ تصب على اللى بـ يفشى السر ويخرجه للناس.. اللعنة ممكن تصيب الخرباوى نفسه.. لأنه تكلم عن حوادث كثير وشخصيات كثير منهم اللى سمع عنهم ومنهم اللى قابلهم بنفسه.. حكى عن طالب الدين اللى بـ يتكلم دائمًا عن المعصية والذنوب... اللى كان بـ يشرح دائمًا كتاب "معالم فى الطريق" وهو كتاب سيد قطب الشهير واللى أصبح بعد كده من كبار رجال الجماعة.. الخرباوى أفشى أسرار مش سر واحد وعمل ربط غريب شوية ما بين سيد قطب والجماعة كتفكير من ناحية، والماسونية من ناحية ثانية، وبـ يحاول يربط ما بين فكرة التنظيم فى جماعة الأخوان المسلمين والماسونية وبـ يقول أن الموضوع مجرد فكرة تحت التجربة والبحث.المعبد:الأول: بـ تحب الصوفية؟الثاني: لأ طبعًا، أنا من الجماعة أحبهم إزاى؟الأول: دول ناس بتوع ربنا برضه.الثاني: وأنا مالى.الأول: لو عرفتم أحوالهم هـ تفهموا أن صلاحكم معاهم.لكل معبد تكوين خاص به وعلاقات مع العالم الخارجى.. والمعبد اللى بـ نتكلم عنه انتشر فى كل مكان فى العالم.. وعمل صفقات وعلاقات مع ناس كثير جدًا منهم أمريكا مثلًا.. استخدم القوة فى بعض الأحيان واستخدم أتباعه فى أحيان ثانية واستخدم علاقته بالملك فى أحيان ثالثة. تميمة أخيرة:عن بذور التكفير... سر المعبدسيد قطب كان ماسونى... سر المعبدالجيش والأخوان... سر المعبدعن التيار القطبى فى الجماعة.. سر المعبدعن طريقة تفكيرهم... سر المعبدعن الخلافة الإسلامية... سر المعبد الأول: هو فيه قيمة للإنسان؟الثاني: يعنى إيه إنسان؟الأول: يعنى هو أنت علشان يبقى عندك قيمة لازم تكون إنسان الأولالثاني: وإزاى أعمل لنفسى قيمة؟الأول: أنك تكون إنسان.

...

هيدرا: أنت ماسونى.. يعنى إيه ماسونية؟ تبقى ماسونى
اصدرت في: 15/03/2013

تعرفوا إيه عن الماسونية؟الماسونية هى الناس الوحشين اللى بـ يعملوا حاجات وحشة.. لأ الماسونية هى الحركة العالمية اللى بـ تبهدل العالم.. لأ الماسونية دى حاجة استغفر الله العظيم.. بـ يعملوا حاجات استغفر الله العظيم.طب نقول لكم إيه؟ تعالوا نعرف مع زهير الكاشف يعنى إيه ماسونية.. المقدمة بـ يكلمنا فيها زهير عن فكرة الكتاب وليه كتب عن موضوع الماسونية.. وده كان بطلب من صديقه لكتابة مقال عن الماسونية فلما بدأ يدور ويبحث لقى الفكرة عدت المقال بكثير، ومن هنا قرر يكتب كتاب عن الماسونية.عن تاريخهم (يا ولاد اللذينه)ما حدش يقدر يقول بالضبط الماسونية بدأت إمتى.. لكن من المعروف أنها نشأت كمنظمة سرية على يد واحد اسمه "حيرم آباد" وسمى المنظمة دى "القوة الخفية" وتلونت وتغيرت وتشكلت كثير جدًا وتم تسميتها بالكثير من الأسماء عبر العصور علشان تتفرع من منظمة لمجموعة منظمات تحت اسم مؤسسة كبيرة اسمها "الماسونية" وهدفها هو السيطرة على العالم.عن هدف الكتاب (شوف إزاى)الهدف من الكتاب مش أنك تتعرف على تاريخ الماسونية الكاشف بس بـ يعرفك على تاريخهم من باب إثبات أن الماسونية موجودة بالفعل مش مجرد خدعة تاريخية بـ يضحكوا بها علينا (ولاد اللذينة) وهو فى الجزء التاريخى ده بـ يعترف أن فضله بس حسن الترتيب وتوفير الوقت والجهد فى قراءة مراجع كبيرة وكثيرة.. أنت بس اقرأ اللى كاتبه الكاشف.شوف إزاى بقى الماسونية بـ تشتغل بمنتهى الهدوء والتخطيط والتنظيم والسيطرة على مفاصل العالم يعنى شركات الميديا الكبيرة.. البنوك العالمية.. البلدان الكبرى واقتصادها.. هما بـ يصنعوا الصراعات والأزمات الاقتصادية والتغيرات العالمية.. هما بـ يعملوا مسرحية العالم الكبيرة وبـ يكتبوا السيناريو فيا ترى هـ تتفرج وأنت مش عارف ولا وأنت عارف إيه اللى بـ يحصل؟أنت ماسونى.. يعنى إيه ماسونية؟ ممكن تسميهم "متنورين" أو جماعة هدفها السيطرة على العالم زيهم زى الحية اللى لها رؤوس متعددة واللى اسمها فى التراث اليونانى "هيدرا" وسبب تسمية الكتاب بالاسم ده هو أن الماسونية زى الهيدرا لها أذرع ورؤوس فى كل حتة فى العالم وفى كل مجال.. كلهم شغالين على مبدأ واحد برموز محددة كل رمز له معنى والماسونيين طبقات يعنى مجتمع كامل ومش أى حد يعرف كتابهم المقدس "كابالا" وكلهم فى النهاية بـ يخدموا المخطط الصهيونى ومؤمنين بالمذهب اليهودى الباطنى "الكابالا" وبـ يحاولوا يشعلوا الحروب ويوقعوا ما بين أصحاب الديانات السماوية الثلاثة.. ممكن يكون الكلام صح ممكن يكون فيه جزء من الحقيقة ممكن يكون نظرية.. لكن الأكيد فى الموضوع أن فيه حاجة اسمها ماسونية.. السؤال دلوقتي أنت ماسونى؟ يعنى إيه مااااااسونية.

...

بعث روى: عودى يا هاميس
اصدرت في: 04/03/2013

فى الأول كده نحب نعرفكم معنى "روى" وهو من يحفظ الكلمات، أو من يوثقها، ودى كانت وظيفة الكاتب المصرى أو أمين الكلمات فهو اللى بـ يملك كل الحقائق ويكون عليها أمين من خلال سجلاته الكثيرة والمختلفة.ماذا لو بعث روى من موته؟.. يا ترى هـ يعمل إيه؟ هـ يفكر إزاى؟ هو ده السؤال اللى لو عاوزين إجابته يبقى لازم تقرأوا "بعث روى" اللي بـ يتكون من 11 فصل منها "الكاتب المصرى، الديانة المصرية القديمة، مصر، الهرم الأكبر، فجر الأخلاق".عادل خميس تخيل لو الكاتب المصرى بعث من جديد.. طيب لو سمع اللى بـ نقوله على المصرى القديم؟ ولو شاف مصر وصلت لإيه؟ ولاَّ سلوكيتنا وأسلوب حياتنا؟.. الإجابة أكيد هـ تكون: -"الكاتب المصرى هـ يغطى نفسه بأى حاجة".-"هـ يستغرب ووجهه يقلب ومش بعيدة يستقيل من وظيفته".-"هـ يطلب بعلو صوته مقابلة الفرعون الأكبر".-"هـ يقول بعلو صوته أنا صحيت غلط.. أنتم ما بـ تتكلموش عن المصرى القديم، أنتم بـ تتكلموا عن أى مجتمع ثانى غير مصر".للأسف أيها الكاتب العظيم هو ده بقى حال مصر، المهم الباحث هنا مش بـ يتكلم عن الكاتب المصرى بس.. ده بـ يحاول يعمل لفة بينا داخل العصر الفرعونى، وعلشان كده بـ يكلمنا عن الديانة المصرية القديمة.. وبـ يقسمها بين الوجدانية والتعددية.خميس هـ يتعرض لـ 3 محاور أساسية فى الدين وهى: "الوحدانية فى الإسلام، الوحدانية فى المسيحية، الوحدانية فى المصرية القديمة".الوحدانية فى الإسلام: هو الله الواحد الأحد الحى الصمد المحي المميت.. التعدد هنا فى الصفات، فالأسماء هنا مرتبطة بالصفات ولا تمت للتعددية فى شيء، أما الوحدانية فى المسيحية: باسم الأب والابن والروح القدس، إله واحد... آمين، لو سألت أى مسيحى فين الوحدانية هنا هـ يرد عليك بكل استغراب أنهم إله واحد لكن الأب تجسد فى صورة الابن وما هو الإ روح قدس، وأخيرًا الوحدانية فى الديانة المصرية القديمة: ما حدش بقى يقول لنا أنهم كانوا بـ يؤمنوا بالله الواحد الأحد، استنوا شوية، عادل خميس هـ يشرح كل حاجة وعلشان تعرف كل حاجة لازم تعرف لغتهم وعاداتهم وتقاليدهم وأكثر من كده أنك لازم تعيش حياتهم، واللى بـ يصعب الموضوع أكثر أن اللغة الفرعونية اختفيت وغير مستخدمة والكاتب هنا بـ يعرَّف معنى كلمة آمون "وده من وجهة نظره هو بس" تعنى العلا أو الموجود الخفى وده كان أعظم آلهة مصر القديمة."مصر هل هى بحاجة إلى اسم": كل مصرى بـ يعتز بمصريته، لو أى حد سأل مين هى مصر ما حدش هـ يعرف يرد، هـ تقول إيه ولا إيه، هى أم الدنيا، اللى كرمها الله بذكرها فى القرآن، مهجر أبو الأنبياء، مسقط رأس نبى الله موسى، ملجأ نبى الله عيسى.. إلخ، إذًا فالسؤال لا معنى له من الإعراب.بجد مش هـ نقدر نوصف قد إيه الرحلة كانت ممتعة وشيقة مع كاتب زى عادل خميس لف بينا حوارى مصر القديمة وكان معانا مرشد للرحلة اسمه الكاتب المصرى واللى كان زعلان مننا أوى يا رب نحاول نفرحه. 

...

بروتوكولات حكماء صهيون: الدستور السرى
اصدرت في: 22/02/2013

"بروتوكولات حكماء صهيون" كتاب للكاتب عصام عبد الفتاح بـ يتناول فيه قراءة الدستور السرى للحركة الصهيونية وبـ يبدأ الكاتب توضيح أن البروتوكولات عبارة عن مجموعة من الوثائق السرية تم إقرارها فى المؤتمر العلمى الأول للصهيونية عام 1897 بمدينة بازل بسويسرا.وبعد كده بـ ينتقل لرؤية العلم لبروتوكولات الحركة الصهيونية وبدأ بخطاب لمهاتير محمد رئيس وزراء ماليزيا اللى قال فيه أن الأوربيين قتلوا 6 ملايين من إجمالى 12 مليون يهودى وبالرغم من ده ما زال اليهود بـ يحكموا العالم وبـ يخلوا الآخرين بـ يدافعوا عنهم ويموتوا من أجلهم.وفى عام 2002 أثيرت ضجة إعلامية وسياسية كبيرة حول المسلسل المصرى (فارس بلا جواد) وقالت الخارجية الأمريكية أن من سفارتها بالقاهرة بـ يتابعوا المسلسل يوميًا لمعرفة إن كان بـ يحتوى على مواد معادية للسامية أو لا وأن الخارجية الأمريكية بـ تحتفظ بحقها فى الاحتجاج رسميًا لدى السلطات المصرية فى حالة ثبوت العداء ضد السامية فى المسلسل. وطبعًا الناس البسيطة بـ تقول: "طب وأمريكا مالها؟".. لكن كانت حقيقة تدخل الولايات المتحدة الأمريكية فى الموضوع كان سببه ضغوط من "رابطة مكافحة التشهير اليهودية" اللى وصفت المسلسل حتى قبل عرضه بأنه آخر مظاهر التحريض على معاداة السامية فى الإعلام المصرى. وفى ديسمبر 2003 أعلن الرئيس الأمريكى جورج بوش أنه استطاع جمع 200 مليون دولار لحملته الانتخابية لعام 2004 وأن معظم الأموال دى كان مصدرها اللوبى الصهيونى فى الولايات المتحدة الأمريكية وبالتالى طبعًا لازم أمريكا تدافع عن الحركة الصهيونية لأن صناعة الرؤساء فى أمريكا جزء من البروتوكولات.وبـ يتطرق الكاتب إلى من أقروا البروتوكولات ومن أنكروها وبـ يقول أن فيه من يرفض البروتوكولات وينكر حقيقتها حتى من بين اليهود أنفسهم ويشاركهم الرأى العديد من المؤرخين وصحيفة (التايمز) اللندنية اللى وثقت الكلام ده عام 1921 وقام محامى فرنسى اسمه (موريس جولى) بعدة تحقيقات صحفية انتهى فيها إلى أن البروتوكولات غير حقيقية وأن تم اقتباسها وتزويرها من كتيب نقدى لاذع لكاتب فرنسى، ومن خلال كل ده الكاتب غرضه يوضح لنا إزاى اليهود اجتهدوا وسخروا كل إمكانياتهم وطاقتهم لإخفاء مخططاتهم، أما عن إزاى خرجت البروتوكولات للنور بشكل واضح فده تم عن طريق نشرها لأول مرة فى الإمبراطورية الروسية وتحديدًا عبر صفحات جريدة (زاناميا)، نشرها الشيوعيين المعارضين لحكومة الإمبراطورية الروسية بعد الثورة البلشيفية تأكيدًا لإيمانهم المطلق بأن اليهود بـ يحاولوا السيطرة على العالم.بعد كده تكلم الكاتب عن البروتوكولات والنازية وفى الجزء ده بـ يعرض إزاى استخدم النازيين البروتوكولات فى تبرير اللى فعلوه فى اليهود والمعروف بمحارق الهولوكوست، وبـ يقول المؤرخين تم ذكر البروتوكولات فى قصة حياة هتلر المعروفة باسم (كفاحى) حيث كتب يقول: "إن البروتوكولات تظهر بشكل واضح فى تاريخ اليهود الذى يستند إلى حد كبير على الأكاذيب والتزوير أن هناك مخاوف حقيقية من نشاطات اليهود وأهدافهم".ويستمر الكاتب فى عرض كل ما ارتبط بالبروتوكولات زى البروتوكولات والماسونية ودراسة كل بروتوكول على حدة، وفى كل جزء تزداد الإثارة والتشويق. يعنى مش هـ تقدر تقفل الكتاب قبل ما تخلصه.

...

حكاية اليونانى المتمصر: على اعتبار أنى بأحب البحر*
اصدرت في: 19/02/2013

هو كتاب أول ما هـ يوقع تحت أيدك هـ تعتقد أنه كتاب عن حكاية واحد كان نفسه يبقى "يونانى مصرى" من كثر حب اليونانيين لمصر، لكن فى الحقيقة الكتاب عن جريدة ظهرت فى الإسكندرية من سنة 1932: 1935م واسمها جريدة "اليونانى المتمصر".كاتبنا د. محمد رفعت أصدر الكتاب ده بشكل أساسى وعلى حد تعبيره أنه هـ يكون عموده الفقرى "اليونانى المتمصر" واللى كل مصادر التاريخ تكلمت عن اليونانيين فى مصر أهملت الجريدة دى على الرغم من أهميتها اللى بـ تبان من الستة عناصر الأساسية فى الكتاب، واللى بـ تبدأ بميلاد جريدة اليونانى المتمصر وتأصيل الروابط التاريخية بين مصر واليونان، وبـ تمر بتنمية العلاقات وتنشيط حركة السياحة.لكن إيه هو الهدف من الكتاب؟ تعالوا نفكر مع بعض، أول إجابة.. يا ترى هو تاريخ الجالية اليونانية السكندرية من خلال الجريدة؟.. إجابة خاطئة.. أعد المحاولة، إجابة ثانية.. العلاقة بين مصر واليونان؟.. إجابة خاطئة.. ناقص لك محاولة.إجابة بجد: قضية مهمة جدًا أننا نعرف إيه سبب إصدار الجريدة دى فعلًا.. وإيه هى إيجابياتها وسلبياتها.. وليه النخبة رفضتها.. وده علشان نعرفه لازم نعرف أولًا أن فكرة الصحافة مهمة جدًا فى التقريب بين الشعوب.. أو زيادة الكره ما بينهم.. أو صنع علاقات جديدة بين البلاد أو التذكير بعلاقات كانت موجودة مثلًا بيننا وبين اليونان.. وده اللى عمله د. الإمام لما فكرنا بأن اليونانيين صنعوا تمثال لمحمد على باشا فى أثينا، وزى ما أنتم عارفين أن محمد على مؤسس مصر الحديثة، وصانع النهضة فى مصر، لكن كالعادة خانه واحد من أفضل قواده.. وانتهى عصر محمد على.بغض النظر أن محمد على ما كانش مصرى إلا أنه يكفيه صناعة بداية النهضة فى مصر (وأوعوا تفكروا فى أى نهضة ثانية.. دى نهضة محمد على مش شارع محمد على) المهم من هنا تقدر تشوف قد إيه كانت العلاقة بين مصر واليونان فيها والروابط التاريخية وفيها ذكريات وعلماء زى إقليدس وهيرودت، واللى مع أنهم مش مصريين إلا أنهم أفادوا مصر كثير، ومش هـ نقول لكم فى الآخر غير حاجة واحدة تفكركم باليونان (الإسكندر الأكبر) واللى الإسكندرية تم تسميتها على اسمه.الكتاب بـ يكلمنا كمان على مسيرة محمد على باشا وإزاى أثر فى اليونان وتأثر بهم لحد ما وصل لسن الثمانين وتعب وتخلى عن العرش لابنه إبراهيم باشا وأحفاده من بعده واللى ما قدروش يحافظوا على الإمبراطورية اللى عملها جدهم.. لحد ما هـ نوصل لإسماعيل باشا اللى بدأ يفتح أبواب مصر للأجانب ويمنح الشعب المصر حرية أوسع، فعمل أول مجلس شورى مصرى، وحاول تكون مصر واحدة من أفضل الدول فى الشرق الوسط.فى وسط ده كله كان لازم نعرف أن عدد اليونانيين فى مصر دائمًا كان أكبر من أى جنس أجنبى ثانى عايش فى مصر، وبـ يدعو الكتاب إلى إعادة العلاقة بين مصر واليونان خاصة وإحنا عندنا حاجة اسمها "الرابطة اليونانية المصرية"، واللى كان غرضها الاحتفاظ بالثقة والاحترام بين الشعبين.. وعلى اعتبار أننا بـ نحب البحر جدًا، وأن اليونان أقرب المدن اللى موجودة فى البحر المتوسط لنا وتعتبر مفتاح أوربا فى العلاقات بيننا وبين الاتحاد الأوربى.. يبقى ليه ما نستغلهاش؟*جزء من قصيدة للشاعر محمد عز الدين

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن