دليل كتب القاهرة - أحدث المقالات عن الكتاب العرب ومؤلفاتهم

كتب

الديانات فى إفريقيا السوداء: الدين.. الأسطورة.. الإنسان.. إفريقيا
اصدرت في: 23/10/2012

كتاب قديم عن الديانات فى إفريقيا صدر من حوالى 70 سنة، وقرر المركز القومى للترجمة يعيد طباعته بشكل جديد، وأهمية الكتاب ده راجعة لفكرة الوصف للديانات المختلفة فى إفريقيا، أما صاحب الكتاب فهو أستاذ مشهور فى معهد الأجناس البشرية بجامعة باريس، العالم "هوبير ديشان" وهو رجل كان مهتم جدًا بإفريقيا واللى بـ يحصل فيها.قبل أى حاجة لازم نعرف أن الدراسات الإفريقية أصبحت مهمة جدًا فى حياتنا، وفى العلوم الحديثة، لأن المشتغلين فى أى علم خاص بالإنسانيات عارف أن إفريقيا منجم من المعلومات والدراسات، ومن هنا بدأ الاهتمام بكل ما هو إفريقى.موضوع الكتاب الرئيسى هو الديانات الكثيرة الموجودة فى إفريقيا، والاعتقاد بالقوى الخفية والطقوس اللى بـ يمارسها سكان المناطق المختلفة هناك، ما بين المحرمات الموجودة عندهم وأشكال التطهر، والترابط الشديد بين الأحياء والأموات هـ يدور كتابنا.فى القسم الثانى من الكتاب بـ يتعرض الكاتب لانتشار الإسلام والمسيحية فى القارة السوداء، وإزاى انتشرت الديانتين هناك، وإيه العوامل اللى أثرت عليها، خاصة العادات والتقاليد الإفريقية اللى دخلت فى صميم الديانتين، وبـ يوصل الكاتب لنتيجة مهمة وهى أن أى نظام اجتماعى أو سياسى أو اقتصادى أساسه هو فكرة التدين الخاصة بأى دين.فى الكتاب كمان هـ تلاقى بلغة سهلة وشيقة مجموعة من الحكايات والأساطير عن الحيوانات والأشجار والكائنات الخرافية والإنسان، خاصة الأجداد اللى لهم مكانة كبيرة فى نفوس الأفارقة، وأرواح الأجداد هى اللى بـ تضمن للقبيلة الاستمرار فى الحياة، وبـ يوصل الترابط ما بينهم لدرجة أن بعض القبائل تعتقد أن لكل شخص روحين، لما بـ يموت واحدة ترجع للأجداد، والثانية جزء من روح واحدة جماعية هى روح الأسرة.كمان الكتاب بـ يتعرض لعلاقة الدين الجماعى بفكرة الترابط الاجتماعى، وإزاى الدين بـ يخدم النظام اللى بـ تظهر فى الحفلات الدينية والشعائرية والتمسك بالتقاليد هو الرابط القوى بين أعضاء الأسرة والقبيلة، واللى يخالفها يطردوه خارج القبيلة، وكل أسرة بـ تعتبر نفسها فى حماية أجدادها ورئيس القبيلة، وبـ ينهى المؤلف الفصل ده بقوله: "أن الزنوج لا يفرقون بين الطبيعة وما وراء الطبيعة، فالكون عندهم وحدة واحدة".أخيرًا بـ يتكلم هوبير عن فكرة الكون والأساطير وإزاى نشأة الأرض وإزاى كان الكون وكانت الحياة، وبـ يتكلم كمان عن السحر والجمعيات الدينية السرية، ودور الكاهن الكبير وأهميته وأنه بـ يقوم بدور الطبيب، وبـ يبيع للناس التعاويذ لكل حاجة، علشان يوصل فى النهاية لوجود الديانتين الإسلامية والمسيحية ومظاهر التجديد اللى حصل فيهم.الكتاب حوالى 190 صفحة لكنهم بـ يجمعوا مجموعة معلومات وبـ يفتح مناطق من الصعب أنك تلاقيها فى كتب الجغرافيا أو التاريخ، بـ يفتح مناطق القارة السوداء.

...

المواقف والمخاطبات: شكل جديد لعلاقة العبد بالله
اصدرت في: 28/05/2012

محمد بن عبد الجبار بن الحسن النفرى واحد من الشخصيات المشهورة جدًا فى التصوف الإسلامى، ولد فى مكان اسمه "نفَّر" فى العراق، وعاش فى القرن الرابع الهجرى، وهو الوقت المعروف بانتشار الأفكار الصوفية فيه، حياته كانت غامضة ومافيش معلومات كثير عنها، لكن الأكيد أنه كان بـ يملى الكتاب بتاعه على تلاميذه وهما بـ يسمعوا منه ويكتبوا، كانوا بـ يكتبوا كتاب "المواقف والمخاطبات". وتعالوا مع بعض نعرف إيه الكتاب ده، الكتاب قديم جدًا لكن الهيئة المصرية العامة للكتاب أعادت طباعته مرة ثانية لأهميته تحت سلسلة اسمها "التراث"، وعلى فكرة هى سلسلة مهمة وفيها كتب كثير قيمة وبسعر قليل جدًا. فى الأول لازم نعرف أنه مش كتاب دينى بالمعنى المعروف، لكنه كتاب أدبى فلسفى دينى، وواحدة واحدة كده وهـ نقول لكم يعنى إيه، الكتاب فيه مناجاة مع الله وكلام النفرى عاوز يقوله لله، فهو واخد شكل دينى، وفى نفس الوقت الكتاب بـ يتعرض لقضايا فلسفية إسلامية زى فكرة وجود الله والإيمان والعلم والمعرفة؛ وده الشكل الفلسفى، وأخيرًا الكتاب بـ يتعرض لكل ده بطريقة أدبية جميلة فيها شكل جديد، ما تقدرش تقول شعر ولا نثر هو حالة ما بين الاثنين، حالة لازم تقول عليها "المواقف والمخاطبات". المواقف عبارة عن رؤية صوفية خالصة للنفرى بـ يكلم فيها الله وبـ يربط كل محاورة بـ يتخيلها بينه وبين الله بموقف معين، يعنى مثلًا يقول فى موقف العز: "أوقفنى فى العز وقال لى: لا يستقل به من دونى شيء، ولا يصلح من دونى لشيء، وأنا العزيز الذى لا يستطاع مجاورته". وبيقول مثلًا فى موقف القرب: "وقال لى أنا أقرب إلى اللسان من نطقه إذا نطق، فمن شهدنى لم يذكر ومن ذكرنى لم يشهد". أما المخاطبات فهى حالة وجدانية ثانية فيها خيال العابد الأديب اللى بـ يتخيل ربنا بـ يكلمه وبـ ينقل لنا الكلام ده فى مجاز جميل فـ يقول: "يا عبد أنا الناطق وما نطقى النطق، وأنا الحى وما حياتى الحياة، أحلت العقول عنى فوقفت فى مبالغها". وبيقول فى المخاطبات: "يا عبد لا تيأس منى فـ تبرئ منك ذمتى"، "يا عبد كيف تيأس منى وفى قلبك متحدثى"، "يا عبد أنا كهف التائبين وإلىَّ ملجأ الخاطئين". هو ده النفرى فى مواقفه ومخاطباته اللى كنا عاوزينكم تقرأوها وتعيشوا حالتها معانا علشان تتعرفوا على شكل جديد من المناجاة والعلاقة بين العبد والله.

...

موسوعة الظلام: موسوعة متخصصة في مصطلحات الميتافيزيقا* والأساطير
اصدرت في: 20/04/2011

دكتور أحمد خالد توفيق غني عن التعريف، كانت بداية معرفة القراء به هي سلسلة «ما وراء الطبيعة» اللي أدخلت نوع جديد من الأدب للثقافة المصرية وهو أدب الرعب والظواهر الخارقة، ورغم أنها كانت ضمن سلاسل روايات مصرية للجيب اللي أصدرتها المؤسسة العربية الحديثة للنشر والتوزيع، وكانت بـ تستهدف أكثر الشباب تحت العشرين، إلا أن نجاح السلسلة كان كبير والإقبال على النوع الجديد من الأدب فاق التوقعات، والمتابع الجيد للسلسلة عارف أنها مليانة بالمعلومات القيمة والمصطلحات العلمية الفيزيقية منها والميتافيزيقية. بعض الأصوات طلبت من المؤلف إصدار موسوعة خاصة بالمصطلحات والتعريفات الخاصة بالأساطير والظواهر الخارقة للطبيعة، وكانت الاستجابة من خلال «دار ليلى» للنشر والتوزيع اللي تعاونت مع المؤلف أكثر من مرة في إصدارات مختلفة، وبقى بين أيدينا أول موسوعة متخصصة في الماورائيات ومصطلحاتها والشخصيات والكيانات الأسطورية المرعبة. كلمة موسوعة مش دقيقة قوي في وصف الكتاب لأنه أشبه بقاموس مصطلحات مع شرح وتعريف في فقرتين أو ثلاثة للكلمات، وفكرتنا عن الموسوعة دائمًا أن معلوماتها بـ تكون وافية ودقيقة جدًا، بس ده مش الحال مع الكتاب اللي عدد صفحاته لم يتجاوز الـ180 صفحة، والغريبة أنه بدون أي تقديم أو غلاف خلفي يكون فيه تعريف بالكاتب وبمضمون الكتاب، بـ مجرد ما تفتح أول صفحة وبعد تقديم دار النشر والقائمين عليها هـ تلاقي صفحة حرف الألف وبعدها كل أسماء الشياطين والمسوخ اللي بـ تبدأ بالحرف ده. وده يخلينا نسأل عن ملابسات إصدار كتاب لمؤلف بحجم دكتور أحمد ودار نشر زي «دار ليلى» من غير أي مقدمات أو إهداءات. الكتاب بـ يضم أكثر من 100 مصطلح واسم وتعريفاتهم والحقيقة وراء الأسطورة منبع الاسم، ومن أهم المحتويات أسماء شياطين العالم السفلي كما يسميهم المؤلف ونبذة عنهم زي: أبراكساس، بعلزبول، لوسيفر، أزيموديوس وبلفيجور، كلها أسامي تخوف أساسًا ومش محتاجة تعريف علشان نترعب منها، وفيه أسماء أهم شخصيات تاريخية ارتبط اسمها بالرعب أو الغموض منهم ممثلين أفلام رعب غرباء الأطوار زي «لون تشاني – Lon Chaney» و«فنسنت برايس – Vincent Price» ومؤلفين وشعراء زي «كليف باركر – Clive Barker » و«إدجار آلان بو – Edgar Allan Poe» و«عبد الله الحظرد» وأسماء أشهر السحرة وكتب السحر في التاريخ، فيه كمان تعريفات لمصطلحات زي «الاسترفاع» و«الودونية» و«هرمجدون». وطبعًا لازم الجانب الأنثوي فعرّفنا المؤلف بشخصيات زي: لاميا، ليليث، الثقوبة، ماري شيلي والأخوات فوكس. كل المصطلحات والأسماء باللغة العربية حتى لو أصل الكلمة لاتيني أو غربي، وترتيب الفهرس بالأبجدية العربية، ومسميات وأساطير قليلة قوي هي اللي أصلها عربي أو مصري زي «أم الشلاشل» و «تحوت» الفرعوني و«العزيف». القاموس كان ممكن يبقى موسوعة فعلاً لو كان اهتم بالتفاصيل أكثر، ومش عارفين إذا كان فيه معلومات أكثر ممكن تُقال عن الأساطير دي ولا هي دى كل المعلومات الأكيدة المتوفرة عنها وباقي الأسطورة ممكن يبقى كذب أو خيالات وفنتازيا. في الآخر الكتاب يعتبر مرجع جيد للنوع ده من التعريفات -للي غاوي طبعًا- وممكن تجيب أي معلومة من خلال الإنترنت لو الشرح مش كافي في الكتاب، وعلشان كده كل المصطلحات مكتوب اسمها جنبها بالإنجليزية لراغبي البحث والتدقيق. فيه جزء ثاني من الموسوعة صدر مؤخرًا عن نفس دار النشر باسم «موسوعة الظلام» الجزء الثاني وموجود حاليًا بالمكتبات. *الميتافيزيقا: فرع من فروع الفلسفة التي تبحث في المبادئ الأولية للعالم "ما وراء الطبيعة"

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن