دليل كتب القاهرة - أحدث المقالات عن الكتاب العرب ومؤلفاتهم

كتب

فوجا: رواية اسمها غريب ومشوقة لعمرو الجندي
اصدرت في: 25/09/2011

"فوجا" اسم غريب لما تسمعه هـ يراودك سؤال: يا ترى هل الكاتب كان عاوز فعلاً يعمل حالة من الفضول عند القارئ، ولا اسم "فوجا" راجع لفكرة مختلفة فى رواية عمرو الجندى؟ الإجابة عن السؤال مرتبطة بالرواية الشيقة اللى من بدايتها بـ تطرح فكرة السؤال عندك، علشان المؤلف بدأ روايته بإهداء جميل لزوجته ومقدمة سريعة بدايتها: "كان يا ما كان.. كان هناك قاتلاً"، ويبدأ السؤال فـ يحاور الجملة دى ويناقض نفسه ويقول: إزاى تكتب "كان ياما كان" وهى أشهر مقدمة معروفة لحكايات الأطفال، وبعدين تتكلم عن القتل وده للبالغين، لكن عمرو سريعًا بـ يخرج من الموضوع ويرد بأننا عايشين فى عالم داخل كل واحد فيه الحلم والواقع، الخيال والحقيقة.. وده مفتاح الرواية. الرواية من نوع القصص البوليسى، لكنه مكتوب بشكل أدبى فيه حالة التشويق البوليسى، وفيه الاهتمام بالجمل والصور الأدبية المكتوبة بعناية بـ تفكرك بروايات أجاثا كريستى المشوقة. من بداية الرواية بـ تدخل فى قلب الأحداث؛ فالبطل الرئيسى موجود فى أول مشهد وهو بـ يحلم بكابوس غريب، وبـ يحاول يلاقى حد يحسسه أنه مش لوحده فيروح عند شقة الحاج إسماعيل صاحب البيت، علشان يلاقى باب الشقة مفتوح والحج إسماعيل غرقان فى دمه، يتوتر ويحاول يطلب المساعدة، فـ يلاقى جاره بـ يدخل شقة الحاج إسماعيل ويصرخ على أنه القاتل، فـ يضربه البطل من غير سبب علشان يسكته ويفضل يضربه حتى الموت، وهنا تجرى الأحداث بسرعة فى "فوجا". تجرى الأحداث بسرعة لأننا بـ نعرف أن القاتل اسمه حسين شاب قوى كان بـ يعيش فى الشرقية واتجه للقاهرة علشان الشغل، والمقتول اسمه كريم وهو جار حسين ودائمًا بـ يرجع البيت سكران، والظابط سالم ووكيل النيابة محمود اللى رسمهم الروائى بشكل ذكى عندهم سرعة بديهة وذكاء وقدرة على التحليل، أما مدام صفاء فـ نعرف أنها كانت موظفة فقيرة وتَعَرف عليها الحاج إسماعيل وحبها وزى كل الأفلام القديمة والجديدة انتشلها من الفقر وعاشت حياة جميلة معاه، لكنه فى النهاية اتقتل وجثته اختفيت وده اللغز الكبير فى الرواية. بـ تستمر طول الرواية وأنت عارف أن حسين قتل كريم السكران وبـ تلاقى العلاقات معقدة وداخلة فى بعضها، وبـ تفهم أن حسين بـ يعانى من عقدة كبت قديمة سببها له أبوه من معاملته القاسية وضربه له وهو صغير، وطول ما أنت بـ تقرأ فى الرواية بـ تلاقى أحداث غريبة بـ تظهر وراء بعضها، وبـ تعرف أن صفاء كان داخلها كبت شديد وعقدة نقص لأنها فقيرة وتجوزت من الحاج إسماعيل علشان الفلوس، واستمرت فترة طويلة معاه وهو مريض، وجاء الوقت علشان تستمتع بحياتها، لكنه استمتاع فيه غموض ومكالمات تليفون وأشخاص ثانية هـ تعرفهم فى الرواية وهـ تسأل سؤال مهم: هل الحاج إسماعيل مات فعلاً، طب لو مات جثته فين وإيه اللى حصل؟ وده هـ نسيبه لك لما تقرأ الرواية. "فوجا".. الاسم الغريب ده بـ تفهمه فى نص الرواية تقريبًا وبـ تعرف أنه اسم حالة نفسية سببها الكبت الشديد واللى ممكن يحول المريض إلى مجرم علشان يهرب من الضغط الشديد عليه، الرواية فى النهاية شايلة مجموعة مفاجآت وبـ تحاول توصل فكرة محددة عن الجريمة الكاملة وبـ تطرح سؤال هل فعلاً فيه جريمة كاملة؟، وهل فعلاً داخل كل واحد مننا "فوجا"؟.. أعتقد أنه سؤال مهم.

...

موسوعة الظلام: موسوعة متخصصة في مصطلحات الميتافيزيقا* والأساطير
اصدرت في: 20/04/2011

دكتور أحمد خالد توفيق غني عن التعريف، كانت بداية معرفة القراء به هي سلسلة «ما وراء الطبيعة» اللي أدخلت نوع جديد من الأدب للثقافة المصرية وهو أدب الرعب والظواهر الخارقة، ورغم أنها كانت ضمن سلاسل روايات مصرية للجيب اللي أصدرتها المؤسسة العربية الحديثة للنشر والتوزيع، وكانت بـ تستهدف أكثر الشباب تحت العشرين، إلا أن نجاح السلسلة كان كبير والإقبال على النوع الجديد من الأدب فاق التوقعات، والمتابع الجيد للسلسلة عارف أنها مليانة بالمعلومات القيمة والمصطلحات العلمية الفيزيقية منها والميتافيزيقية. بعض الأصوات طلبت من المؤلف إصدار موسوعة خاصة بالمصطلحات والتعريفات الخاصة بالأساطير والظواهر الخارقة للطبيعة، وكانت الاستجابة من خلال «دار ليلى» للنشر والتوزيع اللي تعاونت مع المؤلف أكثر من مرة في إصدارات مختلفة، وبقى بين أيدينا أول موسوعة متخصصة في الماورائيات ومصطلحاتها والشخصيات والكيانات الأسطورية المرعبة. كلمة موسوعة مش دقيقة قوي في وصف الكتاب لأنه أشبه بقاموس مصطلحات مع شرح وتعريف في فقرتين أو ثلاثة للكلمات، وفكرتنا عن الموسوعة دائمًا أن معلوماتها بـ تكون وافية ودقيقة جدًا، بس ده مش الحال مع الكتاب اللي عدد صفحاته لم يتجاوز الـ180 صفحة، والغريبة أنه بدون أي تقديم أو غلاف خلفي يكون فيه تعريف بالكاتب وبمضمون الكتاب، بـ مجرد ما تفتح أول صفحة وبعد تقديم دار النشر والقائمين عليها هـ تلاقي صفحة حرف الألف وبعدها كل أسماء الشياطين والمسوخ اللي بـ تبدأ بالحرف ده. وده يخلينا نسأل عن ملابسات إصدار كتاب لمؤلف بحجم دكتور أحمد ودار نشر زي «دار ليلى» من غير أي مقدمات أو إهداءات. الكتاب بـ يضم أكثر من 100 مصطلح واسم وتعريفاتهم والحقيقة وراء الأسطورة منبع الاسم، ومن أهم المحتويات أسماء شياطين العالم السفلي كما يسميهم المؤلف ونبذة عنهم زي: أبراكساس، بعلزبول، لوسيفر، أزيموديوس وبلفيجور، كلها أسامي تخوف أساسًا ومش محتاجة تعريف علشان نترعب منها، وفيه أسماء أهم شخصيات تاريخية ارتبط اسمها بالرعب أو الغموض منهم ممثلين أفلام رعب غرباء الأطوار زي «لون تشاني – Lon Chaney» و«فنسنت برايس – Vincent Price» ومؤلفين وشعراء زي «كليف باركر – Clive Barker » و«إدجار آلان بو – Edgar Allan Poe» و«عبد الله الحظرد» وأسماء أشهر السحرة وكتب السحر في التاريخ، فيه كمان تعريفات لمصطلحات زي «الاسترفاع» و«الودونية» و«هرمجدون». وطبعًا لازم الجانب الأنثوي فعرّفنا المؤلف بشخصيات زي: لاميا، ليليث، الثقوبة، ماري شيلي والأخوات فوكس. كل المصطلحات والأسماء باللغة العربية حتى لو أصل الكلمة لاتيني أو غربي، وترتيب الفهرس بالأبجدية العربية، ومسميات وأساطير قليلة قوي هي اللي أصلها عربي أو مصري زي «أم الشلاشل» و «تحوت» الفرعوني و«العزيف». القاموس كان ممكن يبقى موسوعة فعلاً لو كان اهتم بالتفاصيل أكثر، ومش عارفين إذا كان فيه معلومات أكثر ممكن تُقال عن الأساطير دي ولا هي دى كل المعلومات الأكيدة المتوفرة عنها وباقي الأسطورة ممكن يبقى كذب أو خيالات وفنتازيا. في الآخر الكتاب يعتبر مرجع جيد للنوع ده من التعريفات -للي غاوي طبعًا- وممكن تجيب أي معلومة من خلال الإنترنت لو الشرح مش كافي في الكتاب، وعلشان كده كل المصطلحات مكتوب اسمها جنبها بالإنجليزية لراغبي البحث والتدقيق. فيه جزء ثاني من الموسوعة صدر مؤخرًا عن نفس دار النشر باسم «موسوعة الظلام» الجزء الثاني وموجود حاليًا بالمكتبات. *الميتافيزيقا: فرع من فروع الفلسفة التي تبحث في المبادئ الأولية للعالم "ما وراء الطبيعة"

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن