دليل كتب القاهرة - أحدث المقالات عن الكتاب العرب ومؤلفاتهم

كتب

هامش للديمقراطية فى مصر: المتن والهامس
اصدرت في: 04/05/2014

المتن والهامس: أيوه مش غلطة ولا حاجة.. عارف أن المشهور فى كل الأوساط الكتابية "المتن والهامش" بس قاصد المتن والهامس.. لازم نبص على فكرة العنوان عند حمزاوى فى الهامش البسيط اللى الديمقراطية واخدة حريتها فيه داخل أرض الكنانة.. علشان كده سمى الكتاب "هامش للديمقراطية".. وإحنا سميناه الهامس لأنه بـ يهمس جوه كل أذن مصرية حقيقية خلوا بالكم الرعب سطر حروف الكون.. الديمقراطية مش متن حياتنا أصبحت "هامش". يعنى إيه ديمقراطية: شوية تعريفات بسيطة كده لازم نفهمها وإحنا بـ نتعامل مع د. حمزاوى.. الديمقراطية باختصار سلوكك فى الحياة، أنك تحترم نفسك الأول، وبعدين تحترم الثانى اللى بـ يكلمك ومختلف معاك.. وبعدين تحترم رأى المجتمع واختياراته.. وأن كل الناس زى بعض.. وده بـ ييجى بحاجتين: سيادة القانون وتكافؤ الفرص. الاختيار والليبرالية: ما تقلقش من الكلام الكبير، الاختيار أنك تتعامل بإرادتك –من غير ضغوط- والليبرالية هى أن يكون لك حرية الاختيار أصلًا "الحرية الفردية يعنى" لكن فى ظل وعيك بالمجتمع ومبادئه.. يعنى حريتك مرتبطة بحرية الآخرين –مش كده ولا إيه–؟ ولا إيه: رجل 1: ولا أنت ناوى تكتب عن مصر واللى حصل فيها. حمزاوى: أيوه لازم الناس تفهم. رجل 1: يعنى هـ تغير الكون أنت؟ حمزاوى: مش لازم نغير الكون لكن على الأقل الكون ما يغيرش مبادئنا. رجل 1: وأنت فاكر المقالات والكتب هـ تغير حاجة من واقعنا. حمزاوى: أكيد الوعى بـ يبدأ من الناس وده المهم. رجل 2 (قاعد وسامع الحوار): مسير الناس تعرف.. وإحنا قاعدين. مسير الناس تعرف: لو تكلمنا عن الكتاب وطريقة عرض حمزاوى له فلازم نقول: أولًا: حمزاوى بـ يمتلك لغة "رائقة" وهى اللغة اللى من السهل جدًا توصل لك من غير تعب.. وده مرتبط بامتلاك الكاتب للغة بشكل جيد، وقدرته على التعبير عن موضوعه بأقصر الطرق. ثانيًا: بعض المواقف كانت خارج السياق الزمنى ولها خصوصية فى وقتها، لكن حمزاوى قرر يذكرها علشان التتابع التاريخى للأحداث من أول المرحلة الانتقالية وصراع العسكر والإخوان واختلال الحياة السياسية عامة بعد 2011. ثالثًا: عمرو حمزاوى ما بـ يغيرش رأيه وده مهم للكاتب جدًا خاصة وأنه اختار مرحلة تخبط كبيرة.. وناس كثير من 2011 حتى 2013 غيروا جلدهم بدل المرة ألف.. لكن حمزاوى استمر فى المنافسة مع ذاته وكتب الأسباب الستة لديمقراطية الدعوة إلى الانتخابات الرئاسية المبكرة 2013. خاتمة: لو ما قريتش الكتاب كله.. لازم تقرأ الخاتمة لأنها تنظير لفكرة الكتابة السياسية.. وارتباطها بالوعى الإنسانى.. واعتبارها فعل تنويرى للمجتمع بكل طوائفه.. عمرو فى الخاتمة بـ يلعب على جلد ذاته.. ووضع قواعد عامة للى عاوز يكتب سياسة ويهتم بالشأن العام.. لكل الناس يمينى ويسارى ومتطرف وليبرالى وديمقراطى واشتراكى وثورى (مسيس أو غير) اقرأوا الديمقراطية واجعلوها سلوك حياتى تنعموا بحياة أطول من الحب والتقبل.

...

جنة الإخوان (رحلة الخروج من الجماعة): رحلة وجع ومعرفة
اصدرت في: 21/06/2013

شفتم مسلسل الجماعة؟.. إيه رأيكم فيه؟ جاب كل الحاجات اللى نعرفها عن الجماعة ولا لأ؟ طيب بصوا بقى مسلسل الجماعة كان مسلى صراحة مع أنه جاء فى رمضان والناس صايمة وكده.. بس المعلومات اللى فيه كانت فاتحة خير على الناس اللى بـ تكتب عن الجماعة لأنهم بدأوا ينشقوا عنهم ويخرجوا منها وطبعًا كان الخروج الكبير والكتاب اللى كسر الدنيا وعمل طبعات كثير "سر المعبد" لثروت الخرباوى وعلى نفس الفكرة بـ يقدم لنا ثروت الخرباوى واحد جديد من جماعة الإخوان بـ يخرج منها وبـ يتكلم عن مشاهد كثير قوى تعالوا نشوف مع بعض.. سامح فايز شاب إخوانى صميم قرر يخرج من الجماعة ويقول لنا ليه خرج فى رحلة طويلة مليانة مشاكل وحفر وحاجات غريبة، بصوا بقى السلبية اللى هـ تتاخد على سامح هو استخدامه تقريبًا لنفس طريقة ثروت الخرباوى.. لكنه بـ يحكى بشكل مختلف وإيييه ذكريات بقى. الذكريات بـ تبدأ معاه من أيام ثورة يناير من بداية القعدات اللى كانت بـ تجمعه بالشباب على قهوة البستان أيام التحرير والثورة والسؤال الأزلى: أنت ليه خرجت من الجماعة؟.. فى الأول كان بـ يهرب من الإجابة، عارفين ليه؟.. على اعتبار أنهم كانوا إخوة فى وقت من الأوقات وأنه كان لازم يحافظ على سر الجماعة اللى كان جواها لكن الموضوع اختلف لما قرر يعرف الناس طريقة العمل. آه يا جماعة من طريقة عمل الجماعة، هو بـ يحكى لنا ما يشبه المذكرات بلغة سهلة رقيقة فى وقت وشديدة وقت ثانى على حسب الموقف وعلى حسب انفعاله.. على فكرة سامح بـ يظهر انفعاله قوى فى كتابته.. بـ يظهر فى اختياره لطريقة الحكي ووصفه للمشهد.. بـ يبان لما يحكي عن الهدف الحقيقي –زى ما بـ يقول – وراء الأذكار والأوراد اللى كان شيخه بـ يعطيها له.. فايز بـ يقول أن السبب وراء اهتمام الجماعة بكل الكتيبات والأذكار دى هو حاجة واحدة... هاه فكروا معانا إيه هى الحاجة دى؟ لأ غلط مش أنه يبقى شيخ خالص.. الحاجة دى هى أنه باختصار يبقى مطيع جدًا.. وبـ يربط بين حاجات كثير ببعض زى مثلًا وجهة نظر الجماعة فى العسكرية.. هما شايفين أن العساكر والجنود لازم يكونوا آلات ما عندهمش قدرة على الإبداع والتفكير لأنهم لو أبدعوا ممكن يكونوا خطر على مدنية الدولة. حاجات كثير هـ تعرفها فى الكتاب وفى الرحلة الطويلة اللى قضاها سامح فايز فى الجماعة عن دين الإخوان وعن كفر غطاطى وعن مدرسة الدعوة، هـ تعرفوا كتير بس ابقوا اقرأوا الكتاب.

...

طبائع الاستبداد ومصارع الاستعباد: بالدقيقة والبريزة والمتر واللتر والرطل أوزنوه ذهب
اصدرت في: 22/01/2013

ده مش عرض لكتاب ويعدى، أو بمعنى ثانى ده مش مجرد عرض أو مقال نقدي، نحكى لكم عن تجربتنا مع الكتاب أو إيه اللى عاجبنا فيه أو قدرة الكاتب أو......بصوا بقى من الآخر إحنا بـ نعرض الكتاب ده لأنه بالفعل يستحق العرض ولأن ده توقيته بالدقيقة والبريزة والمتر واللتر والرطل وخطوط الطول ودوائر العرض وكل المقاييس العالمية، إحنا هـ نقول لكم عن فكرة الكتاب بس والباقى هـ يبقى جمل من عند الكواكبى، آه الكواكبى اللى هو صاحب الكتاب أو صاحب الفكر العبقرى، أو صاحب أشهر جمل ضد الظلم، النهارده هـ نتكلم عن "طبائع الاستبداد ومصارع الاستعباد".عبد الرحمن الكواكبى بعد بحث استمر 30 سنة قرر يكتب للشباب فى بداية سنة 1900، عن الاستبداد اللى هو الظلم الواضح أو تقدر تقول أنه الانفراد بالرأى، وكما أن لكل نبأ مستقر، فقد استقر فكر الكواكبى على الكلام عن السياسة وعن تعريفها وعلاقة الاستبداد بالدين والعلم والتربية والمجد والمال والأخلاق والتربية والترقى، وأخيرًا إزاى نتخلص منه، هى دى فكرة الكتاب لكن كل ده مش مهم، المهم هو الرجل ده تكلم فى اللى فات إزاى هنا، المهم أن الرجل ده قرر يعمل كتاب يخلص العالم من الشرور، كتاب يقول للناس يعنى إيه مستبد ويعنى إيه ظالم.الكتاب بـ يتكلم عن أشكال ظلم كثيرة وممكن تكون فى أى عصر، يعنى بـ يتكلم عن أن الاستبداد ممكن يكون عن طريق المال، والغنى يقدر يستبد بفلوسه على الخلق والناس ويحاول يتحكم فيهم باستخدام نفوذه اللى أتى به عن طريق المال، وفيه استبداد الدين بمعنى أن بعض علماء الدين ممكن يساعدوا الحاكم على الظلم بتفسير نصوص الدين تفسيرات خاطئة ويضلوا الناس علشان يفضلوا تحت تأثير الحاكم، وبـ يتكلم عن علاقة الاستبداد بالأخلاق ولما الأخلاق بـ تنهار بين الناس وتختفى الأخلاق الحسنة فى الشعوب وقتها لازم الاستبداد يظهر برأسه، لأن الأخلاق الحسنة هى اللى بـ تصنع شعب قادر يحارب الظلم، شعب يمتلك العزة ويبتعد عن الظلم.لغة الكواكبى رغم أنها بعيدة عن وقتنا اللى عايشينه إلا أنها لغة راقية.. لغة عالم عنده وعيه الخاص بالكلمة فاهم إمتى يستخدم التصوير، وإمتى يستخدم المصطلح، وإمتى يستخدم جملة معبرة بأسلوب أدبى أو أسلوب علمى، وبـ يلخص فكرة الاستبداد لما بـ يقول:"منشأ الاستبداد هو كون الحكومة غير مكلفة بتطبيق شريعة أو إرادة الأمة، أو تكون مقيدة باللى فات لكنها تقدر تتجاوزه بنفوذها، إن المستبد لا يخاف من العلوم إجمالًا لكن من العلوم التى توسع العقول، وتعرف الإنسان ما هو الإنسان".

...

أصدقاء إسرائيل فى مصر: ودى مش تهمة
اصدرت في: 02/01/2013

"أصدقاء إسرائيل فى مصر" كتاب سياسى بـ يقدم دراسة عن الشخصيات العامة المصرية اللى تعاملت مع إسرائيل فى إطار التطبيع اللى تم الاتفاق عليه بين مصر وإسرائيل وده مش اتهام بالخيانة ولا حاجة، وعلشان كده الكاتب بدأ الكتاب بتعريف مفهوم التطبيع ومظاهر خطورته، وبـ يقول أن التطبيع هو تحويل الشيء الشاذ وغير المألوف إلى شيء طبيعى وعادى، زى تحول العلاقات المصرية الإسرائيلية من علاقة عداء وحرب إلى علاقة ودّ وتعاون، وده طبعًا بعد معاهدة السلام. أما عن خطورة التطبيع بقى فبـ يقول أن التطبيع مع إسرائيل أعطاها فرصة علشان تؤسس دولتها فى فلسطين من غير ضغوط من أكبر عدو بالنسبة لها وهو مصر، بل بالعكس دى استفادت اقتصاديًا وسياسيًا كثير بعد الاتفاقية لأن جزء كبير من تركيزهم فى الحرب اتجه إلى بناء دولة إسرائيل فى أمان.بعد كده بدأ الكاتب يتكلم عن الشخصيات المصرية اللى بـ تتعامل مع إسرائيل وهم حوالى 32 شخصية، ومن أهم الشخصيات دى: "أسامة الباز" و"يوسف والى" و"أنيس منصور" و"فاروق حسنى" و"مفيد شهاب" و"إيهاب نافع" و"عادل إمام" و"حسين سالم" و"أحمد زويل". وعن أسامة الباز بـ يقول الكاتب أنه كان من أول الناس اللى شجعوا السادات على زيارة الكيان الصهيونى والتصالح معه وعلشان كده حظى بثقة السادات وخلاه يشاركه فى المفاوضات مع إسرائيل حتى أن الباز هو اللى كتب خطبة السادات اللى ألقاها فى الكنيست، ولما السادات عين حسنى مبارك نائب له طلب من أسامة الباز أنه يفيده بخبرته السياسية ولما تولى مبارك الحكم عين أسامة مستشاره السياسى وكان بـ يصدره فى التعامل مع إسرائيل لإنهاء أى أزمة، حتى عن السفير الإسرائيلى ديفيد سلطان فى مذكراته ذكر أسامة الباز وقال عنه: "رؤية متزنة ومعتدلة تخلو من الاندفاع العاطفى، وكان من الذين يعتقدون أن التعاون مع إسرائيل فى صالح مصر، وتدخل فى عدة مناسبات لتحسين العلاقات مع إسرائيل".أما الحديث عن يوسف والى فى الكتاب هـ نلاقى الكاتب قبل أى حاجة كاتب الجملة اللى قالها يوسف والى فى وداع السفير الإسرائيلى موشيه ساسون واللى بـ يقول فيها بالنص: "أننا نودع اليوم السفير الذى عمل دون توقف من أجل التآخى بين الفلاح المصرى والفلاح الإسرائيلى" وده طبعًا بـ يدل بوضوح على حرص يوسف والى على التطبيع الزراعى مع العدو الصهيونى.ويظهر الحرص ده أكثر لما عزم يوسف والى السفير الإسرائيلى موشيه ساسون فى مكتبه يوم العطلة على فنجان شاى وفوجىء ساسون أن يوسف والى أعد له حفل وداع ضم كبار موظفى وزارة الزراعة وعشرة من السفراء الأجانب.ومن الشخصيات الهامة اللى عرضها الكتاب وتكلم عن تعاونها مع الكيان الصهيونى العالم المصرى أحمد زويل، وبدأ الكاتب كلامه بأن أحمد زويل له مقولة شهيرة وهى "العلم لا وطن له" وبـ يقول أنه دائمًا بـ يرد بالجملة دى على كل اللى بـ يستنكروا زيارته إلى إسرائيل وإلقاء محاضرات بالجامعات الإسرائيلية، وفى الحقيقة هو ما عملش حاجة أكثر من التطبيع، ومن زاوية أخرى لازم نأخذ بالنا أن العالم المصرى أحمد زويل بـ يحمل الجنسية الأمريكية وأن أمريكا هى اللى ساعدته على تكوين مكانته العلمية ومن الطبيعى أن لما أمريكا تطلب منه إلقاء محاضرات فى جامعات إسرائيل أنه يوافق لأنها صاحبة فضل عليه فى الاهتمام به وبعلمه.نعتقد أنكم تشوقتم لمعرفة باقى الشخصيات وإزاى الكتاب تكلم عنهم، هـ نسيب بقية المفاجآت والشخصيات أنتم تتعرفوا عليها من خلال الكتاب وعلى فكرة الكتاب مكتوب بطريقة سهلة وشيقة جدًا تخليك ما تسيبهوش غير لما تخلصه.

...

100يوم من الثورة: لما شعب يصنع تاريخ المستقبل
اصدرت في: 24/09/2012

كتاب من كتب كثييييير تكلمت عن الثورة، والكتب دي فى الغالب كانت راصدة لأحداث الثورة، وبـ تحاول تفهم إيه اللى حصل، والكتاب ده من ضمن الموضوع الكبير اللى اسمه الثورة، لكنه بـ يبدأ من قبل كده بشوية، بـ يبدأ من قبل الثورة.الكتاب زى ما بـ يقول الكاتب الصحفى "أحمد عبد العليم" محاولة من أجل التأريخ والتوثيق، وهدفه عدم ضياع الثورة المصرية فى 25 يناير، وزى ما حصل فى تاريخنا الحديث، وهى شهادة تحمل كثير من المشاهد.الكتاب بـ يحاول تقديم 3 مراحل متعلقة بثورة 25 يناير، الأولى ما قبل الثورة، وفيها بـ يوصف قد إيه مصر وصلت لمرحلة ما وصلتش إليها قبل كده من الانفجار وهو بعنوان "مصر قبل 25 يناير" وهو عبارة عن مجموعة مقالات نشرت للكاتب قبل الثورة بـ 3 أشهر، وفيها بـ يحاول يعرض مصر كانت عاملة إزاى وده كان من وجهة نظره بالطبع، واللى ملخصها أن كل الأحداث اللى مرت بها مصر فى الفترة دى كانت لازم تبقى مقدمات ثورة، لأن مصر كانت عايشة على حافة الانفجار، خاصة أن النظام المصرى كان بـ يتعامل مع مطالب المصريين بنوع من التعالى والاستهزاء، وطبعًا شوفنا وعيشنا كلنا المرحلة دى وشوفنا موضوع تفجير كنيسة القديسين، ومحاولة إشعال الفتنة بين المصريين وبعضهم، السؤال اللى كان لازم يدور فى أذهاننا جميعًا هل فعلًا كنا على حافة الثورة، ولا الموضوع بدأ كده دون مقدمات؟ سؤال هـ يفضل يحير علماء المجتمع والسياسة فترة طويلة من الوقت، ويمكن الأجيال اللى بعدينا تلاقى الإجابة.الجزء الثانى من الكتاب، بعنوان "25 يناير .. مصر تصنع تاريخ المستقبل" هى محاولة للكتابة عن ثورة 25 يناير زى ما عاشها الكاتب، هى حكاية شعب قرر ينتفض، حكاية 18 يوم كانت مصر فيها عايشة كمدينة فاضلة، كان الميدان هو اليوتوبيا، هو المكان اللى فيه كل حاجة حلوة، الناس بـ تساعد بعضها، حالة من المحبة والاطمئنان والشعور بمعنى كلمة وطن، حاجات ما ينفعش تتوصف، لكنها بـ تتحس فقط لو عيشت فى الميدان فى الـ 18 يومن زى ما بـ يقول الكاتب: "رسمت مصر لوحة أبهرت العالم أجمع".أما الجزء الثالث والأخير فى الكتاب جاء تحت عنوان "مصر بعد ثورة 25 يناير" وهو عبارة عن مجموعة مقالات بـ تتكلم عن مائة يوم من الثورة، تكلم فيها عن الفريق "شفيق"، عن الحالة الاقتصادية للبلد، عن الدستور، عن اللى بـ يحصل على الإنترنت واللى بـ يحصل على أرض الواقع.اللى حصل فى الثورة أكبر من أنه يتوصف، الحدث أكبر وأعظم وأرقى من أن تحتويه كلمات، أو تحويه أوصاف لكن الكتاب محاولة من ضمن محاولات لها ما لها وعليها ما عليها.

...

حدائق الأحزان: إيران و"ولاية الفقيه"
اصدرت في: 21/09/2012

إزاى تفهم السياسة الإيرانية، وازاى قدرت نظرية "ولاية الفقيه" تحكم إيران بنفس المضمون من أكثر من ربع قرن، الدكتور مصطفى اللباد شايف أن فهم السياسة الإيرانية الحالية لا يكتمل إلا بفهم نظرية "ولاية الفقيه" وفهم أساسها التاريخى والفكرى، وموقعها من التراث الشيعى التقليدى.كمان بـ يكلمنا الكتاب عن التيار الإصلاحى فى إيران وتأثيره على التوازن السياسى والاجتماعى، وبـ يحلل قضية إبعاد التيارات السياسية المختلفة عن الحكم.إيران بلد فريد فى كل شيء، جغرافيته وتاريخه وموقعه الاستراتيجى، وهو أصل واحدة من أقدم الحضارات الإنسانية وهى الحضارة الفارسية، وإيران مرتبطة بالعرب بصلات كثيرة، وعلى الرغم من ده المعرفة المتبادلة بين العرب وإيران غير مكتملة، لو تمت مقارنتها بمعرفة العرب بالغرب مثلاً، وإيران متميزة بالعديد من الأشياء زى تراثها وتاريخها الفلسفى والصوفى، والكتاب ده بـ يتكلم عن "ولاية الفقيه" النظرية اللى صنعت واقع إيران السياسى من أول ثورة إيران عام 1979، الثورة اللى تعتبر حدث مميز فى تاريخ القرن العشرين لأنها أطاحت برمز قوى وهو الشاه، وثبتت مكانه فكرة وليس شخصًا.كثير من النظريات اللى تكلمت عن ولاية الفقيه، واللى هى فى الأساس ربط ما بين الدين والسياسة، فالولاية معناها تولى الأمر واختيار فكرة محددة لنصرتها، والفكرة هنا هى الفقيه، الفقيه اللى أخد ولايته ونصرته من الرسول والأئمة من بعده وهم فى الفكر الشيعى 12 إمام واللى بـ يعتبروا خلفاء الرسول، من أول سيدنا على إلى الإمام 12، ومن بعده انتقلت الولاية من الخلفاء الصالحين إلى الفقهاء، فكانت "ولاية الفقيه".الكتاب بـ يبدأ من الأساس التاريخ للتشيع، ويكلمنا عن علاقة الفقهاء بالدولة الشيعية، وبعدين بـ يفسر معانى "ولاية الفقيه"، وينتقل بنا إلى التطورات السياسية فى إيران، وفيه فصل كامل بـ يتكلم عن نقل السلطة بعد وفاة الإمام الخمينى إلى السيد على خامنى، ويبحر بنا فى عالم الرئيس السابق محمد خاتمى ودوره فى تطوير الخطاب الدينى، والتوازنات السياسية فى إيران، علشان يوصل بنا إلى مفهوم "جمهورية إيران الإسلامية.

...

دساتير مصر: من دستور 82 إلى الإعلان الدستورى
اصدرت في: 03/09/2012

ده مش أى كتاب، ده كتاب لازم يكون عند حضرتك لو أنت ناوى تصبح مثقف سياسى، ولا بلاش مثقف دى، لو حضرتك ناوى يبقى لك فى السياسة، تعرف ليه؟ لأن ما ينفعش تتكلم فى السياسة من غير ما تبقى عارف مصر كانت بـ تعمل دساتير إزاى، وطبعًا هو بـ يتكلم عن كل الدساتير اللى اتعملت فى مصر وبـ يبدأ الكلام من أول دستور مصرى اتعمل فى الدولة الحديثة بعد تعب وجدال فى فبراير 1982 واللى اشتهر باسم دستور 1982، الكتاب صادر عن الهيئة العامة لقصور الثقافة، فى طبعة جيب متوسطة الحجم لكنها مميزة لأن بداخلها جوهرة مصر. الدستور الأول فى مصر الحديثة كان فى عهد الخديوى توفيق، وهو اللى فتح الطريق بعد كده للدولة الحديثة فى مصر أنها تأخذ مكانتها فى صف الدول الديمقراطية صانعة الدساتير. لكن دوام الحال من المحال، لما دخل الاحتلال البريطانى مصر ألغت سلطة الاحتلال دستور 82، وجردت مصر من دستور اللى كان وضعه شعب مصر الواعى، وفضلت مصر تقريبًا أربعين سنة فى ظل حكم استبدادى لحد ما قدر الشعب يعمل دستوره الثانى فى 19 أبريل 1923، وهو الدستور اللى تم على أساسه أول برلمان للشعب المصرى فى 15 مارس سنة 1924. وتوالت الدساتير بعد كده دستور 1930، والإعلان الدستورى لثورة يوليو 1952، دستور 1956، دستور 1958، دستور 1964، دستور 1971، التعديلات الدستورية فى 2007، والإعلان الدستورى الصادر فى 13 فبراير 2011، والإعلان الدستورى الصادر فى 30 مارس 2011، بعد ثورة يناير. وطبعًا من الصعب نتكلم عن المواد المتشابهة فى كل الدساتير دى، لكن خلونا نقول بعض الأبواب الأولى فى الدساتير المصرية: دستور 1923: الباب الأول: مادة 1: مصر دولة ذات سيادة وهى حرة مستقلة، ملكها لا يجزأ ولا ينزل عن شئ منه، وحكومتها ملكية وراثية وشكلها نيابى. دستور 1964: الباب الأول: مادة1: الجمهورية العربية المتحدة دولة ديمقراطية اشتراكية، تقوم على تحالف قوى الشعب العاملة، والشعب المصرى جزء من الأمة العربية. دستور 1971: الباب الأول: مادة 1: جمهورية مصر العربية دولة نظامها اشتراكى ديمقراطى يقوم على تحالف قوى الشعب العاملة، والشعب المصرى جزء من الأمة العربية يعمل على تحقيق وحدتها الشاملة. دستور 1971 (بعد تعديلات 2007): الباب الأول: مادة 1: جمهورية مصر العربية دولة نظامها ديمقراطى يقوم على أساس المواطنة. والشعب المصرى جزء من الأمة العربية يعمل على تحقيق وحدتها الشاملة.

...

سبع ليالى سلف على القهوة: سلاح التلميذ فى كى جى تو
اصدرت في: 14/07/2012

مقدمة الكتاب أكثر شيء جاذب لقراءته، الكاتب بـ يصور القهوة على أنها انعكاس للى بـ يدور فى "مطبخ" الحياة المصرية، كل اللى بـ يهم الناس بـ يقولوه مع بعض ع القهوة اللى هى بـ تعتبر متنفس كل الفئات الطبقية والمجتمعية، ودى كانت أفضل حاجة وردت خلال الكتاب. "سبع ليالى سلف" بـ يتكون من 7 فصول اللى هما الـ 7 ليالى: "يعنى إيه سلف"، و"العلمانية حرام"، و"يعنى إيه علمانية"، و"العلمانية مش حرام"، و"الديموقراطية حرام"، و"يعنى إيه ديموقراطية"، و"الديموقراطية مش حرام". بـ يبدأ الكتاب بحوار سطحى بين الأستاذ محمد "بطل الحكى فى الكتاب" وبين حمادة "القهوجى" عن السلفيين والاستبشار بوجودهم وأنهم باين عليهم كده ناس كويسين، وده اللى دفع الأستاذ محمد أنه يرجع يقرأ عن السلفيين والعلمانيين "اللى بـ يقولوا عليهم كفرة" علشان يتمنظر باللى بـ يقرأه أمام الواد حمادة لما ييجى يشرح له الكتب اللى يقرأها (ده زى ما قال أستاذ محمد) وكمان علشان يبرر لحمادة هو ليه كاتب على الفيسبوك أنه علمانى، يعنى هو كتب على الفيسبوك علمانى وبعدين قال أنه هـ يقرأ كتب علشان يشرح لحمادة يعنى إيه سلفية وعلمانية وديموقراطية وهو ليه علمانى، ونعتقد دى أسوأ صورة ممكن تتصدر عن العلمانيين ولا يصح أنها ترد فى الكتاب حتى ولو من باب الدعابة اللى اتكأ عليها المؤلف أكثر من اللازم. الكتاب بـ يتكلم بالعامية المصرية وبشكل طفولى كأن حمادة القهوجى ده عنده 12 سنة مش أكثر، ويشبه لحد كبير كتب التاريخ المدرسية فى أنه بـ يتكلم عن "خصائص" العلمانية والديموقراطية وبـ يرتبها في نقط وبعدين فجأة بـ يصنفها ج و د، وفى آخر كل فصل من فصول الكتاب بـ يسأل حمادة القهوجى إيه اللى استفدته النهارده من كلامنا يا حمادة؟ فيرد يا حمادة "في نقط برضه" عرفت كذا وكذا، ولما يبدأ فى شرح مفهوم من المفاهيم بـ يتكلم بطريقة: "وده بقى يا حمادة اللى هـ نعرفه مع بعض النهارده.. يلا بينا". محمد مختار بـ يقول أن المسيحية دين روحانى ينظم العلاقة بين الله والعباد لكنه لا يهتم بالعلاقة بين العباد وبعض، وده مش صحيح لأن الإنجيل مثلاً بـ يقول "إذا ضربك أحد على خدك الأيمن أدر له خدك الأيسر" فى دعوة للحث على التسامح بين العباد، وعند الحديث عن الديموقراطية بـ يقول كان فيه أكثر من حادثة بـ يقولوا فيها عاوزين البلد ديموقراطية منها: كذا جمعية من جمعيات المجتمع المدنى قعدوا يطالبوا بالديموقراطية! كمان الكتاب فيه عدد من الأخطاء اللغوية لا بأس بها لكن لما يقول الكتاب على لسان فرعون "ما علمت لكم ما إله غيرى" بدلاً من "ما علمت لكم من إله غيرى" دى غلطة مش عادية لأن الغلط يخص نص قرآنى. وطبعًا فى ختام الكتاب بعد الفصل السابع طلب الأستاذ محمد من حمادة أنه "يفكره بقى بكل اللى طلع به من أول ليلة لسابع ليلة يعنى من طقطق لسلامو عليكم".. وللأسف نسى الأستاذ محمد أنه يشكر حمادة القهوجى اللى سأله فى الليلة الأولى وخلاه يروح يقرأ وييجى يحكي لنا السبع ليالى.

...

نهاية جماهيرية الرعب: كتاب توثيقي عن فظائع القذافي في ليبيا
اصدرت في: 27/02/2012

"بيت بيت.. دار دار..زنجة زنجة".. كلنا ضحكنا على معمر القذافي، وعلى خطاباته المضحكة وشخصيته المهرجة، لكن في الحقيقة القذافي مش شخصية دمها خفيف نضحك عليها وعلى خطاباتها فقط، لأن الضحك له حدود لما يتعلق بالدم، والأرواح اللي أزهقها القذافي، في الوقت اللي كنا بـ نضحك على خطاباته بسذاجة مش قليلة، لو دورنا على البلاوي اللي عملها هـ نتخض من كم الجرائم والفظاعة، وهـ نعرف يعني إيه كلمة مجرم. في كتابه "نهاية جماهيرية الرعب" بـ ينقل لك الكاتب الصحفي اللبناني "حسن صبرا" صورة واقعية حية للي كان القذافي بـ يعمله في ليبيا وأهلها، الموضوع بالنسبة لهم ما كانش مضحك ولا مسلي أبدًا، والليبيين ما كانوش بـ يموتوا في الثورة وبس، اللي ماتوا قبل الثورة بسبب جرائم القذافي وراحوا ضحية سفاهته أكثر من اللي راحوا فداء الثورة. قصة من القصص البشعة اللي ممكن تقرأها في الكتاب حكاية الـ 1270 ضحية اللي قتلهم القذافي من كل أنحاء ليبيا في سجن أبو سليم بطرابلس، وبعدين حاول يعوض أهالي الضحايا ويشتري سكوتهم من خلال دفع ديتهم، في ناس وافقت وقبلت، لكن فيه ناس رفضت، وقالت لأ مش هـ نأخذ مقابل لدم أولادنا، دول كانوا كثير، أغلبيتهم في مدينة بني غازي، اللي انطلقت منها الثورة الليبية، واللي كثير ما يعرفوش أنها أكثر مدينة ما كانش بـ يحبها القذافي، لأنها خرج منها محاولات كثيرة جدًا لاغتياله والانقلاب عليه والاعتراض على أعماله غير المفيدة لليبيا. الكتاب صادر عن الدار العربية للعلوم ناشرون، ودي دار نشر لبنانية، اختارت أنها تنشر للصحفي اللبناني "حسن صبرا" اللي بـ يملك من المصادر يخليه يقدر يقدم معلومات كويسة في كتابه، ناهيك عن أنه قدر يحاور القذافي قبل كده، ومن خلال 17 فصل هـ تلاقي نفسك وسط معلومات ومغامرات هـ تعرفك حاجات كثيرة عن ليبيا وهـ تخليك تحبها، الكتاب غني وفيه دراسات وملاحق حلوة جدًا معلوماتها مفيدة. شخصية القذافي كانت شاذة جدًا، ما سلمش منها صديق أو عدو، كان بـ يتسلى بقتل أو تعذيب أو مضايقة اللي يعرفهم، فمثلا سنة 1969 دبر حادثة قتل للي راكبين الموتوسيكلات المرافقة لموكبه لمجرد التسلية علشان يتفرج عليهم ويتسلى، المقربين من القذافي كانوا عارفين أن الدم بـ يستهويه، وأنه كان بـ يفرح لما يسمع خبر تصفية معارض ليبي أو يشوف صورته وهو بـ يموت. الأمر مش متعلق بجرائم دموية وشذوذ أخلاقي فقط، الموضوع متعلق بشذوذ فكري، فمثلاً القذافي ما كانش بـ يحب أي نجوم في ليبيا غيره، سببه المعلن أن الناس يكونوا سواسية، والحقيقي أن ما يبقاش فيه نجوم غيره في ليبيا، وبالفعل عمل ده مع كل الناس، بداية من الوزراء اللي الشعب عمره ما عرف اسم حد فيهم، اللهم صفتهم يعني يُقال مثلاً قام وزير البترول بكذا وقام وزير الإسكان بكذا.. وهكذا، وفي نشرة الأخبار كانوا المواطنين الليبيين يسمعوا الآتي: قام الأخ قائد الثورة الفاتح العظيم الأخ المفكر معمر القذافي باستقبال أمين اللجنة الشعبية العامة (رئيس الوزراء في أي مجتمع) بدون ذكر اسمه، فلا اسم لمذيع أو مدرس، أو فنان، الصفة فقط، ووصل الأمر للرياضيين، فهم مجرد أرقام، مش كده وبس، ده كان كمان فيه إدارة خاصة في جهاز الأمن الداخلي لملاحقة أي مخالفة والقضاء عليها فورًا. الكتاب كله مآسي وقصص مؤلمة، لكن هـ تخليك تعرف يعني إيه نظام قمعي ظالم.

...

حزب الكنبة: رحلتي من الكنبة إلى الميدان
اصدرت في: 02/01/2012

طبعًا ناس كثير عارفين مصطلح "حزب الكنبة" اللي انتشر أيام الثورة بشكل ملحوظ واستمر للحظة الحالية لغاية ما بقى مصطلح دارج جدًا ومستخدم بكثرة، عزت أمين مؤلف الكتاب هو اللي ابتكر المصطلح في مقال كتبه ونشره على صفحته الخاصة على الفيسبوك في فبراير 2011 بعد تنحي مبارك وبعد عدة مدونات ومقالات على شبكة الإنترنت قرر أنه يصدر أول كتاب له بعنوان «حزب الكنبة (رحلتي من الكنبة إلى الميدان)»، بـ يحكي فيه عزت بشكل موجز ومبسط عن آراءه السياسية فى أحداث حصلت فى مصر سواء قبل الثورة، أثناءها وبعدها. الكتاب بـ ينقسم إلى جزئين: الأول بـ يحكي سريعًا عن حال مصر قبل الثورة ومسبباتها اللي كلنا عارفينها، مرورًا بأحداث الثورة واندلاعها، رغم أن ممكن الواحد يكون عارف الكلام ده كله إلا أن أسلوب الكتابة واختيار النقاط اللي تم سردها فى الجزء ده كانت غاية فى الذكاء وكأنها تسليط ضوء على الأحداث الهامة اللي عاشها أي مصري وكأنها تنشيط لذاكرة الثورة. الجزء الثاني من الكتاب هو مجموعة مقالات نشرت على مدونته الخاصة بتواريخ مختلفة من بعد الثورة أولهم مقالة "رسالة إلى حزب الكنبة العظيم" اللي حققت شهرة وصدى واسع ورد فعل قوي جدًا على الساحة السياسية والإعلامية في مصر، واللي كان فيها رسالة للفئة اللي اعتادت توجيه النقد للثوار من دون المشاركة فى الأحداث والاكتفاء بالجلوس على الكنبة ومتابعة الأخبار من التليفزيون ووسائل الإعلام، بعدها مقالات مختلفة كتبت تعليق على بعض الأحداث البارزة فى الفترة دي زي الاستفتاء وحوادث الفتن الطائفية وغيرها. رغم بساطة محتوى الكتاب إلا أنه سلط الضوء بشكل رشيق وموضوعي على أفكار كثير تستحق التأمل فيها، ودعى القارئ لعدم التعصب والتمسك بأي فكرة بشكل مبالغ فيه حتى وإن كان استمدها من الكتاب ده، بمعنى أن لازم الواحد يشغل عقله ويوزن أي كلام وأفكار بـ يتلقاها، وده يعتبر شيء محترم جدًا وبـ يعبر بصدق عن رسالة الكتاب البسيطة والقيمة فى نفس الوقت.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن