دليل كتب القاهرة - أحدث المقالات عن الكتاب العرب ومؤلفاتهم

كتب

ابنى يعلمني: أسطورة الميلاد
اصدرت في: 30/10/2015

إلى الورد زين العابدين.. بن وائل السمرى.. الأب اللى حول ابنه إلى أسطورة.. قنطرة: بدل التقديم قرر وائل أنه يعمل قنطرة يحاول فيها يتكلم عن الإنسانية وإزاي دونت تاريخها واحتفت بالموت فى جداريتها ومعابدها... هنا لحظة فارقة بين الحياة والموت، هنا لحظة بـ يحاول فيها السمري صناعة أسطورة الميلاد.. نقدر نقول أنه تاريخ شخصي وتسجيل للحظات حميمة جدًا.. نقدر نقول أنه حالة مختلفة من الكتابة اللى صعب تصنفها.. فهي شاعرية جدًا وسلسة.. تقترب من لغة الصوفية ساعة الوجد.. ومن تصوير الشاعر ساعة كتابة القصيدة.. ومن ابتهال العابد وقت المناجاة.. نقدر نقول أننا أمام حالة كتابية مختلفة. الدرس الأول: لا خروج إلى النور إلا بجرح وبكاء.. حالة التلهف والانتظار اللى بـ تسبق انتظار المولود، حالة الذكريات اللى بـ تلف فى روح الكاتب وهو بـ يفتكر كل مرة كلم فيها "ابنه" وهو لسه جنين، حالة انتظار القادم علشان يطلع للنور. الدرس الثاني: لا شيء يفوق دهشة الموت سوى دهشة الميلاد.. هنا هـ تعرف يعني إيه أول مرة تتعرف على ابنك.. ووقتها هـ تفهم يعني إيه فقه التعرف على الله.. دهشة الميلاد هي اللى بـ تطلع الروح ممن الظلام للنور.. لحظة تطلع واستشراف للمستقبل.. هنا الدهشة اللى مجبور عليها وهذا الطفل بـ يطبق بأيديه على أيدك. الدرس الثالث: أبدًا لا يسأل الظمآن عن قصد المطر.. فى الدرس الثالث هـ نلاقي إعادة لتعريف القلب بعيد عن تعريف الأطباء، هنا تعريف نبع الحياة والقرب، تعريف الحب الصافي والعشق فى أسمى تجلياته. الدرس الرابع: وقد يجرفك الشوق إلى ما تراه بعينيك.. فيصبح الواقع حلمًا والحلم حياة عن الشعر لما يتحول لسرد واللمسة لما تقول ما يعجز عنه كل لسان فصيح أو شاعر عظيم. الدرس الخامس: بالأرض كما بالسماء.. ما لا عين رأت ولا أذن سمعت هنا الجديد، هنا الجديد فى التعلم فى كل شيء، هنا بـ نفهم يعنى إيه فيه حياة ناشئة لسه بـ تتعلم على أيدك أبجدية العشق والنور. باقى الدروس: بـ تدور حول "فافرش قلبك بالبسملة وقف راضيًا" لتقول: اللهم لك صمت وعلى رزقك أبصرت.. بـ تتكلم عن الحكمة والعشق والعقل والحياة والروح والألم والابتسامة والرقة والأم والسعادة والضعف ويبقى أننا نقول لكم الدرس "صفر". "انظر إلى كل لحظة تمر بها باعتبارها ذكرى، وكن مستعدًا لفعل الزمن حينما يلفحك الحنين وتأتيك الصور سالبة ذهنك محتلة عينيك". السمري مش قادر ينسى أنه شاعر ولما اختلطت مشاعر الأبوة بالصوفي اللى جواه بالشاعر اللى ماسك روحه.. بالصحفي اللى مسيطر على عقله.. خرج لنا كتاب "ابني يعلمني" اللى نقدر نقول عليه تداخل ومزيج بين كل اللى فات.. كتابة واخدة من كل مشهد وكل روح وكل تفعيلة وكل مقال وكل فلسفة وكل لحظة وجد حالة.. هنا فيه حالة صعب أنها تتوصف غير أننا نقول لكم: "اقرأوا عن الحياة من جديد في كتاب "ابني يعلمني".

...

دين مصر: تجديد الخطاب الديني بشكل جديد
اصدرت في: 17/04/2015

هل فيه دين معين لكل بلد؟.. بلاش، هل فيه دين معين لكل شخص لكل مكان لكل زمان؟.. لكل معتقد لكل إنسان؟.. يا ترى ليه بقى فيه ملحدين كثير؟ هو الدين عبارة عن إيه أصلًا؟ هل فيه تحديد معين للدين وإيه الفرق بين الدين ومظاهر الدين الشعائر يعنى زى الصلاة والصوم.. أسئلة كثيرة قوى لكن قررنا نقرأ الأول كتاب "دين مصر" وبعدين نشوف بقى إيه الموضوع ده؟ عن أمراء الدم والفيديو زي ما بـ يسميهم د. ياسر ثابت بـ يتكلم عنهم فى كتابه "دين مصر".. وعنوانه باين أنه بـ يتكلم عن أشكال التدين المختلفة فى مصر.. وبـ يقول أن الدين محتاج لحظة من التأمل لأنه بـ يعكس الحياة في أي بلد.. وهو عاوز يرسم صورة شاملة للي بـ يحصل في المجتمع المصري من الناحية الدينية. علشان يعرف يتكلم عن الدين فى مصر كان لازم الأول يتكلم عن هوية مصر وأنها واحدة من أهم دول العالم في الحضارة لأنها شافت أقدم حضارة في العالم وعدى عليها وعاش فيها سبعة أنبياء.. وكمان كان فيها طوائف وديانات وفرق كثير جدًا لكن فضلت مصر بهويتها وتسامحها. كمان بـ يتكلم ياسر ثابت عن المشاكل الدينية في مصر اللي فيها قراءات خاطئة للنصوص الدينية وأشكال متزمتة للآراء الفقهية والتاريخ مليان حكايات استخدام الدين ورموزه في الألعاب السياسية. كمان عندنا مشكلة ثقافة التسلط والقمع في البيت والمسجد والكنيسة والحزب ومؤسسات المجتمع المدني ومؤسسات الحكم، وثقافة الاتكالية والخوف والطاعة العمياء، وتبرير كل ده بالأمثال الشعبية اللي بـ تتلاعب بالعقول والغيب والأخلاق والأوهام. وخد عندك المشاكل الطائفية والحساسيات بين الناس والولاء للقبيلة والأسرة والنوع والعائلة الكبيرة اللي ما قدرش الإسلام ولا قيم الديمقراطية يغيروها. الكتاب مفيد وممتع وبـ يحلل بشكل هادئ وبلغة قوية ومصطلحات كثير فكرة الدين فى مصر، وأنت بـ تقرأ هـ تفهم أنه عاوز يوصل لك فكرة واحدة وبـ يدور حولها أغلب الوقت أن مصر تعرضت لعملية غسيل مخ علشان تبقى دولة مؤمنة إيمان ظاهرى وأنها جزء أساسي من الشرق الأوسط ومالهاش حاجة في حضارتها. الكتاب بـ يناقش مشاكل كثير ممكن نبقى معاه في أفكار ونختلف معاه في أفكار ثانية في أن الكتاب ممكن يُصنف أنه دعوة للبعد عن الدين والاهتمام بالحضارة والهوية المصرية وبس.. لكن الراجل صراحة عمل اللي عليه وتكلم وفنط المشاكل وفتاوى التحريم والتكفير وخلط الدين بالجهل والفتنة ومصادرها.. لكن يا ترى هـ يعرف يحل المشكلة؟

...

داعش.. خرائط الدم والوهم: ما لا تعرفه عن تاريخ داعش
اصدرت في: 27/03/2015

كلنا شوفنا الفيديو الخاص بحرق الكساسبة.. وشوفنا كمان إعدام أخواتنا فى ليبيا وشوفنا التفجيرات وفيديوهات كثير بـ تكلمنا عن داعش واللى بـ تعمله والخوف اللي سيطر على الناس فى أى دولة بـ يدخلوها.. يا ترى بدأوا إزاى وإيه أصلهم وبـ يتكلموا فى إيه وإيه مرجعيتهم ومين اللى بـ يمولهم؟.. أسئلة كثير بـ تدور فى دماغ أى حد بـ يتابع أخبار داعش.. واللى قرر يجاوب عليها الكاتب محمود الشناوى. إزاى ظهرت داعش وعملوا دولة دستورها التكفير والسرعة فى إراقة الدم.. وتسهيل قتل الناس من غير ما يطرف لهم جفن.. مع أن الدماء معصومة فى الإسلام.. إزاى زرعوا الرعب فى قلوب الناس وإيه هى الأماكن الآمنة اللى بـ يستخبوا فيها. إزاى بـ يديروا تنظيمهم وإزاى بـ يتدربوا وإيه المنهج اللى بـ يستندوا عليه فى الدين الإسلامى مع أنه دين الوسطية وإزاى قدروا يخرجوا كل الفتاوى دى فى القتل والحرق. ليه الشباب بـ يلجأ لهم وإزاى بـ يعملوا غسيل للدماغ علشان يقدر الشاب يقتل وضميره مستريح وهو فاكر أنه بـ يطبق الدين، وطريقتهم فى ده شكلها إيه.. كل ده بـ يكلمنا فيه مدير تحرير وكالة أنباء الشرق الأوسط الشناوى فى كتاب تعب صراحة لحد ما عمله وسافر وقرأ مراجع كثير وقعد مع ناس مختلفة واتطلع على حوارات غير منشورة وفرجنا على داعش. هما مجموعة من رجال القاعدة القدامى اللى ظهروا تحت اسم "داعش" وهو اختصار تنظيم الدولة الإسلامية فى العراق والشام. الفكرة بدأت من أيام القاعدة اللى كانت بـ تحاول من البداية تحويل حربها ضد الأمريكان إلى حرب دينية يشوف المسلمون فيها أنهم مستهدفين من الكفرة الغربيين.. واللى تطور بعد كده لقتل أى حد مخالف لرأيها. وفكرة دخول الدين فى السياسة بـ يربطها الكاتب بظهور جماعة الأخوان السلمين فى مصر ومعاها كمان مشترك ثانى اسمه "ولاية الفقيه" فى المذهب الشيعى واللى لما دورنا عليه لاقيناه بـ يتكلم عن أن الفقيه له الولاية والرأى السياسى فى الدول الشيعية زى إيران مثلًا.. والهدف فى النهاية معروف وهو السلطة السياسية الدينية يعنى دخلوا الدين فى السياسة واللى يبقى مخالف لك تقتله لأنه مش بـ يخالف السياسة، لأ ده بـ يخالف الدين.. وهو شايف أن الرؤية الإسلامية السُنية وسطية وفيها شوية تعصب لكن الرؤية الإسلامية الشيعية قائمة على التطرف لأن الحكم السياسى للشيخ أو الفقيه يبقى هو حكم الله وبالتالي ما تقدرش تقول لأي سلطة دينية أنت غلط.. لأنك كده بـ تغلط فى الدين مش فى السلطة وده اللى بـ يخلى القتل عادى ومستباح. الكتاب مع أنه بحثي قوي لكن لغته حلوة وقائمة على العقل والاستشهاد بمراجع ومفكرين ولقاءات عملها الشناوى مع ناس لهم علاقة بالموضوع.. نأخذ على الطبعة بس أنها متعبة للعين وفيها شوية أخطاء فى اللغة وده أكيد من المراجعة والتجميع.. لكن الكتاب لازم يُقرأ وكمان ابقوا اتفرجوا على الصور اللى فيها، الكاتب كان بـ يزور أماكن القاعدة والناس اللى قابلهم.

...

حكايتي في تل أبيب: أسرار دبلوماسي مصري في تل أبيب
اصدرت في: 20/03/2015

فيه كتب كده ممكن نعتبرها "وثائق"، يعني لما مؤرخ يحب يكتب التاريخ يقدر يستخدم الكتب دي كوثيقة تثبت المعلومات في فترة معينة، "حكايتي في تل أببيب" واحد من الكتب دي، بـ يرجع تاريخه لـ 30 سنة فاتت، صاحبه دبلوماسي مصري صميم، من عائلة دبلوماسية عريقة. والده الدكتور علي رفاعة الأنصاري دبلوماسي سابق هو صاحب فكرة الكتاب، وهو اللي نصحه بـ تسجيل كل الأحداث اللي مر بها في إسرائيل لما كان سفير مصر هناك على مُسجل، لحد ما وصلوا 11 شريط، كل شريط ساعة ونصف، حط فيهم كل أفكاره وتفاصيل عمله هناك ولحد ما رجع القاهرة، لكن طبعًا ما قدرش يكتب أي حاجة عن التجربة بسبب السرية، ومرت 30 سنة، لحد ما الكاتب قرر يقدم الكتاب وقدر يأخذ الموافقات، لكن إعداد الكتاب وتفريغ الشرائط والكتابة أخدت 6 سنين، فترة طويلة لكنه بـ يعترف أنه كان محتاج يحصل على موافقات رسمية كثيرة علشان يقدر ينشره. سألنا نفسنا ليه مسئول مهم عنده كلام محترم يقوله يفضل ساكت كل ده بحكم أنه لسه خارج من الخدمة جديد، كم المعلومات والحقائق اللي ماحدش يعرفها عن مسئولين كثير بسبب الخوف المبالغ فيه من الجهات الرسمية مش طبيعي، صحيح هو قدم كتابه أخيرًا لكن إيه الفايدة، هو بـ يقول أنه بـ يحاول يقدم صورة عن المجتمع الإسرائيلي، بس الكلام ده من 30 سنة، اه هـ نتعرف عليه بطوائفه وسياساته ومؤسساته وأعراقه لكن بصورة قديمة حبتين. المؤلف بـ يؤكد قد إيه المجتمع الإسرائيلي مش متجانس، أكثر من ستين جنسية مختلفة جواه، مليان عادات وتقاليد ولغات وخلفيات مختلفة، الغريب بقى أنه بـ يتكلم عن محاولة اغتياله وعن وعن رونا ريتشي زميلته اللي اشتغلت سكرتير أول للسفارة البريطانية في إسرائيل وتم اتهامها بالتجسس لصالح مصر وتم القبض عليها وتقديمها للمحاكمة واستقالت من الخارجية، بعد 30 سنة بـ يعلن السفير المصري براءتها وأنها عمرها ما اتجسست لصالح مصر وأنها اتظلمت ظلم كبير. اللي عجبنا في الكتاب بجد بقى مش حكايات المؤلف في إسرائيل رغم أهميتها وجمال الطريقة اللي بـ يحكي بها، لكن عجبنا أكثر فترة النشأة اللي بـ يحكي عنها المؤلف، قد إيه مميزة وكمية الشخصيات الكبيرة اللي قابلها في حياته فعلًا بـ تعطي صورة مختلفة تمامًا عن اللي نعرفه. عجبنا جدًا أجواء بغداد وإزاي في طفولته قابل شخصيات كثيرة جدًا معظمهم ماتوا موتات بشعة، قصص لطفل صغير لكن بـ توضح أحداث كبيرة معظمنا ما حسش بها إزاي قابل الملك فيصل عاهل المملكة العربية وإزاي قُتل بعدها هو والوصي على العرش ورئيس لوزراء نوري السعيد، اللي الثوار وقتها ما اكتفوش قتله ودفنه لكن طلعوا جثته وأمر كل العربيات تعدي عليها بما فيها عربية أسرة الدكتور رفعت، وإزاي طفل صغير سمع صوت تكسير عظام الجثة في السن ده، عجبتنا كمان مرحلة الشباب اللي قضاها في ليبيا وعرف خلالها العقيد معمر القذافي قبل ما يعمل ثورة وقبل ما يبقى شخصية مشهورة، حكايات صغيرة بـ تكشف أبعاد مش طبيعية وعميقة جدًا. الكتاب ممتع، كل فصل فيه أجمل من الثاني بما فيه المقدمة، وفصول زي النشأة والتكوين، وإزاي كان رايح تل أبيب، الأيام الأولى هناك، وشغله اللي خلاه يوطد علاقته بالإسرائيليين، وإزاي اغتيال السادات أثر على كل حاجة لها علاقة بالسياسة، ورحيله السري عن إسرائيل، ننصحكم بقراءة الكتاب لأنه ممتع فعلًا.

...

الأطفال من الجنة: خمس رسائل فى تربية القادة
اصدرت في: 13/02/2015

فعلاً الأطفال هم أحباب الله، وعلى رأى المثل"عمرهم ولا خلو دارهم"، ودي حقيقة كلنا متفقين عليها وهى أن الاطفال نعمة غيابها ممكن يؤدى إلى هدم البيت، بس هما مسؤولية كبيرة جدًا معظمنا متجاهلها. اللى عاوز يكون طبيب بـ يدرس طب وكذلك موسيقى، فن، رياضة، لكن حد فكر يدرس أمومة؟ أبوية؟.. أيوه، ما التربية مش على الأم لوحدها ده الأب كمان شريك رئيسى مش المدير المالى وخلاص. الكاتب د. جون جراى بـ يوضح لنا من خلال كتابه "الأطفال من الجنة"أن الطريقة اللى معظمنا بـ يمارسها مع أبنائه عذرًا خطأ وهنا هـ نعرف أسرار تنشئة أطفال متعاونين، واثقين، ومتعاطفين،وبطريقة حديثة للتربية تمنح أطفالنا الحرية والتوجه لاكتشاف ذاتهم الحقيقية والتعبير عنها من خلال خمس رسائل للتربية الإيجابية بتدعيم شعورقوى بالذات زى: "السماح بالاختلاف، السماح بارتكاب الخطأ، التعبير عن المشاعر السلبية، الرغبة فى المزيد، السماح لهم بالمقاومة. د. جون جراى بـ يعطينا كبسولة سحرية للتربية وهى الحب وتوظيفه بالشكل السليم لتدعيم ومساندة الأطفال، وعلى الرغم من أن الحب هو أهم ماتتطلبه العلاقة دي، فأنه وحده غيركاف، فإذا لم يتفهم الآباء احتياجات أطفالهم الفريدة وعاوزين نحط تحت "فريدة" ألف خط وخط، فلن نستطيع منحهم ما يحتاجون إليه اليوم، يمكن أن يمنح الآباء الحب، ولكن ليس بالطريقة المفيدة لنمو أطفالهم. الكتاب كمان هـ يقدم لنا طريقة حديثة للتربية توضح كيف نمنح أطفالنا الحرية والتوجه لاكتشاف ذاتهم الحقيقة والتعبير عنها، لازم نعرف أهم هبة ممكن تعطيها لأطفالك وهى هبة "العظمة"، يعنى تعطيهم الفرصة لاكتشاف نفسهم والتعبير عنها.. وساعتها هـ يبقوا أشخاص عظماء وده هـ يصنع منهم قادة بـ يسعوا لعلم كل جديد فى الحياة.. ولازم نعرف أن كل قصة نجاح مليانة بالمعارضة للقديم والتقليدى وبـ تعمل عملية نمو للإبداع.. لازم تعلموا أولادكم يكونوا مختلفين.. ويرتكبوا أخطاء علشان يتعلموا منها.. ويعبروا عن مشاعرهم السلبية والإيجابية.. ترك الفرصة لهم علشان يقولوا لأ.. يعنى يكون عندهم إرادة وشعور قوى بالنفس.

...

فى طريق الأذى: الكنز فى الرحلة
اصدرت في: 09/02/2015

باولو: أول ما قرأنا عنوان الكتاب على طول افتكرنا رواية "الخيميائى"، واحدة من أشهر روايات "باولو كويلو" واللى فيها بـ يحكى عن رحلة طويلة لشاب بـ يدور على كنز علشان يعرف فى النهاية أن الكنز فى الرحلة. يسرى: بالضبط كده، الكنز فى رحلة يسرى فودة أنه عمل اللى ما حدش عمله، أنه راح زار القاعدة فى مكانها وسط الجبال والمخاطر والطرق الوعرة.. يسرى قرر يخوض تجربة مثيرة للغاية.. لأ لأ استنوا شوية، صراحة هو ما قررش لكن حياديته وقوته فى برامجه هى اللى خلت الناس تختاره.. يسرى تم اختياره علشان يكتب عن القاعدة وأسرارها من أهل القاعدة نفسهم. الاختيار: «صباح الرابع عشر من يونيو عام 2002، كانت قناة الجزيرة على موعد مع أكبر خبطة صحفية فى تاريخها عندما دخل فودة إلى مبناها فى الدوحة محملًا بمفكرته وأسراره التى بدأ يكشف عنها، لم تكن شرائط لقائه بزعماء القاعدة قد وصلت بعد، لكنه كان قد بدأ يشعر بأن الوقت قد حان كى يُطلع رؤساءه فى العمل على الأمر». دى مقدمة الكتاب اللى فيه هـ نعرف أن يسرى فودة اختارته القاعدة وبالتحديد اختاره "خالد شيخ محمد.. رمزى بن الشيبة" علشان يحكوا عن أحداث سبتمبر وعن فكرة الإرهاب وعن أنهم بـ يكسبوا عيشهم من موضوع الإرهاب.. والمقدمة اللى فاتت كتبها "رون ساسكيند" الصحفى الأمريكى المتخصص فى السياسة واللى قال عن الكتاب أنه يوصف واحد من أهم المشاهد اللى شافها فى حياته. الرعب: «ماذا تفعل لو كنت مكانى؟ خارجًا للتو من أحد المنازل الآمنة لتنظيم القاعدة فى مدينة كراتشى الباكستانية وفى جعبتى اعترافات خالد شيخ محمد، ورمزى بن الشيبة.. الأمريكان فى كل مكان فى أفغانستان وفى باكستان، القاعدة مشردة كما لم تتشرد من قبل، لا أحد فى قناة الجزيرة ولا فى غيرها يعلم أين أنا ولا من قابلت، أسامة بن لادن وأيمن الظواهرى تحت الأرض، والعالم كله فى حالة مخاض، ثم فجأة.. فى جعبتى، أنا العبد الفقير إلى الله، معلومات تساوى 50 مليون دولار». حط نفسك فى مكان يسرى، يا ترى هـ تعمل إيه والشرايط مع وسيط، والوسيط عاوز مليون دولار وأنت قاعد فى مطعم إيطالى مع أمير قطر بذات نفسه.. رعب ما بعده رعب، يا ترى إيه اللى هـ يحصل؟ ممكن يقتلوك، ممكن السلطة تقلب عليك، ممكن ببساطة الموضوع يدخل فيه لعبة استخباراتية من دول كثير عاوزة المعلومات اللى عندك.. وأنت العبد الفقير. الكتاب ممتع للغاية ويسرى له قدرة على السرد ترشحه أنه يكتب رواية بامتياز.. وأنت بـ تقرأ كتابه مش هـ تحس أنه كتاب عن السياسة أو المذكرات، هو رواية بالفعل لكن كل أحداثها حصلت بجد.. ورحلات ومطاردات وتنظيمات وهروب مع جماعات وبين الحدود وفى المعاقل وليلة لأهل الله، مع يسرى فودة الكنز فى الرحلة، لازم تقرأه. عن الكاتب: يسرى فودة، صحفى مصرى له العديد من البرامج، وواحد من النجوم البارزين والمساهمين في تأسيس قناة الجزيرة القطرية، التي عمل بها منذ عام 1996 كمراسل مواكب لشئون المملكة المتحدة وغرب أوربا، كما شارك في إنشاء مكتب قناة الجزيرة في لندن عام 1997 وقدم من خلاله برنامجه الشهير "سري للغاية" الذي استقطب بموضوعاته وطريقة معالجته قطاعًا كبيرًا من المشاهدين على اختلاف مستوياتهم... وله برنامج على قناة أون تى فى بعنوان "آخر كلام" وهو الآن متوقف.

...

أنا حامل: كتاب قوي ودليل متكامل للمرأة الحامل
اصدرت في: 11/11/2014

الأطفال أحباب الله.. نعمة ربنا بـ يرزقنا بها وبـ تملأ حياتنا وخاصة حياة الأم بمشاعر لا يمكن وصفها مهما بلغت درجة التعب والإرهاق اللي بـ تحس به، وبـ يضاف للأحاسيس دي شعور الخوف لو كانت تجربة الحمل فى الطفل الأول بالنسبة لأي ست، الطبيعي فى الشعب المصري الستات بـ ينقلوا خبراتهم لبعض من غير ما يتأكدوا هل هي مبنية على أسس علمية صحيحة ولا لأ، ده غير أن طبيعة حالة وجسم وظروف حمل كل واحدة ست بـ تختلف عن غيرها. لو كنت حامل أو بـ تخططي للحمل لا غنى عن استشارة الدكتور الخاص بك طبعًا وكمان قراءة كتاب "أنا حامل" الصادر عن دار دّون، الفكرة بدأت بموقع ana7amel.net اللي فيه مقالات عن كل ما يخص المرأة الحامل، بعد كده فكر أصحابه ياسمين شاهين وشيماء الجمال أنهم يصدروا كتاب يعد دليل للمرأة الحامل فيه خلاصة مقالات وموضوعات الموقع بس بطريقة منظمة إلى جانب الاستعانة بمصادر ومراجع عربية وأجنبية، كمان راجع المادة العلمية فى الكتاب د. سحر البرادعي مدرس أمراض النساء والتوليد والعقم بجامعة القاهرة. الموضوع بدأ مع شيماء الجمال أو فكرة الموقع بعد ما مرت بكذا تجربة إجهاض وولادة طبيعية وقيصرية وحمل لتؤام فى حياتها الشخصية فقررت تشارك خبراتها دي وإلا كانت هـ تتجنن، الكتاب أكثر من رائع، فيه معلومات قيمة جدًا وماشي خطوة بخطوة من أول التخطيط للحمل وإيه الأسباب اللي ممكن تمنعه لحد الأيام الأولى بعد الولادة، كل حاجة ممكن تتخيليها هـ تلاقي إجابة عليها، حتى الحاجات اللي ممكن تشوفيها أنها مش مهمة هـ تلاقي شرح وتوضيح لها، زي تأثير بعض الأكلات عليكي وعلى البيبي، إيه اللي منها ممكن يسبب إجهاض، ونفس الشيء بالنسبة للأدوية، 8 فصول، كل فصل مليان نقط كثيرة جدًا كلها مهمة فى رأينا، حتى أنهم مهتمين بجمال الحامل وبـ يقدموا نصائح تلبس إيه ومعلومات عن بنطلون الحمل، وجفاف البشرة، وحماية الأظافر، والتمارين اللي ممكن تتعمل علشان تسهل الولادة والرياضات الممنوعة.. وغيرها كثير جدًا. كمان من الحاجات اللي ممكن تؤرق الحامل اكتئاب ما بعد الحمل، إيه أسبابه وممكن تتغلب عليه إزاي، والتوتر أثناء الحمل وتأثيره، وألم الدوالي، وغثيان الحمل، والوحم، ووجع الظهر، والاضطرابات المعوية، كل حاجة مفصلة بالأعراض والأسباب وتتغلب عليها إزاي. فيه صفحات لطيفة قوي فى الكتاب مدعمة برسوم جميلة ورقيقة فيها ستات بـ تحكي عن تجربتها مثلًا لما بلغت زوجها أنها حامل قالت له إزاى وإيه كان رد فعله رسمت البسمة على وجوهنا، وكمان إيه النصائح اللي قيلت لهم خاطئة أو سمعوها خلال حملهم، بعضها كان يهلك من الضحك، عامة الرسومات والإخراج الفنى من تصميم أحمد عاطف مجاهد أضاف للكتاب كثير جدًا، خلتنا كل شوية نتشوق نقلب الصفحة علشان نشوف الرسمة اللي جاية إيه وكسرت حاجز الملل اللي ممكن يصيب حد من قراءته للنص. أحلى جزء فى الكتاب بقى -بالنسبة لنا- آخره.. وهمي، فكرة أنك تبقى عارفة إيه اللي بـ يحصل لابنك جواكي دي رائعة، عاملة كده كأنه "سونار بالكلام"، بـ يشرح الجزء ده تطور الحمل أسبوع بأسبوع (إجمالى 40 أسبوع)، بـ يقول لك فيه دلوقت ابنك بـ يتكون في بطنك وإمتى بـ يكتمل القلب وباقى أعضاؤه، وشعور الأم فى الأسبوع ده مثلًا بـ يكون إيه وتتعامل معاه إزاي، وأقوى جزء أنه كمان بـ يقول لك ابنك دلوقت بقى وزنه وطوله قد إيه من أول ما يكون نطفة لحد لحظة الولادة، وده بـ ينمي إحساس ترابط فظيع بين الأم والطفل كأنها شايفاه أمامها أو جوه معاه. مكتوب على ظهر الكتاب أنه الكتاب الأول فى سلسلة يحررها فريق عمل موقع ana7amel.net، وده بـ يخلينا متشوقين نعرف يا ترى الكتاب الثاني هـ يكون فيه إيه مختلف من معلومات ونصائح عن الأول أو هـ يقدم إيه جديد عامة.

...

الإسلام وحقوق الإنسان: السماحة والمعاصرة
اصدرت في: 07/11/2014

الإسلام: هو فى المسجد بس.. وصلاة وصوم، ولا منهج حياة؟ سؤال مهم لازم نبدأ به قبل ما نتكلم عن كتاب الإسلام وحقوق الإنسان.. الإسلام منهج حياة.. بـ يعرف الإنسان إزاى يتعامل مع غيره مع أصحابه ومع ولاة الأمر وزوجته وأولاده ووالديه والمجتمع.. يعنى منهج شامل متوازن بـ يخاطب العقل فى كثير من الأحيان. الحقوق: على اعتبار أننا فى مجتمع واحد بـ يضم فئات كثيرة ومختلفة.. وعلى اعتبار أننا شوفنا وقرأنا عن أنظمة كثيرة جدًا حكمت الدول.. كان لازم نشوف إيه أكثر نظام بـ يحمى الحقوق وبـ يحقق فكرة العدل والمساواة والحرية. من وجهة نظر الكاتبة فاطمة محمد حسين أن الدولة الأولى اللى بناها الرسول –صلى الله عليه وسلم– هى اللى حققت المعادلة اللى فاتت واستمرت حتى عهد الخلفاء الراشدين، ومع أن كثير حاولوا بعدهم يعيدوا التجربة إلا أنها ما كانتش فى بياض التجربة الأولى أو التجربة الأصل. الإنسان: أهم حاجة بـ تميز الإنسان عن غيره هو ارتباطه بنظام محدد، والنظام ده لازم يضمن حقوقه ويعرفه واجباته والتزاماته والتزامه للمجتمع والتزام المجتمع نحوه.. وفى الكتاب محاولة علشان توضح الدولة الإسلامية بصورتها العادلة السامية من منظور حقوق الإنسان وواجباته والضمانات اللى تحقق فكرة الإنسان وعلاقته بالدولة من منطلق فكر إسلامى معتدل.. الاعتدال: نقدر نقول أن المنهج اللى مشيت عليه الباحثة فى كتابها هو الاعتدال وحققت ده –صراحة– من خلال مداخل كثيرة زى مبادئ الحكم فى الإسلام.. وفكرة الحريات العامة والمبادئ الاقتصادية كمان وترشيد الاستهلاك.. وكان التركيز الكبير على الحقوق والواجبات الاجتماعية بشكل ملفت وعلاقة الإنسان بالمجتمع فى تفاصيل مهمة جدًا بـ تبين قد إيه الكاتبة تحمل لغة رشيقة وهادية وأساليب متزنة كمان علشان تخاطب العقل من غير تعصب وثقافة إسلامية تتميز بحاجتين: السماحة، والمعاصرة. "السماحة" بانت فى كلامها عن علاقةالإسلام بفكرة المجتمع والطلاق وحق السائل واليتامى والعلاج والعلم والمعرفة، و"المعاصرة" ظهرت فى علاقة الدين بالبيئة النظيفة والأسواق المالية والصحافة والبنوك. تصميم الكتاب من الخارج هادى وشايل فكرة الزخرفة الإسلامية مع أنها مختارة لون من درجات البنى وده مخليه قريب من كتب التراث أو قريب من الكآبة شوية لكن تصميمه حلو.. وفكرتنا فى التصميم قائمة على الألوان الزاهية واللعب بالجرافيك علشان تبقى المعاصرة فى كل حاجة حتى تصميم الكتاب. فى النهاية لو عاوز تعرف عن الإسلام الجديد من وجهة نظر عقلية مدعمة بدلائل قرآنية وشواهد من التاريخ اقرأالكتاب ده.

...

متى سكن المصريون مصر؟: قصة 2 مليون سنة
اصدرت في: 26/09/2014

كتاب "متى سكن المصريون مصر؟" صراحة ممتع وكله معلومات وجديد فى فكرته، قديم فى الكلام اللى جواه.. هـ نقول لكم إزاى يعنى جديد فى فكرة تبسيط المعلومات والعلم قوى كده، وبعدين الطريقة اللى مكتوب بها الكتاب بسيطة جدًا، وقديم فى اللى جواه علشان بـ يكلمنا على مصر من "2 مليون سنة". بصوا بقى.. من الآخر كده هـ نحكى لكم من الأول، مركز دوم الثقافى قرر يعمل سلسلة كتب اسمها "ببساطة"، السلسلة دى تمويلها من المركز وهدفها زى ما بـ يقول الروائى خالد الخميسى فى مقدمة الكتاب "أنها سلسلة كتب هـ تناقش قضايا فكرية معروضة بشكل مبسط وهـ تلعب الرسوم والتصميمات الداخلية فيها دور رئيسى فى تسهيل عملية القراءة.. يعنى الموضوع أنهم عاوزين يعملوا شكل يخلى القراءة أسهل وأمتع وهـ ينتقدوا كمان الحاجات الثابتة أو القضايا اللى الناس فاكرة أنها انتهيت هـ يعيدوا التفكير فيها بشكل نقدى وتعالوا نشوف الكتاب. الفصل الأول بـ يبدأ "كان المناخ فى مصر يختلف تمامًا عما هو عليه الآن وفى الفترة التى لم يعرف فيها الإنسان المصرى الكتابة والتى قدرها الباحثون بحوالى "2 مليون سنة" وأطلقوا عليها اسم "عصور ما قبل التاريخ". والفصل الثانى بـ يحكى لنا عن المعتقدات الأولى وعلاقة الدفن بالشمس وإزاى أن أقدم دفنة كانت لطفل فى مكان اسمه "نزلة خاطر" فى أسيوط وكان الطفل بـ يبص ناحية الشمس.. وكمان هـ نلاقى كلام عن الحياة عند المصرى القديم وإزاى كان بـ يعيش وكلام عن الزراعة والصيد والفخار. وكمان هـ نلاقى حكاية التحول القديمة من إيمان المصرى القديم بالسحر والقوى اللى وراء الطبيعة وتحكمها فى الشمس والقمر زى ما كان بـ يخيل، لحد ما وصل لفكرة الإله وبدأ يعبد إله محدد وقد إيه ده أفاده فى حضارته وبدأت تظهر بعد كده الحضارات الأولى فى مصر والمراكز الأولى كانت فين، وكمان هـ نلاقى معلومات عن عصور ما قبل السرات وحضارة المعادى وإزاى اتعمل النظام فى مصر وكان شكله إزاى؟ الكتاب فكرته حلوة جدًا ومعمول حلو، كمان كمية الرسومات الكاريكاتيرية فى الكتاب بـ تخليك قاعد بـ تقرأ وأنت مستمتع بالرسم وبالتعليقات اللى بـ تقولها شخصيات الرسوم وبـ تخلى خيالك يسرح معاهم وتقعد تتخيل إزاى كان عايش المصرى القديم وإيه حكايته وإمتى بنى القرى الخاصة به والسياسة هناك بلغة رقيقة بجد بـ تخلط العامية فيها بالفصحى وبـ تساعد الرسوم وأسئلة الشخصيات المرسومة اللى بـ تساعد على التفكير فى المصرى القديم.

...

استنساخ القمع: محاكمة وحرق وقتل.. ملخص العنف ضد الصحفيين
اصدرت في: 29/08/2014

حرية الصحافة والإعلام المرئي لسه بـ تعاني من صعوبات كثيرة قوي، بـ تزيد مع الأيام في معظم الدول العربية، صحفيين كثير واجهوا عنف بكل أشكاله وصل لحد الحرق والقتل.. كتاب "استنساخ القمع" الصادر عن الشبكة العربية لمعلومات حقوق الإنسان، بـ يعرض لنا الحوادث وأشكال العنف اللي واجهت الصحفيين والإعلاميين على مدار عام كامل في 14 دولة عربية أهمهم مصر وتونس واليمن وليبيا. نبدأ بـ تونس، حسب ترتيب الكتاب للبلاد، يمكن المقصود من الترتيب ده إشارة إلى أن تونس هى بداية الربيع العربي اللي شهد رفع سقف حرية الإعلام رغم العنف المستمر.. ويذكر الكتاب أن كثير من المواقع الصحفية في تونس تم قفلها عن طريق الحكومة لأنها بـ تحاول تقول حقيقة الواقع في تونس، زي موقع جريدة "الصباح التونسية"، وموقع "لوتون". هـ نتعرف كمان على صحفيين قُدموا للمحاكمة بعد تقديم بلاغات ضدهم، زي الصحفي محمد علي، اللي اتحاكم بعد بلاغ قدمه مدير الوكالة الوطنية للأرصاد الجوية، بسبب مقال في جريدة آخر خبر عنوانه "شبهات إهدار المال العام وقضايا فساد في الوكالة". وبخصوص العنف ضد حرية الإعلام في مصر عرض الكتاب نماذج كثيرة، منها محاكمة الصحفي إسلام عفيفي بتهمة إهانة محمد مرسي –الرئيس المعزول- واللي حصل فيها على البراءة بعد ضغط شعبي وإعلامي كبير. الكتاب اهتم كمان بأحداث تتعلق بتحقيقات داخلية تمت مع إعلاميين في ماسبيرو، وبعض المشاكل اللي واجهت جمعيات حقوق الإنسان وبيوت الثقافة، زي ما حصل في بيت ثقافة الغردقة لما الأمن منع عرض مسرحية كانت بـ تنتقد حكم الإخوان وقتها في 2013. وبـ نقرأ كمان عن الصحفيين اللي تم قتلهم سواء على أيدى مجهولين أو وسط اشتباكات الشرطة والمتظاهرين خاصة في أحداث فض اعتصامات الإخوان، واللي حصل بعدها من مظاهرات ومسيرات سقط فيها عدد مش قليل من الصحفيين والمصورين وهم بـ يقوموا بشغلهم. كمان من أهم البلاد اللي اهتم بها الكتاب.. اليمن اللي واجه فيها الصحفيين عنف زيادة وغير مبرر من الجماعات والأمن، كان بـ يوصل في معظم الأحداث لحد القتل، وبـ يذكر الكتاب واقعة إطلاق النار على صحفي عمره 28 سنة في منزله في فبراير 2013 على يد مُسلح ارتدى زي الجيش اليمني، مش بس كده، جريمة القتل اكتملت بقتل صديق الصحفي بعد ما قام المُسلح بإشعال النار فيه.. وفي يوليو من نفس السنة، وأثناء عودة الفنان سام عبد الجبار إلى منزله بعد ظهوره على التليفزيون اليمني، وإبداء اعتراضه على انعدام القانون والأمان في بلده قام أحد المجهولين باغتياله على الطريق. في ليبيا كان الاغتيال حاضر ضد الصحفيين، وقائع كثيرة منها حادث الصحفي والإعلامي الفلسطيني الأصل عز الدين قوصاد، واللي كان بـ يقدم برنامج عن التنمية البشرية في قناة "الحرة الليبية"، فوجئ في يوم 9 أغسطس العام الماضي بمجهول اعترض طريق سيارته أثناء عودة للمنزل في بنغازي بعد صلاة الجمعة، وقام المجهول بإشعال النار فيه. لسه في الكتاب دول كثير بـ يعاني في الصحفيين والإعلاميين من العنف زي الأردن والسعودية والبحرين اللي بـ يتحكموا في الإنترنت بشكل كبير ومزعج جدًا.. لكن الغريب أن الكتاب تجاهل دولة مهمة زي سوريا اللي أكيد بـ تواجه عنف شديد ضد الصحفيين سواء من ناحية حكومة بشار أو من ناحية الجماعات الدينية، وتجاهل كمان دولة مزعجة بإعلامها زي قطر، واللي وصلت لنا أصلًا عن طريق إعلامها وتحديدًا قناة "الجزيرة" ورغم كده إعلامها بـ يواجه سيطرة وقمع.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح