دليل كتب القاهرة - أحدث المقالات عن الكتاب العرب ومؤلفاتهم

كتب

برج العذراء: الرواية الممنوعة
اصدرت في: 21/11/2016

الأبراج عالم كبير فيه ناس مقتنعة بيه جدًا، وناس شايفة إن الأبراج تخاريف، وناس بتقول حرام، بس رواية برج العذراء لعم إبراهيم عبد المجيد "الكاتب المخضرم" واخدة من البرج اسمه، أما اللي جوه حاجة تانية خالص، دنيا مختلفة، مش مجرد كلام عن برج، دي كلام عن حياة وبشر، بيقول: إنه فكر يسميها رواية سيريالية، وبعدين قال لأ هي رواية واقعية، بس فيها خيال جامح، فقال في النهاية إنها رواية وبس. برج العذراء بتحكي عن حانة بيتجمع فيها الرجال النساء، كله بيدور على الفطرة والبكارة في حياته، البكارة اللي ضاعت في تلوث الحياة، يا ترى هيلاقوها؟ الرواية تاخدك من أول كلمة فيها، عالم تاني واقعي جدًا عن شخص ماتت زوجته وبنته في حادثة، وكمية الألم والوجع اللي حاسس بيهم، ولما صلح عربيته، وساقها وهو راجع من الطريق الساحلي، قابل شرطي عجيب اتكلم معاه شوية واختفى بعدها مارجعش، وفضل ماشي على الطريق بسرعة كبيرة جدًا علشان يعمل حادثة تانية ويخبط شاب، يموت بعدها على طول، هنا تظهر العقدة من أول كام صفحة هتيصرف إزاي ويعمل ايه وايه اللي بيحصل؟ في قسم الشرطة بيلاقي مشاكل كتير وبيكتشف حاجات كتير، وبنقعد شوية مش فاهمين إيه اللي بيحصل، وهو مين الشخص ده، هل هو راشد، ولا سليم، وإيه حكاية الشخصيتين، وإزاي صوت سليم الأنثوي بيتنقل لراشد، وبيخليه شخص تاني، تتابعات كتيرة قوي بتحصل وأنت عايش معاهم في عالم تاني، بيختلط فيه الحقيقي مع الخيالي، لدرجة أنك مابتقاش عارف نفسك وصلت لفين. هي دي طريقة الروائي إبراهيم عبد المجيد مزج الخيال مع الواقع، وبيعتبر واحد من أهم كتاب الرواية الواقعية السحرية في مصر، طريقته بعيد عن طريقة ماركيز، يعني مش زي كتاب كتير لما كتبوا في الواقعية السحرية قلدوا ماركيز، عبد المجيد ليه حالة تانية وعالم تاني، دنيا مختلفة بجد، بيخليك مش قادر تستوعب تطور الأحداث وكمية العجايب اللي بتحصل وكأنك على بساط الريح، وعلشان تفهم لازم تكمل قراية، فيبدأ بعدها في تقنية سرد جميلة يتكلم بهدوء على لسان الرواي علشان يفهمك. الوقت اللي بتبدي تفهم فيه الرواية بتكون وصلت لقمتها للذروة يعني، وده بيخليك قاعد ومكمل معاها، عايز توصل للنهاية علشان تعرف إيه نهاية العالم العجيب ده. مشكلة برج العذراء واللي خلتها فترة ممنوعة من دخول مصر، إنها حاوية لمجموعة ألفاظ صادمة شوية زي مثلًا رسم صورة المريض اللي قبل ما يموت على طول "يعبث بمؤخرة الممرضة" وده خلي ناس تهاجم الرواية، وناس تقول إنها خادشة، وناس تالتة قالت أنها حرية في التعبير، هنسيبلكم أنتم القرار لما تقروها.

...

بيوت عارية: تحفة أدبية مميزة لـ مصطفى عبد ربه
اصدرت في: 20/11/2016

[سيمحو النسيم آثار أقدامنا على الرمال ترى من سوف يخبر الأبدية أننا مشينا مرة ههنا] [غنيتُ كي أزن المدى المهدور في وجع الحمامة، لا لأشرح ما يقول الله للإنسان] المقطعين السابقين افتتح بهم الروائي مصطفى عبد ربه روايته الأولى [بيوت عارية] الأول من أغاني قبائل البوشمان والثاني من قصيدة للشاعر الكبير محمود درويش. كأنه بيقول من البداية أنه مش مهتم بالأفكار ولا بالقضايا العظيمة، لكنه مهتم بحياة الناس البسيطة وتفاصيل حياتهم. تحكي الرواية قصة منطقة أو شارع في مدينة ما لم يذكر الكاتب اسمها. من البداية بنشوف نشأة المنطقة كلها. الحكومة قررت تبني مستشفى لأمراض الصدر والحميات في مكان بعيد عن التلوث والعوادم وبعيد عن عيون الناس. المحافظة عرضت الأراضي المحيطة كلها للبيع. وبعد فترة بسيطة انتشرت البيوت والناس، وتكوّن شارع مستشفى الصدر. في الفصل الثاني، وبعد ما شفنا الجيل الأول وبداية الشارع، الكاتب بيتخطى حوالي عشرين سنة علشان نشوف الجيل الثاني اللي هما أبطال الرواية الرئيسيين. وهي مجموعة من المراهقين يجمعهم شارع واحد. وهنشوف مغامراتهم ولعبهم وخلافاتهم. وبالتوازي هنشوف عدد كبير من الشخصيات برضه من سكان الشارع. واختار الروائي مصطفى عبد ربه أنه يكتب الرواية بطريقة (الراوي العليم) علشان يقدر ينقل للقارئ كل تحركات وتفاصيل هذا العدد الكبير من الشخصيات. وبعد منتصف الرواية هنلاقي الشخصيات الرئيسية بتظهر وبتاخد مساحة أكبر. وهم أهم 3 شخصيات في الرواية: أحمد يوسف عاشور – الإمام الفارسي – محمد حسين. كل واحد منهم له عالم مختلف وتفاصيل تبدو غريبة شوية. لكن الكاتب نجحأانه يضفرها بشكل كويس. وتتحط جنب بعضها من غير ما نحس بأي نفور. هنلاقي مثلًا الإمام الفارسي (مبيض محارة) يُصر على كتابة لفظ الجلالة على اسمنت السقف الطري بمسمار صغير، بعد كل جدار يخلصه. وهنشوف أحلام أحمد يوسف. وهذيان محمد حسين وعلاقته السيئة بزوجته. ومن خلال الأحداث السريعة، ومغامرات مجموعة المراهقين، وعلاقات سكان الشارع بحُكم الجيرة هنشوف أجواء المنطقة كلها. وأحداث ضخمة زي حرب الخليج وزلزال 92 رغم أنها مش واضحة قوي إلا أنها مؤثرة في حياة كل أبطال الرواية. اللغة بسيطة ومحايدة من غير أي زخارف، أشبه بلغة الجريدة. لكن الإصرار على كتابة جمل فعلية قصيرة عطل سلاسة الحدوتة. واللي وازن الإيقاع شوية وجود أحداث سريعة وانتقالات كثيرة من مكان للثاني. الرواية في المجمل جيدة جدًا بالنسبة لرواية أولى. ومصمم الغلاف كان موفق تمامًا في تصميمه.

...

رواية أماريتا: ثروتك هي ذكائك
اصدرت في: 17/11/2016

فكرة جديدة وعنوان يشد "أماريتا" يا ترى إيه الموضوع وإيه هي أماريتا؟ هل جرّبت تتعامل بعملة مختلفة عن العملات الورقية .. ليست معدنية وليست ذهبية …الثروة هنا من نوع آخر … لن تدفع مالاً لتأخذ ..بل ستدفع من ذكائك ..ستدفع من وحدات عقلك… ولكن انتبه فـ للثروة حدود …فهنا المفلس لا يعامل باحتقار أو يُهان كما يحدث في عالمك .. بل يتعرض للموت .. احذر .. فأنت .. في أرض زيكولا. ده جزء من الرواية اللي هي الجزء التاني من أرض زيكولا، رواية بتعيشنا في عالم من الخيال الحلو والممتع، بتحكي عن عالم التعامل فيه مش بالفلوس، ولا المبادلة، التعامل فيه بوحدات الذكاء، يعني كل ما يكون ذكاءك كبير تبقى غني، وكل ما تبقى أقل أنت فقير، فخلي بالك من نفسك، علشان هتعيش في عوالم داخلة في بعض، وحالات من الحب والتضحية الجميلة. الرواية مكتوبة بلغة حلوة وسهلة قريبة من الناس، مافيش أي تعقيد، هو حد قاعد وعمال يحكي، ودي طريقة عمرو عبد الحميد اللي متعودين عليها، بيشتغل على المواضيع بعد ما تخلص في دماغه، فتحس أن فيه حد حافظ حدوتة اتقالت له كتير قوي، وهو بيحكيها لك وبس. كمان شدنا للرواية لو نفع يعني نقول أسلوب الخطف، أنه بيخطفك من أول جملة لأرض تانية وعالم تاني، وشخصيات وناس وأسامي وتصميمات، وأسواق وحاجات كلها مختلفة ومبتكرة، والابتكار هو اللي بيخلي الكتابة تبقى حلوة وممتعة. لو بتدور على متعة ونوع مختلف من الكتابة يبقى لازم تقرأ لعمرو عبد الحميد علشان هو مختلف وعايش مع الشخصيات بتاعته، بيخليها هي اللي تسرد شوية، والراوي يسرد شوية، فمابتحسش بالملل، بالعكس بتبقى مبسوط وعايز تعرف ها هيحصل إيه تاني.

...

يوم انتحار عزرائيل: الحرب بين الدنكا والنوير!
اصدرت في: 13/11/2016

تحكي الرواية قصة الحرب الطويلة بين أكبر قبيلتين في جنوب السودان. قبيلة الدنكا وقبيلة النوير. وكثير من المعارك المذكورة في الرواية حدثت فعلًا. الجنرال فرانكو بطل الرواية شخص سادي وقاتل بالفطرة. يتلذذ بتعذيب الأسرى وقتلهم. قوات التحالف الشعبي لتحرير السودان استخدمت فرانكو في قتل المتمردين وبعدين ركنوه على الرف! ولسنوات طويلة سكن في منطقة نائية فقيرة. وبعيدًا عن المناصب والمكاسب اللي حصدها زملاء الكفاح المسلح! زي الكولونيل جرمايا اللي تحول لرجل أعمال في زيّ عسكري. تحول فرانكو بعد التهميش إلى أداة تدمير. وبطرق وحشية عذب وقتل الآلاف من أبناء قبيلة النوير. قتلهم من باب الانتقام ولأنه شخص سادي مجنون. بيتلذذ بتعذيب الغير. في الجزء الأخير من الرواية تصدر أوامر من القيادة العامة للجيش بالذهاب إلى مدينة (بور) للقضاء على جيوش المتمردين. تتحرك القوات تحت قيادة الكولونيل جرمايا. ومن وراه الكولونيل فرانكو بقوات دعم ومساعدة. جرمايا بيهرب في وسط المعركة، لكن فرانكو الشجاع المتعطش للدم بينتصر على جيوش المتمردين وبيكسب المعركة وبياخد ترقية وبيبقى جنرال (ما يعادل رتبة لواء). فرانكو بيفرح بالترقية والتقدير اللي جاله متأخر بعد فترة طويلة من التهميش في القرى النائية. وبتصدر أوامر لفرانكو المتعطش للدم علشان يروح مدينة (ملكال) للقضاء على جيوش المتمردين من قبيلة الدنكا. وفي نفس الوقت خال الجنرال فرانكو يبوح بسر غاية في الخطورة وهو على وشك الموت. بيقول لفرانكو إن أبوه مش أبوه الحقيقي ولا دي أمه. لكنه مجرد لقيط لاقاه الراجل اللي خد اسمه (ماجوك ماجاك) وهو رضيع تحت أنقاض قرية تسكنها قبائل الدنكا واتبناه بناء على رغبة زوجته. وفي النهاية فرانكو مش بيتحمل الصدمة. بيفتكر كل قرايبه اللي قتلهم وعذبهم بطريقة وحشية. ومطلوب منه يقتل متمردين من الدنكا في مدينة ملكال. وبينتحر ويضرب نفسه بالنار. الكاتب استخدم الفلاش باك علشان يورينا جزء من طفولة الجنرال (فرانكو ماجوك ماجاك) وإزاي أبوه -بالتبني- كان بيعذب أمه وبيضربها بالكرباج يوميًا. ومن هنا انتقلت اللعنة للولد الصغير. ومن الشخصيات المهمة في الرواية شخصية (وليام ويلسون) صديق البطل المقرب الوحيد. وليم ويلسون عكس صديقه تمامًا. صحيح هو رجل عسكري، وصديقه من الطفولة لكنه بيكره العنف وبيرفض تصرفات فرانكو. ودوره في الرواية أنه يبروز سادية البطل. ويورينا مدى بشاعة تصرفاته. نجح آرثر في نقل تفاصيل الصراع، بقدرته على كتابة مشاهد عالية الدقة. والاختبار الصعب فعلًا -تخطاه آرثر بنجاح- هو نقل تعقيدات الصراع في جنوب السودان. علشان القارئ يعيش داخل الأحداث، ويتفاعل مع الشخصيات. الكاتب كان عايز يوصل رسالتين في غاية الأهمية من خلال روايته. أولًا بيقول إن الحرب أسوأ حاجة بيعملها الإنسان. وده ظهر من خلال حرصه على وصف تفاصيل المعارك، ومشاهد القتل والتعذيب. وثانيًا عايز يقول إن الصراع يبان من الظاهر أنه صراع بين قبيلتين على مكاسب سياسية. لكنه في الحقيقة أكبر من كده. الصراع أصلًا بتغذيه قوى خارجية مستفيدة من حالة الحرب الدائمة، عشان تنهب كل خيرات أفريقيا. والجنرال فرانكو واللي زيه مجرد قطع شطرنج. يتم التخلص منهم بسهولة بعد إنتهاء مهمتهم، إما بالتهميش أو بالإغتيال.

...

أن تبقى: غريق بيواجه باريس
اصدرت في: 10/11/2016

كان كل شيء باردًا وخاليًا من الإثارة حتى تلك اللحظة التي قرّرت فيها التمرّد على مساري المحبط وصنع شيء خارق يحرّرني من جحيم الفراغ. منذ وضعت قدمي اليمنى في القارب الخشب المتراقص على الشاطئ في ليلية خريفيّة غاب قمرها، أصبحت حياتي تتابع مرتجلًا لحالات استثنائية، خضت المغامرة تلو الأخرى وعرّضت حياتي للخطر أكثر من مرّة. بكلمات بينساب منها رائحة العطر الباريسي الجميل، وشايلة هم ووجع وحياة مختلفة عننا، بتبدأ رواية أن تبقى، اللي بتعرفنا على أماكن جديدة. في شتاء باريس اللي ممكن نشوفه في فيلم، أو تقرأ عنه في رواية مترجمة، هتلاقوا الحياة بكل ما فيها من فطرة حلوة، هتلاقوا كمان امتحان للإنسان في الغربة، يا ترى هيساعد الغريب في بلاد غريبة ولا هيقف عند حدود المعرفة. رسمة الشخصيات هايلة، بتقدر د/ خولة حمدي في رواية "أن تبقى" تعملنا مجموعة شخصيات صعب تتعرف على كل حياتهم وقصتهم إلا لما تكمل الرواية لآخرها، وده منطقتها وأسلوبها، يعني لازم تشدك لحد آخر الرواية، وإن كان أول الرواية فيها شوية تعب وملل من كتر الوصف، وأنك تقريبًا مش فاهم حاجة، بس لما تصبر وتكمل هتفهم وتستمتع بالرواية. الرواية بتهدي سردها للفقرا في كل مكان، مش الفقراء اللي مش معاهم فلوس لكن للفقراء في الغربة اللي ماعندهمش أقارب وصحبة وحياة، الناس اللي قررت تروح لبلاد تانية وتشتكي من البعد، الرواية بتأثر في قلبك وتخليك تفكر في السفر والحياة من زاوية تانية، زاوية التوهان والاعتراف بالذنب لما تعمله، زاوية اللغة السهلة والرصينة والتشبيهات اللي متاخدة من الواقع، زاوية الحرب اللي قرر يشنها البطل على كل الناس علشان هدف واحد. الرواية تتقري وأنت مستجم في أجازة ومستمتع ببرج إيفل وبنايات باريس وبناتها الحلوة ولعبة السياسة اللي دايمًا متعبة.

...

حذاء فيلليني: الأحلام أصدق ما يكون
اصدرت في: 01/11/2016

أنا كل يوم أسمع فلان عذبوه أسرح في بغداد والجزاير وأتوه ما أعجبش م اللي يطيق بجسمه العذاب وأعجب من اللي يطيق يعذب أخوه. عجبي ! رباعية صلاح جاهين بتعبر عن عالم الرواية بشكل ممتاز. مطاع المعالج النفسي بيتعرض لتعذيب رهيب في المعتقل في دولة عربية، هنعرف في النهاية إنها سوريا. العنوان فيه خدعة. الرواية مش بتتكلم عن السينما لمجرد ذكر إسم المخرج الإيطالي الكبير فيديريكو فيلليني لكنها استوحت أشياء من أعماله ومذكراته. الكتابة في منطقة أدب السجون قليلة نسبيًا في الأدب العربي. لكن على قلتها هي أعمال متميزة. زي رواية تلك العتمة الباهرة للروائي الجزائري الكبير الطاهر بن جلون. لكن هنا وحيد الطويلة اختار طريقة مختلفة تمامًا علشان يحكي الحكاية. اختار الكاتب شكل الحوارات الداخلية الطويلة. ويمكن الطريقة دي متناسبش بعض القراء، لأنها هتحسسهم باللخبطة والإرتباك. لكن ده مقصود كأن عقل مطاع اختل بعد ما تعرض للتعذيب. مطاع دخل المعتقل من غير تهمة واضحة. وفقد إنسانيته وكرامته. حبيبة مطاع القديمة هتزوره في العيادة مع جوزها العجوز شبه الميت. مطاع هيعرف إن جوزها هو اللي عذبه في المعتقل من عشر سنين. والزوجة هتحكي إن جوزها العسكري السادي كان بيعذبها هي كمان. وهنا هيتحول مطاع من ضحية لجلاد. مطاع ماكنش عايز يقتل الجلاد اللي عذبه في المعتقل، لكن كان عايز يعذبه. وبيقع في صراع كبير. بين رغبته في الإنتقام وظهور جوانبه السادية، وبين رجوعه للإيمان بالحب بعد ظهور حبيبته الأولى اللي هي زوجة السجان. كأن الكاتب بيقول أن الحاكم الديكتاتور بيسرق الأحلام والحبيبة وكرامة الإنسان. الرواية مختلفة في كل عناصرها تقريبًا. ومن الأفضل تقرأ بتأني.

...

فهرس: أول دقيقة في الحرب!
اصدرت في: 31/10/2016

يستمر الروائي العراقي الكبير سنان أنطون في الكتابة عن العراق، وطنه المحتل. وفي رواية فهرس بيقدم لنا صورة معبرة لبغداد قبل الاحتلال وبعده. نمير بطل الرواية أستاذ جامعة عراقي يدرس الأدب العربي في أمريكا -فيه شبه كبير من الكاتب نفسه- بيروح بغداد كمترجم مع فريق أمريكي (روي ولورا) اللي بيصوروا فيلم وثائقي عن احتلال العراق. وفي شارع المتنبي الشهير في بغداد بيقابل نمير بائع كتب اسمه ودود. بيقول لنمير أنه بيعمل فهرس مخصوص لتأثير أول دقيقة في الحرب على كل شيء في بغداد. فهرس لتأثير الحرب على الأشجار والبيوت والمحلات مش تأثيرها على الناس بس. ودود شايف أنه لازم يحكي حكاية كل جدار وكل شجرة انتهت بسبب الحرب. نمير بتعجبه الفكرة وبيشارك ودود في العمل عليها. وكعادة سنان أنطون بيلف شوارع بغداد، وبيستعيد ذكرياته فيها. وبنشوف الحياة مقسومة نصين، نص في بغداد والثاني في نيويورك. مش أحسن ما نبقى زي سوريا والعراق؟ السؤال ده سمعناه كتير جدًا الفترة الأخيرة. والرواية بتجاوب عليه لكن بشكل غير مباشر طبعًا! نمير من خلال استعادته لذكرياته في بغداد في التسعينيات بيقول أن السبب بكل بساطة هو صدام حسين. والحكم الديكتاتوري الرهيب، اللي خوّف الناس من مجرد التفكير. ودخل في حرب مع إيران والكويت أدت الى حصار اقتصادي رهيب وإلى دخول أمريكا في النهاية في 2003. اللغة متميزة في كل روايات سنان أنطون، لكن المخاطرة اللي بيتعمدها في كل رواية هي كتابة اللهجة العراقية. ورغم صعوبتها نجح إنه يوظفها كويس. رواية مهمة ومختلفة. بترصد تفاصيل مأساة شعب كامل وقع بين حكمين أسوء من بعض. حكم الديكتاتور وحكم الاحتلال.

...

صلاة تشيرنوبل: جهنم في الربيع!
اصدرت في: 25/10/2016

في 2015 فازت الصحفية البيلاروسية سفيتلانا ألكسيفيتش (معلش إعذرونا بس هي إسمها كده) بجائزة نوبل عن مجمل أعمالها. ومن أشهرها صلاة تشرنوبل. عن أكبر كارثة نووية في القرن العشرين. وواحدة من أسوأ الحوادث في التاريخ. فوزها خلق أسئلة كتير عن شكل الأدب. وهل التحقيقات الصحفية اللي بتكتبها سفيتلانا تعتبر أدب ولا لأ؟ وهل الأدب يستوعب أشكال تعبير مختلفة ولا الأشكال المعروفة بس؟ بعيدًا عن الأسئلة، كتاب صلاة تشرنوبل هو عبارة عن رواية كبيرة، فيها شخصيات كتير بتحكي الكارثة اللي حصلت في 26 ابريل عام 1986. الكاتبة راحت أوكرانيا لإجراء تحقيق صحفي، تجمع فيه شهادات حية من ناس عاشوا الكارثة واتأثروا بيها تأثير مباشر. صدر الكتاب لأول مرة عام 1997 وترجمه أحمد صلاح الدين عن الروسية. من البداية لازم نعرف الأول إيه اللي حصل. إيه اللي أدى إلى انفجار المفاعل النووي؟ طبقا لنتائج التحقيقات. واحد من المهندسين الشبان اللي شغالين في المفاعل-بالواسطة- قاعد زهقان في وردية ليل، حب يلعب شوية، فرفع درجة حرارة المفاعل!. الحرارة وصلت لدرجة رهيبة، أعلى من درجة حرارة سطح الشمس ! -ومن غير الدخول في تفاصيل- انفجر المارد النووي. ومقدرش ماء التبريد يخفف درجة الحرارة. بالعكس زود الكارثة. لأنه اتحلل لعناصره الأساسية قصاد الحرارة الرهيبة. اتحلل لأكسجين والهيدروجين. وأي طالب في أولى إعدادي هيعرف إن واحد يشتعل بفرقعة والتاني يساعد على الاشتعال! وانفجر المفاعل، والمهندس الشاب اتبخر ! زوجة واحد من رجال الإطفاء قالت في شهادتها على الحادث: "كان اللهب في كل مكان، كانت السماء بأكملها تحترق، حتى أن سرعة الانفجار وعدم توقع حدوثه، جعلت زوجها ورفاقه يذهبون لإخماد الحرائق من دون بذلاتهم المطاطية الواقية، لتمتصّ أجسادهم جرعات عالية جداً من الإشعاع." الاشعاع الذري لوّث كل شيء، وتم تهجير كل سكان القرى والمدن المجاورة في دائرة قطرها خمسين كيلو. لكن حالات التلوث الإشعاعي كانت كثيرة. والأسوأ إنها بتمتد لمئات السنين. وتنتقل من جيل لجيل بجينات مختلة، وتسبب تشوه الأجنة. وفي شهادة مؤلمة لأم أصيبت بالتلوث الإشعاعي. قالت إنها ولدت بنت مشوهة. معندهاش غير عينين بس وكلية واحدة!. خافت الأم وعاشت جنب بنتها في المستشفى وقت طويل. وسألت نفسها: لو البنت عاشت وكبرت وسألتها هي ليه طلعت مشوهة كده؟ هترد الأم تقول إيه؟ ناضلت الأم الأوكرانية 4 سنين عشان تاخد ورقة رسمية من الحكومة تثبت إن اللي حصل للطفلة كان نتيجة الإشعاع، عشان بنتها تشوف الورقة لما تكبر. لكن مقدرتش توصل مع الجهات الرسمية لأي شيء. والملاحظ في الشهادتين اللي فاتوا هو التعتيم الإعلامي والإهمال الحكومي في التعامل مع كارثة بالشكل ده. وإن الفساد هو سبب المشكلة أصلًا. لأن المهندس اللي شغال في المفاعل متعين بالواسطة. وأي حد عايش في نظام حكم ديكتاتوري زي روسيا وقت الحادثة هيشوف نفس أحوال بلده. وإن البلد لرجال السلطة مش للناس. الكاتبة بتقول إن الرواية مش بتتكلم عن أزمة الإنسان الروسي أو الأوكراني بس، لكنها بتتكلم عن أزمة الإنسان في العالم كله. وجزء من جمال الكتاب إن سفيتلانا حولت التحقيقات الصحفية الجافة، والشهادات المؤلمة إلى ملفات أدبية، وروايات ممتعة. وحكت الناس البسيطة، المهمشين في قلب المشهد، قدام الكادر. عشان يحكوا حكاياتهم من غير أي تدخل. ووصلت أصواتهم للعالم كله.

...

سجن الزمن: بين الخيال العلمي والتراث
اصدرت في: 24/10/2016

بتختلف مقدمات الكتب حسب رغبة الكاتب، وثقافته ومرجعيته الفكرية، ساعات بيبقى عايز يشوق الناس، وساعات بيعمل ملخص للرواية، وساعات بيتكلم بيتكلم علشان هو محتاج يقول الكلام ده قبل ما تقرأ الرواية، وإحنا دلوقتي قدام النوع التالت، النوع اللي بيتكلم بيتكلم علشان عايزك تفهم حاجة معينة قبل الرواية. تفهم إيه السؤال بقى هنا تفهم إيه؟ أحمد جمال من الواضح أنه شخص اجتماعي ودي أول حاجة هتفهمها عنه من كمية الإهداءات اللي بيبعتها للناس اللي يعرفها واللي ساعدته قبل المقدمة، أما المقدمة بقى فبيتكلم فيها عن فكرة الأسطورة الشخصية، وإن الكون كله بيساعدك علشان تحقق أسطورتك، وده بيرجعنا لرائعة باولو كويلهو "الخيميائي" واللي بيتكلم عن نفس الفكرة، لكن جمال بيزود كمان إن فيه وقت بتحس فيه بالفشل وبتبقى وحيد وتعيس ومكتئب، وفجأة بيجي لك الأمل من مكان عمرك ما فكرت فيه وبيختم: "الفكرة هي التي تبني قوة الشخصية.. فكما تفكر تكن" الرواية اختيار الاسم جيد بالفعل، التركيبة بتاعة سجن الزمن، بتخليك تقف قدام الرواية وعايز تفهم إيه الموضوع، والرواية كمان بتنتمي للخيال العلمي، خيال معتمد على فكرة اتقالت زمان في حكايات ألف ليلة وليلة وكتاب "أخبار البلاد والعباد" عن مدينة كل اللي فيها ستات، مافيهاش ولا راجل، موضوع غريب وممتع في الوقت نفسه.. يا ترى إيه اللي ممكن يحصل لما يلاقي شخص ما نفسه علي أرض كوكب جديد، وحواليه مجتمع من النساء بس ركز مش زي النساء المعروفات عندنا.. المجتمع ده لا يعرف من هم الرجال؟ ولا حتى شكلهم عامل إيه، ولا إيه هي وظيفتهم، ممكن تبعد بفكرك وتقول طب إزاي مجتمع كله ستات وموجود بيخلفوا إزاي مثلًا؟ أو عايشين إزاي؟ طب يا ترى هيعملوا إيه مع الشاب ده؟ ويا ترى هيعاملوه إزاي؟ سيبك من كل ده، هو يا ترى هيعاملهم إزاي، وهيتكيف مع الموضوع إزاي؟ الأسرار طب إيه سر الأقمار الدموية والبوابات النجمية اللي شغلت مكان كبير من التاريخ الكوكب ده .. وإيه حكاية الأرض الملعونة.. هل هي أرض منسية، وماحدش يعرف عنها حاجة، نسيها التاريخ، هل هي على كوكبنا ولا كوكب تاني، أسئلة كتيرة هتبان لكم. الميزة الرواية فيها ميزة مهمة وهي إنها بتعمل مكس بين الواقع بتاعنا وخيال الكوكب التاني، لكن الكاتب أكيد قابلته صعوبة كبيرة قوي، وهي تخيل العالم التاني ده، وشكله ومخلوقاته، علشان ده صعب جدًا، لشوية أسباب وهي أنك ترسم عالم من أول وجديد محتاج خيال غير عادي، فيه كتير من الأفلام لعبت على الموضوع ده ورسمت عوالم مختلفة، إزاي هتقدر تعمل ناس ومخلوقات مختلفة من غير ما يشبهوا الواقع بتاعنا.. كل دي حاجات صعبت المهمة على جمال لكنه قدر بشكل كبير يحولها علشان تبقى حاجة مختلفة ومميزة.

...

بره الدنيا: من أبعد مكان جواك
اصدرت في: 21/10/2016

لما عملنا بحث عن الرواية، علشان نشوف المكتوب عنها لاقينا ناس كتير قوي بتشكر فيها، لكن فيه شخص كتب عنها رفيو قوي على موقع "goodreads"بيقول فيه: "مش هقول لك الرواية حلوة والكلام ده لأن هيكون قليل عليها قوي، الرواية فوق الرائعة، كمية المشاعر اللي فيها حلوة وصادقة وصعبة قوي، من زمان ماقرتش حاجة كده، عايز أقول لك إني عينية مابطلتش تدمع من أول ما بدأت اقرأ لحد ما خلصتها، بقرأ فيها ونفسي أخلصها ، بس بتيجي فيها مواقف مش بقدر أكمل من فرط المشاعر اللي فيه". الرواية عبارة عن وجع قلب، لو حبينا نلخصها يعني وإحنا بنتكلم عنها، ناس كتيرة اتكلمت عن المشاعر اللي فيها وعن الحب الصادق، لكن بجد هي رواية بتوجع القلب، علشان جنب المشاعر اللي فيها مليانة كمية حزن ووجع وفراق مش طبيعي، مع إنها 279 صفحة، يعني مش كبيرة قوي، بس مليانة بالمشاكل اللي بتدور حوالين الغربة والحب، مش كل واحد سافر بيحس بغربة، ممكن الواحد يكون عايش بين أهله وناسه وحاسس بالغربة برضه، ودي بقى بتبقى غربة صعبة جدًا وبتتعب الواحد قوي، ممكن تخليه يعيط وهو قاعد لوحده من غير سبب. الرواية دي بتتكلم عن الهروب من الواقع اللي عايشينه بلغة كلها حاجات حلوة وتصوير للمشاهد هادي جدًا ومتسلسل وبيسمع للمشهد اللي وراه، هنقرأ الرواية، وكمان هنعرف فيها أن مش كل تجمع لشوية ناس وبينهم قرابة هيبقى اسمهم "عائلة" ممكن عيلتك تبقى هي اللي بتبعدك عنها، ممكن تحس بالغربة جواها، إحنا مش عايزين نتكلم عن أحداث الرواية قد ما عايزين نتكلم عن وصف محمود بكري للمشاعر، وعن لغته اللي بيدخلها في الحوارات بين الشخصيات، ويمكن دي تاني حاجة هتشدكم في الرواية، هو مش عامل حوارات بالفصحى، حوارات الشخصيات بالعامية وبيدخل فيها الكلام اللي بنقوله في حياتنا، وده بيخلي الشخصيات حية كأننا عايشين معاهم، وبيقربهم لقلبنا أكتر، ودي شطارة من الكاتب لازم نتكلم عنها. "ود" و "حمزة" و"علا" علاقات غريبة ومتداخلة بين الشخصيات دي هتعيشوا معاها علاقات بعيدة عن الابتذال والزحمة فيها هدوء نفسي يطلعك بره الدنيا (من أبعد مكان جواك).

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن