دليل كتب القاهرة - أحدث المقالات عن الكتاب العرب ومؤلفاتهم

كتب

الحالة سايكو: الجواب بـ يبان من إهداؤه
اصدرت في: 13/05/2015

لإهداء فقرى بجد: إلى رفيقة الطريق إلى شريكة حياتى إلى من أضاءت لى الطريق إلى كل ما أملك إلى أعز ما أملك إلى.. عربيتى الأفيو 2006...! هـ تموت من الضحك: عمرو الانكشارى كائن ضاحك بطبعه، ربنا أعطى له موهبة الضحك دايمًا والقدرة على انتزاع البسمة منك.. كتاب ننصحك تقرأه لو أنت مكتئب.. لأن أكيد هـ تضحك.. لأ هـ تموت من الضحك. هـ تموت: النظرية.. وبما أن كلنا هـ نموت فلازم نعيش حياة حلوة في الأول.. وعلشان نعيش حياة حلوة لازم نبقى أسوياء وعلشان نبقى أسوياء يبقى لازم تكتشف السايكو.. الجهاز: الكتاب هو جهاز لكشف السايكو، يعنى بـ يكتشف الأفعال الخاطئة اللي بـ نعملها في حياتنا اليومية، فيه مجموعة حالات مجنونة لازم تكون حضرتك عديت عليها أو غيرك وساعتها استنى المفاجأة. المفاجأة: بعد ما تقرأ الكتاب هـ تكتشف أنك سايكو في بعض حالاتك. وأن صاحبك كده برضه. وحد من قرايبك. وعيل من عيالك إن لم يكونوا كلهم. والمدام طبعًا ومديرك في الشغل (بس ما ينفعش تقول) فواصل: الكتاب بـ يتكلم عن من أنتم.. إشارة مرور.. سي في.. الاستراحة الأولى (إعلانات).. عقبالنا كلنا.. قصيدة مش عارف.. اشهد يا تاريخ.. اختارنا لك.. الاستراحة الأخيرة (خذوا الحكمة من أفواه المجانين).. والسلام ختام.. بانوراما بـ يتكلم فيها عن حالات كثير تقريبًا أغلبنا بـ يعملها لكنه في المقام الأول راصد جيد جدًا والكتاب نقدر نصنفه اجتماعي نفسي بالدرجة الأولى.. في الختام بـ يقول رباعية لعم صلاح وبـ يرجو أنه يكون جنن الناس وبـ يشكر قراؤه.. وبـ يدفع للعلاج. (تحية للانكشارى) عنبر العقلاء: إزاى تعرف نفسك إذا كانت عاقل ولا مجنون.. أنت في أي عنبر العقلاء ولا المجانين، أنت بـ تكدب؟ بوشين؟ بـ تتأخر على مواعيدك علشان مفترض أن الآخر هـ يعمل كده؟ بـ تركز في حالك ولا في حال الناس بـ تضحك مع زمايلك وأنت مبسوط، ولا بـ تضحك عليهم.. الخريطة: علشان تقرأ الحالة سايكو حضرتك محتاج خريطة.. والخريطة دي هـ توضح لك طريقة كتابة الانكشارى واللي ماشية على قواعد ثابتة وواضحة: الانكشارى قارئ علم نفس بجد. يجيد صياغة كلامه. بـ يفهم في الناس.. يعني بالدارجة "يفنطك وأنت قاعد" الكتاب ده حصيلة خبرة شخصية ومعرفة ناس كثير.. عمرو يعرف أصحاب كثير. الكتاب ده عدى على كذا حد قراه بعد ما كتبه عمرو وعلق عليه. إحنا أمام مشروع كاتب قوى ومبهر وجديد. الأسلوب الأمثل للتعامل مع الكتاب ده.. ارجع للمقدمة: "نطلب من السادة القرّاء أثناء قراءة الكتاب، ربط الأحزمة، وأخذ نفس عميق، وكوب شاى مع قطعة جاتوه والابتعاد عن أى مؤثرات خارجية وداخلية".

...

الورقة: السيلفى بقيت صورة والورقة بقيت كتاب
اصدرت في: 15/04/2015

الفكرة: الفكرة بدأت من تصميم كاريكاتير على الفيسبوك... رفع إسلام جاويش وعمله شخصية مجردة خالص.. عبارة عن خطوط بـ تشكل الجسم ورأس من فوق.. وبدأت الفكرة فى الانتشار وحسين يعمل Share لعلى، وعلى لأمينة، وأمينة لصاحبتها، وأصحابها لأصحابهم ومن مجموعة للثانية ومن صفحة للثانية.. بقى المتواصلين على الفيسبوك بـ يستنوا الورقة. الورقة: الاسم فكرته هائلة بجد، لازم نفهم ده وإحنا معانا الورقة لأن كل حاجة بـ تُقال فى ورقة واحدة.. كل مشاكلك هـ تلاقيها فى ورقة.. كل حياتك وضحكك والفنون والسخرية والمجتمع واللى بـ نتعرض لها واللى عاوزين نقوله واللى الناس بـ تتكلم عنه.. كل نميمة المجتمع والأحداث اللى حصلت فى الورقة. طيب إيه: الكتاب بقى تجميع للورقة اللى كان بـ يشتغل عليها إسلام جاويش والموضوع عبارة عن سيناريو صغير جدًا فى الغالب من أربع جمل لكنهم معبرين جدًا وفى صميم الموضوع وفى الغالب هـ يخلوك تموت من الضحك. الموت: المصريين ناس غريبة بجد، بـ يدخلوا الموت فى كل حاجة حتى الضحك.. لما نحب نقول لك أنك هـ تضحك كثير قوى، نقول لك نفس التعبير اللى استخدمناه فى الفقرة اللى فاتت.. "تموت من الضحك"، لكن يا ترى هـ تموت وتشوف الورقة؟.. بصوا الورقة حاجة كده زى الإدمان لما تتعود عليها هـ تبقى بجد نفسك تعرف هو بـ يفكر إزاى وهـ يكتب إيه عن الموضوع المعين اللى حصل فى البلد وهنا المشكلة. المشكلة: المشكلة بقى فى أن ده أكيد بـ يسبب ضغط كبير على إسلام أنه يجيب الفرحة للآلاف اللى بـ يتابعوه على صفحته واللى بـ يتابعوا الورقة وبـ يضحكوا عليها.. مسؤولية أنه يضحك الكم ده من الناس.. ويعبر عنهم ويكتب عن اللى بـ يفكروا فيه واللى بـ يحلموا به.. واللى عاوزينه يكتب عنه.. المسؤولية فى أنك تتابع كل الأخبار والجديد فى بلدك والبلاد اللى أنت مرتبط بها.. المسؤولية فى أنك بـ تسخر من هموم الناس علشان تحاول تخرجهم منها.. يعنى لازم تنجح فى تخريجهم من همومهم.. بالذات فى وقت حرج زى الوقت اللى عايشين فيه.. وقت الناس محتاجة تفرح. الشباب محتاج يضحك من قلبه الأطفال بقوا بـ يدخلوا فيه على الفيسبوك البنات بقيت بـ تتصور سيلفى للفراغ العواجيز بـ يترحموا على زمن الملك اللى بـ يحبوا بعض نفسهم يتجوزوا ومش عارفين العاطلين عن العمل لسه عاطلين وبـ يزيدوا وأنت اتصدرت علشان تضحكهم... إهداء: لكل شخص متعكنن.. لكل أب مخنوق من ولاده.. لكل زوجة نكدية.. هو مجرد محاولة لإعادة تأهيلك.. من شخص بائس.. لشخص أبأس

...

التعويذة الخاطئة: الاستسهال فى الكتابة
اصدرت في: 14/01/2015

بعد الكلام المبشر اللى قرأناه عن "التعويذة الخاطئة"، وبعد ما رأينا الناس على جروبات الفيسبوك وهى بـ تقول أنها مش قادرة تمسك نفسها من فرط الضحك والكوميديا الموجودين فى الرواية، قررنا أننا نقرأها بأنفسنا ونقول لكم رأينا فيها، واللى ساهم فى قرارنا هو كلمة "الطبعة 8" المكتوبة على غلاف الرواية، وده معناه أن حوالى 8000 شخص قرأوا الرواية، لكن هل اللى قرأناه على مواقع التواصل الاجتماعي كان حقيقي؟ الإجابة باختصار وبأكثر الطرق مباشرة هى: لأ!.. الرواية سيئة جدًا ومبالغ فى تقديرها إلى أقصى درجة، وفى رأينا أن كاتبها محمد عصمت مش بس بـ يفتقر للأسلوب الجيد للكتابة، لكن كمان يلزمه إعادة تعريف كلمة "كوميديا" أو "سخرية" من جديد. غلاف الرواية (من تصميم إسلام مجاهد) مصمم باستخدام الكمبيوتر بالإضافة لبعض الرسومات اللى بـ تصور (توك توك) ومحطة مترو أنفاق، بنت محجبة وثلاثة أشخاص واحد منهم على شكل ذئب، الثاني مصاص دماء، والثالث من الزومبى أو الموتى الأحياء، وهو ده موضوع الرواية. الرواية بـ تحكي عن المواقف الكوميدية والساخرة اللى بـ تحصل لمجموعة من الكائنات غير البشرية، واللى بـ تصادفهم لما بـ يلاقوا نفسهم فى مصر، الأمر اللى بـ يخلق عدد كبير من المفارقات اللى المفروض تكون كوميدية، زي طريقة تعامل الناس العادية فى مصر مع مصاص دماء أو ميت حي، أو حتى إنسان على شكل ذئب. البطولة النسائية فى الرواية كانت من نصيب "مديحة لا مؤاخذة"! الشخصية اللى لاقت إعجاب كثير على الفيسبوك، لكن فى رأينا أنها كانت من أسخف شخصيات الرواية وأكثرهم مبعثًا للاشمئزاز، يمكن لأن الشخصية دي كانت مدخل محمد عصمت لمعظم التلميحات والإيفيهات الجنسية الخارجة اللى عاوز يمررها من خلال روايته. الحوار بـ يفتقر لأي نوع من أنواع الكوميديا، مع كثير من التلميحات الجنسية "القديمة" وغير المضحكة بالمرة، بالإضافة لغيرها من الجمل الحوارية اللى بـ تخلط بين الكوميديا وبين الإيفيهات، وبين الضحك وبين استخدام أسلوب النكت "القبيحة" على القهاوي. الرواية طوال الوقت بـ تلعب على وتيرة واحدة: مواقف معتمدة على عدم فهم وتقبل المجتمع المصري للرجل الذئب ومصاص الدماء والزومبي، ومواقف معتمدة على الإيفيهات الجنسية، ومواقف معتمدة على الإيفيهات فى الحوار بين الشخصيات. الحقيقة إحنا مش عارفين هل عبارة "الطبعة 8" المكتوبة على غلاف الرواية حقيقية، أم أنها محاولة من دار النشر "ن للنشر" أنها تزود إقبال المشترين للكتاب، ومش عارفين إيه رأي الـ 8000 كائن حي اللى قرأوا الرواية، لكن رأينا الشخصى أنها مبالغ فيها وتفتقر لأي نوع من الإبداع... للأسف الشديد.

...

يا ذكريات يا: نوستالجيا الزمن الجميل
اصدرت في: 02/11/2014

في الأول لازم نفكركم باسم برنامج قديم أوى هو "يا تلفزيون يا" واللى وائل غنيمى استوحى منه اسم كتابه. فى مقدمة الكتاب هـ نلاقى أن غنيمى كان حريص بتصدير كلام "حميد الشاعرى" لسببين: الأول أنه يضمن بيع الكتاب والثانى أن حميد يعتبر من جيل الذكريات. جيل بـ ييجى، وجيل بـ يروح. إلا جيلنا.. لحد دلوقت فاكرين أغانيه.. إعلاناته.. برامجه..وفوازيره. شهر رمضان مختلف. العيد مختلف. وده بـ يبين قد إيه حميد حابب جيله من ناحية.. وقد إيه الكتاب مركز على الجيل ده فعلًا.. وممكن نعتبر ده مدخلنا للكتاب فى سؤالين: الأول ليه اختار يكتب عن الذكريات؟ علشان نجاوب على السؤال الأول لازم نقول أنه بـ يتكلم عن البيت المصرى فى الثمانينات بكل اللى فيها من اختلاف وبداية تطور.. الكاتب ببساطة عبر عن فكرة تنشيط الذاكرة.. خد عندك.. فاكر زمان لما كنت قاعد مع بابا وماما وبـ تتفرجوا على التليفزيون وأنت قاعد جنبه ساعة علشان تغير المحطة؟.. تخيل دلوقت أن المشكلة دى راحت وبقى فيه الريموت اللى بـ يتحكم فى كل حاجة مش التليفزيون بس. .. والسؤال الثانى: إشمعنى الفترة دى تحديدًا اللى اختارها؟ نقول لكم باختصار أنه كاتب شاطر جدًا وعارف هو بـ يعمل إيه علشان اختيار فترة الثمانينات موفق جدًا لكونها بداية التحول الحقيقى في المجتمع المصرى، بدأ التليفزيون ينتشر وكمان التليفون والجرائد كثرت. أما عن طريقة الكاتب ولغته.. فلازم نقول أنها لغة شيقة وبسيطة وجمله جميلة ومضحكة تشدك للقراءة، قريبة للعامية الجميلة (العامية الشعبية) وده ثانى اختيار صح لجذب الجمهور. أما الألم الجميل بقى هو أنك تستمتع وأنت بـ تقرأ عن حاجات فاتت من الزمن الجميل.. ولازم نقول أن اختيار العناوين مناسب جدًا زى "الريموت كنترول.. بوزو.. أين تذهب هذا المساء؟.. نافذة على العالم.. حدث فى مثل هذا اليوم". ومع أن الكاتب نفسه معترف أنه مش كاتب ولا شاعر ولافنان، إلا أنه حب يفكرنا بحاجات أثرت فينا ومن وجهة نظرنا هو فعلًا نجح فيها.. لكن ما ينفعش أى كاتب يقول على نفسه كده.. حتى لو ضامن أنه كاتب كتاب جيد.. ونقدر هنا نقتبس جزء من فيلم "مولان روج" العبقرى اللى فيه بـ يقول الراوى للبطل: "لولم تخرج الكلمة من داخلك.. لو لم تحترق من أجل الكلمة.. لو لم تشعر أنك ستتمزق من أجل أن تخرج الكلمة وتنتظرها بالساعات أمام الآلة الكاتبة منحنيًا فلا تكتب" وده اللى لازم نؤكد عليه.. الكتابة لازم تكون طالعة من جواك قوى ومقتنع بها علشان الكتاب يعيش.

...

بواقى بشر: هـ تضحك حد الحزن
اصدرت في: 11/03/2014

إغماء: بدل المقدمة قرر عمرو أمين يعمل "إغماء" لكل اللى ساكن العشوائيات.. وكل مسؤول عاوز ينجح فى الوزارة أو مجلس الشعب وأخذ شعار "القضاء على العشوائيات".. للحكومة اللى دائمًا بـ توعد المواطن أنه يوصل لحد الكفاف، وفى الآخر المواطن بـ يوصل لحد "الجفاف".. للمواصلات والتوك توك وأتوبيس الشعب.. للمستشفيات الحكومية اللى بـ تقدم عرض مع كل مرض بـ تشتكى منه هـ تأخذ عليه 3 أمراض هدية، ده إذا ما موتش فى النهاية من اللى هـ تشوفه جوه.. التصدير ده بـ يعرفنا إيه اللى فى الكتاب وبدل الإهداء قرر يكتب إغماء من اللى هـ تشوفوه جوه الكتاب. جوه الكتاب: الكتاب حالة جميلة ومتعبة.. هـ تضحك حد الحزن لما تقرأه لأنه قرر يكتب عن العشوائيات واللى فيها لكن بطريقة ساخرة.. بـ يبدأ بتعريفك بالعشوائى.. لأ يا فندم مش اللى جاء فى دماغ حضرتك من الشخص اللى مسؤول عن تصرفاته ومبهدل فى غرفته وهدومه.. خالص.. العشوائي هو الشيء اللى لم يرتق لمصطلح "إنسان" بعد واللى عايش فى بيت يشبه "عشة الفراخ".. هو اللى عايش بكرامة وعزة نفس وبس لأنه لا يمتلك أى حاجة ثانية.. هو اللى مش من حقه أنه يحلم زى باقى البشر.. هو اللى بـ يهلك نفسه ليل ونهار علشان بس يلاقى لقمة العيش ويا ريته بـ يلاقيها.. العشوائى هو بواقى بشر.. لسه ما بقاش بشر. بشر: ولأن الضحك من صفات البشر، قرر عمرو أنه يضحكك فى الكتاب على كل حاجة حوله وبدايتهم "أصحابه" اللى هـ يتكلم فى باقى الكتاب عنهم وعن حياته ومشاهداته لكن بالعامية. أصحابه: "عصان غرام" "حمادة بلقص" "أحمد ألجا" دول أبطال من الحياة الواقعية اللى عايشها بعيدًا عن المثقفين المنعزلين أصلًا عن الواقع.. الكتاب محاولة جيدة للخروج من مأزق الثقافة للحكى، والصراحة أمين بارع فى الحكى عنده مقدرة على الحكى فى الكتابة لو عنده فى الكلام يبقى لازم يستغلها بجد.. لأنه هـ يبقى "حكاء" عبقرى. النوم: حاجة من الحاجات اللى بـ يتكلم عنها فى كتابه وبـ يعرفك أن النوم وهو الفعل الطبيعى للإنسان لما بـ يبقى تعبان بـ تحدده فى العشوائيات حاجات كثير جدًا غير أنك تعبان زى مثلًا.. النجار اللى بـ يبدأ شغله بعد الساعة 3 فجرًا.. والسمكرى اللى دائمًا يخبط على العربية اللى عنده فى المحل من ساعة ما فتح.. وحتى البقال اللى مش بـ يبطل تشغيل "الصب" وخليك فاكر الجملة المثيرة فى الكتاب "العشوائيين مش بنى آدمين عاديين". فى الكتاب هـ تلاقوا كلام عن اللجان الشعبية وحمادة موس ملك الموت والموزة العصرية فى المناطق العشوائية واللجان الشعبية.. هـ تلاقوا وصف مختلف لناس عايشين تحت سقف القدرة.. فى المنطقة الفاصلة بين الحياة والموت.. فى العشوائيات.

...

الحارة المزنوقة: هى مصر فين؟
اصدرت في: 17/01/2014

ولا مصر أصلًا.. مين؟ مصر الكرامة والأرض؟ ولا الهوان والعرض؟ مصر رجالة بحق وحقيق.. مصر الطفل البرئ؟ ولا مصر العيال السيس والواد الخنيق؟ مصر الدين اللى لله بس الوطن عمره ما كان للجميع. هى دى مقدمة كتابنا والكلام ده قاله فتحى فى حلقة من حلقات مقالاته المتصلة دائمًا والناس كانت بـ تموت من كثر "الشير" والتعليقات لأن الجزء اللى فات كام سطر من كلام كثير قدر "محمد فتحى" يلم به حاجات كثير فى مصر وكلها من مقالاته اللى كتبها فى (2013) ويعمل الحارة المزنوقة. الحارة المزنوقة: اختيار الاسم ده مش من فراغ.. لازم نعرف أنه اختاره لدلالته اللى صنعها الرئيس السابق محمد مرسى فى واحد من أشهر خطاباته واتكلم فيها عن "الحارة المزنوقة" والبلطجية اللى عارفهم بالاسم.. علشان يقول أنه فاهم كل حاجة وفى النهاية حصل اللي حصل. حصل إيه: على طريقة "حصل إيه" بـ تدور مجموعة من مقالات محمد فتحى حول الأحداث الساخنة اللى بـ تدور فى البلد وأكثر حاجة بـ تميز فتحى أنه محدد وفاهم وغير مسيس وبجد "لا منتمى". الـ "لا منتمى": السؤال الوجودى اللى دائمًا الكل بـ يهاجم به الكل هو أنت منتمى لفصيل كذا.. أنت بتاع الجماعة، أنت بتاع اليمين، أنت بتاع العلمانية الكافرة.. أنت.. أنت.. وده وضحه الكاتب فى سلسلة "كيف".. وآه من كيف؟ بـ يوضح لك بكل بساطة إزاى تشوه خصومك السياسيين.. وتطلع عليهم الإشاعات.. وإزاى تفض خناقة فى مصر "اللى هى الحالة السياسية فى مصر" وأنواع الناس فى الخناقة اللى عاوز يولعها واللى عاوز يهديها من باب "صلوا ع النبى أمال". صلوا ع النبى: فتحى مش النوع اللى عاوز يهدى "صلوا ع النبى" أو يولع "إحنا نروح القسم" لكنه من نوع مختلف عاوز يحلل أسباب الخناقة الدايره فى مصر أصلًا.. وده هـ تلاقيه فى مجموع مقالاته اللى بـ تدور أصلًا عن السبب طوال الوقت: سبب تدهور الحالة الصحية للمريضة "طويلة المرض" واللى اسمها "مصر"، سبب انتصار الإسلاميين فى الانتخابات واكتساحهم للموضوع "بعيد عن الزيت والأرز" سبب اللى حصل فى الاتحادية بعيدًا عن "أغور أنا وجماعتى" وده اللى حصل، سبب المقاطعون للانتخابات "والله أنت واد عندك مبدأ"، سبب تخلف الميديا "فى الغالب هو ذلك الرجل المجهول سيادة "المصدر المطلع" واللى بـ يعطى تصاريح فى كل الجرائد. محمد vs فتحى: محمد قادر أنه يتريق على الوضع العام للبلد، فتحى صورة الأب الموزون العاقل، محمد ممكن يعمل حوار مع أى حد فى الشارع، فتحى بـ يختار دائمًا مين اللى ممكن يجيب الحقيقة، محمد بـ يجيب فى سيرة كل خلق الله، فتحى المهم لما نجيب سيرتهم يرتدعوا ويبقوا كويسين.

...

سيجارة سوبر: 100 صفحة في حُب النيكوتين!
اصدرت في: 18/12/2013

لو جربت تدخل على موقع جوجل وتكتب في البحث "كتاب عن التدخين" هـ تلاقي كتب كثير بـ تتكلم في موضوع آثار التدخين السلبية وكيفية الإقلاع عنها، لكنك صعب تلاقي كتاب يحببك في حالة التدخين ويجذبك لدخول العالم الإنساني والفلسفي للدخان! "سيجارة سوبر" كتاب في حب النيكوتين زي ما وصفه مؤلفه "مُحب سمير" واللي بـ يصدر ثاني كتبه بعد كتابه "‫مرة واحد مسلم وواحد مسيحي"، كتاب "سيجارة سوبر" 100 صفحة بـ توصف الحالة المزاجية للمدخن وعلاقته السرية بسيجارته واللي بـ تختلف من مدخن للثاني ومن سيجارة للثانية وكمان من وقت للثاني. الكتاب مُقسم على 18 جزء أو عنوان، كل عنوان بـ يشدك للعنوان الثاني بشكل سلس جدًا خاصة أن الكاتب اختار لغة "الفيسبوك" علشان تكون لغة الكتاب والفكرة دي بالنسبة لرواد الفيسبوك هـ تساهم في زيادة الاستمتاع بالكتاب لكنها هـ تكون مصدر للغموض بالنسبة لشخص ما يعرفش الفرق بين جهاز الريسيفر وجهاز الكمبيوتر.. كمان من عيوب الكتاب أن في نهاية أي صفحة هـ تلاقي فقرة صغيرة من سطرين أو ثلاثة منفصلة عن مضمون باقي الصفحة، بـ تتكلم عن تاريخ اختراع السيجارة أو أحداث تاريخية لها علاقة بالدخان والتبغ، وعلشان كده هـ تكون أمام اختيار صعب، إما تكمل قراءة الكتاب للآخر بدون ما تقرأ اللي في نهاية الصفحة، وإما تقرأ المعلومات التاريخة لحد آخر صفحة في الكتاب خاصة وأنها جذابة وبعضها متصل ببعضه. حواديت الكتاب اللي لها علاقة بالدخان كثير، لكن من أبرز الحواديت دي، هى علاقة الكاتب بشركة "إسترن كومباني" وهى الشركة المصنعة للسيجارة كليوباترا، أشهر سيجارة في مصر، ومن شدة حب الكاتب للكليوباترا قرر أنه يدور على شقة جنب الشركة بتاعتها! واللي زاد من حماسه في اتخاذ القرار ده كانت حبيبته غير المدخنة واللي كانت بـ تعشق رائحة الدخان فـ قرر يثبت لها حبه بشقة جنب مصنع الدخان! "حرامي الولاعات" عنوان أحد أمتع الأجزاء خاصة وأن فيه شيء كبير من الواقع والمنطق، وحسب تعبير الكاتب فهو مش بـ يعتبر حرامي الولاعات شتيمة، لكنها عادة موجودة عند شخص واحد على الأقل في كل شلة، وبـ يصنف الكاتب حرامي الولاعات إلى الحرامي اللي بـ يخطط كويس جدًا قبل ما يسرق الولاعة المقصودة والحرامي اللي بـ ينقى الولاعات الغالية أو الهدية، والحرامي اللي بـ يسرق أي ولاعة حتى أم 2 جنيه. "المرأة والدخان" واضح من العنوان أن الكاتب يقصد العلاقة بين المرأة والدخان، سواء من جانب المرأة المدخنة أو من جانب المرأة اللي مضطرة تشم الدخان بسبب ذوق واختيار زوجها في مناسبات معينة. في نهاية الكتاب بـ يقدم الكاتب نصائح لغير المدخن أنه ما يقهرش المُدخن خاصة لما يكون لسه مولع سيجارته، حتى وإن كان المكان مقفول، وبـ يستشهد بمقولة: "إن كان من حقك أن تستنشق هواءً نقيًا فمن حقي أن أدخن!"، وحجة الكاتب هى أن الجو أصلاً ملوث من غير دخان السجاير ومعنى كده أن دخان السيجارة مش هـ يؤثر في كمية التلوث اللي هى موجودة أصلاً.

...

لقد وقعنا فى الفخ: كتاب ممتع جديد ليوسف معاطي
اصدرت في: 24/06/2013

"كتاب لطيف".. بالكلمة دي ممكن نوصف "لقد وقعنا في الفخ" ليوسف معاطي الصادر عن الدار المصرية اللبنانية، الكتاب لطيف ومكتوب بطريقة وترتيب مش ممكن تصيب قارئها بملل، مافيش كلمات زيادة، مافيش رغي، وتصويرات مبالغ فيها، ويمكن أكبر دليل على كده السر اللي بـ يكشفه الناشر في أول الكتاب، وهو أن يوسف معاطي مش بـ يحب المقدمات، ودائمًا يقول للناشرين اللي بـ يتعامل معاهم أنه مش بـ يحب المقدمات، ودي ميزة لطيفة للناس اللي بـ تزهق من القراءة بسرعة، لأن معاطي في الحالة دي بـ يراهن على المتعة للاستمرار، مش على حب القراءة بشكل عام. الكتاب عبارة عن مقالات قصيرة، مش مملة، عن الأحوال الجارية، فكرة المقالات المنشورة مخيفة لبعض الكتاب اللي بـ يشوفوا أنها إفلاس للكاتب وأن الحاجة اللي تتنشر مرة لازم الكاتب يشوف إيه بعدها ويهتم بالكتابة أكثر ما يهتم بالنشر، لكن ده مش رأي كل الناس خاصة مع المقالات اللي بـ تنشر بالصحف واللي غالبًا بـ تكون سلعة سريعة البوار.. تتنشر في يوم، يا إما اتقرأت يا ما اتقرأتش وخلاص على كده، ويمكن فايدة كمان من فوائد نشر المقالات في كتب، أن الكاتب مش كل مقالاته بـ تُنشر، بعضها بـ يتم رفض نشره، وبالتالي بـ يكون مهم أنه يعمل كتاب يضم مقالاته اللي ما اتنشرتش، خاصة أن فيه قاعدة صحفية بـ تقول: "الكاتب والصحفي بـ يفتكروا موضوعاتهم اللي ما اتنشرتش أكثر ما بـ يفتكروا موضوعاتهم اللي اتنشرت!" معاطي كاتب مهم، مش علشان قوة اللي بـ يكتبه بقدر رواجه ووصوله للناس، مافيش حاجة كتبها تقريبًا ما تحولتش لفيلم أو مسرحية أو مسلسل، هو كاتب بـ يجيد تسويق أعماله، يمكن بدماثة خلقه اللي بـ يشهد عليها الجميع، ويمكن لجديتها، أو لأن فيها تيمة بـ تعلم مع الناس، الغريبة أنه ما أخذش جوائر عربية أو عالمية فيما يتعلق بالكتابة زي الأسواني مثلاً، في رأينا هو كاتب أقرب لكتاب من نوعية "دان براون" شعبي جدًا، لكن لما تدور على قيمة جمالية أو أدبية كبيرة ما تلاقيش، يعني مثلاً ما تقدرش تقارنه بكاتب زي بهاء طاهر، لكنهم في النهاية هم الاثنين بـ يندرجوا تحت نفس الاسم: " كاتب". واحدة من السمات الأساسية لمعاطي العناوين الصادمة، بداية من العنوان، ومرورًا بالمحتوى هـ نلاقي عناوين صعبة زي: "لقد وقعنا في الفخ، منتهى السفالة، قول ما تخافشي البرص لازم يمشي، أهمية أن تكون سافلا"... عناوين مستفزة لكنها جذابة بدون شك، الناشر اعترض عليها في البداية لكن معاطي نصحه أنه يقرأ وبعدين يحكم، وفعلاً وافق الناشر وخرج الكتاب بعناوينه الداخلية اللافتة. قراءة الكتاب هـ تعرف القراء من أول مقال أن معاطي مش من الناس اللي بـ تقعد في أبراج عاجية وتكتب عن الكادحين، بالعكس، هو بـ يكون جنبهم على القهوة، يكتب عن ألفاظهم ومواقفهم، ويمكن هو ده سر نجاحه على مستوى الكتابة الشعبية. فيه تيمة في معظم مقالات معاطي، وهي البحث عن الأخلاق الضائعة في المجتمع اللي أصبح بـ يستعمل ألفاظ صعبة وهو بـ يدافع عن قيم زي الحرية والديموقراطية، وبـ يقول أنه دي حاجة مش متوافقة مع بعضها.

...

الذين هبطوا من السماء وقعدولنا: الله يرحمك يا أنيس منصور
اصدرت في: 14/05/2013

الكاتب أيمن محرم حب يعمل افتكاسة جديدة وقريبة من فيلم Men in Black وهو أنه تخيل أن الحياة حصل فيها تطور كبير فى التكنولوجيا وده كان سنة 2090 وبعدين العلماء اكتشفوا أن -خير اللهم اجعله خير- فيه كائنات فضائية من كوكب المريخ عايشين معانا ومنهم رئيس تحرير جريدة قدر صحفى فيها يتواصل مع عصرنا ويبعث له مقالات. الأول كده كائنات من المريخ وعايشين معانا من غير ما نعرف ده فيلم Men in Black وأنه حد يرجع بالزمن ويتواصل مع الناس فى عصر ثانى نعتقد أن ده بـ يفكرنا بفيلم (سمير وشهير وبهير). أما بقى عنوان الكتاب فهو نفس عنوان كتاب المؤلف الكبير أنيس منصور "الذين هبطوا من السماء" وقام الكاتب بزيادة "وقعدوا لنا" من غير ما يقول فى المقدمة أنه واخد العنوان من عم أنيس منصور. الكتاب عبارة عن عدة مقالات كلها بـ تنتقد وتسخر من مدعى التدين بس صراحة هو Over قوى... المهم الكتاب بـ يتكون من شوية مقالات زى "تعريف بعمودى.. عشوائية التدين.. غوغائية التدين". الكتاب فيه بعض الألفاظ الخارجة وفكرته أن الصحفى أيمن محرم شغال فى جريدة من زمن 2090 وبـ تطلع كل ساعة واسمها جريدة "المؤخرة" واللى بـ يحاول يبعد خيال الناس عن أى شيء خارج أو بـ يدل على شيء خارج فى الكلمة دي وبـ يقول أن معناها ممكن يكون أن الحكومة أخرتنا أو أن البلاد أصبحت فى المؤخرة. من المقالات اللى فى الكتاب مقال بعنوان "عشوائية التدين" وفيه بـ يعمل تقرير صحفى عن جماعة دينية متطرفة فكريًا.. وهى بـ تضم مهندسين وأطباء ورياضيين... إلخ. واللى بـ يلف ويدور فيه مجموعة أفكار مش مرتبطة ببعض زى أنه راح لهم فى مقر جمعية "الرضا والنور" وأن فيه صلاة جمعة خطبتها معروفة ومحددة وإمام المسجد هو بواب العمارة وكله بالقانون.. وفى الآخر محرم بـ يقفش علينا ويقول: "بس خلاص مش هـ أكمل المقال". المهم الكتاب بـ يدور حول المتدنيين.. يوووه.. تصدقوا أيمن محرم من كثر ما وصفهم بأوصاف متدنية فـ قولنا كده... نقصد المتدينين.. وبصراحة الكتاب بـ ينتقدهم بشكل مبالغ فيه.. شكل تعدى مرحلة السخرية لدرجة أنه سخر حتى من قارئ كتابه وممكن يشتمه عادى جدًا ودائمًا بـ يفترض جهل الآخر. نقول لكم.. اقرأوا "الذين هبطوا من السماء" لأنيس منصور أفضل.

...

ساعة لقلبك مع عبد الناصر: الزعيم ما كانش جد وبس.. كان كمان ابن نكتة
اصدرت في: 21/04/2013

في وسط الأحداث المؤلمة والغيظ، والفشل اللي إحنا عايشينه، الواحد بـ يحتاج أنه يشوف حاجة تريح له أعصابه وتهديه وتخليه يحس أن الحياة ممكن تكون جميلة، وده ما بـ يحصلش معانا غير لما نرجع لأيام زمان، حيث الهدوء واللطافة وكل حاجة بسيطة وخفيفة ومافيهاش عقد ولا أزمات. ياسر قطامش بـ يساعدنا نرجع للزمان للحالة دي في كتابه "ساعة لقلبك مع عبد الناصر"، واللي بــ يحاول من خلاله يقول أن عبد الناصر ما كانش بس زعيم عظيم، كلنا بـ نحترمه ونجله ونحس أنه رمز الجدية والصرامة، لكنه كمان كان إنسان بـ يحب يسمع أغاني معينة ويحسب نكت وبـ يهرج وعنده حياة خاصة بعيد عن أعمال الرئاسة ما كانتش بـ تخلى من الترفية والضحك. عبد الناصر كان بـ يسوق عربيته بنفسه ويتكلم مع الناس البسيطة وكمان يضحك معاهم، كان من مواليد برج الجدي، يحب يروح مسرح "الماجستيك" في عماد الدين، كان بـ يضحك من قلبه لما يشوف علي الكسار، وروايات كشكش بيه " نجيب الريحاني" ويحب يروح السينما في أوقات فراغه، يتفرج على أفلام عبد الوهاب والريحاني.. كان بـ يحب مجلة روزاليوسف ومتابع مقالات محمد التابعي الساخرة. حكايات كثيرة عن الطالب جمال عبد الناصر اللي بـ يحب الخطابة وكان صحفي وممثل في مدرسته، يحب يسمع النكت، والمونولوجات، وفيه قصة غريبة شوية قدمها المؤلف في كتابه، بـ يقول أن لما عبد الناصر لقى الشباب مش مقبلين على الالتحاق بالجيش وجه تعليماته إلى ثروت عكاشة يتصل بالفنان الكوميدي المحبوب إسماعيل يس علشان يبدأ في سلسلة أفلام ظاهرها الهزل وباطنها الجد تحبب الشباب في أداء الدور الوطني، وفعلاً شوفنا سلسلة أفلام إسماعيل يس في الجيش والبوليس والبحرية والطيران. رئيس عظيم لكنه كان بـ يحب القرود، لذلك كنا نشوف صور كثير لهم معاه، وهو بـ يأكلهم السوداني.. حتى زواجه فيه عبرة، السيدة تحية زوجة الرئيس الراحل إزاي تقابلوا وحبوا بعض سنة 1943، وإزاي قرر جمال أنه يتزوجها وراح البيت وقال: "أنا مش جاي أختار أنا واخد قرار"، وإزاي تزوجوا في شقة في الدور الثالث في شارع الجلالي بالقرب من شارع أحمد سعيد في العباسية.. خروج وحب مع الأيام الأولى، وتقديس من الزعيم للحياة الزوجية. من المعلومات الطريفة في الكتاب، شهادة الثانوية اللي كان فيها الرئيس ناجح على الحركرك!، في العربي والتاريخ والرسم وترتيبه 889 في قائمة الناجحين، لذلك بـ يؤكد المؤلف أن النجاح الدراسي مش مؤشر أبدًا على إمكانات الإنسان، والدليل أن نابليون بونابارت وتوفيق الحكيم وتوماس إديسون هم كمان كانوا على قد حالهم في الدراسة!

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن