دليل كتب القاهرة - أحدث المقالات عن الكتاب العرب ومؤلفاتهم

كتب

رحيل امرأة: استقالة نهائية
اصدرت في: 25/08/2016

ليه سمينا المقالة استقالة نهائية؟ علشان دي مش استقالة من الشغل، وإن كانت استقالة الشغل أسهل، دي استقالة من عشرة العمر، وفكرة الاستقالة بتبقى صعبة قوي على النفس سواء كانت من شغلك اللي حبيته وعرفت أصحابك فيه، أو من عشرة عمرك اللي قضيت معاه أحلى أيام وأصعبها، لكن خلاص مابقاش ينفع تكملوا، علشان كده جت فكرة الاستقالة النهائية. إحنا هنا بنحكي عن حواديت كتبتها دعاء تليمة، وخلونا نبدأ بحدوتة لست طيبة في رحلة بالطيارة، وبتصحى على حلم مزعج، ومن باب الدردشة الست اللي جنبها بتكلمها، وأنتِ بقى كنتِ في رحلة عمل ولا زيارة، ولا إيه؟ ومن هنا بتلاقي نفسك دخلت في منطقة ثانية خالص وقصة ورا قصة، بنكتشف أن دعاء الكاتبة القصصية عندها مقدرة على نسج حكايات من كل حاجة وعن أي حاجة كمان. ومن بين القصص اللي بتمس المشاعر قصة البؤس، واللي بتحكي عن امرأة عاملة وأم لـ 6 أبناء وزود عليهم أبوهم اللي مش شغال ومقضيها، وكمان واخد فلوسها، وقد إيه دعاء عندها المقدرة على رسم الشخصيات ورصد حياتها واهتمامها بالتفاصيل حتى لو كانت صغيرة، كمان دعاء في كتابتها بتنقل الصورة كأنه مشهد يعني كأنك بتتفرج عليه، وهي مابتبقاش مهتمة بالمكان والزمان قوي قد ما هي مهتمة بالمشاعر ووصفها وتجريدها في مجموعة هتوجعك في الغالب من القلب. ولما ييجي ذكر عدم توقع النهايات، يبقى لازم ييجي ذكر قصة "رحيل امرأة" هي حدوتة عن الست وعشرة العمر والراجل اللي كانت بتتمناه في حياتها، وإزاي عاشت معاه أيام صعبة جدًا مابتنتهيش إلا بوفاته، لكن كل ده بداية الحدوتة علشان القصة بتبدأ بالفعل في البداية الجديدة للحياة اللي قعدت ترسمها، مع أنه بيموت قدامها، لكن يا ترى هتبدأ، هنسيبكم تقروها وتعرفوا المفاجأة. القصص واخدة الناحية الإنسانية قوي، وواضح أن دعاء تليمة متأثرة بفكرة المرأة وقضاياها وحريتها، وأغلب القصص بتدور حوالين المرأة المطلقة والمتزوجة والمعذبة والحبيبة، واللي شايل هم زوجها وعيالها وده طبعًا بيخليك تشوف المرأة في صورها الكتير والمتعددة، فيه جزء من القصص هنلاقيه عادي بيسرد وقائع وكأننا بنحكي على ناس من بيينا عادي، لكن في قصص ثانية فيها شغل عالي وسرد بجد، لغة دعاء جيدة بتهتم بالمشاعر والخيال، وعندها قدرة على الحكي حلوة.

...

عالم فرانشي: الشوارع حواديت!
اصدرت في: 27/07/2016

بطل كل قصص مجموعة (عالَم فرانشي) هو طفل مصري اسمه أيمن عنده 10 سنين، وعايش في حيّ شعبي في القاهرة. والأحداث في منتصف السبعينيات. كل الأحداث والمشاهد وحتى الشخصيات هنحسها مألوفة جدًا. ويمكن أغلبنا عاش أحداث شبه الأحداث اللي بيرويها أيمن بنفسه. طيب إيه اللي يخلينا نهتم بحكايات أيمن؟ أولا لأنها حكايات مصرية جدًا، وشبهنا جدًا. ونقدر نقول بشكل عام أن المجموعة عبارة عن رصد للطبقة المتوسطة في مصر بعد الحرب. وثانيًا لأن أيمن طفل مختلف. تحديدًا نظرته للعالم مختلفة. وخياله حيّ. لماح وذكي. وبيلقط التفاصيل. وفي الحقيقة الروائي عمرو العادلي كان موفق جدًا في نقل وجهة نظر الطفل لكل حاجة حواليه. روح الطفل البريئة مش قادرة تستوعب حاجات زي الحقد والغيرة والكره والكذب. وبيكتشف أن أسوأ عيوب الكبار هي الكذب. كذبهم على نفسهم مش كذبهم على بعض بس. بطل المجموعة طول الوقت بيقارن بين تصرفات الأشخاص وبين كلامهم. وإزاي يقدر يكتشف الإدعاء بسهولة. ومن خلال سطور قليلة وصياغة بسيطة بيوصل الكاتب بذكاء رسائل مبطنة. اختيار عناوين القصص ممتاز. هنلاقي عناوين زي (الدروس السبعة) (شارع البراميل الخشبية) (أخو شكري) (البحث عن الكبشوصة!) (عبد الرسول الكافر) الحكايات فعلًا جميلة. وهتوقعنا في فخ السؤال (هل القصص دي حصلت فعلًا ولا كل ده خيال؟) وده في حد ذاته نجاح. لأن الأحداث والحوارات والشخصيات طبيعية جدًا. الكاتب عمرو العادلي عنده قدرة ممتازة على كتابة مشاهد الحركة. ودي كانت السمة الأوضح في المجموعة. أغلب القصص فيها مشاهد حيّة ومتحركة (السوق- المولد- تجمهر صغير-مشاجرة- لعب أطفال) ومن أهم نقاط القوة في المجموعة، إنها قدرت تتفادى الإطالة. وده العيب الخطير المنتشر عند أغلب الكتاب العرب حاليًا. وفي خلال 160 صفحة بس قدرت المجموعة تقول كتير. وتقدم قصص ممتعة وجميلة. واقفة على الحد الفاصل بين الحقيقة والخيال.

...

6 ريختر: عن شياطين الإنس والجنّ!
اصدرت في: 12/06/2016

المجموعة القصصية الأولى لعمر عويس، قدم فيها تجربته، ورؤيته للحياة والناس من خلال مجموعة 6 ريختر. الكتاب يحتوي على 12 قصة ما بين واقعيّة وفانتازيا وتشويق، تعالوا نتعرف عليهم بشوية تفصيل. اختار عمر الكتابة بلغة سهلة وبسيطة علشان يوصل أفكاره، القصة القصيرة صعبة إلى حد ما، لكن عمر اتعامل معاها كأنها لعبة، فيها كتير من الجديّة، لكن فيها مساحة واسعة عشان يجرّب. هنلاحظ تأثره إلى حد كبير بدكتور أحمد خالد توفيق، بدرجة قليلة من حيث الأسلوب، وبدرجة كبيرة من حيث أفكار القصص. والملاحظ كمان أن أغلب الحواديت على خلفية من الخيانة بين حبيبين، طول الوقت في علاقة مضطربة بين راجل وست، ودايما الست هي الطرف الأسوء. الأنثى في القصص كائن خطر، ما بين خيانة وقتل. الجانب الفانتازي ظهر في أغلب المجموعة بشكل عام، لكنه في قصة 6 ريختر كان بطل الحكاية أحد أحفاد إبليس أقنع مذيع مصري علشان يطلع معاه في برنامجه الجديد في التليفزيون، وأثناء إذاعة البرنامج على الهواء مباشرة بيتكلم عن وجهة نظر إبليس في عدم السجود لآدم، ونظرته للشر في الدنيا. المهم والجميل هنا أنه بيعرض الشر من وجهة نظر إبليس اللي محدش حاول يعرفها، ولو عرفها مش هيصدقها. وبعد انتهاء الحلقة بيحصل زلزال 1992 الشهير بقوة 6 ريختر. وعامة الجزء ده هو أهم جزء في الكتاب كله، عرضه لوجهة نظر فلسفية عميقة، بطريقة بسيطة ومشوقة، وربطها مع حدث شهير لسه سايب أثر في نفوس كل المصريين اللي حضروه رغم مرور أكتر من عشرين سنة عليه. هنقرأ تشبيهات كتير حلوة، ودي حاجة تُحسب للكاتب، تشبيه بطل قصة 6 ريختر سامح داوود لعم شفيق السواق بتاعه (عم شفيق هو ثمرة طازجة في وجبة مليئة بمكسبات الطعم والمواد الحافظة تأكلها على مدار اليوم) يقصد طبعًا أنه راجل طيب وغير مفتعل. اختيار الكتابة بضمير المتكلم -يبقى الكاتب هو بطل القصة- اختيار صعب وخاصة في كتابات أولى، والكاتب لسه معندوش المهارة إنه يتكلم عن أماكن لم يزرها من قبل، أو عن أحداث مكنش طرف فيها. ده خلى الإيقاع يهرب في مناطق كتير، بذكر تفاصيل ملهاش لازمة، وكمان عدم قدرته على تقمص الشخصيات النسائية. النهايات المفتوحة عملت حالة من التشويق للقارئ، وبتخليه دايمًا يفكر ويسترجع الأحداث، وممكن يقرأ القصة تاني، لكنها مش صالحة لكل القصص، لأنها لو متعملتش صح هتعمل ارتباك للقارئ وهتأثر على استقباله للقصة. القصص كلها -رغم تنوعها وغرابة أحداث بعضها- هنحس قد إيه هي واقعية جدًا، هنحس إننا قابلنا الشخصيات دي قبل كده، هنحس إنها شخصيات من لحم ودم، وهنحس أن الأحداث حصلت في الشارع اللي إحنا ساكنين فيه. المجموعة كبداية لكاتب شاب جيدة جدًا، ومن الواضح أن عمر صاحب نظرة ورؤية للواقع، وعنده لسه حاجات كتير جدًا عايز يقولها. وبداية من الأعمال القادمة هيقدم كتابة مختلفة عن السائد.

...

كتاب 3D: تلات عوالم فى كتاب واحد
اصدرت في: 04/04/2016

فى مقدمة الكتاب بيقول لنا مصطفى البربرى أننا على موعد مع أول كتاب ثلاثى الأبعاد، وطبعًا كلنا عارفين التكنولوجيا ثلاثية الأبعاد دى وعاملة إزاى وإزاى أبهرت الدنيا كلها، هو شايف أن العالم بقى مشوش بشكل كبير، ورؤية الأحداث يا إما ناس مش شايفاها أو لما بتبص على الأحداث اليومية بتبقى عيونها مزغللة، ولو عاوز تشوف اللى حولك لازم تشوف من ناحية جديدة، يعنى مش هينفع نضارة عادية ولا عدسات ملونة، ولا حتى عملية ليزك، أنت عاوز نظارة ثلاثية الأبعاد علشان تتفرج بمزاج وتشوف الدنيا بجد، علشان كده قرر البربرى أنه هيتكلم عن الأدب الساخر والقصة والرواية فى الكتاب ده. طريقته فى الكتابة جميلة بتخليك تعيش معاه الحالة، يعنى مثلًا لما يتكلم عن الساندويتش المصرى الساخر "سكلانس" وكلنا عارفينه، هو اختراع مصرى ساندويتش كده فيه كل حاجة، يعنى لو أنت فى محل فول وطعمية هتقول له عاوز واحد سكلانس، هيحط (فول، طعمية، بتنجان، بطاطس، سلاطة، طحينة) مع الاعتذار للمعدة طبعًا على اللى بنعمله فيها، هو شايف بقى أن الكلام ما بقاش عليه جمرك فى مصر كل واحد عاوز يتكلم عن حاجة بيعمل كده براحته، بيتكلم عن حياتنا اليومية وعن اللى بنحبه، وعن مواقف فى تفاصيل اليوم كل واحد بيعدى عليها، وبيحاول منها يشوف بقى إيه اللى بيحصل فى الكوكب بتاعنا، يعنى تقدروا تقولوا عليه كتاب اجتماعى إنسانى ساخر. بيستخدم كلام الشباب (جمع مثقف سالم، هايبر، فين أم الريموت، سكلانس) وغيرها، وبيعرف يعبر عنهم بشكل كبير، وبيقدم رؤية جديدة، ومقسم الكتاب لتلات أقسام: الأول بيتكلم فيه عن المجتمع بشكل ساخر، والتانى فيه مجموعة قصص قصيرة بيتكلم فيها عن حاجات كتير زى أمراض الخوف، والحاجات اللى بنتعامل معاها (التكييف، atm، الشاشات) وبيهتم بالسرد الهادى وبيعتمد على التفاصيل أكتر من أى حاجة تانية. الجزء الأخير بقى هو اللى مشكلة بجد، رواية مصورة (كوميكس) سعفان مان شو، رواية هتحبوها جدًا وهتحبوا تقعدوا تتفرجوا على الصور اللى فيها، مكتوبة حلو وبتتكلم عن عالم الصحافة الأسود بشكل يموت من الضحك، واللى بيحصل فيه والفساد اللى فى حياتنا والعادات الغلط اللى بنعملها، حتى الصحفى اللى نفسه يشتهر بيفكر يعمل حاجة بره المنطق –لكنها بتحصل– علشان يتشهر ومديره يفرح به، بيعمل فيديو (شاهد قبل الحذف) وطبعًا كلنا اتهرينا من الحاجات دى وأغلب الفيديوهات دى على فكرة بتبقى متفبركة أو أصلًا مالهاش علاقة بالعنوان اللى محطوطة تحتيه، وكل ده علشان الناس تدخل وتعمل شير، الكتاب حلو ومسلى بجد هتمسكه هتقعد تقرأ فيه كتير ومش هـتحس بزهق.

...

وتنام لتراه: قصص مختلفة بروح شبابية
اصدرت في: 31/03/2016

قال عنها الكاتب الكبير بهاء طاهر: "أعجبتني المجموعة، لغة قوية وأفكار جيدة تم سردها بطريقة مشوقة"، وقالت عنها د. إيمان الدواخلي: "أحمد عويضة كاتب يشق طريقًا خاصًا به، بحرف جاد، حريص على الفكرة واللغة والبناء المدرك لفنيات النص القصصي". طب يا ترى مين أحمد عويضة؟ وعمل إيه علشان الناس تكتب عنه وعن مجموعته الأولى؟ من أول الإهداء بنبدأ نتعرف على الكاتب اللى واضح أنه اجتماعي وبيحب الناس، ومتعلق بجده –رحمه الله– علشان الإهداء الأول والخاص لجده، وبعد كده بيعمل إهداء لوالديه وناس تانية كتير ساعدته. المجموعة مكونة من قصص بتدور أحداثها فى مناطق وحالات مختلفة، والتسميات بتاعته ملفتة للعين، مثلًا قصة ابتسامة الخزامى، بيتكلم عن ريحة الخزامى اللى ملأت روحه، هتحس فى بدايتها أنه بيتكلم عن أنثى بيحبها، وعن مذكرات شخص كان بيحب واحدة وبعدين سابها.. لكنك مع القصة هتفهم اللعبة اللى بيعملها عويضة، هو باختصار بيتكلم عن زهرة الخزامى الميلة، وشوقها للطفل الجميل اللى جاي يلمسها، نفسها أن الطفل ده ياخدها لعالمه الخاص اللى لازم يكون جميل زيه.. لأنها زهقت من البشر وحياتهم وأحاديثهم وطريقتهم فى التعامل معاها، بيخليك تحس أنك ماشي بين عالمين: عالم الورود وعالم الإنسان وفيه تداخل حلو ما بينهم ودي طبعًا طريقة فى الكتابة ممتعة ومسلية جدًا. الموضوعات كتير ومختلفة، لكن يجمعها حس الكتابة عنده وطريقته الممتعة فى الحكاية، يعني تحس كأنه بيحكي لك وقاعد معاك، وده طبعًا موضوع صعب أي حد يعمله، لكن عويضة بيعرف يحكي كويس، ودي أهم ميزة لازم تكون موجودة عن القاص أنه يعرف يحكي حدوتة وتطلع حلوة.. علشان تعيش جواها وتفهم هو بيتكلم عن إيه. الميزة التانية بقى فى حكاياته هي المفاجأة بيقدر يفاجئك حتى ولو الموضوع عادي ومستهلك.. لو خدنا مثال على كده هيبقى مثال "الأرشيف" القصة عادية واحد طلب منه مديره أنه ينظم ويرتب الأرشيف، وهو بيلعن كل يوم اشتغل فيه فى الأرشيف، لكن جوه فيه عالم تاني مختلف، عالم من الفانتازيا بيوديك لحتة تانية خالص، كل سيئاته بتتحول لفيديو أمام عينيه، وكل الملفات بتبقى عنه وعن حياته وعن اللى عمله، بيدخل بعد كده فى أسلوب "وعظ" مباشر قوي يمكن ما كانش كأنه فى القصص، والنهاية كمان ساعات عنده بيستسهل فى النهايات يعني كل اللى فات كان كابوس والراجل صحي لقى نفسه بيعمل كل سيئاته عادي... يمكن لو كان حاول أكثر يخرج من حتة المباشرة اللى مش كتير كان هيبقى أفضل.. لكن المجموعة بقصصها حلوة وتتقري وما تزهقش منها.

...

أم كلثوم: قصص قصيرة عن الأسطورة كوكب الشرق
اصدرت في: 26/02/2016

هو صحيح الهوى غلاب.. هاه عاوزين نسمع الرد، ما عندنا رد أكيد فى الموضوع ده، علشان الهوى حاجات كثير وموضوع كبير، فيه هوى الكتابة وهوى الحب وهوى العشق، وفيه هوى أم كلثوم اللى قالت وردت: "ما اعرفش أنا".. وتعالوا نحاول نتصرف ونشوف. فى الأول كده عندنا عتاب بس على إضافة "الكتاب المنسيون" لمجموعة الكتاب اللى كتبوا الكتاب ده، كان ممكن يكونوا كتاب صاعدين أو جدد، حاجة كده فيها تفاؤل، طبعًا أنتم لسه ما عرفتوش إيه القصة، هـ نحكى لكم. إحنا أمام مجموعة قصصية أبطالها 14 قصة لـ 12 صاعدين مجددين.. ونشرح لكم من الأول خالص.. هى مسابقة "أم كلثوم" الأدبية تحت إشراف دار نشر كيان ومشروع كتاب منسيون بالتعاون مع مكتبة "أ".. المشروع هايل وخصوصًا أن المسابقة كانت متاحة لكل الجنسيات باللغة العربية الفصحى.. يعنى نوع من إحياء للغة العربية. اللى بس كان نفسنا فيه أنهم يهتموا بالكتاب الصاعدين مش المنسيين علشان ما يتنسوش بجد.. وطبعًا إحنا مع كل حاجة فيها أمل وتفاؤل.. المجموعة عبارة عن تأملات لسيرة الست أم كلثوم فى صياغة قصصية، وده طبعًا كان تحدى كبير للكتاب اللى أصلًا ما كانوش موجودين فى عهد أم كلثوم، لا شافوها ولا حضروا لها حفلة. بجد إحنا أمام تجربة جديدة شكلًا وموضوعًا.. تعالوا نشوف مع بعض شوية أسماء للقصص: "سلوا كؤوسًا طلاها – خارج إطار الصورة – الست.. المدينة – رحلة طموح – رجاء – ذات ليلة". شمروا بقى معانا وتعالوا فى رحلة مع شخصيات المجموعة اللى بجد فيها تفاصيل مختلفة، مثلًا فى قصة "سلوا كؤوسًا طلاها" هـ نشوف الشخصية الطموحة اللى نفسها تبقى مشهورة والناس كلها تسمع صوتها وبالفعل جريت ورا حلمها لغاية ما اتحقق.. وشخصيات ثانية كثير فيها العصبى والهادى والمحب والودود والعنيف.. بس أنتم اقروا وتابعوا. ومن بين القصص اللى بـ تربط الحاضر بالماضى "سيرة حب" وشخصية بطلتها مرتبطة بأم كلثوم، بـ تذاكر على أغانيها ودى من الحاجات اللى معظمنا كان بـ يعملها وهو بـ يذاكر مع اختلاف المطربين طبعًا. أما بقى قصة "خارج إطار الصورة" فالشخصية رومانسية جدًا، البنت اللى وقعت فى الحب من أول نظرة مع أول جملة لأغنية الست "الأولة فى الغرام بالحب شبكونى". الرحلة لسه ما خلصتش وعلشان تخلص لازم تقروا لحد آخر قصة، ومع أن القصص كلها باللغة العربية الفصحى إلا أنها لغة سهلة وسلسة وممتعة كده، نفهمها كلنا ودى دعوة ثانى لإحياء اللغة العربية فى كتابتنا. من الآخر المجموعة ممتعة وتجربة جديدة تستاهل أنها تكون فى مكتبتك وكمان مناسبة لأعمار كثير.

...

هو وهى: شباك على دنيا العلاقات
اصدرت في: 06/02/2016

بـ نحب يا ناس نكذب لو قولنا ما بـ نحبش.. بـ نحب يا ناس والدنيا يا ناس من غير الحب ما تتحبش فاكرين الأغنية دى.. طبعًا كلنا بـ نحب، واللى يقول غير كده كذاب، علشان الحب ده بحره واسع، يعنى حب الزوج لزوجته، والأم لأولادها، حب العمل وحب الله، ولو صادفت ومافيش كل ده يبقى حبك لنفسك، أو حبك لوالديك. حكايتنا النهارده عن هى وهو، عن العلاقات والمشاعر والمشاكل وكل الحاجات الحلوة اللى بـ تجمعهم.. حكايات هـ تلاقى نفسك فيها، أكيد هـ تلاقى موقف أو أكثر تعرضت له أو عدى عليك أو حكى لك واحد من أصحابك أو جيرانك أو قرايبك عنه، حكايات تحس أنها من الواقع بـ يجمعها كلها حاجة واحدة أنها فيها ولد وبنت. الكتاب بـ يراجع اختياراتنا كانت صح ولا غلط، بـ يخليك تشوف رد فعلك كان عامل إزاى، الكتاب اختبار نفسى علشان تفهم أنت اختارت صح ولا غلط فى المواقف المختلفة، وتقعد تفكر يا ترى كان فيه حل ثانى ولا كان الحل مستحيل، كان الأصح أنك تسيبها، أو كان الأصح أنها تسيبه، أو الأصح أن هما الاثنين يسيبوا بعض، ولا يكملوا، طب لما يكملوا هل فعلًا نجحوا فى حياتهم، الكتاب شباك على دنيا العلاقات بـ يخليك تعيد التفكير فيها وتقول ها مين اللى عاوز يكمل العلاقة مع الثانى، وإيه هى فكرة العلاقة أصلًا، ومين اللى بـ يخلى العلاقة تنجح أو تفشل. "هو وهى" بـ تحكى عن مشاعرنا وحياتنا اللى مافيش حد فينا ما عداش على موقف أو أكثر منها، المهم أنك تشوف أى موقف منهم أثر فى حياتك وعلم على قلبك وخلى روحك سعيدة أو خلاها حزينة. الكتاب عبارة عن أسكتشات قصيرة بين اثنين بـ يحبوا بعض جدًا والدنيا بـ تعمل فيهم هى والظروف اللى هى عاوزاه، يعنى ممكن تلاقى اثنين بـ يحبوا بعض بس الظروف ما سمحتش لهم يجتمعوا مع بعض.. وغيرهم وغيرهم. د. كمال المبشر كاتب شاطر طريقته سهلة فى الكتابة وبـ يعمل حوارات بين الشخصيات أكثر من وصف المشاهد، يعنى بـ يحب الحوار أكثر من أى حاجة ثانية، وده بـ يخلى طريقة الكتاب سهلة وبـ توصل بسرعة للقارئ، كمان أن الكتاب عن الولد والبنت بـ يخلى شريحة الناس اللى بـ يقروه كثيرة لأنه مهتم أوى بالعلاقة دى وبتفاصيلها الكثير، السؤال اللى عاوزين نقوله للكاتب، هو أنت عدت بك العلاقات دى ولا إيه؟

...

أكواريل: الله يسامحك يا د. أحمد خالد توفيق
اصدرت في: 27/11/2015

مقدمة: هي مجموعة قصص بـ تتكلم عن الخوف.. كل الخوف.. مافيش حاجة ثانية غير الخوف.. هـ نعرف كل حاجة عن القصيدة اللى بـ تكمل نفسها.. الرواية اللى اتكتبت بأرواح الموتى.. الطبيب اللى بـ تزوره ضحاياه في عيادته.. هـ نعرف سر المدينة الفضية.. قصة الشاب وعلاقة الحب ما بينه وبين الجثة المتعفنة.. اللوحة اللي بـ تتغير كل دقيقة.. هـ نعرف كثير عن حاجات مش لازم نعرفها.. ولو عرفناها مش لازم نتكلم عنها. الكتاب: لازم نقول أن د. أحمد خالد توفيق.. الشخص اللي بـ يصون تاريخ الخوف في مصر.. وده مش مجاملة لأن كمية القصص اللى ترجمها واللي كتبها بشكل شخصي، تخلينا نقول عليه كده وإحنا مستريحين جدًا.. عنده مقدرة على تصوير الخوف ولحظات الرعب صعب تلاقيها عند أي حد ثاني.. وكمان عدد كبير من كتاب الرعب الشباب بـ يدينوا بالولاء لتوفيق.. لأنه صاحب السلسلة الأشهر في عالم الرعب العربي "ما وراء الطبيعة"، وكلنا فاكرين د. رفعت إسماعيل.. الشخصية الغامضة والدكتور المدخن والمتعب واللي غير شكل البطل الخارق حتى في الكتابة للرواية.. بطلنا عنده علم وقوة قلب مش قوة جسد.. توفيق بـ يكمل مسيرته في الرعب بأكواريل وهي مجموعة قصص متنقية بالواحدة بـ تحكي لك عن عالم من الرعب مختلف كليًا عن الرعب اللى تعرفه. الرعب: لازم تفتكر الضلمة والخوف.. والمجهول والوشوش اللى بـ تطلع وتختفي.. لازم تفتكر كل الحاجات اللى كانت بـ ترعبك زمان، لازم تفتكر كل الطاقات السلبية اللى بـ تخلي الرعشة تصيب روحك.. وأنت بـ تقرأ أكواريل.. القصص اللى بـ تتكلم عن الكاتب اللى مش عارف يكتب الرواية فبـ يدور على تقاليد السحر الأسود في أسكتلندا وبـ يقطع رأس أخته علشان يحضر أرواح كبار الأدباء في عصره.. ويبدأوا يكتبوا الرواية معاه.. ويصادف أن خطيبته تزوره علشان تحكي لنا اللى حصل.. هـ نلاقي حكايات عن الرجل اللي أصيب بداء الكلب.. والقصة بـ تتحكي بشكلين: الزوج: مصاب بمرض نفسي ومعاه شخصية مجهولة بـ تنصحه يقتل ابنه الشيطان ويضرب زوجته. الزوجة: بـ تحكي الواقعة فعلًا أنه أصيب بداء الكلب (السعار) وربطته علشان ما يؤذيش حد. الحقيقة: أكيد مش هـ تعرف الحقيقة بين الأثنين.. لكن الضحية في النهاية ابنهم اللى مات. حالة من الرعب مسيطرة على الكتاب.. والحالة دي بـ تزيد كمان أنهم عاملين حركة عجبتنا قوي.. مع الكتاب هـ تلاقي سي دي عليه موسيقى رعب حاجة كده شبه موسيقى أفلام الرعب ومش مكتوب عليها مين المؤلف.. ممكن تكون Mix من مزيكا رعب مختلفة لأفلام كثير.. السي دي ده بـ يعمل لك حالة مختلفة لما تعمل إضاءة ضعيفة وتشغل المزيكا المرعبة.. وتقرأ أكواريل.. وتقول: "الله يسامحك يا د. أحمد خالد توفيق".

...

حل وترحال: فك وتركيب الحياة عند يوسف زيدان
اصدرت في: 13/08/2015

يا ترى مين حل علينا النهارده؟ مين هـ يرحل طيب؟ مصطلح قديم لكنه في الذهن قدر يستخدمه الكاتب المعروف د. يوسف زيدان في آخر مجموعة قصصية له، "حل وترحال" يعني ناس قاعدة أو لسه واصلة، وناس ناوية على السفر، وهي إيه الدنيا والحياة إلا حد لسه واصل وحد ماشي، مولود لسه جاي، وحد مات وانتقل لربه، شغل جديد، زوجه جديدة، زوج جديد، أولاد، شقة، ناس بـ نعرفها، ناس بـ نقرر نرحل عنها، وناس هما اللى بـ يقرروا يرحلوا عنا، دنيا واسعة، وحياة غريبة، فيها العادي وفيها المجنون، وفيها الكاتب اللى بـ يقدر يعمل Mix بين اليومي والغريب، بين الحلم والواقع، فيه الكاتب اللى بـ يمتلك لغة راقية وهادية ومش عند أي حد، أو خلونا نقول من الصعب أن حد يمتلكها، فيه كاتب عنده السهل الممتنع، فيه يوسف زيدان في "حل وترحال" اللى بـ يحكي فيها عن... "موعود، ساكن السرداب، عرس العجوز، حيرة فاهم، حكايات الوحيدة، مولد قصيدة، لعبة ليل، مخاتلة، بؤس الملكة، انتباه لا إرادي، دوران إجباري، أصل السَّنطة، سر الكحول، كهف بحري".. وطبعًا مش هـ يخفى علينا في قصصه ورواياته لازم تيجي سيرة البحر ولازم تشم ريحة اليود علشان يوسف الإسكندراني لازم يظهر في كتابته، ولا نتكلم عن كتابته يبقى تعالوا نشوف... "موعود" قصة شاب غريبة شوية، شاب اسمه موعود وما تستغربوش الاسم يا جماعة، وما تبقوش زىي كل الناس اللى عقدته في اسمه، وهو صغير لغاية ما اتجوز.. موعود زينا كلنا، مين فينا يعني اختار اسمه، الحكاية هي أن والده كان بـ يشرب "لا موأخذة" المخدرات وبعدين "عليت معاه" وكان بـ يسمع أغنية موعود لعبد الحليم حافظ، وجات له البشارة أن زوجته جابت له ولد فـ قرر يسميه... المهم الحبكة هنا في أن موعود بـ يقعد طوال الوقت يدور على معنى لاسمه وفي النهاية هـ يلاقي المعنى. بـ يدور بنا يوسف زيدان في مناطق مختلفة وأوقات كمان مختلفة وتواريخ كثير بـ تخليك تركز جدًا وأنت بـ تقرأ وده بـ يبان في قصة "عرس عجوز"، هي ست عجوزة ومات زوجها، وانقطع عنها الناس، وكلهم مستنيين موتها علشان يورثوها، وهي كانت راضية بعيشتها، واللى ساعدها على تحمل الوحدة "خصلة الشعر" اللى أهدتها لها صديقتها العراقية وهي خصلة من (لها جو أسطوري) وبـ يتبدل الحال بعد الحال بعد موضوع الخصلة واللى عاوز يعرف يقرأ... في النهاية "حل وترحال" مجموعة قصص تستحق أنها تكون في مكتبة كل حد فينا، زي ما قولنا قبل كده، فيها عن الصداقة والحب والخيانة، وكل السرد ده تم بلغة راقية وبسيطة ومن غير عقد، يعني كل حاجة لها فك وتركيب.

...

حكايات بعد النوم: طاغور السكندرى
اصدرت في: 08/05/2015

المقدمة اللى كاتبها الكاتب الكبير "محمد المخزنجى" فى أول المجموعة محتاجة وقفة.. من المعروف لما كاتب كبير بـ يقدم كاتب شاب بـ يقول عنه كلمتين أو سطرين وبـ يبقوا فى خلفية الغلاف.. إنما أن المخرنجى يكتب مقال ينفع مقدمة للكتاب يبقى إحنا أمام موضوع بقى كبير ولازم نقف عنده علشان نفهم إيه سر إبداع أحمد الديب اللى خلى المخرنجى يقول عنه أنه "طاغور السكندرى" ويشبهه بالشاعر الهندى الكبير "طاغور". للفراشة ونجمة البحر.. وملوك القطار وابن الحداد واللافتات والحجر، وللخطوات ولليل والفجر، هما دول أبطال المجموعة القصصية لأحمد الديب الكاتب السكندرى اللى من الطبيعة ولها يعود. فى العادى غبار التجربة الأولى بـ يكون داخل وباين فى المجموعة القصصية أو العمل الأول.. لكن على عكس المتوقع جاءت "حكايات بعد النوم" اللى كانت نتاج شغل ست سنين من الكتابة وده اللى قاله الكاتب نفسه والعهدة ع الراوى. القصص بـ تعيد تقديم عناصر الطبيعة والوجود من حولنا وتعالوا نكتشف معاه.. الفراشات من القصص الومضة صراحة بس كبيرة فى معناها وعمقها واللى فيها تقرأ فى قديم الزمان ما كانش حد يقدر يشوف الفراشات إلا صاحب القلب الأبيض.. وطلع أنت بقى المعانى من جواك. بـ يكمل الديب فى بحر الطبيعة وتبان فى قصة "أصفر" والسرد فيها مرتبط باللون، اللون اللى بـ يعدى على التفاح الأحمر ويغير من جماله فى محاولة لأنسنة الأشياء، اللون اللى بقى إنسان.. وبـ يشوف وله عيون وبـ يشوف من ضمن اللى يشوفه الشجر وزهوته.. وبـ يفضل فى رحلة طويلة علشان يعرف أهميته على سنابل القمح (يا ترى كلنا عرفنا مين هو الأصفر؟) الوردة والياسمينة بقى موضوع ثانى بـ يبان فيها قد إيه خياله جامح وكأنها خناقة حريمى بين الوردة والياسمينة وفيها تقدر تشوف كل واحدة منهم لها تفاصيل وحياة ومعرفة وحب وذات. "حكايات بعد النوم" مقسومة على جزئين: الأول حكايات بعد النوم وفيها "الفراشات – عقارب – ورد وياسمين – ابن الحداد – السنجاب"، والجزء الثانى "قصص قصيرة" ومنها "لافتات – فترة – فرصة – نعناع – خفة". أيها الناس اقرأوا واعوا.. إحنا معانا مجموعة قصصية مكتملة الأركان وتعالوا نبدأ من الأول.. الرجل تفكيره جيد أنه بعد عن الحياة المعتادة وبعد عن الناس ومشاكلهم.. واتجه للطبيعة.. ومن مميزاته كمان أنك لما تمسك المجموعة مش هـ تزهق هـ تفضل مركز معاه.. وتكمل القصة لحد آخرها.. وكمان فيه ميزة ثانية أن قصصه مركزة جدًا يعنى لما بـ يكتب بـ يختار لغته بعناية وهدوء وتركيز وعنده مقدرة على اختيار الجمل واللعب على التصوير والتسلسل عنده جيد إلى حد كبير.. واللغة بجد ساحرة لأنها لعبت على مناطق بكر فى الطبيعة.. وكمان طريقة عرضه لفكرته وأفكاره الجديدة هـ تخليك تحب تقرأ المجموعة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن