دليل كافيهات القاهرة، أحدث المقالات عن كافيهات مصر

كافيهات

خميرة: مخبوزات فريش في الزمالك
اصدرت في: 06/09/2016

نعتقد أن محلات المخبوزات ثاني مكان الواحد ما بيقدرش يقاوم فيه منتجاته بعد الآيس كريم، وده لأن أي مخبز –بجانب بيع العيش اللي منقدرش نعيش من غيره- بيبقى عنده مقرمشات ومعجنات أشكال وألوان. خميرة - Khamera من ضمن الأماكن اللي مقدرناش اللي نقاوم نرجع لها بعد آخر زيارة لينا –من 3 سنين مثلًا- علشان نشوف نظامهم إيه. لسوء حظنا كانوا مشغلين الشفاط جوه وبالتالي ما جاتلناش فرصة أننا نشم أحلى ريحة في العالم؛ وهي ريحة المخبوزات. المحل صغير فأنت هتشوف كل منتجاتهم قدامك. على الكاونتر لاقينا 3 أطباق تقدر تدوق منهم قبل ما تشتري، جربنا منهم بسكويت باللوز و الشوكولاتة البيضاء، بالرغم من أن طعمها لذيذ إلا أننا حسينا أنها ناشفة زيادة عن اللزوم وضروري يكون معاها كباية شاي أو قهوة تسقيها فيها قبل ما تقضم وإلا سنانك ممكن تروح فيها. لفت نظرنا برضه في الطبق الثاني بسكويت فيه قطع صغيرة لونها أحمر وأخضر فكرتنا بالكيك اللي بيبقى فيه قطع فواكه مجففة، فتوقعنا أنه يكون البسكويت حلو، ولكن المفاجأة كانت أن القطع دي قطع طماطم وزيتون أخضر، ونعترف أنها كانت مفاجأة لذيذة؛ لأننا ما جربناش حاجة شبه النوع ده قبل كده. معروض برضه مجموعة من الكرواسونات والدانيش، قررنا أننا نختار منها كرواسون بالزعتر (10 جنيه)، واللي كان فريش ومليان زعتر، إلا أن عيبه الوحيد أن الجبنة فيه –حسب ما مكتوب المفروض أنها لبنة- كانت شبه معدومة. وبما أننا بنحب أي حاجة عليها جبنة؛ قررنا نجيب مقرمشات مربعة بالجبنة الرومي، وهي من المنتجات المشهورة اللي هتلاقيها عند أي خباز (45 جنيه للكيلو)؛ المقرمشات فريش وخفيفة وأحلى حاجة أن جبنتها كثيرة. أما للناس اللي بتحب حبة البركة فالباتون ساليه (55 جنيه) اللي معمول به كان طعمه لذيذ وخصوصًا أن كمية حبة البركة فيه كبيرة. صحيح إحنا مش من هواة البقسماط، ولكن ده ما يمنعش أننا جربناه (30 جنيه)، والحقيقة أنه هش جدًا وهيعجب أي حد كييف قاعدة الصبح بالبقسماط مع الشاي. في النهاية، نقدر نقول أن التجربة في مجملها كانت لطيفة ولذيذة؛ الحاجات اللي دقناها كانت فعلًا لطيفة، صحيح المحل مش هيبهرك بديكوراته وطريقة عرضه زي محلات ثانية كثير تغريك، إلا أن المنتجات بتثبت جدارتها بنفسها.

...

فور فات ليديز: أحلى حلويات في الزمالك؟
اصدرت في: 30/08/2016

طبعًا كلنا عارفين شارع البرازيل، واحد من أزحم شوارع الزمالك والشهير بأكابر عالم الحلويات زي نولا وخميرة ولقمة عيش وجيلاتو ميا وغيرهم. الجديد في الموضوع إن "ذا فور فات ليديز The Four Fat Ladies" ساب مكانه في اليمامة سنتر ودخل حرب الحلويات المشتعلة في شارع البرازيل. نبدأ مع وصف المكان؛ مخبز صغير فيه أربع ترابيزات متوصلين ببعض بحيث يعملوا ترابيزة كبيرة، مع أربعة كراسي على جنب والجنب الثاني فيه كنبة كبيرة. صحيح اختيارهم للكنبة مش عملي، لكن الأكيد إن أجواء وديكورات المكان باللونين الأبيض والبرتقالى للحوائط والمعالق الخشب المتعلقة على الشباك وكمان الصورة المكتوب فيها "Peanut Butter is my boyfriend" والصبورة المكتوب عليها المنيو يتميزوا بالبساطة والشياكة في نفس الوقت. بساطة المكان مش ظاهرة في الديكورات وبس، الحلويات عندهم كمان مالهاش حل. أول حاجة هتلاحظها في حلويات ذا فور فات ليديز المتنوعة بين كيكات ومافينز وفطائر وتشيز كيك أنك بتاكل حاجة بيتي نظيفة ومختلفة عن باقي المخابز، وكمان المفاجئة أنهم رجعوا الماربل كيك والباندت كيك Bundt Cakes مرة ثانية. ربع ساعة كاملة وإحنا واقفين قصاد ثلاجة العرض زي الأطفال التايهين؛ تخيلوا! في الأخر قررنا نبدأ بسلايس فادج شوكولاتة بزبدة الفول السوداني (19.50جنيه) مع قطعة كاروت كيك (١٦ جنيه) وسولتد كراميل براوني بايت Salted Caramel Brownie bite (4.50 جنيه) وسمورز براوني بايتس S'mores Brownie Bites(4.50 جنيه). المختلف في الفادج كيك عن الموجود في السوق أنها رطبة وطرية جدًا، وكل قضمة منها بتدوب بسهولة وكمان فروستينج زبدة الفول السوداني كان مسكر ولذيذ. نروح على الكاروت كيك المعمولة زي ترايفل في طبق بلاستيك غويط وواضح فيها نكهة القرفة، وصحيح سكر الكيك نفسه كان قليل، لكن الكريمة صاحبة القوام الرائع كانت مسكرة بزيادة. مافيش شك أن كل حاجة في الكاروت كيك لوحدها كان فيها مشكلة، لكن الكيك مع الفروستينج خدموا بعض وعملوا لنا كاروت كيك هايلة. بصراحة كنا قاصدين نسيب البراوني بايتس التحفة للأخر علشان تكون مسك الختام. قطعتين فادج براوني مليانين كراميل، وتقدر تقول عليهم ساندويتشات براوني طرية محشية كراميل وواضح فيها طعم الشوكولاتة القوي اللي عمل شغل عالي مع الكراميل. أما السمورز براوني فكانت هايلة بس طعمها أقرب للكوكي منه للبراوني. علشان نلخص تجربتنا في ذا فور فات ليديز ممكن نقول أنها كانت هايلة، ومافيش شك أنهم كسبوا ملحمة حلويات شارع البرازيل بكل جدارة خصوصًا أنهم بيقدموا الحلويات المعروفة بلمستهم الخاصة، وكل ده وسط أجواء مريحة وموظفين هايلين. نقدر نقول كمان إننا ماقابلناش مشاكل يومها ويسعدنا إننا نقدم لكم الفائز في ملحمة حلويات شارع البرازيل. الأجواء هناك هايلة ومريحة والموظفين ممتازين، لكن سر نجاح ذا فور فات ليديز هو الحلويات اللي كلنا بنحبها ومن غير افتكاسات ملهاش لزوم.

...

دليلك لأهم أماكن الحلويات في التجمع الخامس
اصدرت في: 28/08/2016

زي ما كل واحد فينا ليه "النُص الحلو" بتاعه، بطنك كمان من حقها يكون ليها نص حلو! وعلشان تدلّعها من غير تعب ونكسر لك قاعدة "مافيش حلاوة من غير نار"، إحنا هنقول لك على الأماكن اللي تقدر تحلّي فيها في التجمع الخامس، ومن أشهر الأماكن اللي ممكن تجيب منها تورتة، جاتوهات، أو حلويات بشكل عام هو: سدرا - Sedra سدرا من أنضف الأماكن اللي ممكن تاكل منها حلويات، ممكن يكون أغلى شوية لكن الأكيد إن حاجته تجنن، حتى لو فكرت ماتحلّيش وتقضيها حوادق، هتلاقي عندهم تورتات من فصيلة الحوادق زي تورتة السيمون فيميه، وتورتة السي فود . وده هتلاقيه في 313- ش التسعين الجنوبي – أمام سيراميكا كيليوباترا . ساليه سوكريه - SaléSucré ساليه سوكريه تقدر تجيب منه تقريباُ نفس الحاجات اللي هتلاقيها في سدرا، لكن نقدر نقول أنه أقل منه درجة، يعني سدرا حاجته أجمل واختياراتك فيه هتكون أوسع، وحلوياته مهما تِقلِت هتفضل خفيفة على قلبك. بس نقدر نقول لك بقلب جامد تجرب البروفيترول وكمان البسبوسة من ساليه سوكريه. تروحله إزاي بقى؟ العنوان مايتوّهش، ببساطة لأن الفرع بتاعه في كايروفيستيفال سيتي مول اللي في تقاطع الدائري مع شارع التسعين. كوبلر ميلت - Copper melt كوبر ميلت ده بقى حكاية، كان نفسنا نقول لك أنه ليه منيو نقدر نعرضه عليك ونغريك، بس الحقيقة عين الإغراء أنك تزور المكان ده بنفسك وتشوف رُقي الديكور وطريقة توزيع أماكن الستاندات اللي معروض فيها الحلو والحادق، ولطافة الناس اللي بيشتغلوا. وأنت بتنقي هتحتار شوية وتفضل تلف بين كل ستاندات العرض ولا كأنك بتدوّر على بوكيمون! بس اللطيف أنك هتلاقي من على الباب حد بيستقبلك وبيلف معاك في المكان بكل أريحية لحد ما تستقر على حاجة. من ألطف الحاجات اللي مشهور بيها المكان هي "الكيك بايتس"، هتلاقيها في ستاند مليان كوَر كتيرمعمولة بالتشوكليت والألوان المبهجة، وكمان بيعملوا مهلبية ورز بلبن في أطباق فخار شكلها هيخليك تاكل غصب عنك . والمكان ده موجود في 279 -ش التسعين - عمارة المعمار – جنب سيراميكا كليوباترا . في مكانين تانيين هيكونوا قريبين منك لو أنت ساكن ناحية المحكمة وهم: توماس - Thomas وتورتينا - Tortina توماس عمل اسم كويس في التلات سنين الأخيرة، بس لو عاوز المفيد، فأكتر حاجة ننصحك تاكلها من هناك هي الكيك بأنواعه، هايل! ومكانه في المجمع الطبي الي قصاد مجمع المحاكم. أما تورتينا فأحسن حاجة هو متخصص فيها التارتات، والفرع بتاعه هتلاقيه في سوبر ماركت مترو - 7 ستارز. ولو أنت من عشاق الإكلير، فمافيش غير مكان واحد هيحتويك في الموقف ده: L'Éclair Paris المكان ده طبعًا واضح من اسمه أنه متخصص في الإكلير بس، حلو وحادق وكل اللي يخطر على بالك، بس مشكلته الوحيدة لو طبيت عليهم من غير معاد ممكن ماتلاقيش كل اللي في المنيو موجود في التلاجة، وده تقريبًا لأن فرع التجمع صغير شوية، فأحسن لك تروح بدري، هم بيشتغلوا من 9 صباحًا لحد 1 صباحًا. وده موجود في داون تاون مول - شارع التسعين . أما لو أنت من الناس اللي بيعيطوا أول ما يشوفوا فيديوهات الحلو اللي بيفرقع شوكولاتة من كل حتة، يبقى مالكش غير Dip and Dip. حلو كدا وبيحتوي البني آدم، بس حاول تروحه في أيام وسط الأسبوع أو الصبح بدري تجنبًا للزحمة. وده مكانه في كايرو فيستيفال سيتي مول، منطقة مطاعم النافورة. نوعدك تطلع منه منشكح ووشك وهدومك آكلين معاك شوكولاتة!

...

تيمبو كافيه: أكل ممتاز وخدمة عالية في الدقي
اصدرت في: 23/08/2016

ناس كتير مؤمنة أنك علشان تلاقي مطعم أو كافيه كويس لازم تهرب من مطاعم وسط القاهرة وتروح الشيخ زايد أو التجمع، وأنك كا ما بتبعد عن قلب القاهرة كل ما بتلاقي مطاعم أفضل، لكن تيمبو كافيه الموجود في الدقي بالقرب من المركز الثقافي الروسي نجح يغير المقولة دي، الحقيقة أنه مش مجرد كافيه، هو كمان مطعم مميز بيقدم أكلات شهية. مدخل المكان مبهج، وده بيديك مؤشر على أنك هتمر بتجربة حلوة، بمجرد دخولك هتلاحظ أن المكان مستواه مميز، بنتكلم عن النظافة تحديدًا، كمان المكان واسع وفيه مساحات بين كل ترابيزة والثانية وده بيدي خصوصية بيبحث عنها ناس كتير بتكره الأماكن الضيقة. مستوى الخدمة في المكان يستحق نتكلم عنه، الموظفين كلهم مبتسمين ابتسامة حقيقية، بيقابلوك مقابلة كويسة، وبيهتموا بك، في تجربتنا الموظف طلبنا من الموظف يساعدنا ويقول لنا أفضل الأطباق والشروبات في المكان علشان أول مرة نزوره، والحقيقة أنه كان متعاون جدًا، شرح لنا مكونات كل طبق ومشروب. رغم أن المكان كان فيه عدد كبير لكن بسبب المساحة الواسعة لتيمبو ماكوناش حاسين بالزحمة، واختارنا ترابيزة هادية، في البداية طلبنا من منيو الأكل ساندوتشات تملى التانك، طلبنا ساندوتش فراخ بانيه، (27 جنيه) وده بيتكون من قطع بانيه وخس ومايونيز، كان الطعم رائع، وتتبيلة الفراخ كانت مميزة، مش سهل أننا نلاقي بانيه مضبوط في مطاعم القاهرة، لكن الحقيقة أن تيمبو عرف يضبط الموضوع كويس. كمان حجم الساندوتش كان معقول ومناسب لشخص جعان. طلبنا كمان ساندوتش تيمبو برجر جامبو، وده أجمل ساندوتش ممكن تأكله هناك، كل المكونات مضبوطة، ومحتوياته من خيار وكابوتشة وطماطم خلت الساندوتش أقرب لوجبة متكاملة، كل حاجة محطوطة بضمير فيه. بعد الأكل قولنا لازم نجرب المشروبات اللي بيتميز بها الكافيه، اختارنا مشروب فلوريدا (23 جنيه) وده عبارة عن خليط من مانجو، فراولة، وجوافة، كانت تجربة أكثر من رائعة، المكونات كلها طازجة، ومتقسمة صح، ونسبة السكر مضبوطة، جربنا كمان تيمبو كوكتيل (28 جنيه) وده كان خليط من أكثر من عصير منهم مانجو وكيوي، طعمه كان رائع. انتهت تجربتنا في المكان، لكننا واثقين أننا هنرجع ثاني، نجرب حاجات أكثر.

...

لا بوار كافيه: قعدة لطيفة في مول العرب
اصدرت في: 16/08/2016

قليلة جدًا الأماكن اللي بنلاقيها متواجدة على ساحة المطاعم والكافيهات من زمان؛ أغلب الأماكن بتبقى فتحت مؤخرًا أو أخرها نص التسعينات –ده لو عمرت. من ضمن الأماكن اللي بقالها زمن موجودة ومر عليها أجيال هو محل الحلويات لا بوار. المحل بدأ رحلته سنة 1974، وانتشر في أنحاء القاهرة ومصر وهو حاليًا من أشهر الأسماء الموجودة على الساحة في عالم الحلويات والمخبوزات. من فترة مش بعيدة، بدأ لا بوار ينتشر في نوادي كثيرة تحت عنوان لا بوار كافيه علشان يقدم بجانب منتجاته المعتادة أطباق مخلتفة ومشروبات متنوعة، وبعدها انتشر في القاهرة واسكندرية بمفهومه الجديد. وبما أن لا بوار كافيه – La Poire Cafe فتح أجدد فروعه في مول العرب في أكتوبر، قررنا أننا نروح نشوف إيه الكلام. زي معظم الكافيهات الموجودة في المنطقة الداخلية من المول، لا بوار واخد مساحة كبيرة مفتوحة من الجانبين؛ يعني تقدر تقول أنه واخد ركن كبير فيه كاونتر كبير معروض فيه مختلف المنتجات اللي لا بوار بيقدمها من حلويات شرقية وغربية وساندويتشات وعصائر. أما بقية المساحة، فهي مخصصة لترابيزات وكراسي شكلها لطيف من الخشب. عجبنا في المكان أن ألوانه فاتحة، وهي مكونة من الأبيض وألوان اللوجو مع مجموعة من ألوان الباستيل الهادية. إجمالًأ، الديكور مريح للنظر وهادي. بما أننا كنا في وقت الفطار؛ طلبنا من المخبوزات كرواسون بالجبنة الإمنتال (28 جنيه)، وساندويتش روست بيف (44 جنيه)، ومعاهم واحد كابتشينو (25 جنيه)، وواحد لاتيه بالقرفة والعسل (24 جنيه). الكرواسون في المجمل كان فريش وكمية الجبنة فيه كانت وفيرة، إلا أن الخس الموجود فيه مش طازة بالمرة لدرجة أننا قررنا نخرجه من الكرواسون عشان ما يبوظش التجربة. أما الروست بيف –اللي كان مقدم في عيش بني بالحبوب- فكانت كمية الروست بيف فيه ممتازة، والجبنة الموجودة في الساندويتش كانت هايلة، ولكن تمنينا أن يكون في الساندويتش أي صوص يحرك المسائل، ولكن في المجمل كان شهي. أما بالنسبة للكابتشينو، فالقهوة كانت قوية ولكن في نفس الوقت طعمها متوازن مع كمية اللبن وبالتالي نقدر نقول أننا ممكن نعتمد على قهوة لابوار من هنا ورايح. ولكل لو بتحب المشروبات المسكرة، تقدر تختار اللاتيه بالقرفة والعسل وأنت مطمئن؛ والمشروب ببساطة يعتبر حلو في حد ذاته وخصوصًا أن كمية العسل محترمة ولكن حرارة القرفة بتوازنها –أما لو أنت ما لكش في المشروبات المسكرة، ما ننصحكش لأن طبيعي جدًا يكون المشروب مسكر بوجود العسل. وبما أننا في لا بوار، كان لازم نختار من منيو الحلويات اللي إحنا عادة بنضعف قدامها؛ فقررنا أننا نطلب من الحلويات French Toast – توست معمول بالطريقة الفرنسية (48 جنيه) وبروفيترول (14 جنيه). الأول عادة بيبقى عبارة عن قطع توست مغموسة في البيض واللبن والفانيليا والقرفة، بعدها بيتحمص في زبدة على النار، ولابوار بيقدمه محشي بقطع الموز. بجانب طعمه المميز والمضبوط سواء من حيث التسوية، الطعم أو تجانس المكونات، عجبنا الطريقة اللي متقدم بها الطبق، بحبات اللوز المكسر اللي كانت مرشوشة على جوانب التوست المقطع لثلاث قطع، ونعتقد أن اللوز أضاف قرمشة حلوة لطبق ميزته الأساسية أنه طري. أما البروفيترول، فبنعتبره من كلاسيكيات لا بوار اللي متعودين عليها. وللي ما يعرفش ماهية البروفيترول هو عبارة عن عجينة اسمها عجينة الشو –اللي هي بتاعت الإكلير- ومحشية كريمة وغرقانة صوص شوكولاتة. بالرغم من أن الحلو الأولاني كان تقديمه أكثر من رائع، إلا أن الطبق ده كان على العكس تمامًا كان بولة مش باين فيها غير بركة شوكولاتة وقطع الشو مختفية تحتها، لحسن الحظ طعم البروفيترول كان أكثر من رائع –صحيح هما كانوا ثلاثة بالعدد إلا أن حجم العجينة كان كويس وكمية الشوكولاتة كانت أكثر من كافية. في النهاية، نقدر نعتبر التجربة في مجملها لطيفة، سواء من ناحية جودة الأكل –مع ملاحظاتنا البسيطة- والمشروبات ونفس الكلام مع الخدمة. تقدروا تعدوا عليه وسط جولة التسوق في المول ومش هتندموا.

...

سكوبس: الآيس كريم في أجمل صوره في أبراج نايل سيتي
اصدرت في: 15/08/2016

حاولنا نلاقي افتتاحية مناسبة للمقال، لاقينا أن أي كلام هنقوله عن الآيس الكريم مكرر وكليشيه؛ لأننا هنتكلم عن قد إيه الآيس كريم منعش ولذيذ –وخصوصًا في حر أغسطس- وأنه حلو خفيف مناسب لأي وقت في اليوم... كل الكلام ده قلناه قبل كده فهندخل في الموضوع على طول. قررنا نعمل زيارة لواحد من أشهر الأماكن اللي بتقدم آيس كريم وهو سكوبس – Scoops، واللي موجود في أبراج نايل سيتي. وبالرغم من أن نايل سيتي مول فيه مجموعة كبيرة من المحلات المميزة، إلا أن عامل الجذب الأساسي للمكان هو السينما. كنا بنفكر أن موقع المحل ممكن يكون ظلمه كثير، إلا أن وجوده ممكن يعمل خروجة ممتازة مكونة من سينما وآيس كريم. المحل عبارة عن ركن مفتوح فيه حوالي ترابيزتين مرتفعتين ممكن تستمتع عليهم بالآيس كريم، أما بقية المكان فهو عبارة عن كاونتر فيه ثلاجة آيس كريم فيها أنواع ونكهات كثيرة، ومجموعة من الإضافات اللي ممكن تحطها على الزبادي المثلج. الآيس كريم أحجامه وأسعاره كالآتي، البولة الواحدة (16 جنيه)، الاثنين (30 جنيه) والثلاثة (40 جنيه). أما الزبادي المثلج فالعادي أسعاره من الأصغر للأكبر كالآتي 18 – 28 – 40 جنيه، ولو بنكهة 20 – 30 – 46 جنيه. أما الإضافات فالواحدة بـ 5 جنيه. سكوبس كمان عنده جيلاتو ستيكس وهي عبارة عن بولة آيس كريم بنكهات مميزة على عصاية (20 جنيه للواحدة)؛ من ضمن نكهاته شوكولاتة بالبندق وشوكولاتة دوبل بالفستق. من مجموعة الآيس كريم اختارنا الآتي، بولة بنكهة الليمون بالنعناع، والثانية بالقهوة والثالثة تيراميسو. بالرغم من أننا من عشاق نكهة الليمون، إلا أننا كنا متشككين من طعم النعناع، واعتبرنا نفسنا بنجازف لما اخترناه. ولكن نعترف أنها كانت مجازفة في محلها، وخصوصًا أن ما فيش نكهة طاغية على الثانية، والاثنين مع بعض كانوا أكثر نكهة منعشة ذقناها في حياتنا. وبما أننا بنقدر أي منتج بطعم القهوة، نقدر نقول أن نكهة القهوة في سكوبس لا يعلى عليها؛ لأن بعكس الأماكن الثانية اللي نكهة القهوة عنده بتبقى نكهة نسكافيه، أما نكهة سكوبس فأول المعلقة بتحس بطعم حلو بعدين تتخبط بنكهة القهوة القوية، ده غير حبات القهوة المحمصة اللي هتلاقيها كل شوية اللي أضافت قرمشة لنعومة قوام الآيس كريم. أول ما هتدوق التيراميسو هتحس أن طعم القهوة مش واضح قوي وأن طعم بقية مكونات التيراميسو هو الطاغي؛ إلا أن مع أول قطعة كيك ظهرت لنا حسينا بطعم القهوة واكتمل طعم التيراميسو بالنسبة لنا. أما الزبادي المثلج، فاخترنا الحجم الأصغر وأضافنا عليه جرانولا وقطع بسكويت الآيس كريم مكسرة. بالرغم من أن قطع الجرانولا كانت كبيرة فخلصت بسرعة وتمنينا أنها تكون مفتتة أكثر علشان نوزعها على الزبادي بأكبر شكل ممكن، الآيس كريم المكسر نكهته ما كنتش قوية زي ما توقعنا ولكن ساعد على أن يكون فيه قرمشة جانب قطع الجرانولا. ما فضلش غير أننا نقول أن طعم الزبادي كان رائع، مضبوط ما بين الطعم الحلو والطعم اللاذع المعتاد للزبادي. غير كده كمان سكوبس عنده زبادي مثلج بنكهة زبدة فول السوداني، وعجبتنا لما ذقناها، إلا أننا خوفنا طعمها القوي يغطي على طعم الإضافات اللي هنطلبها. إجمالًا، نعتقد أن سكوبس من الأماكن اللي قدرت تحافظ على مستواها بمرور الوقت، فسواء القوام أو قوة النكهة وحتى الكمية مقابل سعر معقول... سكوبس قدر أنه يحقق الثلاثة دول بامتياز ويستحق الزيارة.

...

قهوة: زيارتنا لفرع واتر واي كانت مخيبة للآمال
اصدرت في: 03/08/2016

عرفناهم وحبيناهم من فرعهم في مدينة 6 أكتوبر اللي يعتبر من أحلى المطاعم الجديدة المعروفة بفطارها اللذيذ. أكيد طيرنا من الفرحة لما عرفنا إن "قهوة" فتحوا فرعهم الثاني في القاهرة الجديدة وتحديدًا في واتر واي، لكن للأسف كانوا بعيد عن المستوى المنتظر. قهوة عندهم قعدتين، واحدة داخل المكان معروض فيها أطباق الحلو – ومحتاجة إضاءة أحسن شوية – أما الآوت دور فهي المكان المثالي لوجبة البرنش بشمسياتها البيضاء والمراوح السوداء وترتيبة الترابيزات والكراسي الخشب المريحة. لازم قبل ما نتكلم عن الأكل نقول إن الخدمة لما كنا هناك كانت سيئة. علشان المنيو توصل أصلًا احتاجنا نستنى نص ساعة وخمسة جرسونات مختلفين، لدرجة إننا كنا بنتحايل عليهم يجيبوا المنيو وأي حد ينظف ترابيزتنا. بعد ما عدينا البداية العجيبة، طلبنا Cobb Salad (60 جنيه)، وهي عبارة عن طبق كبير فيه خس ومكعبات فراخ طرية غرقانين في صوص الباربيكيو، ومعاهم فاصوليا حمراء وذرة حلوة وجبنة شيدر مبشورة وقطع بيف بيكون، وكل دول غرقانين صوص رانش. كمية السلطة كانت كبيرة فعلًا، وصحيح مكوناتها كثير، بس ماشيين مع بعض تمام. مكونات السلطة كانت كلها طازة وطعم الباربيكيو صوص مع الفراخ عملوا شغل عالي. الملاحظة الوحيدة إن نسبة الخس لباقي الإضافات محتاجة نظرة. بعدها دخلنا على أومليت بالسبانخ والمشروم (38 جنيه). الأومليت كان مستوي كويس ومحشي ومحطوط فوقه كمية هايلة من الجبنة والسبانخ والمشروم، وبيتقدم مع الطبق مكعبات بطاطس تتبيلتها 10/10 ومشروم سوتيه طازة. الأومليت نفسه كان محتاج شوية بهارات – وواضح إنهم كانوا معتمدين على الجبنة تقوم بدور التوابل – أما السبانخ فماكانش لها أي تأثير على طعم الطبق. قررنا نجرب طبق بيض ثاني من عند "قهوة"، والطبق كان Egg Benedict بالبيكون (50 جنيه). الطبيعي إن الطبق ده بيكون معمول على عجينة بيتزا، لكن اللي وصل كان مجرد قطعة عيش بارد، مش كده وبس، البيض كان مستوى جدًا وماقدرناش نستمتع بشكل الصفار وهو بينفجر من البيضة. البيكون كمان كان قليل جدًا وبياض البيض كان فيه حاجة غلط. خلاصة القول، الطبق مش حلو. الحاجة الوحيدة الحلوة كانت الهولنديز صوص. كان نفسنا نختم أكلتنا بكريب فراولة وكسترد مع بلوبيري سموزي، بس الأثنين ماكانوش متاحين وقتها فقررنا نطلب عصير برتقال فريش (17 جنيه)، ومعاه Caramelised Banana Crepe (36 جنيه). رأينا في الكريب اللي عليه موزة مقطوعة نصفين – ومش عليه السكر البني زي ما قالوا – وعليهم صوص كراميل وبولة آيس كريم فانيليا سائحة في نصف الكريباية كان متضارب رغم إن التوليفة شكلها حلو على الورق. الكريب نفسه كان كويس، لكن المشكلة في طريقة التقديم، وبرضه الموضوع كان على عكس توقعاتنا. شوف أهو الكلام كان هيأخذنا وننسى البرتقال اللي وصل وإحنا بندفع الشيك على الكاونتر؛ تخيل! طبعًا إنه يوصل متأخر أحسن من مافيش، بس للأسف في الحالة دي يا ريتهم سابوا البرتقالة في حالها. العصير كان فاتر ومافيش ثلج؛ تخيل برضه! على حسب تجربتنا مع فرع قهوة في أركان مول وشهرة المكان بصفة عامة، زيارتنا لفرع واتر واي كانت تجربة للنسيان. بعيدًا عن جودة الأكل، الخدمة كانت مرعبة، خصوصًا إننا لما روحنا كان المكان فاضي لحدِ ما.

...

آد & رول: حمى الآيس كريم رولز وصلت الزمالك
اصدرت في: 01/08/2016

نعتقد أن الآيس كريم ارتبط في ذهننا ببسكويتة وعليها بولة، ولكن من فترة ظهرت محلات بتقدم الآيس كريم بشكل غير تقليدي، وبدل ما يكون بولات عادية بقى يتقدم على شكل رول. وبجانب شكله الغير تقليدي، طريقة صنعه هي كمان غير تقليدية بالمرة، وده اللي حبينا نشوفه بعنينا في محل آد & رول الموجود في الزمالك. المحل مش صعب توصل له بالرغم من أنه في الدور الأول في العمارة المقابلة لكافيه سوبريم؛ وده لأن المحل إضاءته قوية واللي تقدر تشوفها من خلال الواجهة الزجاجية في شارع إضائته أساسًا مش قوية. من غير تفكير كثير مشينا لبوابة العمارة الكبيرة، وطلعنا مجموعة سلالم ودخلنا شمال. وقت زيارتنا، المحل كان زحمة كأن كل الموجودين في الزمالك قرروا أنهم يأكلوا آيس كريم. الفكرة الأساسية في آد & رول أنك هتختار أساس للآيس كريم بتاعك من ضمن 3 نكهات (فانيللا – شوكولاتة – زبادي مثلج) أو نكهة المستكة واللي سعرها 5 جنيه. بعد ما هتختار الأساس، قدامك إضافات كثيرة ممكن تختار منها بتتفاوت في أسعارها؛ ما بين أنواع الشوكولاتة المختلفة (كيت كات، مارس، فريرو روشيه... إلخ)، فاكهة (واللي كان شكلها فريش ومشجع)، كيك، قهوة وبسكويت ومكسرات، ده غير أنواع مميزة جدًا مكونة من الحلويات الشرقية. وأقل سعر للإضافات هو 15 جنيه للفاكهة، أما الأغلي من نصيب المكسرات وهو 25 جنيه. اللطيف أن أول توبينج بيبقى ببلاش وأي إضافة تانية سعرها 5 جنيه. قررنا أننا نطلب الآتي: نكهة الفانيللا وعليها نوتيلا وصوص شوكولاتة (20 جنيه)، ونكهة الليمون بأساس زبادي مثلج (15 جنيه)، وعلشان ما نروحش وإيدينا فاضية أخذنا نكهة الكابتشينو بأساس شوكولاتة وصوص كراميل (20 جنيه) تيك أواي. بالرغم من أننا كنا متحمسين أننا نتفرج على الآيس كريم وهو بيتعمل، إلا أن الكاونتر اللي واقف عليه 3 أشخاص بيعملوا عليه الآيس كريم ما كانش مساعدنا لأنه أعلى من الصاج المثلج اللي بيتعمل عليه المنتج، فلازم تكون مقرب جدًا علشان تشوف العملية من أولها لآخرها. أول حاجة وصلت لنا كانت الليمون بالزبادي؛ الزبادي المثلج كريمي وطعمه غني، إلا أن نكهة الليمون ما كانتش بالقوة اللي كنا عايزنها –فننصحك لو بتحب الليمون اختاره مع أساس الفانيللا لأن نكهة الزبادي كانت قوية جدًا. أما النوتيللا بأساس الفانيللا كان أحلى حاجة ذقناها في التجربة بلا منازع؛ لأن كمية النوتيللا كانت كويسة ومناسب جدًا لأساس الفانيللا وصوص الشوكولاتة. الميزة في آد & رول أن كمية الآيس كريم أكثر من ممتازة، لدرجة أن في أول مرة في حياتنا ما نقدرش نكمل الكوب كله. بالنسبة لآخر حاجة طلبناها تيك أواي –وهي آيس كريم بنكهة الكابتشينو بأساس شوكولاتة وصوص الكراميل- حصل موقف غريب؛ فبعد ما خلاص اتعمل واتقفل بغطاء –هو مش غطاء مخصوص للعلبة، هو غطاء لكوبايات العصاير المفتوح من فوق- طلب اللي عمل الآيس كريم من واحد من العاملين أنه يكمل تجهيز الطلب كتيك أواي، فالعامل أخذ الآيس كريم ودخل المطبخ –قلنا أكيد هيغلفها ببلاستيك أو حاجة- بعدها 10 دقائق رجع لنا نفس الشخص –بعد ما اللي عمل الآيس كريم فكره- بالآيس كريم من غير أي تغليف، واكتفى أنه يديلنا معلقة ومنديل... طلبنا كيس... كان رده أن ما عندهمش، ولكن فيه حامل أكواب ما يخرجش إلا لأربع طلبات بس! طبعًا إحنا روحنا بالآيس كريم وهو في حالة مأسوية قللت من استمتاعنا به بس هو كان كالآتي؛ نكهة الشوكولاتة كانت الأقوى، وبيظهر طعم قوي للقهوة كل فترة، صوص الكارميل ما بدأش يظهر طعمه إلا في الآخر لما وصلنا لقاع الكوباية نتيجة للسيحان اللي حصل، وهو في مجمله طعمه حلو ولكن مناسب لشخص بيحب الشوكولاتة أكثر من القهوة. بغض النظر عن عدم استعدادهم لطلبات التيك أواي –مع أن المحل عنده دليفري- إلا أن آد & رول بيقدم في المجمل آيس كريم طعمه حلو –بالذات النكهات الأساسية لأن الإضافات ممكن تلاقيها في أي مكان- وكميته ممتازة هتعجب اللي بيحب الآيس كريم.

...

ليتشي: فطارك سلاطات وشوفان من خبير العصائر المعروف
اصدرت في: 27/07/2016

في 2012 لما "ليتشيLychee " فتح كان من أوائل الأماكن اللي تفتح بار مخصوص للعصائر والسموزي في القاهرة. أي واحد من المهتمين بالأكل الصحي أكيد طار من الفرحة لما سمع إنهم أضافوا للمنيو بتاعتهم أصناف أكل جديدة، خصوصًا إنها بتقدم أكلات لذيذة وسريعة يستمتعوا بيها مع عصائر وسموزي ليتشي اللي كلنا بنحبها. المكان هنا صغير وتقدر تستمع فيه بأكلات "صحية سريعة". عجبنا شكل المكان واتفرجنا على الصبورات اللي مكتوب عليها أصناف السموزي ومكونات كل واحد منهم. البرطمانات والزجاجات الفاضية المرصوصين فوق أرفف خشبية والصور الصغيرة على الحوائط أكيد أضافوا لشكل المكان المميز. المكان كان مليان على أخره بشباب القاهرة الجميل وهم بيشربوا سموزي ليتشي، وصحيح عندهم دكة صغيرة تكفي من 5-6 أفراد، لكن الأحسن أنك تشتري وتمشي زي معظم محلات العصائر. بدأنا رحلتنا مع سلطة كال واي 'The Kale Way'، واللي وصفتها المنيو بأنها تفاح وفول سوداني مملح وتوت مجفف وتوت أحمر مجفف وخيار وبذور كتان ذهبية وكرنب. في الأول كنا متخيلين إنها خلطة منعشة لذيذة من المكونات الطازة تناسب جو الصيف، لكن السلاطة للأسف كانت بعيدة خالص عن توقعنا. المكونات المهمة اللي بتضيف الطعم المميز للسلطة زي التوت والتفاح والسوداني كانوا قليلين جدًا فطبيعي أن طعمها يطلع عادي. السلطة كمان غير إن مافيش نكهة مميزة كان فيها حاجة مش مريحة. الكرنب مع قطع التفاح كان لازم يتقطعوا أحسن من كده، فكان صعب حتى إننا نأكلهم بالشوكة، أما الخيار فكان متقطع لشريحة طويلة رفيعة، فأكلناها زي السباجيتي. الموضوع مش لطيف خالص يا جماعة. ندخل على الطبق الثاني اللي كان أحسن شوية وطعمه أفضل وهو بريك فاست أوت ميل breakfast oatmeal (40 جنيه). الطبق عبارة عن توت أزرق وموز وبذور شيا واختيارك من حليب اللوز أو حليب خالي الدسم. صحيح إحنا اخترنا حليب اللوز لكن اللي وصل حاجة ثانية، والشوفان – المضاف له شوية مياه – كان سميك القوام وأحسن حاجة إن السكر مضبوط في طعم الأكل. التوت الأزرق المجمد كان مهم علشان يضيف طعم الفاكهة اللذيذ أول لما اختلط وساح مع الشوفان الدافئ، وطبعًا إضافة القرفة للطبق كانت مسك الختام. الطبق فعلًا لذيذ وبيشبع ومليان بروتين ومفيد جدًا للصحة بفضل بذور الشيا وكمية الفاكهة الكبيرة. قررنا نجرب طبق حلو صغير جديد من ليتشي وهو كوكي خالية من الجلوتين (15 جنيه) اللي كانت ناشفة شوية، بس طعمها لذيذ وتشبه فطيرة القرفة. الكوكي ملفوفة في ورقة علشان تأكلها براحتك ومرصوصة على الرف جنب كوكيز بنكهات ثانية، وبكده تقدر تختار أي واحدة على السريع لو كنت جعان. سهل نقول بعد تجربتنا لعصائر وسموزي ليتشي أنهم كسبانين معانا بدون منافس. الكيوي بليند (18 جنيه) كان مسكّر ومنعش، وواضح جدًا إن الكيوي طازة على الأخر. العصائر الجاهزة كان لها نصيب معانا وطلبنا منهم كالمينج جرينز Calming Greens (25 جنيه) وأكيد اسم كالمينج ده له سبب. العصير غير أي حاجة خضراء جربناها في حياتنا، العصير ده بالذات فيه كاموميل -المعروف بخصائصه المهدئة- وتوت أزرق. الأثنين دول ومعاهم شوية أناناس وجزر أضافوا طعم مسكر علشان يقاوم أي نكهة حادقة من الكرنب والجرجير؛ كوكتيل مثالي مافيش كلام. بالنسبة للسموزي قررنا نطلب 'I Love Watermelon' وهو كوكتيل بسيط من البطيخ والنعناع وباشن فروت. زي ما كلنا عارفين إن البطيخ والنعناع كوكتيل محبوب في الشرق الأوسط، بس باشن فروت إزاي؟ الموضوع شكله في شغل عالي يا جماعة؛ تعالوا نشوف! السموزي بشكل عام كان روعة الروعة. مسكر وبيروي عطشك وكمان منعش، ويعتبر المشروب المثلج المثالي لحر الصيف الرهيب. كمان البطيخ المسكّر عمل تناغم رائع مع طعم الباشن فروت اللاذع. بصراحة بعد السموزي ده نقدر نقول إن الباشن فروت هو النصف الثاني للبطيخ، وأكيد نفسك هتروح عليه بعد ما يخلص. على العموم، الشيك كان عامل 168 جنيه، مش بطال طبعًا لو بصينا إن مافيش حد يتوقع من مكان بيبيع عصائر باردة مليانة مكونات أورجانيك ويكون رخيص جدًا. يمكن زعلنا شوية إن في حاجات مش موجودة – زي حليب اللوز – والجرسونات كانوا بيتوهوا شوية، بس الخدمة كانت كويسة مافيش كلام. صحيح في أكلات جديدة مش على المستوى المطلوب، بس مافيش شك إن ليتشي هو أول أخصائي عصائر وسموزي من نوعه.

...

‏5 أماكن في القاهرة تجيب منهم آيس كريم يطري على قلبك في الحر ده
اصدرت في: 20/07/2016

بالرغم من أننا مش من هواة الصيف، إلا أن ده ما يمنعش أنه موسم حاجات حلوة كثير. ولكن من ضمن الحاجات اللي ممكن تبقى حلوة في أي وقت في السنة ولكن حلاوتها الحقيقية مش بتبان غير في الصيف هي الآيس كريم؛ يمكن لأن Contrast برودة الآيس الكريم مع حرارة الجو بيعملوا انتعاش للواحد. علشان كده، قررنا أننا نكتب لك عن 5 أماكن تقدر تجيب منهم آيس كريم ينعشك في الحر اللي إحنا فيه. جيلاتو ميو – Gelato Mio : من أحسن الأماكن اللي موجودة في الزمالك، وتجربتنا معاه كانت رائعة. وبيتميز بأنه عنده مجموعة كبيرة من النكهات اللي ممكن تختار منها، ده غير أن فيه نكهات مبتكرة كثير زي نكهة جبن الركوتا بقطع التين. أما الأسعار فبتبدأ بـ 12 جنيه ومكونة من نكهتين مع بعض، لو 3 نكهات سعرهم 19 جنيه. أما لو أنت حابب تروح البيت وتقعد بعلبة حجم عائلي في حجرك، فسعر العلبة 89 جنيه. والجميل أن المحل مفتوح من الساعة 12 الظهر ومكمل معاك لحد 12 منتصف الليل. ده موقعهم الإلكتروني، ودي صفحة الفيسبوك لو عايز تاخد فكرة. أداجيو – Adagio: صحيح أداجيو مش بس متخصص في الآيس الكريم –لأنه كافيه عنده مجموعة كبيرة من أطباق الحلو والمشروبات- إلا أن آيس كريمه الغني سواء في النكهة أو القوام عامل شغل حلو جدًا في مول العرب. أسعاره بتبدأ من 18 جنيه لأصغر حجم، الوسط بـ 24 جنيه (بولتين) وبيوصل للحجم الأكبر وهو Maxi Cup بـ 42 جنيه، ده غير أنه عنده آيس كريم ستيك بـ 22 جنيه. الحجم العائلي المتوفر عنه وزنه 500 جرام وسعره 90 جنيه. المحل مفتوح من 10 صباحًا لـ 12 صباحًا. ده كان مقالنا النقدي عنه، أما ده الموقع الإلكتروني الخاص بيهم. بيل جيلاتو – Bel Gelato: بيل جيلاتو في مصر الجديدة بيتميز بمجموعة من نكهات الآيس كريم الإيطالية واللي هتعجب كل الأذاوق، فزي ما هتلاقي مجموعة كبيرة من نكهات الفاكهة هتلاقي الكلاسيكيات اللي معمولة بمكونات غنية، وكمان هتلاقي أنواع مش معتادين عليها زي الـ كابريكوف وهو مزيج من نكهة الفستق، الكراميل والقهوة. الأسعار عنده كالآتي: سواء كوب أو بسكويت الحجم الأصغر بـ 15 جنيه، الوسط بـ 25 جنيه أما الحجم الأكبر فبـ 30 جنيه. الحجم العائلي عندهم بـ 150 جنيه ووزنها كيلو. المحل مفتوح من 2 الظهر لـ واحدة الصبح، ودي صفحة الفيسبوك الخاصة بيه. ريجوليتو – Rigoletto: ما كانش ينفع نجيب سيرة الآيس كريم من غير ما نتكلم عن ريجوليتو، واللي يعتبر من أقدم الأماكن اللي بتقدم الآيس كريم في القاهرة. وبما أننا هننصحك أنك تروح خلينا نقترح عليك مجموعة من النكهات الكلاسيكية اللي عنده واللي مش لازم تفوتها؛ زي الفانيليا بالكروكانت (كراميل بالبندق)، والباتر سكوتش. في آخر زيارة لنا، طلبنا بولتين آيس كريم بـ 16 جنيه، أما الحجم الـ 150 مللي بـ 10 جنيه، أما العلبة العائلية وزنها كيلو وسعرها 55 جنيه. ده غير مجموعة تورتات الآيس كريم اللي تنفع في العزومات والصغير منهم أقل سعر له 85 جنيه وأغلى سعر 115، أما الحجم الأكبر فأقل سعر فيه 105 جنيه وأغلى سعر 170 جنيه. المحل فاتح من الساعة 10 صباحًا لـ 11 مساءً. ودي صفحتهم على الفيسبوك. فروزي تويست – Frozzy Twist: من الأماكن اللي قدرت تحقق نجاح في وقت قليل وتكسب قاعدة كبيرة من محبي الآيس كريم؛ وخصوصًا أنه مش بس عنده آيس كريم ده كمان عنده زبادي مثلج (15 و19 جنيه حسب الحجم) ونكهات غريبة زي الآيس كريم بالبسبوسة والكنافة –ده بجد: الأول بـ 13 جنيه والثاني 14 جنيه. الأسعار عنده مش ثابتة؛ هي غالبًا حسب النكهة، أقل سعر في الحجم الصغير 10 جنيه وأغلى سعر 15 جنيه. أما في الحجم الأكبر أقل سعر 15 جنيه وأغلى سعر 20 جنيه. المحل فاتح من الساعة واحدة الظهر لواحدة الصبح. وده المقال الخاص بينا –الأسعار غليت من ساعتها – وده الفيسبوك بتاعهم.

...

شاهد المزيد
مواضيع خاصة

بالخطوات: إزاي تجدد بطاقتك من غير ما تتحرك من بيتك؟

أحيانًا بنكون محتاجين نجدد البطاقة الخاصة بينا أو بحد يهمنا زي الأم مثلًا اللي بنكون خايفين عليها من البهدلة والزحام والحر، وبنكون شايلين هم الطوابير والمجهود والت