كافيهات

كافيهات القاهرة عندها القدرة على تغيير أساسيات الكافيهات المعروفة. مكان بـ يقدم شيشة لازم يكون كالتالى: مكان تنفخ فيه دخان شيشتك مع الاستمتاع بقطعة كيك وقهوة. كافيه "رُكنة - Rokna" فى شارع 26 يوليو فى الزمالك بـ يقدم تجربة شيشة معتادة مافيهاش لف ولا دوران. المكان نازل شوية عن ارتفاع الشارع، وفيه شوية ترابيزات وكراسى أمام المكان الصغير بواجهته الزجاجية. حوائط المكان برضه ملونة وتحس فيه بالراحة وكأنك فى بيتك مع مجموعة من المخدات والكتب وكام لعبة طاولة. طلبنا نقعد فى الخارج علشان نستمتع بواحدة من شيشهم بألوانها المبهجة. منيو الشيشة كبيرة وأسعارها تبدأ من 15 جنيه لنكهات الفواكة المعتادة لغاية 30 جنيه سعر تبغ Starbuzz. عندهم كمان مجموعة جاهزة من الشيش بمزيج من نكهات الفاكهة سعرها 22 جنيه. شيشة Nordic Star اللى بـ تتكون من ثلاثة مكونات سرية وسعرها 22 جنيه، شدت اهتمامنا وعلشان كده قررنا نطلبها مع لىّ ice blizzard hose  سعره 7 جنيه بعد المقارنة مع اللىّ البلاستيك (4 جنيه). بكل سرعة وصلت الشيشة، وما كناش قادرين نتوقع يا ترى هـ نشرب إيه، بس فى الآخر اتبسطنا من النتيجة. النكهات الغامضة –البرتقال والقرفة والتوت– عملوا كوكتيل رائع، وكمان لىّ الشيشة خفف من الدخان بقطع ثلج حقيقة داخل المبسم. لما تركز على منيو المشروبات، هـ تشوف أصناف كثيرة، فيها كل حاجة بداية من شاى وقهوة بنكهات مختلفة لغاية العصائر الفريش والكوكتيلات والسموزى. اختارنا شوكولاتة بيضاء ساخنة (18 جنيه)، وكابوتشينو (14 جنيه). فى خلال ثوانى وصلت الشوكولاتة البيضاء اللى طعمها كان.. وايت شوكليت فعلاً!؛ لذيذة، مسكرة وغنية بالحليب. كمية طبقة الفوم على وش الكابتشينو كانت مناسبة وطعم القهوة كان قوى ولاذع. منيو الحوادق محدودة على الساندويتشات والقراقيش، وتعتبر صغيرة لو قارناها بمنيو الحلو. الحلو الموجود وقت زيارتنا كان صنفين بس، شوكليت كيك أو تشيز كيك. طلبنا قطعة شوكليت كيك ضخمة (18 جنيه)، وللأسف شكلها كان أجمد كثير من طعمها. الكيكة كانت ناشفة وقديمة وحتى صوص الشوكولاتة على وجه الكيكة ما قدرش يغير حاجة. حتى طبقة الكريمة فى وسط الكيك كان طعمها وحش. الموظفين فى "ركنة" لطاف، ودودين، وده بـ يضيف لجو الكافيه المريح. مكان الجلوس المزدحم ونقص الأكل كان سبب عدم اختلاف ركنة عن باقى الكافيهات اللى بـ تقدم شيشة فى الزمالك.

...

عمره لا يزيد عن 3 شهور على أقصى تقدير، إحنا عارفين شارع السباق كويس اللي في مصر الجديدة وحافظين المحلات اللي فيه، مش «بروفايل» بس اللي جديد، ده فيه كام مطعم وكافيه لسه فاتحين في الفترة الأخيرة في نفس الشارع اللي واخد ضلع كامل من أسوار المريلاند، وده أحد عوامل نجاح أي محل بـ يفتح في المنطقة دي، كفاية أنك تقول العنوان بجوار المريلاند. كافيه ومطعم «بروفايل – Profile» موجود في نهاية شارع السباق قبل ما توصل لشارع الحجاز اللي فيه البوابة الرئيسية للمريلاند. المدخل أبيض والإضاءة بيضاء ومن الداخل الديكورات أبيض في أبيض، كراسي وكنبات جلد كبيرة باللون الأبيض، الفكرة مش بطالة، بس اللي لاحظناه أن اللون الأبيض مش نقي كما يجب، ومن الخارج أفضل من الداخل بكثير، خاصة مع الأضواء الحمراء والوردية اللي بـ تلمع بالليل. وعلشان المحل جديد بس ولسه ما جاءش عليه الزمن فأنت شايف الأبيض ناصع البياض، لكن واضح أنه مش من "الأبيض الغالي"، يعني كلها كام شهر كده وتبان عليه آثار عدم النظافة وتبان عيوب الديكورات. سهل أنك تأخذ بالك أن الديكور هنا مش مصروف عليه، واللون الأبيض سلاح ذو حدين، قمة في الرقي والنظافة، أو قمة في التلوث البصري لو ما حصلش على العناية الكافية أول بأول. بـ نقول الكلام ده دلوقت قبل ما نشوف علامات الزمن على «بروفايل» اللي نتمنى أنه يفضل بنصوعه ورونقه. الشيشة في كل مكان وعلى كل الترابيزات، إذن ده كافيه مثالي للمدخنين ومدمني الشيشة، كل اللي تقدر تعمله لو كنت غير مدخن أنك تختار ترابيزة بعيدة عن الدخان قدر الإمكان، وتقعد تتفرج على التليفزيون أو تفتح الإنترنت المجاني المتاح في المكان. وأهم حاجة أن هنا فيه فيشات كهرباء جنب كل ترابيزة ودي حاجة بـ نفتقدها في محلات كثير. مافيش حاجة مميزة في منيو «بروفايل» بس برضه مافيش حاجة مش موجودة، كل الأطباق الرئيسية العالمية وأنواع مختلفة من الباستا والبيتزا، وسلاطات السيزر والتونة، وساندويتشات كل حاجة ساخنة وباردة. آيس كريم وبروفيترول وتشيز كيك وكوكتيلات وعصائر فريش، وشيشة كل النكهات طبعًا. عصير برتقال فريش قبل الأكل المفروض أنه صحي ومفيد، طلبنا العصير (16 جنيه) لكن للأسف كان عديم الطعم بنسبة كبيرة، لا هو مزز ولا هو مسكر، ماسخ شوية وبالعافية فيه رائحة البرتقال. معلش مش هـ نيأس بسرعة، طلبنا من منيو السلاطات طبق سلاطة روكا (28 جنيه) المكونة من الجرجير والمشروم الطازج "مش المعلب" مع رقائق الدوريتو المقرمشة. طبق حلو وكبير، وطعم المشروم ممتاز بصوص الليمون الخطير اللي عليه، وكذلك الجرجير، حسينا أننا بـ نعمل دايت وبـ نأكل وجبة متكاملة فيها كل العناصر الغذائية. جرجير ومشروم، مافيش أقوى من كده. فاهيتا اللحم هنا بـ تُقدم باحتراف، سعرها 76 جنيه، يعني غالية شويتين، أماكن ثانية متخصصة في الفاهيتا والأكل المكسيكي مش بـ تبيعها بالسعر ده. المهم الطبق قُدم فيه الـ Sour Cream الضرورية لأي طبق فاهيتا مع سلاطة الطماطم والبصل والهالوبينو المكسيكية الشهيرة ولفائف عيش التورتيا وعلى جنب بـ ينزل الجريل المولع اللي عليه الفاهيتا لسه بـ تطشطش، يعني خلي بالك واوعى تتلسع فيه زي حالتنا. اعمل ساندويتشاتك بنفسك واستمتع بالفاهيتا هنا لأن واضح أننا عرفنا ننقي، الطبق كان حلو ومشبع، وممكن يكفي أكثر من فرد لو مش جعانين قوي. القعدة هنا ظريفة رغم الدخان الكثيف، لكن قلة خبرة بعض العاملين كانت سبب في انزعاجنا أحيانًا، مرة لما حاولوا يرفعوا الأطباق من أمامنا وإحنا لسه ما خلصناش أكل، ومرة لما جابوا فاتورة الحساب فيها أصناف زيادة إحنا مش طالبينها. لكن بشكل عام المكان مناسب لقعدات الأصحاب وجلسات العمل وفيه وسائل راحة كثير تخلي قعدتك أفضل.

...

 مش هـ نطول عليكم، اللي عاوزين نقوله هنا أننا اكتشفنا مكان جديد لألعاب البلاي ستيشن في حتة هادئة ومتدارية شوية ما تخليش أي حد يشوفه بسهولة، هـ نشرح لكم بالضبط المكان وإزاي تروحوا هناك. محل «كلاسيكو» موجود في شارع هارون الرشيد قبل نهايته من ناحية شارع أبو بكر الصديق الرئيسي اللي بـ يمشي فيه مترو مصر الجديدة. اللي مخلي المكان مش باين هو أنه فيه أعمال حفر خاصة بمترو الأنفاق بـ تخترق شارع هارون وعاملين حواجز حديدية تخليك ما تشوفش إيه موجود على الجانبين، لكن أحسن طريقة تروح بها هي أنك توصل لحد ميدان هارون اللي فيه حلويات «تسيباس» سواء بالمواصلات أو بالعربية وممكن تركن عند المدرسة الإنجليزية اللي على ناصية الشارع من بره وتدخل شارع هارون بعد ما تخلي الحواجز على شمالك وتمشي 50 متر تقريبًا لحد ما تلاقي يافطة صفراء معلقة على مدخل عمارة مكتوب عليها Classico وبعدها تدخل في طرقة طويلة جانبية في نهايتها باب شقة على اليمين مش مكتوب عليه أي حاجة، هو ده المحل. الشقة كلها غرف مغلقة ومكيفة، يعني خصوصية مافيش بعد كده، كل غرفة فيها شاشة LCD 30 بوصة أو أكثر، وجهاز بلاي ستيشن 3 وما شوفناش أي ألعاب غير الكرة سواء PES2013 أو FIFA13 اللي أي محل بلاي ستيشن بـ يبقى قائم عليهم في الأساس. لكن لو سألت على ألعاب ثانية هـ تلاقي؛ سباقات سيارات وألعاب قتالية وحروب. المحل فاتح من 10 صباحًا لـ 5 الفجر، وسعر الساعة بـ يبقى 15 جنيه من الساعة 10 الصبح لحد 5 المغرب، وبـ يبقى 25 جنيه من 5 المغرب لحد 5 الفجر. وأيام الخميس والجمعة بـ يبقى طوال اليوم بـ 25 جنيه. الغرف واسعة والكراسي جلد كبيرة ومريحة، ولو كنت هـ تلعب "مالتي" هـ يجيبوا لك كراسي زيادة، وذراعات اللعب هنا حالتها ممتازة، والخدمة هنا سريعة ومنتبهة، لأن كثير من محلات الألعاب اللي زي دي بـ يسيبوك تهاتي كثير قبل ما حد يعبرك ويغير لك ذراع ولا يغير لك اللعبة. اشتري كيت كات وتودو ومولتو وبيبسي وعصائر وأنت قاعد بـ تلعب، الأسعار هنا مش أغلى من بره، وبعد ما تخلص حاسب على كله وأنت ماشي. وهنا كمان فيه Wi-Fi مجاني ممكن بين الماتش والماتش تقعد على الإنترنت براحتك، أو تطلع تقعد في الريسبشن تسمع مزيكا. حبينا القعدة والنظام في «كلاسيكو» جدًا وعجبنا أن مكان جديد للبلاي ستيشن بمستوى رائع فتح أخيرًا في مصر الجديدة، بعد ما كان فيه ندرة في محلات الألعاب وبالتالي زحمة شديدة ما تخليكش تعرف تلعب إلا بالحجز.  

...

هو ليه كل الأماكن بقى اسمها "لاونج - Lounge" مؤخرًا! طيب هو إيه مفهوم اللاونج! المفروض أنه مكان هادئ أقرب لاستراحة بـ يُقدم فيها مأكولات خفيفة ومشروبات، أكيد مش ده الحال بالضبط في كل مكان اسمه "لاونج" في القاهرة، هنا الكافيه لاونج، والمطعم لاونج، والنايت كلوب لاونج، والقهوة البلدي لاونج، مش فاضل غير المسمط وصالون الحلاقة. عمومًا الموضوع مش بالاستفزاز ده لما تدخل المكان اللي بـ نتكلم عنه النهارده وهو «زيارة لاونج» الموجود عند بوابة 1 لنادي الشمس وبالتحديد في شارع اللواء أحمد محمد علي المتفرع من شارع عبد الحميد بدوي. «زيارة لاونج» كافيه ومطعم في دور أرضي في شارع هادئ، عرفناه من صفحته على الفيسبوك، ولما رُحنا عجبنا شكله من الخارج وبعدها من الداخل وهـ نحكي لكم التجربة بالتفصيل. المكان مقسم لجزئين: الاثنين مساحات مغلقة مافيش جزء Open Area لكن فيه جزء في عمق المحل أقرب للكلاسيكية والقعدات المريحة أكثر، الجزء اللي عند باب الدخول مناسب أكثر لقعدات الشباب والشيشة وفيه هنا لعب طاولة كمان. التدخين مسموح في كل أجزاء المحل، وأهم ميزة في المكان هي شاشات التليفزيون الكبيرة المنتشرة على كل جدران المحل بشكل يخلي الرؤية ممتازة من أي زاوية وأي اتجاه، علشان كده المكان ده مثالي لمتابعة المباريات المهمة. نقطة قوة ثانية للمحل هي ألوان الديكورات الفاتحة المريحة للعين، والتنوع في شكل القعدات حسب سبب زيارتك للمكان، سواء أكل أو شرب أو لعب أو فرجة على التليفزيون. مشكلتنا بدأت مع "زيارة" مع تصفحنا للمنيو. تنوع كبير في الأصناف في الأطباق الرئيسية والباستا والبيتزا والساندويتشات والمقبلات، لكن بعد ما اختارنا طبق معين من فيليه اللحم البقري الجرسون جاء لنا بعد 10 دقائق يقول لنا ياريت نغير الطلب لأن البيف فيليه هنا مش هـ يعجبنا النهارده، احترمنا صراحتهم وغيرنا الأوردر لطبق من الدجاج المشوي اسمه "بيج ماونتن" (60 جنيه) وطبق ثاني من الدجاج برضه "لأن مافيش لحوم طبعًا" كان اسمه تشيكن ريدجولد (49 جنيه) والغريب كان سعر طبق المقبلات الكومبو اللي فيه كاليماري وسجق بلدي وكبدة دجاج تشيكن تندر اللي كان بـ 54 جنيه! بعد ما عملنا الطلب انتظرنا أكثر من 30 دقيقة على ما بدأ الاكل ينزل أمامنا، والمفاجأة لما نزل الأوردر فيه غلطة وحاول الجرسون عبثًا أنه يقنعنا أن هو ده طبق التشيكن ريدجولد اللي كنا مذاكرين مكوناته كويس من المنيو، لكن تمالكنا أعصابنا وقولنا له يغير لنا الطبق ويجيب لنا الدجاج اللي إحنا طالبينه. وطبعًا ده أخذ 20 دقيقة ثانيين، يعني قرابة الساعة علشان نبدأ وجبتنا في «زيارة لاونج». البيج ماونتن فيه قطع صدور دجاج مشوية كبيرة عليها موتزاريلا وفلفل ألوان، وعليها ليمون كثير أفسد كثير من مذاقها لأننا ما كناش حاسين بطعم حاجة ثانية غيره، ده غير أن الفلفل كان له رائحة تدل أنه مُخزن بقاله أيام، وكذلك الخضار السوتيه اللي حسينا أنه مش فريش وما شفعتش له خلطة الزعتر والبهارات اللي عليه. الريدجولد هو رول دجاج محشو بالهوت دوج وغرقان في صوص الطماطم بالثوم شبه بتاع كفتة داوود باشا، الصوص مع الأرز الأبيض كان مش بطال، لكن ما فهمناش ليه الدجاج كان زي ما يكون مسلوق وبـ يفتقد أي مذاق، والهوت دوج كذلك. لكن بعد الانتظار والجوع كان لا مفر أننا نخلص الأكل اللي أمامنا حتى لو كان مش على المستوى المطلوب. على جنب كده طبق المقبلات كان أكثر من رائع، خاصة السجق البلدي بخلطة البصل اللي قررنا يبقى هو اختيارنا الأساسي لو جينا هنا مرة ثانية. والتندر تشيكن كمان خلطتها كانت جيدة ومقرمشة كما يجب أن تكون. على سبيل الاعتذار المحل قدم لنا تشوكليت كيك غرقانة في الشوكولاتة وكانت فريش وخطيرة وقللت فعلًا من حالة الاحتقان اللي كنا فيها بسبب التأخير وجودة الأكل، وفتحت نفسنا أننا نجرب حاجة من منيو المشروبات وكان فنجان الكابوتشينو (15 جنيه) لكن واضح أن النهاية غير السعيدة كانت مكتوبة لزيارتنا لـ «زيارة لاونج» وشربنا فنجان مياه فيه مذاق اللبن والبن، لكن ما كانش له علاقة بالكابوتشينو اللي إحنا عارفينه. علشان ما نبقاش قاسيين قوي على المكان، أنت هنا ممكن تعمل حاجات كثير وتنبسط بعيد عن الأكل، أو يمكن إحنا اللي كان حظنا وحش مع الأكل. ممكن تتفرج على الماتشات أو تلعب بلاي ستيشن أو تلعب ألعاب القهودة العادية وممكن تشرب حاجات خفيفية وتأكل بيتزا وتقعد قعدة حلوة مع أصحابك أو عائلتك. الخدمة متوسطة لكن النظافة جيدة والحمامات ممتازة. نتمنى نزور "زيارة" في ظروف أفضل من المرة دي.

...

بـ ندخل ساحة انتظار السيارات في مجمع مطاعم أواسيس في مساكن شيراتون وبعد ما ندفع 10 جنيه للباركينج نلاقي نفسنا راكنين في آخر الدنيا ونمشي مسافة طويلة لحد ما نوصل للمطعم اللي إحنا رايحينه، وكل مرة نقول لنفسنا طيب ما نركن بره في الشارع وخلاص ما دام كده كده هـ نمشي كثير! بس المرة دي لحسن الحظ كانت الركنة قريبة من المكان اللي إحنا رايحينه، علشان «فلوكا لاونج – Flooka Lounge» هو أول مكان عينك هـ تقع عليه وأنت خارج على رجليك من ساحة الانتظار. هـ تطلع على ممشى خشبي صغير قبل ما توصل للكافيه المقصود، وغالبًا مش هـ تحتاج تسأل هو فين لأن وأنت لسه في الممر الرئيسي خارج منطقة المطاعم هـ تلاقي أحد العاملين في «فلوكا لاونج» بـ يقرب منك وبـ يعطي لك فلاير خاص بالمكان وبـ يدعوك للدخول عندهم مش عند أي حد ثاني. عادة مش بـ نستجيب للدعاية من النوع ده ومش بـ نفضلها، لكن لأننا كنا رايحين مخصوص علشان نشوف الكافيه ده فأخذنا الفلاير ودخلنا في هدوء قبل ما الموظف يقرر يتكلم عن مميزات المكان والمنيو اللي ما حصلش وما إلى ذلك. تقريبًا ده أكبر مساحة بـ يستغلها مطعم أو كافيه في ساحة أواسيس، «فلوكا لاونج» أشبه بتراس خارجي كبير مغطى ببرجولات عملاقة، وفيه تهوية طبيعية من كل الاتجاهات بالإضافة للمراوح اللي بـ تشتغل في الصيف. القعدات فيه بأشكال مختلفة، كنبات كبيرة وكراسي خوص متوسطة الحجم وترابيزات مربعة ودائرية بأحجام مختلفة، غالبًا هـ تلاقي قعدة تناسبك أي كان عدد المجموعة اللي معاك وأي كان نوعها، وإن كان غالب على المكان القعدات الرومانسية والعائلية. بس لازم نسجل إعجابنا بالمساحة الممتدة للمكان وأنك هـ تحس بالخصوصية في أي جزء هـ تقعد فيه، المشكلة الوحيدة في القعدة أن صوت المزيكا عالي جدًا ولاحظنا أن الأغاني بـ يقطعها فواصل دعائية بـ تدل على أنه تم تحميلها من على الإنترنت، ودي مشكلة ثانية بس مع المصنفات الفنية. كل حاجة هنا غالية، الأسعار كثير بالنسبة لكميات كل حاجة، عرفنا ده بعد ما طلبنا طبق كومبو المقبلات اللي اسمه أواسيس (40 جنيه) وكان فيه وحدات قليلة من كل حاجة رغم أن ده المفروض الحجم الكبير، سبرنج رولز وسمبوسك وحلقات بصل وورق عنب مع المايونيز والثومية، طبق مقبلات غريب مالوش علاقة ببعضه، ما تعرفش ده شامي ولا إيطالي ولا إيه! والطعم كان حلو لكن مافيهوش حاجة مميزة، مجرد حوادق تنأنأ فيها لحد ما الأكل الأساسي ينزل. المنيو هنا أقرب للإيطالي، فيه بيتزا وباستا بأنواع كثير، بجانب أطباق الفاهيتا والستيك فيليه والجمبري والسمك، وفيه ساندويتشات ساخنة وباردة، ومنيو للحلويات والكيك والكوكتيلات والقهوة والشيشة زي أي كافيه. طلبنا نجرسكو "مكرونة فيتوتشيني بالدجاج" (43 جنيه) وبعد شوية نزل الطبق وفيه مكرونة بِنا بدل الفيتوتشيني، فطلبنا من الجرسون يغيرها وقد كان، لكن بعد 15 دقيقة زيادة من الانتظار، طبق الفيليه سترانوف (75 جنيه) فيه قطعة ستيك فيليه كبيرة وفريش ومستوية كويس جدًا، ومعاها وحدتين جمبري كبير بصوص "الباييا" الأسباني والبصل، صحيح مش ده الشكل اللي إحنا عارفينه للسترانوف، لكن الطعم كان حلو ومكونات اللحوم فريش، لكن الأرز والسوتيه اللي جنب الأكل كانوا ناشفين شوية وشكلهم في الطبق ماكانش منمق كفاية. النجرسكو وصل لنا سخن مولع، فيه مشروم أكثر من الدجاج، وصوص كريمة كثيف، المذاق جيد والحجم معقول، كان ناقصه شوية لبن في الخلطة علشان ما ينشفش بسرعة أمامنا. وعلشان الأسعار كانت غالية وفيه خدمة وضريبة على الطلبات لاقينا نفسنا مش متحمسين نطلب أي من العصائر أو الحلويات في المنيو، واكتفينا بوجبتنا السريعة في «فلوكا لاونج» وقضينا باقي قعدتنا في تصفح الإنترنت "فيه Wi-Fi مجاني" والاستماع الإجباري للمزيكا العالية اللي قولنا عليها. خبرة العاملين في المكان ومستوى الخدمة مش على القدر المطلوب، عانينا كثير مع الجرسونات المرتبكين "وده ما يمنعش أنهم ودودين" ومع البطء في نزول الطلبات مع أن المكان كان رائق وقت زيارتنا. أكبر متعة ممكن تحصل عليها في زيارتك لـ «فلوكا لاونج» هي قعدتك في مساحة واسعة على كراسي مريحة مع كوباية موكا وكلوب ساندويتش وشيشة وتلعب بلاي ستيشن "الحجز بالساعة" أو تتصفح الإنترنت.  

...