كافيهات

المدينة المنورة: أشهى مخبوزات طازة ولذيذة في المعادي
اصدرت في: 20/08/2015

فيه أماكن معينة بـ تبقى محفورة في ذاكرتنا، ذكريات بسيطة بس متعلقة بأجمل سنين طفولتك، زي ريحة العيش الفينو السخن من المخبز اللي بـ نشتريه كل يوم علشان ساندويتشات المدرسة الصبح، ومن الأماكن اللي بـ ترجع لنا الذكريات دي مخبز "المدينة المنورة"، هو مخبز عادي مافيهوش ديكورات مميزة، أو منيو شيك تختار منه اللي أنت عاوزه، مجرد رائحة المخبوزات قادرة أنها تغريك بدون مقدمات فـ تقرر أنك تشتري كل اللي بـ تحبه وريحته في مناخيرك. أول ما بـ تدخل بـ تلاقي على أيدك اليمين ركن خاص بالباتون ساليه، وفيه منه الرفيع بالكمون وفيه منه اللي بحبة البركة بس حجم سميك أكثر، بعد كده بـ ننتقل لزاوية المخبوزات الشهية، وده كان صف طويل بالطول مليان أرفف كل رف فيه حاجة مختلفة، من ميني كرواسون بالجبنة، وبوريك بالجبنة، وميني بيتزا، ده غير أنواع البسكويت والكيك والتوست الناشف الأصفر، و البسكوت الملفوف بالشوكولاتة، كل حاجة معمولة بدقة وطعمها يجنن. وطبعًا إحنا ما قدرناش نقاوم، طلبنا ربع كيلو باتون ساليه بالكمون بـ 5 جنيه، وكان طعمه أكثر من رائع خفيف وطعم الكمون فيه مضبوط، لا أكثر من اللزوم ولا كثير بزيادة، حاجة كده لو فضلت تأكل منها طوال اليوم مش هـ تزهق ومش هـ تعرف تبطل أبدًا، جيبنا كمان ميني كرواسون بالجبنة البيضاء وده بـ يبقى في علبة من الفوم نصف كيلو، من حظهم أننا من عشاق الكرواسون بكل أنواعه ومش أي كرواسون يعجبنا لازم يبقى فريش ومش مزيت وله مواصفات دقيقة ثانية كثيرة، وكل المواصفات دي كانت متوفرة، الكراوسون كان فريش وطعمه متناسب مع كمية الجبنة البيضاء المتوسطة، حاجة كده تفطر بها الصبح مع كوباية الشاي بروقان. وما قدرناش نشوف الميني بيتزا برضه (طبق نصف كيلو بـ 12.50 جنيه) من غير ما نجيبه، خاصة أن كل المكونات اللي عليه كان شكلها حلو وبيتي، على عكس الطبيعي في المخابز، والجبنة سايحة والطماطم شكلها طازة. كمان اشترينا بوريك بالجبنة برضه طبق من الفوم نصف كيلو بـ 11 جنيه، وكان طعمه حلو قوي، كان عنده كمان فطير مشلتت شكله شهي جدًا وبيتزا حجم كبير، وكيكة حجم كبير مش مجرد الكب كيك بس. المخبز بشكل عام تجربة ممتعة بالنسبة لنا، ومليانة ذكريات جميلة وروائح ممتعة، أكيد دي مش هـ تبقى زيارتنا الأخيرة لهم، وننصح كل سكان المعادي يجربوا يعدوا عليه.

...

نوتيلاريا إيجيبت: أول محل نوتيلا يحقق توقعاتنا ويتجاوزها كمان في بورتو كايرو مول
اصدرت في: 19/08/2015

في يوم من الأيام، واحد من الناس هـ يحكي إزاي وقع العالم في غرام اختراع عبارة عن معجون شوكولاتة بالبندق اللي طلع من مدينة صغيرة في إيطاليا، أيوه بالضبط، إحنا النهارده بـ نتكلم على ظاهرة النوتيلا اللي زلزلت العالم. مصر من أكثر الدول اللي أهلها بـ يموتوا في الحاجات الحلوة، وافتتاح  نوتيليريا في بورتو كايرو مول من غير مجاملة كان من أهم الأحداث بالنسبة لعشاق النوتيلا في مصر. مع الرائحة الطازجة للحلويات المعمولة بالشوكولاتة في كل المكان، أكيد هـ توصل لمكان نوتيلاريا في بورتو كايرو مول، الديكورات هناك على شكل برطمانات نوتيلا بأحجام متنوعة –تشمل برطمانات عملاقة– ونافورة شوكولاتة كبيرة، ولو عاوز تعرف إحساسنا ودرجة انبهارنا بالمكان ممكن تتخيل إحساس تشارلي لما دخل مصنع ويلي ونكا للشوكولاتة. كنا متحمسين لتجربة كل حاجة عندهم، فطلبنا وافل شوكولاتة بالنوتيلا (24 جنيه)، وافل سادة وعليه نوتيلا (24 جنيه)، تارت بلح بصوص النوتيلا (25 جنيه) و"نوتيلا إنجيكشن"، ودي عبارة عن اختراع عبقري من نوتيليريا لأكل النوتيلا عن طريق سرنجة (10 جنيه). بعض الحاجات في المنيو لسه مش موجودة لأن المكان في فترة الإعداد، بس الأكيد أن كل اختياراتنا كانت هائلة، الوافلز كانت هائلة، طرية ومقرمشة في نفس الوقت، وخفيفة وسهلة المضغ برضه، ومسك الختام كان طعم النوتيلا الرائع. قاعدة تارت البلح كانت مقرمشة وعملت تجانس ممتاز مع البلح الطري وصوص النوتيلا الغني. آخر الاختراعات معانا كانت النوتيلا إنجيكشن المكونة من عجينة نوتيلا بالبندق، ودي تعتبر فكرة بديلة هايلة لأكل النوتيلا بالملعقة. بعد ما خلصنا مهرجان النوتيلا، فريق العمل الرائع قدموا لنا شاي فيوري، وهو عبارة عن شاي معمول من زهرة ناشفة في مياه ساخنة، المكان كله كان مليان بالرائحة القوية العطرية للشاي اللي بـ يُقدم معاه ريحان. نوتيليريا كمان بـ يقدموا تشكيلة كبيرة من التشيز كيك، والتارت، والآيس كريم، وبعد زيارتنا الأولى، مش هـ نقدر نستنى علشان نروح ثاني ونجربهم، المهم دلوقت أن تجربتنا معاهم كانت هائلة، مافيش حاجة معينة ممكن ننتقد فيها نوتيليريا، وإحنا باعتبارنا من جمهورهم كنا مبسوطين من شغلهم وجودتهم العالية، نتمنى يحافظوا على مستواهم.

...

ليتشي: عصائر صحية وأكل خفيف هيحافظ على رشاقتك في المعادي
اصدرت في: 18/08/2015

بـ نفرح جدًا بالأماكن اللي بـ تقدم أكل أو مشروبات صحية، لأنها بـ تساعدنا أننا نتخلى عن الأكل المضر، ونسعى أننا نقلل من كمية الدهون اللي بـ نأكلها ونشربها كل يوم، "ليتشي - Lychee" محل عصائر بالأساس فاتح من زمان في الزمالك، وفتح في الفترة الأخيرة مجموعة فروع كثيرة منها الفرع اللي زورناه النهارده، فرع المعادي. قبل ما نروح كنا لازم نشوف المنيو بتاعهم علشان ما نحتارش هناك، بس للأسف برضه لما رحنا احتارنا لأن الوقت كان لسه بدري ومش كل الأصناف كانت متوفرة. في المنيو كل العصائر الموجودة مكتوب جنبها عدد السعرات والبروتين والكربوهيدرات، وبعدين منقسمة أقسام، ما بين السموزي والكوكتيلات المختلفة والسلاطات والساندويتشات ووجبات خفيفة ثانية، بس أكثر حاجة لفتت نظرنا أنهم عاملين برنامج خاص لعصائر الـ Detox وللي ما يعرفوش ده عصير مفيد بـ يطرد السموم من الجسم بس لازم تفضل تشربه لثلاث أيام على الأقل وللأسف طعمه مش بـ يبقى حلو قوي، هو عبارة عن كوكتيل مكون من خضروات وفاكهة وبـ يختلف في برنامج ليتشي أن اليوم بـ يبقى مكون من 3 عصائر للغذاء والعشاء والفطار، تكلفة اليوم 60 جنيه، ده غير العصائر الغنية بالبروتين اللي تمدك بالطاقة لو أنت رياضي وبـ تعمل تمارين كثيرة، وده بالتعاون مع BeFit اللي في المعادي برضه، ده غير الوجبات الخفيفة اللي بـ تبقى ما بين سلاطة وزبادي بالفاكهة والجرانولا. المهم طلبنا من قسم السموزىThe berry land  بـ 20 جنيه، وده عبارة عن عصير فراولة وتوت وموز وزبادي، وطعمه كان حلو برغم أن طعم الموز طغى على طعم أي حاجة ثانية، كان نفسنا يبقى أخف شوية، أما اللي عجبنا جدًا وكان فريش بطريقة مش طبيعية ينعشك ويخليك تبدأ يومك بنشاط هو عصير الـ Orange Passion بنفس السعر، وده عبارة عن برتقال وفراولة وزبادي وباشون فروت، بس إحنا بدلنا الفراولة بالأناناس، لأننا مش من عشاق الفراولة، وكان طعمه وهمي، كأنك رحت على جزيرة في وسط البحر ومستمتع بعصير استوائي منعش. وطلبنا كمانGreek Passion  بـ 30 جنيه، وده عبارة عن زبادي يوناني قوامه بـ يبقى سميك أكثر من الزبادي العادي بتاعنا، وفوقه طبقة عصير مانجو وتحته طبقة عصير باشون فروت، وبـ يضيف عليه جرانولا، تكوينه مع طعمه كان هائل، واجهتنا مشكلة واحدة بس أن نسبة الزبادي أكبر من العصير، فبالتالي ما استمتعناش قوي بطعم عصير المانجو مع الباشون فروت، كان نفسنا الكمية تكون أكبر، يعني يبقى فيه نسبة وتناسب مش أكثر. كمان قلنا نجرب الساندويتشات فطلبنا Chicken Metabolism Plus وسعره 35 جنيه، وده عبارة عن عيش بني مع دجاج ومكسرات وتوت ناشف وأعشاب وزبادي، وللأسف يا جماعة ده كان أسوأ حاجة أكلناها، هو الزبادي حلو وكل حاجة بس مش معنى ده أنه يتحط في الساندويتش بالكمية دي، طعم الزبادي مع الخس والبصل والعين الجمل، عمل لنا قفلة، ده غير أن الفراخ مش متبلة كفاية، لدرجة أننا كنا مش حاسين بطعمها، يمكن لو قللوا كمية الزبادي اللي كانت خارجة من الساندويتش بدرجة رهيبة الموضوع يبقى ألطف، ويزودوا صوص يربط النكهات ببعض، مع تتبيل الفراخ أكيد، كان نفسنا نجرب السلاطات بس للأسف ما كانتش موجودة. بشكل عام ليتشي مكان رائع لعصير صحي أو طبق سلاطة أو فاكهة، قدر أنه يحقق مع الكوكتيلات اللي بـ يقدمها التوازن السليم بين الحاجة الحلوة الصحية واللي ما بـ تتخنش، وده شيء نادر الوجود.

...

ذا فور فات لاديز: كنز حلويات مستخبي في الزمالك
اصدرت في: 13/08/2015

بالرغم من أننا تقريبًا عملنا مسح جغرافي لمنطقة الزمالك، إلا أن فيه أماكن لسه بـ نكتشفها لغاية دلوقت؛ خصوصًا لو هي في منطقة مش متعودين نتجول فيها زي اليمامة سنتر. اليمامة سنتر باختصار هو واحد من أقدم المولات في مصر، بعد سنين من الازدهار، بدأ المول في مرحلة الانهيار البطئ في أوائل التسعينيات لغاية ما مات إكلينيكيًا بانتشار المولات الثانية، وبالتالي هو من الأماكن الشبه مهجورة في الزمالك اللي مش من المعتاد ندخلها. ولكن بما أننا في زمن السوشيال ميديا، عرفنا أن فيه محل جديد للحلويات فتح هناك اسمه ذا فور فات لاديز – The Four Fat Ladies، فقررنا أننا نروح نشوف إيه الجديد اللي ممكن يقدموه وسط مجموعة من أماكن الحلويات الكثيرة الموجودة في الزمالك. المحل ديكوراته بسيطة غالب عليها اللون الأبيض. الكاونتر الرئيسي مواجه للباب ومعروض عليه مجموعة متنوعة من الحلويات اللي ما خليتناش نركز في أي حاجة ثانية بعد كده. بعد ما تعرفنا على المنتجات، وضحوا لنا أن فيه كوكيز لسه خارجة من الفرن، ولكن محتاجة تهدأ شوية قبل ما يقدموها لنا، بعد دقائق من الصراع الداخلي، قررنا أننا نسمع صوت العقل ونختار اللي موجود حالًا، وبالمرة تبقى حِجة حلوة تخلينا نرجع لهم ثاني لما الكوكيز تبقى جاهزة، من ضمن أنواع كثير زي كيك الليمون بالفانيليا، الشوكولاتة بالنوتيلا، وأنواع كثيرة من البراونيز، قررنا نختار من البراونيز بروكيز -  Brookies وهي عبارة عن براونيز تحتها طبقة من كوكيز بقطع الشوكولاتة (20 جنيه / قطعة)، وبرضه Peanut Butter Swirl Fudge Brownies، وهي براونيز بزبدة الفول السوداني (20 جنيه/ قطعة). بالرغم من أننا ما حبذناش فكرة الدمج ما بين الكوكيز والبراونيز، إلا أن الطعم كان أكثر من ممتاز، الفانيليا الموجودة في الكوكيز خففت من جرعة الشوكولاتة الموجودة في البراونيز، وعلى عكس توقعاتنا الكوكيز احتفظت بقرمشتها واللي كانت متناغمة مع طراوة البراونيز اللي هي أصلًا رائعة. البراونيز بزبدة الفول السوداني، كانت أعظم حاجة ذقناها في حياتنا، طعم المكونين الأساسيين كانوا مضبوطين، من غير ما يكون فيه طعم طاغي على الثاني وخصوصًا أن زبدة الفول السوداني معروفة بطعمها القوي، بعد ما ذقناها إحنا تأكدنا أن دي هـ تبقى تحليتنا المفضلة في المكان من هنا ورايح. الريد فيلفت بقيت موجودة بشكل أساسي في أي مكان حلويات في مصر؛ وبالتالي كان لازم نجرب نسخة ذا فور فات لاديز (20 جنيه/ قطعة)، بالرغم من أننا حسينا الكيك عجينته كثيفة أكثر من اللازم، إلا ذا فور فات لاديز من أفضل الأماكن اللي بـ تعمل كريمة الجبنة مضبوطة بعكس أماكن كثير طعمها ما يفرقش عن الكريمة العادية. ذا فور فات لاديز عندهم مجموعة من Cake Pudding، وهي عبارة عن أكواب بنكهات مختلفة مكونة من طبقات من الكيك الإسفنجي والمكونات الثانية؛ فيه منها بالموز والشوكولاتة، ريد فيلفيت ونوع أخير جربناه وهو كيك الفانيليا بكريمة الجبنة (35 جنيه)، بما أننا لسه واصفين لكم حلاوة كريمة الجبنة، نحب نطمنكم على جودة كيك الفانيليا واللي زود من طراوته طراوة الكريمة، عيبها الوحيد بالنسبة لنا أنها كانت مسكّرة زيادة عن اللزوم، وبالتالي هي هـ تعجب جدًا الناس اللي سكرها زيادة. ذا فور فات لاديز رائع جدًا لو نفسك تجيب حاجة حلوة تفرّح بها نفسك بعد يوم طويل؛ ننصحك أنك تجيب بالقطعة لأن سعر الكيكة الكاملة بـ يتراوح ما بين 180 لـ 320 جنيه حسب النوع، وده بالنسبة لنا سعر مبالغ فيه حتى لو هـ تروح بها عزومة، وبالرغم من أنها مغامرة لمكان زي ده أنه يفتح في مول نادرًا ما الناس بـ تدخله، إلا أن السوشيال ميديا وجودة حلوياته ممكن تعيد الحياة لليمامة سنتر وتشجعنا على أننا ندخله.

...

حسونة: حلويات شرقية وغربية ومخبوزات في زهراء المعادي
اصدرت في: 11/08/2015

برغم أن في الفترة الأخيرة انتشرت محلات الحلويات المختلفة، إلا أن فيه منها اللي فاتح من زمان جدًا بس عمرنا ما سمعنا عنه، زي المكان اللي زورناه النهارده "حسونة" اللي فتح من 1969 لكن فرعه الرئيسي في الدقي. حسونة فتح من فترة قريبة في زهراء المعادي جنب "خير زمان" و"لابوار"، وكانت جرأة منه الحقيقة أنه يفتح جنب "لابوار"، برغم أنه على حد علمنا متخصص أكثر في الحلويات الشرقية، لكن لما دخلنا لاقينا أنه عنده كل أنواع الحلويات تقريبًا إلا الحلويات الشرقية، وقالوا لنا أنها هـ تيجي النهارده بالليل، حسونة كان عنده تنوع غريب في المنتجات اللي بـ يبيعها، على يمينك ممكن تحس أنه مخبز من كثر المخبوزات اللي عنده من كرواسون وباتيه ومقرمشات، وبسكويت بأنواعه، وفي آخر الصف ده، بـ يبيع كل أنواع المكسرات من فستق وكاجو ولوز وبونبوني ألوان كمان، مغلفة في علبة مستديرة وبـ يبيعها بالكيلو. ده غير أن في المنيو لقينا أنه المفروض بـ يعمل عصائر وحلويات زي الأرز باللبن وأم علي وجيلي. أما على أيدك الشمال هـ تلاقي شوكولاتة بـ تتباع بالكيلو فكرتنا بشوكولاتة كوفرتينا كده، والحمد لله أنه كان حاططها في الثلاجة وإلا كان زمانها بقيت عصير، بعد كده ثلاجة الحلويات الغربية، اللي كان فيها تورتة ريد فيلفت وتورتة شوكولاتة، وأنواع قليلة من الجاتوه أو بالأخص التشيز كيك بس. بعد كده فيه ثلاجة آيس كريم فيها أنواع قليلة من الآيس كريم، زي البطيخ والفراولة والزبادي توت والكانتلوب والفانيليا. لكن للأسف لم يتم العصور على أي حلويات شرقية واللي كان نفسنا نجربها.  المهم قلنا نجرب أكثر من حاجة عنده علشان نبقى ما ظلمناهوش. فـ طلبنا قطعة تشيز كيك بالكراميل بـ 16 جنيه، وقطعة تشيز كيك بالتوت بـ 15 جنيه، وربع كيلو بسكويت بالفانيليا، و2 بولة آيس كريم، واحد بالبطيخ وواحدة زبادي توت، والبولة بـ 5 جنيه. وخدنا الحاجات ومشينا لأن طبعًا مافيش مكان نقعد فيه، في الجو الحر جدًا ده كان لازم نبدأ بالآيس كريم لأننا لو استنينا لحد ما نروح هـ يبقى عصير، والغريب أن لون آيس كريم البطيخ كان روز فاتح، بينما لون الفراولة كان بينك فاتح، ولما سألناهم قالوا لنا علشان طعم طبيعي، المهم عديناها، بس ما قدرناش نعدي طعم البطيخ الحقيقة اللي كان ناقصه بطيخ، طعمه كان بلا نكهة، يا دوبك نفحة بطيخ فيه، على عكس الزبادي بالتوت اللي كان طعمه حلو، أما بالنسبة للبسكويت كان طعمه عادي، بس برضه يفتقد للنكهة شوية غير أنه كان ناشف زيادة عن اللزوم ونعتقد أن ده لأنه ما كانش طازة. نيجي بقى لطبق اليوم التشيز كيك، وبالصدفة يا جماعة وإحنا بـ نطلعها علشان نأكلها وقعت على الأرض بـ نقلبها، لاقيناها ولا تأثرت ما شاء الله لا الصوص وقع ولا أي حاجة، وده ليه، لأنهم طبعًا يختلفوا عن الآخرون، التشيز كيك كان عامل زي ما يكون قطع حجرية مرصوصة فوق بعض، صوص الكراميل ناشف من فوق والتشيز كيك ناشف جدًا، غير أن البسكويت من كثر ما هو ناشف ما عرفناش نقطعه بالشوكة، لكن قطعة التشيز كيك الثانية اللي بالتوت، كانت ألطف كثير ونعتقد أنها كانت طازة أكثر برغم أنها كان شكلها غريب والصوص خفيف، والقطعة طالعة لفوق مش متساوية إلا أن طعمها كان أحلى كثير وطعم الجبنة فيها كان حلو وطري وطبقة البسكويت كانت قابلة للأكل، كان نفسنا نجرب الحلويات الشرقية علشان نبقى جربنا كل حاجة بس كفاية علينا كده وكمان هي ما كانتش موجودة. نتمنى أنهم يضبطوا الأخطاء دي، علشان المرة الجاية نعطى لي تقييم أفضل.

...

كافيتشو كوفي: كافيه ممتاز لقعدة مشاريب في الزمالك
اصدرت في: 04/08/2015

نعتقد أننا تكلمنا كثير عن حلاوة خروجة الإفطار، وخصوصًا لو أنت أجازة وكل اللي حواليك رايحين أشغالهم؛ في كايرو 360 حظنا الحلو خلى خروجة الإفطار دي شغل، وبالتالي إحنا بـ نعمل واجب قومي لكل أهل القاهرة وفي نفس الوقت بـ ننبسط، المرة دي خروجتنا كانت في كافيتشو كوفي - Kafficho Coffee في الزمالك. من حوالي 6 شهور رحنا فرع جاليريا 40 وانبسطنا بالتجربة ككل؛ جربنا الأطباق الرئيسية واللي كانت في مجملها لطيفة. قررنا أننا نكتشف أداء فرع الزمالك، ولكن المرة دي في وجبة الإفطار، بما أننا في يوم وسط الأسبوع، الكافيه كان فاضي تمامًا وإحنا كنا "استفتاحهم"؛ توقعنا أن المنطقة الخارجية هـ تكون جحيم في الحر اللي إحنا فيه ده ولكن فوجئنا أن الجو كان لطيف وخصوصًا أن الأوت دور جزء من المبنى فبالتالي الشمس مش داخلاه، ووجود مروحة لطف الموضوع كثير، خذ بالك أن كاتب المقال ده مش من الناس اللي الحر بـ "يفرهدها"، فلو أنت من عشاق التكييف ننصحك بالمنطقة الداخلية.   انتظرنا أي شخص يستقبلنا بمنيو أو حاجة، ولكن مرت حوالي 10 دقائق شكينا فيهم أن المكان مش مفتوح أصلًا، فقمنا نتأكد كان القائمين على الخدمة انتبهوا لوجودنا فقدموا لنا المنيو. أخذنا بالنا أن بالرغم من أن المنيو كبير وأقسامه متنوعة إلا أن عدد الاختيارات في كل قسم مش كبيرة، وخصوصًا الساندويتشات والمخبوزات. المهم، طلبنا كرواسون بالجبنة (16.95 جنيه)،  وكابتشينو كبير (20.95 جنيه). بعد وقت مش قليل وصل الطلب، الكرواسون كان طازج ولكن مشكلته الأساسية أنه معمول من عجينة عيش، وبالتالي ما فرقش كثير عن الكرواسون اللي ممكن تشتريه من أي فرن غير شريحة جبنة شيدر في نصفه وثلاث شرائح  رفيعة عليه من فوق. أما الكابتشينو، فكان ممتاز من جميع النواحي، كميته مناسبة جدًا لحد بـ يعشق القهوة زيّنا، القهوة المستخدمة فيه كانت نكهتها قوية من غير ما تكون مُرّة والرغوة كثيفة اتسلينا عليها بعد ما المشروب خلص. طلبنا من الساندويتشات بانيني بالديك المدخن (34.45 جنيه)، سموذي برتقال (20.95 جنيه) وفراولة باللبن (26.95 جنيه). البانيني اللي قُدم لنا مع بطاطس محمرة وكاتشب ما كانش أحسن حاجة ذقناها في العالم، لأن نسبة العيش للمكونات (تشيدر وشرائح الديك) كانت كبيرة، غير أن العيش كان فيه جزء منه محروق، البطاطس كانت لطيفة وساعدتنا أننا نتحمل البانيني في المجمل. بالنسبة للسموذي، الموضوع كان مختلف تمامًا؛ كانوا ممتازين. البرتقال كان منعش وطعمه مضبوط، حتى كمية الثلج بالنسبة للمشروب كانت ممتازة –ودي حاجة مش بـ نلاقيها في معظم الأماكن- ما تعملش لك صداع نصفي، أو تحس أنك بـ تشرب سموذي ثلج، أما الفراولة باللبن كانت كريمي والفراولة فريش، كنا مستمتعين بالمشروبين جدًا ومش عاوزينهم يخلصوا. إجمالًا، التجربة ككل كانت لطيفة، موقع الكافيه الهادئ ساعد كثير، الخدمة صحيح كانت بطيئة والأكل كان عادي بالنسبة لسعره، إلا أن المشروبات كانت أكثر من ممتازة ومافيهاش غلطة واحدة، كافيتشو حلو جدًا لقعدة مشاريب، وممكن تأكل لو أنت خلاص هـ تموت من الجوع.

...

ديب أن ديب: حينما تعشق الشوكولاتة في كايرو فيستيفال سيتي
اصدرت في: 03/08/2015

كالعادة، فيه حالة من الجنون بـ تجتاح مواقع التواصل الاجتماعي كل مرة يوصل فيها مكان جديد ناجح للساحة القاهرية، أول مرة نسمع فيها عن "ديب أن ديب - Dip n' Dip" كانت لما شوفنا ناس بـ تنزل صور مغرية لحلويات غرقانة في كل أنواع الشوكولاتة، طبعًا إرادتنا انهارت في ثانية، وفي ثواني لاقينا نفسنا رايحين هناك ومستحوذة علينا فكرة واحدة: "باي باي للجسم المثالي.. وأهلاً وسهلاً بالشوكولاتة اللذيذة". ديب أن ديب بمساحته المتوسطة موجود في منطقة النافورة في كايرو فيستيفال سيتي، مع قعدات داخل المكان وأماكن محدودة في الخارج، لو قولنا لكم أن المكان كان زحمة وقت زيارتنا يبقي قليل، ومن هنا كان لازم نكتب أسمائنا في قائمة الانتظار، لحسن الحظ واحد من الناس اللي حجزت لغى الحجز وفي خلال ربع ساعة كنا مستقرين على ترابيزتنا. ديكورات المكان حلوة فيها ثلاث نافورات ضخمة على الكاونتر واللي فيهم شوكولاتة حليب، وبيضاء وداكنة، وصل الجرسون سريعًا ومعاه المنيوهات، وبعد رحلة استكشاف، كان واضح أن "ديب أن ديب" متخصص في الحلويات وبس. من كريبات، وافل، كريم باف، شوكليت فوندو، كيكات، وبان برديو Pain Perdu وشوكليت موس، نقدر نقول أن مافيش أي نوع من الحلويات المغطاه بالشوكولاتة في الكون مش موجودة عندهم، من أبرز الحاجات هناك المارشميلو كريب (45 جنيه)، والفيتوتشيني كريب (60 جنيه)، ووافل ستيك (25 جنيه) وتريبل شوكليت موس (35 جنيه). بناءً على نصيحة الجرسون، طلبنا براونيز كريب (45 جنيه) وشوكليت بانانا وافل (55 جنيه). الطلب تأخر جدًا لدرجة أنه وصل بعد أكثر من نصف ساعة، الحقيقة أن الموضوع كان يستحق الانتظار من جمال الحلويات سواء شكلها أو طعمها. البراونيز كريب كانت عبارة عن كريب مفرود ومحشي براوني مطحون ومغطى بشوكولاتة بيضاء وبالحليب وداكنة، وبجد يعتبر اختراع رائع ومميت، وإحنا في نصفه أعلنا استسلامننا وحاولنا نقاوم غيبوبة السكر بكل الأشكال، نفس الكلام ممكن يُقال على الشوكليت بانانا وافل المكونة من وافل محشي موز ومغطى بشوكولاتة حليب وشوكولاتة بيضاء، مع كريمة مخفوقة على جنب الطبق. بشكل عام، بعيدًا عن الدوشة الفظيعة في المكان من طفل بـ يعيط هنا وطفل ثاني بـ يصرخ هناك، الحلويات كانت زي ما بـ تقول صورهم المشهورة على مواقع التواصل الاجتماعي: "من كوكب ثاني". احتمال تحتاج تستنى شوية قبل ما تلاقي مكان، وقد أعذر من أنذر.

...

ذا مهلبية كومباني: أجمل مهلبية وتيراميسو وأرز باللبن ملون في المعادي
اصدرت في: 29/07/2015

كل فترة بـ تطلع تقليعة جديدة في الحلويات، الكل بـ يحاول يجذب الزبون بمنتج جديد ومبتكر، وأكيد أهم حاجة أن طعمه يبقى حلو، وده كله متوفر في "ذا مهلبية كومباني – The Mahalabeya company" اللي لسه فاتح قريب في شارع 9 في المعادي. أول حاجة لفتت نظرنا للمحل هو الورد اللي فوق الاسم الحقيقة يعنى، مش بس علشان إحنا من عشاق الورود، لأ هو فعلًا شكله مبهج غير ألوان الكراسي الملونة بره المحل مع لوجو المكان اللي كله ألوان، تحس أنك رايح مهرجان مبهج، من قبل ما تدخل المكان حتى. النظام هناك كالآتي بـ تدخل تختار هـ تشتري إيه ويا إما تأكله هناك ولو عاوز تشرب حاجة أو تأخد اللي أنت عاوزه وتمشي، والحقيقة أن الناس هناك كانوا ودودين جدًا شرحوا لنا مكونات كل طبق على حدة قبل ما نقرر هـ نشتري إيه، مبدأيا فيه حجمين للأرز باللبن أو المهلبية أو الكريمة، حجم صغير أكبر من حجم الكب كيك حاجة صغيرة وحجم كبير أصغر من حجم علبة الآيس كريم، المهم بعد حيرة طويلة جدًا ما بين الأصناف: كريمة نوتيلا وتراميسو وكريمة بالفواكة ومهلبية بالموز والكراميل وأرز باللبن بالقرفة والمكسرات، ده غير الحاجات اللايت زي حبوب الشيا بالفاكهة والموسلي والزبادي بالفواكة، بعد تردد كبير اختارنا تيراميسو بـ 20 جنيه حجم الكبير، وأرز باللبن قوس قزح بـ 16 جنيه، ومهلبية بالتفاح والقرفة بـ 16 جنيه وAfter Eight وده شوكولاتة بالنعناع بـ 20 جنيه.  وحطوها لنا في علبة لسه معجبين باللوجو بتاعها إلى الآن من بساطة التصميم واللي هي عبارة عن دوريات مزخرفة ملونة مستوحاة من الفنون الهندية المبهجة. أكثر حاجة عجبتنا كانت التيراميسو من كثر جمالها مش عارفين نوصفها بإيه، كانت مضبوطة جدًا ومبهجة، أما بالنسبة للأرز باللبن قوس القزح، فلازم نعترف أنه اختراع كل طبقة منه بلون مختلف أصفر وأخضر وأزرق وأحمر وفي الآخر طبقة كريمة لونها بينك، طعمه كان عادي بس بهجته في الألوان، المهلبية بالقرفة والتفاح كانت كويسة قوي برضه برغم أننا مش من عشاق المهلبية إلا أنه كانت حلوة، آخر حاجة الشوكولاتة بالنعناع للأسف يا جماعة ما عجبتناش خالص، التوازن فيها كان مفقود ما بين الشوكولاتة المُرة وكريمة النعناع اللي مفتقدة لطعم النعناع، نتمنى أنهم يوصلوا للتركيبة الصح بتاعتها. أكيد دي مش هـ تكون الزيارة الأخيرة لهم، نتمنى أنهم يفضلوا يقدموا لنا كل جديد مبهج ومبتكر وطعمه حلو، ودي الخلطة السرية لنجاح أي مكان.

...

كولد ستون كريمري: آيس كريم منعش ووافل حكاية في فرع جديد فى المعادي
اصدرت في: 28/07/2015

في الجو الحر ده الناس بـ تفضل تهرب منه وتسافر على إسكندرية أو الساحل، أما المواطنين اللي لسه ما عرفوش يستخبوا من الحر هناك، مافيش أجمل من أنك تطلب آيس كريم ينعشك ويهدئ أعصابك في الجو ده، وده اللي حصل لنا لما رحنا "كولد ستون كريمري – Cold Stone Creamery" اللي لسه فاتح فرع جديد في شارع 9 في المعادي. طبعًا الآيس كريم هناك مختلف عن أي محل ثاني، مش بس علشان النكهات المختلفة والجديدة، لأ كولد ستون كريمرى مشهور بأحجامه من الصغير خالص للكبير جدًا، ووصفاته الخاصة اللي تقدروا تشوفوها من صفحتهم على الفيسبوك. إحنا حبينا نجرب أكثر من نوع فـ طلبنا حجم كبير في بسكويتة واللي كان فيه منها بالشوكولاتة من الجنب بس إحنا اختارنا السادة، أما بالنسبة للنكهات، طلبنا آيس كريم أوريو كريم البولة بـ 17 جنيه، وآيس كريم نوتيلا وشوكولاتة غامقة بنفس السعر، وآيس كريم نعناع بـ 13 جنيه، والنكهة اللي عجبتنا جدًا آيس كريم بطعم غزل البنات بنفس السعر، وآيس كريم كراميل برضه بـ 13 جنيه. كمان حبينا نجرب الوافل اللي عندهم جبنا وافل our strawberry Blonde  وأضافنا عليه صوص توت مع إضافة مارشميلو وتوت وفراولة، والإضافة الواحدة بـ 7 جنيه مع بولة آيس كريم اختارنا طعمها يكون French vanilla، كمان قولنا نجرب حاجة من منيو الميلك شيك، فـ طلبنا Cherry cheesecake وما كانش فيه شيري فـ بدلناه بـ Blackberry وسعره 30 جنيه. نبدأ بالآيس كريم أكثر طعم عجبنا ورجعنا لأيام الطفولة ومزجنا فعلًا كان آيس كريم غزل البنات Cotton Candy، لو كنا نقدر نأكله هو بس إلى ما لا نهاية كنا عملنا كده، برضه طعم النعناع كان حلو قوي والنوتيلا والشوكولاتة الغامقة والكراميل، آيس كريم الأوريو كان حلو قوي بس أكثر طعم عجبنا دوقناه هناك بس ما أكلناهوش هو الليمون، لأنه أخف طعم ممكن تذوقه، كمان التشيز كيك كان لذيذ، ولو أن النكهات بشكل عام كانت محتاجة تبقى أكثف من كده شوية، بس هي حلوة جدًا طبعًا. نيجي بقى للوافل اللي أول ما قُدم لنا كان شكله تحفة، وكمان أضاف لنا عليه كريمة مخفوقة زيادة من عندهم، الوافل مش كان تحفة.. ده كان وهمي، مضبوط ما تحسش بطعم البيض، مع صوص التوت والفراولة والآيس كريم خلطة منعشة ومبهجة، الحاجة الوحيدة اللي ضايقتنا أن المارشميلو كان ناشف لدرجة أنه بـ يقرمش زي المكسرات تخيلوا! وده طبعًا علشان ما كانش فريش، بس فيما عدا ذلك كان حلو جدًا، كمان ميلك شيك البلاك بيري مع التشيز كيك تجربة رائعة تستحق أنك تغامر بها لآخر قطرة في العصير. بشكل عام تجربتنا في كولد ستون كريمرى كانت ممتعة وأكيد مش هـ تكون زيارتنا الأخيرة.

...

كافيه دو جاردان: مطعم وكافيه عادي، وبسيط وغير متخصص فى داندي مول
اصدرت في: 22/07/2015

فى داندى مول وأنت بـ تتمشى وبـ تدور على لبس أو إكسسوارات تشتريها، أول ما بطنك تزقزق مافيش أمامك غير منطقة المطاعم اللى بره اللى بـ تطل على الجراج الخارجي أو الفوود كورت اللى فى الدور الثاني فى آخر المول، يا إما فيه كام مطعم فى نفس الدور منفصلين ومنهم اللى فتح جديد زي "كافيه دو جاردان – Café Du Jardin". المكان بديكوراته هادئة وتشدك أنك تروح تكتشف إيه المكان ده، الديكور عاكل كأنك قاعد فى جنينة بالفعل بزرع صناعى فى الأرضية وكراسي وترابيزات بيضاء كأنك قاعد فى حتة Outdoor، المكان اسمه "كافيه" لكنه بـ يقدم أطباق رئيسية وبالتالى هو مش كافيه بس، ممكن تعرف أصناف المنيو من صفحتهم على الفيسبوك، من الأصناف –القليلة- اللى شوفناها نقدر نقول أن المكان مالوش تخصص معين، أنواع الأطباق مختلفة ومش تبع مطبخ محدد. كانت نفسنا هفانا على شوربة وأحبطنا لما ما لقيناهاش فى المنيو، لكن لما سألنا الجرسون قال لنا فيه نوعين موجودين، هما شوربة كريمة بالمشروم (22 جنيه) وكريمة بالسي فوود، اختارنا أول واحدة، ومن الأطباق الرئيسية أخذنا دجاج صيني (60 جنيه) وده قطع دجاج مقطعة صغير مع الفلفل الألوان ومكرونة أنجيل هير والجنزبيل والصويا صوص، مع تشيكن سيزر سلاد (40 جنيه). تحضير الأكل ما أخذش وقت طويل، جاءت لنا أول حاجة الشوربة والسلاطة، قوام الشوربة كان كويس وسخونتها معقولة، تعليقنا الوحيد بس أن قطع المشروم كميته كبيرة عن الكريمة، السلاطة كانت كميتها معقولة والخس كويس والفراخ مستوية مع قطع العيش المقرمش وشريحتين طماطم، لكن الـ Dressing بتاع السلاطة كان مملح أوى وكمان باين فيه طعم فلفل، فى رأينا سلاطة السيزر لو الصوص بتاعها مش مضبوط كلها بـ تفشل، وده اللى حصل بالفعل. بعد كده جاء لنا الفراخ الصينية، طعمها وتتبيلتها وكمية الصوص مضبوطين، كان حاجة غريبة بس أن الطبق مالوش طلب جانبي حتى واحد، وبالتالى كميته ما تشبعش واحد أكيل، بس طعمه كان حلو، عامة تعليقنا على الأكل ببساطة أننا ممكن نعمل زيه فى البيت، وأفضل كمان. طلبنا بعد الأكل من المشروبات عصير برتقال فريش (16 جنيه) وعصير ليمون بالنعناع (16 جنيه) ومن الحلويات كريب بالموز (32 جنيه)، العصاير كانت رائعة جدًا، السكر مضبوط، فريش، مافيهاش أى تعليق وحش، وكريب الموز كان عليه صوص كراميل مع شريحتين تفاح للتزيين، طعمه كان كويس بس عادي برضه مافيش فيه حاجة مميزة. "كافيه دو جاردان" مكان لطيف ممكن تاكل فيه أكلة سريعة وأنت فى داندى مول، لكن المكان لازم يحط فى الاعتبار التنافس بين الأماكن اللى فى المول، علشان غير كده هـ يضيع وسطهم!

...

شاهد المزيد
مواضيع خاصة

دليل أحداث نهاية الأسبوع: حفل الطنبورة وسيد درويش ومسرحية ثري دي وعرض أم كلثوم

كعادتنا كل ويك إند ودليل أحداث مميز مليان بالأحداث المختلفة اللي تخليكم تستمتعوا بوقتكم وتستفيدوا به. نبدأ بيوم الخميس، وحفل الطنبورة بمسرح الضمة، وأسعار التذاكر: 3