دليل كافيهات القاهرة، أحدث المقالات عن كافيهات مصر

كافيهات

بينوس: فطار لذيذ في وسط البلد
اصدرت في: 24/10/2016

ساعات كتير بنحتاج أننا نروح مكان نفطر فيه فطار خفيف ونروح الشغل، ويا سلام لو يوم ينفع تشتغل فيه من بره وتقضي طول اليوم في كافيه خدمته كويسة، وبيقدم لك إللي تحتاجه، وده اللي لاحظناه في بينوس – Beano's. المكان في شارع محمد محمود، اللي ليه مع كثير من شباب الشعب المصري ذكريات كتير. المكان دورين، واسع والأهم أن فيه مكان لغير المدخنين. ودي حاجة مابقيناش نلاقيها كتير مؤخرًا. طلبنا Espresso Macchiato بـ 17 جنيه، وCaramel Macchiato بـ 26 جنيه ومعاهم Pancakes 3 قطع (33 جنيه)، وcinnamon pecan coffee cake (28 جنيه). القهوة كان لا يعلى عليها مضبوطة وتعدل المزاج علشان تبدأ يومك بنشاط، البان كيك حسيناه صغير شوية بالنسبة لسعره وبيتقدم معاه 3 أنواع Syrup مختلفين، عسل ومابل ونوتيلا. أما الكيك فكانت وهمية خلطة القرفة مع القهوة ممتعة وكانت فريش، ممكن بس تحتاج تضيف لها صوص كراميل علشان تظبط معاك. بينوس كمان بيقدم أصناف عصائر مختلفة وسلاطات وساندويتشات بس إحنا حبينا فطارنا يكون خفيف، وسريع والحقيقة هم كانوا سريعين وخدمتهم مميزة. أكيد دي مش هتكون أخر زيارة لينا للمكان اللي قدر يحافظ على سمعته على مدار سنين كتيرة.

...

ذا باتر هاف أند كو: ‏‎ ‎محل الحلويات هيدينا سبب تاني عشان نحبه
اصدرت في: 12/10/2016

من الأماكن اللي قدرت أنها تحقق نجاح كبير في عالم الحلويات هو ذا باتر هاف أند كو. وفي وقت قليل قدر أنه يعمل كلاسيكيات الناس بتجيلها مخصوص الزمالك، زي شوكوليت هيفن والريد فيلفت كيك. من فترة عرفنا أن ذا باتر هاف أند كو بقى يقدم تشكيلة من الآيس كريم، فقررنا أننا نروح فرعهم في الزمالك علشان نقدر نحدد إذا كان المحل هيقدر ينافس في منطقة الآيس كريم -اللي ليها محلاتها- ولا لأ. الحماسة الزايدة خلتنا ننزل بدري –حوالي الساعة 11:30. صحيح المحل كان فاتح وكل حاجة كانت جاهزة، إلا أن ثلاجة الآيس كريم كانت فاضية. وبسؤالنا عن الآيس كريم، لحظات والقائم على الخدمة كان مجهز الأنواع قدامنا في ثلاجة العرض. الأنواع كانت كثيرة وهتلاقي منها اللي يناسبك أيًا كان ذوقك في الآيس كريم؛ يعني مثلًا فيه الأنواع اللي ما عليهاش اختلاف زي النوتيلا، المانجو والقهوة، غير الأنواع المبتكرة زي البسكويت والريد فيلفيت. بعد فترة انتظار لحد ما الآيس كريم يفك، قررنا أننا نختار الآتي: بولة ليمون في بسكويتة، وبولة قهوة، وواحدة كراميل وواحدة بنكهة البسكويت. سعر البولة الواحد 15 جنيه. توقعنا أن البسكويتة ما تكونش فريش لأننا أول حد ياخد آيس كريم في اليوم ده، وللأسف توقعنا كان في محله –البسكويتة في حد ذاتها طعمها حول، ولكن بما أنها بايتة من إمبارح طبيعي جدًا أنها ما تكونش مقرمشة. أما آيس كريم الليمون، بالرغم من أنه كريمي وقوامه غني إلا أن ما فيهوش لسعة الليمون اللي بنحبها. أي حد بيحب القهوة ممكن يلاقي أماكن كثيرة بتقدم نكهة الآيس كريم الخاصة به وبجودة حلوة، إلا أن في ذا باتر هاف أند كو فيه في الآيس كريم القهوة قطع مش عارفين بالضبط هي شوكولاتة ولا قهوة ولا حتى الأثنين على البعض مقوية النكهة ومزودة قرمشة مناسبة جدًا مع قوام الآيس كريم ككل ما لاقيناهاش في أي مكان ثاني. صحيح إحنا مش من هواة نكهة الكراميل لأن دايمًا بنحس أن نكهته مش طبيعية، إلا أنك لو بتدور على آيس كريم نكهته مش مفتعلة وفي نفس الوقت سكره مضبوط، هتلاقي اللي أنت عايزه هناك. برضه من النكهات اللي كنا متخوفين منها هي نكهة البسكويت. ولكن نعترف أنه من أحسن النكهات اللي جربناها في المكان. قوامه مختلف عن الأنواع التانية؛ هو مش بنعومة الأنواع الثانية وكأن فيه بسكويت مجروش بشكل ناعم. وكنا متخايلين أن طعمه هيبقى زي السيريلاك، لكن الحقيقة أن طعمه غني وكأنه بسكويت بالزبدة. في النهاية، حتى لو أنت لك مكانك المفضل اللي بتحب تأكل من عنده آيس كريم، ننصحك أنك تعدي على ذا باتر هاف آند كو لأنه أكيد هيغير فكرتك عن الآيس كريم.

...

ديكسي كريم: تشكيلة حلويات هايلة وجودة متواضعة في كايرو فيستيفال سيتي
اصدرت في: 28/09/2016

شوفنا الكام سنة اللي فاتوا ظهور كمية محلات متخصصة في الحلويات مالهاش حصر، وكلامنا هنا مش محصور على الأماكن الجديدة وبس، حتى المحلات الموجودة كمان فتحت لها فروع جديدة علشان يثبتوا تفوقهم في حرب الحلويات القاهرية. أكيد ديكسي كريم واحد من الأماكن دي، وكلامنا هنا عن فرعهم الجديد في كايرو فيستيفال سيتي الموجود عند واحد من مداخل الفوود كورت، وطبعًا مكانه المميز هيلفت انتباه كل الداخلين والخارجين للمكان. الفرع كمساحة يعتبر صغير نسبيًا، ومناسب لزيارة سريعة تدلع بها نفسك بتشكيلتهم الكبيرة من الحلويات اللي تشمل دوناتس وجيلاتو على الطريقة الطلياني وزبادي مثلج، ومعاهم مشروبات سخنة وباردة بيعملوها بنفسهم. أول حاجة لاحظناها بعد ما وصلنا لترابيزتنا إنها مش نظيفة وعليها بواقي عصير وسكر من الناس اللي قبلنا، وعلشان مافيش مناديل اضطرينا نستنى الجرسون اللي وصل بعد فترة ومسح الترابيزة لما طلبنا منه. ندخل في صلب الموضوع ونبدأ مع الشوكليت جليزد دونات Chocolate glazed donut (11 جنيه) المشهور بيها ديكسي كريم مع دونات محشية ريد فيلفيت (16 جنيه) وميني آبل فريتر (14.70 جنيه)، ومعاهم لاتيه (17 جنيه) بنكهة البندق (7 جنيه) وسموزي توت (15 جنيه). الدونات اللي عليها آيسينج شوكولاتة للأسف ماكانتش طازة ومالهاش طعم مميز، أما الدونات بالريد فيلفيت فكانت غنية بكريمة بيضاء جميلة طغت على الدونات اللي برضه مالهاش طعم. نروح على الأبل فريتر الطرية وطعم القرفة مع نكهة تفاح خفيف جدًا وكمية آيسينج سكر كبيرة، والملحوظة إنها وصلت باردة وكان الأحسن طبعًا أنها تكون سخنة. سموزي التوت كان تحفة بس مسكر بزيادة، وفيه نكهة صناعية بعدية عن طعم الفاكهة الطبيعي. أما اللاتيه فكان عبارة عن قهوة تركي دوبل ودي كانت حاجة غريبة طبعًا، بس مع كل المشاكل اللي قابلناها يومها ماكانش عندنا استعداد حتى نتناقش مع الجرسون ومشينا بعدها على طول. مافيش شك إن ديكسي كريم (على الأقل فرع كايرو فيستيفال سيتي) عنده كذا مشكلة محتاجين حل سريع علشان يستمروا في المنافسة مع دانكن دوناتس وغيره من خبراء الحلويات. لازم نقول أن الموظفين هناك بيشرحوا كل حاجة محتاج تعرفها عن الحلويات الموجودة ما عدا الدوناتس اللي هي أصلًا تخصص ديكسي كريم.

...

ماربل سلاب كريمري: فرع جديد ومستوى متواضع في ميراج مول
اصدرت في: 27/09/2016

الآيس كريم اشتكى من عدد الابتكارات الرهيبة اللي اتعملت فيه من خبراء الآيس كريم القاهريين، وغالبًا أول تقليعة شوفناها كانت خلط الآيس كريم مع الإضافات المتنوعة على سطح بارد– والكلام ده هو تخصص "ماربل سلاب كريمري-Marble Slab Creamery". فرعهم الجديد في ميراج مول القاهرة الجديدة صغير لكن تصميمه عملي جدًا ومستغلين كل مكان فيه، وهو عبارة عن ثلاجة عرض آيس كريم عريضة وقصادها رخامة مثلجة عليها الإضافات المختلفة. في كمان أربع ترابيزات قصاد المكان لو حبيتوا تقعدوا هناك. نكهات الآيس كريم الموجودة كانت عشرة وده طبعًا رقم قليل شوية، بس الفكرة هنا هي التباديل والتوافيق بين الآيس كريم والإضافات اللي ممكن تعمل منهم كوكتيلات أشكال وألوان.الكوبايات عند ماربل سلاب لها أربعة أحجام وهي كيدز (22 جنيه) وفاليو Value (30 جنيه) وأوريجينال (40 جنيه) وبيج ديبر (50 جنيه)، أو ممكن تختار بسكوته سادة (5 جنيه). إحنا عن نفسنا طلبنا كوباية آيس كريم فراولة وعليها مالتيزرز (5 جنيه/للإضافة الواحدة) وواحدة شوكولاتة عليها مارشميلو. أول حاجة نجربها كانت ميكس الفراولة-مالتيزرز، وهو عبارة عن بولة آيس كريم عملاقة بتكون على سطح رخام مثلج وعليها كمية مالتيزرز كويسة.طعم الآيس كريم كان أقرب لآيس كريم فانيليا مع طعم فراولة خفيف، وفي ملاحظة ثانية وهي إن توزيع الماليتزرز ماكانش متساوي. نفس الكلام نقدر نقوله على ميكس الشوكولاتة - مارشميلو، ده كمان كان فيه مشاكل زيادة! طعم الشوكولاتة مش ملحوظ في الآيس كريم والمارشملو كانت متجمدة علشان موضوع السطح المثلج، وبالتالي كانت صعبة المضغ. بعد تجربتنا المتواضعة لصنفين آيس كريم معمولين بطريقة الرخامة المثلجة، قررنا نرجع للي نعرفه ونطلب بسكوتة عليها بولة توت بري وبولة زبدة فول سوداني. برضه الموضوع ماكانش لطيف علشان البسكوتة ماكانتش طازة، وكمان التوت مالوش طعم والآيس كريم نفسه كان مثلج لدرجة أنه كسر المعلقة البلاستيك مرتين. الحاجة الوحيدة في الموضوع اللي لها طعم كان بولة زبدة الفول السوداني. بصراحة كنا متوقعين مستوى أعلى من ماربل سلاب بصفته أول محل آيس كريم من نوعه في مصر، لكن المشكلة كانت عدد النكهات القليل، وحتى طعم نكهات الآيس كريم والإضافات مش على المستوى. لو زودت على كلامنا اللي فات إن أسعارهم غالية كمان، تقدر تعرف إن تجربتنا كانت في منتهى السوء.

...

ديب آند ديب: المقر الرسمي للشوكولاتة في أمريكانا بلازا
اصدرت في: 26/09/2016

فيه حاجات بسيطة اتخلقت علشان تعدل مزاج البني آدم حتى لو حياته مكركبة، وهي بتختلف من شخص للثاني؛ ناس بيتعدل مزاجها بكوباية شاي أو قهوة، وفيه ناس مزاجها أكلة حلوة دسمة، وفيه ناس –كثير- مزاجهم بيتعدل بالشوكولاتة. علميًا، يقال أن الشوكولاتة فيها مادتين الكفايين والسيراتونين اللي يعدلوا كيمياء أجدعها دماغ، ونعتقد أن حتى لو المادتين مش موجودين طعمها لوحده كفيل أنه يبسطنا. المهم، قررنا أننا ننبسط شوية ونروح نزور ديب أند ديب – Dip n Dip الموجود في أمريكانا بلازا في الشيخ زايد علشان نعرف إيه اللي ممكن يقدمه المكان لحد بيحب الشوكولاتة. ما فيش شك أن محور المنيو الكبير هو الشوكولاتة البلجيكية بأنواعها الثلاثة (بيضاء – غامقة – باللبن)، واللي هتلاقيها مكوّن أساسي لمجموعة الكريب أو الوافلز والكيك بأنواعه، ده غير أنك ممكن تغمسها بأي حاجة من الاختيارات المتوفرة عندهم وحتى الآيس كريم أو المشروبات هتلاقي فيها شوكولاتة، بجانب مجموعة من العصاير ومشروبات القهوة. بعد حيرة، قررنا أننا نطلب تريبل تشوكوليت وافل – Triple Chocolate Waffle (40 جنيه)، وتشوكوليت فوندو – Chocolate Fondue (40 جنيه)، ومعاه طبق أناناس وكريم بافس – Cream Puffs لزوم التغميس (الطبق الواحد 25 جنيه). ومن المشروبات آيس كابتشينو (35 جنيه)، ومشروب ديب أند ديب فريزي – Dip n Dip Freezy (45 جنيه). لحد هنا الخدمة كانت زي الفل، ومن بعدها الخدمة بدأ رتمها يبطأ لدرجة الملل، بالرغم من أن المكان ما كانش زحمة. بعد حوالي 15 دقيقة وصلت المشروبات لحد ما بقية الطلبات تنزل؛ بالنسبة للآيس كابتشينو، الجارسون كان اقترح علينا أننا نضيف أي نكهة عليه لأنه –على حد قوله- مش هيعجبنا لوحده، ولكن بما أننا كده كده من مدمني القهوة فالموضوع مش محتاج نكهة. الحقيقة النكهة كانت آخر همومنا؛ لأن بالرغم من أن نكهة القهوة قوية زي ما بنحبها، المشروب كان قوامه خفيف جدًا -مع أن فيه لبن- وطعمه بالضبط كأنه معمول بمياه. كان نفسنا يبقى كريمي حبتين. على العكس تمامًا، مشروب ديب أند ديب فريزي، كان أكثر من رائع؛ غني من حيث القوام والنكهة لأن فيه مجموعة كبيرة من المكونات المتجانسة مع بعض زي قطع الشوكولاتة الصغيرة، الكريمة، وطبعًا مشروب الشوكولاتة. حاولنا قدر الإمكان أننا نبطأ من استهلاك مجموعة المشروبات اللي طلبناها على أساس أن خلاص بقية الأوردر في السكة، إلا أن لحظات الانتظار طالت لـ 20 دقيقة كنا خلصنا فيها على المشروبات. الحمد لله وصل الأوردر، الوافل كانت عبارة عن نص دائرة غارقانة شوكولاتة بأنواعها الثلاثة؛ بالرغم من أننا مش من محبي الشوكولاتة البيضاء، إلا أن الثلاث أنواع مع بعض طعمهم كان مثالي مع الوافل اللي لولا أنها مقرمشة بزيادة كان هيبقى الوافل المثالي. بس ده ما يمنعش أننا استمتعنا بالطبق في المجمل. أما اختيارنا الثاني فهو ببساطة طبق شوكولاتة باللبن تحته شمعة علشان تحافظ على سخونته وقوامه، ومعاه اختيارنا من الأناناس والكريم بافس اللي هو ببساطة عجينة شو محشية بالكريمة. الاختيار ده كان بالنسبة لنا أخف من الأول في المجمل؛ الكريم بافس كثيرة وطازة وطعمها لوحده حلو، فما بالك مع الشوكولاتة. أما الأناناس فهو كمان كان فريش ونكهته القوية كانت مناسبة جدًا مع حلاوة الشوكولاتة. طبعًا بعد جرعة السكريات المعتبرة نقدر نقول أن ديب أند ديب مش المكان اللي تروحه بعد أكلة دسمة، لأن أي حاجة هتطلبها هتعمل لك Over Dose، أو جرعة زايدة من الدسامة؛ ديب أند ديب محتاج له خروجة لوحده، حتى علشان تستمتع أكثر باللي هتطلبه. بجانب أن مشكلته الأساسية بالنسبة لنا كانت في الخدمة البطيئة، إلا أن أي حد بيحب الشوكولاتة بأنواعها هيلاقي حاجة تناسبه هناك.

...

جيلاتو ميو: آيس كريم لذيذ على وضعه
اصدرت في: 20/09/2016

أسوأ حاجة فاكرين آيس كريم الزمن الجميل لما كان بيتعمل بسكوتة أو صنداي مع شوية صوص شوكولاتة على الوش؟ يا سلام على الأيام الجميلة، بس للأسف الشكل التقليدي للآيس كريم اتنسى وكل شوية يطلع لنا موضة جديدة – يعني مثلًا شوفنا آيس كريم النيتروجين السائل والآيس كريم رولز. الأنواع دي انتشرت جدًا في القاهرة ولها جمهور عريض، بس في أماكن حافظت على الشكل التقليدي للآيس كريم ومنهم "جيلاتو ميو-Gelato Mio". بعد ما جيلاتو ميو كسب في جوائز اختيارات محرري كايرو360 عن أفضل أماكن الآيس كريم ومنتجات الألبان، قررنا نزورالمحل الصغير الموجود في شارع البرازيل في الزمالك مرة ثانية. نوصف جيلاتو ميو للي ما يعرفوش ونقول له أنه محل صغير ديكوراته بسيطة باللون الأبيض زي قوالب طوب باللون الأبيض، والبساطة دي ركزت الانتباه على ثلاجة عرض الجيلاتو. طلبنا بسكوتة صغيرة (13 جنيه) عليها جيلاتو بطيخ وبولة ثانية موز على جوافة. طلبنا كمان بولتين في كأس واحدة كانوا واحدة كراميل والثانية شوكولاتة ليندت (13 جنيه/للبولة). الجيلاتو بطيخ كان فوق بسكوتة وافل مقرمشة وطازة، وطعم الجيلاتو نفسه كان خفيف ومنعش، بس كان نفسنا يكون طعم البطيخ أقوى من كده. أما الموز على جوافة فطعم الجوافة كان خرافي والموز طبعًا هايل بطعمه المسكر اللذيذ –ويستحق يكون نكهة آيس كريم لوحده – والأثنين عملوا كوكتيل فاكهة رائع. إحنا أسفين يا فراولة، بس الموز خلاص عمل دويتو مع الجوافة. نفس الجمال كان مع الجيلاتو بالشوكولاتة الليندت، ويمكن الشوكولاتة الداكنة مش هتعجبك لو كنت من عشاق الشوكولاتة البيضاء، بس الأكيد إن طعمها كان روعة مع الجيلاتو كراميل اللي طعمه قريب جدًا من طعم الكريم كراميل، والمميز في بولة الكراميل إنها اضافت طعم مسكر مش موجود مع الليندت. نكهات الجيلاتو اللي جربناها بشكل عام كانت هايلة وقوامها ممتاز وطعمها قوي، وهنا بنعرف نقطة قوة جيلاتو ميو وهي المحافظة على الجودة. جيلاتو ميو فتح من ثلاث سنين ولسه محافظ على وضعه.

...

بريكس: أجواء لطيفة وأكل هايل في ذا واك بيفرلي هيلز
اصدرت في: 18/09/2016

من الصعب أنك نلاقي مكان خروج مثالي في القاهرة ودي حقيقة علمية ثابتة مافيهاش كلام. صحيح الكافيهات والمطاعم والبارات على عينك يا تاجر، لكن صعب توصل لمكان يجمع مستوى مميز من الترفيه والأكل والراحة في نفس الوقت، فاللي بيحصل إنهم على الأقل بيضحوا بعنصر منهم علشان يحافظوا على الباقيين. روحنا "بريكس - Bricks" المستخبي وسط مجمع ذا واك في 6 أكتوبر، مكان بسيط بيعتمد على أجواءه الهادئة وأكله الكويس. الآوت دور هناك معمول بطراز القهوة المودرن بكراسي مدهونة أبيض وترابيزات خشب عالية. بريكس كمان فيه منطقة إن دور صغيرة فيها نفس الكراسي، مع مكان للبلاي ستيشن مخصص لعشاق الألعاب – ببلاش يا جماعة–والديكورات معمولة بالجرافيتي الأسود ومكتوب به أغنية البيتلز الشهيرة "Come together". أجواء بريكس الهادئة عاملة جو مريح وممتع، وكمان الطاولة وألعاب الورق ومعاهم الشاشات اللي بتعرض الماتشات أكيد أضافوا كثير للمكان. بعد ما اخترنا ترابيزة بره وبصينا على المنيو، طلبنا موتزاريلا ستيكس (35 جنيه) من قسم المقبلات ومعاها من الأطباق الرئيسية كلاسيك برجر (45 جنيه) ومشروم برجر (55 جنيه) وتشيلي هوت دوج (40 جنيه) مع إضافة جبنة (5 جنيه). مفيش كام دقيقة وكانت الموتزاريلا ستيكس قصادنا، عبارة عن أربعة قطع موتزاريلا ستيكسومعاهم مايونيز وصوص سويت تشيلي. الستيكس بصراحة كانت مقرمشة والجبنة جوه ملهاش حل، ويا سلام لما تغمسها في صوص السويت شيلي وتتذوق الطعم السبايسي المسكّر الرائع. بعدها على طول وصل أكلنا على أطباق خشب ومعاه طبق مخلل صغير وشوية بطاطس محمرة.المشروم برجر كان عبارة عن قطعة برجر كبيرة عليها خس ومايونيز وفوقهم جبنة سويسرية وقطع مشروم كبيرة، ومعاه قطع بطاطس كيرلي (4 جنيه). تتبيلة البطاطس الكيرلي كانت هايلة ومستواها مش أقل من اللي عند هارديز، بقشرتها المقرمشة وقلبها الطري اللذيذ، وبصراحة ماقدرناش نقاومها. أما بالنسبة للبرجر نفسه فجودة اللحم العالية كانت بتتكلم عن نفسها وطعم الشوي اللذيذ واضح فيه، وكمان الجبن وطعم المشروم المملح عملوا ساندويتش مالهوش حل. نروح للكلاسيك برجر اللي بنفس جودة المشروم برجر، وعليه خس وطماطم لكن مشكلته أنه كان ناشف شوية. المهم إننا بشوية مايونيز وسويت شيلي قدرنا ننقذ الموقف. بعدها كان الدور على التشيلي هوت دوج وهو عبارة عن قطعة هوت دوج كبيرة عليها مسطردة وغرقانة جبنة وشرائح بصل ومعاه بطاطس محمرة. صحيح البطاطس كانت محتاجة شوية توابل، بس برضه أنقذنا الموقف بشوية ملح، وبصراحة طعمها كان هايل وقريب من اللي بنأكله في مطاعم الفاست فوود زي برجر كينج أو ماكدونالدز، مقرمشة من بره وطرية وسخنة من جوه. بالنسبة للهوت دوج نفسه فطعمه كان قريب من الهوت دو التقليدي والمسطردة عملت نكهة قوية مع البصل، وفعلًا الساندويتش كان طبق اليوم بدون منافس. جربنا كمان ميلك شيك بزبدة الفول السوداني (30 جنيه) بيكون في كاس طويل ومعاه شفاطة. مفيش شك أن طعم الفول السوداني المميز كان واضح، لكن المشكلة إن الميلك شيك نفسه كان خفيف شوية. نقدر نقول إن زيارتنا لبريكس كانت لطيفة. المكان مميز بأكله اللذيذ والجرسونات الممتازين وأكيد من الأماكن الهائلة لخروجة جميلة، وبصراحة أجواء المكان والأكل اللذيذ بيتكلموا عن نفسهم.

...

خميرة: مخبوزات فريش في الزمالك
اصدرت في: 06/09/2016

نعتقد أن محلات المخبوزات ثاني مكان الواحد ما بيقدرش يقاوم فيه منتجاته بعد الآيس كريم، وده لأن أي مخبز –بجانب بيع العيش اللي منقدرش نعيش من غيره- بيبقى عنده مقرمشات ومعجنات أشكال وألوان. خميرة - Khamera من ضمن الأماكن اللي مقدرناش اللي نقاوم نرجع لها بعد آخر زيارة لينا –من 3 سنين مثلًا- علشان نشوف نظامهم إيه. لسوء حظنا كانوا مشغلين الشفاط جوه وبالتالي ما جاتلناش فرصة أننا نشم أحلى ريحة في العالم؛ وهي ريحة المخبوزات. المحل صغير فأنت هتشوف كل منتجاتهم قدامك. على الكاونتر لاقينا 3 أطباق تقدر تدوق منهم قبل ما تشتري، جربنا منهم بسكويت باللوز و الشوكولاتة البيضاء، بالرغم من أن طعمها لذيذ إلا أننا حسينا أنها ناشفة زيادة عن اللزوم وضروري يكون معاها كباية شاي أو قهوة تسقيها فيها قبل ما تقضم وإلا سنانك ممكن تروح فيها. لفت نظرنا برضه في الطبق الثاني بسكويت فيه قطع صغيرة لونها أحمر وأخضر فكرتنا بالكيك اللي بيبقى فيه قطع فواكه مجففة، فتوقعنا أنه يكون البسكويت حلو، ولكن المفاجأة كانت أن القطع دي قطع طماطم وزيتون أخضر، ونعترف أنها كانت مفاجأة لذيذة؛ لأننا ما جربناش حاجة شبه النوع ده قبل كده. معروض برضه مجموعة من الكرواسونات والدانيش، قررنا أننا نختار منها كرواسون بالزعتر (10 جنيه)، واللي كان فريش ومليان زعتر، إلا أن عيبه الوحيد أن الجبنة فيه –حسب ما مكتوب المفروض أنها لبنة- كانت شبه معدومة. وبما أننا بنحب أي حاجة عليها جبنة؛ قررنا نجيب مقرمشات مربعة بالجبنة الرومي، وهي من المنتجات المشهورة اللي هتلاقيها عند أي خباز (45 جنيه للكيلو)؛ المقرمشات فريش وخفيفة وأحلى حاجة أن جبنتها كثيرة. أما للناس اللي بتحب حبة البركة فالباتون ساليه (55 جنيه) اللي معمول به كان طعمه لذيذ وخصوصًا أن كمية حبة البركة فيه كبيرة. صحيح إحنا مش من هواة البقسماط، ولكن ده ما يمنعش أننا جربناه (30 جنيه)، والحقيقة أنه هش جدًا وهيعجب أي حد كييف قاعدة الصبح بالبقسماط مع الشاي. في النهاية، نقدر نقول أن التجربة في مجملها كانت لطيفة ولذيذة؛ الحاجات اللي دقناها كانت فعلًا لطيفة، صحيح المحل مش هيبهرك بديكوراته وطريقة عرضه زي محلات ثانية كثير تغريك، إلا أن المنتجات بتثبت جدارتها بنفسها.

...

فور فات ليديز: أحلى حلويات في الزمالك؟
اصدرت في: 30/08/2016

طبعًا كلنا عارفين شارع البرازيل، واحد من أزحم شوارع الزمالك والشهير بأكابر عالم الحلويات زي نولا وخميرة ولقمة عيش وجيلاتو ميا وغيرهم. الجديد في الموضوع إن "ذا فور فات ليديز The Four Fat Ladies" ساب مكانه في اليمامة سنتر ودخل حرب الحلويات المشتعلة في شارع البرازيل. نبدأ مع وصف المكان؛ مخبز صغير فيه أربع ترابيزات متوصلين ببعض بحيث يعملوا ترابيزة كبيرة، مع أربعة كراسي على جنب والجنب الثاني فيه كنبة كبيرة. صحيح اختيارهم للكنبة مش عملي، لكن الأكيد إن أجواء وديكورات المكان باللونين الأبيض والبرتقالى للحوائط والمعالق الخشب المتعلقة على الشباك وكمان الصورة المكتوب فيها "Peanut Butter is my boyfriend" والصبورة المكتوب عليها المنيو يتميزوا بالبساطة والشياكة في نفس الوقت. بساطة المكان مش ظاهرة في الديكورات وبس، الحلويات عندهم كمان مالهاش حل. أول حاجة هتلاحظها في حلويات ذا فور فات ليديز المتنوعة بين كيكات ومافينز وفطائر وتشيز كيك أنك بتاكل حاجة بيتي نظيفة ومختلفة عن باقي المخابز، وكمان المفاجئة أنهم رجعوا الماربل كيك والباندت كيك Bundt Cakes مرة ثانية. ربع ساعة كاملة وإحنا واقفين قصاد ثلاجة العرض زي الأطفال التايهين؛ تخيلوا! في الأخر قررنا نبدأ بسلايس فادج شوكولاتة بزبدة الفول السوداني (19.50جنيه) مع قطعة كاروت كيك (١٦ جنيه) وسولتد كراميل براوني بايت Salted Caramel Brownie bite (4.50 جنيه) وسمورز براوني بايتس S'mores Brownie Bites(4.50 جنيه). المختلف في الفادج كيك عن الموجود في السوق أنها رطبة وطرية جدًا، وكل قضمة منها بتدوب بسهولة وكمان فروستينج زبدة الفول السوداني كان مسكر ولذيذ. نروح على الكاروت كيك المعمولة زي ترايفل في طبق بلاستيك غويط وواضح فيها نكهة القرفة، وصحيح سكر الكيك نفسه كان قليل، لكن الكريمة صاحبة القوام الرائع كانت مسكرة بزيادة. مافيش شك أن كل حاجة في الكاروت كيك لوحدها كان فيها مشكلة، لكن الكيك مع الفروستينج خدموا بعض وعملوا لنا كاروت كيك هايلة. بصراحة كنا قاصدين نسيب البراوني بايتس التحفة للأخر علشان تكون مسك الختام. قطعتين فادج براوني مليانين كراميل، وتقدر تقول عليهم ساندويتشات براوني طرية محشية كراميل وواضح فيها طعم الشوكولاتة القوي اللي عمل شغل عالي مع الكراميل. أما السمورز براوني فكانت هايلة بس طعمها أقرب للكوكي منه للبراوني. علشان نلخص تجربتنا في ذا فور فات ليديز ممكن نقول أنها كانت هايلة، ومافيش شك أنهم كسبوا ملحمة حلويات شارع البرازيل بكل جدارة خصوصًا أنهم بيقدموا الحلويات المعروفة بلمستهم الخاصة، وكل ده وسط أجواء مريحة وموظفين هايلين. نقدر نقول كمان إننا ماقابلناش مشاكل يومها ويسعدنا إننا نقدم لكم الفائز في ملحمة حلويات شارع البرازيل. الأجواء هناك هايلة ومريحة والموظفين ممتازين، لكن سر نجاح ذا فور فات ليديز هو الحلويات اللي كلنا بنحبها ومن غير افتكاسات ملهاش لزوم.

...

دليلك لأهم أماكن الحلويات في التجمع الخامس
اصدرت في: 28/08/2016

زي ما كل واحد فينا ليه "النُص الحلو" بتاعه، بطنك كمان من حقها يكون ليها نص حلو! وعلشان تدلّعها من غير تعب ونكسر لك قاعدة "مافيش حلاوة من غير نار"، إحنا هنقول لك على الأماكن اللي تقدر تحلّي فيها في التجمع الخامس، ومن أشهر الأماكن اللي ممكن تجيب منها تورتة، جاتوهات، أو حلويات بشكل عام هو: سدرا - Sedra سدرا من أنضف الأماكن اللي ممكن تاكل منها حلويات، ممكن يكون أغلى شوية لكن الأكيد إن حاجته تجنن، حتى لو فكرت ماتحلّيش وتقضيها حوادق، هتلاقي عندهم تورتات من فصيلة الحوادق زي تورتة السيمون فيميه، وتورتة السي فود . وده هتلاقيه في 313- ش التسعين الجنوبي – أمام سيراميكا كيليوباترا . ساليه سوكريه - SaléSucré ساليه سوكريه تقدر تجيب منه تقريباُ نفس الحاجات اللي هتلاقيها في سدرا، لكن نقدر نقول أنه أقل منه درجة، يعني سدرا حاجته أجمل واختياراتك فيه هتكون أوسع، وحلوياته مهما تِقلِت هتفضل خفيفة على قلبك. بس نقدر نقول لك بقلب جامد تجرب البروفيترول وكمان البسبوسة من ساليه سوكريه. تروحله إزاي بقى؟ العنوان مايتوّهش، ببساطة لأن الفرع بتاعه في كايروفيستيفال سيتي مول اللي في تقاطع الدائري مع شارع التسعين. كوبلر ميلت - Copper melt كوبر ميلت ده بقى حكاية، كان نفسنا نقول لك أنه ليه منيو نقدر نعرضه عليك ونغريك، بس الحقيقة عين الإغراء أنك تزور المكان ده بنفسك وتشوف رُقي الديكور وطريقة توزيع أماكن الستاندات اللي معروض فيها الحلو والحادق، ولطافة الناس اللي بيشتغلوا. وأنت بتنقي هتحتار شوية وتفضل تلف بين كل ستاندات العرض ولا كأنك بتدوّر على بوكيمون! بس اللطيف أنك هتلاقي من على الباب حد بيستقبلك وبيلف معاك في المكان بكل أريحية لحد ما تستقر على حاجة. من ألطف الحاجات اللي مشهور بيها المكان هي "الكيك بايتس"، هتلاقيها في ستاند مليان كوَر كتيرمعمولة بالتشوكليت والألوان المبهجة، وكمان بيعملوا مهلبية ورز بلبن في أطباق فخار شكلها هيخليك تاكل غصب عنك . والمكان ده موجود في 279 -ش التسعين - عمارة المعمار – جنب سيراميكا كليوباترا . في مكانين تانيين هيكونوا قريبين منك لو أنت ساكن ناحية المحكمة وهم: توماس - Thomas وتورتينا - Tortina توماس عمل اسم كويس في التلات سنين الأخيرة، بس لو عاوز المفيد، فأكتر حاجة ننصحك تاكلها من هناك هي الكيك بأنواعه، هايل! ومكانه في المجمع الطبي الي قصاد مجمع المحاكم. أما تورتينا فأحسن حاجة هو متخصص فيها التارتات، والفرع بتاعه هتلاقيه في سوبر ماركت مترو - 7 ستارز. ولو أنت من عشاق الإكلير، فمافيش غير مكان واحد هيحتويك في الموقف ده: L'Éclair Paris المكان ده طبعًا واضح من اسمه أنه متخصص في الإكلير بس، حلو وحادق وكل اللي يخطر على بالك، بس مشكلته الوحيدة لو طبيت عليهم من غير معاد ممكن ماتلاقيش كل اللي في المنيو موجود في التلاجة، وده تقريبًا لأن فرع التجمع صغير شوية، فأحسن لك تروح بدري، هم بيشتغلوا من 9 صباحًا لحد 1 صباحًا. وده موجود في داون تاون مول - شارع التسعين . أما لو أنت من الناس اللي بيعيطوا أول ما يشوفوا فيديوهات الحلو اللي بيفرقع شوكولاتة من كل حتة، يبقى مالكش غير Dip and Dip. حلو كدا وبيحتوي البني آدم، بس حاول تروحه في أيام وسط الأسبوع أو الصبح بدري تجنبًا للزحمة. وده مكانه في كايرو فيستيفال سيتي مول، منطقة مطاعم النافورة. نوعدك تطلع منه منشكح ووشك وهدومك آكلين معاك شوكولاتة!

...

شاهد المزيد
مواضيع خاصة

اعرف التسعيرة الجديدة لأوبر وكريم والتاكسي

طبعا كلنا عارفين إن الزيادة في أسعار البنزين والسولار أدت لارتفاع أسعار كل المواصلات. ومنها التاكسي وخدمات "أوبر" و"كريم". وبحسب خبر نشره موقع "المصري اليوم" فإن محاف