ألبان وآيس كريم كافيهات in Cairo, Egypt

كافيهات

جيلاتو ميو: آيس كريم لذيذ على وضعه
اصدرت في: 20/09/2016

أسوأ حاجة فاكرين آيس كريم الزمن الجميل لما كان بيتعمل بسكوتة أو صنداي مع شوية صوص شوكولاتة على الوش؟ يا سلام على الأيام الجميلة، بس للأسف الشكل التقليدي للآيس كريم اتنسى وكل شوية يطلع لنا موضة جديدة – يعني مثلًا شوفنا آيس كريم النيتروجين السائل والآيس كريم رولز. الأنواع دي انتشرت جدًا في القاهرة ولها جمهور عريض، بس في أماكن حافظت على الشكل التقليدي للآيس كريم ومنهم "جيلاتو ميو-Gelato Mio". بعد ما جيلاتو ميو كسب في جوائز اختيارات محرري كايرو360 عن أفضل أماكن الآيس كريم ومنتجات الألبان، قررنا نزورالمحل الصغير الموجود في شارع البرازيل في الزمالك مرة ثانية. نوصف جيلاتو ميو للي ما يعرفوش ونقول له أنه محل صغير ديكوراته بسيطة باللون الأبيض زي قوالب طوب باللون الأبيض، والبساطة دي ركزت الانتباه على ثلاجة عرض الجيلاتو. طلبنا بسكوتة صغيرة (13 جنيه) عليها جيلاتو بطيخ وبولة ثانية موز على جوافة. طلبنا كمان بولتين في كأس واحدة كانوا واحدة كراميل والثانية شوكولاتة ليندت (13 جنيه/للبولة). الجيلاتو بطيخ كان فوق بسكوتة وافل مقرمشة وطازة، وطعم الجيلاتو نفسه كان خفيف ومنعش، بس كان نفسنا يكون طعم البطيخ أقوى من كده. أما الموز على جوافة فطعم الجوافة كان خرافي والموز طبعًا هايل بطعمه المسكر اللذيذ –ويستحق يكون نكهة آيس كريم لوحده – والأثنين عملوا كوكتيل فاكهة رائع. إحنا أسفين يا فراولة، بس الموز خلاص عمل دويتو مع الجوافة. نفس الجمال كان مع الجيلاتو بالشوكولاتة الليندت، ويمكن الشوكولاتة الداكنة مش هتعجبك لو كنت من عشاق الشوكولاتة البيضاء، بس الأكيد إن طعمها كان روعة مع الجيلاتو كراميل اللي طعمه قريب جدًا من طعم الكريم كراميل، والمميز في بولة الكراميل إنها اضافت طعم مسكر مش موجود مع الليندت. نكهات الجيلاتو اللي جربناها بشكل عام كانت هايلة وقوامها ممتاز وطعمها قوي، وهنا بنعرف نقطة قوة جيلاتو ميو وهي المحافظة على الجودة. جيلاتو ميو فتح من ثلاث سنين ولسه محافظ على وضعه.

...

سدرة: رحلة نجاح من الحلويات للأكل الفرنسي
اصدرت في: 01/09/2016

يمكن من التحديات الصعبة اللي ممكن حد ناجح ياخدها أنه بعد ما يعمل لنفسه مكانة ولقب في مجاله، يبتدي يخوض تجربة جديدة تبدأ من الصفر تحتمل النجاح أو الفشل. إدارة سدرة محل الحلويات المشهور والعلامة في مجال صناعة الحلويات في مصر قرروا إنهم يخوضوا تجربة إنهم يفتحوا مطعم بيقدم أكل فرنساوي بنفس اسم محل الحلويات "سدرة"، وده الشيء اللي جعل التجربة عندهم كانت تحتمل النجاح أو النجاح، بس.. مافيش مجال للسقوط أو الخلل. سدرة فتح فرع في التجمع الخامس. وفي إشارة لطيفة منه إن المكان دورين الدور الأول خاص بالحلويات فقط والدور اللي فوق مطعم وكأنهم عايزين يقولوا إن نجاح المطعم يبدأ من آخر خطوة وصلنا لها في سدرة باتسيري مافيش مجال غير للصعود الرجوع أو حتى الوقوف غير مقبول. روحنا المطعم وأول ما قعدنا جالنا الـ welcome drink (غير داخل في الحساب) عُبارة عن عصير ليمون بالنعناع كان منعش جدًا الحقيقة خصوصًا إن الجو كان حر شهر 7 بقى وكده. ثم نزل لنا المنيو، المنيو الحقيقة منوّع بشكل كبير لكن في سياق الأكل الأوروبي برضه. من مميزات المنيو كمان أنه واضح، مشروح فيه تفاصيل كل طبق، بالإضافة لأن موجود قسم عربي وقسم إنجليزي. بدأنا باختيار الشوربة فاخترانا شوربة الدجاج بالمشروم (38 جنيه) ودي أول حاجة نزلت على الترابيزة بعد مرور تلت ساعة من الأوردر، كانت شوربة كريمة جميلة وفاتح شهية محترم؛ شوربة ذات قوام مضبوط جدًا لا هي خفيفة أو تقيلة بل معمولة زي ما بيقول الكتاب. بعد كده بدأنا نفكر في السلطات فاختارنا سلطة السيزر (38 جنيه) ودي تستحق تنافس على لقب أحلى سيزر سالد بتتقدم في مصر من حيث صوص السيزر المضبوط جدًا في عمايله فهو مش مجرد مايونيز زي ما بنشوف في كتير من المحلات، للخس الفريش، وصدور الفراخ المشوية الطرية جدًا. نزلت السلاطة بالتزامن مع طبق عيش بالروز ماري وزيت الزيتون لسه خارج من الفرن . ثم دخلنا في التقيل الـ main course كان طبق اسمه بولو ألا شيف (85 جنيه) وهو عبارة عن قطعتين من صدور الفراخ المخلية محشية بالجبنة الموتزيرلا والكريمة السايحة والمشروم المتقطع، الفراخ كانت مستوية جدًا والتتبيلة بتاعتها كانت محترمة جدًا جدًا. وجنبها side dish طلبناه مكرونة بالصوص الأبيض والحقيقة كان طبق المكرونة أكبر بكتير من أنه يكون مجرد سايد ديش بسبب تُقل الصوص وحجم الطبق الكبير. الحقيقة الطلب اتأخر شوية، نزل في خلال 40 دقيقة من وقت ما طلبنا الأوردر. بس ماحسناش قوي بالموضوع ده لأن الترابيزة مليانة فواتح شهية وعصير ليمون وسلطات بالإضافة لأن الطبق لما نزل كان جميل أوي شكلًا وموضوعًا وكان مُشبِع جدًا الحقيقة. وفي مننا اللي طلب لازنيا (60 جنيه) حجم الطبق يخدعك يبان صغير أول ما تشوفه بس في الغالب هتحس أنه كفاية قوي كده لما تخلصه، واللي طلب بيتزا مارجريتا (48 جنيه) معمولة على طريقة المطبخ الإيطالي تمام من حيث العجينة الرفيعة وطرية جدًا وكمان الجبنة كانت بتغلي عليها وهي نازلة وحجمها ياكله فردين مثلًا وطلب ميكس سي فود (140 جنيه) وده طبق سي فود مشكل جمبري وكاليماري وسمك مشوي جنبة رز وخضار سوتيه وهو ممكن يُصنف كطلب يجنن عشاق المأكولات البحرية. كانت ترابيزة ثرية الحقيقة وعليها أنواع كتير مختلفة جميلة. فكرنا في أنه مش هينفع نكون في سدرة ونمشي من غير ما ناكل حلو، أخدنا خطوة، سألنا الـ waiter ونزل لنا منيو الحلويات. الحقيقة كنت حاطة عيني على حاجة مُعينة من الجاتوه مش موجودة في المنيو فقلت للراجل عليها وهو بالفعل جاب لي قطعة جاتوه سدرة (10 جنيه) في طبق من تحت، هذه القطعة اللي انفرد بها المكان ده في تقديمها وتنافس هي كمان على لقب أحلى قطعة جاتوه في مصر. جه وقت نحبس اللي حصل ده كله بكوباية شاي (10 جنيه) في فنجان فخم جدًا يناسب المكان الشيك اللي قاعدين فيه. الحقيقة تجربة سدرة لازم تتعاش، بكل جوانبها الحلو والحادق والمشروبات، ويفضل تكون في خروجة مخصصة ليها، الوقت هناك ماكنش ضايع، استمتعنا جدًا بقضائه في محل ناجح بأي صورة من الصور زي سدرة.

...

لا بوار كافيه: قعدة لطيفة في مول العرب
اصدرت في: 16/08/2016

قليلة جدًا الأماكن اللي بنلاقيها متواجدة على ساحة المطاعم والكافيهات من زمان؛ أغلب الأماكن بتبقى فتحت مؤخرًا أو أخرها نص التسعينات –ده لو عمرت. من ضمن الأماكن اللي بقالها زمن موجودة ومر عليها أجيال هو محل الحلويات لا بوار. المحل بدأ رحلته سنة 1974، وانتشر في أنحاء القاهرة ومصر وهو حاليًا من أشهر الأسماء الموجودة على الساحة في عالم الحلويات والمخبوزات. من فترة مش بعيدة، بدأ لا بوار ينتشر في نوادي كثيرة تحت عنوان لا بوار كافيه علشان يقدم بجانب منتجاته المعتادة أطباق مخلتفة ومشروبات متنوعة، وبعدها انتشر في القاهرة واسكندرية بمفهومه الجديد. وبما أن لا بوار كافيه – La Poire Cafe فتح أجدد فروعه في مول العرب في أكتوبر، قررنا أننا نروح نشوف إيه الكلام. زي معظم الكافيهات الموجودة في المنطقة الداخلية من المول، لا بوار واخد مساحة كبيرة مفتوحة من الجانبين؛ يعني تقدر تقول أنه واخد ركن كبير فيه كاونتر كبير معروض فيه مختلف المنتجات اللي لا بوار بيقدمها من حلويات شرقية وغربية وساندويتشات وعصائر. أما بقية المساحة، فهي مخصصة لترابيزات وكراسي شكلها لطيف من الخشب. عجبنا في المكان أن ألوانه فاتحة، وهي مكونة من الأبيض وألوان اللوجو مع مجموعة من ألوان الباستيل الهادية. إجمالًأ، الديكور مريح للنظر وهادي. بما أننا كنا في وقت الفطار؛ طلبنا من المخبوزات كرواسون بالجبنة الإمنتال (28 جنيه)، وساندويتش روست بيف (44 جنيه)، ومعاهم واحد كابتشينو (25 جنيه)، وواحد لاتيه بالقرفة والعسل (24 جنيه). الكرواسون في المجمل كان فريش وكمية الجبنة فيه كانت وفيرة، إلا أن الخس الموجود فيه مش طازة بالمرة لدرجة أننا قررنا نخرجه من الكرواسون عشان ما يبوظش التجربة. أما الروست بيف –اللي كان مقدم في عيش بني بالحبوب- فكانت كمية الروست بيف فيه ممتازة، والجبنة الموجودة في الساندويتش كانت هايلة، ولكن تمنينا أن يكون في الساندويتش أي صوص يحرك المسائل، ولكن في المجمل كان شهي. أما بالنسبة للكابتشينو، فالقهوة كانت قوية ولكن في نفس الوقت طعمها متوازن مع كمية اللبن وبالتالي نقدر نقول أننا ممكن نعتمد على قهوة لابوار من هنا ورايح. ولكل لو بتحب المشروبات المسكرة، تقدر تختار اللاتيه بالقرفة والعسل وأنت مطمئن؛ والمشروب ببساطة يعتبر حلو في حد ذاته وخصوصًا أن كمية العسل محترمة ولكن حرارة القرفة بتوازنها –أما لو أنت ما لكش في المشروبات المسكرة، ما ننصحكش لأن طبيعي جدًا يكون المشروب مسكر بوجود العسل. وبما أننا في لا بوار، كان لازم نختار من منيو الحلويات اللي إحنا عادة بنضعف قدامها؛ فقررنا أننا نطلب من الحلويات French Toast – توست معمول بالطريقة الفرنسية (48 جنيه) وبروفيترول (14 جنيه). الأول عادة بيبقى عبارة عن قطع توست مغموسة في البيض واللبن والفانيليا والقرفة، بعدها بيتحمص في زبدة على النار، ولابوار بيقدمه محشي بقطع الموز. بجانب طعمه المميز والمضبوط سواء من حيث التسوية، الطعم أو تجانس المكونات، عجبنا الطريقة اللي متقدم بها الطبق، بحبات اللوز المكسر اللي كانت مرشوشة على جوانب التوست المقطع لثلاث قطع، ونعتقد أن اللوز أضاف قرمشة حلوة لطبق ميزته الأساسية أنه طري. أما البروفيترول، فبنعتبره من كلاسيكيات لا بوار اللي متعودين عليها. وللي ما يعرفش ماهية البروفيترول هو عبارة عن عجينة اسمها عجينة الشو –اللي هي بتاعت الإكلير- ومحشية كريمة وغرقانة صوص شوكولاتة. بالرغم من أن الحلو الأولاني كان تقديمه أكثر من رائع، إلا أن الطبق ده كان على العكس تمامًا كان بولة مش باين فيها غير بركة شوكولاتة وقطع الشو مختفية تحتها، لحسن الحظ طعم البروفيترول كان أكثر من رائع –صحيح هما كانوا ثلاثة بالعدد إلا أن حجم العجينة كان كويس وكمية الشوكولاتة كانت أكثر من كافية. في النهاية، نقدر نعتبر التجربة في مجملها لطيفة، سواء من ناحية جودة الأكل –مع ملاحظاتنا البسيطة- والمشروبات ونفس الكلام مع الخدمة. تقدروا تعدوا عليه وسط جولة التسوق في المول ومش هتندموا.

...

سكوبس: الآيس كريم في أجمل صوره في أبراج نايل سيتي
اصدرت في: 15/08/2016

حاولنا نلاقي افتتاحية مناسبة للمقال، لاقينا أن أي كلام هنقوله عن الآيس الكريم مكرر وكليشيه؛ لأننا هنتكلم عن قد إيه الآيس كريم منعش ولذيذ –وخصوصًا في حر أغسطس- وأنه حلو خفيف مناسب لأي وقت في اليوم... كل الكلام ده قلناه قبل كده فهندخل في الموضوع على طول. قررنا نعمل زيارة لواحد من أشهر الأماكن اللي بتقدم آيس كريم وهو سكوبس – Scoops، واللي موجود في أبراج نايل سيتي. وبالرغم من أن نايل سيتي مول فيه مجموعة كبيرة من المحلات المميزة، إلا أن عامل الجذب الأساسي للمكان هو السينما. كنا بنفكر أن موقع المحل ممكن يكون ظلمه كثير، إلا أن وجوده ممكن يعمل خروجة ممتازة مكونة من سينما وآيس كريم. المحل عبارة عن ركن مفتوح فيه حوالي ترابيزتين مرتفعتين ممكن تستمتع عليهم بالآيس كريم، أما بقية المكان فهو عبارة عن كاونتر فيه ثلاجة آيس كريم فيها أنواع ونكهات كثيرة، ومجموعة من الإضافات اللي ممكن تحطها على الزبادي المثلج. الآيس كريم أحجامه وأسعاره كالآتي، البولة الواحدة (16 جنيه)، الاثنين (30 جنيه) والثلاثة (40 جنيه). أما الزبادي المثلج فالعادي أسعاره من الأصغر للأكبر كالآتي 18 – 28 – 40 جنيه، ولو بنكهة 20 – 30 – 46 جنيه. أما الإضافات فالواحدة بـ 5 جنيه. سكوبس كمان عنده جيلاتو ستيكس وهي عبارة عن بولة آيس كريم بنكهات مميزة على عصاية (20 جنيه للواحدة)؛ من ضمن نكهاته شوكولاتة بالبندق وشوكولاتة دوبل بالفستق. من مجموعة الآيس كريم اختارنا الآتي، بولة بنكهة الليمون بالنعناع، والثانية بالقهوة والثالثة تيراميسو. بالرغم من أننا من عشاق نكهة الليمون، إلا أننا كنا متشككين من طعم النعناع، واعتبرنا نفسنا بنجازف لما اخترناه. ولكن نعترف أنها كانت مجازفة في محلها، وخصوصًا أن ما فيش نكهة طاغية على الثانية، والاثنين مع بعض كانوا أكثر نكهة منعشة ذقناها في حياتنا. وبما أننا بنقدر أي منتج بطعم القهوة، نقدر نقول أن نكهة القهوة في سكوبس لا يعلى عليها؛ لأن بعكس الأماكن الثانية اللي نكهة القهوة عنده بتبقى نكهة نسكافيه، أما نكهة سكوبس فأول المعلقة بتحس بطعم حلو بعدين تتخبط بنكهة القهوة القوية، ده غير حبات القهوة المحمصة اللي هتلاقيها كل شوية اللي أضافت قرمشة لنعومة قوام الآيس كريم. أول ما هتدوق التيراميسو هتحس أن طعم القهوة مش واضح قوي وأن طعم بقية مكونات التيراميسو هو الطاغي؛ إلا أن مع أول قطعة كيك ظهرت لنا حسينا بطعم القهوة واكتمل طعم التيراميسو بالنسبة لنا. أما الزبادي المثلج، فاخترنا الحجم الأصغر وأضافنا عليه جرانولا وقطع بسكويت الآيس كريم مكسرة. بالرغم من أن قطع الجرانولا كانت كبيرة فخلصت بسرعة وتمنينا أنها تكون مفتتة أكثر علشان نوزعها على الزبادي بأكبر شكل ممكن، الآيس كريم المكسر نكهته ما كنتش قوية زي ما توقعنا ولكن ساعد على أن يكون فيه قرمشة جانب قطع الجرانولا. ما فضلش غير أننا نقول أن طعم الزبادي كان رائع، مضبوط ما بين الطعم الحلو والطعم اللاذع المعتاد للزبادي. غير كده كمان سكوبس عنده زبادي مثلج بنكهة زبدة فول السوداني، وعجبتنا لما ذقناها، إلا أننا خوفنا طعمها القوي يغطي على طعم الإضافات اللي هنطلبها. إجمالًا، نعتقد أن سكوبس من الأماكن اللي قدرت تحافظ على مستواها بمرور الوقت، فسواء القوام أو قوة النكهة وحتى الكمية مقابل سعر معقول... سكوبس قدر أنه يحقق الثلاثة دول بامتياز ويستحق الزيارة.

...

آد & رول: حمى الآيس كريم رولز وصلت الزمالك
اصدرت في: 01/08/2016

نعتقد أن الآيس كريم ارتبط في ذهننا ببسكويتة وعليها بولة، ولكن من فترة ظهرت محلات بتقدم الآيس كريم بشكل غير تقليدي، وبدل ما يكون بولات عادية بقى يتقدم على شكل رول. وبجانب شكله الغير تقليدي، طريقة صنعه هي كمان غير تقليدية بالمرة، وده اللي حبينا نشوفه بعنينا في محل آد & رول الموجود في الزمالك. المحل مش صعب توصل له بالرغم من أنه في الدور الأول في العمارة المقابلة لكافيه سوبريم؛ وده لأن المحل إضاءته قوية واللي تقدر تشوفها من خلال الواجهة الزجاجية في شارع إضائته أساسًا مش قوية. من غير تفكير كثير مشينا لبوابة العمارة الكبيرة، وطلعنا مجموعة سلالم ودخلنا شمال. وقت زيارتنا، المحل كان زحمة كأن كل الموجودين في الزمالك قرروا أنهم يأكلوا آيس كريم. الفكرة الأساسية في آد & رول أنك هتختار أساس للآيس كريم بتاعك من ضمن 3 نكهات (فانيللا – شوكولاتة – زبادي مثلج) أو نكهة المستكة واللي سعرها 5 جنيه. بعد ما هتختار الأساس، قدامك إضافات كثيرة ممكن تختار منها بتتفاوت في أسعارها؛ ما بين أنواع الشوكولاتة المختلفة (كيت كات، مارس، فريرو روشيه... إلخ)، فاكهة (واللي كان شكلها فريش ومشجع)، كيك، قهوة وبسكويت ومكسرات، ده غير أنواع مميزة جدًا مكونة من الحلويات الشرقية. وأقل سعر للإضافات هو 15 جنيه للفاكهة، أما الأغلي من نصيب المكسرات وهو 25 جنيه. اللطيف أن أول توبينج بيبقى ببلاش وأي إضافة تانية سعرها 5 جنيه. قررنا أننا نطلب الآتي: نكهة الفانيللا وعليها نوتيلا وصوص شوكولاتة (20 جنيه)، ونكهة الليمون بأساس زبادي مثلج (15 جنيه)، وعلشان ما نروحش وإيدينا فاضية أخذنا نكهة الكابتشينو بأساس شوكولاتة وصوص كراميل (20 جنيه) تيك أواي. بالرغم من أننا كنا متحمسين أننا نتفرج على الآيس كريم وهو بيتعمل، إلا أن الكاونتر اللي واقف عليه 3 أشخاص بيعملوا عليه الآيس كريم ما كانش مساعدنا لأنه أعلى من الصاج المثلج اللي بيتعمل عليه المنتج، فلازم تكون مقرب جدًا علشان تشوف العملية من أولها لآخرها. أول حاجة وصلت لنا كانت الليمون بالزبادي؛ الزبادي المثلج كريمي وطعمه غني، إلا أن نكهة الليمون ما كانتش بالقوة اللي كنا عايزنها –فننصحك لو بتحب الليمون اختاره مع أساس الفانيللا لأن نكهة الزبادي كانت قوية جدًا. أما النوتيللا بأساس الفانيللا كان أحلى حاجة ذقناها في التجربة بلا منازع؛ لأن كمية النوتيللا كانت كويسة ومناسب جدًا لأساس الفانيللا وصوص الشوكولاتة. الميزة في آد & رول أن كمية الآيس كريم أكثر من ممتازة، لدرجة أن في أول مرة في حياتنا ما نقدرش نكمل الكوب كله. بالنسبة لآخر حاجة طلبناها تيك أواي –وهي آيس كريم بنكهة الكابتشينو بأساس شوكولاتة وصوص الكراميل- حصل موقف غريب؛ فبعد ما خلاص اتعمل واتقفل بغطاء –هو مش غطاء مخصوص للعلبة، هو غطاء لكوبايات العصاير المفتوح من فوق- طلب اللي عمل الآيس كريم من واحد من العاملين أنه يكمل تجهيز الطلب كتيك أواي، فالعامل أخذ الآيس كريم ودخل المطبخ –قلنا أكيد هيغلفها ببلاستيك أو حاجة- بعدها 10 دقائق رجع لنا نفس الشخص –بعد ما اللي عمل الآيس كريم فكره- بالآيس كريم من غير أي تغليف، واكتفى أنه يديلنا معلقة ومنديل... طلبنا كيس... كان رده أن ما عندهمش، ولكن فيه حامل أكواب ما يخرجش إلا لأربع طلبات بس! طبعًا إحنا روحنا بالآيس كريم وهو في حالة مأسوية قللت من استمتاعنا به بس هو كان كالآتي؛ نكهة الشوكولاتة كانت الأقوى، وبيظهر طعم قوي للقهوة كل فترة، صوص الكارميل ما بدأش يظهر طعمه إلا في الآخر لما وصلنا لقاع الكوباية نتيجة للسيحان اللي حصل، وهو في مجمله طعمه حلو ولكن مناسب لشخص بيحب الشوكولاتة أكثر من القهوة. بغض النظر عن عدم استعدادهم لطلبات التيك أواي –مع أن المحل عنده دليفري- إلا أن آد & رول بيقدم في المجمل آيس كريم طعمه حلو –بالذات النكهات الأساسية لأن الإضافات ممكن تلاقيها في أي مكان- وكميته ممتازة هتعجب اللي بيحب الآيس كريم.

...

أداجيو: كافيه إيطالي لطيف في مول العرب
اصدرت في: 10/07/2016

بعد شهر رضمان والعيد كان مهم نكسر الروتين بقعدة مختلفة، علشان كدة قررنا نختار كافيه إيطالي اسمه أداجيو – Adagio، واللي موجود في مول العرب. ثلاجة الآيس كريم الموجودة عند مدخل الكافيه –واللي واخد ركن مفتوح من الجانبين أمام محل نيسبريسو – قدرت أنها تشدنا بمجموعة كبيرة من النكهات اللي ممكن ترضي كل الأذواق؛ لأن منها التقليدي ومنها نكهات ثانية مش هتلاقيها في أي مكان ثاني (هنقول لك عليها في نص المقال ما تقلقش) ده غير مجموعة الآيس كريم ستيك واسمهم أداجو ستيك (22 جنيه) واللي بنعتبرهم أسهل في الأكل خصوصًا وأنت بتلف في المول. قعدنا على الترابيزة الوحيدة اللي كانت فاضية، وعشان نبقى صريحين الترابيزات بالكراسي مصممين علشان تأخد قهوتك وتمشي؛ الترابيزات مدورة وكراسيها الجلد البيضاء واخدة curve الترابيزات فالقعدة مش قعدة تطول فيها. زي ما قلنا الكافيه كان مليان، والطلب على الآيس كريم الـ takeaway كان كبير فانتظرنا حوالي 10 دقائق لحد ما الجرسون آخذ طلباتنا. الآيس كريم عندهم أحجام؛ أصغرهم سعره (18 جنيه) لغاية أكبر حجم Maxi Cup (42 جنيه)، وفيه حجمين في النص Big Cup (36 جنيه) وأخيرًا الحجم الوسط اللي طلبناه (24 جنيه) واللي مكون من بولتين آيس كريم –اختارنا واحدة منهم بالقهوة والثانية بنكهة فطيرة المشمش- وضيفنا معاهم بسكويت بالشوكولاتة على شكل ودعة (10 جنيه). بلا مبالغة من أجمل المرات اللي دقنا فيها آيس كريم؛ قوامه متماسك وفي نفس الوقت كريمي ولذيذ. بولة القهوة كانت مثالية، ولكن بولة فطيرة المشمش نكهتها كانت شبه معدومة، أما البسكويت فكان فريش والشوكولاتة اللي موجودة على أطرافها طعمها لذيذ لوحدها، ومع بولة القهوة كان الموضوع ألذ وأطعم. مع الآيس كريم طلبنا سموذي بالتوت البري (29 جنيه)، مثلج، فريش وكميته كبيرة ولكن للأسف كان مسكر زيادة عن اللزوم –أي نعم الواحد محتاج حاجة مسكرة بس إحنا اختارنا التوت لأن بيبقى فيه مزازة بتميز طعمه. مع السموذي طلبنا كابتشينو وسط (22 جنيه)، واللي كان من ماركة Hausbrandt الإيطالية. لو أنتم بتحبوا القهوة؛ ننصحكم أنكم تجربوا الحجم الأكبر لأن القهوة عندهم رائعة ونسبة اللبن للقهوة مضبوطة بس الحجم كان حقيقي صغير كأنه فنجان إسبريسو بس طويل شوية. أداجو كمان عنده مجموعة من الوافلز اللي ممكن تختار منها، ده غير أنه بيعرض مجموعة من الحلويات –بالذات الشوكولاتة- المصنوعة في إيطالية، والمتوفر منها أنواع وأشكال مختلفة مغلفة في أكياس (وزنها كيلو) لماركات زي Vanini و Go DO. بالرغم من أن الكافيه بقاله كثير موجود، إلا أن أداجو من اكتشافتنا الجديدة في مول العرب، القهوة والآيس كريم نجحوا في الاختبار بامتياز، ولكن عيبهم الوحيد أن في الزحمة جودة الخدمة بتقل والتركيز بيبقى أكثر على طلبات الآيس كريم الـ Takeaway.

...

سلطانة: الكنافة مانجو معشوقة الجماهير دلوقتي بالآيس كريم
اصدرت في: 22/06/2016

رمضان ما يكملش إلا بالحلويات الشرقية، يعني كنافة مافيش مشكلة، بسبوسة ماشي، زلابية وبقلاوة يا ريت. علشان كده كل رمضان بنشوف ابتكارات من محلات الحلويات في القاهرة اللي بيخترعوا أفكار جديدة لحلويات رمضان اللي كلنا بنحبها، من الكنافة بالنوتيلا لغاية ما حشوها بالريد فيلفيت. أما محل الآيس كريم المعروف سلطانة فقرر يعمل فكرة مبتكرة وبسيطة للكنافة تستحق التجربة. سلطانة في شارع الكوربة يتميز بأجواء لطيفة وطبعًا بتستمتع بجمال ثلاجات الآيس كريم الكبيرة والفريزر الضخم المعروض فيه كيكات الآيس كريم مع أرفف الشوكولاتة المغرية. سلطانة عمل منيو لرمضان عبارة عن تشكيلة من كيكات كنافة بالآيس كريم، منها كنافة تشيز كيك (200 جنيه) وكنافة نوتيلا (240 جنيه) وكريم كراميل آيس كريم كيك (240 جنيه)، لكن اللي لفت انتباهنا فعلًا كان كيك الكنافة بالمانجو والآيس كريم (240 جنيه) بألوانها الجذابة وشكلها المغري. كيك الكنافة بالمانجو والآيس كريم من سلطانة عبارة عن طبقة آيس كريم مانجو تحت خالص، وفوقها طبقة ثانية من آيس كريم فانيليا مع قطع مانجو وحواليهم أصابع كنافة مقرمشة. طبعًا قوام وجودة الآيس كريم عند سلطانة لا يعلي عليهم، وكمان طبقة الآيس كريم فانيليا كانت ضعف حجم الآيس كريم مانجو فقدرت توازن الطعم، أما أصابع الكنافة فكانت روعة خصوصًا لما تغمسها في الآيس كريم وبعدهم قطع المانجو الجميلة. نقدر نقول أن الكيكة عمومًا كانت لذيذة وطعمها قريب من الكنافة بالمانجو العادية، لكن أبرد وأخف شوية. صحيح الموضوع شكله بسيط جدًا، لكن سلطانة فعلًا عمل كنافة مانجو ممتازة. هي عمومًا فكرة جديدة وذكية تحارب بها حر الصيف بعد صيام طويل. هو ده الكلام.

...

شيكس & بيكس: سموذيز وحلويات في السريع في أمريكانا بلازا الشيخ زايد
اصدرت في: 07/06/2016

نعتقد أننا كمصريين ما نقدرش نخرج برة البيت من غير ما نأكل. يمكن الموضوع تغير دلوقتي لأن فيه أماكن ترفيهية كثيرة فتحت في القاهرة تساعدك على أنك تستمتع بوقتك بحاجة ثانية غير الأكل؛ وبالتالي الخروجة ما بقاش الهدف الأساسي منها الأكل زي الأول. ولكن ده ما يمنعش أن لسه فيه جزء من الخروجة ممكن تخطف فيه حاجة تتاكل في السريع. وهنا تيجي فايدة الأكشاك اللي بتبقى وسط المول أو جنب السينما؛ توفر عليك قعدة المطعم أو الكافيه، وفي نفس الوقت تقضي الغرض المطلوب منهم. شيكس & بيكس – Shakes & Bakes من ضمن الأكشاك اللي صادفناها في أمريكانا بلازا الشيخ زايد. زي ما هو واضح من اسمه، شيكس & بيكس بيقدم مجموعة من السموذيز والعصائر، بجانب عدد من الحلويات المعمولة في أكواب متوفرة في حجمين (كبير 24 جنيه – صغير 15 جنيه). اختارنا من المجموعة دي تشيز كيك بالفراولة، وكيك بالنوتيللا وزبدة الفول السوداني. اختارنا الحجم الأصغر واللي في نظرنا كافي جدًا لو نفسك في حاجة حلوة على الماشي. لو أنت بتحب التشيز كيك نعتقد أنك هتحبها هنا؛ طبقة الجبنة كريمي وطعمها متوازن ما بين الحلو والحادق –فلو أنت بتحبها مسكرة ننصحك أنك تحتفظ بطبقة المربى اللي على الوش لأطول فترة ممكنة علشان تسكر كل معلقة بتاخدها. كان نفسنا طبقة البسكويت تكون أسمك من كده علشان نقدر نوصلها في كل معلقة. كيك النوتيللا بزبدة الفول السوداني كانت عظيمة؛ مكونة من الآتي: طبقتين من كيك الشوكولاتة وسطهم طبقة زبدة فول السوداني وفوق كل ده طبقة نوتيللا عليها قطع بندق. عجبنا فيها أن بالرغم من كل المكونات اللي مليانا سكر دي الحلو ككل كان طعمه مضبوط، وبالرغم من أن الطبقات اللي داخل فيها شوكولاتة كثيرة، إلا أن طعم زبدة الفول السوداني كان واضح ومتجانس مع بقية المكونات. من مجموعة السموذيز اختارنا واحد بطعم البطيخ، والثاني بالخوخ (سعر الواحد 20 جنيه). ومن مجموعة الـ Shakes اختارنا فرابتشينو (25 جنيه). أحلى حاجة أنك بتشوف المكونات وهي خارجة من الثلاجة وداخلة الخلاط، فلو أنت من الناس اللي بتحرص على المكونات الفريش هتنبسط. بالرغم من أن طعم السموذي –سواء البطيخ أو الخوخ- كان منعش وفريش، إلا أن نسبة السكر فيهم كانت قليلة. يعني لو أنت بتحب الحاجة مسكرة قوي ممكن تضطر تضيف سكر. نعترف أن مكونات فرابتشينو شيكس & بيكس قلقتنا من الطعم النهائي للمشروب –من ضمن المكونات نسكافيه جولد وكريمة حلو- إلا أننا انبهرنا بالنتيجة، صحيح لاحظنا في أول شفطة دسامة الكريمة، لكن ده ما يمنعش أن المشروب نسب مكوناته مضبوطة وطعم النسكافيه خلاه يختلف –بشكل حلو- عن طعم أي فرابتشينو هتذوقه في محلات القهوة العادية. نقدر نقول أن شيكس & بيكس مناسب جدًا لو هفتك نفسك على حاجة حلوة في السريع أو مشروب منعش يظبط لك الدنيا وأنت داخل أو خارج من السينما.

...

آيس كريم أند فريندز: آيس كريم فكرته مبتكرة لكن محتاج تعديلات كثير
اصدرت في: 17/04/2016

تطور الآيس كريم على مر العصور شيء يستحق التأمل، من أول ما كان اسمه جيلاتي على عربية بعجل لحد ظهور كيمو كونو ونسلة ومحلات الآيس كريم المشهورة، وفي السنين الآخيرة أشتدت المنافسة وسط أنواع الآيس كريم وأحجامه وطعمه، فبقينا نشوف آيس كريم الزبادي وآيس كريم منزوع الدسم وآيس كريم لبان وتوت وشوكولاتة بالنعناع وبالتشيز كيك وأنواع الفاكهة اللي مالهاش حصر. كل مكان بيحاول بكل قوته أنه يبني سمعة جيدة عند زبائنه، لحد ما ظهر الآيس كريم رول اللي شقلب الموازين، واللي بقى بيتحط فيه كل النكهات اللي بتحبها، وتتفرج عليه وهو بيتعمل وأنت واقف وإن كان برضه مش كل الناس بتعرف تعمله بالجودة المطلوبة وتعمل توازن بين طعم الآيس كريم نفسه والإضافات اللي عليه. بس إحنا النهارده بنتكلم بشكل خاص عن الجيلاتو واللي من الصعب تنافسه لو عرفت توصل للخلطة المضبوطة ما بين سعر مناسب وطعم مبهر وإضافات طازة، وطبعًا فريق متعاون. آيس كريم أند فريندز – eye scream and friends في شارع 9 في المعادي مكان سيلانترو القديم، عبارة عن بار للآيس كريم، وترابزتين أمامه. وهم طلعوا بفكرة مبتكرة خاصة بهم، هي أنهم يعملوا 3 علب كارتون، واحدة خاصة بالآيس كريم وواحدة للصوص وواحدة لأي إضافة ثانية، وسعر الآيس كريم للإضافتين 35 جنيه. ما بين أنواع الآيس كريم نفسه الكتير ونكهاته من فانيليا أو توت أو مانجو أو شوكولاتة أو زبادي واللي عاملين لكل نكهة منهم شخصية كارتونية خاصة، اختارنا نكهة الفانيليا مع الكراميل والكوكيز. وإحنا بناخد العلب اتخضينا لما لاقيناها متربة جدًا، ولما قولنا للعاملين في المكان كل اللي عملوه أنهم خدوا العلبة دي وادونا واحدة جنبها متربة برضه، وده شيئ سيئ جدًا بالنسبة لنا، المهم بعد ما خدنا طبقنا واللي كان فيه كمية آيس كريم كبيرة بالنسبة لنا، عجبنا جدًا أن الكوكيز كانت طازة وصوص الكراميل كمان، لكن للأسف طعم الآيس كريم نفسه كان بلا نكهة تقريبًا، والثلج كان طاغي على الطعم، لدرجة أننا ما قدرناش نكمله، حقيقي زعلنا أن فكرة جديدة كده، أهم حاجة فيها تكون مش مضبوطة وهي تركيبة الآيس كريم نفسه، ونتمنى أنهم يضبطوها، ويزودوا اختيارات تانية للناس وأحجام مختلفة ما بين بسكويت وعلب صغيرة، لأن مش كل الناس هتقبل أنها تدفع 35 جنيه في كوباية آيس كريم، فما بالكم أن طعمه مش مضبوط. كان نفسنا تجربتنا تكون أفضل من كده،لأننا بنحب نشجع الأفكار الجديدة، ونتمنى أنهم ياخدوا بالهم من ملاحظاتنا.

...

قهوة وردة: كافيه لطيف في المهندسين
اصدرت في: 11/04/2016

بقالنا زمن ما روحناش كافيه في المهندسين، عادة بنتجه للزمالك أو مصر الجديدة لأن كانت جاءت فترة كافيهات المهندسين بقت عجيبة الشكل والمضمون، ده غير أنك علشان توصل لها في الزحمة وتركن في شوارع المهندسين الضيقة حكاية لوحدها. لاحظنا أن فيه اتجاه للكافيهات أنها تأخذ الطابع الشرقي العتيق بشكل عام، بعد ما كان الاتجاه ده مقتصر على المطاعم اللي بتقدم أكل لبناني ومصري. عادة الكافيهات دي ممكن تلاقيها في مولات كبيرة زي سيتي ستارز ومول العرب، ولكن المرة دي صادفنا كافيه من النوعية دي في شارع جامعة الدول العربية ، وهو كافيه وردة – Warda اللي على ناصية امتداد شارع جزيرة العرب. نعترف أن ديكوراته الخارجية هي أول حاجة لفتت نظرنا للمكان؛ اللون الأزرق والشبابيك اللي عليها مجموعة قصاري الزرع مع الإضاءة الداخلية للمكان اللي ديكوراته مستوحاة من الطراز الـ Vintage الشرقي. أول ما دخلنا استقبلنا الجارسون اللطيف اللي الابتسامة والمجاملات ما توقفوش من لحظة دخولنا. المكان من الداخل أثاثه خشبي فاتح، والحوائط الحجرية اللي عليها صور إعلانات قديمة وصور فنانين من الزمن الجميل. بالرغم من أن الديكور بالنسبة لنا مستهلك، إلا أن الضيافة وروح المكان أضفت جمال على المكان. بعد ما ألقينا نظرة على المنيو، من العصائر الباردة كوكتيل وردة (24.95 جنيه) وبينا كولادا (24.95 جنيه). ومعاهم شيشة فاخر بنكهة التوت الأزرق (29.95 جنيه + 5.95 جنيه لاي). ما كانتش الدنيا لسة زحمة وبالتالي الموضوع ما أخذش وقت وحالًا كل حاجة طلبناها كانت على الترابيزة. البينا كولادا (عصير أناناس ولبن جوز الهند وآيس كريم) كان أضبط بينا كولادا ذقناها في حياتنا؛ نسبة السكر لـطعم الأنانس القوي كانت ممتازة، وكذلك نسبة لبن جوز الهند لـ عصير الأناناس مثالية. بالرغم من أن الآيس كريم مكتوب من ضمن مكونات الكوكتيل في المنيو، إلا أننا ما حسيناش بطعمه نهائيًا وما نعتقدش أنهم ضافوه من الأساس، خصوصًا أن الكوكتيل كان قوامه خفيف. كوكتيل وردة (عصير فراولة وأناناس، لبن جوز الهند وآيس كريم) قوامه كان أثقل بكثير وكان واضح أن فيه آيس كريم فانيليا، واللي طعمه كان بيظهر في آخر كل رشفة بعد طعم المكونات الأخرى اللي نسبها كانت مضبوطة لدرجة أنك ما تعرفش تحدد أنت بتشرب إيه بالضبط بس الطعم ككل حلو. المشروبات بتيجي في برطمانات صغيرة شكلها حلو بس حجمها كان محتاج يبقى أكبر. الشيشة وخدمتها في المكان كانت هي كمان ممتازة؛ بما أننا مش من هواة الشيش الثقيلة، طلبنا من المسؤول عن الشيشة أنه يخففها على قد ما يقدر، وحصل فعلُا، وفضل طول القعدة مهتم بضبطها كل شوية، حتى بعد ما الدنيا ازدحمت وبدأ يقل اهتمام القائمين على الخدمة بينا نوعًا ما. ثاني جولة مع المشروبات اشتملت على قهوة فرنساوي دبل (18.95 جنيه) وواحد كابتشينو (18.95 جنيه)، ومن منيو الحلويات طلبنا طبق أرز بلبن (20.95 جنيه). الجولة الثانية ما حضرتش بنفس السرعة اللي حسينا بيها في الجولة الأولى، ولكن للمرة الثانية كانت المشروبات لذيذة. القهوة الفرنساوي (قهوة تركي + لبن) كانت ممتازة، إحنا طلبناها مضبوطة وقد كان. بلا مبالغة أول مرة نروح مكان تقدم بن نضيف ومحوج كمان. وأحلى حاجة أن نسبة القهوة كانت أكبر من نسبة اللبن فكان لونها غامق بس اللبن كاسر حدتها. الكابتشينو كمان كان لطيف؛ الرغوة متماسكة زي ما بنحبها بالضبط وكميتها مضبوطة. الأرز باللبن عادة بيجيء بمكسرات، ولكن زي ما طلبنا نزل لنا سادة. ما نقدرش نقول أنه كان أعظم حاجة في تاريخ الحلويات المصرية، إلا أنه عادي ما قدرناش نأخذ عليه أي مآخذ زي ما بيقولوا في الفصحة. إحنا شايفين أنه مكان ممتاز للقهوة والشيشة بعد يوم طويل في الشغل، أو سهرة حلوة مع الصحاب؛ لأنه بيجمع ما بين الجو، الطعم والخدمة الممتازين.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن