وسط البلد كافيهات in Cairo, Egypt

كافيهات

دي وافلز: وافلز لذيذة بأسعار معقولة في وسط البلد
اصدرت في: 27/04/2015

بعد ما فتحوا بحوالي شهرين في وسط البلد، قدر "دي وافلز - D Waffles" أنه يجذب الناس بحلوياته اللذيذة الخفيفة، المكان في الأساس صغير جدًا –عبارة عن كشك بشوية قعدات بسيطة، كراسي عالية وترابيزات عريضة متوصلة بالحائط– من وجهة نظر عاشق للحاجات المسكّرة، ظهور مكان زي ده في وسط البلد يعتبر من أحلى الأخبار اللي سمعناها في الفترة الأخيرة، المكان هنا بـ يقدم أخف وأسخن الوافلز مع اختيارات كثيرة من الإضافات اللذيذة وكمان الأسعار معقولة جدًا. الإضافات كلها معروضة وراء كاونتر زجاج من مارشميلو، صوصات بنكهات مختلفة، قطع شوكولاتة وبسكويت، لغاية مجموعة من الفواكة تشمل كيوي، فراولة وبلاك بيري. ما قدرناش نقاوم رائحة الوافلز الرائعة خلال وقت انتظارنا البسيط؛ الوافلز بـ تتسخن في ماكينة مخصوصة وممكن تشوفهم بـ يضبطوها باختيارك من الإضافات المختلفة. أغلى حاجة في المنيو وهي واحدة من الحاجات اللي طلبناها سعرها كان 25 جنيه، عبارة عن وافل كبيرة مدورة عليها أربع إضافات من اختيارك. بـ تتقدم على شكل أربع قطع زي البيتزا، قطعة منهم عليها صوص نوتيلا دافئة وشوكولاتة بيضاء؛ الثانية كانت متغطية بقطع فراولة وغرقانة في كمية أكبر من النوتيلا؛ أما الثالثة كانت كلها كومبوت بلوبيري والرابعة عليها قطع شوكولاتة بيضاء وصوص شوكولاتة بيضاء، نقدر نقول من غير شك أن دي كانت أحسن وافل نجربها من فترة. قررنا كمان نجرب وافل عادية عليها نوتيلا بس، واللي فيها حجمين: المخصوص سعره 15 جنيه والعادي سعره 13 جنيه. فوق كل ده، عندهم كمان عدد من المشروبات كلها بسعر واحد (15 جنيه) ومقسومين لحاجتين: ميلك شيك أو سموزي. منيو الميلك شيك عبارة عن أوريو، تويكس، مارس أو سنيكرز وعليه كريمة مخفوقة وقطع بسكويت/ شوكولاتة مكسرة، نروح على منيو السموزي، وفيها اختيارات كثير من الخوخ، فراولة، موز، مانجو أو كوكتيل، والأخير سعره أكثر شوية (18 جنيه). كل المشروبات هناك ثقيلة وتعتبر حلويات في حد ذاتها، خصوصًا الميلك شيك الثقيل والدسم مع الكريمة على الوجه اللي ممكن تأكلها بمعلقة. عمومًا، مافيش مشاكل كبيرة في دي وافلز، بـ يقدموا المكتوب في المنيو وده في حد ذاته إنجاز.

...

أمير تيفولي: أجمل عصائر وقهوة ممكن تشربهم في وسط البلد
اصدرت في: 11/02/2015

في عز التراب اللي إحنا فيه ده، ولما تبقى حاسس أنك حرفيًا بـ تمشي والهواء بـ يزقك، وممكن تطير في أي لحظة، غير أن أصحاب الحساسية بـ يستخبوا في الظروف الجوية دي، كل ده ما منعناش إطلاقًا أننا نخوض تجربة اكتشاف كافيه جديد في وسط البلد. في أول شارع محمد محمود وبرغم كل اللي بـ يحمله الشارع ده من ذكريات ومشاعر، الجرافيتي اللي على الحيطان واللي كل ما يتمسح يترسم من ثاني، والأحلام اللي اتولدت واتبخرت فيه، وبعد ما الجامعة الأمريكية قفلت فيه واتحول مكانها لمكان ثقافي (Greek Campus) اللي بـ يقدم كورسات ومبادرات خدمية وعلمية مميزة وحفلات، لقينا "أمير تيفولي – Amir's Tivoli " بعد مكتبة الجامعة الأمريكية على طول ولازق في Costa Coffe، لونه أسود ويحسسك أنه مكان غامض مستنيك تكتشفه. أول ما بـ تدخل بـ تلاقي الحوائط فعلًا سوداء بـ تفكرك بالصبورة بتاعة زمان في المدرسة، خاصة أنه مكتوب عليها بطباشير ملون، جمل دمها خفيف، وتعليق زبائن المكان وانطباعهم عنه.. المنيو مكتوب بنفس الطباشير الملون على الحائط فوق البار اللي موصول بالمطبخ ومكتوب عليه من فوق عيادة د. أمير، ومكون من مشروبات عادية عصائر وكل أنواع القهوة، وحاجات خفيفة تتاكل زي الـ Cheese cake والـ chocolate cake، ولما سألنا الدكتور اكتشفنا أنه دكتور محاماة وكان عايش لفترة طويلة في أمستردام ولسه فاتح المحل ده يوم 29-11، مما أثار فضولنا الحقيقة طبقًا للوقت والمكان اللي يفتح فيه، وإحنا في الظروف الاقتصادية دي. بس د. أمير كان عنده رؤية مختلفة تحترم، أنه بعد ما نجحت تجربته في أمستردام، حب يفتح سلسلة كافيهات هنا كمان في مصر، علشان كده كان لازم يدرس السوق بنفسه، والحقيقة أن كل اللي شربناه هناك كان من تحت أيديه له طعم مختلف، غير أي مكان ثاني، فيه دفء البيت ونفس الوقت احترافية تقديم المطاعم. ولأننا بـ نحب نجرب الحاجات المختلفة قررنا نخوض التجربة بكل الجنان اللي ممكن تضيفه لنا، ولما سألنا على الكوكتيل، كان عندنا أكثر من اختيار: إما كوكتيل المحل اللي مكون من 6 أنواع فاكهة، بس للأسف مش كل أنواع الفاكهة كانت موجودة اليوم ده، فأخذنا الاختيار الثاني، العصير الخاص بالمحل بـ 20 جنيه، واللي ما كانش عندنا أدنى فكرة هو هـ يبقى مكون من إيه، فضلنا نتفرج على الدكتور وهو بـ يحضر العصير يحط حاجات ويمزج حاجات ببعض وإحنا هـ نموت ونعرف هـ نشرب إيه، المهم جاء لنا كأس شكله مغري جدًا من فوق باين شكل الأوريو المرشوش مع الفول السوداني والآيس كريم واللبن، ومكون سري ثاني إحنا مش عارفينه وده كان هـ يجننا لأن إحنا شغلنا التذوق، ونحب نقول لكم أن كل المشروبات اللي شربناها كانت محاطة بنوع من أنواع الغموض والطعم المتميز، بعد الشوكولاتة، كنا محتاجين حاجة خفيفة، فـ قلنا نشرب ليمون بالنعناع بـ 20 جنيه، وطبعًا برضه الدكتور حط عليه مكون سري بعد ما سألنا والحقيقة أن طعمه كان تحفة مزيج ما بين حموضة الليمون وطعم النعناع والمكون السري، الحقيقة أننا استمتعنا به جدًا لأنه كان خفيف ومنعش. ما قدرناش نقاوم أننا ما نجربش القهوة خاصة أننا كنا عاوزين نجرب طعمها، وطبعًا لم تخلو من المكون السري السحري، إحنا طلبنا كابتشينو وعليه فانيليا وكراميل والمكون السري بـ 20 جنيه وكان طعمه مميز فعلًا ونوع القهوة كان قوي يعدل المزاج، وقبل ما نمشي جربنا آخر حاجة الـ Chocolate cake بـ 20 جنيه، والحقيقة أن طعمه كان أقل ما يقال عنه مذهل لأنها كانت خفيفة ومنعشة، معمولة بالبندق وأكثر من نوع شوكولاتة، وإن كنا متأكدين أن المكون السحري هنا هو حب اللي أنت بـ تعمله، قُدمت لنا سخنة مع صوص الشوكولاتة، علشان تسحرنا وتنقلنا لمكان ثاني خالص، مافيهوش غير الاستمتاع بطعم الشوكولاتة، وإن كانت القطعة صغيرة شوية، بس لو أنت من الناس اللي بـ تهتم بالكيف مش بالكم، هـ تستمع بلا شك. الحقيقة أننا استمتعنا بالقعدة هناك جدًا، لأن كل حاجة بـ تتعمل هناك بفن وشغف، خوضوا التجربة واطلبوا المختلف، وإن كان العادي أكيد هـ يبقى حلو برضه، كمان كنوع من أنواع التجديد Amir's Tivoli بـ يوفر لك رسام كاريكاتير يرسم لك لوحة بشرط واحد بس أن الأصل يحطه في المحل والصورة تأخذها، وهـ يحطوها على حائط المحل، وأهو يبقى المكان منور بصحابه. ولو عاوز تعمل عيد ميلاد أو مناسبة خاصة، الأفراد بداية من 15 شخص بـ يبقى سعرهم بالمشروب 500 جنيه، و10 جنيه على كل حد زيادة، بشرط واحد برضه أن مافيش أغاني شعبية، وفيه تأمين لنظافة المكان 150 جنيه. الحقيقة أن المكان تحس فيه بالدفء كأنه أسرتك الثانية مش بس علشان فعلًا كل أفراد الأسرة مشاركين فيه ولهم قواعدهم المحترمة، لكن علشان كمان كل حاجة بـ تتعمل معمولة باحترافية وشغف خاص بـ Amir's Tivoli.

...

إيتوال: كافيه ومحل حلويات مزدحم فى وسط البلد
اصدرت في: 27/11/2014

فى وسط البلد، وتحديدًا على شارع 26 يوليو، الحلوانى المكون من ثلاثة أدوار مقسم لكافيه صغير شيك فى الدور العلوى، ومحل حلويات جذاب فى الدور الأول بـ يقدم لك تشكيلة رائعة من الكيكات والحلويات. مع دخولك إيتوال، هـ يقابلك صفوف من الحلويات اللذيذة معروضة فى ثلاجة زجاج طويلة، تشمل عدد ضخم من الكيكات بتصميمها المميز، سعر القطعة الواحدة 4.50 جنيه. جربنا كيكة أسفنجية خفيفة بالكريمة وعليها طبقة آيسينج رطبة، بسيطة صحيح لكن طعمها لذيذ. أحلى حاجة فى الكيكات أنك أول ما تشتريها، تقدر تتركهم فى الثلاجة لمدة يومين وطعمهم يفضل طازج كأنك اشتريتها حالًا. تقدر كمان تشترى دستة كاملة من الحلويات اللذيذة بسعر 54 جنيه أو الكيكات الأغلى شوية بـ يكون سعرها 60 جنيه. الكافيه فوق هادئ شوية، وفيه بـ يقدموا مجموعة من الكيكات الموجودة تحت بالإضافة لمجموعة مميزة من المشروبات الساخنة والباردة. الديكورات كانت شيك وبسيطة، بترابيزات وكراسى من الخشب وسط جو مريح مكيف الهواء. طلبنا قطعة تشيز كيك كراميل وقطعة تشيز كيك بالكريز (10جنيه للقطعة الواحدة). الاثنين يميزهم الكريمة اللذيذة بقاعدة طرية من البسكويت المطعم بقشر البرتقال. قطعة التشيز كيك الكريز كان فيها قطع مستخبية من الكريز داخل الكريمة، وقدرت تضيف للكيك قوام مميز. علشان نبلّع الكيك طلبنا عصير فراولة (10 جنيه) الغني بقطع الفراولة اللذيذة وواحد ميلك شيك فانيليا (11 جنيه) المكون من آيس كريم فانيليا. إيتوال كمان عنده كشك صغير للآيس كريم بجانب المدخل، سعر البولة الواحدة 2.50 جنيه، والمفاجأة كانت وجود تنوع فى النكهات الموجودة: شوكولاتة، فانيليا، فستق، كراميل، كنتالوب، مانجو وحتى الكيوى كان موجود، مع اختيارات أخرى. صحيح الشوكولاتة والفانيليا كانوا تحفة، نكهة الكيوى كان فيها كلام. الحلويات الموجودة كانت تشمل حاجات غير الكيكات، إيتوال عارض حلويات شرقية وشوكولاتة جميلة مغلفة بأناقة، بحيث تنفع كهدية ممتازة للمناسبات. إيتوال عنده مشكلة، المكان بـ يزدحم بشكل رهيب لدرجة أنك صعب حتى تمشى قريب من المحل.

...

بركة: مشروب زيادة على حساب صاحب المحل في وسط البلد
اصدرت في: 24/09/2014

الفكرة: كان قاعد مع واحد صاحبه اسمه "بركة"، وبـ يتكلموا فى الشغل والطموح والحياة.. وأوحى له بعمل "قهوة ثقافية" تكون "كافيه" وبـ تدعم الثقافة.. فـ قرر يعمل ده ويسميها "بركة". وائل: وائل هو صاحب المشروع اشتغل مترجم إيطالى.. وعاش فترة فى إيطاليا واشتغل فى الميديا بعد ما أخد كورسات إخراج، وعمل فيلم مستقل أخد مركز أول فى التقييم الخاص بالورشة فى قصر ثقافة السينما والفيلم اسمه "Call me"، ولما فكر فى مشروعه الخاص مع أصحابه قرر يعمل حاجة تجارية لكن لها علاقة بالثقافة وكانت بوك كافيه فى وسط البلد اسمه "بركة". محسن: هو مدير المكان شخص هادى طوال الوقت، وكان شغال فى "السياحة"، وهو خريج سياحة وفنادق.. وكل همه فى الحياة أن بركة تبقى أحسن "بوك كافيه" فى وسط البلد. بوك كافيه: بوك كافيه يعنى فنجان قهوة محترم.. وكتاب وتقعد تقرأ فى هدوء.. وأصحاب المكان محافظين قوى على الموضوع لدرجة أن لو فيه واحد عاوز يقرأ ومجموعة "عاملين دوشة" بـ يعتذروا لهم أن ما ينفعش دوشة علشان الرجل اللى بـ يقرأ.. وممكن كمان يبقى لك هدية لما تيجى وتقرأ فى المكان "مشروب زيادة على حساب صاحب المحل". القهوة: أصحاب المكان بـ يقولوا أنك ممكن تشرب أحسن قهوة عندهم.. وفيه أنواع كثير من سادة ومحوج وبن ثقيل وخفيف ووسط وبالبندق، المهم أنك فعلاً هـ تجرب "قهوة" عظيمة.. كمان أسعارهم مش عالية، وممكن أى حد يقعد هناك.. وعندهم شيشة لكنك تقدر تشربها أمام الكافيه على ترابيزات خاصة علشان الدخان ما يؤثرش على اللى قاعدين داخل الكافيه. حفلات: كمان هما عاوزين يعملوا حفلات توقيع مجانية للكتب، واللى حابب يروح ويتفق معاهم ومن غير مقابل "وده برضه حبًا فى الثقافة"، وبـ يتبنوا فكرة أن القراءة نفسها مكسب.. وبـ يحكوا على "بنت" زارتهم فى مرة ومعاها كتاب ولما خلصته، اتفقت معاهم على تبديل كتابها بكتاب معروض عندهم ولما تخلصه ترجعه.. وبالفعل وافقوا على كده.. ومش محتاجين نقول أن عندهم مجموعة كتب للقراءة فى مجالات مختلفة وهما بـ يستقبلوا أى كتاب للعرض ماعدا "كتب الدين والسياسة" علشان ما يحصلش خلاف بين الناس. وبـ يوجهوا دعوتهم للمكتبات الكبيرة ودور النشر أنهم يبعثوا لهم كتب من إصداراتهم علشان الناس تتعرف على الكتب وتبقى مساحة القراءة أكبر. أصغر صانع: كمان لاقينا هناك "أصغر صانع مشغولات يدوية" وهو "رفعت مصطفى" 8 سنوات وبـ يعمل حظاظات من الخيوط وعاوز يبقى ده مشروعه لما يكبر، وبـ يبيع الواحدة بـ "3جنيه".. ها؟ حد عاوز يشترى؟.. طيب يقرأ.. طيب يشرب قهوة؟

...

باسيليز تاون لاونج: كافيه مريح فى وسط البلد
اصدرت في: 17/09/2014

فى قلب وسط البلد، هـ تلاقى كافيه مميز بـ يقدم شكل من أشكال من المعارض الفنية، من داخل المكان ومن الخارج، والسبب هو تصميمه الشبيه بالمتاهة وديكوراته الفريدة. "باسيليز تاون لاونج - Basilli's Town Lounge" يتكون من ثلاث غرف واسعين كل منهم يتميز بديكورات مبهرجة تشمل صور لمشاهير من ممثلين، ومغنيين وكمان أدباءمن ألفيس بريسلى وويليام شيكسبير، لغاية عبد الحليم حافظ وسعاد حسنى. بعد ما اختارنا المكان وصلت منيوهات باسيليزالبسيطة، والمكونة أغلبها من مشروبات، وكمان عدد من أنواع الآيس كريم منها بنانا سبليت المكون من قطعة موز عليآيس كريم فانيليا وشربات فاكهة. وإحنا بـ نقول لهم على طلباتنا عرفنا أن ماكينة القهوة عطلانة والموضوع ده قلل من حجم اختياراتنا. عمومًا، مجموعة كوكتيلات وعصائر الفاكهة فى باسيليز كانت ممتازة، ومن هنا قررنا نجرب كوكتيلهم الخاص، باسيلي كوكتيل (16جنيه)؛ كوكتيل مانجو، وموز، وزنجبيل وفانيليا. الفكرة بصراحة تستحق التحية بطعمها اللذيذ مع قوام سميك والفضل يرجع للموز والمانجو. طعم الفانيليا كان مختفى عن المشهد، لكن الزنجبيل قدر يضيف اللسعة المنعشة. طلبنا كمان عصير فراولة (10جنيه) وكيوى (11جنيه)؛ الفراولة كانت مسكرة وسميكة وفيها قطع من الفراولة، كل ده فى كأس طويل شكله شيك ومعاه شفاطة كبيرة تسمح بشرب قطع الفراولة الكبيرة. بالنسبة لعصير الكيوى، كان فى الحقيقة ينقصه نكهة الكيوى مع وجود طعم مر نتيجة استخدامهم لعصير الليمون.شكل العصير كان رائع، بـ يُقدم فى نفس كأس عصير الفراولة ويزينه شرائح من فاكهة الكيوى على الكأس من الداخل. بصراحة ثمنه فيه. أسعار باسيليز بشكل عام تعتبر رخيصة، الخدمة كويسة واختيارات العصائر لطيفة. صحيح ديكور المكان مش جديد، لكن أكيد سحر المكان وشكله المميز لازم يشدك. واحدة من الغرف لفتت انتباهنا، والسبب هو الكراسى والترابيزات كانت على شكل حطب، ورغم أن شكلهم بعيد كل البعد عن الشكل العام للكافيه، لكن الفكرة كانت هائلة. كل الثلاث غرف مريحين، مساحتهم كبيرة ومكيفين؛ لو كل ده مش مناسب بالنسبة لك، تقدر تقعد فى الخارج وتستمتع بالجو.

...

راندى فو كافيه: كافيه شيك بمركز هيلتون رمسيس التجاري في وسط البلد
اصدرت في: 25/08/2014

"راندى فو - Rendez-Vous" كافيه موجود في الدور الأول من مركز رمسيس هيلتون التجاري، أصبح وجهة أبناء الطبقة الأرستقراطية والأجانب –خصوصًا نزلاء فندق هيلتون رمسيس المواجه للمركز التجاري- لأنه حقيقي بـ يقدم خدمة 5 نجوم، بموقعه المفتوح والمكيف اللي بـ يكشف بالكامل الدور الأول للمول، والـ LCD العملاقة اللي ممكن تسليك. الكافيه مقسم لجزئين: الأول للأكل والثاني مخصص لمحبي الشيشة، واللي موجود فيه كشك زلابية صغير لعشاق الحلويات... هو مزيج غريب صحيح، بس ما ننكرش أن رائحة الشيشة والزلابية مع بعض عجبتنا. أول ما قعدنا قدموا لنا اثنين منيو شيك من الجلد البني: الكبيرة للأكل والصغيرة للمشروبات. منيو المشروبات معظمها مخصص للمشروبات الكحولية، الكابتشينو (23 جنيه) بالرغم من أن قهوته كانت قوية، يحسب لمنفذه المهارة والمجهود المبذول في كتابة كلمة Welcome بصوص الشوكولاتة فوق رغوة الكابتشينو -بعكس الكثير من المحلات اللي بـ تبهرك بأشكال مماثلة مع أنها لا تتطلب مهارة لأنهم بـ يستخدموا مسحوق الكاكاو على قطعة معدن مفرغة. قررنا أننا نجرب موكتيل (بدون كحول) فجربنا موهيتو التوت البري (32 جنيه)، قوامه سميك زيّ السموثي، وبالرغم من أنه حلو في المجمل إلا أنه كان فيه حمضية عصير ليمون قوية ومضاف إليهم صودا. إجمالًا الموهيتو كان منعش جدًا. طبعًا المنيو متاح فيه المشروبات الغازية، إلا أن أسعارها في المكان سياحية لدرجة أن علبة الكولا بـ 26 جنيه. لاحظنا أن المأكولات هنا مقدمة بطريقة جذابة، المنيو مقسم لسلاطات، حلويات وأطباق مصرية وإيطالية، واللي جربنا منه بيتزا بالخضروات (42 جنيه)، سعرها مناسب جدًا لحجمها وجودتها، أطرافها مقرمشة وجبنتها وفيرة، ده غير أن عليها مجموعة كبيرة من الخضروات المختلفة زيّ البروكلي، الفلفل بأنواعه والمشروم... طعمها كان رائع مفيش كلام. من الأطباق المصرية جربنا الكشري، واللي مقدم في طبق أبيض على هيئة تل من المكرونة، والأرز، والعدس والبصل. طعم الطبق كان عادي مش فارق كثير عن كشري العربية، ما عدا السعر طبعًا. الخدمة زيّ ما قلنا 5 نجوم، القائمين على الخدمة مذاكرين بروتوكولات الضيافة كويس، بزيهم النظيف وقدرتهم على التحدث باللغتين العربية والإنجليزية. بلا شك موقعه في مركز هيلتون التجاري هـ يعجبك لو أنت من عشاق التسوق، أو ناوي تدخل السينما الموجودة في الدور الأخير.

...

مشهور: كافيه مفاجأة فى مول طلعت حرب فى وسط البلد
اصدرت في: 24/08/2014

من الحاجات اللى تفرحنا لما نلاقى محلات فى أماكن لا يمكن تخطر لنا على بال، والمكان ده تحديدًا إحنا متأكدين أن مكانه معظمنا عمره ما فكر يروحه. وسط الدور الأرضى من مول طلعت حرب، "مشهور" يعتبر مكان راحتك بعد ساعات من اللف فى محلات الهدوم، وأكشاك الإكسسوارات ومحلات الأحذية المنتشرة فى المول صاحب السبعة أدوار. "مشهور" من الكافيهات اللطيفة، واسع ومكيف كله، بـ يقدم مشروبات وحلويات صغيرة. الأجواء هناك مريحة، وبعيدًا عن كلام ودوشة الزبائن، يعتبر فعلاً من الأماكن اللطيفة للاستمتاع مع أصحابك بمشروباته المنعشة. المكان عبارة عن أرضيات من البلاط، وترابيزات شيك وقعدة مبطنة باللون الأحمر، والديكورات كانت أجمل وأجمل مع مجموعة من النباتات الخضراء موزعة هنا وهناك. الترابيزات والكراسى فيه بينهم مسافة وسط مساحة الكافيه الكبيرة، وده بـ يكون مناسب لما المكان يتملى، خصوصًا فى مواسم الكرة لما كل الناس تتجمع حول شاشة التليفزيون الكبيرة؛ متوفر كمان أماكن خارج الكافيه علشان الأيام الزحمة، لكن اعمل حسابك أن مافيش مكيفات هواء وممكن الجو يكون مش مريح لحد ما. الشرب عند مشهور حاجة لطيفة رغم أن المنيو محدودة نوعًا ما. الكافيه ده بـ يقدم مجموعة من المشروبات الساخنة والباردة؛ شاى بالليمون سعره 7.50 جنيه وفنجان دوبل سبريسو المتين سعره 13.50 جنيه. المشروبات الغازية برضه موجودة لكن أغلى شوية، سعر الواحدة 8.75 جنيه والريد بول يوصل 20 جنيه للواحدة. مشهور عنده كمان مجموعة من الكوكتيلات المميزة فى المنيو، رغم أننا بعد ما شوفنا المنيو كويس، لاحظنا أنهم أشبه بحلويات خفيفة. طلبنا ميلك شيك شوكولاتة (14.75 جنيه)، ووصل فى كأس زجاجى طويل وعليه فوم لذيذ، وواحد عصير فلوريدا (12 جنيه) وأخيرًا واحد كريم كراميل (10.95 جنيه). العصير والكريم كراميل مستواهم كان متوسط بالنظر لأسعارهم الغالية، لكن الميلك شيك كان ثقيل وممتع مع نكهة شوكولاتة قوية. الخدمة كانت سريعة وودودة، والمشروبات بـ يقدمها جرسونات لابسين قمصان بيضاء وبنطلونات سوداء، والمدير كان لطيف وساعدنا فى اختيار المشروبات من المنيو. المشكلة الحقيقة كانت فى الأسعار، اللى كانت غالية شويتين؛ الواضح أنك بـ تدفع ثمن المكان مش طلباتك. على الناحية الإيجابية، مشهور بـ يقدم خدمات إضافية عن باقى القهاوى والكافيهات العادية، شاشة تليفزيون كبيرة، Wi-Fi مجانى والشيشة كانوا من ضمن الإيجابيات. صحيح مشهور بـ يقدم مشروبات وحلويات خفيفة فقط، لكن عندك كذا مطعم قريبين من الدور الأرضى بـ يعملوا أكلات سريعة تقدر تستمتع بها فى مكان الأكل الكبير الموجود فى وسط الواحة الصغيرة.

...

 قهوة البستان: تفرج على صندوق الدنيا في وسط البلد
اصدرت في: 05/07/2014

منطقة وسط البلد بزحامها وحركتها اللانهائية لها كاريزما خاصة، يمكن سحر البنايات القديمة اللي عامل كونتراست مع زحام المحلات بأضوائها المبهرة، ويمكن كم التفاصيل الحياتية الرهيب، اللي من خلالها تقدر تفك طلاسم الشخصية المصرية. دي مش أول مرة نقعد فيها على قهوة بلدي، خوضنا التجربة قبل كده في الزمالك، ولكن شتان ما بين الزمالك ووسط البلد... يمكن لأن وسط البلد رتمها أسرع وبالتالي مشاهدة العالم هناك أمتع، ده كان شعورنا على "قهوة البستان". الوصول هناك مش صعب، حتى لو مالكش في وسط البلد وشوارعها الحلزونية... انزل تقاطع شارع شريف مع شارع قصر النيل وخذ أول شمال. المكان واسع ويساع من الحبايب ألف زي ما بـ نقول في مصر. مش لازم تقعد جنب باب القهوة لأن أمامها ساحة تقع ما بين بنايتين، انتقي موقعك واستمتع. استقبلنا عم "رمضان" -قل له رمضان على طول بدون رسميات- بترحاب مصري أصيل وكأنه يعرفنا من سنين (مع أنه ما شافناش قبل كده) وأخذ الطلبات، قهوة مضبوط (2.50 جنيه)، حجر معسّل (2.5 جنيه) وزبادي في الخلاط. دقائق وعم "علي" حط القهوة على الترابيزة، القهوة كانت رائعة ومنعشة بعد يوم عمل شاق، بعدها جاءت الشيشة (مش لوحدها أكيد بس بأسلوب عم علي الهجومي، كان أحسن لنا لو كانت الشيشة جاءت لوحدها). في الأثناء النور قطع علينا، وبنفس الترحاب جاء (رمضان) ليعتذر عن صعوبة تقديم الزبادي لأن مافيش كهرباء. فطلبنا شاي بالنعناع (2.5 جنيه). الشيشة نظام Help yourself، وبالتالي ما تنتظرش من عم علي أنه يضبطها لك، لو أنت مش خبير في الشيشة يستحسن تأخذ معاك شخص قادر على التعامل، لأن عم علي خُلقه ضيق وما بـ يحبش الكلام الكثير! الشاي بالنعناع كان ظريف، وأجمل شيء في الوجود هو كوب الماء الساقع اللي بـ ينزل مع المشروب. وطبعًا زي أي قهوة مصرية أصيلة، وارد جدًا تجد باعة جائلين وشحاذين... رجل رمى مجموعة من حافظات الكروت البلاستيكية (من اللي بـ يُعلقها الناس المهمين في المؤتمرات) ما عندناش فكرة ممكن نعمل بهم إيه على القهوة، بس لو عاوز تنفّع الرجل المغلوب على أمره، اشتري! أحسن وأنفع حل هو الاعتذار بذوق أو التجاهل. إجمالًا، التجربة كانت ممتعة جدًا، قهوة البستان جامعة لكل أطياف وأجيال الشعب المصري؛ اللي بـ يحب الكورة موجود فيه شاشة كبيرة لعرض المباريات على فكرة، واللي بـ يحب بس... موجود، فنانين وسياسيين وحتى اللي بـ يتعلموا الطاولة كنوع من التجديد... موجود. أنت بس فضي نفسك وروح في أي وقت ما بين 7 صباحًا لمنتصف ليل القاهرة! 

...

باصورى ريستوران & كافيه: مطعم مفاجآة فى وسط البلد
اصدرت في: 25/06/2014

كل شارع من شوارع القاهرة غالبًا هـ تشوف فيه كافيهات ومطاعم، وأوقات كثير بـ يكونوا غير ملحوظين إلا لأهل المنطقة والمترددين على المكان، مثال على كلامنا "باصورى ريستوران & كافيه - Basury Restaurant & Café"، القريب من ميدان التحرير، المكان المميز والرومانسى نوعًا ما بـ يقدم أجواء هادئة ولطيفة تناسب كونه مطعم، وبساطة وراحة كونه كافية، والحقيقة أنه قدر يجمع بين الاثنين فى مكان لطيف. من خارج المكان، شكله يوحى لك أنه مجرد كافيه عادى، لكن أول ما تدخل، الموضوع بـ يختلف تمامًا. القعدة مكونة من جلد طرى فى صورة كنب مريح وترابيزات خشب لامعة على صفين بالطول قدروا يضفوا إحساس بالراحة على المكان. ديكورات باصورى تشعرك بأنها معرض فنّى؛ الحوائط مزيّنة بصور فوتوغرافية للعالم العربى بـ تعبر عن القصة اللى وراء كل صورة بشكل ما، أرضيات من الخشب اللامع بتصميمات مركّبة بـ تكمل انعكاس الأضواء المعلقة فى السقف على الأرض، أما المنظر الرائع بجد تقدر تشوفه بالليل؛ نقدر نقول أن التصميم بشكل عام كان فعلاً مبهر. باصورى بـ يقدم تشكيلة ضخمة من أنواع القهوة بحيث مستحيل تقدر تختار مجرد صنف واحد: قهوة تركى، أسبريسو، لاتيه، ماهيتو، موكا، أمريكان كوفى، قهوة فرنسية، قهوة مثلجة وكابوتشينو. كوب من الكابوتشينو سعره 12.95 جنيه، موجود منه حجم واحد، والحقيقة أن كوب واحد كان كبير كفاية. المشروبات الغازية والشاى متوفرين، وعلشان الأجواء الساخنة اللى بـ نعيشها اليومين دول، مجموعة من العصائر الفريش جاهزين للترحيب بك، بس الحقيقة أن اللى لفت انتباهنا أكثر كان كوكتيلاتهم المدهشة: تفاح بالتمر، يوسفى بالرمان وكوكتيلنا المفضل مانجو مع فراولة وفانيليا، سعر الكأس الكبير 10.95 جنيه فقط. على الرغم من وجود منيو مشروبات شيّقة، باصورى كمان عنده الكثير من ناحية الأكل. تشكيلة من الشوربة الساخنة، منها شوربة كريمة فراخ (11.95 جنيه)، سلاطات طازجة منها سيزر سلاد كبيرة (22.95 جنيه) مع مجموعة من الساندويتشات، برجر وأنواع متنوعة رائعة من البيتزا بحجم كبير. طلبنا واحدة بيتزا مارجريتا سعرها 19.95 جنيه وواحدة بالخضروات سعرها 22.95 جنيه. باصورى كمان بـ يقدم بيتزا بإمضائه عليها قطعم من اللحم المدخن، وزيتون، وفلفل، وبصل وموتزاريلّا. أخيرًا وليس آخرًا، آخر صفحة فى منيو باصورى المميزة كانت فى الحقيقة أكثر الصفحات إثارة: الآيس كريم. الآيس كريم هنا مش عادى، النكهة مع القوام قدروا يخلقوا مزيج ممتاز، وقدر باصورى يضع بصمته من ثانى اللى بـ تظهر جمال الطبق؛ باصورى Coup عبارة عن خليط من آيس كريم فراولة، وفانيليا ومانجو، عليهم قطع فاكهة لذيذة، مع صوص الكاراميل اللذيذ. الاختراع المبهج سعره 19.95 جنيه، وصحيح كان طعمه تحفه، لكن السعر كان مبالغ فيه شوية. على العموم، باصورى عنده منيو تضم اختيارات رائعة من الوجبات الخفيفة، والأطباق الرئيسية، والمشروبات والحلويات تقدر تستمتع بهم وسط أجواء لطيفة، لكن خلّى بالك من تكلفة الخدمة عند دفع الفاتورة لأنهم دفّعونا كثير.

...

سكوبس: آيس كريم لذيذ فى أبراج نايل سيتى
اصدرت في: 27/05/2013

ميعادنا النهاردة مع محل جديد من محلات الزبادى المثلج والآيس كريم فى القاهرة. سكوبس اللى فتح فى أبراج نايل سيتى فعلاً مكان لطيف، بـ يقدم آيس كريم إيطالى بحق وحقيقى – أو الاسم الإيطالى للآيس كريم "جيلاتو" – وكمان زبادى مثلج لذيذ. وصلنا لمحلهم اللي واخد ركن بألوانه الوردية المبهجة، علشان نجرب منتجاتهم المثلجة. مساحة المحل صغيرة بس كافية، بـ تشوف فيها عرضين من الزجاج؛ واحد فيه ما لذ وطاب من الآيس كريم المغرى، والثانى فيه عشرات من الإضافات الملونة. المشكلة عندهم أن مفيش مكان للجلوس، وده معناه أن الحل الوحيد هو التيك آواى. سكوبس بـ يقدم نوعين من الزبادى، طبيعى وبنكهات، بأسعار من 20جنيه-49جنيه، وتشكيلة النكهات المختلفة –اللى كانت عبارة عن شوكولاته بس وقت زيارتنا- بـ تكلف شوية زيادة. طلبنا زبادى مثلج طبيعى صغير مع ثلاث إضافات؛ شرائح شوكولاتة، كيت كات وجرانولا (29جنيه) وكان فعلاً كوكتيل نكهات رائع، وأضاف كثير للزبادى بطعمه الحادق الحلو فى نفس الوقت. بولة جيلاتو إيطاليانو أسعارها بين 13جنيه -34جنيه، وعلبة جيلاتو 400 جرام سعرها 68جنيه و750 جرام سعرها 99 جنيه. علشان يساعدونا نختار من بين النكهات الموجودة، قدموا لنا عينات من "أو لا لا لا أوريو جيلاتو Ooh La La La Oreo Gelato "، فيكسينى فانيليا Vixeny Vanilla و Playful Pistachi. كل الآيس كريم كان لذيذ، ويعتبر ابتكار أصلى؛ طعم الشوكولاتة فى الأوريو أيس كريم كان روعة وبعد ما تخلصه تحس بطعم بسكويت لذيذ، وفى نفس الوقت، الفانيليا آيس كريم كان طازج وغنى بالحليب، أما الفستق فكان متوازن بين الطعم الحلو وطعم المكسرات. شد انتباهنا فكرة ثانية غير شراء الآيس كريم. سكوبس بـ يبيع أصص "جميع أصيص" زرع ألوانها مبهجة مليانة آيس كريم شوكولاتة، فراولة، فانيليا أو آيس كريم، عليه فتافيت شوكولاتة ووردة صناعية ثمنهم 22 جنيه. قررنا نجرب طعم المانجو المدهش- وفعلاً، اختيارنا كان ميه ميه. رغم أن إضافة الشوكولاتة كانت لذيذة، وفى أجزاء منها بـ تتمضغ بس خليط الشوكولاتة مع المانجو ماكانش مناسب. عندهم كمان جنب مجموعة الآيس كريم، حاجة شكلها لطيف اسمها جيلاتو بوبس- عبارة عن مصاصة من الآيس كريم – ثمنها 14جنيه لقطعة واحدة، 74 جنيه لست قطع و 119جنيه ثمن 12قطعة. تقدر كمان تختار من بين نكهات الميلك شيك زى الكراميل، فانيليا، شوكولاتة (30جنيه)، أو فنجان اسبريسو (12جنيه). العلامة التجارية لسكوبس مقدرتش تميزه عن المنافسين الكثيرين، وده مش عادل، علشان بجد الآيس كريم عنده حاجة ثانية خالص- وهو ده المهم!

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن