شيشة كافيهات in وسط البلد Cairo, Egypt

كافيهات

 قهوة البستان: تفرج على صندوق الدنيا في وسط البلد
اصدرت في: 05/07/2014

منطقة وسط البلد بزحامها وحركتها اللانهائية لها كاريزما خاصة، يمكن سحر البنايات القديمة اللي عامل كونتراست مع زحام المحلات بأضوائها المبهرة، ويمكن كم التفاصيل الحياتية الرهيب، اللي من خلالها تقدر تفك طلاسم الشخصية المصرية. دي مش أول مرة نقعد فيها على قهوة بلدي، خوضنا التجربة قبل كده في الزمالك، ولكن شتان ما بين الزمالك ووسط البلد... يمكن لأن وسط البلد رتمها أسرع وبالتالي مشاهدة العالم هناك أمتع، ده كان شعورنا على "قهوة البستان". الوصول هناك مش صعب، حتى لو مالكش في وسط البلد وشوارعها الحلزونية... انزل تقاطع شارع شريف مع شارع قصر النيل وخذ أول شمال. المكان واسع ويساع من الحبايب ألف زي ما بـ نقول في مصر. مش لازم تقعد جنب باب القهوة لأن أمامها ساحة تقع ما بين بنايتين، انتقي موقعك واستمتع. استقبلنا عم "رمضان" -قل له رمضان على طول بدون رسميات- بترحاب مصري أصيل وكأنه يعرفنا من سنين (مع أنه ما شافناش قبل كده) وأخذ الطلبات، قهوة مضبوط (2.50 جنيه)، حجر معسّل (2.5 جنيه) وزبادي في الخلاط. دقائق وعم "علي" حط القهوة على الترابيزة، القهوة كانت رائعة ومنعشة بعد يوم عمل شاق، بعدها جاءت الشيشة (مش لوحدها أكيد بس بأسلوب عم علي الهجومي، كان أحسن لنا لو كانت الشيشة جاءت لوحدها). في الأثناء النور قطع علينا، وبنفس الترحاب جاء (رمضان) ليعتذر عن صعوبة تقديم الزبادي لأن مافيش كهرباء. فطلبنا شاي بالنعناع (2.5 جنيه). الشيشة نظام Help yourself، وبالتالي ما تنتظرش من عم علي أنه يضبطها لك، لو أنت مش خبير في الشيشة يستحسن تأخذ معاك شخص قادر على التعامل، لأن عم علي خُلقه ضيق وما بـ يحبش الكلام الكثير! الشاي بالنعناع كان ظريف، وأجمل شيء في الوجود هو كوب الماء الساقع اللي بـ ينزل مع المشروب. وطبعًا زي أي قهوة مصرية أصيلة، وارد جدًا تجد باعة جائلين وشحاذين... رجل رمى مجموعة من حافظات الكروت البلاستيكية (من اللي بـ يُعلقها الناس المهمين في المؤتمرات) ما عندناش فكرة ممكن نعمل بهم إيه على القهوة، بس لو عاوز تنفّع الرجل المغلوب على أمره، اشتري! أحسن وأنفع حل هو الاعتذار بذوق أو التجاهل. إجمالًا، التجربة كانت ممتعة جدًا، قهوة البستان جامعة لكل أطياف وأجيال الشعب المصري؛ اللي بـ يحب الكورة موجود فيه شاشة كبيرة لعرض المباريات على فكرة، واللي بـ يحب بس... موجود، فنانين وسياسيين وحتى اللي بـ يتعلموا الطاولة كنوع من التجديد... موجود. أنت بس فضي نفسك وروح في أي وقت ما بين 7 صباحًا لمنتصف ليل القاهرة! 

...

قهوة البورصة: شيشة معتبرة في وسط البلد
اصدرت في: 15/05/2011

لو ساكن في وسط البلد، يبقى انت أكيد عارف المكان اللي فيه شيشة رخيصة و إنترنت وتكييف. الحاجات دي موجودة في كافيهات كتيرة في مصر بس لـ اسباب غير معروفة احنا مش بـ نلاقي الكافيهات دي في منطقة وسط البلد. الناس اللي ساكنة في مناطق زحمة في القاهرة تعبوا من كتر ما كل شوية يأخذوا تاكسي لـ الزمالك عشان يروحوا كافيه هادي او يقعودوا يدوروا على الإنترنت على مكان كويس عشان يروحوا. بس حل المشكلة دي في «بورصة كافيه»، القهوة مليانة شيش، وهي مكان حلو وممتع جداً في وسط البلد، المكان ده معروف من زمان بـ منطقة البورصة. متخليش اي ويتر تاني من قهوة تانية يأخذك للقهوة بتاعته دايماً روح عالبورصة على طول. غير ان في «بورصة» انترنت وتكييف فيها كمان احلى شيشة. ممكن تقعد برة او جوة، القعدة اللي برة بـ تخليك تشوف الزحمة والشارع والجزء اللي جوة فيه تكييف وبـ يبقى أحلى وقت الصيف. برة الترابيزات عليها ظل الشجر وهـ تلاقي هناك دايماً معارك لعبة الطاولة وطبعاً لازم تشم ريحة الشيشة اللي مالية المكان. بالليل المكان بـ يبقى زحمة جداً كله مصريين او طلاب او اجانب قاعدين بـ يتكلموا وبـ يشربوا كابتشينو وميلك شيك. خالد، المتخصص في الشيشة، فنان في تجهيزها للزباين. القهوة فيها كل أنواع الشيشة، وفيها كمان المعسل الفاخر الغالي شوية. افضل طريقة عشان تختار فيها نوع الشيشة اسأل خالد يعملك حاجة ميكس وهـ تطلع حلوة، فيه بطيخ، نعناع وورد وفيه نوع فاخر بالليمون والنعناع واي نوع ممكن يتلخبط مع التاني ويبقى حلو. قهوة البورصة فيها انواع كتير من الحاجات اللي ممكن تتشرب وفيه شاي أخضرعادي وقهوة تركي بـ 5.50 جنيه او كابتشينو وشيكولاتة ساخنة بـ 6 جنيه، اما الحاجات الساقعة فيه منها انواع كتيرة زي عصاير الفواكه والميلك شيك، بس لازم تجرب عصير الليمون بـ النعناع حلو قوي والسكر اللي فيه مظبوط. رغم ان كافيه «بورصة» بـ يقدم حاجات جودتها عالية اللي صعب تلاقيها في اي حتة في «وسط البلد» بس القهوة ليها عيوبها، لازم تشتري كارت موبينيل عشان تعرف تـ دخل على الإنترنت. المكان من جوة عايز يدهن. وبـ يبقى فيه وقت خالد بـ يكون أجازة بـ تبقى الشيشة وقتها مش حلوة. الويترز التانيين بـ يبقوا أبطأ من خالد ومش بـ يعرفوا يظبطوا الشيشة زيه. لو ساكن في وسط البلد ومش لاقي مكان شيشة حلو، لازم تروح قهوة «البورصة».

...

المَضيَفة: قهوة مميزة في وسط البلد
اصدرت في: 05/04/2011

لو بـ تدور على كوفي شوب مش مشهور وعالمي من عينة «ستاربكس» و«كوستا كوفي» يبقى مكانك الصح في وسط البلد. وسط البلد زي أي منطقة تانية فيها فروع للكافيهات العالمية، بس الأهم والمميز هو وجود عدد لا نهائي من القهاوي البلدي اللي كلنا بـ نحبها. المشكلة بقى لو خرجت مع أصحابك - من غير تخطيط - في وسط البلد ومحتاج قعدة مريحة وجوها مناسب للدردشة وفيه الخصوصية؛ «المَضيَفة» بـ تقدملك الحل. عارفين مقولة "ما تحكمش على الكتاب من عنوانه؟" ده ينطبق بالظبط على «المَضيَفة». في شارع عدلي في قلب وسط البلد، الديكور متهالك والمرايات متكسرة وفيه عواميد مش محطوطة في مكانها وقصريات زرع صناعي ومتربة زي اللي كانت بـ تبقى في أوضة الكرار في بيوت جدودنا زمان. ومع ذلك الكراسي كبيرة ومريحة وفيه كَنبْ كمان. القهوة دايماً فيها ناس كتير بس عمرها ما بـ تتزحم عالآخر، المكان مفتوح والتهوية كويسة وهـ تعرف تشم هوا نضيف بين كل نفس شيشة والتاني. أما المنيو فبسيط وده عجبنا جداً. فيه العصاير المعروفة والكوكتيلات والقهوة وفيه برضه موز باللبن جامد وفريش جداً (5.50 جنيه) وكوكتيل المضيفة بـ13 جنيه وده عليه بولة آيس كريم فراولة بـ تغطي عصير المانجو والفراولة اللي في الكاس. فيه الإختيارات العادية لأي كافيه تاني، السلاطات من 4 لـ6 جنيه والشوربات من 6 لـ8 جنيه وأطباق مشويات من 30 لـ40 جنيه. بحذر اعتقدنا ان البيتزا هـ تكون أحسن إختيار، والمفاجأة أنها كانت لذيذة جداً، وأسعارها كانت من 12 لـ20 جنيه وكانت معمولة بطريقة الـ« Deep Dish » اللي بـ تخلي البيتزا سميكة قوي وفي نفس الوقت مقرمشة، جربنا بيتزا الخضروات (14 جنيه) بالفلفل الأخضر والزيتون والبصل والطماطم، والكميات كانت معقولة ومفيش حاجة أكتر من التانية بالنسبة للخبيز والإضافات، لدرجة اننا ممكن نقول انها من أحسن البيتزات اللي كلناها في وسط البلد. الخدمة سريعة وممتازة والويترز متعاونيين وبـ يطمنوا كل شوية أن كله تمام ومافيش زبون ناقصه حاجة. الشيشة بـ3 جنيه بس ونكهة البرتقال كانت خطيرة والخدمة عليها مميزة برضه. عندهم قهوة تركي بـ7 جنيه وسحلب ما بـ يهزرش، الكوباية مليانة مكسرات وزبيب وجوزهند بـ7.50 جنيه، كان طبق حلو في حد ذاته. لو غاوي حلويات قوي ورايح مخصوص عشان كده هـ تلاقي آيس كريم وأم علي بـ12 جنيه. روح «المَضيَفة» لو عايز بديل للأماكن التقليدية في وسط البلد، وفيه هناك انترنت لاسلكي ( Wi-Fi ) لو عايز تخلص شوية شغل وانت هناك.

...

مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول