قهوة كافيهات in وسط البلد Cairo, Egypt

كافيهات

بركة: مشروب زيادة على حساب صاحب المحل في وسط البلد
اصدرت في: 24/09/2014

الفكرة: كان قاعد مع واحد صاحبه اسمه "بركة"، وبـ يتكلموا فى الشغل والطموح والحياة.. وأوحى له بعمل "قهوة ثقافية" تكون "كافيه" وبـ تدعم الثقافة.. فـ قرر يعمل ده ويسميها "بركة". وائل: وائل هو صاحب المشروع اشتغل مترجم إيطالى.. وعاش فترة فى إيطاليا واشتغل فى الميديا بعد ما أخد كورسات إخراج، وعمل فيلم مستقل أخد مركز أول فى التقييم الخاص بالورشة فى قصر ثقافة السينما والفيلم اسمه "Call me"، ولما فكر فى مشروعه الخاص مع أصحابه قرر يعمل حاجة تجارية لكن لها علاقة بالثقافة وكانت بوك كافيه فى وسط البلد اسمه "بركة". محسن: هو مدير المكان شخص هادى طوال الوقت، وكان شغال فى "السياحة"، وهو خريج سياحة وفنادق.. وكل همه فى الحياة أن بركة تبقى أحسن "بوك كافيه" فى وسط البلد. بوك كافيه: بوك كافيه يعنى فنجان قهوة محترم.. وكتاب وتقعد تقرأ فى هدوء.. وأصحاب المكان محافظين قوى على الموضوع لدرجة أن لو فيه واحد عاوز يقرأ ومجموعة "عاملين دوشة" بـ يعتذروا لهم أن ما ينفعش دوشة علشان الرجل اللى بـ يقرأ.. وممكن كمان يبقى لك هدية لما تيجى وتقرأ فى المكان "مشروب زيادة على حساب صاحب المحل". القهوة: أصحاب المكان بـ يقولوا أنك ممكن تشرب أحسن قهوة عندهم.. وفيه أنواع كثير من سادة ومحوج وبن ثقيل وخفيف ووسط وبالبندق، المهم أنك فعلاً هـ تجرب "قهوة" عظيمة.. كمان أسعارهم مش عالية، وممكن أى حد يقعد هناك.. وعندهم شيشة لكنك تقدر تشربها أمام الكافيه على ترابيزات خاصة علشان الدخان ما يؤثرش على اللى قاعدين داخل الكافيه. حفلات: كمان هما عاوزين يعملوا حفلات توقيع مجانية للكتب، واللى حابب يروح ويتفق معاهم ومن غير مقابل "وده برضه حبًا فى الثقافة"، وبـ يتبنوا فكرة أن القراءة نفسها مكسب.. وبـ يحكوا على "بنت" زارتهم فى مرة ومعاها كتاب ولما خلصته، اتفقت معاهم على تبديل كتابها بكتاب معروض عندهم ولما تخلصه ترجعه.. وبالفعل وافقوا على كده.. ومش محتاجين نقول أن عندهم مجموعة كتب للقراءة فى مجالات مختلفة وهما بـ يستقبلوا أى كتاب للعرض ماعدا "كتب الدين والسياسة" علشان ما يحصلش خلاف بين الناس. وبـ يوجهوا دعوتهم للمكتبات الكبيرة ودور النشر أنهم يبعثوا لهم كتب من إصداراتهم علشان الناس تتعرف على الكتب وتبقى مساحة القراءة أكبر. أصغر صانع: كمان لاقينا هناك "أصغر صانع مشغولات يدوية" وهو "رفعت مصطفى" 8 سنوات وبـ يعمل حظاظات من الخيوط وعاوز يبقى ده مشروعه لما يكبر، وبـ يبيع الواحدة بـ "3جنيه".. ها؟ حد عاوز يشترى؟.. طيب يقرأ.. طيب يشرب قهوة؟

...

باسيليز تاون لاونج: كافيه مريح فى وسط البلد
اصدرت في: 17/09/2014

فى قلب وسط البلد، هـ تلاقى كافيه مميز بـ يقدم شكل من أشكال من المعارض الفنية، من داخل المكان ومن الخارج، والسبب هو تصميمه الشبيه بالمتاهة وديكوراته الفريدة. "باسيليز تاون لاونج - Basilli's Town Lounge" يتكون من ثلاث غرف واسعين كل منهم يتميز بديكورات مبهرجة تشمل صور لمشاهير من ممثلين، ومغنيين وكمان أدباءمن ألفيس بريسلى وويليام شيكسبير، لغاية عبد الحليم حافظ وسعاد حسنى. بعد ما اختارنا المكان وصلت منيوهات باسيليزالبسيطة، والمكونة أغلبها من مشروبات، وكمان عدد من أنواع الآيس كريم منها بنانا سبليت المكون من قطعة موز عليآيس كريم فانيليا وشربات فاكهة. وإحنا بـ نقول لهم على طلباتنا عرفنا أن ماكينة القهوة عطلانة والموضوع ده قلل من حجم اختياراتنا. عمومًا، مجموعة كوكتيلات وعصائر الفاكهة فى باسيليز كانت ممتازة، ومن هنا قررنا نجرب كوكتيلهم الخاص، باسيلي كوكتيل (16جنيه)؛ كوكتيل مانجو، وموز، وزنجبيل وفانيليا. الفكرة بصراحة تستحق التحية بطعمها اللذيذ مع قوام سميك والفضل يرجع للموز والمانجو. طعم الفانيليا كان مختفى عن المشهد، لكن الزنجبيل قدر يضيف اللسعة المنعشة. طلبنا كمان عصير فراولة (10جنيه) وكيوى (11جنيه)؛ الفراولة كانت مسكرة وسميكة وفيها قطع من الفراولة، كل ده فى كأس طويل شكله شيك ومعاه شفاطة كبيرة تسمح بشرب قطع الفراولة الكبيرة. بالنسبة لعصير الكيوى، كان فى الحقيقة ينقصه نكهة الكيوى مع وجود طعم مر نتيجة استخدامهم لعصير الليمون.شكل العصير كان رائع، بـ يُقدم فى نفس كأس عصير الفراولة ويزينه شرائح من فاكهة الكيوى على الكأس من الداخل. بصراحة ثمنه فيه. أسعار باسيليز بشكل عام تعتبر رخيصة، الخدمة كويسة واختيارات العصائر لطيفة. صحيح ديكور المكان مش جديد، لكن أكيد سحر المكان وشكله المميز لازم يشدك. واحدة من الغرف لفتت انتباهنا، والسبب هو الكراسى والترابيزات كانت على شكل حطب، ورغم أن شكلهم بعيد كل البعد عن الشكل العام للكافيه، لكن الفكرة كانت هائلة. كل الثلاث غرف مريحين، مساحتهم كبيرة ومكيفين؛ لو كل ده مش مناسب بالنسبة لك، تقدر تقعد فى الخارج وتستمتع بالجو.

...

راندى فو كافيه: كافيه شيك بمركز هيلتون رمسيس التجاري في وسط البلد
اصدرت في: 25/08/2014

"راندى فو - Rendez-Vous" كافيه موجود في الدور الأول من مركز رمسيس هيلتون التجاري، أصبح وجهة أبناء الطبقة الأرستقراطية والأجانب –خصوصًا نزلاء فندق هيلتون رمسيس المواجه للمركز التجاري- لأنه حقيقي بـ يقدم خدمة 5 نجوم، بموقعه المفتوح والمكيف اللي بـ يكشف بالكامل الدور الأول للمول، والـ LCD العملاقة اللي ممكن تسليك. الكافيه مقسم لجزئين: الأول للأكل والثاني مخصص لمحبي الشيشة، واللي موجود فيه كشك زلابية صغير لعشاق الحلويات... هو مزيج غريب صحيح، بس ما ننكرش أن رائحة الشيشة والزلابية مع بعض عجبتنا. أول ما قعدنا قدموا لنا اثنين منيو شيك من الجلد البني: الكبيرة للأكل والصغيرة للمشروبات. منيو المشروبات معظمها مخصص للمشروبات الكحولية، الكابتشينو (23 جنيه) بالرغم من أن قهوته كانت قوية، يحسب لمنفذه المهارة والمجهود المبذول في كتابة كلمة Welcome بصوص الشوكولاتة فوق رغوة الكابتشينو -بعكس الكثير من المحلات اللي بـ تبهرك بأشكال مماثلة مع أنها لا تتطلب مهارة لأنهم بـ يستخدموا مسحوق الكاكاو على قطعة معدن مفرغة. قررنا أننا نجرب موكتيل (بدون كحول) فجربنا موهيتو التوت البري (32 جنيه)، قوامه سميك زيّ السموثي، وبالرغم من أنه حلو في المجمل إلا أنه كان فيه حمضية عصير ليمون قوية ومضاف إليهم صودا. إجمالًا الموهيتو كان منعش جدًا. طبعًا المنيو متاح فيه المشروبات الغازية، إلا أن أسعارها في المكان سياحية لدرجة أن علبة الكولا بـ 26 جنيه. لاحظنا أن المأكولات هنا مقدمة بطريقة جذابة، المنيو مقسم لسلاطات، حلويات وأطباق مصرية وإيطالية، واللي جربنا منه بيتزا بالخضروات (42 جنيه)، سعرها مناسب جدًا لحجمها وجودتها، أطرافها مقرمشة وجبنتها وفيرة، ده غير أن عليها مجموعة كبيرة من الخضروات المختلفة زيّ البروكلي، الفلفل بأنواعه والمشروم... طعمها كان رائع مفيش كلام. من الأطباق المصرية جربنا الكشري، واللي مقدم في طبق أبيض على هيئة تل من المكرونة، والأرز، والعدس والبصل. طعم الطبق كان عادي مش فارق كثير عن كشري العربية، ما عدا السعر طبعًا. الخدمة زيّ ما قلنا 5 نجوم، القائمين على الخدمة مذاكرين بروتوكولات الضيافة كويس، بزيهم النظيف وقدرتهم على التحدث باللغتين العربية والإنجليزية. بلا شك موقعه في مركز هيلتون التجاري هـ يعجبك لو أنت من عشاق التسوق، أو ناوي تدخل السينما الموجودة في الدور الأخير.

...

مشهور: كافيه مفاجأة فى مول طلعت حرب فى وسط البلد
اصدرت في: 24/08/2014

من الحاجات اللى تفرحنا لما نلاقى محلات فى أماكن لا يمكن تخطر لنا على بال، والمكان ده تحديدًا إحنا متأكدين أن مكانه معظمنا عمره ما فكر يروحه. وسط الدور الأرضى من مول طلعت حرب، "مشهور" يعتبر مكان راحتك بعد ساعات من اللف فى محلات الهدوم، وأكشاك الإكسسوارات ومحلات الأحذية المنتشرة فى المول صاحب السبعة أدوار. "مشهور" من الكافيهات اللطيفة، واسع ومكيف كله، بـ يقدم مشروبات وحلويات صغيرة. الأجواء هناك مريحة، وبعيدًا عن كلام ودوشة الزبائن، يعتبر فعلاً من الأماكن اللطيفة للاستمتاع مع أصحابك بمشروباته المنعشة. المكان عبارة عن أرضيات من البلاط، وترابيزات شيك وقعدة مبطنة باللون الأحمر، والديكورات كانت أجمل وأجمل مع مجموعة من النباتات الخضراء موزعة هنا وهناك. الترابيزات والكراسى فيه بينهم مسافة وسط مساحة الكافيه الكبيرة، وده بـ يكون مناسب لما المكان يتملى، خصوصًا فى مواسم الكرة لما كل الناس تتجمع حول شاشة التليفزيون الكبيرة؛ متوفر كمان أماكن خارج الكافيه علشان الأيام الزحمة، لكن اعمل حسابك أن مافيش مكيفات هواء وممكن الجو يكون مش مريح لحد ما. الشرب عند مشهور حاجة لطيفة رغم أن المنيو محدودة نوعًا ما. الكافيه ده بـ يقدم مجموعة من المشروبات الساخنة والباردة؛ شاى بالليمون سعره 7.50 جنيه وفنجان دوبل سبريسو المتين سعره 13.50 جنيه. المشروبات الغازية برضه موجودة لكن أغلى شوية، سعر الواحدة 8.75 جنيه والريد بول يوصل 20 جنيه للواحدة. مشهور عنده كمان مجموعة من الكوكتيلات المميزة فى المنيو، رغم أننا بعد ما شوفنا المنيو كويس، لاحظنا أنهم أشبه بحلويات خفيفة. طلبنا ميلك شيك شوكولاتة (14.75 جنيه)، ووصل فى كأس زجاجى طويل وعليه فوم لذيذ، وواحد عصير فلوريدا (12 جنيه) وأخيرًا واحد كريم كراميل (10.95 جنيه). العصير والكريم كراميل مستواهم كان متوسط بالنظر لأسعارهم الغالية، لكن الميلك شيك كان ثقيل وممتع مع نكهة شوكولاتة قوية. الخدمة كانت سريعة وودودة، والمشروبات بـ يقدمها جرسونات لابسين قمصان بيضاء وبنطلونات سوداء، والمدير كان لطيف وساعدنا فى اختيار المشروبات من المنيو. المشكلة الحقيقة كانت فى الأسعار، اللى كانت غالية شويتين؛ الواضح أنك بـ تدفع ثمن المكان مش طلباتك. على الناحية الإيجابية، مشهور بـ يقدم خدمات إضافية عن باقى القهاوى والكافيهات العادية، شاشة تليفزيون كبيرة، Wi-Fi مجانى والشيشة كانوا من ضمن الإيجابيات. صحيح مشهور بـ يقدم مشروبات وحلويات خفيفة فقط، لكن عندك كذا مطعم قريبين من الدور الأرضى بـ يعملوا أكلات سريعة تقدر تستمتع بها فى مكان الأكل الكبير الموجود فى وسط الواحة الصغيرة.

...

 قهوة البستان: تفرج على صندوق الدنيا في وسط البلد
اصدرت في: 05/07/2014

منطقة وسط البلد بزحامها وحركتها اللانهائية لها كاريزما خاصة، يمكن سحر البنايات القديمة اللي عامل كونتراست مع زحام المحلات بأضوائها المبهرة، ويمكن كم التفاصيل الحياتية الرهيب، اللي من خلالها تقدر تفك طلاسم الشخصية المصرية. دي مش أول مرة نقعد فيها على قهوة بلدي، خوضنا التجربة قبل كده في الزمالك، ولكن شتان ما بين الزمالك ووسط البلد... يمكن لأن وسط البلد رتمها أسرع وبالتالي مشاهدة العالم هناك أمتع، ده كان شعورنا على "قهوة البستان". الوصول هناك مش صعب، حتى لو مالكش في وسط البلد وشوارعها الحلزونية... انزل تقاطع شارع شريف مع شارع قصر النيل وخذ أول شمال. المكان واسع ويساع من الحبايب ألف زي ما بـ نقول في مصر. مش لازم تقعد جنب باب القهوة لأن أمامها ساحة تقع ما بين بنايتين، انتقي موقعك واستمتع. استقبلنا عم "رمضان" -قل له رمضان على طول بدون رسميات- بترحاب مصري أصيل وكأنه يعرفنا من سنين (مع أنه ما شافناش قبل كده) وأخذ الطلبات، قهوة مضبوط (2.50 جنيه)، حجر معسّل (2.5 جنيه) وزبادي في الخلاط. دقائق وعم "علي" حط القهوة على الترابيزة، القهوة كانت رائعة ومنعشة بعد يوم عمل شاق، بعدها جاءت الشيشة (مش لوحدها أكيد بس بأسلوب عم علي الهجومي، كان أحسن لنا لو كانت الشيشة جاءت لوحدها). في الأثناء النور قطع علينا، وبنفس الترحاب جاء (رمضان) ليعتذر عن صعوبة تقديم الزبادي لأن مافيش كهرباء. فطلبنا شاي بالنعناع (2.5 جنيه). الشيشة نظام Help yourself، وبالتالي ما تنتظرش من عم علي أنه يضبطها لك، لو أنت مش خبير في الشيشة يستحسن تأخذ معاك شخص قادر على التعامل، لأن عم علي خُلقه ضيق وما بـ يحبش الكلام الكثير! الشاي بالنعناع كان ظريف، وأجمل شيء في الوجود هو كوب الماء الساقع اللي بـ ينزل مع المشروب. وطبعًا زي أي قهوة مصرية أصيلة، وارد جدًا تجد باعة جائلين وشحاذين... رجل رمى مجموعة من حافظات الكروت البلاستيكية (من اللي بـ يُعلقها الناس المهمين في المؤتمرات) ما عندناش فكرة ممكن نعمل بهم إيه على القهوة، بس لو عاوز تنفّع الرجل المغلوب على أمره، اشتري! أحسن وأنفع حل هو الاعتذار بذوق أو التجاهل. إجمالًا، التجربة كانت ممتعة جدًا، قهوة البستان جامعة لكل أطياف وأجيال الشعب المصري؛ اللي بـ يحب الكورة موجود فيه شاشة كبيرة لعرض المباريات على فكرة، واللي بـ يحب بس... موجود، فنانين وسياسيين وحتى اللي بـ يتعلموا الطاولة كنوع من التجديد... موجود. أنت بس فضي نفسك وروح في أي وقت ما بين 7 صباحًا لمنتصف ليل القاهرة! 

...

باصورى ريستوران & كافيه: مطعم مفاجآة فى وسط البلد
اصدرت في: 25/06/2014

كل شارع من شوارع القاهرة غالبًا هـ تشوف فيه كافيهات ومطاعم، وأوقات كثير بـ يكونوا غير ملحوظين إلا لأهل المنطقة والمترددين على المكان، مثال على كلامنا "باصورى ريستوران & كافيه - Basury Restaurant & Café"، القريب من ميدان التحرير، المكان المميز والرومانسى نوعًا ما بـ يقدم أجواء هادئة ولطيفة تناسب كونه مطعم، وبساطة وراحة كونه كافية، والحقيقة أنه قدر يجمع بين الاثنين فى مكان لطيف. من خارج المكان، شكله يوحى لك أنه مجرد كافيه عادى، لكن أول ما تدخل، الموضوع بـ يختلف تمامًا. القعدة مكونة من جلد طرى فى صورة كنب مريح وترابيزات خشب لامعة على صفين بالطول قدروا يضفوا إحساس بالراحة على المكان. ديكورات باصورى تشعرك بأنها معرض فنّى؛ الحوائط مزيّنة بصور فوتوغرافية للعالم العربى بـ تعبر عن القصة اللى وراء كل صورة بشكل ما، أرضيات من الخشب اللامع بتصميمات مركّبة بـ تكمل انعكاس الأضواء المعلقة فى السقف على الأرض، أما المنظر الرائع بجد تقدر تشوفه بالليل؛ نقدر نقول أن التصميم بشكل عام كان فعلاً مبهر. باصورى بـ يقدم تشكيلة ضخمة من أنواع القهوة بحيث مستحيل تقدر تختار مجرد صنف واحد: قهوة تركى، أسبريسو، لاتيه، ماهيتو، موكا، أمريكان كوفى، قهوة فرنسية، قهوة مثلجة وكابوتشينو. كوب من الكابوتشينو سعره 12.95 جنيه، موجود منه حجم واحد، والحقيقة أن كوب واحد كان كبير كفاية. المشروبات الغازية والشاى متوفرين، وعلشان الأجواء الساخنة اللى بـ نعيشها اليومين دول، مجموعة من العصائر الفريش جاهزين للترحيب بك، بس الحقيقة أن اللى لفت انتباهنا أكثر كان كوكتيلاتهم المدهشة: تفاح بالتمر، يوسفى بالرمان وكوكتيلنا المفضل مانجو مع فراولة وفانيليا، سعر الكأس الكبير 10.95 جنيه فقط. على الرغم من وجود منيو مشروبات شيّقة، باصورى كمان عنده الكثير من ناحية الأكل. تشكيلة من الشوربة الساخنة، منها شوربة كريمة فراخ (11.95 جنيه)، سلاطات طازجة منها سيزر سلاد كبيرة (22.95 جنيه) مع مجموعة من الساندويتشات، برجر وأنواع متنوعة رائعة من البيتزا بحجم كبير. طلبنا واحدة بيتزا مارجريتا سعرها 19.95 جنيه وواحدة بالخضروات سعرها 22.95 جنيه. باصورى كمان بـ يقدم بيتزا بإمضائه عليها قطعم من اللحم المدخن، وزيتون، وفلفل، وبصل وموتزاريلّا. أخيرًا وليس آخرًا، آخر صفحة فى منيو باصورى المميزة كانت فى الحقيقة أكثر الصفحات إثارة: الآيس كريم. الآيس كريم هنا مش عادى، النكهة مع القوام قدروا يخلقوا مزيج ممتاز، وقدر باصورى يضع بصمته من ثانى اللى بـ تظهر جمال الطبق؛ باصورى Coup عبارة عن خليط من آيس كريم فراولة، وفانيليا ومانجو، عليهم قطع فاكهة لذيذة، مع صوص الكاراميل اللذيذ. الاختراع المبهج سعره 19.95 جنيه، وصحيح كان طعمه تحفه، لكن السعر كان مبالغ فيه شوية. على العموم، باصورى عنده منيو تضم اختيارات رائعة من الوجبات الخفيفة، والأطباق الرئيسية، والمشروبات والحلويات تقدر تستمتع بهم وسط أجواء لطيفة، لكن خلّى بالك من تكلفة الخدمة عند دفع الفاتورة لأنهم دفّعونا كثير.

...

مقهى ريش: التاريخ البديل للمثقفين
اصدرت في: 26/01/2013

بناه ثرى ألمانى وباعه لواحد من الرعايا الفرنسيين اسمه هنرى بير واللى سماه "ريش" على اسم ريش كافيه الشهير فى فرنسا، وبعدين آل المقهى لمجدى ميخائيل صاحب مقهى ريش الحالى وهو أول مصرى يمتلك المقهى، كان بـ يقعد فيه كثير من الشعراء والفنانين، ويعتبر مقهى ريش ملتقى الأدباء والمثقفين زى مثلًا نجيب محفوظ، ويوسف إدريس، وأمل دنقل، ويحيى الطاهر عبد الله، وصلاح جاهين، وثروت أباظة، ونجيب سرور، وكمال الملاخ، وغيرهم كثير من اللى كانوا بـ يحضروا نداوت نجيب محفوظ الأسبوعية واللى كان بـ يعملها عصر كل يوم جمعة منذ عام 1963.ولما نرجع بالتاربخ للخلف شوية كمان هـ نلاقى أن عبد الرحمن الرافعى قال في كتابه "تاريخ مصر القومى" أن مقهى ريش ملتقى الأفندية من الطبقة الوسطى، وأنها عُرفت كمكان بـ يجتمع فيه الداعون إلى الثورة والمتحدثون عن أهميتها وعن حال البلاد.لأ وكمان كان لمقهى ريش دور كبير فى ثورة عام 1919، وبـ يقول أصحاب الحكايات الثقافية الخاصة أن صاحب المقهى في الوقت ده كان عضو في واحد من أهم التنظيمات السرية، وبـ تقول الحكايات برضه أنهم بعد 80 عام من ثورة 1919 لاقوا آلة لطبع المنشورات. وكمان فى سنة 1972 انطلقت منه ثورة الأدباء احتجاجًا على اغتيال الروائى الفلسطيني غسان كنعانى.. وفى ديسمبر عام 1919 شهد المقهى محاولة اغتيال رئيس الوزراء وقتها يوسف وهبة.وفي ساحة المقهى قدمت فرقة الفنان عزيز عيد المسرحية عدد من مسرحياته اللى قامت ببطولاتها الفنانة روزاليوسف، وكمان بعض المونولوجات اللى كان بـ يغنيها الفنان محمد عبد القدوس، والد الأديب إحسان عبد القدوس.شوفتم التاريخ قد إيه مرتبط بالمكان ده؟ المكان عبارة عن مساحة مستطيلة واخده مساحة مهمة فى منطقة وسط البلد بالضبط هـ تلاقوه جنب ميدان طلعت حرب، مع أن البياعين من كل صنف ولون حاوطوا المكان إلا أنه قادر يفضل مقهى المثقفين والأدباء لحد دلوقت.. وفيه بـ نلاقى حفلات توقيع لكبار الكتاب وندوات خاصة بـ تتعمل فيه، لكن اللى يؤخذ عليه أنه غالى ومش أى حد يقدر يقعد فيه، خاصة الشباب اللى لهم طقوس ثانية خالص فى القهاوى ممكن نتعرض لها فى مقهى ثانى فى وسط البلد برضه، واللى يتاخد على المقهى برضه هو أن واحد من كبار الشعراء قال عليه أنه مكان للنخبة يعنى المثقفين اللى ماسكين كل حاجة فى أيديهم وهو الشاعر نجيب سرور، لأ وكمان عمل ديوان اسمه "بروتوكولات حكماء ريش" وده كان نتيجة الظلم اللى تعرض له فى حياته واللى وصل للنفى خارج مصر.. والسجن والتعذيب.. واللى كان بعض المثقفين اللى موجودين فى ريش وقتها سبب فيه.. اسمعوه وهو بـ يوصفهم بـ يقول:نحن الحكماء المجتمعين بمقهى ريش ..من شعراء وقصاصين ورسامين ..ومن النقاد سحالى «الجبانات» ..حملة مفتاح الجنة ..وهواة البحث عن الشهرة ..وبأى ثمن ..والخبراء بكل صنوف «الإزمات» ..مع تسكين الزاى ..كالميكانيزم!نحن الحكماء المجتمعين بمقهى ريش ..قررنا ماهو آت:* البرتوكول الأول:لا تقرأ شيئًا .. كن حمال حطب ..وأحمل طن كتب ..ضعه بجانب قنينة بيره ..أو فوق المقعد ..واشرب .. وانتظر الفرسان ..سوف يجيئ الواحد منهم تلو الآخر ..يحمل طن كتب! ..شوية ممكن بـ يوصف حال بعض المثقفين فى عصرنا لأن كل العصور بـ تتشابه، خاصة فى الأدعياء، وعمومًا إحنا كده عرضنا كل وجهات النظر حول المقهى.. ونقول لكم روحوا أنتم وشوفوه واقرأوا عنه وكونوا رأيكم الخاص عن ريش ذكريات الثقافة والمثقفين وأنصاف المثقفين وأدعياء الثقافة.* البروتوكول: هو صيغة تعاون بين يتفق عليها مجموعة من الأطراف بمواد وقوانين محددة

...

إيتوال: كافيه وركن هادئ فى وسط البلد
اصدرت في: 17/10/2012

الهدوء مهم جدًا، لما الأصحاب يحبوا يقعدوا مع بعض فـ يحكوا أخبارهم، ولما حد يحب يقعد مع مج كابتشينو لوحده من غير ما حد يزعجه، أو لما اثنين مرتبطين عاوزين يقعدوا مع بعض من غير ما يكون اللى قاعدين على الترابيزة اللى أمامهم سامعين كل اللى بـ يقولوه. ويا سلام لما يبقى الهدوء مع ديكور كلاسيك رقيق جدًا يحسسك بزمن الأبيض و الأسود والرومانسية بتاعة زمان.. إحنا شوفنا كل ده متوفر فى كافيه «إيتوال -«Etoile ."إيتوال" عبارة عن 3 أدوار، الدور الأول للحلويات الشرقية والتورتات بأنواعها والدور الثانى للحلويات الغربية والدور الثالث هو الكوفى وبـ يقدم كل المشروبات الساخنة زى الشاى والنيس كوفى والكابتشينو والهوت شوكلت والميلك شيك وحاجات ثانية كثير ومشروبات باردة بأنواعها وعصائر فريش وفروت سلاط وجاتوه وكرواسون وآيس كريم.إحنا لما روحنا شوفنا الأسعار كانت فى المتناول فمثلاً لقينا كابتشينو وكرواسون (12 جنيه) وآيس كريم (10 جنيه) وبيبسى مع جاتوه (12 جنيه) وفروت سلاط (10 جنيه) وميلك شيك (10 جنيه)، والآيس كريم بـ يُقدم وعليه إضافات مشهية جدًا زى صوص الشوكولاتة وبـ يكون تحفة وكراميل كمان وويفر بالكريمة، أما الكابتشينو كان مُقدم بشكل جميل وكان مرسوم على وشه وردة، الجاتوه كان ما يفرقش فى الجودة عن محلات الحلويات المشهورة. وبالرغم أن الأسعار فى المتناول إلا أن الخدمة تحسسك أنك فى مطعم شيك جدًا.والمكان بقى استراتيجى جدًا، هو بالضبط فى الإسعاف أمام دار القضاء العالى بجوار مطعم شبراوى، يعنى قريب من المواصلات ومحطة المترو.إحنا وأصحابنا أخذنا على المكان وبقينا نتقابل هناك دائمًا، وفى مرة اتعمل لنا مفاجأة من أصحابنا واحتفلوا بعيد ميلادنا هناك، الكوفى كان بـ يحتفل معانا وشغلوا أغانى عيد الميلاد والجرسونات قدموا لنا الأطباق مكتوب فيها اسمنا وحسينا فى اليوم ده كأننا ملوك. تخيلنا بصراحة أن ترتيبات المكان تكلفت مبلغ كبير لكن بعد كده عرفنا أنهم ما دفعوش غير ثمن التورتة والمشروبات بس وكل مظاهر الاحتفال كانت هدية من الكافيه.من الحاجات اللى هـ تخليك ترتبط بالمكان هناك معاملة الجرسونات ومستوى الخدمة، لأن الطلبات بـ تُقدم بسرعة وبـ تحس من طريقة التعامل أنك أفضل زبون هناك ولو شافوك متضايق شوية بـ يعملوا حاجات بسيطة تخليك تبتسم يعنى ممكن يرسموا لك على وش الكابتشينو وجه بـ يضحك أو قلب أو يرسم لك على الآيس كريم بالشوكولاتة، كمان الكوفى فيه Wi-Fi علشان لو عاوز تتصفح الإنترنت وأنت بـ تشرب حاجة.لما هـ تروحوا هـ تتبسطوا بالمكان كثير وممكن كمان يبقى مكانكم المفضل.

...

كافيه وجاليري كانست: كوفي شوب رخيص في وسط البلد
اصدرت في: 09/05/2011

انك تلاقي كوفي شوب هادي في وسط البلد مش حاجة سهلة. فلو عاوز تشرب قهوتك في هدوء وانت بـ تشتغل٬ احنا لاقينالك المكان اللي ينفع. اسمه «كانست - Kunst » ودي معناها فن بالألماني٬ المكان اللي معتبر نفسه جاليري وكافيه في نفس الوقت في شارع ضيق مليان شجر جنب قهوة البورصة. «كانست» بـ يعتبر نفسه مكان معمول عشان التبادل الثقافي وعشان يخلق مساحة للإبداع والحوار. والجاليري أحياناً بـ يستضيف عروض أفلام ومعارض مختلفة٬ بس ده مش بطريقة منتظمة. المكان عبارة عن دورين٬ الحيطان بيضة وماعليهاش حاجة٬ وكل حاجة بسيطة الترابيزات والكراسي والطفايات الفخار. لو بـ تدور على خدمة واي – فاي المكان ده مثالي٬ الإنترنت ببلاش والمكان مليان أكباس. هـ تروح للكاونتر وتعمل الطلب بتاعك٬ وانت هناك هـ تلاقي سمك محطوط في أحواض إزاز على الكاونتر. واحنا واقفين أخدنا بالنا ان ماكينة الإسپريسو صغيرة قوي وده خلانا مش عارفين الماكينة دي هـ تطلعلنا ايه٬ بس أما شربنا الإسبريسو عرفنا ان شكنا ما كانش ليه داعي. الإختيارات اللي في المنيو مش كتيرة٬ فيه لاتيهات وكا پيتشينو أسعارهم من 12 لـ 15 جنيه٬ والإسپريسو بـ8 جنيه للشوت الواحدة. الإسپريسو اتقدم مع مكعبات سكر٬ وكان غني وعجبنا إنهم حاطين عليه فوم (رغوة) كده مزينة الوش. وبما ان الكافيه بـ يستخدم قهوة «لاڤازا - Lavazza » وبس٬ فان قهوتك تطلع حلوة دي حاجة مضمونة. المكان للأسف ما بـ يقدمش أكل. جنب القهوة٬ الكوفي شوب بـ يبيع رسومات مطبوعة لفنانين محليين٬ ومجموعات علب مجوهرات. لكن ده مش "فن" كافي انه يبرر اسم المكان٬ ودي حاجة ممكن تضايق محبي الفن اللي هـ يخشوا المكان متوقعين منه فن أكتر. «كانست» ماهواش مكان مالهوش حل٬ لكنه مكان كويس لوعاوز تهرب من الدوشة وتشرب قهوة حلوة.

...

جروبي: نوستالچيا مكان "كان" أيام زمان
اصدرت في: 30/04/2011

«جروبي» كافيتريا البهوات والباشوات، النجوم والعساكر الأجانب. افتتحه جاكومو جروبي السويسري سنة 1892، وكان واحد من مشاريعه الكتيرة. فضل جروبي يُعتبر «Tamarai» بتاع زمان لغاية ما تم تأميمه سنة 1981. بعد التأميم بكام سنة، وزي حاجات كتيرة في البلد، فقد المكان كل طعم ولون، ومافضلش منه غير هيكل خاوي من المحتوي، سوفونير لقاهرة بلعها التراب. الكافيتريا من برة ممكن تخدعك، لسة المدخل المتزين بالموزّايك وديكور أواخر القرن الـ19 بحالة كويسة، زي باقي ميدان «طلعت حرب» اللي الكافيتريا موجودة فيه. أول ما تخطي عتبة الباب وعينيك تقع عليه من جوه، هـ تحس ان الزمن جار عليه. لما تدخل هـ تلاقي بيتيفور وشيكولاتة وكيك معروضين في المدخل. الكافيتريا سقفها عالي ومتزين بنجف قديم وأنتيكا. الجو العام هادي، وفاتر. الويترز لابسين قميص وبنطلون، يدوا شعور بالرسمية مع إن الخدمة اللي بـ يقدموها بعيدة كل البعد عن الرسمية وتكاد تكون منعدمة. المنيو بتاعهم فيه كل أنواع الأكل، لكن في وقت زيارنتا كان كتير من الحاجات اللي على المنيو مش موجودة! «Trois Petit Cochons» وترجمتها 3 خنازير صغيرين! من أشهر أطباق الأيس كريم في المكان وهـ تلاقي كل جيل الخمسينات والستينات عارفينه. الحلويات والتورتة والآيس كريم هي تخصص المطعم، ولسه لغاية النهاردة بـ يقدم أطباق بأساميها الفرنساوي القديمة. إحنا من باب التغيير جربنا سندويتش جبنه رومي سايحة (6 جنيه)، سعر كويس على عكس الطعم، وعصير ليمون (10 جنيه)، اتقدم ساقع كفاية، لكن طعمه كان ممكن يبقى أحسن. التورتات فيه أسعارها بـ تبدأ من 30 لـ240 جنيه، وأطباق الحلويات الشرقية من 17 لـ170 جنيه، أم علي وبسبوسة وكنافة. لو انت في وسط البلد، وعاوز تستكشف جزء من تاريخ وسط البلد اتمشى لـ«جروبي»، وعيش جواه ذكريات القاهرة القديمة.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن