الزمالك كافيهات in Cairo, Egypt

كافيهات

خميرة: مخبوزات فريش في الزمالك
اصدرت في: 06/09/2016

نعتقد أن محلات المخبوزات ثاني مكان الواحد ما بيقدرش يقاوم فيه منتجاته بعد الآيس كريم، وده لأن أي مخبز –بجانب بيع العيش اللي منقدرش نعيش من غيره- بيبقى عنده مقرمشات ومعجنات أشكال وألوان. خميرة - Khamera من ضمن الأماكن اللي مقدرناش اللي نقاوم نرجع لها بعد آخر زيارة لينا –من 3 سنين مثلًا- علشان نشوف نظامهم إيه. لسوء حظنا كانوا مشغلين الشفاط جوه وبالتالي ما جاتلناش فرصة أننا نشم أحلى ريحة في العالم؛ وهي ريحة المخبوزات. المحل صغير فأنت هتشوف كل منتجاتهم قدامك. على الكاونتر لاقينا 3 أطباق تقدر تدوق منهم قبل ما تشتري، جربنا منهم بسكويت باللوز و الشوكولاتة البيضاء، بالرغم من أن طعمها لذيذ إلا أننا حسينا أنها ناشفة زيادة عن اللزوم وضروري يكون معاها كباية شاي أو قهوة تسقيها فيها قبل ما تقضم وإلا سنانك ممكن تروح فيها. لفت نظرنا برضه في الطبق الثاني بسكويت فيه قطع صغيرة لونها أحمر وأخضر فكرتنا بالكيك اللي بيبقى فيه قطع فواكه مجففة، فتوقعنا أنه يكون البسكويت حلو، ولكن المفاجأة كانت أن القطع دي قطع طماطم وزيتون أخضر، ونعترف أنها كانت مفاجأة لذيذة؛ لأننا ما جربناش حاجة شبه النوع ده قبل كده. معروض برضه مجموعة من الكرواسونات والدانيش، قررنا أننا نختار منها كرواسون بالزعتر (10 جنيه)، واللي كان فريش ومليان زعتر، إلا أن عيبه الوحيد أن الجبنة فيه –حسب ما مكتوب المفروض أنها لبنة- كانت شبه معدومة. وبما أننا بنحب أي حاجة عليها جبنة؛ قررنا نجيب مقرمشات مربعة بالجبنة الرومي، وهي من المنتجات المشهورة اللي هتلاقيها عند أي خباز (45 جنيه للكيلو)؛ المقرمشات فريش وخفيفة وأحلى حاجة أن جبنتها كثيرة. أما للناس اللي بتحب حبة البركة فالباتون ساليه (55 جنيه) اللي معمول به كان طعمه لذيذ وخصوصًا أن كمية حبة البركة فيه كبيرة. صحيح إحنا مش من هواة البقسماط، ولكن ده ما يمنعش أننا جربناه (30 جنيه)، والحقيقة أنه هش جدًا وهيعجب أي حد كييف قاعدة الصبح بالبقسماط مع الشاي. في النهاية، نقدر نقول أن التجربة في مجملها كانت لطيفة ولذيذة؛ الحاجات اللي دقناها كانت فعلًا لطيفة، صحيح المحل مش هيبهرك بديكوراته وطريقة عرضه زي محلات ثانية كثير تغريك، إلا أن المنتجات بتثبت جدارتها بنفسها.

...

فور فات ليديز: أحلى حلويات في الزمالك؟
اصدرت في: 30/08/2016

طبعًا كلنا عارفين شارع البرازيل، واحد من أزحم شوارع الزمالك والشهير بأكابر عالم الحلويات زي نولا وخميرة ولقمة عيش وجيلاتو ميا وغيرهم. الجديد في الموضوع إن "ذا فور فات ليديز The Four Fat Ladies" ساب مكانه في اليمامة سنتر ودخل حرب الحلويات المشتعلة في شارع البرازيل. نبدأ مع وصف المكان؛ مخبز صغير فيه أربع ترابيزات متوصلين ببعض بحيث يعملوا ترابيزة كبيرة، مع أربعة كراسي على جنب والجنب الثاني فيه كنبة كبيرة. صحيح اختيارهم للكنبة مش عملي، لكن الأكيد إن أجواء وديكورات المكان باللونين الأبيض والبرتقالى للحوائط والمعالق الخشب المتعلقة على الشباك وكمان الصورة المكتوب فيها "Peanut Butter is my boyfriend" والصبورة المكتوب عليها المنيو يتميزوا بالبساطة والشياكة في نفس الوقت. بساطة المكان مش ظاهرة في الديكورات وبس، الحلويات عندهم كمان مالهاش حل. أول حاجة هتلاحظها في حلويات ذا فور فات ليديز المتنوعة بين كيكات ومافينز وفطائر وتشيز كيك أنك بتاكل حاجة بيتي نظيفة ومختلفة عن باقي المخابز، وكمان المفاجئة أنهم رجعوا الماربل كيك والباندت كيك Bundt Cakes مرة ثانية. ربع ساعة كاملة وإحنا واقفين قصاد ثلاجة العرض زي الأطفال التايهين؛ تخيلوا! في الأخر قررنا نبدأ بسلايس فادج شوكولاتة بزبدة الفول السوداني (19.50جنيه) مع قطعة كاروت كيك (١٦ جنيه) وسولتد كراميل براوني بايت Salted Caramel Brownie bite (4.50 جنيه) وسمورز براوني بايتس S'mores Brownie Bites(4.50 جنيه). المختلف في الفادج كيك عن الموجود في السوق أنها رطبة وطرية جدًا، وكل قضمة منها بتدوب بسهولة وكمان فروستينج زبدة الفول السوداني كان مسكر ولذيذ. نروح على الكاروت كيك المعمولة زي ترايفل في طبق بلاستيك غويط وواضح فيها نكهة القرفة، وصحيح سكر الكيك نفسه كان قليل، لكن الكريمة صاحبة القوام الرائع كانت مسكرة بزيادة. مافيش شك أن كل حاجة في الكاروت كيك لوحدها كان فيها مشكلة، لكن الكيك مع الفروستينج خدموا بعض وعملوا لنا كاروت كيك هايلة. بصراحة كنا قاصدين نسيب البراوني بايتس التحفة للأخر علشان تكون مسك الختام. قطعتين فادج براوني مليانين كراميل، وتقدر تقول عليهم ساندويتشات براوني طرية محشية كراميل وواضح فيها طعم الشوكولاتة القوي اللي عمل شغل عالي مع الكراميل. أما السمورز براوني فكانت هايلة بس طعمها أقرب للكوكي منه للبراوني. علشان نلخص تجربتنا في ذا فور فات ليديز ممكن نقول أنها كانت هايلة، ومافيش شك أنهم كسبوا ملحمة حلويات شارع البرازيل بكل جدارة خصوصًا أنهم بيقدموا الحلويات المعروفة بلمستهم الخاصة، وكل ده وسط أجواء مريحة وموظفين هايلين. نقدر نقول كمان إننا ماقابلناش مشاكل يومها ويسعدنا إننا نقدم لكم الفائز في ملحمة حلويات شارع البرازيل. الأجواء هناك هايلة ومريحة والموظفين ممتازين، لكن سر نجاح ذا فور فات ليديز هو الحلويات اللي كلنا بنحبها ومن غير افتكاسات ملهاش لزوم.

...

آد & رول: حمى الآيس كريم رولز وصلت الزمالك
اصدرت في: 01/08/2016

نعتقد أن الآيس كريم ارتبط في ذهننا ببسكويتة وعليها بولة، ولكن من فترة ظهرت محلات بتقدم الآيس كريم بشكل غير تقليدي، وبدل ما يكون بولات عادية بقى يتقدم على شكل رول. وبجانب شكله الغير تقليدي، طريقة صنعه هي كمان غير تقليدية بالمرة، وده اللي حبينا نشوفه بعنينا في محل آد & رول الموجود في الزمالك. المحل مش صعب توصل له بالرغم من أنه في الدور الأول في العمارة المقابلة لكافيه سوبريم؛ وده لأن المحل إضاءته قوية واللي تقدر تشوفها من خلال الواجهة الزجاجية في شارع إضائته أساسًا مش قوية. من غير تفكير كثير مشينا لبوابة العمارة الكبيرة، وطلعنا مجموعة سلالم ودخلنا شمال. وقت زيارتنا، المحل كان زحمة كأن كل الموجودين في الزمالك قرروا أنهم يأكلوا آيس كريم. الفكرة الأساسية في آد & رول أنك هتختار أساس للآيس كريم بتاعك من ضمن 3 نكهات (فانيللا – شوكولاتة – زبادي مثلج) أو نكهة المستكة واللي سعرها 5 جنيه. بعد ما هتختار الأساس، قدامك إضافات كثيرة ممكن تختار منها بتتفاوت في أسعارها؛ ما بين أنواع الشوكولاتة المختلفة (كيت كات، مارس، فريرو روشيه... إلخ)، فاكهة (واللي كان شكلها فريش ومشجع)، كيك، قهوة وبسكويت ومكسرات، ده غير أنواع مميزة جدًا مكونة من الحلويات الشرقية. وأقل سعر للإضافات هو 15 جنيه للفاكهة، أما الأغلي من نصيب المكسرات وهو 25 جنيه. اللطيف أن أول توبينج بيبقى ببلاش وأي إضافة تانية سعرها 5 جنيه. قررنا أننا نطلب الآتي: نكهة الفانيللا وعليها نوتيلا وصوص شوكولاتة (20 جنيه)، ونكهة الليمون بأساس زبادي مثلج (15 جنيه)، وعلشان ما نروحش وإيدينا فاضية أخذنا نكهة الكابتشينو بأساس شوكولاتة وصوص كراميل (20 جنيه) تيك أواي. بالرغم من أننا كنا متحمسين أننا نتفرج على الآيس كريم وهو بيتعمل، إلا أن الكاونتر اللي واقف عليه 3 أشخاص بيعملوا عليه الآيس كريم ما كانش مساعدنا لأنه أعلى من الصاج المثلج اللي بيتعمل عليه المنتج، فلازم تكون مقرب جدًا علشان تشوف العملية من أولها لآخرها. أول حاجة وصلت لنا كانت الليمون بالزبادي؛ الزبادي المثلج كريمي وطعمه غني، إلا أن نكهة الليمون ما كانتش بالقوة اللي كنا عايزنها –فننصحك لو بتحب الليمون اختاره مع أساس الفانيللا لأن نكهة الزبادي كانت قوية جدًا. أما النوتيللا بأساس الفانيللا كان أحلى حاجة ذقناها في التجربة بلا منازع؛ لأن كمية النوتيللا كانت كويسة ومناسب جدًا لأساس الفانيللا وصوص الشوكولاتة. الميزة في آد & رول أن كمية الآيس كريم أكثر من ممتازة، لدرجة أن في أول مرة في حياتنا ما نقدرش نكمل الكوب كله. بالنسبة لآخر حاجة طلبناها تيك أواي –وهي آيس كريم بنكهة الكابتشينو بأساس شوكولاتة وصوص الكراميل- حصل موقف غريب؛ فبعد ما خلاص اتعمل واتقفل بغطاء –هو مش غطاء مخصوص للعلبة، هو غطاء لكوبايات العصاير المفتوح من فوق- طلب اللي عمل الآيس كريم من واحد من العاملين أنه يكمل تجهيز الطلب كتيك أواي، فالعامل أخذ الآيس كريم ودخل المطبخ –قلنا أكيد هيغلفها ببلاستيك أو حاجة- بعدها 10 دقائق رجع لنا نفس الشخص –بعد ما اللي عمل الآيس كريم فكره- بالآيس كريم من غير أي تغليف، واكتفى أنه يديلنا معلقة ومنديل... طلبنا كيس... كان رده أن ما عندهمش، ولكن فيه حامل أكواب ما يخرجش إلا لأربع طلبات بس! طبعًا إحنا روحنا بالآيس كريم وهو في حالة مأسوية قللت من استمتاعنا به بس هو كان كالآتي؛ نكهة الشوكولاتة كانت الأقوى، وبيظهر طعم قوي للقهوة كل فترة، صوص الكارميل ما بدأش يظهر طعمه إلا في الآخر لما وصلنا لقاع الكوباية نتيجة للسيحان اللي حصل، وهو في مجمله طعمه حلو ولكن مناسب لشخص بيحب الشوكولاتة أكثر من القهوة. بغض النظر عن عدم استعدادهم لطلبات التيك أواي –مع أن المحل عنده دليفري- إلا أن آد & رول بيقدم في المجمل آيس كريم طعمه حلو –بالذات النكهات الأساسية لأن الإضافات ممكن تلاقيها في أي مكان- وكميته ممتازة هتعجب اللي بيحب الآيس كريم.

...

ليتشي: فطارك سلاطات وشوفان من خبير العصائر المعروف
اصدرت في: 27/07/2016

في 2012 لما "ليتشيLychee " فتح كان من أوائل الأماكن اللي تفتح بار مخصوص للعصائر والسموزي في القاهرة. أي واحد من المهتمين بالأكل الصحي أكيد طار من الفرحة لما سمع إنهم أضافوا للمنيو بتاعتهم أصناف أكل جديدة، خصوصًا إنها بتقدم أكلات لذيذة وسريعة يستمتعوا بيها مع عصائر وسموزي ليتشي اللي كلنا بنحبها. المكان هنا صغير وتقدر تستمع فيه بأكلات "صحية سريعة". عجبنا شكل المكان واتفرجنا على الصبورات اللي مكتوب عليها أصناف السموزي ومكونات كل واحد منهم. البرطمانات والزجاجات الفاضية المرصوصين فوق أرفف خشبية والصور الصغيرة على الحوائط أكيد أضافوا لشكل المكان المميز. المكان كان مليان على أخره بشباب القاهرة الجميل وهم بيشربوا سموزي ليتشي، وصحيح عندهم دكة صغيرة تكفي من 5-6 أفراد، لكن الأحسن أنك تشتري وتمشي زي معظم محلات العصائر. بدأنا رحلتنا مع سلطة كال واي 'The Kale Way'، واللي وصفتها المنيو بأنها تفاح وفول سوداني مملح وتوت مجفف وتوت أحمر مجفف وخيار وبذور كتان ذهبية وكرنب. في الأول كنا متخيلين إنها خلطة منعشة لذيذة من المكونات الطازة تناسب جو الصيف، لكن السلاطة للأسف كانت بعيدة خالص عن توقعنا. المكونات المهمة اللي بتضيف الطعم المميز للسلطة زي التوت والتفاح والسوداني كانوا قليلين جدًا فطبيعي أن طعمها يطلع عادي. السلطة كمان غير إن مافيش نكهة مميزة كان فيها حاجة مش مريحة. الكرنب مع قطع التفاح كان لازم يتقطعوا أحسن من كده، فكان صعب حتى إننا نأكلهم بالشوكة، أما الخيار فكان متقطع لشريحة طويلة رفيعة، فأكلناها زي السباجيتي. الموضوع مش لطيف خالص يا جماعة. ندخل على الطبق الثاني اللي كان أحسن شوية وطعمه أفضل وهو بريك فاست أوت ميل breakfast oatmeal (40 جنيه). الطبق عبارة عن توت أزرق وموز وبذور شيا واختيارك من حليب اللوز أو حليب خالي الدسم. صحيح إحنا اخترنا حليب اللوز لكن اللي وصل حاجة ثانية، والشوفان – المضاف له شوية مياه – كان سميك القوام وأحسن حاجة إن السكر مضبوط في طعم الأكل. التوت الأزرق المجمد كان مهم علشان يضيف طعم الفاكهة اللذيذ أول لما اختلط وساح مع الشوفان الدافئ، وطبعًا إضافة القرفة للطبق كانت مسك الختام. الطبق فعلًا لذيذ وبيشبع ومليان بروتين ومفيد جدًا للصحة بفضل بذور الشيا وكمية الفاكهة الكبيرة. قررنا نجرب طبق حلو صغير جديد من ليتشي وهو كوكي خالية من الجلوتين (15 جنيه) اللي كانت ناشفة شوية، بس طعمها لذيذ وتشبه فطيرة القرفة. الكوكي ملفوفة في ورقة علشان تأكلها براحتك ومرصوصة على الرف جنب كوكيز بنكهات ثانية، وبكده تقدر تختار أي واحدة على السريع لو كنت جعان. سهل نقول بعد تجربتنا لعصائر وسموزي ليتشي أنهم كسبانين معانا بدون منافس. الكيوي بليند (18 جنيه) كان مسكّر ومنعش، وواضح جدًا إن الكيوي طازة على الأخر. العصائر الجاهزة كان لها نصيب معانا وطلبنا منهم كالمينج جرينز Calming Greens (25 جنيه) وأكيد اسم كالمينج ده له سبب. العصير غير أي حاجة خضراء جربناها في حياتنا، العصير ده بالذات فيه كاموميل -المعروف بخصائصه المهدئة- وتوت أزرق. الأثنين دول ومعاهم شوية أناناس وجزر أضافوا طعم مسكر علشان يقاوم أي نكهة حادقة من الكرنب والجرجير؛ كوكتيل مثالي مافيش كلام. بالنسبة للسموزي قررنا نطلب 'I Love Watermelon' وهو كوكتيل بسيط من البطيخ والنعناع وباشن فروت. زي ما كلنا عارفين إن البطيخ والنعناع كوكتيل محبوب في الشرق الأوسط، بس باشن فروت إزاي؟ الموضوع شكله في شغل عالي يا جماعة؛ تعالوا نشوف! السموزي بشكل عام كان روعة الروعة. مسكر وبيروي عطشك وكمان منعش، ويعتبر المشروب المثلج المثالي لحر الصيف الرهيب. كمان البطيخ المسكّر عمل تناغم رائع مع طعم الباشن فروت اللاذع. بصراحة بعد السموزي ده نقدر نقول إن الباشن فروت هو النصف الثاني للبطيخ، وأكيد نفسك هتروح عليه بعد ما يخلص. على العموم، الشيك كان عامل 168 جنيه، مش بطال طبعًا لو بصينا إن مافيش حد يتوقع من مكان بيبيع عصائر باردة مليانة مكونات أورجانيك ويكون رخيص جدًا. يمكن زعلنا شوية إن في حاجات مش موجودة – زي حليب اللوز – والجرسونات كانوا بيتوهوا شوية، بس الخدمة كانت كويسة مافيش كلام. صحيح في أكلات جديدة مش على المستوى المطلوب، بس مافيش شك إن ليتشي هو أول أخصائي عصائر وسموزي من نوعه.

...

ماندرين قويدر: حلويات شرقية من اللي قلبك يحبها في الزمالك
اصدرت في: 24/06/2016

الحلويات الشرقية تعتبر من أساسيات أي عزومة أو سفرة في رمضان؛ لأن زي ما الواحد بيحلم وهو صايم بأكلة حلوة، زي ما بيكون نفسه في حاجة حلوة بعدها وخصوصًا أن الواحد بيبقى عنده نقص في السكر. طبعًا فيه مليون حاجة ثانية مفيدة ممكن ناخد منها سكريات، إلا أن الواحد بيضعف دايمًا قدام الحاجة الحلوة. من الأماكن اللي بنضعف قدام حلوياتها هو محل ماندرين قويدر – Mandrine Koueider، واللي بقاله سنين فاتح في الزمالك قدر من خلالها أنه يكسب شعبية كبيرة؛ مش بس بحلوياته الشرقية، ده كمان بالآيس كريم اللي بيقدمه –خصوصًا تورتة آيس كريم الزبادي بالتوت المشهورة. وبما أن الأخيرة غنية عن التعريف، وبما أننا في رمضان؛ قررنا نروح نشوف الحلويات الشرقية أخبارها إيه السنة دي. عادة في أول عشر أيام من رمضان المحل بتبقى الناس واقفة جواه طوابير، وكل ما توغلنا في الشهر الكريم كل ما الزحمة دي بتقل وساعتها تقدر تقف هناك تتفرج براحتك وتختار من مجموعة الحلويات الكبيرة عندهم بمزاج. اختارنا طبق مشكل محتوياته كالآتي: بلح الشام (53 جنيه للكيلو)، كنافة بالكريمة (55 جنيه للكيلو)، كل واشكر (53 جنيه للكيلو) وأصابع لوز (53 جنيه للكيلو) وأخيرًا بللورية (215 جنيه للكيلو). بعكس أماكن كثيرة، بلح الشام في ماندرين قويدر بيتميز بحجمه الكبير. نعترف أن ده بيعجبنا لأن واحدة بتكون كفاية جدًا، وخصوصًا لو حظنا حلو وبلح الشام لسه طازة. المرة دي بالرغم من أنه كان طازة ومقرمش من بره، إلا أن عجينته كانت سميكة زيادة عن اللزوم وما كانتش هشة من جوة قد ما كانت إسفنجية. إحنا مش من هواة الحلويات الشرقية اللي فيها قشطة، لأننا بنحس أن القشطة بتقضي على أي قرمشة في الحلو. كنافة ماندرين اللي بالقشطة خلتنا نرجع عن فكرتنا دي؛ طبقتين الكنافة مقرمشين ومظبوطين من حيث اللون والطعم وفي وسطهم الكريمة الطرية الموازنة الطعم ككل. ننصحكم تأخدوا قطعة صغيرة منها لأنها نوعًا ما دسمة. كل واشكر المحشية بالبندق المفروم كانت من اكتشافاتنا رمضان السنة دي عند قويدر؛ العجينة هشة من بره ومن جوه ناعمة وكثيفة. ما تتوقعش أنك تحس بطعم البندق لأنه من كثر ما هو مفروم بقى عبارة عن ذرات ممكت تطير قبل ما تاكلها. أصابع اللوز لونها ذهبي ومقرمشة بس برضه احتمالية أنك تحس باللوز مش كبيرة. البللورية وهي الكنافة البيضاء بالفستق من حلوياتنا المفضلة، وبالرغم من أننا جربناها في أماكن كثير، إلا أن ماندرين قويدر من أحسن الأماكن اللي بيقدمها، الكنافة متماسكة وطبقتها سميكة ولكن في نفس الوقت مش أسمك من طبقة الفستق واللي الفستق فيها حجمه كبير ومش متحمص فطعمها فريش. هي صحيح غالية بس حقيقي تستاهل. نقدر نقول لك بقلب جامد لو عندك عزومة مهمة وعايز تبسط الناس بحلو ما يكسفكش؛ عدي على ماندرين قويدر. في الأيام دي الضغط بيبقى أكثر قبل الفطار، فحاول تروح بعده. العيب الوحيد اللي في المحل هم القائمين على الخدمة هناك؛ محتاجين يكونوا ودودين أكثر في التعامل، وخصوصًا لو وقعوا تحت ضغط لازم تبقى عارف كويس أنت عايز إيه وإلا هيحسسوك أنك معطلهم.

...

ذا باتر هاف & كو:  تجربة حلوة بعد صيام يوم طويل في الزمالك
اصدرت في: 16/06/2016

نعتقد أن الكلام عن الاختراعات الجديدة في مجال الحلويات الرمضانية كثر، وبالتالي لو افتتحنا المقال بالموضوع ده هنكون بنستهلك مساحة على الفاضي. إحنا شخصيًا من الناس اللي مش بتعجبها الاختراعات دي؛ ولكن في النهاية استسلمنا للأمر الواقع، وخصوصًا أننا عارفين أن فيه مرحلة هننزل نكتب مقالات نقدية عن الأماكن اللي بتقدم حلويات رمضان، وبالتالي لازم هنجرب اختراع من الاختراعات دي. ذا باتر هاف & كو - The Batter Half & Co. في الزمالك من ضمن الأماكن اللي قررنا نروح نشوف إيه الجديد عندهم السنة دي. أول حاجة لاحظناها لما دخلنا المحل إننا مش الوحيدين اللي كان نفسنا في حاجة حلوة بعد صيام طويل؛ لأن كان فيه ناس كثير -ما بين ناس واخدة الحلو تيك أواي، أو قاعدة على البار الموجود على يمين الباب. وبما أن الضغط عليهم كبير، توقعنا أننا نلاقي أغلبية المعروضات خلصانة، ولكن لحسن حظنا كان تقريبًا واصل لهم مجموعة جديدة لأن ثلاجتين العرض كان فيهم حلويات من كل شكل ونوع. وبما أننا كتبنا المقال النقدي رمضان اللي فات، قررنا أننا نحاول نبعد عن الحاجات اللي جربناها قبل كده، فاختارنا الكنافة Dome (26.70 جنيه)، رز بلبن بنكهة المستكة (26.70 جنيه) وكنافة تراميسو (26.70 جنيه)... نعترف أننا ما قدرناش نقاوم حلويات إحنا جربناها السنة اللي فاتت زي تارت الكنافة (25.72 جنيه)، السنة اللي فاتت عجبنا الرز بلبن السادة، السنة دي قررنا أننا نجرب اللي بنكهة المستكة والمميز بلونه الأخضر الفاتح عن الأنواع الثانية الموجودة ( سادة – بالبسبوسة). بجانب أن نكهة المستكة كانت قوية جدًا لدرجة أن طغى على نكهة المكونات الثانية، كان فيه طعم صناعي غريب نعتقد أنه له علاقة باللون الأخضر الموجود في الحلو، اللي للأسف ما كانش فيه أي أثر للسكر. الكنافة تراميسو بيقدمها المحل في برطمانات صغيرة، وهي بنفس مكونات التراميسو التقليدية، ولكن مستخدمين كنافة بدل بسكويت السافوايار. كريمة الجبنة كانت فريش وسكرها كان مضبوط، أما الطبقة الكنافة، فبعكس الطريقة التقليدية اللي البسكويت بيكون شارب فيها الإسبريسو لدرجة أن قوامه يبقى زي الإسفنج، الكنافة كانت متشربة الإسبريسو ولكن بفن، مش غرقانة لدرجة أنها تفقد قرمشتها. نقدر نعتبر أن الحلو ده أحسن حاجة ذقناها في التجربة. الكنافة Dome هي عبارة عن طبقة كنافة متشكلة على هيئة قبة محشية بالكريمة. شوف إحنا شايفين أن الحلو ككل طعمه أكثر من رائع ولكن هو محتاج يتظبط شوية؛ يعني كمية الكنافة كانت كبيرة جدًا بالنسبة لكمية الكريمة. لكن ده ما يمنعش أن الكنافة لونها وطعمها أكثر من رائع، ونفس الحكاية مع الكريمة. وفي رأينا أن الحلو ده ممكن يأكل اثنين ويكفي. آخر حاجة ذقناها كانت تارت الكنافة بالشوكولاتة، واللي بتتكون من مجموعة طبقات كنافة مع طبقات شوكولاتة. التارت جودته ما اختلفتش عن السنة اللي فاتت؛ هو إجمالًا حلو، والشوكولاتة اللي مستخدمة في الحلو نوعها ممتاز، إلا أن كمية الشوكولاتة محتاجة تكون متناسبة أكثر مع كمية الكنافة الموجودة في التارت. بالرغم من أن كان لنا ملاحظات على الحلويات المختلفة اللي ذقناها، إلا أنها كلها ملاحظات "ملحوقة"، ومش كارثية لدرجة أنها تبوظ تجربتنا. غالبًا هنعدي عليهم العزومة الجاية نجيب الحلو من عندهم.

...

أمبرساند: تجربة لطيفة ناقصها حاجات بسيطة في الزمالك
اصدرت في: 05/05/2016

كل مرة بنزور مكان في الزمالك علشان نكتب مقال نقدي بنعتقد أن دي هتكون آخر مرة نشوف مكان جديد بيفتح فيها؛ ده لأن الزمالك تقريبًا ما بقاش فيها مساحة لأي حاجة جديدة. ولكن بالرغم من كده بنلاقي أن لسه فيه أماكن بتفتح، ومش بس كده، ده في خلال وقت قليل المكان الجديد بيبقى له ناسه اللي بتروح له مخصوص، وكأنه موجود بقاله سنين. آخر مكان ظهر على الساحة هو أمبرساند – Ampersand، والموجود في شارع أبو الفدا. أول حاجة لفتت نظرنا هو الاسم المبتكر والغريب لحد كبير، واللي هو اسم الرمز "&" اللي بيعني "و – And" في اللغة الإنجليزية. بالرغم من أن المكان من برة ما يوحيش بأنه واسع، إلا أنه فيه أماكن جلوس متنوعة ممكن تختار اللي يناسبك منها؛ يعني فيه مكان خارجي –ترابيزات وكراسي من الخشب الفاتح- ومكان مقفول بشبابيك زجاج بيطل عليها، وبقية المنطقة الداخلية فيها كذا ركن تقدر تقعد فيه وكمان فيه ترابيزة كرة قدم Foosball تلعب عليها أنت وصحابك. وبما أننا روحنا الصبح والدنيا كانت حر، قررنا أننا نقعد في المنطقة المقفولة بزجاج، واللي حوائطها مدهونة باللون الأبيض، وأثاثها عبارة عن مجموعة ترابيزات مجمعة مع بعضها على هيئة ترابيزة كبيرة. عجبتنا المنطقة دي لأنها كانت مكيفة وفي نفس الوقت ما كانتش بعيدة عن الإضاءة الطبيعية، وخصوصًا أن لون الديكور الفاتح (سواء خشب الأثاث أو الحوائط) ساعد على إضافة روح خاصة بالمكان. إجمالًا، الديكور بسيط ولكن أنيق وتم اختياره بعناية. قعدنا، جالنا المنيو اللي بيضم اختيارات مختلفة للفطار، مع وجبات ومقبلات ينفع تأكلها في أي وقت في اليوم –ده بالإضافة للمشروبات والحلويات طبعًا. من ضمن الاختيارات الموجودة في المنيو أنك ممكن تعمل الساندويتش على مزاجك، وبتختار ما بين العيش (10 جنيه)، لحوم باردة (15 جنيه)، جبنة (18 جنيه) وخضروات (4 جنيه) ودريسينج (2 جنيه). وهنا بدأت المشكلة، المنيو مش مكتوب فيه الاختيارات اللي ممكن نعمل منها الساندويتش، فقلنا نسأل لأن القائمين على الخدمة أكيد هيكونوا عارفين. ولكن للأسف ما عرفناش نطلع بأي حاجة مفيدة لأنها ما كانتش عارفة إيه المكونات اللي ممكن نختار منها؛ وبما أن العيش الموجود كان باجيت، قررنا أننا نرتجل بقية المكونات ونشوف إذا كانت هتكون موجودة ولا لأ؛ الصراحة أول حاجة جت على بالنا هي لحم مدخن (روست بيف) مع خس وجبنة شيدر ومايونيز، والحمد لله كله كان موجود. طلبنا مع الساندويتش عصير برتقال (24 جنيه) ولاتيه (27 جنيه) معاه كراميل (8 جنيه). بالرغم من أن المنيو مكتوب فيه أن الأكل بياخد على الأقل 20 دقيقة، إلا أن حالًا والأكل وصل. بالرغم من أننا بنتضايق من الباجيت لأنه جاف بطبيعته، إلا أن الساندويتش مكوناته كلها كانت فريش، عجبنا أن قطع الروست بيف كانت سميكة وطرية. كان نازل مع الساندويتش طبق بطاطس محمرة –هي صحيح فارم فريتس- بس كانت لسه طالعة من على النار فكانت هي كمان فريش. عجبنا أن البرتقال واللاتيه نزلوا مع الأكل، والاثنين كانوا حلوين، الأول فريش وكميته ممتازة، والثاني مضبوط من أول شكل التقديم حتى الطعم. وبما أن القعدة حلوة قررنا أننا نطلب كابتشينو (24 جنيه)، ومعاها تشوكوليت كيك (45 جنيه)، واللي أكدنا أنها تكون سادة تمامًا من غير أي إضافات أو مكسرات. للأسف الشديد الكيك اللي جالنا كان عليه قطع بسكويت مكسر واللي للأسف برضه ما ينفعش أنه يتشال لأنه بيتعمل في برطمانات ودي طريقة تقديم الشيف. ما حبيناش الكابتشينو لأننا حسينا كمية القهوة فيه كانت كبيرة. أما التشوكوليت كيك فهي عبارة عن برطمان فيه طبقات من كريمة الشوكولاتة وكيك الشوكولاتة طبعًا وعليهم البسكويت المدقوق. الحقيقة أن الكيك والكريمة كانوا هايلين؛ السكر مضبوط والكيك طري وخفيف بس البسكويت كان شامم ريحة الثلاجة (ما عرنفاش نقولها لكم إزاي دي فهنكتبها كده). التجربة في المجمل كانت لطيفة من حيث الجو العام والأكل وحتى الخدمة من حيث السرعة بس، ولكن اللي فعلًا ما عجبناش في المكان هو ارتباك الخدمة، يمكن ده بسبب أن المكان لسه فاتح جديد، بس حقيقي ارتباك الجرسونات حسسنا بالارتباك شخصيًا. نعتقد أن بمرور الوقت هياخدوا ثقة أكثر، ولكن ده ما يمنعش أنهم لازم يكونوا مذاكرين المنيو كويس علشان يقدروا أنهم يجاوبوا على استفسارات الزبائن.

...

بيك أب: قهوة ع السريع في أي وقت من اليوم في الزمالك
اصدرت في: 06/01/2016

انتشرت الأماكن اللي نقدر نعتبرها مزيج من الكشك، والسوبر ماركت والكافيه في نفس الوقت؛ يعني لو ناقصك مثلًا في البيت -في حدود علبة لبن أو علبة مناديل كبيرة- ومش مستاهلة أنك تنزل السوبر ماركت... تلاقي، أصحابك هـ يمروا عليك وعاوز Snacks من النوع المفتخر مش موجودة في أي كشك... تلاقي، حتى لو نفسك في قهوة أو عاوز تاكل ومش مستاهلة قعدة كافيه برضه هـ تلاقي، دي تعتبر ميزة في السريع، وخصوصًا لو نفسك تعمل المشاوير دي كلها في وقت واحد، إنما الميزة الحقيقية للـMinimarkets دي أنها بـ تبقى مفتوحة 24 ساعة، بيك أب – Pickup هو أحدثMinimarket في الزمالك. طبيعي جدًا أن المكان يكون مكدس بكل أنواع المعروضات اللي ممكن تتخيلها، وبـ ننصحك أنك تبقى عارف كويس أنت عارف إيه وتحدد هدفك قبل ما تدخل لأن الموضوع مغري أوي؛ إحنا شخصيًا أي حاجة وقعت في مجالنا البصري حسينا أننا محتاجينها –وخصوصًا الشوكولاتات والـ Snacks، بالرغم من أن المعروضات كثيرة، إلا أن توزيع المنتجات مريح؛ على يمينك مجموعة من الثلاجات اللي معروض فيها كل أنواع المشروبات والعصائر سواء مستوردة أو محلية وبأحجام مختلفة، لفت نظرنا أن بيك أب عنده في الثلاجة مجموعة من مشروبات القهوة المثلجة الخاصة بـ Starbucks زي اللاتيه، وأسعارهم مش هـ تزيد عن 25 جنيه للزجاجة. بجانب ثلاجات المشروبات هـ تلاقي ثلاجة الساندويتشات والمأكولات الفريش اللي بـ يعملها كوبرميلت - Coppermelt لبيك أب واللي بـ توصل للمحل كل يوم الساعة 7 صباحًا؛ الساندويتشات سعرها موحد 28 جنيه، ماعدا السلامون 35 جنيه، وفيه منها روست بيف وديك مدخن (المعتاد يعني)، أما السلاطات فهي بـ 30 جنيه ماعدا السلامون برضه بـ 35 جنيه. في مواجهة المدخل فيه بار المشروبات وثلاجة الدوناتس والمخبوزات اللي برضه بـ يقدمها Coppermelt، عجبنا أن فيه منوعات كثيرة من كل حاجة، الدوناتس الكبيرة بـ 13 جنيه، أما الصغيرة بـ 9 جنيه. وبما أن المقال النقدي مش هـ يبقى عن Coppermelt، توجهنا ناحية المشروبات، بعكس أماكن كثيرة بـ تقدم قهوة بس، بيك أب بـ يقدم سموزي وعصائر فريش، طلبنا سموزي فراولة (20 جنيه)، كابتشينو كبير (20 جنيه)، بالرغم من أن المكان ما يوحيش بأن فيه مكان تقعد فيه، إلا أن بالصدفة لمحنا لافتة بـ توضح أن فيه دور فوق تشرب فيه قهوتك، واللي كان بالنسبة لنا نجدة من السماء، لأن ما كانش عندنا استعداد نشرب على الواقف، الدور الثاني فيه ترابيزتين كبار بأربع دكك خشب، High Table من غير كراسي للي يحب قهوته على الواقف إلى جانب حمام، بعد ما انتظرنا فترة علشان المشروبات تتحضر، وضحت لنا القائمة على الخدمة أنها ممكن تطلع لنا مشروباتنا فوق، وده كان أحسن وأحسن. تحمسنا للكابتشينو لما عرفنا أن القهوة المستخدمة فيه ماركة illy، وفعلًا حماسنا كان في محله؛ القهوة نوعيتها ممتازة، قوية سواء من حيث الرائحة أو الطعم بس من غير مرارة، كمية اللبن وقوام الفوم رائع تمنينا أننا ناخذ واحد كمان بس المقال النقدي مش هـ يبقى قائم على كوب كابتشينو بس! السموزي كان حجمه مثالي، بالرغم من أن لونه الوردي الفاتح شككنا في طعمه لوهلة، وتمنينا أنه ما يبقاش عبارة عن Syrup فراولة على حبة ثلج مجروش، إلا أن طعمه كان طبيعي ومنعش حتى لو في يوم برد، وخصوصًا أن سكره بالنسبة لنا كان مضبوط. ما كانش ينفع أننا نمشي من غير ما نجرب حاجة ثانية، فقررنا أننا نجرب اللاتيه (17 جنيه) علشان نعرف إذا كان الكابتشينو المضبوط ده ضربة حظ من الباريستا ولا فعلًا فيه فرق؛ ولكن الحقيقة نعتقد أننا عرفنا إحنا هـ نجيب قهوتنا منين الأيام الجاية، لأن اللاتيه كان كريمي وأخف من حيث حدة القهوة، ومع إضافة نكهة كراميل زيادة (6 جنيه) اللاتيه كان مثالي. بالنسبة لنا التجربة كانت مثالية، في رأينا أن "بيك أب" قدر يغطي الفكرة اللي هو مبني على أساسها، كل حاجة هو بـ يقدمها مضبوطة ومعمولة بحرفية، من أول ترتيب المعروضات، والمأكولات الفريش وحتى تعامل القائمين على الخدمة اللي مستعدين يردوا على أي استفسار.

...

نينوز: محل آخر من محلات الكب كيكس في الزمالك
اصدرت في: 11/11/2015

لو حاولنا نعِّد المحلات المتخصصة في بيع الحلويات في الزمالك ممكن ما نخلصش المقال ده النهارده، وإحنا عندنا موعد تسليم ملتزمين به، فهـ نكتفي بعَّد المحلات المتخصصة في بيع الكب كيكس بس؛ وغالبًا هم أربعة وخامسهم وأحدثهم هو نينوز – Nino's. الاسم ده سمعناه قبل كده كثير، ونعتقد أن ده لأنه قبل ما يفتح محل خاص به كان واسع الانتشار في بازارات القاهرة المختلفة. وبما أن ناس كثير بـ تيجي الزمالك مخصوص علشان تأكل كب كيكس، كان لازم نروح نشوف نينوز هـ يبقى ترتيبه إيه وسط المنافسة الشرسة اللي أساسًا موجودة بين الأماكن الثانية من قبل ما يفتح، الديكور مش حاجة مختلفة عن بقية محلات الكب الكيكس الثانية، ده يمكن واخد كثير من ديكور محل كرامبز - Crumbs زي مثلًا الكراسي المصرية الشعبية المدهونة باللون الـ Pink والحوائط البيضاء مع شوية لوحات متعلقة بالكب كيكس والخبز عامة، أماكن الجلوس مش كثيرة؛ هي ترابيزة مربعة على اليمين، وبار بـ High Chairs على الشمال، أما ثلاجة العرض فهي مقابلة لواجهة المحل. الطبيعي أن أول حاجة نعملها أننا نقف نستكشف المعروضات الموجودة في ثلاجة العرض، وبما أن مش مكتوب أمام كل حاجة اسمها ومكوناتها، طلبنا من القائم على خدمة البيع –الوحيد اللي موجود في المحل- أنه يقول لنا عن اسم أنواع الكب كيكس والحلويات الثانية الموجودة في الثلاجة، المهمة دي المفروض سهلة ولكن بالنسبة لنا كانت صعبة؛ أولًا لأن القائم على خدمة البيع كان صوته مش واضح وثانيًا كاونتر الثلاجة كان عالي قوي وبالتالي إحنا ما كناش قادرين حتى نقرأ شفايفه، المهم أن الموضوع ده عاقبته وخيمة... هـ تعرفوا ليه كمان كام فقرة. المهم، قلنا ننوّع، فطلبنا الآتي: برطمانين، الأول فيه كيك شوكولاتة، والثاني كيك شوكولاتة بزبدة الفول السوداني وكريمة الفانيليا (الواحد 25 جنيه)، ومن الكب كيكس طلبنا نوتيلا (15 جنيه)، زبدة فول سوداني، وشوكولاتة وفانيليا (15 جنيه)، نينوز كمان بـ يعمل كوكيز وبراونيز؛ أخذنا من الثانية قطعة (10 جنيه). أول حاجة لاحظناها –هي السمة العامة للكيك الموجود في كل الأنواع اللي ذقناها دي- هي أن الكيك جاف جدًا؛ وبالتالي بـ يتفتت من قبل ما نأكله، حتى المشكلة دي كانت في حالة البرطمانين اللي المفروض مكونين من عدة طبقات متبادلة من كريمة الشوكولاتة أو زبدة الفول السوداني. برطمان كيك الشوكلاتة بزبدة الفول السوداني كان أفضل حاجة ذقناها في التجربة كلها؛ طعم زبدة الفول السوداني كان موازن حلاوة الكيك وطبقة كريمة الفانيليا اللي كانت موجودة معهم، أما برطمان كيك الشوكولاتة فكانت التركيبة كلها مسكرة زيادة عن اللزوم، وفي كريمة الشوكولاتة عيب رهيب وهو أن السكر مش ذائب كويس وبالتالي كنا حاسين به وإحنا بـ نأكل، أكثر حاجة بـ تميز البراونيز هي عجينتها السميكة القابلة للمضغ، للأسف العنصر ده ما كانش موجود في القطعة اللي جربناها وبالتالي هي كمان كانت جافة. موضوع أننا لا سامعين القائم على الخدمة ولا هو سامعنا نتج عنه لخبطة في الأنواع اللي طلبناها؛ فانتهى الموضوع أن حظنا وقعنا في كب كيك بالشوكولاتة العادية (13 جنيه) بدل اللي بالفول السوداني؛ المهم أننا مش هـ نتكلم كثير عن الكب كيكس لأنها ما حسنتش من التجربة بأي شكل من الأشكال؛ لأن كان فيها نفس مشكلة الجفاف. ما حسيناش بفرق شاسع بين الشوكولاتة والنوتيلا، لأن الآيسينج كان طعمهم شبه واحد.. أو بمعنى أدق الاثنين ما كانش لهم طعم؛ الفرق الوحيد بينهم كان الشكل (الأولى عليها 4 قطع شوكولاتة والثانية عليها رشة نوتيلا)، كب كيك الشوكولاتة بالفانيليا كانت محل استغراب بالنسبة لنا؛ لأن الكيك كانت بالشوكولاتة، والآيسينج كان لونه أزرق وفيه واحدة أوريو في النص، الآيسينج المفروض أنه بـ يلعب دور نكهة الفانيليا، ولكن للأسف كل اللي حسينا به هو طعم الأزرق! طعم النكهة الصناعي. الجدير بالذكر أن كل الحاجات اللي إحنا كتبنا عنها في المقال شكلها الخارجي رائع ويحمسك تأكل، صحيح ده عنصر في غاية الأهمية بس مش نهاية المطاف، علشان نكون منصفين؛ إحنا مقدرين أن تجربة البيع في البازارات والـ Events مختلفة تمامًا عن البيع المستمر في محل، بل كمان إحنا فخورين بإنجاز صاحب المشروع بأنه يفتح مكانه الخاص، ولكن في النهاية لازم الإدارة تواكب مستوى الأماكن الأخرى وتلحق المشاكل الموجودة، لأن المنافسة شرسة جدًا. 

...

ريجوليتو: أثبت أنه مش بس محل آيس كريم في الزمالك
اصدرت في: 05/11/2015

مش لازم نكتب مقدمة طويلة عن ريجوليتو - Rigoletto الزمالك لأن غالبًا معظم الناس عارفاه؛ ولكن لكل اللي مش عارفينه، ريجوليتو من أقدم محلات الآيس كريم والحلويات الموجودة في القاهرة، ولأننا زبائن دائمين عنده، لاحظنا أنه عمل تجديدات كبيرة في الفترة الأخيرة بعدما كان مجرد محل آيس كريم تشتري منه وتاكل على الواقف، أو تطلبه دليفري، إحنا شخصيًا ما نفتكرش أننا شفنا حد جرب يجر كرسي ويقعد هناك، لأن الجو العام للمكان كان كئيب بدرجة رهيبة؛ الديكور قديم وشبه متهالك والإضاءة معتمة... مفيش بهجة الآيس كريم والحلويات اللي هو بـ يقدمها. التجديدات تمت من حوالي سنة أو أكثر، وشملت حتى اللوجو والـ Packaging؛ ونعترف أنها بقيت أكثر تعبيرًا عن المنتج اللي هو بـ يقدمه، وأخيرًا رجعت الحياة للمحل الكئيب بعد ما ديكوراته غلب عليها اللون الأبيض والأحمر ومجموعة الصور الأبيض في أسود المعلقة على الحوائط، ومن الواضح أن الموضوع فرق كثير في نفسية الزبائن، لأن المحل وقت زيارتنا كان مزدحم، اقترح علينا الجرسون أنه يفرش لنا ترابيزة خارج المحل، وده Option ما كناش نعرف أنه متاح، كان عندنا قلق أن القعدة تبقى غريبة –وخصوصًا أن ما كانش فيه غيرنا بره- إلا أن القعدة كانت مريحة ومختلفة عن أي قعدة Outdoor جربناها قبل كده. المنيو المكون من صفحتين في منتهى البساطة، مشروبات باردة وساخنة، آيس كريم وحلويات؛ لاحظنا أن المشروبات الباردة فيها مجموعة من الاختيارات الغريبة اللي داخل فيها آيس كريم، زي الكولا بآيس كريم الفانيليا، بس قررنا أننا ما نجازفش واختارنا آيس صودا بالمانجو (15 جنيه) وسموذي ليمون بالنعناع (12 جنيه)، ومعهم قطعة تشوكليت كيك (15 جنيه). الآيس صودا لكل اللي ما يعرفوش هو عبارة عن آيس كريم وعليه Tonic Water (صودا سادة من غير أي نكهة، حاجة كدة زي المياه الفوارة)؛ بالرغم من أن كمية الآيس كريم كانت قليلة جدًا بالنسبة للصودا، إلا أننا استمتعنا بتوازن الطعم بين الصودا –اللي نوعًا ما تعتبر مُرّة- وطعم الآيس الكريم الحلو. سموذي الليمون بالنعناع كان لطيف وكميته كبيرة، نكهة الليمون كانت أقوى من نكهة النعناع ولكن يحسب لهم أن طعمه كان مضبوط ومش مُرّ، وأن النعناع المستخدم في السموذي كان فريش. استغربنا لما سألنا الجرسون لو نحب صوص شوكولاتة على التشوكليت كيك لأننا اعتبرنا أن الصوص ده من البديهيات، والحمد لله أننا وافقنا على زيادة الصوص؛ لأن بالرغم من أن الكيك كان فريش والشوكولاتة فيه وفيرة، إلا أن الكيك كان أطرى وأحلى بكثير بالصوص. بعد الجولة دي، قررنا نحبس بمشروبات سخنة؛ وبما أن عادة الشاي مش بـ يبقى فيه فن في صناعته جربنا قهوة تركي مضبوط (8 جنيه)، وكابتشينو (12 جنيه). الأولى كانت مضبوطة ولكن القهوة جودتها ما كانتش أحسن حاجة في العالم، أما الكابتشينو فحقيقي كان رائع؛ طعم القهوة واضح ونوعها جيد، نسبة اللبن لها كانت مناسبة والشكل النهائي كفوم قوامه مضبوط ومتماسك كان ممتاز، عيبها الوحيد أن الفنجان كان متناهي الصغر لدرجة أننا خلصناه على مرتين (في مسألة الحجم إحنا عاذرينهم لأن مافيش مكان في القاهرة كلها بـ يقدم فنجان كابتشينو بالحلاوة دي بـ 12 جنيه بس). وبما أن ما ينفعش نروح ريجوليتو من غير ما نأكل آيس كريم، فقررنا نأخذ كوباية صغيرة فيها بولة Butterscotch، وهي مزيج من الفانيليا والكراميل ودائمًا الاختيار المفضل لنا هناك (10 جنيه)، ما بـ نحسش بفرق كثير في الطعم بينها وبين أشهر نكهات المحل وهي الفانيليا بالكروكانت (الكراميل الصلب بالمكسرات) -ما عدا جزء المكسرات طبعًا- إلا أنها كريمي أكثر وأغنى من حيث النكهة. لو عمرك ما جربت تدخل ريجوليتو وتقعد فيه، نعتقد أنك لازم تجربه لأنه فعلًا اختلف كثير عن زمان، ده غير أن خدمتهم ممتازة، حتى وإحنا نسبيًا منفيين بره المحل. فعلًا من خلال التجربة دي، ريجوليتو أثبت أنه بـ يقدم أكثر من آيس كريم.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح