شيشة كافيهات in الزمالك Cairo, Egypt

كافيهات

سيكويا: سحور ممتع على النيل فى الزمالك
اصدرت في: 22/07/2013

أكيد "سيكويا – Sequoia" المطل على النيل مش محتاج مننا أى مقدمات أو تعريف كونه واحد من أماكن خروجات أهل القاهرة المفضلة، سواء فى رمضان أو باقى شهور السنة. قررنا نتسحر بره، ونستمتع بجو جميل، وفورًا طلعنا على شارع أبو الفدا فى الزمالك. وصلنا قبل معظم الزبائن، وبكده قدرنا نختار ترابيزة تطل مباشرة على النيل بنسماته المنعشة ومنظره اللطيف. السحور فى سيكويا بـ يُقدم على شكل منيو ألا كارت، والحد الأدنى للطلبات 150 جنيه للفرد. بدأنا نطلب من المنيوهات الموجودة على الترابيزة، مجموعة متنوعة من الأطباق تشمل فول بالطعمية (30 جنيه)، حواوشى (50 جنيه)، حمص (26 جنيه)، ورق عنب (37 جنيه)، سلاطة زبادى (22 جنيه)، سلاطة فتوش (26 جنيه) وسمبوسك بالجبن (43 جنيه). قبل أى حاجة طلبنا عصير فريش: واحد بطيخ وواحد ليمون بالنعناع (ثمن الواحد 27 جنيه). العصائر كالمعتاد قدمت فى أباريق زجاج صغيرة، والاثنين كانوا باردين ومنعشين، وفى نفس الوقت محافظين على الطعم المسكر الطبيعى. الأكل كله وصل بسرعة. الفول بالطعمية بالذات كان طعمه لذيذ، مع نكهة الزبدة المميزة. الحواوشى -واحد من أحلى ساندويتشات الحواوشى اللى جربناها فى القاهرة– معاه طبق جانبى من قطع البطاطس اللذيذة. الحمص كان متبل كويس ونكهته مضبوطة. السمبوسك كانت متوسطة المستوى، عجينتها كانت سميكة وطرية شوية بدل ما تبقى خفيفة ومقرمشة، أما ورق العنب المحشى لحمة فكان طازج وطرى. أضعف حاجة فى الأكل عمومًا كان سلاطة الفتوش؛ صحيح المكونات كلها طازجة وطعمها يميزه صوص التارت الرائع، بس المشكلة كانت قطع العيش المقرمش السيئ سواء من ناحية القوام أو الطعم. طبعًا ده وقت نهاية مسكرة لذيذة لسحورنا، وعلشان كده طلبنا واحد أزر باللبن والمكسرات (30 جنيه) ومشروب رمضان التقليدى: سحلب (30 جنيه). الأول كان لطيف وغنى، لكن مستوى السحلب كان أضعف منه. افتكرنا أن السحلب بـ يُقدم عليه طبقة من المكسرات، وجوز الهند والزبيب كلهم طافيين علي السطح، بس السحلب ده كان عليه كمية قليلة جدًا مخلوطة مسبقًا على المشروب اللى مليان مياه. أضف على كده أن طعمه كمان كان مسكر جدًا. سيكويا كمان بـ يقدم شيشة (28 جنيه) بكل النكهات الأساسية وكانت هائلة. نفس الكلام ينطبق على الخدمة؛ المكان اتملأ بسرعة، ورغم العدد الكبير، فضل مستوى الخدمة عند دقته وفعاليته. سيكويا تجربة أكثر من مجرد أكل جيد، الفكرة فى روعة وجمال المنظر؛ بعيدًا عن منظر النيل الواضح، التصميم نفسه حالم، عتيق وشديد القرب من المدينة، والفضل يرجع لتصيمات إكليجو Eklego.

...

 ولعة: موقع جديد لكافيه وشيشة جامدين على كورنيش الزمالك
اصدرت في: 23/05/2013

لأنه معروف من جو المكان المريح، الشيشه اللذيذة والأكل بكمياته الكبيرة، قررنا نروح فرع ولعة الجديد ونشوف هـ يقدر يحافظ على سمعته المعروفة ولا لأ. وقعنا فوراً فى حب فرعهم اللى جنب المياه مباشرة، على حافة مركب كلوب 33 على كورنيش الزمالك. المكان من الداخل عبارة عن منطقة مفتوحة، مقفولة من فوق بس، أما بقى المكان من الخارج متقفل من ثلاثة أجناب - وده معناه أن الهواء كان كافى يبعد أى دخان شيشة. تقدر تشوف ألوان «ولعة» المبهجة واضحة على كنب beanbag، أغطية الكراسى والحيطان المخططة، وبجانب الألوان فيه مجموعة من الأعمال الفنية زى لوحات لفنانين مشهورين منهم مارلين مونرو، دالى وشارلى شابلن، وده بـ يضيف لمسة دمها خفيف لديكورات المكان. طبعاً منظر النيل والفلوكة العائمة فيه مع الأنوار المبهجة بـ يضيفوا جو جامد للتجربة. المنيو عبارة عن قائمة كبيرة من المشروبات الساخنة (9جنيه- 19جنيه)، نكهات شاى وخلطات أعشاب (8جنيه- 14جنيه)، مشروبات مثلجة (13جنيه- 24جنيه)، فرابيه (22جنيه)، سموزى (18جنيه- 23جنيه)، عصائر فريش (11جنيه- 12جنيه)، مشروبات خفيفة (11جنيه- 12جنيه) وقائمة لطيفة من الكوكتيلات (18جنيه- 22جنيه). قررنا نجرب كوكتيل ولعة (19جنيه)، سموزى فراولة وموز (23جنيه) وميلك شيك B-Oreo (22جنيه). ولعة كوكتيل – مكتوب عليه لازم تجربه- كان تحفة؛ خليط طازج سميك من الخوخ، الكيوى والأناناس المسكر. سموزى الفراولة والموز "رجع بعد مطلب جماهيرى" كان تحفة فنية ثانية، واضح فيه طعم الموز المسكر. أقل واحد فيهم كان الميلك شيك وطعمه كان قالب على بودرة شوكولاتة، بس برضه طعمه لذيذ، غنى بالحليب، وخفيف بحيث يعجب أى عاشق للطعم المسكر. بالنسبة للأكل، ولعة اتحد مع جاره، جريزلى، عشان يقدم أكلات شهية. الأكل وصل فى علب تيك أواى وكان طعمه كويس. رغم أن منيو ولعة مكتوب فيها حلويات شكلها لذيذ، للأسف مافيش أى حاجة فيهم كانت موجودة. منيو الشيشة الخرافية برضه كانت جامدة؛ تقدر تلاقى نكهات نخلة المحلية، وكمان نكهات مستوردة زى الفواكه الفاخرة وتبغ ستارباز. طلبنا شيشة محلية بنكهة الكريز (12جنيه) وشيشة عنب (18جنيه)، مستوردة من الإمارات. الشيشتين وصلوا بسرعة ومتحضرين باحترافية، ومش محتاجين أى تظبيط. النكهتين كان طعمهم قوى، ومريح وممتاز من كل النواحى، بس معرفناش هل النكهات المستوردة تستاهل فرق الفلوس فعلاً، وهل الجودة تختلف بجد. مع افتتاح فرعهم الجديد، أصحاب ولعه قدروا يميزوا نفسهم عن طريق الموقع المميز، والقعدة المريحة مع ديكورات ممتعة وحديثة فى نفس الوقت. الشيشة أكيد محافظة على المستوى، بس إحنا مستنيين الحلويات.

...

ركنة: كافية شيشة تقليدى فى الزمالك
اصدرت في: 12/05/2013

كافيهات القاهرة عندها القدرة على تغيير أساسيات الكافيهات المعروفة. مكان بـ يقدم شيشة لازم يكون كالتالى: مكان تنفخ فيه دخان شيشتك مع الاستمتاع بقطعة كيك وقهوة. كافيه "رُكنة - Rokna" فى شارع 26 يوليو فى الزمالك بـ يقدم تجربة شيشة معتادة مافيهاش لف ولا دوران. المكان نازل شوية عن ارتفاع الشارع، وفيه شوية ترابيزات وكراسى أمام المكان الصغير بواجهته الزجاجية. حوائط المكان برضه ملونة وتحس فيه بالراحة وكأنك فى بيتك مع مجموعة من المخدات والكتب وكام لعبة طاولة. طلبنا نقعد فى الخارج علشان نستمتع بواحدة من شيشهم بألوانها المبهجة. منيو الشيشة كبيرة وأسعارها تبدأ من 15 جنيه لنكهات الفواكة المعتادة لغاية 30 جنيه سعر تبغ Starbuzz. عندهم كمان مجموعة جاهزة من الشيش بمزيج من نكهات الفاكهة سعرها 22 جنيه. شيشة Nordic Star اللى بـ تتكون من ثلاثة مكونات سرية وسعرها 22 جنيه، شدت اهتمامنا وعلشان كده قررنا نطلبها مع لىّ ice blizzard hose سعره 7 جنيه بعد المقارنة مع اللىّ البلاستيك (4 جنيه). بكل سرعة وصلت الشيشة، وما كناش قادرين نتوقع يا ترى هـ نشرب إيه، بس فى الآخر اتبسطنا من النتيجة. النكهات الغامضة –البرتقال والقرفة والتوت– عملوا كوكتيل رائع، وكمان لىّ الشيشة خفف من الدخان بقطع ثلج حقيقة داخل المبسم. لما تركز على منيو المشروبات، هـ تشوف أصناف كثيرة، فيها كل حاجة بداية من شاى وقهوة بنكهات مختلفة لغاية العصائر الفريش والكوكتيلات والسموزى. اختارنا شوكولاتة بيضاء ساخنة (18 جنيه)، وكابوتشينو (14 جنيه). فى خلال ثوانى وصلت الشوكولاتة البيضاء اللى طعمها كان.. وايت شوكليت فعلاً!؛ لذيذة، مسكرة وغنية بالحليب. كمية طبقة الفوم على وش الكابتشينو كانت مناسبة وطعم القهوة كان قوى ولاذع. منيو الحوادق محدودة على الساندويتشات والقراقيش، وتعتبر صغيرة لو قارناها بمنيو الحلو. الحلو الموجود وقت زيارتنا كان صنفين بس، شوكليت كيك أو تشيز كيك. طلبنا قطعة شوكليت كيك ضخمة (18 جنيه)، وللأسف شكلها كان أجمد كثير من طعمها. الكيكة كانت ناشفة وقديمة وحتى صوص الشوكولاتة على وجه الكيكة ما قدرش يغير حاجة. حتى طبقة الكريمة فى وسط الكيك كان طعمها وحش. الموظفين فى "ركنة" لطاف، ودودين، وده بـ يضيف لجو الكافيه المريح. مكان الجلوس المزدحم ونقص الأكل كان سبب عدم اختلاف ركنة عن باقى الكافيهات اللى بـ تقدم شيشة فى الزمالك.

...

ديشز: منيو متنوعة فى الزمالك
اصدرت في: 15/04/2013

"ديشز- Dishes" كافية جديد فى الزمالك واحد من أحدث إضافات قائمة كافيهات القاهرة. مكانه بعيد خالص عن شارع 26 يوليو المزدحم، ناحية شارع الجزيرة الهادئ المناسب للتمشية وبـ يثبت أنه مكان لطيف ومريح للاستمتاع بالشيشة، جو المكان العام مريح، وغالبًا بـ يكون هادئ، ماعدا الويك إند بـ يكون زحمة شديدة. وصلنا ديشز جعانين على الآخر، وردود الأفعال بالنسبة للأكل فى المجمل كانت مختلفة لحد كبير. عمومًا كان فيه إجماع أن الكتابة والترجمة الموجودة فى المنيو قمة فى الابتكار؛ أكثر كلمة شدتنا كانت'grape paper' أو "ورق العنب" وده كان بديل مختلف لكلمة 'vine leaves'. فى البداية طلبنا عصير مانجو (18 جنيه) وسموزى موز (24 جنيه)، مع شوية فواتح شهية منها سبرينج رولز (30 جنيه)، ناتشوز (26 جنيه)، بابا غنوج (15 جنيه) وسلاطة فتوش (16 جنيه). المفاجأة بالنسبة لنا أنهم ما قدموش حمص، والأغرب من كده أننا عرفنا أن 'grape paper' اللى كلنا كنا متشوقين نجربها كانت خلصت. المشروبات كانت ممتازة، بطعمها الطازج اللذيذ، ومجموعة السموزى الكبيرة الموجودة خلتنا نفكر فى الفروقات ما بينها. كل المقبلات كان شكلها أنيق خصوصًا السبرينج رولز الطعمة، رغم أننا أُحبطنا شوية من جودة العيش السيئة اللى بـ يقدم كمجاملة، اللى كان واضح أنه قديم شوية. الناتشوز كمان كان ينقصها شوية مكونات أساسية، ونزلت من غير الأصناف الجانبية المعتادة زى guacamole –أفوكادو مهروس بالفلفل والطماطم- والقشطة والصلصة. نروح للأطباق الرئيسية اللى اختياراتنا فيها كانت متنوعة بشكل كبير، وده بـ يعكس تنوع الأطباق الموجودة داخل المنيو. الكاساديا بالفراخ وكمان اللحم (37 جنيه، 51 جنيه على الترتيب) كانوا روعة، ونفس الكلام بالنسبة للفراخ بالمانجو (55 جنيه)، رغم أن صوص المانجو كان طاغى شوية على طعم الفراخ. بالنظر لكميات الأكل الكبيرة، قدرنا بالعافية نطلب حاجة واحدة من الحلويات الكثير الموجودة. فى الأول طلبنا وافلز، لكن بعدها عرفنا أنها خلصت فـ قررنا نبدلها ببلو بيرى تشيز كيك (26 جنيه). وكالعادة حجم القطعة كان كبير، بس الكيك نفسه كان مسكر بزيادة. لازم نقول أن الكيك كانت مزيج مضبوط بين الطبقة الخارجية، والكيكة نفسها والتوت البرى، وقوامها نفسه كان مميز. أكيد ديشز يستحق يدخل فى قائمة كافيهات المنطقة، مش بسبب أكله ولكن السبب الأهم كان جمال جو الزمالك اللى ما يتنسيش.

...

بوليفارد: كافيه جديد صاخب في الزمالك
اصدرت في: 28/02/2013

المصمم المعماري لودفيج ميس فان دير روه قال في مرة: "Less is more"، أغلب الأوقات في القاهرة بـ نجد أنفسنا بـ نفكر في نفس الشيء في الوقت اللي أغلب الأماكن المصرية بـ تنجح في مقولة "More is more"، مازلنا بـ نتمنى وجود أي حد أو أي مكان يقدر يحقق المقولة دي، قليلين قوي اللي بـ يحققوها، للأسف بوليفارد في الزمالك مش منهم. في شارع البرازيل على اليمين أمام سفارة الجزائر هـ تلاقوا بوليفارد عبارة عن كافيه شيشة ثاني، لكن المنيو شاملة بـ تضم كل أنواع السلاطات والشوربات والسندويتشات والمكرونات والبيتزا والأطباق الرئيسية من الأسماك والدجاج واللحوم مع مجموعة من الحلويات، اختارنا من المقبلات كرات الجبنة (25 جنيه) وساندويتش فراخ بانيه (31 جنيه) مع مكرونة بصوص الأرابياتا (27 جنيه)، كمان قررنا نجرب عصير الجوافة الطازج (13.95 جنيه) واللي كان فعلًا طازج لكن قوامه ثقيل شوية لدرجة أنه ما كانش بـ يطلع في الشفاطة. الطبق الرئيسي وصل من غير أي إشارة لطبق المقبلات اللي يا إما اتنسى أو ما اتكتبش، ما كناش متأكدين من ده، الساندويتش وصل مكون من طبقتين ومعاه بطاطس مقلية وكان أفضل شئ في كل اللي طلبناه وبكل المقاييس كان رائع، البطاطس المقلية كانت مليانة زيت ومش مقرمشة زي ما تعودنا، المكرونة كانت أقل اندهاش وكانت باردة والصوص مالوش طعم ومافيهوش أي نكهة. وأخيرًا وصل طبق المقبلات اللي كان برضه مُخيب، شوية مطاطي زي كرة الضغط، ومكعبات الجبنة المقلية كانت موجودة على كمية من الخس وده مش حاجة ذكية للأكلات المقلية. كان لسه عندنا أمل في الحلويات واختارنا على حسب ترشيح بوليفارد "Deep Dish Fudge " (23 جنيه) اسمه حلو؟ توقعنا طبق اسمه على مسمى من شوكولاتة الفادج الدافئة اللذيذة ولكن بدلاً منها جاء لنا شريحة من كيكة شوكولاتة مش طازجة. الخدمة كانت مش مستقرة بـ تأخذ كثير من الوقت في الطلبات لكن سريعة مع الآخرين، الزبائن في بوليفارد صغار في السن وأقرب للمراهقين، لكن لاقينا نفسنا محبطين شوية من مستوى الأكل، بـ يقدموا شيشة (10: 25 جنيه) من الحاجات اللي ممكن تدعم نجاحه. الكافيه من الداخل مدهون وشبه شوية أماكن زي ولعة و كافيه ميكس من ناحية الديكور والجماليات لكن في المجمل وجدنا أننا نحاول بجدية أكثر ندور وكنا هـ نجد شئ أفضل من كده بالنسبة للأساسيات.

...

سيكويا: مطعم وخيمة ضخمة أحبطتنا شوية فى الزمالك
اصدرت في: 17/07/2012

لما حد يسألك إيه أكبر وأضخم وأكثر مكان له شعبية فى منطقة الزمالك على طول بـ ييجي «سيكويا» على ذهنك، على الرغم أن دي أول زيارة لنا –شخصيًا- للمكان، لكن كان لنا سابق معرفة به وبصوره اللى منتشرة فى كل مكان وتجارب أصحابنا هناك اللى حكوا لنا عنه كثير، خاصة القعدة بتاعته الوهمية اللى بـ تطل على النيل، حتى مطعم "ليفت بانك" لما فتح جنبه بقى مرتبط وصفنا له بأنه "جنب سيكويا" خاصة أنهم مشتركين فى نفس المدخل. المكان كبير وواسع بـ يغلب عليه اللونين الأبيض والبني فى القعدات والأرضيات، فيه كذا قعدة على شكل دائرة كبيرة والزرع والمراوح كبيرة جدًا فى كل مكان لكن حرارة الجو كانت أعلى والرطوبة فما كانش تأثيرها واضح، ده غير أنها وقفت فى منتصف قعدتنا هناك وكنا بـ نسيح من الحر وبعد فترة كبيرة اكتشفنا أنهم هما اللى قفلوها، مش فاهمين ليه عملوا فينا كده! المنظر بـ يبص على أبراج ساويرس والنيل حولك من كل مكان وحلو جدًا. المنيو عبارة عن ورقة، وبرضه مش فاهمين ليه مع أن المكان شيك بس اكتشفنا أنها الـ Cover كمان بتاع الترابيزة (1 جنيه)، المنيو فيها أكل لبنانى ومصري وعالمي: مقبلات باردة وساخنة وبيتزا ومشويات ده غير المشروبات الساخنة والباردة. من الحاجات الملفتة للنظر أن الأكل بـ ييجي لنا بسرعة جدًا بدرجة لا تصدق، وبـ ييجي سخن ومخدوم حلو، ما كناش متخيلين أنه ييجي بالسرعة دي. أول ما بـ تقعد بـ ينزل لك زجاجة مياة صغيرة (12 جنيه)، طلبنا فراخ مخلية بالفريك (65 جنيه)، و فتة شاورمة لحمة (60 جنيه) معاها سلاطة بلدي (25 جنيه)، و سمبوسك لحمة (40 جنيه)، السلاطة كانت عادية جدًا مافيهاش أى شيء مميز عن مثيلاتها وما فهمناش هى ليه بالسعر ده، وكمان السمبوسك كان حلو ومش متحمر بزيادة، الفراخ كانت عظيمة جدًا مستوية كويس مشوية ومعاها بولة فريك عليه مكسرات حلوة مش عارفين اسمها، والشاورمة كمان كانت مستوية كويس والأرز مع العيش المحمص. على وقت الغروب الجرسونات بـ يحطوا شمع صغير على الترابيزات علشان يكملوا الجو الشاعري للمكان مع الموسيقى اللى شغالة بشكل دائم. فى قسم المشروبات جربنا سيكويا بانش (22 جنيه) وده بـ يكون كوكتيل مختلف من العصائر وكان رائع ومنعش جدًا مع الثلج، وكمان جربنا فرابيه فريز بالاسبريسو (30 جنيه) كان كويس بس ذقنا الأفضل منه فى أماكن ثانية كثيرة. آخر حاجة ضايقتنا من المكان لما جئنا نطلب التحلية "ميل فاي بالفواكة" ولقيناهم بعد فترة جابوا لنا تشوكلت فوندو بصوص الشوكولاتة مع الفاكهة! ولما قلنا لهم مش ده طلبنا، راح الجرسون جايب لنا تارت فاكهة على أنه الميل فاى اللى طلبناه، وبعدين استدرك ده لما لقانا بـ نشتكي وقال لنا هو ده اللى موجود بس! فيه 12% خدمة و10% ضريبة، وكان فيه حاجات ثانية كاتبينها فى الشيك مافهمناش دي إيه زي Other charge! المكان بـ يقدم مشروبات كحولية. على الرغم من كده بـ يعمل جو مختلف فى رمضان، زور صفحة "سيكويا" على الفيسبوك علشان تشوف تحضيرات المكان لرمضان من ديكور ومنيو. التجربة لطيفة والمكان حلو والمنظر اللى بـ يطل عليه أحلى لكن ضايقتنا حاجات كثيرة هناك نتمنى أنهم يأخذوا بالهم منها علشان يفضل "سيكويا" المكان الأكثر تميزًا فى جزيرة الزمالك.

...

بي. إس: كافيه جديد ومريح فى الزمالك
اصدرت في: 28/03/2012

كل مكان بـ تبص عليه في القاهرة هـ تلاقي دائمًا –وبسرعة الضوء- كافيه جديد فتح، وأقرب مثال أمامنا كافيه «بي. إس» اللى فتح في الزمالك. موجود في شارع متفرع من شارع البرازيل ومنعزل عن دوشة ومرور شارع 26 يوليو. الديكور الداخلى للمكان رِوش، الحوائط فيه حجرية لونها بني غامق وتفاصيل بالبرتقالى، قررنا نروح في يوم مشمس علشان نجرب القعدة الخارجية، خلال فترة الصبح بـ تكون المنطقة دي محدودة جدًا ومقتصرة على أربع أو خمس ترابيزات بالكثير. لكن فى فترة المساء لما بـ تقفل باقى المحلات المجاورة المكان بـ يتسع لإضافة ترابيزات أكثر. الورود بـ تملأ المكان ولأنه مستخبي شوية فأشعة الشمس مش مباشرة عليه وبالتالى هـ يكون منفذ حلو لما الحرارة تشتد شوية. المنيو في «بي. إس» مافيهوش حاجات مفاجأة أو مغرية، أغلب اللى موجود فيه بـ نقرأه فى أى منيو كافيه عادي زي السلاطات والساندويتشات والباستا والكريب، وللأسف فيه غلطات إملائية بـ يقع فيها ساعات كذا مكان، طلبنا سموزي مانجو (12 جنيه) وسلاطة روكا (13 جنيه) وتشيكن كاسادياس (20 جنيه)، وقهوة أمريكي (10 جنيه). كثير من السموسيز اللي بـ نجربها فى كايرو عمرها ما كانت كويسة، طعمها كأنه مشروب مثلج مخلوط باللبن أو الزبادي. السموزي فى «بي. إس» كافيه ما كانش مختلف عن كده، كان طعمه لذيذ لكن مش سموزي، كان عبارة عن عصير مثلج بس. القهوة الأمريكي كانت قوية وأعطتنا جرعة الكافيين اللى كنا محتاجينها. سلاطة الروكا كانت عادية، للأسف كان المشروم اللى فيها معلب مش طازج ومعمول بجبنة رومي بدلاً من البارميزان. كان عندنا أمل أن التشيكن كاسادياس تطلع أفضل لكن للأسف خاب ظننا، كان فيها فلفل كثير قوي لدرجة طغت على طعم الفراخ، وكان فيه شبت ملء الطبق بشكل غير منطقى، الكريمة كانت خفيفة قوي أقرب إلى قوام اللبن وبرضه عليها كمية شبت كثيرة. على الرغم من أن الأكل ما أبهرناش لكن كافيه بي. إس مشروباته جامدة. المشروبات الخفيفة والشاي بـ يبدأ سعرها من 4 جنيه والقهوة بـ 8 جنيه وده سعر رخيص جدًا. المنظر أمام الكافيه مش مميز لكن يكفينا أنه هادئ.

...

كوفي شوپ كومباني: كافيه بروح المصيف في الزمالك
اصدرت في: 31/05/2011

المكان اللي فتح فيه «كوفي شوپ كومپاني» كان دايماً هادي جداً، وده كان زمان، دلوقتي الشارع بقى يادوب بـ يعَدّي عربية واحدة من كُتر العربيات اللي راكنة صف تاني قدام الكافيه. أول ما سمعنا أن الكافيه فتح فرع جديد في شارع أبو الفدا في الزمالك قُلنا لازم نروح ونجربه. الغريب أننا أخدنا شارع أبو الفدا من أوله لأخره ومالقيناش حاجة، وفي الآخر إكتشفنا أن الكافيه فاتح على النيل على طول (مش تحت عمارة يعني)، وده بـ يخللي موقعه هايل جداً، بالرغم أنه من برة مش باين كويس، وممكن جداً أنك تعمل زينا وتعدّي جنبه من غير ما تاخد بالك منه. موقع الكافيه اللي على النيل على طول وتقسيمته من جوة بـ تحسسك أنك قاعد في كافيه في المصيف، وخصوصاً كافيهات «مارينا». الجو المفتوح ونسيم مية النيل اللي بـ تبقى شامه وانت على باب الكافيه، كل ده بـ يدّي للقعدة جوة طابع مميز عن كل كافيهات كايرو. طول ما انت ماشي في الكافيه هـ تلاقي سلمتين لفوق، وسلمتين لتحت. وهـ تلاقي قعدات كتيرة بترابيزات وكراسي متنوعة، وفيه قعدة فوق بـ تطلعلها بكام سلمة برضه، ولو بصيت من فوقها لتحت تحس أنك قاعد في الهوا. فيه كمان شاشات LCD لزوم الماتشات وكده متوزعة في المكان كله بحيث أن كل الترابيزت تقدر تتفرج على التلفزيون بوضوح. إحنا لمّا رُحنا كان يوم فيه ماتش مهم وماكانش فيه ترابيزة واحدة فاضية رغم أن الكافيه لسّه مش معروف قوي، وتقريباً كان فيه ناس قاعدة برة الكافيه في الشارع من كُتر الزحمة. المكان بـ يقدم شيشة ومشروبات وأنواع بسيطة من الأكل والحلويات. إحنا لمّا رُحنا كان المكان لسّه في مرحلة الإفتتاح والأكل الوحيد اللي متوفر كان الپيتزا، والحقيقة الپيتزا طعمها وعجينتها هايلة جداً. الپيتزا المارجريتا (جبنة وصوص طماطم فقط) كانت بـ 32 جنيه وإحنا طلبنا عليها إضافة مشروم (5 جنيه) وإضافة سوسيس (5.5 جنيه). أمّا پيتزا الپيپيروني كانت بـ 38.5 جنيه وكانت لذيذة جداً. المشروبات فيها كل أنواع القهوة والشيكولاتة (المثلجة والساخنة)، وكمان العصائر والمشروبات المثلجة اللي من غير قهوة، وأسعارهم من أول 15 جنيه لغاية 30 جنيه، ومشروبات السموثيز Smoothies كلها بسعر موحد (22.50 جنيه). نيجي بقى للشيشة، والحقيقة الشيشة عندهم مميزة أكتر من الكافيهات التانية وأشكالها غريبة. فيه الشيشة اللي على شكل علبة وبـ يحطوها على الترابيزة مش على الأرض، وفيه شيشة تانية عادية بس شكلها غريب وبـ تتحط على الترابيزة برضه. إحنا طلبنا تفاح فاخر (18 جنيه) وبـ ينزل معاها اللي الطبي (4 جنيه).الأسعار في الكافيه أغلى شوية من الأماكن العادية (بس هو يستاهل أنه يبقى أغلى). يعني لو طلبت شيشة ولا قهوة في أي مكان تاني هـ تبقى أرخص، لكن الأكيد أنه مش سهل أنك تلاقي جو قعدة زي دي داخل القاهرة يحسسك أنك في بلد تانية خالص.

...

ولعة: كافيه شيشة مُبتَكَر في الزمالك
اصدرت في: 18/05/2011

القهاوي والكافيهات اللي بـ تقدم شيشة مفيش أكتر منها في البلد ومِنطورة في كل حتة، وغالباً أي منطقة هـ تبقى فيها هـ تلاقي قريب منك مكان بـ يقدم شيشة، ولو حتى القهوة اللي عالناصية. لكن الصعب بقى هو إنك تلاقي مكان بـ يقدم شيشة حلوة ومعمرة وتفضل قاعد ساعتين تِشِد فيها (من غير ما تدفع فيها دم قلبك). في نص شارع 26 يوليو، في قلب الزمالك، هـ تلاقي كافيه اسمه «ولعة»، وده بـ يقدم لك كل اللي إحنا قلناه ده. المكان اللي كان هناك قبل «ولعة» كان عبارة عن قهوة بلدي بـ يسهر فيها الناس بالليل ويدخنوا لهم حجرين. أما «ولعة» فـ هو بـ يصنف نفسه على إنه أول كافيه في كايرو يكون مخصوص للشيشة. المكان صغير ومفروش بكراسي پلاستيك وكَنَب لونه رمادي، وشوية منهم مرصوصين برة المحل وعاملين صف كبير على الرصيف وجو عالي جداً. رغم إن الكافيه بـ يقدم التوباكو المحلي ماركة "النخلة" (12 جنيه) و"ميزو" (15 جنيه)، لكن برضه عنده شوية حاجات مستوردة حلوة جداً. نقول مثلاً التوباكو الأردني "شيش بيش" (22 جنيه) اللي بـ ينفرد بيه «ولعة»، وده خليط توباكو معمول من العسل الصافي وطعمه بـ يبقى معسل أكتر وأحلى. وفيه كمان نوع مستورد من أمريكا اسمه بلو ميست Blue Mist وبـ 25 جنيه. لمّا رُحنا طلبنا معسل فاخر (18 جنيه). وطبعاً مش محتاجين نقول لكم إنها كانت ليلة طويلة ومليانة دخان. الشيشة كانت متقدمة مع لي پلاستيك، والويتر كان مركز جداً والولعة كانت بـ تتغير بانتظام من غير ما نطلب. الشيشة متوفرة عندهم بكل النكهات، وحتى المعسل كمان. جرب بقى تتطلب الإختيار المفتوح بتاعهم، وده عبارة عن شوط مش بـ يخلص من شيشتك المفضلة ومتقدم معاها براد شاي سخن. متوفر في القهوة كل أنواع التوباكو بأسعار من أول 22 جنيه ولغاية 45 جنيه. الوجبات الخفيفة في «ولعة» فيها ساندوتشات (ما بين 22 جنيه و26 جنيه)، زي ميكس الجبنة، الروست بيف، والتركي (شرايح الديك الرومي). أي ساندوتش من دول بـ ييجي على حسب إختيارك في عيش متحمص أو متسخن عادي في الميكروويڤ. فيه إختيارات تانية فيها سلاطات، كيش، أنواع مختلفة من الكيكات (18 جنيه لـ 22 جنيه)، وكمان كاپ كيكس. كيش الجبنة كان متقدم بارد شوية، بس مزيج الفراخ مع الفلفل الألوان والبصل كان متبل حلو جداً وكبير. جنب منيو الشيشة المتنوع جداً، «ولعة» برضه بـ يقدم تشكيلة مشروبات مثلجة ومشروبات فريش مضروبة في الخلاط «سموذيز – Smoothies ». سموذي الصباح عندهم عبارة عن مشروب منعش وطعمه غني من خليط الفراولة، الموز، والخوخ، وكلهم معصورين طازة ومضروبين في الخلاط مع الكمية المظبوطة من التلج. «ولعة» بـ يقدم أنواع القهوة السخنة والقهوة المتلجة كمان. يعني من الآخر، أياً كان اللي بـ تحب تاخده مع الشيشة، سواء قهوة، عصير فواكه، أو حتى وجبة خفيفة، كل ده هـ تلاقيه في «ولعة».

...

مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال