مصر الجديدة كافيهات in Cairo, Egypt

كافيهات

آيس كريم فاكتوري: نكهات قوية وأسعار معقولة في مساكن شيراتون
اصدرت في: 22/11/2015

الآيس كريم في الشتاء له مذاق مختلف تمامًا عنه في الصيف، تحسه بـ ينعشك أكثر، وجرعة السعادة والنشاط بـ تبقى أكبر بكثير. علشان كده في الجو المتقلب اللي إحنا فيه ده حبينا نجرب نأكل آيس كريم، وكانت تجربتنا لطيفة في آيس كريم فاكتوري – ice cream Factory في مساكن شيراتون في مصر الجديدة. المكان جديد لسه فاتح من ثلاث أسبابيع بس، وانبسطنا لما عرفنا أن اللي فتحه شاب صغير لسه في بداية حياته، زي مشاريع كثيرة بـ نشوفها بـ تبدأ بشباب محترم بـ يحاول يعمل حاجة مختلفة، نتمنى أن الأماكن دي تفضل تزيد وتزدهر. كمان الآيس كريم بـ يتعمل أمامك أنت بـ تختار النكهة اللي بـ تحبها سواء فاكهة أو شوكولاتة وبـ تزود عليهم اللي أنت عايزه من مارشميلو أو بسكويت أو نوع شوكولاتة والصوص طبعًا، وعندهم حجمين للآيس كريم الصغير بـ 14 جنيه وده بـ يبقى بطعم واحد ومعاه إضافة واحدة أوصوص واحد، أو الكبير بـ 18 جنيه، وده بـ يبقى عليه إضافتين. وأي إضافة ثانية بـ 2 جنيه، ولو طعم مختلف بـ 4 جنيه. وبالرغم من أننا جربنا نوع الآيس كريم ده في أكثر من مكان زي Frozzy Twist وCold stone creamery إلا أن المكان ده له الروح الخاصة بتاعته بالرغم من أنهم لسه فاتحيين والمنيو بتاهم مش متنوع قوي زي الأماكن الثانية. طلبنا آيس كريم بالفراولة مع صوص توت بـ 14 جنيه، وآيس كريم توت متنوع بنفس السعر. آيس كريم الفراولة كان مميز فعلًا، وكان فيه قطع فراولة طازة، صحيح خد وقت طويل وهو بـ يتعمل بس طعمه كويس، أما آيس كريم التوت فـ كان مختلف، تحس بمزازة التوت الأحمر مع باقي أنواع التوت، غير صوص التوت اللي طلبنا يبقى Blueberry مش بنفس نكهة الآيس كريم، فكان طعمه حلو فعلًا. هم بس محتاجين يتدربوا أكثر على عمل الآيس كريم، لأننا لاحظنا أن اللي بـ يعملوا الآيس كريم لسه مبتدأين شوية. بس المكان هادئ وفيه مكان أنك تقعد فيه، على عكس أماكن ثانية بـ تبقى زحمة ومش منظمة. آيس كريم فاكتوري بشكل عام كان تجربة لطيفة جدًا، نتمنى أنهم يزودوا نكهات جديدة في المنيو الفترة الجاية، علشان تستمتعوا بنكهات طبيعية جدًا بـ تتعمل أمام عينيكم، وطعمها حلو.

...

فروزي تويست: أجمل آيس كريم بنكهة لذيذة وأصلية في مساكن شيراتون
اصدرت في: 01/11/2015

مع بداية رحيل فصل الصيف ودخول الشتاء، وحبنا الشديد لأكل الآيس كريم في الجو الحلو ده أو في الشتاء عمومًا، كنا لازم نجرب الفرع الجديد لـ فروزي تويست – Frozzy twist واللي كنا كتبنا عنه قبل كده مقال نقدي لفرع مدينة نصر في 2014. المميز في فروزي تويست أن كل اللي بـ يقدمه بـ تكون نكهاته قوية وأقرب ما يكون للطبيعية، لأنه زي ما قلنا قبل كده بـ يتعمل آيس كريم أمامك وبـ تختار النكهة اللي بـ تحبها، سواء نوع معين من الشوكولاتة أو الفاكهة أو حتى اللبان أو العسلية أو البسبوسة. المنيو ما زال زي ما هو فيه آيس كريم بالتشيز كيك وبسكويت دايجستيف و آيس كريم بالزبادي وأي نوع فاكهة تحبه، وفيه آيس كريم بالمارشميلو أو اللبان أو السينابون أو العسلية أو البراونيز مع صوص الشوكولاتة، كل ما يمكن أن تتخيلوه هناك. أكثر فقرة إحنا بـ نستمتع بها هناك هي فقرة عمل الآيس كريم، لما بـ يبدأ يحطوا أمامنا كل المكونات ويفضلوا يقلبوا لحد ما اللبن أو الزبادي يختلط بالصوص اللي إحنا طلبناه مع الإضافات اللي بـ نحبها سواء مارشميلو أو أي حاجة ثانية، وتبدأ تثلج على الترابيزة المبردة مع التقليب وتتحول لأجمل آيس كريم ممكن تذوقه. طلبنا آيس كريم زبادي بالتوت بـ 15 جنيه، ولبنان بالتفاح بـ 13 جنيه، وزودنا عليه مارشميلو بـ 4 جنيه، وشوكو باوني بـ 13 جنيه، زودنا عليه حبوب سينابون بـ 4 جنيه برضه، وهم عندهم حجم كبير ووسط طلبنا أنهم يكونوا وسط. مش عارفين ليه الشخص اللي كان بـ يعمل لنا الآيس كريم على غير العادة كان مضايق وحسينا أنه مش طايقنا يعنى شوية وممكن يستقيل بسببنا رغم أننا ماعملناش حاجة! بس يمكن من ضغط الزبائن. المهم طعم آيس كريم الزبادي بالتوت كان هائل، مع صوص البلاك بيري، كان طعمه يطير العقل، كمان الـ شوكو باوني واللي هو عبارة عن صوص شوكولاتة مع قطع براونزيز كان حلو جدًا بس ثقيل شوية، أما أكثر حاجة عجبتنا فكانت آيس كريم التفاح باللبان، اللون الأخضر مع الصوص واللبان والتفاح عملوا تركيبة منعشة ومبهجة هائلة قدرت تنقلنا لعالم ثاني خالص كله بهجة. للأسف في وقت زيارتنا للمكان كان يوم خميس، وكنا متوقعين الزحمة بس مش لدرجة أننا نفضل حوالي نصف ساعة لحد ما يبدأوا في طلبنا. لأن المكان كان زحمة جدًا وبرغم أن فيه حوالي 4 أشخاص بـ يعملوا الآيس كريم إلا أن مافيش مكان للإنتظار غير الوقوف، وده شيء مزعج جدًا، خاصة لما الوقت يطول. نتمنى أن مكاننا المفضل للآيس كريم يأخد باله من التنظيم خاصة في الزحمة، لأن الآيس كريم بتاعه فعلًا مختلف ويستاهل كل التطوير علشان يبقى أفضل.

...

كاروسيل: حلويات رمضان من حلواني هليوبوليس المعروف
اصدرت في: 11/07/2015

رمضان جانا، ومعاه جاء سباق تذوق أكبر عدد ممكن من الحلويات اللي بـ تقدمها محلات حلويات القاهرة كل سنة، تحس أن الموضوع عبارة عن مسابقة الكسبان فيها هو اللي هـ يعمل أكثر حلويات مليانة سكر، طبعًا دي حاجة حلوة وأكيد مش بـ نشتكي منها. اللون الأخضر النعناعي الخاص بكاروسيل الموجود في منطقة حيوية من هليوبوليس مميز جدًا في الشارع الغالب عليه اللون الرمادي، أول ما تدخل، هـ تلاحظ جمال وهدوء ديكورات المكان الشبيهة بأجواء أليس في بلاد العجائب. مافيش كلام يوفّي حق كاروسيل وتشكيلة حلوياته المبهرة، أول حاجة شوفناها كانت عشرات وعشرات من أكواب الحلويات تشمل كنافة موز، نوتيلا، كنافة ريد فيلفيت، كنافة بلوبيري، عيش سرايا وكنافة بلاك فوريست. شوفنا كمان عدد من الحلويات المختلفة تشمل بولات كبيرة من الكنافة بالنوتيلا والريد فيلفيت، وكمان كنافة مالتيزرز وكنافة مانجو، لفت انتباهنا كمان كنافة فادج شكلها أسطوري، كاروسيل كمان معروف بأطباق حلويات منها زلابية بالنوتيلا وقطايف محشية بـ ييجي معاهم صوص بلوبيري، نوتيلا وكراميل. بعد مشاورات طويلة قررنا نطلب كنافة ريد فيلفيت (170 جنيه) والموظف اللطيف غلفها في العلبة سريعًا، هل كان اختيارنا صح؟ مم، خلينا نقول أن حواس التذوق عندنا كانت بـ ترقص من الانبهار مع أول قطعة، نقدر نقول أن سكرها كان مضبوط حتى في وجود الكريمة الطازجة، طبقة الكنافة الرفيعة أضافت اللمسة الرمضانية المطلوبة لواحد من أطباق الحلو المعروفة. عمومًا، كاروسيل قدر يقدم الحلويات الشرقية بلمسة غربية رائعة، الموظفين كانوا هايلين والمكان لطيف جدًا، أكيد هـ نرجع هناك مرة ثانية علشان نجرب ابتكارات رمضانية جديدة!

...

بينك بيري: آيس كريم الزبادي اللذيذ والصحى فى صن سيتي مول
اصدرت في: 24/02/2015

من ساعة ما اختراع الزبادي المثلج Frozen Yoghurt ظهر على الساحة فى القاهرة وإحنا بـ نعشقه، إحنا رحنا أول فرع فتح له بتاع سيتي ستارز وكتبنا عنه مقال نقدي، وبالتالى أثناء تجولنا فى صن سيتي مول وعيوننا وقعت عليه كان لازم نروح ناخده بالحضن. آيس كريم الزبادي بـ يكون صحى وخفيف على عكس النوع الثاني المعروف، وبـ يكون فيه "مذاذة" كده حلوة تخليك تدمنه، خاصة لو شربته كمان فى "Shakes"، المكان وقت زيارتنا كان فاضى (المول كله عامة ما كانش زحمة)، أحلى حاجة فى ديكور المكان هى الكراسي، رائعة بلونها الأخضر والأبيض، المكان كله بـ يبعث راحة نفسية جميلة بلونه الأبيض المقتبس من لون آيس كريم الزبادي. الموضوع بكل بساطة عبارة عن خطوات: تختار الحجم اللى عاوزه "الأصلى" (كبير بـ 40، وسط بـ 26، صغير بـ 20)، وفيه Options "الأصلى مع إضافات"، "نكهات"، و"نكهات مع إضافات" أسعارها بـ تختلف، وبعدين بـ تختار يا إما الطعم الأصلى اللى هو الزبادى العادى أو بنكهات: الرمان، الكراميل، المانجو، الفراولة، الباشن فروت، الشوكولاتة أو ممكن تمزج اثنين منهم سوا، وتيجي بعدها مرحلة الإضافات، كل إضافة بـ 5 جنيه، لكن لو اختارت 4 إضافات بـ 12 جنيه. غير الآيس كريم فيه عندهم سموزي وShakes وفيه كمان عبوات للتيك أواى. عامة الحجم الصغير بنكهة الزبادي العادي بـ ييجي مع أربع إضافات، وحجم الوسط والكبير بـ ييجي مع ستة إضافات اللى عبارة عن اختيارات كثيرة من الفاكهة: التوت، البلوبيري، البلاك بيري، الأناناس، الكيوي والموز، أو من الشوكولاتة أو المكسرات. طلبنا الحجم الصغير (وهو كافى الصراحة وأكثر لشخص واحد) بطعم الزبادي الأصلى معمول ميكس مع طعم الفراولة، وده الشخص المهذب جدًا اللى كان معانا هو اللى رشحه لنا (ممكن تذوق قبل ما تأخد طلبك) وحطينا عليه بلوبيري مع قطع جرانولا، والثانى طلبناه بالشوكولاتة ممزوج بالطعم الأصلى عليه قطع شوكولاتة كريسبي، الاختيار الأول كان بالنسبة لنا أفضل كثير، طعم الفراولة مع الفانيليا كان أكثر من رائع، بس حسينا كان فيه حاجة ناقصة محتاجة تربط البلوبيري بالجرانولا، صوص مثلًا، بس المكونات كلها فريش وخفيفة ومنعشة، فى حين الشوكولاتة كانت حلوة برضه بس ثقيلة جدًا وما حسيناش فيها بطعم الزبادي المميز، حسينا أنها أقرب للآيس كريم العادى، واللى زود ثقلها اختيارنا لكريسبي الشوكولاتة، كان الأفضل اختارنا إضافة ثانية. كل اللى نقدر نقوله أن ده أفضل زبادى آيس كريم مثلج ممكن تذوقه، وأحلى حاجة هنا أن الموضوع مش بالوزن زي فى أماكن ثانية، لأن الواحد أيده بـ تأكله وبـ يحط حاجات كثيرة وفى الآخر بـ يتفاجئ بالفاتورة، بس هنا الموضوع تحت سيطرتنا، الحاجة الوحيدة اللى مش تحت سيطرتنا هو حبنا للآيس كريم المجمد اللذيذ فى بينك بيري.

...

ديوكس: مخبوزات لذيذة في هليوبوليس
اصدرت في: 10/02/2015

حاجة أكيدة هي أن ما فيش نقص في المخابز على مستوى قاهرة المعز، وإحنا بـ نتمشى في هليوبوليس، وصلنا عند واحد من الأماكن المحبوبة "ديوكس - Dukes" بواجهة لطيفة من الأبيض والأسود وشهرتهم بتقديم "ديرت كيك Dirt Cake" اللذيذة، كان لازم ندخل ونشوف السنين عملت إيه معاهم. أول ما دخلنا، قابلنا عرض زجاجي كبير فيه تشكيلة متعددة الألوان من الجاتوهات، ديرت كيكس، تارت، ماكرونز وكب كيكس عملاقة، كمان ديوكس بـ يقدم أصناف من الشوربة، سلاطات، ساندويتشات، طواجن خضار، مكرونات وأطباق رئيسية، بجانب العيش، ميني بيتزا ومخبوزات ثانية رائعة. بعد تفكير عميق، طلبنا جاتوه بلاك فوريست (15 جنيه)، ديرت كيك شوكولاتة (25 جنيه)، جاتوه شارلوت (15 جنيه)، وكيكة صغيرة بالسلامون المدخّن (12 جنيه)، الترابيزة الوحيدة في المكان كانت مشغولة، وبكده أخذنا طلباتنا ومشينا. كيك السلامون كانت بسيطة جدًا بطبقة عيش أبيض رقيقة وفيه سلامون مطحون ومغطاة بشرائح سلامون مدخن، صحيح الكمية كانت قليلة جدًا بالمقارنة بسعرها، السلامون الطازج ونكهة السلامون المطحون الرائعة كانت حاجة ممتازة. البلاك فوريست، وهي عبارة عن كيكة مستطيلة فيها كذا طبقة من الشوكولاتة وعليها كريمة مخفوقة، كانت فيها كمية كويسة من الشوكولاتة، لكن الكريمة الزيادة طغت على باقي المكوّنات ولخبطت القطعة. لكل عشاق الشوكولاتة الحقيقيين، ننصحكم بدلاً منها بالديرت كيك بالشوكولاتة، الشوكولاتة الرطبة مع طبقة الكيك الرقيقة كانت فعلاً طبق اليوم؛ يا سلام لو كان ورد الزينة عليها ينفع نأكله كمان. في نفس الوقت، جاتوه شارلوت كان تحفة فنية من الفواكة، عبارة عن حشو تشيز كيك غني بالكريمة، وعليه شرائح من الفراولة، ومغطى بآيسينج سُكّر وردي بـ يجمع المكونات مع بعضها، النكهات المختلفة كانت رائعة وقدرت تعمل قطعة جاتوه عالمية. وصلنا للآخر، أصل مافيش داعي ندخل في غيبوبة سكر؛ كده تمام، ديوكس أكيد واحد من أجمد الحلوانية في العاصمة والفضل يرجع للمنيو الكبيرة والمبتكرة؛ من المؤسف أن ما فيش أي مكان نستمتع فيه بأكلنا.

...

هوكة لاونج: شيشة على مزاجك فى هليوبوليس
اصدرت في: 08/12/2014

الشيشة، أو الهوكة، أو الأرجيلة، قول اللى أنت عاوزه، المهم أنها عنصر أساسى من مكونات أى كافيه فى القاهرة زى الكراسى والترابيزات، وأغلب الأماكن فى العاصمة بـ تقدمها كجزء لا يتجزأ من التجربة المصرية الأصيلة. على شارع الميرغنى المزدحم، "هوكة لاونج – Hookah Lounge" يميزه يافطة بنفسجى مضيئة وحوائط بيضاء. رحب بنا الجرسون على الباب، وعرض علينا قعدة فى الداخل أو الخارج. بصراحة، القعدة وقت طويل فى مكان مكشوف فى شهر نوفمبر صعب، لكن قعدات هوكة لاونج المكشوفة مجهزة بدفايات ممتازة. قعدنا فورًا وسط عدد معقول من الناس بدون الحاجة لانتظار ترابيزة فاضية، والمنيوهات وصلت فى غمضة عين. تصميم المكان مريح، بدرجات ألوان هادئة من الأسود والأبيض. أكثر حاجة عجبتنا كانت تصميم ملون ضخم لشيشة مرسوم على الحائط الجانبى قدر يضيف شكل مميز للمكان. منيو هوكة بسيطة وسهلة، بـ تقدم أطباق تقليدية من مكرونات، وبيتزا، وساندويتشات، وسلاطات وبرجر، بالنسبة للشيشة عندك أشكال وألوان من النكهات والكوكتيلات. عملنا الطلب، وخلال دقائق قليلة وصلت الشيشة. نكهة البلوبيرى مع الفانيليا (27 جنيه) كانت روعة، رغم أن نكهتها كانت قوية شوية. فى كل الأحوال، الشيشة كانت هائلة. شيشة الكرز مع الفانيليا (27 جنيه)، واللى كانت مش موجودة فى المنيو لكنهم عملوها حسب طلبنا، كانت أخف بكثير عن اللى فاتت وطعمها كان لذيذ. المشكلة كانت فى تغيير الولعة واضطرارنا كل شوية نطلب منهم يغيروها. بعد الشيشة مباشرة وصلت الأطباق الرئيسية بشكلها الشهى. الفرايد موتزاريلا (25 جنيه) كانت عبارة عن أربع قطع حجمهم كبير من عجينة الجبن المقلية مع صوص طعمه حلو بنفس درجة الجبن المقلى. التشيكن ألفريدو باستا (49 جنيه) كانت كميتها كبيرة، عبارة عن مكرونة بنّا –حسب طلبنا– عليها صوص أبيض ثقيل وقطع من الفراخ المشوية، وعليهم رشة جبن بارميزان. صحيح من ناحية طعم الأكل الموضوع مش خارق للعادة، لكن الطهى كان كويس والكمية كانت كبيرة وكافية. على العموم، من اسم الكافيه "هوكة لاونج"، أكيد التركيز بـ يكون أكثر حاجة على الشيشة، ورغم أنها كانت مختلفة عن الشيشة المعتادة، لكن مع الجودة والنكهات المتنوعة، أكيد الكافيه يعتبر جنة لعشاق الشيشة.

...

كافيه سوبريم: أكل لذيذ من سلسلة الكافيهات الشهيرة فى كونكورد بلازا مول
اصدرت في: 24/11/2014

مش كل يوم بـ تقابل مطعم أو كافيه فى القاهرة بـ يقدم أطباق عالية الجودة وفى نفس الوقت أسعارها معقولة. كافيه سوبريم يعتبر واحد من الأماكن اللى بـ تكسر القاعدة. آخر إضافة للسلسلة كانت فرعهم الجديد فى القاهرة الجديدة، واللى تم افتتاحه حديثًا فى كونكورد بلازا مول على شارع 90. مع مساحة واسعة للقعدة داخل وخارج الكافيه، تقدر بسهولة تلاقى ترابيزة، حتى فى أكثر الأوقات زحام. تصميم المكان والجو العام فى المكان عصرى جدًا، بدرجات ألوان أولية وألواح زجاجية. وصلونا للترابيزة اللى اختارناها فى الخارج وعلى طول الجرسون قدم لنا المنيوهات. كافيه سوبريم مش متخصص فى مطبخ معين، لكنه بـ يقدم أطباق تقليدية معروفة فى أى كافيه، مع حاجات ثانية مدهشة. بداية من الكنافة بالجمبرى (59 جنيه) وسلّة المقبلات المثيرة Munchies Basket بـ (53 جنيه)، لغاية السلاطة المدهشة كاليفورنيا سلاد (38 جنيه)، المقبلات كانت فعلاً تفتح النفس. الأطباق الرئيسية كمان كانت هايلة، فيها عدد رهيب من المكرونات، والبيتزا، والساندويتشات وأطباق اللحوم. العدد الكبير من الجرسونات كان بـ يقول أنك دائمًا تقدر تطلب فى لمح البصر، ومن هنا طلبنا وانتظرنا بكل هدوء. أكلنا وصل بعد فترة معقولة، تحديدًا بعد 25 دقيقة من الطلب، لكن للأسف، بعض الأطباق وصلت قبل الباقى، الموضوع فعلاً كان مزعج شوية. عمومًا، الأكل كان مطبوخ بشكل ممتاز، طبق Flamed Grilled Chicken بـ (65 جنيه) كان عبارة عن قطعتين سميكتين من صدور فراخ مشوية مع طلبنا من الخضروات السوتيه، بطاطس مهروسة وصلصة كطلبات جانبية. الفراخ كانت طرية وتتبيلتها ممتازة، والخضروات كانت لذيذة، لاهى معجنة ولا مزيتة. مكرونة سوبريم (49 جنيه) برضه كان طعمها لذيذ. الطبق الضخم كان مكون من مكرونة بنّة غرقانة فى الصوص الأبيض –صاحب القوام المناسب– وعليها صدور فراخ مشوية وجبن بارميزان. بيتزا تشيكن باربيكيو (65 جنيه) كانت الحقيقة غريبة شوية. صحيح العجينة نفسها كانت لذيذة ورفيعة، لكن الإضافات طعمها كان مش ولابد، والطعم العام فى النهاية كان مسكر ومحبط شوية. لازم نتكلم عن الخدمة المميزة واللى أكيد تستحق الإشادة لكفائتها. الجرسون عرض علينا غطاء لما الجو كان برد. إجمالاً، كافيه سوبريم بـ يقدم أكل لذيذ بجودة مميزة وميزانية فى المعقول، بجانب خدمة رائعة، إحنا معاك أن البيتزا كانت غريبة شوية، لكن باقى الأطباق كانت رائعة.

...

بافلوفا: حلويات وكب كيكس محبطة في مصر الجديدة
اصدرت في: 26/10/2014

أماكن كثيرة بـ تبقى شهرتها سابقاها من قبل ما نروح نستكشفها بنفسنا؛ الموضوع ده مريح بالنسبة لنا لأننا بـ نكون نوعًا ما مطمئنين من نتيجة التجربة، بعكس الأماكن اللي بـ تبقى لسه ما اشتهرتش، واللي غالبًا بـ نكون أول من يجربها. ولكن الجانب السلبي لكتابة مقال نقدي عن مكان مشهور وله سمعته بين أهل القاهرة، أن التجربة ممكن تكون مخيبة للآمال، وللأسف هو ده اللي حصل لنا في بافلوفا - Pavlova في مصر الجديدة. بافلوفا مشهور جدًا بين سكان مصر الجديدة، وفي رمضان اللي فات كان بـ يقدم مجموعة كبيرة من اختراعات الكنافة المختلفة، بمتابعتنا لصفحتهم على الفيسبوك قررنا أننا نقوم بزيارة للمكان، حجم الواجهة الخارجية للمحل يوحي لك أن المكان صغير، ولكن المكان واسع من الداخل وفيه أربع ترابيزات من الخشب، وثلاجتين لعرض منتجاتهم المختلفة. الديكور –كعادة ديكورات محلات الحلويات والمخبوزات- مبهج بمجموعته اللونية المكوّنة من باستيلات الأخضر والوردي، بالإضافة لمجموعة من إكسسوارات الديكور المُعلقة على الحائط، واللي لها طابع عتيق، زي الإطارات البيضاء المزخرفة، ومجموعة من الأطباق الملونة بأحجام مختلفة. بما أننا في ساعة مبكرة من النهار، كنا عاملين حسابنا أننا هـ نفطر ونحلي، خصوصًا أن بافلوفا بـ يقدم مجموعة متنوعة من الساندويتشات الخفيفة؛ ولكن للأسف آمالنا تحطمت لما قال لنا الجرسون أنهم مش بـ يقدموا ساندويتشات في الوقت الحالي لأنهم بـ يعدلوا المنيو الخاص بها. كَحل بديل قررنا تجربة الدونتس (15 جنيه للواحدة)، الأولى بالنوتيلا والثانية ببسكويت الأوريو. بغض النظر عن أن عجينة الدونتس كانت طازجة وهشة، إلا أن الحشوة في النوعين كانت غير كافية بالمرة. دونتس الأوريو كانت ممتازة من حيث الطعم. أما دونتس النوتيلا، فحشوة الشوكولاتة ما كانتش من النوتيلا، وده أكبر خطأ ممكن يقعوا فيه، لأن عشاق النوتيلا كثير وسهل جدًا أنهم يكتشفوا فرق الطعم. بما أن الواحد لازم يشرب حاجة بجانب الإفطار، طلبنا شاي وكابتشينو (15 جنيه)، وآخر شيء نتوقعه هو أن مكان بـ يقدم مشروبات ساخنة أنه ما يكونش عنده شاي. ما توقعناش أن الكابتشينو يكون معجزة، وكان زي ما توقعنا. آخر اختيارتنا كانت الـ Dirt Cake بالفانيليا (20 جنيه)، واللي للأسف كانت هي كمان مخيبة للآمال، خصوصًا أننا ما حسيناش بأي طعم للشوكولاتة بالرغم من أن الكيك قائم على بسكويت وبودينغ الشوكولاتة كمكونين أساسيين. للأسف التجربة ما كانتش زي ما توقعنا، ما فيش شاي ولا ساندويتشات والحلويات اللي ذقناها كانت عادية جدًا بالرغم من أن بافلوفا مشهور بها، يمكن زرناهم في توقيت مش مناسب، بس ده ما يمنعش أن مكان بالشعبية دي لازم يكون جاهز في كل وقت لتقديم أفضل خدمة ممكنة.

...

كافيه إيتوال: كافيه مريح وسط إزعاج تيفولى دوم هليوبوليس
اصدرت في: 14/09/2014

أى واحد راح تيفولى دوم هليوبوليس أكيد عارف مدى الزحمة هناك. فى وجود عدد كبير من المحلات مرصوصين فى مساحة صغيرة، وطوفان من الناس رايحين يحتفلوا بالويك إند، صعب نتخيل أصلاً احتمالية وجود مكان هادئ نقدر نتكلم فيه مع بعض.الاستثناء الوحيد كان مع "كافيه إيتوال - Cafe Etoile". رحب بنا على مدخل الكافيه جرسون لطيف عرض علينا أماكن داخل المكان أو فى الخارج. قررنا نختار مكان فى الداخل علشان إحنا عاوزين مكان نقدر نتكلم فيه ونتجنب دوشة الناس. كلنا وافقنا على المكان فى نفس واحد،وفورًاكنا على الكنب المريح. الجرسون بعدها على طول وصل بالمنيوهاتوترك لنا فرصة نختار براحتنا. مزاجنا كان رايح على حاجة حلوة وشوية شاى، ومن هنا طلبنا تشيز كيك بصوص الفراولة (27.90 جنيه)، تارت إيتوال (31.90 جنيه) وشاى أخضر منعش.المنيو فيها مجموعة من الأطباق الرئيسية التقليدية الموجودة فى أغلب كافيهات القاهرة. المشروبات على الناحية الثانية كانت متنوعة وكل شوية نشوف الجرسون ماشى ومعاهألوان رائعة من السموزى المنعش. التشيز كيك والتارت وصلوا سريعًا ومعاهم الشاى، الصراحة ما قدرناش نقاوم تجربة حلوياتهم اللذيذة أكثر من كده. على الرغم من حجم التشيز كيك الصغير بشكل عجيب، لكنهاكانت غنية بالكريمة وتشعر أنها خفيفة مع مربى الفراولة على الوجه. أما التارت فطعمه كان بعيد عن المستوى؛ قاعدة الكيك مختلفة عن قوام التارت الهش الخفيف وطعمها كان يشبه البان كيك البايت.كوكتيل الموز مع الكراميل كمان اللى بـ يغطى القاعدة كان مسكر بزيادة. الفكرة أن إضافة آيس كريم فانيليا قدرت تضبط الطعم وتجعله مقبول. الشاى الأخضر قُدم فى أبريق معدنى كان بـ يسرب المياه، وفى رأينا المتواضع أن الموضوع مش مستاهل كل الكلام ده. تلخيصًا للموضوع، تجربتنا مع كافيه إيتوال، بعيدًا طبعًا عن التارت السيء، كانت تجربة لطيفة جدًا. الجرسون كان كفء، وكل شوية يملأ المياه، ومافيش لحظة واحدة اختفى فيها عن أنظارنا. من ناحية الخدمة نقدر نقول ممتازة. بالنسبة للأسعار تعتبر معقولة ومافيش حد أدنى للطلبات، زى كثير من الكافيهات الموجودة فى تيفولى دوم. كمان، الجو العام كان هادئ فى مكان مشهور بالزحمة والدوشة.

...

أزمالك كافيه: لما الزمالك تيجي لغاية عندك في مصر الجديدة
اصدرت في: 26/06/2014

مش جديد علينا في مصر أننا نلاقي مكان مسمى على اسم منطقة، ويبقى موجود أصلًا في منطقة ثانية خالص... زي كده جامعة القاهرة اللي موجودة في الجيزة، ونادي الزمالك اللي موجود في المهندسين، وهكذا... بس أصحاب أزمالك كافيه - Ezamalek Cafe لهم رؤية في اختيار الاسم، هي مش غلاسة والسلام، أصحاب المكان شايفين أنهم قادرين على نقل إحساس كأنك في الزمالك، وأنت في مصر الجديدة. الواجهة الخارجية للمكان فكرتنا بالزمالك فعلًا، الحائط المدهون باللون السكري، مع الباب العتيق المدهون بالأزرق، واللي مكون من 4 ضرفات، مش مفتوح منهم غير واحدة يا دوب تدخل فرد بالعافية، ما قدرناش نفهم ليه التعسف ده... ما علينا، استكمالًا للوصف: بجانب الباب علامة كبيرة شبيهة بعلامات اللي بـ يكتب عليها اسم الشوارع في مصر، لونها أبيض وأزرق. كل ده أوحى لنا بالزمالك. لما دخلنا الكافيه، لاقيناه نسخة معدلة من كافيه مكس اللي كان فاتح من سنة في الزمالك، الحوائط لونها رمادي، الكراسي بلاستيك من نفس اللون والترابيزات خشبية بسيطة. الديكور في مجمله بسيط جدًا، وغير متكلف، سواء الإضاءة الصفراء أو المكتبة المودرن اللي فيها مجموعة من الإكسسوارات العتيقة زي آلة كاتبة وجرامافون صغير. الشيء المبهر الوحيد، واللي فعلًا ما شفناهوش في أي مكان ثاني ولا حتى في الزمالك هو حائط مرسوم عليه بالكامل مجموعة من الزخارف الشرقية بألوان ساخنة زي الأحمر والبرتقالي بدرجاته. فاضل أننا نقول أن فيه شاشة LCD معروض فيها مباريات كأس العالم. استقبلنا جارسون ببرود أو ملل شديد، وأخذنا المنيو اللي مليء بكل الأصناف اللي ممكن تتخيلها، مشهيات وأطباق رئيسية، كريب حادق وحلو، ده غير الحلويات والعصائر. طلبنا من المقبلات بطاطس محمرة بالجبنة (13.45 جنيه) ويا ريتنا ما طلبناها، لأنها كانت عبارة عن بطاطس قديمة، غرقانة زيت، رشوا عليها جبنة رومي وفتتوا قطع جبن شيدر ورموها في المايكروويف، مافيش داعي أننا نقول أكثر من كده! طلبنا سلاطة سيزر بالفراخ (31.95 جنيه) بالرغم من كميتها المعقولة إلا أنها كانت عادية، لأن الخس ما كانش طازج، وبعض قطع الفراخ كانت شبه متفحمة، بالرغم من وفرتها. الطبق الرئيسي كان فراخ بالكاري مع باستا (43.95 جنيه)، لازم نقول أن الفراخ بالكاري كانت أحسن حاجة أكلناها في المكان، التتبيلة مضبوطة، والفراخ طرية جدًا... لولا أننا بـ نكره كلمة "زبدة" كنا قلناها. الباستا بالصوص الأبيض كانت شهية بالرغم من خفة قوام الصوص. طلبنا بعد كده كريب نوتيلا (22.95 جنيه)، كان عادي، ومافيهوش إبهار، إلا أنه قضى غرض التحلية، مع عصير الليمون بالنعناع (17.95 جنيه) واللي كنا محتاجينه فعلًا ينعشنا في الحر ده. ذكرنا أن الجرسون كان بـ يتعامل معنا ببرود شديد، بالرغم من استيائنا، إلا أننا أخذنا بالنا أن الجرسون "عمر" هو الوحيد في المكان كله المسئول عن تقديم المأكولات والمشروبات، بينما بقية العاملين مسئولين عن الشيشة... صحيح! أزمالك بـ يقدم الشيشة بأنواعها، وشعارهم على صفحتهم على الفيسبوك بـ يقول: "الحياة قصيرة علشان ترضى بشيشة رديئة!" وده كمان كان رأينا! من الآخر أزمالك هو نسخة أخرى من كافيهات الزمالك، واللي مناسبة تمامًا لقعدة حلوة مع أصحابك، ده غير أنك ممكن تستمتع بمباريات كأس العالم هناك!

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح