عصائر كافيهات in مصر الجديدة Cairo, Egypt

كافيهات

ديبى دو: فواكة وفوندو أسطورية فى هليوبوليس
اصدرت في: 27/08/2013

مصر شهيرة بفواكهها اللذيذة اللى تعتبر من السلع الأساسية مش مجرد رفاهيات. "ديبى دو - Dippie Doo" الموجود فى شارع أنقرة فى هليوبولس بـ يحتفل بالفواكه الرائعة وبـ يقدم مجموعة ممتعة من ابتكارات العصير اللذيذة. "كافيه الفواكة" صغير حجمًا بس فى نفس الوقت متسع، بديكورات ألوانها ظريفة متدرجة بين الأخضر الفاتح، والأصفر والأحمر مع ترابيزات متجانسة وكراسى صغيرة للناس اللى تحب تقعد فى المحل. مكان تحضير الطلبات ومكان الأكل الاثنين فى منتهى النظافة ورغم أن العصائر مغطاة علشان تحافظ على نضارتها، الموظفين برضه كانوا لابسين قفازات لضمان أكبر قدر من معايير النظافة. بجانب المشروبات الخفيفة من الفواكة والزبادى منخفض السعرات، الحلويات المسكرة تشمل وافلز (15: 25 جنيه)، شيش فواكة مغطى بالشوكولاتة (8.99 جنيه) وشوكليت فوندو (19.99 جنيه: 23.99 جنيه). كمان الآيس كريم (14.99: 21.99 جنيه) والزبادى المثلج (15.99 جنيه: 22.99 جنيه) بـ يتقدموا مع مجموعة كبيرة من الإضافات، من قطع الشوكولاتة، الجرانولا والويفر لغاية الفواكة الطازجة. مجموعة متنوعة من الصودا، والعصائر الفريش، مشروبات الزبادى والمياه المحلاة بالفواكة كلها متوفرة فى ديبى دو. عصير البلاك بيرى الطبيعى (19.99 جنيه) كان قليل جدًا لكن طعمه طازج، لاذع وطبعًا زى أى بلاك بيرى، مسكر بزيادة. ما قدرناش نقاوم شكل كوب choc o' doo بشوكولاتة البندق (24.99 جنيه)، مع اختيارك من الكنتلوب، الكيوى، الموز والعنب الأخضر. الكوب البلاسيتك الكبير كان مليان صوص ثقيل من الشوكولاتة بالبندق وقطع أوريو مقرمشة وفى القاع شوكولاتة بيضاء. كان من الصعب نخلص الكوب بسبب دسامته، مهما حاولنا. بعدها، طلبنا وعاء صغير من الزبادى المثلج مع ثلاث إضافات (18.99 جنيه)؛ قطع شوكولاتة بالزبدة، قطع مانجو وجرانولا مقرمشة. الزبادى المثلج الطبيعى كان لذيذ وغنى، لكن الواضح فى الموضوع أن كمية الزبادى كانت أكثر بكثير من الإضافات. "ديبى دو" بـ يجمع بين فواكة مصر الشهيرة بطعمها الصحي اللذيذ مع الحلويات الرائعة زى الشوكولاتة وغيرها، والنتيجة هى سناكس جميلة شهية.

...

كلاسيكو: ركن بلاي ستيشن مغمور في مصر الجديدة
اصدرت في: 15/04/2013

 مش هـ نطول عليكم، اللي عاوزين نقوله هنا أننا اكتشفنا مكان جديد لألعاب البلاي ستيشن في حتة هادئة ومتدارية شوية ما تخليش أي حد يشوفه بسهولة، هـ نشرح لكم بالضبط المكان وإزاي تروحوا هناك. محل «كلاسيكو» موجود في شارع هارون الرشيد قبل نهايته من ناحية شارع أبو بكر الصديق الرئيسي اللي بـ يمشي فيه مترو مصر الجديدة. اللي مخلي المكان مش باين هو أنه فيه أعمال حفر خاصة بمترو الأنفاق بـ تخترق شارع هارون وعاملين حواجز حديدية تخليك ما تشوفش إيه موجود على الجانبين، لكن أحسن طريقة تروح بها هي أنك توصل لحد ميدان هارون اللي فيه حلويات «تسيباس» سواء بالمواصلات أو بالعربية وممكن تركن عند المدرسة الإنجليزية اللي على ناصية الشارع من بره وتدخل شارع هارون بعد ما تخلي الحواجز على شمالك وتمشي 50 متر تقريبًا لحد ما تلاقي يافطة صفراء معلقة على مدخل عمارة مكتوب عليها Classico وبعدها تدخل في طرقة طويلة جانبية في نهايتها باب شقة على اليمين مش مكتوب عليه أي حاجة، هو ده المحل. الشقة كلها غرف مغلقة ومكيفة، يعني خصوصية مافيش بعد كده، كل غرفة فيها شاشة LCD 30 بوصة أو أكثر، وجهاز بلاي ستيشن 3 وما شوفناش أي ألعاب غير الكرة سواء PES2013 أو FIFA13 اللي أي محل بلاي ستيشن بـ يبقى قائم عليهم في الأساس. لكن لو سألت على ألعاب ثانية هـ تلاقي؛ سباقات سيارات وألعاب قتالية وحروب. المحل فاتح من 10 صباحًا لـ 5 الفجر، وسعر الساعة بـ يبقى 15 جنيه من الساعة 10 الصبح لحد 5 المغرب، وبـ يبقى 25 جنيه من 5 المغرب لحد 5 الفجر. وأيام الخميس والجمعة بـ يبقى طوال اليوم بـ 25 جنيه. الغرف واسعة والكراسي جلد كبيرة ومريحة، ولو كنت هـ تلعب "مالتي" هـ يجيبوا لك كراسي زيادة، وذراعات اللعب هنا حالتها ممتازة، والخدمة هنا سريعة ومنتبهة، لأن كثير من محلات الألعاب اللي زي دي بـ يسيبوك تهاتي كثير قبل ما حد يعبرك ويغير لك ذراع ولا يغير لك اللعبة. اشتري كيت كات وتودو ومولتو وبيبسي وعصائر وأنت قاعد بـ تلعب، الأسعار هنا مش أغلى من بره، وبعد ما تخلص حاسب على كله وأنت ماشي. وهنا كمان فيه Wi-Fi مجاني ممكن بين الماتش والماتش تقعد على الإنترنت براحتك، أو تطلع تقعد في الريسبشن تسمع مزيكا. حبينا القعدة والنظام في «كلاسيكو» جدًا وعجبنا أن مكان جديد للبلاي ستيشن بمستوى رائع فتح أخيرًا في مصر الجديدة، بعد ما كان فيه ندرة في محلات الألعاب وبالتالي زحمة شديدة ما تخليكش تعرف تلعب إلا بالحجز.

...

كافيه سوبريم: عيش جو ثاني فى الكوربة
اصدرت في: 20/03/2013

لأن زيارتنا الأخيرة لفرع "كافيه سوبريم" فى مول العرب من فترة كانت استثنائية وكنا مبسوطين فيها جدًا من جودة الأكل، والمكان وحاجات كثير ذكرناها، وبالتالى كنا في قمة السعادة لما شفنا فرع ثاني له فى الكوربة وإحنا ماشيين بالصدفة، أول حاجة عملناها بدون تفكير. ركننا العربية ونزلنا قعدنا فيه. في "كافيه سوبريم - Café Supreme" أول حاجة هـ تشدك المنطقة الخارجية الواسعة والمليانة شمسيات وناس بـ تشرب شيشة أو قهوة أو بـ تستمتع بأكلة خفيفة مع أصدقائها، غالب عليه اللون البني المحروق لكنه على عكس الانطباع الأول اللى ممكن يوصلكم شيك جدًا باللوجو المميز له بحجم كبير. فيه منطقة خارجية مفتوحة دي فيها تدخين، ومنطقة بالداخل فيه منها للمدخنين وغيرها لغير المدخنين، الأماكن مفتوحة على بعض من خلال فتحات فى الحوائط أو فواصل زجاج، ده غير أن فيه نواحي من المكان واجهتها زجاج، ثلاجة العرض موجودة جوه على الشمال. ولأننا لنا سابق خبرة مع المنيو أخذنا المرة دي أصناف ما جربناهاش فى الفرع الأول، طلبنا سوبريم بيتزا (39 جنيه)، وسموكد تركي ساندويتش "بانيني" (43 جنيه) ونزل معاها شوربة مشروم (أو سلاطة على حسب اختيارك)، وكاليفورنيا سلاد (36 جنيه) فيها خس وجرجير وخرشوف وعيش محمص مكعبات وبرضه مكعبات جبنة بيضاء، وزجاجة المياه الصغيرة بـ 6.75 جنيه. مافيش كلام على المكونات كلها، طازجة وخفيفة والمزج بينها له طعم ثاني هنا، السلاطة كانت عالمية ومختلفة، الشوربة كمان كانت جيدة وفيها قطع مشروم صغيرة، السموكد تركي كان حلو ومكوناته كثيرة وبرضه طازجة، إلى جانب المنيو العادية فيه منيو للسوشي فيها اختيارات أكيد هـ تشدك أنك تجربها لأنها مش موجودة فى أماكن أخرى.. بس إحنا لنا زيارة ثانية علشان نجربها. فى المشروبات جربنا هوت شوكليت (Dark) (23 جنيه) وفيه بالشوكولاتة البيضاء كمان، وأسبريسو كراميل سوبريمو (حجم M بـ 28 جنيه)، الهوت شوكولات كان لطيف بس فيه اللى ذقناه أفضل منه، والأسبريسو كان لطيف برضه بس كان فيه حاجة غريبة أن قطع أسبريسو مش مطحونة فيه كنا حاسينها فى فمنا! للأسف وقتنا كان ضيق وكان لازم نمشي فى الوقت اللى أصحابنا كانوا بـ يشدونا من أمام ثلاجة عرض الحلويات المغرية بأنواع كثيرة قوي لازم هـ نعدي فى يوم نجربها من تشيز كيك وغيرها. "سوبريم" لهم موقع على الإنترنت (لكن لسه مش شغال)، و صفحة على الفيسبوك مليانة معلومات وصور ممكن تدخل عليه تعرف معلومات أكثر، المكان بـ يضيف خدمة فقط، وللأسف مافيهوش إنترنت Wi-Fi، لكن القعدة هناك مافيش كلام عليها.. بجد جوها مختلف هـ تحس فيه أنك فى المصيف.. والتغيير مطلوب دائمًا.

...

فيج: كافيه وأكلات سريعة في أواسيس مساكن شيراتون
اصدرت في: 10/07/2012

مش عارفين هو ساحة "أواسيس" اللي في مساكن شيراتون دي مساحتها بـ تزيد ولا إحنا اللي بـ يتهيأ لنا! بس الأماكن اللي بـ نلاقيها فتحت جديد في المكان كل مرة بـ نزوره فيها بـ نبقى فعلًا مش عارفين دي كان فيه إيه في مكانها قبل كده، أو إذا مكانها ده كان ضمن مساحة المكان أصلًا ولا تم إضافته له. مش مهم، المهم أن المكان بـ يزداد حيوية وجمال كل مرة بـ نزوره فيها وده بـ يبقى على فترات مش قريبة. والمرة دي دخلنا في منتصف الساحة عند البحيرة الصناعية واختارنا قعدة خطيرة جنب الماء مباشرة وكانت القعدة دي تابعة لكافيه «فيج - f.i.g» اللي طبعًا له جزء مخصص في مكان مغلق مكيف، لكن القعدة على البحيرة الصناعية أكيد مغرية أكثر. «فيج» المكان اللي ممكن تأكل فيه (بافلو برجر) و(روما بيتزا تو جو) وأنت قاعد وبـ تستمتع بالمشروبات والكوكتيلات والحلويات اللي مش هـ تلاقيها في الأماكن المستقلة الخاصة بالمطاعم دي، وأكيد مش هـ تلاقي زي القعدة الساحرة دي ولا هـ تلاقي الشيشة المميزة اللي بـ يقدمها «فيج». المشروبات اللي في المنيو تزغلل العين، خاصة الكوكتيلات المفتكسة زي الكيوي بالتفاح بإضافات الكريمة، والزبادي المميز لـ «فيج» والسموزي والميلك شيك ومشروبات الشوكولاتة، والأسعار من 20 لـ 30 جنيه لأي مشروب. بس الصدمة كانت لما عرفنا أن على حظنا حصل عطل في الخلاط ومعنى كده أننا مش هـ نشرب أي كوكتيل أو أي مشروب مضروب في الخلاط. يعني ما كانش أمامنا غير عصير البرتقال الفريش (19 جنيه) اللي طلع مش حلو خالص لأن البرتقال صيفي زي ما قال لنا الجرسون، والمشروبات الساخنة زي القهوة والشاي، وعلشان كده قررنا نركز في المأكولات بعد ما طموحاتنا في المشروبات تحطمت، وطبعًا ما حبيناش نجرب أي برجر أو أطباق من «بافلو برجر» أو من «روما بيتزا» لأننا عارفينهم كويس، وإحنا موجودين هنا علشان نجرب مطبخ «فيج» نفسه اللي كان فيه بعض الأطباق العالمية زي الستيك والفيليه ومشويات برازيلية وبعض الأطباق المكسيكية والباستا والسلاطات والحلويات. جربنا الكاسيديا بالدجاج (42 جنيه) وهي رقائق عيش تورتيا مكسيكي محشوة بالدجاج بالصوص الأحمر ومع الطبق رقائق الذرة المقرمشة (زي الدوريتوس) وصوص الباربكيو والجواكمولي والطماطم والبصل الحار. المفروض أن ده طبق مشهيات، لكن إحنا استمتعنا به كطبق رئيسي وما قدرناش نطلب حاجة بعده لأنه كان مليان ويشبع فرد واحد. من منيو الحلويات اللي مليان كيك وآيس كريم كسرنا العادة وطلبنا أم علي (22 جنيه) وكان اختيار موفق جدًا، لأنها كان عليها كمية كاجو وفستق مش طبيعية وغرقانة في اللبن الحلو، ودي بقى مستحيل تخلصها بعد ما تكون واكل أكلة جامدة، فأكيد هـ تأخذها معاك تيك آواي زي ما إحنا عملنا. الشيشة هنا قوية جدًا، مع القعدة على ضفاف البحيرة بقى حاجة ما حصلتش، شيشة Blue Mist اللي بالعنب والنعناع والتوت (26 جنيه) نكهتها خطيرة ومميزة لأنها خاصة بالمكان. منيو الشيشة فيه طرق مختلفة لإعدادها زي ما بـ تتعمل في دول مختلفة، مصر والإمارات والمغرب وأمريكا كمان. يعني اطلب الشيشة بتاعتك حسب بلدك. الخدمة هنا جيدة جدًا، والعاملين ودودين وهـ يبقوا حريصين أنهم يكسبوك كزبون دائم للمكان، لأن زي ما أنتم عارفين اللي بـ يروح أواسيس ممكن يدور على أي قعدة حلوة على البحيرة وخلاص وممكن ما يركزش هو قاعد في أي مطعم أو كافيه. بس زيارتنا لـ «فيج» فعلًا كانت مميزة والتجربة كلها كانت ممتعة، بس نتمنى نيجي المرة الجاية والخلاط شغال.

...

عصائر حمادة: عصير فريش وفروت سلاط في مساكن شيراتون
اصدرت في: 08/07/2012

لو رجليك مشيت بك لمساكن شيراتون أكيد هـ تحب تقف تشرب عصير أو تأكل فخفخينا من عند المحل ده، خاصة أنه من رائحة الحبايب. «عصائر حمادة» الفرع المتخصص في العصائر من محلات (حمادة) اللي غزت شارع أنقرة مؤخرًا بعد ما أصبح اسم مساكن شيراتون مرتبط باسم عربية الفول بتاعة (حمادة) أو «حمادة شيراتون» أو في رواية ثانية (حمادة الدولي). في وقت من الأوقات كانت الناس بـ تروح مساكن شيراتون بس علشان تأكل من عند حمادة وتشرب عصير من الـ FBI اللي كان مكسر الدنيا وقتها أيام ما كان الشباب بـ يروحوا يعملوا دريفتات بعربياتهم في الأرض الفاضية اللي هناك. وعلشان كده واضح أن إدارة محل فول حمادة (هو اشترى محل واستغنى عن العربية) قررت تعمل ستاند عصائر كمان قريب منها أو بمعنى أصح لازق فيها علشان اللي ييجي عند (حمادة) يأخذ الكورس كله مرة واحدة من نفس المكان، ومش بعيد قريب يوسعوا الشارع أمامهم شوية علشان الناس تيجي تلعب بعربياتها ويسترجعوا مجد مساكن شيراتون القديم بالكامل. العصائر هنا فيه منها العادي أو التقليدي بـ 3 أحجام من 3 لـ 8 جنيه، زي عصائر الفاكهة العادية، فيه جرانيتا بـ 4 و6 جنيه، وقسم خاص في المنيو لمشروبات الشوكولاتة زي السنيكرز والكيت كات والتويكس والمارس مع إضافات من الفانيليا والمانجو والفراولة، ودي أغلى حاجة في المنيو، الحجم الكبير بـ 12 جنيه والجامبو بـ 15 جنيه. وفيه مشروبات زبادي بالعسل والفاكهة هم مسمينها زبادو بـ 5 و7جنيه. وأخيرًا الفروت سلاط بالآيس كريم أو المكسرات أو كله على بعضه وده بـ يبقى اسمه حمادة سبيشيال بـ 10 جنيه. الحاجات اللي مش تقليدية بقى هنا فيه منها التقليد لمحلات عصائر ثانية مشهورة زي الرضعات وأسمائها اللي مش لطيفة خالص بالنسبة لنا، رضعة الأسد والنمر والفيل والقرد والكلام ده ودي من الآخر بـ تبقى عبارة عن سوبيا بالآيس كريم وبـ يضاف لها نوع فاكهة أو شوكولاتة وموجودة بـ 3 أحجام برضه. ابتكارات حمادة موجودة في قسم الكوكتيلات وأسمائها ظريفة زي: سي بلاس، بوم بيري، هوريكان، باهاما ماما، كاليبسو وشوربة عدس.. ولو بصيت لكل اسم هـ تلاقيه له علاقة بمكوناته، سواء فواكة استوائية أو فيتامين سي أو غيره، وشوربة العدس ده بـ يبقى شبه شوربة العدس فعلًا ولونه لأن مكوناته الأساسية هي المانجو والموز. السعر موحد لكل الكوكتيلات 7 جنيه، و9 جنيه للجامبو. فيه مشروبات المكسرات باللبن بـ 6 و10 جنيه وقسم المشروبات الشعبية زي القصب والتمر هندي والكركديه والخروب بـ 1.5 جنيه لـ 3 جنيه. تقريبًا جربنا كل الحاجات عند «حمادة» في مرات متفرقة، وعجبنا العصائر الفريش والكوكتيلات المبتكرة بتاعته، بس ما عجبناش الفروت سلاط السبيشيال عنده لأنه بـ يعمل الحركة السخيفة اللي بـ يعملها للأسف كل محلات العصير في مصر وهي أنه بـ يملأه كانتلوب أكثر من أي فاكهة ثانية فبـ تحس أنك بـ تأكل طبق كنتلوب مش سلاطة فواكة خالص. عمومًا الوقفة أمام المحل مسلية والشارع هادئ نوعًا ما فممكن تفضل واقف وتشرب أكثر من نوع عصير في الحر اللي إحنا فيه، والخدمة هنا طبعًا سريعة وبـ ييجوا لحد العربية. بعد طبق الفول المتين من «حمادة شيراتون» اخبط شوب عصير من «عصائر حمادة».

...

إكس- شيكس: مشروبات مثلجة لمقاومة الحر فى هليوبوليس
اصدرت في: 13/06/2012

فى حر القاهرة الرهيب، المشروبات الباردة المُنعشة اللى بـ تمنع الجفاف عن جسمك دائمًا بـ تكون محل ترحيب. فى منطقة شيراتون هليوبوليس، «إكس- شيكس» محل صغير بـ يقدم مشروبات باردة. التصميم بالداخل مش حلو، ملابس الموظفين مليانة بُقع. ده خلّانا نشُك، لكن كل الشكوك راحت لما وصلت المشروبات. كاونتر كبير موجود فى نصف المحل بـ يقسّم المكان الصغير لجزئين: الأول للعملاء علشان يشوفوا المنيو ويطلبوا مشروبهم، الجزء الثانى موظفين بـ يشتغلوا بسرعة يروحوا ويرجعوا بين المحل والغرفة الخلفية اللى فيها بـ يتم تحضير المشروبات. رغم أننا ما شوفناش اللى بـ يحصل الناحية الثانية، لكن شوفنا من شباك صغير أن المكان عبارة عن منطقة متبلّطة بسيراميك أبيض وقدرنا نسمع صوت الخلاطات والثلّاجات وهى بـ تتفتح وتتقفل. منيو إكس- شيكس فيها اختيارات كثيرة من العصائر الطبيعية الصحّية (6 جنيه). لو زودت 1 جنيه، ممكن تضيف حليب. كمان الكوكتيلات (8 جنيه( موجودة، لكن أنت اللى تحدد إيه نوع الفاكهة. عصير الكيوى كان طعمه فيه مزازة جميلة. كمان المانجو والبطيخ كويسين، لكن مشروبنا المفضّل هو الفراولة. تقدر كمان تضيف بولة أيس كريم بـ (2 جنيه). خليط الزبادى مع المانجو والفراولة موجود بـ (8 جنيه). كمان ممكن تطلب شاى (3 جنيه)، وقهوة (4 جنيه) وكابتشينو (5 جنيه)، وموكّا (6 جنيه) أو هوت تشوكلت (6 جنيه). بعيدًا عن المشروبات الصحية إحنا بـ نحب نشرب إكس- شيكس علشان مجموعة الـ "كاندي شيكس" اللي ممكن تدمنها. سنيكرز شيك (16 جنيه) خصوصًا، لكن باقى الحاجات الموجودة بـ تكون فى نفس المستوى. كمان حلويات ثانية زى كيت كات، وبونتى، وتويكس، وفيريرو روشيه ومارس. المشروبات بـ تيجى فى كوباية بلاستيك مع غطاء، مكونات الشيكس صعب تعرفها، لكنها بـ تعطى طعم قطع الشوكولاتة الحقيقية لكن فى شكل سائل. رغم أن مشروبات الشيك بـ تكون مسكّرة شوية، لكنها ممتازة علشان تزود طاقتك. مع 1 جنيه زيادة، تقدر تزود آيس كريم. مشروبات إكس-شيكس كبيرة وبـ تأخذ وقت علشان تخلص، لكن تأثيرها المنعش بـ يظهر بسرعة. أكيد ده خيار هائل لو نفسك تشرب حاجة مسكّرة تسيبك فترة وأنت منتعش. لكن لازم نحذرك، احتمال أنك تحتاج تروح الجيم علشان تعوض كل اللى عملته ده.

...

ويمبلي: كافيه وبلاي ستيشن في مساكن شيراتون
اصدرت في: 28/02/2012

في ساحة طعام أواسيس الموجودة في مساكن شيراتون بجوار محطة بنزين كالتكس، فتح مكان جديد بـ يقدم خدمة مهمة جدًا وأهميتها نابعة من حب الناقد كاتب المقال لها، وهي البلاي ستيشن. كافيه ومطعم «ويمبلي» - على اسم الاستاد الشهير في إنجلترا - ممكن تقعد تأكل وتشرب هناك وتستمتع بألعاب البلاي ستيشن والـ X BOX باستخدام جهاز الـ Kinect اللي بـ يخليك تتنطط أمام الشاشة، لكن ما تقلقش؛ المكان مؤهل لكده. الديكور شيك جدًا بألوان فاتحة هي الأبيض والخشبي الفاتح وإضاءات ساطعة وبعض التابلوهات على الجدران، وهو مقسم لثلاثة أجزاء، أولهم خارجي في مكان يشبه التراس وده مخصص للناس اللي عاوزة تلعب بلاي ستيشن 3 أو X BOX وفيه الشاشات بـ تكون مرصوصة جنب بعضها زي أي إنترنت كافيه، شاشات LCD بحجم 30 بوصة تقريبًا. سعر الساعة للبلاي ستيشن بـ 25 جنيه وممكن تأخذ أي عدد من أذرع التحكم لو عاوز تلعب Multiplayer وساعة الـ X BOX بجهاز الـ Kinect بـ 40 جنيه. وحساب الألعاب بـ يبقى على جنب مالوش دعوة بأي مأكولات أو مشروبات هـ تطلبها. الجزئين الآخرين من المكان داخليين وممكن نعتبرهم مفصولين شوية عن جزء البلاي ستيشن الخارجي، أماكن عادية للجلوس وشاشات تليفزيون، وفيه جزء مغلق بفواصل زجاجية لو عاوز قعدة أكثر هدوء. الكراسي مريحة لكن الترابيزات منخفضة شوية وده بـ يبقى متعب لو هـ تطلب أكل. المنيو بدون اختراعات، زي أي كافيه بـ يقدم ساندويتشات ومعجنات وبيتزا وعدد محدود من الأطباق الرئيسية والمشهيات. كريب وحلويات ومخبوزات ومشروبات ساخنة وباردة وميلك شيك وشيشة طبعًا. من المشهيات طلبنا الجمبري والكاليماري المقلي بعجين التيمبورا (35 جنيه) بـ يُقدم مع المايونيز وشرائح البصل المحمر، كان مقرمش ولذيذ لكن مش هـ نطلبه مرة ثانية، لأنه عادي قوي! لكن طبعًا جربنا البيتزا البولو بالدجاج والمشروم (31 جنيه) لأننا مقتنعين أن أفضل ما يقدم في الكافيهات من أكل هو البيتزا والباستا، وفعلًا البيتزا كانت رائعة وحجمها كبير ومليانة موتزاريلا وإضافات كثير، وبـ نرشحها كوجبة خفيفة ومافيهاش زروطة جنب الماتش اللي هـ تلعبه. ومن منيو الأطباق الرئيسية جربنا طبق Veal Medallion المكون من 3 قطع من اللحم البتلو بالصوص البني بالفلفل الأسود (64 جنيه) ومعاه صنفين جانبيين هما الأرز البسمتي والخضار السوتيه، الحقيقة الطبق مافيهوش أي حاجة مميزة في الطعم أو الشكل، واللحم كمان ما كانش مستوي كفاية والخضار شكله مش فريش ويفتح النفس زي ما بـ نشوفه في أماكن ثانية، الخلاصة أننا نفضل من هنا الساندويتشات والباستا والبيتزا زي ما تعودنا في كل الكافيهات. الكابوتشينو (14 جنيه) كان هائل، وواضح أنهم متمكنين من كل مشروبات البن والشوكولاتة، لأننا لاحظنا إقبال عليها من الناس اللي حولنا، ومن المشروبات الباردة طلبنا كوكتيل ويمبلي علشان المفروض أن ده أيقونة المكان، لكن للأسف كان محبط جدًا لأنه كان مسكر بزيادة ومش باين من طعم الفاكهة الاستوائية اللي فيه غير الموز، وما قدرناش نكمل الكأس الصغير اللي قُدم لنا فيه. الشيشة الفاخرة بـ 23 جنيه، والعادية بـ 18 جنيه، واللي الطبي بـ 5 جنيه. الخدمة جيدة لكن واضح قلة خبرة العاملين نظرًا لحداثة المكان، لكن الطلبات بـ تُقدم بشكل منظم وشيك، وعجبنا غطاء الترابيزة الورقي (Cover) اللي على شكل ملعب كرة قدم، وتجربتنا في «ويمبلي» كانت حلوة لأكثر من سبب أهمها أننا اكتشفنا مكان جديد من نوعه في منطقة مساكن شيراتون وما حولها.

...

ميلك بار: ميلك شيك وسموسيز منعشة في سيتي ستارز
اصدرت في: 18/09/2011

بعد يوم طويل من اللف والدوران في سيتي ستارز، رجلنا ما كانتش شايلانا وبطننا بدأت تعلن حالة العصيان وبدأ صوتها يعلا، اتجهنا لمنطقة الأكل Food court الجديدة هناك (فيه منطقتين) وطلبنا أكلنا وبسطنا نفسنا، لكن طول ما إحنا قاعدين نأكل كان شادد نظرنا محل صغير لونه بمبي على يمين مدخل منطقة الأكل بعد «أنطي أن – Auntie Anne’s» بـ يعمل مشروبات مخفوقة ساقعة وسموسيز اسمه «ميلك بار – Milk Bar». ما ترددناش نروح نجرب، الموضوع كان مغري جدًا، كشك «ميلك بار – Milk Bar» الصغير لونه بمبي واللوجو بتاعه بالإنجليزي ولونه موف، على جنب الكشك فيه تصميمين للميلك شيك والسموسيز اللي بـ يقدموها وفيه شكل لشلال من اللبن متوظف حلو، واللي عرفناه بقى أن ده مشروع عاملاه شركة "لبنيتا" بـ تستخدم فيه اللبن كمكون أساسي لمنتجاتها، من جوه الديكور عامل زي مطبخ صغير فيه خلاط وأرفف عليها المكونات من كورن فليكس وبسكويت الأوريو وزجاجات صوص الشوكولاتة والآيس كريم في ثلاجة والنكهات بتاعة العصائر في عبوات، طلبك بـ يتحضر أمام عينيك لدرجة أنك ممكن تعرف هو بـ يتعمل إزاي خطوة بخطوة. "ميلك بار" عنده أصناف كثيرة بـ يقدمها: سحلب ميلك بار (أول مرة نشوف سحلب معمول زي الميلك شيك)، مشروبات باردة، شوكولاتة فرابيه، موكا فرابيه، ستيكي توفي فرابيه، سموزي (مانجو وفراولة وجوافة)، أوريو شيك، ميلك شيك، مزيج الرايب بالفواكة، مزيج الزبادي بالفواكة، فلاك شيك، وأخيرًا نافورة الشوكولاتة (عبارة عن مزيج من قطع المارشملو والفاكهة الطازجة المغطاة بالشوكولاتة). الأسعار بـ تتراوح من 10 إلى 20 جنيه أقصى حاجة، وفيه آيس كريم خالي الدسم بـ 7 جنيه، طلبنا أوريو شيك وفلاك شيك (20 جنيه الكوب، وهو عبارة عن آيس كريم شوكولاته ولبن مع الكورن فليكس) المشروبات بـ تقدم في كوب شفاف وأحلى حاجة بـ يحط لك شاليموه حلزوني ضخم منه ألوان كثيرة وشكله حلو قوي. المشروبات بصفة عامة هناك منعشة وطعمها رائع، طفت سخونة الأكلة اللي أكلناها قبلها وروتنا، والكباية ما كانتش عاوزة تخلص، والفلاك شيك كان رائع لما تأكل معاه قطع الكورن فليكس المقرمشة، بجد كان خاتمة جامدة جدًا ليوم طويل ومرهق. بـ ننصح ما تفوتوش في زيارتك القادمة لسيتي ستارز.

...

لا فريز: كوكتيلات تيك آواي مميزة في مصر الجديدة
اصدرت في: 20/04/2011

الشمس شديدة جداً في القاهرة في الصيف، والجو بـ يبقى نار، وحتى في الشتاء الشمس نادراً ما بـ تسيب عرشها في السما. النتيجة في النهاية أنك محتاج تشرب عصاير طول السنة وفي أي وقت من اليوم طول ما انت في القاهرة، عشان تظبط الموود أو تبرد الحر اللي حاسس بيه. في شارع نبيل الوقاد فيه محل عصاير صغير اسمه «لا فريز - La Fraise» ومعناها الفراولة بالفرنسية، بـ يقدم إختيارات كتير من عصاير الفواكه وحاجات تانية تقدر تاخدها تيك آواي. المحل عبارة عن كونتر وراه الأوضة اللي بـ يقف فيها العمال اللي بـ يعملوا العصير فريش قدام عينك. الجو كله فرايحي وألوان المحل جميلة وفيه رسومات فواكه على الحيطان، وفي وسط الكونتر سلة فواكه كبيرة مليانة فواكه وقطع شيكولاتة متبعترة حواليها. إختيار حاجة تشربها في المحلات اللي زي دي بـ يكون عملية بسيطة، بس الوضع مختلف في «لا فريز». لأن الإختيارات كتير وكلها حلوة. ومشكلة تانية ان المنيو مفيهوش أسعار جنب الأصناف، وقدامك حل من أتنين، يا تسأل الويتر على السعر يا تخمن انت الأسعار وفي الحالتين هـ تتأخر في طلب الأوردر بتاعك. المحل بـ يعمل شيك شيكولاتة لذيذ سعره 13 جنيه، بـ تزود عليه نوع الشيكولاتة اللي بـ تحبه «مارس» أو «سنيكرز» أو«كيت كات» مثلاً، مع لبن متلج وآيس كريم وكراميل وصوص شيكولاتة. ولو بـ تحب الشيكولاتة السخنة المحل لسه عامل قسم للمشروبات السخنة قريب، ممكن تحط قطع شيكولاتة سايحة من اللي الأنواع اللي قولنا عليها جوة مشروبك السخن. المحل مش بس متميز في الشيكولاتة ومشروباتها، إنما عصاير الفواكه الفريش (8 جنيه) خفيفة وصحية أكتر، وممكن تختار أي نوعين فاكهة وتحطهم على بعض. جنون الفواكه اللي في «فريز» مش بـ يقف عند العصاير وبس، بـ يعملوا كمان «سموزيس – Smoothies» وسلاطة فواكه، وطبعاً ليك كل الحرية إنك تختار الفاكهة اللي بـ تحبها، ولما الفاكهة الفريش بـ تضرب في الخلاط بـ تدي قوام سميك وطعم لذيذ للسموزيس. جنب العصاير في إضافات كتير ممكن تحطها على الطلب بتاعك زي الآيس كريم والشيكولاتة والمكسرات والفاكهة (الإضافة من 2 لـ3 جنيه)، والمشروبات المتلجة بتـ تقدم في كوباية بلاستيك ليها غطاء عشان ما توقَّعش. ميزات الطعم كتير والعيوب اللي ليها علاقة بالصحة والوزن، كتير برضه، بس في الآخر هـ تستمتع جداً بزيارة «لا فريز».

...

مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال