مدينة نصر كافيهات in Cairo, Egypt

كافيهات

دى. كابتشينو: زيارة جديدة لكافيه الروقان في مدينة نصر
اصدرت في: 15/09/2015

"دي. كابتشينو – D. Cappuccino" رحناه من سنتين وكتبنا مقال نقدي وكنا طايرين به، مش بس علشان الأصناف اللى بـ يقدمها، لأ كمان لأنه مكان ضد التدخين وواخد طابع إسلامي (فيه مكان مخصص للبنات بس)، وبـ يعرض في شاشاته أفلام كارتون Despicable Me وغيرها، ولأننا كنا قريبين منه قلنا نعدي نشوفه لسه محافظ على مستواه ولا لأ. أول حاجة لاحظناها أول ما قعدنا أن المنيوهات مش مُعتنيين بها، كانت صفحاتها مقطعة وتقريبًا ما عملوش لها تجديد من أول ما بدأوا، طلبنا في الأول ليمون منت (17.60 جنيه) وشاي بالنعناع (12.10 جنيه)، ومن الساندويتشات طلبنا ساندويتش تونة (19.80 جنيه) بـ ينزل معاه بطاطس محمرة وسلاطة كول سلو. الليمون بالنعناع كان حلو أوي وسكره مضبوط، النعناع كان Syrup مش نعناع طبيعي فأضاف طعم مختلف للعصير، الشاي بالنعناع برضه كان لطيف، وساندويتش التونة بـ يقدم لك في عيش فينو مقسم لنصفين والتونة عليها مايونيز وزيتون كان طعمها خفيف وحلو أوي، البطاطس المحمرة عادية لكن حلوة، وسلاطة الكول سلو كنا حاسين أنها ثقيلة شوية. نفس الشيء في ساندويتش تشيكن بانيه (25.30 جنيه)، قطع الفراخ المقلية مقرمشة ورفيعة عليها خس وطماطم ومايونيز كان طعمها خفيف وحلو جدًا، طلبنا بعدها بشوية سموزي كراميل (حجم كبير 27.50 جنيه) وعصير برتقال (14.30 جنيه)، الكراميل في السموزي كان كثير جدًا فـ كان ثقيل ولفتنا نظر الجرسون لها، والبرتقال لأنه مش الموسم بتاعه كان مش طعمه حلو أوي بس مقبول. دى. كابتشينو مازال له مكانة في قلبنا، محتاجين بس يضبطوا المنيو، الأكل والمشروبات حلوة وأسعارها كمان، لو أنت في مدينة نصر عدي عليه واتفرج على أفلام كارتون وأنت قاعد هناك.

...

ماندرين قويدر: بـ يمتعنا بحلو ممتاز وأكل منعش ومشروبات مبهجة في سيتي ستارز
اصدرت في: 14/09/2015

المنافسة قوية جدًا بين محلات الحلويات في القاهرة ما بين الأصناف المبتكرة والجودة وطبعًا الأسعار، بس ماندرين قويدر من حوالي سنتين عمل لنا مفاجأة، وبقى بـ يقدم منيو مطعم متكامل بجانب الحلويات وتميز فيه كمان، واللي كنا كتبنا عن فرع القطامية بتاعه مقالة في 2012. زيارتنا لفرع سيتي ستارز كانت مبهجة جدًا، مش بس علشان المكان كبير وواسع، لأ كمان المنيو متنوع جدًا، ما بين مشروبات ومكرونة وبيتزا ووجبات رئيسية وحلو. كالعادة الحاجة الوحيدة اللي بـ تضايقنا من الأماكن المفتوحة أن مش بـ يبقى فيها فصل للمدخنين وغير المدخنين، فـ بنضطر نشم ريحة الشيشة اللي بـ تخنقنا، بس نتمنى أن المحلات تراعي غير المدخنين في الفترة الجاية. أول ما استقرينا على مكان بعيد عن نسبيًا عن المدخنين، كنا عطشانين جدًا فـ قررنا نبدأ بالعصائر، فـ طلبنا Green Mandarin بـ 27 جنيه، وده عبارة عن سفن آب بالليمون والنعناع وصوص الماندرين، وكان طعمه تحفة، لولا أن Syrup النعناع اللي استخدموه أشبه بالبونبوني، ولطبيعة شغلنا فلأسف السيرب ده منتشر بين المطاعم والكافيهات ولازم يغيروه لأن فعلًا طعمه مش حلو. طلبنا كمان كوكتيلTropical Flyer بـ 26 جنيه، وده عصير مكون من برتقال وليمون ومانجو، وكان مبهج جدًا ويخليك حاسس بالانتعاش تمامًا. بعد كده احتارنا جدًا في منيو الأكل، ما بين المشويات والمقبلات، والأطباق الرئيسية، فـ قررنا نبدأ بـ Mozzarella Sticks بـ 34 جنيه، وكانت مضبوطة تمام وساخنة وبـ تذوب في فمك، مقدمة مع صوص الباربكيو، بعد كده طلبنا مكرونة Penne Alfredo بـ 49 جنيه، وطعمها كان رائع برضه، الصوص كثيف زي ما بـ نحبه، بس بعض قطع الدجاج جافة شوية وقطع ثانية مضبوطة، بس بشكل عام الطبق حجمه كبير يشبعك جدًا لو جعان. كنا لازم نجرب الحلو اللي عندهم، واللي كنا محتارين فيه جدًا، لأن الحلو ده لعبتهم الأساسية اللي مشهورين بها، وكان في كريب ووافل وتيراميسو وطبعًا الحلويات الشرقية اللي لا يُعلى عليها، لحد ما لاقينا أكثر حلو بـ نحبه واللي بـ يختلف اسمه من مكان للثاني، وهنا كان اسمه جبل لبنان بـ 27 جنيه، وفي أماكن ثانية ممكن يبقى اسمه عروس لبنان أو غزل بنات، وده بـ يبقى عبارة عن حلاوة شعر لبناني مع آيس كريم مستكة وفستق، وبرغم أن حجمه كان صغير شوية، إلا أنه طعمه يخطفك لجزيرة مهجورة مافيهاش غير طعم الحلاوة الشعر اللي ما لهاش زي مع طعم الآيس كريم اللي بـ يكسر الحلاوة الزائدة دي مع الفسدق، عمرنا ما هـ نزهق من الحلو ده أبدًا، واللي قُدم لنا ببراعة. ماندرين قويدر، مكان مناسب جدًا لخروجات العائلات أو الأصحاب، واللي بـ يناسب كل الأذواق سواء في الأكل العادي أو الحلويات، أكيد مش هـ تكون زيارتنا الأخيرة.

...

كولد ستون كريمري: السعادة في كور آيس كريم ممتعة في سيتي ستارز
اصدرت في: 02/04/2015

النهارده اكتشفنا أن كولد ستون كريمري – Cold Stone Creamery اللي له سلاسل في كل أنحاء العالم وأكثر من فرع في مصر، بـ يعمل نفس الآيس كريم بالنكهات اللي تحددها، وكنا كتبنا عنه مقال نقدي قبل كده في 2012 بس للفرع اللي في مول العرب، بـ يعمل النكهات على حجر مثلج فعلًا، بس بـ يحطها في علب عادية وبـ يمزجها مع أي مكون تختاره سواء فاكهة أو مكسرات أو شوكولاتة، فقلنا نجرب فرع سيتي ستارز ونشوف الفرق. هـ تلاقوا نكهات كثير تحفة زي الـ Cheese cake والـ Red velvet والـ French Vanilla والشوكولاتة بكل أنواعها، ونكهات ثانية تخليك تحس أنك بـ تأكل فعلًا النكهات دي بس آيس كريم مش مجرد نكهة صناعية. أجمل حاجة أنك ممكن تختار أي نكهة ومنها العادي والمختلف، بس أكثر حاجة ممتعة، أنك ممكن تُكون النكهات بتاعتك وتزود 3 إضافات زي ما تحب، وممكن تختار نوع واحد واللي طعمه بـ يبقى مختلف عن أي حاجة ذوقتها في حياتك، كمان معروف عن كولد ستون كريمري أنه بـ يعمل حركات بهلوانية بالآيس كريم غير الفيديو بتاعهم اللي كانوا بـ يحدفوا فيه الآيس كريم لبعض في المول، هـ تلاقيهم بـ ينططوا الآيس كريم وهم بـ يعملوه لك بشكل محترف وممتع. جربنا آيس كريم Cold Stone Cheese Cake Fantasy بـ 36 جنيه، واللى كان عبارة عن آيس كريم بطعم الـ Cheese cake فعلًا ومعاه فراولة وتوت ومعاها إضافة مارشميلو بـ 7 جنيه، في بسكويتة حروفها مليانة صوص شوكولاتة. الآيس كريم طعمه كان مختلف وممتع وإضافة الفاكهة فيه كانت مبهجة، كنا نتمنى كمية الفاكهة تبقى أكثر صحيح، بس بشكل عام كان طعمه حلو وإن كانت النكهة مش قوية زي ما توقعنا. والبسكويتة كانت ناشفة ومليانة شوكولاتة مستنياك تأكلها بس وتستمتع بها. جربنا كمان طعم الـ French Vanilla وكان طعمها تحفة لوحدها من غير أي إضافات كأنك في عالم ثاني مليان روقان وانسجام، وذوقنا كمان آيس كريم Red velvet كان طعمه تحفة تحس أنك بـ تأكل Cupcake Red Velvet فعلًا مش مجرد آيس كريم. تجربة الآيس كريم بشكل عام مبهجة جدًا، بالذات لو في آخر اليوم، ننصحكم تجربوا النكهات قبل ما تطلبوا الآيس كريم علشان تستمتعوا أكثر بالأصناف اللي بـ تحبوها، وأكيد مشاركة حد بـ تحبوه مع الآيس كريم المختلف والمطرقع ده وسط العروض البهلوانية هـ تسعدكم، كمان كولد ستون بـ يقدم كريب رائحته وهمية ومشروبات ساخنة وباردة وCupcakes، لو حابين تجربوهم.

...

فروزي تويست: آيس كريم بـ يتعمل أمامك بالبسبوسة والمارشميلو في مدينة نصر
اصدرت في: 29/12/2014

من فترة للثانية الواحد بـ يحب يجرب حاجة جديدة، مش شرط نوعها أو مكانها المهم أنه يكسر روتين حياته بحاجة حلوة تفرحه وسط الأحداث العالمية والمحلية العظيمة، وده اللي حصل لنا لما سمعنا عن "فروزي تويست - Frozzy twist" وعن الأصناف الجديدة المختلفة اللي بـ يعملها. أول ما دخلنا على صفحتهم على الفيسبوك، شدنا جدًا أنهم بـ يعملوا آيس كريم بسبوسة! تخيلوا، ولما سألنا عن مكانهم اكتشفنا أن مكانهم الأصلي في بورسعيد، بس الافتتاح هـ يبقى في القاهرة كمان كام يوم. وبالفعل قررنا نخوض التجربة للآخر ونروح الافتتاح. مفهوم افتتاح المحلات عندنا في القاهرة معروف، صوت عالي وأنوار وممكن تلاقي بني آدمين لابسين دباديب كمان، لكن المرة دي كانت مختلفة لأن لوجو المحل كان باين من أول الشارع من الأنوار، ده غير العربية الميني كوبر اللي كان مرسوم عليها اللوجو برضه. المهم دخلنا وكان الاكتشاف الأكبر، أن الآيس كريم بـ يتعمل أمامك.. أي نعم أمامك، هم بـ يستخدموا تقنية جديدة بمجرد ما بـ يحطوا المكون اللي أنت عاوزه بسبوسة أو كنافة أو عسلية أو تشيز كيك أو أي نوع شوكولاتة، ويفضلوا يقلبوا فيه على صينية درجة حرارتها منخفضة جدًا، بـ يتكون السائل من مجرد بسبوسة لآيس كريم بسبوسة.. لا سحر ولا شعوذة، دي تقنية تبريد لسه جديدة، وهم أول ناس ينزلوها مصر. من الحاجات اللي لفتت نظرنا في المنيو العظيم المطرقع ده، غير أنك ممكن تختار أي نوع شوكولاتة بـ تحبها من أول مارس لحد فوريرو روشيه، إلا أن فيه آيس كريم بالتشيز كيك وبالكولا والجيلي كولا وبسكويت دايجستيف وكريم بروليه crème brule كمان. وفيه آيس كريم بكل أنواع المكسرات اللي تخطر على بالك بندق ولوز وكاجو وزبدة الفول السودانى، لكن العادي عندهم الآيس كريم بالفاكهة والزبادي والصن داي وكلام الحلو ده، غير أنهم بـ يقدموا وافل وبراونيز. الحقيقة أننا كنا متشوقين قوي نعرف آيس كريم البسبوسة والكنافة دول طعمهم إيه، فطلبنا آيس كريم بسبوسة بـ 10 جنيه، واللي لقيناه بالفعل بـ يقطع قطعة بسبوسة أمامنا مع فانيليا وفضل يقلب لحد لما كونت طبقة مربعة لفها زي الوردة وحط عليها صوص كراميل وأعطاها لنا، والمفاجأة كانت في الطعم المميز اللي يحسسك أنك بـ تأكل قطعة بسبوسة فعلًا بس آيس كريم.. تجربة ما تتوصفش يا جماعة تتأكل بس، أما آيس كريم الكنافة بـ 12 جنيه، كان أخف بكثير للناس اللي مش بـ تحب السكر بزيادة، وطعمه مميز قوي برضه. جربنا كمان آيس كريم التشيز كيك مع قطع الديجستيف والتوت الأحمر بـ 12 جنيه، واللي كان حلو قوي وطعم البسكويت فيه كان مميز فعلًا، وللي بـ يحبوا المكسرات وبالذات عشاق زبدة الفول peanut butter نحب نقول لكم أن آيس كريم زبدة الفول اللي بـ 12 جنيه ده طعمه وهمي ودسم ومغري جدًا، لكن أكثر حاجة إحنا حبيناها كانت آيس كريم المارشميلو بـ 10 جنيه، وبغض النظر عن عشقنا للمارشميلو، إلا أن الآيس كريم كان معمول بنكهة التوت الأحمر كمان، ومضاف معاه قطع مارشميلو صغيرة علشان يطرقع في مخك ويعطيك أجمل إحساس بالانتعاش والتجديد في حياتك. الحقيقة أننا استمتعنا هناك جدًا وكان نفسنا نجرب كل الأصناف الحقيقة، وما منعناش إلا أن بطننا كانت ممكن تنفجر لو زودنا أكثر من كده، والخدمة هناك كانت جميلة جدًا وودودة، كل صنف بـ يشرحه لك بهدوء وطولة بال وابتسامة مميزة.

...

ريد مانجو: سلسلة محلات الزبادى المثلج الأمريكية دلوقت فى سيتى ستارز
اصدرت في: 05/09/2014

الزبادى المثلج، ومين غيره طبعًا؛ المشروبالمنعش، والصحى لحد كبير وفى نفس الوقت سعره غالى بشكل مش طبيعى، وكل واحد فينا مر بعلاقة من الحب/الكره معاه.مافيش عندنا مانع طبعًا فى أى وقت نستمتع بكأس مثلج من المشروب اللذيذ، وعلشان كده أول ما وصلت الماركة الأمريكانى "ريد مانجو - Red Mango" للقاهرة، طلعنا عليهم على طول علشان نجربهم ونشوف إيه الكلام. فى مكانه الموجود بمنطقة الموزياك الخاصة بالأكل، المحل نوعًا ما منعزل عن زحمة ودوشة سيتى ستارز. التصميم ودرجات الألوان فى المكان ككل مختلفة خالص عن جو الألوان الفاتحة الموجود فى باقى محلات الزبادى المثلج.القعدة هناك معقولة جدًا، عبارة عن عدد محدودمن الترابيزات، والمكان بشكل عام مش زحمة. أول ما عرفوا أنها أول زيارة لنا، شرح لنا الموظف كل حاجة فى المنيو الكبيرة. ريد مانجو مش بس بـ يعمل زبادى مثلج، عندهم كمان سموزى من الفاكهة والزبادى، بارفيه، عصائر فاكهة فريش، فرابيه، ووافلز حلوة وحادقة. معظم الموجود فى المنيو قليل الدسم ومنخفض السعرات، والموضوع ده ممتاز مع الناس المهتمة بالحياة الصحية.اهتمام الموظفين بنا ما توقفش عند المرحلة دى؛ قدموا لنا كمان عينات تجربة من كل نكهات الزبادى المثلج الموجودة. المحبط فى الموضوع أن ريد مانجو فى مصر بـ يعمل ست نكهات فقط، رغم أنهم فى أمريكا عندهم أكثر من عشرين نكهة مختلفة.طعم الأوريجينال زى ما توقعنا كان عادى، وبصراحة مش جذاب. نكهات الرمان، الفراولة والتفاح الأخضر طعمها شبه بعض وعادى خالص من وجهة نظرنا. بعيد عن كل اللى فات، نكهة المانجو كانت لذيذة بشكل رائع وكانت أجمد طعم من الفواكة. فى الآخر استقرينا على الفانيليا مدغشقر مع أربع إضافات (32جنيه) هى مانجو، كريز، جرانولا ولوز مطحون. عندهم إضافات ثانية تشمل كل حاجة من حبوب، عين جمل، أوريو مطحون، إم&إمز ووصولاً للكيوى، الكريز، المانجو، البطيخ والعنب. نكهة الفانيليا مدغشقر كانت عادية، لكن برضه تعتبر مزيج لذيذ من النكهات. الخلط بين زبادى الفانيليا مع القرفة كان هائل، وفعلاً طعمه كانمنعش ولذيذ، ننصحكم تجربوها. أما بالنسبة للإضافات، المانجو كانت طازجة ولذيذة، أما الجرانولا كانت مقرمشة بشكل حلو.قطع اللوز المطحون كانت عديمة الطعم، لكن الصدمة الحقيقية كانت فى الكريز، اللى سبب لنا وجع فى أسناننا بسبب البذر. بشكل عام، ريد مانجو بـ يقدم زبادى مثلج معقول –لا هو ماحصلش يعنى ولا هو وحش للدرجة- فى أحسن الأحوال، التجربة كانت متوسطة. السبب فى كلامنا أن هى نكهة واحدة من بين الست نكهات كانت مميزة.نسينا نقول كمان أنك مع كوب صغير من الزبادى المثلج، هـ تدفع مبلغ محترم.

...

فريشي آيس ستيكس: مثلجات منعشة في سيتي ستارز
اصدرت في: 17/08/2014

لو أنت من مهووسي التسوق زي حالاتنا، طبيعي جدًا أنك تصادف كشك من أكشاك فريشي آيس ستيكس في أي مول أثناء رحلاتك الاستكشافية المعتادة للبحث عن خصومات الصيف، واللي ما نقدرش نعيش من غيرها. الكشك بلونه الأحمر ولوجو فريشي المميز لازم هـ يلفتوا انتباهك، ولو حصل وما أخذتش بالك، فصفوف الآيس ستيكس الملونة مش بس هـ تشوفها عن بعد، دي هـ تغريك أنك تأخذ منهم واحدة معاك تؤنس لك رحلتك في المول. وده بالضبط اللي حصل معانا. أول حاجة سألنا عن الأنواع الكثيرة، واللي عرفنا عليها بحماس بالغ البائع اللطيف. والألطف كمان هو سعر القطعة، وهو (12 جنيه). لو أنت من الناس اللي ما بـ تفرقش معهم السعرات الحرارية، ومن عشاق الشوكولاتة، فيه آيس ستيكس بالنوتيلا. أما لو يهمك أن الريجيم ما يبوظش، هـ تلاقي أنواع كوكتيلات فاكهة كثيرة وخالية من السكر، ده غير الأنواع المعتمدة على الزبادي قليل الدسم والمخلوط معاها فاكهة أو شوكولاتة. فيه كمان أنواع ثانية مبتكرة زي التشيز كيك، والأوريو والكابتشينو. نصحنا البائع أننا نجرب الزبادي بالتوت، والفراولة الخالية من السكر. زي ما قلنا أن المكان عبارة عن كشك في مول، فأخذنا الآيس ستيكس واستكملنا جولتنا... والحقيقة أنها كانت فرصة أننا نقدر نستمتع بهم لأطول فترة ممكنة –وطبعًا نقول لك رأينا. بالرغم من أن الزبادي بالتوت كان خفيف، إلا أنها كانت كريمي ولذيذة. المشكلة الوحيدة فيها كانت أن نسبة الزبادي فيها أكبر بكثير من نسبة التوت، وبالتالي طعمه كان غالب فيها. أما الفراولة، ففاقت كل توقعاتنا؛ تخيلنا أنها هـ تكون فاقدة الطعم والنكهة زي أي حاجة معمولة لمهووسي الريجيم، لكن لحسن الحظ كان طعمها رائع وكأنها معمولة من فراولة مجمدة طازجة. إجمالًا فريشي كان تجربة منعشة جدًا، لأنه بـ يقدم آيس ستيكس لا تقاوم، ومرضية لجميع الأذواق، ومش بس كده، ده موجود تقريبًا في كل مولات القاهرة، وده لحسن حظنا... علشان إحنا أكيد هـ نرجع لهم علشان نجرب أنواع أكثر.

...

كيكس لاند: كيك من تصميمك في مدينة نصر
اصدرت في: 26/01/2014

الحلويات.. من أكثر الحاجات اللي لو هـ نأكلها أكثر من مرة في اليوم مش هـ نزهق وكمان لما نجربها من المكان الصح، "كيكس لاند Cakes Land -" اللي في مكرم عبيد في مدينة نصر بـ يقدم كل الكيكات اللي ممكن نتخيلها بجميع الأشكال والألوان وبطعم خرافي. بصراحة ما جاءتش لنا فرصة أن إحنا نشوف المحل عامل إزاي علشان إحنا طلبناه دليفري، لكن لما شفنا الصور على صفحتهم على الفيسبوك عجبنا كل الكيكات بالألوان الكثير والأحجام الكبيرة والصغيرة وكيك المناسبات سواء لأعياد الميلاد أو أفراح أو تَخرُج اللي ممكن تصممها أنت بنفسك وتبعث لهم الصورة ويعملوا لك زيها بالضبط، وعندهم جزء كده للمعجنات زي الميني بيتزا (60 جنيه للكيلو) والساليزونات (70 جنيه للكيلو) والميني ساندويتش (65 جنيه للكيلو) بس ده لازم نطلبه قبلها بيوم كامل علشان يتعمل. أما بالنسبة للكب كيكس والحلويات بشكل عام ففكرة الـ 3D كيكس هما اللي بـ يتميزوا بها، وعلشان تعمل أوردر للـ 3D كيكس لازم يكون قبلها على الأقل بـ 5 أيام، بس فيه حاجات بـ تتعمل أوردر سريع بـ تأخذ 3 ساعات، لكن سواء 3 ساعات أو خمسة أيام الأوردر بـ يكون شكله لطيف جدًا ونفس الشكل المطلوب علشان كل الحاجات معمولة بفن، أسعار الكيك بـ تكون على حسب حجمها ولكام شخص وبـ تتراوح من (150 – 500 جنيه) والكب كيكس (10 – 15 جنيه) وكرات الشوكولاتة عبارة عن 24 قطعة بـ (35 جنيه)، وفيه عندهم كمان بوكس عبارة عن ميني كب كيكس فيه 30 قطعة بـ (50 جنيه) والـ 14 قطعة بـ (30 جنيه) والموس كب بـ (10 جنيه) وعندهم كمان مشروبات ساخنة زي الكابتشينو والموكا والنسكافيه والأمريكان كافيه (8 – 12 جنيه). أول ما قررنا نطلب قلنا ننوع في اختيارنا للحلو علشان نذوق كل حاجة، طلبنا واحد موس كب بالفراولة اللي كان عبارة عن قطع فراولة وموس الفانيليا اللي مرصوصين فوق بعض بشكل شهي وطعم لذيذ كمان، وواحد تشيز تارت بالتوت عبارة عن قطع من التوت تحتها تشيز مع بسكويت فريش هائل، طلبنا كمان من السبشيال كيك بتاعتهم وهي كيكة الشوكولاتة الملفوفة بشوكولاتة جالكسي فلوتس وعليها من فوق قطع من التويكس والسنيكرز اللي بـ ننصحكم أنكم لازم تجربوها. مشكلتنا كلها كانت في الدليفري اللي تأخر في توصيل الأوردر لأنه مش موجود قبل الساعة 12 أو 1 مع أنهم بـ يفتحوا الساعة 10 الصبح، كل الحلويات فريش وطعمها خفيف ولذيذ، المرة اللي جاية هـ نجرب المعجنات علشان شكلها في الصور كان لا يقاوم، وأول ما يكون عندنا مناسبة خاصة مش هـ نتردد نطلب من الـ 3D كيكس بتاعتهم.

...

ساليه سوكريه: مخبوزات وحلويات رائعة في مدينة نصر
اصدرت في: 12/01/2014

مؤخرًا بدأت محلات الحلويات والمخبوزات تنتشر بشكل ملحوظ في القاهرة وتزداد أكثر وأكثر، فرع "ساليه سوكريه" في مدينة نصر واحد من أهم فروع محل المخبوزات والحلويات الفرنسي الشهير. مع أكثر من 11 فرع في مصر ساليه سوكريه بـ يقدم مخبوزات طازجة وباتون ساليه وحلويات شرقية وتورتات وشوكولاتة، وكمان بـ يقدم تورتات بتصميمات خاصة لأعياد الميلاد والمناسبات الخاصة. فرع مدينة نصر في مصطفى النحاس فرع جميل ونظيف، وثقة منهم يفتحوا بجانب لابوار مباشرة، أول ما تدخل بـ تلاقي في المنتصف فيه رفوف طويلة مرصوص عليها كل أنواع الباتون ساليه الموجودة، وراءها فيه مكان عرض كبير فيه كل المخبوزات من الكرواسون بالجبنة والزعتر وكرواسون سادة وكرواسون بالسوسيس وكرواسون بالجبنة الشيدر والتركي (4.5 جنيه للقطعة)، ومخبوزات ثانية زي البيتزا الصغيرة والساليزونات وساندويتشات التونة المثلثة الشهيرة كل المخبوزات دي بـ تُباع بالطبق، مثلاً تشكيلة طبق صغير منها بـ (60 جنيه) وطبق قطع البيتزا الصغيرة بـ (40 جنيه). ثلاجة العرض الكبيرة كان فيها جميع أنواع الحلويات الشهية جدًا منها التشيز كيك (12 جنيه) وتارت صغير بالتوت (2 جنيه) وبروفيترول (12 جنيه) وحلوى فرين بالأناناس والمانجا (5 جنيه) اللي كانت مكونة من طبقات من الكيك الطازة والكريمة اللباني وقطع المانجا والأناناس وكان طعمها هائل، التورتات في ساليه سوكريه يتراوح سعرها من (120: 150 جنيه) والشوكولاتة من (150: 180 جنيه للكيلو)، والحلويات الشرقية زي الكنافة من (32: 60 جنيه للكيلو) حسب مكوناتها زي الكنافة بالمكسرات والكنافة بالقشطة والكنافة السادة، البسبوسة سعرها من (28: 48 جنيه للكيلو) كمان حسب مكوناتها، وفيه كمان بلح الشام (38 جنيه للكيلو) وزلابيا شرقية (28 جنيه للكيلو)، واحنا بندفع الفاتورة الكاشير قال لنا إن من 11 لـ 12 بالليل فيه خصم على كل حاجة 35% ودي حاجة بسطتنا جداً. الكرواسون اللي جربناه وحلوى الفيرين والبروفيترول وتارت التوت كان طعمهم من أفضل ما يكون وطازة جدًا وحتى شكلهم حلو ومعمول بفن، الناس اللي هناك ما بـ يمسكوش حاجة بأيدهم ونضاف جدًا، بعد ما جربنا ساليه سوكريه ما عندناش مشكلة كل يوم نروح نفطر فطار خفيف وطازة من هناك ونحلي كمان.

...

فوشون: حلويات باريسية فى مدينة نصر
اصدرت في: 24/09/2013

معروف أن القاهريين بـ يعشقوا أى حاجة حلوة، وكافيهات القاهرة شهدت منافسة كبيرة من أماكن جديدة فتحت في العاصمة. مع خبرة تتجاوز 100 سنة فى عالم الحلويات، الاسم الباريسى المعروف "فوشون - Fauchon" بـ يقدم حلويات فاخرة ومخبوزات مميزة للمدينة. زيارتنا لفرعهم فى مدينة نصر داخل فندق سونستا كانت لتجربة الحلويات الفرنسية الأصلية. مكان "فوشون" على يمين مدخل اللوبى بديكوراته المعروفة بلونها الفوشيا والأسود وسط المساحة الصغيرة، لكن منظمة بعناية فى نفس الوقت. كبائن زجاجية كبيرة بـ تعرض مجموعة من الحلويات اللذيذة، أما الأرفف فمليانة بالمنتجات الملونة. رغم أن الفرع بـ يقدم قعدة تشبه الكافيهات، لكن مافيش أى منيوهات، وده معناه أن طريقة طلبك الوحيدة عن طريق الكاونتر بنفسك. من الأسباب الرئيسية فى شهرة فوشون هو الماكارون، ده غير تقديمه لمجموعة من الحلويات وفواتح الشهية اللذيذة. لاحظنا علب تحتوى على قطع صغيرة من كريب الجبنة (30 جنيه)، بسكويت بالجبنة (+107 جنيه)، برطمانات مسطردة (115 جنيه) وعلب صفيح من الفواجرا foie gras الفرنسية، أسعارها تبدأ من 275 جنيه بالنسبة لحجم 65 جرام. مجموعة من مربى الفواكة سعرها 120 جنيه، وكمان تشكيلة كبيرة من نكهات الشاى المختلفة تحتل أرفف جزء كامل؛ علبة متوسطة جذابة من الشاى الأخضر مثلاً سعرها كان 255 جنيه. أسعار عجين الكيك يبدأ تقريبًا من 30 جنيه، معجنات تكفى فرد واحد سعرها 20 جنيه وكيكات أكبر للمناسبات الخاصة، منها شوكليت موس 'Reve Gauche' بسعر 170 جنيه و'Charlotte Frambois بـ 165 جنيه. الماكارون الخاص بهم سعره محدد بناءً على الوزن (210 جنيه/ كيلو)، ونفس الكلام بالنسبة لقطع الشوكولاتة المغطاة بالسكر chocolate nibbles بسعر من 250 لـ 390 جنيه الكيلو. معظم منتجات فوشون تغليفها جذاب وجاهزة لتقديمها كهدية؛ تشكيلة من الشوكولاتة والجيلى بـ تقدم داخل علب صفيح شيك على شكل قلب (150 جنيه) أو على شكل دبدوب (160 جنيه)، مع الهدايا الأكثر شعبية زى فازات صيني تبدأ من 700 جنيه، وسلات هدايا جاهزة فيها أجمد منتجات فوشون سعرها يوصل لغاية 1000 جنيه. طلبنا قطعتين صغيرين من المارزيبان اللى صعب تلاقيهم فى العاصمة (6 جنيه للقطعة)، قطعة إكلير شوكولاتة (20 جنيه)، قطعتين بسكويت تغطيهم الشوكولاتة (3.60 جنيه) و250 جرام مشكل من الماكارونز (52.50 جنيه). رغم أن قطع المارزيبان كانت ملونة بحيث تأخذ شكل فواكة مختلفة، فوجئنا أن مافيش فرق فى الطعم. الطبقة الخارجية لسوء الحظ كانت ناشفة أكثر مما توقعنا، أما الطعم المسكر فكان قوى بزيادة ويفتقد نكهة اللوز الحقيقية. البسكويت كان طرى، طازج وطعم الشوكولاتة كان روعة، أما الإكلير فكان دسم بزيادة، مع طبقة مُرة من الشوكولاتة الداكنة على الوجه وحشو من الشوكولاتة بالحليب داخل عجينة طرية، واللى كان واضح أنها اتسخنت أكثر من مرة. مع 250 جرام من الماكارونز، جهزنا علبة صغيرة فيها 15 قطعة؛ خمسة موز، خمسة توت أحمر وخمسة شوكولاتة. طعم كل قطعة منهم كان خرافى وأحلى حتى من تخيلنا، مع طبقة خارجية مقرمشة ومركزها السائح بطعمه اللذيذ. عرضوا علينا كمان نتذوق النكهات الباقية، زى القهوة والشوكولاتة المزدوجة، والاثنين كانوا منتهى الروعة. مافيش كلام أن فوشون محافظ على سمعته كأحسن مكان يقدم الماكارونز فى المدينة. أحجام العلب بألوانها المبهجة تتراوح بين الصغير والكبير، بحيث قطع الحلويات الرائعة تكون اختيار مطروح لكل الناس اللى محتاجة هدايا لحفلات العشاء. رغم أن أغلب المنتجات المستوردة أسعارها عالية، حلويات ومخبوزات فوشون المحلية أسعارها معقولة بالمقارنة مع منافسينهم، وتعتبر وجبات خفيفة أو هدايا راقية وطعمها لذيذ.

...

دي. كابتشينو: الكافيه الرسمي للروقان فى مدينة نصر
اصدرت في: 07/03/2013

"الكافيه الرسمي للروقان".. ده الشعار اللى كاتبينه على المنيو وأماكن كثيرة فى الكافيه اللى اكتشفناه بالصدفة وإحنا بـ نشتري حاجات من شارع ابن الهيثم المتفرع من عباس العقاد في مدينة نصر، كافيه "دي. كابتشينو – D. Cappuccino" بنوره وديكوراته شدنا خاصة أننا كنا تعبانين من اللف والدوران وكنا محتاجين نأكل ونشرب حاجة مسكرة ونستريح شوية. السمة الأساسية للمكان هو الخط والحروف العربية اللى مرسومة على الزجاج من الخارج وبالداخل، أول ما تدخل هـ تحس بجو مريح وهادئ وهـ تلاقى شباب كثيرة قاعدة إما بـ تذاكر أو شغالين على اللابتوب بتاعهم (Wi-Fi متوفر فى المكان). لأول مرة نروح مكان حلو من كل حاجة، المكان بـ يغلب عليه جو إسلامي مودرن (ودي حاجة أول مرة نلاقيها فى القاهرة)، بالخط العربي فى الديكورات، شاشات عليها لوجو الكافيه بـ تعرض أفلام كرتون عالمية، مزيكا وأغاني إسلامية باللغة الإنجليزية لماهر زين وغيره، المكان اللى بره مختلط وللعائلات ديكوره باللونين الأخضر مع البيج بكنب مودرن، وفيه مكان ثاني غالب عليه اللون البمبى والأحمر الخفيف ده مخصص للبنات فقط ومنفصل عن الثاني بزجاج شفاف، فيه رائحة بخور وعنبر وحاجات حلوة ثانية خلت قعدتنا مميزة، وجديدة علينا الصراحة. تعريفهم عن الكافيه فى المنيو لطيف جدًا ومضحك من خلال قصة حكوها، بـ يقولوا: "علي الرغم من اعتمادنا الكلي علي المنبهات علشان نصحي من النوم لكن كلنا بـ يكون نفسنا نقوم نخبطها في الحيطة أول لما بـ ترن.. يقال أن الراجل اللي اخترع المنبه ما كانش بـ يعرف يضبطه إلا علي الساعة 4 الصبح.. فبعد ما اخترعه بفترة قتلته مراته الساعة 4:05 من كثر الدوشة.. فلولا وجود القهوة علشان تفوقنا كان عدد الناس اللي بـ تتقتل زاد بكثير بعد رنة المنبه، المهم ومن غير كلام كثير.. دي كابتشينو هو "الكافيه الرسمي للروقان". بصرف النظر عن أن القصة حقيقية ولا لأ لكنها شدتنا زي ما المنيو وتصميمه شدنا ورسم ابتسامة على وجهنا، نيجي بقى للمنيو اللى كانت شاملة كل شيء لدرجة أننا ممكن نصنفه مطعم كمان علشان تشكيلات الساندويتشات والباستا والبيتزا اللى بـ يقدموها، التصميم بتاعها حلو جدًا وفيه روح فكاهة هـ تخليك تأخذ وقت شوية أنك تتفرج عليها، الحاجة الوحيدة اللى مش مكتوبة فى المنيو هى الحلويات لكن ممكن تروح تختارها بنفسك من ثلاجة العرض. أخذنا فى البداية تشيكن سيزار سلاد (25 جنيه)، وسباجيتي كبتافى (29 جنيه)، الطلب أخذ وقت شوية بس لما جاء لنا كان تقديمه حلو، السلاطة كانت حلوة وفريش والصوص مع الفراخ المستوية كانت حلوة مع شرائح فلفل أحمر للتزيين، كانت مشكلتنا الوحيدة بس أن كميتها قليلة بالنسبة للسعر، السباجيتي كان بصوص الكاري مع قطع الفراخ، كل حاجة كانت تمام فى الطبق ده ماعدا كمية صوص الكاري الكثيرة اللى كانت بزيادة خلتنا محتاجين نشرب وراها حاجة، بس إجمالاً اتبسطنا بالطبق. من المشروبات لقينا عندهم فرابيه بلح وده أول مرة نشوفه لكن للأسف ما كانش موجود، اختارنا سنكرز شيك (حجم صغير 25 جنيه)، وهوت بوريو (حجم صغير 15 جنيه) اللى كانوا حلوين جدًا مافيش كلام واتبسطنا بهم، لما رحنا عند ثلاجة العرض علشان نختار حاجة نحلى بها ما كانش فيه غير صنف واحد بس افتكرناه فى الأول تشيز كيك بالكراميل لكن مع أول قطمة منه اكتشفنا أنه كريم كراميل كيك (17 جنيه) وكان الاكتشاف ده رائع، شريحة كيك عليها كريم كراميل مجمد من فوق بنفس شكل التشيز كيك، كانت خفيفة جدًا والكيك هش وجميل.. ختام رائع. ثاني يوم من زيارتنا اكتشفنا أن الكافيه ده راحه الشيخ العريفي وقت زيارته لمصر وهما منزلين له صور كثيرة على صفحة "دي. كابتشينو" على الفيسبوك، وكمان العريفي شكر فيه على حسابه فى تويتر. طاقم العمل هناك مهذب جدًا وروحه حلوة وخدوم واستمتاعنا بالمكان مش هـ يقل عن العريفى وأكيد أى حد يروح المكان كمان من بعدنا.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول