مخبوزات وحلويات كافيهات in مدينة نصر Cairo, Egypt

كافيهات

ساليه سوكريه: مخبوزات وحلويات رائعة في مدينة نصر
اصدرت في: 12/01/2014

مؤخرًا بدأت محلات الحلويات والمخبوزات تنتشر بشكل ملحوظ في القاهرة وتزداد أكثر وأكثر، فرع "ساليه سوكريه" في مدينة نصر واحد من أهم فروع محل المخبوزات والحلويات الفرنسي الشهير. مع أكثر من 11 فرع في مصر ساليه سوكريه بـ يقدم مخبوزات طازجة وباتون ساليه وحلويات شرقية وتورتات وشوكولاتة، وكمان بـ يقدم تورتات بتصميمات خاصة لأعياد الميلاد والمناسبات الخاصة. فرع مدينة نصر في مصطفى النحاس فرع جميل ونظيف، وثقة منهم يفتحوا بجانب لابوار مباشرة، أول ما تدخل بـ تلاقي في المنتصف فيه رفوف طويلة مرصوص عليها كل أنواع الباتون ساليه الموجودة، وراءها فيه مكان عرض كبير فيه كل المخبوزات من الكرواسون بالجبنة والزعتر وكرواسون سادة وكرواسون بالسوسيس وكرواسون بالجبنة الشيدر والتركي (4.5 جنيه للقطعة)، ومخبوزات ثانية زي البيتزا الصغيرة والساليزونات وساندويتشات التونة المثلثة الشهيرة كل المخبوزات دي بـ تُباع بالطبق، مثلاً تشكيلة طبق صغير منها بـ (60 جنيه) وطبق قطع البيتزا الصغيرة بـ (40 جنيه). ثلاجة العرض الكبيرة كان فيها جميع أنواع الحلويات الشهية جدًا منها التشيز كيك (12 جنيه) وتارت صغير بالتوت (2 جنيه) وبروفيترول (12 جنيه) وحلوى فرين بالأناناس والمانجا (5 جنيه) اللي كانت مكونة من طبقات من الكيك الطازة والكريمة اللباني وقطع المانجا والأناناس وكان طعمها هائل، التورتات في ساليه سوكريه يتراوح سعرها من (120: 150 جنيه) والشوكولاتة من (150: 180 جنيه للكيلو)، والحلويات الشرقية زي الكنافة من (32: 60 جنيه للكيلو) حسب مكوناتها زي الكنافة بالمكسرات والكنافة بالقشطة والكنافة السادة، البسبوسة سعرها من (28: 48 جنيه للكيلو) كمان حسب مكوناتها، وفيه كمان بلح الشام (38 جنيه للكيلو) وزلابيا شرقية (28 جنيه للكيلو)، واحنا بندفع الفاتورة الكاشير قال لنا إن من 11 لـ 12 بالليل فيه خصم على كل حاجة 35% ودي حاجة بسطتنا جداً. الكرواسون اللي جربناه وحلوى الفيرين والبروفيترول وتارت التوت كان طعمهم من أفضل ما يكون وطازة جدًا وحتى شكلهم حلو ومعمول بفن، الناس اللي هناك ما بـ يمسكوش حاجة بأيدهم ونضاف جدًا، بعد ما جربنا ساليه سوكريه ما عندناش مشكلة كل يوم نروح نفطر فطار خفيف وطازة من هناك ونحلي كمان.

...

فوشون: حلويات باريسية فى مدينة نصر
اصدرت في: 24/09/2013

معروف أن القاهريين بـ يعشقوا أى حاجة حلوة، وكافيهات القاهرة شهدت منافسة كبيرة من أماكن جديدة فتحت في العاصمة. مع خبرة تتجاوز 100 سنة فى عالم الحلويات، الاسم الباريسى المعروف "فوشون - Fauchon" بـ يقدم حلويات فاخرة ومخبوزات مميزة للمدينة. زيارتنا لفرعهم فى مدينة نصر داخل فندق سونستا كانت لتجربة الحلويات الفرنسية الأصلية. مكان "فوشون" على يمين مدخل اللوبى بديكوراته المعروفة بلونها الفوشيا والأسود وسط المساحة الصغيرة، لكن منظمة بعناية فى نفس الوقت. كبائن زجاجية كبيرة بـ تعرض مجموعة من الحلويات اللذيذة، أما الأرفف فمليانة بالمنتجات الملونة. رغم أن الفرع بـ يقدم قعدة تشبه الكافيهات، لكن مافيش أى منيوهات، وده معناه أن طريقة طلبك الوحيدة عن طريق الكاونتر بنفسك. من الأسباب الرئيسية فى شهرة فوشون هو الماكارون، ده غير تقديمه لمجموعة من الحلويات وفواتح الشهية اللذيذة. لاحظنا علب تحتوى على قطع صغيرة من كريب الجبنة (30 جنيه)، بسكويت بالجبنة (+107 جنيه)، برطمانات مسطردة (115 جنيه) وعلب صفيح من الفواجرا foie gras الفرنسية، أسعارها تبدأ من 275 جنيه بالنسبة لحجم 65 جرام. مجموعة من مربى الفواكة سعرها 120 جنيه، وكمان تشكيلة كبيرة من نكهات الشاى المختلفة تحتل أرفف جزء كامل؛ علبة متوسطة جذابة من الشاى الأخضر مثلاً سعرها كان 255 جنيه. أسعار عجين الكيك يبدأ تقريبًا من 30 جنيه، معجنات تكفى فرد واحد سعرها 20 جنيه وكيكات أكبر للمناسبات الخاصة، منها شوكليت موس 'Reve Gauche' بسعر 170 جنيه و'Charlotte Frambois بـ 165 جنيه. الماكارون الخاص بهم سعره محدد بناءً على الوزن (210 جنيه/ كيلو)، ونفس الكلام بالنسبة لقطع الشوكولاتة المغطاة بالسكر chocolate nibbles بسعر من 250 لـ 390 جنيه الكيلو. معظم منتجات فوشون تغليفها جذاب وجاهزة لتقديمها كهدية؛ تشكيلة من الشوكولاتة والجيلى بـ تقدم داخل علب صفيح شيك على شكل قلب (150 جنيه) أو على شكل دبدوب (160 جنيه)، مع الهدايا الأكثر شعبية زى فازات صيني تبدأ من 700 جنيه، وسلات هدايا جاهزة فيها أجمد منتجات فوشون سعرها يوصل لغاية 1000 جنيه. طلبنا قطعتين صغيرين من المارزيبان اللى صعب تلاقيهم فى العاصمة (6 جنيه للقطعة)، قطعة إكلير شوكولاتة (20 جنيه)، قطعتين بسكويت تغطيهم الشوكولاتة (3.60 جنيه) و250 جرام مشكل من الماكارونز (52.50 جنيه). رغم أن قطع المارزيبان كانت ملونة بحيث تأخذ شكل فواكة مختلفة، فوجئنا أن مافيش فرق فى الطعم. الطبقة الخارجية لسوء الحظ كانت ناشفة أكثر مما توقعنا، أما الطعم المسكر فكان قوى بزيادة ويفتقد نكهة اللوز الحقيقية. البسكويت كان طرى، طازج وطعم الشوكولاتة كان روعة، أما الإكلير فكان دسم بزيادة، مع طبقة مُرة من الشوكولاتة الداكنة على الوجه وحشو من الشوكولاتة بالحليب داخل عجينة طرية، واللى كان واضح أنها اتسخنت أكثر من مرة. مع 250 جرام من الماكارونز، جهزنا علبة صغيرة فيها 15 قطعة؛ خمسة موز، خمسة توت أحمر وخمسة شوكولاتة. طعم كل قطعة منهم كان خرافى وأحلى حتى من تخيلنا، مع طبقة خارجية مقرمشة ومركزها السائح بطعمه اللذيذ. عرضوا علينا كمان نتذوق النكهات الباقية، زى القهوة والشوكولاتة المزدوجة، والاثنين كانوا منتهى الروعة. مافيش كلام أن فوشون محافظ على سمعته كأحسن مكان يقدم الماكارونز فى المدينة. أحجام العلب بألوانها المبهجة تتراوح بين الصغير والكبير، بحيث قطع الحلويات الرائعة تكون اختيار مطروح لكل الناس اللى محتاجة هدايا لحفلات العشاء. رغم أن أغلب المنتجات المستوردة أسعارها عالية، حلويات ومخبوزات فوشون المحلية أسعارها معقولة بالمقارنة مع منافسينهم، وتعتبر وجبات خفيفة أو هدايا راقية وطعمها لذيذ.

...

دي. كابتشينو: الكافيه الرسمي للروقان فى مدينة نصر
اصدرت في: 07/03/2013

"الكافيه الرسمي للروقان".. ده الشعار اللى كاتبينه على المنيو وأماكن كثيرة فى الكافيه اللى اكتشفناه بالصدفة وإحنا بـ نشتري حاجات من شارع ابن الهيثم المتفرع من عباس العقاد في مدينة نصر، كافيه "دي. كابتشينو – D. Cappuccino" بنوره وديكوراته شدنا خاصة أننا كنا تعبانين من اللف والدوران وكنا محتاجين نأكل ونشرب حاجة مسكرة ونستريح شوية. السمة الأساسية للمكان هو الخط والحروف العربية اللى مرسومة على الزجاج من الخارج وبالداخل، أول ما تدخل هـ تحس بجو مريح وهادئ وهـ تلاقى شباب كثيرة قاعدة إما بـ تذاكر أو شغالين على اللابتوب بتاعهم (Wi-Fi متوفر فى المكان). لأول مرة نروح مكان حلو من كل حاجة، المكان بـ يغلب عليه جو إسلامي مودرن (ودي حاجة أول مرة نلاقيها فى القاهرة)، بالخط العربي فى الديكورات، شاشات عليها لوجو الكافيه بـ تعرض أفلام كرتون عالمية، مزيكا وأغاني إسلامية باللغة الإنجليزية لماهر زين وغيره، المكان اللى بره مختلط وللعائلات ديكوره باللونين الأخضر مع البيج بكنب مودرن، وفيه مكان ثاني غالب عليه اللون البمبى والأحمر الخفيف ده مخصص للبنات فقط ومنفصل عن الثاني بزجاج شفاف، فيه رائحة بخور وعنبر وحاجات حلوة ثانية خلت قعدتنا مميزة، وجديدة علينا الصراحة. تعريفهم عن الكافيه فى المنيو لطيف جدًا ومضحك من خلال قصة حكوها، بـ يقولوا: "علي الرغم من اعتمادنا الكلي علي المنبهات علشان نصحي من النوم لكن كلنا بـ يكون نفسنا نقوم نخبطها في الحيطة أول لما بـ ترن.. يقال أن الراجل اللي اخترع المنبه ما كانش بـ يعرف يضبطه إلا علي الساعة 4 الصبح.. فبعد ما اخترعه بفترة قتلته مراته الساعة 4:05 من كثر الدوشة.. فلولا وجود القهوة علشان تفوقنا كان عدد الناس اللي بـ تتقتل زاد بكثير بعد رنة المنبه، المهم ومن غير كلام كثير.. دي كابتشينو هو "الكافيه الرسمي للروقان". بصرف النظر عن أن القصة حقيقية ولا لأ لكنها شدتنا زي ما المنيو وتصميمه شدنا ورسم ابتسامة على وجهنا، نيجي بقى للمنيو اللى كانت شاملة كل شيء لدرجة أننا ممكن نصنفه مطعم كمان علشان تشكيلات الساندويتشات والباستا والبيتزا اللى بـ يقدموها، التصميم بتاعها حلو جدًا وفيه روح فكاهة هـ تخليك تأخذ وقت شوية أنك تتفرج عليها، الحاجة الوحيدة اللى مش مكتوبة فى المنيو هى الحلويات لكن ممكن تروح تختارها بنفسك من ثلاجة العرض. أخذنا فى البداية تشيكن سيزار سلاد (25 جنيه)، وسباجيتي كبتافى (29 جنيه)، الطلب أخذ وقت شوية بس لما جاء لنا كان تقديمه حلو، السلاطة كانت حلوة وفريش والصوص مع الفراخ المستوية كانت حلوة مع شرائح فلفل أحمر للتزيين، كانت مشكلتنا الوحيدة بس أن كميتها قليلة بالنسبة للسعر، السباجيتي كان بصوص الكاري مع قطع الفراخ، كل حاجة كانت تمام فى الطبق ده ماعدا كمية صوص الكاري الكثيرة اللى كانت بزيادة خلتنا محتاجين نشرب وراها حاجة، بس إجمالاً اتبسطنا بالطبق. من المشروبات لقينا عندهم فرابيه بلح وده أول مرة نشوفه لكن للأسف ما كانش موجود، اختارنا سنكرز شيك (حجم صغير 25 جنيه)، وهوت بوريو (حجم صغير 15 جنيه) اللى كانوا حلوين جدًا مافيش كلام واتبسطنا بهم، لما رحنا عند ثلاجة العرض علشان نختار حاجة نحلى بها ما كانش فيه غير صنف واحد بس افتكرناه فى الأول تشيز كيك بالكراميل لكن مع أول قطمة منه اكتشفنا أنه كريم كراميل كيك (17 جنيه) وكان الاكتشاف ده رائع، شريحة كيك عليها كريم كراميل مجمد من فوق بنفس شكل التشيز كيك، كانت خفيفة جدًا والكيك هش وجميل.. ختام رائع. ثاني يوم من زيارتنا اكتشفنا أن الكافيه ده راحه الشيخ العريفي وقت زيارته لمصر وهما منزلين له صور كثيرة على صفحة "دي. كابتشينو" على الفيسبوك، وكمان العريفي شكر فيه على حسابه فى تويتر. طاقم العمل هناك مهذب جدًا وروحه حلوة وخدوم واستمتاعنا بالمكان مش هـ يقل عن العريفى وأكيد أى حد يروح المكان كمان من بعدنا.

...

عرفات: حلوانى متخصص فى الكنافة النابلسية فى مدينة نصر
اصدرت في: 01/08/2012

من الصعب أن ترابيزة الأفطار فى رمضان تبقى خالية من الحلويات بأشكالها المختلفة والمتنوعة، يعنى جنب الأطباق الرئيسية والسلاطات لازم يبقى فيه اللى يحلى الترابيزة من قطايف محشية وكنافة وبلح الشام وبقلاوة بالكريمة أو محشية بالمكسرات، وبسبوسة. ورغم طعامة الحلويات دي، إلا أن فيه ناس بـ تمل من تكرارها كل رمضان وبـ تحب تخرج عن المألوف حتى وإن كان الموضوع له علاقة بالأكل. لو كنت من الأشخاص اللى حابين يغيروا فى الحلويات اللى بـ يأكلوها، يبقى لازم تجرب فى رمضان ده الكنافة النابلسية، طبعًا ده اسم جديد بالنسبة لكثير متعودين يسمعوا الكنافة الشعر والكنافة البلدى، والكنافة المبرومة، أما بقى الكنافة النابلسية بالجبنة اللى ابتدعها سكان مدينة نابلس من زمان قوى وبقى لها صيت كبير بـ تتكون من سمنة وسكر وكنافة شعر وجبنة ريكوتا، وفستق، وشربات. نيجى للسؤال المهم، منين ممكن نجيبها فى مصر؟ «عرفات» حلوانى متخصص فى الحلويات الشامية من ساعة ما فتح فى سنة 1920 له سلسلة فروع فى فلسطين، والأردن، وقطر، وأمريكا، والسعودية، والبحرين وليبيا والصين، فى مصر هـ نلاقيه موجود فى شارع على أمين امتداد مصطفى النحاس بمدينة نصر. على يافطة المحل هـ نلاقى بالبنط العريض كنافة نابلسية بالجبنة، وهى نوعين: نوع طرى وبـ يبقى لونه غامق بنى محمر، ونوع ناشف وبـ يبقى لونه برتقالى غامق والناشف أحلى من الطرى، الكيلو منه بـ 55 جنيه، طبعًا لما بـ تطلبوها بـ يرش العامل عليها ملعقة عسل وبـ ينصح الزبائن أنهم يسخنوها شوية، والأفضل أنها تتحط فى الميكرويف علشان نقدر نستمتع بالجبنة وهى سايحة مع الكنافة. بخلاف الكنافة النابلسية والبورمة الحلبى هـ تلاقى مختلف أنواع الحلويات التقليدية يعنى مثلاً هـ نلاقى بلح الشام وطعمه حلو جدًا وبـ يقرمش والكيلو منه بـ 20 جنيه، هـ نلاقى البسبوسة بأنواعها المختلفة ودي كانت أسوأ حاجة لأنها كانت مليانة جوز هند، هـ نلاقى البقلاوة برضه وأحلى نوع اللى بالكريمة الكيلو منها بـ 20 جنيه، برضه زنود الست بالقشطة طعمها تحفة، والكيلو منها بـ 30 جنيه، كيكة الروانى برضه من الحاجات الحلوة، وهى مغطية بطبقة من الفستق المطحون. رغم أن محلات الحلوانية بـ نلاقى زحمة كبيرة فيهم فى رمضان وبـ تأخذ وقت كبير فى الشراء إلا أن عرفات فيه عمال كثيرة بـ ينجزوا فى الانتهاء من الطلبات ويـ يفضلوا ماشيين معاكم فى أركان المحل لحد ما تخلصوا طلباتكم، كمان بـ يشرحوا أنواع الحلويات اللى ممكن تكونوا مش عارفينها، برضه من الحاجات الكويسة فى "عرفات" أن عنده خدمة توصيل، وده بـ يعتمد على المناطق اللى ساكنين فيها الزبائن، يعنى مثلاً بـ يخدم على مدينة نصر ومصر الجديدة والمناطق القريبة من المنطقتين دول.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن