شيشة كافيهات in مدينة نصر Cairo, Egypt

كافيهات

تايم جيت: تجربة مريرة في كافيه مغمور في مدينة نصر
اصدرت في: 11/07/2012

عاوزين نوضح حاجة قبل ما نبدأ نتكلم عن المكان اللي رحناه النهاردة، أن مش معنى أن تجربتنا كانت سيئة في المكان أنه بـ يكون بنفس المستوى طوال الوقت، إحنا مقتنعين جدًا بنظرية الـ Day Off أو الأيام اللي بـ يغيب فيها التوفيق بشكل ملحوظ، لكن إحنا كمان مقتنعين أن فيه حد أدنى من العناصر اللي لازم تتوفر لأي مكان بـ يقدم خدمة للجمهور. وعلشان نكون منصفين؛ الحد الأدنى كان متوفر في مطعم وكافيه «تايم جيت» اللي في شارع جانبي بـ يوصل بين شارعي عباس العقاد ومكرم عبيد في مدينة نصر، لكن واضح أننا اللي توقعاتنا كانت عالية بخصوص المكان خاصة لما شفناه من الخارج بتصميمه المتميز ومكانه الهادئ. لكن عرفنا بمجرد ما دخلنا أن أحلامنا مش هـ تتحقق هنا وأننا لازم ننزل بسقف المطالب شوية. «تايم جيت- Time Gate» أو بوابة الزمن عامل لنفسه Theme مميز واضح في كل الديكورات والمنيوهات وحتى في التصميم الخارجي للمحل، التصميم كله معتمد على فكرة البوابات الزمنية اللي بـ تفصل بين العوالم المختلفة في الكون، ومستخدم شعارات ورسوم في كل أركان المحل لإضفاء جو الخيال العلمي على المكان، لكن للأسف أفسد كل حاجة الديكور والمفروشات المتهالكة والأرضيات المغطاة بالسيراميك الرخيص والحمامات غير النظيفة بالمرة، يعني كأنهم عملوا الفكرة وافتتحوا المكان وبعد كده سابوا كل حاجة زي ما هي من غير عناية أو تطوير. المكان كبير جدًا وهو في دور علوي بـ تطلع له من سلم جانبي في العمارة، وفي الشكل هو أقرب للكافيه أو القهوة من كونه مطعم. أخذنا ركن بعيد عن الناس اللي بـ تدخن لأن مافيش مكان مخصص لغير المدخنين وبدأنا نتفحص المنيو. المنيو فيه كل حاجة تقريبًا، مقبلات وسلاطات وأطباق رئيسية من اللحوم والدجاج والمأكولات البحرية، وفيه ساندويتشات وبيتزا وباستا ومشروبات الكافيه المعروفة وبعض الحلويات والشيشة طبعًا. طلبنا طبق مقبلات مشكل فيه كبيبة وسمبوسك وأصابع موتزاريلا مقلية (20 جنيه) وطلبنا بيتزا تايم جيت (32 جنيه) اللي باللحمة المفرومة والسوسيس والدجاج وطبق رئيسي اسمه تشيكن سبيشيال (59 جنيه) فيه صدور دجاج مقلية وملفوفة وفيها حشو من المشروم والبصل ووحدات جمبري صغير وطبق نجرسكو بالجبنة (28 جنيه). الأكل بدأ ينزل أمامنا على الترابيزة بعد حوالي ساعة وربع من الانتظار، وده بعد ما طلبنا منهم أكثر من مرة أننا نلغي الطلب ونمشي لأن التأخير ده مش طبيعي، وقولنا لهم أن مافيهاش حاجة لو قالوا لنا أن الأكل هنا بـ يتأخر أو أنهم مش بتوع أكل أساسًا وأن المشاريب والشيشة هي الموضوع، لكن بعد اعتذارات كثير نزل الأكل وطبعًا تقدروا تتوقعوا معانا مستوى وطعم الأكل نفسه، المقبلات شبه نيئة، البيتزا مش بيتزا، فطيرة عليها شوية لحمة مفرومة ومن غير جبنة تقريبًا، المكرونة النجرسكو كانت بدون أي نكهة أو توابل، الدجاج بالجمبري ده اللي يعني كان حلو شوية مع الخضار السوتيه، لكن بعد طول الانتظار والمقبلات اللي مالهاش علاقة بفتح النفس كان صعب نستطعم أي حاجة ولو كانت حلوة. حاولوا يصالحونا بطبق فروت سلاط بالآيس كريم، الحقيقة هو كان لذيذ، علشان كده تأكدنا أن مشكلة المكان – بعيد عن الإهمال- هي الأكل، وأن معظم زائريه بـ يفضلوا المشروبات والشيشة والفرجة على التليفزيون. شكرناهم جدًا وخرجنا ندور على مكان ثاني نأكل فيه بعد اللي حصل فينا. وعرفنا أن تجربة الأكل في «تايم جيت» مش هـ تتكرر ثاني، بس جايز نفكر في موضوع زيارته ككافيه.

...

الخان: مطعم وكافيه بطابع شرقي في مدينة نصر
اصدرت في: 16/05/2012

مش عارفين إمتى ممكن نقول أننا خلاص غطينا كل محلات ومطاعم شارع عباس العقاد بمقالات نقدية في كايرو 360 لأن الحقيقة كل مرة نعدي فيها من هناك بـ نكتشف أماكن جديدة لسه فاتحة أو بقالها فترة جديدة وإحنا ما أخذناش بالنا منها، ده غير المحلات اللي بـ تغير نشاطاتها وبالتالي بـ تغير أسمائها، وكثير بـ نعتمد على أصدقائنا اللي ساكنين هناك علشان يقولوا لنا لو فيه مكان جديد فتح وإحنا مش كاتبين عنه. أمام محل «قويدر» العملاق على الصف المقابل، هـ تلاقي محل واجهته صغيرة اسمه «الخان»، مطعم بـ يقدم مأكولات شرقية وكافية، موجود في الدور الثاني فوق منفذ بيع منتجات مزارع دينا، وله مدخل خاص به من الدور الأرضي، والملفت في المدخل أنك هـ تلاقي على شمالك كاونتر زجاجي معروض عليه إكسسوارات وحلي وأساور زي اللي بـ تباع في خان الخليلي والمناطق الأثرية. ما قدرناش نعرف دي للبيع ولا للعرض فقط لأن ما كانش فيه حد نسأله! الطابق العلوي مساحته كبيرة وله شكل مستطيل والمسافات معقولة بين الترابيزات، والديكور واخد الطابع العربي بالألوان الخشبية والأرابيسك والنقوش الصوفية على الجدران والأسقف، والمكان كله زي ما يكون تراس مغطى بأسقف معلقة، ومافيش جزء مقفول ومكيف لغير المدخنين، كله مسموح فيه بتدخين الشيشة، لكن ممكن تقعد على أطراف التراس اللي بـ تطل على الشارع وهناك مش هـ تحس بأي دخان وهـ تستمتع برؤية الشارع وهـ تبقى شايف برضه شاشات التليفزيون اللي داخل المحل. رغم أن كل حاجة في شكل المكان والديكور بتاعه بـ توحي أنه كافيه أو قهوة وبس، إلا أن المفاجأة لما بصينا في المنيو ولقينا كل أصناف الأكل تقريبًا موجودة من أول الساندويتشات لحد الموزة البتلو والمشويات. سألنا الجرسون عن أصل المحل وطبيعته وقال لنا أنه في البداية كان مطبخ شرقي وبس وبعد فترة استحدث فكرة الشيشة والقعدة العربي وألعاب الطاولة والشطرنج، وده عمل إقبال أكثر على المكان. وعلشان تجرب أحسن حاجة متميزة في مكان أول مرة تروحه، يبقى تبص في المنيو وتطلب كل طبق مكتوب جنب اسمه اسم المحل نفسه، اللي هو هنا "الخان"، يعني ستيك فيليه بصوص الخان وبيتزا الخان (25 جنيه) الخان كوكتيل (20 جنيه) وآيس كريم الخان وهكذا. تقريبًا عملنا كده بس أكيد ما كانش ينفع نجرب كل حاجة. بدأنا بسلاطة السيزر بالدجاج (22 جنيه) وكانت كميتها كبيرة ومعاها صوص كريمة وجبنة رومي مبشورة وطعمها كان هائل. فيليه اللحم بصوص الخان والجمبري مع الأرز الأبيض والخضار السوتيه (65 جنيه) كان مفاجأة بكل المقاييس، لحم بقري بلدي صافي بصوص المسطردة والتوابل العربية (خلطة خاصة بالمكان) مع وحدات جمبري والسوتيه مع حبات الذرة الحلوة والبروكلي، حجم الطبق كبير ومشبع جدًا والسوتيه كان خيالي. نفس المفاجأة السارة كانت في طبق التشيكن مكسيكان (46 جنيه) صدور دجاج محمرة وموضوعة في الصوص الأحمر بالثوم والذرة، خلطة فريدة ما شوفناش زيها في أي حتة. المفاجأة بالنسبة لنا كانت في الصنعة الخطيرة اللي في الأكل رغم أن تخصص المكان المفروض أنه شرقي، يعني التميز بتاعه يكون في الطواجن والمحاشي والمشويات. لكن بعد ما جربنا الأطباق الرئيسية العالمية هنا وطلعت بالروعة دي، مش قادرين نتخيل المطبخ الشرقي هنا هـ يبقى عامل إزاي. فيه بيتزا بأسعار من 23 لـ 32 جنيه، وأطباق أسماك من 58 لـ 85 جنيه وطواجن خضار باللحوم من 20 لـ 34 جنيه وكل أنواع المشهيات الشرقية والغربية، ده بالنسبة للمأكولات. كل المشروبات الساخنة والباردة والعصائر والكوكتيلات موجودة، وفيه حلويات زي أم علي والتشيز كيك والآيس كريم (25 جنيه) اللي جربناه في الآخر وكان مسك الختام بعد الوجبة اللذيذة. والشيشة للي غاوي (مافيش حد قاعد هناك مش بـ يشيش) بأسعار 9 جنيه للعادي، و15 جنيه للفاخر وفيه مكس بـ 22 جنيه. القعدة حلوة قوي في «الخان»، والخدمة شيك وسريعة، الأكل هناك ممتع مش بس مشبع، والمشروبات كلها فريش، والأسعار بـ يضاف عليها 12 % خدمة بس ومافيش ضريبة. معظم الموجودين في المحل وقت زيارتنا كان واضح أنهم زبائن دائمين للمكان، وأكيد ده ما جاش من فراغ؛ «الخان» عرف يربي زبون.

...

أفريكانو كافيه: قهوة رخيصة ومكان متميز في مدينة نصر
اصدرت في: 09/05/2012

رغم أنه كاتب على يافطته من بره «أفريكانو كافيه» والشكل الخارجي للمحل وموقعه الاستراتيجي في الشارع المتفرع من شارع عباس العقاد، إلا أنه مش هـ يقدر يخدعك أكثر بعد ما تنزل درجتين السلم اللي قبل مدخل المكان. قهوة بلدي متنكرة في هيئة كافيه إيطالي. واحنا مش بـ نكتب هنا علشان نعيب في النقطة دي؛ لأ إحنا بس بـ نقول لكم ليه إحنا مش حابين نقول عليه كافيه. قريب جدًا من محل كشري «شيخ البلد»، في الشارع اللي على ناصيته محل الكشري الشهير، واسم الشارع مصطفى حمام، واللي عارف مدينة نصر كويس بـ نقول له أن نفس المكان ده كان فاتح فيه من كام سنة كافيه اسمه "الأقزام" وكان كل اللي شغالين فيه فعلاً أقزام. قعدة أفريكانو أغلبها داخلية أو جوه المكان، مافيش غير ترابيزتين فقط خارج المحل، وده معناه أنك لو مش بـ تدخن أو بـ تشرب شيشة هـ تتعب قوي من القعدة بالداخل. القعدة مريحة أو زي ما هم كاتبين على جدران المحل وعلى المنيو "قاعة ملكية وأسعار أقل من العادية" وإحنا شايفين في الجزء الأول من العبارة بعض المبالغة، لكن وماله، من إمتى الشعارات كانت نموذجية! الملفت داخل المحل أنه هـ يحسسك أنك قاعد في قاعة أفراح شعبية أو في حفل عيد ميلاد! كمية الأنوار والكهارب وأشجار الزينة مش طبيعية، بس أهو بـ يحاول يعمل لنفسه ستايل. المنيو هو كل ما يمكن تشربه في أي قهوة مصرية أصيلة، من أول الشاي أبو 2.5 جنيه لحد عصير المانجو بـ 8.5 جنيه. فيه طبعًا قرفة بالجنزبيل وسحلب وكل أنواع القهوة، لكن الجديد هنا كان عصير البوريو والميلك شيك والبرتقال باللبن وكل ده بـ 7 جنيه، وفيه حلويات زي الجيلي والفروت سالاد والكريم كراميل بنفس السعر، والكانز بـ 4 جنيه. الشيشة بـ 2.5 جنيه للمعسل و6 جنيه للفواكه الفاخر واللي والمبسم الطبي بـ 7 جنيه مع بعض. المشروبات لذيذة سواء ساخنة أو باردة، لكن أكيد أي محل عصير متخصص هـ يقدم مشروبات أحسن من كده. علشان كده خليك في الشاي والقهوة والينسون والكانز المقفولة، وما تطلبش فاكهة اللي لما يكون ده أوانها. القهوة مافيهاش أي ألعاب قهوة! لا شطرنج ولا طاولة وطبعًا ممنوع الكوتشينة. لكن علشان يعوضوا ده ويعملوا شوية ترفيه عاملين في نهاية المحل ترابيزة بلياردو بـ تتأجر بالساعة. ممكن تطلب أكل من محلات قريبة من القهوة زي كشري شيخ البلد وكبدة ومخ من المحل المقابل لها وتقعد تأكل هناك. القهاوي اللي أسعارها رخيصة مش كثير في شارع عباس العقاد وما حوله، جرب «أفريكانو» وهـ تلاقي رجليك بـ توديك هناك كل ما تحب تريح بعد شوية تمشية في عباس العقاد، خاصة آخر الشهر.

...

كيروز لاونـﭺ: طعام ممتاز ومكان محتاج عناية في مدينة نصر
اصدرت في: 25/06/2011

بالرغم من صعوبة الوصول ليه، «كيروز لاونـﭺ - Kiro’s Lounge» طلع يستاهل كل التدوير واللف عليه. موجود في شارع يوسف عباس في مدينة نصر، والمنيو بتاعه مجمع أكلات من روما، المكسيك، باريس وكمان بيروت. أول ما دخلنا المكان كنا قلقانين شوية؛ دخان الشيشة كان خانق المكان ولما طلبنا من الويتر ترابيزة في قسم الغير مدخنين، هز رأسه في أسف مزيف وقال مفيش. وبعد ما أخيراً قعدنا، ترابيزيتنا كان عليها طفاية مليانة طفي سجاير، وده زود مضايقتنا. القماش البرتقالي في بيـﭺ اللي مغطي الكراسي كان متوسخ وللأسف يونيفورم الويتر كان مبقع هو كمان، وده خلانا نتمنى أن المطبخ يكون معتنى بيه أكتر. منيو «كيروز لاونـﭺ» كان متقسم حسب بلد منشأ الطبق المعروض، وده كان مزعج شوية في الأول لأن كل قسم كان فيه مقبلات وأطباق رئيسية وحلو. وكان فيه منيو تاني للمشروبات على شكل إزازة. إحنا طلبنا عصير جوافة فريش (13.99 جنيه) عشان نبتدي به القعدة، كان لذيذ بس عادي. بعد ما طلبنا، نزل على الترابيزة اللي جنبنا طبقين فاهينتا ريحتهم تجري الريق، وده خلانا متحمسين نشوف أطباقنا، وفي نفس الوقت ندمانين اننا ماطلبناش فاهيتا إحنا كمان. قررنا ناكل من القسم المكسيكي، فطلبنا شرايح الفراخ المقرمشة (بـ25.99 جنيه) وده بـ يتقدم مع مسطردة عسل. الفراخ نفسها كانت مالهاش طعم، لكن القشرة البرانية المقرمشة كان طعمها جنان. وجدير بالذكر ان المقبلات اللي كانت تيجي قبل الطبق الرئيسي ماجاتش. وبعد تفكير كتير، طبلنا كمان طبق الفراخ المكسكية السبايسي (50.99 جنيه)، والطبق ده للأسف ماكانش حار بالقدر اللي نفسنا فيه ولكن كان لذيذ جداً. الفراخ كانت مطبوخة مع الفاصوليا الحمراء وفلفل أحمر وأخضر مبشور وذرة. وأخدنا معاه فراخ الطماطم المكسيكية (Mexican Chicken Tomato بـ51.99 جنيه)، واللي على نقيض اسمه كان خالي تماماً من الطماطم، بس برضه طعمه رائع. وبـ ينزل معاه طبقين جانبيين وبـ تختار ما بين خضار سوتيه، رز، بطاطس محمرة ومهروسة، أو طبق مكرونة. أما الحلو، فـ«كيروز لاونـﭺ» فيه حاجة ترضي كل الأذواق. القسم الفرنسي فيه كريب (21.99 جنيه) وكيك شيكولاتة (20.99 جنيه)، بينما القسم اللبناني ففيه حلويات شرقية زي «أم علي» (18.99 جنيه) وسلاطة فواكه (11.99 جنيه). المكان فيه شاشات LCD عشان سهرات الكاريوكي، لكن لازم تتصل تحجز الأول.

...

ساعة لقلبك: ساعة لشيشتك في قلب مدينة نصر
اصدرت في: 05/04/2011

في نٌص شارع «عباس العقاد»– نصه بالطول مش بالعرض - بعد «ماكدونالدز» وقبل «سيراميكا كليوباترا» هـ تلاقي كافيه «ساعة لقلبك». وكعادة القهاوي المصرية، في جزء منه برة المحل واخد مساحة من الرصيف، بس مش كل الرصيف لدرجة إنك ماتعرفش تعدي. حوالي 4 أو 5 ترابيزات بس برة المحل. رغم أن «ساعة لقلبك» في ظاهرها قهوة عادية بس ليها طابع خاص و زباينها من نوع خاص، مش زي القهاوي البلدي العادية ومفيهاش ألعاب زي الطاولة و الشطرنج ولا حتى كوتشينة. في عائلات كتير وسيدات بس، لكن ده ما يمنعش إن الغرض الأساسي من زيارة الجميع هي الشيشة. والأقلية اللي ما بـ تشيش بـ يقعدوا على الترابيزات إللي برة هروباً من الدخان. المكان منوَّر بإضاءة هادية لونها أصفر ومفروش بالسجاد العجمي ماشي مع الديكور الكلاسيكي وألوان الحيطان الغامقة. و في تقريباً 6 شاشات، كلها بـ تعرض ماتشات كورة، وخصوصاً دوريات أوروبا الحصرية على قنوات «الجزيرة» الرياضية. وفيه عواميد متبعترة في المكان بشكل عشوائي بـ تخليه مليان زوايا وأركان ممكن تحجب الشاشات عن اللي قاعدين، وعشان كده في شاشات كتيرة متعلقة بشكل يخلي كل القاعدين شايفين الشاشات كويس. مافيش منيو تختار منه وفهمنا السبب؛ معظم الموجودين زباين دايمين للكافيه، حافظين المشاريب والشيَّش وأسعارها، بس ده أكيد مش مبرر لغياب المنيو! عشان تطلب هـ تسأل حد من الويترز، وهما بالمناسبة مش لابسين زي موحد ( Uniform ) وهـ تعرفهم من القلم والدفتر اللي بـ يكتبوا فيه الطلبات، هـ يقولك ليستة من المشاريب الساقعة زي العصائر الفريش وزبادي الفواكه وكل أنواع الكانز، ده غير المشاريب السخنة زي الشاي والقهوة والسحلب وحمص الشام (اللي بـ يتعمل بس في الشتاء)، في كمان سلاطة فواكه بالآيس كريم ومن غير. المكان مش بـ يقدم أكل، بس أول ما بـ تقعد وبعد ما تختار هـ تشرب إيه على طول بـ ينزلك طبق لب وسوداني وطبق تاني فيه ترمس وسُكّرية مليانة لعينها وإزازة ميَة صغيرة. الطلب ممكن يتأخر عليك شوية لو المكان مزحوم. إخترنا عصير اليوسفي الفريش وطلع جامد جداً بس بـ يلسع شوية –فريش بقى- وده سعره كان 9.5 جنيه، بس الحق يتقال الكوباية اللي بـ يتقدم فيها كبيرة قوي. وزبادي الفواكه، المشروب الرسمي للقهاوي في مصر، في «ساعة لقلبك» حاجة تانية خالص؛ بـ يتقدم على شكل كوكتيل متدرجة فيه ألوان الفراولة والمانجو والزبادي مع قطعتين تفاح على طرف الكاس والفاكهة طازة وحلوة بطريقة مش طبيعية، الكاس العظيم ده بـ10.5 جنيه بس. الشيشة بكل النكهات بـ7 جنيه ومعاها لَي طبي، المكان مشهور بالشيشة ومافيش ترابيزة مش عليها شخصين على الأقل بـ يشيشوا، بس ده مخلّي المكان مغيم ومدخن على طول ولو حد راح مش بـ يدخن هـ يتخنق من الدخان جوه المحل خصوصاً أن المساحة صغيرة. في جميع الأحوال خدمة الشيشة ممتازة وفيه نكهات مميزة زي الكريز والليمون والبرتقال، و طبعاً في معسل قص عادي للي غاوي. الخدمة والتسالي والميّة كانت بـ14 جنيه، والمشكلة أن مافيش فاتورة بـ توضح ده! إنما لازم تسأل الويتر عشان تعرف إنت دفعت قد إيه و في إيه! لأ وهـ يستغرب جداً إنك مش عارف الأسعار، كأنك المفروض تدفع من غير ما تفكر. بس يتقال في حق الويتر انه لما جينا نطلب كابتشينو قالنا بلاش نسكافيه ولا كابوتشينو دلوقتي عشان مش هـ يعجبنا، فطلبنا سحلب وكان هايل ومليان مكسرات. «ساعة لقلبك» ماسك العصاية من النص، قهوة على شكل كافيه أو العكس. والمكان الإستراتيجي والإسم اللي بـ يعلق في الدماغ بسهولة –عشان على إسم البرنامج الإذاعي المشهور- إدوا المكان شخصيته وعملوا له زباينه المخلصين.

...

مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال