عصائر كافيهات in مدينة نصر Cairo, Egypt

كافيهات

جوستو: مطعم وكافيه بستايل مميز في مدينة نصر
اصدرت في: 27/08/2012

الشارع اللي فيه المكان ده مغمور شوية، اسمه شارع ابن الهيثم وهو متفرع من شارع عباس العقاد، قبل نهايته بالقرب من شارع مصطفى النحاس. والكافيه واخد ناصية ومدخله على شارع اسمه محمد يوسف موسى متفرع من شارع الطيران. طيب بعد التوهان ده كله يا ترى المكان يستاهل؟ الحقيقة هو فعلًا يستاهل، الشارع الهادئ اللي هو فيه (اللي ظهر فيه عدد من الكافيهات والمطاعم مؤخرًا) أضاف الطابع الهادئ ده للمكان من الخارج. أضواء بيضاء أنيقة وديكورات مميزة في المدخل خلتنا نعرف من اللحظة الأولى من دخولنا للمكان أنه مش مجرد مكان تقعد فيه شوية وتأخذ ساندويتش وحجرين شيشة وخلاص، ده مكان ممكن بسهولة يبقى مكانك المفضل لو كانت ساكن في مدينة نصر أو قريب منها، وده لأن الجو العام مريح وأنيق بزيادة، وهـ تلاحظ كمان أن زوار المكان من طراز خاص وواضح أنهم من المترددين بكثرة على المكان وده باين من العلاقة الودية بينهم وبين العاملين في «جوستو – Gosto». المكان مقسم لـ 3 أجزاء: جزء خارجي مفتوح أشبه بحديقة وفيها ساحة لعب للأطفال ومراجيح، وجزء نصف مغطى ومحاط ببلاستيك شفاف لكنه مكيف، وجزء داخلي مقفول. كنا فاهمين أن الجزء الداخلي ده لغير المدخنين إنما طلع مافيش فرق وكل الأماكن مسموح فيها بالشيشة والدخان، لكن المساحات الواسعة والمسافات المعقولة بين الترابيزات والتهوية الجيدة هـ تخليك مش متضايق من الدخان وهـ تحب القعدة جدًا سواء بره أو جوه، وممكن تستخدم الإنترنت الخاص بالمكان (Wi-Fi) مجانًا. «جوستو» عنده منيو غني بالمشروبات والأطباق العالمية والباستا والبيتزا والمقبلات والساندويتشات والحلويات والآيس كريم، هـ تتعب شوية علشان تعرف تختار من بين كل الأصناف الموجودة، فهـ نحاول نسهل عليك المأمورية ونقول لك إحنا طلبنا إيه وعجبنا. شوربة كريمة بالمشروم والدجاج (17 جنيه) كانت ضرورية لفتح الشهية وكانت اختيار موفق جدًا والمشروم فيها كان مقطع بحجم كبير زي ما بـ نحب. مبدئيًا الباستا هنا تجنن، جربنا باستا كواترو فورماج (33 جنيه) اللي فيها 4 أنواع جبنة منها البلو تشيز الرائعة، وطلبنا جبنة إكسترا (6 جنيه) فبقى طعمها خيالي (طبعًا الكلام ده لعشاق الجبنة). طبق رئيسي بـ يحمل اسم "جوستو" أكيد هـ يبقى جامد، ميكس جوستو (70 جنيه) فيه قطعة دجاج بصوص الليمون وقطعة فيليه لحم بصوص المشروم البني ووحدات جمبري مقشر بصوص الكابوريا مع صنفين جانبيين من اختيارك. الطبق أقل ما يقال عنه أنه رائع، شكلًا وموضوعًا. استمتعنا بالـ 3 مذاقات للصوصات المختلفة وحسينا بالتناغم الموجود في الطبق رغم اختلاف المكونات، والبطاطس البيوريه والخضار السوتيه هـ يبقوا أحسن حاجة تطلبها من الطبق. واحد من أصدقائنا طلب طبق هو متعود يطلبه في كل زيارة للمكان وهو دجاج بالصوص الأبيض الحلو مع النعناع والريحان، اسم الطبق "دي مينتي" وسعره 53 جنيه. الطبق مشهور في بلاد البحر المتوسط ورغم النكهة القوية للنعناع والسكر الظاهر في الطعم إلا أن المذاق كان خطير ومميز، وطلع له حق يطلبه كل مرة. بعد الوجبة المحترمة كان عندنا فضول نشوف المشروبات والحلويات بنفس الجودة ولا لأ، وما خذلناش «جوستو» وقدم لنا أحلى ميلك شيك بالكراميل (23 جنيه) وتروبيكال آيس كريم بالفواكة (27 جنيه)، صحيح اتأخر علينا شوية قبل ما يجيب لنا الحلويات، لكن الموضوع كان يستاهل الانتظار. عرفنا أن البيتزا هنا حلوة وحجمها كبير، وفيه مقبلات شرقية وشامية، ومنتجات القهوة الساخنة والباردة كويسة، وفيه سموزي وعصائر وشاي وقهوة "Cold As Ice" أو شبه مجمدة، وطبعًا الشيشة هنا لها زبائنها المخلصين وسعر الشيشة الفاخرة بطعم العنب والخوخ والتفاح 18 جنيه واللي الطبي بـ 5 جنيه. حبينا المكان بجد والخدمة الجيدة وأناقة المكان وطعامة الأكل هـ تخلي رِجلنا تأخذ على المكان ده بسرعة ونحطه في قائمة "المفضل" وسط كل المطاعم والكافيهات اللي بـ نزورها. ننصحكم تجربوا «جوستو».

...

الخان: مطعم وكافيه بطابع شرقي في مدينة نصر
اصدرت في: 16/05/2012

مش عارفين إمتى ممكن نقول أننا خلاص غطينا كل محلات ومطاعم شارع عباس العقاد بمقالات نقدية في كايرو 360 لأن الحقيقة كل مرة نعدي فيها من هناك بـ نكتشف أماكن جديدة لسه فاتحة أو بقالها فترة جديدة وإحنا ما أخذناش بالنا منها، ده غير المحلات اللي بـ تغير نشاطاتها وبالتالي بـ تغير أسمائها، وكثير بـ نعتمد على أصدقائنا اللي ساكنين هناك علشان يقولوا لنا لو فيه مكان جديد فتح وإحنا مش كاتبين عنه. أمام محل «قويدر» العملاق على الصف المقابل، هـ تلاقي محل واجهته صغيرة اسمه «الخان»، مطعم بـ يقدم مأكولات شرقية وكافية، موجود في الدور الثاني فوق منفذ بيع منتجات مزارع دينا، وله مدخل خاص به من الدور الأرضي، والملفت في المدخل أنك هـ تلاقي على شمالك كاونتر زجاجي معروض عليه إكسسوارات وحلي وأساور زي اللي بـ تباع في خان الخليلي والمناطق الأثرية. ما قدرناش نعرف دي للبيع ولا للعرض فقط لأن ما كانش فيه حد نسأله! الطابق العلوي مساحته كبيرة وله شكل مستطيل والمسافات معقولة بين الترابيزات، والديكور واخد الطابع العربي بالألوان الخشبية والأرابيسك والنقوش الصوفية على الجدران والأسقف، والمكان كله زي ما يكون تراس مغطى بأسقف معلقة، ومافيش جزء مقفول ومكيف لغير المدخنين، كله مسموح فيه بتدخين الشيشة، لكن ممكن تقعد على أطراف التراس اللي بـ تطل على الشارع وهناك مش هـ تحس بأي دخان وهـ تستمتع برؤية الشارع وهـ تبقى شايف برضه شاشات التليفزيون اللي داخل المحل. رغم أن كل حاجة في شكل المكان والديكور بتاعه بـ توحي أنه كافيه أو قهوة وبس، إلا أن المفاجأة لما بصينا في المنيو ولقينا كل أصناف الأكل تقريبًا موجودة من أول الساندويتشات لحد الموزة البتلو والمشويات. سألنا الجرسون عن أصل المحل وطبيعته وقال لنا أنه في البداية كان مطبخ شرقي وبس وبعد فترة استحدث فكرة الشيشة والقعدة العربي وألعاب الطاولة والشطرنج، وده عمل إقبال أكثر على المكان. وعلشان تجرب أحسن حاجة متميزة في مكان أول مرة تروحه، يبقى تبص في المنيو وتطلب كل طبق مكتوب جنب اسمه اسم المحل نفسه، اللي هو هنا "الخان"، يعني ستيك فيليه بصوص الخان وبيتزا الخان (25 جنيه) الخان كوكتيل (20 جنيه) وآيس كريم الخان وهكذا. تقريبًا عملنا كده بس أكيد ما كانش ينفع نجرب كل حاجة. بدأنا بسلاطة السيزر بالدجاج (22 جنيه) وكانت كميتها كبيرة ومعاها صوص كريمة وجبنة رومي مبشورة وطعمها كان هائل. فيليه اللحم بصوص الخان والجمبري مع الأرز الأبيض والخضار السوتيه (65 جنيه) كان مفاجأة بكل المقاييس، لحم بقري بلدي صافي بصوص المسطردة والتوابل العربية (خلطة خاصة بالمكان) مع وحدات جمبري والسوتيه مع حبات الذرة الحلوة والبروكلي، حجم الطبق كبير ومشبع جدًا والسوتيه كان خيالي. نفس المفاجأة السارة كانت في طبق التشيكن مكسيكان (46 جنيه) صدور دجاج محمرة وموضوعة في الصوص الأحمر بالثوم والذرة، خلطة فريدة ما شوفناش زيها في أي حتة. المفاجأة بالنسبة لنا كانت في الصنعة الخطيرة اللي في الأكل رغم أن تخصص المكان المفروض أنه شرقي، يعني التميز بتاعه يكون في الطواجن والمحاشي والمشويات. لكن بعد ما جربنا الأطباق الرئيسية العالمية هنا وطلعت بالروعة دي، مش قادرين نتخيل المطبخ الشرقي هنا هـ يبقى عامل إزاي. فيه بيتزا بأسعار من 23 لـ 32 جنيه، وأطباق أسماك من 58 لـ 85 جنيه وطواجن خضار باللحوم من 20 لـ 34 جنيه وكل أنواع المشهيات الشرقية والغربية، ده بالنسبة للمأكولات. كل المشروبات الساخنة والباردة والعصائر والكوكتيلات موجودة، وفيه حلويات زي أم علي والتشيز كيك والآيس كريم (25 جنيه) اللي جربناه في الآخر وكان مسك الختام بعد الوجبة اللذيذة. والشيشة للي غاوي (مافيش حد قاعد هناك مش بـ يشيش) بأسعار 9 جنيه للعادي، و15 جنيه للفاخر وفيه مكس بـ 22 جنيه. القعدة حلوة قوي في «الخان»، والخدمة شيك وسريعة، الأكل هناك ممتع مش بس مشبع، والمشروبات كلها فريش، والأسعار بـ يضاف عليها 12 % خدمة بس ومافيش ضريبة. معظم الموجودين في المحل وقت زيارتنا كان واضح أنهم زبائن دائمين للمكان، وأكيد ده ما جاش من فراغ؛ «الخان» عرف يربي زبون.

...

بون فروت: عصائر وفاكهة فريش في مدينة نصر
اصدرت في: 03/04/2012

كثير بـ يحصل أن المحلات اللي بـ تبيع نفس المنتج بـ تفتح جنب بعضها في منطقة معينة ويتحول المكان بالتدريج لسوق للمنتج ده، لكن فيه حاجات ما ينفعش يفتح محل من نفس النوع في مكان قريب منه إلا واعتبرنا ده (كمصريين) نوع من المقاسمة في الرزق أو حتى قطع أرزاق، لكن الحقيقة أن الموضوع لا يزيد عن قناعة صاحب المحل الجديد أن المكان ده مناسب لبيع المنتج ده بدليل نجاح جاره القديم في نفس المجال، ده طبعًا لأننا بـ نفترض حسن النية. محل عصائر «بون فروت» الموجود في نهاية شارع النزهة قبل ما توصل للأوتوستراد أو طريق النصر، وعلى نفس الصف بعد «بون فروت» بأمتار قليلة واحد من أشهر محلات العصائر في المنطقة وهو «سيتي درينك»، وده اللي خلانا نفتكر موضوع المزاحمة في الرزق ده. لكن اللي يهمنا كمستهلكين أن المحلات تكثر والمنافسة تزيد علشان الأسعار تتظبط ومستوى الخدمة يبقى أحسن. وده كان الحال مع «بون فروت» اللي عامل أضواء مبهرة وراصص أكوام من الفاكهة في واجهة المحل بطريقة تفتح النفس، وخلانا نغير رأينا قبل ما نوصل لسيتي درينك ونقرر نقف ونجرب من عنده. أول مشكلة قابلتنا هي أنه ما عندوش منيو مطبوع، يعني كان لازم الجرسون اللي جاء لنا لحد العربية يقعد يقول لنا كل الأصناف شفهيًا والأسعار كمان، أو نضطر ننزل لحد مدخل المحل علشان نشوف قائمة المشروبات المعلقة. المهم عرفنا أن المنيو هو العادي لأي محل عصائر، وأكيد فيه كوكتيلات بأسماء مفتكسة خاصة بالمحل لكن في النهاية كلها فيها نفس المكونات سواء فواكة أو مكسرات باللبن أو خضروات زي الأفوكادو والجرجير أو سلاطات الفواكة بالآيس كريم ده طبعًا بالإضافة لمشروبات محل عصير القصب العادي وهي القصب والتمر هندي والسوبيا. المهم قررنا أننا نحكم عليه من جودة المشروبات والفواكة نفسها مش من المنيو والأسماء الرنانة. طلبنا كوكتيل من المانجو والفراولة بالحجم الكبير بـ 6 جنيه، وعجبنا جدًا طعم الفاكهة الفريش وكأنها لسه مضروبة في الخلاط حالاً، وجربنا البلح باللبن (بنفس السعر) وهو واحد من أهم مشروبات الطاقة أو الريد بول الشعبي، قوي جدًا وسكره مضبوط، وبما أن أصل المحل القصب، كان لازم نشوف عصير القصب إيه ظروفه، لأن عادة لما المحل بـ يتوسع كده ويتحول من محل عصير لـ Juice Bar بـ يهمل القصب والتمر هندي والحاجات دي، لكن المفاجأة أن القصب هنا عالمي، هو بس غالي عن الطبيعي شوية (2 جنيه) لكن الطعم هائل. ممكن تأخذ أي حاجة تيك آواي والجديد هنا أنه فيه توصيل طلبات للمنازل في المناطق القريبة، مافيش حد كان بـ يعمل الموضوع ده إلا «فرغلي» قبل كده. «بون فروت» اكتشاف جديد متأكدين أن زبائنه هـ تزيد يوم بعد يوم، وعارفين أنه هـ يعجبكم.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن