ألبان وآيس كريم كافيهات in مدينة نصر Cairo, Egypt

كافيهات

فروزي تويست: آيس كريم بـ يتعمل أمامك بالبسبوسة والمارشميلو في مدينة نصر
اصدرت في: 29/12/2014

من فترة للثانية الواحد بـ يحب يجرب حاجة جديدة، مش شرط نوعها أو مكانها المهم أنه يكسر روتين حياته بحاجة حلوة تفرحه وسط الأحداث العالمية والمحلية العظيمة، وده اللي حصل لنا لما سمعنا عن "فروزي تويست - Frozzy twist" وعن الأصناف الجديدة المختلفة اللي بـ يعملها. أول ما دخلنا على صفحتهم على الفيسبوك، شدنا جدًا أنهم بـ يعملوا آيس كريم بسبوسة! تخيلوا، ولما سألنا عن مكانهم اكتشفنا أن مكانهم الأصلي في بورسعيد، بس الافتتاح هـ يبقى في القاهرة كمان كام يوم. وبالفعل قررنا نخوض التجربة للآخر ونروح الافتتاح. مفهوم افتتاح المحلات عندنا في القاهرة معروف، صوت عالي وأنوار وممكن تلاقي بني آدمين لابسين دباديب كمان، لكن المرة دي كانت مختلفة لأن لوجو المحل كان باين من أول الشارع من الأنوار، ده غير العربية الميني كوبر اللي كان مرسوم عليها اللوجو برضه. المهم دخلنا وكان الاكتشاف الأكبر، أن الآيس كريم بـ يتعمل أمامك.. أي نعم أمامك، هم بـ يستخدموا تقنية جديدة بمجرد ما بـ يحطوا المكون اللي أنت عاوزه بسبوسة أو كنافة أو عسلية أو تشيز كيك أو أي نوع شوكولاتة، ويفضلوا يقلبوا فيه على صينية درجة حرارتها منخفضة جدًا، بـ يتكون السائل من مجرد بسبوسة لآيس كريم بسبوسة.. لا سحر ولا شعوذة، دي تقنية تبريد لسه جديدة، وهم أول ناس ينزلوها مصر. من الحاجات اللي لفتت نظرنا في المنيو العظيم المطرقع ده، غير أنك ممكن تختار أي نوع شوكولاتة بـ تحبها من أول مارس لحد فوريرو روشيه، إلا أن فيه آيس كريم بالتشيز كيك وبالكولا والجيلي كولا وبسكويت دايجستيف وكريم بروليه crème brule كمان. وفيه آيس كريم بكل أنواع المكسرات اللي تخطر على بالك بندق ولوز وكاجو وزبدة الفول السودانى، لكن العادي عندهم الآيس كريم بالفاكهة والزبادي والصن داي وكلام الحلو ده، غير أنهم بـ يقدموا وافل وبراونيز. الحقيقة أننا كنا متشوقين قوي نعرف آيس كريم البسبوسة والكنافة دول طعمهم إيه، فطلبنا آيس كريم بسبوسة بـ 10 جنيه، واللي لقيناه بالفعل بـ يقطع قطعة بسبوسة أمامنا مع فانيليا وفضل يقلب لحد لما كونت طبقة مربعة لفها زي الوردة وحط عليها صوص كراميل وأعطاها لنا، والمفاجأة كانت في الطعم المميز اللي يحسسك أنك بـ تأكل قطعة بسبوسة فعلًا بس آيس كريم.. تجربة ما تتوصفش يا جماعة تتأكل بس، أما آيس كريم الكنافة بـ 12 جنيه، كان أخف بكثير للناس اللي مش بـ تحب السكر بزيادة، وطعمه مميز قوي برضه. جربنا كمان آيس كريم التشيز كيك مع قطع الديجستيف والتوت الأحمر بـ 12 جنيه، واللي كان حلو قوي وطعم البسكويت فيه كان مميز فعلًا، وللي بـ يحبوا المكسرات وبالذات عشاق زبدة الفول peanut butter نحب نقول لكم أن آيس كريم زبدة الفول اللي بـ 12 جنيه ده طعمه وهمي ودسم ومغري جدًا، لكن أكثر حاجة إحنا حبيناها كانت آيس كريم المارشميلو بـ 10 جنيه، وبغض النظر عن عشقنا للمارشميلو، إلا أن الآيس كريم كان معمول بنكهة التوت الأحمر كمان، ومضاف معاه قطع مارشميلو صغيرة علشان يطرقع في مخك ويعطيك أجمل إحساس بالانتعاش والتجديد في حياتك. الحقيقة أننا استمتعنا هناك جدًا وكان نفسنا نجرب كل الأصناف الحقيقة، وما منعناش إلا أن بطننا كانت ممكن تنفجر لو زودنا أكثر من كده، والخدمة هناك كانت جميلة جدًا وودودة، كل صنف بـ يشرحه لك بهدوء وطولة بال وابتسامة مميزة.

...

ريد مانجو: سلسلة محلات الزبادى المثلج الأمريكية دلوقت فى سيتى ستارز
اصدرت في: 05/09/2014

الزبادى المثلج، ومين غيره طبعًا؛ المشروبالمنعش، والصحى لحد كبير وفى نفس الوقت سعره غالى بشكل مش طبيعى، وكل واحد فينا مر بعلاقة من الحب/الكره معاه.مافيش عندنا مانع طبعًا فى أى وقت نستمتع بكأس مثلج من المشروب اللذيذ، وعلشان كده أول ما وصلت الماركة الأمريكانى "ريد مانجو - Red Mango" للقاهرة، طلعنا عليهم على طول علشان نجربهم ونشوف إيه الكلام. فى مكانه الموجود بمنطقة الموزياك الخاصة بالأكل، المحل نوعًا ما منعزل عن زحمة ودوشة سيتى ستارز. التصميم ودرجات الألوان فى المكان ككل مختلفة خالص عن جو الألوان الفاتحة الموجود فى باقى محلات الزبادى المثلج.القعدة هناك معقولة جدًا، عبارة عن عدد محدودمن الترابيزات، والمكان بشكل عام مش زحمة. أول ما عرفوا أنها أول زيارة لنا، شرح لنا الموظف كل حاجة فى المنيو الكبيرة. ريد مانجو مش بس بـ يعمل زبادى مثلج، عندهم كمان سموزى من الفاكهة والزبادى، بارفيه، عصائر فاكهة فريش، فرابيه، ووافلز حلوة وحادقة. معظم الموجود فى المنيو قليل الدسم ومنخفض السعرات، والموضوع ده ممتاز مع الناس المهتمة بالحياة الصحية.اهتمام الموظفين بنا ما توقفش عند المرحلة دى؛ قدموا لنا كمان عينات تجربة من كل نكهات الزبادى المثلج الموجودة. المحبط فى الموضوع أن ريد مانجو فى مصر بـ يعمل ست نكهات فقط، رغم أنهم فى أمريكا عندهم أكثر من عشرين نكهة مختلفة.طعم الأوريجينال زى ما توقعنا كان عادى، وبصراحة مش جذاب. نكهات الرمان، الفراولة والتفاح الأخضر طعمها شبه بعض وعادى خالص من وجهة نظرنا. بعيد عن كل اللى فات، نكهة المانجو كانت لذيذة بشكل رائع وكانت أجمد طعم من الفواكة. فى الآخر استقرينا على الفانيليا مدغشقر مع أربع إضافات (32جنيه) هى مانجو، كريز، جرانولا ولوز مطحون. عندهم إضافات ثانية تشمل كل حاجة من حبوب، عين جمل، أوريو مطحون، إم&إمز ووصولاً للكيوى، الكريز، المانجو، البطيخ والعنب. نكهة الفانيليا مدغشقر كانت عادية، لكن برضه تعتبر مزيج لذيذ من النكهات. الخلط بين زبادى الفانيليا مع القرفة كان هائل، وفعلاً طعمه كانمنعش ولذيذ، ننصحكم تجربوها. أما بالنسبة للإضافات، المانجو كانت طازجة ولذيذة، أما الجرانولا كانت مقرمشة بشكل حلو.قطع اللوز المطحون كانت عديمة الطعم، لكن الصدمة الحقيقية كانت فى الكريز، اللى سبب لنا وجع فى أسناننا بسبب البذر. بشكل عام، ريد مانجو بـ يقدم زبادى مثلج معقول –لا هو ماحصلش يعنى ولا هو وحش للدرجة- فى أحسن الأحوال، التجربة كانت متوسطة. السبب فى كلامنا أن هى نكهة واحدة من بين الست نكهات كانت مميزة.نسينا نقول كمان أنك مع كوب صغير من الزبادى المثلج، هـ تدفع مبلغ محترم.

...

فريشي آيس ستيكس: مثلجات منعشة في سيتي ستارز
اصدرت في: 17/08/2014

لو أنت من مهووسي التسوق زي حالاتنا، طبيعي جدًا أنك تصادف كشك من أكشاك فريشي آيس ستيكس في أي مول أثناء رحلاتك الاستكشافية المعتادة للبحث عن خصومات الصيف، واللي ما نقدرش نعيش من غيرها. الكشك بلونه الأحمر ولوجو فريشي المميز لازم هـ يلفتوا انتباهك، ولو حصل وما أخذتش بالك، فصفوف الآيس ستيكس الملونة مش بس هـ تشوفها عن بعد، دي هـ تغريك أنك تأخذ منهم واحدة معاك تؤنس لك رحلتك في المول. وده بالضبط اللي حصل معانا. أول حاجة سألنا عن الأنواع الكثيرة، واللي عرفنا عليها بحماس بالغ البائع اللطيف. والألطف كمان هو سعر القطعة، وهو (12 جنيه). لو أنت من الناس اللي ما بـ تفرقش معهم السعرات الحرارية، ومن عشاق الشوكولاتة، فيه آيس ستيكس بالنوتيلا. أما لو يهمك أن الريجيم ما يبوظش، هـ تلاقي أنواع كوكتيلات فاكهة كثيرة وخالية من السكر، ده غير الأنواع المعتمدة على الزبادي قليل الدسم والمخلوط معاها فاكهة أو شوكولاتة. فيه كمان أنواع ثانية مبتكرة زي التشيز كيك، والأوريو والكابتشينو. نصحنا البائع أننا نجرب الزبادي بالتوت، والفراولة الخالية من السكر. زي ما قلنا أن المكان عبارة عن كشك في مول، فأخذنا الآيس ستيكس واستكملنا جولتنا... والحقيقة أنها كانت فرصة أننا نقدر نستمتع بهم لأطول فترة ممكنة –وطبعًا نقول لك رأينا. بالرغم من أن الزبادي بالتوت كان خفيف، إلا أنها كانت كريمي ولذيذة. المشكلة الوحيدة فيها كانت أن نسبة الزبادي فيها أكبر بكثير من نسبة التوت، وبالتالي طعمه كان غالب فيها. أما الفراولة، ففاقت كل توقعاتنا؛ تخيلنا أنها هـ تكون فاقدة الطعم والنكهة زي أي حاجة معمولة لمهووسي الريجيم، لكن لحسن الحظ كان طعمها رائع وكأنها معمولة من فراولة مجمدة طازجة. إجمالًا فريشي كان تجربة منعشة جدًا، لأنه بـ يقدم آيس ستيكس لا تقاوم، ومرضية لجميع الأذواق، ومش بس كده، ده موجود تقريبًا في كل مولات القاهرة، وده لحسن حظنا... علشان إحنا أكيد هـ نرجع لهم علشان نجرب أنواع أكثر.

...

دي. كابتشينو: الكافيه الرسمي للروقان فى مدينة نصر
اصدرت في: 07/03/2013

"الكافيه الرسمي للروقان".. ده الشعار اللى كاتبينه على المنيو وأماكن كثيرة فى الكافيه اللى اكتشفناه بالصدفة وإحنا بـ نشتري حاجات من شارع ابن الهيثم المتفرع من عباس العقاد في مدينة نصر، كافيه "دي. كابتشينو – D. Cappuccino" بنوره وديكوراته شدنا خاصة أننا كنا تعبانين من اللف والدوران وكنا محتاجين نأكل ونشرب حاجة مسكرة ونستريح شوية. السمة الأساسية للمكان هو الخط والحروف العربية اللى مرسومة على الزجاج من الخارج وبالداخل، أول ما تدخل هـ تحس بجو مريح وهادئ وهـ تلاقى شباب كثيرة قاعدة إما بـ تذاكر أو شغالين على اللابتوب بتاعهم (Wi-Fi متوفر فى المكان). لأول مرة نروح مكان حلو من كل حاجة، المكان بـ يغلب عليه جو إسلامي مودرن (ودي حاجة أول مرة نلاقيها فى القاهرة)، بالخط العربي فى الديكورات، شاشات عليها لوجو الكافيه بـ تعرض أفلام كرتون عالمية، مزيكا وأغاني إسلامية باللغة الإنجليزية لماهر زين وغيره، المكان اللى بره مختلط وللعائلات ديكوره باللونين الأخضر مع البيج بكنب مودرن، وفيه مكان ثاني غالب عليه اللون البمبى والأحمر الخفيف ده مخصص للبنات فقط ومنفصل عن الثاني بزجاج شفاف، فيه رائحة بخور وعنبر وحاجات حلوة ثانية خلت قعدتنا مميزة، وجديدة علينا الصراحة. تعريفهم عن الكافيه فى المنيو لطيف جدًا ومضحك من خلال قصة حكوها، بـ يقولوا: "علي الرغم من اعتمادنا الكلي علي المنبهات علشان نصحي من النوم لكن كلنا بـ يكون نفسنا نقوم نخبطها في الحيطة أول لما بـ ترن.. يقال أن الراجل اللي اخترع المنبه ما كانش بـ يعرف يضبطه إلا علي الساعة 4 الصبح.. فبعد ما اخترعه بفترة قتلته مراته الساعة 4:05 من كثر الدوشة.. فلولا وجود القهوة علشان تفوقنا كان عدد الناس اللي بـ تتقتل زاد بكثير بعد رنة المنبه، المهم ومن غير كلام كثير.. دي كابتشينو هو "الكافيه الرسمي للروقان". بصرف النظر عن أن القصة حقيقية ولا لأ لكنها شدتنا زي ما المنيو وتصميمه شدنا ورسم ابتسامة على وجهنا، نيجي بقى للمنيو اللى كانت شاملة كل شيء لدرجة أننا ممكن نصنفه مطعم كمان علشان تشكيلات الساندويتشات والباستا والبيتزا اللى بـ يقدموها، التصميم بتاعها حلو جدًا وفيه روح فكاهة هـ تخليك تأخذ وقت شوية أنك تتفرج عليها، الحاجة الوحيدة اللى مش مكتوبة فى المنيو هى الحلويات لكن ممكن تروح تختارها بنفسك من ثلاجة العرض. أخذنا فى البداية تشيكن سيزار سلاد (25 جنيه)، وسباجيتي كبتافى (29 جنيه)، الطلب أخذ وقت شوية بس لما جاء لنا كان تقديمه حلو، السلاطة كانت حلوة وفريش والصوص مع الفراخ المستوية كانت حلوة مع شرائح فلفل أحمر للتزيين، كانت مشكلتنا الوحيدة بس أن كميتها قليلة بالنسبة للسعر، السباجيتي كان بصوص الكاري مع قطع الفراخ، كل حاجة كانت تمام فى الطبق ده ماعدا كمية صوص الكاري الكثيرة اللى كانت بزيادة خلتنا محتاجين نشرب وراها حاجة، بس إجمالاً اتبسطنا بالطبق. من المشروبات لقينا عندهم فرابيه بلح وده أول مرة نشوفه لكن للأسف ما كانش موجود، اختارنا سنكرز شيك (حجم صغير 25 جنيه)، وهوت بوريو (حجم صغير 15 جنيه) اللى كانوا حلوين جدًا مافيش كلام واتبسطنا بهم، لما رحنا عند ثلاجة العرض علشان نختار حاجة نحلى بها ما كانش فيه غير صنف واحد بس افتكرناه فى الأول تشيز كيك بالكراميل لكن مع أول قطمة منه اكتشفنا أنه كريم كراميل كيك (17 جنيه) وكان الاكتشاف ده رائع، شريحة كيك عليها كريم كراميل مجمد من فوق بنفس شكل التشيز كيك، كانت خفيفة جدًا والكيك هش وجميل.. ختام رائع. ثاني يوم من زيارتنا اكتشفنا أن الكافيه ده راحه الشيخ العريفي وقت زيارته لمصر وهما منزلين له صور كثيرة على صفحة "دي. كابتشينو" على الفيسبوك، وكمان العريفي شكر فيه على حسابه فى تويتر. طاقم العمل هناك مهذب جدًا وروحه حلوة وخدوم واستمتاعنا بالمكان مش هـ يقل عن العريفى وأكيد أى حد يروح المكان كمان من بعدنا.

...

فروتانيا: وافل وزبادي مجمد وعصائر وآيس كريم في مدينة نصر
اصدرت في: 25/11/2012

كان قرار جريء أنهم يفتحوا المحل في المكان ده، لأن طريق الأوتوستراد السريع مش بـ يخلي الناس بسهولة تعرف تقف أمام أي محل من المحلات الموجودة فيه، خصوصًا لو محلات أكلات سريعة أو عصائر وآيس كريم. يعني الحل الوحيد أنك تبقى رايح مخصوص لأي محل موجود في طريق النصر أو الأوتوستراد، وده مش هـ يحصل إلا لما يكون المكان جدير بأنك تروح له فعلًا. بـ نقول الكلام ده لأننا بقى لنا فترة بـ نشوف محل «فروتانيا» وإحنا بـ نجري بالعربية من أمامه، لدرجة أننا مش بـ نبقى لاحقين نقرأ اسمه، لكن الإضاءة الجذابة والديكور الخارجي المودرن للمكان خلانا نهدي مرة مخصوص علشان نكتشف المحل ده، ونعرف هو اسمه إيه وبـ يبيع إيه.في اليوم ده استغلينا أن الطريق كان واقف شوية وبدأنا نتفحص المحل عن قرب، هو بالتحديد موجود في الصف المقابل لمسجد رابعة العدوية في طريق النصر، ألوان المحل هي الوردي والأزرق الفاتح وبـ يقدم مثلجات ومشروبات ساخنة وكريب ووافل. فيه قعدة صغيرة داخل المحل، لكن الاعتماد الأكبر على التيك آواي والعربيات اللي بـ تقف أمام المحل. اختارنا أننا ندخل نشوف المكان من الداخل وعجبنا جدًا القعدة البسيطة على كراسي البار العالية والترابيزات المستديرة وشاشة التليفزيون والموسيقى الهادئة في الخلفية، لكن أكثر حاجة عجبتنا كانت الـ Wi-Fi المجاني السريع داخل المكان اللي خلى وقت طويل يعدي علينا من غير ما نحس داخل المكان. المنيو كبير ومتنوع وفيه عدد مهول من الحلويات والمشروبات. الوافلز هنا حكاية، جربناها قبل أي حاجة وكانت مستوية كويس مش ملسوعة زي أماكن ثانية. طلبنا وافل فروتانيا الخصوصي (24 جنيه) مع شوكولاتة الفادج الساخنة و5 اختيارات من الـ Toppings الكثير قوي اللي عندهم اللي منها الكريمة والمكسرات والعسل والفاكهة وقطع شوكولاتة مارس وتويكس وسنيكرز وآيس كريم. إحنا اختارنا شوكولاتة كيت كات وصوص الرمان وتشكيلة فاكهة موسمية فريش وانبهرنا بالطعم بصراحة. بعدها دخلنا على المثلجات وجربنا الزبادي المجمد بطعم التفاح الأخضر الحجم الكبير (24 جنيه برضه) ومعاه إضافات رمان وتوت وكنتالوب وأناناس. الزبادي حلو مافيش كلام، لكن لما نقارنه بأماكن ثانية متخصصة في الزبادي المثلج زي «بينك بيري» أو «مايبي تو» هـ نلاقي المقارنة مش في صالح «فروتانيا» ومع ذلك استمتعنا بأكلتنا الطفولية الصحية جدًا. بمناسبة الصحية فيه منيو خاص بالكوكتيلات الصحية بأسماء غريبة شوية زي "زينارجو" و"زينيللا" و"ميلدوري" و"زينافو" وهـ تلاقي فيها مكونات زي البنجر والعسل والجنزبيل والأفوكادو وأسعارها 13 و16 جنيه حسب الحجم. كل الكريب الموجود هنا مسكر بالشوكولاتة والآيس كريم والكراميل، ومافيش أي حاجة مملحة في المحل بالمناسبة، والكريب بأسعار من 13 لـ 24 جنيه حسب الحشو. ممكن مع الوافل تأخذ كوباية إسبرسو أو موكا أو لاتيه، والأسعار معقولة من 7 لـ 14 جنيه، وطريقة التحضير هنا ظريفة وشكلها يفتح النفس، والمعدات حديثة وبالتالى كل النسب في كل المشروبات بـ تطلع جيدة جدًا. فيه حلويات زي الموس والتشيز كيك والسينامون سالاد والإضافات متاحة على أي حلوى وأي عصير أو آيس كريم حسب اختيارك. وبولة الآيس كريم بـ 8 جنيه وكأس فروتانيا الكبير اللي فيه كل حاجة بـ 24 جنيه، مش عارفين إيه حكاية الرقم ده معاهم! الخدمة ممتازة وودودة في «فروتانيا» وقدر العاملين بسهولة أنهم يخلونا نحب المكان ونخليه في قائمة المفضلين لما نقرر نحلي أو نديها آيس كريم أو وافل لذيذ غرقان في الشوكولاتة، وقبل أي حاجة لما نحب ندخل على النت مع فنجان قهوة أو ميلك شيك.

...

كافيه شكسبير: بيت للقهوة جديد فى مدينة نصر
اصدرت في: 09/09/2012

عباس العقاد.. الشارع الأكثر ازدحامًا فى مدينة نصر هـ تلاقى محلات جديدة ومطاعم وكافيهات عادة مش ظاهرة أو مرئية بسبب كمية الأماكن الحيوية الموجودة هناك. "كافيه شكسبير" يعتبر إضافة جديدة للأماكن دي، رؤيتك لاسم شكسبير وكمان اللوجو اللى استخدموا فيه صورته وهو ماسك فنجاج قهوة ومبتسم هـ تخلي عندك -وعند أى حد معدي من أمام المكان- فضول تدخل تستكشف المكان. على الرغم من أن الديكور مش واخد طابع العصور الوسطى إلا أن القعدة باللونين البني والأحمر كانت مريحة ومزدحمة بالناس، منيو المكان مقسمة إلى مشروبات ومأكولات زيها زي منيو أى كافيه، وكمان قسم للأفطار فيه أصناف زي الكرواسون (7.75 جنيه) والأومليت (13 جنيه) اللى ممكن تضيف عليه جبنة شيدر بـ 3 جنيه. من كل الأصناف اللى شفناها أمامنا من سلاطات وبرجر وساندويشات شاورما واختيارات أطباق الباستا طلبنا ساندويتش تشيكن فيليه (24.75 جنيه)، وزى ما وعدنا الجرسون لقيناه مليان بالنكهة وشهي، الفراخ كانت مشوية ومستوية كويس جدًا ومحطوط فوقها مشروم وخس وجبنة موتزاريلا كثير فى عيش طازج بالسمسم. تيمة المنيو تحسها إيطالى، بيتزا الخضروات (28 جنيه) كانت محتوياتها غنية وجوانبها كانت طرية، على الرغم أنها ما كانتش طازجة لكن الفلفل والبصل والموتزاريلا عوضوا النكهة. الأصناف فى المنيو أسماءها على اسم مؤلفات لشكسبير زي "كينج لير كوكتيل" (21.75 جنيه) المكون من كيوي ومانجو وبرتقال. وكمان ممكن تختار مكونات الكوكتيل بتاعك فى قسم "As you like it" (21.75 جنيه)، وفيه كمان قسم للقهوة والسموسيز. وكمان المكان بـ يستفيد من المساحة الواسعة اللى عندهم وبـ يقدم شيشة بـ 22 جنيه. بشكل عام كافيه شكسبير بـ يقدم أطباق وأكلات رئيسية وتنويعات كبيرة من المشروبات، روح المكان هـ تخليك عاوز تقعد وقت أكبر والحلو فيه أنه مش زحمة.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح