قهوة كافيهات in مدينة نصر Cairo, Egypt

كافيهات

دي. كابتشينو: الكافيه الرسمي للروقان فى مدينة نصر
اصدرت في: 07/03/2013

"الكافيه الرسمي للروقان".. ده الشعار اللى كاتبينه على المنيو وأماكن كثيرة فى الكافيه اللى اكتشفناه بالصدفة وإحنا بـ نشتري حاجات من شارع ابن الهيثم المتفرع من عباس العقاد في مدينة نصر، كافيه "دي. كابتشينو – D. Cappuccino" بنوره وديكوراته شدنا خاصة أننا كنا تعبانين من اللف والدوران وكنا محتاجين نأكل ونشرب حاجة مسكرة ونستريح شوية. السمة الأساسية للمكان هو الخط والحروف العربية اللى مرسومة على الزجاج من الخارج وبالداخل، أول ما تدخل هـ تحس بجو مريح وهادئ وهـ تلاقى شباب كثيرة قاعدة إما بـ تذاكر أو شغالين على اللابتوب بتاعهم (Wi-Fi متوفر فى المكان). لأول مرة نروح مكان حلو من كل حاجة، المكان بـ يغلب عليه جو إسلامي مودرن (ودي حاجة أول مرة نلاقيها فى القاهرة)، بالخط العربي فى الديكورات، شاشات عليها لوجو الكافيه بـ تعرض أفلام كرتون عالمية، مزيكا وأغاني إسلامية باللغة الإنجليزية لماهر زين وغيره، المكان اللى بره مختلط وللعائلات ديكوره باللونين الأخضر مع البيج بكنب مودرن، وفيه مكان ثاني غالب عليه اللون البمبى والأحمر الخفيف ده مخصص للبنات فقط ومنفصل عن الثاني بزجاج شفاف، فيه رائحة بخور وعنبر وحاجات حلوة ثانية خلت قعدتنا مميزة، وجديدة علينا الصراحة. تعريفهم عن الكافيه فى المنيو لطيف جدًا ومضحك من خلال قصة حكوها، بـ يقولوا: "علي الرغم من اعتمادنا الكلي علي المنبهات علشان نصحي من النوم لكن كلنا بـ يكون نفسنا نقوم نخبطها في الحيطة أول لما بـ ترن.. يقال أن الراجل اللي اخترع المنبه ما كانش بـ يعرف يضبطه إلا علي الساعة 4 الصبح.. فبعد ما اخترعه بفترة قتلته مراته الساعة 4:05 من كثر الدوشة.. فلولا وجود القهوة علشان تفوقنا كان عدد الناس اللي بـ تتقتل زاد بكثير بعد رنة المنبه، المهم ومن غير كلام كثير.. دي كابتشينو هو "الكافيه الرسمي للروقان". بصرف النظر عن أن القصة حقيقية ولا لأ لكنها شدتنا زي ما المنيو وتصميمه شدنا ورسم ابتسامة على وجهنا، نيجي بقى للمنيو اللى كانت شاملة كل شيء لدرجة أننا ممكن نصنفه مطعم كمان علشان تشكيلات الساندويتشات والباستا والبيتزا اللى بـ يقدموها، التصميم بتاعها حلو جدًا وفيه روح فكاهة هـ تخليك تأخذ وقت شوية أنك تتفرج عليها، الحاجة الوحيدة اللى مش مكتوبة فى المنيو هى الحلويات لكن ممكن تروح تختارها بنفسك من ثلاجة العرض. أخذنا فى البداية تشيكن سيزار سلاد (25 جنيه)، وسباجيتي كبتافى (29 جنيه)، الطلب أخذ وقت شوية بس لما جاء لنا كان تقديمه حلو، السلاطة كانت حلوة وفريش والصوص مع الفراخ المستوية كانت حلوة مع شرائح فلفل أحمر للتزيين، كانت مشكلتنا الوحيدة بس أن كميتها قليلة بالنسبة للسعر، السباجيتي كان بصوص الكاري مع قطع الفراخ، كل حاجة كانت تمام فى الطبق ده ماعدا كمية صوص الكاري الكثيرة اللى كانت بزيادة خلتنا محتاجين نشرب وراها حاجة، بس إجمالاً اتبسطنا بالطبق. من المشروبات لقينا عندهم فرابيه بلح وده أول مرة نشوفه لكن للأسف ما كانش موجود، اختارنا سنكرز شيك (حجم صغير 25 جنيه)، وهوت بوريو (حجم صغير 15 جنيه) اللى كانوا حلوين جدًا مافيش كلام واتبسطنا بهم، لما رحنا عند ثلاجة العرض علشان نختار حاجة نحلى بها ما كانش فيه غير صنف واحد بس افتكرناه فى الأول تشيز كيك بالكراميل لكن مع أول قطمة منه اكتشفنا أنه كريم كراميل كيك (17 جنيه) وكان الاكتشاف ده رائع، شريحة كيك عليها كريم كراميل مجمد من فوق بنفس شكل التشيز كيك، كانت خفيفة جدًا والكيك هش وجميل.. ختام رائع. ثاني يوم من زيارتنا اكتشفنا أن الكافيه ده راحه الشيخ العريفي وقت زيارته لمصر وهما منزلين له صور كثيرة على صفحة "دي. كابتشينو" على الفيسبوك، وكمان العريفي شكر فيه على حسابه فى تويتر. طاقم العمل هناك مهذب جدًا وروحه حلوة وخدوم واستمتاعنا بالمكان مش هـ يقل عن العريفى وأكيد أى حد يروح المكان كمان من بعدنا.

...

فيمانا: مطعم وكافيه جديد جدًا في مدينة نصر
اصدرت في: 20/11/2012

المكان لسه في مرحلة ما قبل الافتتاح الرسمي أو ما يسمى بالـ Soft Opening. ومع ذلك تجربتنا في «ﭭيمانا» كانت جيدة جدًا وماحسيناش بنواقص كثيرة زي أي محل بـ يبقى في المرحلة دي قبل الافتتاح الرسمي بأيام. لكن برضه هـ نقول ملاحظتنا لعلها تبقى من الحاجات اللي هم مش واخدين بالهم منها وممكن تأثر على أداء المكان.أولًا "ڤيمانا" هو اسم شاعر هندي شهير عاش من أكثر من 300 سنة واشتهر بلغته السهلة والقيم الرفيعة في أشعاره وممارسته اليوجا. الحقيقة ما كناش نعرف عنه حاجة قبل زيارتنا للمكان ده، واستغربنا من اختيار اسمه لمطعم وكافيه، واستخدام صورته لوجو للمكان. لكن لما دخلنا ولقينا الديكورات واخدة الطابع الهندي ونقوش الأفيال والألوان الأحمر والبنى والمذهب في كل النقوش عرفنا أن Theme المكان هندي ومش ناقص غير أن المنيو كمان يكون هندي. المطعم موجود في شارع عباس العقاد الرئيسي بعد مطعم «جاد» من ناحية الشمال، مكان مميز، وشكل المطعم من الخارج كمان مميز واليافطة الحمراء المضيئة هـ تلفت النظر من بعيد. المكان من الداخل أنيق وقعداته مريحة. مكون من طابقين وتقسيمة القعدات كويسة وبـ تسمح بقدر من الخصوصية. المنيو طلع مش هندي خالص وإن كان فيه بعض أنواع الشوربات والخلطات الهندية لبعض الأطباق. لكن هو منيو أي مطبخ عالمي شبه مطاعم كثير. مقبلات وأطباق رئيسية وسلاطات وبيتزا وباستا وساندويتشات وحلويات وعصائر ومشروبات ساخنة وشيشة، وفي كل قائمة من دول هـ تلاقي طبق اسمه "ﭭيمانا" وهو غالبًا بـ يبقى أحسن حاجة وسط باقي الأطباق من نفس القائمة، يعني "شوربة ﭭيمانا" أو "دجاج ﭭيمانا" أحسن من أي شوربة أو دجاج ثانيين. أول صدمة لنا كانت لما استقرينا أخيرًا على نوعين بيتزا وبعد كده عرفنا أن "مافيش بيتزا حاليًا" وقعدنا نتصفح المنيو الطويل ثاني علشان نختار أطباق ثانية بعد ما نتأكد أنها موجودة بالفعل. طلبنا طبق مشهيات "ڤيمانا" طبعًا (36 جنيه) وكان لذيذ وأصنافه (دجاج ستريبس ومشروم وسبرنج رولز وميني ساندوتش بالجبنة والذرة الحلوة) كانت فريش وغنية بالطعم ومعاه صوصات المكسيكان الحارة والتارتار والمايونيز، طبق ممتاز وبداية مبشرة. طريقة تقديم الميكس جريل (74 جنيه) هنا هو الموضوع كله؛ شواية صغيرة فحمها لسه مولع بـ تتحط أمامك واللحم والدجاج عليها يكمل تسويته أمام عينك، يعني شيلها من على الفحم لما توصل للتسوية اللي أنت عاوزها. واللحم نفسه طازج والأطباق الجانبية من الأرز والبطاطس والسوتيه كمياتها معقولة. طبق ثاني هو الدجاج بصوص الطماطم والجبنة السويسرية (49 جنيه) كان طعم الدجاج فيه رائع والجبن السايح اللي عليه، لكن ما حسيناش بطعم صوص الطماطم خالص. رغم كده الطبق كان اختيار موفق رغم أنه مش اسمه "ﭭيمانا". جربنا كمان النجرسكو (30 جنيه) الغنية جدًا بجبن البارميزان وقطع الدجاج، وواضح أن الباستا هنا عمومًا هـ تبقى لها شأن كبير.كوكتيل فلوريدا الشهير (16 جنيه) كان فريش وحجم الكأس كبير، وكمان عصير البرتقال الفريش (13 جنيه) من أحسن الحاجات اللي ممكن تأخذها قبل أو مع الأكل هنا في «ﭭيمانا».ركن الشيشة واضح أنه لسه ما اشتغلش بكامل طاقته، بس الأسعار هي 7 و20 و25 جنيه للمعسل والفواكة والـ"ﭭيمانا ميكس" على الترتيب. الخدمة ودودة وإن كانت الخبرة لسه مش قوي عند بعض العاملين، بس هم بـ يحاولوا يرضوا ضيوفهم بأي طريقة ودي حاجة كويسة. النظافة ممتازة والأكل بـ يتأخر شوية، بس لما بـ ينزل على ترابيزتك بـ تنسى التأخير اللي حصل وبـ تنبسط. حبينا «ڤيمانا» وما عندناش مانع نقرأ للشاعر نفسه من هنا ورايح.

...

تايم جيت: تجربة مريرة في كافيه مغمور في مدينة نصر
اصدرت في: 11/07/2012

عاوزين نوضح حاجة قبل ما نبدأ نتكلم عن المكان اللي رحناه النهاردة، أن مش معنى أن تجربتنا كانت سيئة في المكان أنه بـ يكون بنفس المستوى طوال الوقت، إحنا مقتنعين جدًا بنظرية الـ Day Off أو الأيام اللي بـ يغيب فيها التوفيق بشكل ملحوظ، لكن إحنا كمان مقتنعين أن فيه حد أدنى من العناصر اللي لازم تتوفر لأي مكان بـ يقدم خدمة للجمهور. وعلشان نكون منصفين؛ الحد الأدنى كان متوفر في مطعم وكافيه «تايم جيت» اللي في شارع جانبي بـ يوصل بين شارعي عباس العقاد ومكرم عبيد في مدينة نصر، لكن واضح أننا اللي توقعاتنا كانت عالية بخصوص المكان خاصة لما شفناه من الخارج بتصميمه المتميز ومكانه الهادئ. لكن عرفنا بمجرد ما دخلنا أن أحلامنا مش هـ تتحقق هنا وأننا لازم ننزل بسقف المطالب شوية. «تايم جيت- Time Gate» أو بوابة الزمن عامل لنفسه Theme مميز واضح في كل الديكورات والمنيوهات وحتى في التصميم الخارجي للمحل، التصميم كله معتمد على فكرة البوابات الزمنية اللي بـ تفصل بين العوالم المختلفة في الكون، ومستخدم شعارات ورسوم في كل أركان المحل لإضفاء جو الخيال العلمي على المكان، لكن للأسف أفسد كل حاجة الديكور والمفروشات المتهالكة والأرضيات المغطاة بالسيراميك الرخيص والحمامات غير النظيفة بالمرة، يعني كأنهم عملوا الفكرة وافتتحوا المكان وبعد كده سابوا كل حاجة زي ما هي من غير عناية أو تطوير. المكان كبير جدًا وهو في دور علوي بـ تطلع له من سلم جانبي في العمارة، وفي الشكل هو أقرب للكافيه أو القهوة من كونه مطعم. أخذنا ركن بعيد عن الناس اللي بـ تدخن لأن مافيش مكان مخصص لغير المدخنين وبدأنا نتفحص المنيو. المنيو فيه كل حاجة تقريبًا، مقبلات وسلاطات وأطباق رئيسية من اللحوم والدجاج والمأكولات البحرية، وفيه ساندويتشات وبيتزا وباستا ومشروبات الكافيه المعروفة وبعض الحلويات والشيشة طبعًا. طلبنا طبق مقبلات مشكل فيه كبيبة وسمبوسك وأصابع موتزاريلا مقلية (20 جنيه) وطلبنا بيتزا تايم جيت (32 جنيه) اللي باللحمة المفرومة والسوسيس والدجاج وطبق رئيسي اسمه تشيكن سبيشيال (59 جنيه) فيه صدور دجاج مقلية وملفوفة وفيها حشو من المشروم والبصل ووحدات جمبري صغير وطبق نجرسكو بالجبنة (28 جنيه). الأكل بدأ ينزل أمامنا على الترابيزة بعد حوالي ساعة وربع من الانتظار، وده بعد ما طلبنا منهم أكثر من مرة أننا نلغي الطلب ونمشي لأن التأخير ده مش طبيعي، وقولنا لهم أن مافيهاش حاجة لو قالوا لنا أن الأكل هنا بـ يتأخر أو أنهم مش بتوع أكل أساسًا وأن المشاريب والشيشة هي الموضوع، لكن بعد اعتذارات كثير نزل الأكل وطبعًا تقدروا تتوقعوا معانا مستوى وطعم الأكل نفسه، المقبلات شبه نيئة، البيتزا مش بيتزا، فطيرة عليها شوية لحمة مفرومة ومن غير جبنة تقريبًا، المكرونة النجرسكو كانت بدون أي نكهة أو توابل، الدجاج بالجمبري ده اللي يعني كان حلو شوية مع الخضار السوتيه، لكن بعد طول الانتظار والمقبلات اللي مالهاش علاقة بفتح النفس كان صعب نستطعم أي حاجة ولو كانت حلوة. حاولوا يصالحونا بطبق فروت سلاط بالآيس كريم، الحقيقة هو كان لذيذ، علشان كده تأكدنا أن مشكلة المكان – بعيد عن الإهمال- هي الأكل، وأن معظم زائريه بـ يفضلوا المشروبات والشيشة والفرجة على التليفزيون. شكرناهم جدًا وخرجنا ندور على مكان ثاني نأكل فيه بعد اللي حصل فينا. وعرفنا أن تجربة الأكل في «تايم جيت» مش هـ تتكرر ثاني، بس جايز نفكر في موضوع زيارته ككافيه.

...

فايكنج: أكلات أمريكية وتيكس ميكس ضخمة فى مدينة نصر
اصدرت في: 25/06/2012

كثير من أصحابنا رشحوه لنا وإحنا بـ نلف بعربيتنا بـ ندور على مكان نأكل فيه بعد يوم مرهق فى الشمس الحارقة، لفينا كثير جدًا والمرور فى شوارع مدينة نصر كان زحمة وتنفسنا الصعداء أول ما وصلنا، لكن كل ده راح فجأة لما شفنا المبنى الضخم المهيب بتاع مطعم «فايكنج - Viking». المبنى مكون من دورين ولونه أبيض وفيه لوجو عليه رمز الفايكنج، الدور اللى فوق كان مقفول وقت زيارتنا لكن الجرسون قال لنا أن بـ يعملوا فيه حفلات، وأنت داخل فيه منطقة مفتوحة بالخارج فى الجنينة للجلوس ومنطقة ثانية بالداخل، المفتوحة لغير المدخنين والمغلقة العكس، المكان محاط بزجاج فـ تقدر تستمتع بمنظر الشارع، الديكور رائع وجو المكان حلو جدًا، الجرسونات شعلة نشاط ومتابعينك باستمرار. قعدنا فى المكان اللى جوه، قبل ما نختار من المنيو سألنا الجرسون لو حابين نجرب نأكل أطباق من منيو "شواية فايكنج" اللى بـ يعملوها بس كل يوم جمعة وسبت، مشويات شرقية من كفتة وكباب.. إلخ، الصراحة المنيو الأساسية كانت مغرية جدًا وكنا عاوزين نجرب الأطباق الغريبة دي. الأكل هناك فيه مشويات وأصناف مقلية، لكن المقلى كثير برضه، حتى أن عندهم حاجة لطيفة جدًا البطاطس المهروسة معمولة على شكل كرات بالبيض والبقسماط ومقلية فى الزيت، فـ تأكل طبقة مقرمشة من بره والبطاطس المهروسة الطرية هـ تذوقها من جوه، لمنيو لوحدها فتحت نفسنا بس برضه طلبنا مقبلات فايكنج سامبلر (52.99 جنيه) وده عبارة عن طبق كبير فيه عينات من 4 مقبلات: بافلو وينجز، جاكيت بطاطس وأصابع الموتزاريلا وسبرينج رولز بالخضار ومعاها 3 أنواع صوص. وكمان طلبنا شوربة طماطم (14.99 جنيه) وطلبنا يضاف عليها كريمة. الشوربة جاءت كميتها كبيرة وساخنة والطعم كان وهمى، بس ما قدرناش نكملها، برضه المقبلات كانت ضخمة ومتنوعة، كمية المقليات بالنسبة لنا كانت كثيرة لكن ما ننكرش أنها كانت لذيذة، وبرضه ما عرفناش نخلصها كلها. اكتشفنا بعد كده أن «فايكنج» كرماء فى كميات الأكل اللى بـ يقدموها، واللى أكد لنا كده لما طلبنا الأطباق الرئيسية، اختارنا هوبو تشيكن (58.99 جنيه) وفايكنج ميكس جريل (74.99 جنيه) الهوبو تشيكن عبارة عن صدور فراخ عليها صوص أبيض وزيتون وبيف بيكون وفلفل ألوان وبـ ينزل معاها خضار سوتيه وكرات البطاطس المهروسة اللى ذكرناها قبل كده، الأكل بصفة عامة كله تحفة فى الطعم والتقديم والتخديم عليه، الكميات ضخمة وبقينا منها برضه أخذناه تيك أواي، بس استمتعنا جدًا به. وإحنا لسه بـ نأخذ نفسنا ويا دوب أخذوا الأطباق، لقينا الجرسون جاء لنا يروج للمشروبات والحلويات وبـ يعطينا منيو علشان نطلب حاجة ثانية، كان الموضوع تسويق أكثر ما منه خدمة ودي حاجة ضايقتنا شوية، طلبنا منه نستريح شوية وبعدها نطلب ثانى. شوية كده وانتقلنا للقعدة اللى بره نجربها، الخدمة فى المنطقة دي مش حلو قوي زي اللى جوه، لما طلبنا كذا مرة حاجات كانت بـ تأخذ وقت كثير عقبال ما تيجي وفيه وقت عقبال ما ييجي لنا حد أصلاً، طلبنا برتقال (14.99 جنيه) وليمون بالنعناع (11.99 جنيه)، المشروبات بصفة عامة منعشة وخففت من الأكل اللى أكلناه شوية ماعدا أننا ما حسيناش أن الليمون فيه طعم نعناع خالص، وبرضه حصل ثاني موقف أن الجرسون جاء لنا وسأل عاوزين نطلب حاجة تحلية بعد الشرب فـ تضايقنا ثاني، لدرجة حسستنا أنهم عاوزيننا ننجز ونطلب ونمشي، ختمنا القعدة بنوجا بالآيس كريم (26.99 جنيه) اللى بـ ييجي لك حسب اختيار نوع الآيس كريم اللى بـ تحبه وفيه قطع فواكة مجففة ونوجا، كان لطيف لكن كان ثقيل شوية ومسكر وكانت نسبة النوجا أكثر من الآيس كريم فكانت جامدة. فيه حد أدنى للطلبات فقط يوم الخميس هو 75 جنيه، لما بـ تقعد بـ ينزل لك زجاجة مياه صغيرة (6.99 جنيه) وبـ يضاف خدمة فقط على حسابك، لو عاوز تعرف أكثر عن "فايكنج" زور صفحتهم على الفيسبوك لأن الموقع لسه تحت الإنشاء.

...

الخان: مطعم وكافيه بطابع شرقي في مدينة نصر
اصدرت في: 16/05/2012

مش عارفين إمتى ممكن نقول أننا خلاص غطينا كل محلات ومطاعم شارع عباس العقاد بمقالات نقدية في كايرو 360 لأن الحقيقة كل مرة نعدي فيها من هناك بـ نكتشف أماكن جديدة لسه فاتحة أو بقالها فترة جديدة وإحنا ما أخذناش بالنا منها، ده غير المحلات اللي بـ تغير نشاطاتها وبالتالي بـ تغير أسمائها، وكثير بـ نعتمد على أصدقائنا اللي ساكنين هناك علشان يقولوا لنا لو فيه مكان جديد فتح وإحنا مش كاتبين عنه. أمام محل «قويدر» العملاق على الصف المقابل، هـ تلاقي محل واجهته صغيرة اسمه «الخان»، مطعم بـ يقدم مأكولات شرقية وكافية، موجود في الدور الثاني فوق منفذ بيع منتجات مزارع دينا، وله مدخل خاص به من الدور الأرضي، والملفت في المدخل أنك هـ تلاقي على شمالك كاونتر زجاجي معروض عليه إكسسوارات وحلي وأساور زي اللي بـ تباع في خان الخليلي والمناطق الأثرية. ما قدرناش نعرف دي للبيع ولا للعرض فقط لأن ما كانش فيه حد نسأله! الطابق العلوي مساحته كبيرة وله شكل مستطيل والمسافات معقولة بين الترابيزات، والديكور واخد الطابع العربي بالألوان الخشبية والأرابيسك والنقوش الصوفية على الجدران والأسقف، والمكان كله زي ما يكون تراس مغطى بأسقف معلقة، ومافيش جزء مقفول ومكيف لغير المدخنين، كله مسموح فيه بتدخين الشيشة، لكن ممكن تقعد على أطراف التراس اللي بـ تطل على الشارع وهناك مش هـ تحس بأي دخان وهـ تستمتع برؤية الشارع وهـ تبقى شايف برضه شاشات التليفزيون اللي داخل المحل. رغم أن كل حاجة في شكل المكان والديكور بتاعه بـ توحي أنه كافيه أو قهوة وبس، إلا أن المفاجأة لما بصينا في المنيو ولقينا كل أصناف الأكل تقريبًا موجودة من أول الساندويتشات لحد الموزة البتلو والمشويات. سألنا الجرسون عن أصل المحل وطبيعته وقال لنا أنه في البداية كان مطبخ شرقي وبس وبعد فترة استحدث فكرة الشيشة والقعدة العربي وألعاب الطاولة والشطرنج، وده عمل إقبال أكثر على المكان. وعلشان تجرب أحسن حاجة متميزة في مكان أول مرة تروحه، يبقى تبص في المنيو وتطلب كل طبق مكتوب جنب اسمه اسم المحل نفسه، اللي هو هنا "الخان"، يعني ستيك فيليه بصوص الخان وبيتزا الخان (25 جنيه) الخان كوكتيل (20 جنيه) وآيس كريم الخان وهكذا. تقريبًا عملنا كده بس أكيد ما كانش ينفع نجرب كل حاجة. بدأنا بسلاطة السيزر بالدجاج (22 جنيه) وكانت كميتها كبيرة ومعاها صوص كريمة وجبنة رومي مبشورة وطعمها كان هائل. فيليه اللحم بصوص الخان والجمبري مع الأرز الأبيض والخضار السوتيه (65 جنيه) كان مفاجأة بكل المقاييس، لحم بقري بلدي صافي بصوص المسطردة والتوابل العربية (خلطة خاصة بالمكان) مع وحدات جمبري والسوتيه مع حبات الذرة الحلوة والبروكلي، حجم الطبق كبير ومشبع جدًا والسوتيه كان خيالي. نفس المفاجأة السارة كانت في طبق التشيكن مكسيكان (46 جنيه) صدور دجاج محمرة وموضوعة في الصوص الأحمر بالثوم والذرة، خلطة فريدة ما شوفناش زيها في أي حتة. المفاجأة بالنسبة لنا كانت في الصنعة الخطيرة اللي في الأكل رغم أن تخصص المكان المفروض أنه شرقي، يعني التميز بتاعه يكون في الطواجن والمحاشي والمشويات. لكن بعد ما جربنا الأطباق الرئيسية العالمية هنا وطلعت بالروعة دي، مش قادرين نتخيل المطبخ الشرقي هنا هـ يبقى عامل إزاي. فيه بيتزا بأسعار من 23 لـ 32 جنيه، وأطباق أسماك من 58 لـ 85 جنيه وطواجن خضار باللحوم من 20 لـ 34 جنيه وكل أنواع المشهيات الشرقية والغربية، ده بالنسبة للمأكولات. كل المشروبات الساخنة والباردة والعصائر والكوكتيلات موجودة، وفيه حلويات زي أم علي والتشيز كيك والآيس كريم (25 جنيه) اللي جربناه في الآخر وكان مسك الختام بعد الوجبة اللذيذة. والشيشة للي غاوي (مافيش حد قاعد هناك مش بـ يشيش) بأسعار 9 جنيه للعادي، و15 جنيه للفاخر وفيه مكس بـ 22 جنيه. القعدة حلوة قوي في «الخان»، والخدمة شيك وسريعة، الأكل هناك ممتع مش بس مشبع، والمشروبات كلها فريش، والأسعار بـ يضاف عليها 12 % خدمة بس ومافيش ضريبة. معظم الموجودين في المحل وقت زيارتنا كان واضح أنهم زبائن دائمين للمكان، وأكيد ده ما جاش من فراغ؛ «الخان» عرف يربي زبون.

...

أفريكانو كافيه: قهوة رخيصة ومكان متميز في مدينة نصر
اصدرت في: 09/05/2012

رغم أنه كاتب على يافطته من بره «أفريكانو كافيه» والشكل الخارجي للمحل وموقعه الاستراتيجي في الشارع المتفرع من شارع عباس العقاد، إلا أنه مش هـ يقدر يخدعك أكثر بعد ما تنزل درجتين السلم اللي قبل مدخل المكان. قهوة بلدي متنكرة في هيئة كافيه إيطالي. واحنا مش بـ نكتب هنا علشان نعيب في النقطة دي؛ لأ إحنا بس بـ نقول لكم ليه إحنا مش حابين نقول عليه كافيه. قريب جدًا من محل كشري «شيخ البلد»، في الشارع اللي على ناصيته محل الكشري الشهير، واسم الشارع مصطفى حمام، واللي عارف مدينة نصر كويس بـ نقول له أن نفس المكان ده كان فاتح فيه من كام سنة كافيه اسمه "الأقزام" وكان كل اللي شغالين فيه فعلاً أقزام. قعدة أفريكانو أغلبها داخلية أو جوه المكان، مافيش غير ترابيزتين فقط خارج المحل، وده معناه أنك لو مش بـ تدخن أو بـ تشرب شيشة هـ تتعب قوي من القعدة بالداخل. القعدة مريحة أو زي ما هم كاتبين على جدران المحل وعلى المنيو "قاعة ملكية وأسعار أقل من العادية" وإحنا شايفين في الجزء الأول من العبارة بعض المبالغة، لكن وماله، من إمتى الشعارات كانت نموذجية! الملفت داخل المحل أنه هـ يحسسك أنك قاعد في قاعة أفراح شعبية أو في حفل عيد ميلاد! كمية الأنوار والكهارب وأشجار الزينة مش طبيعية، بس أهو بـ يحاول يعمل لنفسه ستايل. المنيو هو كل ما يمكن تشربه في أي قهوة مصرية أصيلة، من أول الشاي أبو 2.5 جنيه لحد عصير المانجو بـ 8.5 جنيه. فيه طبعًا قرفة بالجنزبيل وسحلب وكل أنواع القهوة، لكن الجديد هنا كان عصير البوريو والميلك شيك والبرتقال باللبن وكل ده بـ 7 جنيه، وفيه حلويات زي الجيلي والفروت سالاد والكريم كراميل بنفس السعر، والكانز بـ 4 جنيه. الشيشة بـ 2.5 جنيه للمعسل و6 جنيه للفواكه الفاخر واللي والمبسم الطبي بـ 7 جنيه مع بعض. المشروبات لذيذة سواء ساخنة أو باردة، لكن أكيد أي محل عصير متخصص هـ يقدم مشروبات أحسن من كده. علشان كده خليك في الشاي والقهوة والينسون والكانز المقفولة، وما تطلبش فاكهة اللي لما يكون ده أوانها. القهوة مافيهاش أي ألعاب قهوة! لا شطرنج ولا طاولة وطبعًا ممنوع الكوتشينة. لكن علشان يعوضوا ده ويعملوا شوية ترفيه عاملين في نهاية المحل ترابيزة بلياردو بـ تتأجر بالساعة. ممكن تطلب أكل من محلات قريبة من القهوة زي كشري شيخ البلد وكبدة ومخ من المحل المقابل لها وتقعد تأكل هناك. القهاوي اللي أسعارها رخيصة مش كثير في شارع عباس العقاد وما حوله، جرب «أفريكانو» وهـ تلاقي رجليك بـ توديك هناك كل ما تحب تريح بعد شوية تمشية في عباس العقاد، خاصة آخر الشهر.

...

كاريبيان: تجربة أكل صادمة في مدينة نصر
اصدرت في: 12/10/2011

الأكل في المطاعم بره مش مجرد قعدة أكل وخلاص. لما بـ نخرج نأكل بره أكيد بـ ندور على أكل لذيذ، خدمة ودودة، وجو مريح للأعصاب، ولكن لما تلاقى مطعم أكل مافيهوش أى عامل من العوامل دي اللي تشجعك تروحه هـ تتساءل هو إزاي شغال لحد دلوقت. «كاريبيان - Caribbean» مكان أشبه بالوكر عنه مكان للأكل، أول ما دخلنا جاء لنا إحساس على طول أننا عاوزين نلف ونمشى من المكان، الإضاءة في المكان خافتة بزيادة، والكراسي الرمادية اللون كانت مقطعة وباين الحشو اللى جواها. أول ما قعدنا لقينا فقط قائمة الطعام بتاعة المشروبات والتحلية، واضطرينا نسأل الجرسون مرتين على قائمة الأطباق الرئيسية، وفي الآخر جابوا لنا منيو واحدة لمجموعة من ستة أشخاص، فاضطرينا نسأله يجيب لنا ثاني على قدنا. المنيو كانت ملزقة وكان عليها آثار بصمات أصابع، وده خوفنا زيادة لأن طالما المنيو كده أُمال الأكل بتاعنا لما ييجي هـ يكون شكله عامل إزاى؟ كل اللي قدرنا نعمله قعدنا ندعي أن المطبخ يكون فيه اعتناء أكبر من اللي شايفينه أمامنا. وكانت غلطتنا الكبيرة أننا زرنا حجرة الاستراحة، كنا فاكرين أن الوضع هـ يكون مختلف وهـ نلاقي الدنيا نظيفة، لكن شكل آخر مرة نُظفت فيها كانت من سنين وإلا كان شكلها يبقى مختلف وقت زيارتنا. الخدمة في "كاريبيان" كانت بطيئة وخاملة جدًا، كنا قدرنا ده لو كان المكان مزدحم، ولكن إحنا كان حولنا خمس مجموعات بـ يخدموا في المكان، فالتأخير والبطء كده مالوش مبرر. طلبنا ساندويتش ديك رومي مدخن بالجبنة المولتن (27 جنيه) لأننا كنا جعانين جدًا، المفاجأة أن الجرسون جاء بعد نصف ساعة يقول لنا أن الساندويتش للأسف غير متاح في المطعم حاليًا، وبالتالي غيرنا طلبنا لساندويتش فراخ سبايسي مقرمشة (30 جنيه)، وفي الوصف بتاعه في المنيو كاتبين أنه عبارة عن فراخ سبايسي مقرمشة معاها ديك رومي مدخن وعليه جبنة شيدر في عيش باجيت فرنساوي، الساندويتش ما كانش فيه رائحة ولا وجود للديك الرومي، والجزء الكريسبي في الفراخ كان فيه دهن تحته. جربنا كمان ساندويتش التشيكن مشروم (28 جنيه) وهو عبارة عن: صدور فراخ، ومشروم، وجبنة موتزاريلا وصوص المايو في عيش باجيت فرنساوي برضه، والصراحة إحنا ممكن نحضر ساندويتشات في البيت أفضل وأطعم من كده بكثير. طلبنا كمان ساندويتش فراخ بارميزان (26 جنيه) وده كان الحاجة الوحيدة اللي كان طعمها جيد، جابوه لنا في طبق أبيض بورسلين كبير وكمية كبيرة من البطاطس المحمرة المقرمشة، ولكن في النهاية حجم الساندويتش مع البطاطس كان قليل قوي في الطبق الضخم ده فكان شكل الطبق أكنه فاضى. كمان طلبنا باربكيو تشيكن بيتزا، وكان حظنا حلو مع الطبق ده أخيرًا، محطوط على الساندويتش من فوق شرائح فراخ، فلفل أخضر، زيتون، مشروم، بصل وجبنة موتزاريلا، البيتزا ما كانش فيها حاجة مميزة لكن أخيرًا لقينا حاجة طعمها كويس نأكلها. كنا عاوزين نعطي «كاريبيان» فرصة ثانية، فطلبنا تحلية، ولكن الجرسونة قالت لنا بكل أسف أن مافيش تحلية متاحة، وكان كفاية كده، طلبنا الفاتورة ولكن الصدمات ما انتهيتش لأننا لقيناهم محاسبيننا على أربعة أطباق إحنا ما طلبناهاش! إحنا مش عارفين دي غلطة أثناء زيارتنا ولا ده المعتاد هناك، لكن اللي إحنا متأكدين منه أننا مش هـ نروح المكان ده ثاني علشان نعرف إجابة سؤالنا ده إيه.

...

كيروز لاونـﭺ: طعام ممتاز ومكان محتاج عناية في مدينة نصر
اصدرت في: 25/06/2011

بالرغم من صعوبة الوصول ليه، «كيروز لاونـﭺ - Kiro’s Lounge» طلع يستاهل كل التدوير واللف عليه. موجود في شارع يوسف عباس في مدينة نصر، والمنيو بتاعه مجمع أكلات من روما، المكسيك، باريس وكمان بيروت. أول ما دخلنا المكان كنا قلقانين شوية؛ دخان الشيشة كان خانق المكان ولما طلبنا من الويتر ترابيزة في قسم الغير مدخنين، هز رأسه في أسف مزيف وقال مفيش. وبعد ما أخيراً قعدنا، ترابيزيتنا كان عليها طفاية مليانة طفي سجاير، وده زود مضايقتنا. القماش البرتقالي في بيـﭺ اللي مغطي الكراسي كان متوسخ وللأسف يونيفورم الويتر كان مبقع هو كمان، وده خلانا نتمنى أن المطبخ يكون معتنى بيه أكتر. منيو «كيروز لاونـﭺ» كان متقسم حسب بلد منشأ الطبق المعروض، وده كان مزعج شوية في الأول لأن كل قسم كان فيه مقبلات وأطباق رئيسية وحلو. وكان فيه منيو تاني للمشروبات على شكل إزازة. إحنا طلبنا عصير جوافة فريش (13.99 جنيه) عشان نبتدي به القعدة، كان لذيذ بس عادي. بعد ما طلبنا، نزل على الترابيزة اللي جنبنا طبقين فاهينتا ريحتهم تجري الريق، وده خلانا متحمسين نشوف أطباقنا، وفي نفس الوقت ندمانين اننا ماطلبناش فاهيتا إحنا كمان. قررنا ناكل من القسم المكسيكي، فطلبنا شرايح الفراخ المقرمشة (بـ25.99 جنيه) وده بـ يتقدم مع مسطردة عسل. الفراخ نفسها كانت مالهاش طعم، لكن القشرة البرانية المقرمشة كان طعمها جنان. وجدير بالذكر ان المقبلات اللي كانت تيجي قبل الطبق الرئيسي ماجاتش. وبعد تفكير كتير، طبلنا كمان طبق الفراخ المكسكية السبايسي (50.99 جنيه)، والطبق ده للأسف ماكانش حار بالقدر اللي نفسنا فيه ولكن كان لذيذ جداً. الفراخ كانت مطبوخة مع الفاصوليا الحمراء وفلفل أحمر وأخضر مبشور وذرة. وأخدنا معاه فراخ الطماطم المكسيكية (Mexican Chicken Tomato بـ51.99 جنيه)، واللي على نقيض اسمه كان خالي تماماً من الطماطم، بس برضه طعمه رائع. وبـ ينزل معاه طبقين جانبيين وبـ تختار ما بين خضار سوتيه، رز، بطاطس محمرة ومهروسة، أو طبق مكرونة. أما الحلو، فـ«كيروز لاونـﭺ» فيه حاجة ترضي كل الأذواق. القسم الفرنسي فيه كريب (21.99 جنيه) وكيك شيكولاتة (20.99 جنيه)، بينما القسم اللبناني ففيه حلويات شرقية زي «أم علي» (18.99 جنيه) وسلاطة فواكه (11.99 جنيه). المكان فيه شاشات LCD عشان سهرات الكاريوكي، لكن لازم تتصل تحجز الأول.

...

ڤايكنج: أكل خيالي في قصر ملوك الشمال
اصدرت في: 16/06/2011

موعد غرامي٬ خروجة أصحاب٬ عزومة عائلية مهمة٬ صبح ليل...«ڤايكنج - Viking» هو المكان. «ڤايكنج» مطعم بقى له حوالي 7 سنين في مصر الجديدة. مطعم ديكوره مستوحى من الـ«ڤايكنج» وهما قراصنة من البلاد الإسكندنافيا شمال أوروبا عاشوا في العصور الوسطى. المطعم خلف التوحيد والنور اللي في الميرغني٬ في شارع هادي جداً. المطعم عبارة عن ڤيلا دورين وفيه مساحة كبيرة قوي تراس مليان كراسي خشب شيك. الڤيلا الديكور بتاعها فريدً٬ لونه برتقالي وبـ يميزه الشبابيك الإزاز الدائرية والكور الضخمة اللي على واحدة منها شكل لراس قرصان «ڤايكنج». المطعم مكتوب عليه بالبرتقالي الكبير من فوق اسمه٬ بطريقة واضحة وجميلة. المكان من جوه برضه فيه دواير كتير مزيناه٬ ألوانه دافية وأنيق بطريقة غير تقليدية ومافيهوش كنب كله كراسي وترابيزات. وممكن تقعد في الدور الأول وهو الأهدى لأن التاني فيه المطبخ. المكان هادي عامةً وبـ يروحله تشكيلة متنوعة من الناس شباب على عائلات. المنيو بتاعهم جميل٬ وصور الأطباق اللي فيه رائعة وتخليك مش قادر تستنى عشان تشوف الأكل (المفاجأة الجميلة ان الأكل مش بعيد أبداً عن الصور!) فيه تشكيلة من الشوربات (من 15 لـ19 جنيه) الأطباق المكسيكية زي التاكو والكيسيديا والفاهيتا وبيتزا (من 31 لـ38 جنيه) وساندويتشات وبرجر (من 33- 39 جنيه)٬ ومقبلات وعصائر وكوكتيلات. احنا قررنا ناخد طبق مقبلات «ڤايكنج سامپلر – Viking Sampler» (53 جنيه) و للأطباق الرئيسية طبق سي فوود اسمه «سي بيد – Sea bed» (80 جنيه) وواحد عبارة عن ستيك مع تاكو واسمه «تامپيكاندي – Tampicandi» (83 جنيه). الـ«ڤايكنج سامپلر – Viking Sampler» كان فيه أكتر من صنف مقبلات في نفس الوقت٬ صوابع جبنة موزاريلا مقلية وبطاطس محشية جبنة شيدر وعليها شرايح سلامي٬ كاليماري مقلي وأجنحة فراخ متغرقة في الصوص الحار٬ وكان جاي معاها صوص تارتار وصوص طماطم ومسطردة. وكل صنف كان أجمل من التاني! صوابع الجبنة كانت هشة٬ وجميلة وقشرتها متماسكة ورفيعة ورقيقة. شرائح البطاطس بالشيدر كانت ممتعة جداً٬ والكاليماري كان مقرمش وطِعم ومع التارتار صوص كان هايل. الـ«تامبيكاندي» كان نازل معاه رز بالبهارات٬ كان طعمه مكسيكي وبهاراته قوية٬ الستيك كان بـ يشد شوية٬ بس حلو. والتاكو كانت التورتيا المحطوط فيها صابحة ومقرمشة (مقرمشة وناشفة زيادة فكان أكله صعب شوية)٬ المكونات كانت كلها صابحة وطعمها حلو٬ بس الطبق بوجه عام كان مالح اكتر من اللازم. أما الـ«سي بيد» فكان في منتهى الجمال كان عبارة عن قطعة سمك فيليه ومحار وجمبري ومكرونة فوسيلي بصلصة ليمون بيضة بالشبت٬ متقطع عليها قطع سمك سالمون. المكرونة كانت معجزة٬ خفيفة ولذيذة والليمون والصوص الأبيض عاملين توازن بديع مع السي فوود اللي كل حاجة فيه كانت بـ تنافس التانية في قد ايه هي فريش وحلوة. الحلو خدناه «أوريو تشيز كيك – Oreo Cheese Cake» (32 جنيه) (كيك الجبنة بالأوريو) وده الويتر رشحه لنا والمطعم مشهور بيه. وده كان عبارة عن أيس كريم ڤانيليا ومن فوق ومن تحت بسكويت أوريو بالمكسرات عليه كراميل ٬ وفوق طبقة الأوريو فيه مربى فراولة والطبق متذوق بصوص كراميل وشيكولاتة. أينعم ماكانش فيه أي "تشيز" في الموضوع٬ لكن الطبق كان حلو بشكل مبالغ فيه. تركيبة الأوريو مع الكراميل مع مربى الفراولة مع الأيس كريم كانت عبقرية٬ ضيف على ده ان كل مكون في ذاته روعة في الجمال. الطبق كان شكله خطير وكل قطمة بـ تسيح في الفم٬ ومش مليان سكر على الفاضي وفي نفس الوقت مسكر كفاية وكفاية عليكم كده. هو غالي بس تمنه فيه ويكفي اتنين مش جعانين قوي. المكان فيه منيو عصائر معقد والكوكتيلات بـ تبدأ من 20 جنيه والعصائر السادة من 12 جنيه. جربنا الـ«باشن ميكس – Passion Mix» والـ«ڤايكنج كوكتيل – Viking Cocktail». الأول عبارة عن عصير مانجو وكريمة (مخفوقة) وكان رقيق وجميل ومشبع (مقدرناش نخلصه بعد الوجبة الكبيرة اللي أكلناها) والتاني كان عصير أناناس٬ فراولة وشربات كرز واتقدم بكريزه على طرف الكوباية. العصير كان فريش بس الخليط نفسه كان مسكر بزيادة٬ لكن خفيف وحلو برضه. الخدمة كانت سريعة٬ والويترز شاطرين وفاهمين كويس جداً الأكل اللي في المنيو٬ ده غير انهم ودودين وسايبين الناس في حالهم في نفس الوقت. الخلاصة ان المكان هايل وحميمي ومش هـ تندم لو قررت تروحه لأي سبب من الأسباب٬ خصوصاً لو السبب انك تجرب ال«أوريو تشيز كيك» الملائكية!

...

بيكيا: كتب مستعملة وكافيه في القاهرة
اصدرت في: 10/06/2011

موجودة في شارع جانبي هادي في ضواحي مدينة نصر، جنة القراء الجديدة بمعروضات من الكتب المستعملة ومكان تشرب فيه قهوة وتاخد مأكولات خفيفة ومقرمشات. القصة إبتدت مع 5 بنات في العشرينات من عمرهم، كان عندهم حلم من أيام المدرسة بإنشاء مكتبة للكتب المستعملة، وقدروا في 5 شهور يحققوا الحلم ده ويقدموا للقاهرة مكتبة فريدة من نوعها، وطبعاً كلمة "بيكيا" هي إختصار كلمة "روبابيكيا" اللي هي الحاجات القديمة اللي للبيع. الديكور الداخلي مريح للأعصاب وده مقصود في تصميمه، فيه ألوان دافية كتير زي البرتقالي والأحمر وأجزاء تانية رمادي، والأثاث نفسه خشبي باللون البني، وكله بـ يصب في خانة جو الإسترخاء والشياكة للمكان، الكراسي والكنبات وقدامها الترابيزات في كل أركان المكان وبـ تهيئ جو رائع للقراءة. تشكيلة ضخمة من الكتب المستعملة إستعمال نضيف جداً، بعض الكتب مش هـ تحس إنها مستعملة أصلاً. بعض الكتب محطوطة في سلات من القش متوزعة في أركان الأوضة، إنما الكم الأكبر من الكتب موجود في أرفف على الحيطة ومتقسمين حسب نوع الكتاب. الكتب باللغة الإنجليزية معروضة في تصنيفات كتير زي : غموض ودراما وتشويق، تاريخ وسياسة، دين، خيالي، واقعي، كوميدية رومانسية. في رف القصص هـ تلاقي كلاسيكيات زي «ذهب مع الريح» و«1984» وأعمال معاصرة لجابرييل جارسيا ماركيز والأديب الياباني كوزو إيشيجورو وأعمال نجيب محفوظ واللبناني أمين معلوف وآخرين. الكتب العربية منظمة حسب نوعها سواء كانت أدب، سياسة، دين، فنون. في «بيكيا» معظم الكتب بتـ تباع في «بيكيا» بـ أقل بمن 75% من سعرها العادي ولو دورت كويس هـ تلاقي كتب كتير بـ 5 جنيه. وانت في المكتبة بص على المنيو هناك هـ تلاقي عندهم بـ يقدموا قهوة،عصير، ساندوتشات وأكلات مغلفة بأقل من 20 جنيه. لو في يوم الجو برد اقعد في حتة جنب الشباك عشان أشعة الشمس تدخلك وتلاقي نفسك حاسس بالراحة، دوَّر كويس جوة الباسكت هـ تلاقي مجلة ﭭوجVogue القديمة ومجلات تانية. لو انت عايز تلعب مع صحابك، «بيكيا» فيها لعب زي «سكرابل- Scrabble» و«بيكتشنوريPictionary - » اللعبة دي بـ ترسم فيها وتخلي الناس اللي بـ تلعب معاك تحاول تفكر الرسمة دي يعني ايه. هـ تلاقي اللعب دي في الأرفف في المكتبة. «بيكيا» مش مجرد محل بـ يبيع كتب، وقت الإفتتاح «بيكيا» جاب موهوبين لـ مدة ثلاث ايام زي شادي احمد، راش راديو و«Double Barrel». «بيكيا» تعهدت انها هـ تعمل أنشطة تانية مش بس موسيقى.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن