القاهرة الجديدة كافيهات in Cairo, Egypt

كافيهات

قهوة: زيارتنا لفرع واتر واي كانت مخيبة للآمال
اصدرت في: 03/08/2016

عرفناهم وحبيناهم من فرعهم في مدينة 6 أكتوبر اللي يعتبر من أحلى المطاعم الجديدة المعروفة بفطارها اللذيذ. أكيد طيرنا من الفرحة لما عرفنا إن "قهوة" فتحوا فرعهم الثاني في القاهرة الجديدة وتحديدًا في واتر واي، لكن للأسف كانوا بعيد عن المستوى المنتظر. قهوة عندهم قعدتين، واحدة داخل المكان معروض فيها أطباق الحلو – ومحتاجة إضاءة أحسن شوية – أما الآوت دور فهي المكان المثالي لوجبة البرنش بشمسياتها البيضاء والمراوح السوداء وترتيبة الترابيزات والكراسي الخشب المريحة. لازم قبل ما نتكلم عن الأكل نقول إن الخدمة لما كنا هناك كانت سيئة. علشان المنيو توصل أصلًا احتاجنا نستنى نص ساعة وخمسة جرسونات مختلفين، لدرجة إننا كنا بنتحايل عليهم يجيبوا المنيو وأي حد ينظف ترابيزتنا. بعد ما عدينا البداية العجيبة، طلبنا Cobb Salad (60 جنيه)، وهي عبارة عن طبق كبير فيه خس ومكعبات فراخ طرية غرقانين في صوص الباربيكيو، ومعاهم فاصوليا حمراء وذرة حلوة وجبنة شيدر مبشورة وقطع بيف بيكون، وكل دول غرقانين صوص رانش. كمية السلطة كانت كبيرة فعلًا، وصحيح مكوناتها كثير، بس ماشيين مع بعض تمام. مكونات السلطة كانت كلها طازة وطعم الباربيكيو صوص مع الفراخ عملوا شغل عالي. الملاحظة الوحيدة إن نسبة الخس لباقي الإضافات محتاجة نظرة. بعدها دخلنا على أومليت بالسبانخ والمشروم (38 جنيه). الأومليت كان مستوي كويس ومحشي ومحطوط فوقه كمية هايلة من الجبنة والسبانخ والمشروم، وبيتقدم مع الطبق مكعبات بطاطس تتبيلتها 10/10 ومشروم سوتيه طازة. الأومليت نفسه كان محتاج شوية بهارات – وواضح إنهم كانوا معتمدين على الجبنة تقوم بدور التوابل – أما السبانخ فماكانش لها أي تأثير على طعم الطبق. قررنا نجرب طبق بيض ثاني من عند "قهوة"، والطبق كان Egg Benedict بالبيكون (50 جنيه). الطبيعي إن الطبق ده بيكون معمول على عجينة بيتزا، لكن اللي وصل كان مجرد قطعة عيش بارد، مش كده وبس، البيض كان مستوى جدًا وماقدرناش نستمتع بشكل الصفار وهو بينفجر من البيضة. البيكون كمان كان قليل جدًا وبياض البيض كان فيه حاجة غلط. خلاصة القول، الطبق مش حلو. الحاجة الوحيدة الحلوة كانت الهولنديز صوص. كان نفسنا نختم أكلتنا بكريب فراولة وكسترد مع بلوبيري سموزي، بس الأثنين ماكانوش متاحين وقتها فقررنا نطلب عصير برتقال فريش (17 جنيه)، ومعاه Caramelised Banana Crepe (36 جنيه). رأينا في الكريب اللي عليه موزة مقطوعة نصفين – ومش عليه السكر البني زي ما قالوا – وعليهم صوص كراميل وبولة آيس كريم فانيليا سائحة في نصف الكريباية كان متضارب رغم إن التوليفة شكلها حلو على الورق. الكريب نفسه كان كويس، لكن المشكلة في طريقة التقديم، وبرضه الموضوع كان على عكس توقعاتنا. شوف أهو الكلام كان هيأخذنا وننسى البرتقال اللي وصل وإحنا بندفع الشيك على الكاونتر؛ تخيل! طبعًا إنه يوصل متأخر أحسن من مافيش، بس للأسف في الحالة دي يا ريتهم سابوا البرتقالة في حالها. العصير كان فاتر ومافيش ثلج؛ تخيل برضه! على حسب تجربتنا مع فرع قهوة في أركان مول وشهرة المكان بصفة عامة، زيارتنا لفرع واتر واي كانت تجربة للنسيان. بعيدًا عن جودة الأكل، الخدمة كانت مرعبة، خصوصًا إننا لما روحنا كان المكان فاضي لحدِ ما.

...

مطعم ولاونج ذا موود: فرع جديد للمطعم المميز هايل لكن مع ملاحظات بسيطة
اصدرت في: 24/05/2016

ذا موود كان من أوائل المطاعم الفخمة اللي تفتح في القاهرة الجديدة وتحديدًا وراء فندق لاند مارك، وقدم لجمهوره أكل مميز مع الاستمتاع بمكانه الرائع على حمام السباحة. دلوقتي ذا موود غير مكانه وراح وراء كنيسة البازيليك في هليوبوليس، وهناك هتشوف قعدة آوت دوور بألوان ساحرة وحواليها زرع وخضرة يفتحوا النفس مع مراوح بترش رزاز مياه علشان حر القاهرة الجميل، أما المطعم نفسه فأجواءه هادئة وإضاءته خافتة، مع كنب مريح وشاشة تليفزيون كبيرة، والكلام ده هيكون مناسب جدًا للمجموعات الكبيرة. بعد رحلة استكشافية في المنيو حسينا بتوهان شوية بسبب تنوع الأصناف، أصل ذا موود بيقدم كل حاجة من مشويات لسمك لأطباق باستا وبيتزا وكمان ساندويتشات، وحتى الفتة هتلاقيها هناك. قررنا نفتح نفسنا بشوية سبموسك جبنة (31.99 جنيه)، وبالنسبة للأطباق الرئيسية قررنا نجرب التشيكن كاري (69.99 جنيه) و"موود سي فوود" (110.99 جنيه) معاهم بطاطس محمرة وخضار سوتيه. ننقل لكم اللي حصل سريعًا من قلب الحدث، خمس قطع سمبوسك محشيين جبنة لا هي ساخنة ولا باردة. للأسف طعم الجبنة في السمبوسك كان سيء وواضح أنهم سخنوها قبل كده، وبعد كل ده كمان توصل مش ساخنة؛ طب ده كلام؟! بعدها بشوية وصلت الأطباق الرئسية وواضح عليها إنها مليانة بكميات أكل كويسة. الفراخ بالكاري كانت عبارة عن قطع فراخ طرية صغيرة غرقانة صوص الكاري التايلاندي الأخضر المميز، وهو ريحان مع صوص تايلاندي أخضر حار، والحقيقة أن طعمها كان خرافي، خصوصًا مع نكهة ثوم خفيفة والصوص اللذيذ مع الطعم السبايسي الخطير. نطلع على "موود سي فوود" اللي كان على نفس المستوى من الجمال والحلاوة. توليفة الفيليه المقلي الخفيف مع الكاليماري والجمبري وعليهم صوص أبيض ممتاز والتوابل اللذيذة عملوا شغل عالي، وكمان ما ينفعش ننسى الدور المهم للشبت الطازة. الطبق ده يعتبر من أطباق المطعم المخصوصة، وبصراحة صعب تقول له كفاية أنا شبعت. أما منيو الحلو ففيها حلويات شامية لذيذة منها غزل بيروت (31.99 جنيه) مع أطباق تقليدية زي المولتن كيك بالآيس كريم (37.99 جنيه)، لكن إحنا دماغنا راحت لحاجة مختلفة وهي بطاطا حلوة بالآيس كريم (30.99 جنيه). البطاطا خرجت ساخنة مولعة من الفرن وعليها بولة آيس كريم ومرشوش عليهم صوص كراميل لذيذ ومكسرات، والحقيقة أن التركيبة بين الساخن والبارد كانت عبقرية، ودي فعلًا كانت نهاية ممتازة لأكلتنا في ذا موود. بعدها طلبنا شيشتين واحدة كيوي والثانية مانجو (46 جنيه) كانوا مضبوطين زي الكتاب ما بيقول، لكن حجر المعسل كان محروق، وطبعًا الأسعار كانت غالية شوية. على العموم، تجرتنا مع ذا موود كانت هايلة، لكن عليها شوية ملاحظات. المهم أن الأجواء اللطيفة والموظفين الهايلين والأطباق الرئيسية اللذيذة كانوا ممتازين، وكافيين إنهم يرجعونا في زيارة ثانية قريب.

...

لا إكلير باريس: أول متخصص إكلير باريسي في القاهرة حاليًا في داون تاون القطامية
اصدرت في: 07/12/2015

من ييجي خمس سنين شوفنا ظاهرة الكب كيكس بـ تكتسح كل حلويات القاهرة، بس دلوقت مع وجود عدد كبير من محلات الكب كيكس اللي بـ يحاولوا يجددوا فيها بكل الطرق الممكنة، لدرجة أنهم عملوا كب كيكس كنافة، تخيل! دلوقت حان الوقت أن القاهرة تقدم لنا نوع جديد من الحلويات، طلعنا على "لا إكلير باريس – L' Éclair Paris" اللي فتح حديثًا في مول داون القطامية في القاهرة الجديدة، وعندنا استعداد ندمن حلويات الاسم الباريسي الشهير. بعد ما تفرجنا على عرض المحل الأوت دور، انبهرنا من تنوع النكهات الرهيب عندهم من قطع الفاكهة زي البلوبيري والمانجو والباشن فروت وفتات التفاح، لغاية نكهات أثقل من الشوكولاتة والكريمة تشمل نوتيلا وكيت كات وشوكولاتة بيضاء وكراميل وفانيليا وريد فيلفيت وموكّا. "لا إكلير باريس" كمان عنده إكلير حادق يشمل رومي وجبنة، وسلامون مدخن، وجبنة مشكلة، وروست بيف وجبنة، ودي اختيارات هايلة لوجبة الفطار أو Brunch وكمان متوفر منهم قطع ميني صغيرة. بعد فترة من الحيرة بين نكهات الإكلير المتنوعة، طلبنا تشكيلة متنوعة تشمل إكلير مارشميلو فانيليا، وشوكولاتة بيضاء وكراميل، وموكّا، وكريسبي أوريو، وشوكليت ستروبيري (22 جنيه للقطعة). طلبنا من الاختيارات الحادقة إكلير سلامون مدخن (35 جنيه) محشي جبن فيلادلفيا وسلامون مدخن طازج ومخلل، رغم أننا كنا مترددين في الأول نطلب إكلير حادق، بس المفاجأة كانت إزاي المكونات كانت متوازنة كده وطعمها ماشي مع عجينة الإكلير الخفيف اللي طعمها مضبوط وسكّرها مش زيادة. نسيب الإكلير الحادق ونروح للحلو، المحشي بنكهات لذيذة في عجينة الإكلير المميزة، واللي فعلاً طعمهم كان تحفة فنية، إكلير المارشميلو فانيليا كان عليه قطع مارشميلو صغيرة ومحشي فانيليا، بس اللي فعلًا كان نموذجي هو الشوكليت إكلير، والفضل يرجع لقطع الشوكولاتة البيضاء اللذيذة ورشة الكراميل على الوش وحشو الكراميل المرعب. حلم عشاق القهوة هـ يتحقق مع الموكّا إكلير، الغني بكريمة القهوة وعليه فنجان قهوة صغير من الشوكولاتة على الوش، أما الكريسبي أوريو فكان ثقيل نوعًا ما، لأنه محشي كريمة أوريو وقطع أوريو مكسّرة، فالعجينة كانت مقرمشة غير كل اللي فات، ممكن نقول أن الشوكليت ستروبيري إكلير هو إكليرنا المفضل؛ أصل خلينا نقول لك حاجة واحدة، حشو من كريمة الفراولة ومتغطية بالشوكولاتة الرهيبة، بس خلاص! تجربتنا مع لا إكلير بشكل عام مرضية وصعب نشتكي من حاجة معيّنة، والمفاجأة أن بعد كل المعركة دي ما حسيناش بثقل الأكل، والفضل يرجع لعجينة الإكلير الخفيفة المميزة. سهل جدًا أن مكان لا إكلير يفوتك لأنه ببساطة عبارة عن كشك كبير، بس الموضوع يستاهل.

...

زاكس بيكري أند كافيه: فطار بسيط ولذيذ في الرحاب
اصدرت في: 23/11/2015

مفيش أحلى ولا أجمل من رائحة مخبوزات لسه طالعة حالًا من الفرن مع شوية كابتشينو منعش، وهو ده كان سبب زيارتنا لـ "زاكس Zack's" في مدينة الرحاب الموجود داخل مطعم سمايليز تيك أواي – وهو مكان غريب شوية بس تمام – المكون من محل صغير فيه ست ترابيزات وكنب جلد وكراسي وأرفف عليها كتب قديمة وفي الخلفية مشغلين موسيقى جاز هادئة. اتفرجنا على المنيو وكلنا شوق نجرب مخبوزاتهم الطازجة، وفيها شوفنا مجموعة من الحاجات الموجودة في أي مخبز زي ساندوتشات وعيش وكيكات وفطائر وكوكيز. لفت انتباهنا إن في حاجات عند زاكس – خصوصًا الكرواسونات - مش موجودة في المنيو. بدأنا اليوم مع ساندوتش تونة في عيش بني ومعاه شوية رقائق مملحة (23 جنيه). العيش البني الخفيف بطعمه اللذيذ كان فيه التونة ومعاها خضروات، والرقائق المملحة كانت إضافة هايلة للطبق. نروح على حلويات زاكس المتنوعة اللي تشمل براونيز وفطائر وكوكيز وطلبنا منهم شوكليت بسكيت كيكchocolate biscuit cake المميز بيها زاكس (18 جنيه). الكيك كان عبارة عن قطع صغيرة من البسكويت المخلوط مع الشوكولاتة متغطيين بطبقة صحيح كانت رقيقة بس غنية بالشوكولاتة. مسك الختام كان مع الآيس لاتيه (24 جنيه) وهارت بيت كوكتيل Heart Beet cocktail بـ 25 جنيه – عبارة عن خليط من الفاكهة والخضروات – وطبعًا عندهم عدد كبير من المشروبات الصحّية المنعشة. الكوكتيل كان من عالم ثاني، خليط مبهر من الكرنب ونصف ليمونة ونصف برتقالة وتفاح أخضر فعلًا يستحق العلامة الكاملة بطعمه اللذيذ الرائع – ودي كانت نهاية رائعة لفطار مميز. جايز موقع زاكس يكون غريب شوية، بس مع الأكل والموسيقى والأسعار المعقولة والموظفين المميزين أكيد تجربتنا معاهم كانت هائلة.

...

نوتيلاريا إيجيبت: أول محل نوتيلا يحقق توقعاتنا ويتجاوزها كمان في بورتو كايرو مول
اصدرت في: 19/08/2015

في يوم من الأيام، واحد من الناس هـ يحكي إزاي وقع العالم في غرام اختراع عبارة عن معجون شوكولاتة بالبندق اللي طلع من مدينة صغيرة في إيطاليا، أيوه بالضبط، إحنا النهارده بـ نتكلم على ظاهرة النوتيلا اللي زلزلت العالم. مصر من أكثر الدول اللي أهلها بـ يموتوا في الحاجات الحلوة، وافتتاح نوتيليريا في بورتو كايرو مول من غير مجاملة كان من أهم الأحداث بالنسبة لعشاق النوتيلا في مصر. مع الرائحة الطازجة للحلويات المعمولة بالشوكولاتة في كل المكان، أكيد هـ توصل لمكان نوتيلاريا في بورتو كايرو مول، الديكورات هناك على شكل برطمانات نوتيلا بأحجام متنوعة –تشمل برطمانات عملاقة– ونافورة شوكولاتة كبيرة، ولو عاوز تعرف إحساسنا ودرجة انبهارنا بالمكان ممكن تتخيل إحساس تشارلي لما دخل مصنع ويلي ونكا للشوكولاتة. كنا متحمسين لتجربة كل حاجة عندهم، فطلبنا وافل شوكولاتة بالنوتيلا (24 جنيه)، وافل سادة وعليه نوتيلا (24 جنيه)، تارت بلح بصوص النوتيلا (25 جنيه) و"نوتيلا إنجيكشن"، ودي عبارة عن اختراع عبقري من نوتيليريا لأكل النوتيلا عن طريق سرنجة (10 جنيه). بعض الحاجات في المنيو لسه مش موجودة لأن المكان في فترة الإعداد، بس الأكيد أن كل اختياراتنا كانت هائلة، الوافلز كانت هائلة، طرية ومقرمشة في نفس الوقت، وخفيفة وسهلة المضغ برضه، ومسك الختام كان طعم النوتيلا الرائع. قاعدة تارت البلح كانت مقرمشة وعملت تجانس ممتاز مع البلح الطري وصوص النوتيلا الغني. آخر الاختراعات معانا كانت النوتيلا إنجيكشن المكونة من عجينة نوتيلا بالبندق، ودي تعتبر فكرة بديلة هايلة لأكل النوتيلا بالملعقة. بعد ما خلصنا مهرجان النوتيلا، فريق العمل الرائع قدموا لنا شاي فيوري، وهو عبارة عن شاي معمول من زهرة ناشفة في مياه ساخنة، المكان كله كان مليان بالرائحة القوية العطرية للشاي اللي بـ يُقدم معاه ريحان. نوتيليريا كمان بـ يقدموا تشكيلة كبيرة من التشيز كيك، والتارت، والآيس كريم، وبعد زيارتنا الأولى، مش هـ نقدر نستنى علشان نروح ثاني ونجربهم، المهم دلوقت أن تجربتنا معاهم كانت هائلة، مافيش حاجة معينة ممكن ننتقد فيها نوتيليريا، وإحنا باعتبارنا من جمهورهم كنا مبسوطين من شغلهم وجودتهم العالية، نتمنى يحافظوا على مستواهم.

...

كافيه سوبريم: فرع كايرو فيستيفال سيتي أقل من المتوقع
اصدرت في: 15/06/2015

من أكبر المشاكل اللي بـ تواجه كثير من المطاعم والكافيهات كل ما بـ تزيد فروعهم هي الاحتفاظ بمستوى ثابت، سواء كان الموضوع له علاقة بجودة الأكل والمشروبات أو الخدمة بشكل عام، بعد ما جربنا عدد من فروع كافيه سوبريم، قررنا نروح من غير تردد لفرع جديد من فروعهم، وفيه قابلتنا المشكلة اللي تكلمنا عليها دي بالضبط. كافيه سوبريم بإطلالته على النافورة الراقصة الشهيرة في كايرو فيستيفال سيتي بـ يقدم قعدتين تحفة خارج وداخل المكان. لما روحنا كانت القعدة بره زحمة جدًا، فـ قررنا نختار ترابيزة داخل المكان. إضاءة الكافيه/ المطعم كانت خافتة بتصميمات مودرن وأثاث عادي جدًا، شكل تقليدي للمكان. بعد وقت بسيط وصل الجرسون ومعاه منيوهات بـ تعرض أطباق سوبريم الشهيرة منها سلاطات، مكرونة، بيتزا، أطباق فراخ، لحوم وساندويتشات. أول حاجة طلبنا شيشتين، واحدة بنكهة الفانيليا وجوز الهند وواحدة بنكهة الفراولة (40 جنيه للواحدة)، وبالنسبة للأطباق طلبنا تشيكن كريسبرز (45 جنيه) وسوبر سلامي بيتزا (45 جنيه). طبعًا الشيشة وصلت قبل الأكل، وطبعًا برضه شيشة كافيه سوبريم معروفة بخفتها ونكهتها المميزة، بس المشكلة كانت مع الاستمرار في تغيير الولعة. التشيكن كرسيبرز وصل قبل البيتزا بعشر دقائق ومعاه صوص Honey Mustard، الطبق كان ضعيف والفراخ مافيش فيها رائحة القرمشة أو أي طعم مميز، حتى البيتزا اللي وصلت متأخر ما قدرتش تعوض الكريسبرز ومافيش فيها أي ابتكار في الطعم، خصوصًا أن العجينة مش غنية زي ما هو متعارف عليه، والموتزاريلا كانت قليلة جدًا، أما الإضافات فكانت سلامي وفلفل أخضر موزعين علي البيتزا. عمومًا، الفرع ده تحديدًا من كافيه سوبريم كان بعيد خالص عن المستوى المميز المعروف عن باقي فروعه، نقطة أخيرة لازم نتكلم عن الجرسونات الودودين وخدمتهم المميزة طوال وقت زيارتنا.

...

هاجن داز: عالم الآيس كريم في كايرو فيستيفال سيتي
اصدرت في: 04/03/2015

صيف القاهرة أكيد لا يحتمل، ومافيش علاج ينقذنا من الحرارة الرهيبة غير الاختراع المنعش اللذيذ اللي اسمه "آيس كريم". في الشهور الباردة –وده وقت كتابة المقال– بـ يكون الإغراء زي الصيف بالضبط، إن لم يكن أكثر. واحد من الأماكن اللي بـ تقدم المثلجات اللذيذة هو "هاجن داز - Häagen-Dazs"، الاسم العالمي واجه حظ الغريب في القاهرة –بعد ما قفل عدد من فروعه– لكن فرع كايرو فيستيفال سيتي في القاهرة الجديدة دائمًا بـ يزوره عدد كبير من عشاق الآيس كريم. هاجن داز المصمم على طراز الكافيهات يحتل مكان صغير، بإضاءة معتمة باللون النبيتي الغامق المزين للحوائط وثلاجة كبيرة لعرض نكهات الآيس كريم المتنوعة والحلويات، أماكن القعدة تعتبر محدودة جدًا وكانت شبه مليانة وقت زيارتنا. رحب بنا موظف لطيف وأصر أننا نجرب عدد من النكهات قبل ما نأخذ أي قرار، من غير كسوف، وافقنا على طلبه، نكهة التوت الأحمر كانت مززة بشكل لذيذ، خفيفة وواضح أن التوت طازج رغم أنه مسكّر شوية زيادة، أما الشوكولاتة بالبندق والكراميل فكانت تحفة فنية، وإضافة الكراميل لنكهة الشوكولاتة بالبندق أضافت كثير للطعم بشكل عام. الشوكولاتة البلجيكي طعمها روعة زي اسمها، بـ تقدم الطعم القوي المميز للشوكولاتة البلجيكي الغامقة عالية الجودة. أخيرًا، استقرينا على بولة من بسكويت الكراميل والكريمة Caramel Biscuit and Cream وواحدة ثانية من ميدنايت كوكي والكريمة Midnight Cookie and Cream بـ (18 جنيه للبولة) في 2 كونو طازجين من بسكويت الوافل (4 جنيه للكونو)؛ المهم هنا أن الاثنين كانوا حلوين. الأول كان خفيف لكن غني بقطع بسكويت مقرمشة مستخبية وسط طبقات الكريمة اللذيذة والأخير كان طعم الشوكولاتة فيه لا يقاوم. هاجن داز بـ يقدم اختيارات ثانية من الحلويات تشمل مافنز، كوكيز، كيكات، تارت، فطائر، كريب ووافلز، وطبعًا كل ده مع ابتكاراتهم من نكهات الآيس كريم. لفت انتباهنا تشيز كيك بلوبيري شكلها لذيذ (22 جنيه) مع كوكيز كبيرة مزدوجة بشرائح الشوكولاتة (13 جنيه). مجمل الموضوع؛ هاجن داز يستحق العلامة الكاملة، والفضل يرجع لاستخدامه مكونات جودتها عالية بشكل ملحوظ، بجانب فريق العمل الهائل اللي بـ يحاول بكل قوته يقدم لك أحسن تجربة ممكنة طوال وقت زيارتك، إحنا معاك، الأسعار أغلى شوية من باقي محلات الآيس كريم، لكن فيه حاجات في الحياة تستحق تدفع قرش أو قرشين زيادة.

...

كوبرميلت: حلويات وكيكات عالية الجودة من حلوانى القاهرة الجديدة المميز
اصدرت في: 04/01/2015

كل ما الجو يبرَّد أكثر، الاشتياق للأكلات اللذيذة بـ يزيد؛ دى حقيقة علمية معملية! الشتاء فى الحقيقة بـ يقدر يحولنا لمهاويس بالسكريات. من حسن الحظ أن مصر بينها وبين الحلويات قصة حب طويلة، وكل يوم بـ يظهر فيها مكان جديد. واحد من الأماكن الجديدة هو "كوبرميلت - Coppermelt" اللى بـ يقدم نفسه ككافيه ومطعم، والوصف ده صراحة بـ يبخس حق حلوياته ومخبوزاته الرائعة. مكانه غريب إلى حدٍ ما قريب من شارع التسعين الشهير. كوبرميلت بـ يقدم طابع وأجواء أوربية معاصرة، شكل المكان كان أنيق، بدرجات ألوان من الرمادى وتصميم كوبرميلت البارز والمكان نفسه مميز ومنظم بشكل هائل. رحب بنا موظف لطيف عرفّنا بحلوياتهم الساحرة، وعمل لنا جولة سريعة فى المكان، بدأنا مع جانب الحلويات، وفيه شوفنا كيكات رائعة (165: 175 جنيه) أبرزهم كيكة البلوبيرى–ليتشى بشكلها المبهر. بعدها شوفنا عرض الكيك بايتس الملوّنة (6.5 جنيه للقطعة) وقدم الموظف قطعة لكل واحد مننا علشان نجرّبها؛ الريد فيلفيت والشوكولاتة بزبدة الفول السودانى كانوا من كوكب ثانى، وبـ يذوبوا فى ثوانى بطعمهم اللذيذ. شوفنا كمان عرض لكيكات المرينجي بنكهات متنوعة، كوكيز (3: 17 جنيه للقطعة)، براونيز (12 جنيه للقطعة) وديرت كيكس مغلفة (25 جنيه)، مع حلويات شرقية (150 جنيه للكيلو). اكتشفنا كمان ابتكار ثاني وهو مهلبية بالبلوبيرى (19 جنيه). نروح على حاجات حادقة، وفى الجزئية دى كوبرميلت بـ يقدم مجموعة من الساندويتشات والبيجلز محشية سلامون، فراخ، روست بيف وحاجات ثانية (20: 25 جنيه)، شوفنا كمان مينى بيتزا وعيش بكل الألوان، والأشكال والأحجام. بعد جولتنا، وصلنا للأسف لمرحلة اختيار قطع محدودة، بعد تفكير عميق، طلبنا شوية كوكيز ريد فيلفيت (8 جنيه للقطعة)، شوية براونيز شوكولاتة، قطعة كيك ريد فيلفيت أسفنجية (8 جنيه) وديرت كيك فانيليا (25 جنيه)، وفى ثوانى كانوا معبئين فى علب صغيرة شيك. صعب نقول أن الحلويات كانت خارقة للعادة؛ الكوكيز كانت صعبة المضغ، سكّرها قليل ومليانة قطع شوكولاتة بيضاء، أما البراونيز برضه كانت متوسطة، لكن الفكرة كانت خفتّهم رغم وجود قطع شوكولاتة داكنة. كمان، الديرت كيك كانت دسمة شوية وطعمها لذيذ، وكيك الريد فيلفيت الأسفنجية كانت رائعة رغم أنها محتاجة نوع من النكهة، ويمكن السبب عدم وجود أى Icing. احتمال كبير نقضى الشتاء مع كوبرميلت، مع عرض الحلويات المنظّم، الخدمة الرائعة والحلويات اللذيذة، كوبرميلت أكيد إضافة مميزة للقاهرة الجديدة.

...

توماس باتيسيرى: حلويات وكيكات فى القاهرة الجديدة
اصدرت في: 02/12/2014

بعد ما قدر يصنع لنفسه سمعة فى سوق الحلويات المصرية، ما فيش شك أن "توماس باتيسيرى - Thomas Patisserie" من الأسماء المعروفة. أحدث فروعهم فى القاهرة الجديدة لسه جديد وفى أحسن حال، ومن منطلق إدماننا للحلويات، قررنا نعمل لهم زيارة للاستمتاع بجرعة من السكريات اللذيذة. فى مكان غريب شوية من القاهرة الجديدة، تحديدًا عند الميديكال بارك، توماس يحتل مساحة واسعة من غير أى أماكن للقعدة؛ توماس من أماكن الحلوى اللى بـ تروح لهم فى حالة طلبك لحلويات تيك أوت. شكل المحل يميل للديكورات الغامقة الأنيقة اللى يطغى عليها درجات الأسود، وهى محاولة واضحة لعمل تصميم راقى وفخم. بالنسبة للجو العام فكان مبالغ فيه شوية والموضوع كان أقرب للبهرجة عنه للأناقة. توماس بـ يقدم مجموعة متنوعة من الحلويات، مقسمة لنوعين رئيسيين: حلويات غربية وشرقية. بعد نظرة سريعة على كل الحلويات الموجودة وقت زيارتنا، كان لازم نلاحظ أن شكل الجاتوهات والكيكات أفضل بكثير من الحلويات الشرقية. على العموم، الحلويات الشرقية المعروضة كانت تشمل كثير من الحلويات المعروفة زى البسبوسة (40 جنيه -60 جنيه/ للكيلو)، كنافة، بقلاوة وحاجات ثانية كثير. ممكن كمان تعمل طبق يشمل الثلاثة بسعر (130 جنيه/ للكيلو). اتحركنا ناحية عرض مضئ بشكل أفضل للجاتوهات، التارت والكيكات لا يمكن يخطروا على بالك. من بين كيكات دائرية لطيفة على الطريقة الإنجليزية (70 جنيه)، لغاية كيكات شرقية للمناسبات (120 جنيه – 150 جنيه للحجم الصغير ومن 170 جنيه – 210 جنيه للأحجام الكبيرة) بكل الأحجام والنكهات والإضافات. كمان، الحلويات الفرنسية الشهيرة، المكارونز، كانت متوفرة بنكهات متنوعة (175 جنيه/ للكيلو). الجاتوه، بالحجم العادى (9 جنيه - 16 جنيه/ للقطعة) والسواريه (100 جنيه/ للكيلو)، كان متوفر وطلبنا منهم عدد بسيط. تقدر كمان تلاقى حوادق عند توماس، تشمل باتيهات، كرواسونات ومينى بيتزا (5.50 جنيه – 8 جنيه/ للقطعة). شوكولاتات فاخرة (175 جنيه/ للكيلو) كانت متوفرة وتعتبر هدية هائلة لأى مناسبة. قطع الجاتوه الخاصة بنا كانت مغلفة تمام فى علبة شكلها مبهج. قطعة الميلفي المغطاة بالسكر كانت خفيفة، وفى نفس الوقت غنية بالحشو، والعجينة كانت طازجة بشكل ممتاز. تارت المانجو كان برضه لذيذ وخفيف. جاتوه الشوكولاتة على الناحية الثانية، رغم أن طعمه كان مضبوط لكن ينقصه النكهة المميزة؛ الطعم العادى لا يجوز فى أى حلويات شوكولاتة، ولا إيه؟ بشكل عام، توماس بـ يقدم تشكيلة جميلة من الحلويات لكل المناسبات. بعيدًا عن تصميماته السيئة وموقعه الغريب، لكنهم يمتازوا بالخدمة المرُضية، وموظفين رائعين. طعم الحلويات مش خرافى، لكن الجودة كانت ملحوظة.

...

كولد ستون كريمرى: آيس كريم روعة فى كايرو فيستيفال سيتى
اصدرت في: 16/09/2014

أنت شايف أن القاهرة بـ تعانى من نقص فى عدد محلات الآيس كريم؟! أكيد بـ تهزر. المشكلة الحقيقة هى نقص نكهات الآيس كريم الخالصة، بعيدًا عن النكهات الصناعية.كولد ستونقدر يقدم اللى فى دماغنا بالضبط؛ مثلجات لذيذة غنية بالطعم الرائع. من آخر كايرو فيستيفال سيتى شدتنا رائحة الوافل، ولا إراديًا حاجة سحبتنا لمصدر الرائحة الرائعة؛ مهيب الركن وصاحب عدد الزبائن المهول "كولد ستون كريمرى -Cold Stone Creamery".مع أعداد الناس المنتظرة فى الصف علشان يحددوا اختيارهم من الآيس كريم، كنا خلاص على وشك نلف ونرجع ثانى، لكن شكل أوعية الآيس كريم الضخمة بألوانها الرائعةشدتنا من جديد. بكل صبر انتظرنا فى الطابور وبدأنا نتفرج على المنيو الرائعة المعلقة على الحائط. محاولتنا لحجز ترابيزة وفى نفس الوقت الانتظار فى طابور الطلبات فشلت بكل المقاييس نتيجة لحجم المكان الصغير واللى مستحيل يستوعب كل العدد الموجود وقت زيارتنا. الحل الوحيد قصادنا هو الاستمتاع بالآيس كريم فى أى مكان ثانى. كولد ستون بـ يقدم أحجام مختلفة من الآيس كريم 'Like it' من 12: 29 جنيه، 'Love It' من 24: 35 جنيه، 'Gotta Have It' من 36: 46 جنيه، 'Mine' من 48: 69 جنيه و'Ours' من 80: 110 جنيه، و"ابتكاراتهم" أغلى شوية من البولات العادية. أول ما وصلنا عند ثلاجة الآيس كريم رحب بنا المسئول وعرض علينا نجرب النكهات مجانًا. جربنا كل أنواع النكهات قبل ما نستقر على Cake Batter، شوكولاتة داكنة، فستق وMystic، أول اثنين فى بسكويت والاثنين الباقيين فى كوب عادى. اختيارنا من قسم "الابتكارات" كان تشيز كيك فانتازى. وإحنا فى مرحلة الدفع، كان صعب نقاوم الانقضاض على الآيس كريم، ومع أول تجربة وقعنا فى حب كل النكهات. لو كنت واحد من الناس اللى بـ تحب تضرب معلقة فى الكيك وقت تحضيره، يبقىهـ تشوف أن نكهة Cake Batter مالهاش حل. الشوكولاتة الداكنة كانت قوية، لكن سكرها مش زيادة كثير، يعنى من الآخر هايلة لكل مدمنى الشوكولاتة.نكهة الفستق كانت فستق بحق وحقيق، وواضح فيها طعم الفستق المحمص الطازج، أما نكهة Mystic، أو المستكة، كانت مسكرة وهشة بشكل لذيذ. نجم الشباك فى الواقع كان نكهة "تشيزكيك فانتازى"، الغنية بحشو فراولة وقطع بسكويت، طعمها فعلاً كان خرافى. إجمالاً، قدرنا نشبع اشتياقنا للآيس كريم من كل حاجة بـيقدمها كولد ستون.كل النكهات كانت ممتازة والموظفين هناك ودودين ويتميزوا بالسرعة. العيب الوحيد فى التجربة أن مافيش أى مكان فاضى بحيث نقدر نستمتع بالآيس كريم والسبب حجم المحل الصغير والزحام الشديد.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح