مخبوزات وحلويات كافيهات in القاهرة الجديدة Cairo, Egypt

كافيهات

زاكس بيكري أند كافيه: فطار بسيط ولذيذ في الرحاب
اصدرت في: 23/11/2015

مفيش أحلى ولا أجمل من رائحة مخبوزات لسه طالعة حالًا من الفرن مع شوية كابتشينو منعش، وهو ده كان سبب زيارتنا لـ "زاكس Zack's" في مدينة الرحاب الموجود داخل مطعم سمايليز تيك أواي – وهو مكان غريب شوية بس تمام – المكون من محل صغير فيه ست ترابيزات وكنب جلد وكراسي وأرفف عليها كتب قديمة وفي الخلفية مشغلين موسيقى جاز هادئة. اتفرجنا على المنيو وكلنا شوق نجرب مخبوزاتهم الطازجة، وفيها شوفنا مجموعة من الحاجات الموجودة في أي مخبز زي ساندوتشات وعيش وكيكات وفطائر وكوكيز. لفت انتباهنا إن في حاجات عند زاكس – خصوصًا الكرواسونات - مش موجودة في المنيو. بدأنا اليوم مع ساندوتش تونة في عيش بني ومعاه شوية رقائق مملحة (23 جنيه). العيش البني الخفيف بطعمه اللذيذ كان فيه التونة ومعاها خضروات، والرقائق المملحة كانت إضافة هايلة للطبق. نروح على حلويات زاكس المتنوعة اللي تشمل براونيز وفطائر وكوكيز وطلبنا منهم شوكليت بسكيت كيكchocolate biscuit cake المميز بيها زاكس (18 جنيه). الكيك كان عبارة عن قطع صغيرة من البسكويت المخلوط مع الشوكولاتة متغطيين بطبقة صحيح كانت رقيقة بس غنية بالشوكولاتة. مسك الختام كان مع الآيس لاتيه (24 جنيه) وهارت بيت كوكتيل Heart Beet cocktail بـ 25 جنيه – عبارة عن خليط من الفاكهة والخضروات – وطبعًا عندهم عدد كبير من المشروبات الصحّية المنعشة. الكوكتيل كان من عالم ثاني، خليط مبهر من الكرنب ونصف ليمونة ونصف برتقالة وتفاح أخضر فعلًا يستحق العلامة الكاملة بطعمه اللذيذ الرائع – ودي كانت نهاية رائعة لفطار مميز. جايز موقع زاكس يكون غريب شوية، بس مع الأكل والموسيقى والأسعار المعقولة والموظفين المميزين أكيد تجربتنا معاهم كانت هائلة.

...

نوتيلاريا إيجيبت: أول محل نوتيلا يحقق توقعاتنا ويتجاوزها كمان في بورتو كايرو مول
اصدرت في: 19/08/2015

في يوم من الأيام، واحد من الناس هـ يحكي إزاي وقع العالم في غرام اختراع عبارة عن معجون شوكولاتة بالبندق اللي طلع من مدينة صغيرة في إيطاليا، أيوه بالضبط، إحنا النهارده بـ نتكلم على ظاهرة النوتيلا اللي زلزلت العالم. مصر من أكثر الدول اللي أهلها بـ يموتوا في الحاجات الحلوة، وافتتاح نوتيليريا في بورتو كايرو مول من غير مجاملة كان من أهم الأحداث بالنسبة لعشاق النوتيلا في مصر. مع الرائحة الطازجة للحلويات المعمولة بالشوكولاتة في كل المكان، أكيد هـ توصل لمكان نوتيلاريا في بورتو كايرو مول، الديكورات هناك على شكل برطمانات نوتيلا بأحجام متنوعة –تشمل برطمانات عملاقة– ونافورة شوكولاتة كبيرة، ولو عاوز تعرف إحساسنا ودرجة انبهارنا بالمكان ممكن تتخيل إحساس تشارلي لما دخل مصنع ويلي ونكا للشوكولاتة. كنا متحمسين لتجربة كل حاجة عندهم، فطلبنا وافل شوكولاتة بالنوتيلا (24 جنيه)، وافل سادة وعليه نوتيلا (24 جنيه)، تارت بلح بصوص النوتيلا (25 جنيه) و"نوتيلا إنجيكشن"، ودي عبارة عن اختراع عبقري من نوتيليريا لأكل النوتيلا عن طريق سرنجة (10 جنيه). بعض الحاجات في المنيو لسه مش موجودة لأن المكان في فترة الإعداد، بس الأكيد أن كل اختياراتنا كانت هائلة، الوافلز كانت هائلة، طرية ومقرمشة في نفس الوقت، وخفيفة وسهلة المضغ برضه، ومسك الختام كان طعم النوتيلا الرائع. قاعدة تارت البلح كانت مقرمشة وعملت تجانس ممتاز مع البلح الطري وصوص النوتيلا الغني. آخر الاختراعات معانا كانت النوتيلا إنجيكشن المكونة من عجينة نوتيلا بالبندق، ودي تعتبر فكرة بديلة هايلة لأكل النوتيلا بالملعقة. بعد ما خلصنا مهرجان النوتيلا، فريق العمل الرائع قدموا لنا شاي فيوري، وهو عبارة عن شاي معمول من زهرة ناشفة في مياه ساخنة، المكان كله كان مليان بالرائحة القوية العطرية للشاي اللي بـ يُقدم معاه ريحان. نوتيليريا كمان بـ يقدموا تشكيلة كبيرة من التشيز كيك، والتارت، والآيس كريم، وبعد زيارتنا الأولى، مش هـ نقدر نستنى علشان نروح ثاني ونجربهم، المهم دلوقت أن تجربتنا معاهم كانت هائلة، مافيش حاجة معينة ممكن ننتقد فيها نوتيليريا، وإحنا باعتبارنا من جمهورهم كنا مبسوطين من شغلهم وجودتهم العالية، نتمنى يحافظوا على مستواهم.

...

هاجن داز: عالم الآيس كريم في كايرو فيستيفال سيتي
اصدرت في: 04/03/2015

صيف القاهرة أكيد لا يحتمل، ومافيش علاج ينقذنا من الحرارة الرهيبة غير الاختراع المنعش اللذيذ اللي اسمه "آيس كريم". في الشهور الباردة –وده وقت كتابة المقال– بـ يكون الإغراء زي الصيف بالضبط، إن لم يكن أكثر. واحد من الأماكن اللي بـ تقدم المثلجات اللذيذة هو "هاجن داز - Häagen-Dazs"، الاسم العالمي واجه حظ الغريب في القاهرة –بعد ما قفل عدد من فروعه– لكن فرع كايرو فيستيفال سيتي في القاهرة الجديدة دائمًا بـ يزوره عدد كبير من عشاق الآيس كريم. هاجن داز المصمم على طراز الكافيهات يحتل مكان صغير، بإضاءة معتمة باللون النبيتي الغامق المزين للحوائط وثلاجة كبيرة لعرض نكهات الآيس كريم المتنوعة والحلويات، أماكن القعدة تعتبر محدودة جدًا وكانت شبه مليانة وقت زيارتنا. رحب بنا موظف لطيف وأصر أننا نجرب عدد من النكهات قبل ما نأخذ أي قرار، من غير كسوف، وافقنا على طلبه، نكهة التوت الأحمر كانت مززة بشكل لذيذ، خفيفة وواضح أن التوت طازج رغم أنه مسكّر شوية زيادة، أما الشوكولاتة بالبندق والكراميل فكانت تحفة فنية، وإضافة الكراميل لنكهة الشوكولاتة بالبندق أضافت كثير للطعم بشكل عام. الشوكولاتة البلجيكي طعمها روعة زي اسمها، بـ تقدم الطعم القوي المميز للشوكولاتة البلجيكي الغامقة عالية الجودة. أخيرًا، استقرينا على بولة من بسكويت الكراميل والكريمة Caramel Biscuit and Cream وواحدة ثانية من ميدنايت كوكي والكريمة Midnight Cookie and Cream بـ (18 جنيه للبولة) في 2 كونو طازجين من بسكويت الوافل (4 جنيه للكونو)؛ المهم هنا أن الاثنين كانوا حلوين. الأول كان خفيف لكن غني بقطع بسكويت مقرمشة مستخبية وسط طبقات الكريمة اللذيذة والأخير كان طعم الشوكولاتة فيه لا يقاوم. هاجن داز بـ يقدم اختيارات ثانية من الحلويات تشمل مافنز، كوكيز، كيكات، تارت، فطائر، كريب ووافلز، وطبعًا كل ده مع ابتكاراتهم من نكهات الآيس كريم. لفت انتباهنا تشيز كيك بلوبيري شكلها لذيذ (22 جنيه) مع كوكيز كبيرة مزدوجة بشرائح الشوكولاتة (13 جنيه). مجمل الموضوع؛ هاجن داز يستحق العلامة الكاملة، والفضل يرجع لاستخدامه مكونات جودتها عالية بشكل ملحوظ، بجانب فريق العمل الهائل اللي بـ يحاول بكل قوته يقدم لك أحسن تجربة ممكنة طوال وقت زيارتك، إحنا معاك، الأسعار أغلى شوية من باقي محلات الآيس كريم، لكن فيه حاجات في الحياة تستحق تدفع قرش أو قرشين زيادة.

...

كوبرميلت: حلويات وكيكات عالية الجودة من حلوانى القاهرة الجديدة المميز
اصدرت في: 04/01/2015

كل ما الجو يبرَّد أكثر، الاشتياق للأكلات اللذيذة بـ يزيد؛ دى حقيقة علمية معملية! الشتاء فى الحقيقة بـ يقدر يحولنا لمهاويس بالسكريات. من حسن الحظ أن مصر بينها وبين الحلويات قصة حب طويلة، وكل يوم بـ يظهر فيها مكان جديد. واحد من الأماكن الجديدة هو "كوبرميلت - Coppermelt" اللى بـ يقدم نفسه ككافيه ومطعم، والوصف ده صراحة بـ يبخس حق حلوياته ومخبوزاته الرائعة. مكانه غريب إلى حدٍ ما قريب من شارع التسعين الشهير. كوبرميلت بـ يقدم طابع وأجواء أوربية معاصرة، شكل المكان كان أنيق، بدرجات ألوان من الرمادى وتصميم كوبرميلت البارز والمكان نفسه مميز ومنظم بشكل هائل. رحب بنا موظف لطيف عرفّنا بحلوياتهم الساحرة، وعمل لنا جولة سريعة فى المكان، بدأنا مع جانب الحلويات، وفيه شوفنا كيكات رائعة (165: 175 جنيه) أبرزهم كيكة البلوبيرى–ليتشى بشكلها المبهر. بعدها شوفنا عرض الكيك بايتس الملوّنة (6.5 جنيه للقطعة) وقدم الموظف قطعة لكل واحد مننا علشان نجرّبها؛ الريد فيلفيت والشوكولاتة بزبدة الفول السودانى كانوا من كوكب ثانى، وبـ يذوبوا فى ثوانى بطعمهم اللذيذ. شوفنا كمان عرض لكيكات المرينجي بنكهات متنوعة، كوكيز (3: 17 جنيه للقطعة)، براونيز (12 جنيه للقطعة) وديرت كيكس مغلفة (25 جنيه)، مع حلويات شرقية (150 جنيه للكيلو). اكتشفنا كمان ابتكار ثاني وهو مهلبية بالبلوبيرى (19 جنيه). نروح على حاجات حادقة، وفى الجزئية دى كوبرميلت بـ يقدم مجموعة من الساندويتشات والبيجلز محشية سلامون، فراخ، روست بيف وحاجات ثانية (20: 25 جنيه)، شوفنا كمان مينى بيتزا وعيش بكل الألوان، والأشكال والأحجام. بعد جولتنا، وصلنا للأسف لمرحلة اختيار قطع محدودة، بعد تفكير عميق، طلبنا شوية كوكيز ريد فيلفيت (8 جنيه للقطعة)، شوية براونيز شوكولاتة، قطعة كيك ريد فيلفيت أسفنجية (8 جنيه) وديرت كيك فانيليا (25 جنيه)، وفى ثوانى كانوا معبئين فى علب صغيرة شيك. صعب نقول أن الحلويات كانت خارقة للعادة؛ الكوكيز كانت صعبة المضغ، سكّرها قليل ومليانة قطع شوكولاتة بيضاء، أما البراونيز برضه كانت متوسطة، لكن الفكرة كانت خفتّهم رغم وجود قطع شوكولاتة داكنة. كمان، الديرت كيك كانت دسمة شوية وطعمها لذيذ، وكيك الريد فيلفيت الأسفنجية كانت رائعة رغم أنها محتاجة نوع من النكهة، ويمكن السبب عدم وجود أى Icing. احتمال كبير نقضى الشتاء مع كوبرميلت، مع عرض الحلويات المنظّم، الخدمة الرائعة والحلويات اللذيذة، كوبرميلت أكيد إضافة مميزة للقاهرة الجديدة.

...

توماس باتيسيرى: حلويات وكيكات فى القاهرة الجديدة
اصدرت في: 02/12/2014

بعد ما قدر يصنع لنفسه سمعة فى سوق الحلويات المصرية، ما فيش شك أن "توماس باتيسيرى - Thomas Patisserie" من الأسماء المعروفة. أحدث فروعهم فى القاهرة الجديدة لسه جديد وفى أحسن حال، ومن منطلق إدماننا للحلويات، قررنا نعمل لهم زيارة للاستمتاع بجرعة من السكريات اللذيذة. فى مكان غريب شوية من القاهرة الجديدة، تحديدًا عند الميديكال بارك، توماس يحتل مساحة واسعة من غير أى أماكن للقعدة؛ توماس من أماكن الحلوى اللى بـ تروح لهم فى حالة طلبك لحلويات تيك أوت. شكل المحل يميل للديكورات الغامقة الأنيقة اللى يطغى عليها درجات الأسود، وهى محاولة واضحة لعمل تصميم راقى وفخم. بالنسبة للجو العام فكان مبالغ فيه شوية والموضوع كان أقرب للبهرجة عنه للأناقة. توماس بـ يقدم مجموعة متنوعة من الحلويات، مقسمة لنوعين رئيسيين: حلويات غربية وشرقية. بعد نظرة سريعة على كل الحلويات الموجودة وقت زيارتنا، كان لازم نلاحظ أن شكل الجاتوهات والكيكات أفضل بكثير من الحلويات الشرقية. على العموم، الحلويات الشرقية المعروضة كانت تشمل كثير من الحلويات المعروفة زى البسبوسة (40 جنيه -60 جنيه/ للكيلو)، كنافة، بقلاوة وحاجات ثانية كثير. ممكن كمان تعمل طبق يشمل الثلاثة بسعر (130 جنيه/ للكيلو). اتحركنا ناحية عرض مضئ بشكل أفضل للجاتوهات، التارت والكيكات لا يمكن يخطروا على بالك. من بين كيكات دائرية لطيفة على الطريقة الإنجليزية (70 جنيه)، لغاية كيكات شرقية للمناسبات (120 جنيه – 150 جنيه للحجم الصغير ومن 170 جنيه – 210 جنيه للأحجام الكبيرة) بكل الأحجام والنكهات والإضافات. كمان، الحلويات الفرنسية الشهيرة، المكارونز، كانت متوفرة بنكهات متنوعة (175 جنيه/ للكيلو). الجاتوه، بالحجم العادى (9 جنيه - 16 جنيه/ للقطعة) والسواريه (100 جنيه/ للكيلو)، كان متوفر وطلبنا منهم عدد بسيط. تقدر كمان تلاقى حوادق عند توماس، تشمل باتيهات، كرواسونات ومينى بيتزا (5.50 جنيه – 8 جنيه/ للقطعة). شوكولاتات فاخرة (175 جنيه/ للكيلو) كانت متوفرة وتعتبر هدية هائلة لأى مناسبة. قطع الجاتوه الخاصة بنا كانت مغلفة تمام فى علبة شكلها مبهج. قطعة الميلفي المغطاة بالسكر كانت خفيفة، وفى نفس الوقت غنية بالحشو، والعجينة كانت طازجة بشكل ممتاز. تارت المانجو كان برضه لذيذ وخفيف. جاتوه الشوكولاتة على الناحية الثانية، رغم أن طعمه كان مضبوط لكن ينقصه النكهة المميزة؛ الطعم العادى لا يجوز فى أى حلويات شوكولاتة، ولا إيه؟ بشكل عام، توماس بـ يقدم تشكيلة جميلة من الحلويات لكل المناسبات. بعيدًا عن تصميماته السيئة وموقعه الغريب، لكنهم يمتازوا بالخدمة المرُضية، وموظفين رائعين. طعم الحلويات مش خرافى، لكن الجودة كانت ملحوظة.

...

ليه دام: حلويات لذيذة فى مول داون تاون القطامية، القاهرة الجديدة
اصدرت في: 04/02/2014

للاستفادة من عشق المصريين للحلويات بـ نشوف كل يوم محلات حلويات وكافيهات جديدة فى القاهرة، وعلشان يخدموا الناس البعيدة عن قلب المدينة، الحلوانى الشهير "ليه دام-Les Dames" حجز لنفسه مكان فى مول داون تاون القطامية فى القاهرة الجديدة سريعة النمو. المكان يشد الانتباه بواجهته الزجاجية،والشعارات التركواز وعرض الكيكات الكبير. مافيش أماكن جلوس، والاختيارات المتاحة هى التيك أواى أو خدمة التوصيل، لكن الغريب فى الموضوع كان عدم وجود منيو للطلبات عن طريق التليفون. رغم أن حاويات العرض الزجاج الموجودة فى الأول كانت مليانة على الآخر، شوية منهم كانوا فاضيين تمامًا، وده سبب إحساس شوية بوجود نوع من الفراغ فى المكان. الأسعار تحدد حسب الوزن، من بين تشكيلة المحل العريضة من الحلويات الشرقية، أقراص الماكرونز، كب كيكس جميلة، بيتى فور وبسكويت، وكمان أنواع من الشوكولاتة. شوفنا طبق حلويات شرقية جاهز سعره 150جنيه، كيكات كبيرة جذابة (+150جنيه/ للواحدة) ومعجنات صغيرة شكلها لذيذ (10جنيه/ للقطعة). مجموعة بسيطة من الحوادق كانت برضه معروضة، وكمان عدد محدود من كرواسونات الإفطار ملفوفة فى غلاف بلاستيك. رغم استقبالهم الفاتر شوية فى البداية، العدد الكبير من الموظفين كانوا ودودين ومفيدين، ولبسوا جوانتيات قبل ما يلمسوا أى من اختياراتنا. طلبنا مجموعة من البيتى فور مع البسكويت (27جنيه/ 300جرام)، طبق بسبوسة (18جنيه/ 400جرام) واختارنا نوعين من المعجنات، واحدة منهم بالشوكولاتة والبندق، وواحدة بسكويت كبير بمربى المشمش (10جنيه/ الواحدة). بالنسبة للكيكات المخصوصة بـ يتم طلبها مقدمًا. البسبوسة كانت متماسكة ولذيذة، مع قرمشة خفيفة، بسبوسة كما يجب أن تكون. قطعة جاتوه الشوكولاتة والبندق كانت استثنائية، مع صوص الشوكولاتة الغنى من الخارج والقوام الأسفنجى الطرى من الداخل. البسكويت العملاق كان برضه شهى بكمية مربى كبيرة من الداخل وطبقة السكر الوفيرة على الوجه. مع مئات من قطع البيتى فور على اختلافها، كانت مفاجأة أن كل قطعة كانت لذيذة وجذابة زى الثانية. الشرائح الأسفنجية متعددة الألوان كانت من أكثرهم روعة، مع رشة من المرزبانية والشوكولاتة اللذيذة. شكوتنا الوحيدة من الكيك بوبس الدائرية المحاطة بالشوكولاتة كانت أنها جافة شوية من الداخل، بس تفضل رائحتها روعة مافيش كلام. رغم الإحساس أن المحل فاضى شوية، المجموعة الكبيرة المبتكرة من الحلويات أكيد يقدروا يشبعوا أى جوع، مع تقديمهم فى علب جذابة، أو توصيلهم مباشرة لغاية باب بيتك.

...

فانيلا بينز: محل كب كيكس فى مول داون تاون القاهرة الجديدة
اصدرت في: 03/09/2013

من بداية ثورة الكب كيكس فى مصر، واضح أن المنافسة بدأت بين مين يقدر يطلع أكثر محل مشع بالألوان والديكورات علشان يعرض إبداعاته. "فانيلا بينز - Vanilla Beans" فى مول داون تاون القطامية أكيد مش مختلف عن القاعدة، بألوانه الظريفة اللى بـ تزين المحل الصغير. صحيح أن روشنة المحل علشان يبقى الأفضل مش مشكلة، لكن حسينا بضيق شوية من وجود محل ثانى من محلات الكيكات فتح فى القاهرة. شباك العرض المنظم بـ يعرض مجموعة من كيكات لكل المناسبات، مجهزة مخصوص لزبائن، وفعلاً صعب تتجاهله. من الواضح أن طول المحل أكبر من عرضه، وده باين من أماكن القعدة المكونة من كام ترابيزة مصفوفين على الجوانب، بكراسى عالية للجلوس. عرضهم عبارة عن دواليب بزجاج متحرك بجانب الكابينة الرئيسية، معروض فيهم مجموعة مبهرة من الكب كيكس، براونيز (15 جنيه)، كوكيز (12 جنيه)، مصاصات كيك (12 جنيه) مع تارت كبير للمشاركة (+100 جنيه). المشكلة كانت فى وجود جزء مكسور فى كابينة منهم، وده خلانا نسأل نفسنا هل المنتجات دى طازجة ولّا إيه الكلام! الكب كيكس حجمين، حجم عادى (15 جنيه) وحجم صغير (4.50 جنيه)، أما أسعار الكيكات الأكبر بـ تُحدد على حسب الحجم. الكيكات المخصوصة لازم تطلبها على الأقل قبلها بيومين، ونفس الكلام بالنسبة للفوندو. علبهم الملفتة للانتباه الخاصة بالكب كيكس ممكن تشيل لغاية 5 قطع من الحجم الصغير، أو 6 أو 12 من الحجم العادى. بجانب النكهات المسكرة المعروفة، فانيلّا بينز قدر يميز نفسه بأنواع غير عادية من الفواكة؛ البلوبيرى والتوت الأحمر على وجه الخصوص أخذونا لكوكب ثانى. الاثنين كانوا فعلاً طعم ونكهة ما حصلتش، ورغم أن الكيكة الأسفنجية كانت صغيرة شوية، كل منهم عليه كمية كبيرة من الجبن الدسم المتجمد. كب كيك الجزر اللذيذ مع قشطة مجمدة خطفت الأضواء، مع اختراعهم اللذيذ، كيكة ريد فيلفت. طبعًا أساسى جربنا النوعين المعتادين من الكب كيك، أوريو وتويكس (15 جنيه للواحدة)، ورغم أن كل جزء فيهم بـ تعبر عن طعم الشوكلاتة اللذيذ بقوامها اللزج زى ما تخيلناه، كان واضح أن مافيش حاجة زيادة عن الطبيعى. كان صعب نقاوم فانيلّا كيك بوب (12 جنيه) برضه اللى غالبًا كانت أطعم من كل الكب كيكس مجتمعين. يغطيها طبقة ناشفة مقرمشة غلفت طبقة الفانيليا الخفيفة بامتياز؛ خلى بالك، الكيكة دى بالذات ما يقدرش عليها إلا عاشق للحلويات. فانيلّا بينز بـ يخطو خطوات ثابتة فى عالم الكب كيكس، وخطته قائمة على إضافة نكهات جديدة للمنيو وتوفير الحلويات المحبوبة أقرب وأقرب للقاهرة الجديدة.

...

دينا كانتينا: كب كيك وحلويات غربية في التجمع الخامس
اصدرت في: 22/05/2013

كان آخر حاجة نتوقعها في الكام سنة الأخيرة أننا نشوف في القاهرة منافسة شديدة بين محلات الكب كيك وتفنن كل منها في تقديم مذاقات وأشكال مختلفة لمنتجاتها، عمل عروض وأسعار تنافسية بهدف خلق شعبية للمكان، شعبية للـ "كب كيك"! غريبة مش كدة؟ لكن في النهاية دي حاجة كويسة وما عندناش مانع نشوف كل حاجة جديدة في القاهرة ونكتب عنها ونشجع الناس أنها تجربها، وإحنا ما ننكرش أننا من مدمنين الكب كيك وأي حلويات فيها شوكولاتة كثير وتوت أحمر. يعني بسهولة تقدروا تخمنوا إحنا إيه اللي جذبنا لمحل «دينا كانتينا – Dina Cantina». موجود داخل مول الداون تاون في التجمع الخامس في الدور الأرضي، محل رقيق بألوان وردية و Theme ظريف واخد من ألوان الحلويات اللي بـ يعرضها، ومساحتها من الداخل مش كبيرة، وفيه ثلاجات عرض للتورتات والكب كيكس وغيرها من الحلويات، المعاملة هنا ممتازة وراقية جدًا، خد راحتك وأنت بـ تتفرج وبـ تسأل عن كل حاجة معروضة وهـ تلاقي حد بـ يساعدك وبـ يشرح لك بمنتهى الصبر. واحدة الكب كيك هنا غالية شوية، أغلى من أي محل كب كيك تاني شوفناه في القاهرة، يعني لو هي بـ 15 جنيه في «نولا» أو «كرامز» هي هنا بـ 17.50 جنيه، بس ممكن تأخذ عبوة فيها 6 قطع أو 12 قطعة بأسعار أقل شوية "زي الجملة كدة" يعني مثلًا Box of 12 زي ما بـ يقولوا بـ يبقى بـ 155 جنيه، وطبعًا بـ تختار القطع اللي أنت عايزها من تشكيلة فيها أكثر من 40 نوع من الكب كيك. جربنا مذاقات مختلفة زي التوت والكريمة وزبدة الفول السوداني والتشيز كيك والمالتيزرس وطوفي الموز والـ m&m والقرفة. بس مافيش حاجة كانت بروعة الـ Chocolate Paragon وهي فعلًا الشكل النموذجي لكب كيك الشوكولاتة زي اسمها ما بـ يقول. قوام الشوكولاتة فيها ممتاز وسكرها مضبوط قوي، بعكس الكيت كات بالشوكولاتة البيضاء اللي كانت مسكرة بزيادة وماقدرناش نكملها. لكن في النهاية الكب كيكاية الواحدة هنا بـ تقوم بالواجب وهـ تشبعك جدًا لأنها غنية بالطعم والخامات وطازجة جدًا ودي أهم حاجة. بعيدًا عن الكب كيك «دينا كانتينا» بـ يعمل تورتات المناسبات اللي مطبوع عليها الصورة وبـ تتكلف من 240 لحد 400 جنيه، وبـ تتزين حسب رغبتك، والعينات اللي كانت في العرض كان شكلها مغري قوي وألوانها خطيرة، وهـ تحتاج تتصل بيهم أو تروح بنفسك علشان تحدد طلبك وتحجز قبلها بيومين أو يوم على الأقل. وفي الثلاجة كان فيه عدد من تورتات الآيس كريم (110 جنيه) وتورتات الشوكولاتة والبلاك فوريست (260 جنيه) وفيه مجموعة حلويات تانية مناسبة أكثر للأطفال زي الكوكيز (7 جنيه) وأنواع مختلفة من الكاندي والطوفي. حبينا الطعم ومن قبله شكل المحل في «دينا كانتينا» ومتوقعين له نجاح وانتشار أكبر في الفترة اللي جاية وأنه يبقى منافس قوي في ساحة الكب كيك في مصر.

...

بوتري كافيه: شيشة وبيتزا ومشروبات فريش في التجمع الخامس
اصدرت في: 29/01/2012

من الأسماء المألوفة جدًا في عالم الكافيهات، يعني لما تعد أهم 10 كافيهات في كايرو لازم «بوتري كافيه – Pottery café» يكون واحد منهم، ومن وقت للثاني محررين كايرو 360 بـ يكون لهم تجربة هناك في واحد من فروعهم المنتشرة في كل المناطق، وبـ ننقل لكم تجربتنا وملاحظتنا عن الفروق بين كل فرع والثاني، وكل مرة بـ نسجل إعجابنا بتفصيلة معينة خاصة بالمكان، اللي اتعودنا منه على مستوى جيد وموود معين. المرة دي كانت تجربتنا في فرع «بوتري كافيه» في التجمع الخامس، داخل مجمع الـ Meeting Point اللي في نهاية شارع التسعين أمام جامعة المستقبل. الكافيه داخل المبنى نفسه في الدور الأرضي، المدخل عبارة عن ممر طويل ضيق فيه ترابيزات تكفي لفردين على الناحية الشمال، وعلى اليمين الكاونتر الخاص بتحضير الطلبات. في نهاية الممر بـ تلاقي باب كأنه بـ يدخلك لعالم ثاني، مساحة مفتوحة كبيرة ومغطاة بالمشمع علشان الأمطار والرياح، ودي طبعًا غير مكيفة لأنها مخصصة للشيشة، وفيها 3 شاشات تليفزيون كبيرة والإضاءة قليلة والترابيزات بأحجام مختلفة وهـ تحس بصخب وزحام غريب وغير معتاد عمومًا في التجمع الخامس المشهور بالهدوء والروقان. يمكن دي تكون حاجة مميزة للمكان وبـ تخلي الناس تيجي هنا مخصوص علشان تستمتع بالدفء البشري ويغيروا الموود الهادئ للمنطقة المحيطة. ده طبعًا بفرض أن كل رواد المكان من سكان التجمع والقاهرة الجديدة. الديكور بسيط وألوانه غامقة لكن مريح نفسيًا، بس مش هـ تستحمل تقعد في الساحة الداخلية دي كثير لو كنت غير مدخن، غير كده الجو ظريف والقعدة حلوة والكراسي مريحة. المنيو تقليدي زي أي كافيه فيما يخص المشروبات: ساخنة وباردة وفرابيه وسموزي، الأسعار معقولة، الشوكولاتة الساخنة بـ 15 جنيه وبـ تبقى حجم واحد كبير، والكابوتشينو بالحجم العادي بـ 12 جنيه، الموكا بـ 20 جنيه، وجربنا كل المشروبات دي وكانت ممتازة والكميات مناسبة للأسعار، ومن المشروبات الباردة جربنا كوكتيل فواكة "بوتري" (17 جنيه) بالكيوي والموز والتفاح وكان غالب عليه طعم ولون الكيوي لكن كان منعش ولذيذ. أسعار باقي الكوكتيلات والفرابية والسموزي من 17 لـ 25 جنيه. في منيو المأكولات فيه مقبلات وشوربات وأطباق رئيسية زي الفاهيتا والسكالوب بأسعار من 45 لـ 60 جنيه، وفيه بيتزا ومعجنات وساندويتشات وبانيني، لكن عرفنا أن الباستا والبيتزا من أحسن الحاجات هناك، وحبينا نتأكد بنفسنا، وطلبنا بيتزا بيبروني (28 جنيه) تكفي لفرد واحد أو اثنين علشان مش جعانين قوي، وكانت حلوة ومليانة جبنة موتزاريلا ورقيقة جدًا. جربنا مكرونة بِنَا بالمشروم والدجاج والصوص الأبيض (31 جنيه) اللي تم تقديمها في طبق كبير فيه كمية قليلة لكن الطعم كان حلو والتوابل والأعشاب اللي عليها كانوا جامدين، والدجاج كان طازج ودي أهم حاجة. بعد الأكل حلينا بواحد براوني بالآيس كريم، وأحلى حاجة فيه أنه فريش برضه والكيك تحس أنه لسه مخبوز حالًا. الشيشة قوية جدًا في «بوتري كافيه» وأي حد غاوي هـ يبقى عارف الموضوع ده لأننا مش مدخنين بصراحة لكن عجب أصدقائنا جدًا، نكهات كثير وخدمة سريعة، جربنا شيشة بنكهة الجوافة (15 جنيه) معاها لي بلاستيكي (4 جنيه). وغير أن طعمها حلو، شكل الشيشة نفسها حلو. الخدمة فيها بعض العيوب، يعني هـ تحتاج تنادي على الجرسون أكثر من مرة وتفكره بطلبك، وبعد كده هـ يتأخر لحد ما يجيب المطلوب. واستغربنا لما النور انطفأ فجأة وإحنا قاعدين ولما سألناه عن السبب ما حدش رد علينا بإجابة محددة! وبعد 15 دقيقة رجع النور. «بوتري» له فروع في الزمالك ومصر الجديدة والمعادي ووسط البلد، عجبتنا التجربة في فرع التجمع الخامس (التجمد الخامس أحيانًا) ومستنيين نشوف «بوتري كافيه» في أماكن أكثر في كايرو.

...

مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح