السادس من أكتوبر كافيهات in Cairo, Egypt

كافيهات

أداجيو: كافيه إيطالي لطيف في مول العرب
اصدرت في: 10/07/2016

بعد شهر رضمان والعيد كان مهم نكسر الروتين بقعدة مختلفة، علشان كدة قررنا نختار كافيه إيطالي اسمه أداجيو – Adagio، واللي موجود في مول العرب. ثلاجة الآيس كريم الموجودة عند مدخل الكافيه –واللي واخد ركن مفتوح من الجانبين أمام محل نيسبريسو – قدرت أنها تشدنا بمجموعة كبيرة من النكهات اللي ممكن ترضي كل الأذواق؛ لأن منها التقليدي ومنها نكهات ثانية مش هتلاقيها في أي مكان ثاني (هنقول لك عليها في نص المقال ما تقلقش) ده غير مجموعة الآيس كريم ستيك واسمهم أداجو ستيك (22 جنيه) واللي بنعتبرهم أسهل في الأكل خصوصًا وأنت بتلف في المول. قعدنا على الترابيزة الوحيدة اللي كانت فاضية، وعشان نبقى صريحين الترابيزات بالكراسي مصممين علشان تأخد قهوتك وتمشي؛ الترابيزات مدورة وكراسيها الجلد البيضاء واخدة curve الترابيزات فالقعدة مش قعدة تطول فيها. زي ما قلنا الكافيه كان مليان، والطلب على الآيس كريم الـ takeaway كان كبير فانتظرنا حوالي 10 دقائق لحد ما الجرسون آخذ طلباتنا. الآيس كريم عندهم أحجام؛ أصغرهم سعره (18 جنيه) لغاية أكبر حجم Maxi Cup (42 جنيه)، وفيه حجمين في النص Big Cup (36 جنيه) وأخيرًا الحجم الوسط اللي طلبناه (24 جنيه) واللي مكون من بولتين آيس كريم –اختارنا واحدة منهم بالقهوة والثانية بنكهة فطيرة المشمش- وضيفنا معاهم بسكويت بالشوكولاتة على شكل ودعة (10 جنيه). بلا مبالغة من أجمل المرات اللي دقنا فيها آيس كريم؛ قوامه متماسك وفي نفس الوقت كريمي ولذيذ. بولة القهوة كانت مثالية، ولكن بولة فطيرة المشمش نكهتها كانت شبه معدومة، أما البسكويت فكان فريش والشوكولاتة اللي موجودة على أطرافها طعمها لذيذ لوحدها، ومع بولة القهوة كان الموضوع ألذ وأطعم. مع الآيس كريم طلبنا سموذي بالتوت البري (29 جنيه)، مثلج، فريش وكميته كبيرة ولكن للأسف كان مسكر زيادة عن اللزوم –أي نعم الواحد محتاج حاجة مسكرة بس إحنا اختارنا التوت لأن بيبقى فيه مزازة بتميز طعمه. مع السموذي طلبنا كابتشينو وسط (22 جنيه)، واللي كان من ماركة Hausbrandt الإيطالية. لو أنتم بتحبوا القهوة؛ ننصحكم أنكم تجربوا الحجم الأكبر لأن القهوة عندهم رائعة ونسبة اللبن للقهوة مضبوطة بس الحجم كان حقيقي صغير كأنه فنجان إسبريسو بس طويل شوية. أداجو كمان عنده مجموعة من الوافلز اللي ممكن تختار منها، ده غير أنه بيعرض مجموعة من الحلويات –بالذات الشوكولاتة- المصنوعة في إيطالية، والمتوفر منها أنواع وأشكال مختلفة مغلفة في أكياس (وزنها كيلو) لماركات زي Vanini و Go DO. بالرغم من أن الكافيه بقاله كثير موجود، إلا أن أداجو من اكتشافتنا الجديدة في مول العرب، القهوة والآيس كريم نجحوا في الاختبار بامتياز، ولكن عيبهم الوحيد أن في الزحمة جودة الخدمة بتقل والتركيز بيبقى أكثر على طلبات الآيس كريم الـ Takeaway.

...

شيكس & بيكس: سموذيز وحلويات في السريع في أمريكانا بلازا الشيخ زايد
اصدرت في: 07/06/2016

نعتقد أننا كمصريين ما نقدرش نخرج برة البيت من غير ما نأكل. يمكن الموضوع تغير دلوقتي لأن فيه أماكن ترفيهية كثيرة فتحت في القاهرة تساعدك على أنك تستمتع بوقتك بحاجة ثانية غير الأكل؛ وبالتالي الخروجة ما بقاش الهدف الأساسي منها الأكل زي الأول. ولكن ده ما يمنعش أن لسه فيه جزء من الخروجة ممكن تخطف فيه حاجة تتاكل في السريع. وهنا تيجي فايدة الأكشاك اللي بتبقى وسط المول أو جنب السينما؛ توفر عليك قعدة المطعم أو الكافيه، وفي نفس الوقت تقضي الغرض المطلوب منهم. شيكس & بيكس – Shakes & Bakes من ضمن الأكشاك اللي صادفناها في أمريكانا بلازا الشيخ زايد. زي ما هو واضح من اسمه، شيكس & بيكس بيقدم مجموعة من السموذيز والعصائر، بجانب عدد من الحلويات المعمولة في أكواب متوفرة في حجمين (كبير 24 جنيه – صغير 15 جنيه). اختارنا من المجموعة دي تشيز كيك بالفراولة، وكيك بالنوتيللا وزبدة الفول السوداني. اختارنا الحجم الأصغر واللي في نظرنا كافي جدًا لو نفسك في حاجة حلوة على الماشي. لو أنت بتحب التشيز كيك نعتقد أنك هتحبها هنا؛ طبقة الجبنة كريمي وطعمها متوازن ما بين الحلو والحادق –فلو أنت بتحبها مسكرة ننصحك أنك تحتفظ بطبقة المربى اللي على الوش لأطول فترة ممكنة علشان تسكر كل معلقة بتاخدها. كان نفسنا طبقة البسكويت تكون أسمك من كده علشان نقدر نوصلها في كل معلقة. كيك النوتيللا بزبدة الفول السوداني كانت عظيمة؛ مكونة من الآتي: طبقتين من كيك الشوكولاتة وسطهم طبقة زبدة فول السوداني وفوق كل ده طبقة نوتيللا عليها قطع بندق. عجبنا فيها أن بالرغم من كل المكونات اللي مليانا سكر دي الحلو ككل كان طعمه مضبوط، وبالرغم من أن الطبقات اللي داخل فيها شوكولاتة كثيرة، إلا أن طعم زبدة الفول السوداني كان واضح ومتجانس مع بقية المكونات. من مجموعة السموذيز اختارنا واحد بطعم البطيخ، والثاني بالخوخ (سعر الواحد 20 جنيه). ومن مجموعة الـ Shakes اختارنا فرابتشينو (25 جنيه). أحلى حاجة أنك بتشوف المكونات وهي خارجة من الثلاجة وداخلة الخلاط، فلو أنت من الناس اللي بتحرص على المكونات الفريش هتنبسط. بالرغم من أن طعم السموذي –سواء البطيخ أو الخوخ- كان منعش وفريش، إلا أن نسبة السكر فيهم كانت قليلة. يعني لو أنت بتحب الحاجة مسكرة قوي ممكن تضطر تضيف سكر. نعترف أن مكونات فرابتشينو شيكس & بيكس قلقتنا من الطعم النهائي للمشروب –من ضمن المكونات نسكافيه جولد وكريمة حلو- إلا أننا انبهرنا بالنتيجة، صحيح لاحظنا في أول شفطة دسامة الكريمة، لكن ده ما يمنعش أن المشروب نسب مكوناته مضبوطة وطعم النسكافيه خلاه يختلف –بشكل حلو- عن طعم أي فرابتشينو هتذوقه في محلات القهوة العادية. نقدر نقول أن شيكس & بيكس مناسب جدًا لو هفتك نفسك على حاجة حلوة في السريع أو مشروب منعش يظبط لك الدنيا وأنت داخل أو خارج من السينما.

...

ديرى كوين: أكلات سريعة وتشكيلة آيس كريم تجنن فى فرع مول العرب
اصدرت في: 13/10/2015

ديرى كوين – Dairy Queen مش محتاجين نكتب مقدمات طويلة عنه لأنه أكيد مألوف لناس كثيرة جدًا، خاصة فى الفوود كورت، كتبنا عنه قبل كده فى فرع سيتى ستارز من كام سنة، بس عامة للى ما يعرفوش هو مشهور أوى بحرفين DQ ومكتوب كمان على اليافطة Chill & Grill لدرجة ممكن تتلخبط هو مين اسم المكان! ديرى كوين لهم صفحة على الفيسبوك ممكن تعرفوا منها طبيعة الساندويتشات اللى بـ يقدموها، بس هما مشهورين جدًا بالتنوع اللى مش طبيعي فى تشكيلة الآيس كريم خاصة البليزارد، اللى بـ يُقدم لك بالمقلوب "عند الكاونتر فقط" ولو وقع تاخده مجانًا، وهما هنا بـ يثبتوا لك أنهم بـ يقدموا آيس كريم متماسك وغنى مافيهوش هوا ومملى على آخره، وأنت اللى بـ تختار المكون اللى فى الآيس كريم الفانيليا من: أوريو، إم أند أمز، سنيكرز .. إلخ. أول حاجة لازم نقولها –واللى قالها لنا الرجل على الكاونتر- أن الساندويتشات حجمها واحد، لكن الأحجام فى البطاطس والمشروب، أخذنا ساندويتش دوبل تشيز برجر (17 جنيه) وتشيكن جريل (23.54 جنيه) وطلبناها كومبو فزاد على سعر الساندويتش (2 كولا بـ 9.10 جنيه) و(2 بطاطس بـ 9.08 جنيه)، وطبعًا طلبنا أوريو بلايز Oreo Blizz بـ (الحجم الصغير بـ 19.09 جنيه). الساندويتشات بصفة عامة مخدومة كويس، المكونات فريش، الساندويتش ممكن يكون صغير شوية بالمقارنة بأماكن أكلات سريعة ثانية، والبطاطس المحمرة عندهم رفيعة جدًا عاملة دايت، بس كانت محتفظة بقرمشتها من بره وطراوتها من جوه. الآيس كريم بقى.. يا روحي عليه.. إحنا ممكن نعيش باقى حياتنا نتغذى على الآيس كريم ده، طعمه غنى وبـ تحس بالانتعاش مع كل قضمة منه، بجد رائع، الفكرة بس أن الحجم الصغير ببالضريبة عامل 21 جنيه فكثير طبعًا، بس الجودة برضه شفيعة له. "ديري كوين" يمكن مش واخد شهرة باقى أماكن الأكلات السريعة، يمكن علشان مش بـ يعمل دعايا كثيرة زيهم، ولأن برضه هـ نقول مش بنفس قوة أماكن ثانية، بس هو مكان لطيف فى فوود كورت كذا مول هـ يسد جوعك بأكل كويس وتشكيلة آيس كريم تجنن.

...

بوترى كافيه: ابدأ يومك بفطار منعش في ويست تاون هب الشيخ زايد
اصدرت في: 17/09/2015

لما نحب نروح مكان هادي ولطيف في الشيخ زايد، "ويست تاون هب – Westown Hub" أول مكان بـ ينط في دماغنا، هو و"جاليريا 40 – Galleria 40"، وكل مرة لما كنا بـ نروح ويست تاون هب كنا بـ نشوف Roll-up على مدخل "بوترى كافيه – Pottery Cafe" أنهم بـ يقدموا فطار مميز.. قلنا لازم نجربه لأننا دائمًا لما بـ نروح هناك بـ نجرب الأطباق الرئيسية والتحلية وما جربناش الفطار عندهم قبل كده.. وقد كان. رحنا قبل الساعة 10 علشان قبل ميعاد شغلنا، للأسف كانوا لسه بـ ينظفوا ويوضبوا المكان، الجرسون كان مهذب وما رضيش يقول لنا نمشي فـ قعدنا جوه لحد ما يخلصوا تنظيف بره في المنطقة الـ Outdoor لأن الشمس كانت مشجعة أننا نقعد في مكان مفتوح. أخذنا المنيو ودخلنا على قسم الفطار على طول اللى مكون من 7 أنواع فطار وقسم للمخبوزات والكرواسون السادة وبالجبنة أو التركي.. إلخ، اختارنا منها أومليت (30 جنيه) عبارة عن أومليت معمول مع فلفل أحمر ومشروم وبصل أحمر وكسبرة خضراء وتوابل، ومكتوب في المنيو مقدم معاها عيش بالزبدة والثوم، وإحنا كمان زودنا إضافة جبنة بارميزان عليها من فوق (8 جنيه) وفطار الخواجة (47 جنيه) عبارة عن 2 بيضة أنت بـ تختار طريقة تحضيرها وإحنا اختارنا طريقة Scrambled eggs ومعاها بـ ينزل زبدة ومربى وسوسيس إيطالي وبطاطس مكعبات بالأعشاب وبرضه معاها عيش بالزبدة والثوم. من المشروبات كمان اختارنا عصير برتقال (22 جنيه) وشاي (19 جنيه) عليه إضافة لبن (7 جنيه)، الجرسون قال لنا أن التحضير هـ يستغرق نصف ساعة، وبعد فترة طلعنا قعدنا بره في القعدة الـ Open Air بره. أول حاجة جاءت لنا هي العصير، البرتقال رغم أنه مش الموسم بتاعه كان طعمه مقبول وفريش بالمقارنة بأماكن ثانية بـ يبقى طعمه مر وما يتشربش، الشاي باللبن جاء لنا بدري عن الأكل فاضطرينا نسأل الجرسون أنه يسخن المياه ثاني علشان نقدر نشربه مع الفطار لما نزل وكان متعاون ومؤدب جدًا. ندخل بقى على الكلام الكبير، الأومليت كان حلو أوي، طعم الجبنة البارميزان مع البيض والخضار الفريش اللى فيه فتحت نفسنا وأنعشتنا في بداية اليوم، وكمان الـ Scrambled Eggs كانت معمولة مضبوط مع مكعبات البطاطس المقلية بقشرها (القشرة بـ تضيف طعم حلو أوي لها وكمان قيمتها الغذائية بـ تكون فيها) كمان مع السوسيس كانوا ميكس مثالي، بس أحبطنا جدًا أن العيش (شرائح توست مقطعة رفيع) اللى نازل مع الطبقين ما كانش بالثوم والزبدة، كان سادة! بعد ما خلصنا فطار كان لازم نختم زيارتنا بالبان كيك (30 جنيه) اللى مكتوب في المنيو أنها 2 قطعة بان كيك رقيقة تقدم مع الفواكة الطازة وصوص الشوكولاتة أو الـ Mable Syrup المشهور به، طلبنا الفاكهة اللي معاها موز اللى اتفاجئنا أنها مكتوبة في الـ Receipt إضافة موز (7 جنيه)! المفروض دي مش إضافة، دي حاجة في مكون البان كيك، عامة البان كيك كانت أكثر من رائعة، هشة، العجينة رائحتها تجنن وصوص المابل كان خفيف وعامل ثنائي حلو مع الموز، استمتعنا به لحد آخر قضمة. ختمنا قعدتنا بلاتيه كراميل، اللى برضه لقيناه في الـ Receipt مكتوب لاتيه (24 جنيه)، وإضافة أكسترا كراميل (7 جنيه)، مش فاهمين ليه "إكسترا"! وعلى الرغم من كده اللاتيه ما حسيناش فيه بطعم الكراميل أوي، بس كان لطيف. فطارنا في بوتري كافيه كان منعش، طعمه حلو ويفتح نفس الواحد أنه يبدأ يوم عمل شاق بصدر رحب، بس اللي ضايقنا أن العيش ما كانش فيه زبدة وثوم، والأصناف اللى حاسبينها أنها "إكسترا" أو كـ "إضافة"، لأن في النهاية مش منطقي أن شخصين يروحوا يفطروا يدفعوا 225 جنيه! أمال في الغداء هـ ندفع كام؟.. بس كانت بداية حلوة لليوم.

...

شكسبير أند كو: مأساة شكسبيرية في كابيتال بيزنس بارك الشيخ زايد
اصدرت في: 13/05/2015

ناس كثير حكيت عن روعة وجمال فرع مطعم وكافيه "شكسبير أند كو" في دبي، وقد إيه هم متحمسين للفرع الجديد في القاهرة اللي جاء بعد طول انتظار، في منتصف شهر فبراير اللي فات، تم افتتاح أول فروع شيكسبير أند كو – Shakespeare and Co. في كابيتال بيزنس بارك الشيخ زايد، وسمعنا برضه أن الفرع هائل والأكل فيه عظيم؛ فقررنا أننا نزوره علشان نجرب بنفسنا ونقول لكم عن تجربة شخصية. مبدأيًا، كابيتال بيزنس بارك نفسه لسه مافيهوش محلات أو مطاعم فتحت، وبالتالي مش هـ تلاقي غير "شكسبير أند كو" بس، ومجموعة من العمال اللي بـ يشطبوا المكان، المطعم واسع نسبيًا وفيه مساحة خارجية فيها مجموعة كبيرة من الترابيزات، ده غير ركن خاص للأطفال. أما المساحة الداخلية، فهي مقسومة لجزئين: مكان خاص للمدخنين والثاني لغير المدخنين. الديكورات مبهجة بتفاصيلها الكثيرة، واللي بـ تتميز بالطابع الأوربي الكلاسيكي بشكل عام ولكن بـ "لسعة" مودرن: من أول الأسقف الخشبية المنتشر عليها مجموعة من الإطارات الكلاسيكية وصور كثيرة لنبلاء وملوك أوربيين، ده غير مجموعة كبيرة من النجف المزين بألوان وأقمشة مختلفة، القعدات متنوعة ما بين ترابيزات خشبية عليها نفس مجموعة الصور ومفارش متنوعة الألوان والأشكال بكراسي كلاسيكية بأشكال وألوان مختلفة؛ أو كنب وكراسي كلاسيكية مبطنة. الموضوع كبير والتفاصيل كثيرة، من الآخر كده... كأنك قاعد في صالون ماري أنطوانيت! المهم، المكان ما كانش تقريبًا فيه غيرنا وترابيزة ثانية وبالتالي الخدمة والاهتمام بنا كان أكثر من ممتاز، المنيو كبير ومعقد وملئ بالتفاصيل –بـ يغطي كل الوجبات وفيه ركن خاص للأطباق اللبنانية- فأخذنا وقتنا وطلبنا الآتي: كفاتح شهية طلبنا كريسبي كاليماري (39 جنيه). أما للأطباق الرئيسية، فطلبنا كوردون بلو (80 جنيه) وبيف تندرلوين (130 جنيه). بعد ما أخذ الجرسون الطلبات قدم لنا سلة عيش كبيرة فيها أربع وحدات ميني كايزر وزبدة؛ وبما أننا كنا هـ نموت من الجوع خلصناهم بسرعة. العيش كان فريش وطعمه شهي، أما الزبدة المخلوطة بالثوم والأعشاب (نعتقد أن الأعشاب دي كانت روزماري) فكانت هائلة. بعد لحظات وصل لنا فاتح الشهية ومعاه تارتار صوص وليمون. الكاليماري المقلي كان بـ يشد شوية، ولو هـ تأكله من غير صوص أو ليمون هـ تضطر تضيف له ملح وفلفل. ولكن بعد ما استخدمنا الصوص ورشة ليمون الموضوع كان أكثر من رائع، وبسهولة نقدر نقول أن ده كان أحسن حاجة أكلناها في تجربتنا. بوصول الأطباق الرئيسية، الموضوع اختلف تمامًا. حجم التقديم صغير بالنسبة للأحجام المصرية اللي متعودين عليها، والحقيقة الحمد لله أن أحجام الأطباق كانت صغيرة. البيف تندرلوين اللي طلبناه Well done كان شبه محروق من الطبقة الخارجية. وبما أنه سميك، فمن الداخل كان ممكن تأكله عادي ولكن أطرافه الحقيقة غير صالحة للأكل تمامًا. مع الطبق فيه قطعة بطاطس بالبشاميل شكلها الخارجي غير محمس بالمرة، والحقيقة ولا طعمها؛ لأن ما كانش فيه طعم أصلًا ولا نكهة مميزة... فبالتالي لو مش عارف أنك بـ تأكل بطاطس بالبشاميل مش هـ تقدر تميزه. المفروض أننا طلبنا مشروم صوص مع الطبق، ولكن كل اللي وصل لنا كان جارنيش وسابي... (أيوه، المعجون الأخضر اللاذع ده اللي بـ يتقدم مع السوشي) إحنا عارفين أن فيه صوص اسمه "وسابي جارليك كريم" (يعني وسابي بالثوم والكريمة) وعادة بـ يُقدم مع التندرلوين بس ما بـ يبقاش شكله كده. بالنسبة للكوردون بلو، واللي طلبناه بناء على صورة موجودة على صفحة شيكسبير أند كو على الفيسبوك، فالصورة حاجة والطعم حاجة ثانية تمامًا؛ أولًا الأطباق الجانبية اللي عبارة عن خضار سوتيه وبطاطس بالبيكون، فالخضار كان عبارة عن فرع من واحد بروكلي، واحدة إسبارجوس ذبلانة، وتقريبًا واحدة كوسة صغيرة مقطعة لقطع أصغر ما تسمحش أنك حتى تمسكها بالشوكة. أما البطاطس بالبيكون، فالموضوع ما كانش أحسن كثير، بيكون دهني وغير مقرمش مع مكعبات بطاطس بلا نكهة. أما قطعة الكوردون بلو كانت بطلة المأساة الشيكسبيرية: مع أول ضربة سكينة نافورة زيت –زيت مش عصارة- مع شريحة مشروم واحدة بلا مبالغة ولا أثر لوجود جبنة نهائيًا... أما الطبقة الخارجية للمأساة، فبالرغم من أنها كانت متماسكة، إلا أنها كانت غير مقرمشة بالمرة. المهم، أكيد الجولة الثانية هـ يكون فيه كلام ثاني... طلبنا "بينك ليموند" (25 جنيه)، وبروفيترول (40 جنيه). البينك ليموند ده عبارة عن كوكتيل ليمون، رمان وماء ورد. ده ثاني أحلى حاجة ذقناها في تجربتنا... بس لو ما لكش في ماء ورد بلاش منه خالص، لأن ماء الورد يعتبر المكون الأساسي وطاغي بشكل عام على بقية النكهات، هـ تحس بطعم الليمون كل شوية، أما الرمان فيعتبر أقل المكونات وضوحًا وسط الكوكتيل. بوصول البروفيترول، المأساة اكتملت؛ ثلاث قطع من عجينة الشو وسطهم ثلاث بولات آيس كريم كبار بدل الكريمة، وعلى كل ده رشة صوص شوكولاتة. بغض النظر أننا ما قدرناش نتوصل لنكهة الآيس كريم، إلا أن طعمه كان سيء، عجينة الشو ما كانتش فريش وحجم الآيس كريم طاغي عليها فمافيش نسبة وتناسب. كمية الصوص كانت محدودة جدًا وبالتالي أنت بـ تأكل ساندويتش آيس كريم. كان لازم بعد كل ده نهضم بشاي أخضر (18 جنيه)... كان حلو. بالنسبة لنا التجربة كانت خيبة أمل كبيرة، سواء فى جودة الأكل أو الأسعار. ومع كل الكلام الحلو اللي بـ نسمعه عن المكان مش قادرين نقول إذا كان يومهم كان وحش وقت زيارتنا، ولا اختياراتنا وقعت على أسوأ أطباقهم... أيًا كان، أدينا عرفنا شكسبير كان بـ يستوحى مأسوياته منين!

...

كافيه سوبريم: فرع مول العرب محافظ على مستوى السلسلة الشهيرة
اصدرت في: 29/04/2015

لما نتكلم عن نجاح أي سلاسل كافيهات أو مطاعم، كلمة السر عادة بـ تكون المحافظة على مستوى ثابت، ودي حاجة من الصعب تشوفها في مشهد الأكل القاهري، حتى بين الفروع المختلفة لنفس المطعم أو الكافيه. لما روحنا فرع كافيه سوبريم في 6 أكتوبر الموجود وسط عدد من المطاعم والكافيهات المطلة على النافورة، كنا متأكدين مليون فى المائة أنه هـ يكون رائع زي باقي الفروع اللي زورناها قبل كده. أول ما دخلنا المطعم واختارنا مكان كويس، وصلت المنيوهات اللي بـ تقدم أطباق ومشروبات الكافيه التقليدية، من هنا طلبنا تشيكن سيزار سلاد (40 جنيه)، بيتزا فونجي (43 جنيه)، بيتزا سوبريم (49 جنيه) وساندويتش بيستو تشيكن بطلب جانبي من السيزار سلاد (39 جنيه)، مع مشروبات غازية، وبعدها انتظرنا طلبنا يجهز. بعد حاجة بسيطة وصلت المشروبات، ومعاها كوبايات شكلها متوسخ شوية، وعلى طول الجرسون غيرهم بكوبايات ثانية نظيفة، الأكل وصل بعدها بحوالي ربع ساعة وبدأنا ندخل في المفيد. كمية التشيكن سيزار سلاد كانت هائلة مع شوية خس حلوين وعليها شرائح فراخ مشوية مستوية ومتبلة كويس، مع عيش محمص وجبن مبشور كلهم عليهم دريسنج السيزار. صحيح مكوناتها كانت طازجة لحدٍ ما، بس المشكلة أن الدريسنج كان قليل جدًا وبكده السلاطة كانت جافة شوية. البيتزا المكونة من عجينة رفيعة عليها طبقة من صلصة الطماطم وفوقها جبن موتزاريلا، مشروم وزيتون أسود طازج، ومقدمة فوق حامل من الخشب، نقدر نقول أنها كانت خفيفة وطعمها لذيذ، الفكرة كمان أن المشروم طازج ومش معلب، وده يعتبر إضافة لطيفة لطعم البيتزا. بعد كده دخلنا على الباستا، اللي طلبناها تكون بنّا، مكونة من صوص كريمة لذيذ بس ثقيل شوية، مع شرائح فراخ مشوية، أما ساندويتش التشيكن بيستو وصل في عيش باجيت بني -زي ما طلبناه برضه- محشي شرائح فراخ مشوية وعليها طماطم، خس وصوص بيستو مايونيز، والصوص ده تحديدًا كان محتاج يكون أكثر شوية. على العموم، فرع كافيه سوبريم مول العرب حافظ على مستوى سلسلة الكافيهات المعروفة، إحنا ممكن نتكلم اليوم بطوله عن عيوب، بس لما يكون قصادك خدمة ممتازة وأطباق بسيطة صحيح بس معمولة صح، ليه نبوظ حاجة كويسة؛ كلام سليم، صح؟

...

كافيتشو: أجواء شاعرية وأكل لطيف فى فرع جاليريا 40 الشيخ زايد
اصدرت في: 15/02/2015

إحنا عارفين "كافيتشو كوفى – Kafficho Coffee" من أول فرع له فى الزمالك، كنا بـ نحب نروحه ونستمتع بقعدته اللى بـ تطل على الشارع ومن المشروبات اللى كان بـ يتميز بها سموزى الكيوي، وبالتالى فرحنا جدًا لما عرفنا أنه فتح فرع جديد فى المول الضخم "جاليريا 40" فى الشيخ زايد. موجود داخل المول وموازى لمطعم أيادينا اللبنانى اللى كتبنا لكم عنه من فترة، وتصادف يوم زيارتنا لكافيتشو أنه يوم الفلانتين، فكانوا عاملين منيو مخصوصة للأطباق، والمنيو الأصلية كانوا موقفينها، ومتاح منها بس المشروبات والتحلية، لو عاوز تعرف المنيو الأصلية ممكن تشوفها من صفحتهم على الفيسبوك، إما منيو الفلانتين فمكونة من 7 أطباق رئيسية وبـ ينزل معاها اختيارك من الشوربة (عدس أو مشروم) أو من السلاطة (خضراء أو سيزر)، كمان كانوا عاملين جو شاعرى جايبين ناس تعزف موسيقى حية: جيتار وساكسفون. اختارنا من منيو الفلانتين طبقين: كافيتشو جمبالايا (80 جنيه) عبارة عن باستا لينجويني بصوص الكريمة عليها قطع فراخ وبيف وسوسيس وفلفل ألوان وبصل، وطلبنا ينزل معاها سلاطة سيزر، والطبق الثانى تشيكن باربكيو بيتزا (66 جنيه) معاها شوربة عدس. أول حاجة نزلت لنا كانت الشوربة، الحق يقال أن دي أخف وأحلى شوربة عدس ذقناها فى حياتنا لحد دلوقت، ما كناش عاوزينها تخلص، قوامها مضبوط وطعمها متوازن وخفيف، سلاطة السيزر لطيفة وفريش بس عادية، بعد شوية جاءت الأطباق الرئيسية، الجرسون شال طبق السلاطة على الرغم أنها لسه فيها وطلبنا منه يرجعها ثاني، المكرونة جاءت لنا "بنّا" مش لينجويني بس مش مشكلة لأن شكلها كان تحفة، قطع البيف كان بعضها مستوى كويس وبعضها لأ على عكس الفراخ اللى كانت طرية جدًا، ميكس المذاقات اللى فى الطبق عامة مع السوسيس كان رائع والكمية كانت وفيرة، البيتزا بقى ننصح أنها تكفى لشخصين لأنها كبيرة، عليها قطع الفراخ بصوص الباربكيو، وكان طعمها لطيف والعجين كانت متوسطة السمك وطازة وخفيفة. بعد الأكل جاءت لنا المنيو العادية علشان نطلب منها مولتن كيك اللى للأسف كانت غير متاحة وقتها فبدلناها بوافل (26.95 جنيه) بـ تختار يتحط صوص نوتيلا أو شوكولاتة وبـ تختار نوع فاكهة واحد يضاف كمان زي الموز والتفاح والفراولة والكيوي، اختارنا الموز وصوص الشوكولاتة لأنه أخف من النوتيلا، ومن المشروبات اختارنا موهيتو أو "موخيتو Mojito" (20.95 جنيه) وده عبارة عن ليمون مع نعناع وسفن أب مع ثلج مجروش، الموخيتو جاء لنا الأول بس الحقيقة ما لحقناش نستمتع به، المشروب كان عبارة عن 5 "شفطات" بالعدد لأن أغلب الكوب كان ثلج، وبالتالى العصير خلص بسرعة واتضايقنا جدًا لأننا حسينا أنهم قدموا لنا مشروب ثلج، الوافل أخذت وقت شوية فى تحضيرها بس كانت لطيفة، بس ذقنا أفضل منها فى أماكن ثانية. زيارتنا لفرع "كافيتشو" الجديد فى الشيخ زايد كانت ممتعة، وأكيد هـ نروح هناك ثاني لأن فيه أماكن جديدة حوله هـ تفتح قريب فى المول العظيم "جاليريا 40".

...

يشمك: مش كل مطاعم الفنادق جامدة، على طريق الواحات 6 أكتوبر
اصدرت في: 01/09/2014

وإحنا ماشيين فى طريق الواحات ومتجهين لمدينة 6 أكتوبر كل شوية نشوف يافطة كبيرة لونها بني فاتح وعليها اسم مطعم "يشمك - Yashmak"، وكل مرة يشدنا الاسم ونقول عاوزين نروحه، ونؤجل اليوم ده، ونؤجل تانى، لحد ما جاء اليوم الموعود ورحنا.. ويا ريتنا ما رحنا. المطعم موجود فى فندق هيلتون بيراميدز جولف ريزورت (جنب دريم لاند) على طريق الواحات، دائمًا شائع أو معروف أن مطاعم الفنادق بـ تكون جامدة علشان بـ يكون لها عناية خاصة، بس لكل قاعدة شواذ، وإحنا اتكعبلنا المرة دي فى الاستثناء ده. أول ما تدخل هـ تلاقى المطعم على أيدك الشمال، المكان واخد طابع عربي قديم خشبي، الموسيقى اللى شغالة طوال الوقت لأغانى مصري قديمة لفريد الأطرش وغيره شغالة بصوت معقول مع الشاشات الصامتة، فيه قعدة بالخارج بـ تطل على غرف الفندق والثانية بالداخل وفيه مربع خشب كبير بـ يتوسطها زي مسرح صغير للعروض اللى بـ يعملوها. ممكن تعرف أقسام المنيو من صفحتهم على الفيسبوك، ده غير أن لهم موقع على الإنترنت، طلبنا فى البداية شوربة الطماطم بالجمبري (23.95 جنيه) وسلاطة الراهب (12.95 جنيه)، ومن الأطباق الرئيسية أخذنا كباب وكفتة (68.95 جنيه) بـ ينزل معاها أرز بالخلطة وخضار سوتيه، وكمان طلبنا سكالوب لحمة (74.95 جنيه) بـ ينزل معاها مكرونة سباجيتي وبطاطس محمرة. أول حاجة نزل لنا زجاجة مياه ص (8.95 جنيه)، بعد شوية مش كثير نزلت لنا الشوربة، أول حاجة شدتنا لونها الأحمر القوي، بس أول ما ذقناه ما كانش فيها أى توابل أو نكهة مميزة تخلينا نميزها عن شوربة البيت، حتى أن الجمبري اللى فيها كان مستوى كويس لكن طعمه مش منسجم مع الطعم الشوربة، تحس أنك بـ تأكل كل واحد لوحده، سلاطة الراهب عبارة عن باذنجان مهروس عليه فلفل ألوان، الباذنجان كان طعمه حلو بس برضه مش فيه حاجة مميزة، ولا توابل أو أى طعم، باذنجان ساقع ومهروس بدون نكهة، بـ يقدم معاه عيش شامي أبيض صغير. نروح للأطباق الرئيسية اللى تقديمها شكله حلو، لكن الشكل مش كل حاجة، نبدأ بالكباب والكفتة، الكباب ما كانش مستوى وكان بـ يشد وما عرفناش نضغط على نفسنا ونأكله، الكفتة برضه كان طعم اللحم ما عجبناش، والخضار السوتيه كان عبارة عن كام واحدة فلفل ألوان! أما الأرز بالخلطة كان أحلى حاجة فى الطبق الصراحة، أما بقى السكالوب كان قطعتين كبار من اللحم المقلى وكان طعمها حلو جدًا ممكن تقسمها مع حد لأن حجمهم كبير جدًا، المكرونة السباجيتي طعمها شبه اللى بـ نعملها فى البيت، والبطاطس المحمرة كذلك. بعد الأكل كان لازم نشرب حاجة، طلبنا ليمون سكواش (18.95 جنيه) عبارة عن ليمون ونعناع وسيرب نعناع ومعاها سفن أب، وكمان سلاطة فواكة بالآيس كريم (28.95 جنيه)، العصير كان حلو جدًا بس مش فى حلاوة الآيس كريم بالفواكة المختلفة، تفاح وعنب وموز وفاكهة كثيرة جدًا فى بولة كبيرة وآيس كريم فانيليا على قمة كل ده، استحالة بنى آدم بطنه طبيعية يعرف يخلصه، ضخم جدًا، بس كان طعمه رائع وكل حاجة فيه فريش بس للأسف ما قدرناش نكمله. بعيدًا عن الأكل اللى ما كانش مضبوط وصفارة إنذار الحريق اللى خضتنا أثناء زيارتنا بسبب دخان الشيشة! إلا أن المكان لطيف لنزلاء الفندق يروحوا يأكلوا فيه، لكن مش هـ ييجي له ناس مخصوص من بره الفندق مرتين، خاصة كايرو 360.

...

باسكوا وبرام: مطعمين x واحد في ذا ووك بيفرلى هيلز
اصدرت في: 20/07/2014

كايرو 360 بـ تنفرد فى المقال ده أنها أول حد يكتب عن أحد المطاعم اللى هـ تفتح فى المنطقة السكنية الشهيرة "بيفرلي هيلز" فى السادس من أكتوبر، "ذا ووك – The Walk" بقى لهم فترة بـ يعلنوا عنه بكلمة "قريبًا"، مكان تجمع كبير للكافيهات والمطاعم وكمان محلات التسوق، لسه مش لهم صفحة على الفيسبوك، لكن ممكن تـ Google المكان. أى حد بـ يكون له السبق أنه يفتتح مطعمه فى مكان مافيهوش حاجة لسه مش شغالة أو حيوية بـ نحسب له نقطة فى صالحه علشان هو مغامر وشجاع، دائمًا الواحد بـ يختار مكان "عليه رِجل" زي ما بـ يقولوا، وبالتالى المكان ده هـ يبذل مجهود أكبر علشان الناس تعرفه، أول ما سمعنا أن "باسكوا - Pasqua" و"برام - Bram" فتحوا فى بيفرلى هيلز ما ترددناش وفى أقرب فرصة رحنا. المكان يتوه جدًا، خاصة أن الأمن على البوابة لو سألتهم مش هـ يعرفوا يدلوك، ادخل ثالث بوابة واسأل بعدها على المكان، فى اعتقادنا أن برام وباسكوا مطعمين منفصلين عن بعض، لكن لما رحنا اكتشفنا أن الاثنين لهم نفس المدخل وتقدر تطلب من المكانين فى نفس الوقت على نفس الشيك، ونعتقد فيه اتجاه أنهم يكونوا دائمًا متلازمين، لأننا لقينا نفس الشيء فى الفرعين الموجودين فى "الجزيرة بلازا" فى الشيخ زايد (المجاور لأركان مول). أول ما رحنا أعطونا الاثنين منيو وسابونا نختار براحتنا، ويفضل تكلمهم قبل ما توصل علشان تتفادى تأخير تجهيز طلبك، المكان له قعدة داخلية والثانية فى مكان مفتوح وفيه قعدات كثيرة (كنب، كراسي، وفيه كمان كنب خشب كبيرة على شكل مرجيحة)، على وقت المغرب الهواء كان وهمي والقعدة اللى بره تجنن، الشاشات فى كل مكان علشان تقدر تتابع مسلسلك أو برنامجك المفضل، كمان بـ يقدموا شيشة. "باسكوا" مطعم عالمي، و"برام" من اسمه شرقي، حب المغامرة بـ يقول نجرب من الاثنين، اختارنا من "برام" فى المقبلات ورق عنب (23.99 جنيه)، وفى الرئيسي برام أرز معمر باللحم الضاني (59.99 جنيه)، أما من "باسكوا" اختارنا شوربة الفاصوليا بالفراخ (24.99 جنيه)، ومن الرئيسي بيف رول (95.99 جنيه)، عندهم كمان كل المشروبات الرمضانية اختار منها اللى تحبه، أخذنا واحد سوبيا وواحد قمر الدين (15.99 جنيه للواحد). نزل لنا زجاجة مياه صغيرة (6.99 جنيه)، قبل الآذان نزل لنا كمان طبق من التمر، والمشروبات، بعدها بشوية نزلت الشوربة، المشروبات كان طعمها حلو والسكر مضبوط لقمر الدين، لكن السوبيا مسكرة شوية لأنها كمان فيها جوز هند على الوش، الشوربة كانت اختراع الصراحة أول مرة نذوقها، عبارة عن فاصوليا بيضاء وحمراء وقطع فراخ صغيرة مع فلفل ملون، خفيفة جدًا وقوامها مضبوط، والمزيج الرائع بين البقوليات والفراخ كان هائل. ورق العنب نزل على طول مع الشوربة، مزز وطعمه حلو أوى والكمية كمان كانت وفيرة، بـ ينزل معاها سلاطة زبادي ونعتقد الثاني زيت زيتون (مش واثقين)، الأطباق الرئيسية نزلت بعدها بشوية، البيف رول كان حجمه كبير أوى، أول مرة نذوق رول بيف جواه بيف سلامى وروزبيف ومشروم وجبنة موتزاريلا مغطى بصوص البصل وقطع البصل كمان، المزيج كان رائع، بس صوص البصل كان محتاج يخف شوية، السوتيه والبطاطس البيوريه كمان كانوا إضافة جامدة للطبق، برام الأرز المعمر باللحم الضاني كمان كان رائع، اللحم مش فيه دهن ومتسوي كويس ودي كانت أهم حاجتين بالنسبة لنا، طعم الأرز خرافى والكمية كبيرة، الإفطار النهارده كان استثنائي. بعد الراحة والفرجة على التليفزيون والاستمتاع بالجو التحفة والهواء دقت ساعة التحلية، من منيو باسكوا اختارنا حاجة تقليدية هى الأوريو مادنيس (29.99 جنيه) بعد ما أحبطنا لأن الفرايد آيس كريم مش موجود، للأسف كان عادي جدًا وجاء لنا أصلاً سايح شوية، الآيس كريم ما كانش متماسك شكله قعد بره كثير قبل ما ييجي لنا، وبالتالى طعم الآيس كريم وهو مش ساقع وسايح فى صوص شوكولاتة وبوريو غزير ما كانش حلو! التجربة لطيفة، وفكرة أن يكون عندك Option للاختيار بين اثنين منيو بـ ترضي جميع الأذواق، الخدمة احترافية ومش بـ يتأخروا عليك فى أى طلبات، كمان عندهم خدمة توصيل، منتظرين نشوف المكان ده بعد ما يفتح كذا مطعم وتبدأ التنافسية!

...

أطلانتس: مطعم بانطباعات متناقضة فى مول العرب
اصدرت في: 15/05/2014

من قبل ما يفتح وهو عامل إعلانات فى كل ركن من مول العرب، "قريبًا" وحركات، وبعد كده فجأة لقينا افتتاح ضخم وفنانين حضروا وصور التغطيات فى مواقع كثيرة، وألعاب نارية وتغطيات إعلامية وإعلانات بشكل أكبر فى كل مكان حتى على مداخل البوابات فى المول.. وبالتالى فضول الكائن الكايرو360ي لازم يشتغل، وكان لازم نروح نعمل له زيارة مفاجأة بعد كام يوم من الافتتاح الرسمي. المكان ده عمل لنا حالة من الإنطباعات المختلطة والمتناقضة، عجبنا فيه حاجات وفيه حاجات ثانية زعلتنا أو ضايقتنا منه، بس دائمًا إحنا فى كايرو 360 بـ نعطي عذر للأماكن اللى لسه فاتحة علشان نعطيها فرصة تضبط الدنيا وتلحق المنافسة القوية، أما الناس القديمة اللى بقى لها فترة فى المجال بـ نكون قاسيين عليهم ومش بـ نفوت لهم فتفوتة. مبدئيًا من الاسم هـ يوحي لك الاسم "أطلانتس" أنها حاجة مرتبطة بالبحر، بس على عكس توقعاتنا طلع مش مطعم مأكولات بحرية، هو بـ يقدم مأكولات عالمية وفيه كمان شيشة، بس فيه حاجة من روح المحيط وهى الديكور، تصميم مدخل المطعم والقعدة اللى تحت كأنه سفينة، وتفاصيل صغيرة زي دفة القبطان ووحدات الإضاءة وكمان حوض السمك اللى فيه مياه فى الأرضية كملت روح الاسم مع اللون الأزرق فى مخدات الكراسي، فيه شاشات فى مناطق كثيرة علشان تتابع ماتشات الكرة اللى ساعات بـ يعلنوا عنها على صفحتهم على الفيسبوك، وفيه منطقة جلوس ثانية فى الدور العلوي بـ تطل على منطقة النافورة وكل المطاعم الموجودة. طلبنا من الجرسون نقعد فوق ولكنه اعتذر بأدب أن مافيش أماكن وممكن نقعد على الـ High Table تحت لحد ما يفضى مكان فوق، مافيش 5 دقائق نزل ناس من فوق وفكرنا الجرسون رجع قال لنا معلش فيه عيد ميلاد فوق ومحتاجين الكراسي علشان العدد الكثير، اتضايقنا جدًا لأنه كان ممكن يقول لنا كده من الأول، وبعدها رجع جرسون ثاني قال لنا ممكن نطلع دلوقت! أول ما طلعنا اتضايقنا أكثر لما لاقينا ترابيزتين بالكراسي فاضيين، طب كان لازمته إيه الكلام ده؟ بداية غير موفقة. كل ترابيزة عليها منيو iPad موصلة بالإنترنت ومقسمة من أول الإفطار لحد الأطباق الرئيسية والمشروبات والحلويات، عيب المنيو الخطير أنها مرتبطة بقوة الإنترنت، وبالتالى لو هو ضعيف القائمة بـ تفضل تحمل وقت كثير علشان تشوف إيه اللى جواها، وكمان طريقة عرض الأطباق متعبة فى أن لازم تدوس على كل طبق علشان تشوف الشرح بتاعه، مش كلهم موجودين جنب بعض، وبالتالى بـ تقعد وقت كثير عقبال ما تقرر هـ تأخذ إيه، لأن الأقسام كمان كثيرة جدًا، بس إحنا عرفنا من القائمين على المكان أنهم بـ يحولوا المنيو لـ Application علشان ما تبقاش مرتبطة بالإنترنت خالص. بعد حيرة كبيرة طلبنا من الأطباق الرئيسية جريلد تشيكن (68 جنيه) عبارة عن صدور فراخ مشوية معاها صوص أبيض أو ليمون واختارنا الثاني، وبيف فيليه (87 جنيه) عبارة عن قطعة بيف Charboiled مع اختيار صوص المشروم أو الفلفل واختارنا الأول، وعامة كل الأطباق الرئيسية معاها اختيارك من البطاطس المحمرة والأرز والأرز بالسبانخ والخضار السوتيه، ومعاها كمان طلبنا شوربة طماطم (25 جنيه). أول حاجة نزلت الشوربة معاها مكعبات العيش المحمص، كمية الشوربة كانت حلوة مقارنة بأماكن ثانية بـ تعملها ضخمة لدرجت أنها تشبعك، كانت محتاجة تخف شوية بس لأن قوامها كان سميك لكن طعمها حلو وسخنة معقول، الأطباق جاءت بعدها بفترة، بداية للأسف مش سخنة خالص بس تتاكل، الفراخ كان طعمها حلو جدًا والتسوية كمان بس صوص الليمون ما كانش ظاهر خالص كطعم ولا كشكل فى الطبق، ولما سألنا الجرسون قال لنا هـ يجيب لنا الصوص منفصل، غاب لدرجة جابه قبل ما نخلص الطبق وبرضه طعم الليمون ما كانش ظاهر خالص حسينا أنها زبدة سايحة مش صوص زبدة بالليمون، الخضار السوتيه طعمه هايل مع البطاطس المحمرة المقرمشة بس كان نفسنا برضه يكونوا سخنين، أما البيف فكان طري كتسوية وطعمه حلو مع الصوص وكميته معقولة. بعد الأكل طلبنا من المشروبات أطلانتس مارجريتا (28 جنيه) ومن الحلويات وافلز (28 جنيه) بصوص الشوكولاتة مع الفاكهة، مع إضافة بولة آيس كريم (10 جنيه)، فترة بعد ما جاء لنا الوافلز كعجينة كانت لطيفة بس كان عليها صوص شوكولاتة قليل جدًا وفاكهة كانتالوب وتفاح وموز كلهم ما كانش فيه تجانس بينهم وحسينا أن كل حاجة منفصلة عن الثانية وناشفة فى فمنا بسبب نقص صوص الشوكولاتة اللى بـ يطري الدنيا شوية، كمان فى رأينا أن الكنتالوب مش فاكهة تنفع مع وافل بسبب الطعم. المفاجأة الأكبر بقى كانت فى المارجريتا بلونها اللبني الفاتح وطعمها الجميل جدًا اللى مش متناسب مع المفاجأة الأفظع اللى اكتشفناها بعد ما شربنا ¾ منه وهى حشرة عجيبة بـ تسبح فى نهاية الكوب خلتنا قفلنا من كل حاجة ووريناها للجرسون، رد فعل المكان كان محترم وكمية اعتذارات كثيرة تحترم طبعًا، بس زي ما قلنا فى الأول إحنا مشينا من المكان عندنا انطباعات متناقضة عنه، الخدمة كويسة والمعاملة والأكل لكن فيه حاجات صغيرة محتاجة تضبيط، بس نرجع ثاني نقول نعطيهم فرصة ثانية علشان الافتتاح، لأن مش معقول بعد كل المجهود ده والدعايا دي ويطلع مش قد كده.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح