مخبوزات وحلويات كافيهات in المعادي Cairo, Egypt

كافيهات

وافل ميكر: وافل وبيتزا ضعيفة المستوى في المعادي
اصدرت في: 08/03/2016

كنا زرنا قبل كده وافل ميكر - Waffle Maker في فرع الدقي وكتبنا عنه مقال نقدي في 2014، وكان لنا تعليقات معينة كان نفسنا ياخدوا بالهم منها، لكن للأسف اللي حصل أن المكان مازال بيواجه مشاكل احترافية كثيرة زي اختيار نوع شوكولاتة مناسب للوافل أو أن المكونات بشكل عام تكون غنية ولها طعم قوي. وافل ميكر – Waffle Maker فتح فرع جديد في شارع 9 في المعادي، بقعدة لطيفة خارجية وسط الشجر، كان فيه حوالي 6 ترابيزات ملونين بألوان لوجو المكان الأحمر والأصفر، طبعًا كنا متحمسين نتفرج على المنيو اللي ما كانش فيه حاجات جديدة غير بيتزا من عجينة الوافل ومكوناتها، فقررنا نجربها، طلبنا بيتزا مارجريتا (22 جنيه)، ومن قسم الحلويات اختارنا وافل بالشوكولاتة عليها 4 إضافات (34 جنيه)، ومارس ميلك شيك (20 جنيه). بعد طلبنا بحوالي 20 دقيقة جاء لنا الجرسون يبلغنا أن مافيش مارس فبدلناه بأوريو رغم أن أمامهم سوبر ماركت محترمة بس ماشي مش مشكلة، وكنا طالبين الإضافات بتاعتنا على الوافل فوريرو روشيه برضه ما كانتش موجودة فبدلناها بـ Chocolat chips، وبعد ربع ساعة وصل لنا الوافل زي ما طلبناها بصوص الشوكولاتة وعليها موز وكيوي وفراولة وقطع الشوكولاتة، لكن برضه للأسف طعم الشوكولاتة اللي هي أساس الوافل ما كانش نوتيلا الأصلية كان أي نوع شوكولاتة ثاني وكان سيء جدًا وطعمه مر، أما عجينة الوافل نفسها فما كانتش هشة إطلاقًا وطعمها كان غريب، غير أنها قدمت لنا باردة. حاولنا نتغاضى عن الأخطاء دي وقلنا نذوق الأوريو ميلك شيك وبرغم أنه المفروض من الحاجات السهلة جدًا أنها تتعمل إلا أن قوامه ما كانش مضبوط وكتل الأوريو فيه ما كانتش مضروبة كويس، غير أنه ما كانش ميلك شيك بأي شكل من الأشكال، ده مجرد لبن اتضرب مع الأوريو في الخلاط وممكن عليهم ثلجتين وشكرًا. نيجي بقى للحاجة الجديدة.. البيتزا، واللي طلبناها مارجريتا وكانت المفاجأة أنها قدمت لنا مع إضافة فلفل وزيتون، قولنا يمكن ده تعريفهم للمارجريتا مش مشكلة، لكن المشكلة الحقيقة كانت في الطعم، بالرغم من أن العجينة كانت هشة إلا أن طعم الصلصة والجبنة كان سيء جدًا، لدرجة أننا ما أخدناش غير قضمة واحدة. كان نفسنا بعد حوالي سنتين على المقال اللى فات أن المكان يكون حسن من نفسه لكن للأسف هو مستمر في أنه يقدم الأكل بجودة تفتقر للحرفية والطعم الشهي.

...

زينو كوفي: قهوة ألماني تخبطك في دماغك من حلاوتها في المعادي
اصدرت في: 06/03/2016

بنفرح جدًا لما مكان جديد يفتح في شارع 9 بشكل خاص، فبرغم الشوارع الكثيرة اللى فى المعادى إلا أن شارع 9 له مكانة خاصة، لأنه يعتبر زي الشارع الرئيسي للأماكن المفضلة والمبهجة بالنسبة لنا، وممكن يكون زينو كوفي – Zino Coffee من الأماكن دي. المكان شكله حلو جدًا بقعدة خارجية وسط الخضرة ومكان داخلي بديكور عصري، أكثر حاجة عجبتنا في الديكور كانت سبورة كبيرة سوداء شبه بتاعة المدرسة زمان ومكتوبة عليها اسم المكان وكذا حاجة ثانية، شكلها مبهج الحقيقة. الجو كان حلو اليوم ده فقررنا أننا نقعد بره، وأول لما جاء لنا المنيو احتارنا ما بين كل أنواع القهوة اللي ممكن تتخيلوها، سواء سخنة أو باردة، والمفروض أن نوع القهوة ألماني، والشاي برضه، لكن للأسف بالنسبة للأكل الاختيارات كانت قليلة جدًا سواء في الحلويات أو المخبوزات. طلبنا فطيرة تفاح (18 جنيه) وزينو كراميل لاتيه بس بارد مش سخن (24 جنيه)، وكابتشينو عادي (22 جنيه)، وتشيز كيك بالفراولة (25 جنيه)، لازم نعترف أن تخصصهم الأساسي في المشروبات، لأن الحاجات اللي طلبناها كأكل ما كانتش بالجودة اللي نتمناها، هي مش وحشة بس برضه مش حلوة، يعني التشيز كيك كان صوص الفراولة مش مضبوط لدرجة أن طعمه كان صناعي جدًا شبه البونبوني، وفطيرة التفاح كانت دسمة شوية وكمية التفاح ثلاث أضعاف العجينة ومعاهاش آيس كريم فانيليا فالموضوع كان صعب. نيجي بقى لأساس المكان القهوة، وهنا لنا وقفة لأن عشاق القهوة القوية كلهم أكيد هيعتبروا المكان ده ملاذهم لسنين قدام، طعم القهوة من كتر ما هو قوي وحاد بيخبطك في دماغك حرفيًا تبقى مش عارف هو إيه اللي حصل، طب هي قوية كده ليه ومهما تزود لبن أو سكر هتفضل بنفس قوتها، وده خبر عظيم لعشاق القهوة الحادة، أما اللي بيحبوا القهوة خفيفة أو مش قوية كده فده مش مكانكم أكيد. ما قدرناش نقاوم أننا نجرب الشاي، فاختارنا شاي بالليمون من مجموعة الـ Ice tea الهندية اللي عندهم (22 جنيه) وطعمه كان حلو جدًا برضه، لو كان عليه سكر زيادة بس كنا استمتعنا أكثر، وهم صحيح بيقدموا سيرب سكر مع المشروبات الساقعة اللي السكر العادي مش هيدوب فيها. زيارتنا كانت قصيرة هناك بس أكيد مش هتكون الأخيرة، "زينو كوفي" مكان مناسب لكل عشاق القهوة هم محتاجين ياخدوا بالهم من حاجات بسيطة بس خاصة أنهم لسه فاتحين قريب.

...

كاروت بايتس: حلويات معقولة وخدمة توصيل سيئة جدًا في المعادي
اصدرت في: 23/02/2016

من كتر ما طبيعة عملنا بـ تفرض علينا أننا نتعامل مع مطاعم وكافيهات كثيرة، وخاصة محلات الحلويات، بقى عندنا الخبرة أننا نقدر نفرق بين الأماكن الناجحة المحترفة، والأماكن اللي لسه محتاجة تتعلم الاحتراف والمهنية وللأسف ده اللي صدمنا في تعاملنا مع كاروت بايتس - Karrot Bites. أول ما شفنا الـ Website بتاعهم انبهرنا بشكل الكيك والحلويات المختلفة، وبما أننا بـ نتكلم عن الجزر وتورتة الجزر فهي كانت ملكة الـ Website غير برطمانات كيك الجزر والـ Red Velvet والبراونيز والكوكيز والزبادي بالفاكهة، ولازم نعترف أن الأسعار في البداية خضتنا خاصة أننا لاقينا تورتة بحوالي 700 جنيه، هي ممكن تكون كبيرة بس برضه المبلغ مبالغ فيه. المهم قولنا نجرب كل الأنواع المتاحة علشان تجربتنا تكون كاملة وعادلة، فطلبنا 4 برطمانات متنوعين (135 جنيه) والتوصيل تكلفته (25 جنيه)، والأنواع اللي طلبناها كانت كيك جزر وبراونيز وكوكيز وRed Velvet، وأكدنا عليهم أن التوصيل يكون الساعة 2 علشان ميعاد وصولنا من الشغل هـ يكون متأخر، والأوردر وصل حوالي 3:15، يعنى متأخر ساعة، ولما وصلنا البيت كانت المفاجأة، أن الطلب كله برطمانات كيك جزر وبعد ما اتصلنا أكثر من مرة برقم المكان وما ردوش اتصلنا بالشخص اللي جاب لنا الأوردر وقال لنا أنه هـ يحل المشكلة لكن ما اتصلش بنا ثاني، وبعد إيميل حاد للشركة لاقيناهم بـ يتصلوا وبـ يعتذروا وبـ يأكدوا أن طلبنا هـ يتبدل، المهم الاتصالات دي كلها كانت حوالي الساعة 7 علشان يوصل لنا الأوردر بتاعنا الساعة 10:30، واللي بالنسبة لنا طبعًا متأخر. حاولنا نتغاضى عن سوء الإدارة لأن حتى ما كانش فيه فاتورة للي طلبناه والمبلغ اتبعت على الإيميل بتاعنا بس، وبرغم أنهم بعتوا لنا الثلاث برطمانات اللي طلبناهم وما أخدوش الثلاثة الجزر اللي جم غلط، كنوع من أنواع الاعتذار إلا أن الأخطاء ما توقفتش عند الحد ده للأسف، فتحنا برطمانات الكوكيز والبراونيز لقيناهم عبارة عن قطع كيك فقط من غير كريمة وده خطأ شنيع وفي الغالب ناتج عن اللخبطة اللي حصلت، طعم البراونيز كان مر جدًا لأنها معمولة بـ Dark Chocolate من غير كريمة وكانت لا تحتمل بالنسبة لنا والكوكيز ما كانتش طازة ومليانة مكسرات زيادة عن اللزوم، لكن كان فيه كمية كريمة مضاعفة في الريد فيلفت واللي كانت عبارة عن طبقتين، يعني هم لو كانوا وزعوا كريمة الريد فيلفت على الثلاث برطمانات كنا اتبسطنا كلنا. الحاجة الإيجابية الوحيدة في الموضوع كانت كيك الجزر لأنها كانت هشة وطعمها متوازن بين المكسرات والكيكة والكريمة، برغم أن الكريمة كانت قليلة شوية، يعنى برطمان واحد منها يقدر ينسيك كل اللي حصل، لكن لو هـ نتكلم على أي نوع من أنواع المهنية أو الاحتراف أو التنسيق فللأسف كاروت بايتس ما عندهمش أي فكرة عن الحاجات دي، كنا نتمنى نعطيهم تقييم أعلى من كده بس ممكن نقول أن اليوم ده ما كانش يومهم إطلاقًا.

...

كوفي كورنر: مكان جميل تبدأ به يومك بقهوة لذيذة وأكل خفيف في المعادي
اصدرت في: 10/02/2016

من فترة قريبة اكتشفنا جمال قهوة إيلي - illy واللي أصحبنا حرفيًا مدمنينها، لدرجة أن بقى صعب نشرب قهوة غيرها، لأنها فعلًا لها نكهة مميزة وقوية، ودي أول حاجة جذبتنا نجرب كوفي كورنر - Coffee cornerفي دجلة المعادي، واللي بـ يفتح من بدري علشان تستمتع بالقهوة بتاعتك قبل ما تروح الشغل، وبـ يعملوا ساندويتشات خفيفة وكوكيز وتشيز كيك تقدر تفطر بهم براحتك، وتبدأ يوم مبهج مليان حيوية ونشاط. أول ما دخلنا المكان لاقينا ترابيزتين بس جوه وترابيزة واحدة بره، وتقدر تطلب اللي أنت عاوزه وتنطلق بسرعة عادي، إحنا وصلنا أول ما المكان فتح تقريبًا، واحتارنا في منيو القهوة ما بين شوت الأسبريسو والماكياتو والكابتشينو والحاجات الثانية زي السموزي والساندويتشات اللي شكلها مغري جدًا سواء تركي أو جبن وكلوب ساندويتش والحلويات، اختارنا كابتشينو (21 جنيه حجم وسط) وعليه إضافة فانيليا (4 جنيه)، وسموزي Passion fruit بـ 23 جنيه، وتشيز كيك (20 جنيه) وقطعتين كوكيز بقطع الشوكولاتة (11 جنيه). أول حاجة جربناها كانت الكابتشينو اللي طعم القهوة فيه كان قوي، وزودنا عليه بودرة شوكولاتة ضبطت الدنيا، وكان طعمه كويس جدًا، أما بقى التشيز كيك كانت تحفة لأنها كانت صابحة جدًا مع صوص التوت الشهي، خلانا نعيش سمفونية من الجمال نتمنى أنها تتكرر كل يوم الصبح، بعد كده جربنا سموزي الـ Passion fruit اللي برضه كان حلو جدًا ومافيهوش ثلج كتير، وبالنسبة للكوكيز فكانت طرية ومقرمشة في نفس الوقت، وده أعطى لها معزة خاصة عندنا ونعتقد أننا أدمناها خلاص. تجربتنا في كوفي كورنر كانت ممتعة جدًا، نتمنى بس أنهم يعلقوا يافطة تقول أن مافيش تدخين جوه لأن فيه حد كان بـ يدخن جنبنا وخلانا نضطر نخلص زيارتنا بسرعة علشان مش قادرين نتنفس.

...

تشوكوليت مانيا: شوكولاتة متقدمة بشكل مبهر لكن بطعم مقبول في المعادي
اصدرت في: 01/02/2016

بطبيعة عملنا كمحررين لكايرو 360 بـ نجرب أماكن كثيرة، وبـ نقدر نفرق ما بين الطعم القوي الشهي وبين الطعم العادي اللي ممكن يكون أقل من المستوى المطلوب في الطعم والاحترافية، وللأسف ده اللي لاقيناه في تجربتنا مع تشوكوليت مانيا – Chocolate Mania. فرحنا جدًا لما عرفنا أن فرع جديد لهم فتح في المعادي في شارع 9 وكنا متشوقين نجربه، وشوقنا زاد أكثر لما شوفنا المنيو اللي مليان حاجات مختلفة، زي البرجر اللي معمول من الـ Macron وحقنة الشوكولاتة وبيتزا الشوكولاتة وشاورما الشوكولاتة، بس ده كله يتوقف على نوع الشوكولاتة، هل الاختراعات دي هـ تنجح ولا هـ تكون مجرد مغامرة غير محسوبة؟ إحنا قلنا كبداية ناخد الحاجات العادية فـ طلبناchocolate pot بـ 80 جنيه، وكان معاه 4 اختيارات اختارنا مارشميلو وموز وكيوي وكور بروفترول. أول ما وصلت كانت الشوكولاتة باردة للأسف، فـ طلبنا من الجرسون يسخنها وكان طعمها أقرب للشوكولاتة العادية كأننا اشترينا بار شوكولاتة وسيحناه، مش ممتعة أو غنية زي ما متعودين برغم أن المفروض أن نوع الشوكولاتة يكون بلجيكي زي ما قال لنا الجرسون بس قولنا نعديها، وقلنا نجرب المولتين كيك (35 جنيه) وقدم لنا معاه آيس كريم مالتيزر ومكسرات من فوق. هو شكله كان حلو والشوكولاتة خرجت منه سايحة برضه عادي، لكن للأسف كطعم ما عرفناش ناخد منه أكثر من معلقتين، طعم الشوكولاتة كان جاف جدًا مع مكسرات من فوق وآيس كريم ثقيل غير القهوة اللي فوق الشوكولاتة، كانت تركيبة ثقيلة جدًا وغير مرضية بالمرة، برغم أن الجرسون حاول يصلحها بأنه يجيب لنا آيس كريم فانيليا، بس برضه طعمه كان غير مقبول، ختمنا يومنا بـ 2 شاي في الجو البرد اللي كنا فيه، منهم شاي عادي بالكراميل (15 جنيه)، وشاي بالفراولة (18 جنيه)، وكانت باكيت عادي مافيهوش اختراع. كنا نتمنى تجربتنا في المكان ده كانت تكون مبهجة أكثر من كده، ونتمنى أنهم يهتموا بطعم وجودة الحاجة زي ما بـ يهتموا بشكلها، لأنها فعلًا هـ تفرق كثير.

...

أنطي لولو: أحسن حلويات خفيفة ممكن تستمتع بها في المعادي
اصدرت في: 12/11/2015

كثير بـ نحتاج من فترة للثانية حاجة حلوة مسكرة، كده بالتعريف البسيط واللي مؤخرًا بقيت في صورة كب كيك ووافلز أو Chocolate Fountain وإن كنا بـ نلجأ لأبسط حاجة علشان نضيع الإحساس ده بأننا نأكل مجرد قطعة شوكولاتة، واللي رجع لنا الإحساس بالبساطة والجمال هو أنطي لولو – Auntie Loulou اللي كنا كتبنا عنه مقال نقدي قبل كده أول ما فتح في شارع 9 في 2011. المكان صغير جدًا مجرد 3 ترابيزات والمطبخ مفتوح جنبك بـ يفصلك عنه مجرد بار التقديم وثلاجة الآيس كريم، والمنيو مجرد ورق أصفر A4 مقسوم نصفين، لكن الطعم حكاية. أول ما مسكنا المنيو ولاقينا تنوع كبير، فـ سألنا لو فيه حاجة مش موجودة لأن في الأغلب ده اللي بـ يحصل في أغلب الأماكن اللي بـ نروحها مؤخرًا، لكن الحمد لله كله موجود، المنيو فيه كل ما يمكن أن تتخيلوه ولا تتخيلوه: كريب مالح وحلو ووافلز وبان كيك وتشيز كيك وبروانيز وكمان عصائر فريش أو قهوة. قررنا أننا نجرب من كل حاجة حاجة، فـ طلبنا كريب حادق بالموتزاريلا والسلامي بـ 25 جنيه، وبان كيك بـ 25 جنيه وبـ تقدم معاها ثلاثة صوصات عسل ومابل وشوكولاتة، ومولتن كيك بـ 23 جنيه، وعصير ليمون بالنعناع بـ 18 جنيه، وعصير برتقال بـ 13 جنيه. والطلبات كلها خلصت في ظرف نصف ساعة، نبدأ بكريب الموتزاريلا والسلامي كان طعمه حلو بس نعتقد أنه ممكن يكون نقطة الضعف الوحيدة للمكان لأنه متخصص في الحلو، الكريب كان قوامه مضبوط لكن جواه موتزاريلا وسلامي بس، فـ تحس أن الطعم ناقصه حاجة، يمكن لو كانوا حطوا حبة صوص طماطم أو باربكيو أو جزر حتى الطعم كان بقى أحلى. أما البان كيك فأقل ما يقال عنه أنه تحفة، التوازن ما بين المكونات والطعم البيتي اللي بـ يتميز به أنطي لولو، كمان كان معاه على جنب مابل وصوص وعسل وشوكولاتة نوتيلا، فـ كان طعمه حكاية، ننصح به محبي الفطار الخفيف. أما بقى القنبلة السكرية اللي أكلناها كانت المولتن كيك، لأنه حط جواها شوكولاتة نوتيلا وبعدين من فوقها صوص شوكولاتة، وطبعًا مع أول شوكة بـ يبقى فيه انهيار للشوكولاتة السايحة، ومن فوق بـ يحط بولة آيس كريم فانيليا موفنبيك واللي جننتنا بحلاوتها. عصير الليمون بالنعناع كان حلو قوي برضه ومتوازن، لكن على عكسه عصير البرتقال ما كانش فريش وطعمه كان متخزن بقى له كثير برغم أننا في موسم البرتقال. أنطي لولو تجربة لطيفة لو عاوز تأكل حاجة مسكرة خفيفة ومش غالية وتبهجك، يبقى ده أكيد مكانك.

...

برانش & لانش: بيسترو مبهج مليان أكلات محترفة ولذيذة في المعادي
اصدرت في: 21/10/2015

دائمًا الأماكن اللي جمالها يلمس روحك مش بـ تلاقيها بسهولة، مش دائمًا تدخل مكان وتحس فيه بالدفء والبهجة، وده اللي حصل لنا أول ما رحنا برانش أند لانش – Brunch & Lunchفي شارع 9 في المعادي واللي لسه فاتح من حوالي شهر. جذبنا بألوان الكراسي الملونة المبهجة، واللوجو اللي كله ألوان واسمه كمان مختلف يشدك، لأن وجبة الـ Brunch في مصر مش معروفة قوي، تعتبر معروفة أكثر للأجانب وهي زي وجبة خفيفة كده بين الفطار والغداء، واللي أغلب المصريين في الشغل بـ يأكلوها وبـ تبقى في الأغلب دليفري، مش زي بره مصر بـ ياخدوا ساعة راحة يروحوا ياكلوا في المكان اللي يحبوه، وجبة الـ Brunch. ما علينا إحنا حبينا نجرب حاجة ثانية خالص ألا وهي الفطار هناك، لأن شارع 9 الصبح بـ يبقى هادئ وجميل، كمان الفطار عندهم في المنيو مغري جدًا ما بين البيض بكل أنواعه للجبن والتوست مع المربى، تقدر تختار اللي أنت عاوزه، أما طريقة عرض باقي الأكلات فـ عجبنا جدًا أنهم مقسمين في الصفحة الواحدة الاختيارات ما بين مقبلات ومعجنات خفيفة ووجبات عادية، حسينا كأن حد بـ يسهل عليك التفكير، اختار اللي تحبه وهم هـ يسهلوا الموضوع عليك، صحيح ما كانش فيه عدد وجبات كبيرة مختلفة لكن الحرفية اللي قدموها لنا في الفطار كفيلة أنها تضمن لنا جودة باقي الأكلات. طلبنا كبداية حاجة تفوقنا على الفطار، سموزي ليمون بالنعناع بـ 23 جنيه، وبان كيك بـ 23 جنيه برضه، وEgg benedict beef بـ 38 جنيه، ومن هنا تبدأ الحكاية، مبدئيًا قبل ما أي حاجة توصل بـ تيجي لك فوطة معقمة سخنة علشان تعقم بها أيديك وبعد كده قدموا لنا سموزي الليمون بالنعناع وكان قوامه مضبوط وطعمه مميز وبعد فترة جاء لنا الـ benedict، وهنا المفاجأة.. إحنا حسينا أننا دخلنا برنامج ماستر شيف لأن تقديم الطبق بـ يحتاج حرفية في تسوية البيض لأنه بـ يستوى بدرجة حرارة معينة تخليه يبقى مستوى وفي نفس الوقت الصفار نيء، وقد كان مع أول شوكة للتوست اللي عليه روزبيف وفي الآخر بعد البيض صوص الهولنديز الممتع، أكلنا وجبة ممتعة بكل معنى للكلمة خاصة أنه بـ يبقى فيه طلبين جانبيين: بطاطس ويدجز وحاجة ثانية من اختيارك وإحنا اختارنا سوسيس وبرضه كان درجة تسويته ممتازة، مافيش احتراف أكثر من كده، بعد كده جاء لنا البان كيك ومعاه صوص مابل اللذيذ وكان على الجانبين تفاح مقطع ساعدنا أنه يكسر طعم السكر القوي، الحاجة الوحيدة اللي ضايقتنا أن سُمك البان كيك كان تخين شوية كنا نتمنى أنه يبقى أرفع من كده. بشكل عام "برانش & لانش" مكان مميز تقدر تستمتع به هناك بوقتك مع عائلتك أو صحابك، بأكلة متميزة معمولة بحرفية وفن.

...

سويت كورنر: جاتوه طازة وحلويات ممتعة في المعادي
اصدرت في: 27/08/2015

محلات الحلويات في المعادي معروفة، وطبعًا ما بين عمالقة الحلوى زي Sale Sucre وDelight، ممكن نعتبر سويت كورنر – Sweet Corner فضل مدة زمنية طويلة محافظ على سمعته وجودة منتجاته. أول ما دخلنا المكان تفاجأنا أنه لسه بـ يقدم منتجات رمضانية، وده كان شيء مبهج بالنسبة لنا، لسه فيه كنافة بالمانجو وكحك وبسكويت، كمان كان عامل تشكيلة جديدة من الماكرون الملون روز وأخضر وأصفر، الكيلو بـ 100 جنيه، ذوقنا واحدة كان طعمها حلو قوي، بس مسكرة زيادة عن اللزوم بالنسبة لنا ننصح بها لعشاق السكر. كمان تشكيلة التورتات اللي عنده كانت حلوة قوي، ما بين تورتة أم أند أمز وكيت كات بـ 120 جنيه، وتورتة كنافة بالمانجو، والتورت العادية اللي نصف شوكولاتة ونصف فانيليا، بس الجديد كانت التورت اللي بـ يبقى عليها عجينة سكر للتزيين، وممكن تختار من الكتالوج الشكل اللي تحبه، لو عاوز تعمل عيد ميلاد مميز لطفل. كمان كان فيه تشكيلة حلويات شرقية بـ تُباع بالكيلو، وكنابيه (ساندويتشات صغيرة) النصف كيلو بـ 45 جنيه، وجاتوه سواريه بـ 70 جنيه، غير تورت الآيس كريم اللي بحوالي 130 جنيه. نيجي بقى لأكثر حاجة بـ نحبها في سويت كورنر.. "الجاتوه"، ليه ده أكثر حاجة بـ نحبها عندهم؟ لأنه ببساطة مافيش في حلاوته، كمان بـ يبقى طازة جدًا لدرجة تخليه يذوب في فمك، مهما كان اللي طلبته، لما وصلنا ما كانوش حطوا كل الأنواع، فاستنينا شوية، وطلبنا 4 قطع: كراميل، وشوكولاتة بالكراميل، وفانيليا بالكيوي والأناناس، وبلاك فورست، القطعة الواحد بـ 9 جنيه، كمان كان فيه ميل في، وإكلير، وكور خالصة من الشوكولاتة، بس لأننا مش من محبي الشوكولاتة اكتفينا بالجاتوه. نبدأ بقطعة الكراميل، وكانت حلوة جدًا وخفيفة، تدخلك في عالم ثاني مافيهوش غير السكر بس والعذوبة، أما قطعة البلاك فورست فلأننا من عشاقها فمش هـ نعرف نعطيها حقها في الوصف، بس هي كانت طازة ومنعشة، كمان قطعة الشوكولاتة بالكراميل كانت مختلفة، بس لأننا مش من عشاق الشوكولاتة ما حبيناهاش قوي، لكن اللي كانت متناهية الجمال هي قطعة الفانيليا بالكيوي والأناناس، بمجرد ما تأخد شوكة واحدة منها، هـ تطير لمدينة الفانيليا الساحرة، طبقات الكيكة الهشة الخفيفة مع الفانيليا الرائعة، المتوجة بالكيوي والأناناس، لازم تخطفك لمدينة السعادة اللي فيها كل منتجات الفانيليا بس. باختصار سويت كونر من أحسن الأماكن اللي تشتري منها جاتوه، أو تورتة، نتمنى أنكم تستمتعوا بكل حاجة هناك.

...

المدينة المنورة: أشهى مخبوزات طازة ولذيذة في المعادي
اصدرت في: 20/08/2015

فيه أماكن معينة بـ تبقى محفورة في ذاكرتنا، ذكريات بسيطة بس متعلقة بأجمل سنين طفولتك، زي ريحة العيش الفينو السخن من المخبز اللي بـ نشتريه كل يوم علشان ساندويتشات المدرسة الصبح، ومن الأماكن اللي بـ ترجع لنا الذكريات دي مخبز "المدينة المنورة"، هو مخبز عادي مافيهوش ديكورات مميزة، أو منيو شيك تختار منه اللي أنت عاوزه، مجرد رائحة المخبوزات قادرة أنها تغريك بدون مقدمات فـ تقرر أنك تشتري كل اللي بـ تحبه وريحته في مناخيرك. أول ما بـ تدخل بـ تلاقي على أيدك اليمين ركن خاص بالباتون ساليه، وفيه منه الرفيع بالكمون وفيه منه اللي بحبة البركة بس حجم سميك أكثر، بعد كده بـ ننتقل لزاوية المخبوزات الشهية، وده كان صف طويل بالطول مليان أرفف كل رف فيه حاجة مختلفة، من ميني كرواسون بالجبنة، وبوريك بالجبنة، وميني بيتزا، ده غير أنواع البسكويت والكيك والتوست الناشف الأصفر، و البسكوت الملفوف بالشوكولاتة، كل حاجة معمولة بدقة وطعمها يجنن. وطبعًا إحنا ما قدرناش نقاوم، طلبنا ربع كيلو باتون ساليه بالكمون بـ 5 جنيه، وكان طعمه أكثر من رائع خفيف وطعم الكمون فيه مضبوط، لا أكثر من اللزوم ولا كثير بزيادة، حاجة كده لو فضلت تأكل منها طوال اليوم مش هـ تزهق ومش هـ تعرف تبطل أبدًا، جيبنا كمان ميني كرواسون بالجبنة البيضاء وده بـ يبقى في علبة من الفوم نصف كيلو، من حظهم أننا من عشاق الكرواسون بكل أنواعه ومش أي كرواسون يعجبنا لازم يبقى فريش ومش مزيت وله مواصفات دقيقة ثانية كثيرة، وكل المواصفات دي كانت متوفرة، الكراوسون كان فريش وطعمه متناسب مع كمية الجبنة البيضاء المتوسطة، حاجة كده تفطر بها الصبح مع كوباية الشاي بروقان. وما قدرناش نشوف الميني بيتزا برضه (طبق نصف كيلو بـ 12.50 جنيه) من غير ما نجيبه، خاصة أن كل المكونات اللي عليه كان شكلها حلو وبيتي، على عكس الطبيعي في المخابز، والجبنة سايحة والطماطم شكلها طازة. كمان اشترينا بوريك بالجبنة برضه طبق من الفوم نصف كيلو بـ 11 جنيه، وكان طعمه حلو قوي، كان عنده كمان فطير مشلتت شكله شهي جدًا وبيتزا حجم كبير، وكيكة حجم كبير مش مجرد الكب كيك بس. المخبز بشكل عام تجربة ممتعة بالنسبة لنا، ومليانة ذكريات جميلة وروائح ممتعة، أكيد دي مش هـ تبقى زيارتنا الأخيرة لهم، وننصح كل سكان المعادي يجربوا يعدوا عليه.

...

كنافة: حلويات رمضان مفتكسة في شارع 9 بالمعادي
اصدرت في: 12/07/2015

محلات الحلويات من أول الشعبي لغاية أعلى المستويات في رمضان بـ يكون الموسم بتاعهم وكل واحد بـ يحاول يفرد عضلاته سواء كان باختراعات جديدة أو التأكيد على جودة المنتجات القديمة، فيه منهم اللي أبهرنا باختراعاته وفيه منهم اللي أدهشنا بغباءه. في شارع 9 في المعادي وبالقرب من ميدان المحطة وأمام ملك الكب كيكس في مصر "نولا كب كيك"، بدأت شوية توضيبات وتحضيرات نشوفها في آخر شهر 5 ويافطة محل اسمه "كنافة – Kunafa" تظهر، الجواب باين من عنوانه، أكيد محل متخصص في الكنافة بكل أشكالها وحركاتها، ومع بداية شهر رمضان كان الافتتاح. المحل بدأ يأخذ شهرته شوية بشوية من أصحابنا وخصوصًا لما تباينت الآراء حوله، واجهة باللون التركوازي هـ تأخذ نظرك مع ديكور مصري ظريف بالألوان الذهبية وأبواب خشبية زي أبواب زمان، المساحة الداخلية للمحل مش كبيرة ومش صغيرة لكنها موزعة كويس، أول ما تدخلوا هـ تلاقوا مساحة لعرض أصناف الكنافة غير التقليدية بأحجام مختلفة وعلى الشمال مساحة لعرض أشكال الكنافة التقليدية زي العثمانلي والمبرومة والقشطة والمكسرات وغيرها، بعد الفطار "كنافة" بـ يحطوا ترابيزات وقعدة رمضانية بره المحل زي أغلب الأماكن في شارع 9. "كنافة" علشان لسه فاتحين ما عندهمش منيو تقدروا تطلبوا منها لكنهم شغالين عليها على حسب كلام أحد الموظفين هناك، بعد شوية تجول وأسئلة مع الـStaff الظريف طلبنا 1 كنافة بالمانجو صغير (15 جنيه) و1 كنافة بالنوتيلا صغير (15 جنيه) و1 كنافة بالجبنة والبلوبيري وسط (30 جنيه)، فيه أحجام أكبر تكفي 4: 6 أشخاص بـ يتراوح سعرها من (80: 200 جنيه). الكنافة بالمانجو كانت مختلفة عن أي كنافة بالمانجو ثانية جربناها، عبارة عن طبقة من الكريم باستري وعليه مكعبات متوسطة من المانجو وملفوفة بكنافة مقرمشة وذهبية اللون، طريقة جديدة عجبتنا جدًا، أما النوتيلا كانت بنفس الطريقة وبرضه كانت رائعة (للأسف مش نوتيلا، هي شوكولاتة Naussa ودي تقليد لشوكولاتة النوتيلا وقريبة قوي منها لكن قوامها أخف ومسكرة زيادة عنها) وعليها كورتين من شوكولاتة الـ Maltesers، كنافة البلوبيري كانت عبارة عن طبقة من الكنافة اللذيذة ونصف مقرمشة وعليها طبقة من الجبنة والكريمة الخفيفة جدًا وطعمها رائع ومن فوق طبقة مش قليلة من مربى البلوبيري وشوية فستق، صحيح هي اختراع لكن كنا شايفينها معقولة. انطباعنا العام عن المحل أنه هـ يبقى منافس مش سهل في سوق الحلويات وخصوصًا أنه لسه فاتح من قريب قوي، لكن كنا شايفين الأسعار مبالغ فيها شوية بس بالمقارنة مع غيره وجودة الأصناف، كنا شايفين أنها أسعار ظريفة لكنها أكيد مش هـ توصل للمحل الظريف اللي كان بـ يبيع صينية كنافة بالمانجو بـ 350 جنيه.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن