عصائر كافيهات in المعادي Cairo, Egypt

كافيهات

برانش & لانش: بيسترو مبهج مليان أكلات محترفة ولذيذة في المعادي
اصدرت في: 21/10/2015

دائمًا الأماكن اللي جمالها يلمس روحك مش بـ تلاقيها بسهولة، مش دائمًا تدخل مكان وتحس فيه بالدفء والبهجة، وده اللي حصل لنا أول ما رحنا برانش أند لانش – Brunch & Lunchفي شارع 9 في المعادي واللي لسه فاتح من حوالي شهر. جذبنا بألوان الكراسي الملونة المبهجة، واللوجو اللي كله ألوان واسمه كمان مختلف يشدك، لأن وجبة الـ Brunch في مصر مش معروفة قوي، تعتبر معروفة أكثر للأجانب وهي زي وجبة خفيفة كده بين الفطار والغداء، واللي أغلب المصريين في الشغل بـ يأكلوها وبـ تبقى في الأغلب دليفري، مش زي بره مصر بـ ياخدوا ساعة راحة يروحوا ياكلوا في المكان اللي يحبوه، وجبة الـ Brunch. ما علينا إحنا حبينا نجرب حاجة ثانية خالص ألا وهي الفطار هناك، لأن شارع 9 الصبح بـ يبقى هادئ وجميل، كمان الفطار عندهم في المنيو مغري جدًا ما بين البيض بكل أنواعه للجبن والتوست مع المربى، تقدر تختار اللي أنت عاوزه، أما طريقة عرض باقي الأكلات فـ عجبنا جدًا أنهم مقسمين في الصفحة الواحدة الاختيارات ما بين مقبلات ومعجنات خفيفة ووجبات عادية، حسينا كأن حد بـ يسهل عليك التفكير، اختار اللي تحبه وهم هـ يسهلوا الموضوع عليك، صحيح ما كانش فيه عدد وجبات كبيرة مختلفة لكن الحرفية اللي قدموها لنا في الفطار كفيلة أنها تضمن لنا جودة باقي الأكلات. طلبنا كبداية حاجة تفوقنا على الفطار، سموزي ليمون بالنعناع بـ 23 جنيه، وبان كيك بـ 23 جنيه برضه، وEgg benedict beef بـ 38 جنيه، ومن هنا تبدأ الحكاية، مبدئيًا قبل ما أي حاجة توصل بـ تيجي لك فوطة معقمة سخنة علشان تعقم بها أيديك وبعد كده قدموا لنا سموزي الليمون بالنعناع وكان قوامه مضبوط وطعمه مميز وبعد فترة جاء لنا الـ benedict، وهنا المفاجأة.. إحنا حسينا أننا دخلنا برنامج ماستر شيف لأن تقديم الطبق بـ يحتاج حرفية في تسوية البيض لأنه بـ يستوى بدرجة حرارة معينة تخليه يبقى مستوى وفي نفس الوقت الصفار نيء، وقد كان مع أول شوكة للتوست اللي عليه روزبيف وفي الآخر بعد البيض صوص الهولنديز الممتع، أكلنا وجبة ممتعة بكل معنى للكلمة خاصة أنه بـ يبقى فيه طلبين جانبيين: بطاطس ويدجز وحاجة ثانية من اختيارك وإحنا اختارنا سوسيس وبرضه كان درجة تسويته ممتازة، مافيش احتراف أكثر من كده، بعد كده جاء لنا البان كيك ومعاه صوص مابل اللذيذ وكان على الجانبين تفاح مقطع ساعدنا أنه يكسر طعم السكر القوي، الحاجة الوحيدة اللي ضايقتنا أن سُمك البان كيك كان تخين شوية كنا نتمنى أنه يبقى أرفع من كده. بشكل عام "برانش & لانش" مكان مميز تقدر تستمتع به هناك بوقتك مع عائلتك أو صحابك، بأكلة متميزة معمولة بحرفية وفن.

...

جربيس: أكل ممتع ومشروبات ممزوجة بالسعادة في شارع 9 بالمعادي
اصدرت في: 13/09/2015

شارع 9 بالنسبة لسكان المعادي خاصة، وباقي سكان القاهرة عامة، مكان مميز بـ يشمل كل أنواع المطاعم والكافيهات، يعني هم يوصلوا شارع 9 وبعدين يقرروا هـ يروحوا فين، بس بالنسبة لنا كمحررين لكايرو 360 ومن سكان المعادي، فإحنا حافظينه عن ظهر قلب، وفرحنا جدًا أول ما عرفنا أن جربيس - Grapes فتح من قريب هناك، واللي كنا منتظرينه من فترة لأن اللوجو بتاعه كان جاذبنا جدًا بألوانه الموف في أخضر أو بينك في أخضر على حسب الإضاءة. المكان كبير جدًا مقسم لثلاث أجزاء، جزء مطل على شارع 9 نفسه وجزء مستطيل جنبه، ودول مفتوحين وفيه بالداخل مكان مقفول مكيف، بس الصبح بقى سقفه بـ يتفتح والزجاج اللي على الجنب كمان بـ يتفتح فـ بيبقى المكان كله مفتوح، علشان تستمتع بالشمس والهواء المنعش الصبح بدري. أكثر حاجة عجبتنا في المكان أنه ألوانه مبهجة سواء ديزاين الكراسي اللي مليان ورود ملونة ومبهجة أو الورد المعلق على الحيطان غير التابلوهات طبعًا. المنيو شكله لطيف أول صفحتين معمولين من الخشب ومنحوت جواهم اسم المكان، واللي متنوع جدًا في وصفاته، ما بين الشوربة والسلاطة والمقبلات والمكرونة والبيتزا والأطباق الرئيسية. بدأنا من منيو المقبلات بـ Mussels Provencal بـ 49 جنيه، وده بلح بحر مع الزيتون وصلصة طماطم، كان طعمه حلو جدًا، بس بارد شوية كنا نتمنى يبقى أسخن. كمان طلبنا شوربة كريمة بالفراخ والذرة بـ 25 جنيه، وطعمها كان ممتاز صحيح القوام كان محتاج يبقى أكثر سمكًا بس الطعم لا يُعلى عليه. بعد حوالي نصف ساعة وصل الأطباق الرئيسية وكنا طلبنا Fillet Mignon بـ 96 جنيه وبـ يبقى معاه 2 أطباق جانبيه من اختيارك، طلبنا أرز وبطاطس معاه، الفيليه بـ يبقى عليه بـ يكون مع صوص بني خفيف بالعسل، وطعمه كان تمام جدًا مع التسوية الـ well done المضبوطة، قطعة اللحم كانت عصارية ومستوية تمام استمتعنا بكل قضمة فيها. الطبق الثاني اللي طلبناه كان Chicken Roll بـ 68 جنيه، وبـ يتقدم معاه مكرونة بصوص البيستو، إحنا حصل معانا وقف غريب بـ نتعرض له كثير وبـ يبين إذا كان المكان ده محترف والخدمة عنده ممتازة ولا لأ، أول ما الطبق وصل وذقناه، الفراخ كانت جافة جدًا والصوص سائل وخلطة البيستو خفيفة جدًا، فـ طلبنا من الجرسون يغيروا أو يشوف الطبق ماله! فغير لنا الطبق بالكامل وعمل واحد جديد صوص البيستو فيه ممتاز والفراخ ريحتها لوحدها كفيلة أنها تغير مودك، صحيح اتأخروا شوية في عمل ثاني طبق لدرجة أننا شبعنا بس طعمه كان مختلف وممتع. بالنسبة لنا من المعايير الأساسية أو التفاصيل الدقيقة اللي بـ تخلينا نعتبر المكان ده محترف ولا لأ غير طبعًا الخدمة والديكور، الحلويات والعصائر، ونقدر نقول أنهم نجحوا بجدارة مش بس علشان المنيو المتنوع جدًا ما بين مشروبات ساخنة وباردة وسموزي لأ ده كل حاجة عنده معمولة باهتمام وإتقان وحب، طلبنا من الكوكتيلات Margarita بـ 27 جنيه. وده عبارة عن سفن آب وليمون ومكعبات ثلج خاصة بالمارجريتا، وطعمه كان تحفة زي ما بـ نحبه بالضبط. كمان طلبنا سموزي مانجو بـ 20 جنيه، وكان أجمل سموزي ممكن تشربه في حياتك متوازن ومنعش بعد الأكلة الدسمة دي، بس أجمل حاجة أكلناها في اليوم فعلًا، كانت الـ Crème de la Meme بـ 35 جنيه، ودي زي الكريم بروليه بالضبط بس زيادة طبقة بسكويت من تحت، وكان طعمها حكاية ورواية تبدأ بطبقة السكر المحروق اللي أول ما تخبطه بالمعلقة تسمع أجمل صوت تكسير في الدنيا لطبقة زجاجية خفيفة، وبعد كده تدخل على طبقة الكريمة مع طبقة البسكويت الدايب اللي كنا نتمنى يبقى مقرمش شوية، بس كان طعمه ممتاز، يعني كان أجمل ختام لليوم. جربيس مكان لطيف جدًا للعائلة أو للأصحاب، أيًا ما كان اللي هـ تطلبه هـ تستمتع به أكيد، سواء أكل أو مشروبات، لأن كل حاجة بـ يعملوها بحب وشغف واهتمام ودي عوامل النجاح لأي مكان.

...

ليتشي: عصائر صحية وأكل خفيف هيحافظ على رشاقتك في المعادي
اصدرت في: 18/08/2015

بـ نفرح جدًا بالأماكن اللي بـ تقدم أكل أو مشروبات صحية، لأنها بـ تساعدنا أننا نتخلى عن الأكل المضر، ونسعى أننا نقلل من كمية الدهون اللي بـ نأكلها ونشربها كل يوم، "ليتشي - Lychee" محل عصائر بالأساس فاتح من زمان في الزمالك، وفتح في الفترة الأخيرة مجموعة فروع كثيرة منها الفرع اللي زورناه النهارده، فرع المعادي. قبل ما نروح كنا لازم نشوف المنيو بتاعهم علشان ما نحتارش هناك، بس للأسف برضه لما رحنا احتارنا لأن الوقت كان لسه بدري ومش كل الأصناف كانت متوفرة. في المنيو كل العصائر الموجودة مكتوب جنبها عدد السعرات والبروتين والكربوهيدرات، وبعدين منقسمة أقسام، ما بين السموزي والكوكتيلات المختلفة والسلاطات والساندويتشات ووجبات خفيفة ثانية، بس أكثر حاجة لفتت نظرنا أنهم عاملين برنامج خاص لعصائر الـ Detox وللي ما يعرفوش ده عصير مفيد بـ يطرد السموم من الجسم بس لازم تفضل تشربه لثلاث أيام على الأقل وللأسف طعمه مش بـ يبقى حلو قوي، هو عبارة عن كوكتيل مكون من خضروات وفاكهة وبـ يختلف في برنامج ليتشي أن اليوم بـ يبقى مكون من 3 عصائر للغذاء والعشاء والفطار، تكلفة اليوم 60 جنيه، ده غير العصائر الغنية بالبروتين اللي تمدك بالطاقة لو أنت رياضي وبـ تعمل تمارين كثيرة، وده بالتعاون مع BeFit اللي في المعادي برضه، ده غير الوجبات الخفيفة اللي بـ تبقى ما بين سلاطة وزبادي بالفاكهة والجرانولا. المهم طلبنا من قسم السموزىThe berry land بـ 20 جنيه، وده عبارة عن عصير فراولة وتوت وموز وزبادي، وطعمه كان حلو برغم أن طعم الموز طغى على طعم أي حاجة ثانية، كان نفسنا يبقى أخف شوية، أما اللي عجبنا جدًا وكان فريش بطريقة مش طبيعية ينعشك ويخليك تبدأ يومك بنشاط هو عصير الـ Orange Passion بنفس السعر، وده عبارة عن برتقال وفراولة وزبادي وباشون فروت، بس إحنا بدلنا الفراولة بالأناناس، لأننا مش من عشاق الفراولة، وكان طعمه وهمي، كأنك رحت على جزيرة في وسط البحر ومستمتع بعصير استوائي منعش. وطلبنا كمانGreek Passion بـ 30 جنيه، وده عبارة عن زبادي يوناني قوامه بـ يبقى سميك أكثر من الزبادي العادي بتاعنا، وفوقه طبقة عصير مانجو وتحته طبقة عصير باشون فروت، وبـ يضيف عليه جرانولا، تكوينه مع طعمه كان هائل، واجهتنا مشكلة واحدة بس أن نسبة الزبادي أكبر من العصير، فبالتالي ما استمتعناش قوي بطعم عصير المانجو مع الباشون فروت، كان نفسنا الكمية تكون أكبر، يعني يبقى فيه نسبة وتناسب مش أكثر. كمان قلنا نجرب الساندويتشات فطلبنا Chicken Metabolism Plus وسعره 35 جنيه، وده عبارة عن عيش بني مع دجاج ومكسرات وتوت ناشف وأعشاب وزبادي، وللأسف يا جماعة ده كان أسوأ حاجة أكلناها، هو الزبادي حلو وكل حاجة بس مش معنى ده أنه يتحط في الساندويتش بالكمية دي، طعم الزبادي مع الخس والبصل والعين الجمل، عمل لنا قفلة، ده غير أن الفراخ مش متبلة كفاية، لدرجة أننا كنا مش حاسين بطعمها، يمكن لو قللوا كمية الزبادي اللي كانت خارجة من الساندويتش بدرجة رهيبة الموضوع يبقى ألطف، ويزودوا صوص يربط النكهات ببعض، مع تتبيل الفراخ أكيد، كان نفسنا نجرب السلاطات بس للأسف ما كانتش موجودة. بشكل عام ليتشي مكان رائع لعصير صحي أو طبق سلاطة أو فاكهة، قدر أنه يحقق مع الكوكتيلات اللي بـ يقدمها التوازن السليم بين الحاجة الحلوة الصحية واللي ما بـ تتخنش، وده شيء نادر الوجود.

...

حسونة: حلويات شرقية وغربية ومخبوزات في زهراء المعادي
اصدرت في: 11/08/2015

برغم أن في الفترة الأخيرة انتشرت محلات الحلويات المختلفة، إلا أن فيه منها اللي فاتح من زمان جدًا بس عمرنا ما سمعنا عنه، زي المكان اللي زورناه النهارده "حسونة" اللي فتح من 1969 لكن فرعه الرئيسي في الدقي. حسونة فتح من فترة قريبة في زهراء المعادي جنب "خير زمان" و"لابوار"، وكانت جرأة منه الحقيقة أنه يفتح جنب "لابوار"، برغم أنه على حد علمنا متخصص أكثر في الحلويات الشرقية، لكن لما دخلنا لاقينا أنه عنده كل أنواع الحلويات تقريبًا إلا الحلويات الشرقية، وقالوا لنا أنها هـ تيجي النهارده بالليل، حسونة كان عنده تنوع غريب في المنتجات اللي بـ يبيعها، على يمينك ممكن تحس أنه مخبز من كثر المخبوزات اللي عنده من كرواسون وباتيه ومقرمشات، وبسكويت بأنواعه، وفي آخر الصف ده، بـ يبيع كل أنواع المكسرات من فستق وكاجو ولوز وبونبوني ألوان كمان، مغلفة في علبة مستديرة وبـ يبيعها بالكيلو. ده غير أن في المنيو لقينا أنه المفروض بـ يعمل عصائر وحلويات زي الأرز باللبن وأم علي وجيلي. أما على أيدك الشمال هـ تلاقي شوكولاتة بـ تتباع بالكيلو فكرتنا بشوكولاتة كوفرتينا كده، والحمد لله أنه كان حاططها في الثلاجة وإلا كان زمانها بقيت عصير، بعد كده ثلاجة الحلويات الغربية، اللي كان فيها تورتة ريد فيلفت وتورتة شوكولاتة، وأنواع قليلة من الجاتوه أو بالأخص التشيز كيك بس. بعد كده فيه ثلاجة آيس كريم فيها أنواع قليلة من الآيس كريم، زي البطيخ والفراولة والزبادي توت والكانتلوب والفانيليا. لكن للأسف لم يتم العصور على أي حلويات شرقية واللي كان نفسنا نجربها. المهم قلنا نجرب أكثر من حاجة عنده علشان نبقى ما ظلمناهوش. فـ طلبنا قطعة تشيز كيك بالكراميل بـ 16 جنيه، وقطعة تشيز كيك بالتوت بـ 15 جنيه، وربع كيلو بسكويت بالفانيليا، و2 بولة آيس كريم، واحد بالبطيخ وواحدة زبادي توت، والبولة بـ 5 جنيه. وخدنا الحاجات ومشينا لأن طبعًا مافيش مكان نقعد فيه، في الجو الحر جدًا ده كان لازم نبدأ بالآيس كريم لأننا لو استنينا لحد ما نروح هـ يبقى عصير، والغريب أن لون آيس كريم البطيخ كان روز فاتح، بينما لون الفراولة كان بينك فاتح، ولما سألناهم قالوا لنا علشان طعم طبيعي، المهم عديناها، بس ما قدرناش نعدي طعم البطيخ الحقيقة اللي كان ناقصه بطيخ، طعمه كان بلا نكهة، يا دوبك نفحة بطيخ فيه، على عكس الزبادي بالتوت اللي كان طعمه حلو، أما بالنسبة للبسكويت كان طعمه عادي، بس برضه يفتقد للنكهة شوية غير أنه كان ناشف زيادة عن اللزوم ونعتقد أن ده لأنه ما كانش طازة. نيجي بقى لطبق اليوم التشيز كيك، وبالصدفة يا جماعة وإحنا بـ نطلعها علشان نأكلها وقعت على الأرض بـ نقلبها، لاقيناها ولا تأثرت ما شاء الله لا الصوص وقع ولا أي حاجة، وده ليه، لأنهم طبعًا يختلفوا عن الآخرون، التشيز كيك كان عامل زي ما يكون قطع حجرية مرصوصة فوق بعض، صوص الكراميل ناشف من فوق والتشيز كيك ناشف جدًا، غير أن البسكويت من كثر ما هو ناشف ما عرفناش نقطعه بالشوكة، لكن قطعة التشيز كيك الثانية اللي بالتوت، كانت ألطف كثير ونعتقد أنها كانت طازة أكثر برغم أنها كان شكلها غريب والصوص خفيف، والقطعة طالعة لفوق مش متساوية إلا أن طعمها كان أحلى كثير وطعم الجبنة فيها كان حلو وطري وطبقة البسكويت كانت قابلة للأكل، كان نفسنا نجرب الحلويات الشرقية علشان نبقى جربنا كل حاجة بس كفاية علينا كده وكمان هي ما كانتش موجودة. نتمنى أنهم يضبطوا الأخطاء دي، علشان المرة الجاية نعطى لي تقييم أفضل.

...

لا فريز: أجمل عصير فريش ينعشك مع الحر ده في المعادي
اصدرت في: 20/05/2015

الصيف بدأ والجو حر جدًا، وبـ يخليك عاوز تشرب حاجات ساقعة ومنعشة على طول، علشان كده مافيش أجمل من عصير طبيعي ساقع ومنعش، يجدد طاقتك ثاني، وده اللي لقيناه في لافريز – La Fraise اللي لسه فاتح من شهر واحد في المعادي أمام سوبر ماركت مترو، وده بعد نجاحه في فرع الميرغني وهليوبوليس طبعًا. المكان مُعد أنك تأخد العصير وأنت واقف أو دليفري، والحقيقة أن العاملين كانوا ودودين جدًا، واستقبلوا كل أسئلتنا بسعة صدر، أول ما شوفنا المنيو اتبسطنا جدًا بـ تنوع العصائر، كل نوع فاكهة تحته كوكتيلات مختلفة، غير أنواع الشوكولاتة والحلويات الخفيفة زي الفروت سلاد وقطع موز بالشوكولاتة أو قطع فراولة بالكريم شانتيه أو براونيز. وكان حظنا حلو جدًا أن بمناسبة الافتتاح لما بـ تطلب 2 عصير، لك واحد هدية ودي كانت مفاجأة بالنسبة لنا. بعد حيرة كبيرة طلبنا 4 عصائر، وطلبنا أنهم يكونوا Smoothies علشان الدنيا حر ومشوارنا طويل، ولأننا بـ نحب نجرب الحاجات الغريبة والمختلفة، طلبنا ميلون زيست Melon Zest وده عصير بطيخ بالليمون بـ 12 جنيه، وكيوي كراش Kiwi Crush عصير كيوي بالبرتقال بـ 12 جنيه، وتو بري Two Berry وده عصير توت بالفراولة والزبادي واللبن والفانيليا وبـ 15 جنيه، ومن قسم الشوكولاتة طلبنا مارس Mars بـ 20 جنيه. وطلبنا عصير بنانا توفي Banana toffee ده موز باللبن بالكراميل وسعره 15 جنيه بس إحنا خدناه هدية، مع واحد عصير ميلون زيست ثاني. أجمل حاجة أن العصير بـ يتعمل أمامك، وكل ما يخلص واحد يحط لنا حبة في كوباية صغيرة جدًا ندوقه ولو عجبنا تمام، ما عجبناش يعدله زي ما نحب، والعصائر كان طعمها تحفة بشكل عام في الجو ده، نبدأ بعصير التو بيري، وهو كان اختراع مطرقع ومزز ومنعش في نفس الوقت، طعم التوت مع الفراولة مع الزبادي كان مبهر. أما الاختراع لمحبي العصائر المنعشة، كان عصير كيوي كراش، إحنا في العادي بـ نحب الكيوي بالليمون، بس قلنا نجربه بالبرتقال المرة دي، وطعمه كان حلو جدًا، حاجة كده تنقلك على جزر ميامي أو بورا بورا. ولأننا بـ نعشق العصائر الغريبة طلبنا نجرب ميلون زيست، طعم البطيخ مع الليمون كان مزز جدًا، حاجة جنان فعلًا، لو أنت من عشاق طعم البطيخ المسكر مش ده أنسب عصير لك إلا لو زودت السكر جدًا، بس عامة كان طعمه حلو ويستحق التجربة. أما الحكاية والرواية كانت عند عصير مارس اللي فعلًا استمتعنا به لآخر قطرة، طعم الشوكولاتة مع الكراميل مع الآيس كريم كان حلو جدًا، ومبهج ومش ثقيل أو دسم ودي أكثر حاجة عجبتنا فيه. أما الهدية الجميلة بنانا توفي فكان مضبوط جدًا والكراميل إضافة عظيمة عليه. بشكل عام تجربتنا في لا فريز كانت ممتعة جدًا ومنعشة، أكيد مش هـ تبقى آخر زيارة، لأننا عاوزين نجرب باقي الأصناف اللي شكلها حلو جدًا زي الشوكو شيري (شيري بالشوكولاتة) والكاليبسو (مانجو وخوخ وكنتالوب) وعصائر ثانية كثير.

...

كونسبتو: كافيه ومطعم مريح لكن دون المستوى فى جراند مول المعادى
اصدرت في: 25/11/2014

كثير بـ نشوف الكافيهات اللي بـ تقدم لك مشروبات ووجبات خفيفة في نفس الوقت، بس اللي غير مقبول أن هو يبقى أصلاً كافيه وعامل نفسه مطعم. بعد يوم طويل بـ تقضيه في التسوق لو عاوز ترتاح وتكمل ثاني أو تشرب حاجة خفيفة "كونسبتو – Concepto" كافيه في الجراند مول بـ يمثل لك المكان ده خاصة لشكله المريح وتوافد الناس عليه. الحقيقة أننا كنا معديين من أمامه ولقينا شكل طبق بيتزا معدي أمامنا مغري جدًا فقلنا لازم نجربه، بس للأسف اتخدعنا بالمظاهر. طلبنا في الأول عصير Sunshine بـ 17 جنيه وهو عبارة عن سفن أب وصوص كريز، وناتشوز سادة (17 جنيه)، وجاءوا فعلًا بعد ربع ساعة بعد ما طلبنا من الجرسون أنه يستعجل الطلب لأننا كنا جعانين. ويا ريته ما استعجله، الناتشوز كان نصفها محروق والنصف الثاني فيه دوائر صغيرة (العيش عفن وعليها فطر أخضر من فوق)، ولما قلنا للجرسون، كانت المفاجأة أنه قال لنا أن العجينة بـ تيجي لهم كده جاهزة وجابها يوريها لنا فعلًا وهي محروقة، وحلف لنا أن دي أحسن مرة يطلع الناتشوز لأنهم مش بـ يعرفوا يعملوها! وما حذفوش من الفاتورة ولا حاجة رغم أن في المطاعم العادية بـ يتحذف في الحال ويُقدم لك طلب هدية من الإدارة اعتذارًا لك على الخطأ، تخيل نفسك وأنت جعان ومضطر تأكل ناتشوز محروق مع صوص طماطم مالوش طعم.. إمم.. بلاش أحسن.. الحقيقة يا جماعة أننا انبهرنا من صدق الرجل، بس في نفس الوقت حزننا، لو أنتم مش بـ تعرفوا تعملوا الحاجة ببساطة شيلوها من المنيو. المهم طلبنا بعد كده فراخ فاهيتا (53 جنيه)، والحقيقة أن شكلها كان حلو وكانت مقدمة مع أرز وعيش بوريتو وزبادي وجبنة موتزاريلا وصوص مكسيكي، بس طبعًا أنتم عارفين أن مش كل من قال أنه بـ يعرف يعمل فاهيتا بـ يعملها مضبوطة، الفراخ كانت مستوية زيادة عن اللزوم للأسف والخضار اللي حولها شبه محروق، والأرز كان معجن شوية، أما الخلطة فهي عبارة عن بصل مقطع مع طماطم شكلها ما كانش مشجع إطلاقًا. وطلبنا بيتزا كونسبتو (34 جنيه)، ودي كانت بالمشروم والفراخ والفلفل الأخضر والحقيقة أن العجينة كانت رفيعة وشهية، بس الجبنة كانت محتاجة تبقى أكثر من كده. كافيه كونسبتو برغم أنه عامل منيوهين واحد للمشروبات وواحد للأكل وبرغم تنوع منيو الأكل من ساندويتشات وبيتزا وأطباق رئيسية إلا أننا مش بـ ننصح بالأكل هناك لحد ما يغيروا الطباخ، أو يكتفوا بأنهم كافيه محبوب من المتسوقين اللي بـ يشربوا فيه حاجة ويمشوا. تجربة الكافيه والمطعم ما كانتش ناجحة مع كونسيبتو لكن بالتأكيد أنهم نجحوا في حاجات ثانية، زي أنه مكان مناسب أنك تعمل اجتماع لأن المكان كبير وهادئ، وفيه كمان أنشطة خاصة للأطفال من أول الرسم على الوجه لحد التلوين على الفوم والخشب والكوبايات وأنشطة ثانية مهتمين بها فريق Kids Activities وتقدروا تتابعوهم على صفحتهم على الفيسبوك. الخدمة في المكان كانت متميزة برغم الأخطاء اللي حاصلة والديكورات كانت بسيطة.

...

ستيك كورنر: جريل وكافيه جديد جدًا في المعادي الجديدة
اصدرت في: 09/07/2012

 لما بـ نقول جديد ده معناه أن المكان مفتوح بقاله شهور قليلة أو أيام، لكن اللي حصل في زيارتنا لـ «ستيك كورنر» أننا دخلنا المحل بعد افتتاحه بساعتين فقط. الحقيقة كانت صدفة، إحنا كنا متابعين التجهيزات والترتيبات اللي بـ تتعمل في المحل لأننا بـ نعدي كثير من أمامه، لكن ما كناش عارفين ميعاد الافتتاح بالضبط، لحد ماعدينا في وقت ولقينا الأبواب مفتوحة فقررنا ندخل ونكتشف المكان. بيت أوربي عملاق باللون الأحمر الداكن والسقف المثلث المميز والشبابيك الزجاجية، ده اللي هـ تشوفه وأنت واقف أمام «ستيك كورنر»، شكله تحفة من الخارج، ولما دخلنا ما كناش متخيلين قد إيه هو واسع، والمسافات بين الترابيزات معقولة جدًا، ولقينا المكان مقسم لجزئين: واحد أشبه بكافيه ومسموح فيه بالتدخين والشيشة، وجزء ثاني لغير المدخنين وفيه الترابيزات أكبر وكنبات مريحة أكثر للجلوس. المكان أنيق وديكوراته بسيطة وعاملة شخصية مميزة للمكان، والجدران عليها بوسترات أفلام عالمية قديمة من الأربعينيات والخمسينيات، والإضاءة هادئة وفيه شاشات LCD في كل أركان المحل، ووقت زيارتنا (وقت الافتتاح) كانوا مشغلين حفلة DVD مهيبة للفنان Yanni وكانت فكرة هائلة ومناسبة جدًا للأجواء الاحتفالية اللي في المكان. وعلشان ده كان Soft Opening للمكان، كان لسه فيه حاجات كثير مش جاهزة زي منيوهات الطعام والأكواب اللي عليها لوجو المحل وعلب التيك آواي وغيره، بس رغم النقص ده عجبنا مستوى الخدمة والعاملين هناك اللي كانوا ودودين ومحترفين جدًا، وواضح أن لهم خبرات سابقة في أماكن ثانية. ولاحظنا الاقبال على المكان وخاصة ركن الشيشة أو الكافيه بعد الساعات الأولى من افتتاحه، ويرجع الفضل في ده لشكل المبنى الجذاب من الخارج. ولأن مافيش منيو للأكل كان لازم الجرسون يقول لنا بنفسه كل الأصناف وأسعارها، لكن إحنا سهلنا عليه المأمورية وطلبنا منه طبقين رئيسيين واحد فيليه لحم والثاني صدور دجاج، وطبق كوكتيل المشهيات الموجودة في المحل. كومبو مشهيات ستيك كورنر (50 جنيه) فيه سبرنج رولز بالسبانخ ودجاج تندر وبطاطس مقلية وكرات الجبن بالبطاطس وعدد من الصوصات وجبن الريكفورد، الطبق كبير ولذيذ وكالعادة ينفع وجبة متكاملة لوحده، وبـ ننصحكم ما تشبعوش منه قبل ما ينزل الطبق الرئيسي. ستيك فيليه بقري بصوص المشروم البني ومعاه قطع ﭭـيل البيكاتا أو (البتلو) بنفس الصوص وأصناف جانبية هي السوتيه والأرز المكسيكي الأصفر (85 جنيه) ده كان طبق اللحوم الأقوى في المكان حسب رواية الجرسون. الكميات هنا كبيرة قوي، بس الأهم من الكميات هو المذاق، والمذاق كان أكثر من رائع وحسينا قد إيه اللحوم طازجة وناضجة بشكل مثالي على الجريل، ونفس الكلام على السوتيه. طبق صدور الدجاج المشوية (52 جنيه) بصوص أبيض من أنواع الجبن المختلفة "ميكس تشيز" طلبنا معاه صنف جانبي واحد وهو الباستا بصوص الكريمة، وكانت المفاجأة أن الدجاج بنفس مستوى فيليه اللحم ويمكن أحلى، استمتعنا بصوص الجبن بالأعشاب، وبرضه ما قدرناش نخلص الطبق لأن «ستيك كورنر» كرماء جدًا في كمياتهم، لدرجة أننا سألناهم هل هـ يفضلوا كده على طول ولا ده علشان الافتتاح وجذب الزبائن وكده؟ ضحك الويتر وقال لنا: لأ طبعًا ده في الأول بس! هو صحيح بـ يهزر، بس إحنا فعلًا بـ ننصحكم تلحقوا تزوروا المكان في أيامه الأولى اللي كل حاجة فيها بـ تبقى ماشية زي الكتاب ما بـ يقول. وإن فضل الحال على كده فـ «ستيك كورنر» هـ يبقى فعلًا من أفضل مطاعم الستيك في مصر، ومن أجمل أماكن الجلوس وتقضية الوقت كمان. في نهاية القعدة قدموا لنا طبق حلو هو تشيز مادنيس بالفراولة (20 جنيه) كمجاملة من المحل، وكان طعمه خطير خلانا نخلصه كله رغم أننا كنا مش قادرين نتنفس من الأطباق الرئيسية. فعرفنا أنهم ما بـ يهزروش هنا وكل حاجة بـ تتعمل بمنتهى الحرفية، يعني ممكن تطلب أي أكل أوشرب أوحلويات من هنا بقلب جامد.

...

دان: عصائر فريش ومبتكرة في المعادي
اصدرت في: 19/03/2012

بـ نفرح لما نمشي في أي شارع ونلاقي محل عصائر فريش أو Juice Bar أو حتى محل عصير قصب عادي، البديل الصحي للمشروبات الغازية والعصائر المعلبة. وبـ ندعو أي حد بـ يقرأ المقال ده أنه يستبدل كانز الكولا اللي بـ يشربها كل يوم بشوب عصير طبيعي كل ما يكون فيه فرصة، ولو قدرتم تعملوا كده عرفونا عملتوها إزاي لأننا هـ نموت ونعمل كده، لكن واضح أن الكولا إدمان. بار عصائر «دان» في شارع 9 في المعادي له لافتة ظريفة عليها لوجو المحل بحروف عربية إنجليزية متداخلة باللون الفضي، شكله من الخارج مش مألوف وغير كل محلات العصائر اللي بـ تستخدم ألوان كثيرة خاصة اللونين الأحمر والأخضر للتعبير عن روح الانتعاش والفواكة، لكن «دان» فضل يكون له شخصية مميزة وشكل مختلف، والأكيد أنه نجح في ده. قريب جدًا من «كوفي بين» وهو على نفس الصف بتاعه، المحل مساحته صغيرة، لكن فيه ترابيزات مدورة وكراسي بار صغيرة داخل المحل وفيه ساحة خارجية وأحواض أشجار ممكن تقعد عليها أمام المحل، لكن مافيش مكان لركنة العربية الشهيرة أمام محلات العصير لأن الشارع نفسه ضيق. هـ تدخل تأخذ المنيو الورقي المطبوع والمكتوب عليه Think Healthy.. Drink Dan أو "فكر بطريقة صحية واشرب دان". فيه عصائر الفواكه الكلاسيكية العادية زي الجوافة والمانجو والبطيخ والتفاح والبرتقال بأسعار من 6 لـ 12 جنيه وفيه عصير توت بـ 22 جنيه وأهم حاجة عصير القصب بـ 3 جنيه. فيه عصائر خضروات زي الجزر والجرجير والنعناع بـ 7 جنيه، والأفوكادو بـ 12 جنيه، وننصحك تطلب سكر زيادة في أي عصير خضار علشان تعرف تشربه. مشروبات الطاقة هي المميزة عند «دان» خاصة عصير "ماكسيمام إنيرجي" اللي فيه تفاح ومانجو والباشون فروت Passion Fruit وهي فاكهة استوائية مش منتشرة في مصر لكن طعمها حلو وغير مألوف ومعروف أنها بـ تعطي طاقة كبيرة، وعلشان كده سعر الكوب 25 جنيه، ووكوكتيل ثاني بالعنب والكيوي والتوت أو الباشون فروت اسمه "إنيرجي بابل" بـ 28 جنيه. وكوكتيل ثاني مغذي جدًا فيه فراولة وزبادي وأناناس اسمه "جو مان جو" بـ 21 جنيه. أي عصير فيه منه 3 أحجام، والسعر الموضح هو سعر الحجم الصغير وبـ نزود 2 جنيه للحجم الوسط و 4 جنيه للحجم الكبير. السموزي عند «دان» مختلف» ومش شبه أي مكان ثاني، يمكن علشان الخلاط العجيب اللي شفناه بـ يتعمل فيه العصائر الممزوجة بالثلج، يمكن هو لا عجيب ولا حاجة بس إحنا ما شفناش زيه في أي حتة، المهم أنه بـ يطلع العصائر والسموزي والكوكتيلات لها مذاق فريد وقوام متوسط لا خفيف ولا ثقيل، ودي أكثر حاجة عجبتنا في عصائر «دان». فيه كوكتيلات فيها جنزبيل بس للي يقدر عليها، وسموزي الفواكة الحمراء زي التوت والفراولة والبطيخ بـ 22 جنيه، وكوكتيلات استوائية من 12 لـ 22 جنيه. وأخيرًا فروت سلاط بالآيس كريم بـ 16 جنيه للحجم الكبير ودي كانت رائعة ومكوناتها فريش جدًا، لكن كانت مليانة كنتالوب وإحنا مش بـ نحبه، واللي تقريبًا ما نعرفش حد بـ يحبه لكن كل محلات الكوكتيلات مصرة تملأ به أطباقها! «دان» عصائره فريش على طول ولها طعم مميز لكن أسعاره أغلى من أي بار عصائر ثاني، جرب لو كنت موجود في شارع 9.

...

المدينة المنورة: منتجات ألبان وحلويات في المعادي الجديدة
اصدرت في: 15/12/2011

في شارع النصر في المعادي الجديدة وعلى الناصية اللي بـ تتقاطع مع شارع اللاسلكي جنب مطعم «جاد» هـ تنزل درجتين سلم على الرصيف على مدخل محل «المدينة المنورة» المتخصص في كل منتجات الألبان والجبن والعسل، بالإضافة للآيس كريم والكريب اللي تم إضافته للمنيو مؤخرًا. الكاشير موجود داخل المحل، حجمه من الداخل صغير، وعلشان كده المكان اللي بـ يتعمل فيه الكريب بـ يبقى موجود في الخارج أمام المحل. ودي حاجة ظريفة بـ تضيف حيوية أكثر للمكان وتلفت نظر اللي رايح واللي جاي، والرائحة كمان بـ تملأ الشارع. الأرز باللبن والمهلبية هم أكثر الحاجات اللي الناس بـ تروح علشانها، فيه حجمين، صغير وكبير، الصغير من 3 جنيه لـ 6 جنيه والكبير من 4 لـ 7.5 جنيه وده حسب الإضافات. الإضافات هي العسل والقشطة والآيس كريم والمكسرات والفروت سلاد، وفيه مهلبية وأرز باللبن في الفرن بـ 4 جنيه، ودي من أجمل الحاجات اللي ممكن تأكلها في «المدينة المنورة». من الحاجات المميزة للمحل أنه من الأماكن القليلة قوي اللي تلاقي عندها مهلبية قمر الدين (4 جنيه) طول السنة مش في شهر رمضان فقط وهـ تلاقي عاشوراء (زي البليلة لكن بالنشا والفانيليا) برضه طول السنة وممكن تضيف عليها أي حاجة نفسك فيها. وعنده عبوات صغيرة بلاستيكية لكل أنواع الحلويات والكيك اللي أحيانًا بـ يبقى صعب تشتريه بأحجام صغيرة زي البروفيترول (9 جنيه) والترايفل (7 جنيه) وهـ تلاقي أنواع ثانية من الحلويات زي الكاسترد والبودنج وكريم كراميل وقرع عسلي (4.5 جنيه). أحيانًا بـ نحب نجرب الكسكسي بالقشطة (7.5 جنيه) رغم أنه بـ يبقى دسم جدًا لكن لذيذ، ومن اختراعات المحل ممكن تشتري لبن رايب بطعم الموز والمانجو والجوافة والفراولة بسعر 2.25 جنيه فقط. داخل المحل فيه ثلاجة عرض كبيرة فيها كل الإضافات اللي ممكن تختارها على الطبق بتاعك زي الكريز والفواكة المسكرة والكريم شانتيه وأنواع مختلفة من الصوصات الحلوة وكل الإضافات بأسعار من 1 جنيه لـ 3 جنيه. والكريب الحادق موجود منه نوعين فقط هم مشكل الجبنة والجبنة بالمشروم بسعر 7 جنيه، والحلو بالنوتيلا والموز والسكر والعسل بـ 5 و8 جنيه. والكريب هنا حلو ومكوناته فريش بس مش زي أماكن ثانية متخصصة. لخزين الثلاجات في البيوت بقى ممكن تجيب لبن وقشطة وسمن بقري وجاموسي بالكيلو وبرطمانات عسل نحل وكريمة لباني وكلها بأسعار معقولة وجودة عالية وتغليف نظيف. هـ تلاقي كل أنواع الجبن من أول القريش (15 جنيه للكيلو) والأسطنبولي (24 جنيه) لغاية الريكوتة (23 جنيه) والفلمنك المستورد (50 جنيه) والجوده ( 47 جنيه) واللبنة (12 جنيه). يعني زيارة كل أول شهر هـ تبقى مهمة لدعم الثلاجة بمنتجات الإفطار والعشاء ودعم دولاب التخزين بالسمن والزبدة والذي منه. بعد وجبتك الرئيسية في أي مطعم من مطاعم شارع النصر الكثير، سيب مكان فاضي في معدتك لطبق حلو معتبر من «المدينة المنورة».

...

المدينة المنورة: عصير وحلويات من اللي قلبك يحبها في المعادي
اصدرت في: 05/04/2011

لو عندك احساس انك على طول عايز حاجة حلوة، يـ بقى كويس جدا انك عايش في القاهرة، المدينة مليانة بـ محلات حلويات من أول المحلات الغالية اللي بـ تبيع حلويات راقية وفخمة لأكشاك وعربيات في الشارع بـ تقدم حلويات رخيصة جداً٬ فتقدر بـ 2 جنيه من اى حتة في القاهرة بأحيائها الراقية والمتواضعة على حد سواء٬ تاكل حاجة حلوة. «المدينة المنورة» محل معروف جداً في «المعادي» في شارع «اللاسلكي» من اكتر الشوارع زحمة واشهرها في المعادي، هـ تلاقيه جنب مطعم مؤمن وجاد. المحل الصغير بـ يقدم كل انواع العصير، آيس كريم وحلويات كتيرة قوي زي رز بلبن، بليلة، كسكسي وكمان ام علي، وفطاير. المحل كمان بـ يبيع لبن، سمنة، جبنة، زبادي وزبدة. المحل في الدور الأرضي ومعروف عنه انه بـ يقدم احلى وارخص الحلويات ودايما فريش وعشان كده بـ يكون زحمة بالليل. «المدينة المنورة» المكان اللي تأخد في صحابك وتشربوا عصير وتأكلوا أيس كريم في أيام الحر في الصيف، ولو في الشتا يبقى مكان هايل تاكل فيه كسكسي أو ﭼاميكا كريب اللي طعمه رائع جداً. أسعار «المدينة المنورة» رخيصة جداً، «ﭼاميكا كريب» بالشوكولاتة ومع قطع موز بـ6.75 جنيه وطِعم قوي وممكن تحس انك مش هـ تاكل كريب تاني من اي حتة إلا هنا. الآيس كريم بـ3 جنيه وام علي بـ4.25 جنيه والكسكسي بالكريمة بـ7.5 جنيه، وكمان في خدمة توصيل الطلابات للمنازل بـ4 جنيه زيادة. رغم انه بـ يأخد وقت عشان طلبك يجهز في الأيام الزحمة بس العاملين في «المدينة المنورة» لطاف ، ولو روحت في يوم مش زحمة ممكن تلاقي واحد من الويترز واقفين وبـ ياخذوا الطلابات من العربية ويجبولك الطلب لغاية عندك في العربية من غير ماتنزل منها. روح «المدينة المنورة» لو عايز تأكل حلويات رائعة وفريش.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا