ألبان وآيس كريم كافيهات in المعادي Cairo, Egypt

كافيهات

باسكن روبنز: الماركة العالمية لسه محتفظة بجودة منتجاتها في المعادي
اصدرت في: 16/09/2015

عشق الآيس كريم خاصة في فصل الصيف له سحر خاص ومتعة مختلفة، بـ يعطيك نفس الشعور لما تبقى عطشان قوي وحران وتشرب مياه ساقعة مثلجة، مجرد حاجة مسكرة مبهجة في بسكويتة جميلة تخفف عنك حر الصيف، فطبعًا كنا لازم نعيد زيارتنا للماركة العالمية باسكن روبنز - Baskin Robins، اللي كنا كتبنا عنه قبل كده في 2010. باسكن روبنز عنده حوالي 27 نوع آيس كريم، ما بين آيس كريم بالتوت والكراميل والتشيز كيك والشوكولاتة بأنواعها، والريد فيلفت والفول السوداني بالزبدة، وكل ما تتمنوه، وهـ تلاقوا كل الأنواع ده بشكل موضوح أكثر على صفحتهم على الفيسبوك، بس للأسف وقت زيارتنا، أنواع قليلة قوي اللي كانت موجودة، وده سبب لنا حزن كبير، ومن الأنواع القليلة اللي ذوقناها Chocolate Chip Cookie Dough Ice Cream، وكان طعمها عادي وكمان Peanut Butter 'n Banana Ice Cream كان حلو. وطلبنا بقى إيه World Class Chocolate Ice Cream واللي مكون من فانيليا وشوكولاتة بيضاء وسوداء، وكان طعمه تحفة، وكمان آيس كريم فانيليا في بسكويتة مع صوص كراميل، وكان طعمها حلو جدًا ومضبوط، سعر البولة الواحدة 17 جنيه، والبولتين بـ 28 جنيه، والثلاثة بـ 32 جنيه، ده غير أحجامهم الكبيرة لو عاوزين عدد أكبر من البولات، والبسكويت بتاعهم اللي يجنن سواء بالشوكولاتة أو سادة، كمان ممكن تضيفوا صوص كراميل أو شوكولاتة أو فراولة، وعاملين جديد بانانا سبليت مكونة من 3 بولات آيس كريم وموز، ده غير الميلك شيك، وأنواع تورت الآيس كريم اللذيذة اللي بـ يقدمها وبـ يمتعنا بنكهاتها. باسكن روبنز مكان مميز، نتمنى أن المرة الجاية في زيارتنا لهم يبقى عندهم نكهات أكثر متوفرة.

...

حسونة: حلويات شرقية وغربية ومخبوزات في زهراء المعادي
اصدرت في: 11/08/2015

برغم أن في الفترة الأخيرة انتشرت محلات الحلويات المختلفة، إلا أن فيه منها اللي فاتح من زمان جدًا بس عمرنا ما سمعنا عنه، زي المكان اللي زورناه النهارده "حسونة" اللي فتح من 1969 لكن فرعه الرئيسي في الدقي. حسونة فتح من فترة قريبة في زهراء المعادي جنب "خير زمان" و"لابوار"، وكانت جرأة منه الحقيقة أنه يفتح جنب "لابوار"، برغم أنه على حد علمنا متخصص أكثر في الحلويات الشرقية، لكن لما دخلنا لاقينا أنه عنده كل أنواع الحلويات تقريبًا إلا الحلويات الشرقية، وقالوا لنا أنها هـ تيجي النهارده بالليل، حسونة كان عنده تنوع غريب في المنتجات اللي بـ يبيعها، على يمينك ممكن تحس أنه مخبز من كثر المخبوزات اللي عنده من كرواسون وباتيه ومقرمشات، وبسكويت بأنواعه، وفي آخر الصف ده، بـ يبيع كل أنواع المكسرات من فستق وكاجو ولوز وبونبوني ألوان كمان، مغلفة في علبة مستديرة وبـ يبيعها بالكيلو. ده غير أن في المنيو لقينا أنه المفروض بـ يعمل عصائر وحلويات زي الأرز باللبن وأم علي وجيلي. أما على أيدك الشمال هـ تلاقي شوكولاتة بـ تتباع بالكيلو فكرتنا بشوكولاتة كوفرتينا كده، والحمد لله أنه كان حاططها في الثلاجة وإلا كان زمانها بقيت عصير، بعد كده ثلاجة الحلويات الغربية، اللي كان فيها تورتة ريد فيلفت وتورتة شوكولاتة، وأنواع قليلة من الجاتوه أو بالأخص التشيز كيك بس. بعد كده فيه ثلاجة آيس كريم فيها أنواع قليلة من الآيس كريم، زي البطيخ والفراولة والزبادي توت والكانتلوب والفانيليا. لكن للأسف لم يتم العصور على أي حلويات شرقية واللي كان نفسنا نجربها. المهم قلنا نجرب أكثر من حاجة عنده علشان نبقى ما ظلمناهوش. فـ طلبنا قطعة تشيز كيك بالكراميل بـ 16 جنيه، وقطعة تشيز كيك بالتوت بـ 15 جنيه، وربع كيلو بسكويت بالفانيليا، و2 بولة آيس كريم، واحد بالبطيخ وواحدة زبادي توت، والبولة بـ 5 جنيه. وخدنا الحاجات ومشينا لأن طبعًا مافيش مكان نقعد فيه، في الجو الحر جدًا ده كان لازم نبدأ بالآيس كريم لأننا لو استنينا لحد ما نروح هـ يبقى عصير، والغريب أن لون آيس كريم البطيخ كان روز فاتح، بينما لون الفراولة كان بينك فاتح، ولما سألناهم قالوا لنا علشان طعم طبيعي، المهم عديناها، بس ما قدرناش نعدي طعم البطيخ الحقيقة اللي كان ناقصه بطيخ، طعمه كان بلا نكهة، يا دوبك نفحة بطيخ فيه، على عكس الزبادي بالتوت اللي كان طعمه حلو، أما بالنسبة للبسكويت كان طعمه عادي، بس برضه يفتقد للنكهة شوية غير أنه كان ناشف زيادة عن اللزوم ونعتقد أن ده لأنه ما كانش طازة. نيجي بقى لطبق اليوم التشيز كيك، وبالصدفة يا جماعة وإحنا بـ نطلعها علشان نأكلها وقعت على الأرض بـ نقلبها، لاقيناها ولا تأثرت ما شاء الله لا الصوص وقع ولا أي حاجة، وده ليه، لأنهم طبعًا يختلفوا عن الآخرون، التشيز كيك كان عامل زي ما يكون قطع حجرية مرصوصة فوق بعض، صوص الكراميل ناشف من فوق والتشيز كيك ناشف جدًا، غير أن البسكويت من كثر ما هو ناشف ما عرفناش نقطعه بالشوكة، لكن قطعة التشيز كيك الثانية اللي بالتوت، كانت ألطف كثير ونعتقد أنها كانت طازة أكثر برغم أنها كان شكلها غريب والصوص خفيف، والقطعة طالعة لفوق مش متساوية إلا أن طعمها كان أحلى كثير وطعم الجبنة فيها كان حلو وطري وطبقة البسكويت كانت قابلة للأكل، كان نفسنا نجرب الحلويات الشرقية علشان نبقى جربنا كل حاجة بس كفاية علينا كده وكمان هي ما كانتش موجودة. نتمنى أنهم يضبطوا الأخطاء دي، علشان المرة الجاية نعطى لي تقييم أفضل.

...

ذا مهلبية كومباني: أجمل مهلبية وتيراميسو وأرز باللبن ملون في المعادي
اصدرت في: 29/07/2015

كل فترة بـ تطلع تقليعة جديدة في الحلويات، الكل بـ يحاول يجذب الزبون بمنتج جديد ومبتكر، وأكيد أهم حاجة أن طعمه يبقى حلو، وده كله متوفر في "ذا مهلبية كومباني – The Mahalabeya company" اللي لسه فاتح قريب في شارع 9 في المعادي. أول حاجة لفتت نظرنا للمحل هو الورد اللي فوق الاسم الحقيقة يعنى، مش بس علشان إحنا من عشاق الورود، لأ هو فعلًا شكله مبهج غير ألوان الكراسي الملونة بره المحل مع لوجو المكان اللي كله ألوان، تحس أنك رايح مهرجان مبهج، من قبل ما تدخل المكان حتى. النظام هناك كالآتي بـ تدخل تختار هـ تشتري إيه ويا إما تأكله هناك ولو عاوز تشرب حاجة أو تأخد اللي أنت عاوزه وتمشي، والحقيقة أن الناس هناك كانوا ودودين جدًا شرحوا لنا مكونات كل طبق على حدة قبل ما نقرر هـ نشتري إيه، مبدأيا فيه حجمين للأرز باللبن أو المهلبية أو الكريمة، حجم صغير أكبر من حجم الكب كيك حاجة صغيرة وحجم كبير أصغر من حجم علبة الآيس كريم، المهم بعد حيرة طويلة جدًا ما بين الأصناف: كريمة نوتيلا وتراميسو وكريمة بالفواكة ومهلبية بالموز والكراميل وأرز باللبن بالقرفة والمكسرات، ده غير الحاجات اللايت زي حبوب الشيا بالفاكهة والموسلي والزبادي بالفواكة، بعد تردد كبير اختارنا تيراميسو بـ 20 جنيه حجم الكبير، وأرز باللبن قوس قزح بـ 16 جنيه، ومهلبية بالتفاح والقرفة بـ 16 جنيه وAfter Eight وده شوكولاتة بالنعناع بـ 20 جنيه. وحطوها لنا في علبة لسه معجبين باللوجو بتاعها إلى الآن من بساطة التصميم واللي هي عبارة عن دوريات مزخرفة ملونة مستوحاة من الفنون الهندية المبهجة. أكثر حاجة عجبتنا كانت التيراميسو من كثر جمالها مش عارفين نوصفها بإيه، كانت مضبوطة جدًا ومبهجة، أما بالنسبة للأرز باللبن قوس القزح، فلازم نعترف أنه اختراع كل طبقة منه بلون مختلف أصفر وأخضر وأزرق وأحمر وفي الآخر طبقة كريمة لونها بينك، طعمه كان عادي بس بهجته في الألوان، المهلبية بالقرفة والتفاح كانت كويسة قوي برضه برغم أننا مش من عشاق المهلبية إلا أنه كانت حلوة، آخر حاجة الشوكولاتة بالنعناع للأسف يا جماعة ما عجبتناش خالص، التوازن فيها كان مفقود ما بين الشوكولاتة المُرة وكريمة النعناع اللي مفتقدة لطعم النعناع، نتمنى أنهم يوصلوا للتركيبة الصح بتاعتها. أكيد دي مش هـ تكون الزيارة الأخيرة لهم، نتمنى أنهم يفضلوا يقدموا لنا كل جديد مبهج ومبتكر وطعمه حلو، ودي الخلطة السرية لنجاح أي مكان.

...

كولد ستون كريمري: آيس كريم منعش ووافل حكاية في فرع جديد فى المعادي
اصدرت في: 28/07/2015

في الجو الحر ده الناس بـ تفضل تهرب منه وتسافر على إسكندرية أو الساحل، أما المواطنين اللي لسه ما عرفوش يستخبوا من الحر هناك، مافيش أجمل من أنك تطلب آيس كريم ينعشك ويهدئ أعصابك في الجو ده، وده اللي حصل لنا لما رحنا "كولد ستون كريمري – Cold Stone Creamery" اللي لسه فاتح فرع جديد في شارع 9 في المعادي. طبعًا الآيس كريم هناك مختلف عن أي محل ثاني، مش بس علشان النكهات المختلفة والجديدة، لأ كولد ستون كريمرى مشهور بأحجامه من الصغير خالص للكبير جدًا، ووصفاته الخاصة اللي تقدروا تشوفوها من صفحتهم على الفيسبوك. إحنا حبينا نجرب أكثر من نوع فـ طلبنا حجم كبير في بسكويتة واللي كان فيه منها بالشوكولاتة من الجنب بس إحنا اختارنا السادة، أما بالنسبة للنكهات، طلبنا آيس كريم أوريو كريم البولة بـ 17 جنيه، وآيس كريم نوتيلا وشوكولاتة غامقة بنفس السعر، وآيس كريم نعناع بـ 13 جنيه، والنكهة اللي عجبتنا جدًا آيس كريم بطعم غزل البنات بنفس السعر، وآيس كريم كراميل برضه بـ 13 جنيه. كمان حبينا نجرب الوافل اللي عندهم جبنا وافل our strawberry Blonde وأضافنا عليه صوص توت مع إضافة مارشميلو وتوت وفراولة، والإضافة الواحدة بـ 7 جنيه مع بولة آيس كريم اختارنا طعمها يكون French vanilla، كمان قولنا نجرب حاجة من منيو الميلك شيك، فـ طلبنا Cherry cheesecake وما كانش فيه شيري فـ بدلناه بـ Blackberry وسعره 30 جنيه. نبدأ بالآيس كريم أكثر طعم عجبنا ورجعنا لأيام الطفولة ومزجنا فعلًا كان آيس كريم غزل البنات Cotton Candy، لو كنا نقدر نأكله هو بس إلى ما لا نهاية كنا عملنا كده، برضه طعم النعناع كان حلو قوي والنوتيلا والشوكولاتة الغامقة والكراميل، آيس كريم الأوريو كان حلو قوي بس أكثر طعم عجبنا دوقناه هناك بس ما أكلناهوش هو الليمون، لأنه أخف طعم ممكن تذوقه، كمان التشيز كيك كان لذيذ، ولو أن النكهات بشكل عام كانت محتاجة تبقى أكثف من كده شوية، بس هي حلوة جدًا طبعًا. نيجي بقى للوافل اللي أول ما قُدم لنا كان شكله تحفة، وكمان أضاف لنا عليه كريمة مخفوقة زيادة من عندهم، الوافل مش كان تحفة.. ده كان وهمي، مضبوط ما تحسش بطعم البيض، مع صوص التوت والفراولة والآيس كريم خلطة منعشة ومبهجة، الحاجة الوحيدة اللي ضايقتنا أن المارشميلو كان ناشف لدرجة أنه بـ يقرمش زي المكسرات تخيلوا! وده طبعًا علشان ما كانش فريش، بس فيما عدا ذلك كان حلو جدًا، كمان ميلك شيك البلاك بيري مع التشيز كيك تجربة رائعة تستحق أنك تغامر بها لآخر قطرة في العصير. بشكل عام تجربتنا في كولد ستون كريمرى كانت ممتعة وأكيد مش هـ تكون زيارتنا الأخيرة.

...

عبد الرحيم قويدر: أشهى حلويات شرقية في رمضان في المعادي
اصدرت في: 25/06/2015

زمان جدًا تعتبر الكنافة أول حلويات دخلت علينا مع رمضان، وبعدين القطايف والبسبوسة في عهد الدولة الأموية تقريبًا، وكانت اختراع طبعًا وخاصة على طاولة الأمراء ورؤساء الدولة في العهد ده في رمضان، وبمرور الوقت فضلت الكنافة مرتبطة معانا برمضان والبسبوسة والقطايف طبعًا وباقي الحلويات الشرقية. فمهما تكثر الاختراعات ما بين كنافة نوتيلا وكنافة بالمانجو وريد فيلفت وحركات، هـ يفضل الأصلي أصلي وهـ تفضل الكنافة والبسبوسة والبقلاوة لهم مكانهم الخاص جوه قلوبنا، علشان كده كنا لازم نروح عبد الرحيم قويدر – Abdel Rahim Koweider ونجرب الحلويات الشرقية اللي على أصلها. أنك تروح محل حلويات بداية من الساعة 5 كده فكأنك بالضبط داخل ساحة حرب ومش معاك أي أسلحة تدافع بها عن نفسك، وده كان إحساسنا بالضبط من كثر الزحمة اللي في المحل اللي تخليك تفضل واقف أمام الحلويات مش عارف تطلب من كثر الناس اللي مشغولة بطلبات ثانية، تقريبًا مصر كلها كالعادة بـ تشتري في آخر لحظة وبالصدفة جاءوا كلهم نفس المكان، ده غير كمان لو حضرتك قصير زينا كده والستاند بتاع الحلويات طويل، فأنت مش هـ تتشاف أساسًا والصوت في الصيام مش بـ يطلع، فكنا محتاجين معجزة، لحد الحمد لله النجدة الإلهية جاءت، عبد الرحيم قويدر عامل حاجة لطيفة جدًا، وهي أنك وأنت واقف محتار ومخضوض من الزحمة كده، ييجي لك المتر لحد عندك يقول لك: "تحب تطلبِ إيه يا فندم؟"، وتبقى أسعد لحظة في حياتك لأنك خلصت من كابوس الزحمة وأخيرًا هـ تطلب وتروح. طبعًا الكنافة بالمانجو كانت مكتسحة والحجم الكبير منها بـ 140 جنيه، والأصغر حاجة بسيطة بـ 140، غير العثمانلية، وأنواع القطايف اللي قلبك يحبها، محشية بالجبنة ومحشية قشطة، وكل أنواع الحلويات الشرقية اللي تخطر على بالك. إحنا دخلنا في المضمون الحقيقة وطلبنا ربع كيلو من كل الأنواع الجاية، بسبوسة سادة الكيلو بـ 42 جنيه، وكنافة بالقشطة الكيلو بـ 52 جنيه، وبقلاوة مشكل الكيلو بـ 104 جنيه، وبلورية بيضاء (شبه الكنافة البيضاء بالفستق) الكيلو بـ 150 جنيه، ولقينا عندهم قطع كنافة نوتيلا صغيرة بـ تُباع بالقطعة قلنا نجربها، والقطعة بـ 75 قرش. نبدأ بالكنافة بالقشطة اللى كانت غنية بالكريمة وطرية وتتاكل أكل من شكلها بس، أما البسبوسة فطبعًا كلنا عارفين أن أجمل بسبوسة تلاقيها عند قويدر من غير كلام، طازة وطرية ومسكرة وبـ تذوب في فمك، أما البقلاوة.. يا عيني على البقلاوة، مقرمشة بس طرية في نفس الوقت ومليانة شربات، كل واحدة رفيعة أو مدورة بـ تناديك علشان تحلي فمك بها، نيجي لاختراع البلورية البيضاء (شبه الكنافة البيضاء) وفي النص فيه طبقة فستق شهية، وهي أكيد لها الناس اللي بـ يحبوها جدًا، بس إحنا مش من عشاقها للأسف، لما جربنا قطع الكنافة بالنوتيلا الصغيرة، طعم النوتيلا كان تحفة، لكن للأسف برضه الكنافة كانت ناشفة جدًا بالمعنى الحرفي "حجر"، مش عارفين ده حظنا اللي جه في قطع مش طازة ولا هم كلهم كده. أما لو أنت مستعجل عبد الرحيم قويدر عامل علب جاهزة فيها كل أنواع الحلويات الشرقية تقدر تختارها بسرعة وتطير. ونرجع ونقول أن الحلويات ما بـ يبقاش لها طعم إلا وسط لمة العيلة والحبايب وكل سنة وأنتم طيبين وكل رمضان متجمعين على الخير يا رب.

...

ألورا: متعة الآيس كريم والمخبوزات في شارع 9 في المعادي
اصدرت في: 10/06/2015

في الجو الحر ده الواحد ما بـ يصدق يلاقي ملاذ له، ومافيش أجمل من الآيس كريم الإيطالي اللي يخفف من علينا حر اليومين دول، كل معالم الفرحة والبهجة اترسمت على وشنا أول ما شفنا "ألورا - Allora" في شارع 9 أمام Aunty Anne اللي لسة فاتح من أسبوع. المحل صغير لو أنت مش مركز ممكن ما تشوفوش، بس بـ يقدم لك قطع سعادة في صورة آيس كريم ممتع، النكهات عادية ما بين شوكولاتة وفانيليا ولبان وتشيز كيك وليمون وفستق وكراميل وعنده أحجام مختلفة كبيرة وصغيرة، غير أنه بـ يقدم إضافات على الآيس كريم زي البسكويت والفروماسي والفاكهة والكريمة والصوص طبعًا زي الكراميل والشكولاتة وكان عنده نوع مختلف إيطالي طعمه تحفة اسمه كويلا (Quella) لونه أبيض وطعمه بالفانيليا وفيه لمسة قرفة وكريمة ونوع ثاني فيه طعم الشوكولاتة بس طعمه حلو وقوي بالنكهات. المكان أمامه ترابيزات خشب صغيرة لو عاوز تفطر فيه الصبح أو تقعد مع صحابك بالليل، خاصة أنه بـ يقدم مخبوزات شهية جدًا زي كرواسون بالزعتر واللوز والشوكولاتة ووافلز وكريب ومشروبات ساخنة زي الشاي والكابتشينو. طلبنا 2 بولة آيس كريم بالليمون والفانيليا بـ 22 جنيه ولأننا لما ذقنا الـ Cheese Cake ما قدرناش نقاومه، قسمنا بولة الفانيليا علشان نستمتع بطعم التشيز كيك الوهمي، كمان جربنا من الإضافات البسكويت والفورماسي ( قطع حلوة ملونة) والإضافة الواحدة بـ 3 جنيه، وصوص كراميل بـ 3 جنيه. عارفين لما تخطفوا من وقتكم 10 دقائق تستمتعوا فيها بطعم البهجة والانشكاح والمزاج، الليمون كان طعمه رائع وفريش، كمان الفانيليا مع التشيز كيك اللي بلا مبالغة كان أحلى آيس كريم تشيز كيك أكلناه في حياتنا حاجة تعزلك عن العالم اللي أنت فيه. لولا أن بطننا امتلأت أكيد كنا هـ نجرب الجيلاتو ستيكيس أو الجيلاتو كيك اللي أكيد كانت هـ تبقى تحفة برضه... لو عاوز مكان تخطف منه 10 دقائق سعادة بسيطة لازم تجرب ألورا.

...

ريجوليتّو: سلسلة محلات الآيس كريم المصرية تفتتح فرع جديد في المعادي
اصدرت في: 03/02/2015

لما نتكلم عن الحلويات في مصر، نادرًا ما بـ يقرر الناس أنهم يبعدوا عن اللي جربوه وتعودوا عليه، كل مرة أهلك بـ يكون عندهم زيارة، ويأخذوا معاهم بسبوسة، كنافة أو جاتوه، نضمن لك أنهم بـ يشتروهم دائمًا من نفس المكان، المصريين شعب تقليدي بطبعه. أقدم محلات الآيس كريم في مصر وهو "ريجوليتّو - Rigoletto" مش استثناء، من بدايته في الثمانينيات، ريجوليتّو مش بس معروف بالآيس كريم، لكن كمان بالكيكات والحلويات المتنوعة. مع افتتاح فرعهم الجديد على شارع 233 في المعادي، قررنا نروح في زيارة ونشوف إيه الجديد، طيب دلوقت لو عمرك ما جربت ريجوليتّو، الفرع ده تحديدًا مش هـ يبهرك، المحل عبارة عن حوائط بيضاء، ثلاجة للكيكات وواحدة ثانية للآيس كريم، مع أجواء مُحبطة جدًا، مافيش أي ديكورات أو أجواء خالص. في وقتنا الحالي، أغلب المحلات مستحيل تعمل كده، لكن لما يكون عندك ماركة معروفة، مافيش حد بـ يهتم بشكل المكان، طول ما الحلويات مستواها كويس، من هنا، ومن غير كلام كثير طلبنا قطعة تشيز كيك (14 جنيه) وبولتين آيس كريم فانيليا (16 جنيه). التشيز كيك الكاملة سعرها 80 جنيه أو 100 جنيه على حسب الحجم، وممكن تطلب علبة 150 مللى من الآيس كريم (10 جنيه) أو علبة 1 لتر (55 جنيه). الجرسون جهز طلبنا سريعًا وعرض علينا يضيف صوص فراولة على التشيز كيك بإضافة 5 جنيه. وافقنا، وأخذنا الحلويات للعربية، والسبب أن مافيش مكان للقعدة. طعم التشيز كيك كان لذيذ جدًا وتميزت بالقوام المتماسك اللي كان هائل مع البسكويت. طعم الصوص ممكن يكون ثقيل شوية عند بعض الناس، خصوصًا أن طعم كريمة الجبن مش قوي، فمن هنا نقدر نقول أنها مش لأصحاب القلوب الضعيفة. آيس كريم الفانيليا كان كويس كمان، بإضافة الكراميل والبندق على الوجه، فعلاً خليط النكهات قدر يقدم شكل جديد للآيس كريم. صحيح الاسم الشهير يتمتع بالشهرة وزبائنه الأوفياء، لكن الاعتماد على الاسم لوحده يعتبر مغامرة؛ المنافسة شديدة جدًا اليومين دول، وفرع ريجوليتّو الجديد على الرغم من جودته، لكن هـ يلاقي صعوبة على المدى الطويل أمام الأسماء الأكثر شهرة.

...

ستافولتا: كل الآيس كريم اللي نفسك فيه وأكثر في المعادي
اصدرت في: 03/11/2014

في الفترة الأخيرة كثرت محلات الآيس كريم في القاهرة، وبقوا بـ يتنافسوا في الجودة والكمية والإبداع، "محل ستافولتا – Stavolta" في دجلة بالمعادي، قدر ينجح أنه يحافظ على جودته وسمعته ويبقى من أشهر الأماكن اللي بـ تقدم لك آيس كريم ممتع هناك. أكثر شيء مميز أن كان فيه 3 أحجام للعلب اللي تقدر تأخد فيها الآيس كريم، علبة كبيرة لتر كامل وعلبة متوسطة نصف لتر وعلبة صغيرة لثلاث بولات آيس كريم بس، وبولة الآيس الكريم الواحدة بـ 10 جنيه. ده غير أنك ممكن تضيف الصوص اللي أنت عاوزه سواء كراميل أو فانيليا أو شوكولاتة، وممكن تضيف كمان قطع شوكولاتة أوريو، وقطع شوكولاتة عادية. المكان مش كبير مجرد ثلاجة الآيس كريم وثلاجة ثانية فيها تورت آيس كريم مغرية جدًا، وLollypops شوكولاتة، غير التشيز الكيك اللي كان معروض. طلبنا العلبة الصغيرة اللي فيها 3 بولات وجربنا Salted Caramel Ice Cream وكان حلو جدًا ومتوازن، وآيس كريم كيوي اللي كان مُر شوية بس طعمه كيوي زي ما بـ يقول الكتاب، أما اللي عجبنا جدًا آيس كريم الفانيليا الدايت من غير سكر وكانت حلوة جدًا لدرجة أنك تفتكرها فانيليا عادية وكان فيه كمان شوكولاتة دايت، جربنا كمان عليهم صوص الفانيليا اللي كان حلو جدًا ومتناسق مع الكراميل والفانيليا جدًا بس ما كانش حلو مع طعم الكيوي الصراحة. أما عن الطرقعة اللي بجد في Roses ice cream وده فعلاً كان بطعم الورد زي المياه اللي بـ يحطوا معاه مياه ورد دي، بس للأسف ما عجبناش لأننا مش بنحب طعم الورد بـ نحب نشمه بس، ولمحبي الشوكولاتة كان فيه Chocolate Chips Ice Cream واللي كان طعمه حلو قوي بس الشوكولاتة فيه قليلة شوية، وBanana and Chocolate Chips بس للأسف ما ذقناهوش. حسينا أن الاختيارات بالنسبة لمحبي الشوكولاتة كانت قليلة جدًا، بس يمكن لأننا رحنا في آخر اليوم فالأنواع بدأت تخلص، وده ما يمنعش أننا استمتعنا بكل معلقة من الآيس كريم اللذيذ.

...

المدينة المنورة: منتجات ألبان وحلويات في المعادي الجديدة
اصدرت في: 15/12/2011

في شارع النصر في المعادي الجديدة وعلى الناصية اللي بـ تتقاطع مع شارع اللاسلكي جنب مطعم «جاد» هـ تنزل درجتين سلم على الرصيف على مدخل محل «المدينة المنورة» المتخصص في كل منتجات الألبان والجبن والعسل، بالإضافة للآيس كريم والكريب اللي تم إضافته للمنيو مؤخرًا. الكاشير موجود داخل المحل، حجمه من الداخل صغير، وعلشان كده المكان اللي بـ يتعمل فيه الكريب بـ يبقى موجود في الخارج أمام المحل. ودي حاجة ظريفة بـ تضيف حيوية أكثر للمكان وتلفت نظر اللي رايح واللي جاي، والرائحة كمان بـ تملأ الشارع. الأرز باللبن والمهلبية هم أكثر الحاجات اللي الناس بـ تروح علشانها، فيه حجمين، صغير وكبير، الصغير من 3 جنيه لـ 6 جنيه والكبير من 4 لـ 7.5 جنيه وده حسب الإضافات. الإضافات هي العسل والقشطة والآيس كريم والمكسرات والفروت سلاد، وفيه مهلبية وأرز باللبن في الفرن بـ 4 جنيه، ودي من أجمل الحاجات اللي ممكن تأكلها في «المدينة المنورة». من الحاجات المميزة للمحل أنه من الأماكن القليلة قوي اللي تلاقي عندها مهلبية قمر الدين (4 جنيه) طول السنة مش في شهر رمضان فقط وهـ تلاقي عاشوراء (زي البليلة لكن بالنشا والفانيليا) برضه طول السنة وممكن تضيف عليها أي حاجة نفسك فيها. وعنده عبوات صغيرة بلاستيكية لكل أنواع الحلويات والكيك اللي أحيانًا بـ يبقى صعب تشتريه بأحجام صغيرة زي البروفيترول (9 جنيه) والترايفل (7 جنيه) وهـ تلاقي أنواع ثانية من الحلويات زي الكاسترد والبودنج وكريم كراميل وقرع عسلي (4.5 جنيه). أحيانًا بـ نحب نجرب الكسكسي بالقشطة (7.5 جنيه) رغم أنه بـ يبقى دسم جدًا لكن لذيذ، ومن اختراعات المحل ممكن تشتري لبن رايب بطعم الموز والمانجو والجوافة والفراولة بسعر 2.25 جنيه فقط. داخل المحل فيه ثلاجة عرض كبيرة فيها كل الإضافات اللي ممكن تختارها على الطبق بتاعك زي الكريز والفواكة المسكرة والكريم شانتيه وأنواع مختلفة من الصوصات الحلوة وكل الإضافات بأسعار من 1 جنيه لـ 3 جنيه. والكريب الحادق موجود منه نوعين فقط هم مشكل الجبنة والجبنة بالمشروم بسعر 7 جنيه، والحلو بالنوتيلا والموز والسكر والعسل بـ 5 و8 جنيه. والكريب هنا حلو ومكوناته فريش بس مش زي أماكن ثانية متخصصة. لخزين الثلاجات في البيوت بقى ممكن تجيب لبن وقشطة وسمن بقري وجاموسي بالكيلو وبرطمانات عسل نحل وكريمة لباني وكلها بأسعار معقولة وجودة عالية وتغليف نظيف. هـ تلاقي كل أنواع الجبن من أول القريش (15 جنيه للكيلو) والأسطنبولي (24 جنيه) لغاية الريكوتة (23 جنيه) والفلمنك المستورد (50 جنيه) والجوده ( 47 جنيه) واللبنة (12 جنيه). يعني زيارة كل أول شهر هـ تبقى مهمة لدعم الثلاجة بمنتجات الإفطار والعشاء ودعم دولاب التخزين بالسمن والزبدة والذي منه. بعد وجبتك الرئيسية في أي مطعم من مطاعم شارع النصر الكثير، سيب مكان فاضي في معدتك لطبق حلو معتبر من «المدينة المنورة».

...

ستاﭭولتا: آيس كريم بيتي أصلي في المعادي
اصدرت في: 26/06/2011

لو كل مكان فتح جديد في القاهرة كان على نفس مستوى المكان التحفة ده، أكيد البلد هـ تبقى مكان أجمل! التوقيت كمان مناسب جداً عشان الصيف، «ستاﭭولتا» فتح أبوابه وبـ يقدم للقاهريين الآيس الكريم البيتي الإيطالي المشهور به. محل صغير موجود في شارع جانبي قريب من صاب واي Subway وبنك الأهلي سوسيتيه في دجلة المعادي، فممكن ما تاخدش بالك منه بسهولة. بس خللوا بالكم أنكم وبلاش تفوتوه عشان إحنا مقتنعين أن «ستاﭭولتا» عنده أحسن أيس كريم في البلد. المحل متقسم لجزئين: جزء العرض اللي الزباين المحظوظين يقدروا يختاروا منه أكثر من 30 نكهة كل يوم، ده غير بسكويت الآيس كريم الطازة، كيك التريماسيو، الكريم كراميل، والمصاصات البيتي، والجزء لثاني هو المطبخ اللي الناس اللي معدية هناك تقدر تشوف العاملين هناك وهما بـ يعملوا أحلى شغل. طقم العاملين هناك كلهم مصريين واتدربوا أنهم يعملوا آيس كريم أصلي على يد شيف إيطالي جه مخصوص عشان الغرض ده، وده إستثمار كويس، لأن صناع الأيس كريم الموهوبين دول دلوقتي بــ يقدموا حلويات زيها زي أحلى حلويات في روما. بـ 10 جنيه للبولة في كوب أو بسكويتة، «ستاﭭولتا» بـ يقدم آيس كريم فريد من نوعه وحلويات جميلة للصيف. خزين «ستاﭭولتا» من نكهات الآيس كريم المختلفة لا يحصى ومثير للإعجاب، بـ 60 نكهة من أول الأنواع الإيطالية التقليدية زي mascarpone والدولتشي فيتا، ولغاية النكهات المصرية زي الكركديه والتمر الهندي. أحسن إختيار لك هـ يتوقف على ذوقك الشخصي، ومن الصعب أن نكهة ماتعجبكش في «ستاﭭولتا». العاملين لمّا بـ يستقبلوك بـ يحاولوا يخللوك تجرب نكهات كتير قد ما انت عايز قبل ما تختار، بس خلّي بالك، كل نكهة منهم لذيذة جداً لدرجة تخلّي الإختيار أصعب أكثر. رغم أن أغلب الإختيارات هناك كريمية وأساسها معمول من اللبن (بس برضه لسّه خفيفة ومنعشة)، لكن فيه كمان إختيارات جرانيتا خالية من الألبان وبرضه لذيذة جداً. جرانيتا البطيخ عندهم خيالية، ونتحداك أنك تلاقي حاجة منعشة أكثر من كده في يوم صيفي، وطعم الجزر بالليمون والبرتقال برضه منعش وطِعِم بطريقة مرعبة. بالنسبة للنكهات الغنية، مش هـ تلاقي أحلى من شيكولاتة «ستاﭭولتا». لعشاق الشيكولاتة، خللوا بالكم ده ممكن يبقى إدمانك المفضل بعد كده. الجوافة باللبن ناعمة وغنية بالطعم، وكريمة جوز الهند قوامها حلو. فيه إختيارات تانية متوفرة زي القهوة، اللبن بالشيكولاتة، الشيكولاتة البيضاء، التشيز كيك، زبدة الفول السوداني، الفستق، الكراميل، الموز، الكانتالوب، الليمون، وحاجات تانية كتير. «ستاﭭولتا» أحسن محل جديد للآيس كريم فتح في المعادي من سنين، وإحنا بـ نحسد سكان الحي الهادي على المحل ده.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن