دليل الحياة في كايرو القاهرة، أحدث المقالات عن الحياة في كايرو مصر

الحياة في كايرو

اعرف التسعيرة الجديدة لأوبر وكريم والتاكسي
اصدرت في: 04/12/2016

طبعا كلنا عارفين إن الزيادة في أسعار البنزين والسولار أدت لارتفاع أسعار كل المواصلات. ومنها التاكسي وخدمات "أوبر" و"كريم". وبحسب خبر نشره موقع "المصري اليوم" فإن محافظ القاهرة عاطف عبد الحميد، اعتمد بشكل رسمي التسعيرة النهائية، وكان لازم في #كايرو_360 نقول لكم عليها علشان تبقوا فاهمين الموضوع كويس. التاكسي الأبيض فتح العداد 4 جنيه. 175 قرش لكل كيلومتر. ساعة الانتظار 14 جنيه، يعني حوالي 23 قرش للدقيقة في المشوار. تطبيق "كريم" فتح العداد 3 جنيه. 140 قرش لكل كيلومتر. ساعة الانتظار 13.8 جنيه، يعني حوالي 23 قرش للدقيقة في المشوار. تطبيق "أوبر" فتح العداد 3 جنيه. 130 قرش لكل كيلومتر. ساعة الانتظار 12 جنيه، يعني حوالي 20 قرش للدقيقة في المشوار. سعر تكلفة المشوار: الأجرة بتتحسب بفتح العداد، زائد المسافة في سعر الكيلومتر، زائد سعر الوقت المستغرق في المشوار. يعني من الآخر كده، لو تكلفة المشوار بالتاكسي الأبيض 15.05 جنيه، تبقى في "أوبر" 11.5 جنيه، وفي "كريم" 12.30 جنيه.

...

5 حاجات تخليك لازم تحب #القاهرة!
اصدرت في: 01/12/2016

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة حكومية. كلها حاجات أساسية بتيجي في دماغك بمجرد ما تسمع كلمة "القاهرة". إحنا ماننكرش ده، لكن خلينا نعترف إن القاهرة فيها حاجات مش موجودة في بلد تانية في العالم مش بس مصر. حاجات تخليك غصب عنك تحبها وترتبط بيها. خلينا ناخد فكرة سريعة كده عن الحاجات دي: وسط البلد ماينفعش تبقا من سكان القاهرة وماعدتش على وسط البلد. المكان اللي هتقابل فيه كل أنواع الناس، باختلاف ثقافاتها وخلفياتها. أو أكبر تجمع للقهاوي ممكن تقعد عليها مع أصحابك تدردشوا مع شيشة وكوباية شاي. ده غير السينمات والمولات. وكمان محلات الأكل الكتير. باختصار كده، مفيش حاجة ماتتعملش في وسط البلد. السينمات البديلة السينمات هنا مش مقصود بيها السينمات العادية، إطلاقًا. مقصود بيها دور العرض والمراكز اللي بتعرض أفلام المهرجانات، أو الأفلام العادية. بس بأسعار رمزية جدًا أو حتى ببلاش. زي زاوية أو سينما دال أو درب 1718، وغيرها من الأماكن اللي مش ممكن تلاقيها في أي بلد تانية. الأنشطة والهوايات لو انت موهوب، بتحب ترسم أو تلعب مزيكا أو بتحب التصوير أو أي نوع نشاط انت بتفضله. لو عايز تاخد كورس في مجال معين لشغلك أو لدراستك. القاهرة مليانة أماكن و work spaces بتوفر ورش عمل وكورسات كتير في المجالات دي كلها. وكمان بأسعار على قد الإيد. زي شفشاون ومساحة وملاذ وغيرهم كتير. وهتلاقيهم بسهولة من غير تعب. الرحلات كلنا بنحب الرحلات. سواء رحلات مصايف أو الرحلات اللي بنطلع فيها نزور أماكن أثرية، أو نسكتشف جوانب مختلفة من الطبيعة، أو حتى نطلع نقضي day use في أي مكان نغير بيه المود. في القاهرة هتلاقي أكتر من مكان بينظم الرحلات دي لكل مكان في مصر طول السنة. تقدر تعرف كل المعلومات من خلال صفحات وجروبس كتير على فيسبوك. المراكز الثقافية في القاهرة بس هتلاقي أماكن ومراكز الثقافية كتير تقدر تحضر فيها حفلات التراث الشعبي والفلكلور والفنون الصوفية. وتتعرف على ألوان كتير مختلفة من الفنون، وفرق من كل أنحاء مصر. تقدر تحضر الحفلات دي في أماكن زي الربع أو مكان أو مسرح الضمة. وكمان هتلاقي الصالونات الثقافية اللي فيها بيتم مناقشة أنواع مختلفة من الكتب والروايات والقصص. الظاهر كده إن دايمًا في حاجة بتخليك تحب القاهرة ونيلها وطول ليلها ومواويلها، حبها واتبسط على قد ما تقدر بقى.

...

دليلك لويك إند سعيد: استمتع ببرد الشتاء
اصدرت في: 01/12/2016

برد برد عم بتشتي الدنيا، المطرة والبرد مش مبرر أنهم يمنعوا الناس تخرج وتتفسح في الويك إند ده، لكن كمان الخروجة بيكون لها متعة خاصة، متعة شرب كوباية شوكولاتة سخنة في البرد، أو نسكافيه تضبط بيه مودك. والمشي تحت المطر مع صوت فيروز. نبدأ بالنهارده الخميس، ومركز المصطبة للموسيقى والفنون التراثية واللي بيستضيف مسرح الضمة بوسط البلد عامل حفل لفرقة الطنبورة البورسعيدية، وسعر التذكرة 30 جنيه. كمان في علبة ألوان بالزمالك فيه حفل للإنشاد الصوفي والموسيقى الروحية تقدمه فرقة "برهان" للإنشاد الصوفي ومديح الحضرات، وسعر تذكرة الحضور 50 جنيه. شاملة المشروب. أما في روم آرت سبيس بجاردن سيتي ففيه حفل موسيقي للفنان شادي القصير وفرقته، اللي بيقدموا موسيقى الجاز، وسعر تذكرة الحضور 50 جنيه. كمان في سينما زاوية في وسط البلد فيه عرض للفيلم الوثائقي "20 سبتمبر" المعروف باسم "هدية من الماضي" للمخرجة الشابة كوثر يونس، وسعر تذكرة الحضور 35 جنيه. وننتقل ليوم الجمعة، هتلاقوا في مسرح الهوسابير آخر أيام العرض المسرحي "البروفة" واللي هيقدمه فريق العرض المسرحي الشبابي الشهير "1980 وأنت طالع"، وسعر التذكرة 25 جنيه. كمان لمحبي الأوبرا هتلاقوا على المسرح الكبير بدار الأوبرا المصرية عرض موسيقي بعنوان "أوبرا الحفل التنكري"، وأسعار التذاكر تبدأ من 35 لغير الطلبة و 25 للطلبة. أما لعشاق الجري فمجموعة الجري الجماعي الأشهر في القاهرة "Cairo Runners" عاملة يوم للجري الجماعي في وسط البلد، ونقطة التجمع أمام قصر عابدين، المشاركة مفتوحة للجميع. ونختم بيوم السبت، وعلى مسرح قاعة النهر بساقية الصاوي فيه حفل لفرقة "وسط البلد"، وسعر تذكرة الحضور 60 جنيه. كمان على مركز المصطبة للفنون الفلكلورية والشعبية هيستضيف مسرح الضمة بوسط البلد حفل لأسياد الزار، والزار هو فن غنائي شعبي قديم تحتل المرأة فيه دور بارز في الغناء والعرض، وسعر تذكرة الحضور 30 جنيه. ولمحبي الفلكلور الشعبي هتلاقوا في مركز إبداع وكالة الغوري، حفل تنورة، وأسعار التذكرة 5 جنيه للمصريين. لو عاوزين تعرفوا أكثر عن الأحداث اللي بننشرها كل يوم على مدار الشهر، تابعوا أجندتنا. ويك إند سعيد!

...

النهارده في القاهرة: أغاني وأفلام وتنورة وزار.. وأنت عليك تختار
اصدرت في: 30/11/2016

اليوم بادئ بشكل لطيف الحمد لله، وخلاص داخلين على الويك إند والأجازة والذي منه. والظاهر كده الحفلات والإيفينتات بتكتر على السيرة دي. يبقى على طول تعالوا نشوف أجندتنا النهارده فيها إيه. نبدأ كده بداية مزاج مع حفلة تنورة لفرقة التنورة التراثية في وكالة الغوري. الفرقة بتقدم رقص التنورة المستوحى من التراث الصوفي. الحفلة هتبدأ الساعة 7 مساء، وسعر التذكرة 5 جنيه. نكمل برضه في نفس المود مع "عرض زار بتقدمه فرقة مزاهر" في مكان. العرض بيبرز دور المرأة في الأداء والغناء في الشكل التراثي. العرض هبيبدأ الساعة 8 مساء، وسعر التذكرة 30 جنيه. ننقل بقى لجو الحفلات والأغاني ونبدأ مع "حفلة الفنان علي الحجار" على مسرح النهر في ساقية الصاوي. الحفلة هتبدأ الساعة 9 مساءً. أقل سعر للتذكرة 55 جنيه للأعضاء، 60 جنيه لغير الأعضاء. ومن ضمن فعاليات مهرجان "مزيكا في السطح" هنلاقي درب 1718 مجهز لنا حفلة لفرقة الراب "واي كرو". الحفلة هتبدأ الساعة 8 مساءً، وسعر التذكرة 50 جنيه. طبعًا عشاق الأفلام لهم برضه نصيب النهارده. سينما زاوية هتعرض الفيلم الوثائقي "20 سبتمبر". العرض هيبدأ الساعة 7 مساء، وهيكون كل يوم حتى 6 ديسمبر. سعر التذكرة 35 جنيه. وكمان سينما دال بجاردن سيتي هتعرض فيلم "A Clockwork Orange" الساعة 7:30 مساءً. الفيلم للكبار فقط والدعوة عامة. يومكم جميل.

...

النهارده في القاهرة: حفل نوبي وموسيقى روحية وعرض في الأوبرا
اصدرت في: 29/11/2016

يا صباح الخير ياللي معانا.. نوفمبر بيودعنا وداع لطيف، وبيسلم الراية لديسمبر مع وصية ليه علينا بصحبة سعيدة ومرور خفيف. النهارده القاهرة فعالياتها مش كتير كعادتها معانا لكن البركة في الموجود. البداية هتكون من المركز المصري للثقافة والفنون "مكان" في وسط البلد، اللي هيستضيف حفل نوبي مميز مع فرقة "أراجيد" للفن النوبي، الحفل هيتشارك فيه الفنان النوبي فرح المصري والفنان مصطفى هيركي في تقديم تراث الغناء والاستعراض النوبي المحبب لنفوسنا، بداية الحفل في تمام الثامنة مساءً وموعد سقوط الحجز 7:30 مساءً، وسعر تذكرة الحضور 30 جنيه. ومن مدار في المعادي هنكون على معاد مع حفل رباعي إسلام الشعري، الحفل هيكون عبارة عن تقديم لموسيقى روحية ارتجالية، هيشارك فيه كل من إسلام الشعري ونانسي منير وأوسو لطفي وميزو جمال، سعر تذكرة حضوره 60 جنيه، والبداية في الثامنة مساءً. ونختم مع جوهرة اليوم، من دار الأوبرا المصرية اللي هيستضيف المسرح الكبير فيها أول أيام عرض "أوبرا الحفل التنكري" اللي هيستمر لحد يوم الجمعة 2 ديسمبر، العرض بيتم بمشاركة فرقة أوبرا القاهرة وأوركسترا أوبرا القاهرة وباليه أوبرا القاهرة وكورال أوبرا القاهرة، أسعار تذاكر حضوره بتبدأ من 25 جنيه للطلبة، و 35 جنيه لغير الطلبة، وبدايته في تمام الثامنة مساءً. يومكم سعيد.

...

النهارده في القاهرة: تشكيلة مزيكا ومسرح على رشة ثقافة وفن
اصدرت في: 28/11/2016

تاني يوم في الأسبوع يعني لسه في بدايته، وحلم أجازة الويك إند لسه بعيد شوية. يبقى أكيد هنلجأ للحل السحري لكل مشاكل وضغوطات الأسبوع، وهو أجندة حفلاتنا في كايرو 360، اللي دايمًا هدفها تبسطكم. تعالوا نشوف مجهزة لنا إيه: نصيب الأسد النهار ده هيكون لدار الأوبرا المصرية. اللي بتسضيف حفل موسيقي لرباعي الأوبرا الوتري على المسرح الصغير. الحفل هيبدأ الساعة 8 مساء. وسعر التذكرة: 25 – 35 جنيه للفرد. وفي نفس الوقت هيكون في حفل لفرقة الإيقاعات الشرقية، بقيادة الفنان سعيد الأرتيست، على المسرح المكشوف. سعر التذكرة: 25 جنيه للفرد. لو بتحب المسرح يبقى خد بعضك وطير على ساقية الصاوي، علشان قاعة الحكمة هتستضيف العرض المسرحي "قصة حياة طفل اسمه أوسكار". العرض هيكون الساعة 6 مساء. وسعر التذكرة: 15 للأعضاء، و20 جنيه لغير الأعضاء. نروح بقى لوكالة الغوري نلاقيها مجهزة لنا حفل تنورة لفرقة التنورة التراثية. اللي بتقدم رقص مستوحى من التراث الصوفي. الحفل هيبدأ الساعة 7 مساء. وسعرة التذكرة: 5 جنيه. التاريخ والأدب والثقافة من المجالات اللي لها جمهور كبير، وعلشان كده الصالون الثقافي في نقابة الأطباء "دار الحكمة" هيستضيف معرض لمجموعة من المجلدات الأدبية بعنوان "تاريخ مصر". وهيعرض كمان مجموعة من الأفلام الوثائقية القصيرة. والمعرض مستمر لحد 30 نوفمبر الجاري. يومكم سعيد يا قاهراوية.

...

النهارده في القاهرة: حفل المولوية وعرض مسرح وسينما وجولة سياحية
اصدرت في: 27/11/2016

بداية آخر أسبوع في الشهر والأمل بيتجدد في أوقات خفيفة وسعيدة تزق الدنيا معانا لحد آخر أيام الشهر، والأنظار كالعادة متجهة لأجندتنا وفعالياتها، يللا بينا نشوف. اللون الصوفي المحبب لنفوسنا فارض نفسه على ساحة الفعاليات الفنية النهارده بالحفل اللي هتستضيفه ساقية الصاوي لفرقة المولوية المصرية بقيادة المنشد المعروف عامر التوني، الحفل هيبدأ على مسرح قاعة النهر في تمام الساعة السابعة مساءً وسعر تذكرة حضوره 35 جنيه. ومن مركز الربع الثقافي في شارع المعز هنكون على معاد مع عرض مسرحي بعنوان "حب"، العرض كان تم تقديمه قبل كده في مهرجان كيميت للعروض المسرحية القصيرة، ودي المرة التانية لتقديمه، سعر تذكرة حضوره 10 جنيهات فقط، وهيبدأ في تمام الساعة 6:30 وآخر معاد لحجز التذاكر 6:00 مساءً. في حين هيستضيف درب 17 18 بمنطقة مجمع الأديان بمصر القديمة –بتنظيم سينما الفرن- عرض للفيلم الإسباني También la lluvia""، العرض هيبدأ في تمام السابعة مساءً والدعوة عامة. ونختم فعالياتنا مع جول سياحية ليلية داخل المتحف المصري من تنظيم مبادرة "ميراث"، الجولة هتضم شرح وتعريف كل المعروضات في المتحف، وهتبدأ في تمام الخامسة والنصف مساءً، والجولة مجانية لكنها غير شاملة تذاكر دخول المتحف. أسبوعكم سعيد.

...

نوفارتيس: عشرين سنة مع أحسن ناس
اصدرت في: 24/11/2016

من أيام قليلة كلمناكم على #هاشتاج_عشرين اللي كان عامل قلق على السوشيال ميديا وماكناش لسه فاهمين أوي طبيعته ولا مصدره، ووعدناكم في نهاية كلامنا معاكم أننا وقت مانجيب التايهة، هنشاور لكم عليها، وإحنا عند وعدنا. زمان قالوا أن اللحظات المميزة مش بتحتاج مننا أي مجهود علشان نوثقها أو نحفظها، هي كده كده مطبوعة جوه القلوب ومحفورة في الذاكرة، لكن ده لا يمنع أننا نحاول نقضيها بشكل مميز علشان نزود من رصيدها عندنا، ونحمّلها ذكريات حلوة تانية تتحفظ على اسمها! "نوفارتيس"، شركة الأدوية العالمية اللي بتمتد جذور تأسيسها لقرابة القرنين من الزمان، بتكمل عشرين سنة باسمها الحالي بعد اندماج الشركات المكونة ليها في سنة 1996م، والحقيقة أنه الحدث لو كان مقرر يختار توقيت حلوله ماكانش هيختار أحسن من الوقت ده، الوقت اللي تصدرت فيه الشركة السويسرية الأصل قائمة المبيعات بين كل شركات الأدوية في العالم، ده غير نجاحها الإقليمي المطلق في مصر والشرق الأوسط. لما تبقى شريك يبقى لازم تفرح، لأن الموضوع طلع يخصك، وبما أننا كنا لسه بنجيب في سيرة نجاح الشركة فعايزين نضيف على القايمة نجاحها الأدبي الأكبر، في جعل كل الناس شركاء فيها، ابتداءً من هيكلها الإداري ومرورًا بالموظفين وانتهاءً بالجمهور المستفيد، شكل التعامل، معايير اختيار الناس اللي بتمثل الشركة، طبيعة المنتجات، كل مساحة هي تفصيلة صغيرة من تفاصيل الصورة اللي رسمتها الشركة بنجاح في أذهان كل اللي احتكوا بيها، إحنا كجمهور مستفيد مانعرفش أوي المجال واللي بيحصل فيه، ولا يهمنا نعرف غالبًا، لكن نعرف كويس أن في العوارض المرضية البسيطة زي الصداع أو الآلام المؤقتة بنصاحب "كاتافاست" أو "كاتافلام" أو "فولتارين"، ونعرف كويس في أوقات التهاب الزور ناخد لفة على "برادورال"، نعرف كويس أن اللي مركز أن إنتاجه يكون في مساحة كلنا بنقع فيها على فترات ده حد عايز يخلي نفسه الجزء اللي بيساعد في أوقات التعب من حياتنا، وعايز يشركنا معاه، علشان وقت فرحة زي ده، يلاقي كتير وياه يفرحوا. مظاهر الاحتفال بدأت بدري من أهل المطبخ، العاملين في الشركة، بهاشتاج تم إطلاقه مؤخرًا على فيسبوك وحجز مكانه كـ Popular search، #هاشتاج_عشرين اللي كان عبارة عن كرنفال مصغر فيه ضحك وهزار مخبيين وراهم حب وامتنان للمكان، وأهله.. وللقَدَر اللي جمع ناس حلوة، في مكان حلو، علشان يعملوا لنا حاجة حلوة. بعد ما تخطينا حاجز الغموض خلاص واللعب بقى على المكشوف، وعرفنا الهاشتاج الأولاني كان ليه وفين ولمين، تم إطلاق هاشتاج تاني، هاشتاج #عشرين_سنة_مع_أحسن_ناس. اللي أسقط قناع الهزار عن الحقيقة، وكشف كل المشاعر الحلوة الصادقة على المشاع. السوشيال ميديا ماكانتش مسرح الاحتفال الوحيد، أماكن تانية كتير -زي شارع المعز والقاهرة القديمة وغيرهم- كانت مسرح تاني للاحتفال، اللي تمثلت مظاهره في صورة جولة مع رفقاء رحلة النجاح، استراحة في وسط الطريق، نتشارك فيها حكاوي اللي كان، ونشحن منها طاقة للي جاي! كل سنة و "نوفارتيس" طيبة، وكل سنة وناسها أحسن ناس. 

...

دليلك لويك إند سعيد: حفل عزيز مرقة ونوبانور وعلي الهلباوي والحضرة
اصدرت في: 24/11/2016

فيه ناس بتحب تقضي حياتها تعمل نفس الحاجة كل يوم، وناس تحب تخلي كل يوم من حياتها مغامرة، تكتشف فيها حاجة جديدة عن نفسها أو عن العالم اللي حواليها، وده اللي بنحاول نوفره لكم في أجندة #كايرو_360 ونبدأ بيوم الخميس، وعلى مسرح الضمة فيه حفل لفرقة "نوبانور" واللي بتقدم تشكيلة من الغناء مع الرقص الشعبي النوبي، وسعر التذكرة عند الباب 30 جنيه. برضه في مركز الربع الثقافي بشارع المعز فيه حفل للإنشاد الصوفي المصري هتقدمه فرقة "الحضرة"، وسعر التذكرة 40 جنيه. أما على مسرح الفلكي في الجامعة الأمريكية بالتحرير فيه عرض مسرحي باسم "المسودة الأولى"، وسعر تذكرة الحضور 30 جنيه، ويستمر العرض أيام 23 و24 و25 نوفمبر الجاري. كمان على مسرح الهوسابير فيه عرض مسرحي باسم "في قلبي أنثى عبرية" عن رواية الدكتورة خولة حمدي اللي لها نفس الاسم، وسعر تذكرة الحضور 35 جنيه. وننتقل ليوم الجمعة، وعلى مسرح قاعة النهر بساقية الصاوي فيه حفل موسيقي للفنان التونسي الشهير "عزيز مرقة"، وأسعار تذاكر الحضور تبدأ من 100 جنيه. ولعشاق الجري مجموعة الجري الجماعي الأشهر في القاهرة "Cairo Runners" عاملة فعالية للجري الجماعي في المقطم، ونقطة التجمع في ميدان النافورة، والمشاركة مفتوحة للجميع. كمان الصالون الثقافي بمقر نقابة الأطباء (دار الحكمة)، بالتعاون مع مكتبة الإسكندرية،فيه معرض لإصدارات مكتبة الإسكندرية من المجلدات الأدبية بعنوان "تاريخ مصر"، وعاملين ندوة ثقافية لعرض الأفلام الوثائقية القصيرة، من 24 حتى 30 نوفمبر الجاري. برضه في مكتبة البلد في وسط البلد فيه أمسية شعرية بحضور كثير من الشعراء الشباب ده غير فقرات غنائية وموسيقية، والدعوة عامة. ونختم بيوم الخميس، وهتلاقوا في مركز الربع الثقافي بشارع المعز حفل لفرقة "برهان" للإنشاد الصوفي، وسعر تذكرة الحضور 30 جنيه. ولمحبي الإنشاد الصوفي فيه على المسرح المكشوف بدار الأوبرا المصرية حفل غنائي للفنان علي الهلباوي، وسعر التذكرة 50 جنيه. ده غير أن على مسرح الجمهورية التابع لدار الأوبرا المصرية فيه حفل لفرقة "الإخوة أبو شعر" واللي بتقدم الإنشاد الصوفي الشامي والابتهالات والمديح، وأسعار تذاكر الحضور 25 - 35 - 50 جنيه. كمان بيت السناري بالسيدة زينب التابع لمكتبة الإسكندرية، عامل ندوة مفتوحة للجمهور بعنوان "الساقية النوبية"، والدخول مجاني. لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا. ويك إند سعيد!

...

أجمد 5 apps لازم يكونوا على موبيلات سكان كايرو
اصدرت في: 24/11/2016

مصممين الـ apps الخاصة بالتليفونات الذكية دايمًا بيحاولوا يخلوها مفيدة بأكبر شكل ممكن للمستخدمين. وطبعًا كتير منها بيبقى مناسب لنا هنا في مصر. لكن أحيانًا إحنا كمصريين بنكون محتاجين لـ apps مخصوص لينا. وعلشان تتعمل محتاجة مصريين زينا عارفين طبيعة حياتنا كويس، وعارفين إزاي يوظفوا الـ apps دي صح. تعالوا نشوف أكتر 5 apps مطرقعة من وإلى المصريين: Beitko معروف إن البحث عن مكان سكن في القاهرة صعب ومتعب جدًا. "Beitko" بيشيل عنك كل الهم ده وبيوفر لك طريقة سهلة تلاقي بيها شقة أو بيت حسب رغباتك. Rakna لو سألت أي حد معاه عربية إيه أرخم حاجة ممكن تقابلك في أي مشوار، هيقول لك الركنة. علشان كده "Rakna" هيساعدك تلاقي الركنة في أقرب مكان أنت رايح له، وكمان من غير وجع الدماغ مع السايس. Selah el Telmeez ده أكتر تطبيق هيفرح كل طلبة المدارس. علشان أخيرًا هيرتاحوا من القعدة في الدروس الخصوصية مع مدرسين بيشربوا شاي وياكلوا الكيكة اللي ماما عملاها. التطبيق ده بيساعدهم يذاكروا ويحلوا الأسئلة والامتحانات على الموبايل. Iqraaly إحنا كمصريين أكتر من نص عمرنا ضايع في الزحمة والمواصلات وزنقة الميكروباصات. وده بيسيب وقت قليل جدًا للناس اللي بتحب تقرا. علشان كده "Iqraaly" بيخليك تتابع كل الأخبار والكتب بالصوت، وفي أي مجال أنت بتحبه. Otlob الناس الأكيلة أكيد التطبيق ده موجود على موبايلاتهم من زمان. "Otlob" بيسمح لك تطلب الأكل من أكتر من 500 مطعم في القاهرة. وكمان خدمة عملاء تقدر تجيب لك الأكل من تحت الأرض.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح