جيمانزيوم صحة ولياقة in Cairo, Egypt

صحة ولياقة

إيف جيم: أقصر طريق لرشاقة السيدات في مصر الجديدة
اصدرت في: 18/12/2013

فى عالم الصحة واللياقة في القاهرة أول ما بـ نقرر نعمل دايت بـ نفكر فى حاجتين: دكتور تخسيس وجيم، وفيه "إيف جيم – Eve's Gym" (للسيدات فقط) هـ تلاقى الاثنين فى مكان واحد. فى"إيف جيم" ممكن تخسى فى 3 شهور (برنامج الـ 90 يوم) وكمان هـ تخسى بطريقة صحية بدون عذاب وبدون حرمان، حتى الرياضة اللى هـ تمارسيها هـ تكون مريحة لأنك هـ تخسى عن طريق تمارين الأيروبكس وعلشان السمنة مش سببها الوحيد الأكل، هـ تلاقى أطباء نفسيين هـ يتابعوكى أثناء الكورس علشان يوصلوا لسبب السمنة اللى عندك ويساعدوكى أنك تتخلصى منه، وأحلى حاجة فى الكورس أنك مش بـ تكونى لوحدك بـ يكون معاكى مجموعة من السيدات بـ ينفذوا الكورس وبـ يكون فيه روح تنافسية بينكم وكمان بـ تشجعوا بعض أنكم تكملوا. طبعًا هـ تفتكروا أن الكورس بفلوس كثير، نحب نقول لكم أن الكورس 3 شهور بمبلغ "2500" جنيه وممكن كمان ما تدفعيش خالص لأن السنتر بـ يعمل مسابقة فى الكورس للسيدات اللى خسروا أكبر وزن، يعنى اللى هـ تخسر أكبر وزن هـ تسترد الفلوس اللى دفعتها كلها، وثانى سيدة بعدها هـ تسترد 50% من المبلغ والثالثة هـ تسترد 25% من المبلغ. الكورس بـ يتكون من 3 برامج: برنامج رياضى ونفسى وبرنامج تغذية واللى بـ ينفذ البرامج دى فى الكورس خبراء فى مجالهم، وقبل ما نبدأ الكورس بـ نقيس جسمنا بجهاز قياس الجسم والجهاز ده بـ يحدد كمية المياه فى الجسم وكمية الدهون وكمية العضلات وتوزيعها على البطن والصدر، والسعرات الحرارية اللازمة للجسم والوزن المطلوب إنقاصه وكمان الجهاز بـ يحدد وزن كل منطقة فى الجسم علشان لو فيه مناطق مش متناسقة يتم التركيز عليها فى الكورس وبـ يتم تخسيس كل منطقة فى الجسم بطريقة معينة. وطبعًا علشان الجيم للسيدات بس فكل العاملين سيدات، حتى الأطباء والمدربين كلهم سيدات، وفريق العمل هـ يعلمنا إزاى نتعامل مع الأجهزة الموجودة وكمان هـ يكونوا معنا فى تدريبات الأيروبكس سواء مبتدئين أو محترفين، وعلشان نضمن أننا نستفيد بشكل جيد من التدريبات هـ يكون لكل سيدة مدربة خاصة بها تتابع معها الكورس من البداية للنهاية وكمان هـ تكون معاها فى تدريبات الأيروبكس، ولو فيه بنات بـ يخجلوا أنهم يتمرنوا مع زميلات لهم ممكن يتمرنوا لوحدهم. كمان بعد كل مرحلة فى الكورس هـ نستلم تقرير عن حالتنا البدنية ولياقتنا علشان نتحمس أكثر، ولو إحنا عندنا مناطق معينة هى اللى محتاجة تخسيس بـ يتم التعامل معاها وكمان هـ يعرفونا أساليب تغذية وتمرينات معينة علشان ما ترجعش للسمنة مرة ثانية، وده لأن الجيم مش بـ يستعمل أى تدخل جراحى وطبعًا كل عضوة فى الكورس لها برنامج معين يناسب جسمها وحالتها النفسية وده بـ يتم تحديده بعد قياس الجسم. "إيف جيم للسيدات" مساحته كبيرة مقسمة إلى صالة للآلات الرياضية وصالة لتدريبات الأيروبكس، وفيه كمان كافيه كبير علشان بعد التمرين ممكن تقعدى مع أصدقائك، وكمان ميزة مهمة جدًا للسيدات اللى عندهم أطفال وممكن ما يعرفوش هـ يسيبوهم فين وقت التمرين المشكلة دى "إيف" حلوها لأنه وفر مكان لاستضافة الأطفال حتى الرضع، المكان فيه كل وسائل الترفيه والراحة للأطفال وكمان فيه مرافقات للأطفال ومستوى الخدمة والنظافة فيه على درجة كبيرة جدًا، والمفاجأة أنه من غير مصاريف إضافية. فيه حوامل كثير بـ يخافوا أن جسمهم ما يرجعش لطبيعته بعد الولادة، فى "إيف جيم" تمرينات خاصة بالحوامل تحت إشراف طبى ومتخصصين والتمرينات دى بـ تحافظ على شكل جسمك بعد الولادة. طبعًا فيه ناس كثير ممكن يكونوا مش بـ يعانوا من السمنة بس بـ يحبوا يحافظوا على جسمهم ودول "إيف" عمل لهم الاشتراك السنوى وقيمته "2700 جنيه" بمعدل 12 جلسة فى الشهر أو عدد الجلسات اللى العميلة بـ تحددها بشرط ما يزيدوش عن 12، وممكن يتم الدفع بالشهر، وبـ يتم فى الجلسات تمرينات أيروبكس وتمرينات رياضية وبـ يتم قياس الجسم بشكل دورى.

...

هيرز: جيم متكامل للسيدات فى هليوبوليس
اصدرت في: 29/10/2013

مع الاحتياج الشديد للخصوصية، وعلشان المكان الوحيد للتمرين بالنسبة للسيدات هى جيمات القاهرة المختلطة، لازم تحصل زيادة فى عدد الأماكن الخاصة بالسيدات فى أنحاء المدينة. مع افتتاحه حديثًا كواحد من أفراد عائلة سامية علّوبة، "هيرز - Hers" بـ يقدم جيم جديد مخصص للسيدات وبس. هيرز مكانه واضح فوق دار حضانة مع فرع من فروع صالون التجميل "نيل فاشون" داخل الجيم، بهدف تلبية الاحتياجات البدنية والتجميلية للسيدات المشغولات. وسط إضاءة مبهرة خارج المكان، الواجهة الزجاجية على مدخل المبنى مخصصة لمركز اللياقة وتمرين الأطفال "ماى جيم - My Gym"، أما السلالم والدور العلوى بـ يمنع دخول الرجال تمامًا. الجيم نفسه صغير ونظيف، مجهز بأحدث الأجهزة المتراصة بجانب بعضها. قسم الكارديو محدود شوية لكنه فى نفس الوقت كاف، وفيه عدد قليل من المشايات وجهازين cross-trainer. الأوزان الحرة تقريبًا مش موجودة، خصوصًا أن التركيز عليها غالبًا بـ يكون من الرجال، ويعوضوهم مجموعة من الأجهزة المسؤولة عن تمرين أغلب عضلات الجسم. رغم أن ديكورات المكان المعاصرة هدفها خلق شعور بالمساحة الواسعة، لكن أكيد فيه مشكلة من ناحية الخصوصية للفرد، خاصة فى أوقات الذروة. فى وقت زيارتنا، كانت شغالة موسيقى عالية حماسية من السماعات مع تليفزيونات مُعلقة فوقنا. مخصصين غرف لجلسات الدراجات spinning وحصص اللياقة الجماعية. مواعيد الجيم تبدأ من 11 صباحًا لغاية 10 مساءً، بـ يقدموا خلالها كل أنواع الأنشطة من الرقص الشرقى والزومبا، لليوجا، بيلاتس وحتى حصص اللياقة. يميز غرف تغيير الملابس، الدواليب والحمامات النظافة والمساحة الواسعة، وفى آخر المكان منطقة الاستجمام الفخمة. مع الإضاءة الخافتة والديكورات العتيقة، الجاكوزى الدافئ بفقاعاته المثيرة هو المكان المثالى للاستشفاء. نفس الجو المريح ينطبق على الساونا وغرفة البخار الجاهزين للاستخدام فى أى وقت. تصميم المكان يرجعك فى الآخر من جديد لمكتب الاستقبال، المعروض فيه مجموعة من المجوهرات البراقة للبيع، وفى الخارج منتجع نيل سبا اللى بـ يقدم مجموعة كبيرة من طرق التجميل. قضاء يوم فى الجيم سعره 100 جنيه والاشتراكات أسعارها تتراوح بين 800: 4200 جنيه لفترات توصل لسنة كاملة. بجانب القياسات المبدئية للجسم، تعليمات غذائية، حصة مع مدرب خاص وتجربة جهاز vibrating Power Plate بسعر 65 جنيه للساعة، العضويات تشمل استخدام الأجهزة، وحصص اللياقة، والساونا، وغرفة البخار والجاكوزى؛ وزى أغلب الجيمات، عدد دعوات الضيوف محدد على حسب مدة الاشتراك. الجيم للأسف مش أكبر كثير من الغرف الخاصة بالسيدات فى الجيمات المختلطة. على العموم، مع جو مريح، طاقته كلها بناتى 100%، منتجع صحى وعلاجات تجميلية، هيرز بـ يقدم أكثر من مجرد مكان للتمرين.

...

ورلد جيم: جيم كلاسيكي في الجيزة
اصدرت في: 12/09/2013

مع كل نهاية فصل القاهريين بـ يهجموا على كل النوادي الرياضية ومراكز الجيم للتدريب وتعويض الوزن الزائد من أنتخة ودفء الشتاء وكمان علشان فورمة الساحل (أي كلام وخلاص)، الفترة دي فكرة أنك تواظب مع جيم كويس حاجة صعبة جدًا بسبب الزحمة المبالغ فيها وتضطروا تنتظروا أدواركم أمام كل جهاز كأنكم في طابور عيش، غير "الكروتة" من المدربين والأنفاس الكثيرة، لكن مع نهاية الصيف الحركة بـ تقل وتقدروا تنتظموا مع جيم كويس ونظيف زي الجيم اللي هـ نكلمكم عنه النهارده. "ورلد جيم - World Gym" في شارع همدان بالقرب من ميدان الجيزة، يعتبر من مراكز الجيم القديمة في المنطقة من سنة 2001 وحصل له تغيير وتعديل أكثر من مرة علشان يناسب معايير المراكز الثانية وفي نفس الوقت بأسعار معقولة مش مبالغ فيها، بواجهة كبيرة باسم "World Gym" باللون الأحمر أكيد هـ يلفت نظركم، سلم صغير وبعد كده بـ تكونوا في صالة كبيرة، على شمالكم هـ يكون مكتب الاستقبال وعلى اليمين ثلاثة أنتريهات حديد للانتظار، وفي واجهة المدخل لصالة التدريب وغرف ملابس الرجال وقبلها على الشمال غرف ملابس وتواليت السيدات. بـ تدخلوا من باب هـ تلاقوا غرف ملابس الرجالي والساونا وحمامات البخار والجاكوزي وكمان التواليت وغرف الاستحمام على يمينكم ومدخل صالة التدريب في الوجه، صالة التدريب عبارة عن دائرة إلا ربع كبيرة بـ يكون فيها قسم الـ Fitness على شمالكم وده مكون من أجهزة المشي والعجلات وأجهزة أخرى ومساحة كبيرة للتمارين زي عضلات البطن وغيرها، أما النصف الثاني على اليمين فهو نصف الـ Body Building مليان بأجهزة الحديد والأوزان الثقيلة وما تتخضوش لو سمعتوا صوت أشبه بالزعيق أو حاجة "دول الأولاد بـ يتدربوا"، أجهزة صالة التدريب تعتبر من الأنواع الحديثة نسبيًا لكن فيه أحدث من كده بكثير، لو قارننا السعر بالمستوى ده يبقى كويس جدًا. مستوى النظافة في كل الجيم كويس جدًا لكن الأجهزة مش قوي يعني مثلًا مافيش وسيلة للتنظيف من مكان لعب اللي قبلكم زي أماكن ثانية، كمان لازم تجيبوا معاكم فوطتكم الشخصية لأن المكان مش بـ يقدم فوط للتدريب أو للاستحمام برضه زي أماكن ثانية، باقات الاشتراك في الجيم هي شهر واحد (400 جنيه) ودعوة لشخص يتدرب معاك مجانًا، اشتراك ربع سنوي (3 شهور) 1000 جنيه و10 أيام هدية مع 3 دعوات للتدريب مجانًا، اشتراك نصف سنوي (6 شهور) 1700 جنيه مع شهر اشتراك هدية و5 دعوات للتدريب مجانًا، اشتراك سنوي (2800 جنيه) مع شهرين اشتراك هدية و8 دعوات للتدريب مجانًا، الاشتراك بـ يضم الدخول لصالات الجاكوزي والساونا وحمامات البخار وجلسات التغذية ومدربين اللياقة البدنية وكمال الأجسام، يعني تقدروا تقولوا "اتدرب وانبسط يا شعب". مستوى المدربين في ورلد جيم كويس ومعقول ووقت زيارتنا كان فيه مدرب بـ ينظم حصة تدريب عضلات البطن وكان أشبه بضابط جيش بـ يدرب الجنود بكل حزم واحترافية وقوة، ولو طلبت من حد منهم المساعدة هـ يرحب جدًا ويتابعكم من جهاز لجهاز بس تبقى معرفينهم إيه هدفكم من التدريب وهـ يساعدوكم في الوصول له في الوقت اللي أنتم عاوزينه بس تستحملوا. ورلد جيم يعتبر من المراكز اللي تقدروا تتدربوا فيها بسعر مقبول وإمكانيات كويسة لكن مستوى النظافة نتمنى يكون أفضل من كده وياريت يكون فيه فوط للتدريب وللحمام.

...

سوفيتيل الجزيرة: اقضى يوم مريح على حمام السباحة فى الزمالك
اصدرت في: 21/05/2013

الجو حر والشمس مولعة، وأنت محبوس فى القاهرة، تمام جدًا؛ اسمعنى كويس، الموضوع مش لازم يكون بالسوء ده. نقصد إيه؟ نقول لك، الحقيقة أن القاهرة مليانة طرق منعشة وممتعة تقضى بها يوم على حمام السباحة فى الحالة دى تحديدًا بـ نتكلم عن فندق سوفيتيل الجزيرة فى الزمالك. من وجهة نظرنا، المكان ده مش واخذ حقه كواحد من أجمد الفنادق فى المدينة. مكانه بـ يقع فى أكثر جزء منعزل فى الزمالك، وأول ما تقرب منه هـ تحس على طول بالراحة والهدوء. بعد ما عدينا على مكان الاستقبال الواسع البراق، توجهنا إلى المنتجع الصحى للاستمتاع بيوم من الراحة على حمام السباحة كنا محتاجينه ضرورى. زوار الفندق يقدروا بـ 300 جنيه فى أيام الأسبوع، و400 جنيه فى الويك إند يدخلوا ولمدة يوم كامل المنتجع الصحى وحمام السباحة طوال الوقت اللى يحبوه. الأسعار للأسف مش شاملة أكل أو مشروبات، وده طبعًا يعتبر إسراف، بس الصراحة الموضوع يستحق. حمام السباحة مش كبير للدرجة، بس مكانه وموقعه فى الفندق أكثر من مثالى. تقدر تختار الشيزلونجات المعتادة –رغم أن عليها مخدات ومخادع للرأس- وكمان تقدر تختار الجلوس فى المكان الأكثر خصوصية، المنطقة المشتركة؛ واللى شوفنا أن يناسبها اسم sun-couch أو "كنبة الشمس". مكانها بـ يطل مباشرة على النيل، ومع صفاء المنظر، والمكان المفتوح، بجد حاجة روعة؛ جزء من حمام السباحة بـ يطل مباشرة على النيل، وده أحسن مكان تغطس فيه. وعلى عكس فنادق كثيرة، حمام السباحة فى سوفيتيل فضل منور لوقت متأخر، وده مهم لو كنت ناوى تقضى يوم واحد بس. الخدمة كانت ممتازة والموظفين كانوا بـ ينفذوا طلباتنا فورًا. طلبنا حاجات بسيطة من المنيو، يعنى بدأنا بـ "بنانا بلاست" سموزى (54 جنيه) عبارة عن موز، وتوت، وتوت برى، وعصير برتقال وكان فعلاً اختيار رائع؛ طازج، وبارد وطبعًا صحى ومفيد. بعد ساعات من الراحة والعوم من فترة للثانية، قررنا نتغدى. الاختيارات الموجودة كان منها بيتزا مارجريتا (58 جنيه) ومكرونة كلها من القمح مع صوص بطعم جبنة جورجنزولا (56 جنيه) وكان طعمها برضه لذيذ، بس الغريب بالنسبة لنا إزاى البيتزا سعرها غالى كده! حمام السباحة كان زحمة، بس مش لدرجة تضايق، والناس الموجودة بـ يتنوعوا بين الأزواج، وشوية سياح، وعائلة واحدة مع شوية أطفال. الجو العام كان مريح؛ مافيش أى حد بـ يركز معاك أو يبص لك بشكل مزعج ودى حاجة تساوى الدنيا كلها فى مدينة زى القاهرة. سوفيتيل الجزيرة أكيد هـ يقدم لك يوم ممتع على حمام السباحة، اعمل بس حسابك تدفع زيادة شوية.

...

تايتنز ويلنس سنتر: دولة الجيم الحديث في القاهرة الجديدة
اصدرت في: 23/03/2013

فروع "تايتنز - Titans" في القاهرة اللى عمالة تفتح فى كل مكان غيرت من مفهوم التدريب وأصبح من الصعب أنكم تتجنبوه، أكبر فروعهم موجود في أسفل مبنى كبير مميز في التجمع الخامس بالقاهرة الجديدة.المدخل موجود تحت سلم مضحك شبه النفق اللي موجود تحت حمام سباحة خارجي أزرق موجود فيه شلال صناعي، للأسف في وقت زيارتنا –رغم أن الموضوع كان مغري- قررنا أننا ما ننزلش المياه اللي شكلها كان مثلج.اللوبي -وبقية الجيم- مستخدم فيه مجموعة ألوان من اللون الرمادي والأحمر اللامع وأرضيات خشبية ملونة بألوان مبهجة، الغرفة المقابلة صغيرة ومليانة بالعصائر وبار للوجبات الخفيفة والنقنقات، كمان فيه أغذية الطاقة وماركات مختلفة للبروتينات المنشطة.دخلنا من الباب الزجاجي وشوفنا منطقة تدريب كبيرة على شكل حرف L، ماكينات تدريب الكارديو زي المشايات والكروس تراينرز والدراجات موجودة على شكل صفوف معظمها ملحق به iPad، ما كناش عارفين هل من السهل أننا نستخدم الأي باد في التدريب والعرق اللى هـ نكون فيه لكنها لمسة لطيفة للتغيير من الشكل المعتاد للتدريب.بالتجول في الغرفة اللي كلها مرايات وجدنا ماكينات متنوعة من رفع الأثقال من غير أوزان موجودة في جانب واحد وبـ تتنوع الأوزان بين 2 و 50 كيلو جرام هـ تناسب التدريب المبتدئ والمتقدم، كمان فيه غرفة منفصلة للحصص الجماعية للرجال والسيدات فقط المتخصصة في حرق الدهون، بناء وتغيير شكل العضلات، مع وجود حصص زومبا للسيدات فقط وحصص رقص شرقي لكن التدريب عام مافيش مكان للسيدات فقط.في غرف الملابس البسيطة والنظيفة الأعضاء يقدروا يستمتعوا بجاكوزي خاص وساونا موجودة بالأسفل، كمان "تايتنز" عندهم ساحة صغيرة بس مناسبة لرياضة الإسكواش، الجيم بـ يوفر طبيب خاص وأخصائي تغذية لمساعدتكم في الوصول لأهدافكم في التخسيس أو كمال الأجسام."تايتنز ويلنس سنتر" بـ يقدم عدد من العروض زي اشتراك الشهر الواحد (900 جنيه) والـ3 شهور (2300 جنيه) والـ6 شهور (3150 جنيه) وفي السنة (4400 جنيه)، الاشتراك السنوي عليه تخفيض في حالة الاشتراك سنتين هـ تكلفك (7800 جنيه)، بجانب استخدام الجيم والحصص المجانية كل عرض من العرض هـ تحصلوا معه على جلسة واحدة تدريب خاص وجلسة مع أخصائي تغذية، بعد ما تختاروا الحصص اللي أنتم عاوزينها في الاتفاق تقدروا تحددوا حصص تدريب خاص تبدأ أسعارها من (1500 جنيه) للـ 12 حصة و(2600 جنيه) للـ 24 حصة وللـ 36 حصة (3500 جنيه)، كمان فيه أكثر من اختيار لتجميد العضوية على حسب مدتها مع استثناء عضوية الشهر الواحد."تايتنز" من أكثر المراكز الصحية ارتفاعًا في السعر لكنه من الأماكن اللي بـ تفتخر بتقديمها تجربة جديدة في مجال التدريب مختلفة عن كثير من الأماكن الثانية.

...

سو سبا: خدمات سبا فاخرة فى الزمالك
اصدرت في: 13/01/2013

بعد أسبوع متعب كله شغل وظهرنا مائل على الكمبيوتر، قررنا ولو لمرة، نبقى أنانيين تمامًا بكل ما تحمله الكلمة من معنى وندلع نفسنا بيوم سبا فى فندق سوفيتيل الجزيرة فى الزمالك. وعلشان "سو سبا – So Spa" إدارته لسه جديدة، قررنا نحجز ساعة من التدليك العطرى (690 جنيه).الفندق والمدخل الخاص به فيهم نوع من الجمال علشان موجودين فى مكان معزول، بـ يطل مباشرة على النيل. وصلنا مع غروب الشمس، فى ميعاد طقوس الغناء بالشموع، واللى بـ تُقدم فى لوبى الفندق كل يوم بعد الغروب تعبيرًا عن الرابط بين الثقافة الفرنسية والمصرية.بعد ما تفرجنا على عرض الموسيقى الشرقى وعزف الناى بإعجاب شديد، رحنا السلالم الدائرية اللى بـ تودى على السبا. عدينا على ممر معروض فيه مجموعة سو سبا من زيوت التدليك والعطور ومستحضرات التجميل الخاصة بـ Cinq Mond ورحب بنا عند المدخل مدير السبا بنفسه بمنتهى الاحترافية والأدب.قبل ما نجهز للعلاجات بتاعتنا، أخذنا جولة فى السبا والمنشآت التابعة له، من بينها جيم صغير بس على أحدث طراز، وغرف العلاجات، وغرف الراحة، كل ده بـ يكمل مع الشاى وكيك خفيف بالياسمين وبراونيز شوكولاتة طرية خالية من الجلوتين، وكمان حمام السباحة؛ حمام السباحة الخارجى بمساحته الشاسعة مع النيل بـ يخلقوا منظر خرافى.الأنوار فى السبا من الداخل معتمة والممرات محددة بأنوار لها طابع شرقي داخل زجاجات، والمزيكا مع الروائح العطرية بـ تغطى على حواسك كلها. معظم غرف العلاجات فردية ولاحظنا أن فيهم واحد ملحق به جاكوزى خاص. الغرف الزوجية برضه متاحة ويقدر فيها فردين يحصلوا على الخدمة الخاصة بهم فى نفس الوقت. سواء كنت اخترت تدليك فردى أو لفردين، بـ تأخذ مفتاح خاص بكل فرد لغرفة تغيير ملابس واللى بـ تبقى مجهزة بمجموعة كبيرة من هدايا السبا الصغيرة.غيرنا هدومنا ولبسنا روب طرى وشبشب قبل ما نتعرف على المدلكة وأخذنا حمام قدم دافئ علشان نبدأ، بـ يكمله زيت الورد والملح وتدليك قدم مريح. بعدها مددنا على ترابيزة تدليك طرية لها ملمس حريرى وفى نفس الوقت المدلكة استخدمت زيت ليمون وبرتقال دافئ رائحته منعشة وبمنتهى الهدوء دلكت كل جزء.بعد حالة الصفاء العقلى، ببطء نزلنا على حمام السباحة الممتع اللى درجة حرارته 40 درجة وكملنا الاسترخاء مع نفاثات المياه والمنظر الممتع للنيل وحمام السباحة. الباقة شاملة استخدام غرفة البخار، بس خوفًا أننا نفضل قاعدين على طول، قررنا نوفره ليوم ثانى.لما تفرجنا على مجموعة مستحضرات Cinq Mondes الموجودة فى منطقة الاستقبال، اشترينا مرطب للبشرة Onguent de Jeunesse Aux 7 Plantes Chinoises (سعره من 678: 847.53 جنيه على حسب نوع البشرة)، ودى تركيبة عضوية ضد أعراض كبر السن مستوحاة من طرق تجميل صينية. مقشر للبشرة برضه مأخوذ من جزر بالى اسمه 'Exfoliant Graines et Fleurs (470.04 كان برضه على قائمة مشترياتنا. بـ يحسسك بنعومة وانتعاش بشرة مش عادية ورغم أن سعره غالى، بس دى منتجات لها جودة عالية مناسبة للتدليل فى المناسبات المهمة أو كهدية.أكيد هـ نرجع مرة ثانية علشان نستمتع بالترف الزيادة الموجود هناك، خصوصًا لما مسئولة التجميل عندهم ترجع فى خلال الأسبوعين القادمين علشان تتعامل مع احتياجاتنا من إزالة الشعر بالشمع والمانيكير والباديكير.

...

جولدز جيم النيل: تمرن كأنك من الفراعنة فى الجيزة
اصدرت في: 02/11/2012

الجيم ممكن يبقى مكان مخيف ومتعب لكثير من الناس. رغم كده، المنظر البانورامى الخرافى المطل على النيل عند جولدز جيم بـ يضمن لك أنك تكمل المشوار. علشان هو من أقدم الجيمات فى مصر، وأول فرع من فروع جولدز جيم فى مصر، الديكور شكله كلاسيكى ومتهالك شوية. الخشب على الطراز الفرعونى والزخارف الذهبى على الحوائط والسقف الموجود فى اللوبى كان اختيار مفاجئ، خصوصًا بالمقارنة مع فروع جولدز جيم الجديدة فى المدينة، واللى بـ تميل لتصميم حديث وأنيق. طرق الاشتراك فى عضوية الجيم كثيرة، بأسعار تتراوح بين 1.000 و5.500 جنيه على حسب مدة الاشتراك (1-12 شهر)، ودخول طوال اليوم ولا الصبح فقط (5 صباحًا: 3 مساءً). كل العضويات متضمنة حصتين تدريب شخصى ومقابلة مع خبير تغذية خاص بالجيم علشان يناقش معاك عن هدفك من التمرين. فيه حصص لياقة مختلطة أو للسيدات فقط على أساس يومى وبـ تبقى بديل لطيف لروتين التمرين المعتاد. يمكن الموضوع يستاهل أنك تقول لمديرك فى الشغل أنهم بـ يقدموا تخفيض على عضويات الشركات. منطقة التمرين الرئيسية موجودة فى الدور الثانى ومحاطة تقريبًا بالكامل بمنظر تحفة للنيل. مساحة الجيم كبيرة ومجهزة بأحدث الأجهزة علشان يساعدك على الوصول لبناء جسمك وتخفيض الوزن المطلوبين. فيه مجموعة من الأوزان الحرة والأجهزة المتخصصة. رغم كده الجيم ده مش ثابت على وحدة قياس معينة يستخدمها لأن فيه أوزان بالكيلوجرام وأوزان ثانية بالرطل، وده ممكن يبقى محير. فيه كمان أجهزة لتمارين اللياقة زى المشايات، وأجهزة كروس ترينر، وجدافات rowers وأجهزة الستيبر steppers علشان تنشط عضلة القلب. مدربين شخصيين لطاف موجودين فى أى وقت علشان يقدموا نصيحة ويساعدوك فى التمرين. لو فى يوم زهقت من منظر النيل، قنوات الدش شغالة على مجموعة من التليفزيونات المعلقة. مكان صغير بس كافى مخصص للسيدات فقط موجود جنب غرف تغيير ملابس السيدات ومعاه جاكوزى وساونا وغرفة بخار مستقلين. تقدرى تتمرنى بدون ما تحسى بخجل وتمشي وأنت في أحسن حالة من غير ما حد يحس! مجموعة من المكملات الغذائية معروضة للبيع فى اللوبى، بجانب بار عليه فواكه وكشك موبينيل، ده لو حسيت أنك عاوز تأخذ حاجة سريعة. كمان فيه غرفة أطفال تحت إشرافهم يقدر الأطفال فيها يلعبوا بأمان وأنت بـ تشيل عنك آثار الإجهاد. بعد ما تخلص وتحس بالجوع أمامك مجموعة من المطاعم موجودين تحت الجيم، لو عاوز تأخذ معاك شوية أكل صحى وأنت ماشى. رغم انطباعنا الأول، جولدز جيم النيل مكان عظيم للتمرين وفيه كل الأجهزة اللى ممكن تحتاجها علشان جسمك يوصل لأحسن أداء. إحنا مش بـ نقصر المكان ده على أنه مكان للتمرين بس، ده كمان مناسب علشان تقابل ناس جديدة وتتعرف عليهم.

...

برو سنتر: جيم أنيق ومجهز بأحدث الأجهزة الرياضية فى مدينة نصر
اصدرت في: 01/10/2012

رغم أن كثير من القاهريين عاوزين يروحوا جيم علشان يضبطوا جسمهم، بس الحماسة دى بـ تروح من عند معظمهم بعد كام شهر من الاشتراك. وعلشان كده «برو سنتر» فى مدينة نصر بـ يبذل أقصى جهده علشان أعضاءه ما يستسلموش بدرى.يعتبر برو سنتر من أشهر المراكز الموجودة فى القاهرة، والمتخصصة فى الصحة، واللياقة، وإعادة التأهيل والعلاج الطبيعى. برو سنتر بنى اسمه من خلال فروع فى كذا مكان فى القاهرة وكمان فى أربعة نوادى رياضية.وعلشان سمعنا من ناس كثير كلام عن برو سنتر وقد إيه هو مكان فخم، ومساحته واسعة وكمان فيه مشاهير كثير بـ يتمرنوا هناك من لاعبي الكورة لغاية مطربين وممثلين معروفين، قررنا نتحدى كسلنا ونروح على فرع مدينة نصر رغم أننا عارفين أن الموضوع هـ يبقى مكلف شوية.المركز بـ يقدم أنواع مختلف من العضوية: فردية، ومجموعة، وشركات، وطلبة، وكبار السن، وشباب، اشتراك سنوى واشتراكات صباحية، وكل اللى فات ده مجرد أمثلة. أسعار الاشتراك مش ثابتة ودائمًا بـ تظهر عروض جديدة. الاشتراك السنوى فى فرع مدينة نصر 3000 جنيه.الباقات الموجودة بـ تمكن الأعضاء من أنهم يستخدموا كل إمكانيات المركز زى أجهزة التمارين الرياضية المنشطة للقلب والأوعية الدموية، وحمام سباحة موجود فى الخارج، ومخصص للسيدات وقت محدد يستخدموه فيه لوحدهم، وكمان خدمات منتجع صحى متكاملة زى الساونا، وحمام البخار والجاكوزى. كمان فيه مجموعات للياقة البدنية والرقص بـ تُقدم على شكل حصص أيروبكس، ويوجا، وفنون العلاقة الزوجية، وملاكمة وأيروبكس فى المياه ورقص شرقى. وغير كده الأعضاء يقدروا يشتركوا بأنهم يدفعوا بالحصة.وعلشان أنت عضو، بـ تأخذ دعوات لأصحابك اللى نفسهم يجربوا الجيم ليوم واحد أو دعوات لسبعة أيام حسب نوع اشتراكك.علشان نبدأ برنامج اللياقة بتاعنا، المدرب بدأ بتسجيل قياساتنا علشان يتابع تطورنا مع مرور الوقت. كمان أخذنا ثلاث جلسات مجانية مع مدرب خاص علشان يساعدنا فى ضبط النظام الغذائى والريجيم المناسب لنا.الجيم مليان أجهزة متنوعة على أعلى مستوى، من أول دمبلز 2 كيلو لغاية أجهزة معقدة. معظم الأجهزة فيها شاشات تقدر تشوف عليها فيلم أو تسمع شوية مزيكا وأنت بـ تتمرن. تقدر تلاقى مدربين موجودين فى أى وقت بـ يساعدوك ويوجهوك لو فيه أى مشكلة أمامك.كمان فيه منطقة كاملة فيها أجهزة للأطفال، مع دور كامل للسيدات مليان أجهزة كثير بس كان كئيب شوية ومحبط. ولما سألنا قالوا أن دور السيدات هـ يتجدد كله قريب.بعد التمرين ما يخلص، الأعضاء أمامهم اختيارات ثانية بدل ما يأخذوا حمامهم ويروحوا. برو سنتر بـ يقدم اختيارات لطيفة زى أنك تريح على حمام السباحة الموجود فى الروف وتشوف حاجة على الشاشة الكبيرة، أو تأكل وجبة خفيفة صحية من الكافيتريا أو تستمتع بجلسة مساج.

...

بيراميدز بارك ريزورت: حمام سباحة جيد على طريق مصر إسكندرية الصحراوي
اصدرت في: 09/07/2012

الأماكن اللى بـ توفر خدمة الـ Day use أو استخدام اليوم الواحد كثيرة وفى كل مكان، لكن أنك تلاقى مكان كامل متكامل ونظيف والخدمة فيه ممتازة بـ تتوقف على الحظ، إلا إذا كان لك حد راح قبل كده وحكى لك عن تجربته هناك، مش رايح على أنك فأر التجارب الأول. لما لقينا الدنيا مقفولة خالص فى الساحل ومافيش حجز فى أى خرم إبرة قبل رمضان فكرنا فى متنفس ثاني وعرفنا عن «بيراميدز بارك ريزورت – Pyramids park Resort» من موقع على الإنترنت، بعد ما شفنا صور المكان وعجبنا شكل حمام السباحة اتصلنا بهم لأننا عرفنا أن لازم نحجز قبلها وده متاح من خلال التليفون مش لازم نروح هناك. مقابل 280 جنيه (لفردين) ممكن تقضى يوم فى بيراميدز بارك والعرض ده بـ يتيح لك استخدام غرفة (أو بـ يسموها كابينة) بـ تطل على حمام السباحة، وخلوا بالكم القاعدة عندهم أن الغرفة فى الـ Day use للمتزوجين فقط، ولو عاوز غذاء بـ تضيف 170 جنيه (إجمالى 450 جنيه لفردين وده سعر كويس جدًا) وإمكانية أنك تدخل صالة الجيم اللى هناك. لما وصلنا المكان استقبلنا الرجل فى مكتب الاستقبال بوجه بشوش، لكن للأسف كنا بـ نسحب منهم إجابات لأسئلتنا بالعافية وكأننا عارفين النظام بتاع المكان، ودي حاجة وحشة قوي، ده غير أن الإجابة على قد السؤال، بعد ما خلصنا إجراءات الورق فيه رجل محترم بـ يأخذ منك حاجتك وبـ يوصلك لحد الكابينة. المنظر المطل على حمام السباحة حلو جدًا وهو نظيف، كمان المنظر حول الفندق خاصة أنه بـ يطل على أهرامات الجيزة، الحجرة كانت نظيفة وفيها الإمكانيات اللى محتاجها، المفروض أن المكان 5 نجوم، لكن ما حسيناش ده من مستوي المكان، يمكن ده يبان أكثر فى الفندق نفسه، إحنا مش عارفين! المكان ما كانش زحمة وقت زيارتنا كان فيه كام سائح أجنبى وعربي فقط. الغذاء بـ يكون فى مطعم لو بيستو Le Pistou داخل الفندق، من الأطباق الرئيسية بـ تختار واحد من 3 اختيارات: كفتة مشوية، فراخ مشوية، أو فيلية سمك، وبـ ينزل معاها خضار سوتيه وبطاطس محمرة أو أرز، وفيه 3 اختيارات للتحلية، الأكل تسويته كويسة وجميل وطازج، بـ ينزل لك كمان عيش وسلاطة فى الأول تنقنق فيها. القعدة كانت حلوة فى الهواء الطلق جنب حمام السباحة بزاوية لكن ما كانتش بنفس فخامة الصور على الموقع بتاعهم. الـ Day use بـ يبدأ من 9 صباحًا لحد 6 مساءً أو لحد غروب الشمس، فيه مكان لركن العربية مجانًا أمام ساحة الفندق، وفيه كمان ملاعب تنس وكرة سلة وكرة قدم. المكان لطيف وأهم حاجة أنه نظيف، فيه ديكورات حلوة فى كل مكان خاصة اللى على شكل أسود محاطة بزرع خاصة فى جزء ساحة الاستقبال وكبارى عند المياة، وفيه كذا مطعم هناك فى المنطقة اللى داخل الفندق، وقعدات كنب فى كل حتة محاطة بزرع برضه. استمتعنا بالمكان وكان يوم حلو، إلا أننا كنا متوقعين حاجة أفضل بناء على اللى شفناه، نصيحتنا أنهم ما يعتمدوش على الاسم ويهتموا بالمكان أكثر، وخاصة أن المنافسة قوية جدًا فى عالم الفنادق.. وكمان المطاعم!

...

فندق سفير: قضى يومك على حمام السباحة فى الدقى
اصدرت في: 19/06/2012

من الواضح أن صيف القاهرة السنة دى هـ يبقى حر جامد، خاصة مع درجة الحرارة اللي مش بـ تقل عن 35 درجة، فلو كنت فى العاصمة طوال الصيف أو عندك وقت فاضى، تبقى فكرة حلوة أنك تستمتع بشوية انتعاش فى حمّام السباحة. الدقى عمومًا مش أول مكان هـ ييجى على بالك لما تدوّر على حمام سباحة، لكن اللى موجود فى فندق سفير فى ميدان المساحة فعلاً من أحسنهم فى القاهرة. حمّام السباحة كبير وأقصى عمق فيه حوالى 2.1 متر وده يعتبر عمق كبير بالنسبة لحمام سباحة فى القاهرة. أحلى حاجة فعلاً هى الجو العام، كمان فيه كراسى شيزلونج متوفرة. لكن اللى شد انتباهنا قوى كان مكان للقعدة بترابيزات قصيرة حولها مخدّات، نفس ستايل شواطئ دهب. ضيف على كده أن الفندق بـ يقدم الشيشة وكده يبقى اليوم تمام. الأكل كان معقول جدًا، سعر أطباق المَزة (السلاطات) 15 جنيه للطبق وتقدر تختار من أصناف كثير زى الطحينة، وبابا غنوج، والثومية والتبّولة. أطباق البيتزا والباستا سعرها من 30: 50 جنيه، أما الستيك والسمك المشوى والأكلات المشابهة سعرها بـ يكون حوالى 100 جنيه. الأكل مش بـ يُقدم عند الشيزلونجات علشان كده اطلب من الموظفين وهم هـ يحضروا ترابيزة مخصوص علشانك. بعد الكلام ده، تقدر نقول أنه أحسن حمام سباحة فى القاهرة؟ ممكن تفتكر كده، بس للأسف فيه مشكلة. فى وقت الصيف الفندق بـ يتملي ناس على الآخر ودى حاجة مش مريحة. كمان النزلاء الرجال بـ يقفوا طوال اليوم فى البلكونات علشان يبصّوا على حمام السباحة. ده غير المضايقات اللى بـ تحصل لنا على حمام السباحة نفسه. طبعًا واضح أن سفير مش مسؤول لكن المشكلة دى هـ تخلينا نفكر كثير قبل ما نيجى ثانى. بعيد عن الموضوع ده، نقدر نقول أنه من أحسن حمامات السباحة فى المدينة. علشان تقضى يوم فى سفير هـ تدفع 100 جنيه للفرد. تقدر تحط حاجاتك وأنت مطمئن فى الخزائن الموجودة فى غرفة تغيير الملابس وكمان استعمال الجيمانيزيوم ببلاش طوال اليوم. بعد ما تخلّص يومك على حمام السباحة، تقدر كمان تستخدم الساونا، البخار والجاكوزى.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح