كوافير صحة ولياقة in Cairo, Egypt

صحة ولياقة

محمد الصغير: قسم رجالي متوسط المستوى فى فرع الزمالك
اصدرت في: 25/02/2015

الكابوس اللي بـ يواجه أي رجل في القاهرة هو قصة الشعر، في صالونات القاهرة بـ تخاطر بحدوث كوارث منها أنه يقص لك كابوريا، يحط جيل زيادة وربنا وحده أعلم بإيه ثاني ممكن يحصل، لحسن الحظ، كل يوم بـ تظهر اختيارات راقية، وطبعًا لما تحب تجرب مكان مش هـ تلاقي أحسن من الاسم القاهري الشهير "محمد الصغير". مع دخولك لفرعهم المحبوب في الزمالك، هـ يحييك شباب مهندمين، قسم الرجالي مكانه في الدور الأول، ورغم كده مسئول الأسانسير رحب بنا لدخول المصعد الصغير الأنيق، أول ما وصلنا لمكتب الاستقبال، موظفين الاستقبال بكل أدب عرضوا علينا نشرب حاجة وسألونا لو كنا عاوزين شخص بعينه. مصفف الشعر بـ يوصّلك لمكان الكراسي وأحواض غسل الشعر، تقدر تختار ما بين المياه الساخنة أو الباردة، ومع الشامبو برائحته الجميلة، بدأنا رحلتنا مع محمد الصغير، الفكرة هنا أن الأحواض لا يمكن تغيير وضعها، وده ممكن يسبب مشكلة لأصحاب الأطوال. بعدها، بـ يوصلك المصفف للكرسي المقابل للمراية ويسألك عن شكل قصّتك، طلبنا كان في منتهى البساطة؛ تقصير وتدريج الأجناب والخلف، وتسوية بسيطة في المقدمة، نعتقد الموضوع بسيط وعادي جدًا، رغم كده، المصفف بدل ما يدرج الأجزاء السفلية من الشعر، قصه كله بنفس الطول على الجوانب، مع تدريج الخلف بطريقة بدائية جدًا، الأكثر كمان أنه بدل ما يسوّي شعر المقدمة، قصق منه كام ملليمتر. بعدها، هـ يطلب منك تروح مرة ثانية لغسل الشعر، وترجع على الكرسي للتسريح. من الطبيعي لما تقص شعرك أن المصفف يسألك عن طريقة تسريحك له، وعاوز كريم إيه لو كنت بـ تستخدم منتج معين، بدلاً من كل ده، المصفف استخدم شمع ثقيل جدًا من غير ولا كلمة. حتى استخدامه للشمع نفسه كان بطريقة عنيفة، غير متساوي وشكل الشعر النهائي كان مزيّت. لما طلبنا منه يخفف شعر المقدمة شوية كمان رفض، وحاول يقنع كاتب المقال أن كده تمام وبعدها مشي، مبلغ 70 جنيه يعتبر مناسب، لكن خدمة العملاء محتاجة شغل شوية. في آخر اليوم، وبعد ما راح أثر الشمع السيء، ظهر لنا شكل الكارثة الحقيقية، كان واضح أن الشعر مش متساوي، والأجزاء الخلفية من المقدمة كان واضح أنها طويلة جدًا ومع تقصير شعر مؤخرة الشعر وضح عدم التساوي. الهدف من الحكاية؟ خليك واضح، وثابت على طلبك.

...

محمد الصغير: فرع جديد فى القاهرة الجديدة يثبت أن السلسلة المحبوبة مازالت الأفضل لشعرك
اصدرت في: 01/12/2014

فيه أوقات بـ تمر علينا، بـ نحتاج لشوية تدليل، وطبعًا الفضل يرجع لضغوط الحياة الشاقة فى القاهرة، ومافيش طريقة أحسن من التوجه لواحد من صالوناتنا المفضلة للحصول على قصة شعر. من هنا، قررنا نطلع على محمد الصغير. فى مكانه المميز وسط كومبوند قطامية هايتس الهادئ المميز بمساحاته الخضراء الواسعة، فرع محمد الصغير فى القاهرة الجديدة تشعر من الخارج أن مساحته صغيرة. بعد طلوعك على السلالم المؤدية لمدخل الصالون، كانت المفاجأة اللطيفة أن المكان كبير. رحب بنا موظف حسن المظهر، واللى سلمنا أرواب بيضاء، وطلبنا منه معالجة تقويم وتجفيف للشعر (90 جنيه)، وبعدها وصلّنا لمنطقة الانتظار. انتظرنا لمدة 15 دقيقة، واللى فى الحقيقة كان وقت كويس جدًا بالنظر للزحام الموجود وقت زيارتنا، وكمان سمح لنا نتفرج على تصميمات الصالون الأنيقة والبسيطة فى نفس الوقت. مع لون أبيض شيك وشبابيك فى كل مكان بـ تسمح لأشعة الشمس المنعشة بالدخول، المكان بـ يشع بالطاقة الإيجابية. الأثاث المعاصر واللى يشمل كراسى بلاستيكية مميزة مع مخدات ملونة وبعض لوحات على الحوائط لرموز فنية منها أودرى هيبرن، قدر يخلق شكل مميز للمكان. خلص وقت انتظارنا، وطلعنا مع مصفف الشعر لغرفة ثانية، وجلسنا فيها أمام مراية طويلة. بعدها، بدأ يناقشنا فى قصة الشعر المطلوبة، وقال لنا على نصائح مهمة عن قصة الشعر المناسبة أكثر لشكل وجهنا. بعد ما اتفقنا على شكل معين، بدأ ينفذ سحره على خصل شعرنا الملخبطة. لسوء الحظ، عملية معالجة تقويم وتجفيف الشعر كانت صعبة؛ أوقات الموضوع كان مؤلم بسبب طول وكثافة الشعر وكمان قبضته الشديدة. النتيجة النهائية بعض النظر عن الوجع كانت خرافية؛ الشعر كان مشرق، كثيف ومش منفوش أو غريب؛ من الآخر، شغل روعة. لازم نضيف كمان أن السبراى المستخدم كان من نوعية ممتازة وساعد أن رائحة شعرنا تفضل جميلة طوال اليوم. بشكل عام، محمد الصغير مستمر فى إبهارنا، بطاقم عمل مميز وخدمة رائعة. أكيد إحنا عانينا من ألم بسيط نتيجة شد شعرنا، لكن الجمال يستحق الوجع، صح؟ كمان النتيجة النهائية الرائعة كانت تستحق.

...

فيفا مي: العناية الكاملة بالجمال الداخلي والخارجي تحت سقف واحد في كونكورد بلازا مول
اصدرت في: 16/11/2014

بانتشار وسائل الإعلام والاتصال في العالم، بقى سهل جدًا أن توصل لِك آخر أخبار الموضة وفن التجميل؛ وللأسف أصبح التركيز موجه على الجمال الخارجي بشكل كبير، لدرجة أن معظمنا نسي تمامًا أن جمال وصحة الروح بـ تنعكس على جمال الصورة. بعكس صالونات ومراكز التجميل اللي بـ تقدم كل ماله علاقة بالشكل الخارجي بس، فيفا مي - VeeVaaME في كونكورد بلازا مول بالقطامية بـ يقدم مفهوم مختلف تمامًا. "فيفا مي" مش بس بـ يوفر خبراء متخصصين في فن التجميل، ده بـ يساعدك كمان على إبراز جمالك وتوازنك الداخلي بتوفير مجموعة من الأنشطة المختلفة بالحجز المسبق زي اليوجا والزومبا، ده غير أنه متوفر فيه جلسات شخصية لمدة 90 دقيقة مع مدربة الحياة "نيللي ياسين"، الحاصلة على شهادات معتمدة في المجال. وبالإضافة لاهتمامهم بالمعنى الأعمق للجمال، "فيفا مي" بـ يؤمن بالتخصص في فروع التجميل المختلفة؛ فبـ يستضيف مجموعة من أشهر الأسماء في كل تخصص علشان تقدم خدماتها المتميزة كفرق عمل قائمة بذاتها تحت سقف واحد. على سبيل المثال رويال سبا – Royal Spa وهو اسم مشهور في مجال العناية بالأظافر وتجميلها، له مساحة خاصة في "فيفا مي" بـ يوفر فيها خدماته اللي مش موجودة في صالونات التجميل المعتادة، لأنهم بجانب تميزهم في الجانب التجميلي، بـ يهتموا بصحة الأظافر أولًا، يعني أبسط برامج الـ Nail Spa واللي بـ يمتد للعناية باليدين أو الساقين، بـ يشمل تحديد نوع الأظافر (ناعمة – متوسطة – صلبة) وعلى أساسه بـ يتحدد طريقة العلاج بمجموعة من مستحضرات ماركة أليساندرو Alessandro الفخمة، واللي متوفر منها طلاءات للأظافر بألوان عديدة مناسبة لكل الأذواق. أما بالنسبة لجمال البشرة، فبمساعدة مجموعة من مستحضرات بايوسفير Biosphere السويسرية، واللي مصنوعة من مواد طبيعية بتكنولوجيا متطورة، خبير التجميل اللبناني عادل حسين هـ يساعدك على تقييم ومعرفة نوع بشرتك، وعلى أساس التقييم ده هيتم عمل برنامج علاجي لها وللحفاظ على نضارتها. من الخدمات الموجودة في "فيفا مي" تركيب رموش صناعية، ولكن بطريقة متطورة وعملية أكثر؛ فبعد تحديد الأماكن اللي هـ يتم فيها تكثيف الرموش واللي بـ تختلف من شخص لآخر، خبيرة التجميل بـ تقوم بوضع خصل رموش صناعية على الرموش الطبيعية. وبعكس الطريقة التقليدية اللي بـ يظهر فيها أثر الصمغ اللاصق في الشكل النهائي، بـ يتم استخدام لصق بنفس لون الرموش لشكل أكثر طبيعية، وبـ تبقى الرموش موجودة لمدة تصل لأسبوعين، بعدها ممكن يتم تكرار التركيب مرة أخرى. وزي ما بـ يضم "فيفا مي" أشهر الأسماء في عالم التجميل، "فيفا مي" فاتح بوتيك بـ يستضيف فيه أشهر أعمال مصممي الأزياء المصريين المتميزين، زي "ندى أكرم" بـ تعرض مجموعة من القطع المتميزة واللي بـ تنفرد بحيوية ألوانها وأفكارها المبتكرة، "زام" بمجموعة مختلفة جدًا من الحقائب والمنتجات الجلدية، ومن المعروضات المميزة، نظارات "شوود – Shwood" واللي بـ يميزها أنها مصنوعة يدويًا من الخشب الطبيعي. وبما أن فيفا مي مختلف عن أي مكان ثاني، فهو بـ يتيح لمقتني حقائب وأحذية الماركات العالمية أنهم يعيدوا بيعها من خلال البوتيك حسب حالتها، وده في حد ذاته شيء جديد بالنسبة لنا في مصر. كل اللي إحنا قلناه ده يعتبر جزء صغير بالنسبة الأسماء الثانية والخدمات المختلفة اللي بـ تقدم تحت سقف "فيفا مي"، ففيه كمان الـ Flash Tatto المؤقت واللي متوفر منه أشكال وألوان مختلفة، وطبعًا الخدمات المختصة بالعناية بالشعر من أول صحته حتى التسريحات والتلوين، واللي أسعارها تعتبر معقولة جدًا بالنسبة لجودة المستحضرات المستخدمة والنتيجة النهائية.

...

كوافير سوفيتيل: صالون أنيق فى سوفيتيل الجزيرة
اصدرت في: 07/09/2014

الرحلة لسوفيتيل الجزيرة فى حد ذاتها تعتبر تجربة مختلفة؛ المبنى أنبوبى الشكل واقف شامخ فى مكانه فى أقصى جنوب الزمالك. عندك 100 سبب وسبب يقنعوك تروح، حتى لو كنت مش ناوى تقضى ليلة هناك؛ شوية دلع على حمام السباحة بعد الظهر أو سهرة من الأكل والشرب فى مطاعم مطلة على النيل زى لو ديك، الكبابجى أو لا بالميراي، مع فرصة هايلة للاستمتاع بأحلى منظر على النيل. سبب كمان؟ الكوافير الخاص بالفندق. الصالون مفتوح كل يوم من 9 صباحًا لـ 9 مساءً، حتى فى وقت الأجازات الرسمية. مكان الكوافير فى الدور الثانى ويافطاته منتشرة فى الفندق. كلمناهم علشان نحجز قبل ما نروح، لكنهم قالوا لنا أننا مش محتاجين نحجز ونقدر نزورهم فى الوقت اللى يعجبنا. وقت ما وصلنا كان الصالون فاضى، رغم أن المكان كان مليان ناس؛ الكلام ده مش غريب على الصالون، وبكده يكون عندك مكان مميز تعتمدى عليه لو مستعجلة –أو فى وقت أجازة رسمية– والمكان ده هو "سوفيتيل كوافير - Sofitel Coiffeur". الصالون نظيف وأنيق، ومافيش أى نوع من البوسترات أو الصور البناتى العجيبة، مكان فعلاً يناسب اسم وسمعة سوفيتيل. رحبوا بنا وطلبوا مننا فورًا نستريح على واحد من كراسى غسل الشعر. الصالون فيه مكان يسع من أربعة لخمسة زبائن فى وقت واحد، ورغم أن مساحته صغيرة، لكنه منظم كويس ومافيش إحساس بالكركبة. المساعدة أخذت وقتها فى غسل شعرنا، بحيث تترك للشعر وقت مناسب يجف وكمان عملت لنا مساج مريح للرأس. رائحة المنتجات المستخدمة كانت تحفة ونقدر نقول من دلوقت أن شعرنا هـ يفضل ناعم ونظيف لأيام بعد زيارتنا الصالون. بعد ما تم لف وتسريح الشعر بشكل احترافى، مصفف الشعر وصل علشان يقابلنا ويسألنا عن طلبنا. قدر سريعًا يستوعب طلباتنا وبعد وقت من القصقصة وتضبيط الطول، قدر يوصل للنتيجة المطلوبة وكان مستعد يعمل أى تعديل نطلبه. بعد قص الشعر، بدأت عملية تضبيط القصة، اللى فيها استخدم مجفف شعر، وبعدها أجهزة يدوية لفرد الشعر. الغريب أنه عمل كرات ملفوفة من الشعر سببت أن شكل القصة نفسه كان غير واضح تمامًا، بس لازم نقول أنه عمل خصل الشعر باحترفية وفضلت فى مكانها طوال اليوم. سعر الغسل والتجفيف 250 جنيه، والصالون مجهز لعمل صبغات، Extension للشعر مع عرضه لمجموعة من المنتجات يقدر زبائنهم يستعملوها فى البيت. فرحنا جدًا بنتيجة تصفيف الشعر وكمان الخدمة السريعة الاحترافية، واللى قدروا يحولوا حلمنا بقصة شعر مميزة يوم الأحد بعد الظهر لحقيقة.

...

محمد الصغير: أحدث فروع عملاق التجميل فى ميريديان المطار
اصدرت في: 18/08/2014

يمكن بعض الناس بـ تشوف أن التجميل بـ يكون فى المرتبة الثانية من ناحية ترتيب الأولويات، وسط صعوبة وتعب الحياة فى القاهرة، بس الصورة فى أماكن انتظار صالونات التجميل المنتشرة فى كل مكان من العاصمة بـ يقول عكس كده. باعتباره رقم واحد على مستوى الكوافيرات الراقية فى مصر حسب رأى ناس كثير، الاسم الشهير فى عالم التجميل، محمد الصغير، أضاف لأسطورته اللى بـ تكبر يوم بعد يوم فرع جديد فى ميريديان المطار. داخل الفندق هـ تحسى بأجواء مريحة ناتجة عن الشكل الراقى المعاصر للمكان، واللى بـ يساعد على تخفيف قلق السيدات من قص شعرهم خصوصًا من سكان القاهرة المتعودين عليه. مع دخولنا للصالون، لاحظنا وجود عرض كبير من منتجات TIGI، قبل ما يرحب بنا موظف استقبال لابس بدلة شيك. طلبنا قصة شعر وتصفيف (210 جنيه)، ونادى موظف الاستقبال على واحد من المساعدين علشان يبدأ تضبيط الشعر. وصّلنا المساعد لمكان غسل الشعر وبدأ بتدليك مريح لفروة الرأس باستخدام شامبو ومرطب للشعر. درجة حرارة المياه كانت معقولة وقت الغسل والحوض كان مريح بحيث نقدر نرتاح بظهرنا عليه، والمشكلتين دول واجهونا كثير فى زيارتنا لصالونات ثانية. بعد عملية غسل الشعر، روحنا على الصالة الرئيسية، وفيها انتظرنا المسئول عن قص شعرنا. فى الوقت ده قدرنا نندمج مع الأجواء اللطيفة مع موسيقى السوينج من العصر الذهبى. رغم أن شكل المكان وديكوراته بـ تحكى عن مدى شهرة ونجاح المكان، حيرتنا شوية عيوب بسيطة فى الديكورات، تحديدًا المرايات كانت موجودة فى زوايا مش مضبوطة أمامنا فى الصالة الرئيسية. ما انتظرناش وقت طويل قبل ما يعرفنا مصفف الشعر المسؤول عننا بنفسه ويشوف الصورة اللى اختارنا نعمل قصة تشبهها. بعد شوية مناقشات حاولنا نوصل عن طريقها لحاجة نوافق عليها إحنا الاثنين، بدأ يشتغل بالمقص. دقته فى الشغل كانت فعلاً رائعة، وكنا سعداء طوال الساعة اللى اشتغل فيها بعد ما وصل لمرحلة تضبيط قُصة الشعر الأمامية والطول علشان يبدأ التسريح. عملية التسريح كانت التجربة المعتادة من مجفف الشعر والفرد ومافيش أى حاجة نعلق عليها. فى الآخر رش سبراى خفيف وكده نبقى خلصنا. بعد ما قصة شعرنا خلصت بشكل أقرب لفكرة مقتبسة من الصورة الأصلية مش تقليد لها، القصة فعلاً اتنفذت بشكل احترافى ومطابق لتوقعاتنا. الموضوع ده أصلاً صعب توصلّه فى بلد صعب تلاقى فيه مكان يجمع بين الشهرة والجودة.

...

ديفا لاين: كوافير مناسب فى هليوبوليس
اصدرت في: 05/08/2014

وسط صالونات التجميل فى القاهرة ما بين الراقى جدًا، والمتواضع شوية، من الصعب تلاقى كوافير كويس بأسعار معقولة. فى مكانه المستخبى فى عمارة سكنية من عمارات هليوبوليس، "ديفا لاين - Diva Line" بـ يقدم فريق محترف من مصففى الشعر بأسعار مناسبة. الصالون نفسه شيك وماشي على الموضة، بديكور من الأبيض مع حليات من الأخضر اللامع والبنفسجى. دخلنا الصالون المكون من منطقة استقبال صغيرة كل اللى فيها كنبة ومكتب الموظف، مع كابينة عرض زجاجية فيها ماركات تجميل معروفة منها Global Keratin. مكان قص الشعر مقسم لجزئين: الصالة الرئيسية فيها ستة أماكن لقص الشعر، ومنطقة انتظار، وأحواض غسل الشعر ومكان خاص لتجفيف الشعر. المنطقة الخلفية مخصصة للفتلة، وإزالة الشعر بالشمع والماكياج، مع غرف مقفولة للمحجبات. طلبنا قص شعر (30: 50 جنيه على حسب نوع الشعر)، وبعده تمويج للشعر (70 جنيه). وصلونا لأحواض غسل الشعر، ولبسنا روب وبعدها حطوا فوطة فوق كتفنا. مسؤولة غسل الشعر وضعت الشامبو بسرعة واحتاجت كام دقيقة لتجفيف شعرنا، مع تدليك مريح لفروة الرأس. بعدها روحنا على منطقة قص الشعر؛ كل قسم مجهز بكراسى جلد مريحة ومرايات بطول الحائط. المسؤولين عن قص الشعر فى كل فروعهم من أصل لبنانى، وجاهزين لتنفيذ أى قصة شعر تحتاجيها، وبعد ما شرحنا المطلوب للمسؤول عن شعرنا، بدأ فى الشغل. الحقيقة أنه كان ذكى وموهوب، مش بس فى قصة الشعر اللى طلبناها، لكن كمان فى التأكد أن باقى الشعر طوله مناسب بحيث يمشى مع قصتنا الجديدة. بعد ما خلّص، واحد من المساعدين وصل لتجفيف الشعر؛ المساعد ما كانش لطيف وبس، كمان كان بـ يبعد الهواء الساخن عن بشرتنا. بعدها، استخدم مكواة فرد صغيرة لإضافة تمويج للشعر المتطاير واستخدم بخاخة لتثبيت الشعر تستمر لفترة طويلة. على الرغم من دقة الشغل، الموضوع احتاج وقت طويل جدًا من وجهة نظرنا، وإحنا أصلاً صبرنا قليل. بديكوراته الشيك وشغله الاحترافى، "ديفا لاين – Diva Line" بـ يقدم خدمات محترفة للعناية بالشعر بأسعار مناسبة وما كانتش مفاجأة أنهم يحتفظوا بولاء زبائنهم.

...

صالون تجميل أحمد وعبده: قصات شعر احترافية فى صن سيتى، هليوبوليس
اصدرت في: 31/05/2014

لما يحصل جمع بين أماكن التسوق وصالونات التجميل فى مكان واحد فى القاهرة، خليك متأكد أن الكل هـ يطلع كسبان. فى مكانه المستخبى فى آخر الدور الثالث من مول صن سيتى هليوبوليس، صالون تجميل "أحمد وعبده" افتتح أول فروعه للرجال والسيدات، وبـ يقدم كل حاجة من قصات شعر، ومانيكير، وماكياج وإزالة الشعر. أول ما دخلنا، رحبوا بنا عند الاستقبال ووصلونا لمنطقة الصالون الرئيسية لاحظنا أن جنب مكتب الاستقبال منطقة صغيرة متقفلة مخصصة للرجال. طبعًا منطقة السيدات أكبر بكثير، يزينها رسوم فينيل لونها أحمر صارخ، وزود جمال الديكور أشكال هندسية مودرن بألوان أسود وأبيض، أما منطقة الانتظار المريحة كانت مجهزة بمجموعة من الكنب والكراسى. بالإضافة للمناطق المخصصة للشعر والمجهزة بالكامل، لاحظنا ثلاثة كراسى للباديكير وبار صغير للمانيكير واخد جنب من الغرفة، طلاء الأظافر المستخدم معروض فى مدخل المحل وأنواعه تشمل منتجات الماركة الشهيرة L'Oreal وكام نوع أقل شهرة. مشينا وراء الموظفة، اللى وصلتنا لحوض فاضى لغسل الشعر وقدمت لنا فوطة بحروفهم الأولية لتغطية منطقة الكتف. الكراسى ووضعية الحوض نفسها كانت مش مريحة خالص، وسببت لنا وجع طوال وقت غسل الشعر. بعيدًا عن وجع الظهر، عملت لنا مساج للرأس كان نفسنا نستمتع به. بعد الغسيل، انتظرنا مصفف الشعر على كرسى برضه مش مريح، وصل بعد فترة بسيطة ومعاه شنطة أدوات محمولة منظمة لأقسام بشكل شيك. طلبنا تقليم سريع للأظافر (100 جنيه)، مع تجفيف الشعر بالمجفف وتمويج (80 جنيه)، تجنبًا لأى صدام فى موضوع تضبيط الشعر، تركنا له مطلق الحرية يشتغل زى ما هو شايف. رغم أن بدايته كانت بطيئة شوية، بسرعة قدر يفهم القصة السابقة قبل ما يبدأ يقصقص جزء من الأطراف، وبعدين بدأ فى تضبيط نهايات الشعر. الحقيقة أنه كان سريع الاستيعاب وله أسلوب عشوائى مميز، وحسينا بالراحة على طول أول ما طلّع منقلة يقيس بها إيه الستايل المناسب لشكل وجهنا. بعد ما خلصت عملية قص الشعر، واحد من الموظفين شال عباءة الشعر ونظف بواقى القص من الأرض. بالنسبة للتجفيف والتمويج، الموضوع كان تقليدي، رغم أننا أخذنا بالنا من الحجم الزيادة المضاف على الشعر. بعد كده عملوا تمويج الشعر، وفى الآخر رشوا سبراى شعر سريع، وبكده تكون خلصت الجلسة. صحيح ديكور أحمد وعبده كان محاولة متواضعة للظهور بشكل راقى، التجربة ومهارة طاقم العمل كانت العكس تمامًا. يمكن دى واحدة من العوامل اللى ممكن تبرر الأسعار العالية بشكل مش متوقع.

...

لا كوب: أفضل طرق العناية بالشعر والتجميل فى دوسيت ثانى ليك فيو، القاهرة الجديدة
اصدرت في: 14/04/2014

مع الزيادة السكانية الواضحة فى القاهرة الجديدة، الطلب بـ يزيد على صالونات التجميل، مع افتتاح عدد من الأسماء المشهورة فى عالم التجميل فروع لهم فى المدينة الجديدة. فى مكانه المستخبى من بدروم الفندق صاحب الخمس نجوم دوسيت ثانى ليك فيو، "لا كوب - La Coupe" موجود فى آخر ممر طويل مهجور، بعد ما تنزلى دورين على السلالم. الصالون مبهر ومنظم، وغرقان فى الإضاءة الصناعية، بكنبتين فوشيا رديئتين شوية ووحدات تصفيف شعر متشابهة ومرايات كبيرة. لو قارناهم بالغرف المخصصة لعناية الأظافر وإزالة الشعر، نلاقي الغرف ضيقة جدًا. لما روحنا الصبح بدرى من غير حجز، قدرنا نتجنب أى تحضيرات لأفراح أو حفلات خطوبة ودخلنا فورًا، مع باقاتهم المشهورة الخاصة بالشعر وخدمة العرايس، طلبنا غسل الشعر وتصفيفه بالمجفف (90 جنيه)، مانيكير (50 جنيه) وفتلة وجه (20 جنيه). لبسنا روب قديم شوية ووجهونا على صف من أحواض غسل الشعر، وبدأت المسئولة عننا فى غسل شعرنا بعناية مع تدليك الرأس بقوة، قبل ما موظفة ثانية تجفف الشعر وتفك الضفاير بطريقة مريحة، مصففة الشعر ظهرت على طول علشان تعمل طلبنا من الشعر المموج، وإحنا كنا واضحين فى طلبنا باستخدام فرشاة، وشعرنا ما يكونش مجعد. صحيح لازم نعترف أن النتيجة النهائية كانت حلوة، بس فى الآخر برضه عملوا التجعيد باستخدام جهاز التجعيد بالسخونة، وده ما كانش طلبنا. كون وقتنا ضيق، طلبنا أن المانيكير يتعمل فى نفس الوقت مع الشعر، وفعلاً نفذوا طلبنا. رغم أن المتاح من طلاء الأظافر يعتبر مناسب، لاحظنا وجود نقص فى مجموعة كبيرة من ألوان النيون والألوان الفاتحة الخفيفة. رغم أننا فاهمين كويس أن أكثر من ظفر كانوا مكسورين، بس أظافر اليد بعد استخدام المبرد طلعت قصيرة شوية عن المتوقع، وعمومًا فى الآخر الشكل النهائى كان منتظم ومتناسق. الاهتمام الزيادة بقص الزيادات الجلدية من واحد من الأصابع سبب ألم شوية، وواحد من طلاء الأظافر كان شكله مش متناسق على الأطراف، على غير العادة، طبقة أساس من الطلاء بس اللى عملوها من غير الطبقة العلوية. بعدها، روحنا على غرفة صغيرة خاصة بإزالة الشعر بالشمع، وفيها عملنا فتلة سريعة، ودقيقة ومن غير ألم زيادة عن الطبيعى. "لا كوب" فرع دوسيت ثانى يعتبر واحد من أجمد الصالونات المخفية، ومناسب بالذات للزيارات الطارئة، مع موظفين متمكنين وأساليب متخصصة للعناية بالشعر والبشرة.

...

نيلز & مور: صالون تجميل جذاب ومريح فى الزمالك
اصدرت في: 26/02/2014

رغم أن صالونات التجميل والكوافيرات من أهم الشغلانات فى القاهرة،المفاجأة الغريبة أن أداء عدد كبير منهم أقل بكثير من التوقعات. باعتبارها فوود كورت القاهرة بحالها، الزمالك يوم وراء الثانى بـ تتحول كمان لراعى الصالونات فى مصر. "نيلز & مور-Nails & More" أحدث صالون تجميل وسبا، فتح قريب جدًا جدًا من "توا –Toi" على شارع الجزيرة الوسطى. مع وجود مسؤول عن ركن السيارات قريب من الصالون، سهل تلاحظ الصالون الصغير بتصميم كبير منتشر على واجهة العمارة.الباب الرئيسى المصنوع من زجاج غير شفاف مقفول زيادة فى الخصوصية، ويخفى وراءه جنةبناتية رائعة؛ الصالون بتصميماته اللى تجمع بين درجات من الزمردى، والوردى الصارخ ودرجات الأصفر الباهت بجانب نجف أنيق بـ يبعث إحساس بالرقى والراحة. صحيح إحنا كلمناهم قبل حضورنا بوقت قليل، لكنهم قابلونا بشكل لطيف وبدأنا فى عمل المانيكير (50جنيه) فى الوقت المطلوب، مع إزالة شعر الرجل كاملاً بالشمع (80جنيه). الصالون كمان بـ يوفر خدمات للشعر منها باستخدام الفرشاة (70جنيه)، قصّات (100جنيه) وصبغة (+300جنيه). مجموعة متكاملة من خدمات السبا برضه متوفرة تشمل حمام مغربى (200جنيه)، تدليك وتنظيف الجسم بالفرك، ومستحضرات تجميل، وماكياج وأظافر صناعية. بـ يبيعوا منتجات تجميل مشهورة للشعر، والأظافر ومستحضرات تجميل خلف الكاونتر؛ تحديدًا طلاء أظافر من أورلى. قبل وصولنا لمكان عمل الشمع، قدموا لنا مشروب هدية، وقررنا نختار بنفسنا طلاء الأظافر؛ العرض الأنيق بـ يقدم عدد كبير من الألوان والماركات. غرفة الشمع كانتضيقة شوية، لكن فى نفس الوقت كافية ونظيفة مافيش كلام، مع بشاكير نظيفة مفروشة فوق السرير. بعيدًا عن شوية أسلاك نازلة من الحائط، الغرفة بـ توفر إحساس يشبه جو البيت زى باقى الصالون. العملية تمت عن طريق صاحبة المكان بنفسها، بشكل سريع، دقيق وتقريبًا من غير أى ألم. بعدها سلمونا بشكير نظيف لإزالة أى بواقى زيتية، وسابونا نبدل هدومنا لوحدنا. فى وجود ثلاثة كراسى بس، وترابيزات جانبية وحوض ثابت لعمل الباديكير، منطقة العناية بالأظافر لها جو مريح، وبسبب عدد الكراسى المحدود، صعب المكان يكون زحمة فى أى وقت. المانيكير –نفذته فنية اسمها مروة– كان بنفس دقة الشمع، بنفس مراحل البرد وإزالة الزيادات الجلدية، وبعدها عملت تقشير وتزييت لليدين باستخدام عطر رائحته جميلة.استخدمت طبقتين من طلاء أظافر من اختيارنا بشكل ممتاز، بطبقة علوية وطبقة سفلية بحيث يستمر لفترة طويلة. "نيلز & مور" إضافة جذابة خبيرة لعدد الصالونات المتزايد يوم بعد يوم فى الزمالك، كل أملنا أن –مع زيادة شعبيتهم– جدول المواعيد يتم إدارته بشكل ذكى علشان يتجنبوا الزحام.

...

مركز تجميل أحمد طه: تجميل مناسب للميزانية فى هليوبوليس
اصدرت في: 27/01/2014

سواء كانت كبيرة أو صغيرة، فخمة أو عادية، صالونات التجميل في القاهرة عددها فى الليمون. فى قلب مساكن شيراتون، صالون "أحمد طه" بنى سمعته بناءً على جودة الخدمة والمصداقية. مع افتتاحه لفرع ثانى فى هليوبوليس، قررنا نزور الفرع الرئيسى، الموجود أسفل عمارة سكنية يسكن فيها صاحب الصالون. رغم أن شكل الصالون مش بـ يوحى بالفخامة، فريقهم من مصففى الشعر وخبراء التجميل إما تدربوا فى أماكن معتمدة، أو عندهم خبرة كبيرة. المحل له مدخلين، المدخل الرئيسى بـ يؤدى لمنطقة تصفيف الشعر وفريق أحمد طه من مصففى الشعر، والمدخل الصغير الخاص، مخصص حديثًا للمحجبات اللى بـ يشعروا بعدم الراحة من الدخول فى المنطقة الرئيسية علشان يوصلوا للغرفة الخلفية. الصالون تم تجديده حديثًا، بحوائط مصقولة من الجير الأبيض وأرض من السيراميك اللامع مع معدات جديدة، تشمل مرايات كاملة وكراسى جلد. المكان بـ يقدم كل الخدمات المتوقعة من صالون تجميل، أحمد طه بـ يعمل قص شعر (70 جنيه)، تصفيف (40 جنيه)، صبغة (200 جنيه)، إزالة شعر بالشمع، فتلة (+15 جنيه)، ومجموعة من ماسكات تجميل للشعر والوجه، لكن علشان نريح ضميرنا، مش بـ ننصحك تعملى وجهك هنا. رغم أننا حصلنا على قصات شعر مقبولة فى زياراتنا السابقة، مصفف الشعر الموثوق فيه بالنسبة لنا كان فى الفرع الثانى، ومش موجود وقت زيارتنا. عملنا بدلاً منه جلسة بمجفف الشعر، تمويج وفتلة للحواجب. على طول وجهونا لحوض الغسل لغسيل شعرنا بالشامبو وتهيئته، وفك الجدائل بمشط عريض. صحيح أغلب مصفيين الشعر فى الدور الأول كانوا رجال، اكشتفنا إنهم بـ يدردشدوا أكثر من معظم أخصائيين التجميل السيدات اللى عدوا علينا؛ المناقشة استمرت حتى وسط دوشة المجفف. بعيدًا عن المحادثات الجانبية المبالغ فيها، عملية تهذيب الشعر كانت جيدة وفريدة من نوعها باستخدام مصفف الشعر لطرق نادرًا ما بـ نشوفها فى زيادة كثافة الشعر والتمويج، وده كان سبب أن التجربة كانت ممتعة أكثر. بعمل التجديل عن طريق مصل لمعان الشعر من الماركة الشهيرة، تشاى Chi، انتهيت عملية تصفيف الشعر بسرعة. بعد كده، طلعنا على الغرفة الخلفية وفيها بـ يتم إزالة الشعر بالشمع، والفتلة وقص الشعر الشخصى. الجو العام كان حيوى جدًا نظرًا لأن معظم رواد الصالون ساكنين فى محيطه، وده معناه أن المحل كان مركز تجمع لحلقات النميمة. بشكل ماهر وذكى، خبيرة التجميل الخاصة بنا استخدمت الفتلة لإزالة شعر الحواجب بشكل مريح. بجانب الفتلة، كانت بـ تقطف الشعر عند اللزوم وقلمت الشعر الأطول علشان تساوى الطول. يمكن أحمد طه مش أفخم صالون تجميل ممكن نشوفه فى العاصمة، لكن أسعاره المعقولة بـ تشجع على الولاء للمكان وتجعل من الصالون جنة تجميل اجتماعية.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح