نادي رياضي صحة ولياقة in Cairo, Egypt

صحة ولياقة

تايتنز ويلنس سنتر: دولة الجيم الحديث في القاهرة الجديدة
اصدرت في: 23/03/2013

فروع "تايتنز - Titans" في القاهرة اللى عمالة تفتح فى كل مكان غيرت من مفهوم التدريب وأصبح من الصعب أنكم تتجنبوه، أكبر فروعهم موجود في أسفل مبنى كبير مميز في التجمع الخامس بالقاهرة الجديدة.المدخل موجود تحت سلم مضحك شبه النفق اللي موجود تحت حمام سباحة خارجي أزرق موجود فيه شلال صناعي، للأسف في وقت زيارتنا –رغم أن الموضوع كان مغري- قررنا أننا ما ننزلش المياه اللي شكلها كان مثلج.اللوبي -وبقية الجيم- مستخدم فيه مجموعة ألوان من اللون الرمادي والأحمر اللامع وأرضيات خشبية ملونة بألوان مبهجة، الغرفة المقابلة صغيرة ومليانة بالعصائر وبار للوجبات الخفيفة والنقنقات، كمان فيه أغذية الطاقة وماركات مختلفة للبروتينات المنشطة.دخلنا من الباب الزجاجي وشوفنا منطقة تدريب كبيرة على شكل حرف L، ماكينات تدريب الكارديو زي المشايات والكروس تراينرز والدراجات موجودة على شكل صفوف معظمها ملحق به iPad، ما كناش عارفين هل من السهل أننا نستخدم الأي باد في التدريب والعرق اللى هـ نكون فيه لكنها لمسة لطيفة للتغيير من الشكل المعتاد للتدريب.بالتجول في الغرفة اللي كلها مرايات وجدنا ماكينات متنوعة من رفع الأثقال من غير أوزان موجودة في جانب واحد وبـ تتنوع الأوزان بين 2 و 50 كيلو جرام هـ تناسب التدريب المبتدئ والمتقدم، كمان فيه غرفة منفصلة للحصص الجماعية للرجال والسيدات فقط المتخصصة في حرق الدهون، بناء وتغيير شكل العضلات، مع وجود حصص زومبا للسيدات فقط وحصص رقص شرقي لكن التدريب عام مافيش مكان للسيدات فقط.في غرف الملابس البسيطة والنظيفة الأعضاء يقدروا يستمتعوا بجاكوزي خاص وساونا موجودة بالأسفل، كمان "تايتنز" عندهم ساحة صغيرة بس مناسبة لرياضة الإسكواش، الجيم بـ يوفر طبيب خاص وأخصائي تغذية لمساعدتكم في الوصول لأهدافكم في التخسيس أو كمال الأجسام."تايتنز ويلنس سنتر" بـ يقدم عدد من العروض زي اشتراك الشهر الواحد (900 جنيه) والـ3 شهور (2300 جنيه) والـ6 شهور (3150 جنيه) وفي السنة (4400 جنيه)، الاشتراك السنوي عليه تخفيض في حالة الاشتراك سنتين هـ تكلفك (7800 جنيه)، بجانب استخدام الجيم والحصص المجانية كل عرض من العرض هـ تحصلوا معه على جلسة واحدة تدريب خاص وجلسة مع أخصائي تغذية، بعد ما تختاروا الحصص اللي أنتم عاوزينها في الاتفاق تقدروا تحددوا حصص تدريب خاص تبدأ أسعارها من (1500 جنيه) للـ 12 حصة و(2600 جنيه) للـ 24 حصة وللـ 36 حصة (3500 جنيه)، كمان فيه أكثر من اختيار لتجميد العضوية على حسب مدتها مع استثناء عضوية الشهر الواحد."تايتنز" من أكثر المراكز الصحية ارتفاعًا في السعر لكنه من الأماكن اللي بـ تفتخر بتقديمها تجربة جديدة في مجال التدريب مختلفة عن كثير من الأماكن الثانية.

...

البندر بولينج: صالة ألعاب متميزة في المعادي الجديدة
اصدرت في: 05/11/2012

من زمان بـ نحب لعبة البولينج، وما بـ نصدق نلاقي مركز رياضي أو مول أو نادي فيه صالة بولينج محترمة وفي حالة جيدة، لأن فيه فرق بين الصالة الجيدة اللي تصلح للعب "الاحترافي" حتى لو كان اللي بـ يلعب هواة، وبين الصالات غير المعتنى بها اللي تصلح أكثر للأطفال أو "للترفيه". علشان كده عجبتنا صالة «بندر مول» الموجودة في المعادي الجديدة وبالتحديد في شارع فلسطين القريب من شارعي النصر واللاسلكي أكبر شوارع المعادي الجديدة. صالة البولينج في الدور الأول من المول، وسهل توصل له بسؤال الناس في الشوارع المحيطة اللي ذكرنا اسمها.صالة كبيرة مكونة من Lane 12 أو مكان للعب، حالة الصالة جيدة جدًا من حيث كرات اللعب والأحذية الخاصة بالبولينج، وحتى نسبة الزيت المستخدمة على تراكات اللعب كانت مضبوطة علشان الكرات تمشي بسرعتها الطبيعية. الجيم بـ 25 جنيه للفرد. ممكن تأخذ أصحابك وتحجز 2 أو 4 Lane جنب بعض. بس لازم تلبس الحذاء الخاص بالبولينج، وما تقلقش هـ تلاقي كل المقاسات، والأحذية تمشي رجالي وحريمي، وحالتها جيدة وشكلها مفرح أصلًا بألوانها الأحمر والأزرق. بجانب البولينج فيه ترابيزات بلياردو وبيبي فووت وAir Hokey وأسهم للتنشين Darts وأركيد فيديو جيم بألعاب مسلية وما شوفنهاش في أي صالة ألعاب ثانية قبل كده. عملة اللعب أو الـ Coin بـ 5 جنيه، وفيه ألعاب طبعًا بـ تشتغل بأكثر من عملة. بس زي ما قلنا أكثر حاجة لفتت نظرنا في المكان كانت حالة الألعاب والأدوات الجيدة جدًا، بجانب الموود الظريف والمبهج للمكان، والمزيكا الحلوة اللي كانت شغالة وقت زيارتنا، والأضواء المبهرة اللي هـ تخليك حاسس أنك في كرنفال طوال الوقت.ممكن تطلب مشروبات أو أطباق باستا أو بيتزا وأنت في مكانك على تراك البولينج. ما كناش عاوزين نأكل المرة دي بس شكل الأكل كان حلو خصوصًا البيتزا، لكن جربنا عصير رمان مثلج وكان تحفة ومبهج زي كل حاجة في المكان.ممكن تعمل زي عضوية في المكان أو تشارك في برنامج نقاط بـ يوفر لك فلوس بعد عدد مرات لعب بولينج في المكان، يعني بعد كام مرة ممكن تيجي تلعب مرة ببلاش، هـ تحتاج تملأ استمارة على مكتب الحجز وأنت هناك.استمتعنا بوقتنا في «بندر بولينج» واللي كان أحلى من اللعب نفسه كان الفرجة على بعض اللاعبين المحترفين اللي بـ يلعبوا في المكان. ممكن تقف تشجع بس وهـ تنبهر بما فيه الكفاية. 

...

مركز التنمية الرياضية: دعوة لممارسة الرياضة في مصر الجديدة
اصدرت في: 22/06/2011

حاولت تلعب قبل كده مع أصحابك ماتش كورة بس المشكلة أن كل واحد مشترك في نادي مختلف أو حتى مش مشتركين في أي نادي أصلاً! حل المشكلة دي هـ تلاقيه في «مركز التنمية الرياضية» اللي في مصر الجديدة. المركز مكانه في مساكن شيراتون، في شارع أنقرة المتفرع من شارع عبد الحميد بدوي، تقريبًا أمام فندق راديسون بلو. مركز التنمية الرياضية تابع للمجلس القومي للرياضة، ومقام علي مساحة 12.5 فدان تقريبًا وتم افتتاحه رسميًا في مارس 2010. وهو واحد من عدة مراكز منتشرة في أنحاء الجمهورية والوحيد في محافظة القاهرة. أهم أهداف المركز هو توسيع قاعدة ممارسي الرياضة من خلال جذب مختلف المراحل العمرية لممارسة رياضات مختلفة تحت إشراف متخصصين. تذكرة الدخول بـ 5 جنيه للمصريين وغير المصريين شاملة استخدام بعض الملاعب. المركز فعلاً صرح رياضي ضخم، مكون من مبنى رئيسي فيه: الدور الأرضي: يحتوي على 4 ملاعب أسكواش جيدة جدًا بـ تتأجر بـ 15 جنيه في الساعة، صالة بولينج صغيرة نسبيًا وعادية بــ 15 جنيه للفرد، صالة بلياردو بــ 10 جنيه في الساعة والسنوكر بـ 15 جنيه في الساعة، صالة لتنس الطاولة (بينج بونج) عادية وهي مجانًا، غرف خلع ملابس وحمامات نظيفة للرجال وللسيدات، وأخيرًا عيادة طبية. وفيه كافيتريا صغيرة موجودة بالمركز بـ تقدم حاجات بسيطة بأسعار رخيصة جدًا تفكرك بأندية الجيش، بس وقت زيارتنا للمركز كان يادوب بقى لها يومين فاتحة. الدور الأول: غرفة مجهزة كإنترنت كافيه بأسعار معقولة، الإنترنت بـ 3 جنيه للساعة والبلاي ستيشن بـ 10 جنيه للساعة. وفيه صالة جيم وأيروبكس صغيرة نسبيًا بالنسبة إلى حجم المركز، الأجهزة مش كلها حديثة، بس فيها الأساسيات. وقت زيارتنا كان الوقت المخصص للرجال وأكد أحد العاملين أنه سيتم تخصيص قريبًا صالة أخرى للسيدات. الجيم بـ 10 جنيه للساعة والاشتراك لـ 12 مرة بـ 100 جنيه. مواعيد جيم السيدات حاليًا كل يوم من 9 صباحًا لـ 11 صباحًا. وأيام السبت، الاثنين، الأربعاء من 4 ظهرًا لـ 6 مساءً. الدور الثاني: مطعم وتراس كبير، حتى وقت زيارتنا ما كانش تم افتتاحه. أهم وأكبر جزء في المركز هو المنطقة الخارجية والملاعب المفتوحة وهي بـ تضم ملعبين لكرة السلة وملعبين للكرة الطائرة وملعب كرة يد "ترتان" (نوع أرضية ملاعب) وكل الملاعب دي مجانية، 4 ملاعب تنس أرضي ترتان بـ 15 جنيه مساءً وبـ 8 جنيه في فترة الصباح، وخمس ملاعب كرة قدم خماسية (نجيلة صناعية) بـ 75 جنيه في الساعة، وتراك دائري للمشي طوله 850 متر وآخر للدراجات بنفس المسافة والاثنين مجانًا. إمكانيات المركز هائلة جدًا، بالنسبة أنه تابع لجهة حكومية ولا يهدف للربح، والملاعب المفتوحة كلها بحالة ممتازة جدًا، وطبعًا الأسعار غير قابلة للمنافسة، ولا ينقص المركز غير حمام سباحة، وعند سؤالنا عن الجزئية دي كانت إجابة أحد العاملين أنهم فعلا بـ يدرسوا إمكانية إنشاء حمام سباحة قريبًا. لو كنت غير مشترك في نادي رياضي، وساكن في منطقة قريبة من مصر الجديدة ومدينة نصر يبقى خلاص مفيش حجة؛ لازم تلعب رياضة النهاردة.

...

فجنون: جنون + فنون على ترعة المريوطية
اصدرت في: 24/04/2011

لما بـ ييجي الويك إند أو مناسبة زي شم النسيم كلنا بـ نكون عايزين نهرب من زحمة ودوشة القاهرة٬ وفي الوقت اللي أغلب الناس فيه بـ تهرب للشواطئ القريبة٬ ممكن يكون فيه مهرب تاني في الجنة الريفية اللي بعد كوبري المنيب على طول. احنا مش بـ نقترح فسحة على الترعة٬ احنا بـ نقترح رحلة لـ«فجنون»٬ مركز الفنون والأنشطة المجنون على شط ترعة المريوطية. اسمه خليط بين "فنون" و"جنون"٬ والفنون والجنون الاثنين واضحين في كل شبر من المكان٬ من أول الجراچ بتاعه اللي مصممه خياله واسع جدًا لحد أسماء العاملين في المكان اللي كلها إبداع٬ إلى الألعاب اللي مصنوعة يدويًا في الحوش٬ لحد الموزاييك بألوانه البراقة والمزينة كل جزء في المكان. أسسه الفنان «محمد علام» وعمله تجسيد لرؤيته عن مجتمع مثالي لحرية الرأي واحترام البيئة والآخر هو الطبيعي فيه. علام كان عاوز يتيح للأطفال فرصة أنهم ينموا مواهبهم ويطلقوا العنان لإبداعهم في بيئة فنية غير مقيدة٬ علشان يعبروا عن نفسهم بحرية تامة. «فجنون» توسع عن كده كمان ودلوقتي بـ يقدم مجموعة من الأنشطة الفنية والإبداعية لكل الأعمار. الأنشطة المتوفرة عبارة عن أكثر من مشروع فني بخامات مختلفة زي الفخار والخشب٬ ده بالإضافة إلى صناعة المجوهرات واللحام ونشاطات تانية زي البستنة (وهي زراعة نباتات زينة مثل الورود والزهور والشجيرات والنباتات المتسلقة بهدف التجميل أكثر منها نباتات لها فائدة غذائية) والخبيز الريفي. وفيه شِبَاك ومراجيح معمولة يدوي للعب٬ ودي متعة فائقة للكبار والصغار. والعائلات هـ تستمتع جدًا بالمشي بين الأراضي الزراعية واللي فيها شوية حيوانات ريفية منتشرة في كل المكان٬ وممكن كمان تركب حصان أو حمار لو عاوز. الأطفال الكبار هـ يستمتعوا جدًا ببركة الطين٬ ودي فيها المجموعات بـ تعمل ماتشات مصارعة جبارة، وبالرغم من أنك لازم تبقى مستعد أنك ترمي كل الهدوم اللي بـ تنزل بيها بركة الطين٬ إلا أن الموضوع يستاهل جدًا. معارك بالونات المياة هـ تكون متعة ما تتوصفش للشلل اللى بتحب الدوشة وبـ تحب تلعب اللعب دى. في اللعبة بالونات مية مصبوغة بالأزرق٬ الأخضر٬ الأحمر والأصفر٬ بـ تُنقل لساحة المعركة اللي عبارة عن أرض مزروعة حشيش٬ والمعركة بـ تبدأ. والعاملين في «فجنون» بـ يساعدوا أنهم يزودوا المتعة بتاعة المعركة٬ فبـ يرموا على اللي بـ يلعبوا بيض٬ أو بـ يفاجئوهم ببراميل مية٬ لأ وبـ يصوروا الكوميديا الصاخبة دي كمان. بـ ننصحك أنك تجيب معاك هدوم احتياطي وفوطة لو ناوي تشترك في الأنشطة الفوضوية الـ"مطينة" دي. ولحسن الحظ فجنون فيه دش نظيف.. ريفي بس نظيف. الدخول وبركة الطين ومعركة بالونات المياة (مرة واحدة) بـ50 جنيه للشخص. ولو عاوز تلعب تاني بـ تدفع 20 جنيه زيادة للشخص. ركوب الحصان أو الحمار بـ20 جنيه للفة. لما تزهق من دوشة القاهرة٬ روح على ترعة المريوطية واستمتع بيوم جميل في الشمس والخضرة وجدد حيويتك.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن