عناية أظافر صحة ولياقة in Cairo, Egypt

صحة ولياقة

فيفا مي: العناية الكاملة بالجمال الداخلي والخارجي تحت سقف واحد في كونكورد بلازا مول
اصدرت في: 16/11/2014

بانتشار وسائل الإعلام والاتصال في العالم، بقى سهل جدًا أن توصل لِك آخر أخبار الموضة وفن التجميل؛ وللأسف أصبح التركيز موجه على الجمال الخارجي بشكل كبير، لدرجة أن معظمنا نسي تمامًا أن جمال وصحة الروح بـ تنعكس على جمال الصورة. بعكس صالونات ومراكز التجميل اللي بـ تقدم كل ماله علاقة بالشكل الخارجي بس، فيفا مي - VeeVaaME في كونكورد بلازا مول بالقطامية بـ يقدم مفهوم مختلف تمامًا. "فيفا مي" مش بس بـ يوفر خبراء متخصصين في فن التجميل، ده بـ يساعدك كمان على إبراز جمالك وتوازنك الداخلي بتوفير مجموعة من الأنشطة المختلفة بالحجز المسبق زي اليوجا والزومبا، ده غير أنه متوفر فيه جلسات شخصية لمدة 90 دقيقة مع مدربة الحياة "نيللي ياسين"، الحاصلة على شهادات معتمدة في المجال. وبالإضافة لاهتمامهم بالمعنى الأعمق للجمال، "فيفا مي" بـ يؤمن بالتخصص في فروع التجميل المختلفة؛ فبـ يستضيف مجموعة من أشهر الأسماء في كل تخصص علشان تقدم خدماتها المتميزة كفرق عمل قائمة بذاتها تحت سقف واحد. على سبيل المثال رويال سبا – Royal Spa وهو اسم مشهور في مجال العناية بالأظافر وتجميلها، له مساحة خاصة في "فيفا مي" بـ يوفر فيها خدماته اللي مش موجودة في صالونات التجميل المعتادة، لأنهم بجانب تميزهم في الجانب التجميلي، بـ يهتموا بصحة الأظافر أولًا، يعني أبسط برامج الـ Nail Spa واللي بـ يمتد للعناية باليدين أو الساقين، بـ يشمل تحديد نوع الأظافر (ناعمة – متوسطة – صلبة) وعلى أساسه بـ يتحدد طريقة العلاج بمجموعة من مستحضرات ماركة أليساندرو Alessandro الفخمة، واللي متوفر منها طلاءات للأظافر بألوان عديدة مناسبة لكل الأذواق. أما بالنسبة لجمال البشرة، فبمساعدة مجموعة من مستحضرات بايوسفير Biosphere السويسرية، واللي مصنوعة من مواد طبيعية بتكنولوجيا متطورة، خبير التجميل اللبناني عادل حسين هـ يساعدك على تقييم ومعرفة نوع بشرتك، وعلى أساس التقييم ده هيتم عمل برنامج علاجي لها وللحفاظ على نضارتها. من الخدمات الموجودة في "فيفا مي" تركيب رموش صناعية، ولكن بطريقة متطورة وعملية أكثر؛ فبعد تحديد الأماكن اللي هـ يتم فيها تكثيف الرموش واللي بـ تختلف من شخص لآخر، خبيرة التجميل بـ تقوم بوضع خصل رموش صناعية على الرموش الطبيعية. وبعكس الطريقة التقليدية اللي بـ يظهر فيها أثر الصمغ اللاصق في الشكل النهائي، بـ يتم استخدام لصق بنفس لون الرموش لشكل أكثر طبيعية، وبـ تبقى الرموش موجودة لمدة تصل لأسبوعين، بعدها ممكن يتم تكرار التركيب مرة أخرى. وزي ما بـ يضم "فيفا مي" أشهر الأسماء في عالم التجميل، "فيفا مي" فاتح بوتيك بـ يستضيف فيه أشهر أعمال مصممي الأزياء المصريين المتميزين، زي "ندى أكرم" بـ تعرض مجموعة من القطع المتميزة واللي بـ تنفرد بحيوية ألوانها وأفكارها المبتكرة، "زام" بمجموعة مختلفة جدًا من الحقائب والمنتجات الجلدية، ومن المعروضات المميزة، نظارات "شوود – Shwood" واللي بـ يميزها أنها مصنوعة يدويًا من الخشب الطبيعي. وبما أن فيفا مي مختلف عن أي مكان ثاني، فهو بـ يتيح لمقتني حقائب وأحذية الماركات العالمية أنهم يعيدوا بيعها من خلال البوتيك حسب حالتها، وده في حد ذاته شيء جديد بالنسبة لنا في مصر. كل اللي إحنا قلناه ده يعتبر جزء صغير بالنسبة الأسماء الثانية والخدمات المختلفة اللي بـ تقدم تحت سقف "فيفا مي"، ففيه كمان الـ Flash Tatto المؤقت واللي متوفر منه أشكال وألوان مختلفة، وطبعًا الخدمات المختصة بالعناية بالشعر من أول صحته حتى التسريحات والتلوين، واللي أسعارها تعتبر معقولة جدًا بالنسبة لجودة المستحضرات المستخدمة والنتيجة النهائية.

...

محمد الصغير: أحدث فروع عملاق التجميل فى ميريديان المطار
اصدرت في: 18/08/2014

يمكن بعض الناس بـ تشوف أن التجميل بـ يكون فى المرتبة الثانية من ناحية ترتيب الأولويات، وسط صعوبة وتعب الحياة فى القاهرة، بس الصورة فى أماكن انتظار صالونات التجميل المنتشرة فى كل مكان من العاصمة بـ يقول عكس كده. باعتباره رقم واحد على مستوى الكوافيرات الراقية فى مصر حسب رأى ناس كثير، الاسم الشهير فى عالم التجميل، محمد الصغير، أضاف لأسطورته اللى بـ تكبر يوم بعد يوم فرع جديد فى ميريديان المطار. داخل الفندق هـ تحسى بأجواء مريحة ناتجة عن الشكل الراقى المعاصر للمكان، واللى بـ يساعد على تخفيف قلق السيدات من قص شعرهم خصوصًا من سكان القاهرة المتعودين عليه. مع دخولنا للصالون، لاحظنا وجود عرض كبير من منتجات TIGI، قبل ما يرحب بنا موظف استقبال لابس بدلة شيك. طلبنا قصة شعر وتصفيف (210 جنيه)، ونادى موظف الاستقبال على واحد من المساعدين علشان يبدأ تضبيط الشعر. وصّلنا المساعد لمكان غسل الشعر وبدأ بتدليك مريح لفروة الرأس باستخدام شامبو ومرطب للشعر. درجة حرارة المياه كانت معقولة وقت الغسل والحوض كان مريح بحيث نقدر نرتاح بظهرنا عليه، والمشكلتين دول واجهونا كثير فى زيارتنا لصالونات ثانية. بعد عملية غسل الشعر، روحنا على الصالة الرئيسية، وفيها انتظرنا المسئول عن قص شعرنا. فى الوقت ده قدرنا نندمج مع الأجواء اللطيفة مع موسيقى السوينج من العصر الذهبى. رغم أن شكل المكان وديكوراته بـ تحكى عن مدى شهرة ونجاح المكان، حيرتنا شوية عيوب بسيطة فى الديكورات، تحديدًا المرايات كانت موجودة فى زوايا مش مضبوطة أمامنا فى الصالة الرئيسية. ما انتظرناش وقت طويل قبل ما يعرفنا مصفف الشعر المسؤول عننا بنفسه ويشوف الصورة اللى اختارنا نعمل قصة تشبهها. بعد شوية مناقشات حاولنا نوصل عن طريقها لحاجة نوافق عليها إحنا الاثنين، بدأ يشتغل بالمقص. دقته فى الشغل كانت فعلاً رائعة، وكنا سعداء طوال الساعة اللى اشتغل فيها بعد ما وصل لمرحلة تضبيط قُصة الشعر الأمامية والطول علشان يبدأ التسريح. عملية التسريح كانت التجربة المعتادة من مجفف الشعر والفرد ومافيش أى حاجة نعلق عليها. فى الآخر رش سبراى خفيف وكده نبقى خلصنا. بعد ما قصة شعرنا خلصت بشكل أقرب لفكرة مقتبسة من الصورة الأصلية مش تقليد لها، القصة فعلاً اتنفذت بشكل احترافى ومطابق لتوقعاتنا. الموضوع ده أصلاً صعب توصلّه فى بلد صعب تلاقى فيه مكان يجمع بين الشهرة والجودة.

...

صالون تجميل أحمد وعبده: قصات شعر احترافية فى صن سيتى، هليوبوليس
اصدرت في: 31/05/2014

لما يحصل جمع بين أماكن التسوق وصالونات التجميل فى مكان واحد فى القاهرة، خليك متأكد أن الكل هـ يطلع كسبان. فى مكانه المستخبى فى آخر الدور الثالث من مول صن سيتى هليوبوليس، صالون تجميل "أحمد وعبده" افتتح أول فروعه للرجال والسيدات، وبـ يقدم كل حاجة من قصات شعر، ومانيكير، وماكياج وإزالة الشعر. أول ما دخلنا، رحبوا بنا عند الاستقبال ووصلونا لمنطقة الصالون الرئيسية لاحظنا أن جنب مكتب الاستقبال منطقة صغيرة متقفلة مخصصة للرجال. طبعًا منطقة السيدات أكبر بكثير، يزينها رسوم فينيل لونها أحمر صارخ، وزود جمال الديكور أشكال هندسية مودرن بألوان أسود وأبيض، أما منطقة الانتظار المريحة كانت مجهزة بمجموعة من الكنب والكراسى. بالإضافة للمناطق المخصصة للشعر والمجهزة بالكامل، لاحظنا ثلاثة كراسى للباديكير وبار صغير للمانيكير واخد جنب من الغرفة، طلاء الأظافر المستخدم معروض فى مدخل المحل وأنواعه تشمل منتجات الماركة الشهيرة L'Oreal وكام نوع أقل شهرة. مشينا وراء الموظفة، اللى وصلتنا لحوض فاضى لغسل الشعر وقدمت لنا فوطة بحروفهم الأولية لتغطية منطقة الكتف. الكراسى ووضعية الحوض نفسها كانت مش مريحة خالص، وسببت لنا وجع طوال وقت غسل الشعر. بعيدًا عن وجع الظهر، عملت لنا مساج للرأس كان نفسنا نستمتع به. بعد الغسيل، انتظرنا مصفف الشعر على كرسى برضه مش مريح، وصل بعد فترة بسيطة ومعاه شنطة أدوات محمولة منظمة لأقسام بشكل شيك. طلبنا تقليم سريع للأظافر (100 جنيه)، مع تجفيف الشعر بالمجفف وتمويج (80 جنيه)، تجنبًا لأى صدام فى موضوع تضبيط الشعر، تركنا له مطلق الحرية يشتغل زى ما هو شايف. رغم أن بدايته كانت بطيئة شوية، بسرعة قدر يفهم القصة السابقة قبل ما يبدأ يقصقص جزء من الأطراف، وبعدين بدأ فى تضبيط نهايات الشعر. الحقيقة أنه كان سريع الاستيعاب وله أسلوب عشوائى مميز، وحسينا بالراحة على طول أول ما طلّع منقلة يقيس بها إيه الستايل المناسب لشكل وجهنا. بعد ما خلصت عملية قص الشعر، واحد من الموظفين شال عباءة الشعر ونظف بواقى القص من الأرض. بالنسبة للتجفيف والتمويج، الموضوع كان تقليدي، رغم أننا أخذنا بالنا من الحجم الزيادة المضاف على الشعر. بعد كده عملوا تمويج الشعر، وفى الآخر رشوا سبراى شعر سريع، وبكده تكون خلصت الجلسة. صحيح ديكور أحمد وعبده كان محاولة متواضعة للظهور بشكل راقى، التجربة ومهارة طاقم العمل كانت العكس تمامًا. يمكن دى واحدة من العوامل اللى ممكن تبرر الأسعار العالية بشكل مش متوقع.

...

جوسي بيوتي صالون: صالون تجميل بيتوتي ودافئ بالقاهرة الجديدة
اصدرت في: 26/05/2014

بالرغم من عدد صالونات التجميل الكبيرة الموجودة بالقاهرة، إلا أن العدد بـ يقل كل ما اتجهنا للمناطق اللي موجودة على أطراف القاهرة، وبالتالي عدد الاختيارات بالنسبة لنا بـ يقل، والمنافسة ما بين الصالونات دي بـ تزيد، بالذات في القاهرة الجديدة. بعد نجاح فرع المعادي، "جوسي بيوتي صالون - Beauty Salon Josy" فتح في المنطقة السكنية في التجمع الخامس. المكان صعب الوصول إليه بدون وصف، خاصة أن مافيش علامة توضح أن الصالون موجود هنا، أو أن دي فيلا 5، غير علامة صغيرة جدًا بجانب جرس المدخل. بعد مجموعة من السلالم، هـ تشعر بجو منعش مليء بالروائح الحلوة -ده لأن المكان فيه Spa- ده غير العاملين بالمكان واللي بـ يكلموا أكثر من لغة. خدماتهم كثيرة ومنوعة ولذلك طابعين منيو فيها قائمة الأسعار (ده من حسن حظنا طبعًا). تشكيلة كبيرة من مقشرات الجسم (120+ جنيه)، ولو هـ تلفي جسمك بالكريم (170+ جنيه) أما الماسكات فأسعارها (60: 1100 جنيه)، شمع لإزالة الشعر (10: 160 جنيه). كمان عندهم مجموعة من المانيكيرات: الجيل والأكريليك. جربنا الشمع لإزالة الساق كلها (كنا محتاجين بصراحة!) وسعره (120 جنيه)، عملنا مانيكير (65 جنيه) وباديكير (80 جنيه)، وطبعًا لو طلبت أي رسوم على الأظافر الموضوع هـ يبقى أغلى. جوسي نفسها ومساعدتها بـ يقوموا بكل حاجة، ولو عاوزة جوسي شخصيًا لازم يبقى بالحجز والسعر طبعًا هـ يبقى أغلى. ألوان الديكور مش معتادة في الصالونات، فبدل أبيض المستشفيات اللي متعودين نشوفه (قال يعني المكان نظيف!) المحل مستخدم الأخضر والبنفسجي، مش أي حد هـ يحبه ولكن الألوان أكسبت المكان حياة وشخصية. قلنا أننا كنا في أمس الحاجة لإزالة الشعر، دخلنا حجرة صغيرة، وتركونا على راحتنا علشان نغيّر على أنغام الموسيقى الهادئة. قبل ما نبدأ عملية التعذيب، نقصد الإزالة، وضعوا لنا بودر (علشان ما نتوجعش) قبل ما يقوموا بوضع الشمع. بعد تنفيذ قرار الإزالة رجلينا كانت بـ تلمع زي الفضة... وبالرغم من أن النتائج كانت مذهلة إلا أن كمية الزيت اللي المفروض تزيل بقايا الشمع كانت قليلة جدًا... وبالتالي كنا مبسوطين... بس ملزقين! بعد ما عملنا عملية النظافة الشاملة، اتجهنا للحجرة الرئيسية علشان نعتني بأظافرنا، الخدمة كانت ممتازة وكذلك المستحضرات المستخدمة. أظافرنا شكلها كان مضبوط بعد القص والبرد. بعد كده وُضع لنا ثلاث طبقات من المانيكير. الصالون رائع والخدمة ممتازة، يستاهل أن الواحد يروح يقضي اليوم هناك ويدلع نفسه.

...

لا كوب: أفضل طرق العناية بالشعر والتجميل فى دوسيت ثانى ليك فيو، القاهرة الجديدة
اصدرت في: 14/04/2014

مع الزيادة السكانية الواضحة فى القاهرة الجديدة، الطلب بـ يزيد على صالونات التجميل، مع افتتاح عدد من الأسماء المشهورة فى عالم التجميل فروع لهم فى المدينة الجديدة. فى مكانه المستخبى من بدروم الفندق صاحب الخمس نجوم دوسيت ثانى ليك فيو، "لا كوب - La Coupe" موجود فى آخر ممر طويل مهجور، بعد ما تنزلى دورين على السلالم. الصالون مبهر ومنظم، وغرقان فى الإضاءة الصناعية، بكنبتين فوشيا رديئتين شوية ووحدات تصفيف شعر متشابهة ومرايات كبيرة. لو قارناهم بالغرف المخصصة لعناية الأظافر وإزالة الشعر، نلاقي الغرف ضيقة جدًا. لما روحنا الصبح بدرى من غير حجز، قدرنا نتجنب أى تحضيرات لأفراح أو حفلات خطوبة ودخلنا فورًا، مع باقاتهم المشهورة الخاصة بالشعر وخدمة العرايس، طلبنا غسل الشعر وتصفيفه بالمجفف (90 جنيه)، مانيكير (50 جنيه) وفتلة وجه (20 جنيه). لبسنا روب قديم شوية ووجهونا على صف من أحواض غسل الشعر، وبدأت المسئولة عننا فى غسل شعرنا بعناية مع تدليك الرأس بقوة، قبل ما موظفة ثانية تجفف الشعر وتفك الضفاير بطريقة مريحة، مصففة الشعر ظهرت على طول علشان تعمل طلبنا من الشعر المموج، وإحنا كنا واضحين فى طلبنا باستخدام فرشاة، وشعرنا ما يكونش مجعد. صحيح لازم نعترف أن النتيجة النهائية كانت حلوة، بس فى الآخر برضه عملوا التجعيد باستخدام جهاز التجعيد بالسخونة، وده ما كانش طلبنا. كون وقتنا ضيق، طلبنا أن المانيكير يتعمل فى نفس الوقت مع الشعر، وفعلاً نفذوا طلبنا. رغم أن المتاح من طلاء الأظافر يعتبر مناسب، لاحظنا وجود نقص فى مجموعة كبيرة من ألوان النيون والألوان الفاتحة الخفيفة. رغم أننا فاهمين كويس أن أكثر من ظفر كانوا مكسورين، بس أظافر اليد بعد استخدام المبرد طلعت قصيرة شوية عن المتوقع، وعمومًا فى الآخر الشكل النهائى كان منتظم ومتناسق. الاهتمام الزيادة بقص الزيادات الجلدية من واحد من الأصابع سبب ألم شوية، وواحد من طلاء الأظافر كان شكله مش متناسق على الأطراف، على غير العادة، طبقة أساس من الطلاء بس اللى عملوها من غير الطبقة العلوية. بعدها، روحنا على غرفة صغيرة خاصة بإزالة الشعر بالشمع، وفيها عملنا فتلة سريعة، ودقيقة ومن غير ألم زيادة عن الطبيعى. "لا كوب" فرع دوسيت ثانى يعتبر واحد من أجمد الصالونات المخفية، ومناسب بالذات للزيارات الطارئة، مع موظفين متمكنين وأساليب متخصصة للعناية بالشعر والبشرة.

...

نيلز & مور: صالون تجميل جذاب ومريح فى الزمالك
اصدرت في: 26/02/2014

رغم أن صالونات التجميل والكوافيرات من أهم الشغلانات فى القاهرة،المفاجأة الغريبة أن أداء عدد كبير منهم أقل بكثير من التوقعات. باعتبارها فوود كورت القاهرة بحالها، الزمالك يوم وراء الثانى بـ تتحول كمان لراعى الصالونات فى مصر. "نيلز & مور-Nails & More" أحدث صالون تجميل وسبا، فتح قريب جدًا جدًا من "توا –Toi" على شارع الجزيرة الوسطى. مع وجود مسؤول عن ركن السيارات قريب من الصالون، سهل تلاحظ الصالون الصغير بتصميم كبير منتشر على واجهة العمارة.الباب الرئيسى المصنوع من زجاج غير شفاف مقفول زيادة فى الخصوصية، ويخفى وراءه جنةبناتية رائعة؛ الصالون بتصميماته اللى تجمع بين درجات من الزمردى، والوردى الصارخ ودرجات الأصفر الباهت بجانب نجف أنيق بـ يبعث إحساس بالرقى والراحة. صحيح إحنا كلمناهم قبل حضورنا بوقت قليل، لكنهم قابلونا بشكل لطيف وبدأنا فى عمل المانيكير (50جنيه) فى الوقت المطلوب، مع إزالة شعر الرجل كاملاً بالشمع (80جنيه). الصالون كمان بـ يوفر خدمات للشعر منها باستخدام الفرشاة (70جنيه)، قصّات (100جنيه) وصبغة (+300جنيه). مجموعة متكاملة من خدمات السبا برضه متوفرة تشمل حمام مغربى (200جنيه)، تدليك وتنظيف الجسم بالفرك، ومستحضرات تجميل، وماكياج وأظافر صناعية. بـ يبيعوا منتجات تجميل مشهورة للشعر، والأظافر ومستحضرات تجميل خلف الكاونتر؛ تحديدًا طلاء أظافر من أورلى. قبل وصولنا لمكان عمل الشمع، قدموا لنا مشروب هدية، وقررنا نختار بنفسنا طلاء الأظافر؛ العرض الأنيق بـ يقدم عدد كبير من الألوان والماركات. غرفة الشمع كانتضيقة شوية، لكن فى نفس الوقت كافية ونظيفة مافيش كلام، مع بشاكير نظيفة مفروشة فوق السرير. بعيدًا عن شوية أسلاك نازلة من الحائط، الغرفة بـ توفر إحساس يشبه جو البيت زى باقى الصالون. العملية تمت عن طريق صاحبة المكان بنفسها، بشكل سريع، دقيق وتقريبًا من غير أى ألم. بعدها سلمونا بشكير نظيف لإزالة أى بواقى زيتية، وسابونا نبدل هدومنا لوحدنا. فى وجود ثلاثة كراسى بس، وترابيزات جانبية وحوض ثابت لعمل الباديكير، منطقة العناية بالأظافر لها جو مريح، وبسبب عدد الكراسى المحدود، صعب المكان يكون زحمة فى أى وقت. المانيكير –نفذته فنية اسمها مروة– كان بنفس دقة الشمع، بنفس مراحل البرد وإزالة الزيادات الجلدية، وبعدها عملت تقشير وتزييت لليدين باستخدام عطر رائحته جميلة.استخدمت طبقتين من طلاء أظافر من اختيارنا بشكل ممتاز، بطبقة علوية وطبقة سفلية بحيث يستمر لفترة طويلة. "نيلز & مور" إضافة جذابة خبيرة لعدد الصالونات المتزايد يوم بعد يوم فى الزمالك، كل أملنا أن –مع زيادة شعبيتهم– جدول المواعيد يتم إدارته بشكل ذكى علشان يتجنبوا الزحام.

...

إلينا هير ستوديو: صالون تجميل بأسعار معقولة فى القاهرة الجديدة
اصدرت في: 09/09/2013

كلنا بـ نشوف صالونات تجميل القاهرة مليانة يوميًا بالزبائن، بس المشكلة أن علاجات التجميل مش دائمًا ممتعة بالشكل الكافى. علشان نتجنب تعب أعصابنا من الصالونات الجديدة قررنا نطلع على "إلينا هير ستوديو - Alina Hair Studio فى ميتينج بوينت القاهرة الجديدة وهدفنا الأساسى نعمل شوية عمليات عناية بالأظافر. أول ما تدخل ساحة المول فى الدور الأرضى بـ تشوف أمامك يافطة "إلينا" بتصميمها المعاصر من الكروم ممتدة بطول جزء من شرفة الدور الثانى. الصالون من الداخل بـ يشع جو من الشياكة، مع أثاثه البسيط والمرايات الطويلة اللى بـ تزين المساحة الواسعة الناصعة والمشرقة. قائمة الأسعار على المكتب شاملة كل أنواع علاجات الشعر، مع مجموعة من مستلزمات الماكياج (+350 جنيه)، رموش صناعية (150 جنيه)، خدمات التدليك وإزالة الشعر. حجزنا مسبقًا مانيكير (45 جنيه) وباديكير (55 جنيه) لفردين، إدارة المكان رحبت بنا وقدمت مشروبات قبل ما يوجهونا لباب متحرك مش ملحوظ بـ يؤدى لمنطقة خاصة للزبائن المحجبات. الغرفة عبارة عن تكملة لنفس الإحساس المعاصر، بس من المدى القريب لاحظنا أن الدهان مش مضبوط عند الجوانب. كرسيين مساج -عفا عليهم الزمن- غير مريحين من الجلد موجودين فى ناحية، ومزودين بحوض خاص للباديكير. قبل ما نبدأ، قررنا نختار ألوان طلاء الأظافر من بين المجموعة اللى يمكن صغيرة بس فى الوقت نفسه متنوعة الماركات والألوان. رغم أننا حجزنا فردين، زحام جدول الصالون تسبب أننا نقعد بعيد عن بعض، وواحدة مننا عملت الجلسة على الكنبة وسط عدد من المنتظرين؛ بكل صراحة التجربة عمومًا بعيدة كل البعد عن توقعاتنا سواء بالنسبة للأجواء أو الخصوصية. العناية بأظافر اليد والقدم كانت معقولة، بس مافيش زيادة عن باقى الموجود فى باقى صالونات القاهرة؛ عملية برد الأظافر كانت مضبوطة ورغم أن ما حصلش مقارنة بين طول أظافر كل يد على حدة بعد ما خلصوا، حصلت المعجزة وفرق الطول بين الأظافر كان غير ملحوظ تمامًا. مع الأسف، واحدة من زيادات الجلد حول الظفر تم قصها زيادة شوية وتسببت فى ورم بسيط. مساج لطيف مع إزالة الجلد الميت بمنتجات رائحتها جميلة لليدين والأرجل، لكن كانت بعيدة كل البعد عن أنها تريحنا وتشيل التعب، أما وقت الشغل فـ يختلف من بنت للثانية. رغم أن الطلاء كان مش متقن فى بعض مناطق، وضع الطلاء تم بنظام وعناية؛ بالنسبة للطبقة العلوية بما أنها ما كانتش جاهزة، اضطرينا نطلبها مخصوص. صحيح بالنسبة لنا كان يبقى أفضل لو حصلنا على خروجة ألطف وقعدة مريحة أكثر، لكن مع تكلفة قيمتها 100جنيه صعب نبرر شكوتنا عن نتائج المانيكير والباديكير.

...

تشاينا بيرل أروما ثيرابى كلوب: علاجات تجميلية بسيطة فى الزمالك
اصدرت في: 29/08/2013

الدلع والراحة فى القاهرة عادة لهم ثمن، خصوصًا أن المنتجعات الصحية الشهيرة غالبًا موجودة فى الفنادق الكبيرة المنتشرة حول المدينة. وسط رحلة البحث عن حاجة مختلفة، طلعنا على "تشاينا بيرل أروما ثيرابى كلوب - China Pearl Aromatherapy Club" الموجود فى الزمالك. متعلق يافطة صغيرة بجانب أبواب مطعم السوشى فويجو Fuego على شارع أبو الفدا فى الزمالك، بـ تعلن عن مركز التجميل؛ حاولنا نتجاهل حجزنا مؤقتًا ونطلع السلالم للدور الأول. الغريب أن مركز التجميل كان عبارة عن شقة، متجمع فيها الأسرة كلها على كنب فى اللوبى. كنا طلبناهم قبل وصولنا علشان نحجز، ولما ما حدش طلب منا الأسماء أو رقم التليفون فهمنا أن مافيش مشكلة تروح بدون حجز. ديكورات المكان قديمة وغير منظمة، أما الغرف فمقسمة لجدران وأبواب خفيفة، والاثنين ساهموا فى تعزيز الشكل الردئ. مركز التجميل بـ يقدم مجموعة من الطرق العلاجية للرجال والسيدات، وصحيح أن المنيوهين الكبار يجمعوا بين المساج (100: 300 جنيه) وعلاج للأقدام (120 جنيه)، منيو السيدات بـ تقدم إضافات منها 45 دقيقة من تجميل الوجه (180 جنيه) وفن العناية بالأظافر (150: 280 جنيه). تشاينا بيرل كمان بـ يقدم علاجات متخصصة منها الحجامة (100 جنيه)، تقشير البشرة (100 جنيه) إزالة شمع الأذن (380 جنيه)، والأخيرة تحديدًا علاج مضاد للالتهابات وإزالة السموم فى القناة السمعية. حجزنا جلسة عناية بالأظافر (150 جنيه)، لكن عرفنا أن الإخصائية مش موجودة لغاية الأسبوع القادم. كنا محتاجين مساج كامل للجسم (300 جنيه)، وكل أملنا نستمتع بساعة من الراحة والاسترخاء. وزى ما طلبنا الجلسة تكون ثنائية، أخذونا للغرفة الثنائية، عبارة عن ترابيزتين مساج متجاورين من الجلد الأحمر عليهم بشاكير خشنة. الإضاءة كانت معتمة بهدف خلق جو مريح –وطبعًا لأغراض جمالية- لكن فى نفس الوقت كنا شايفين السجاد تحت السرائر مهترئ ومبقع فى مناطق منه. المدلكتين تكلموا انجليزى بسيط جدًا بدون الاهتمام بالخصوصية؛ كل التعليمات كانت أننا نخلع ملابسنا ونمدد على السرير، بدون ما يمسكوا الملايات أو البشاكير حفاظًا على الحياء. استخدموا زيت بدون رائحة وعملية التدليك تمت بثبات وعناية، وأغلب التركيز كان على منطقة الظهر. المدلكة استخدمت طرق وأساليب متنوعة عن طريق الضغط على نقاط ضغط محددة. وبجانب أن الاحترافية لسوء الحظ ضاعت مع دردشتهم باللغة الصينية، دلكوا بعض نقاط الضغط لكن مش بالقدر المطلوب. بعد ساعة وشوية، سلمونا صنادل مستعملة نلبسها وأخذونا للحمام الوحيد فى المكان؛ مافيش عندهم تقديم أى رفاهيات، ولا حتى بشاكير نظيفة. استغربت المدلكة أننا رغم طلبنا أن التدليك يكون ثنائى، بس مش معنى ده أننا نشترك فى الحمام! من الوهلة الأولى، كان واضح أن الأسعار معقولة، لكن بعد زيارتنا جاء لنا إحساس أن بشوية فلوس زيادة كنا اتدلعنا فى أى مكان خمس نجوم قريب. على الرغم من حاجز اللغة "تشاينا بيرل أروما ثيرابى كلوب" بـ يوفر جو ودى مريح، مع علاجات مريحة خفيفة، بدون أى كماليات وكل ده فى قلب الزمالك.

...

ذا نيل سبا: منتجع رائع للعناية بالأظافر فى المهندسين
اصدرت في: 10/04/2013

أنك تلاقى مانيكير مميز فى القاهرة دائمًا مهمة صعبة، بس دورى كويس وأكيد هـ تلاقى. إحنا عن نفسنا كنا عاوزين مكان بـ يقدم عناية بالأظافر ونجرب فيه ستايل طلاء "الكافيار" الجديد، ومن هنا قررنا نروح على صالون فى المهندسين ألوانه كلها وردى×وردى، وهو "ذا نيل سبا – The Nail Spa". الصالون المكون من دورين فى عمارة على شارع الفواكة تم تجديده من فترة قريبة. وصلنا فى أول الليل بدون أى حجز وطلبنا نعمل مانيكير وباديكير (120 جنيه) وطلاء أظافر يد كامل من الكافيار (15 جنيه/ الظفر). تغيير نوع الطلاء يكلفك حوالى 25 جنيه، فى وقت وجودنا وسط اللوبى بأرضيته الوردى، لاحظنا مجموعة من الشنط والمحافظ المقلدة، مرتبة بشكل لطيف جنب الكنب الجلد الأبيض. بعد وقت بسيط، موظفة الاستقبال عرفتنا بأخصائية الأظافر وأخذتنا للدور العلوى. وعلشان كنا مجموعة، قعدونا جنب بعض على كراسى كبيرة مريحة جدًا لها مساند، أمامها أحواض الباديكير وعرضوا علينا نشرب شاى أو قهوة كهدية من المكان. كل واحد منا كان معاه اثنين أخصائيين، واحدة للقدم والثانية بـ تركز على الأيدى، وده سبب لنا تركيز شوية وراحة فى نفس الوقت. شغلهم كان قمة فى الاجتهاد؛ الأظافر تم قصها وبرَدها لشكل معين، تم عمل تقشير لأيدينا وأقدامنا وعملوا لهم مساج، ونظفوا زيادات الجلد حول الأظافر وشالوا الجلد الميت. وسط مرحلة الباديكير، عرفنا أن مجموعة طلاء الأظافر الموجودة كانت بكل غرابة معروضة فى الدور الأرضى وأننا المفروض كنا نختار فى الأول. عمومًا، ومن غير كلام كثير، نزلنا تحت واختارنا مجموعة من الألوان المبهجة من مجموعتهم الكبيرة المتنوعة من طلاء الأظافر، وبعدها نفذوا الطلاء المكون من طبقتين بكل حرص على أصابع القدم. بعد كده لبسنا شباشب من الفوم، وأخذونا لترابيزة علشان يضعوا طلاء الكافيار على أظافر الأيدين. مجموعة الألوان الموجودة كان منها المبهج، والبراق، والباهت وتقدرى تعملى خليط من ثلاثة ألوان. اختارنا خليط تقليدى من الوردى الفاتح، والوردى الباهت والأبيض، والنتيجة كانت تشبه لون الملبس. الأخصائية أخذت وقت علشان تتأكد أن الكافيار تم وضعه بشكل صحيح واتغلف بطبقة عليا شديدة. صعب نلوم عملية الطلاء علشان الكافيار معروف عنه أن آخره يومين ويبدأ يتقشر. بجانب شغل الأظافر "ذا نيل سبا" بـ يقدم أظافر أكريليك، تنظيف كامل للجسم بالشمع سعره حوالى 200 جنيه، وهو إزالة الشعر بالسكر والليمون مع عمل الفتلة، بس اعملى حسابك تحجزى قبلها. نقدر نقيم تجربة "ذا نيل سبا" أنها مريحة ومرضية، قدر فيها الموظفين الودودين أنهم يقدموا نتائج ممتازة.

...

باتشي أي لوتشي: صالون تجميل عصرى فى هليوبوليس
اصدرت في: 09/01/2013

افتتح صالون التجميل اللبنانى "باتشي إي لوتشي" ثانى فروعه داخل القاهرة، وتحديدًا فى الدور الأول من مبنى إعمار فى هليوبوليس. وعلشان إحنا زبائن دائمين فى فرعهم فى المعادى وكنا محتاجين ضرورى نعمل صبغة شعر باللون الذهبى (500 جنيه)، والخصل (200 جنيه) ومانيكير وباديكير (125 جنيه)، روحنا على الفرع الجديد بعد الشغل علشان نستمتع بشوية تدليل.العمارة الموجود فيها الفرع مبهرة والأسانسير موجود وسط مدخل من الرخام. مافيش أى علامة تدل على مكان الصالون، فخلى بالك علشان ما تطلعش لدور غلط؛ يمكن تقابلك كومة من الأنقاض، بدل من الشعار المميز لـ "باتشي أي لوتشي".أول ما تدخلي من الباب اللى بدرفتين هـ تلاقى نفسك واقفة فى وسط صالون زحمة، وفيه نفس الديكورات الموجودة فى فرع المعادى، مكان عصرى، مصقول ونظيف وفيه شاشات بلازما معروض عليها دعاية خاصة بـ "باتشي أي لوتشي" للشعر والتجميل.فى البداية دخلونا غرفة فردية، وعلشان إحنا وقتنا ضيق، سيدتين ولا واحدة منهم بـ تتكلم إنجليزى، بدأوا يحضروا للباديكير. كل كرسى من الكراسى الجلد اللى بمساند لليد له حوض خاص لونه أبيض وترابيزة جانبية لمعدات المانيكير. بعد ما غطسنا رجلنا شوية دقائق فى حمام قدم بالفقاقيع، بدأت خطوات الباديكير الروتينية؛ تدليك علشان إزالة الجلد الميت، ومساج شديد والتخلص بالخيط من أى شعر مش لطيف. الشئ الوحيد اللى يستحق الشكوى هو أن مقصات الأظافر كانت ثلمة شوية والأظافر المقصوصة كانت بـ تطير فى أى مكان، حتى داخل الحذاء بتاعنا. بعد طبقتين رائعين من ملمع الأظافر الأحمر الغامق "أورلى" -وده ممكن تشتريه بـ 80 جنيه- على أظافر القدم، أخذنا شبشب مطاط علشان نلبسه فى رحلة رجوعنا لصالون الشعر.أول ما تعرفنا على مصففة الشعر المسئولة عنا، وبعد ما موظف الاستقبال اللى بـ يتكلم بلغتين شرح له أننا عاوزين صبغة كاملة للخصل وصبغة بلاتينية للجزء الظاهر من الشعر. واحد من الناس اللى تحت التمرين كان بـ يحاول يرحب بنا، فى حين أن مصفف الشعر الرئيسى كان بـ يتابعنا بس ما ابتسمش خالص ولو حتى مرة طوال وقت زيارتنا.بعد ما غسلنا شعرنا على السرير المريح الممدد أمام الحوض، المساعد كان مركز أنه ما يشدش الشعر وهو بـ يسرحه، وبعدين يجففه علشان يبدأ فى وضع الصبغة على خصل الشعر بمنتهى الحرص، للتأكد من أنه غطى كل جزء من اللون البنى الأصلى. وزى كثير من صالونات التجميل فى مصر، خبير التجميل كان بـ يعمل مانيكير الأظافر وفى الوقت نفسه مصفف الشعر بـ يضبط القَصّة والحقيقة أن النتائج كانت مرضية جدًا. بعد كده غسلوا شعرنا مرة ثانية وجففوه قبل ما مصفف الشعر يبدأ يشتغل على صبغة الجزء الظاهر من الشعر.كل اللى فات ده خلص أخيرًا حوالى الساعة 10 بالليل، ومع إحساسنا بالملل والإحباط، مشينا من غير ما نعمل التسريح بالسشوار اللى تكلفته 100 جنيه إضافية، وده فى رأينا المفروض يبقى موجود من ضمن العرض.فى النهاية ما نقدرش نشتكى من الألوان النهائية؛ يمكن مش هى اللى كانت فى خيالنا، بس فى الآخر هى صبغة برونزية. فكرة أن لا خبير التجميل ولا مصفف الشعر بـ يعرفوا يتكلموا كلمة واحدة إنجليزى كانت محبطة وغريبة شوية بالنسبة لفريق فرع المعادى الأفضل كثير.نصحونا نحجز ميعاد الساعة 6.30 بالليل علشان الصالون بـ يقفل الساعة 8، وده يعتبر بدرى شوية نظرًا لكمية المناسبات والحفلات المحتاجة لخدمات تجميل فى الويك إند. رغم كده قدرنا نستنى لغاية ما كل طلباتنا نُفذت وده استمر ساعتين بعد وقت الغلق.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن