دليل موسيقى القاهرة - أحدث المقالات عن المطربين والنجوم العرب

مزيكا

إقرا الخبر: مسار إجباري
اصدرت في: 22/04/2013

في نقلة جديدة لفريق "مسار إجباري" اللي انطلق من الإسكندرية سنة 2005، صدر له مؤخرًا ألبوم "إقرا الخبر" كأول خطوة للخروج من وسط الـunderground ودخول سوق الكاسيت. نقدر نعتبر أن الألبوم مافيهوش جديد! وده لأن الـ9 أغنيات أعمال قديمة قدمها الفريق في حفلاته على مدار 3 سنين منهم أغنية لها ريمكس في نهاية الألبوم، وحتى تراك الموسيقى يعتبر مقطع من تراك مدته 7 دقائق قدمه الفريق من حوالي 6 شهور. لكنك إذا كنت مش متابع فرق الـ underground وحفلات مسار إجباري، فهـ يكون بالنسبة لك الألبوم جديد، خاصة وأن موضوعات الأغاني متفقة جدًا مع واقعنا ومع الحالة النفسية لكثير مننا. "ما تخافشي" أولى أغنيات الألبوم، رغم كلامها الإيجابي واللي مليان تحفيز على مواجهة الخوف والشدة، إلا أن اللحن البطيء زَوّد جرعة الشجن، ويمكن اللي خلق توازن في الأغنية توزيع مزيكا الروك الصاخب بعض الشيء، واللي بـ يميز فريق مسار إجباري في أعماله. الكلمات تأليف دعاء عبد الوهاب، واللحن لعضو الفريق هاني الدقاق اللي لحن كل أغنيات الألبوم، وتوزيع الألبوم كله من صنع الفريق. وعلى إيقاع "الرومبا" غنى مسار إجباري "الليل" بكلمات حمدي زيدان وتوزيع مكرر مافيهوش جديد.. ورغم قصر كلام الأغنية إلا أنه يعتبر استكمال لهدف الأغنية السابقة وهو السعي وراء الأمل دائمًا. في الأغنية الثالثة، بـ نشعر بتغيير حالة الألبوم بمزيكا أكثر صخبًا وكلام مشابه لأسلوب المونولوج، وبـ ينتقد الفريق أزمة المرور وسواقة الميكروباصات، بالإضافة لسوء الإدارة وفشل التخطيط. الأغنية من تأليف آمار مصطفى، والتوزيع أفضل بكثير من التجربتين السابقتين وفيه تنويع ودقة في استخدام الآلات والمؤثرات. وبـ يواصل الفريق صعوده في "حاوي"، أغنية درامية يمكن تكون متوافقة مع حالة الكثير من المصريين اليومين دول، خاصة في ظل حالة اللامبالاة اللي خلقتها الأزمة الاقتصادية والسياسية، ورغم أن دخلة الألبوم كانت دعوة للأمل، إلا أننا هـ نسمع كلمات يائسة ومستسلمة للظروف مهما كانت.. الكلمات الجيدة من تأليف محمد جمعة، والتوزيع البسيط متوافق جدًا مع حالة الأغنية. "أدِف" أغنية تعتبر نصيحة مقبولة من الفريق، لأن معظمنا محتاج يخرج من رتابة الحياة ويأدف بعيد عن روتين ظروف المعيشة والأعمال.. كلام بلال حسني بسيط وفيه صدق لدرجة أنك ممكن تقول: "أيوه أنا عاوز أعمل زي ما بـ يقول كده". اللحن عادي باستثناء السنيو الصاخب، وعلى نفس مستوى السنيو كان التوزيع اللي برزت فيه أوتار الإلكتريك جيتار والساكسفون بشكل مؤثر. أما المقطع الموسيقي الوحيد بالألبوم موجود باسم "شتا" في أول التراك بـ نسمع صوت صفوت الشريف أمين عام الحزب الوطني سابقًا، ومش مفهوم إيه الغرض الفني من وجود مؤثر صوت صفوت الشريف في تراك موسيقي خالي من النصوص! "إجباري المسار" عودة للكلام اليائس ويبدو وكأنه يتناقض مع كلام الأغنية الأولى في الألبوم واللي كانت بـ تدعو لمواجهة صعوبات الحياة، إلا أننا هنا بـ نسمع كلمات من نوع "كنت متفاءل، كل يوم أحلام تروح، وخانني الطموح". الكلام العادي لمحمد السيد، أما اللحن فهو يبدو غير مستقر بسبب الصعود والهبوط اللي ممكن يخرجنا من حالة الأغنية أصلًا.. والمزيكا في بعض الأوقات كانت مغطية على الكلام يمكن ده بسبب سيطرة الإلكتريك جيتار. "أنا موجود" أغنية ثورية رافضة للسكوت والاستسلام للظلم وبـ تقول كلماتها: "أنا موجود صوتي أقوى من البَرود". الكلام التقليدي جدًا لآمار مصطفى، وبـ يشاركها نفس المستوى لحن هاني الدقاق.. أما التوزيع فهو أفضل حالًا يمكن بسبب بساطته والاعتماد على الجيتار فقط في المذهب. "إقرا الخبر" أغنية الهيد، وتعتبر خاتمة جيدة لأول ألبوم لفريق مسار إجباري، كلماتها الناقدة هى أبرز ما في الأغنية، وبـ تحكي عن رحلة الشاب المصري في البحث عن وظيفة لائقة واللي بـ ينتهي به الحال في الآخر للسفر علشان "يأخذ دكتوراة في غسل الصحون". الكلام المختلف لآمار مصطفى، واللحن كمان له دور كبير في خروج الأغنية بشكل جيد وممتع.. وبـ يشاركهم نفس المستوى التوزيع المناسب جدًا لحالة الأغنية ورتمها السريع.

...

بول سالم: مدينتنا
اصدرت في: 26/06/2011

في تجربة من تجارب دمج الموسيقي الشرقي مع الـﭼاز اللاتيني، نجح بول سالم في تحقيق ده ألبوم «مدينتنا» بشكل كبير اللي عمل فيه مزيج بين المقامات الشرقية بآلاتها مع موسيقى البوسانوفا البرازيلية. بول سالم فنان لبناني بـ يغني و يلحن أعماله على البيانو والجيتار وكان واضح من الألبوم انه متأثر بروح البرازيل من ناحية الموسيقى البوسانوفا وكمان كلمات واسماء بعض الأغاني والمقطوعات. «مدينتنا» ألبوم زي ما قولنا مزيج بين نوعين من الموسيقى الشرقي واللاتيني من الناحية الفنية، إنما الروح اللاتيني هى اللي طاغية على أغلب الأعمال وده بـ يعكس تأثر بول بموسيقى أمريكا اللاتينية عموماً والبرازيل تحديداً. الألبوم فيه 14 اغنية ومقطوعة أولهم هي أغنية الألبوم «مدينتنا» اللي متلحنة ومتوزعة ببراعة وبساطة فى نفس الوقت وكلماتها دافية وبـ توصف حبه لتفاصيل المدينة اللي عايش فيها، آدائه فى الغناء مميز ومؤثر أكثر من كونه عالي الإمكانيات، فيه إعتماد واضح على انه بـ يعرف يعبر عن فنه بأسلوب مناسب وخلاص، وساعد فى ده إضافة مؤثرات زي تأثير الريـﭭيرب Reverb ومن الطريف ان ده بـ يخلي صوته قريب من صوت الفنان حميد الشاعري، و ده كان واضح فى الأغاني اللي غني فيها زي «مدينتنا» و«الساعة ماشية لقدام» اللي تعتبر حالة مختلفة شوية بموسيقتها الهادية مع الإيقاع الخفيف وطريقة إلقاء الكلمات السريعة اللي تخلي اللي بـ يسمع فى حالة ترقب! أما أغاني زي «بتطلّع هي في» و«ملاك» و«شغل حب» إتنوعوا بين الـﭼاز اللاتيني الكلاسيكي والبوسانوفا بطريقة غناء خفيفة والنغمات اللاتيني الناعمة على البيانو الممزوجة بآلات شرقي زي الناي. إتنوعت مقطوعات الموسيقى فى الألبوم زي مقطوعة «جنون البقر» و «سوق البازاركان» و «كاسترو فى المدينة» اللي كان واضح فيهم قوي حرفية عالية فى التوزيع مع اللحن المميز مع لزمة تعلق فى الودن و ده برضه بـ تنويع المقامات والآلات بين الشرقي والغربي. إختلفت شوية بس اغنية «ما في شي أكيد» اللي كانت ليها مود البلوز روك وبكده تبقى بعدت شوية عن المود الغالب على الألبوم، و فيه إختلاف برضه في مقطوعة «حزيران» اللي كانت شبه موسيقى النيو ايدج New Age شوية بوجود تكرار إيقاعي ثابت Loop مع تنوع الألحان على البيانو والعود. من الملفت فى الألبوم وجود أكتر من مقطوعة عبارة عن لعب جاز كلاسيكي صريح بإسم «فاصل» أو Interlude وهي فعلاً زي ماتكون فاصل بين كل كام مقطوعة أو أغنيه، وزمن كل فاصل بين الـ 30 ثانية والدقيقتين، فكرة مش بطالة خالص. وملفت كمان فى نهاية بعض المقطوعات والأغاني وجود أصوات لكلام وحوارات دايرة بين ناس أو صوت مذيعة في نشرة أخبار وطبعاً باللهجة اللبناني، يمكن الفكرة تكون لشد الإنتباه، إنما مغزاها برضه ممكن يكون مش واضح قوي للمستمع. بـ يختم الألبوم بأغنية «مدينتنا» لكن بصوت كورال من الأطفال ولمدة اقصر من الأصلية، صوت الاطفال مؤثر جدا فى الغناء وله طعم مختلف عن الأولى وقريب من القلب وبـ يثير مشاعر البهجة! ألبوم يستحق انه يتسمع ومناسب جداً فى اوقات؛ زي سواقة العربية او حتى انه تشغله فى البيت وانت بـ تعمل حاجة كخلفية لأحداث اليوم.

...

افتكاسات: دندشة
اصدرت في: 05/04/2011

مميزين قوي افتكاسات فى تسمية اعمالهم، إختيارهم لأسماء البوماتهم بـ يكون معبر جداً عن اللي بـ يقدموه. أول البوم كان «مولد سيدي اللاتيني» وزي ما هو واضح اسم جذاب وله رنة، الألبوم كان فعلاً مزيج خطيرمن الطابع الصوفي – أصل فكرة المولد - مع الـﭼاز اللاتيني ونجحوا في ده بشكل مايختلفش عليه اتنين.و تكملة المشوار بـ تيجي فى الالبوم التاني للفريق وهو «دندشة»، وزي ما قلنا كانوا موفقين جداً فى إختيار الاسم، لأنه فعلاً ألبوم دندشة! يعني يديّ إحساس بالبهجة والسعادة بالمزيكا الشرقي اللي فيه.الألبوم ده اتبدل فيه بعض أعضاء الفرقة اللي سجلوا في الالبوم اللي فات، بقى بـ يلعب ليد جيتار «شريف واطسون» بدل «أوسو» الجيتارست والعضو المؤسس للفريق، وعلى الدرامز «احمد هشام» بدل «عمرو خيري». وده كان ملحوظ من خلال المزيكا، وأي حد سمع الالبوم الأولاني ممكن يفرق بين التكنيك اللي إختلف في الإصدار الجديد.دندشة البوم مصري جداً لمحبي المقامات الشرقية، بس طبعاً ماننساش أنه في الآخر ﭼاز أكتر من أي حاجة تانية. كمان فيه اللمسة اللي ممكن تخليك تسرح وانت بـ تسمع و تتخيل منطقة شعبية فيها ناس قاعدة على قهوة بلدي و بياعين سريحة بجلاليب بالشكل الفلكلوري الأصيل.«أم الدنيا» أول مقطوعة فى الألبوم فيها الطابع الشرقي عامة والمصري تحديداً و ده عشان لعب الأكورديون المميز اللي فيها مع الايقاع الشرقي المحبب لودان ناس كتير.تاني مقطوعة فى الألبوم هي «جريكي»، مميزة بلزمة شرقية جميلة جداً وتعلق مع الواحد بسهولة، وهي شبه مقطوعة «تتر» فى الألبوم اللي فات اللي برضه كانت مميزة عشان ليها تيمة تعلق في الودن.أما المقطوعتين «Joh Rasta Fa» و «Nubian Syndrome» ليهم طابع الـﭼاز الأفريقي مع حبة عزف (Fusion Jazz)، ممكن ده يكون مش مألوف للمستمع العادي اللي مش غاوي يسمع أنواع مزيكا مختلفة، لكن بشكل عام هما الموود بتاعهم لطيف خصوصاً ان افتكاسات بارعين فى دمج النغمات الشرقي فى اغلب مقطوعاتهم بالتالي المستمع مايحسش بالغربة.مقطوعة «Jazzmina» شرقية خالصة بنغمات القانون والناي، ليها تأثير سحري جميل وموحي بأفكار وخيالات لدرجة انها تنفع تكون موسيقى تصويرية لعمل سينمائي. مقطوعة «دندشة» هي أغنية الألبوم، دخلتها جذابة من وحي الموالد الشعبية وكأنها بـ تفكر المستمع بالألبوم اللي فات، إلا انها أقصر تراك فى الألبوم ومش مليانة مزيكا أو تفاصيل عكس المتوقع.الجزء الغنائي في الألبوم عبارة عن أغنيتين، الأولى «فدادين» مع حجازي متقال المغني الفلكلوري ابن الريس متقال. حجازي نجح انه يسيب بصمته وشخصيته في الفرقة ويحافظ على الستايل بتاعها فى نفس الوقت، الأغنية بشكل عام دمها خفيف وكلماتها بـ تحكي عن واحد بـ يمشي فدادين كتيرة فى سوهاج عشان يروح لحبيبته وبـ يقول أسماء المراكز والقرى الكتيرة اللي بـ يعدي عليها فى السكة، طبعاً الكلمات فلكلورية لكن افتكاسات وظفوا الآلات والتوزيع لإظهار الأغنية بشكل "مُفتكس".تاني أغنية هي "قلبي بيحاول يعيش" مع هاني عادل عضو فرقة «وسط البلد»، توزيع الأغنية مش مألوف قوي للمستمع، وفيها صولو طويل للباص جيتار، إلا ان هاني عادل واضح فيها بإمكانياته الصوتية وإحساسه.وبرضه مش لازم ننسى دخلة البيت بوكس (Beat Box) فى مقطوعة «Third Eye» لأنها جديدة على افتكاسات وجات غير متوقعة.الألبوم بشكل عام مليان قطع عزف منفرد (Solo) فى كل المقطوعات، منها النغمات الشرقية المميزة بالكمان لمحمد مدحت و واطسون اللي كان بـ يلعب على الجيتار باحساس وذوق عالي بعيد عن إستعراض المهارات وان كانت المهارات دي ظهرت فى الأجزاء الغربي أكتر من الشرقي. توزيع الألبوم لعمرو صلاح عازف الكيبورد، وإيقاعات هاني بدير دنِدشت الالبوم جداً!افتكاسات زي ما نجحوا في إختيار اسم يعبر بدقة عن موسيقتهم، نجحوا برضه انهم يقدموا الخليط بين الـﭼاز الغربي والموسيقي الشرقي، لأن ناس كتير جربوا –ولسة بـ يجربوا - فكرة الخلط بين نوعين من الموسيقى بس الموضوع مش بـ يزيد عن كونها محاولة أو مشروع مؤقت، اقبال الناس على افتكاسات بـ يقول انهم نجحوا فى الخليط ده فعلاً وأن هي دي شخصيتهم الدائمة.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن