دليل موسيقى القاهرة - أحدث المقالات عن المطربين والنجوم العرب

مزيكا

ألبوم كتاب الحب: نغمات قديمة بتوزيع ألافرانكا!
اصدرت في: 16/10/2016

ألبوم كتاب الحب للموسيقار كاظم الساهر هو الألبوم رقم 25 في مسيرته الفنية الكبيرة. كل الأغاني من أشعار الراحل الراحل نزار قباني. التوزيع أغلبه لميشيل فاضل و3 أغاني بس لهشام نياز. وطبعًا الألحان لكاظم الساهر. نقطة القوة في الألبوم كله التوزيع الموسيقي. تحديدًا الأوركسترا اللي فيه أفضل عازفين أوروبا، واللي نفذ الجمل الموسيقية بحرفية واقتدار. التوزيع الخرافي والمقدمة الرائعة لأغنية كتاب الحب تُحسب للموزع ميشيل فاضل. واللحن من أجمل وأرق ألحان كاظم الساهر. في أغنية رسالة حب صغيرة الكلمات مابعدتش عن قاموس نزار قباني [سيدتي-حبيبتي-أنتِ اللي بتتكرر كل شوية] واللحن كالعادة على طريقة كاظم الساهر اللي بيتعب جدًا علشان يلاقي جملة صولو حلوة أو مقدمة موسيقية ممتازة وبيتعب أكثر علشان يضيع كل اللي عمله! هنلاحظ مثلًا انتقاله للنغمة الشرقي -الربع تون- عند (فلا تقولي يالهذا الفتى) الانتقالات دي معتادة عند كاظم الساهر. بيتعمد يعملها في أغلب الأغاني، حتى لو الأغنية مش محتاجة النقلة دي. وهنلاحظ إن مود الأغنية اتغير تمامًا. في أغنية كوني امرأة نزار بيطلب من حبيبته إنها تتحول لإعصار. دي مش أول مرة نزار يكتب الحالة دي وكاظم غناها قبل كده. لكن الجديد فعلًا الجملة اللحنية الممتازة اللي صاغها كاظم لكلمات صعبة إلى حد ما. وكالعادة التوزيع متفوق على كل عناصر الأغنية. دخول المزامير بعد كوني فرسًا لمحة جيدة. كأنه حبيبته -الفرس- بترقص. وجملة الفاصل بالناي والخلفية بخط وتريات بيقول جملة مختلفة تمامًا إضافة حقيقية للألبوم. مع بداية أغنية عيد العشاق بيظهر الموزع ميشيل فاضل في جمل الوتريات وصوت الكورس. صوت كاظم فرحان ومش مرهق على عكس باقي الأغاني. والتحويلات المقامية في مكانها مضبوط. عودة مرة أخرى لإيقاع الرومبا في أغنية لو لم تكوني أنتِ في حياتي . كلمات الأغنية بتجسد حالة الحب من منظور مختلف. وإن كانت الصياغة مش موفقة قوي. نزار بيقول أنه لو ماكنش لقى حبيبته كان هيخترع واحدة زيها بالضبط. لكن التعبير الغريب هنلاقيه (طويلة كالسيف) علشان تمشي مع (سحابة صيف) في السطر اللي بعدها. وطبعًا ماحدش هيشبه حبيبته بالسيف أبدًا في 2016. هنسمع كمان (وثغرها كأس عبق) كأس عبق إزاي طيب؟ هي المفروض (كأس عرق) لكن عشان العرق مشروب كحولي فكاظم غيرها منعًا للقيل والقال، وعلشان الرقابة! هنلاحظ نفس النقلات المقامية غير المبررة عند (كنت استعرت قطعة من القمر) و(كنت جعلت شعرها مزرعة من الحبق) والأغنية عامة فيها حالة من الفوضى والسمك لبن تمر هندي. كاظم بيبعد خالص عن الأغنية الكلاسيكية وبيقدم لحن سلس وهادي في أغنية زر مرة اللي قرب كتير جدًا وبالذات في البداية وصولو البيانو من أغنية قولي جاي لعاصي الحلاني وكارول صقر. ونقل الأغنية نص تون بالقرب من النهاية خلاها أحلى. أغنية شئون صغيرة المفروض أنها ببتقال على لسان سيدة. لكن كاظم عدلها بحيث تبقى مناسبة له. اللحن من أفضل ألحان الألبوم. الانتقال لمقام الصبا عند (أبكي أبكي) و(أظل مريضًا) موفق جدًا. على الرغم من البداية الجيدة وجملة الفلوت والناي في أغنية قصة خلافاتنا لكن الانتقال الغريب والمفاجئ إلى مقام الصبا عند (برغم خريف علاقاتنا) غيّر الحالة تمامًا وكأنه خلل في بناء الأغنية. بداية ممتازة بالهارب والآهات لأغنية تناقضات. والجملة غالبًا لكاظم الساهر. دخول الوتريات بنفس جملة الآهات اللي بتفكرنا بمقدمة أغنية صبري عليك طال للمغربية الراحلة رجاء بلمليح. وبيفضل التبادل بين الآهات والكمنجات على طول الأغنية بسلاسة لاستغلال جمال الجملة اللحنية. وطبعًا مش محتاجين نقول إن التوزيع الأوركسترالي تحفة حقيقية. لجسمك عطر خطير النوايا مثال ممتاز على الأغنية الرومانسية. التوزيع الأوركسترالي البديع أضاف للأغنية كثيرا. لحن كاظم جميل وحالم. مع ملاحظة إنه صوته مرهق في المناطق العالية. أغنية فاكهة الحب أغنية بسيطة وماكنتش محتاجة كل التوزيع الاوركسترالي الخرافي ده. وخاصة أنها حالة رقيقة. وكلام من حبيب لحبيبته. في المجمل الألبوم كويس. لكن كاظم الساهر للأسف مُصر على تقديم نفسه كل مرة بأنه الملحن العظيم الخرافي اللي بيعمل حاجات ماحدش يعرف يعملها غيره. لكن غالبًا الجمال في البساطة.

...

سهرنا يا ليل: الحُب الحُب، الشوق الشوق!
اصدرت في: 27/09/2016

النجمة اللبنانية إليسا بتقدم تجربة جديدة متنوعة في ألبوم سهرنا يا ليل. إليسا المرة دي بتحاول ترضي كل الأذواق، وبتفتح سكك جديدة، من خلال 16 أغنية، وهو عدد كبير جدًا. إليسا معروفة بذكائها واختيارتها الجيدة. وفي كل خطوة بتكتسب أرض جديدة وجمهور جديد، وخاصة بعد النجاح المبهر لألبومها السابق حالة حب. الشاعر ملاك عادل أعاد كتابة أغنية كارم محمود المشهورة (أمانة عليك يا ليل طول) بشكل جديد يناسب 2016 في أغنية سهرنا يا ليل. التشابه بين الأغنيتين مش على مستوى الفكرة بس. لكن على مستوى الكلمات نفسها. ونقدر نقول ببساطة إن أغنية كارم محمود رغم إنها قديمة وكلاسيكية إلا إنها أحلى وأصدق كتير. أغنية ولا بعد سنين من نوعية الأغاني المناسبة جدًا لصوت إليسا. الأغنية مش محتاجة إمكانيات صوتية كبيرة، لكن محتاجة أداء صحيح 100% وإحساس عالي. وده اللي قدر يعمله الملحن نزيه اسلر. كلمات نادر عبد الله فيها حالة من اللخبطة وخاصة في مطلع الأغنية. كأنه اختار أصعب الطرق عشان يعبر عن فكرته. وتوزيع ناصر الأسعد أضعف عناصر الأغنية. الملحن الكبير وليد سعد قدم لحن متوسط وأقل من المتوقع في أغنية عكس اللي شايفنها. الشاعر أمير طعيمة عمل إعادة صياغة لفكرة مستهلكة. عن المرأة القوية الناجحة، لكنها حزينة ومجروحة من جواها وبتحاول تداري كل ده عن عيون الناس. يمكن تكون الأغنية دي لسان حال إليسا نفسها، وأمير طعيمة ترجم أفكارها عن نفسها وحياتها. الشاعر أسامة مصطفى خد لقب إليسا وعمل منه أغنية ملكة الإحساس. سامر أبو طالب قدم لحن من أفضل ألحان الألبوم. والموزع تميم وظف كل امكانياته عشان الأغنية تخرج في أفضل صورة. كلمات أغنية فَلّ الحكي للشاعر يوسف سليمان من أهم كلمات الألبوم. الذكريات والتفاصيل اللي كانت جميلة بين الحبيبين وهي بتتحول لتفاصيل مؤلمة بعد الفراق. حتى الكلام بيهرب مع الحبيب اللي راح. لحن صلاح الكردي من أجمل ألحان الألبوم، وتحسب له جملة الفاصل الرائعة. الموسيقار المتميز عمرو اسماعيل أضاف كتير لأغنية متمردة كموزع رغم تجاربه القليلة في التوزيع الموسيقي. أغلب أغاني الألبوم فيها دراما بنسب مختلفة. وهنا الدراما ناتجة من حوار مع الذات. وده خلى مهمة الملحن مدين أصعب في تلحين كلمات أحمد الجندي اللي جسدت حالة لوم الذات وعتابها بشكل جيد. كالعادة الموزع ناصر الأسعد بيبقى أضعف حلقة في العمل الفني. وفي أغنية متلك ما في بيستغل إيقاع المقسوم بشكل مبتذل ومستهلك. شجاعة حقيقية من الملحن المصري سامر أبو طالب إنه يصيغ نغمات لكلمات باللهجة اللبنانية. لكن المفاجأة الأكبر هي إن الكلمات للشاعر المصري أسامة مصطفى. ودي شجاعة يحسد عليها الشاعر والملحن. لأنهم دخلوا منطقة بعيدة عنهم تمامًا. الموزع تميم افتتح أغنية عمري ابتدا بموسيقى التكنو في إشارة واضحة إن الأغنية معمولة عشان الأفراح والحفلات. كلمات أحمد الجندي ولحن مدين أقل من العادي. بداية تميم بالأبوا في أغنية هتسيبني جيدة وملفتة. وبتمهد لجو الأغنية. واستمرار الأبوا والبيانو زاد لحن محمد رحيم رقة وجمال. كلمات أحمد مرزوق جسدت باقتدار احتياج الأنثى لحضن حبيبها. أغنية أغلى الحبايب مثال جيد على الأغنية الإيقاعية المتوازنة في كل عناصرها. وكل الفضل في تماسكها يحسب للموزع أحمد عبد السلام. محمد يحيي قدم لحن رائع في أغنية هخاف من إيه. الجملة اللحنية بتلمع وتبان عند (جوايا مش فاضل مكان لجراح ولا لحرمان كمان. دي حكاية خلصانة من زمان تفيد بإيه بعدين) الموزع أحمد إبراهيم قدر يحافظ على حالة الحزن الهادئ المسيطرة على كلمات الأغنية. لتاني مرة خاض الملحن سامر أبو طالب والشاعر أسامة مصطفى تجربة تقديم أغنية باللهجة اللبنانية في أغنية قلب وروح وإن كانت التجربة المرة دي أفضل من التجربة السابقة من ناحية الصياغة اللحنية والكتابة. ويُحسب للشاعر أسامة مصطفى جملة (في العتمة عيوني لعينك ضيّ) إليسا اكتشفت جانب مهم جدا من صوتها. اكتشفت إن صوتها بيلمع في الأغاني الإيقاعية، زي الأغاني الهادية بالظبط. ومع الشاعر الكبير بهاء الدين محمد بتغني فكرة جديدة عليها إلى حد ما في أغنية مش عارفه ليه. بتسأل نفسها ليه بتمثل قدام حبيبها إنها قوية مع إن نفسها تحضنه وتبوس إيديه أول ما تشوفه!. بهاء الدين محمد قدم حالة المكابرة والعناد بنعومة وسلاسة. المقدمة الموسيقية لأغنية مكتوبة ليك اللي كتبها وليد شراقي مستهلكة وسمعناها كتير قبل كده. بداية الأغنية الحقيقية من غناء إليسا. ولحن محمد يحيي المناسب تماما لصوتها. الشاعر نادر عبد الله للأسف لسه مخرجش من حالة الارتباك. ولتاني مرة بيستسهل وبيعتمد على قافية سهلة، وبيجيب كلمات ممكن أي حد يكتبها زي (تعيشلها- كلها- تتقالها- وقتها- دخلتها رسمتها) نفس القافية اللي اختارها في الأغنية اللي فاتت. بداية جيدة ورقيقة من مقام العجم لأغنية الحضن تحسب للموزع يحيي يوسف. كلمات سلامة علي تناولت العلاقات بين الناس من زاوية جديدة، من زاوية الحضن! وذكاء من الشاعر إنه يوسّع دائرة الكلام، وميختصرش الحالة في الأحضان اللي بين الحبايب بس. الملحن الموهوب صلاح الكردي اختار يبقى شاعر وكتب أغنية ياريت وصاغها لحنيا بشكل رائع. أداء إليسا كالعادة رائع ومظبوط بالمسطرة. لكن هنا كانت متألقة جدًا.

...

مالناش إلا بعض: رامي جمال كلاكيت ثاني مرة!
اصدرت في: 12/08/2016

المطرب الشاب رامي جمال بدأ حياته الفنية كملحن. قدم أغاني كثيرة علمت مع الناس (خلص الكلام) و(بحبك كل يوم أكثر) لمحمد حماقي، (أنا مصمم) لبهاء سلطان، (بسهولة كده) لمحمد فؤاد. رامي اتجه للغناء وقدم ألبومه الأول (فترة مش سهلة) ونجح نجاح كبير. وفي 2016 بيقدم تجربته الثانية في ألبوم "ملناش إلا بعض". جملة الصولو في بداية أغنية "ملناش إلا بعض" ناعمة وشيك وتُحسب لرامي جمال كملحن. وتقديم الجملة مرتين، وخاصة المرة الثانية بالكمنجات خلى تأثيرها أعمق. الموزع نور أضاف حيوية للأغنية باستخدام الصقفة كإيقاع واستخدام البيتزكاتو (النقر بالأصابع على أوتار الكمان). لحن أغنية "اوعديني" من أجمل ألحان الألبوم، جملة لحنية رقيقة وهادية، زي أغلب ألحان رامي جمال سواء لنفسه أو لغيره. أمير طعيمة بيقول (لو نسيت يا حبيبتي نفسي تفوقيني) السطر ده مش مقبول في سياق أغنية بتعبر عن حوار هادئ ورقيق بين حبيبين. الشاعر جمال الخولي بيقدم صياغة جيدة لحالة الضياع بعد انتهاء العلاقة في أغنية "ما تنسيش". هنلاقيه بيقول (وشكلي بارتاح لما باتعذب وباخسر وعمري ما اتعودت ع المكسب). استخدام الكلارينيت في بداية الأغنية يُحسب للموزع أحمد إبراهيم، وكذلك جملة الفاصل. ومافيش أي فرق بالنسبة للوتريات اللي تخصص بكتابتها سعيد كمال. أغنية "تعالالي" مثال للأغنية الإيقاعية العادية الخالية من أي تجديد. وإن كان نجاحها مضمون وخاصة في موسم المصايف والأفراح. جملة الكمان في أغنية "خاصمنا بعض" جيدة. ولحن رامي جمال كويس، رغم إن اللحن والتوزيع على العكس من الكلمات الحزينة اللي بتجسد حالة الفراق والخصام. الموزع أحمد إبراهيم استغل مزيكا الكانتري في مقدمة أغنية "إزاي هنرجع". ولحن رامي جمال كالعادة هادي من غير أي تحويلات أو مفاجئات. سعيد كمال قدم صولو كمان راقي في الفواصل. والشاعر جمال الخولي بيثبت للمرة الثانية إنه شاعر مختلف. وبيقدم صياغة مختلفة لحالة الفراق والهجر. عودة مرة أخرى لأغاني الأفراح الإيقاعية في أغنية "هالله هالله". الشاعر أسامة مصطفى أعاد كتابة أغاني قديمة كتير. وأخد من كل أغنية كوبليه. ولحن سامح كريم أقل من العادي. في أغنية "يا قلبي" الملحن ياسر نور هو البطل. قدم جملة لحنية ممتازة. واستخدام آلات النفخ النحاسية أضاف لجملة الصولو – الجميلة أصلا- طعم جديد. وكل ده الفضل فيه يرجع للموزع الدؤوب نادر حمدي. استغلال الإيقاع بشكل جيد في أغنية "الندم" يحسب للموزع شريف مكاوي، وكذلك استخدام الساكسفون. كلمات أحمد المالكي من أفضل الكلمات في الألبوم. هنسمع مثلا (الندم مهما تداريه دمعة عينيك بتأكده. واللي جي تنده عليه ده اللي كنت بتبعده) والأغنية لو حذفنا منها المقدمة والفواصل وجمل الصولو والإعادات هيبقى طولها دقيقة ونص تقريبا!. مقام الكرد واضح جدا من بداية لحن أغنية "عرفتوا ليه" اللحن اللي اشترك فيه رامي جمال مع محمد وزيري. أمير طعيمة حاول يخرج من التعبيرات السائدة فقال (عرفتوا ليه كان نفسي فيه) التعبير غير مناسب لجو الأغنية. ويحمل معاني سيئة كثيرة. لحن مدين لأغنية "مات اللي فات" فرض نفسه بقوة على المستمعين، ونظن فرض نفسه كمان على رامي جمال عشان يختاره. كلمات هاني صارو عادية جدًا، وخاصة لما نسمع حاجة زي (الباب يفوّت 100 بجد مش هزار) في أغنية "حبيبي تعالى" توزيع شريف مكاوي أضاف كتير سواء من ناحية الإيقاع أو جمل الصولو في المقدمة والفواصل. جمل قوية ومتماسكة على عكس لحن محمد النادي وكلمات هشام صادق. أغنية "علامة استفهام" أجمل أغنية في الألبوم. أغنية متكاملة في كل عناصرها. الموزع أحمد إبراهيم بعد عن موسيقى التكنو والهاوس وبدأ بجملة إيقاعية بسيطة بالدفوف وظهر معاها العود والوتريات. ورغم بساطة الجمل إلا إنها دافئة ومعبرة. لحن رامي جمال وصل للقمة عند (هرجع تاني أمشي وحداني سكة الأيام) ورغم إن رامي جمال احتفظ بنصيب الأسد من ألحان الألبوم إلا إنه هنا كان في أفضل حالاته. وكذلك أمير طعيمة. الشاعر أسامة مصطفى هو بطل أغنية "فرق في حياتي". فكرة الأغنية وصياغتها جديدة ومحتلفة تماما عن كل اللي موجود على الساحة. حالة البحث عن الحبيب وهو قدامنا، والأهم فهم الحكمة من البحث في أماكن بعيدة، اللي بيخلينا نتعلم دروس مهمة. لكن للأسف الكلمات المختلفة الجيدة معاها لحن سيء، وهنلاحظ ده في البداية بالذات، من طريقة نطق رامي جمال، من خلال المطّ والتطويل في الحروف. الموزع محمد عاطف أجاد في الكتابة للوتريات على طول الأغنية. عادة آخر أغنية في الألبوم وأول أغنية بيبقوا من أفضل أغاني الألبوم. ولما شفنا اسم جمال الخولي على الأغنية توقعنا كلمات مختلفة. لكن للأسف خابت كل توقعاتنا. أغنية ضعفت مجرد أغنية حزينة تقليدية. سمعناها كتير قبل كده ولسه هنسمعها أكثر.

...

عمري ابتدا: بداية مرحلة جديدة
اصدرت في: 26/06/2016

بعد نجاحه الكبير مع شيرين في ألبوم مشترك سنة 2002 انطلق تامر حسني وأصبح ظاهرة لفتت أنظار جمهور كتير. نجح في جذب شريحة كبيرة من الشباب، بعد ألبومه المنفرد الأول (حبّ) سنة 2004. ونقدر نقول أن ألبوم (عمري ابتدا) ممكن يكون بداية مرحلة نضج فني، لأن اختياراته محسوبة بعناية، بعيدًا عن النمط اللي اختاره تامر من بداية مسيرته. الموزع جلال حمداوي اختار قالب التكنو لأغنية يا مالي عيني أول أغنية في الألبوم. مزيكا الفواصل والمقدمة أشبه بتراكات الـ Fitness Motivation تامر حسني لسه مصّر أنه يخوض تجربة كتابة كلمات الأغاني. لكن على كل حال، التجربة المرة دي أفضل من تجارب سابقة. للمرة التانية بنقابل مزيكا التكنو في أغنية عمري ابتدا والمرة دي مع الموزع تميم. لحن شريف بدر مناسب لقدرات تامر الصوتية، وأداءه جيد في المجمل، وإضافاته للحن بسيطة لكن ذكية. والأغنية دي من الأغاني المخصوصة لحفلات الزفاف. تامر استعار طريقة الغناء المغاربي في أغنية الحارس الله في بداية الأغنية. سلامة علي شاعر موهوب ومجتهد وله نَفَس مختلف عن السائد، وده واضح في صياغته، وفي اجتهاده علشان يلاقي صور شعرية جديدة. وكلماته من أجمل عناصر الألبوم. هنسمع حاجات زي (ده أنا قلبي أما لقاك فتح الباب والشباك) جملة الفاصل بالترومبيت أضافت حيوية وقوة، جملة مبهجة فيها كتير من روح المزيكا اللاتينية. الموزع الشاب يحيي يوسف هو بطل أغنية فاض بيا. البداية بالجيتارات مهدت للحن تامر علي الرقيق. الكمنجات في الخلفية -وبالذات في الكوبليه التاني- جسدت انفعالات اللحظة الصعبة، بضربات قوس قوية، وجمل قصيرة مبتورة كأنها بتقول اللي بين السطور، كأنها الكلام اللي ماكملش بين الحبيبين. التتابعات النغمية بالجيتارات في البداية وجملة الفاصل جديدة ورقيقة. وواضح أنها عجبت الموزع جدًا لأنه لعبها بالبيانو في النهاية وختم بيها. محمد يحيي من أهم الملحنين في جيله، ومن أكثرهم موهبة، وبيقدم ألحان حلوة وجديدة. لكن في أغنية نفس الحنين قدم لنا لحن أقل من العادي. الموزع تميم المسئول عن الميكساج خلى الإيقاع في الخلفية أعلى من صوت تامر أو مساوي له، وده خلى سماع الأغنية محتاج مجهود. رفع اللحن نص تون كسر حالة الملل وأضاف شيء من الحيوية. جملة الكمنجات في بداية أغنية يا عيون جميلة. توما اجتهد وأضاف للأغنية كتير، استغل الكمنجات لعمل حالة من الرقة على طول الأغنية. كلمات أحمد المالكي جيدة وخاصة في المذهب. في أغنية حبيبي خلاص الشاعر محمد مصطفى ملك بيعبر بخفة دم عن التضحيات علشان حبيبته وقال (صاحي لك كل يوم بدري ويومي معدول) لحن محمود أنور عادي، والطبلة أضافت حيوية لجو الأغنية. الموزع تميم استخدم نغمة الموبايل بذكاء في بداية أغنية بطلة العالم في النكد. عنوان الأغنية مبالغ فيه، لأن تامر حسني مصرّ يكتب أغانيه بنفسه. الملحن عبد الرحمن شوقي كان في امتحان صعب علشان يلحن كلام زي (بطلة العالم في النكد ونمرة واحد في العقد) كلمات وألحان تامر حسني في أغنية احساسي مبيكدبش موفقة إلى حد كبير. والأغنية دي مثال على إن تامر طاقة فنية كبيرة، وملحن موهوب، ويقدر يقدم ألحان مهمة. في أغنية كان في واحدة الشاعر سلامة علي أثبت أنه صاحب موهبة كبيرة. الأغنية بتحكي عن الحب المزيف. القصة اللي بتتكرر كل يوم ألف مرة. لكنه صاغها بطريقة أقرب لحكايات الأطفال، علشان يأكد أنها حكاية ساذجة وقديمة. لحن محمد يحيي، وتوزيع تميم أكدوا على نفس الفكرة ببساطة وذكاء. وكان من الأفضل تتغنى من وجهة نظر مطربة، لأن الحبيبة هي الطرف المهزوم في النهاية. الدخول بجملة الناي من مقام الكرد في أغنية يا بعيد يُحسب للموزع ياسر ماجد. نادر عبد الله وتامر علي اعتمدوا على روح الفولكلور الشعبي المصري، واستغلوا المنطقة دي بذكاء ومن غير مبالغة. كلمات أمير طعيمة في أغنية كداب وأناني فيها قدر كبير من المباشرة. وهي عبارة عن حوار أخير بين حبيبين. لحن تامر عاشور سلس وانسيابي، واتأخر في الوصول للذروة لغاية الكوبليه الثاني. لحن شريف بدر لأغنية شكرا إنك في حياتي أقل من ألحانه في باقي الألبوم. تآلفات الجيتار والوتريات أضافت للأغنية عمق جمال. أغنية رحلة الحياة من أهم وأجمل ألحان الألبوم. وليد سعد استخدم مقام الكرد في صناعة جملة عذبة وانسيابية، وعند (وقت اللقا قصير) بينتقل لمقام الصبا. وجملة الكمنجات في البداية رائعة من الموزع احمد إبراهيم. كلمات أيمن بهجت قمر ممتازة، وخاصة لما قال (ولا حد آمن للعتمة ولا حد ضامن ضيّ).

...

اسم على الورق: عفوًا.. لقد نفذ الرصيد
اصدرت في: 02/06/2016

المغني المصري صاحب التاريخ الطويل هاني شاكر بيقدم ألبوم جديد، بيحاول يتماشى مع الجو الموسيقي العام، وفي نفس الوقت متمسك بطريقته القديمة، اللي احتفظ بها من غير أي تغيير على مدار أكتر من 30 سنة. ورايا إيه محاولة لتقديم أغنية إيقاعية سريعة في إطار جديد، ابتعد الموزع أحمد عبد السلام عن المقسوم أو الإيقاع الصعيدي، واختار موسيقى التكنو، لحن مدين أقرب للركاكة، هاني شاكر حاول يضيف من عنده للحن لكن مافرقتش كتير. حتى إضافاته وطريقة أداءه ماتغيرتش من فترة طويلة. أغنية ذكرياته من أفضل أغاني الألبوم. أغنية متكاملة في جميع عناصرها. جملة الحوار بين الجيتار والأبوا بداية ممتازة. اللحن جميل وحيوي من مقام الكرد – مقام هاني شاكر المفضل- كلمات بهاء الدين محمد جسدت حالة ما بين الأمل في بُكره، والرغبة في الانتقام، والجزء بتاع (سلام كبير) مش مفهوم ضمن سياق الأغنية، ولو اتحذف مش هنحس بأي تغيير ولا أي نقص. أداء هاني شاكر هادئ وجيد في المجمل. الأغاني الحزينة هي النوع المفضل عند الفنان هاني شاكر، وسبب نجاحه وشعبيته، وفي أغنية اسم على ورق بيقع في فخ المباشرة والتقليدية، كلمات أحمد شريف ما هي إلا سرد لمفردات الموت والضياع والحزن والفراق، من غير ما نعرف إيه سبب كل الحزن ده، وإيه اللي يستدعي الوصول للمرحلة دي، ومش مفهوم القصد من جملة (أنا زهرة اتخلقت للزينة) هل المفروض إن الزهرة تتعمل مربى مثلًا؟ وعلى الرغم من جودة جملة الفاصل، لكن تنفيذها ماكنش موفق أبدًا، استخدام الأكورديون الفرنساوي مش مناسب، لأنه أضاف جو من البهجة على عكس مود الأغنية. أغنية غلطة عمرك مثال آخر على الوقوع في السطحية، كلمات محمد البوغة بتجسد حالة الرغبة في التشفي والانتقام، لكن لحن محمد عبد المنعم على العكس تمامًا، ولحد دلوقتي مش مفهوم أبدًا إيه الغرض من لحن سريع على أغنية كلماتها مش مُبهجة. وجود الموسيقيين والشعراء الشباب في الألبوم مافرقش كتير، ومن الواضح تدخل هاني شاكر بقوة في تفاصيل العمل وبيفرض وجهة نظره، لأن ملامح التغيير مش واضحة، أو نقدر نقول باهتة، في أغنية رسالة حب (عنوان قديم ومستهلك جدًا) الجملة اللحنية عبارة عن نسخة مكررة من أغاني كتير لهاني شاكر، وكل ألبوم فيه أغنية واحدة على الأقل من النوعية دي. الشاعر أحمد شريف طلع علينا بفكرة غريبة على المستمع العربي في أغنية بره نفسي، عايز يشوف نفسه من بره، علشان يعرف مين بيحبه ومين بيكرهه. نفس الفكرة اللي تم تداولها قبل كده في أفلام كتير، البطل بيموت أو بيحلم إنه مات وبيشوف تعليقات الناس في العزاء، ولأول مرة بنسمع صوت الطورة (الصاجات الكبيرة) في الخلفية في أغنية مش شعبي. والسؤال هنا: إيه قصد الموزع حازم رأفت من استخدام الطورة في أغنية زي دي؟ الموسيقار الكبير محمد ضياء الدين عاد بعد فترة غياب طويلة، علشان يستعيد نجاحات الثمانينات والتسعينيات مع هاني شاكر، لحن وتوزيع أغنية يخونك إضافة للألبوم، فقط يعيبها أداء هاني شاكر نفسه، اللي كان محتاج قوة وحيوية أكتر، إلى جانب أن حرف التاء اتحول بطريقة غريبة وبقى حرف (تس) وهنسمع كلمات زي مشيتس، اتمنيتس، اتهديتس، اموتس، بيفوتس، وهكذا. أغنية شكرًا كلماتها اللي كتبها محمد البوغة ولحنها محمد عبد المنعم لم تحمل أي جديد، بالعكس هي عبارة عن أفكار لأغاني قديمة سواء في الكلمات أو في اللحن. في أغنية بحلم بنشوف جانب آخر من موهبة الملحن محمد عبد المنعم، اللي أثبت إنه يقدر يقدم ألحان متميزة بعيدًا عن الألحان الشعبية اللي اقتحم بيها الساحة الفترة الأخيرة. تعامل أحمد عادل مع الكمنجات والجيتار والإيقاع بوعي. الملحن حمدي صديق يعود بعد فترة غياب بأغنية وإيه يعني. وقدم جملة لحنية جديدة، بتتابع نغمي رائع، وتفوق على نفسه في تلحين كوبليه (ولا عمري يوم شفت كده) الموزع مجدي داوود عمل جملة فاصل عادية. لما بنشوف اسم الشاعر الكبير بهاء الدين محمد بنعرف إننا هنسمع كلمات حلوة، وفيها فكرة جديدة، لكن أغنية بعد حبك مخيبة للآمال، وأقل من العادية. لحن مدين جيد جدًا بالنسبة لأغنية Slow بسيطة، لكن فيها نَفَس ملحن موهوب. في أغنية جرح الماضي الملحن والموزع محمد ضياء استغل كل طاقات وإمكانيات الأوركسترا، وقدم جُمَل موسيقية – سواء في اللحن أو في موسيقى الفواصل – قمة في العذوبة والجمال والرقي. خطوط الوتريات المتعارضة في الخلفية أضافت للأغنية. جملة البداية في أغنية هتلاقيني تُحسب للموزع حازم رأفت، البيانو ونغبشات الجيتار والوتريات أكدت على حالة الهدوء المُصاحب للعتاب الأخير بين حبيبين. الملحن خالد جنيدي استخدم الكريشندو أو التصاعد اللحني لحد دخول الإيقاع. جملة الفاصل كانت تحتمل موسيقى أكثر قوة وتماسك، لكن الموزع اكتفى بالحلول السهلة. في أغنية برواز صورتك كلمات ناصر الجيل بتعبر عن حالة التعلق بتفاصيل الحبيبة الغائبة، وطول الوقت اللحن وموسيقى الفاصل وموسيقى الخلفية أفضل من أداء هاني شاكر الثابت طول الوقت.

...

قلبي حبك: بداية جيدة جدًا للمطرب نبيل وياريت تستمر
اصدرت في: 09/05/2016

نصر محروس له فضل كبير على الساحة الغنائية في مصر، قدّم أصوات مصرية متميزة، زي تامر حسني وشيرين وبهاء سلطان، نصر مش مجرد منتج أو رجل أعمال، لكن عنده رؤية، والمرة دي قدملنا المطرب الشاب نبيل كتجربة جديدة جيدة ومبشرة في ألبوم (قلبي حبك) ونتمنى أنها تستمر. ياللا أغنية ياللا لو حذفنا منها الإيقاع وسمعنا اللحن لوحده برضه هنحب الأغنية، محمد يحيي عامل جملة لحنية بسيطة ومناسبة تمامًا لإمكانيات نبيل الصوتية وأبرزت أجمل مناطق في صوته. الموزع أمير محروس متفهم كويس متطلبات الأغنية الإيقاعية، وإن كان غريب لما بدأ الأغنية بإيقاع أيوب (إيقاع الزار) مع المزمار. يخرب بيتك عنوان صادم إلى حد ما لأغنية رومانسية. جملة البزق في المقدمة عملها أمير محروس بحرفنة، وخدت من نَفَس اللحن ونقلاته. نبيل بيغني ببساطة ومن غير افتعال. الجيتار الإليكتريك في الخلفية أضاف حيوية. محمد يحيي قدم جملة لحنية متميزة كالعادة، والنقلة من النهاوند للبياتي عند (جو حضني أنا ربيتك) اتعملت بسلاسة. لو كان فارق لحن نبيل وتوزيع Jezo في أغنية لو كان فارق حيوي وفيه حركة وشقاوة على عكس كلمات نصر محروس اللي بتعبر عن حزن الفراق. الأغنية دي نموذج لأغاني كتير بنسمعها دلوقتي، بس مهما كانت عناصر الأغنية كلها حلوة مش مستساغ أبدًا التناقض الصارخ بين عناصرها. بقالي يومين توزيع أمير محروس من أهم نقاط القوة في الألبوم بشكل عام. بداية أغنية بقالي يومين بجملة الناي من مقام الكرد قوية، وتمهيد ممتاز، كلمات مينا مجدي من أفضل الكلمات في الألبوم (وكل شوية يوحشني حبيبي اللي فارقني وراح.. وأشوف الذكرى قدامي صور عمالة تتجمع.. بقالي يومين و مش عارف أضحك غير وأنا مدمع) تجربة حصلت للكل تقريبًا، كلام جديد مش مستهلك، رغم بساطته وقربه، لحن مصطفى شوقي من أجمل ألحان الألبوم، جملة هادية وانسيابية. نقدر نقول انها أغنية متكاملة من جميع عناصرها. على فكرة نصر محروس كتب أغاني كتير كويسة، لكن تجربته كملحن في أغنية على فكرة ماكنتش موفقة، أمير محروس ونبيل بذلوا جهد كبير علشان الأغنية تبقى أحسن، من غير نجاح كبير. حكاية القمر لحن نبيل لأغنية حكاية القمر – عنوان ملفت بالمناسبة – فيها احساس ومليان دفا، وأفضل كتير من كلمات نصر محروس، مثلًا هنلاقي في مطلع الأغنية (الناس شايفه القمر.. وهو شايف مين الناس باصة على القمر.. بس هو باصص على مين) رغم أن مافيش فرق بين باصص وشايف. Jezo اعتمد على جملة بسيطة بتقولها التشيللوهات من منطقة منخفضة، كتعبير عن الانكسار والحزن، وجود البيانو أضاف رقة وشفافية. مفيش حاجة تستاهل المقدمة الموسيقية لأغنية مافيش حاجة تستاهل منقولة بالحرف من أغنية قديمة لوائل جسار اسمها (خلينا بعيد). جُمل الوتريات في الخلفية نمطية جدًا، والتوزيع ككل مفيهوش أي جديد. لحن عزيز الشافعي عبارة عن مزيج من جمل لحنية من أغاني مختلفة عملها لمطربين تانيين، أجمل ما في الأغنية هو أداء نبيل وإحساسه. نسيتني ليه لتاني مرة عزيز الشافعي بيكرر نفسه، ونصر محروس كذلك، الموزع Jezo قدم حوار جيد وجديد بين الجيتارات في جملة الفاصل. عامل إيه الغريب في أغنية عامل إيه إن الملحن محمد يحيي لأول مرة بيقدم لحن يكاد يكون متطابق مع أغنية (عايز تمشي) لحسين الجسمي، وعلشان أغنية الجسمي حزينة وتوزيعها مختلف مش هيبان التشابه الكبير بين الميلودي الرئيسي في الأغنيتين. حبيبي الآهات في بداية أغنية حبيبي بتكشف عن إمكانيات صوت نبيل وخياله وقدرته على الارتجال. شطارة Jezo أنه استخدم مفردات الهارد روك وطوعها علشان يغير من شكل اللحن، ويبقى أحسن. مشاوير من أجمل كلمات نصر محروس في الألبوم -اللي كتب كل كلماته تقريبًا- وأفضل لحن لعزيز الشافعي في الألبوم. نقدر نقول أن الأغنية فيها طابع تأملي، في الدنيا والرحلة والطريق. واستخلاص الحكمة من نظرة عميقة أثناء فترة توقف. اللحن عكس حالة التأمل والهدوء والروقان. قلبي حبك الملحن القدير وليد سعد بيقدم لحن بسيط، بصياغة غربية تمامًا من مقام العجم. أمير محروس لعب على قالب الهارد روك بذكاء شديد، ومن خلال الدرامز والبيانو عمّق احساسنا بغربية اللحن.

...

أحلى وأحلى: عودة الهضبة بالـ Latin Pop!
اصدرت في: 04/05/2016

صدور ألبوم عمرو دياب (أحلى وأحلى) هو الحدث اللي كلنا بنستناه. عايزين نشوف إيه الجديد اللي هيفاجئنا بيه بعد تجربة كبيرة عمرها أكتر من 30 سنة، وعايزين كمان نعرف الفرق بينه وبين الألبوم اللي قبله (شفت الأيام) من سنتين، خلونا نشوف عمرو دياب مقدم لنا إيه السنة دي. رسمها أغنية رسمها فرحتنا بعودة الملحن الموهوب عمرو طنطاوي اللي عمل لعمرو دياب أغاني كتير حلوة منها ويلوموني مثلًا ومن فترة اكتفى بأنه يبقى عازف الجيتار الرئيسي في فرقة عمرو دياب رغم إمكانياته العالية وفهمه لصوت وشخصية عمرو دياب. عمرو طنطاوي قدم لحن ديناميكي وحيوي. الموزع أسامة الهندي أضاف جملة موسيقية سريعة علشان تناسب اللحن. موسيقى الفاصل فكرتنا بموسيقى فيلم Ocean's Twelve وتحديدًا في مشهد Laser Dance. لكن في سؤال مهم للشاعر تامر حسين، اللي له نصيب الأسد في كلمات أغاني الألبوم، إيه المقصود بـ (رسمها داير ما يدور) تحديدًا؟ أحلى وأحلى في أغنية أحلى وأحلى بنشوف نفس الثلاثي في الأغنية اللي فاتت، أغنية إيقاعية خفيفة، مناسبة تمامًا علشان تشتغل في الأفراح والمصايف. معاك قلبي في أغنية معاك قلبي بيتغير المود، وبنسمع أغنية Slow. الإيقاع غايب طول الأغنية تقريبًا. ودي لمحة ذكية من الموزع أسامة الهندي. علشان غياب الإيقاع بيأكد على الهدوء السائد على طول الأغنية. الإيقاع هنا معتمد على حرفين بس في البيانو. ونغبشات الباص جيتار. دخول الجيتار الإليكتريك عند (معاك قلبي) علشان يعمل نوع من الحيوية. أمنتك المقدمة الموسيقية لأغنية أمنتك هيئتنا علشان نسمع أغنية فيها طابع طربي. لكن الموزع أسامة الهندي بيودينا في ناحية تانية خالص، وبيبدأ الغُنا من طبقة القرار، بجملة لحنية عادية. دخول المقسوم ما عملش أي تغيير في المود، الأغنية كانت تحتمل حيوية أكتر من كده، من ناحية التوزيع بالذات، صولو الكمنجة في نهاية الأغنية رائع.. والليالي اللي قالها عمرو في الآخر ممتازة. لا لا بنرجع تاني لأغاني الأفراح بأغنية لا لا، لما نسمعها هنسأل ليه اشترك في تلحينها عمرو دياب وعمرو طنطاوي؟ ليه 2 ملحنين؟ ولو حذفنا كلمة لا بتكرارها والفاصل الموسيقي – Latin pop - إيه اللي هيتبقى من الأغنية؟ وكالعادة كلمات تامر حسين فيها تركيب مش مفهوم، يعني إيه (شفت قلوب كتير عاشقين وماهمنيش؟). عكس بعض دخول البيانو في بداية أغنية عكس بعض كان قريب إلى حد ما من بداية أغنية Sorry seems to be the hardest word للمغني الإنجليزي Elton Jones لكن الموزع عادل حقي قدر يهرب بذكاء من التشابه التام وراح في ناحية تانية. بداية من (كنا دايمًا عكس بعض) بيتحول الهدوء اللي بدأت بيه الأغنية لعاصفة مع الجيتار الإليكتريك والدرامز، لحن إسلام زكي من أفضل ألحان الألبوم. والشاعر تامر حسين كان في أفضل حالاته، موسيقى الفاصل نقطة قوة تحسب لعادل حقي. حبيبتي الشاعر تامر حسين اتكلم عن الحبيبة من منظور حسي إلى حد كبير في أغنية حبيبتي. هنلاقيه بيقول (أنا ليا نظرة أعرف بيها.. الواحدة إيه أحلى ما فيها) و(حبيبتي لما بتتمايل خطوتها بتسوي هوايل) و(عودك طرح قبل أوانه)، لحن طارق نديم عادي، تآلفات الجيتارات عملها أسامة الهندي بحرفية وشياكة، لكن جملة الفاصل نفسها كانت عادية جدًا. وعدتك عودة مرة أخرى للجيتارات الأسباني في مقدمة أغنية وعدتك، وموسيقى الـ Latin Pop لحن إسلام زكي مافيهوش جديد، مجرد لازمة لحنية بتتكرر في الكوبليهات، والأغنية بشكل عام مافيهاش جديد، جملة الفاصل بالجيتارات عادية وسمعناها في أغاني لعمرو دياب قبل كده. راجع في أغنية راجع لحن إسلام زكي هو البطل -على عكس الأغنية اللي فاتت- لحن مميز رغم بساطته، كلمات تامر حسين موفقة جدًا في التعبير عن الفراق، وخاصة لما بيقول (يا خسارة بتيجي الحاجة لما الواحد مايعوزهاش) صوت عمرو دياب واضح أنه مجهد في الطبقات العالية وخاصة عند (مين استغنى وباع ببلاش) اختيار الموزع أسامة الهندي كان موفق لنبضات الباص جيتار، خط الكمنجات على طول الأغنية كان ناعم وسلس. على حبك أغنية على حبك من أفضل أغاني الألبوم. المقدمة والحوار بين الأكورديون الفرنساوي والكمان رائع جدًا ويحسب للملحن الموهوب سامح كريم، اللي عمل جملة لحنية جميلة وكلها إحساس. الكمان والأكورديون أضافوا ثراء وجمال بوجودهم طول الأغنية. أداء عمرو دياب جميل وهادئ، والشاعر أسامة مصطفى كتب جملة من أفضل الحاجات اللي اتقالت في أغنية لما قال (وطبعك خدت منه حاجات). أنا وأنت الأغاني اللي زي أغنية أنا وأنت نجاحها مضمون، ووجودها ضروري. الشاعر أحمد علي موسى بدأ بداية ممتازة لما قال (أنا وأنت اخترنا أننا نبعد عن بعض خلاص.. يبقى ملوش لازمة يبان ضعفي وضعفك قدام الناس) لكن للأسف باقي كلمات الأغنية عادية، ولحن أحمد البرازيلي عادي جدًا. عمرنا ما هنرجع في أغنية عمرنا ما هنرجع بنفتكر أجواء التسعينات من خلال مفردات المزيكا اللي المفروض أن الموسيقى في مصر تجاوزتها من فترة طويلة، والغريب في الأغنية أن كلمات تامر حسين حزينة بتجسد حالة الفراق. لكن اللحن والتوزيع فيهم حركة وحيوية على عكس الكلام، الموزع أسامة الهندي اللي كان له نصيب الأسد في توزيع أغاني الألبوم اتعامل مع الأغنية بمفردات أغاني التسعينات، من الإيقاع المقسوم والباص جيتار على طول الأغنية.

...

بنفس الكلام: جنات بتعيد اكتشاف نفسها
اصدرت في: 27/04/2016

المطربة المغربية جنات أطلقت ألبومها الرابع بنفس الكلام بعد 3 سنين غياب، وفي نفس الوقت جنات بتغني أغنية فيلم اللي اختشوا ماتوا اللي بيتعرض في السينما حاليًا. تعالوا نشوف إيه الفرق بين الألبوم الجديد والألبوم اللي فات. أغنية عايزة أقرب عادية جدًا. بس الغريب أن صناع الألبوم اختاروها علشان تبقى أول أغنية في الألبوم. يمكن اختاروها لمجرد أنها أغنية إيقاعية بس. الموزع أحمد وجيه ما عملش أي مجهود في الأغنية. والملحن الموهوب تامر علي كان أقل من مستواه. في محاولات جنات أنها تخرج من الأغاني الهادية بتحاول تكتشف نفسها في أكتر من شكل موسيقي. أغنية أخدت قرار هي أغنية إفّيه. فيها أكبر قدر ممكن من كلام الحوار العادي أو مفردات الشارع. هنلاقي الشاعر هاني أبو اليزيد كاتب حاجات زي (عمال بتسيطر سنّة سنّة .. صحصحت مشاعر النايمة ننة!) وللمرة التانية بنشوف استسهال غير عادي في التوزيع من الموزع يحيي يوسف. مافيش أي محاولات عشان يضيف أي جديد للألحان. الملحن المتميز مصطفى عوض بيرجع تاني بعد فترة غياب طويلة جدًا في أغنية مش رجولة. واختار المنطقة الأجمل في صوت جنات. واستغل حنيّة مقام النهاوند علشان ينسج جملة لحنية عاطفية وسلسة. القانون والأكورديون الفرنساوي في الخلفية أضافت ثراء للأغنية. ودي حاجة تحسب للموزع أسامة عبد الهادي. جملة الفاصل على بساطتها لكنها معبرة وفيها شجن. لحن أغنية 100 دليل قرب جدًا من أغاني وردة في التسعينيات. جملة لحنية خفيفة لكن فيها مساحة للطرب. وكالعادة التوزيع عادي، وجملة الفاصل وخلفية الكامنجات بسيطة جدًا. أغنية بنفس الكلام تستحق تكون أهم أغنية في الألبوم. الملحن القدير خالد عز نسج لحن رائع بتتابعات نغمية جديدة ومختلفة. الأغنية بتعبر عن حالة الملل أو الفتور بين الحبيبين. بداية من الكوبليه التاني الإيقاع بيختفي تمامًا وبتقول الكمنجات سلالم نازلة وده تجسيدًا لحالة الملل. المقدمة الموسيقية لأغنية أكيد زعلت تحسب للملحن تامر علي. الكلمات بتعبر بحرفية عن حالة الندم والصدمة، بعد ما تخلت جنات عن حبيبها بإرادتها. هنا كلمات الشاعر تامر حسين هي بطلة الأغنية. جمالية اللحن بتظهر عند (مع أنها ممكن تكون روحه وحبيبته) في أغنية آخر أحزاني الشاعر أحمد علي موسى بيقدم لنا جمل جديدة وغنية زي (ربنا مايجيبش جروح تاني .. ويخليك آخر أحزاني) والرغبة في التشفي والانتقام واضحة على طول الخط. لحن محمد عبد المنعم أغرى جنات إنها تغني عكس لونها تمامًا. الجملة الشعبية البسيطة، اللي فيها مساحات واسعة كان ممكن جنات تغنيها أحسن من كده. اللحن والتوزيع كانوا بين البياتي والكرد. والمقسوم العالي في الخلفية أكد على الروح الشعبية للحن. في أغنية اسأل مجرب حاول محمدي أنه يقدم لحن مختلف، لكن كانت محاولة مش ناجحة أوي. وبرضه كلمات نادر عبد الله مش جديدة. ذروة اللحن عند (شوفوا اللي قاسوا واللي تعبوا قد إيه) الموزع ياسر ماجد رسم خط الوتريات في الخلفية عشان يبروز باقي العناصر، لكنها كانت مهمة صعبة، لكن يكفي شرف المحاولة. (تملي اللي غلط يبقى كلامه كتير) جملة موفقة جدًا من أمير طعيمة في أغنية ماتتكلمش. لحن إيهاب عبد الواحد قرب كتير من أغنية ده كان لمحمد حماقي وخاصة في البداية. الكريشندو (تصاعد اللحن) قدر يوصل حالة الأغنية بالظبط. وكأنه حوار بين اتنين وشوية بشوية بتبدأ النرفزة والصوت العالي. أغنية بطل تغني هي محاولة جديدة علشان جنات تخرج من لونها اللي الناس اتعودت عليها فيه. وتقول أنها تقدر تأدي كل الأشكال الموسيقية. كلمات ملاك عادل مختلفة إلى حد كبير عن باقي الأغاني هنلاقي حاجة زي (ده الشوق مافيهوش إتيكيت) ملاك قدر يبرز جانب البنت الشقية في شخصية جنات، في حاجة زي (أحمد ربنا إن أنا معجبة بيك أصلًا متمثلش) وإلى حد كبير قدر لحن محمد يحيي أنه يجسد نفس الحالة. بلحن حيوي سريع. وساب مساحة كبيرة لجنات عشان تستعرض المنطقة دي في صوتها. في المجمل توزيع الألبوم بالذات كان أضعف جزء. ويمكن الألبوم اللي فات كان فيه تنوع في الأشكال الموسيقية أكتر. وكان فيه محاولات جريئة لدمج الموسيقى الشرقي بالغربي واهتمام بالتوزيع زي اغنية حب جامد مثلًا اللي اخدت من الكانتري ميوزيك تفاصيل حلوة كتير.

...

كريم محسن: أنا عربى
اصدرت في: 14/02/2016

المغني الشاب كريم محسن بـ يقدم لنا 11 أغنية في ألبومه الجديد "أنا عربي" وده الألبوم الثالث بعد "كل الكلام" في 2010 و"عن تجربة" في 2014. في أغنية أنا عربي الشاعر محب بـ يقول: "أنا عربي أنا مين في حبه زيّ أنا الغيره طبعي أنا والطيبة والشهامة وأنا العربي مين في حبه زيّ أنا" وبـ يفكرنا بأغنية يوري مرقدي الشهيرة "عربي أنا"، نفس المعالجة مع اختلاف طريقة التعبير، والملاحظ أن صياغة الكلام مافيهاش أي مجهود، كأنها أشبه بفكرة خام، والأهم أن الأغنية بـ تعطي أفضلية للعاشق العربي على حساب غيره من غير أي سبب مفهوم. لحن كريم محسن خالي من أي جملة مميزة، جُمل نفسها قصير علشان إيقاعها يبقى أسرع، والموزع محمد شفيق اختار موسيقى التكنو على طول الأغنية من غير أي إضافات تُحسب له. "وعندي بكره شبه بعده شبه دلوقت".. الجملة دي تُحسب للشاعر مصطفى حسن في أغنية بفتكرك، وهي بشكل عام مثال للأغنية الـ Slow الخفيفة، وإن كانت الكلمات أحسن إلى حد كبير من لحن محمود أنور وأداء كريم محسن. الفلامنكو والجيتارات الأسباني بداية موفقة لأغنية هي خلصت وفيها بصمة الموزع محمد شفيق، الشاعر محمد مصطفى ملك وقع في فخ المباشرة لما قال: "أنا عمري ما اتذليت لحد ولا أوطي راسي، قلبي زيادة عن اللزوم كان دبلوماسي، ياخي يلعن الحب اللي يكسر فيك ويذلك" صحيح كلام الأغاني من الأفضل أنه يكون أقرب لطريقة كلامنا العادية، لكن بعيدًا عن الابتذال والسطحية، وهـ نلاقي تعبيرات زي "واقدر اجيب حالاً مكانه ييجي عشرة"، مبالغات زي دي ما بقاش ينفع تتقال في أغاني، لأننا مش بـ نصدقها حتى في الكلام العادي. الموزع محمد شفيق بـ يدخل بقوة بإيقاع المقسوم في أغنية نقول تاني، تعامل شفيق للمرة التالتة في الألبوم مع أدواته كموزع كان عادي جدًا ويمكن أقل من العادي، رغم أن دور الموزع أكبر من أنه يلاقي إيقاع مناسب للأغنية، جملة الفاصل بالجيتارات مكررة، ولحن كريم محسن ركيك. بداية الكمانجات بطريقة البيتزيكاتو (استخدام الأصابع في العزف بدل القوس) مع الجيتارات عملت حالة من الحيوية في بداية أغنية حِبّ الدنيا، الأغنية إيقاعية من الطراز الأول، كلمات محب بـ تجسد حالة التفاؤل وحب الحياة. "حِب الدنيا بلاش ولا ثانية على الفاضي تعدّيها اتعب حاول لما تحاول تاخد أحلى ما فيها صدق حلمك بكره هـ تقدر كل حاجة ممكنة وفي رأينا أن الأغنية دي من أفضل أغاني الألبوم" أغنية حلوين طعمين دمها خفيف، وبـ تعبر عن وجهة نظر شريحة كبيرة من الرجالة ورأيهم في الستات. "حلوين طعمين على طول فاكرين من غيركم مالناش قيمة، كل دي أوهام يلا يا مجانين ده ما فيكم واحدة سليمة". لعبها الشاعر وليد غزالي بشكل حلو، ومن الذكاء أن أغنية زي كده تبقى في الألبوم، جملة الفاصل بالأكورديون جميلة من محمد شفيق، وقدرت تجسد حالة الخفة اللي في الأغنية. أغنية أنت حبيبي من أهم أغاني الألبوم، شادي حسن كان موفق إلى حد كبير كملحن وشاعر، وهـ نلاقي تعامل الموزع محمد شفيق اختلف إلى حد كبير عن باقي أغاني الألبوم، الجيتارات في جملة الفاصل قالت جملة ممتازة، التلاعب بالإيقاع وتغييره كان في صالح الأغنية تمامًا، أداء كريم محسن ممتاز وفيه كثير من الفرحة والانطلاق. بداية أغنية فيه إيه تاني بـ تعطينا فكرة عن جو الأغنية، جملة البداية ممتازة –وفي الحقيقة مش عارفين هي بتاعة الموزع محمد شفيق ولا الملحن محمود أنور- لكن الجملة الموسيقية في البداية واضح فيها شاعرية مقام الكرد وبراحه. جو الأغنية بشكل عام مش غريب، لكن الإحساس والدفا في جملة اللحن الرئيسية وجمل الفواصل أضاف للأغنية كتير. جملة الناي والبداية في أغنية متغير أكثر من ممتازة، اللحن بـ يوضح إمكانيات محمود أنور العالية وخياله الواسع، وكانت فكرة جميلة أن الناي يمشي على طول الخط مع كريم محسن ويقول نفس اللي بـ يقوله. وبـ نرجع مرة ثانية للتكنو في أغنية نداري ليه، كلمات أحمد المالكي مافيش فيها أي جديد، لحن شريف بدر كان ممكن يطلع أفضل من كده بكثير لو قدر يسيطر على جملته اللحنية ويشبعها بالنزول لمناطق القرار، أداء كريم كان عادي. بداية الكمانجات والبيانو في أغنية مرت أيام نجحت في تكثيف حالة الأغنية بسرعة علشان ندخل في مود الأغنية. محمد شفيق أضاف للأغنية كثير، واستخدم الكمانجات في منطقة القرار بحرفية، واستخدام البيانو أضاف رقي للأغنية، لحن حسام البيجرمي حساس ومليان دفء، ومع دخول الإيقاع بـ تبدأ الكمانجات في الخلفية مع آلات النفخ وتعمل زي طبقة سوليفان تغلف صوت كريم واللحن وتضيف لها رقة، ويحسب كمان للشاعر هشام صادق لما قال "حتى لون لبسك يوميها مش ناسيه".

...

آمال ماهر: أيام ما تتعوضش
اصدرت في: 06/01/2016

آمال ماهر بـ تقدم ألبوم "أيام ما تتعوضش" بعد النجاح الكبير للألبوم اللي فات، بـ تقدم 10 أغاني من خلال نفس المفردات ومن الواضح أنها لقيت سكتها واشتغلت عليها كويس، ومش محتاجين نقول أن آمال ماهر من أهم الأصوات النسائية على الساحة حاليًا، ونقدر نعتبر الملحن القدير وليد سعد اللي كان له نصيب الأسد في تلحين أغاني الألبوم شريك أساسي في النجاح. القدير وليد سعد بـ يقدم لحن حيوي ورشيق في أغنية سكة السلامة، وليد تعامل بذكاء مع كلمات أيمن بهجت قمر اللي بـ تجسد كسر الحبيبة لقيود العلاقة وخروجها من الأسر، أيمن كاتب مفردات متداولة لكن بشياكة. الموزع توما استعمل المقسوم بسرعة بطيئة نسبيًا، علشان يؤكد على طابع الخفة والشقاوة، الفواصل أو مَرَدّات الكمانجات في أماكن السكوت كانت جُمل قصيرة لكن مختلفة. في أغنية مافيهاش بعدين الملحن الموهوب تامر عاشور بـ يقدم لحن بسيط في مجمله لكن مبني على تتابعات نغمية جديدة ومختلفة، تميم عمل جملة فواصل ممتازة وشيك، استخدم القانون والوتريات والأكورديون الفرنساوي في الخلفية، وجملة الفاصل من نفس نسيج لحن المذهب. وليد سعد بـ يقدم لحن مختلف عن أغلب ألحانه في أغنية أيام ما تتعوضش، جملة الوتريات في الخلفية أضافت عمق للأغنية وساعدت في تجسيد الحالة أكثر والفضل في ده يرجع لتميم، لكن جملة الجيتار والإيقاع كانوا قريبين جدًا من أغنية "وافتكرت" لمحمد حماقي وتميم كان هو الموزع برضه، وكمان جملة الوتريات والناي. أنا حبيتك ثاني لحن لتامر عاشور لأغنية Slow، الدفء واضح جدًا من البداية، الموزع أحمد عبد السلام كتب خط وتريات في الخلفية أكثر من رائع، ويحسب للشاعر عمرو يحيى الشاعر جملة "ولو ينفع أخد من عمري وأديلك". نقدر نقول عن أغنية ظروفي صعبة أنها الجزء الثاني لأغنية "سكة السلامة"، وليد سعد بـ يؤكد على موهبته الكبيرة المتجددة وبـ يقدم لحن خفيف وحيوي، الشاعر نادر عبد الله ابتكر كلمة جديدة لما قال "تتشمّت فيا"، طبعًا هو يقصد تشمت، لكن علشان الوزن يضبط. الكلمات بـ تعكس حالة القوة اللي بـ تؤكد عليها آمال ماهر في أكثر من أغنية، اللحن بـ يبقى أبطأ وأهدأ من بداية الكوبليه عند "وأنا في الظروف اللي زي دي". في أغنية "ما هونتش عليا" الموزع أحمد عبد السلام بـ يلعب دور مهم جدًا ومحوري، البداية والتمهيد للغُنا بالكمانجات، وخط وتريات حزين ورقيق في الخلفية. رد الوتريات على غُنا آمال بـ يتغير في كل مرة، وده بـ يوضح مجهود الموزع وقدرته على أنه يلاقي حلول كثيرة، تعامل أحمد عبد السلام مع الإيقاع، والهارموني بين البيانو والوتريات والجيتار الإلكتريك على طول الأغنية بـ يكشف عن احترافية ومجهود كبير، وجملة الفاصل برضه من نفس نسيج اللحن وما خرجش عن إطار الميلودي الأساسي خالص. والمهم نقول أن خط الوتريات بـ يعبر عن حالة آمال ماهر نفسها وهي بـ تغني، وبـ يؤكد على إحساسها بالشوق والانكسار، أما الجيتار الإلكتريك بـ يعبر عن الغضب المكبوت أو بمعنى أصح عن اللي ما عرفتش تقوله، أو عن الكلام اللي بين السطور. لحن مدين صياغته القوية واضحة من البداية، وهـ نلاحظ من أول عند "ما هونتش عليا" أن اللحن راكب تمامًا على صوت آمال، الذروة عند "ما كونتش معايا" لكن صوت آمال بـ ينطلق ويحلو أكثر عند "بـ تعرفني أكثر". في أغنية غلطت أنا وليد سعد بـ يبدأ بتتابع نغمي جديد حلو جدًا ولايق على صوت آمال، اللحن في مجمله متماسك وقوي على الرغم من رقته. وللمرة الثانية الموزع بـ يقدم لنا وجبة دسمة بس المرة دي الموزع هو طارق عبد الجابر، ومن المرات القليلة اللي بـ نسمع فيها الفلوت في الخلفية، طارق تعامل مع البيانو -خاصة في منطقة الختام- بطريقة الجاز، الإيقاع مختفي تقريبًا طوال الأغنية، أو بمعنى أصح موجود لكن مش محسوس، جملة الكمانجات اللي ماشية معانا على طول الأغنية مكتوبة بوعي وحرفية، والترومبيت في جملة الفاصل كانت مفاجأة. بـ نرجع مرة ثانية للمقسوم وللأغنية الخفيفة في أغنية بحبك، الموزع توما لثاني مرة بـ يخلي الأغنية أشبه لأغاني حماقي. كلمات أيمن بهجت قمر مختلفة عن الأغنية اللي فاتت، هنا الحبيبة بـ تصالح حبيبها، أيمن كشاعر محترف قدر يجسد الحالة باقتدار، هـ نسمع مفردات ما جاتش قبل كده في أغنية زي "كل دي زعلة" و"خلاص بقى صافي يا لبن"، وطبعًا لازم يسيب لمسته وهـ نلاقي حاجة زي "باصالحك وابتدي ليه كده دي واجب ولا دي بدعة.. تزعلني واسيب كل ده وأقول خليني أنا الجدعة". أغنية ذكرياتنا نقدر نقول أنها ماركة مسجلة باسم وليد سعد، هـ نلمس روحه في الكريشندو –التصاعد النغمي– من أول الأغنية لحد ذروتها عند "ليه بـ ننسى كل حاجة لما نسمع كلمتين" وليد اختار مقام الكرد الرقيق الحزين، وهـ نلاحظ حرفيته واقتداره في نقلة مقامية صغيرة جدًا من الكرد للبياتي، وفي كلمة واحدة بس عند كلمة "الجراح" في المرة الأولى. أفضل ختام للألبوم مع أغنية إحنا ولاد النهارده، تميم اعتمد على التكنو كقالب موسيقي، ولحن وليد سعد مليان حيوية ومحبة، وعند "تعالى أنا مش ممانعة" بـ تبان قوة الجملة اللحنية. تميم عمل جملتين مختلفتين للفواصل، أول مرة استخدم الناي وأضاف طعم حلو أوي للحالة، أداء آمال ماهر كالعادة مبهر وفيه احترافية عالية.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول