مأكولات سريعة مطاعم in Cairo, Egypt

مطاعم

سيتي كريب: ملك الكريب في مدينة نصر
اصدرت في: 05/04/2016

مش كل حاجة مشهورة لازم تكون كويسة، خلال جولاتنا في مطاعم وكافيهات القاهرة، لاقينا أن ممكن يكون أحسن واحد بتاع سمك (زي ما بـ يقولوا) يطلع مش أحسن حد، نروح لأحسن واحد بيخترع بيتزا وفطائر يطلع برضه فاكس، علشان كده بقينا نقلق من أي مكان مبالغ في شهرته لأن للأسف الإحباط بيكون كبير. ليه تأخذ من وقتك وحياتك 90 دقيقة قاعد في البيت أو على القهوة بتتفرج على ماتش؟ ده اللي فكرنا فيه يوم ماتش الكلاسيكو (برشلونة وريال مدريد) وبالرغم من أننا لاعيبة كورة جامدين جدًا ومشجعين برضه بس كنا زهقانين من جو ماتشات الكورة والحماس والتشجيع، قولنا ننزل نتمشى شوية في مدينة نصر (اللي كانت متربسة زحمة عربيات) بس كانت رايقة جدًا من الناس (لأن كلهم بيتفرجوا على الماتش). رجلنا أخذتنا على شارع مكرم عبيد اللي مليان محلات أكل صحيح مش كثير لكنها متنوعة، إزاي نكون هنا وما نعديش على أكثر واحد مشهور في المنطقة، اللي سمعنا عنه أساطير وأنه ملك الكريب والزحمة عنده طوابير وبتاع، طيب يالا بينا! في شارع متفرع من مكرم عبيد في نهايته هتلاقوا محل سيتي كريب، محل بسيط جدًا عبارة عن حوالي 10 عيون (ماكنة عم الكريب) وترابيزات لعمل الكريب، ووراهم مطبخ فيه المكونات اللي بتُضاف على الكريب، صحيح أن شكل المحل بسيط وممكن ما يكونش شيك وخالي من البهرجة والديكورات الحديثة، إلا أن زي ما شوفنا نظيف جدًا، خصوصًا في أماكن تجهيز الكريب، كل واحد بيشتغل هناك لابس جوانتي وفي منتهى النظافة، فيه صالة للعائلات موجودة جنب محل الـ Take Away، تأثير الماتش الحمد لله كان ظاهر في الإقبال على المحل والحمد لله كان فيه 11 واحد منتظرين الطلبات بتاعتهم قبلنا. بصينا في المنيو الظريفة اللي عبارة عن ورقة واحدة من وجهين، فيها كل أنواع الكريب اللي بيقدمها حلو وحادق وفيها كمان كل فروع سيتي كريب بأرقام التليفونات. فيه تقسيمات ظريفة قوي في المنيو زي (كريب على كيف كيفك) و(الميكس) و(اكسترا) و(كريب الطاقة) وجواها حاجات مليانة اختراعات وانبهارات وهجوم نووي شامل على أصحاب النفوس الضعيفة اللي في دايت أو بيجهزوا علشان فورمة الساحل، طلبنا كريب الوحش سادة (18 جنيه) وده عبارة عن فراخ بانيه وفراخ كرسبي وفراخ كاتيوشة (مشطشطة شوية) وهوت دوج كمان، طلبنا ميكس جبنة (14 جنيه) ده عبارة عن مجموعة من الجبن الموجودة (شيدر – فلامنك – موتزاريلا – رومي) ومن الحلو كريب نوتيلا سادة (11 جنيه). حوالي 10 دقائق وكان حد بينادي على رقم الطلب بتاعنا وأسئلة زي (كاتشب ومايونيز؟ سبايسي ولا عادي؟) وبدأ التجهيز للكريب، المكونات بـ تيجي من جوة من المطبخ في طبق وبعدها بتترص على الكريب ويبدأ التكوين، لازم تكونوا واقفين قريب علشان لو عاوزين تضيفوا حاجة زي شطة زيادة مايونيز كاتشب زيادة. أول كريب خرج كان ميكس الجبن، بقالنا كثير ماكناش أكلنا جبنة من اللي بتشد زي إعلانات البيتزا في التسعينات، عجينة الكريب رائعة مش معجنة ولا ناشفة مظبوطة بالمللي، الجبنة كانت عاملة خلطة كده مافيهاش إلا سعادة وطعم حلو كده في قلب بعضه مع الكاتشب والمايونيز، الكريب حجمه كبير لدرجة أنه يكفي 3 أشخاص، بعدها وصل الوحش وهو وحش فعلًا! والحمد لله أننا ما طلبناش الصاروخ (23 جنيه) ولا حبيشة (27 جنيه) كنا هنتعب جامد، ميكس الفراخ البانيه بأنواعها سواء كانت العادية أو المقرمشة أو المشطشطة مع شوية الموتزاريلا مع البهارات وشوية شطة خفيفة كده يخلوكم مبسوطين ومفيش إحساس بالذنب خالص لو متابعين الدايت أو Plant Based، كل ده بينهار مع أول قطمة. كريب النوتيلا، يمكن من الأماكن القليلة جدًا اللي شوفناها بتحط نوتيلا (حقيقية) في أكلها، بالرغم أن فيه محلات بالاسم كبيرة وبتستخدم أنواع مقلدة من النوتيلا وللأسف ما يعرفوش أن أي واحد هيعرف الفرق وبكل سهولة، الكريب رائع وكمية النوتيلا كثيرة و (بتبظ) من كل حتة ورائعة. خلاص كفاية كده.. كفاية كده، كان نفسنا نأكل ثاني بس خلاص مافيش مكان وكنا محتاجين نتمشى شوية علشان نأخذ هدنة من الحرب اللي بدأناها على معدتنا، سيتي كريب فعلًا من أحسن الأماكن اللي بتعمل كريب في القاهرة ويستحق الشهرة اللي واخدها، بمكونات نظيفة وعجين مضبوط وتسوية مضبوطة وتعامل ظريف من الشباب اللي شغالين هناك. الماتش كان بدأ يخلص وبدأنا نشوف بدايات زحام من اللي كانوا بيقولوا عليها جاية على المحل، بس الحمد لله كنا أكلنا وانبسطنا وخلاص ماشيين.

...

هم يم: برجر وساندويتشات ممتازة في الزمالك
اصدرت في: 25/02/2016

نعتقد أننا افتتحنا مقالات كثيرة بفكرة أن الزمالك بقى فيها كل أنواع المأكولات اللي ممكن نفسك "تهف" عليها؛ ولكن اللي بـ يعجبنا بجد أن موجود من كل مطبخ أو نوع أكل كذا مطعم بأسعار وجودة مختلفة، وكل مكان وله اللي غاويينه، بالرغم من أن في الزمالك مطاعم كثير للمأكولات السريعة والبرجر، إلا أن مؤخرًا وصل على الساحة منافس جديد وقوي اسمه هم يم – Humyum، واللي فتح في شارع أحمد حشمت بالزمالك. الجو العام في هم يم بـ يفكرنا بـ الـ American Diners بالبار الجانبي على الشمال وأمامه كراسي عالية، أما على اليمين مجموعة ترابيزات أمامها دكك خشبية بسيطة (بدون ظهر) مبطنة بالجلد، أما الكاونتر الرئيسي فهو مواجه للمدخل الزجاجي اللي بـ تنزله بسلمتين، معظم الديكور معتمد على تأثير الخشب بدرجات ألوانه المختلفة. المنيو البسيط مكتوب بطول الحائطين، وكل صنف تحته شرح واف للمكونات؛ الجرسون ممكن يساعدك لو عاوز تستفسر عن أي مكونات وهـ يساعدك تختار بمنتهى الذوق واللطف، مجموعة البرجر متنوعة وبـ تغطي كل الأذواق حتى الناس اللي عاوزين ياكلوا برجر بس قلقانين من دهون فيه هـ تلاقوا برجر Healthy Goer قليل الدسم، من قسم البرجر اختارنا The Legacy، بالجبنة مع طماطم وخس وبصل (32 جنيه)، الساندويتشات الثانية فراخ ولحمة -وكمان فيه شاورما (صاج أو عيش كيزر)- واختارنا منها كوردون بلو (39 جنيه)، ممكن كمان تضيف 13 جنيه لو عاوز كومبو وده بالضبط اللي عملناه. الحقيقة أن دي مش أول زيارة لنا هناك، ومن سخونة الأكل عرفنا أنه بـ يتم تحضيره في وقتها وبالتالي كل حاجة فريش وتحمسك أنك تأكلها بنفس، البرجر كان مضبوط من الألف للياء، من أول تسوية اللحمة وجودتها، وبقية المكونات الفريش. الكوردون بلو ما اختلفتش جودته عن جودة البرجر، كل المكونات كانت فريش وقطع الفراخ كانت ممتازة ووفيرة والأهم من كده العيش اللي كان طازج لأقصى درجة. البطاطس المقلية هي كمان كانت مضبوطة، كان نفسنا تبقى Homemade إلا أن تسويتها الممتازة اللي حافظت على لونها الذهبي وقرمشة طبقتها الخارجية كانت كفيلة بأننا نتمنى أنها ما تخلصش، كنا مصممين نعرف أخبار البطاطس الويدجز عندهم إيه واللي موجودة في منيو الأطباق الجانبية (14 جنيه) فطلبنا منها؛ بالرغم من أنها احتاجت شوية ملح وفلفل، إلا أن طعمها كان ممتاز في المجمل. بـ نتبسط لما بـ نلاقي أماكن عارفة تضبط الأكلات اللي بـ تقدمها، وفي رأينا "هم يم" نجح في تقديم نفسه على الساحة بشكل ممتاز، ممكن ناس تشوف أن الأسعار نوعًا ما غالية كونه بـ يقدم أكلات سريعة، إلا أن جودة المكونات والطعم مختلفين كثير عن أماكن ثانية بـ تقدم نفس الأكل.

...

ماجيستك: كل أنواع الفطائر والبيتزا والكالزوني في العجوزة
اصدرت في: 22/10/2015

من أهم الحاجات اللي بـ تميز محل فطائر عن الثاني هي أن يكون بـ يقدم أكل حلو وفي نفس الوقت سعره ما يكونش غالي، وإلا هـ تنافسه المحلات العالمية وهـ يفقد ميزته أنه محل فطير مصري. وبحكم عملنا في كايرو 360، المرة دي المحل هو اللي جاء لنا مش إحنا اللي روحناه، لأن مطعم "ماجيستك – Majestic" في الشارع اللي وراء مكتبنا بالضبط، وأول ما فتح، كنا فرحانين جدًا ومتشوقين نجربه، وطلبنا منه أكثر من مرة، وعنده كل حاجة من أول الفطير اللي بالسمن البلدي لحد البيتزا والكريب والكالزون وطبعًا فطائر الحلو. أول مرة نجربه، طلبنا حوواشي باللحمة المفرومة بـ 15 جنيه، وكان طعمه حلو جدًا، لأنه مختلف هم مش بـ يعملوه بعيش بلدي، بـ يعملوه بعجينة بدقيق أبيض وبـ يبقى شبه الكالزون بالضبط بس فعلًا طعمه مختلف ومش مزيت، كمان طلبنا بيتزا بأربعة أنواع جبنة بـ 30 جنيه، وأنواع الجبنة كانت كيري ورومي وشيدر وموتزاريلا، ونقدر نقول بكل ثقة أنها كانت من أجمل أنواع البيتزا اللي أكلناها في حياتنا، كانت دسمة وشبعتنا جدًا رغم أنها حجم وسط مش كبيرة، وكانت سخنة وشهية. كمان جربنا مكرونة فرن بـ 12 جنيه، وطلبنا بدل البشاميل والصوص الأبيض أنه يكون صوص أحمر وجبنة بس، وطعمها كان حلو برضه، المميز في ماجيستك أنك تقدر تضيف أو تشيل المكونات اللي أنت عاوزها في كل حاجة، وعلشان نجرب كل حاجة، طلبنا كمان كريب بالسوسيس والجبنة بـ 17 جنيه، بس للأسف الكريب كان مقرمش زيادة عن اللزوم تحس أنه شبه الفريسكا، والمكونات مش متناسقة قوي ما بين الفلفل والجبنة والزيتون والطماطم لحد دلوقت إحنا بـ ندور على قطع السوسيس مش لاقيينها تقربيًا مدفونة تحت في قاع الكريب. أما فطيرة أو رول الخضروات بالجبنة بـ 15 جنيه، فهم كانوا 2 رول مش واحد مليانين جبنة وفلفل وزيتون وطعمهم كان حلو لولا أن كمية الجبنة كثيرة ودسمة شوية، وطبعًا كنا لازم نجرب الحلو فـ طلبنا فطيرة ماجيستك بـ 25 جنيه، المفروض أنها كانت تبقى نصف شوكولاتة ونصف فواكة بالقشطة والعسل بس للأسف ما كانش عندهم فواكة، فـ طلبناها من غير فواكة، بس طعم الشوكولاتة فيها كان مميز، استمتعنا بها. للأسف لما طلبنا الطلب قالوا لنا نصف ساعة ويبقى جاهز بس للأسف أخذ حوالي ساعة، لكن غير كده الأكل عند ماجيستك شهي وأسعاره مناسبة، ننصح كل سكان الدقي والعجوزة به.

...

ولعتين: أكل مشطشط على كيفك فى فرع المهندسين
اصدرت في: 20/09/2015

اللى بـ يحب ستايل مطعم كنتاكى وماكدونالدز وهارديز هـ يحس بألفة فى المكان ده، ماشي على نفس المنهج لكن سبب تسميه "ولعتين - Welatain" أنك بـ تختار أنت عاوز ساندويتشاتك مشطشطة ولا لأ، ودرجة الشطشطة إيه. إحنا رحنا من فترة فرع المعادى ومن فترة أطول منها فرع مدينة نصر، وعجبنا جدًا، فقلنا نروح فرع المهندسين اللى موجود عند سور نادى الزمالك فى جامعة الدول العربية أخباره إيه، لو أنت سعيد الحظ ممكن تلاقى ركنة على الرصيف اللى أمام المطعم اللى واخد 3 أدوار وبـ يبص على الشارع الرئيسي الزحمة، بس خلى بالك من السُياس اللى هـ يطلعوا لك من حيث لا تعلم. الجديد كمان فى ولعتين أنه عنده عيش كيزر لونه أحمر، لأن العيش نفسه سبايسي، وكمان عنده ساندويتشات بأحجام مختلفة، منها التوربيني، الساندويتش العملاق اللي طوله 50 سم، وحجم صغير وكبير، ودرجات الشطشطة بالترتيب: عادى، سبايسي، ولعة، ولعتين. طلبنا ساندويتش فياجرا بانيه (كبير بـ 35 جنيه) وده عبارة عن جمبرى وكابوريا مقلية، وضيفنا عليه صوص حريقة (2 جنيه)، وطلبناه كومبو (كبير 10.50 جنيه)، وساندويتش ثانى مشوى صدور (كبير بـ 27 جنيه)، وسلاطة كول سلو (حجم كبير 8 جنيه)، وللتحلية مافيش فى المنيو غير شوكليت كيك (11 جنيه) فطلبناها. قعدنا فى الدور الثالث علشان نتفرج على الشارع، الأكل جاء لنا بعد شوية، الجمبرى والكابوريا كانوا أكثر من رائعين، مقرمشة من بره وطرية من جوه وفريش، والشطشطة كانت مضبوطة، والصدور المشوية كانت رفيعة ومستوية كويس وطرية ومعاها خس ومايونيز، والكول سلو كانت حلوة أوى الصوص بتاعها مضبوط مش غرقانة فيه زي ما أماكن كثير بـ تعمل. الشوكليت كيك عبارة عن Slice من كيك شوكولاتة هشة وعليها صوص شوكولاتة كمان من فوق، ممكن ناس تعتبر الصوص ده ثقيل بس كميته ما كانتش كثيرة أوى، الشوكولاتة فى الكيك غنية جدًا وهشة وطعمها حلو، ختامها مسك. تجربتنا فى "ولعتين" لطيفة، المكان ده هـ يحبه الناس اللى بـ تعشق الأكل المشطشط والحريف، واللطيف أنك ممكن تتحكم فى كمية الشطشطة، وجربوا العيش الأحمر السبايسي!

...

ويليز كيتشن: برجر ضخم وشهي وأجمل أنواع التحلية في مدينة نصر
اصدرت في: 06/09/2015

كل يوم والثاني، يطلع لنا محل برجر جديد، بأسماء مختلفة ومتعددة ما بين الكويس واللي خسر تحدي الجودة والطعم من أول قضمة، بس النهارده وسط المنافسة الكبيرة، ويليز كيتشن – Willy's Kitchen كسب التحدي وقدر يحقق معادلة البرجر الصعبة، نكهة جديدة بجودة كويسة وسعر معقول، أول معرفتنا بالمكان كان عن طريق صفحته على الفيسبوك، بعد كده عرفنا أن برنامج الأكيل زارهم وعجبه جدًا، فـ قلنا لازم نخوض التجربة كاملة حتى لو المكان بعيد بالنسبة لنا. أول ما بـ تدخل المكان هـ تلاحظ أنه صغير جدًا مش مبالغة، هو فعلًا صغير قوي، مجرد ترابيزتين داخل المحل وترابيزتين ثانيين خارج المحل، رغم أن فيه مكان في الخارج لأكثر من ترابيزة ثانية. أخذنا المنيو واحتارنا من بين الأصناف الكثيرة المغرية جدًا، ساندويتشارت برجر دجاج ولحمة، بـ تختار حجمهم 200 ولا 250 أو 300 جرام، ومنها أنواع حراقة وأنواع عادية بالمشروم والبيكون والبيض، والبلوتشيز وكل اللي قلبك يحبه، ده غير أنواع الأطباق الجانبية زي البطاطس بصوص التشيلي والجبنة والبطاطا المقلية ومشروم مقلي محشو جبنة ووافل فرايز وسلاطات متنوعة، أما الحلو بقى فلك الاختيار بين فطيرة تفاح وتوست بالنوتيلا والموز أو زبدة الفول السوداني وصوص التوت. طبعًا وسط الحاجات دي كلها كنا لازم نحتار، بس قلنا لازم ننجز ونطلب علشان كنا جعانين الحقيقة، وبالفعل طلبنا ساندويتش برجر Cheese Lava بـ 43 جنيه، والكومبو بـ تزود 22 جنيه، واللي بـ نختار منهم حاجة من الأطباق الجانبية مع عصير أو مشروب غازي، ولأن العصير كان خلص طلبنا مشروب غازي، وبطاطس بصوص التشيلي والجبنة وسعرها ضمن الكومبو بس لو لوحدها بـ 22 جنيه برضه فـ ننصحكم بالكمبو. إيه حكاية الساندويتش ده بقى؟ ده حضرتك برجر جواهم جبنة جودة، يعني أنت تأخذ قضمة تسيح الجبنة في فمك على طول وتمط، ومعاها خلطة المكان وخس وخيار وطماطم وزودنا عليها إكسترا مشروم بـ 5 جنيه، وإكسترا بيكون بنفس السعر، طعمه معاهم كان تحفة لا مثيل له برغم أنهم حطوا لنا 3 قطع مشروم بس تقريبًا، إلا أن طعمه كان تحفة، وكنا نتمنى بس أن الأطراف ما تبقاش نية أو فيها قطع حمراء، وده حصل على حسب كلامهم علشان الجبنة ما تتحرقش فـ يبقى تسويته Medium. أما البطاطس بصوص التشيلي والجبنة الشيدر، فأقل ما يُقال عليها أنها وهمية من جمالها، صوص التشيلي الحراق مع اللحمة المفرومة والصلصة عمل توازن مع دسم الجبنة والبطاطس، ودخلونا في عالم ثاني جميل وممتع. طلبنا كمان ساندويتش J Poopers بـ 49 جنيه، وده عبارة عن برجر مع هاليبنو محشي جبنة وهاليبنو عادي وجبنة شيدر، يعنى هـ تطير من الحرقان ما ننصحش به الناس اللي بـ تتعب من الأكل الحار، وكان مضبوط جدًا بالرغم من أننا لقينا بعض الأجزاء مش مستوية برضه بس قليلة، وطلبناه برضه كومبو مع بطاطا حلوة مقلية، برضه لو لوحدها سعرها هـ يبقى 22 جنيه، وكانت حلوة قوي ومضبوطة. أما أجمل حاجة أكلناها هناك يا جماعة وننصح بها أي حد يختم الأكل الدسم الجميل ده، هي ستافد فرينش توست بالنوتيلا والموز بـ 19 جنيه. بجد أجمل حاجة ممكن تأكلها وما تشبعش منها لأنها خفيفة جدًا، ومنعشة، ودي عبارة عن توست أبيض مفرود وجواه شوكولاتة نوتيلا سخنة وموز مهروس، طعمها يجنن من حلاوته. تجربتنا في ويلز كيتشن كانت ممتعة جدًا، أكيد مش هـ تبقى آخر زيارة لنا، والخبر الجميل أنه كمان بـ يوصل، تقدروا تتواصلوا معاه مباشرة.

...

جورميه فرايد تشيكن: أطباق وساندويتشات دجاج مختلفة في ويست تاون هب
اصدرت في: 09/08/2015

فتح من فترة جورميه فرايد تشيكن – Gourmet Fried Chicken وبوتشرز برجر – Butcher's Burger جنب بعض في ويست تاون هب، تقريبًا قبل رمضان بشوية، الاثنين تبع إدارة واحدة لكن الفرق أن الأول بـ يقدم ساندويتشات فراخ جورميه والثاني برجر. بوتشرز برجر رحناه لما فتح فرع الشيخ زايد عند الكرمة مول، ومن فترة كتبنا عن الفرع اللى فى ويست تاون هب، والمرة دي جاء الدور على جاره جورميه فرايد تشيكن علشان نجرب الفراخ الجورميه بتاعتهم ونعرف مين فيهم الأقوى. المكانين جنب بعض بـ يفصلهم بس جدار صغير بـ يتيح لك أنك تشوف الناس في الجزء الثاني، ولما بـ تقعد بـ يقدموا لك المنيو بتاعة المكانين، يعني مش شرط علشان أنت قاعد ناحية البرجر أنك ما تطلبش فراخ والعكس صحيح، الـ Artwork بتاع منيو المكانين مبتكرة ومميزة جدًا، وأكثر اللى بـ يميزهم كمان هيكل الميني باص الصفراء غير المكتمل اللى حاطينه كديكور علشان الناس تتصور فيه. أول حاجة غريبة شدت انتباهنا في المنيو أنهم بـ يقدموا الفراخ مع الوافل، ودي حاجة جديدة بالنسبة لنا، فيه أقسام للمقبلات وأجنحة الدجاج والسلاطات والـ House Meals والساندويتشات، اختارنا مشروم تشيكن وافل (59 جنيه) وده عبارة عن وافل محشية فراخ من جوه وكمان من فوق عليها صوص مشروم مع الفراخ وبـ يقدم معاها فراخ، ومن الساندويتشات طلبناGFC Tower بـ (44 جنيه) وده ساندويتش مكون من فراخ مقلية مع الكول سلو وقطع الهالوبينو والبصل والمخلل وبـ ينزل معاها بطاطس محمرة، أخذنا كمان كولا (10 جنيه)، وليمون بالنعناع (14 جنيه). الطلب أخذ وقت شوية بس مش كثير، وصلت لنا وافل دائرية عليها صوص المشروم بالفراخ عليها من فوق بس لكن مش محشية من جوه خالص! ودى حاجة أحبطتنا جدًا، لأن حتى كمية الفراخ كانت أقل من الوافل وطعمهم مع بعض ما كناش حاسين بينهم Harmony أو ترابط، طعم الفراخ وتسويتها حلوة مافيش كلام، الوافل هشة ولذيذة، بس ما حسيناش بتناغم بينهم للأسف! الخضار كان كويس. اللى كان أقوى في الطعم وفكرة تكوين المكونات هو الساندويتش، الطعم المسكر في الكول سلو عمل توازن مع الشطشطة في الهالوبينو، فـ تحس أنك بـ تذوق طعم متوازن في فمك وفي نفس الوقت حلو جدًا، قطعة الفراخ كانت تخينة وكبيرة وبالتالي شطارة منهم أنهم يطلعوها مستوية كويس وJuicy وطرية.. الساندويتش ده كان اختراع، البطاطس كانت عادية بس حلوة. الليمون بالنعناع كان حلو برضه، الليمون مش لاذع ومتوازن، وطعم النعناع ما كانش طاغي على الطعم زي ما أماكن كثيرة ما بـ تعرفش تضبطها، ندخل بقى على الحلو، عندهم 4 أصناف حلو اللى غريب منها اثنين هما Sweet Potato Cake Jar بـ (39 جنيه)، والتشوروس Churros بـ (24 جنيه) ودي حلوى أسبانية تشبه بلح الشام عندنا بس بـ تكون مقرمشة ومحشية شوكولاتة ومرشوش عليها قرفة بسكر من بره. التشوروس جاءت بسرعة، هي ما كانتش محشية شوكولاتة، الشوكولاتة كانت معاها في طبق صغير جانبي وأنتم بـ تغمسوا التشوروس فيها، كانت وهمية، التشوروس مقرمشة ولونها ذهبي، وصوص الشوكولاتة حلو أوي، كانت فقرة لغوصة بس كانت ممتعة بالنسبة لنا حسستنا أننا أطفال.. بـ نوصي لكم التشوروس تذوقوها لما تروحوا. زيارتنا لمطعم "جورميه فرايد تشيكن" كانت لطيفة، لكن لو جينا نقارن بين تجربتنا هنا وبين جارتهم "بوتشرز برجر".. الصراحة أتبسطنا أكثر في الثانية، بس ما عندناش مانع نروح ثاني ونديهم فرصة ثانية يمكن المرة الجاية نحبهم أكثر من "بوتشرز".

...

لارين دوريه: اختراعات كنافة رمضان لكن بنكهات محتاجة تعديل في المنيل
اصدرت في: 07/07/2015

السنة دي موضة الحلويات الجديدة الريد فيلفت كنافة أو بسبوسة بكل الأشكال اللي تحبوها، وما بين الأسعار وجودة الحلويات بـ يظهر لنا "لارين دوريه – La Reine Doree" اللي بعد عن كل زحمة الحلويات دي واخترع حاجة جديدة خالص رحنا مخصوص علشان نجربها. شفنا صورة كنافة 3 Seasons اللي مكونة من 3 أقسام، كنافة بالمانجو وكنافة بالكريز وكنافة بالكراميل، وده كلام كبير جدًا خاصة أن سعرها 125 جنيه بس، كمان شكل الميني كنافة بالنوتيلا والكريز والمانجو كنا لازم نجربهم برضه والكيلو بـ 100 جنيه. أول ما دخلنا لفت انتباهنا الكحك طبعًا اللي الناس بدأت تشتريه من دلوقت، كل سنة وأنتم طيبين رمضان خلاص بـ يودعنا للأسف، قبل ما نلحق نستمتع به، الحقيقة أن لارين عنده كمان تورتة كنافة بالمانجو شكلها كان مغري جدًا بـ 110 جنيه، وبايركس كنافة بالمانجو بس بـ 125 جنيه، كمان كان فيه كب صغير كريمة بالمانجو وكريمة بالشوكولاتة، وكل أنواع الحلويات الشرقية اللي تتخيلوها. أكثر حاجة لفتت نظرنا وعجبتنا جدًا الحقيقة هي العلبة اللي حطوا لنا فيها البايركس علشان كانت على شكل فانوس وإحنا بـ نحب التفاصيل الصغيرة دي، كمان العلبة الصغيرة اللي كان فيها الكنافة كان مرسوم عليها شكل الحارة المصرية في رمضان من بياع الكنافة لبتاع العرقسوس والأطفال اللي بـ يلعبوا بالفانوس. المهم بعد رحلة طويلة للبيت، جربنا الميني كنافة بالمانجو واللي كانت طازة وفريش بس للأسف ما نعرفش ليه الراجل وهو بـ يختارها لنا بعد ما نقي لنا اللي شكلهم حلو ومش منعكش جاء واحد من وراه وقال له أنت بوظت الصفوف ليه رجع دول وخد من هنا، وهنا ده طبعًا كان شكله مش مضبوط خالص، وكل ده وإحنا بـ نتفرج بصمت على أطول مدة انتظرنا فيها الكنافة. أما بالنسبة للكنافة 3 Seasons.. الكنافة فيها كانت حلوة جدًا، كمان الفاكهة كانت طازة وحلوة، بس نيجي للحاجة اللي بـ تفرق محل من الثاني سر الحلويات الشهية وهي الكريمة، الكريمة للأسف كانت الغلطة الوحيدة اللي نقلت مستوى الطبق من ممتاز لمش بطال، لأنها سر الطبق كله، غير أنهم أضافوا قطعة كيك صغيرة جدًا لا تكاد ترى بالعين المجردة ما بين الكنافة والكريمة، والحقيقة أنها كانت محتاجة تكبر عن كده علشان بـ يبقى طعمها أحلى. بشكل عام تجربتنا في لارين دوريه ما كانتش أفضل تجربة نتمنى أنهم يضبطوا خلطة الكريمة والدنيا هـ تبقى تمام جدًا.

...

بركة: زيارة جديدة لمطعم الشاورما في الزمالك
اصدرت في: 18/06/2015

حياتنا الصعبة في القاهرة اللي كلها زحمة ساعات بـ تجبرنا نعمل كل حاجة بسرعة من غير وقت كافي نستمتع فيه بأكلنا، من هنا كانت فكرة مطاعم التيك أواي والتوصيل اللي بـ تنقذ يومنا من الضياع، بحيث نقدر نأكل حاجة على الماشي وإحنا بـ نخلّص مصالحنا. بركة يعتبر من أشهر معالم الزمالك وتحديدًا في شارع البرازيل، وأعتقد صعب يفوتك بيافطته الضخمة وشعاره من اللون البرتقالي والنبيتي المميز. مافيش في المحل أي أماكن للأكل، وفكرته ببساطة أنك تدفع ثمن الأكل، تستنى طلبك يخلص وتأكله في أي مكان ثاني. ندخل على وصف منيو بركة، المنيو متقسمة قسمين رئيسيين: ساندويتشات لحم، ودي تشمل ستيك بالجبنة (22: 26 جنيه)، فاهيتا لحم (18: 22 جنيه) وكفتة بلدي (14: 18 جنيه)، وساندويتشات فراخ تشمل طاووق (16: 20 جنيه)، فراخ موتزاريلا (18: 22 جنيه) وكبد فراخ (12: 15 جنيه)، والأحجام الموجودة وسط أو كبير. لو حبيت تطلب كومبو زود 9 جنيه على سعر الساندويتش. علشان نكون في المضمون، طلبنا ساندويتشين شارومة فراخ (18 جنيه للواحد) وساندويتشين شاورمة لحم (18 جنيه للواحد)، ويكونوا كلهم في عيش سوري. بعد ما دفعنا، سلمنا الطلب لشيف ودود، ووصلتنا الساندويتشات الساخنة بعد حوالي 10 دقائق. الساندويتشات الملفوفة كويس كانت طازجة وسخنة مولعة، والعيش السوري كان مقرمش وطعمه رائع. صحيح حجم الساندويتشين سواء كانوا لحم أو فراخ كان أقرب للوسط من الكبير، بس الحق يتقال كانوا مليانين حشو يشمل طماطم ومخلل، مع قطع الشاورمة، رغم كده، الاثنين كان ينقصهم كمية كافية من الصوص، يعني الشاورمة فراخ كانت محتاجة ثومية زيادة واللحم محتاجة شوية طحينة. الملخص، بركة يعتبر مكان ممتاز لأكلة سريعة ع الماشي، الساندويتشات كانت لذيذة مافيش كلام، بس لو التانك فاضي وواقع من الجوع، هات لك ساندويتشين علشان ساندويتش واحد مش كبير لدرجة أنه يشبعك.

...

صب واي: متخصص الساندويتش الشهير عدى عليه أيام أحسن من كده في المعادي
اصدرت في: 17/05/2015

موضة الأكل الصحي منتشرة في القاهرة بشكل رهيب. في كل منطقة لازم تلاقي مطاعم فيها بار سلاطة أو أكلات تنفع للدايت بحيث يقدموا أكل للناس اللي عاوزة تضحي بطعم الأكل في مقابل تقليل السعرات الحرارية. ليه بـ نقول عليها موضة؟ علشان آخر كام تقليعة ظهرت كانت كلها متعلقة بالحلويات. ممكن تقول أن قبل هوجة الأكل الصحي ما تضرب العاصمة بحوالي عشر سنين مثلًا، الراعي الرسمي "للساندويتشات الصحية" -وتحديدًا في التسعينيات- كان صب واي – SubWay. صب واي طول عمره معروف بأكلاته الصحية وساندويتشاته اللذيذة، ومشهور أكثر بإعلاناته عن التخسيس من موديلز مالهمش علاقة خالص بصب واي. من ساعة ما وعينا على الدنيا وفرع المعادي موجود، بمساحته الصغيرة اللي تحتل ناصية جنب الأسواق الحرة و"تابلا لونا – Tabla Luna". الفرع ده تحديدًا اللي بـ يقدم شكل الساندويتش الطويل المعروف من زمان ما عملش تجديدات من فترة كبيرة، عمرك كمان ما هـ تشوفه زحمة في أي وقت. طلبنا ساندويتش ستيك وجبنة بطول قدم (49 جنيه) مع واحد دجاج بارميزان بطول قدم (47 جنيه) واتفرجنا على الشيف اللطيف وهو بـ يجهز ساندوتشاتنا في نوع العيش اللي اختارناه وهو واحد بالسمسم وواحد بالبارميزان والزعتر. علشان نعمل توازن مع اللحوم، طلبنا كمان طماطم، خس ودريسينج بصل حلو على الساندويتش الأول، ومخلل على الثاني. بالنسبة للستيك والجبنة، صحيح كان مليان لحمة، بس مش بـ يشبع. الطعم كان معقول بس على ما نفتكر أنه كان أحسن من كده، الدجاج بالبارميزان كان ضايع خالص، مع صدور الفراخ المجمدة، اللي ممكن نقول عليها فراخ بس علشان شكلها زي الفراخ، كانت مش متسوّية صح أصلًا. باقي مكونات الساندويتش كانت قليلة جدًا. مع إحباطنا من الأكل وأن حتى مافيش تجربة مميزة أو أجواء ممكن تعوض المشكلة دي، نفسنا نعرف سر استمرار صب واي في القاهرة طوال الوقت ده، الأكل مش زي زمان، الساندويتشات مش زي زمان، وكمان المنافسة نفسها شديدة جدًا عن زمان.

...

آدامز دونر & جريل: دونر كباب ورابس لسه محتفظة بمستواها فى هليوبوليس
اصدرت في: 30/04/2015

قليل أوى فرصة أننا نلاقى مكان فى القاهرة بـ يعمل دونر تركي ممتاز، كان زمان فيه مكان فى الزمالك اسمه "على بابا دونر كباب" لكن قفل مش عارفين ليه رغم أنه كان ناجح جدًا، أما المكان الثاني اللى شايفين أنه يعتبر الأفضل فى القاهرة هو "آدامز دونر & جريل – Adam's Doner & Grill"، جربناه مرتين من أول ما فتح، مرة أول ما فتح والمرة الثانية كانت فى شهر رمضان وكتبنا عن تجربتنا مقال نقدي، قلنا نروح نعيد زيارتنا نعرف الدنيا وصلت لفين، المنيو بسيطة جدًا فيها أقسام: الأرز (ممكن تضيف عليه دونر كباب، أو كفتة مشوية، أو بيف ستربس، أو دجاج تندورى)، السلاطات، الرابس (دونر ولحوم ودجاج)، جزء صيامي وجزء خاص بالأفطار فيه جبنة وأومليت، وأخيرًا الإضافات الجانبية. طلبنا ساندوتش بيف ستريبس (29 جنيه)، وآدامز دونر كباب (28 جنيه)، وباكيت بطاطس (10 جنيه)، ومشروب سبرايت (6 جنيه)، وسلاطة دجاج تندورى (34 جنيه)، لو عاوزين تعرفوا الأصناف أكثر ممكن تشوفوا صفحة الفيسبوك بتاعتهم، جنب الكاشير فيه مطبخ مفتوح ممكن تشوف فيه أكلك وهو بـ يتعمل. المكان واخد ناصية ومتميزة، فيه كام ترابيزة بره علشان اللى حابب يأكل فى المكان، فيه كمان حاجة زي مدخل لمكان مقفول جنب مدخل المطعم الأصلى فيه قعدة ترابيزتين أمام بعض، وفيه لوحات فنية على الحوائط علشان تستمتع بها طوال ما أنت قاعد تأكل، الأكل أخذ وقت طويل أوي عقبال ما جاء لنا، لكن شكله يفتح النفس. الأكل أقل ما يوصف به أنه رائع، تسوية الفراخ فى سلاطة التندورى اللى كانت مكتسبة لون أحمر لطيف رائعة مع الخس والجرجير والطماطم والخيار والفلف الأخضر والخبز المحمص وصوص التزازيكي، كمان راب البيف ستريبس كان رائع، قطع البيف المقطعة مع الطماطم والفلفل الرومي والبصل والذرة وساور كريم والجبنة الشيدر كان مزيج رائع وطري وغني بالعصارة، بس الأحلى منه كمان راب دونر الكباب اللى كان الحشو فيه غني وممزوج مع البقدونس والخس والطماطم والبصل وصوص طماطم بالليمون وعليها صوص كمان التزازيكي، طعم اللحم نفسه كفيل أنك ممكن تأكله لوحده من غير مكونات، كمان البطاطس المحمرة كان مقرمشة من بره وطرية من جوه وعليها نكهة من بره فشلنا نعرف هى إيه بس كانت وهمية. "آدامز دونر & جريل" مازال فى الصدارة ومحتفظ بجودته، الخدمة بس محتاجة تكون أسرع خاصة أننا كنا الوحيدين فى المكان وقت زيارتنا، نتمنى أنه يفضل على نفس المستوى وأحسن حتى لو ظهر منافسين على الساحة.

...

شاهد المزيد
مواضيع خاصة

10 أغاني مميزة أوعى تسمعهم وانت متضايق

في المقال ده هنقدم 10 أغاني حزينة يُفضل بلاش يتسمعوا وأنت متضايق أو زعلان. حاولنا على قد ما نقدر نخلي الأغاني تبقى مختلفة ومتنوعة من حيث وقت إنتاجها ومن حيث الشكل. ومن