مأكولات بحرية مطاعم in Cairo, Egypt

مطاعم

كاستن: مطعم سمك عادي وغالي في مدينة نصر
اصدرت في: 29/03/2016

أيام نهايات الأسبوع بقيت تعدي من هنا وتروح من هنا ولا تحسوا بها والوقت فيها بيطير بطريقة مش طبيعية، بقى لنا فترة بنسافر بره القاهرة نغير جو ونفصل شوية من الزحمة والزهق، الأسبوع ده قولنا نرتاح شوية وننزل نغير جو في القاهرة. بقى لنا كتير ما أكلناش سمك بره البيت، وإحنا بنقلب في اليوتيوب شوفنا حلقة من برنامج صاحبة السعادة للفنانة إسعاد يونس وحلقتها مع صاحب سلسلة محلات "كاستن" وفزاع، شكل الأكل وكلام أصحابنا في بورسعيد عنه خلانا متحمسين لأكلة سمك شكلها هتكون أسطورية، روحنا على فرع مدينة نصر في شارع أبو داوود الظاهري، كان وقتها مباراة مصر ونيجيريا في تصفيات كأس أمم أفريقيا، شكلنا هننبسط بالسمك والماتش. كنا محظوظين ولاقينا ركنة أمام المطعم على طول وفيه عامل تبع المطعم بيساعد الناس في الركنات، شكل المطعم ظاهر قوي ومميز باليافطة الخضراء الكبيرة وعليها اللوجو والاسم، الديكور بسيط وتقليدي، نفس شكل مطاعم السمك في إسكندرية وبورسعيد، المفروض أنه مكيف (ده ما كانش مشكلة، لكن مع حرارة الأكل والسمك التكييف بيكون ضروري أوي). فضلنا قاعدين شوية كويسين كده ما حدش جاب منيو ولا عارفين أي حاجة، بعد كده قومنا علشان نختار السمك، اختارنا 4 سمكات دنيس مقلي بالطريقة البورسعيدية (الكيلو 120 جنيه)، وسمكتين وقار سنجاري (الكيلو 150 جنيه) وسمكة وقار مشوي ردة (الكيلو 150 جنيه)، وكيلو جمبري مقلي (الكيلو 140 جنيه)، واختارنا شوربة فواكة البحر مخلية (35 جنيه) وواحد أرز بالجمبري (15 جنيه) وسلاطات (7 جنيه) تشمل بابا غنوج وطحينة وبطاطس مهروسة وطماطم مخللة. "هو أنتم ماعندكمش منيو؟".. سؤال لما حسينا أن الموضوع ماشي طبيعي وما حدش بيحاول يساعدنا أو يفيدنا بأي حاجة، "لو سمحت ممكن منيو" السؤال ده تكرر ثلاث مرات وأخيرًا المنيو وصلت، اللي فهمنا ليه ما حدش بيطلبها، منيو مالهاش لازمة مافيهاش أي حاجة لأنه مطعم سمك تقليدي ما عندوش اختراعات، بعد ما كنا اختارنا بالحس السمكي من غير منيو، زودنا على الطلب (استعانة بالمنيو) طبق "حنشان مشوي على الفحم" (الكيلو 180 جنيه) الحنشان هي ثعبان البحر أو الـ Eel. النتيجة صفر، صفر والدقيقة 38 فى الماتش وإحنا جعانين ومافيش حاجة وصلت، في نهاية الشوط وبدأ الستوديو التحليلي للماتش وبدأت تهل علينا السلاطات والعيش والشامي الطازة اللي كان طعمه حلو أوي. وصلت الشوربة اللي كانت ظريفة، قوامها خفيف وفيها قطع من السمك الفيليه والجمبري والسبيط المخلي، وصل السمك الدنيس ومعاه طبق الأرز اللي كان مليان وعليه قطع من الجمبري، تسوية الدنيس كانت حلوة والسمك كان مقرمش والتتبيلة بتاعته حلوة، أما الأرز كان عادي ما كناش شايفين فيه أي جديد غير اللون بس والجمبري اللي عليه ما كناش فاهمين هو مسلوق ولا مقلي ولا إيه. بعدها وصل السمك المشوي السنجاري، كان رائع تتبيلته قوية وطعمه رائع وده كان نفس الحال للمشوي ردة اللي كان برضه رائع وخفيف والسمك نفسه كان طري ومتسوي حلو أوي، الجمبري المقلي كان بقشره، مقرمش وطعم التتبيلة قوية وهايل، بس القشر بصراحة كان أكثر شوية صغيرة من الجمبري نفسه. بعد ما خلصنا الأكلة دي، طلبنا ليمون بالنعناع (10 جنيه) وده كان رائع، فريش وسكره مضبوط، كنا 4 أفراد دفعنا حوالي 1200 جنيه، لكن للأسف كنا ممكن ندفع أقل من كده بكثير وننبسط أكثر بجودة أكل واختراعات جديدة. رأينا أن كاستن محل سمك تقليدي لكنه كعادة أغلب الأماكن في مصر شهرة على الفاضي وبالتالي أسعاره غالية بناء على أنه من أحسن محلات السمك في مصر.

...

أسماك النيل: معركة الفوسفور فى وقت متأخر من الليل فى وسط البلد
اصدرت في: 21/03/2016

طول عمرنا متعودين ناكل سمك الصبح علشان بيكون لسه طازة، وعلشان كده عندنا ثقافة أن السمك ما ينفعش تاكله بالليل علشان نفس السبب، لكن فى حالتنا إحنا وأصدقائنا كان نفسنا فى أكلة سمك فى حدود الساعة 11 بالليل وكان لازم ناكله بشكل أو بآخر، وصادف وجودنا فى وسط البلد، وبما أن اللى يسأل ما يتوهش سألنا عن أحسن مكان ناكل عنده سمك وكان الرد الوحيد "أسماك النيل". المكان دورين: الدور اللى تحت معروض فيه السمك وبصراحة كان شكله محمس جدًا وكأنه لسه خارج من المياه على طول، الدور اللى فوق قعدة مكونة من عدد ترابيزات مش كثير. نيجى بقى لأهم ما فى الموضوع وهو الأكل، المنيو كان كوميدى شوية بسبب الترجمة الحرفية زى فيليه بياض وترجمتهاFillet whites و ده كان كفيل أنه يقفلنا، لكن لما بدأنا فى أول حاجة نزلت بدأنا نغير رأينا. بدأنا بشوربة السى فوود (35 جنيه) كان فيها قطع سبيط صغيرة وواحدة جمبرى كبيرة بقشرها وجندوفلى، طعمها كان حلو جدًا، أنت بتشرب بهاريز كل الكلام ده ونص ليمونة عليها خلاه خير بداية لمعركة الفوسفور اللى كنا مقدمين عليها. السلاطات نزلت قبل الأكل، إحنا كنا طالبين طحينة وخيار مخلل وبتنجان مخلل (كل نوع 5 جنيه) وطبعًا نزل معاهم عيش بلدى، الخيار كان حلو والبتنجان المخلل معاه فلفل محمر كان حلو جدًا وخلطته مضبوطة مع أنه كان حراق شوية زيادة لكن فى النهاية محتمل، والطحينة كانت نازلة سخنة وقوامها خفيف جدًا وعلى المستوى الشخصى كنا نحب أن قوامها يكون اتقل من كدة شوية، طبعًا مع السلاطات نزل عيش بلدى لكن كان كارثة، مجلد وبيتقطع بصعوبة وآخر حاجة قبل السمك كانت الأرز (7 جنيه) كان كويس ومفلفل وبهاراته مضبوطة لكن طعمه كان بعيد شوية عن طعم الأرز الصيادية اللى تعودنا عليه. السمك نزل أخيرًا، نفسنا كانت رايحة للمقلى فطلبنا كله مقلى، طلبنا فيليه قشر بياض (60 جنيه الكيلو) كان حلو بزيادة، خالى من الزفارة تمامًا وطلبنا جمبرى وسط ما كانش فيه غير كبير بس فطلبناه (160 جنيه الكيلو) تسويته كانت فوق الممتازة والـCoating أو القشرة الخارجية اللى عليه كان لونها ذهبى يفتح النفس ومقرمشة قرمشة خفيفة. السبيط (100 جنيه الكيلو) اسمحوا لنا نتكلم عنه باستفاضة علشان ده من الحاجات اللى ممكن تلاقى مطعم مضبطها وعشرة لأ.. السبيط كان آية فى الجمال، مش شارب زيت، طرى جدًا، مش مجلد ومش بيشد ولا بتلاقى أى صعوبة فى أكله. بالنسبة للخدمة كانت على قد ما هى سريعة على قد ما اللى بياخد الأوردر خُلقه ضيق ومستعجل، وإحنا بنفكر نطلب إيه جاء لنا حوالى مرتين أو تلاتة وكل مرة يسأل "خلاص" وده بصراحة كان مزعج شوية على الرغم من سرعته. فى النهاية نقدر نقول التجربة كانت جميلة جدًا، غيرت بالنسبة لنا ثقافة أن السمك بيتاكل الصبح بس علشان يكون طازة، بعد ما خلصنا فيه محل عصير قدامه شربنا عنده كوباية سوبيا عظيمة كانت أحلى قفلة للأكلة العبقرية دى.

...

مانشو ووك: أكلة صيني لذيذة في سيتي سنتر المعادي
اصدرت في: 11/04/2015

كلنا عارفين المطبخ الصيني الغني بأكلاته الملوّنة ورائحتها الشهية، وممكن جدًا تخرجه من دائرة "الأكل الراقي"، "مانشو ووك - Manchow Wok" في سيتي سنتر المعادي على الطريق الدائري أكبر مثال على كلامنا. رغم أن مافيش عنده مطعم خاص، بس مكانه وسط المساحة الكبيرة المليانة ترابيزات وكراسي مشتركة بين كل أكشاك الأكل الموجودة على بعد أمتار، ومنها تقدر تطلب الأكل اللي على مزاجك. المنيو بـ تقدم تنوع كبير لدرجة كان صعب نختار أكلنا. مانشو ووك عنده كل الأكلات المعروفة، من سبرينج رولز وفراخ مقلية wontons لغاية فراخ سويت & ساور، وكمان بـ يقدم أكل للنباتيين والأطفال، وبكده يعتبر مكان مثالي لكل الأسرة. في الآخر رسينا على كومبو 2 اللى بـ (29 جنيه) عبارة عن فراخ بصوص الفلفل الأسود مع اختيارك من الأرز أو النودلز، طلب من النودلز السبايسي (16 جنيه)، كمية من الأرز بالبخار (10 جنيه) وفراخ بصوص السويت & ساور (38 جنيه). اختيار "كومبو 2" كان هائل من ناحية الطعم والكمية، والأحلى كمان كان قطع الفراخ المدخن الطرية ومعاها قطع الفلفل الأخضر، وكلهم عليهم صوص ثقيل هائل قدر يضيف نكهة قوية من الفلفل الأسود والشطشطة، كل الكلام ده كان معاه شوية أرز حلوين بالبسلة والجزر؛ فعلًا كانوا إضافات رائعة. نحب نقول أن أحلى حاجة من وجهة نظرنا كانت السبايسي نودلز الطرية بقوامها السميك جدًا، الطبق كان فيه قطع خضروات زيادة مع الطعم اللذيذ المميز للصويا صوص. الكمية الإضافية من الأرز الأبيض صحيح طعمها تقليدي، بس كميتها ممتازة. أخيرًا، الفراخ بصوص السويت & ساور كانت خليط رائع من اللون البرتقالي مائل للأحمر من الطعم المسكّر لقطع الأناناس مع مزازة الصوص والخضروات المشكّلة. بالنسبة للحلو، طلبنا واحد من أشهر الأطباق في المنيوFried Banana in Honey بـ (11 جنيه)، اللي صحيح كميته كانت قليلة، بس طعمه لذيذ وطري نتيجة غرقانه في العسل وكمان كان سخن من الداخل. الأسعار هنا غالية شويتين، بس الأكل هائل بطعمه اللذيذ وكميته الكبيرة، وصحيح موضوع المطاعم في المولات بـ يعمل لنا حساسية، بس مع أكل مانشو ووك البسيط، الاختيارات المتنوعة والجودة العالية، الموضوع فعلاً يستاهل.

...

كيلو جمبري: أجمل ليمون بالجنزبيل وكنافة بالجمبري في سيتي ستارز مدينة نصر
اصدرت في: 08/02/2015

دائمًا كايرو 360 بـ تحب تجيب لكم كل جديد علشان كده بـ نلف وندور على كل الأماكن اللى ظهرت مؤخرًا، وده اللي حصل لما شفنا صفحة "كيلو جمبري" على الفيسبوك، اللي عامل جنبه "كيلو كباب" كمان، اللي منتشر في أكثر من مكان، وهـ يفتح فروعه الجديدة في كايرو فيستفال سيتي ومول العرب. المحل واخد جنب في الـ Food Court في الدور الأرضي، لو بـ تحب المأكولات البحرية لازم تجربه، هو تخصص جمبري بكل أنواعه وأشكاله ممكن تشتري الجمبري نيء وممكن تطلب جمبري قزاز محمر، أو جمبري كنافة، وكمان إضافة جديدة لهم كاليماري محمر، وممكن تطلب بالكيلو وممكن تطلب نصف كيلو، وممكن تعمل زينا وتطلب 300 جرام. طلبنا 300 جرام جمبري كنافة وكفتة بـ 50 جنيه، و300 جرام كليماري، وعلشان المتعة تستمر عندهم نصف كيلو البطاطس الشيبسي بـ 10 جنيه. لفت نظرنا أن عندهم أنواع صوصات كثيرة جدًا، ولما سألنا عن أنواعها عرفنا أن بـ ينزل مع كل طلب طحينة وكاتشب بالمايونيز وسلاطة خضراء، ده غير صوص الفلفل الحلو والصويا صوص، وصوص الكافيار والواحد فيهم بـ 4 جنيه بس، كمان ما قدرناش نقاوم نجرب عصير فيتامين سي بتاعهم اللي مكون من زنجبيل وليمون ونعناع وبـ 10 جنيه. أول ما الأكل خلص لقيناهم مغلفينه في علبة كرتون زرقاء، أول ما بـ تفتح العلبة بـ تلاقيها معمولة بطريقة أن الكرتون اللي على الجنب يبقى مفرود والصوص يبقى عليه، ولما بـ تخلص أكل بـ تتقفل بنفس الطريقة، لا سحر ولا شعوذة، كمان بـ يبقى معاها صوص طحينة وكاتشب بالمايونيز وسلاطة خضراء، وطلبنا معاهم كمان صوص الفلفل الحلو، وبـ يبقوا متغطيين بـ 2 عيش لبناني علشان تشبع. الكليماري كان روعة، حلقات مدورة صغيرة مقلية والكمية كانت كبيرة، ممكن كانت محتاجة تتصفى من الزيت أكثر من كده، وجمبري الكنافة كان حكاية ومقرمش ولذيذ صحيح كان محتاج كنافة أكثر شوية وحجمه كان صغير، بس طعمه كان حلو جدًا، أما الاختراع فهي كفتة الجمبري لأننا كنا أول مرة نأكلها والحقيقة أنها كانت متميزة ومضبوطة جدًا بالذات مع الصوص، أما عن بطاطس الشيبسي، فكانت أحلى حاجة لأنها كانت سخنة ومقرمشة ومافيهاش زيت لدرجة أننا افتكرناها معمولة في الفرن. لكن لو عاوزين تجربوا حاجة مطرقعة ومذهلة وحرفيًا بـ تخبطك في دماغك، يبقى لازم تجربوا عصير فيتامين سي، اللي مكون من جنزبيل وليمون ونعناع طازة، مع ثلج كثير، أول ما بـ تذوقه بـ تحس بالانتعاش والطرقعة في نفس الوقت، وده بسبب الجنزبيل طبعًا، كمان النعناع بـ يحطوه طازة، عود نعناع وليمون وساقع، كل ما بـ نفتكر بـ يرجع لنا نفس الشعور، لدرجة أننا ما كناش عاوزين العصير يخلص أبدًا. تجربة كيلو جمبري لطيفة جدًا، هـ تعجبكم لو عاوزين تأكلوا حاجة خفيفة بعد يوم تسوق طويل، وعصير الفيتامين سي هـ يعجبكم أكيد.

...

ابن حميدو: أكلة سمك مصرية فى السيدة زينب
اصدرت في: 23/10/2014

"ابن حميدو" مطعم السمك المأخوذ اسمه من فيلم قديم للفنان العظيم إسماعيل يس، واللى كان بـ يدور حول صياد من السويس بـ يقدم أكلات سى فوود على الطريقة المصرية. الديكورات أغلبها مأخوذة من مشاهد للفيلم، وهـ تشوفها محفورة فى الحائط ولوحات على السقف، بجانب أحواض سمك العرض المعتاد من الجمبرى، والسبيط والسمك على الثلج. قدرنا نشوف سمكتنا قبل ما تروح على المطبخ، وبعدها انتظرنا فى مكاننا فى الدور العلوى. المطعم كان مزدحم ومزعج شوية وقت وصولنا، لكنهم وصلونا لترابيزة هادئة فى الركن البعيد، وعليها زجاجة مياه وسلة خبز نقزقز فيهم أثناء انتظارنا، الخبز كان مزيج من المحمص والمقلى. منيو ابن حميدو متنوعة وتقدر تختار منها نوعية طهى سمكتك بين مشوى، ومقلى، ومسلوق أو صينية. طلبنا واحد سلاطة خضراء، وأرز أبيض، وربع كيلو جمبرى مشوي بالصوص وربع كيلو فيليه مقلى. الفيليه المقلى (75 جنيه/ للكيلو) كان طرى، عصارى وطعمه ماشى مع رشة الليمون. الربع كيلو كان كافى جدًا لفردين. كمية الجمبرى المشوى (175 جنيه/ للكيلو)، كانت قليلة إلى حد ما وكمان أغلى. على العموم، الصوص كان تحفة فنية؛ خليط من الطماطم، والجرجير، والبصل والجزر مع بهارات وتوابل، ولا أحلى! بشكل عام، ما فيش كلام أن ابن حميدو بـ يقدم أجمل أكلات السى فوود وسط ديكورات جميلة، لكن الفكرة أن الخدمة وقت زيارتنا كانت مهملة شوية؛ طوال الوقت كان اثنين جرسونات بـ يحركوا الترابيزات بشكل مزعج. ابن حميدو مجهز لاستقبال الحفلات أو المجموعات الكبيرة بشرط الحجز مسبقًا، ننصحكم كمان تعملوا حسابكم أن أسعار السى فوود بـ تتغير بشكل يومى والطلبات بـ تكون حسب الكمية: ربع، أو نصف أو حتى كيلو كامل.

...

أسماك مرجان: السمك زى ما تحب فى العجوزة
اصدرت في: 16/08/2014

بـ يقولوا أكل السمك مزاج، وعلشان كده فيه مطاعم للسمك مخصوص، وفيه ناس لما تحب تأكل أكلة سمك جامدة بـ تسافر لأى مدينة ساحلية على اعتبار أن الساحليين أكثر ناس بـ يطبخوا سمك كويس. إحنا ما سافرناش ولا حاجة علشان نأكل سمك والموضوع كله بالصدفة لما أكلنا سمك في مطعم "مرجان" اللى في شارع دكتور النبوى المهندس بمدينة الإعلام بالعجوزة خلف مسرح البالون، المطعم بسيط جدًا ومش رومانسى، أول ما دخلناه حسينا أنه معمول للأكل وبس، طلبنا الأكل بسرعة وجاء لنا بسرعة برضه، وبالرغم أن المطعم صغير إلا أن المنيو كبير وفيه أصناف كثير. وطعم الأكل كان حلو جدًا والأحجام كانت مناسبة أو يمكن أكثر من العادى، وربما ده سبب شعار المطعم وهو "في أسماك مرجان.. اتحداك لو قمت جعان" وده فعلاً اللى حصل معانا، مافيش طبق طلبناه قدرنا نخلصه بالرغم أن الأكل حلو جدًا. وأما الأسعار كانت مناسبة يعنى مش عالية قوى ومش رخيصة، يعنى مثلاً طلبنا مكرونة سى فوود بالصوص الأبيض (20 جنيه) وكمان وجبة فيليه وسبيط وجمبرى (25 جنيه) وكمان طلبنا أرز بالجمبرى (20 جنيه)، فيه وجبات عائلية سعرها برضه مناسب. وبالرغم أن الأسعار تعتبر بسيطة بالنسبة لمطاعم السمك إلا أن كل الأسماك طازة وهي بالفعل في صناديق زجاج وصاحية أمام عيوننا في المطعم. في أسماك مرجان الدليفرى كمان سريع وبـ يروح لأماكن كثير مش بس اللى فى محيط المطعم، دائمًا بـ يأخذوا رأينا في الأكل وكمان بـ يأخذوا بياناته علشان لو طلب دليفرى بعد كده يبقى المطعم عارف ملاحظاته من قبل الأكل ما يوصله. وزى ما كان المطعم بسيط طريقة تقديم الأكل كمان كانت بسيطة ومش شيك قوى لكن النظافة ظاهرة جدًا والاهتمام بمذاق الأكل وكميته من أكبر اهتمامات المطعم، لكن بالنسبة لنا الشياكة في تقديم الأطباق مهمة جدًا لأنها بـ تترك شعور نفسى بالاستمتاع غير متعة الأكل. وزى ما بـ يقولوا الحلو ما يكملش، فعلاً لو كان أسماك مرجان مساحته كبيرة وفيه شيء من الرومانسية كان يبقى مكان هائل للاستمتاع مع الأصدقاء أو العائلات، لأن مثلاً الطاولات قريبة جدًا من بعضها، يعنى لو تكلمنا أكيد باقى الناس هـ يكونوا سامعيننا بشكل ما. لو فيه عزومات عندك ممكن تنسق مع إدارة المطعم وهم بـ يجهزوا الأوردر وبـ يوصل في الميعاد اللى بـ نحدده بالشكل اللى يحافظ على الأكل.

...

شيخ العرب زهران: مأكولات بحرية بأسعار معقولة فى المعادي
اصدرت في: 23/06/2014

كلنا بـ نحب مطاعم التيك أوت فى القاهرة، خصوصًا لو مطعم أسعاره معقولة وأكله كويس. الطبيعى أن فيه أكلات أغلى شوية من أكلات ثانية، وعندنا فى مصر تعتبر المأكولات البحرية من الأكلات الأساسية فى المطبخ المصرى، والناس عندها استعداد تدفع كم فلوس محترم علشانه. المأكولات البحرية فى مصر يميزها التنوع، يعنى تقدر بمبلغ بسيط جدًا تأكل ساندويتش بحوالى اثنين جنيه، وممكن أكلة غالية فى مطعم فخم. أغلب الناس على العموم بـ يفضلوا المستوى المتوسط، ولو المكان ما كانش بـ يطل على منظر بحر، يبقى هـ يختاروا يستمتعوا بالأكل براحتهم فى البيت. فى هذا الإطار، المعادى بـ ترحب بمكان جديد بـ يلبى الطلب ده، وهو "شيخ العرب زهران"؛ مطعم متوسط الحجم بجانب محطة توتال على طريق الأوتوستراد. بعد افتتاحه من وقت قريب، تفرجنا على المنيو لاختيار أكلات جامدة نتوقع أن الناس فى البيوت يحبوا يجربوها. طواجن؟ تمام. طلبنا طاجن باستا سى فوود (44 جنيه) وطاجن كاليمارى (43 جنيه) ومعاهم طلبين أرز، وواحد صيّادية بالجمبرى (26 جنيه) والثانى أرز شيخ العرب (12 جنيه). وإحنا بـ ندور على مقبّلات تناسب ذوقنا، لفت انتباهنا سبرينج رولز بالجمبرى (48 جنيه) وكانيلونى سى فوود (48 جنيه). لما يوصل الأكل هـ تندهش من حجم الأكل. السبرينج رولز كانت أكبر من أى واحدة نشوفها طوال حياتنا، وقُدمت فى علبة من الورق. مع أنها كنت مقرمشة، الحشو -المكون من جمبرى، كاليمارى وفلفل رومى- زيته كان زيادة، وده كان أثقل من أى طبق مقبلات نجرّبه. الكانيلونى، قُدم فى طاجن فخّار فيه جمبرى وكاليمارى مع كمية محترمة من الكريمة، وكان لذيذ، لكن مع وصولنا للمرحلة دى كنا حسينا تقريبًا بالشبع. طاجن الباستا سى فوود برضه قُدم فى طاجن فخار، فيها سباجتى بالصوص الأبيض، جمبرى كثير، محار قليل وشوية كاليمارى، كلهم يغطيهم جبن ناشف شوية. صحيح الطاجن كان يشبع جدًا، الطعم ما كانش مميز، فى الحقيقة الفرق بين الكانيلونى والمكرونة بالصوص الأبيض كان غير ملحوظ. طاجن السمك والكاليمارى اتعمل بصوص أحمر مع فلفل أخضر، نكهته كانت مختلفة بشكل لذيذ بسبب عدم وجود الكريمة. صحيح كمية الكاليمارى كانت كبيرة، السمك كان قليل شوية. طبقين الأرز اللى طلبناهم كانت كميتهم كبيرة. قُدموا فى طبق فويل دائرى، الصيّادية كان فيه جمبرى زيادة عن اللزوم، رغم أنها ممكن تكون حاجة كويسة، لكن نكهة الأرز نفسها كانت مش موجودة. بالنسبة لأرز شيخ العرب، كانت العكس تمامًا، مافيش أى وجود للجمبرى، وتتبيلته قوية حرّاقة ثقيلة على القلب. صحيح الأكل ممكن يكفى أربعة أفراد، لازم نعلق على قد إيه الأكل طازج. كل الجمبرى والكاليمارى على الترابيزة مش طازة بالمرة. ممكن نسامح أى مكان بـ يقدم سى فوود غير طازج فى حالة أنه بعيد عن الأماكن البحيرة، بس لازم تعوض المشكلة دى إما بالتتبيلة أو طريقة الطبخ؛ ما ينفعش أبدًا السى فوود يكون صعب المضغ، أبدًا.

...

عنتر وعروس البحر: أكل حلو وسعره كويس يناسب العزومات في شارع فيصل
اصدرت في: 10/06/2014

حيرة كبيرة بـ نحس بها لما بـ نحب نروح مطعم، فيه شوية مميزات مجتمعة زي أن الأكل يكون حلو، التقديم بعد فترة مناسبة، السعر مش عالي، مكان الأكل يكون مريح ويساع العائلة من غير ضغط، أو شعور بالخنقة، معادلة تكاد تكون مستحيلة، المكان الواسع معناه سعر أوفر، والأكل الحلو معناه خدمة متأخرة، لكن مطعم "عنتر وعروس البحر" بـ يوفر كل ده وأكثر كمان. روحنا فرع المحل في آخر شارع فيصل، قرب المريوطية، طلبنا فراخ مشوية (الفرخة الكاملة 38 جنيه)، وشوربة (3 جنيه)، وأرز بالكبد والكلاوي (8 جنيه)، وأرز أبيض (3 جنيه)، السلاطات بـ تنزل تلقائي (الواحدة بـ 2 جنيه)، والتحضيرات كويسة، الأكل بـ ييجي بعد فترة بسيطة بطريقة كويسة. الفراخ كانت جميلة جدًا، والأرز بالكلاوي كان مميز جدًا، والشوربة رائعة، كذلك السلاطات فعلاً مميزة، يمكن الأرز الأبيض هو اللي ما حبيناهوش قوي، كان كأنه قديم شوية قبل الطبخ، الكلام ده كله ما كملش خمسين جنيه على بعضها، اتبسطنا من الجو الظريق، والمكيف. "عنتر وعروس البحر" مش مجرد مطعم عادي متوسط ومريح، فيه ميزة أنهم مطعمين، وبلافتتين، لكن لهم صالة واحدة، ورقم واحد، قسم اسمه " عروس البحر" بـ يقدم الأسماك بأنواعها، وقسم اسمه "عنتر" بـ يقدم المشويات، يعني بـ يوفر كل الأطباق تقريبًا، ولو أصحاب لهم رأيين مختلفين، جزء عاوز أسماك وجزء عاوز مشويات، يقدروا يقعدوا على نفس الترابيزة، في نفس المكان ويأكلوا أكل مختلف. الأسعار في المطعم ده بسيطة، والأكل طعمه حلو جدًا ومستواه كويس، ونظيف، وسخن، لكن فيه شوية عيوب تقنية، يعني مثلاً لما زرناه مرة ثانية بعد الأولى، والنور قطع، ما لقيناش كشافات كفاية أو إضاءة مناسبة في المكان أو مولد يشغل اللمبات لحد ما النور ييجي، ولما قولنا معلش هـ نقعد على ضوء الشموع نأكل قالوا لنا: "معلش مافيش سمك لأن النور قاطع، الطبخ كمان بـ يقف!" الحقيقة كانت حاجة عجيبة وغريبة، لكن على كل حال المطعم كويس، ننصحكم به، لو عاوزين تعزموا عزومة ما تكلفش جامد وتتبسطوا مع بعض كعائلة وتلاقوا أكلات كثير متنوعة ومميزة روحوا "عنتر وعروس البحر".

...

مراسي: مطعم راقي للمأكولات البحرية في زهراء المعادي
اصدرت في: 14/05/2014

من أسابيع قليلة كنا بـ نمر من نفس المكان اللي فيه المطعم ده ونلاقيه مغلق ومافيش أي بوادر لتجهيزات لمكان جديد، لكن بسرعة تم تشطيب المكان وتجهيزه على أعلى مستوى علشان نتفاجئ بمطعم عملاق واخد الدور الأرضي بأكمله في أحد الأبراج القريبة من أبراج بدر في زهراء المعادي عند المعادي سيتي سنتر أو كارفور، ومعلق عليه يافطة بـ تقول «مراسي» للمأكولات البحرية. قربنا أكثر من البوابة علشان نستكشف المكان أكثر لاقينا كابتن محمد بركات وكابتن سيد معوض نجوم الأهلي واقفين بـ يستقبلوا ضيوف المكان وبـ يتصوروا معاهم، وعرفنا أن ده المشروع الخاص بالنجمين بعيدًا عن عالم الرياضة، اختاروا مكان هادئ ومميز وعملوا مطعم فخم وضخم ومتخصص في السي فوود اللي هو عشق المصريين. اليوم ده كان يوم الافتتاح لـ «مراسي» وطبعًا كان كثير من نجوم الرياضة والفن مدعوين والافتتاح كُتب عنه في عدد من المجلات والصحف، فانتظرنا يعدي يومين ثلاثة ونزور المطعم في الروقان ونشوف شغلنا ونحاول نجاوب على الأسئلة اللي بـ تطرح نفسها؛ يا ترى مذاق الأكل بنفس قوة المكان وشياكته؟ يا ترى بركات ملك الحركات مضبط المطعم زي ما كان مضبط الجناح اليمين في الأهلي والمنتخب؟ أكيد مفهوم أن ناس كثير ممكن تروح المكان لأول مرة بس علشان اسم بركات أو معوض، يشوفوهم ويتصوروا معاهم ويغلسوا عليهم أحيانًا، لكن الإقبال على المكان وتكرار الزيارات مش هـ يبقى له أي علاقة بحاجة غير الأكل ومستوى الخدمة، علشان كده هـ نحكي لكم حالًا عن تجربتنا في «مراسي». زي ما قلنا المطعم تصميمه أنيق وراقي جدًا، ديكورات خارجية زجاجية باللون الأبيض والأزرق، ومدخل فخم للمحل بـ يفتحه موظفين استقبال بمنتهى اللياقة، ويستقبلك المتر دو أوتيل بالملابس الرسمية ويساعدك في اختيار المكان أولًا، وبعدين يعرض عليك مباشرة أنك تلقي نظرة على ثلاجة الأسماك الفريش وتختار منها سمكتك المفضلة وطريقة تسويتها، وبعد كده ييجي ثاني لحد ترابيزتك يأخذ باقي الأوردر من مقبلات وسلاطات ومعجنات. المكان من الداخل واسع وتصميمه مثالي، ساحة مربعة كبيرة للترابيزات وشاشات في كل مكان وعدد مهول من الويترز قريبين منك دائمًا، وفي أحد الأركان كان فيه ثلاجة عرض الأسماك الضخمة وجنبها بار السلاطات المتنوعة. في العرض لقينا كل أحجام الجمبري، بأسعار مش مكتوبة في المنيو لأنها ممكن تتغير كل يوم، بس مش بـ تختلف كثير عن 100 و180 و250 و300 جنيه للكيلو، الأغلى هو الجامبو السويسي طبعًا، وفيه استاكوزا صاحية، هـ تلاقيها بـ تلعب على الكاونتر أمام الأسماك، الكيلو بـ 300 جنيه، الواحدة توزن نصف كيلو تقريبًا، وفيه بطارخ بـ 400 جنيه الكيلو والكاليماري بـ 100 جنيه والقاروص بـ 140 جنيه والبوري بـ 60 جنيه والوقار هو الأغلى بـ 170 جنيه للكيلو. الويتر اقترح علينا طاجن مخصوص بـ يحمل اسم المحل، فيه أستاكوزا وجمبري وبطارخ وخلطة بصل وفلفل ومغطى بالكريمة والموتزاريلا، بـ نختار الأصناف فيه بالوزن، وكان سعره حوالي 200 جنيه، واختارنا سمكة قاروص تتعمل سنجاري مشوي، وشوربة سي فوود مخلية (30 جنيه) وطبق أرز بالجمبري والكاليماري (15 جنيه) ومن بار السلاطات أخذنا سلاطة رنجة بالطحينة وسلاطة خضراء (8 جنيه). في أقل من 10 دقائق بدأ الأكل ينزل أمامنا، مع عيش أبيض ومحمص رائع، وبعده الشوربة بكمية معقولة ومذاق كريمي لذيذ ومليانة سمك فيليه وكابوريا مخلية، كانت أكثر من ممتازة. سلاطة الرنجة هنا ما تتفوتش، والسلاطة الخضراء كان ممكن تبقى أحسن لو كانت قطع صغيرة زي ما طلبناها، لكن للأسف جابوها لنا شرائح على غير رغبتنا. الأرز عادي مافيش حاجة مميزة، لكن كل التميز والفوسفور والجمدان كان في الطاجن الرهيب، مذاق رائع والأستاكوزا تحديدًا اللي كانت لسه صاحية وبـ تلعب من شوية كانت متبلة ومستوية بمنتهى الروعة، والبطارخ كانت لذيذة فريش بس لو مالكش فيها ما تطلبش منها كثير لأن رائحتها نفاذة وقوية جدًا، حاجة كدة مخصوص لأكيلة السمك. مافيش أجمل من القاروص يتعمل سنجاري في رأينا، وهنا كان معمول بمنتهى الحرفنة في التسوية بس التتبيلة كان ممكن تبقى أحسن من كده، الخلطة قليلة، بس اللحم الأبيض الطري خلانا ننسى موضوع الخلطة ده. وبعد الوجبة قدموا لنا طبق بطيخ مثلج هدية من المكان. الخدمة ودودة ومهذبة ونظافة المكان لا غبار عليها، والكهرباء قطعت شوية صغيرين في المكان، فوزعوا كشافات إضاءة في كل أركان المكان، وعرضوا علينا يساعدونا حتى في تفصيص السمك علشان الضلمة. شكرناهم وكنا ممتنين جدًا للتجربة ككل، لكن غلطة صغيرة في الفاتورة غيرت جزء من انطباعنا الإيجابي جدًا عن المكان، لأننا لما طلبنا تصحيح الغلطة وتوضيح أننا ما طلبناش الحاجات دي الويتر قال لنا أنها نزلت بالفعل على الترابيزة وما حاولش يصلح الغلطة أو يتأكد إحنا فعلًا طلبنا الحاجات دي ولا لأ، واكتفى أنه يعتذر لنا شفويًا، لكن الحساب هـ يدفع كده كده. ياريت إدارة المحل تكون حريصة أكثر من كده على إرضاء الزبائن، والأهم أن اللي بـ يأخذ الأوردر يركز ويجيب اللي تم طلبه بالضبط، الأسعار هنا مش قليلة وما تحتملش أخطاء في الحساب ممكن تكون سبب في إحراج الضيوف. وفي النهاية مبروك جناحي الأهلي والمنتخب على «مراسي» ويارب يكون فاتحة خير عليكم.

...

تيستي بيستي: مأكولات بحرية ومشويات في شارع جانبي في مدينة نصر
اصدرت في: 07/04/2014

من وقت للثاني بـ نحاول نتفادى الشوارع الرئيسية الكبيرة اللي مليانة محلات ومطاعم، وندخل في شوارع جانبية هادئة أثناء رحلات بحثنا عن الجديد اللي ممكن نكتب عنه، وبنسبة كبيرة بـ تبقى جولاتنا موفقة وبـ نقع في أماكن مميزة، وبـ تبقى الإضافة الحقيقية للتجربة أننا بـ نكون سبب في أن الناس تعرف الأماكن دي وتقرأ عنها، لأنها عادة بـ تبقى مغمورة ومتدارية وما حدش يعرفها غير سكان المنطقة. آخر جولاتنا كانت في شارع جانبي متفرع من شارع عباس العقاد في مدينة نصر، اسمه شارع أحمد قاسم جودة، قريب من توكيل بيجو اللي هناك، ولاقينا مطعم اسمه «تيستي بيستي – Tasty Besty» متخصص في السي فوود والمشويات، لكن كمان بـ يعمل بيتزا وساندويتشات ومعجنات وطواجن وكبسة وحاجات ثانية كثير، من الآخر هو أقرب لمطبخ متكامل، لأنه قائم بشكل كبير على الكاترنج والدليفري، علشان كده صالة الطعام كانت مش قد كده، صغيرة والترابيزات مرصوصة بشكل عشوائي، مافيش أي اهتمام بالديكور أو التصميم الداخلي، لكن أهم حاجة أن المكان كان نظيف، والخدمة ودودة من صاحب المحل شخصيًا اللي كان أخذ الأوردر بنفسه واهتم أنه يرشح لنا بعض الأطباق، وجاب الشيفات لحد ترابيزتنا واللي واحد منهم متخصص في الأسماك والثاني في المشويات، وكل منهم وعدنا أن الأكل هـ يعجبنا، وعلشان كده كان لازم نجرب من المنيوهين الموجودين في المكان. نصف الوجبة سي فوود والنصف الثاني ميكس جريل! الأوردر أخذ وقت مش قليل علشان يجهز، لولا الشوربة والسلاطات اللي نزلت في الأول كنا قومنا مشينا من الزهق، لكن المفاجأة كانت في المذاق الخرافي لكل طبق نزل أمامنا، من أول سلاطة الطحينة لحد طاجن الجمبري، الشيفات فعلًا أساتذة وكل واحد وفى بوعده تمامًا، وبقينا مش مصدقين أن مجرد صدفة في محل مغمور زي ده ممكن تسبب لنا السعادة دي في وجبة أقل ما يقال عنها أنها ممتازة، نتكلم عليها شوية بالتفصيل. شوربة سي فوود مخلية (25 جنيه) بالكريمة والزعتر والكمون والسمك الفيليه، كمية وفيرة تكفي شخصين، وإضافات فريش وملح مضبوط، سمكة بوري صغيرة معمولة سنجاري (17 جنيه) بالخلطة السويسي والصوص المتشبع بالتتبيلة علشان تحطه على أرز الصيادية، وطاجن جمبري من الحجم الوسط (50 جنيه) وبالتحديد ربع كيلو جمبري كبير بـ 40 جنيه و10 جنيه لتحضير الطاجن بالطماطم والبصل والفلفل، ولا أجدع مطعم سمك في إسكندرية، والكاليماري المقلي (الكيلو بـ 80 جنيه) كان زي الفرايز اللي تسلينا بها جنب الأكل، بجد برافو شيف الأسماك هنا! طبق ميكس جريل بـ 57 جنيه فيه 4 قطع كباب وكفتة وربع فرخة مشوية وأرز أبيض، الكمية صغيرة شوية بس إحنا كنا شبعنا جدًا من السي فوود، لكن طعم الكباب اللي يجنن خلانا نأكله من غير عيش مع الطحينة والسلاطة الخضراء، الكباب مستوي قوي وبـ يذوب في الفم علشان اللحمة نفسها فريش، والمشويات كلها مغطاة بدبس الرمان وحاجة معتبرة، لا بجد استمتعنا هنا بوجبة غير متوقعة بالمرة، وكان نفسنا يبقى منيو الحلويات شغال علشان نجرب أم علي ولا الأرز المعمر باللبن، لكن الحلويات وبعض الأطباق الثانية بـ تبقى شغالة أكثر في الكاترنج. مطعم «تيستي بيستي» بـ يعمل طلبات خاصة زي الديك الرومي والفراخ الروستو والحمام والمحاشي والفخدة الضاني، وبالمستوى اللي جربناه هنا، نقدر نقول اعتمد عليه وأنت مطمئن لو عندك عزومة أو وليمة، وما تترددش أنك تدخل المطعم تطلب أكلة سريعة حتى لو المكان شكله مش محمس قوي من الخارج، المهم الصنعة، ونتمنى أنهم يهتموا شوية بالشكل الظاهري للمكان علشان الحلو يكمل.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول